|
|
| (One intermediate revision by one other user not shown) |
| Line 1: |
Line 1: |
| {{Khyentse Metadata | | {{Text |
| |classification=Tibetan Publications | | |classification=Tibetan Publications |
| |subclass=Tibetan Texts | | |subclass=Tibetan Texts |
| Line 27: |
Line 27: |
| }} | | }} |
| {{Header}} | | {{Header}} |
| <h1 style="font-size: 24px !important;">Tibetan Text</h1>
| |
| <onlyinclude>
| |
| {{TibP|༄༅། །གསུང་མགུར་སྐོར་ཕྱོགས་བསྒྲིགས་བཞུགས་སོ། །
| |
| །དགྲ་འདུལ་གཉེན་སྐྱོང་དང་། འདི་ཆ་འདྲ་བའི་ཆགས་སྡང་རྟེན་བཞེངས་སོགས། དོན་མེད་ཀྱི་ལྟོ་ལྡིར་ཆེན་པོའི་ངང་། ཚེ་འདི་ཡི་ལྷག་མ་ནུབ་རིར་བསྐྱལ། དོན་དེ་ལ་བསམ་ཀྱང་སྐྱོ་བ་འཕེལ། སེམས་ཕན་པའི་ཚིག་གིས་སྨྲས་གྱུར་ཀྱང་། ཚིག་ངན་པས་རང་བཞིན་མཐོང་གྱུར་ནས། འཁོན་ངན་པ་བཟུང་བའི་བུ་དང་། སྐྱོང་དཀའ་བའི་འཁོར་གཡོག་གནས་ཚུལ་ལ། བསམ་བཞིན་སྐྱོ་བ་འཕེལ། རང་ལས་འབྲས་བརྩི་མེད་བཏང་བཞིན་དུ། མི་གཞན་ལ་དགེ་སྡིག་བླང་དོར་བཤད། གཡོ་སྒྱུ་ཡི་ཁུག་འགོ་ཆེན་པོ་ཅན། བདག་རང་ལ་བསམ་བཞིན་སྐྱོ་བ་འཕེལ། ད་མི་ཚེའི་ལྷག་མ་ཇི་ཙམ་གནས། ལས་དིན་མེད་ཀྱི་མགོ་བོ་མི་འཁོར་བར། ཆོས་ཟབ་མོ་བསྒྲུབ་ལ་བརྩོན་པ་ཡིས། ཚེ་མཐའ་རུ་འཁྱིལ་བར་བྱིན་གྱིས་རློབས། སྐྱབས་འདྲེན་མཆོག་རྒྱལ་པོ་ཁྱེད་རྣམས་མཁྱེན། ཅེས་པའང་ཆུ་རྟ་ཟླ་བ་བཅུ་པའི་ཚེས་བཞི་ལ་སེམས་སྐྱོ་བའི་གདུང་གླུ་བློ་གྲོས་རྒྱ་མཚོས་བྲིས་པའོ། །དགེའོ༎ །། ༈ ཨོཾ་སྭཱསྟི། །སྐྱབས་གནས་ཀུན་འདུས་བླ་མ་རྡོ་རྗེ་འཆང་། །བཀའ་དྲིན་མཉམ་མེད་ཆོས་ཀྱི་བློ་གྲོས་མཁྱེན། །བདག་བརྒྱུད་ཆོས་དང་འདྲེས་པར་བྱིན་གྱིས་རློབས། །གསལ་སྟོང་ཟུང་འཇུག་སྤྲོས་བྲལ་ལྟ་བ་སྟོང་། །ཡེངས་མེད་འཛིན་མེད་བསྒོམས་པ་ལམ་དུ་ཁྱེར། །སྡོམ་པ་གསུམ་གྱི་ཀུན་སྤྱོད་རྣམ་པར་དག། དབང་བཞིའི་འབྲས་བུ་ཚེ་འདིར་སྨིན་པར་ཤོག། མདོར་ན་སྐྱིད་སྡུག་ལེགས་ཉེན་ཅི་བྱུང་ཡང་། །རེ་ས་གཞན་ན་མེད་དོ་བླ་མ་མཁྱེན། །བྱང་ཆུབ་བར་དུ་འབྲལ་མེད་ཐུགས་རྗེའི་གཟུང་། ཞེས་པས་ཤཱཀྱའི་དགེ་སློང་འཇམ་དབྱངས་ཡོན་ཏན་རྒྱ་མཚོས་བསྐུལ་ངོར་མཁྱེན་སྤྲུལ་ཆོས་ཀྱི་བློ་གྲོས་པས་བྲིས་པའོ། །དགེ་ལེགས་འཕེལ།། །། ༈ སྐྱོ་གླུ་སྙིང་གི་གཟེར་ཆེན་ཞེས་བྱ་བ་བཞུགས་སོ། །རྗེ་དྲན་ཆོག་ངོ་བོ་རྡོ་རྗེ་འཆང་། །སྐྱབས་མཚུངས་མེད་བློ་གཏེར་དབང་པོ་དང་། །རྗེ་ཐམས་ཅད་མཁྱེན་གཟིགས་སི་ཏུ་པ། །དཔལ་བཀའ་དྲིན་མཉམ་མེད་པདྨའི་མཚན། །མགོན་འགྲོ་འདུལ་དཔའ་བོ་རྡོ་རྗེ་དང་། །ཆོས་ཤེས་བྱ་ཀུན་གཟིགས་གྲུབ་ཆེན་པ། །རྗེ་འཇམ་མགོན་ངག་དབང་ལེགས་པའི་ཞབས། །གཙུག་རྒྱན་གྱི་ཡོངས་འཛིན་རྣམ་པ་དྲུག། མི་བདག་གི་སྤྱི་བོའི་རྒྱན་དུ་བཞུགས། །དུས་ལེགས་ཉེས་སྐྱིད་སྡུག་ཅི་བྱུང་ཡང་། །རྗེ་བླ་མ་རྣམས་ལ་གསོལ་བ་འདེབས། །བུ་བདག་ལ་ཐུགས་རྗེས་བྱིན་གྱིས་རློབས། །དུས་སྙིགས་མའི་གྲལ་མཐར་སྐྱེས་པ་ཡི། །རྒྱུད་ཉོན་མོངས་དུག་ལྔས་རབ་ཏུ་གཟིར། །ཆོས་ཟབ་རྒྱས་ཀྱི་གདམས་པ་ཐོབ་གྱུར་ཀྱང་། །དཔེ་ཤོག་ཐོག་དང་ཚིག་སྐམ་ཁོ་ནར་ལུས། །དོན་སྙིང་ལ་ཟུགས་པ་འགའ་མ་མཆིས། །རང་རྒྱུད་གཤིས་ངན་པ་འདུལ་མ་ཐུབ། །སེམས་ཆོས་ཉིད་རྣམ་རྟོག་མུན་པས་སྒྲིབ། །བྱིང་རྒོད་ཀྱི་ཆོམ་རྐུམ་ངན་པས་བཅོམ། །བརྗེད་ངས་ཀྱིས་དྲན་པའི་སོ་མ་ཚུགས། །སྣང་སེམས་ཐ་མལ་རྒྱ་འབྱམས་ལུས། །དོན་རིག་སྟོང་དབྱིངས་སུ་གྲོལ་མ་ཐུབ། །དེ་བསམ་ཞིང་བསམ་ཞིང་སྐྱོ་བ་འཕེལ། །ཕྱི་ནམ་ཟླ་དུས་ཀྱི་སྟོད་སྨད་དང་། །ནང་སྐྱེ་འགྲོ་མི་ཡི་འགྱུར་བ་དང་། །སྒོས་རང་གི་མི་ཚེ་ཟད་ལུགས་ལ། །ཡང་ཡང་བསམ་ན་སྐྱོ་བ་འཕེལ། །གྲོགས་མི་རྟག་འདུས་པ་ཐམས་ཅད་འབྲལ། །དེ་ཕལ་ཆེར་ཕྱི་མའི་ལྟད་མོར་སོང་། །རྒྱུ་ནོར་རྫས་སྒྱུ་མའི་བསོག་པ་འདྲ། །ཕན་ཅུང་ཟད་མེད་ཀྱང་སྙིང་མེད་པོ། །མགོ་འཁོར་ནས་ནོར་ལ་གསོག་འཇོག་བྱེད། །དེའི་ཚུལ་ལ་བསམ་ཀྱང་སྐྱོ་བ་འཕེལ། །དམ་སྡོམ་པ་སྣ་གཅིག་མི་བསྲུང་བའི། །རང་གཞན་གྱི་ཨོ་ཟོག་ཚུལ་འཆོས་ཀྱི། །ཆོས་འཆད་ཉན་བྱེད་ཟེར་དམ་ཆོས་བཙོངས། །འཇིག་རྟེན་གྱི་དགྲ་འདུལ་གཉེན་སྐྱོང་དང་། །ཆ་འདྲ་བའི་ཆགས་སྡང་རྟེན་བཞེངས་སོགས། །དོན་མེད་ཀྱི་སྟོང་ལྡིར་ཆེན་པོའི་ངང་། །ཚེ་འདི་ཡི་ལྷག་མ་ནུབ་རིར་བསྐྱལ། །དོན་དེ་ལ་བསམ་ཀྱང་སྐྱོ་བ་འཕེལ། །སེམས་ཕན་པའི་ཚིག་གི་སྨྲས་གྱུར་ཀྱང་། །ཚིག་ངན་པའི་རང་བཞིན་མཐོང་གྱུར་ནས། །འཁོན་ངན་པར་བཟུང་བའི་སློབ་བུ་དང་། །བསྐྱངས་དཀའ་བའི་འཁོར་གཡོགས་གནས་ཚུལ་ལ། །བསམ་ཞིང་བསམ་ཞིང་སྐྱོ་བ་འཕེལ། །རང་ལས་འབྲས་བརྩི་མེད་བཏང་བཞིན་དུ། །མི་གཞན་ལ་དགེ་སྡིག་བླང་དོར་བཤད། །གཡོ་སྒྱུ་ཡི་ཁུག་མགོ་ཆེན་པོ་ཅན། །བདག་རང་ལ་བསམ་ཞིང་སྐྱོ་བ་འཕེལ། །ད་མི་ཚེའི་ལྷག་མ་ཇི་ཙམ་གནས། །ལས་དོན་མེད་མང་པོས་མགོ་མི་འཁོར། །ཆོས་ཟབ་མོ་སྒྲུབ་ལ་བརྩོན་པ་ཡིས། །ཚེ་མཐའ་རུ་འཁྱོལ་བར་བྱིན་གྱིས་རློབས། །སྐྱབས་དྲན་ཆོག་རྒྱལ་པོ་ཁྱེད་རྣམས་མཁྱེན། ཅེས་པའང་ཆུ་རྟ་ཟླ་༡༠ཚེས་༤ལ་སེམས་སྐྱོ་བའི་གདུང་གླུ་བློ་གྲོས་རྒྱ་མཚོས་བྲིས་པའོ།། །། ༈ དུས་ད་ནང་སྤྲིན་དཀར་འཁྲིགས་པ་ནས། །ཤེལ་དཀར་གྱི་རྡུལ་ཕྱེ་ཐང་མར་བརྡལ། །དཀར་ཕྱོགས་ཀྱི་ལྷ་རྣམས་དགྱེས་ཞལ་ངོམ། །ལྷ་བྱ་ཡི་གོང་མོའི་སྐད་སྙན་སྒྲོགས། །སངས་རྒྱས་ཀྱི་བསྟན་པ་དཀར་པོ་རུ། །འགྲོ་བ་ཡི་བརྡ་ཞིག་སྟོན་ནས་འདུག། གནས་དག་པ་ཤེལ་གྱི་རི་བོ་ལ། །སྒྲོལ་མ་ནི་དཀར་མོ་བཞུགས་ནས་ཡོད། །ཁོང་དགྱེས་ཞལ་འཛུམ་པའི་ཟེར་ཕྲེང་ལས། །འཆི་མེད་ཀྱི་བདུད་རྩི་སྐྱུགས་ཀྱིན་གདའ། །དེ་མྱོང་འདོད་ཡོད་ན་གྱེན་ལ་ལྟོས། །སྒྲོལ་མ་ཡི་ཐུགས་རྗེས་གཟིགས་ནས་འདུག། འཆི་མེད་ཀྱི་བདུད་རྩི་གནང་རན་འདུག། རི་དེ་ཡི་རྩེ་མོ་འཇའ་འོད་ལྔ། །འཁྲིགས་པ་ཡི་ཀློང་ན་པད་འབྱུང་ལ། །མཚོ་རྒྱལ་དང་མནྡཱ་ར་བས་བསྟེན། །བྱིན་རླབས་ཤིག་ཞུ་ན་དེ་ལ་གཟིགས། །གསོལ་བ་ཞིག་སྙིང་གི་དཀྱིལ་ནས་ཐོབ། །དངོས་གྲུབ་ཀྱི་སྦྲང་ཆར་འབེབས་རེ་རན། །བྱིན་རླབས་ཀྱི་ན་བུན་ཐིབས་སེ་ཐིབས། །མི་ང་འདྲ་སངས་རྒྱས་རློན་པར་བསྒྱུར། །དངོས་གྲུབ་ཀྱི་དགའ་སྟོན་ཆར་དུ་བསྙིལ། །དོན་གཉིས་ནི་ལྷུན་གྲུབ་བཀྲ་ཤིས་ཤོག། ། ༈ རང་ལ་གྲོས་གདབ་ཀྱི་མཚངས་འདོན་བཞུགས་སོ། །ཕ་སྐྱབས་གནས་ཀུན་འདུས་བླ་མ་རྗེ་མཁྱེན་ནོ། །བདག་དལ་འབྱོར་མི་ལུས་ཁྱད་འཕགས་ནི་ཐོབ་ཀྱང་། །ལས་ངན་པའི་དབང་གིས་འདིར་སྣང་གི་ཞེན་པས། །རྒྱུད་མ་རུངས་ཐ་མ་སྲ་མཁྲེགས་ཏུ་གྱུར་པས། །སེམས་དམུ་ཆུའི་གཅོང་ནད་དྲག་པོ་ཡིས་ཟིན་ཏོ། །དུས་དེང་སང་ཕ་གཅིག་མཚན་ལྡན་གྱི་བླ་མ། །སྐུ་དངོས་སུ་མཇལ་བའི་སྐལ་བ་ནི་དམན་ཞིང་། །གསུངས་གདམས་ངག་ཆོས་ཀྱི་ཕུང་པོ་རྣམས་མཐོང་ཡང་། །རང་རྒྱུད་དུ་མ་ལོན་ཁྱི་སྔོན་ལ་རྩྭ་བཞིན། །བུ་ཐར་པའི་བློ་མིག་གྱེན་དུ་རེ་གཏོད་ཀྱང་། །དགྲ་ཉོན་མོངས་ཆགས་སོགས་ཞགས་པས་ནི་ཐེབས་ཏེ། །མགོ་ཐུར་དུ་དུད་སྟེ་དམྱལ་བ་ཡི་གཏིང་རྡོ། །བྱས་འདི་ལ་འཁོན་དུ་བཟུང་རིན་ཞིག་གདའ་འོ། །སེམས་ཆོས་ཉིད་རིག་པའི་ཡེ་ཤེས་ཀྱི་ཁྱེའུ་ཆུང་། །རྗེ་མཚན་ལྡན་བླ་མས་ཕྱོགས་ཙམ་ཞིག་བསྟན་ཀྱང་། །དོན་གོམས་འགྲིས་མ་བྱས་གཤིས་སུ་ནི་མ་ཕེབས། །དཔེ་སྤྲིན་གསེབ་ཉི་ཞུར་ལྟ་བུ་འདིས་སྐྱོའོ། །བདུད་འཆི་བདག་གཤེད་པོའི་སྡང་མིག་གིས་གཟིར་ཏེ། །ལས་ཞགས་པ་ནག་པོས་རྐེ་ལ་ནི་བཏབ་ནས། །མཚོན་དགྲ་སྟྭས་སྲོག་རྩ་དམར་པོ་ནི་གཅོད་རན། །བདག་གོམ་གསུམ་སྤོས་ན་འཆི་བདག་དང་ཉེའོ། །ལུས་འབྱུང་བཞིའི་བེམ་རྒོག་ཤུལ་དུ་ནི་ལུས་ཏེ། །གྲོགས་སུ་མེད་གཅིག་པུར་འགྲོ་བ་ཡི་དུས་སུ། །སྐྱབས་མཚུངས་མེད་བླ་མ་ཐུགས་རྗེ་ཅན་རྣམས་ལས། །མགོན་དཔུང་གཉེན་གཞན་མེད་གསོལ་བ་ནི་འདེབས་སོ། །ལས་དགེ་སྡིག་གང་བྱས་ཕྱི་བཞིན་དུ་འབྲང་ཚེ། །དགེ་བྱས་བསགས་ཆུད་དུ་ཉུང་ངུ་ལས་མེད་ཅིང་། །སྡིག་མི་དགེ་རི་རབ་ལྷུན་པོ་ཙམ་བསགས་པ། །བསྐྱུར་བ་ཡི་ཐབས་ནི་ཅི་བྱས་ཀྱང་མ་རྙེད། །འབྲས་རྣམ་སྨིན་རྩུབ་མོ་རང་ཐོག་ཏུ་མྱོང་དུས། །དུས་སྐད་ཅིག་བཟོད་པའི་གོ་སྐབས་ནི་མེད་ཀྱང་། །རང་བྱས་ཀྱི་འབྲས་བུར་སྤྱོད་པ་ལས་འོས་མེད། །དུས་དེ་ཚེ་ཀྱེ་ཧུད་ཀྱེ་ཧུད་ཅེས་འབོད་ཚེ། །ཕྱིས་སོང་བའི་སེམས་འགྱོད་ཆེན་པོ་ཞིག་ཡོང་ངོ་། །རྒྱུ་དེས་ན་བློ་གྲོས་ལས་ངན་གྱི་ཁུར་པོ། །བཏེག་མ་རན་གོང་ནས་དམ་ཆོས་ལ་འབད་མཛོད། །བུ་རང་དབང་ཡོད་དུས་དལ་ཆུད་ནི་མ་གསོན། །རྒྱུད་བསམ་པ་དགེ་བར་ནན་ཏན་དུ་བསྐྱེད་མཛོད། །དེ་སྐད་རང་ལ་གདམས་པ་འདི། སྦྲུལ་ལོ་ཆོ་འཕྲུལ་ཟླ་བའི་ཚེས༢། དགའ་སྐྱོ་སྤེལ་མའི་ཉམས་ཤར་ཚེ། རང་ལ་གྲོས་སུ་བཏབ་བོ།། །། ༈ རང་གཞན་ལ་གྲོས་སུ་གདབ་པ་ཕན་བདེའི་འཁྲི་ཤིང་ཞེས་བྱ་བ་བཞུགས་སོ། །རྗེ་དུས་གསུམ་སངས་རྒྱས་འགྲོ་བའི་མགོན། །ཕ་མཚན་ལྡན་གྱི་བླ་མ་རིན་པོ་ཆེ། །བུས་གསོལ་བ་སྙིང་གི་དཀྱིལ་ནས་འདེབས། །དུས་རྟག་པར་འབྲལ་མེད་བྱིན་གྱིས་རློབས། །ང་དལ་འབྱོར་གྱི་མི་ལུས་རིན་པོ་ཆེ། །སྐྱོན་མེད་པ་སྔོན་འབྲས་བསོད་ནམས་ཀྱིས། །དུས་ད་རེས་ཐོབ་སྟེ་འདུག་ན་ཡང་། །དལ་འབྱོར་ལ་སྙིང་པོ་མ་ལོན་པས། །དེ་བསམ་གྱིན་སྙིང་ནས་སྐྱོ་བར་འདུག། རྗེ་མཚན་ལྡན་གྱི་བླ་མ་མང་དུ་བསྟེན། །གདམས་ངག་གི་ཟབ་དགུ་ཉན་ན་ཡང་། །རྣ་ལམ་དུ་ཆུ་སྒྲ་ཤོབ་ཤོབ་བཞིན། །དོན་ཉམས་སུ་མ་བླངས་སེམས་པ་སྐྱོ། །ད་མི་ཚེ་ཉི་མ་བརྒྱ་ཕྱེད་ཐལ། །མིག་ལ་སོགས་དབང་པོ་འགྲིབ་ཅིང་རྒུད། །སེམས་ད་ལྟ་བྱས་པ་ད་ལྟ་བརྗེད། །ལུས་འབྱུང་བ་རྒུད་པའི་སྡུག་གིས་ནོན། །ཆོས་བྱེད་པར་སེམས་ཀྱང་ནུས་པ་མེད། །སྔར་མ་ནུས་པ་ལ་འགྱོད་འདུག་ཀྱང་། །འགྱོད་པ་འདི་དྲན་དུས་ཕྱི་ནས་འདུག། ཁོ་གཤིན་རྗེའི་སྐྱེས་བུ་མདུན་དུ་ལྷག། མི་བཟོད་ཀྱི་མཆེ་བ་རྣོན་པོ་དེ། །དུས་ནམ་བཏབ་ངེས་པ་མི་འདུག་པས། །རྗེ་བླ་མ་མཆོག་གིས་བསྐྱབ་ཏུ་གསོལ། །ལས་དགེ་བ་བསགས་པ་སེན་རྡུལ་ཙམ། །མི་དགེ་བའི་བང་མཛོད་གང་ནས་འདུག། ལས་ཅི་བསགས་གྲིབ་མ་བཞིན་དུ་འབྲངས། །ངན་སོང་གི་སྡུག་བསྔལ་མྱོང་ངན་འདུག། དེ་བསམ་གྱིན་སྙིང་རྩ་དབང་མེད་འདར། །སེམས་འཇིགས་སྣང་སྐྱེ་ཡང་ཕྱི་ནས་ཐལ། །འཁོར་བ་འདི་མེ་ཡི་འོབས་དང་མཚུངས། །འདོད་ཡོན་ལ་ཆགས་འདི་སྤུ་གྲི་ལ། །སྦྲང་རྩི་འབྱར་བ་ལྕེས་ལྡག་བཞིན། །ཐར་པའི་སྲོག་རྩ་གཅོད་པར་འགྱུར། །ངན་སོང་གི་གནས་སུ་འཕེན་གྲབས་བྱེད། །དུས་ད་ལྟ་ཉིན་གཅིག་བཀྲེས་སྐོམ་དང་། །ལུས་མེ་སྟག་ཕོག་པའི་སྡུག་བསྔལ་ཙམ། །མ་བཟོད་དེ་སྐད་ངན་འདོན་བྱེད་ན། །དུས་རྒྱུན་རིང་བར་མེད་མནར་བ་ཡི། །ངན་འགྲོའི་སྡུག་བསྔལ་བཟོད་ཐབས་བྲལ། །དེ་ལེགས་པར་བསམས་ནས་ཆོས་ལ་འབུངས། །ཆོས་ཐོབ་ཐོབ་བལྟས་བལྟས་རྣམ་གྲངས་མང་། །སྦྱོར་དངོས་དང་རྗེས་གསུམ་ཚང་བ་ཡི། །ཉམས་སུ་བླངས་པ་ནི་གཅིག་ཀྱང་མེད། །ལྷ་བསྙེན་ཅིང་སྒྲུབ་པའི་བྱས་ལོ་ཡང་། །དོན་རྒྱུད་ལ་འབྱོར་བ་ཤིན་ཏུ་ཉུང་། །ཁ་ཤོག་ལྕེ་རླུང་གིས་བསྐྱོད་བཞིན་པར། །སེམས་གཡེང་བ་བརྒྱ་འབྱམས་ངང་དུ་ཐལ། །དེ་བསམ་གྱིན་སྙིང་ནས་སྐྱོ་བ་སྐྱེས། །ད་ཅི་ཙམ་སྡོད་པའི་ལོང་ཡོད་ན། །ཆོས་ཚུལ་བཞིན་སྒྲུབ་པའི་ནུས་པ་དང་། །ལས་ཅི་བྱས་གཞན་དོན་འགྱུར་བ་དང་། །རང་ལེགས་སུ་རེ་བའི་བདག་འཛིན་གྱི། །འགོང་པོ་འདི་རྩད་ནས་ཆོམ་པ་ཞིག། བླ་མ་དཀོན་མཆོག་གིས་བྱིན་གྱིས་རློབས། །མཁས་འདོད་ཀྱི་དཔེ་ཀློག་མང་པོ་དང་། །ལྟར་སྣང་གི་ཆོས་ལྟར་བཅོས་པ་ཡི། །འདུ་ཚོགས་དང་དབང་བསྐུར་ཆོས་བཤད་སོགས། །རང་མ་སྨིན་གཞན་རྒྱུད་གྲོལ་མི་ནུས། །དགོས་མེད་ཀྱི་བྱ་བ་བསྒྱུར་ལ་ཐོངས། །ད་སོས་དལ་འདུག་ལ་མ་ཎི་སྒྲོངས། །ཆོས་ཕྱག་རྫོགས་དབུ་གསུམ་ཟེར་བ་དེ། །ཟབ་དང་ཟབ་པར་ཡོད་ཚོད་ཀྱང་། །དེ་རང་ཉམས་ལོངས་པ་ཤིན་ཏུ་དཀའ། །ཁ་གདངས་དང་མིག་བགྲད་སེམས་གནས་དང་། །སྟོང་ཆ་དང་གསལ་ཆ་ཕྱོགས་རེར་ཞེན། །རྒྱུད་ཉོན་མོངས་ཁ་ནས་མ་བྲི་བ། །སྒོམ་འདིས་ཀྱང་གར་འཕེན་ངེས་མི་འདུག། རྗེ་མཚན་ལྡན་གྱི་བླ་མ་རིན་པོ་ཆེ། །སངས་རྒྱས་དངོས་སུ་མཐོང་བ་དང་། །ཅིར་སྣང་ཀུན་བླ་མར་ཤར་ཙམ་ན། །རྟོགས་པ་དེ་སྐྱེ་བ་ཡིན་ཚོད་འདུག། དེ་ང་དང་ང་འདྲར་མེད་པ་འདྲ། །བདག་འཛིན་དང་ཉོན་མོངས་ཇེ་འཕེལ་འདི། །རང་བློ་རང་ལ་མངོན་གྱུར་པས། །གནས་ལུགས་ཀྱི་རྟོགས་པ་ཕར་ལ་ཞོག། གོ་མྱོང་ཡང་རྣལ་མ་སྐྱེ་བ་དཀའ། །ཚུལ་དེ་འདྲའི་རིགས་ལ་རང་གཞན་ཀུན། །སྣང་བ་འདི་རྒྱ་ཡན་མ་བཏང་བར། །ལག་བྲང་ཐོག་ཞོགས་ལ་བསམ་མནོ་བཏང་། །དུས་ད་ནི་མི་རན་དགུ་རན་རེད། །འཆི་ཞེས་བྱའི་སྒྲ་ཆེན་དེ་ཉིད་ལ། །མི་སྐྲག་དང་མི་འགྱོད་པ་ཞིག་ཏུ། །ཕ་རྗེ་བཙུན་བླ་མས་བྱིན་གྱིས་རློབས། །ཐར་པའི་ལམ་སྣ་འདྲེན་དུ་གསོལ། །མ་རིག་གི་མུན་པ་བསལ་དུ་གསོལ། །ཡེ་ཤེས་ཀྱི་སྣང་བ་རྒྱས་པར་མཛོད། །སྐྱབས་གཅིག་ཆོག་འདྲེན་མཆོག་བླ་མ་མཁྱེན། །ཅེས་པའང་གནས་འགོ་དགོན་གྱི་གྲྭ་པདྨ་རིག་འཛིན་གྱིས་བསྐུལ་བ་དང་། རང་ལ་ཁྲེལ་བཟླས་ཤིང་སྐྱོ་བའི་ངག་གི་སྨྲེ་སྔགས་འདིས་ཀྱང་རང་གཞན་ལ་དྲན་བའི་གསོས་སུ་གྱུར་ཅིག། ཅེས་པའང་འབྲས་ལྗོངས་སྟག་རྩེ་ཕོ་བྲང་དུ་འཇམ་དབྱངས་ཆོས་ཀྱི་བློ་གྲོས་པས་བྲིས་པའོ།། །།དགེའོ།། །། ༈ རྡོ་རྗེའི་གླུ་སྤྲིན་དཀར་འཛུམ་པོའི་ལྷ་ཡི་དབྱངས་སྙན་ཞེས་བྱ་བ་བཞུགས་སོ། །ཨ་ཧོ་ཡེ། །ངོ་མཚར་འཇའ་དང་འོད་ཀྱི་གུར་ཁང་གི་དབུས་ན། །རྡོ་རྗེའི་སློབ་དཔོན་པདྨ་འབྱུང་གནས་དེ་མཁྱེན་ནོ། །ང་ཅག་འདིར་འདུས་སྐལ་ལྡན་རྣལ་འབྱོར་གྱི་ཕོ་མོར། །གསང་གསུམ་ཡེ་ཤེས་རྡོ་རྗེའི་བྱིན་ཆེན་དེ་ཕོབས་ཤིག། མ་ཚོག་ཌཱ་ཀི་བྱེ་བ་འབུམ་ཕྲག་གི་དབུས་ན། །འཆི་མེད་དབང་མོ་མནྡ་ར་བ་དེ་མཁྱེན་ནོ། །བརྟན་གཡོ་སྲིད་དང་ཞི་བའི་ཚེ་བཅུད་ཀུན་བསྡུས་ནས། །སྐྱེ་འཆི་གཞོམ་གཞིག་བྲལ་བའི་ཚེ་དབང་དེ་སྩོལ་ཅིག། གངས་ཅན་སྐྱེ་འགྲོ་ཡོངས་ལ་བཀའ་དྲིན་ནི་མཚུངས་མེད། །མ་གཅིག་དབྱིངས་ཕྱུག་ཡེ་ཤེས་མཚོ་རྒྱལ་དེ་མཁྱེན་ནོ། །རྩ་གསུམ་དཔའ་བོ་མཁའ་འགྲོའི་ཟབ་གསང་གི་མཛོད་ལ། །ཅི་དགར་སྤྱོད་དུ་ཡོད་པའི་དངོས་གྲུབ་དེ་སྩོལ་ཅིག། རྗེ་བཙུན་འཇམ་དཔལ་དཔའ་བོ་མི་གཟུགས་སུ་བསྒྱུར་བ། །མངའ་བདག་ཚངས་པ་ལྷ་ཡི་མེ་ཏོག་ཁྱེད་མཁྱེན་ནོ། །མ་རིག་གཉིས་འཛིན་འཁྲུལ་པའི་མུན་པ་འདི་བསལ་ནས། །མཁྱེན་རབ་ཡེ་ཤེས་གློག་གི་སྒྲོན་མེ་ནི་སྦར་མཛོད། །མདོ་སྔགས་གསུང་རབ་རྒྱ་མཚོ་འཕགས་ཡུལ་ནས་བསྒྱུར་མཛད། །ལོ་ཙཱ་ཆེན་པོ་བེ་རོ་ཙ་ན་དེ་མཁྱེན་ནོ། །རིག་རྩལ་དགོངས་པའི་རྩལ་ཆེན་ཤུགས་དྲག་ཏུ་བསྐྱེད་དེ། །ང་ཅག་རྗེ་དང་དགོངས་པ་མཉམ་པ་རུ་བསྒྱུར་ཐོང་། །མཆོག་ཐུན་གྲུབ་བརྙེས་རྗེ་འབངས་ལོ་པཎ་རྣམས་མཁྱེན་ནོ། །ཟླ་མེད་མཁས་དང་གྲུབ་པའི་རྟགས་མཚན་དེ་བསྟན་ནས། །གངས་ཅན་བསྟན་འགྲོར་ཕན་བདེའི་དགེ་ལེགས་ཀྱི་སྒོ་འཕར། །ཡང་ཡང་འབྱེད་པའི་བཀྲ་ཤིས་སྣང་བ་དེ་སྩོལ་ཅིག། ལྔ་བརྒྱའི་གཙུག་རྒྱན་པཎ་ཆེན་བི་མ་དེ་མཁྱེན་ནོ། །ལྗོངས་འདིར་གསང་བ་གསུམ་གྱི་བྱིན་ཆེན་ཞིག་ཕབ་ནས། །ཐེག་མཆོག་འོད་གསལ་ཉི་ཟླའི་སྣང་བ་ནི་ཆེན་པོ། །འཕོ་བྲལ་འཕོ་བ་ཆེན་པོའི་མཆོག་དངོས་དེ་སྩོལ་མཛོད། །ངེས་གསང་རྡོ་རྗེ་རྩེ་མོའི་ཤིང་རྟ་པ་ཆེན་པོ། །ཀུན་མཁྱེན་བླ་མ་ཀློང་ཆེན་རབ་འབྱམས་དེ་མཁྱེན་ནོ། །ཤེས་བྱ་ཀུན་ལ་ཆགས་ཐོགས་མེད་པ་ཡི་སྤོབས་པ། །བློ་གྲོས་གཏེར་བརྒྱད་གྲོལ་བའི་དགའ་སྟོན་དེ་སྩོལ་ཤིག། སྙིགས་མ་ལྔ་བདོའི་རྒུད་པའི་གདུང་བ་ལས་སྐྱོབ་མཛད། །ཧེ་རུ་ཀ་དཔལ་ནམ་མཁའ་འཇིགས་མེད་དེ་མཁྱེན་ནོ། །གཟུང་འཛིན་འཁྲུལ་རྟོག་སྐྱེ་མེད་ཆོས་དབྱིངས་སུ་བསྒྲལ་ནས། །ཕྱི་ནང་སྦས་ཡུལ་རིན་ཆེན་སྒོ་མོ་ནི་འབྱེད་མཛོད། །དེ་ཉིད་སླར་ཡང་བཀའ་བབས་བདུན་ལྡན་གྱི་ཤིང་རྟ། །མཁྱེན་བརྩེའི་དབང་པོ་ཆོས་ཀྱི་བཤེས་གཉེན་དེ་མཁྱེན་ནོ། །རིས་མེད་རྒྱལ་བསྟན་ཐམས་ཅད་དར་རྒྱས་སུ་མཛད་པ། །སྐྱབས་གཅིག་ཁྱེད་དང་འདྲ་བར་བྱིན་གྱིས་རང་རློབས་ཤིག། ང་ཡི་བླ་མ་དྲན་ཆོག་རྒྱལ་པོ་རྣམས་མཁྱེན་ནོ། །ཉམ་ཐག་འགྲོ་བ་ཀུན་ལ་བུ་གཅིག་ལྟར་བརྩེ་བས། །ལས་ཉོན་སྡུག་བསྔལ་མཚོ་ལས་ད་ལྟ་རང་དྲངས་མཛོད། །ཨ་ཧོ་ཡེ། བྲག་དཀར་བཀྲ་ཤིས་ལྡིང་གི་ས་འཛིན་གྱི་ལྟེ་བར། །འཇིག་རྟེན་དབང་ཕྱུག་ཀརྨ་པའི་སྤྲུལ་སྐུ་ཆེན་པོ། །ཆོས་རྒྱལ་ཡབ་ཡུམ་སྲས་ལྕམ་འདུས་ཚོགས་དང་ལྷན་ཅིག། རྩ་གསུམ་དགྱེས་པའི་རྟེན་མཁར་ཆེན་པོ་ནི་འཛུག་སྟེ། །འཕགས་བོད་ལྗོངས་སུ་བདེ་སྐྱིད་རྫོགས་ལྡན་གྱི་དགེ་མཚན། །འཕེལ་བའི་རྟེན་འབྲེལ་བཟང་པོ་ལྷུན་གྲུབ་ཏུ་བྱུང་ཞིང་། །རྟག་བརྟན་འགྱུར་མེད་གཡུང་དྲུང་གཡས་འཁྱིལ་ལ་ལོངས་སྤྱོད། །རྒྱལ་བསྟན་དར་ཞིང་རྒྱས་བའི་ལྟས་བཟང་ཞིག་འཆར་སོང་། །བཀྲ་ཤིས་མེ་ཏོག་སྣ་ཚོགས་མཁའ་དབྱིངས་སུ་བྲེས་ནས། །བཀྲ་ཤིས་བླ་མ་ཡི་དམ་མཁའ་འགྲོ་ཡི་འཛུམ་ཞལ། །བཀྲ་ཤིས་འདིར་ཚོགས་རྣམས་ལ་ཡང་ཡང་དུ་བསྟན་ནས། །བཀྲ་ཤིས་པད་དཀར་བཞད་པའི་བཀྲ་ཤིས་དེ་ཤོག་ཅིག། །ཅེས་པ་འདི་སྦས་ཡུལ་འབྲས་ལྗོངས་གནས་ཀྱི་སྙིང་པོ་བྲག་དཀར་བཀྲ་ཤིས་སྡེང་དུ་ཆོས་རྒྱལ་ཆེན་པོ་ཐབས་ཤེས་དང་ལྷན་ཅིག་གནས་ཆེན་བྱིན་འབེབ་སྐབས་སུ། རང་སློབ་མཆོད་དཔོན་དགེ་སློབ་མཆོག་ལྡན་ནས་བསྐུལ་བས་མཚམས་སྦྱར་ཏེ་པདྨ་ཡེ་ཤེས་རྡོ་རྗེས་གང་ཤར་ཐོབ་བྱུང་དུ་བྲིས་པའོ། །འདི་འབྲི་སྐབས་རྟེན་འབྲེལ་རབ་ཏུ་གྱུར་བ་བྱུང་ཞིང་། །དེའང་ལྷ་བཙུན་ཆེན་པོ་བྲི་སྐབས་དངུལ་ལས་བཟོས་པའི་བཀྲ་ཤིས་རྟགས་བརྒྱད། བྷོ་དྷི་ཙེའི་ཕྲེང་བ། མཁྱེན་བརྩེ་རིན་པོ་ཆེའི་སྒབས་མཎྜལ་རྫས་བརྒྱད་རི་མོ་ཡོད་པ་ལྕགས་རི་དང་བཅས། འབྲས་དཀར་སྡེར་མ་གང་། ཡང་གཙང་པ་རྒྱ་རས་ཀྱི་སྐུ་བཅས་འབྱོར། དེ་རྣམས་དད་ལྡན་ལི་ཐང་དག་མ་ནས་ཕུལ་བའོ།། །། ༈ གླུ་ཟབ་དོན་གླིང་བུ་ཞེས་བྱ་བ། ཨ་ཧོ། འོག་མིན་དཔལ་གྱི་བསམ་ཡས་འཆིམས་ཕུ་ཡི་ཡང་རྩེ། །རང་བྱུང་ཤེལ་གྱི་ཕ་ཝཾ་དཀར་པོ་ཡི་གུར་ཁང་། །མ་བཅོས་ལྷུན་གྲུབ་གཞལ་མེད་ཁང་ཆེན་འདི་དགའ་འོ། །དགུང་སྔོན་དག་པ་དབྱིངས་ཆེན་ཕྱོགས་ལྷུང་དང་བྲལ་བར། །འོད་གསལ་ཉི་ཟླའི་དཀྱིལ་འཁོར་བཀྲག་མདངས་ནི་འཚེར་བས། །རིག་པ་ཚད་ལ་ཕེབས་པའི་ངོ་མཚར་གྱི་ལྟད་མོ། །མངོན་སུམ་ཆོས་ཉིད་སྤྱན་གྱིས་སྣང་བ་འདི་ཨ་ཧོ། །རྣལ་འབྱོར་ང་ཡི་སྣང་བ་གཏད་མེད་དུ་ཟང་ཐལ། །ཤེས་རབ་རང་བྱུང་སྒྲོན་མའི་རིག་པ་ཡི་རང་གདངས། །ཕྱི་རོལ་དབྱིངས་ཀྱི་མཁའ་ལ་རྒྱ་འབྱམས་སུ་ཀླས་པས། །སྐུ་གསུམ་ལྷུན་གྱིས་གྲུབ་པའི་གནས་ལུགས་ལ་ཡིད་ཆེས། །སངས་རྒྱས་གཞན་ནས་མ་བཙལ་རང་ཆས་སུ་རྫོགས་འདུག། ཀུན་བརྟགས་བློ་ཡིས་སྤྲོས་པའི་བསྐྱེད་རྫོགས་ཀྱི་ཨ་འཐས། །ཡིད་དཔྱོད་མཚན་འཛིན་རྟོག་པ་ཐེ་ཚོམ་གྱི་དྲྭ་བའི། །སྦུབས་སུ་འཐུམས་པའི་དཀའ་ཚེགས་ངལ་བ་འདིས་ཅི་བྱ། །མ་བཅོས་གདོད་ནས་དག་པའི་རིག་གདངས་ཀྱི་དཀྱིལ་འཁོར། །ཇི་ལྟར་སྣང་བ་འདི་དག་ཇི་བཞིན་དུ་བཀོད་པ། །སངས་རྒྱས་འཕགས་པ་ང་ཡི་དཔང་བོ་རུ་བྱོན་དང་། །ཐེ་ཚོམ་བྲལ་བའི་ངེས་ཤེས་ནང་ནས་རང་རྙེད་དོ། །རྩ་རླུང་བྱེད་རྩོལ་མཚན་མའི་འདུ་བྱེད་ཀྱི་ཐགས་པས། །དམ་དུ་བཅིད་ལས་རྟོག་མེད་བག་ཙམ་ཞིག་འཆར་རུང་། །ཀུན་གཞིའི་ཆ་དང་འདྲེས་པས་རང་བྱུང་གི་ཡེ་ཤེས། །སྒྲིབ་བྱེད་ཙམ་ལས་གནས་ལུགས་དངོས་མ་ནི་མ་ལགས། །ཐེག་བརྒྱད་བློས་བྱས་གྲུབ་མཐའི་གཟུགས་བརྙན་གྱི་རི་མོ། །བརྫུན་པ་ཆུ་ཟླ་དང་མཚུངས་གནས་ལུགས་ལ་ཐག་རིང་། །ང་ཅག་རིག་འཛིན་དགའ་རབ་དཔའ་བོ་ཡི་བརྒྱུད་འཛིན། །རྣམ་པར་རྟོག་པའི་གཟེབ་ཀྱི་འཆིང་བ་ལས་རང་གྲོལ། །རང་བྱུང་རང་ཤར་རང་གནས་ཀུན་བཟང་གི་རོལ་པ། །གདོད་མ་གཞི་ཡི་གནས་ལུགས་མངོན་སུམ་འདི་ཨ་ཧོ། །བསྒོམ་བྱ་སྒོམ་བྱེད་བྲལ་བའི་འོད་གསལ་གྱི་གཤིས་ལ། །རང་བབ་རྒྱ་འབྱམས་ལྷུན་གྲུབ་ཚོམ་བུ་ཡི་བཀྲག་མདངས། །མ་བྲིས་མ་བྱས་རང་ཤར་སྣང་བ་འདི་ཨ་ཧོ། །གཟུང་འཛིན་འཁྲུལ་རྟོག་ཆོས་ཉིད་དབྱིངས་ཆེན་དུ་ཟད་དེ། །ལོ་དང་ཟླ་བའི་སྡུག་སྒུར་ཆེན་པོ་ནི་མི་དགོས། །སྐྱིད་ཉལ་ངང་དུ་ལས་རླུང་ཟད་པ་ལ་ཕྱོགས་པ། །འོད་གསལ་སྙིང་ཐིག་རིག་འཛིན་བརྒྱུད་པ་ལ་བྱིན་མཐུ། །སྙིང་དབུས་འཕོས་པའི་རྟགས་ཚད་སྣང་བ་འདི་ཨ་ཧོ། །ཅེས་པའང་མེ་སྤྲེལ་ནག་ཟླའི་ཚེས་ཉེར་དགུ་ལ་བསམ་ཡས་འཆིམས་ཕུའི་བློན་ཆེན་གུར་དཀར་ཕུག་ཏུ་ཉམས་སྐྱིད་པས་རྐྱེན་བྱས་ཏེ། རང་ལ་འདི་འདྲའི་རྟོགས་ཚད་མི་ལྡན་ཡང་མ་འོངས་འབྱུང་འགྱུར་གྱི་རྟེན་འབྱུང་ཙམ་དུ་ཐོལ་བྱུང་གླུ་རུ་བླངས་པའོ།། །། ༈ ཀུན་མཁྱེན་ཆོས་ཀྱི་རྒྱལ་པོ་རྗེས་དྲན་གྱི་གླུ་ཀ་ལ་པིངྐའི་དབྱངས་སྙན་ཞེས་བྱ་བ། །ཕ་བླ་མའི་ཞབས་ལ་ཕྱག་འཚལ་ལོ། །གནས་རང་སྣང་ལྔ་ལྡན་འཇའ་ཟེར་གྱི་ཀློང་ན། །རྗེ་ཀུན་མཁྱེན་ངག་གི་དབང་པོ་དེ་བཞུགས་ཡོད། །སྐུ་མཚན་དཔེའི་གཟི་བྱིན་ལྷམ་མེ་རུ་གསལ་ལ། །གསུང་ཚངས་དབྱངས་ཆོས་སྒྲ་འགགས་མེད་དུ་སྒྲོགས་ཤིང་། །ཐུགས་མཁའ་ཁྱབ་འོད་གསལ་རྡོ་རྗེ་ཡི་ཀློང་ན། །དུས་རྟག་ཏུ་མཉམ་པར་མ་བཞག་པ་མི་མངའ། །རྗེ་དུས་གསུམ་སངས་རྒྱས་སྲས་བཅས་ཀྱི་རང་གཟུགས། །མགོན་ཀུན་མཁྱེན་ཆོས་རྗེ་སྙིང་དབུས་ནས་དྲན་བྱུང་། །ཤར་རི་རྒྱལ་སྤང་བྲག་རྫ་རི་ཡི་རྩེ་མོ། །དགུང་སྔོན་པོར་སྙེགས་འདྲའི་སྔོ་བསང་གི་མཁའ་ལ། །སྤྲིན་དཀར་པོ་ལང་ལོང་གར་སྟབས་སུ་སྒྱུར་ཚེ། །རྗེ་ཀུན་མཁྱེན་རྡོ་རྗེ་གཟི་བརྗིད་དེ་དྲན་བྱུང་། །དུས་ནམ་དྲན་སྙིང་ལ་མོས་གུས་ཀྱི་གཟེར་ཆེན། །ཡིད་བཟོད་མེད་གདུང་བས་ཤུགས་རིང་ཞིག་འདོན་ཚེ། །ལུས་བ་སྤུ་གཡོ་བའི་དད་མོས་ཀྱི་སྣང་བ། །མིག་མཆི་མ་འཁྲུགས་བཞིན་གསོལ་འདེབས་ལ་འབད་ཚེ། །ཕ་ཀུན་མཁྱེན་གདོད་མའི་མགོན་པོ་ཡི་དགྱེས་ཞལ། །མི་བདག་གི་མིག་སྔར་མངོན་སུམ་དུ་སྟོན་ཅིག། སྐུ་བེམ་པོ་མ་ཡིན་ཡེ་ཤེས་ཀྱི་ལུས་ཅན། །འོད་སེར་པོ་བྱེ་བ་ཕྲག་བརྒྱ་ནི་འབར་ཞིང་། །གསུང་ཟབ་རྒྱས་གདམས་པའི་སིལ་སྙན་གྱི་ང་རོས། །བདག་མི་ཤེས་གཉིད་ལས་ད་ལྟ་རང་བཀྲོག་མཛོད། །ཐུགས་ལྔ་ལྡན་ལྷུན་གྲུབ་འོད་གསལ་གྱི་གོང་བུ། །དུས་ད་ལྟ་བདག་གི་སྙིང་དབུས་སུ་བསྟིམ་མཛོད། །གཞི་རིག་སྟོང་དབྱེར་མེད་སྐུ་གསུམ་གྱི་བླ་མ། །དོན་མ་བཅོས་མ་བསྒྲུབ་རང་ཞལ་ནི་མཇལ་ཏེ། །ཅིར་སྣང་བ་ཡེ་ཤེས་འཁོར་ལོ་ཡི་རྒྱན་དུ། །རང་ཤར་ནས་འཛིན་མེད་རང་གྲོལ་གྱི་སྤྱོད་པས། །བོགས་འདོན་ཏེ་ཆོས་ཅན་སྤྲོས་པ་ཡི་དྲྭ་བ། །གཞི་ཀ་དག་ཆོས་ཟད་ཆེན་པོ་རུ་ཐིམ་ནས། །དབྱིངས་ཕྱིར་གསལ་སྐུ་དང་ཞིང་ཁམས་ཀྱི་བཀོད་པ། །མ་འགྲོ་དྲུག་འཁོར་བ་དོང་སྤྲུགས་སུ་གྱུར་ཅིག། ཚིག་དེ་སྐད་མགྲིན་པའི་དབྱངས་སྙན་དུ་འཁྲོལ་ན། །རྗེ་ཀུན་མཁྱེན་བླ་མས་བྱིན་གྱིས་རང་རློབས་ཤིགབུ་བློ་གྲོས་བླུན་རྒན་ལས་ངན་གྱི་གདུང་བས། །ཡིད་རྩེ་གཅིག་གུས་པས་གསོལ་བ་རང་འདེབས་སོ། །ཤིང་ཁྱི་ཟླ་བརྒྱད་ཚེས་ཉེར་དགུ་ལའོ།། །། ༈ ཉམས་མཚར་དུ་བརྗོད་པ་ཁུ་བྱུག་མགྲིན་གླུ་ཞེས་བྱ་བ། ཨ་ཧོ་ཡེ། ངོ་མཚར་ཕུན་ཚོགས་དག་པ་རབ་འབྱམས་ཀྱི་ཞིང་ཁམས། །རྩ་གསུམ་རྒྱལ་བ་རྒྱ་མཚོ་སྐར་ཚོགས་ལྟར་བཀྲ་ཞིང་། །ཕུལ་བྱུང་ཐུགས་རྗེའི་ཟླ་བ་བསིལ་ཟེར་དང་ལྡན་པ། །མཁྱེན་བརྩེའི་འོད་ཟེར་སྟོང་འབར་བདུད་རྩི་ཡི་ཟིལ་ལྡན། །ང་ཅག་རྣལ་འབྱོར་དམ་ལྡན་རིམ་གཉིས་ཀྱི་ལམ་ལ། །བརྩོན་པས་དད་མོས་བློ་ཡི་ཀུ་མུད་ནི་ཁ་འབྱེད། །རིག་སྟོང་འོད་གསལ་རྫོགས་པ་ཆེན་པོ་ཡི་ཟེ་འབྲུ། །རང་བྱུང་བཞད་བའི་ངོ་མཚར་ལྟད་མོ་འདི་ཨ་ཧོ། ཨ་ཧོ་ཡེ། ཕ་གཅིག་དྲིན་ཆེན་བླ་མ་མཚོ་སྐྱེས་ཀྱི་རྡོ་རྗེ། །མ་གཅིག་ཡེ་ཤེས་མཁའ་འགྲོ་འབུམ་ཕྲག་གི་གཙོ་མོ། །མནྡཱ་ར་དང་ཡེ་ཤེས་མཚོ་རྒྱལ་དེ་མཁྱེན་ནོ། །ང་ཅག་སྒོ་གསུམ་ཐ་མལ་འཁྲུལ་རྟོག་གི་ཁང་བུ། །ཁྱེད་ཀྱི་ཡེ་ཤེས་མེ་ཡིས་ལྷག་མེད་དུ་བསྲེགས་ནས། །གདན་གསུམ་ཚང་བར་གདོད་ནས་ལྷུན་གྲུབ་ཀྱི་ཕུང་པོ། །ཡེ་ཤེས་མཁའ་འགྲོའི་གྲོང་ཁྱེར་ཆེན་པོ་རུ་བསྒྱུར་ཐོངས། །རྩ་རླུང་ཐིག་ལེའི་འདུ་བ་རང་དབང་དུ་བསྒྱུར་ནས། །གནས་ཡུལ་ཕྱི་རུ་མི་བགྲོད་ནང་བསྐོར་ཞིག་རྒྱབ་སྟེ། །དཔའ་བོ་མཁའ་འགྲོའི་ཚོགས་དང་དགྱེས་དགུ་རུ་རོལ་ལོ། །རྨད་བྱུང་ཕྱི་ནང་གསང་བའི་ཚོགས་འཁོར་གྱི་སྤྲིན་ཕུང་། །ཏིང་འཛིན་ཆོ་འཕྲུལ་ཆེན་པོས་སྐད་ཅིག་ལ་རྫོགས་ཏེ། །རྩ་ཡི་མདུད་གྲོལ་རླུང་རྣམས་དབུ་མ་རུ་དེངས་ནས། །ཐིག་ལེ་རང་དག་ལམ་ལྔ་ས་བཅུ་རྣམས་བགྲོད་དེ། །ཡེ་ཤེས་བླ་མའི་ས་མཆོག་ཐོབ་པ་ལ་སྨོན་ནོ། །ཨ་ཧོ་ཡེ། དྲན་བས་སྙིང་གི་མུན་སེལ་དྲི་མེད་ཀྱི་འོད་ཟེར། །རང་བྱུང་རྡོ་རྗེ་འཇིགས་མེད་གླིང་པ་དེ་མཁྱེན་ནོ། །རྟག་ཏུ་བདག་གི་ཚངས་གནས་འཁོར་ལོ་རུ་བཞུགས་ནས། །ཡེ་ཤེས་འཕོ་བ་ཆེན་པོའི་དབང་བསྐུར་དེ་སྩོལ་ཅིག། ཀུན་མཁྱེན་རྫོགས་པའི་སངས་རྒྱས་ཡབ་སྲས་ཀྱི་གསུང་གི །བདུད་རྩིས་རིང་ནས་འཚོ་བའི་སྐལ་བཟང་ང་སྐྱིད་དོ། །ལེགས་གསུང་རྒྱལ་བའི་བཀའ་དང་རྣམ་དབྱེར་ནི་མེད་པའི། །མཛོད་ཆེན་བདུན་དང་ཡོན་ཏན་རིན་པོ་ཆེའི་མཛོད་ཀྱི། །ཚིག་དོན་སྦྲང་རྩི་རྒྱུན་དུ་ཡང་ནས་ཡང་མྱང་བས། །ཟབ་རྒྱས་གནས་ལ་སྤོབས་པའི་གཏེར་ཆེན་དེ་རྡོལ་ལ། །ཐེ་ཚོམ་མེད་པའི་ངེས་ཤེས་བརྟན་པོ་རང་འཁྲུངས་བྱུང་། །བློས་བྱས་མ་ཡིན་ཀ་དག་གདོད་མ་ཡི་གནས་ལུགས། །བླ་མའི་དྲིན་གྱིས་མངོན་སུམ་རང་ཐོག་ཏུ་ཕེབས་ནས། །ལྷུན་གྲུབ་ཐོད་རྒལ་གསེང་ལམ་ཟབ་མོ་ཡི་གནད་ཀྱིས། །ཆོས་ཅན་སྣང་བ་ཆོས་ཉིད་ཀློང་དུ་ནི་ཟད་དེ། །འཇའ་ལུས་རྡོ་རྗེའི་སྐུ་མཆོག་འགྲུབ་པ་རུ་ཤོག་ཅིག། ཅེས་པའང་རང་སློབ་གཡོན་རུ་གཏེར་སྲས་འཇམ་དབྱངས་བསོད་ནམས་ཀྱིས་མགུར་སྙན་བ་ཞིག་བྲི་དགོས་གསུངས་ཀྱང་སྙན་ཚིག་གཤིས་ལ་མི་གནས་པས་མ་བྱུང་ཡང་། གང་ཤར་ཡུད་ཙམ་ལ་བློ་གྲོས་རྒྱ་མཚོས་བྲིས་ཏེ་ཕུལ། དགེའོ།། །། ༈ ངེས་དོན་སྙིང་པོའི་གླུ་བྱང་ཆུབ་བདེ་ལམ་ཞེས་བྱ་བ། ཕ་མཚན་ལྡན་གྱི་བླ་མ་རྡོ་རྗེ་འཆང་། །ཡིད་དད་བརྒྱའི་གདུང་བས་གསོལ་བ་འདེབས། །རྗེ་ཁྱེད་ཀྱི་ཐུགས་རྗེ་མཐུ་ནུས་ཀྱིས། །དོན་ངེས་གསང་རྟོགས་པར་བྱིན་གྱིས་རློབས། ཆོས་སྣང་བ་འདི་དག་རང་གི་སེམས། །མདངས་རྨི་ལམ་འཁྲུལ་སྣང་ཇི་བཞིན་དུ། །གཞི་རྩ་བ་མེད་ཅིང་སྟོང་པའི་གཟུགས། །དེ་སྣང་བའི་དུས་ན་རང་བཞིན་སྟོང་། །སྟོང་བཞིན་དུ་སྣང་བ་མ་འགགས་ཤིང་། །ཀུན་རྫོབ་ཏུ་རྒྱུ་འབྲས་བསླུ་བ་མེད། །དོན་དམ་དུ་སྐྱེ་འགགས་གནས་བྲལ་བའི། །སྟོང་རྟེན་འབྱུང་དབྱེར་མེད་རོ་གཅིག་འདི། །གཞི་མཐའ་བྲལ་དབུ་མ་ཆེན་པོ་ཟེར། །དེ་ཕྱི་ན་མེད་དེ་རང་གི་སེམས། །རང་སེམས་ཀྱི་ཆོས་ཉིད་གཉུག་མ་འདི། །བཞི་ཆ་གསུམ་བྲལ་གྱི་ཡེ་ཤེས་ལ། །གཉིས་འཛིན་གྱི་རྟོག་པས་མ་བསླད་པར། །གཞི་མ་བཅོས་སོ་མ་རང་བབ་ཏུ། །ངང་གནས་ཀྱི་དྲན་པས་ཡེངས་འཛིན་བྲལ། །སྒོམ་འོད་གསལ་གྱི་བློ་ཡིས་མ་བཅིང་ཞིང་། །རེ་དོགས་ལས་འདས་པའི་ངང་དེ་རུ། །བྱ་བྱེད་ཀྱི་རྩོལ་བ་བྲལ་བ་ལ། །ལམ་སྒོམ་པ་ཕྱག་རྒྱ་ཆེན་པོ་ཡིན། །གཞི་ཀ་ནས་དག་པའི་ཡེ་ཤེས་དེ། །རྒྱ་ཆད་ཕྱོགས་ལྷུང་བྲལ་བ་ཡི། །ཆོས་ཀྱི་དབྱིངས་སྟོང་པ་ཆེན་པོ་ཡི། །སྐུ་གསུམ་ལྷུན་གྲུབ་མ་བཙལ་རྫོགས། །དེ་སྒོ་ཡུལ་རླུང་རིག་གནད་བསྣུན་པས། །ལམ་སྣང་གི་སྒྲོན་མ་ཆེས་ཆེར་འབར། །མངོན་སུམ་གྱི་སྣང་བ་ནས་བརྩམ་སྟེ། །མཐར་ཆོས་ཟད་བློ་འདས་དགོངས་པ་རྙེས། །ཕྱི་ནང་གི་འབྱུང་བའི་ཟག་པ་ཟད། །རིག་པ་འོད་ཀྱི་སྐུ་རུ་སྨིན། །གཞན་དོན་གྱི་མཛད་པ་རྒྱུན་མི་ཆད། །དེ་འབྲས་བུ་རྫོགས་པ་ཆེན་པོ་ལགས། །ཚུལ་དེ་སྐད་གླུ་རུ་གདམས་པ་འདིས། །ཁམས་གསུམ་གྱི་སེམས་ཅན་མ་ལུས་པས། །ཆེན་པོ་གསུམ་དབྱེར་མེད་རྟོགས་པ་དང་། །འཁོར་བ་དོང་ནས་སྤྲུགས་གྱུར་ཅིག། །ཅེས་པའང་རང་སློབ་དགེ་སློང་རིན་ཆེན་གྱིས་ལྷ་རྫས་དང་རིན་གཉིས་རྟེན་དང་བཅས་བསྐུལ་ངོར་ཆོས་ཀྱི་བློ་གྲོས་པས་འབྲས་ལྗོངས་སྒང་ཐོག་གཙུག་ལག་ཁང་གི་བ་གམ་ནས་བྲིས་པ་དགེའོ།། །། ༈ གླུ་ཡེ་ཤེས་བྱིན་འབེབས་ཅེས་བྱ་བ། ཨ་ཧོ་ཡེ། མི་འགྱུར་བདེ་བ་ཆེན་པོའི་ཡེ་ཤེས་ཀྱི་ཕོ་བྲང་། །ངེས་པ་ལྔ་ལྡན་སངས་རྒྱས་པདྨ་ཡི་རྒྱལ་པོ། །གང་འདུལ་ངོ་མཚར་སྒྱུ་མའི་བཀོད་པ་ནི་གྲངས་མེད། །སྐྱབས་གཅིག་ཨོ་རྒྱན་གཏེར་བདག་གླིང་པ་དང་དབྱེར་མེད། །འགྱུར་མེད་པདྨ་བི་ཛ་སྙིང་དབུས་ནས་དྲན་བྱུང་། །ང་ཡི་གཟུང་འཛིན་འཁྲུལ་པ་གཏད་མེད་དུ་ཐོང་ཞིག། འཁོར་འདས་ཆོས་ཀུན་སྣ་ཚོགས་རང་སེམས་ཀྱི་ཆོ་འཕྲུལ། །རྨི་ལམ་བདེ་སྡུག་མྱོང་ལྟར་དོན་ལ་ནི་མ་གྲུབ། །ཨ་འཐས་བྱས་པའི་བློ་ཅན་རང་གི་རང་བཅིངས་པ། །འདི་ཀོ་བླ་མའི་དྲིན་གྱིས་འབད་མེད་དུ་གོ་བྱུང་། །སྐྱབས་གཅིག་དྲིན་ཆེན་བླ་མ་ཚངས་གནས་ཀྱི་འཁོར་ལོར། །སྙིང་དབུས་པད་དཀར་བཞད་པའི་ཟེ་འབྲུ་རུ་བསྒོམ་སྟེ། གསོལ་བཏབ་དབང་བླང་ཐུགས་ཡིད་བསྲེ་བ་ཡི་ཉམས་ལེན། །ཁ་ཙམ་མིན་པར་སྙིང་ནས་ཡང་ཡང་དུ་སྐྱོང་ན། །རྡོ་རྗེའི་ཡེ་ཤེས་སྙིང་དབུས་འབེབ་པ་ནི་ཐག་ཆོད། །མ་རིག་རྒྱུས་བསྐྱེད་ལུས་ངག་ཡིད་གསུམ་གྱི་སྒྲིབ་པས། །རིག་པ་སྐུ་གསུམ་སྙིང་པོའི་རང་ཞལ་དེ་མ་མཇལ། །ད་རེས་རང་རིག་རྒྱལ་པོ་བླ་མ་ཡི་དྲིན་གྱིས། །ཐུགས་རྗེའི་ཤུགས་ཀྱིས་མ་རིག་འཁྲུལ་འཁོར་དེ་གཏོར་ནས། །རང་གནས་ཆོས་ཉིད་ངོ་བོ་རྗེན་པ་རུ་འཆར་སོང་། །གཉིས་འཛིན་མུན་པ་སྟུག་པོ་གར་སོང་ནི་ཆ་མེད། །ཡེ་གྲོལ་ཀ་དག་ཆོས་དབྱིངས་སྟོང་ཆེན་གྱི་མཁའ་ལ། །ལྷུན་གྲུབ་འོད་གསལ་ཚོམ་བུའི་དཀྱིལ་འཁོར་འདི་བཀྲག་གསལ། །མ་བྱས་རང་བྱུང་ཐོལ་གྱིས་འཆར་བ་འདི་ཨ་ཧོ། །རང་བབ་མ་བཅོས་རང་སྣང་རིག་པ་ཡི་རྒྱན་འཁོར། །འདུ་འབྲལ་མེད་པར་སྤྱོད་པའི་རྣལ་འབྱོར་ང་སྐྱིད་དོ། །སངས་རྒྱས་ཞེས་པའི་འབྲས་བུ་སྒྲ་བོ་ཆེ་དེ་ཀོ། གཞི་རྫོགས་འཕོ་འགྱུར་བྲལ་བ་འདི་ཀ་རང་ཡིན་པར། །ངེས་ཤེས་གཏིང་ནས་སྐྱེས་པའི་མཆོད་པ་ཞིག་འབུལ་ན། །སྐུ་བཞི་ཡེ་ཤེས་ལྔ་ལྡན་བྱིན་ཆེན་དེ་ཕོབ་ཅིག། འཁོར་བ་དོང་ནས་སྤྲུགས་པའི་དངོས་གྲུབ་ཞིག་སྩོལ་ཅིག། རང་གཞན་དོན་གཉིས་འགྲུབ་པའི་བཀྲ་ཤིས་ནི་ཞུའོ། །ཞེས་བའང་སྨིན་གླིང་གདུང་སྲས་རིན་པོ་ཆེ་ཀུན་བཟང་དབང་རྒྱལ་གྱི་བཀའ་ཡིས་བསྐུལ་བ་བཞིན་དུ། རང་ལ་འདི་འདྲའི་རྟོགས་པའི་གདིང་ཚད་མེད་ཀྱང་འབྱུང་རུང་གི་རྟེན་སྨོན་ཙམ་དུ་འཇམ་དབྱངས་ཆོས་ཀྱི་བློ་གྲོས་པས་འོག་མིན་གཉིས་པ་སྨིན་གྲོལ་གླིང་དུ་བྲིས་པ་དགེ་ལེགས་སུ་གྱུར་ཅིག། སརྦ་དཱ་མངྒ་ལ་ཤུ་བྷཾ།། །། ༈ ཨེ་མ་ཧོ། འཁོར་འདས་བདག་མེད་སྟོང་ཉིད་གཞི་དབྱིངས་ཀྱི་ཀློང་ན། །གདོད་མའི་མགོན་པོ་ཀུན་ཏུ་བཟང་པོ་དེ་བཞུགས་ཡོད། །ཞལ་ཕྱག་འཛིན་པ་རང་སར་དག་པ་དེ་ཨ་ཧོ། །གཞོན་ནུ་བུམ་སྐུའི་བླ་མ་ཆོས་སྐུ་དེ་མཁྱེན་ནོ། །ངེས་པ་ལྔ་ལྡན་འོད་གསལ་བདེ་སྟོང་གི་ཞིང་ན། །ཚོམ་བུ་ལྔ་ལྡན་རིགས་ལྔའི་སངས་རྒྱས་དེ་བཞུགས་ཡོད། །གཉིས་མེད་ཁ་སྦྱོར་ཡན་ལག་བདུན་ལྡན་དེ་ཨ་ཧོ། །ཟུང་འཇུག་རྡོ་རྗེའི་བླ་མ་ལོངས་སྐུ་དེ་མཁྱེན་ནོ། །འོག་མིན་ལ་སོགས་དག་པ་རབ་འབྱམས་ཀྱི་ཞིང་ན། །མཆོག་སྤྲུལ་སྟོན་པ་གཟུགས་ཀྱི་རྒྱལ་པོ་སོགས་བཞུགས་ཡོད། །བྱར་མེད་ས་དང་ལམ་གཅིག་སྦྱོར་བ་དེ་ཨ་ཧོ། །དབྱིངས་ཀྱི་སྙིང་པོ་ཡེ་ཤེས་བླ་མ་དེ་མཁྱེན་ནོ། །རྔ་ཡབ་ཟངས་མདོག་དཔལ་གྱི་རི་བོ་ཡི་ཞིང་ན། །རིགས་ཀུན་འདུས་ཞལ་མཚོ་སྐྱེས་རྡོ་རྗེ་དེ་བཞུགས་ཡོད། །སྐྱེ་དང་འཆི་བའི་མཚན་མ་ཟད་པ་དེ་ཨ་ཧོ། །འཇའ་ལུས་རྡོ་རྗེའི་སྐུ་མཆོག་བླ་མ་དེ་མཁྱེན་ནོ། །ཐ་མལ་རིག་པ་བརྗོད་འདས་སྤྲོས་བྲལ་གྱི་ཀློང་ན། །གཉུག་མའི་རང་བཞིན་རྫོགས་པ་ཆེན་པོ་དེ་བཞུགས་ཡོད། །ཆོས་ཀྱི་རང་བཞིན་ཡིད་དཔྱོད་ཟད་པ་དེ་ཨ་ཧོ། །བྱར་མེད་མཉམ་བཞག་ལྷུག་པའི་བླ་མ་དེ་མཁྱེན་ནོ། །དྭངས་མ་ལྔ་དང་ལྡན་པའི་དྷུ་ཏི་ཡི་ཀློང་ན། །རིག་པ་དངོས་མེད་སྟོང་གསལ་ཁྱབ་བརྡལ་དེ་བཞུགས་ཡོད། །ཅིར་སྣང་ཐམས་ཅད་དག་པ་རབ་འབྱམས་དེ་ཨ་ཧོ། །ཡེ་གྲོལ་གདིང་ལྡན་ཆོས་སྐུའི་བླ་མ་དེ་མཁྱེན་ནོ། །ཕུང་ཁམས་སྐྱེ་མཆེད་ཐམས་ཅད་འདུ་བྱེད་ཀྱི་གྲོང་ན། །མཁའ་འགྲོའི་གསང་མཛོད་རང་བྱུང་ཡེ་ཤེས་དེ་བཞུགས་ཡོད། །སྣང་ཆེད་ཐམས་ཅད་དཔེ་ལ་ཤར་བ་དེ་ཨ་ཧོ། །ལྟོས་གྲུབ་རང་བྱུང་རིག་པའི་བླ་མ་དེ་མཁྱེན་ནོ། །སྒོམ་པ་ཡེངས་མེད་རང་གསལ་ལྷུན་གྲུབ་ཀྱི་ཀློང་ན། །འཕོ་མེད་བྱ་བ་བྲལ་བའི་སངས་རྒྱས་དེ་བཞུགས་ཡོད། །ལྷོད་དེ་གནས་པའི་སྟོང་ཉིད་ལྟ་བ་དེ་ཨ་ཧོ། །ངེས་པ་དོན་གྱི་སྐྱབས་གནས་བླ་མ་དེ་མཁྱེན་ནོ། །ཡེངས་དོག་མཉམ་བཞག་ལྟ་སྟངས་གར་འགྲོ་ལ་ཐོང་ཤོག། སེམས་འཛིན་ཡིད་དཔྱོད་མི་དགོས་རང་བབ་ཏུ་བསྐྱུར་ཐོང་། །བཏང་བཞག་ཆེད་དུ་འཛིན་པ་བློས་བྱས་ཀྱིས་ཅི་བྱེད། །མ་བསྒོམ་རང་བྱུང་སངས་རྒྱས་ཀ་དག་ལ་བཞུགས་ཡོད། །ཁྲེགས་ཆོད་གཞི་ཐོག་འཚང་རྒྱ་ཨ་ཏི་ཡི་རྙེད་པས། །ས་ལམ་བཙལ་ཞིང་བགྲོད་པའི་འོ་བརྒྱལ་ནི་མི་དགོས། །ལུས་རྒྱའི་སྦུབ་ན་བློ་འདས་ཆོས་ཉིད་དུ་སོང་བས། །རང་ལུས་དྭངས་མ་འཇའ་ལུས་རྡོ་རྗེ་རུ་བཞེངས་འགྲོ། །འདི་ལྟར་ཆོས་ཕུང་བརྒྱད་ཁྲི་བཞི་སྟོང་གི་སྙིང་པོ། །གཞན་དུ་རྩོལ་སྒྲུབ་མ་དགོས་རང་སེམས་ལ་རྙེད་འདུག། ངེད་ཅག་བདེ་ཆེན་རྒྱ་མཚོ་རང་མཐོང་གི་ཁ་ཕོ། །རང་ལྟོས་སློབ་བུ་རྣམས་ཀྱི་དགའ་སྟོན་དུ་ཐལ་ལོ།། །། ༈ རང་ཉམས་ངེས་པའི་དོ་ཧ་ནི། ཨ་ཧོ། སྲིད་པའི་གྲོང་ཁྱེར་ཆེན་པོ་ན། །སེམས་ཁྱེའུ་འཁྲུལ་པའི་ཆང་གིས་མྱོས། །ལམ་གྱ་གྱུ་མང་པོར་འཁྱམས་པའི་མཐར། །བདེ་ཆེན་གྱི་ཐང་ལ་སླེབས་པར་གྱུར། །དེར་ཕ་རྒོད་རིག་པའི་རྒྱལ་པོ་བཞུགས། །དེ་དང་གཉིས་མིན་གཉིས་སྣང་བའི། །གཞི་གྲོལ་གྱི་ཆོས་སྐུའི་ནོར་བུ་སྟེར། །དེ་ཕྱི་ནས་མ་རྙེད་རང་ལ་གནས། །སྔར་མ་རིག་སྒྲིབ་པས་ནོངས་པར་འདུག། རང་བྱུང་རིག་པའི་ཉི་མ་ཤར། །ཚོགས་བརྒྱད་ཀྱི་མདུད་པ་གྲོལ་ནས་སོང་། །དེ་གར་སོང་བཙལ་དུ་མེད་པར་འདུག། ཡེ་གྲོལ་གྱི་ངང་དུ་སླེབ་ནས་གདའ། །བསྒོམ་འདོད་ཀྱི་རྟོག་པ་བོར་ནས་ཐལ། །རིག་པ་འདི་ཕྱོགས་ཡན་ནམ་མཁར་བརྡལ། །སྣང་བ་འདི་རྒྱ་ཡན་ཅོག་གེར་བཞག། སྣང་སེམས་འདི་གཉིས་མེད་རོ་གཅིག་འདྲེས། །དྲན་པ་ཡི་བྱ་ར་མ་དགོས་ཤིང་། །ཅེར་འཛིན་དང་ཀློད་པ་སྐད་སོགས་ཀྱི། །ཤེས་སྒྲིབ་ཐམས་ཅད་དབྱིངས་སུ་ཡལ། །ཡེ་གདོད་ནས་དག་པའི་ཆོས་སྐུ་ཡི། །ཆོས་སྣང་སྲིད་ཐམས་ཅད་ཁྱབ་པར་བརྡལ། །བརྡལ་བ་འང་འུབ་ཆུབ་ཀློང་ཡངས་ཆེ། །འོད་གསལ་གྱི་ཐིག་ལེ་ཆེན་པོར་རྫོགས། །སྐུ་གསུམ་གྱི་སྣང་བ་བཀྲག་པོ་ཆེ། །དམིགས་གཏད་དང་དངོས་མཚན་ཚོས་ལས་འདས། །གཅིག་དང་དུ་མའི་མཐའ་དང་བྲལ། །སྐུ་གསུམ་ནང་དབྱིངས་ཆེན་པོར་རྫོགས། །དེ་ཤེས་རབ་མིག་གིས་མཐོང་བ་དང་། །ཤེས་དང་ཤེས་བྱ་གཉིས་མེད་པ། །ཐིམ་ལ་མ་རྨུགས་ངང་དུ་ཧཱུྃ། །ཡེ་ཤེས་རང་གསལ་ཆེན་པོར་ཨཱཿ། རང་སྣང་ཕྱིར་གསལ་ཆེན་པོར་ཨོཾ། །དེ་སྐད་རྟོགས་པ་བརྗོད་པའི་གླུ། །གྲགས་སྟོང་མགྲིན་པའི་རོལ་མོ་འཁྲོལ། །བུ་སྨྱོན་པ་ཡེ་ཤེས་རྡོ་རྗེ་ཡིས། །རང་རིག་པའི་བླ་མ་མཉེས་ཕྱིར་འབུལ། །དགེ་འདི་ཡིས་འཁོར་བ་དོང་སྤྲུགས་ཤོག། ཆུ་སྦྲུལ་ཟླ་བཅུ་ཚེས་བདུན་ལའོ།། །། ༈ འ་འེ། ཀུན་མཁྱེན་རྫོགས་པའི་སངས་རྒྱས། །ང་ཡི་སྤྱི་བོའི་གནས་སུ། །མི་འབྲལ་རྟག་པར་བཞུགས་ནས། །དགོངས་བརྒྱུད་བྱིན་རླབས་འཕོས་ཤིག། རིག་པའི་རྩལ་དབང་སྐུར་ཅིགའཁྲུལ་པ་ཟད་སར་སྐྱོལ་ཅིག། སྣང་བ་གཏད་མེད་ཐོངས་ཤིག། སྣང་སྲིད་ཆོས་ཀུན་སྒྱུ་མ། །རང་བཞིན་བདེན་མེད་དུ་སོང་། །ཆོས་ཀུན་ཡེ་ནས་ཀ་དག། རང་རིག་བློ་བྲལ་ཆེན་པོ། །བྱ་བྱེད་རྩོལ་བྲལ་ངང་ནས། །མཉམ་ཉིད་འོད་གསལ་ཆེན་པོ། །བརྡལ་ཁྱབ་ཐིག་ལེའི་ཀློང་དུ། །ལྷུན་རྫོགས་ཆེན་པོར་ཨ་ཧོ། །བལྟས་པས་མཐོང་བ་མེད་ཅིང་། །མ་བཅོས་རང་བཞག་ཆེན་པོ། །ཅོག་བཞག་གསུམ་གྱི་ལྷུམས་སུ། སྐུ་གསུམ་རང་ཆས་བཞུགས་པ། །སྤང་བླང་བསལ་བཞག་བྲལ་བ། །བླ་མའི་དྲིན་གྱིས་མཐོང་བས། །ཁམས་གསུམ་སེམས་ཅན་ཐམས་ཅད། །རང་རིག་གཞོན་ནུ་བུམ་སྐུར། །མངོན་བྱང་ཆུབ་པར་གྱུར་ཅིག། ཅེས་པའང་ཀུན་བཟང་འོད་གསལ་སྙིང་བོས་བྲིས་པའོ།། །། ༈ ཨ་ཧོ་ཡེ། གཞི་སྐྱེ་མེད་ཀྱི་ཀློང་ནས། །ལམ་འགགས་མེད་ཞིག་བགྲོད་ན། །འབྲས་སྐྱེ་མེད་དེ་ཐོབ་འོང་། །ལྷ་བཙུན་སྨྱོན་པའི་བུ་བརྒྱུད། བྱར་མེད་ཀུན་བཞིའི་ཐང་ལ། །རང་གསལ་རིག་པའི་རྟ་ཕོ། །ཡེ་ཤེས་རྐང་པའི་འགྲོས་ལྡན། །ཞོན་ནས་སྲིད་ཞིའི་ཐང་བརྒལ། །ཆོས་སྐུའི་རྒྱལ་ཁམས་ཡངས་པར། །ལྟད་མོ་ལྟ་རུ་འགྲོའོ། །ཞེས་པའང་དབྱུག་ཟླ་ཕྱི་མའི་ཚེས་ཉེར་དགུ་ལ་འབྲས་ལྗོངས་སྟག་རྩེ་ཕོ་བྲང་ནས་ཐོལ་བྱུང་དུ་དྲན་པ་དགེའོ།། །། ༈ ཨ་ཧོ། སེམས་ཅན་ཀུན་ལ་ཡོད་པའི། །ཡེ་གྲོལ་རྫོགས་པ་ཆེན་པོ། །གཞན་ནས་བཙལ་དུ་མི་དགོས། །ཡེ་ནས་ཆོས་ཉིད་ཀ་དག། རང་བཞིན་གཤིས་ཀྱི་གནས་ལུགས། །འདི་ཀོ་ངོ་འཕྲོད་དེས་ཆོག། བློས་བྱས་བཟོ་བཅོས་མི་དགོས། །སྒྲིམས་ལྷོད་ལ་སོགས་མཚན་འཛིན། །ཡིད་དཔྱོད་ཆོས་ཀྱིས་མ་བསླད། །འཕྲོ་གནས་གང་ལྟར་བྱས་ཀྱང་། །རིག་པའི་རྩལ་ལས་གཞན་མེད། །འཁོར་བ་ངན་དུ་མ་སོང་། །མྱང་འདས་བཟང་དུ་མ་གྱུར། །གཟུང་འཛིན་གཉིས་རྟོག་ཐམས་ཅད། །ཆོས་དབྱིངས་བརྡལ་ཁྱབ་ཆེན་པོར། །ཐིག་ལེ་ཉག་གཅིག་ཀློང་དུ། །དབྱེ་བསལ་མེད་པར་མཉམ་མོ། །དེ་ཉིད་བླ་མའི་དྲིན་ལས། །སྐད་ཅིག་རྟོགས་པའི་མོད་ལ། །དེ་མ་ཐག་ཏུ་གྲོལ་བ། །ཨ་ཏི་རྫོགས་ཆེན་ཁྱད་ཆོས། །འོད་གསལ་གསང་བའི་མན་ངག། འདི་ལས་མྱུར་ལམ་ཟབ་པ། །མདོ་རྒྱུད་ཀུན་ན་མེད་པས། །འདི་འདྲ་འཕྲད་པ་བློ་བདེ། །ཕ་རྗེས་བུ་ཡིས་ཟིན་པར། །ཀུན་མཁྱེན་བླ་མས་བྱིན་རློབས། །ཅེས་པའང་ཐོལ་བྱུང་དུ་བྲིས། ཨ་ཧོ་ཡེ། འཆི་བདུད་ཀྱི་རྟོག་པའི་ཚོགས། །འཆི་མེད་ཀྱི་དབྱིངས་སུ་དེངས། །འཆི་མེད་ཀྱི་རང་རིག་དེ། །འཆི་མེད་ཀྱི་སྐུ་རུ་འགྲུབ། །འཆི་ཞེས་བྱ་བ་མིང་ཙམ་མོ། །འཆི་བདག་གི་གཤིན་རྗེ་དེ། །འཆི་འཇོམས་ཀྱི་ཚེ་ཞལ་བྲག། འཆི་མེད་ཀྱི་རིག་འཛིན་ཚོགས། །འཆི་མེད་ཀྱི་དངོས་གྲུབ་སྩོལ། །ཆོས་ཀྱི་བློ་གྲོས་པས་སོ།། །། ༈ འཁོར་འདས་དབྱེར་མེད་ཀྱི་ལྟ་བའི་མགུར་གླུ་ཀུན་བཟང་མཆོད་སྤྲིན་ཞེས་བྱ་བ། ཨ་ཧོ། འཁོར་འདས་ཞེས་བྱའི་སྒྲ་བོ་ཆེ། །བཙལ་ན་རང་བཞིན་ཅིར་ཡང་མེད། །མ་དཔྱད་སེང་གེའི་གསོབ་དང་མཚུངས། །དོན་དུ་ཇི་ལྟར་སྣང་བ་ཀུན། །རང་གི་སེམས་ཀྱི་སྣང་བ་ནི། །དག་དང་མ་དག་སྣང་བ་ཡིན། །མ་དག་སེམས་ཅན་ལ་སྣང་བ། །ནང་དུ་ལུས་ལ་རབ་ཏུ་ཚང་། །དེ་ཡི་རྩ་བ་སེམས་ལ་ཚང་། །འཁོར་ཆོས་སེམས་ཀྱི་མཚན་ཉིད་དང་། །ལམ་ཆོས་སེམས་ཀྱི་ཡོན་ཏན་དང་། །འབྲས་ཆོས་གནས་འགྱུར་ཚུལ་དུ་ཚང་། །ཀུན་གཞི་རྒྱུ་ཡི་རྒྱུད་ཅེས་བྱ། །མྱོང་རིག་བྱེ་བྲག་ལ་ཕྱེད་ཅིང་། །འཁོར་འདས་གཉིས་ཀའི་གཞི་རུ་གྱུར། །ངོ་བོ་སྟོང་པ་ཉིད་ཡིན་ནོ། །རྒྱུ་ཡི་ལྷན་སྐྱེས་ཆོས་གསུམ་དང་། །ལམ་དང་འབྲས་བུའི་ལྷན་སྐྱེས་རྣམས། །སྦྱང་གཞི་སྦྱོང་བྱེད་སྦྱངས་འབྲས་ཀྱི། །མ་དག་དག་དང་རྣམ་དག་གི །རིམ་པ་ཀུན་གཞིའི་སྟེང་དུ་འཇོག། ཐབས་རིག་གསལ་ལ་མ་འགགས་པ། །སེམས་ཅན་ནས་བརྩམས་སངས་རྒྱས་བར། །རྒྱུན་མི་ཆད་པས་རྒྱུད་དུ་འཇོག། རིག་པའི་གསལ་བ་དེ་ཉིད་ནི། །སེམས་ཀྱི་མཚན་ཉིད་ངོ་བོ་སྟོང་། །བཅོས་མིན་ཟུང་འཇུག་སེམས་ཀྱི་གཤིས། །དེ་ཡི་དོན་ལ་སྒྲོ་འདོགས་བཅད། །རྡོ་རྗེའི་ལུས་ལ་གནད་བསྣུན་པ། །བསྐྱེད་རྫོགས་དབང་བཞིའི་རིམ་པ་ཡི། །ཆུ་བོའི་རྒྱུན་ལྟར་བརྩོན་པ་ལས། །དཀྱིལ་འཁོར་བཞི་པོ་རབ་སྨིན་ནས། །ས་ལམ་ཡོན་ཏན་ཀུན་རྫོགས་འགྱུར། །འབྲས་རྒྱུད་ཀུན་གཞི་རྟེན་བརྟེན་པ། །གནས་ཡོངས་གྱུར་དང་ཟག་བཅས་བྲལ། །ཤིན་ཏུ་ཕྲ་བའི་རླུང་དང་བཅས། །ངོ་བོ་ཉིད་སྐུར་བྱང་ཆུབ་པ། །ཁ་སྦྱོར་བདུན་ལྡན་རྡོ་རྗེ་འཆང་། །མཆོག་གི་གོ་འཕང་མངོན་སུམ་བརྙེས། །གཞི་ལམ་འབྲས་གསུམ་དབྱེར་མེད་པ། །གསུང་ངག་སྙིང་པོའི་དོན་གྱི་བཅུད། །ལྟ་བའི་གླུ་དབྱངས་འདི་ཉིད་ནི། །བློ་གྲོས་རྒྱ་མཚོའི་དཔལ་ལས་ཐོན། །བླ་མའི་ཐུགས་དགོངས་རྫོགས་པར་ཤོག། ས་མསྟ་ཨི་ཐི། ས་ཟླའི་ཚེས་ཉེར་ལྔ་ལའོ།། །། ༈ ལྟ་བའི་ཡང་སྙིང་བཅུད་ཕྱུང་། འཁོར་འདས་དབྱེར་མེད་དོན་སྟོན་པའི། །རང་སེམས་བླ་མར་གུས་བཏུད་ནས། །བཤད་པའི་རྣམ་གྲངས་རྒྱ་ཆེ་ཡང་། །མན་ངག་སློབ་བཤད་སྙིང་པོའི་བཅུད། །གནད་དུ་དྲིལ་བ་འདི་ལྟ་སྟེ། །ད་ལྟ་དྲན་རིག་སྣ་ཚོགས་ཀྱི། །འཕྲོ་གཞིར་གྱུར་པའི་སེམས་འདི་ཉིད། །མ་བཅོས་ཇི་བཞིན་བཞག་པ་ན། །གསལ་སྟོང་ཟུང་འཇུག་དབྱེར་མི་ཕྱེད། །དྭངས་གསལ་རྟོག་བྲལ་བརྗོད་མེད་ལ། །མཚན་མཚོན་གདགས་གཞི་དང་བྲལ་བའི། །གཉུག་མའི་རིག་པ་འདི་ཡི་སྟེང་། །འཁོར་འདས་དབྱེར་མེད་ཚང་ཚུལ་ཤེས། །གདོད་ནས་རྣམ་པར་དག་པ་ཡི། །གསལ་གདངས་ཡེངས་མེད་འཛིན་བྲལ་བསྐྱངས། །དེ་ཉིད་དོན་དམ་ཉམས་ལེན་མཐིལ། །དེ་ཡིས་དབང་བཞིའི་ལམ་སྲོག་བཟུང་། །དེས་ནི་ཚེ་འདིར་འགྲུབ་པར་འགྱུར། །ཅེས་པའང་ས་ཁྱི་ས་ཟླའི་ཚེས་ཉེར་ལྔ་ལ་རྡོ་རྗེ་གླིང་དུ་བྲིས་པའོ།། །། ༈ ཨ་ཧོ། གདོད་ནས་རྣམ་དག་སྐྱེ་མེད་ཆོས་སྐུ་ཡི་ཀློང་ན། །འགགས་མེད་རང་གསལ་ལྷུན་གྲུབ་ལོངས་སྤྱོད་ནི་རྫོགས་སྐུ། །ཐུགས་རྗེ་གང་འདུལ་འགགས་མེད་སྤྲུལ་སྐུ་ཡི་རང་རྩལ། །སྐུ་གསུམ་དབྱེར་མེད་བླ་མ་པད་འབྱུང་དེ་མཁྱེན་ནོ། །ང་ཡི་གཟུང་འཛིན་འཁྲུལ་པའི་སྦུབས་རྒྱ་དེ་བཤིག་ནས། །མི་འཁྲུལ་གཉུག་མ་རང་བྱུང་རིག་པ་ཡི་གནས་ལུགས། །ཡིད་དཔྱོད་བློ་དང་བྲལ་བ་མངོན་སུམ་དུ་རྟོགས་ནས། །ཚེ་འདིར་གདོད་མའི་གཏན་སྲིད་ཟིན་པ་ཞིག་ཞུའོ། །མ་གྱུར་རིགས་དྲུག་ཁམས་གསུམ་སེམས་ཅན་གྱི་འགྲོ་རྣམས། །རྣམ་གྲོལ་གཏན་བདེའི་ས་ལ་འགོད་འདོད་ཀྱི་ལྷག་བསམ། །བྱང་ཆུབ་སེམས་མཆོག་རྒྱུད་ལ་རྩོལ་མེད་དུ་སྐྱེས་ནས། །འཁོར་བ་དོང་ནས་སྤྲུགས་པའི་དངོས་གྲུབ་ཞིག་ཞུའོ། །ཅེས་པའང་གྲོ་སྐྱབས་ལི་ཤུ་ཐུབ་བསྟན་སངས་རྒྱས་འོད་ཟེར་གྱིས་བསྐུལ་ངོར་ཆོས་ཀྱི་བློ་གྲོས་པས་སོ།། །། ༈ ཨ་ཧོ་ཡེ། ངོ་མཚར་གླུ་ཡི་རྒྱལ་པོ་དགྱེས་པ་ཡི་དགའ་སྟོན། །སྤྲིན་དཀར་ན་བུན་བུ་མོའི་མཛེས་སྡུག་གི་ཁྲོད་ན། །བཀྲ་ཤིས་ཁུ་བྱུག་ལྷ་ཡི་གསུང་དབྱངས་དེ་སྙན་པས། །ང་ཅག་སེམས་པ་དགའ་བའི་སྤུ་ལོང་ནི་རྒྱས་སོ། །ལྷ་དང་བླ་མའི་མཚན་དཔེའི་ཞལ་རས་ནི་དྲན་བྱུང་། །གངས་ཅན་རི་བོའི་རྟེན་དང་གནས་མཆོག་གི་བཀོད་པ། །ཡིད་ལ་དྲན་པའི་གསོས་སྨན་དམ་པ་རུ་གྱུར་པས། །ཡིད་ཀྱི་མེ་ཏོག་བྱང་གི་ཕྱོགས་ལ་ནི་དེངས་སོང་། །འབྲས་ལྗོངས་པདྨོ་བཀོད་པ་ལྷ་ཡུལ་གྱི་དགའ་ཚལ། །ཡང་ཡང་ཡིད་ལ་དྲན་བཞིན་རྣལ་འབྱོར་ང་འགྲོའོ། །སླར་ཡང་རྩ་གསུམ་ཌཱ་ཀིའི་འདུ་བ་དང་བཅས་ཏེ། །རྨད་བྱུང་ཚོགས་ཀྱི་འཁོར་ལོའི་དགའ་སྟོན་ལ་སྤྱོད་པའི། །བཀྲ་ཤིས་ཕུན་སུམ་ཚོགས་པའི་སྨོན་ལམ་ཞིག་ཞུ་བར། །བཀྲ་ཤིས་མེ་ཏོག་གསར་པའི་ལྡིང་གུར་གྱི་ནང་ན། །བཀྲ་ཤིས་དཔལ་ལྡན་རྣམ་པར་རྒྱལ་བ་ཡི་དོན་གྲུབ། །བཀྲ་ཤིས་འཇིགས་བྲལ་ཚེ་དབང་རྣམ་པར་ནི་རྒྱལ་ལོ།། །། ༈ གླུ་ཡེ་ཤེས་བྱིན་འབེབས་ཞེས་བྱ་བ། ཨ་ཧོ་ཡེ། རང་བྱུང་འོད་ལྔ་འཁྲིགས་པའི་འཇའ་ཟེར་གྱི་ཀློང་ན། །ཕ་གཅིག་དྲིན་ཆེན་མཚོ་སྐྱེས་རྡོ་རྗེ་དེ་བཞུགས་ཡོད། །བུ་ལ་བྱིན་རླབས་སྦྲང་ཆར་བཟང་པོ་ཞིག་ཕོབས་དང་། །ང་ཡི་རྟོག་པ་སྐྱེ་མེད་ཟང་ཐལ་དུ་དེང་འགྲོ། །མ་རྒྱུད་མཁའ་འགྲོ་དཔའ་བོའི་འཁོར་ཚོགས་ནི་འབུམ་ཕྲག། རྩེད་འཇོ་གླུ་གར་གདུགས་དང་རྒྱལ་མཚན་ནི་ཐིབ་ཐིབ། །ལྷ་རྫས་མེ་ཏོག་གསར་པས་ནམ་མཁའི་ཁྱོན་བཀང་སྟེ། །བཀྲ་ཤིས་གླུ་དབྱངས་བྱེ་བའི་རོལ་མོ་ཡང་འཁྲོལ་སོང་། །སྟེང་ན་རྒྱ་བོད་མཁས་གྲུབ་རིག་འཛིན་གྱི་ཚོམ་བུ། །བར་ན་སྒྲུབ་སྡེ་དགུ་སོགས་ཞི་ཁྲོ་ཡི་ལྷ་ཚོགས། །འོག་ན་དམ་ཅན་ཆོས་སྐྱོང་སྤྲིན་ལྟར་དུ་གཏིབ་པས། །དམ་ཉམས་དགྲ་བགེགས་བསྒྲལ་བའི་མངོན་སྤྱོད་ལ་རྔམས་སོ། །དེ་འདབ་ནོར་ལྷ་རྒྱ་མཚོས་དངོས་གྲུབ་ཀྱི་གཏེར་རྡོལ། །དཀར་ཕྱོགས་ལྷ་ཀླུས་དགའ་བའི་རྣམ་འགྱུར་དང་བཅས་ཏེ། །ངོ་མཚར་སྒྱུ་མའི་རོལ་རྩེད་ཡང་ཡང་དུ་བསྒྱུར་བས། །རྣལ་འབྱོར་སྒྱུ་མའི་སྐྱེས་བུ་སེམས་པ་ནི་དགའ་འོ། །ཨ་ཧོ། སྐྱབས་ཀུན་འདུས་པ་ཨོ་རྒྱན་མཚོ་སྐྱེས་ཀྱི་རྡོ་རྗེ། །དབྱིངས་ཕྱུག་མནྡར་དང་བདེ་ཆེན་གྱི་མཚོ་རྒྱལ། །སྟངས་དཔྱལ་འདུ་འབྲལ་མེད་པ་སྤྱི་བོ་ཡི་རྒྱན་དུ། །འབྲལ་མེད་རྟག་པར་བཞུགས་ནས་བྱིན་རླབས་དེ་སྩོལ་ཅིག། སྙིང་དབུས་གེ་སར་བཞད་པར་རྟག་པ་རུ་མཆོད་པས། །ཐུགས་ཡིད་དབྱེར་མེད་དགོངས་པའི་བཙན་ས་ནི་ཟིན་ཏེ། །རིག་འཛིན་རྣམ་པ་བཞི་ཡི་གསང་ལམ་ལ་བགྲོད་ནས། །ཨོ་རྒྱན་རྗེ་དང་དགོངས་ཀློང་མཉམ་པ་རུ་གྱུར་ཏེ། །འཁོར་བ་དོང་ནས་སྤྲུགས་པའི་དངོས་གྲུབ་ཞིག་ཞུའོ། །ཅེས་པའང་ས་ཁྱི་དབོ་ཟླའི་ཚེས་བཅུ་དགུ་ལ་རིག་པ་འཛིན་པ་ཀུན་བཟང་འོད་གསལ་སྙིང་པོ་རྩལ་གྱིས་འབྲས་ལྗངས་སྒང་ཏོག་ཏུ་བྲིས་བའོ།། །། ༈ ཨ་ཧོ་ཡེ། འབྲས་ལྗོངས་བཀྲ་ཤིས་དགའ་བ་འཁྱིལ་བ་ཡི་ཕོ་བྲང་། །སྟེང་ན་འཇའ་འོད་གུར་ཁང་འཁྲིགས་པ་ཡི་ཀློང་ན། །ཕ་གཅིག་ཨོ་རྒྱན་མཚོ་སྐྱེས་རྡོ་རྗེ་དེ་བཞུགས་ཡོད། །མ་ཚོགས་ཌཱ་ཀིའི་ཚོགས་ཀྱིས་མེ་ཏོག་གི་ཆར་འབེབས། །ས་གཞི་པདྨ་འདབ་མ་སྟོང་ཕྲག་ནི་བརྡལ་བར། །ལྷ་མི་འབུམ་ཕྲག་མང་པོས་མཆོད་པའི་རྫས་ཐོགས་ཏེ། །ངོ་མཚར་ཀ་ལ་པིངྐའི་གླུ་དབྱངས་དེ་སྒྲོགས་བྱུང་། །རྨ་བྱ་གཞོན་ནུའི་ཚོགས་ཀྱི་ཟློས་གར་དེ་མཛེས་སོ། །བསོད་ནམས་ཟླ་གཞོན་བརྒྱ་ཕྲག་བརྩེགས་པ་ཡི་ཞལ་རས། །ཆོས་ཀྱི་རྒྱལ་པོ་ལྷ་ཡི་བླ་མ་ཡི་མདུན་སར། །མཉན་ལྕུགས་འཁྲིལ་ལྡེམ་རི་དྭགས་མིག་ཅན་གྱི་ཚོགས་གྲར། །ཚེ་རིང་དཔྱིད་ཀྱི་རྒྱལ་མོའི་དབྱངས་སྙན་གྱི་རྒྱུད་མང་། །སྙན་པའི་རྟ་ལ་དྲངས་ནས་མགྲིན་གླུ་ཡི་མཆོད་པ། །ཅུང་ཟད་ཕུལ་བས་རྒྱལ་ཁམས་བདེ་དགའ་དང་སྐྱིད་པའི། །བཀྲ་ཤིས་མི་ནུབ་དར་ཞིང་རྒྱས་པ་རུ་ཤོག་ཅིག། འཛམ་གླིང་ཀུན་ཏུ་བཀྲ་ཤིས་སིལ་སྙན་ནི་འཁྲོལ་ལོ། །ཨེ་མ་ཧོ། བཀྲ་ཤིས་ངོ་མཚར་ལྷ་ཡི་དགའ་ཚལ་དང་མཚུངས་པའི། །འབྲས་བཟང་དཀར་མོ་ལྗོངས་ཀྱི་ས་འཛིན་གྱི་ལྟེ་བར། །པདྨ་དཀར་པོ་བཞད་པའི་གཞལ་མེད་ཀྱི་ཁང་མཛེས། །སྐྱབས་གཅིག་ཨོ་རྒྱན་མཚོ་སྐྱེས་རྡོ་རྗེ་ཡི་འཛུམ་ཞལ། །ང་ཅག་སྐལ་བཟང་རྣམས་ལ་སྒྲིབ་མེད་དུ་སྟོན་དང་། །སྔོན་སྨོན་ལས་འཕྲོ་ལྡན་པའི་ཞིང་ས་ནི་བཟང་པོར། །བྱང་ཆུབ་མྱུ་གུ་ལྗང་མདོག་མཛེས་པ་ཞིག་འཁྲུངས་ནས། །བསྟན་དང་འགྲོ་ལ་ཕན་པའི་རྟེན་འབྲེལ་ཞིག་ཞུའོ། །དྷརྨ་མ་ཏིས་སོ།། །། ༈ གླུ་ཐ་ལ་ཐ་ལ་རེད་ཡ། གླུ་འདི་ལ་བླ་མས་བྱིན་རླབས་ཤིག་སྩོལ་ཤོག། གླུ་འདི་ལ་མ་ཚོགས་མཁའ་འགྲོ་ཡིས་བྱིན་རློབས། །ཁྱེད་དཔའ་བོ་ཌཱ་ཀི་གླུ་དབྱངས་ནི་སྙན་པས། །དྲི་ཟའི་བུ་མོས་པི་ཝཾ་སྙན་པ་དེ་སྒྲོགས་དང་། །ངེད་འདིར་ཚོགས་ཕོ་མོའི་སྣང་བ་ནི་བསྒྱུར་འོང་། །གླུ་སྙན་པའི་དབྱངས་རྟ་གླིང་བུ་ལ་དྲངས་ན། །ཁྱེད་ལྷ་ཀླུ་ཐམས་ཅད་དགྱེས་མོ་ཞིག་འོང་འགྲོ། །ཞལ་འཛུམ་མདངས་མུལ་ལེ་ཞལ་ཆབ་ཅིག་སྩོལ་དང་། །ངེད་འགྲོ་བ་ཕོ་མོས་འཆི་གསོས་ཀྱི་བདུད་རྩི། །སྔར་མ་མྱོང་བའི་དངོས་གྲུབ་ཆེན་པོ་ཞིག་ཐོབ་འོང་། །གནས་འདི་ནི་ཆོས་བཟང་ལྷ་ཡི་མདུན་ས་རེད་པས་སྐྱིད་དོ། །དགུང་ཡ་ཀིར་འཇའ་སྤྲིན་ཁ་དོག་སྣ་ཚོགས། །ཀླུ་མ་དྲོས་གཟི་ཅན་སྤྲིན་དཀར་དང་འགྲོགས་ནས། །དངོས་གྲུབ་ཀྱི་སྦྲང་ཆར་ཟིམ་ཟིམ་དུ་འབེབ་བྱུང་། །ས་འདི་ལ་མེ་ཏོག་ཨུཏྤལ་དང་པདྨ། །དཀར་དམར་ཁ་དོག་སྣ་ཚོགས་བཀྲ་བའི་མཛེས་སྡུག་དེ་ངོམ་བྱུང་། །འཆི་མེད་ལྷ་ཡི་བུ་དང་བུ་མོ་ཡི་ཚོགས་རྣམས། །མཛེས་སྡུག་ལང་ཚོ་ངོམས་པས་སེམས་ཀྱི་སྡུག་བསྔལ་ཀུན་ཞི་བའི། །བདེ་ལྡན་ཕུན་སུམ་ཚོགས་པའི་སྙན་འགྱུར་གྱི་རོལ་མོ་འཁྲོལ་ལོ། །ཨ་ཧོ་ཡེ། རྩ་བ་གསུམ་གྱི་ལྷ་ཚོགས་ལྟར་བཀྲ་ནས་འདུག་གོ །སྐྱེ་བོ་ཐམས་ཅད་མིག་བགྲད་ཡར་ལ་ཞིག་གཟིགས་དང་། །ངོ་མཚར་གྱི་ལྟད་མོ་མཐོང་མ་མྱོང་བ་ཞིག་མཐོང་རན། ཨ་ཧོ་ཡེ། ད་ལྟ་སྐྱིད་པའི་ཉི་མ་འདི་འདྲ་ཞིག་ཤར་དུས། །སེམས་ཆུང་ཁ་རོག་མ་འདུག་གཟིང་གཟིང་ཞིག་མཛོད་དང་། །བྱིན་རླབས་བཀྲ་ཤིས་འདོད་དགུ་འབྱུང་བའི་དངོས་གྲུབ་ཅིག་རྡོལ་འོང་། །ཨ་ཧོ་མ་ཧཱ་སུ་ཁ་གི་རྟི་སཾ་གྲ་ཧ། ཨ་ནུ་ཏཱ་རོ་པིཎྜེ་ཨ་བ་ཀ། ནི་རྨ་ལི་ཛྙཱ་ན་ཀཱ་ཡ་ཝཱ་ཀ་ཙིཏྟ་ཨ་ཧཾ། ཅེས་པའང་མེ་བྱི་ཟླ་གཅིག་ཚེས་བཅུ་གསུམ་ལའོ།། །། ༈ བལ་ཡུལ་གནས་བསྐོར་འཁོར་བའི་གླུ་ཚེ་རིང་ཞབས་བྲོ་བཀྲ་ཤིས་སོ། །ཨ་ཧོ་ཡེ། བཀྲ་ཤིས་ཀྱི་སྣང་བ། །དཀར་པོ་ཡི་ཚེས་འགྲོགས། །བལ་ཡུལ་གྱི་མཐིལ་དུ། །རྣལ་འབྱོར་ང་འབྱོར་བས། །ངོ་མཚར་གྱི་ཡུལ་གྲུ། །བཀོད་པ་ནི་ཁྱད་འཕགས། །སངས་རྒྱས་ཀྱི་བྱིན་རླབས། །ཆོས་སྐུ་ཡི་མཆོད་རྟེན། །རྣམ་གསུམ་དེ་བཞུགས་པས། །དགེ་མཚན་གྱི་གཟི་འབར། །ས་གཞི་ལ་གཡང་ཆགས། །བྱིན་རླབས་ཀྱི་ན་བུན། །སྤྲིན་བཞིན་དུ་གཏིབ་ཅིང་། །ཐུགས་རྗེ་ཡི་ཆར་རྒྱུན། །སི་ལི་ལི་འབེབ་བྱུང་། །འཇིག་རྟེན་གྱི་ལྷ་ཆེན། །ནོར་གྱི་ནི་བདག་པོས། །ཕྱ་གཡང་ནི་སྩོལ་འདུག། སྐྱེས་པ་ནི་དཔའ་བོ། །བཞིན་རས་ནི་དུང་དང་། །བྱེ་རུ་ལྟར་སྣུམ་ཞིང་། །མཛེས་པ་དང་བརྗིད་ཆགས། །མོ་བཙུན་ནི་བཞིན་བཟང་། །ལྷ་ཡུལ་གྱི་བུ་མོ། །ས་འདི་རུ་འཕོས་འདྲ། །ཨ་ཧོ་ཡེ། བུ་ཆུང་གཞོན་ནུ་ཡི་ཚོགས་རྣམས། །ལྷ་ཕྲུག་རྩེ་བ་དང་འདྲའོ། །ལྷ་དམག་རུ་མཚོན་ནི་སྒྲེང་བ། །དགྲ་ལ་ཆས་པ་དང་འདྲའོ། །བཟོ་རིག་འཕྲུལ་བཟོས་ཀྱི་བཀོད་པ། །སྙན་པའི་སྒྲ་དབྱངས་དེ་སྒྲོགས་སོ། །ཕྱོགས་མཚམས་བྱིན་ཅན་གྱི་གནས་མཆོག། དུ་མས་ཁོར་ཡུག་ཀུན་ཁེངས་ཤིང་། །ཤེལ་དཀར་བརྩེགས་འདྲ་ཡི་ལྷུན་པོ། །ཡན་ལག་བརྒྱད་ལྡན་གྱི་ཆུ་བོ། །ཁྲུས་ཀྱི་རྫིང་བུ་ནི་མང་པོ། །རྣམ་མང་བཟའ་བཏུང་གི་ཞིམ་མངར། །འཇམ་མཉན་གོས་བཟང་གི་ལྷབ་ལྷུབ། །དེ་འདྲའི་གནས་ཡུལ་གྱི་བཀོད་པ། །མཐོང་བས་སེམས་པ་ནི་དགའ་འོ། །ཨ་ཧོ་ཡེ། གནས་བསྐོར་སོང་བ་ཡི་དགེ་རྩ། །རྩ་བའི་བླ་མ་ལ་འབུལ་ན། །ཐུགས་ཀྱི་དགྱེས་པ་ནི་མཛོད་ཅིག། མ་རྒན་སེམས་ཅན་ལ་སྦྱིན་པས། །ཐར་པའི་ལམ་མཆོག་ཏུ་ཕྱིན་ཤོག། ཨ་ཧོ་ཡེ། བཀྲ་ཤིས་ཀྱི་ཞབས་བྲོ་འཁོར་གཅིག་འཁོར་གཉིས་འཁོར་གསུམ་རྒྱབ་པས་བདེ་སྐྱིད་ཕུན་སུམ་ཚོགས་པར་ཤོག་ཅིག། ཟླ་༡༢ཚེས་༥ལའོ།། །། ༈ ངོ་མཚར་སྤྲོ་བ་བསྐྱེད་པ་ལྷ་ཡི་གླུ་དབྱངས་ཞེས་བྱ་བ། ཨེ་མ་ཧོ། སྟེང་འཆི་མེད་མཁའ་དབྱིངས་དགུང་སྔོན་གྱི་དཀྱིལ་ན། །འོད་ཉི་ཟླའི་དཀྱིལ་འཁོར་བཀྲག་མདངས་ནི་འཚེར་ཞིང་། །འཁོར་གཟའ་དང་རྒྱུ་སྐར་ཚོམ་བུ་ནི་བཀྲ་བས། །རྗེ་བརྒྱུད་གསུམ་རིག་འཛིན་བླ་མ་རྣམས་དྲན་བྱུང་། །གནས་ཁྱད་འཕགས་སྦས་ཡུལ་འབྲས་གཤོངས་ཀྱི་བཀོད་པ། །གངས་དཀར་པོ་རྩེ་མོ་དགུང་དུ་ནི་ཟུག་སྟེ། །དྭངས་བསིལ་གྱི་རི་བྲན་ཚར་དུ་ནི་དངར་ཞིང་། །སྤོས་ངད་དང་ལྡན་པའི་ནགས་ཚལ་གྱི་དྲྭ་བ། །བྲག་རིན་ཆེན་ཁམས་ལྡན་ཁ་དོག་ནི་སྣ་ཚོགས། །བརྒྱ་སྟོང་ཕྲག་མང་པོའི་ཚོམ་བུ་ནི་བརྡལ་དང་། །ངོས་འཇམ་གསལ་སྣ་ཚོགས་གཟུགས་བརྙན་ནི་ཆེས་བཀྲ། །ལྷ་རྩ་གསུམ་ཞི་ཁྲོ་རབ་འབྱམས་ཀྱི་བཞུགས་གནས། །ལྗོངས་ཆེན་པོའི་སྒོ་མོ་འཕྲང་ཆེན་གྱིས་བཅད་པ། །ཕྱོགས་མཚམས་སུ་རབ་ཡངས་མཱ་ཀི་ཡི་ལྷ་མོ། །ཆིལ་ཆིལ་དུ་མུ་ཏིག་དཀར་པོ་ནི་འཐོར་བཞིན། །རྐང་གར་སྟབས་བསྒྱུར་ཞིང་གྱ་གྱུ་རུ་ལྡེམ་ལྡེམ། །བྱ་རི་དྭགས་སྤུ་སྡུག་གསུང་སྙན་ནི་སྒྲོགས་ཚེ། །མ་ཨོ་རྒྱན་མཁའ་འགྲོའི་གླིང་ཆེན་དེ་དྲན་བྱུང་། །བཟོ་མ་དགོས་རང་བྱུང་རྡོ་བ་ཡི་ཕུག་ཆེན། །ལྷ་རང་འཁྲུངས་རྩ་གསུམ་རབ་འབྱམས་ཀྱི་དཀྱིལ་འཁོར། །ཆོས་ནོར་གྱི་གཏེར་ཁ་འཛད་མེད་དུ་གཏམས་ཤིང་། །མ་ཌཱ་ཀིའི་བྲོ་གར་འདུ་འཕྲོ་ནི་ཆད་མེད། །ཕ་ཨོ་རྒྱན་པདྨའི་ཐུགས་བསྐྱེད་ཀྱི་ཞིང་མཆོག། དཔལ་པདྨ་འོད་ཀྱི་འདྲ་ཅོག་ནི་འདི་ལགས། །ལྷ་རྩ་གསུམ་རབ་འབྱམས་དགྱེས་དགུ་རུ་རོལ་པའི། །གནས་འདི་ངང་མཇལ་བའི་རྣལ་འབྱོར་ང་སྐྱིད་དོ། །ཡར་བལྟས་པས་བྱིན་རླབས་སྤྲིན་ཕུང་ནི་ཐིབ་ཐིབ། །བར་དངོས་གྲུབ་སྦྲང་ཆར་སི་ལི་ལི་འབེབས་ཤིང་། །ཐང་སྔོ་ལྗང་གཡུ་ཡི་མཎྜལ་གྱི་སྟེང་དུ། །ལྷ་བཟང་ཤིང་སྣ་ཚོགས་སྨན་དྲི་ནི་འཐུལ་ཏེ། །སེམས་མེད་ཀྱི་རྐང་འཐུང་གར་བརྒྱ་ཡི་རྩེད་འཇོ། །བཟའ་ཤིང་འབྲས་སྣ་ཚོགས་མགོ་ཅོག་ནི་དུད་དེ། །རོ་ཞིམ་མངར་ཕན་ཚུན་འགྲན་པ་ལ་ཆས་བཞིན། །མ་ཚོགས་ཀྱི་འདུ་བའི་དགའ་སྟོན་ནི་འབད་མེད། །དུས་འཁོར་མོ་ཡུག་ཏུ་འབྲས་བཟང་གི་སྙེ་མ། །ལྗགས་རོ་མངར་བརྒྱ་ལྡན་ལྷ་ཡུལ་གྱི་བདུད་རྩི། །ནམ་ཅི་དགར་སྤྱོད་པའི་སྐལ་བཟང་ང་སྐྱིད་དོ། །གྲོགས་དཔའ་བོ་དཔའ་མོ་མཛའ་ཕྲུག་གི་གཞོན་ནུ། །དར་པཉྩ་ལི་ཀ་ལྷ་རྫས་ཀྱི་ན་བཟའ། །རྒྱན་རིན་ཆེན་སྣ་ཚོགས་འཕྱང་འཕྲུལ་ནི་མཛེས་ཤིང་། །རྐང་ངང་མོ་བཞིན་དུ་གདུ་བུ་ཡི་སྒྲ་ལྡན། །གླུ་སྙན་འཇེབས་རྣ་བའི་དཔྱིད་དུ་ནི་སོན་ཞིང་། །བཟོ་རིག་པ་ངོ་མཚར་སྒྱུ་མ་ཡི་འཕྲུལ་ཆེ། །དུས་མིག་འཛུམ་ཙམ་ལ་བརྒྱ་ཕྲག་ནི་ངོམས་དང་། །བཅུད་བཟང་པོའི་ཉིང་ཁུ་དྲི་བཟང་གི་ངད་ལྡན། །ལན་ཇི་ཙམ་མྱོང་ཡང་སུན་པ་ནི་མི་སྐྱེད། །མ་མཁའ་འགྲོའི་ཚོགས་དང་སྐལ་བ་ནི་མཉམ་པའི། ཐབས་རྨད་བྱུང་གསང་བའི་ཚོགས་ཁང་ལ་ཞུགས་ནས། །ལུས་རྡོ་རྗེའི་བྲོ་གར་གར་སྟབས་ནི་སྒྱུར་ཞིང་། །ཆོས་ཟབ་མོ་རྩ་གསུམ་རིག་འཛིན་གྱི་སྲོག་སྒྲུབ། །རང་ཅི་དགར་སྤྱོད་པའི་རྟེན་འབྲེལ་ལ་ཡག་བྱུང་། །སྔོན་ཁྲག་འཐུང་ཧེ་རུ་ཀ་དཔལ་གྱི་དཔའ་བོ། །དུས་དེང་སང་འཇིགས་མེད་ནམ་མཁའ་ཡི་རྡོ་རྗེ། །བུ་དེ་ལ་རྣལ་འབྱོར་དབང་ཕྱུག་གིས་བྱིན་ཕོབ། །ལུས་འཆི་མེད་རྡོ་རྗེའི་ལང་ཚོ་ནི་རྒྱས་ཤིང་། །ཚེ་བདུད་ཀྱི་བར་ཆད་སྐྱེ་མེད་དུ་བསྒྲལ་ནས། །ངག་གྲགས་སྟོང་གཞོམ་མེད་ཆོས་རྔ་ནི་ལྡིར་བཞིན། །ཡིད་རིག་སྟོང་བརྡལ་ཁྱབ་ཆེན་པོ་ལས་མ་གཡོས། །མཆོག་ཐུན་མོང་དངོས་གྲུབ་བགོ་སྐལ་ལ་སྤྱོད་དེ། །ཕྱོགས་ཀུན་ལས་རྣམ་པར་རྒྱལ་བ་ཡི་བཀྲ་ཤིས། །དབྱངས་སྙན་པོ་མི་ནུབ་དར་རྒྱས་སུ་གྱུར་ནས། །ས་གསུམ་ཀུན་དགེ་ཞིང་ལེགས་པ་རུ་ཤོག་ཅིག། །ཅེས་པའང་འབྲས་ལྗོངས་སྒང་ཐོག་ཏུ་འཇིགས་མེད་ནམ་མཁའི་རྡོ་རྗེས་གླུར་བླང་བ་དགེ་ལེགས་སུ་གྱུར་ཅིག། །། ༈དུས་ལ་མངོན་པར་སྐྱོ་བའི་གཏམ་མུ་ཀུའི་མགྲིན་གླུ་ཞེས་བྱ་བ། ན་མོ་གུ་རུ། དྲན་པ་ཙམ་གྱིས་སྙིང་གི་གདུང་སེལ། །མ་རིག་མུན་པ་སེལ་བའི་སྒྲོན་མེ། །རྗེ་བཙུན་དྲན་པས་གདུང་སེལ་ཁྱེད་རྣམས། །བདག་གི་སྤྱི་བོའི་རྒྱན་དུ་བཞུགས་ཤིག། སེམས་ཅན་རྣམས་ཀྱི་ལས་ངན་བསགས་པའི། །ས་བོན་བག་ཆགས་རྩུབ་མོ་སྨིན་པས། །ཆེར་སྙིགས་གནས་དུས་བསྐལ་པ་ངན་པ། །འདི་འདྲར་སྐྱེས་པས་སེམས་པ་སྐྱོ་འོ། །དགེ་སྡིག་བླང་དོར་གནས་ལ་རྨོངས་ཤིང་། །ཤེས་ཀྱང་བཙན་དུག་འཐུང་བ་དང་འདྲ། །ཉོན་མོངས་ཤུགས་དྲག་གཉེན་པོ་སྟོབས་ཆུང་། །མི་དགེའི་ལས་ལ་སྤྱོད་འདིས་སེམས་སྐྱོ། །རང་ལ་དབང་མེད་གཏི་མུག་གཞན་དབང་། །དུག་ལྔའི་མེ་དཔུང་དྲག་ཏུ་འབར་བས། །སྙིགས་དུས་རང་གཞན་ཐམས་ཅད་བསྲེགས་ནས། །ངན་སོང་འབྲས་བུ་བསྐྱེད་འདིས་སེམས་སྐྱོ། །ཆོས་པ་རྣམས་ཀྱང་དམ་ཆོས་བྱེད་ཟེར། །བདག་བསྟོད་གཞན་སྨོད་ངན་སེམས་ཕྲག་དོག། གཅིག་གིས་གཅིག་ལ་ངན་སྨྲས་སྐུར་འདེབས། །ངན་སེམས་འཁོར་ལོ་བསྐོར་འདིས་སེམས་སྐྱོ། །སྐྱེ་བོ་ཕལ་ཆེར་མི་དགེའི་འདམ་དུ། །ཉིན་མཚན་བར་མེད་དོག་མེད་བྱ་བས། །མི་ཚེའི་ཉི་མ་ནུབ་རིར་བསྐྱལ་ཞིང་། །མི་ལུས་ཆུད་ཟོས་བཏང་འདིས་སེམས་སྐྱོ། །མི་རྟག་འཆི་བས་མདུན་ནས་སྒུག་ཀྱང་། །ཚེ་ནི་ནམ་ཟད་མི་ཤེས་བཞིན་དུ། །སྡིག་པའི་ཁུར་ཆེན་བཏེགས་ནས་འགྲོ་དུས། །སྐྱབས་མེད་ཉམ་ཐག་གྱུར་པས་སེམས་སྐྱོ། །ཐོས་པ་བྱས་ཀྱང་ཐོས་དོན་མ་སྒྲུབ། །སྒོ་གསུམ་མ་ཞི་མ་དུལ་རྩུབ་ཟིང་། །ཚེར་མ་དར་ཐུམ་འདྲ་བའི་གྱོང་པོ། །ཚུལ་འདི་བསམ་གྱིན་བསམ་གྱིན་སེམས་སྐྱོ། །ཆོས་བཞིན་སྤྱོད་པ་ཉིན་མོའི་སྐར་མ། །ཆོས་མིན་སྤྱོད་པས་ས་སྟེང་ཁེངས་ཤིང་། །སྡིག་པའི་ལྟ་ངན་མུན་པ་འཐིབ་པས། །ལོག་པའི་ལམ་དུ་འཁྱམས་འདིས་སེམས་སྐྱོ། །རྒྱལ་བའི་བསྟན་པ་སྣུམ་ཟད་མར་མེ། །བསྟན་འཛིན་སྐྱེས་རྣམས་དགུང་དུ་ཡལ་ནས། །ས་སྟེང་མུན་པའི་སྨག་གིས་ཁྱབ་ཅིང་། །ཀླ་ཀློ་མིན་ཀྱང་དེ་འདྲས་སེམས་སྐྱོ། །ཆོས་ལྡན་རྒྱལ་པོའི་དབུ་འཕང་སྨད་ཅིང་། །ཡ་རབས་དྲྭ་མའི་གྲལ་བཟང་འཐོར་ནས། །མ་རབས་སྐྱེ་བོས་འཛིན་མའི་ཁྱོན་གང་། །སྙིགས་མའི་ངང་ཚུལ་འདི་ཡིས་སེམས་སྐྱོ། །ཞག་རེའི་ནང་དུ་གཏམ་གསར་རེ་རེ། །མི་རྣམས་ཆ་ལུགས་ཕལ་ཆེར་འགྱུར་ནས། །རྒྱན་གོས་ཡོ་བྱད་མཐའ་མིའི་ཆ་ལུགས། །སྤྱོད་ངན་འདི་འདྲ་མཐོང་ནས་སེམས་སྐྱོ། །བསྟན་ལ་ཞུགས་རྣམས་ཆོས་སྤྱོད་མི་བརྩོན། །དམག་ཇག་སྒྲུང་དང་བུད་མེད་གཏམ་སོགས། །ཆགས་སྡང་དྲག་པོས་ཉིན་མཚན་དུས་འདའ། །ཐར་པའི་ལམ་ཆེན་བཀག་འདིས་སེམས་སྐྱོ། །གྲྭ་པ་རྣམས་ལ་ཆོས་གཏམ་མེད་ཅིང་། །ཁྱིམ་པའི་ཁ་ནས་ཆོས་བཤད་འུར་འུར། །གོང་འོག་ནོར་བའི་དུས་ངན་རང་རྟགས། །འདི་འདྲ་མང་པོ་མཐོང་བས་སེམས་སྐྱོ། །ཕར་ལ་ཅི་ཙམ་བྱམས་སེམས་བྱས་ཀྱང་། །ཇེ་རྩུབ་ཇེ་རྩུབ་ངན་དབང་ཇེ་ཆེ། །ལབ་རྒྱུ་མང་པོས་རང་གཞན་རྒྱུད་བསྲེགས། །འཁོར་ངན་སྐྱེ་བོ་འདི་ལ་སེམས་སྐྱོ། །བླ་མ་བསྟེན་ཟེར་དམ་ཆོས་མང་ཐོབ། །མ་བསྒོམ་མ་བསྒྲུབ་དད་དང་དག་སྣང་། །ཅུང་ཟད་མེད་པའི་བླ་སློབ་འདི་འདྲ། །དེ་ཡི་རང་བཞིན་མཐོང་བས་སེམས་སྐྱོ། །རང་རྒྱུད་མ་གྲོལ་གཞན་ལ་ཆོས་བཤད། །གསང་སྔགས་དབང་ཆོས་ནོར་དང་བརྗེ་ཞིང་། །ཕན་སེམས་མེད་ལ་རྒྱུ་ནོར་གང་ཐོབ། །ཡིད་ལ་བརྣགས་པ་འདི་ཡིས་སེམས་སྐྱོ། །བསྐྱེད་རྫོགས་ལྟ་བའི་གདིང་དང་མི་ལྡན། །གཞན་ཕན་བྱང་ཆུབ་སེམས་དང་རྒྱབ་འགལ། །འདུལ་ཁྲིམས་སྡོམ་པ་ཆུ་ལ་ཕོ་ཞིང་། །ཆོས་དང་མི་མཐུན་རང་ལ་སེམས་སྐྱོ། །སྙིགས་མ་ལྔ་བདོའི་སེམས་ཅན་འདི་འདྲ། །མགོན་པོ་འཕགས་མཆོག་ཐུགས་རྗེ་ཆེ་རྣམས། །མཁྱེན་བརྩེ་ནུས་པའི་རྩལ་ཆེན་བསྐྱེད་ནས། །སྡུག་བསྔལ་འཁོར་བའི་འདམ་ནས་དྲངས་མཛོད། །ཀྱེ་མ་ཀྱི་ཧུད་བྱམས་ལྡན་ཁྱེད་རྣམས། །ཐུགས་ལ་ལེ་ལོ་བཏང་སྙོམས་མི་མངའ། །གནས་སྐབས་འདི་དང་འདི་འདྲར་དགོངས་ནས། །ཡེ་ཤེས་སྤྱན་གྱིས་མྱུར་དུ་གཟིགས་ཏེ། །ཐུགས་རྗེའི་ཕྱག་གིས་འདྲེན་པར་མཛོད་ཅིག། ཅེས་པའང་སྡིག་རྒན་ཟོག་པོ་བློ་གྲོས་མིང་ཅན་གྱིས་བྲིས་པའོ།། །། ༈ ཐུགས་དམ་རྒྱུད་བསྐུལ་གྱི་གླུ་དད་པའི་གློག་ཞགས་བཞུགས་སོ། །ཨ་ཧོ། གནས་བྱིན་རླབས་ཅན་རྔ་ཡབ་དཔལ་རི་ན། །ཕ་རྩ་གསུམ་ཀུན་འདུས་གུ་རུ་རྗེ། །འཁོར་རིག་འཛིན་གྲུབ་ཐོབ་རྒྱ་མཚོས་བསྐོར། །བདག་མོས་པའི་བུ་ཡིས་གསོལ་བ་འདེབས། །དུས་དེང་སང་སྲིད་པོའི་གྲོང་ཁྱེར་འདྲ། །ཞག་རེ་བཞིན་མི་རྟག་ངང་ཚུལ་སྟོན། །མི་ཐམས་ཅད་དགེ་སྡིག་གོ་ལོག་སྤྱོད། །རྗེ་ཐུབ་པའི་བསྟན་པ་དབུ་འཕང་སྨད། །རྒྱུད་མི་བསྲུན་ནག་ཕྱོགས་ཀླ་ཀློས་འཚེ། །ཆོས་བྱེད་པ་ཀུན་གྱི་སྲོག་རྩ་གཅོད། །བསྟན་འགྲོ་བ་ཡོངས་ཀྱི་བདེ་སྐྱིད་འཕྲོག། དཔལ་བསོད་ནམས་ཀྱི་རྟེན་མཆོག་ཐམས་ཅད་བཅོམ། །གདོན་འབྱུང་པོ་ཐམས་ཅད་སྣ་འདྲེན་བྱེད། །དེའི་རྐྱེན་གྱིས་མི་འདོད་སྣ་དགུས་གཙེས། །དུས་འདི་འདྲར་ཨོ་རྒྱན་ཁྱེད་ཀྱིས་གཟིགས། །རྗེ་པད་འབྱུང་ལ་སྙིང་ནས་གསོལ་འདེབས་ན། །མཐུ་སྟོབས་དང་ཐུགས་རྗེའི་རྩལ་ཤུགས་ཕྱུངས། །རྐྱེན་ངན་པ་ཐམས་ཅད་བཟློག་ཏུ་གསོལ། །བོད་གངས་རིས་བསྐོར་བའི་ལྗོངས་ཆེན་གྱི། །སྐྱབས་གཅིག་ཆོག་པདྨ་འབྱུང་གནས་མཁྱེན། །རྗེ་ཁྱེད་ལས་རེ་ས་གཞན་མེད་པས། །དུས་ད་ལྟ་ཉིད་དུ་བྱིན་གྱིས་རློབས། །མེ་ཁྱི་ནག་ཟླའི་ཚོས་༢༥ལའོ།། །། ༈ ཤྲཱི་གཱི་རྟི་ཨ་ལ་ལ་ཧོ། །དཔལ་བདེ་བ་ཆེན་པོ་གྲུབ་པའི་སྐུ། །ཡེ་ཤེས་ཕྱག་རྒྱའི་གཟི་བརྗིད་ཅན། །ཀུན་ཏུ་དགའ་བའི་འོད་ཟེར་འབར། །ས་གསུམ་དག་ན་གཡོ་བར་བྱེད། །རྡོ་རྗེའི་བརྟུལ་ཞུགས་གྲུབ་པའི་གཟིས། །མི་འགྱུར་ཕྱག་རྒྱས་བཅིང་བ་ལས། །ཨ་ཧཾ་བདེ་བའི་གླུ་དབྱངས་སྒྲོགས། །གཉིས་མེད་བདུད་རྩིའི་རོས་མྱོས་པས། །མཆོག་ཏུ་མི་འགྱུར་གྲུབ་པ་ཆེ་ཧོཿ། ངོ་བོ་གཅིག་ལས་འགྱུར་མེད་ཀྱང་། །རྣམ་པ་ཧེ་རུ་ཀ་ཡི་གཟུགས། །ས་གསུམ་དག་ན་མཆོད་བྱེད་ཅིང་། །དཔའ་བོ་ཆེན་པོའི་སྟབས་ཀྱི་ནི། །འཁོར་འདས་ཐམས་ཅད་གནོན་ཅིང་གཟིར། །བདུད་ལས་རྒྱལ་བའི་རལ་གྲི་དང་། །ཐབས་ཤེས་མདའ་གཞུ་ལ་སོགས་པ། །རྡོ་རྗེའི་གོ་མཚོན་སྣ་ཚོགས་པས། །བདུད་ཀྱི་ཚོགས་རྣམས་འཇིགས་པར་བྱེད། །འཇིགས་མཛད་ཆེན་པོ་ཁྲག་འཐུང་དཔལ། །མི་ཡི་ལུས་ལ་ཞུགས་པ་ཡི། །རྔམས་པའི་གསུང་དང་བརྗིད་པའི་སྐུ། །སྙིང་རྗེ་རབ་ཞི་ཐུགས་ཁྲོས་པས། །དུས་ཀྱི་མུན་པ་མཐའ་དག་བཅོམ། །ཡེ་ཤེས་སྐུ་ནི་རང་བྱུང་བས། །བརྟན་གཡོ་ཀུན་ལ་རབ་ཏུ་ཁྱབ། །ཇི་ལྟར་ལྕགས་ལ་གསེར་འགྱུར་བཞིན། །ཐམས་ཅད་ཐམས་ཅད་ཕྱག་རྒྱའི་སྐུ། །ངོ་མཚར་ཆོ་འཕྲུལ་བདེ་ཆེན་རྒྱལ། །དཀྱིལ་འཁོར་གཙོ་ལ་ཕྱག་འཚལ་ལོ། །ཨེ་མ་ཨེ་མ་རྡོ་རྗེ་ཆེ། །རྡོ་རྗེ་རྒྱལ་པོ་དཔལ་དང་ལྡན། །སངས་རྒྱས་ཀུན་གྱི་ཕྲིན་ལས་པ། །དུས་སུ་སྒྱུ་མའི་གར་མཛོད་ཅིག། ཨ་ཧོ། ཨེ་མ་ཀི་རི་ཀི་རི་མ་ལྱཱ་ཤཔྡ་པ་ཏ་ཡེ་གཱིརྟི་མ་ཨ་ཧཾ། །ཆུ་འབྲུག་ཟླ་༡༢ཚེས་༢༩ལ།། །། ༈ ཨེ་མ་ཧོཿཨེ་མ་ཀི་རི་ཨ་ཧོཿརྡོ་རྗེ་ཉི་མ་འབར་བའི་མེ། །རིན་ཆེན་ཉི་མ་གཟི་བརྗིད་ཆེ། །ཀུན་ཏུ་རྒྱས་མཛད་བདེ་བ་ཆེ། །ཡེ་ཤེས་རིན་ཆེན་དྲྭ་བ་ཆེ་ཧོཿརྡོ་རྗེ་མེ་སྟེ་ཀུན་ཏུ་འཕྲོ། །རྡོ་རྗེ་ཞི་བ་བླ་ན་མེད། །བདེ་མཆོག་བདུད་རྩིའི་སྤྲིན་འཕྲོ་བ། །ཡེ་ཤེས་རིན་ཆེན་འབར་བ་ཆེ་ཧོཿ། པདྨའི་བདག་པོ་ཀུན་ཏུ་འཆང་། །དཔལ་གྱི་འབྱུང་གནས་ཀུན་གྱི་རྗེ། །པདྨ་ཐབ་པའི་དཔལ་མངའ་བ། །དཔལ་ལྡན་པདྨའི་རྒྱལ་པོ་ཆེ་ཧོཿ། ལས་ཀྱི་བདག་པོ་ཀུན་ཏུ་འཕྲོ། །ཡེ་ཤེས་ཡོན་ཏན་སྡུད་མཛད་པ། །རྡོ་རྗེའི་འཐོར་རླུང་ཆེན་པོ་ཡི། །རྣམ་རྟོག་ཀུན་ཏུ་བརླག་མཛད་ཆེ་ཧོཿ། དབྱིངས་ཀྱི་རྒྱལ་པོ་ཀུན་ཏུ་བཟང་། །དེ་བཞིན་ཡུམ་མཆོག་དབྱིངས་ཕྱུག་མ། །ཞི་ཁྲོ་རབ་འབྱམས་སྤྲོ་བའི་བདག། ཀུན་གྱི་བྱེད་པོ་ཀུན་བཟང་ཆེ་ཧོཿ། ཆོས་ཉིད་སྟོང་པའི་རང་སྒྲ་འདི། །གཏད་མེད་རྣལ་འབྱོར་རྒྱལ་པོས་བླངས། །སྲིད་གསུམ་ཡེ་ནས་སངས་རྒྱས་ཞིང་། །རིགས་ལྔའི་ངོ་བོར་ལྷུན་རྫོགས་ཆེ་ཧོཿཨ་ཧོ་ཨོཾ་ཨཱཿཧཱུྃ་ཧོཿ། པདྨ་ཡེ་ཤེས་རྡོ་རྗེས་མཁའ་འགྲོ་འདུ་བའི་ཚེས་༢༥ཉི་ཤར་ལའོ།། །། ༈ བཀའ་བརྒྱུད་གྲུབ་ཐོབ་རྒྱ་མཚོ་མཁྱེན་ནོ། །རི་གངས་དཀར་གྱི་རྒྱལ་པོ་ཏི་སེ་ན། །རྗེ་རྣལ་འབྱོར་དབང་ཕྱུག་མི་ལ་རྗེ། །མཚན་ཐོས་པས་ངན་འགྲོའི་སྡུག་བསྔལ་སེལ། །ཕ་དྲན་ཆོག་རྒྱལ་པོ་ཐོས་པ་དགའ། །མི་ལས་ངན་བདག་ལ་ཐུགས་རྗེས་གཟིགས། །གནས་འཁོར་བ་ངན་སོང་གཡང་ལས་སྐྱོབས། །བུ་ཐུགས་རྗེའི་ཕྱག་གིས་འཛིན་པར་མཛོད། །ལས་ངན་པའི་དབང་དུ་མ་གཏོང་ཞིག། ཆོས་ཟབ་མོ་མདོ་སྔགས་རྒྱུད་སྡེ་ཐོས། །ཚུལ་བཞིན་དུ་ཉམས་སུ་མ་བླངས་པས། །རྒྱུད་ཆུ་ནང་རྡོ་བ་ལྟར་དུ་གྱུར། །གཞན་མགོ་སྐོར་གྱི་ཚུལ་འཆོས་སྤྱོད་པ་ལས། །ནང་ཉོན་མོངས་དུག་ལྔ་མེ་ལྟར་འབར། །རང་ཐར་མེད་དམྱལ་བའི་གཏིང་རྡོ་བྱེད། །སྡོམ་དམ་ཚིག་མི་སྲུང་འཆལ་བར་ཤོར། །དཀོར་ནག་པོ་གང་བྱུང་ཧབ་ཐོབ་བྱེད། །དགེ་སྡིག་གི་ངོ་བོ་ཤེས་བཞིན་དུ། །རྒྱུད་མི་དགེ་སྡིག་པའི་དབང་དུ་བཏང་། །བསྐྱེད་རྫོགས་ཀྱི་རིམ་པ་བསྒོམ་ལ་ཡང་། །ཐ་མལ་གྱི་སྣང་ཤེས་དམ་པོས་བཅིངས། །རྗེ་བླ་མ་རྣམས་ལ་མོས་གུས་ཆུང་། །གསོལ་འདེབས་ཀྱི་འུར་དིང་ཁ་ཙམ་ཟད། །མ་སེམས་ཅན་ཀུན་གྱི་དྲིན་མི་དྲན། །བྱམས་སྙིང་རྗེ་བྱང་སེམས་སྟོར་ནས་སོང་། །བདག་གཅེས་འཛིན་གྱི་འགོང་པོ་ཁོང་དུ་གབ། །རང་བདེ་བར་འདོད་པའི་བློ་ངན་སྐྱེས། །གཞན་ཆོས་བྱེད་རྣམས་ལ་དག་སྣང་མེད། །ཟུར་ཟ་དང་ཕྲག་དོག་གདོན་གྱིས་གཙེས། །དེ་ལྟ་བུའི་སྐལ་ངན་བློ་གྲོས་ལ། །རྗེ་བཞད་པ་རྡོ་རྗེས་བསྐྱབ་ཏུ་གསོལ། །བློ་དམ་པའི་ཆོས་ལ་བསྒྱུར་དུ་གསོལ། །ཞེས་སྐྱོ་གླུ་ཟླ་ཚེས་ལའོ།། །། ༈ ཚོགས་གླུ་ཌཱ་ཀི་དགྱེས་རོལ་བཞུགས། ཨ་ཧོ་ཡེ། རྔ་ཡབ་དཔལ་རི་པད་འོད་སྤྲུལ་སྐུ་ཡི་ཞིང་ཁམས། །རྡོ་རྗེའི་བླ་མ་པདྨ་འབྱུང་གནས་དེ་མཁྱེན་ནོ། །མ་གཅིག་ཌཱ་ཀི་ཡེ་ཤེས་མཚོ་རྒྱལ་དེ་མཁྱེན་ནོ། །པད་འབྱུང་ཡབ་ཡུམ་ཐུགས་རྗེས་འབྲལ་མེད་དུ་གཟིགས་ཤིག། ལས་སྨོན་སྐལ་པ་ལྡན་པས་གསོལ་བ་ཞིག་འདེབས་ན། །བདེ་ཆེན་ཐར་པའི་ཞིང་དུ་ད་ལྟ་རང་དྲངས་མཛོད། །མ་ལུས་འགྲོ་བ་འདྲེན་པའི་དེད་དཔོན་དུ་གྱུར་ཅིག། སྙན་འགྱུར་གདུང་བའི་དབྱངས་ཀྱིས་ཉིན་མཚན་དུ་འབོད་ན། །མ་ཡིས་བུ་ལ་བརྩེ་བཞིན་མངོན་སུམ་དུ་འདིར་བྱོན། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡི་བྱིན་ཆེན། །ད་ལྟ་ཉིད་དུ་སྩོལ་བའི་དངོས་གྲུབ་ཞིག་ཞུ་ན། །བུ་ཡི་ལུས་ངག་ཡིད་གསུམ་བྱིན་གྱི་རང་རློབས་ཤིག། ཅེས་པའང་ཆོས་ཀྱི་བློ་གྲོས་པས་སོ།། །། ༈ ཚོགས་གླུ་ཌཱ་ཀིའི་དབྱངས་སྙན་ཞེས་བྱ་བ་བཞུགས་སོ། །ཨ་ཧོ་ཡེ། ངོ་མཚར་འཇའ་འོད་འཁྲིགས་པའི་སྤྲིན་དཀར་གྱི་དབུས་ན། །མཚོ་སྐྱེས་རྡོ་རྗེ་དཔའ་བོ་ཌཱ་ཀི་ཡི་ཚོགས་ཀྱིས། །བྱིན་རླབས་བཀྲ་ཤིས་མེ་ཏོག་དཀར་པོ་ཡི་སིལ་མས། །དེང་འདིར་འཆི་མེད་གྲུབ་པའི་དངོས་གྲུབ་ཞིག་སྩོལ་ཞུ། །དཔའ་བོ་མཁའ་འགྲོ་རྡོ་རྗེའི་གླུ་གར་གྱི་རོལ་རྩེད། །དགའ་བཞི་ཡེ་ཤེས་ཆེན་པོའི་རྩེ་མོ་རུ་སོན་པའི། །ལྷན་སྐྱེས་ཤིན་ཏུ་རྣམ་དག་ཡེ་ཤེས་འདི་ཨ་ཧོ། །སྣང་སྲིད་དཀྱིལ་འཁོར་འཁོར་ལོར་འཆར་བ་འདི་ངོ་མཚར། །ཚིམ་པ་དྲུག་ལྡན་ག་ཎ་ཙ་ཀྲ་ཡི་ལོངས་སྤྱོད། །ཞེན་མེད་རོལ་པ་ལས་བྱུང་འཆི་མེད་ཀྱི་བདུད་རྩི། །རྣལ་འབྱོར་གྲུབ་པ་པདྨ་ཀཱ་ར་ཡི་ལང་ཚོ། །ཚེ་འདིར་མངོན་སུམ་གྲུབ་པའི་དགའ་སྟོན་ཞིག་ཞུའོ། ཨ་ཧོ་ཡེ། འོག་མིན་ཨོ་རྒྱན་དྷུ་མ་ཐ་ལ་ཡི་ཞིང་ཁམས། །རིག་འཛིན་དཔའ་བོ་མཁའ་འགྲོའི་ཚོམ་བུ་དེ་ཨ་ཧོ། །གདན་གསུམ་རྡོ་རྗེ་ཕུང་པོའི་གྲོང་ཁྱེར་གྱི་ཀློང་ན། །རབ་འབྱམས་རྩ་གསུམ་རྒྱ་མཚོའི་ཆོ་འཕྲུལ་དེ་ངོ་མཚར། །ཙིཏྟ་མཆོང་གུར་སྨུག་པོ་དཔལ་རི་ཡི་པད་འོད། །མ་ཧཱ་གུ་རུའི་དགྱེས་ཞལ་འཛུམ་དཀར་དེ་ངོམ་བྱུང་། །བདེ་སྟོང་གཉིས་སུ་མེད་པའི་མཆོད་སྤྲིན་ཞིག་ཕུལ་ན། །གསང་ཆེན་མཆོག་གི་དངོས་གྲུབ་ད་ལྟ་རང་སྩོལ་ཅིག། རྨད་བྱུང་ཚོགས་ཀྱི་འཁོར་ལོའི་འདུ་བ་ནི་ཉམས་དགའ། །རྣལ་འབྱོར་ཕོ་མོ་ལྷ་ཡི་དགའ་སྟོན་གྱི་རོལ་པས། །ཟག་མེད་བདེ་སྟོང་བདུད་རྩིའི་སྤྲིན་ཕུང་ནི་གཡོས་པས། །སྣང་སྲིད་བདེ་མཆོག་རྡོ་རྗེའི་རོལ་མོ་ཞིག་འཁྲོལ་ལོ། །ཅེས་པའང་མེ་ཕག་ས་ཟླའི་དམར་ཕྱོགས་ཀྱི་དགའ་བ་གཉིས་པར་གླིང་དཀར་བདག་བཙུན་ལྷན་རྒྱས་ཀྱིས་རིགས་འདུས་ཚོགས་ཀྱི་དགའ་སྟོན་གྱི་འདུ་བ་ཆེན་པོའི་སྐབས་སུ་རིག་འཛིན་གྱི་བཙུན་པ་པདྨ་ཡེ་ཤེས་རྡོ་རྗེས་གླུར་བླངས་པའོ།། །། ༈ ཚོགས་ཀྱི་གླུ་ཡེ་ཤེས་བྱིན་འབེབས་ཅེས་བྱ་བ་བཞུགས་སོ། །ཨ་ཧོ་ཡེ། སྟེང་རྣམ་དག་འཇའ་འོད་འཁྲིགས་པ་ཡི་ཀློང་ན། །ཕ་རྩ་གསུམ་ཀུན་འདུས་པདྨ་འབྱུང་གནས་དེ་བཞུགས་ཡོད། །འཁོར་རིག་འཛིན་དཔའ་བོ་མཁའ་འགྲོ་ཡི་བསྐོར་ནས། །བུ་བདག་ལ་དགྱེས་པའི་འཛུམ་ཞལ་ནི་ལམ་མེ། །མཁྱེན་བརྩེ་དང་ནུས་པ་ཚད་མེད་ཀྱི་གཏེར་ཆེན། །མི་བདག་གི་རེ་ལྟོས་འདུན་པ་ཡི་གཏད་ས། །ཕ་ཁྱེད་ཀྱི་ཐུགས་རྗེས་བསླུ་བ་ནི་མི་སྲིད། །དུས་བཟང་པོ་ཚེས་བཅུའི་མཆོད་པ་ཡི་དུས་ཆེན། །ཡུལ་གནས་དང་ཉེ་གནས་མཁའ་འགྲོ་ཡི་འདུ་བ། །ཚད་བཟུང་ལས་འདས་པའི་ཚོགས་གྲལ་གྱི་དབུས་ན། །ང་གཏད་མེད་རིག་པའི་ཁྱེའུ་ཆུང་འདི་སྐྱིད་དོ། །ཚོགས་འདོད་ཡོན་སྤྲིན་ཕུང་ནམ་མཁའ་ལྟར་ཁྱབ་ཅིང་། །ལྷ་རྡོ་རྗེའི་དབང་པོས་དགྱེས་རྒུར་ནི་རོལ་པས། །ཉམས་བདེ་ཆེན་ཟག་བྲལ་དགའ་བཞི་ནི་འབར་རོ། །སྒྲ་གྲགས་སྟོང་ཨ་དཱི་ཀ་དཱི་ཡི་མཆོད་དོ། །སྐུ་གར་གྱི་ཉམས་བརྒྱའི་བྲོ་བརྡུང་ནི་ཁྲིགས་སེ། །ཐུགས་ཨ་ཧཾ་འབར་འཛག་བདེ་སྟོང་གིས་མྱོས་པས། །རྩ་འཁོར་ལོ་བཞི་ཡི་ལྷ་ཚོགས་ཀྱིས་གར་བསྒྱུར། །ལུས་ཕུང་ཁམས་སྐྱེ་མཆེད་ལྷར་སྣང་དུ་བྱིན་རློབས། །ངག་སྲོག་རྩོལ་འགྲོ་འོང་དབུ་མ་རུ་དེངས་ནས། །ཡིད་རྟོག་ཚོགས་འོད་གསལ་ཆེན་པོ་ཡི་སྦུབས་ཞུགས། །གཞི་པདྨ་དྲ་བ་ཆེན་པོ་ཡི་ཞིང་དུ། །འབྲས་རང་རིག་སྐུ་གསུམ་མཚོ་སྐྱེས་རྗེའི་ཞལ་མཇལ། །མ་འགྲོ་དྲུག་འཁོར་བ་དོང་སྤྲུགས་སུ་ཤོག་ཅིག། ཅེས་པའང་ལྕགས་འབྲུག་དབོ་ཟླ་བའི་ཚེས་བཅུར་གླིང་རྗེ་ཡབ་སྲས་སོགས་དང་ཐུགས་སྒྲུབ་བར་ཆད་ཀུན་སེལ་ཚོགས་ཀྱི་འདུ་བར་སྤྱོད་པའི་སྐབས་བྲིས་བའོ།། །། ༈ ཚོགས་ཀྱི་གླུ་ཌཱ་ཀིའི་དབྱངས་སྙན་ཅེས་བྱ་བ། ཨ་ཧོ་ཡེ། བརྒྱུད་གསུམ་རིག་འཛིན་བླ་མའི་བྱིན་རླབས་ཀྱི་སྦྲང་ཆར། །དད་གསུམ་གདུལ་བྱའི་ཡིད་ཀྱི་ཞིང་ས་རུ་འབེབས་པས། །སྐལ་བཟང་དཀྱིལ་འཁོར་རྣམ་བཞིར་སྐུ་བཞི་ཡི་མྱུ་གུ། །ཅི་དགར་རྒྱས་པའི་དངོས་གྲུབ་དམ་པ་འདི་ཨ་ཧོ། །བསྐལ་མང་གོང་ནས་བསྙེན་ཅིང་བསྒྲུབ་པ་ཡི་ལྷ་མཆོག། ཡི་དམ་དགོངས་འདུས་བཀའ་འདུས་ཆོས་ཀྱི་ནི་རྒྱ་མཚོ། །ཚོམ་བུ་ཉེར་གཅིག་དཀྱིལ་འཁོར་ཆེན་པོ་ཡི་དམ་དུ། །བསྙེན་སྒྲུབ་བཞི་ལྡན་རིག་འཛིན་མཆེད་ལྕམ་གྱི་ཚོགས་ཀྱིས། །ཕུན་སུམ་ཚོགས་པ་ལྔ་ལྡན་རང་བྱུང་དུ་འཛོམས་པས། །ལེགས་པར་སྒྲུབ་པའི་དགའ་སྟོན་མྱོང་བ་འདི་ཨ་ཧོ། །རྨད་བྱུང་ཚོགས་འཁོར་ཚིམ་པ་དྲུག་ལྡན་དུ་རོལ་པས། །ཟག་མེད་ཚོགས་གཉིས་རྒྱ་མཚོ་སྐད་ཅིག་ལ་ཟླུམ་པའི། །ངོ་མཚར་ཐབས་མཁས་གསང་ཆེན་རྡོ་རྗེ་ཡི་རོལ་མོ། །ཀུན་ཏུ་དགའ་བ་ཉམས་བཞིའི་རྣམ་འགྱུར་འདི་ཨ་ཧོ། །མ་དག་ཕུང་ཁམས་སྐྱེ་མཆེད་རྣམ་ཤེས་ཀྱི་ཚོགས་རྣམས། །ཡེ་ཤེས་ཉེར་གཅིག་དཔལ་ཆེན་དཀྱིལ་འཁོར་དུ་གྲུབ་ནས། །སྲིད་གསུམ་རྣམ་དག་དཔལ་ཆེན་ཧེ་རུ་ཀའི་དཀྱིལ་འཁོར། །གདོད་ནས་རང་ལ་རྫོགས་པ་ངོ་ཤེས་འདི་ཨ་ཧོ། །སྣང་སྲིད་ཐམས་ཅད་དོན་གྱི་བདུད་རྩི་རུ་རྫོགས་པ། །ཆོས་ཀྱི་བདུད་རྩི་ལྷ་སྔགས་ཡེ་ཤེས་ཀྱིས་སྦྱངས་པས། །རྟགས་ཀྱི་བདུད་རྩིའི་འདུ་འཕྲོའི་ཟེར་ཆེན་ནི་འབར་བས། །ཕྱག་རྒྱ་ཆེན་པོའི་བདུད་རྩི་གྲུབ་པ་འདི་ཨ་ཧོ། །འདི་ལ་འབྲེལ་བ་ཐོགས་པའི་སེམས་ཅན་གྱི་གཙོར་བྱས། །ཁམས་གསུམ་མ་འཁྲུལ་རང་བྱུང་རིག་པ་ནི་སྨིན་རྫོགས། །ཡེ་གྲོལ་ཆེན་པོའི་ས་ལ་འབད་མེད་དུ་ཕྱིན་ནས། །འཁོར་བ་དོང་སྤྲུགས་བརྙེས་པའི་ཕྲིན་ལས་འདི་ཨ་ཧོ། །བདག་ཅག་སྐལ་ལྡན་ཁྱད་འཕགས་སྒྲུབ་པོ་ཡི་རྣལ་འབྱོར། །རྡོ་རྗེའི་ལམ་གྱི་བགྲོད་པའི་ཕ་མཐའ་རུ་ཕྱིན་ནས། །འོག་མིན་གསང་བ་མཆོག་གི་གཞལ་མེད་ཁང་ཆེན་པོར། །ཚོམ་བུ་གཅིག་ཏུ་འཚང་རྒྱའི་རྟེན་འབྲེལ་ཞིག་ཞུའོ།། །། ༈ རྗེ་བླ་མའི་ཞབས་ལ་ཕྱག་འཚལ་ལོ། །ཕ་དྲིན་ཅན་བློ་གཏེར་དབང་པོ་མཁྱེན། །བུ་བློ་གྲོས་མིང་ཅན་བློ་ངན་བདག། ལོ་བཅུ་ཕྲག་ལྔ་ལ་སོན་པ་ཡི། །ཐ་སྐར་གྱི་ཟླ་བའི་ཚེས་བཅོ་ལྔའི། །ནམ་ཐོ་རངས་ཅུང་ཟད་མནལ་བ་ན། །དངོས་མཐོང་དུ་མེད་པའི་རིག་རྒྱུ་ཡི། །འཁྲུལ་པའི་སྣང་བ་ཤར་བ་ལ། །རྗེ་ཐམས་ཅད་མཁྱེན་པ་བློ་བཟང་གྲགས། །འཁོར་ཐུགས་སྲས་བཞི་པོ་དང་བཅས་པ། །ཐམས་ཅད་ཀྱང་གསེར་མདོག་ཆས་ལྡན་ཤར། །རྗེ་གཙོ་བོའི་ཞལ་ནས་བརྩེགས་གསུང་ཚོགས། །གླེགས་བམ་གྱི་རྣམ་པས་སྡོམ་གཏད་མཛད། །ཆོས་ཁྱད་འཕགས་གསང་འགྲེལ་སྒྲོན་གསལ་གྱི། །བཀའ་ཁྱོད་ལ་གཏད་དོ་ཞེས་གསུངས་ནས། །འཁོར་ཐམས་ཅད་མི་སྣང་གྱུར་པ་དང་། །རྒྱུད་འགྲེལ་གླེགས་བམ་བརྒྱད་སྟོང་ཙམ། །འོད་སྔོན་པོའི་རྣམ་པར་གནས་པ་དང་། །རྗེ་གསང་བ་འདུས་པ་ཕྱག་གཉིས་པའི། །སྐུར་གྱུར་ཏེ་དགོངས་པ་གཏད་པ་དང་། །གླེགས་བམ་དེ་གསང་འདུས་དཀྱིལ་འཁོར་གྱི། །ལྷ་སོ་གཉིས་གྱུར་ནས་གནས་གསུམ་ནས། །འོད་ཟེར་གྱི་བདུད་རྩིའི་དབང་བསྐུར་སྩལ། །སླར་གླེགས་བམ་གསང་འདུས་སྔགས་སུ་གྱུར། །རྗེ་བླ་མའང་སྔར་བཞིན་གྱུར་པ་དང་། །གླེགས་བམ་སྔགས་ཀྱི་རྣམ་པ་དེ། །བདག་ལུས་ལ་ཐིམ་པས་རང་གསང་འདུས། །མི་བསྐྱོད་པར་གྱུར་དང་ལུས་ནང་ཀུན། །སྔགས་མེར་གྱིས་གང་ནས་རང་སྒྲ་སྒྲོགས། །ལུས་སེམས་ལ་བདེ་བས་ཅུང་ཟད་ཁྱབ། །ཡིད་མི་རྟོག་ངང་ལ་ཕྱམ་མེར་བརྡལ། །གཉིད་སྲབ་མོ་དེ་ཡང་སད་པར་གྱུར། །རྗེ་འདི་ལ་སྔོན་ནས་འབྲེལ་པ་ནི། །ཆེས་ཟབ་མོ་ཡོད་པའི་ཉེར་ལེན་ལས། །རྗེ་གང་གི་བྱིན་རླབས་ཡང་ཡང་འཆར། །ཁ་བྱང་བསྟན་ཕུག་དེར་ཉི་མ་མེད། །དཔེ་དེ་བཞིན་རྗེ་ཡི་དགོངས་མཛད་ཀྱང་། །བུ་ལས་ངན་ལ་ཡར་སྐྱེད་ཅང་མ་མཆིས། །ལས་ངན་ཉོན་མོངས་ཀྱི་རྫབ་ཏུ་ལྷུང་། །དེ་བསམ་ཞིང་བསམ་ཞིང་སྙིང་རླུང་ལྡང་། །སྐྱེ་ངན་གྱི་སྐྱེ་བོ་བདག་འདྲ་ལ། །རྗེ་ཁྱེད་ཀྱི་ཐུགས་རྗེས་དགོངས་མཛད་ནས། །སྲིད་མེ་འདགས་ཀློང་ནས་བསྒྲལ་དུ་གསོལ། །འཁྲུལ་རྟོག་གི་རླུང་དམར་ཞི་བ་དང་། །ངན་སྤྱོད་ཀྱི་རྒྱུན་ཐག་ཆད་དུ་གསོལ། །བློ་གྲོས་ཀྱི་སྣང་བ་བསྐྱེད་དུ་གསོལ། །ཆོས་བྱང་ཆུབ་ཀྱི་སེམས་མཆོག་སྐྱེ་བར་མཛོད། །རྗེ་འཇམ་དབྱངས་བླ་མ་ཁྱེད་ཉིད་ཀྱིས། །དུས་ད་དུང་བྱང་ཆུབ་མ་ཐོབ་པར། །མི་བདག་གི་སྐྱབས་གནས་མཛད་པ་དང་། །ཐེག་མཆོག་གི་ཆོས་ཀྱི་རྒྱས་པར་མཛོད། །གསོལ་བ་སྙིང་ནས་འདེབས་སོ་བྱིན་གྱིས་རློབས། །ཉམ་ཐག་གི་ནད་པར་བྱིན་རླབས་ཀྱི། །ཕན་པ་འབྱུང་བ་དེ་བཞིན་དུ། །དངོས་གྲུབ་གྱི་སྐལ་བ་ཆེན་པོ་ཞིག། དུས་ད་ལྟ་སྨིན་པར་མ་གྱུར་ཀྱང་། །བྱིན་རླབས་ཀྱི་དགོངས་གཏང་ཟབ་མོ་དེས། །སྒྲིབ་གསུམ་དབྱིངས་སུ་དག་པར་ཤོག། གཞི་རྒྱུད་དེ་རང་ངོ་འཕྲོད་པ་དང་། །ལམ་རྒྱུད་ཀྱི་ཡེ་ཤེས་འཆར་བ་དང་། །འབྲས་རྒྱུད་གསང་བ་འདུས་པ་ཡི། །དཀྱིལ་འཁོར་དེ་མངོན་པར་བྱང་ཆུབ་ཤོག། རྗེ་ཁྱོད་ཀྱི་བསྟན་པས་འཛམ་གླིང་ཁྱབ། །དེ་ལ་འཁུ་ཞིང་སྡང་པ་ཡི། །ལྷ་མིན་གྱི་བདུད་ལས་རྒྱལ་བར་ཤོག། བཀྲ་ཤིས་ཀྱི་དགའ་ལྡན་དར་རྒྱས་ཤོག། །། ༈རྗེ་བླ་མ་རྣམས་ལ་ཕྱག་འཚལ་ལོ། །གནས་ལུགས་རང་སོ་ཟིན་པར་བྱིན་གྱིས་རློབས། །གཞི་ཀ་དག་སྤྲོས་པ་བྲལ་བ་དེར། །བློས་བྱས་ཀྱིས་གསར་དུ་བསྒྲུབ་མི་དགོས། །གདོད་མ་ནས་སྟོང་ཆེན་དེ་བཞིན་ཉིད། །དེ་ཆོས་རྣམས་ཀུན་ལ་ཁྱབ་པར་བཞུགས། །སེམས་ཅན་གྱི་རྒྱུད་ལ་བདེ་གཤེགས་སྙིང་། །དབྱིངས་དང་ཡེ་ཤེས་གཉིས་མེད་པ། །བྲི་གང་དང་འཕོ་འགྱུར་བྲལ་བར་གདའ། །དེ་དཔལ་ལྡན་བླ་མའི་བྱིན་རླབས་ཀྱིས། །རང་གནས་ཀྱི་ཡེ་ཤེས་རྗེན་པར་རྟོགས། །དེ་ལ་བློ་ཡི་བསླད་མ་ཞུགས། །ལྟ་བ་དེ་རང་ངོ་ཤེས་པས་ཆོག། དེའི་ངང་ལ་མ་ཡེངས་མ་འཛིན་པར། །རིག་པ་ཅོག་གེར་བཞག་པ་དང་། །ཡུལ་ཤེས་དབྱེར་མེད་མཉམ་པ་ཉིད། །ཟང་ཐལ་གྱི་རིག་པ་ས་ལེ་བ། །སང་དེ་ཡེ་རེ་རྗེེན་ནེ་འཆར། །སྒོམ་པ་ཟེར་ཀྱང་མི་བསྒོམ་པ། །བསྒོམ་མེད་ངང་དེར་བབས་ཀྱིས་བཞག། །ཚོགས་དྲུག་གི་སྣང་བ་གང་ཤར་དང་། །རྩལ་གྱི་རྟོག་པ་ཅི་ཤར་ཡང་། །མི་སྤྲོ་མི་དགག་མི་བསྡུ་བར། །རང་ཤར་རྒྱ་ཡན་ངང་བཞག་པས། །ཆོས་ཉིད་ངང་དེར་རང་གྲོལ་ཞིང་། །རེ་དོགས་མེད་པའི་སྤྱོད྄༵་པ་ལགས། །མཉམ་པར་བཞག་དང་མ་བཞག་ཀུན། །རིག་པ་འོད་གསལ་ཆེན་པོའི་ངང་། །དུས་རྟག་ཏུ་མི་གཡོ་མི་འགྱུར་བས། །འབྲས༷་སྐུ་གསུམ་དགོངས་པའི་རྩལ་རྫོགས་ཤིང་། །མ་རིགས་དྲུག་འཁོར་བ་དོང་སྤྲུགས་ཤོག། ཚིག་དེ་སྐད་འཇུ་སྔགས་སྐལ་ཕྲིན་གྱིས། །ནན་དུ་བསྐུལ་བའི་ངོ་མ་ལྕོགས། །ཆོས་མེད་ཀྱི་དྲེད་པོ་བློ་གྲོས་པས། །རང་མྱོང་བ་མེད་བཞིན་རྡོལ་ཐབས་སྨྲས། དགེའོ།། །། ༈ ཨ་ཧོ་ཡེ། གནས་མཆོག་བཀྲ་ཤིས་འཆི་མེད་གྲུབ་པ་ཡི་དགའ་ཚལ། རྩ་གསུམ་རབ་འབྱམས་མངོན་གསུམ་བཞུགས་པ་ཡི་ཕོ་བྲང་། །བྱིན་རླབས་གཟི་བརྗིད་འབར་བའི་གཞལ་མེད་ཁང་ཆེན་པོར། །དཔལ་ལྡན་ས་སྐྱའི་འཁོན་རིགས་འཇམ་དཔལ་ནི་གཞོན་ནུ། །གོས་དཀར་ལྕང་ལོའི་སྐུར་འཆང་ཀུན་དགའ་ནི་བསོད་ནམས། །སྲས་ཡུམ་དགྱེས་པའི་ཞལ་རས་ཟླ་རྒྱས་ལྟར་གསལ་བ། །མངོན་སུམ་མཇལ་བའི་དགའ་སྟོན་དར་ལ་ནི་བབ་ཅིང་། གསུང་གསང་ཀ་ལ་པིངྐའི་སྒྲ་དབྱངས་ལྟར་སྙན་པ། །ལྷུག་པས་གྲོལ་བའི་སྐལ་བཟང་མཐོ་རིས་ཀྱི་གྲོང་ཁྱེར། །ས་འདིར་མངོན་སུམ་འཕོས་པའི་དགེ་མཚན་འདི་ཨ་ཧོ། །བདག་ཅག་རིག་འཛིན་མཆེད་ལྕམ་རྩེ་འཇོ་ཡི་རོལ་ཞིང་། །ཅིར་སྣང་ཐམས་ཅད་བདེ་ཆེན་ཡེ་ཤེས་ཀྱི་རོལ་མོར། །འཆར་བ་འདི་འདྲའི་དགའ་བདེ་མཚོན་དཔེ་ལས་འདས་ཤིང་། །ཉམས་སུ་མྱོང་བའི་ངོ་མཚར་བཀྲ་ཤིས་འདི་ཨ་ཧོ། །སླད་ནས་སྒྲིབ་མེད་སྟོན་འཁོར་ལྷན་གཅིག་ཏུ་འཚོགས་ནས། །ལུགས་བརྒྱའི་དཔལ་ཡོན་ཕུན་ཚོགས་འབད་མེད་དུ་འབྱོར་ཏེ། །སྲིད་ཞིའི་མཐའ་ལས་འདས་པའི་བྱང་ཆུབ་ཀྱི་གོ་འཕང་། །ཆོས་ཀྱི་འཁོར་ལོས་བསྒྱུར་བའི་དགེ་ལེགས་ཀྱི་པད་ཚལ། །ནུབ་མེད་མྱུར་དུ་འཆར་བའི་བཀྲ་ཤིས་ཤིག་ཞུའོ། །ཅེས་པའང་ཤིང་འབྲུག་ཆོ་འཕྲུལ་ཟླ་བའི་དཀར་ཕྱོགས་ཀྱི་རྒྱལ་བ་དང་པོའི་ཚེས་ལ་སྔགས་འཆང་ཆོས་ཀྱི་རྒྱལ་པོ་ཡབ་སྲས་ལ་ཐུགས་དགྱེས་པའི་མཆོད་སྤྲིན་དུ་ཕུལ་བའོ།། །། ༈ ཨ་ཧོ་ཡེ། མི་འགྱུར་དྷུ་ཏིའི་དབྱིངས་ན། །ཆོས་སྐུ་རྡོ་རྗེ་ཕག་མོ། །ཐབས་མཆོག་བདེ་ཆེན་དཔའ་བོར། །སྙོམས་འཇུག་ཁ་སྦྱོར་བདེ་བའི། །རོལ་གར་ལོངས་སྤྱོད་རྫོགས་སྐུ། །བཅོམ་ལྡན་རྡོ་རྗེ་ཕག་མོ། །གང་འདུལ་ཡེ་ཤེས་སྒྱུ་མ། །གངས་ཅན་བོད་ཀྱི་ཡུལ་དུ། །དབྱིངས་ཕྱུག་བདེ་ཆེན་རྒྱལ་མོ། །དབྱེར་མེད་དྲིན་ཅན་བླ་མར། །གསོལ་བ་སྙིང་ནས་འདེབས་སོ། །མི་བཤིག་རྡོ་རྗེའི་གནས་ལུགས། །རང་གནས་མངོན་སུམ་སད་ནས། །ཡེ་ཤེས་གཟི་བྱིན་འབར་བས། །རྩ་རླུང་ཐིག་ལེའི་མདུད་གྲོལ། །སྐུ་གསུམ་ཕག་མོའི་གོ་འཕང་། །ཚེ་འདི་ཉིད་ལ་བརྙེས་པའི། །རྟེན་འབྲེལ་སྙིང་ནས་ཞུའོ།། །། ༈ ཁྲོ་རྒྱལ་དགྱེས་པའི་གད་རྒྱངས་ཞེས་བྱ་བ་བཞུགས་སོ། །ཤྲཱི་ཨ་ལ་ལ་ཧོ། བཛྲ་ཀྲོ་དྷ་བདེ་བ་ཆེ། །ཡཀྴ་དེ་ཝ་ལྷ་ཡི་ལྷ། །དབང་ཕྱུག་རྣམས་ཀྱི་ཕྱག་བྱ་བ། །དཔལ་ཆེན་གཙོ་ལ་ཕྱག་འཚལ་ལོ། །རིག་སྔགས་ཀུན་གྱི་བདག་པོ་མཆོག། དོན་ཡོད་རྡོ་རྗེ་དེ་བཞིན་གཤེགས། །བགེགས་འདུལ་ཁྲོ་རྒྱལ་གཙོ་མཆོག་གི །ཁམས་གསུམ་པོ་རྣམས་བཀྲ་ཤིས་ཤོག། བར་ཆད་བདུད་དཔུང་ཕྱེ་མར་འཐག། དངོས་གྲུབ་ཆེན་པོ་ཀུན་གྱི་དབྱིག། དབང་མཛད་དབང་བསྒྱུར་བཅོམ་ལྡན་འདས། །ཁྲོ་བོའི་རྒྱལ་པོས་དགེ་ལེགས་སྩོལ། །ཅེས་པའང་ཤིང་ཁྱི་ཟླ་༡༠ཚེས་༩ལའོ།། །། ༈ གདུང་དབྱངས་ཐུགས་རྗེས་འཛིན་བཞུགས། ཨ་ཧོ། མཁྱེན་བརྩེ་ནུས་པའི་གཏེར་མཛོད། །ལས་རབ་གླིང་པ་མཁྱེན་ནོ། །འོད་གསལ་ཀློང་ནས་གཟིགས་ཤིག། རྟག་ཏུ་ཁྱེད་ཀྱིས་བྱིན་རློབས། །རྔ་ཡབ་དཔལ་རིའི་ཕོ་བྲང་། །མ་ཧཱ་གུ་རུའི་བཞུགས་གྲལ། །དྷ་ཀིའི་ཚོགས་དང་ལྷན་གཅིག། དགྱེས་དགུར་སྤྱོད་པ་དགའ་འོ། །པདྨས་བོད་འབངས་སྐྱོབས་པར། །མངག་པའི་ཕོ་ཉ་མཆོག་ཉིད། །བོད་འབངས་ཤུལ་དུ་བཞག་ནས། །པདྨ་འོད་དུ་གཤེགས་སམ། །བདག་ཅག་ཁྱེད་ཀྱི་ཐུགས་རྗེས། །ཤུལ་དུ་འདོར་བར་བཟོད་དམ། །བསྐལ་ངན་དུས་ཀྱི་རྒུད་པ། །རྒྱུན་མི་ཆད་པས་མནར་ཚེ། །ཁྱོད་ཉིད་ཞི་བར་གཞོལ་ན། །དམ་བཅའ་ཉམས་པ་འགྱུར་ཏེ། །ཟབ་རྒྱས་གཏེར་གྱི་རྒུད་པ། །འགྲོ་དོན་མཁའ་ཁྱབ་འབྱུང་བར། །ད་སླད་ཅི་ཚུགས་བྱེད་དམ། །མ་རིག་མུན་སེལ་སྒྲོན་མེ། །པདྨས་མཆོག་བསྟན་རྒྱས་མཛད། །མཚུངས་བྲལ་གཏེར་ཆེན་དྲ་པ། །ཕ་གཅིག་རིན་ཆེན་གཙུག་ནོར། །བུ་ཡི་གདུང་དབྱངས་འདི་ལ། །དགོངས་ནས་མཁས་གྲུབ་གཉིས་ལྡན། །མཆོག་གི་སྤྲུལ་སྐུར་བཞེངས་ནས། །ལས་འཕྲོ་གཏེར་གྱི་བསྟན་པ། །ས་གསུམ་ཁྱབ་པར་མཛོད་ཅིག། བོད་ཁམས་གདུག་པའི་ཚ་ངར། །ལྷག་མེད་ཞི་ནས་བདེ་སྐྱིད། །ཡར་ཟླའི་དཔལ་ལ་འགྲན་ཞིང་། །རྒྱལ་བསྟན་སྤྱི་དང་ཁྱད་པར། །སྔ་འགྱུར་བསྟན་པ་རྒྱས་མཛོད། །ཕྲིན་ལས་རྣམ་བཞི་ཐོགས་མེད། །གང་འབྲེལ་ཐར་པའི་སར་བཀྲི། །མཆོག་གི་དངོས་གྲུབ་སྟེར་བས། །སྤྲུལ་པ་དུས་གསུམ་བཀྲ་ཤིས། །བཀྲ་ཤིས་ཡུན་དུ་གནས་ཤོག། ཅེས་པའང་མི་ཕྱེད་དད་བའི་བློས་ཐོལ་བྱུང་དུ་འཇམ་དབྱངས་བློ་གྲོས་རྒྱ་མཚོས་གསོལ་བ་བཏབ་པའོ།། །། ༈ ཀུན་མཁྱེན་ཆོས་ཀྱི་རྒྱལ་པོ་རྗེས་དྲན་གྱི་གླུ་མོས་གུས་ཀྱི་རླབས་ཕྲེང་ཞེས་བྱ་བ་བཞུགས་སོ། །མཁྱེན་ནོ་མཁྱེན་ནོ་ཀུན་མཁྱེན་ཆོས་ཀྱི་རྒྱལ་པོ་མཁྱེན་ནོ། །ཆོས་དབྱིངས་དག་པའི་འོད་གསལ་མཁའ་ལ། །ཐུགས་རྗེའི་ཉི་ཟླའི་འོད་ཟེར་འཕྲོ་བས། །བདག་རྒྱུད་རྨོངས་པའི་མུན་པ་སེལ་མཛད། །ཀུན་མཁྱེན་བླ་མས་བྱིན་གྱིས་རློབས་ཤིག། ལྟ་བ་སྤྲོས་བྲལ་བརྡལ་ཁྱབ་ཆེན་པོར། །བསྒོམ་པ་འོད་གསལ་ཉིན་མཚན་ཁ་སྦྱོར། །སྤྱོད་པ་གང་ཤར་ཞེན་མེད་རང་གྲོལ། །ཀུན་མཁྱེན་བླ་མས་བྱིན་གྱིས་རློབས་ཤིག། ཇི་ལྟར་སྣང་བ་སྣ་ཚོགས་ཆོས་འདི། །མེད་བཞིན་གློ་བུར་འཁྲུལ་པའི་སྣང་བ། །ཐོག་མེད་བག་ཆགས་ངན་པས་བསྐྱེད་པའི། །བརྫུན་ཕུག་རྡིབ་པར་བྱིན་གྱིས་རློབས་ཤིག། མ་རིག་འཁྲུལ་པའི་གདོན་ཆེན་འདི་ཡིས། །སྙིང་ལ་ཟིན་པས་ཀུན་ཏུ་རྨོངས་ཤིང་། །ཆོས་ཉིད་ཀུན་ཁྱབ་རང་བྱུང་ཡེ་ཤེས། །མཐོང་དུ་མི་འཇུག་སྒྲིབ་བ་འདི་ཀོ། །ཀུན་མཁྱེན་ཁྱེད་ཀྱིས་དེ་རིང་བསལ་མཛོད། །སྣ་ཚོགས་མཐོང་བ་རང་བཞིན་བཞག་ནས། །རང་སར་གྲོལ་བའི་གདེང་ཆེན་རྙེད་ན། །སྲིད་པའི་ཉེས་བརྒྱའི་སྒྲོག་ཏུ་མི་འཆིང་། །ཡེ་ཤེས་ཁྱེའུ་ཆུང་རང་ཞལ་ངོམ་མཛོད། །རང་བྱུང་རང་ཤར་རིག་བའི་རྒྱལ་པོ། །གུ་ཡངས་ནམ་མཁར་མདུང་བསྐོར་ཇི་བཞིན། །ཆོས་དབྱིངས་ཀུན་མཉམ་ཡངས་པ་ཆེན་པོར། །ང་ཡི་རིག་པ་གཏད་མེད་ཐོངས་ཤིག། མཁྱེན་ནོ་མཁྱེན་ནོ་ཀུན་མཁྱེན་བླ་མ། །རྫོགས་པའི་སངས་རྒྱས་དྲི་མེད་འོད་ཟེར། །ཁྱེད་ཀྱི་ཐུགས་རྗེས་བདག་ལ་གཟིགས་ཤིག། ལས་ངན་རྒྱ་མཚོ་ཆེན་པོར་ལྟུང་བའི། །རྨོངས་པ་བདག་འདྲ་སྐུ་སྐྱེའི་མིང་ཐོགས། །སྡིག་རྒན་དཀོར་ནག་རྐྱལ་པ་ཆེན་པོ། །སྡོམ་པ་དམ་ཚིག་ཆུ་ལ་བོར་ན། །ཕྱི་མར་རྡོ་རྗེའི་དམྱལ་བ་བསྒྲུབ་པ། །སྐྱེ་ངན་བདག་ལ་ཡེ་ཤེས་སྤྱན་གྱིས། །མི་འབྲལ་གཟིགས་ནས་བྱམས་པའི་ཕྱག་གིས། །དམ་པོར་ཟུངས་ཤིག་ཀུན་མཁྱེན་བླ་མ། །བླུན་རྒན་བདག་ཉིད་ཐར་པར་དྲོངས་ཤིག། བཤེས་གཉེན་དམ་པའི་མགོན་གྱིས་ཟིན་ཅིག། ཟབ་རྒྱས་དམ་ཆོས་རྩྭ་བཞིན་བཀྲམ་ཀྱང་། །ཁྱི་རྒན་བདག་གི་གལ་ཆུང་དུ་བསྐྱུར། །ཆོས་དྲེད་ཆོས་དང་རྒྱབ་འགལ་གྱུར་ལ། །མཁྱེན་བརྩེའི་ནུས་པའི་མཐུ་ནུས་རྩལ་སྤྲུགས། །འཁོར་བའི་འདམས་ལས་ད་ལྟ་དྲོངས་ཤིག། སྲིད་པའི་མེ་ཆེན་ཐུགས་རྗེའི་ཆར་གྱིས། །ད་ལྟ་ཉིད་དུ་སེལ་བར་མཛོད་ཅིག། དེང་ནས་བཟུང་སྟེ་ཚེ་རབས་ཀུན་ཏུ། །དལ་འབྱོར་དོན་ཡོད་བྱེད་པར་ཤོག་ཅིག། མི་རྟག་འཆི་བ་རྗེས་སུ་དྲན་ནས། །སྲིད་ལས་ངེས་འབྱུང་དྲག་པོ་སྐྱེ་བར། །ཀུན་མཁྱེན་བླ་མས་བྱིན་གྱིས་རློབས་ཤིག། ཐེག་ཆེན་ལམ་གྱི་སྙིང་ནོར་གཅིག་པུ། །བྱང་ཆུབ་སེམས་མཆོག་ཡང་ཡང་བསྒོམ་ནས། །འགྲོ་བའི་དོན་ལ་སྐྱོ་དུབ་མེད་པ། །རིགས་གསུམ་སེམས་པའི་རྣམ་ཐར་ཇི་བཞིན། །གཞན་ཕན་མཐའ་ཡས་འབྱུང་བར་བྱིན་རློབས། །བདག་གི་སྒོ་གསུམ་བྱ་བ་ཅི་བྱས། །ཕ་མ་སེམས་ཅན་དོན་དུ་འགྱུར་ནས། །རིགས་དྲུག་འགྲོ་ཁམས་དོང་ནས་སྤྲུགས་པར། །ཀུན་མཁྱེན་བླ་མས་བྱིན་གྱིས་རློབས༴ །རིག་སྟོང་འོད་གསལ་ཐེག་རྩེའི་རྣལ་འབྱོར། །ཀ་དག་ལྷུན་གྲུབ་དགོངས་པའི་རྩལ་རྫོགས། །ཀློང་ཆེན་རབ་འབྱམས་མངོན་དུ་འགྱུར་བར། །ཀུན་མཁྱེན་བླ་མས་བྱིན༴ །ཀུན་མཁྱེན་བླ་མ་དྲི་མེད་འོད་ཟེར། །བདག་ལ་སྐྱིད་སྡུག་ལེགས་ཉེས་ཅི་བྱུང་། །ཁྱེད་རང་མཁྱེན་ནོ་བྱིན་གྱིས༴ །མྱུར་བ་ཉིད་དུ་བྱིན༴ །འདུག་ས་འདི་རུ༴ །བུ་ཡི་བྱ་བ་བྱེད་པ་ཐམས་ཅད། །ཀུན་མཁྱེན་བླ་མས་དོན་ཡོད་མཛོད་ཅིག། མདོར་ན་ཆོས་ཀྱི་རྒྱལ་པོ་ཁྱེད་དང་། །དབྱེར་མེད་ཉིད་དུ་བྱིན་གྱིས་རློབས་ཤིག། མཁྱེན་ནོ་མཁྱེན་ནོ་ཀུན་མཁྱེན་བླ་མ་མཁྱེན་ནོ། །ཞེས་པའང་ཆུ་སྤྲེལ་ཁྲུམས་ཟླའི་ཚེས་༢༥ལ་ཀུན་མཁྱེན་བླ་མ་དྲན་པས་ཐོལ་བྱུང་དུ་གསོལ་བ་བཏབ་པའོ།། །། ༈ ཨ་ཧོཿལྔ་ལྡན་འཇའ་ཟེར་འཁྲིགས་པའི་འོད་ཁྱིམ་གྱི་ཀློང་ན། །ལྷུན་གྲུབ་རིག་འཛིན་ཨོ་རྒྱན་ཆེན་པོ་དེ་བཞུགས་ཡོད། །རྩ་གསུམ་རྒྱ་མཚོའི་སྤྱི་གཟུགས་པད་འབྱུང་དེ་མཁྱེན་ནོ། །བུ་ལ་ཐུགས་རྗེའི་བརྩེ་བས་ད་ལྟར་རང་གཟིགས་ཤིག། ང་ཡི་སྐྱབས་གཅིག་མཚོ་སྐྱེས་རྡོ་རྗེ་དེ་མཁྱེན་ནོ། །ཕ་གཅིག་མ་ཧཱ་གུ་རུ་ཌཱ་ཀཱི་ཡི་ཚོགས་རྗེ། །ཡེ་ཤེས་སྐུ་ཡི་ཕྱག་རྒྱའི་རྣམ་རོལ་ནི་ཚད་མེད། །རྡོ་རྗེའི་གསུངས་དབྱངས་ཆོས་སྒྲ་དིར་དིར་དུ་སྒྲོགས་བཞིན། །འོད་གསལ་དགོངས་པ་མཁའ་ཁྱབ་ལྷུན་གྲུབ་ཀྱི་སྦུབས་ནས། །བདག་གི་སྒོ་གསུམ་རྡོ་རྗེའི་བྱིན་ཆེན་ཞིག་ཕོབས་མཛོད། །ང་ཡི་འཁྲུལ་སྣང་ཀ་དག་ཆོས་ཟད་དུ་བསྐྱེལ་ཐོངས། །རང་སྣང་རོལ་པ་དཔལ་རི་པདྨ་ཡི་ཞིང་ཁམས། །རང་བྱུང་རིག་པ་བདེ་ཆེན་རྒྱལ་པོ་དེ་བཞུགས་ཡོད། །པདྨ་བཛྲ་བདེ་མཆོག་སྒྱུ་མ་ཡི་གར་གྱི། །ས་གསུམ་ཀུན་ཁྱབ་ལྔ་ལྡན་ཡེ་ཤེས་སུ་འབར་བ། །བརྟན་གཡོ་གདོད་ནས་དང་པོའི་སངས་རྒྱས་ནི་མངོན་སྣང་། །སྐུ་དང་ཞིང་ཁམས་ཆོས་དབྱིངས་རྒྱས་པ་རུ་ཁྱབ་པའི། །འདུལ་བྱ་འདུལ་བྱེད་རྣམ་འཕྲུལ་ཕྲིན་ལས་ནི་འཛད་མེད། །ཀུན་ཁྱབ་ཀུན་བཟང་པདྨ་འབྱུང་གནས་དེ༴ །ཨ་ཧོཿངོ་མཚར་ཐུགས་ཀྱི་ཐིག་ལེའི་བསྙེན་སྒྲུབ་ཀྱི་སྦྱོར་བས། །གསང་གསུམ་བྱིན་བརླབས་ནུས་མཐུ་དབང་མེད་དུ་བཀུག་སྟེ། །བདག་ལ་བསྟིམ་པས་སྣང་སྲིད་ཟིལ་གནོན་དང་དབྱེར་མེད། །ཚེ་འདི་ཉིད་ལ་འགྲུབ་པའི་དངོས་གྲུབ་ཞིག་ཞུའོ། །ཟླ་༣ཚེས་༡༡ལའོ།། །། ༈ ཀྱེ་ཧོ། གང་གི་རང་བཞིན་ཐུགས་རྗེའི་ཟླ་སྣང་ནི། །དྭངས་བའི་ཆུ་ལ་སྒྲིབ་མེད་འཆར་ན་ཡང་། །མི་བསྲུན་སྐྱེ་བོས་རབ་ཏུ་དཀྲུག་པ་ན། །རི་བོང་ཅན་ཡང་ནུབ་རིའི་ཕག་ལ་གཞོལ། །ལྷ་དང་བླ་མའི་ཞལ་བཟང་བལྟ་བའི་ཕྱིར། །དེང་ནས་བཟུང་སྟེ་བྱང་ཆུབ་སྙིང་པོའི་བར། །རྡོ་རྗེའི་གཡར་དམ་གཉན་པོ་བླངས་བ་ཡང་། །སོ་སོར་འབྲལ་བ་དུས་ཀྱི་རང་བཞིན་གཤིས། །ཀྱེ་མ་མ་གྲང་ཁྲོད་གནས་བྱིས་པ་འགས། །ཡིད་ཀྱི་ཁ་ཆུས་དམར་པོར་འཆིང་བ་ལས། །བཟང་པོར་སྤྱོད་དང་འགྲོག་པའི་སྐལ་བ་ནི། །རུས་སྦལ་སྤུ་ཡི་ནམ་མཁར་ཐགས་སུ་བཏགས། །ཆགས་དང་བྲལ་བ་རྒྱལ་དང་རྒྱལ་བའི་སྲས། །ཡེ་ཤེས་སྤྱན་གྱིས་སྒྲིབ་མེད་རྟག་གཟིགས་ལ། །སྲེད་པའི་འཆིང་བ་ཀུན་ལྡན་བདག་འདྲ་ལ། །ཐུགས་རྗེ་བསིལ་བའི་ཆབ་ཀྱིས་བརླན་པར་མཛོད། །ཕན་པར་སྨྲས་ཀྱང་ལོག་པར་སེམས་པ་ཡི། །སྐྱེ་བོ་ངན་པ་སྦྲུལ་གདུག་དང་འདྲ་བའི། །ཇི་ཙམ་བསྙེན་ཀྱང་ཕྱིར་ཕྱིར་རྒྱང་བསྲིང་བ། །དེ་འདྲའི་སྡིག་གྲོགས་རིང་དུ་སྤངས་བར་ཤོག། སུ་དང་འགྲོག་ཀྱང་ཆགས་སྡང་འཕེལ་བའི་གཞི། །གང་དུ་གནས་ཀྱང་ཆོས་བརྒྱད་བདུད་མོས་བསླུས། །ད་ནི་དབེན་པའི་གནས་བཟང་བསྟེན་བྱས་ནས། །བརྩོན་པས་སྒྲུབ་ལ་གཞོལ་བར་བྱིན་གྱིས་རློབས། །དུས་གསུམ་རྒྱལ་བ་ཀུན་གྱི་མཁྱེན་བརྩེ་ཡི་རང་གཟུགས། །དྲན་པས་སྲིད་ཞིའི་གདུང་སེལ་བླ་མ་རང་མཁྱེན་ནོ། །ཡེ་ཤེས་སྤྱན་གྱིས་བདག་ཅག་ལས་ངན་ལ་གཟིགས་ཤིག། སྲིད་ཞིའི་འཇིགས་པ་ཀུན་ལས་ད་ལྟ་རང་སྐྱོབས་མཛོད། ཨ་ཧོ་ཡེ། ཚེ་སྲོག་མི་རྟག་སྒྱུ་མའི་དཔེ་བརྒྱད་དང་མཚུངས་ཏེ། །ད་ལྟ་ཡོད་ཀྱང་གློག་བཞིན་མྱུར་དུ་ནི་འཇིག་པའི། །ཕྱི་ལ་བསམ་ན་འཁོར་བ་སྡུག་བསྔལ་གྱི་རང་བཞིན། །བྱ་དཀའ་དོན་ཆུང་བྱེ་མའི་ཁང་བུ་དང་འདྲ་བ། །ཟིན་དང་འགྲུབ་དུས་མེད་པའི་ལས་ངན་བདག་སྐྱོབས་ཤིག། སྟོན་ཀའི་ནམ་མཁའ་དང་མཚུངས་དགྲ་གཉེན་ནི་ངེས་མེད། །ལུས་འདི་གཅེས་པར་བསྐྱང་ཡང་སྐད་ཅིག་ཙམ་མི་སྡོད། །འཆི་བདག་གཤིན་རྗེའི་དགྲ་སྟྭས་བཅོམ་པ་ལ་ཉེའོ། །ནམ་ཟླ་དུས་བཞིའི་འཕོ་འགྱུར་འཕེལ་འགྲིབ་ལ་ལྟོས་དང་། །གཉེན་དང་ཉེ་དུ་བར་མའི་སེམས་ཅན་དང་འདྲའོ། །སྐྱེ་ཤི་དར་རྒུད་བདེ་སྡུག་འཕོ་འགྱུར་ལ་བསམ་ན། །རྟག་ཅིང་བརྟན་པ་རྡུལ་ཕྲན་ཙམ་ཞིག་ནི་མི་འདུག། རྣམ་ཐོས་བུ་ཡི་དཔལ་འབྱོར་ལོངས་སྤྱོད་ཙམ་ཡོད་ཀྱང་། །ཕྱི་མའི་ལམ་དུ་ཁབ་ཅིག་ཁྱེར་དབང་ནི་མེད་དོ། །འདོད་པས་གསོག་སྲུང་སྙིང་པོ་ཅུང་ཟད་ཀྱང་མེད་དོ། །མི་འཆི་སྡོད་གྲབས་བྱེད་པའི་སྙིང་མེད་ཀྱི་བླུན་པོ། །རང་མགོ་རང་གིས་གཡོགས་པའི་མདོ་མེད་ཀྱི་དྲེད་པོ། །བདག་ནི་སྐྱབས་དང་མགོན་མེད་སྡུག་བསྔལ་གྱི་ཉམ་ཐག། འདི་ལ་དཔལ་ལྡན་བླ་མའི་ཐུགས་རྗེ་ཡིས་གཟིགས་མཛོད། །འཁོར་བ་དགྲ་རུ་མཐོང་བར་བྱིན་གྱིས་རང་རློབས་ཤིག། ཡེ་ཤེས་རིག་པའི་དབང་ཆེན་བསྐུར་ཐོབ་དང་བྲལ་བ། །མངོན་སུམ་ཐོབ་ནས་འཁྲུལ་པ་རུ་ལོགས་སུ་གྱུར་ཏེ། །གདོད་མའི་གནས་ལུགས་རྟོགས་པ་བྱིན༴ །མཁྱེན་ནོ་མཁྱེན་ནོ་དཔལ་ལྡན་བླ་མ་རང་མཁྱེན་ནོ། །ཆོས་ཀྱི་བློ་གྲོས་པས་སོ།། །། ༈ ཕ་བླ་མ་རྡོ་རྗེ་འཆང་བློ་གཏེར་དབང་པོ་ཁྱེད་མཁྱེན་ནོ། །མི་ལས་ངན་བདག་ལ་ད་ལྟ་རང་ཐུགས་རྗེས་གཟིགས་ཤིག། བུ་འཁྲུལ་རྟོག་ངན་པས་བསླད་གྱུར་ནས། །རྗེ་ཁྱེད་ཀྱི་ཡེ་ཤེས་སྐུ་མ་མཇལ། །དུས་ཐ་ན་རྨི་ལམ་ཙམ་དུའང་། །མགོན་ཁྱོད་ཀྱི་ཞལ་མཐོང་མེད་པ་འདི། །བདག་ལས་ངན་སྡིག་པ་ཆེ་བ་འདྲ། །རྗེ་ཁྱེད་ལ་ཁ་ཞེ་མེད་པ་ཡི། །སྙིང་དད་པ་མོས་གུས་གཏིང་ནས་ཡོད། །ཁ་ཙམ་དུ་མིན་སྙམ་དྲན་གྱུར་ཀྱང་། །རྗེའི་ཞལ་མ་བསྟན་དང་གསུང་མ་ཐོས་པ་འདི། །མི་ངའི་རྒྱུད་དད་པ་གཏིང་ཚུགས་མེད་པ་འདྲ། །ང་ལ་མི་ཡི་བླ་མ་མང་ཡོད་ཀྱང་། །བཀའ་དྲིན་ཆེ་བ་རྣམ་པ་ལྔ། །དེའི་ནང་གི་གཙུག་གི་རྒྱན་ཅིག་པུ། །ཕ་བླ་མ་ཁྱེད་ལས་གཞན་ན་མེད། །རྗེ་ཁྱེད་ཀྱི་རྣམ་ཐར་དྲན་ཙ་ན། །བཟོད་རླག་མེད་པའི་མཆི་མས་གདུང་། །མཚན་བརྗོད་ན་དད་པའི་ཡུས་ཀྱི་བསྣངས། །ཚུལ་དེ་ལ་དགོངས་ནས་ཐུགས་རྗེས་གཟིགས། །སློབ་བུ་ལས་ངན་གྱི་དབང་དུ་མ་གཏོང་ཤིག། རྗེ་ཡི་གསང་གསུམ་གྱི་དམ་ཚིག་དང་འགལ་བ་ལ། །དུས་རྒྱུན་དུ་སྙིང་ནས་འགྱོད་པས་བཤགས། །དག་ཚང་གི་གནང་བ་སྩལ་དུ་གསོལ། །དུས་རྟག་པ་རྒྱུན་དུ་སྙིང་དབུས་སུ། །སྒོམ་ནས་གསོལ་བ་རྩེ་གཅིག་འདེབས། །བདག་གི་རྒྱུད་བྱིན་གྱིས་རློབས་པར་མཛོད། །ཉམས་རྟོགས་ཀྱི་རྩལ་ཆེན་སྦར་དུ་གསོལ། །རྟེན་དཀྱིལ་འཁོར་བཞིའི་འགྲོས་བཞི་ཐིམ། །དཔལ་སྐུ་བཞིའི་དབང་ཕྱུག་ཐོབ་པར་ཤོག། ཕ་རྗེ་བཙུན་རྡོ་རྗེ་འཆང་དབང་མཁྱེན། །རྗེ་ཁྱེད་དང་འབྲལ་མེད་བྱིན་གྱིས་རློབས། །ཅེས་ས་བྱི་རྒྱལ་ཟླའི་ཚེས་ཉེར་བརྒྱད་སྣང་བ་སྐྱོ་མུན་ནེ་བའི་ངང་གདུང་དབྱངས་སུ་བྲིས་པའོ།། །། ༈ མཁྱེན་ནོ་མཁྱེན་ནོ་བླ་མ་མཁྱེན་ནོ། །ཕ་ཅིག་རྫོགས་པའི་སངས་རྒྱས། །དྲན་པས་སེམས་གྱི་འཇིགས་འཕྲོག། དཔལ་ཆེན་གསང་བའི་བདག་པོ། །དགྱེས་མཛད་ཧེ་རུ་ཀ་དཔལ། །བདག་ཅག་མགོན་དུ་བྱོན་པ། །འཇམ་དབྱངས་བློ་གཏེར་དབང་པོར། །སྙིང་ནས་གསོལ་བ་འདེབས་སོ། །བདག་རྒྱུད་བྱིན་གྱིས་རང་རློབས་ཤིག། དཀོན་མཆོག་རྒྱ་མཚོའི་ངོ་བོ། །ཁམས་གསུམ་ཆོས་ཀྱི་རྒྱལ་པོ། །འགྲོ་དྲུག་ངན་སོང་གཡང་ལས། །ཐུགས་རྗེའི་ཕྱག་གི་འདྲེན་མཛད། །བླ་མ་རྡོ་རྗེ་འཆང་ཆེན། །ཁྱེད་ལ་སྙིང་ནས་གསོལ་འདེབས། །ལས་ངན་བདག་ནི་འདྲེན་མཛོད། །ཀྱི་ཧུད་བུ་ཧྲུལ་བདག་ནི། །ཕྱི་ཚུལ་ཆོས་གོས་ཟང་ཟོངས། །ནང་དུ་མི་དགེའི་བང་མཛོད། །ཁ་ནས་ཆོས་བཤད་ཝ་ལེ། །རང་རྒྱུད་ཆུ་ནང་རྡོ་བ། །བྱང་ཆུབ་སེམས་དཔའ་ཡིན་ཞེས། །རང་དོན་འབའ་ཞིག་སྒྲུབ་སྒྲུབ། །གསང་སྔགས་དབང་བསྐུར་ཐོབ་ཐོབ། །རྣམ་གྲངས་བསམ་ལས་འདས་ཀྱང་། །བསྐྱེད་རྫོགས་ཐུན་གཅིག་མི་སྒོམ། །ཐ་མལ་ཞེན་སྣང་དང་བཅས། །དམ་སྡོམ་ཆུ་ལ་ཕོ་བ། །སྐལ་ངན་བདག་འདྲའི་སེམས་ཅན། །དབུགས་ཀྱི་རྒྱུ་བ་ཆད་ཚེ། །མནར་མེད་དམྱལ་བར་ཐིབས་པོ། །འཇུག་པར་གདོན་མི་ཟ་བ། །བདག་ལ་ཐུགས་རྗེས་གཟིགས་ཤིག། ཚེ་རབས་སྔོན་ནས་འབྲེལ་ཞིང་། །དྭངས་བའི་སེམས་ཀྱིས་མཎྜལ། །ཐོག་མ་ཉིད་ནས་སྒྲིབ་བྲལ། །སྐུ་མཐོང་ཉམས་དགའ་བག་ཕེབས། །རིག་པ་དྭངས་སང་བྱེད་དེ། །གསུང་གསང་གདམས་པའི་གནད་ཀྱི། །སེམས་ཀྱི་མདུད་གྲོལ་མཁན་པོ། །སྐུ་གསུམ་རང་ཞལ་བསྟན་པའི། །ཕ་ཅིག་དྲན་ཆོག་རྒྱལ་པོ། །ཁྱེད་ལ་གསོལ་བ་འདེབས་ན། །ལས་ངན་བདག་ལ་སྐྱོབས་ཤིག། སྒོ་གསུམ་བྱ་བ་ཅི་བྱས། །རྣམ་ཀུན་དོན་ཡོད་འགྱུར་བར། །དྲན་ཆོག་ཡིད་བཞིན་ནོར་བུ། །བླ་མ་རྡོ་རྗེ་འཆང་ཁྱེད་རང་མཁྱེན་ནོ། །མཁྱེན་ནོ་མཁྱེན་ནོ་བླ་མ་མཁྱེན་ནོ། །ཅེས་པའང་མེ་གླང་ཟླ་༦ཚེས་༢༩ལ་བླ་མ་དྲན་པས་ཐོལ་བྱུང་དུ་བྲིས་པའོ།། །། ༈ ཀུན་མཁྱེན་བླ་མར་གསོལ་འདེབས་ཀྱི་གླུ་སྤྲིན་གྱི་ཕོ་ཉ་ཞེས་བྱ་བ་བཞུགས། ཨ་ཧོ་ཡེ། དབྱིངས་ཀ་དག་ཡེ་སྟོང་ཆེན་པོ་ཡི་མཁའ་ལ། །གདང་རང་བཞིན་འོད་གསལ་ལྔ་ལྡན་གྱི་འཇའ་གུར། །རྩལ་ཐུགས་རྗེ་རིག་པ་སྤྲུལ་པ་ཡི་སྐུ་མཆོག། ཕ་ཀུན་མཁྱེན་ཆོས་ཀྱི་རྒྱལ་པོ་ཁྱེད་མཁྱེན་ནོ། །སྐུ་ཟག་མེད་རྡུལ་བྲལ་ཡེ་ཤེས་ཀྱི་ཕུང་པོ། །རྗེ་མཚན་དཔེས་བརྒྱན་པའི་གདན་གསུམ་གྱི་དཀྱིལ་འཁོར། །དེ་ཕྱི་ན་མི་བཞུགས་རང་ཉིད་ལ་རྫོགས་སྟེ། །གཞི་མ་བཅོས་རང་བྱུང་ལྷུན་གྲུབ་ཀྱི་རྩལ་སྣང་། །དུས་ད་ལྟའི་རིག་པ་ཟང་ཀ་མ་འདི་ག། རྗེ་མཚན་མཚོན་བརྗོད་པ་ཐམས་ཅད་དང་བྲལ་བ། །རང་ཤར་པའི་སྒྱུ་འཕྲུལ་རྡོ་རྗེ་ཡི་བཀོད་པ། །རང་རིག་པའི་ངང་ནས་རང་ཞལ་ཞིག་མཇལ་བྱུང་། །དཔལ་རྫོགས་པའི་སངས་རྒྱས་དྲི་མེད་ཀྱི་འོད་ཟེར། །མི་བདག་གི་རེ་ལྟོས་ཅིག་ཆོག་ཏུ་ཞུ་ཤིང་། །སྐྱབས་གཞན་ན་མེད་པ་ཁོ་ཐག་རང་ཆོད་ནས། །བུ་ང་ཡི་བློ་སེམས་བདེ་བ་ཞིག་བྱུང་སོང་། །རྗེ་སྐུ་གསུམ་ལྷུན་གྲུབ་སྲིད་ཞི་ཡི་ཁྱབ་བདག། མཁའ་མཉམ་གྱི་འགྲོ་ཁམས་ཇི་སྙེད་ཀྱི་སྣང་ངོར། །དག་མ་དག་སྒྱུ་འཕྲུལ་རོལ་རྩེད་ནི་བསམ་ཡས། །སྤྲོ་བ་དང་བསྡུ་བའི་བྱེད་པོ་ཡི་མགོན་པོ། །ཕ་ཀུན་མཁྱེན་བླ་མ་ཀློང་ཆེན་གྱི་རབ་འབྱམས། །མཚན་ཐོས་པས་སྲིད་དང་ཞི་བ་ཡི་འཇིགས་འཕྲོག། མགོན་ཁྱེད་ནི་བདག་གི་སྙིང་དབུས་སུ་བཞུགས་ནས། །མི་ང་ཡི་གཟུང་འཛིན་འཁྲུལ་པ་འདི་གཏོར་ཏེ། །དབྱིངས་རིག་པའི་ཡེ་ཤེས་རྩལ་ཁ་ནི་རྒྱས་ནས། །རྗེ་ཁྱེད་དང་མཉམ་པར་བྱིན་གྱིས་རང་རློབས་ཤིག། མི་ང་ལ་འབྲེལ་བའི་སེམས་ཅན་གྱི་གཙོ་བྱས། །ཁམས་གསུམ་གྱི་འགྲོ་རྣམས་སྡུག་བསྔལ་ལས་གྲོལ་ཞིང་། །ནུབ་བདེ་ལྡན་ཞིང་སོགས་དག་པ་རུ་དྲོངས་ནས། །འཁོར་བ་འདི་དོང་ནས་སྤྲུགས་ནུས་ཞིག་ཞུའོ། །ཅེས་པའང་ས་གླང་རྒྱལ་ཟླའི་དུས་དྲན་མཆོད་པར་པདྨ་ཡེ་ཤེས་རྡོ་རྗེས་གསོལ་བ་བཏབ་པ་དགེའོ།། །། ༈ ཨ་ཧོ། རང་རིག་འོད་གསལ་དབུ་མ་ཡི་གྲོང་ཁྱེར། །རིག་སྟོང་ཕ་རྒོད་པད་འབྱུང་དེ་བཞུགས་ཡོད། །ཡེ་ཤེས་སྤྱན་གྱིས་རྟག་པ་རུ་གཟིགས་མཛོད། །བུ་ཧྲུལ་ང་ལ་བྱིན་རླབས་ཞིག་སྩོལ་མཛོད། །རང་བྱུང་གཉུག་མའི་ཤེས་རིག་ནི་ཟང་མ། །མ་བཅོས་སོ་མ་ཀ་དག་གི་ངོ་བོ། །རང་བཞིན་ལྷུན་གྲུབ་འོད་གསལ་གྱི་གཏིང་གདང་། །ཡེ་ནས་ལྷུན་རྫོགས་བྱ་རྩོལ་དང་བྲལ་བའི། །གདོད་མའི་མགོན་པོ་རང་ཆས་སུ་བཞུགས་སོ། །ཨ་ཧོཿརང་རིག་བླ་མ་ཆོས་སྐུ་ཡི་ངོ་བོ། །རང་གདང་འགགས་མེད་ཞི་ཁྲོ་ཡི་ཚོམ་བུ། །རིག་རྩལ་མ་འགགས་དཔའ་བོ་དང་མཁའ་འགྲོ། །རིག་པའི་རང་ཆས་སུ་བཞུགས་པས་སྐྱིད་དོ། །དངོས་གྲུབ་ཕྲིན་ལས་རང་སྣང་གི་བཀོད་པ། །རྟོགས་ན་དངོས་གྲུབ་མ་རྟོགས་ན་འདྲེར་སྣང་། །དོན་ལ་མ་གྲུབ་ཡེ་ཤེས་ཀྱི་སྒྱུ་མ། །ཅིར་ཡང་འཆར་ཞིང་ཞེན་མེད་ཀྱི་རྣལ་འབྱོར། །རང་གྲོལ་བུ་ཡང་བློ་བདེ་ང་སྐྱིད་དོ། །གཏད་མེད་རྒྱལ་པོ་བློ་གྲོས་ཀྱི་རྣལ་འབྱོར། །གང་ཤར་འཛིན་མེད་ཉམས་དབྱངས་ཀྱི་མཆོད་པ། །དུས་ཀྱི་རྒྱལ་པོ་མཁའ་འགྲོ་ཡི་དུས་ཆེན། །གྲགས་སྟོང་རྡོ་རྗེའི་གླུ་དབྱངས་གི་རོལ་མོ། །འདིས་ཀྱང་འཁོར་བ་དོང་སྤྲུགས་སུ་ཤོག་ཅིག། ཅེས་པའང་རིག་འཛིན་ཀུན་བཟང་འོད་གསལ་སྙིང་པོ་རྩལ་གྱིས་སོ།། །། ༈ རྗེ་བླ་མ་རྣམས་ལ་ཕྱག་འཚལ་ལོ། །སྤྲང་པོ་ཡི་བློ་སྣ་ཆོས་ལ་བསྒྱུར། །མི་ང་ཡི་རྒྱུད་འདི་ལྕགས་གོང་འདྲ། །མི་རྟག་དང་ངེས་འབྱུང་ཅུང་མི་དྲན། །གཞན་ཕན་གྱི་བསམ་པ་བསྐྱེད་འདོད་ཀྱང་། །རང་འདོད་ཀྱི་འཁྲི་བའི་དྲི་མས་གོས། །དབང་བསྐུར་ནི་གྲངས་མེད་ཐོབ་གྱུར་ཀྱང་། །བསྐྱེད་རྫོགས་ཀྱི་ལམ་ལས་གཡེལ་ནས་གདའ། །ཐ་མལ་གྱི་སྣང་ཞེན་འཆིང་བས་བཅིངས། །མཚན་འཛིན་གྱི་སྒྲོགས་ཀྱིས་བཅིངས་ནས་གདའ། །ཕྱག་རྫོགས་ལ་མོས་པ་ལམ་བྱེད་ཀྱང་། །ཐ་མལ་གྱི་རྟོག་པས་ཉིན་མཚན་གཡེངས། །དྲན་བསམ་ཀྱི་འཕྲོ་འདུའི་རྒྱ་བསྐྱེད་དེ། །གཟུང་འཛིན་གྱི་སྦུབས་སུ་འཐུམ་ནས་འདུག། བཀའ་དྲིན་ཅན་དཔལ་མགོན་བླ་མ་ལ། །དད་པ་ལ་ལྟེམ་རྐྱང་འོང་བར་འདུག། ཁོངས་སངས་རྒྱས་དངོས་སུ་གསུང་ནའང་། །ལས་ངན་གྱི་སྒྲིབ་པས་མི་མཐོང་འདུག། དེ་རང་གི་མོས་གུས་ཆུང་བས་ལེན། །ད་སྔ་ཕན་བདེ་བའི་སར་གནས་ཀྱང་། །ད་རང་སྡུག་རང་གི་ཉོ་བྱས་ཏེ། །བུད་མེད་དང་གཟའ་ཚོའི་མདུན་སྡེབས་འདིར། །ཡང་ཡང་དུ་བསམ་གྱིན་ཞེ་རེ་སྡུག། རང་བྱས་ཀྱི་ལས་འདི་བསྐྱུར་དབང་མེད། །ཚེ་འདི་ཡང་སྡུག་ལ་ཕྱི་མ་སྡུག། སྡུག་བསྔལ་གྱི་འབྲས་བུ་མྱོང་རེ་རན། །དེ་བསམ་གྱིན་སྙིང་རྩ་འདར་ཤིག་ཤིག། འབྱུང་བར་འདུག་ཀྱང་བྱ་ཐབས་བྲལ། །ད་བླ་མ་དཀོན་མཆོག་གསུམ་པོ་ལ། །ཞེ་གཏིང་ནས་གསོལ་འདེབས་མོས་གུས་ཀྱི། །ཕུར་པ་ཞིག་འཛུགས་ན་ཁྱེད་རྣམས་མཁྱེན། །བུ་ལས་ངན་དབང་དུ་མི་གཏོང་བར། །བློ་སྣ་ཆོས་སུ་བསྒྱུར་བ་དང་། །ཅི་བྱས་ཀུན་གཞན་ལ་ཕན་པ་དང་། །བདག་སྒོ་གསུམ་འབྲེལ་ཚད་དོན་ལྡན་ཤོག། ཕ་བླ་མའི་ཐུགས་དགོངས་རྫོགས་པ་དང་། །རྗེ་མཁྱེན་བརྩེའི་ཕྲིན་ལས་སྤེལ་གྱུར་ཅིག། །ཅེས་པའང་གླང་ཆོ་འཕྲུལ་ཟླ་བའི་ཚེས་བཅུ་བདུན་ལའོ།། །། ༈ བླ་མ་རྗེས་དྲན་གྱི་གླུ་འཇིགས་མཛད་ཁྲོས་པའི་བྱིན་རླབས་སྙིང་ལ་བསྐུལ་བའི་དབྱངས་སྙན་ཅེས་བྱ་བ། ཨ་ཧོ་ཡེ། དཔལ་ལྡན་སྲིད་ཞིའི་ཁྱབ་བདག་བདེ་ཆེན་གྱི་ཆོས་སྐུ། །དངོས་གཅིག་དུ་མའི་གར་གྱི་རྣམ་རོལ་ནི་མཐའ་ཡས། །རྒྱལ་ཀུན་མཁྱེན་པའི་གཏེར་ཆེན་ཡེ་ཤེས་ཀྱི་སྐུ་ཅན། །བླ་མ་འཇམ་དཔལ་རྡོ་རྗེ་སྙིང་དབུས་ནས་དྲན་བྱུང་། །ཁ་སྦྱོར་ཡན་ལག་བདུན་ལྡན་མཚན་དཔེ་ཡི་སྣང་བརྙན། །དམར་སེར་སིནྡྷུ་ཝཱ་རའི་འོད་ཟེར་གྱི་ཕུར་པོ། །རྡོ་རྗེ་དབྱངས་ཅན་དགྱེས་པའི་རྗེས་ཆགས་ཀྱི་རོལ་རྩེད། །རབ་འབྱམས་སྤྲོ་བསྡུའི་བྱེད་པོ་སྙིང་དབུས་སུ་བཞུགས་ཤིག། མཛེས་འཛུམ་ཞི་བས་མི་ཐུལ་གདུལ་དཀའ་ཡི་འགྲོ་ལ། །མི་བཟད་འཇིགས་རུང་དྲག་པོ་གར་དགུ་ཡི་ཉམས་ལྡན། །གཤིན་རྗེ་བྱེ་བའི་སྡེ་ཚོགས་འདུལ་མཛད་ཀྱི་ཁྲག་འཐུང་། །འཇམ་དཔལ་ཡ་མནྟ་ཀར་གསོལ་བ་རང་འདེབས་སོ། །ཀུན་རྨོངས་གཏི་མུག་དགྲ་ཆེན་མུན་སྟུག་གི་གླང་པོ། །ང་རྒྱལ་དྲེགས་པས་མྱོས་པའི་གཙུག་བུམ་ནི་འགེམ་མཛད། །དུས་ཀྱི་དགྲ་ཆེན་བཅོམ་ལྡན་རྡོ་རྗེ་ནི་འཇིགས་བྱེད། །བདག་གི་སྒོ་གསུམ་རྡོ་རྗེ་གསུམ་དངོས་སུ་བསྒྱུར་མཛོད། །བསྙེན་ཅིང་སྒྲུབ་པའི་གསང་ཆེན་རྨད་བྱུང་གི་ཉམས་ལེན། །རྡོ་རྗེ་བེ་ཏ་ལི་ཡི་སྙན་བརྒྱུད་ཀྱི་གདམས་པ། །གྲུབ་བརྙེས་རིག་འཛིན་བྱེ་བའི་ཐུགས་བཅུད་ཀྱི་བདུད་རྩིས། །ཚེ་འདིར་འཇམ་དཔལ་འགྲུབ་པར་གསོལ་བ་རང་འདེབས་སོ། །ཁམས་གསུམ་འོད་གསལ་དབུ་མའི་གྲོང་ཁྱེར་དུ་སྡོམ་པས། །རྩ་ཡི་མདུད་གྲོལ་ཐིག་ལེ་འོད་གསལ་དུ་དེངས་སྟེ། །ཅིར་སྣང་སྐུ་དང་ཡེ་ཤེས་འབྱམས་ཀླས་ཀྱི་འཁོར་ལོར། །གདོད་ནས་ལྷུན་རྫོགས་མངོན་གྱུར་བྱིན་གྱིས་རང་རློབས་ཤིག། མ་དག་རླུང་སེམས་འཁྲུལ་པའི་གཟུགས་བརྙན་གྱི་སྣང་བ། །བསྟན་ལ་གནོད་ཅིང་འཚེ་བའི་ལྷ་མིན་གྱི་ཀླ་ཀློ། །འཇིགས་མཛོད་ཁྲོས་པའི་མཚོན་ཆ་རྣོན་པོ་ཡི་དབལ་གྱིས། །རྩད་ནས་བརླག་པར་ནུས་པའི་མཐུ་སྟོབས་ཞིག་སྩོལ་ཞུ། །རྒྱལ་བསྟན་དར་རྒྱས་བསྟན་འཛིན་སྐྱེས་ཆེན་རྣམས་ཞབས་བརྟན། །ཆོས་ལྡན་རྒྱལ་པོའི་མངའ་ཐང་དར་ཤིང་ནི་རྒྱས་ཏེ། །འཇིག་རྟེན་བདེ་དགེའི་དཔལ་ཡོན་རྫོགས་ལྡན་བཞིན་འཕེལ་ནས། །བཀྲ་ཤིས་དགེ་ལེགས་སྣང་བ་འགྲིབ་མེད་དུ་ཤོག་ཅིག། ངེད་ཅག་རྡོ་རྗེའི་རྣལ་འབྱོར་རིག་འཛིན་གྱི་ཕོ་མོ། །ཚེ་སྲོག་རྡོ་རྗེའི་ཀ་ཆེན་ཡུན་དུ་ནི་བརྟན་ཏེ། །འཆི་བདག་བདུད་ལས་རྣམ་རྒྱལ་རྡོ་རྗེ་ཡི་སྐུ་བརྙེས། །འགྲོ་དོན་མཁའ་ཁྱབ་དོན་གཉིས་ལྷུན་གྲུབ་ཏུ་གྱུར་ཅིག། །ཅེས་པའང་འཇིགས་མེད་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་འཇིགས་མཛད་ཁྲོས་པའི་བསྙེན་སྒྲུབ་ཀྱི་སྐབས་ལྕགས་སྟག་རྒྱལ་ཟླའི་དཀར་ཕྱོགས་ཀྱི་རྫོགས་པ་དང་པོར་གསོལ་བ་བཏབ་པ་སིདྡྷི་རསྟུ།། །། ༈ བསླུ་མེད་ཀྱི་སྐྱབས་གནས་དཀོན་མཆོག་གསུམ། །གཅིག་འདུས་ཀྱི་ངོ་བོ་བླ་མ་རྗེའི། །ཞབས་པདྨོ་སྤྱི་བོའི་རྒྱན་དུ་མཆོད། །མི་ང་ཡི་བློ་སྣ་ཆོས་ལ་བསྒྱུར། །སྟོན་ཟླ་ཡི་ཕུན་སུམ་ཚོགས་པའི་དུས། །རྒྱལ་བལ་གྱི་ཡུལ་ནས་བྱུང་བ་ཡི། །མེ་ཏོག་ནི་ཁ་དོག་སྣ་ཚོགས་པ། །མཚར་སྡུག་གི་བུ་མོ་ལྟར་མཛེས་ཤིང་། །མཁས་བླུན་གྱི་མིག་དང་ཡིད་ལ་ནི། །ཕན་བདེ་ཡི་དགའ་བ་བརྒྱ་ཕྲག་བསྐྱེད། །དེ་འདྲ་ཡི་དཔལ་ཡོན་ཕུན་ཚོགས་དེ། །སྟོན་ཟླ་ལ་ཉེར་བརྒྱད་མུན་སྨག་ལ། །སྔོ་སངས་ཀྱི་བུ་མོ་བཀྲག་ཏེ་ཆེ། །རྒྱུ་སྐར་གྱི་ལྷ་མོས་ཞལ་བཟང་བཀྲ། །དྲི་བཞོན་གྱི་ངད་པ་རབ་བསྐྱེད་པས། །ཐོ་རངས་ཀྱི་ཆུ་ལ་མེ་ཏོག་རྣམས། །མགོ་ལ་ནི་ཞྭ་མོ་དཀར་པོ་གྱོན། །ཉི་ཤར་གྱི་ཆ་ལ་འཆི་བས་འཇོམས། །ལོ་འདབ་ཀྱི་ཡན་ལག་ཐུར་དུ་འཕྱང་། །མགོ་ལྕོགས་ནི་མགྲིན་པས་མ་ཐེགས་ཏེ། །ཤི་བ་ཡི་རོ་ལྟར་གྱུར་པ་ཡི། །དཔེ་དེས་ཀྱང་མི་རྟག་སྟོན་ནས་བྱུང་། །ལང་ཚོ་ཡི་མཛེས་པ་ལོ་ཟླ་ཡི། །དམག་དཔུང་གིས་བཅོམ་པར་གྱུར་པ་དང་། །འཆི་བདག་གི་དུས་མུན་ཆེན་པོའི་ཀློང་། །འཁྲུལ་སྣང་གི་གཤིན་རྗེ་གྲངས་མེད་ཀྱིས། །ལུས་གཅེས་རྒུའི་མེ་ཏོག་སད་ཀྱིས་ཁྱེར། །མགོ་འཕང་ནི་དམའ་ཞིང་མ་མཆུ་འཕྱང་། །ཡན་ལག་རྣམས་ཤིང་བཞིན་རེངས་པ་འོང་། །དེ་ལྟ་བུའི་འཇིགས་པ་ཆེན་པོ་དེ། །མྱུར་བ་རུ་འབྱུང་བར་གདོན་མི་ཟ། །བདག་སྙིང་དེ་བཟོད་སྲན་མ་ཆེ་བར། །དམ་ཆོས་ལ་འབུངས་གསུམ་བསྐྱེད་ལ་རེམ། །དེ་འདྲ་དེ་བྱུང་དུས་ཅི་བྱ་མེད། །དེ་བས་ན་རང་དབང་ཡོད་དུས་འདིར། །ལེ་ལོ་དང་སྙོམས་ལས་དབང་མ་གཏོང་། །བརྩོན་འགྲུས་ཀྱི་མེ་ཆེན་སྦར་བྱས་ཏེ། །ཉོན་མོང་གི་ཚང་ཚིང་བསྲེག་པ་དང་། །འཁོར་བ་ཡི་མེ་འོབས་བརྒལ་དཀའ་བར། །མྱུར་བ་རུ་སྒྲོལ་ནུས་བྱིན་གྱིས་རློབས། །ཕ་བླ་མ་རྗེ་བཙུན་ཁྱེད་རང་མཁྱེན། །ཅེས་པའང་མེ་ཏོག་གི་ཚོགས་སད་ཀྱིས་ཁྱེར་བ་ན་མི་རྟག་དྲན་པས་སྐྱོ་གླུ་བྲིས་པའོ།། །། ༈ སྐྱབས་བཀའ་དྲིན་འཁོར་མེད་བླ་མ་རྗེ། །མི་བདག་གི་བདེ་ཆེན་རྒྱན་དུ་བཞུགས། །སྐྱིད་མཆོག་གསུམ་ཉི་མ་དགུང་ལ་འཆར། །དུས་བསྟན་པ་མདོ་སྔགས་དམ་ཆོས་དར། །དེ་སྟོན་མཛད་བཤེས་གཉེན་མཁས་གྲུབ་ཚོགས། །ཆེས་མ་ཉམས་རྒྱས་སྐབས་སྐྱེ་བ་ལེན། །བུ་སྐལ་ངན་མ་ཡིན་སྐལ་བ་བཟང་། །གཞི་སངས་རྒྱས་བསྟན་ལ་ཞུགས་བྱས་ནས། །བཀའ་མདོ་རྒྱུད་མན་ངག་རྒྱ་ཆེར་ཐོས། །བདག་བསོད་ཆུང་མ་ཡིན་བསོད་ནམས་ཆེ། །ཆོས་སོ་ཐར་འདུལ་བའི་ཁྲིམས་ནོས་པ། །སེམས་མ་ཞི་བག་མེད་སྤྱོད་པ་ཡི། །ཡན་ལག་གི་ལྟུང་བ་ཆར་བཞིན་བབ། །སྡོམ་རྩ་་བ་བཞི་དང་མ་འགལ་ཙམ། །དུས་དེང་སང་བཀའ་བའི་ཆད་པས་ནོན། །སྐྲ་ཙམ་པ་ཀ་ལྟར་གྱུར་པ་ན། །འདོད་བུད་མེད་ཀྱི་སྒྲོག་ཏུ་ཚུད་གྱུར་ཀྱང་། །བུ་དགེ་བའི་བཤེས་ཀྱི་ཟིན་པ་ལས། །དོན་ཟབ་མོར་ངེས་ཤེས་སྐྱེས་པ་ན། །སྡོམ་གསུམ་དེ་ཡར་ལྡན་ཉིད་དུ་རྫོགས། །གཏོང་ཟོབ་ཀྱི་ས་མཚམས་འཁྲུལ་མེད་སྤྱོད། །བློ་གཞན་ཕན་བསམ་པ་བཟང་པོ་ཡི། །རྒྱལ་བསྟན་ལ་སྨན་པའི་འདུན་པ་བསྐྱེད། །ཆེས་རྣལ་འབྱོར་གྲུབ་པ་མ་ཡིན་ཀྱང་། །སྔགས་རྡོ་རྗེའི་རིག་པ་འཛིན་པའི་གཟུགས། །ཤེས་རབ་ཀྱི་དགའ་མར་མ་སྨད་ཅིང་། །ཐབས་གསང་ཆེན་རྡོ་རྗེའི་སྒྱུ་རྩལ་ངོམ། །སེམས་གནས་ལུགས་རྡོ་རྗེའི་རང་ཞལ་བལྟས། །དོན་འཕོ་བྲལ་འགྱུར་མེད་གདེངས་ཞིག་རྙེད། །ཀུན་རྫོབ་ཀྱི་ཁམས་སྙིགས་ཕྱིར་འཛག་ཀྱང་། །ཆེས་དྭངས་མའི་དོན་དམ་ཐིག་ལེ་ནི། །འཕོ་མེད་འོད་གསལ་ཆེན་པོར་བཅིངས། །དེ་བཅིངས་པས་གཟུང་འཛིན་རླུང་དག་ཅིང་། །རླུང་ཟད་པས་འཁྲུལ་སྣང་རང་སར་དྭངས། །དུས་ད་ལྟ་སྣང་བ་སང་མ་སེང་། །གཏད་མེད་ཀྱི་ངང་དུ་འབྱམས་ནས་གདའ། །གང་ལའང་མི་རྟོག་ཅིར་མི་འཛིན། །འགྱུར་འཕྲོ་རྣམས་བྱ་ལམ་རྗེས་མེད་འདྲ། །དྲན་པ་ནི་དྲན་གཞིའི་དབྱིངས་སུ་ཐིམ། །དྲན་གཞི་ཡང་སྟོར་ནས་སྒོམ་མ་རྙེད། །སྒོམ་བྱ་དང་སྒོམ་བྱེད་ཀུན་ལས་འདས། །ད་ཅི་བྱ་ང་ནི་གར་ན་འདུག། གཞི་གྲོལ་གྱི་རིག་པ་རྒྱ་ཡན་དུ། །ཀློང་ཆེན་པོར་འབྱམས་ཀླས་ཕྱོགས་ལྷུང་བྲལ། །ལྷུན་གྱིས་ནི་མཉམ་ཡངས་ཆེན་པོའི་ངང་། །དུས་བཞི་ནི་མཉམ་པ་ཆེན་པོར་ཨཿ། ང་སྐྱེ་འཆིའི་རྟོག་པས་གཙེས་གཙེས་ནས། །ད་སྐྱེ་འཆི་མེད་པ་རྡོ་རྗེའི་སྐུ། །ཚེ་འདི་ལ་འགྲུབ་པའི་སྨོན་ལམ་ཞིག། དུས་གསུམ་དང་དུས་མེད་རྟག་ཏུ་འདེབས། །ཕ་ལྔ་བརྒྱའི་གཙུག་རྒྱན་བི་མ་ལ། །རྗེ་ཁྱེད་བཞིན་འགྲུབ་པར་བྱིན་གྱིས་རློབས། །ཅེས་པའང་ས་གླང་ཆོ་འཕྲུལ་ཟླ་བའི་ཚེས་ལྔ་ལ་གང་ཤར་གླུར་བླངས་པ། ས་མ་སྟི།། །། ༈ ཨ་ཧོ་ཡེ་ཨ་ལ་ལ་ཧོ། འཆི་མེད་བཀྲ་ཤིས་འཁྱིལ་པའི་སྨན་ལྗོངས་ནི་ཉམས་དགར། །འཆི་མེད་གྲུབ་བརྒྱའི་གཙུག་རྒྱན་པད་འབྱུང་དེ་བཞུགས་ཡོད། །འཆི་མེད་འཇའ་ལུས་རྡོ་རྗེའི་དངོས་གྲུབ་ཞིག་ཞུ་ན། །འཆི་མེད་གྲུབ་པའི་བདུད་རྩི་ད་ལྟ་རང་སྩོལ་ཅིག། འཆི་མེད་བདེ་ཆེན་ཌཱ་ཀི་ཡེ་ཤེས་ཀྱི་མཚོ་རྒྱལ། །འཆི་མེད་མཁའ་འགྲོ་རྒྱ་མཚོའི་དཀྱིལ་འཁོར་གྱི་གཙོ་མོ། །འཆི་མེད་པདྨ་ཚེ་ཡི་སྙིང་ཐིག་གི་བཅུད་འཛིན། །འཆི་མེད་གདམས་པ་ཟབ་མོའི་ཨ་མྲྀ་ཏ་སྐྱུགས་རན། །འཆི་མེད་ཚེ་ཡི་མངའ་བདག་ཚངས་པ་ལྷའི་མེ་ཏོག། འཆི་མེད་འོད་གསལ་སྤྲུལ་པའི་རྡོ་རྗེ་རུ་ཤར་ནས། །འཆི་མེད་རིག་འཛིན་མང་གའི་མཚན་ཅན་གྱི་སྐུར་བཞེངས། །འཆི་མེད་གར་དབང་མདོ་སྔགས་གླིང་པ་ཞེས་སྙན་པས། །འཆི་མེད་ཐུགས་གསང་དཔལ་གྱི་བེའུ་ཡི་སྒོ་ཕྱེས། །འཆི་མེད་ཟབ་དང་རྒྱ་ཆེའི་གསང་མཛོད་ཀྱི་དངོས་གྲུབ། །འཆི་མེད་རྟག་པར་རབ་སྨོན་བདག་ཅག་གི་བགོ་སྐལ། །འཆི་མེད་གྲུབ་པ་རྩ་གསུམ་དགྱེས་པ་ཡི་དགའ་ཚལ། །འཆི་མེད་བཀྲ་ཤིས་གནས་འདིར་སྨིན་གྲོལ་ཞིག་ཞུ་ན། །འཆི་མེད་བླ་མ་མཆོག་གི་དགྱེས་ཞལ་ནི་ངོམ་པས། །འཆི་མེད་དགའ་སྟོན་དབྱར་གྱི་དཔལ་མོ་ལྟར་རྒྱས་ནས། །འཆི་མེད་ཚེ་ཡི་བདུད་བགེགས་ཨེ་དབྱིངས་སུ་བསྟིམ་མཛོད། །འཆི་མེད་ཙན་ཌཱ་ལི་ཡི་ཐབས་ཤེས་ཀྱི་ཉེ་རྒྱུས། །འཆི་མེད་འཕོ་བྲལ་རྟག་པ་དམ་པ་ཡི་ལང་ཚོ། །འཆི་མེད་བི་མ་མི་ཏྲའི་ངོ་བོ་ཏུ་སྨིན་ནས། །འཆི་མེད་ཚེ་དང་ཡེ་ཤེས་གྲུབ་པ་ཞིག་ཞུའོ། །ཚེ་ཡི་གསང་མཛོད་དབྱེ་བའི་ཚིག། འཆི་མེད་དྲང་སྲོང་དབུ་དཀར་དེས། །རིན་ཆེན་རྡོ་ཡི་སྙིང་པོ་ཡི། །ཕྲེང་བ་ལྷ་རྫས་འབེབས་གཞི་བཅས། །རྒྱལ་གྱི་ཟླ་བའི་དཀར་པོའི་ཕྱོགས། །བཀྲ་ཤིས་དགེ་བའི་ཚེས་ལ་ཕུལ།། །། ༈ རྗེ་སངས་རྒྱས་ཀུན་འདུས་རྡོ་རྗེ་འཆང་། །དཔལ་ཨོ་རྒྱན་ཆོས་ཀྱི་རྒྱ་མཚོ་ནི། །སྤྲང་བདག་གི་སྤྱི་བོའི་རྒྱན་དུ་བཞུགས། །རྐྱེན་ཅི་བྱུང་བླ་མ་ཁྱེད་རང་ལ། །བུས་རྟག་ཏུ་གསོལ་བ་འདེབས་པ་ལགས། །རྟེན་དལ་འབྱོར་མི་ལུས་ཐོབ་པ་འདི། །རྗེ་ཐུབ་པའི་བསྟན་ལ་ཞུགས་པ་ཡང་། །ཕ་རྗེ་བཙུན་བླ་མ་ཁྱོད་ཀྱི་དྲིན། །དཔེ་ཀ་ཁ་སྦྱངས་པ་ཡན་ཆོད་ནས། །རྒྱུད་གསང་བ་སྙིང་པོ་ཐུག་གི་བར། །བསོད་རྣ་བའི་དཔྱིད་དུ་ཐོས་པའང་། །སྐྱབས་ཕ་ཅིག་བླ་མ་ཁྱེད་ཀྱི་དྲིན། །གཞི་ངེས་འབྱུང་སོ་ཐར་གྱི་ས་གཞི་ལ། །སྨན་བུ་མོས་འདམས་གྱིས་མ་གོས་ཤིང་། །བུ་ད་ལྟ་བྱི་ཕྲུག་གི་མ་བསྐོར་བ། །མགོན་བླ་མ་ཐུབ་དབང་ཁྱེད་ཀྱིས་དྲིན། །ཆོས་སྙིང་པོ་བྱང་ཆུབ་སེམས་བསྐྱེད་ལ། །སེམས་ཅན་བློས་བཏང་གི་དགྲ་སྟྭས་མ་རྨས་པ། །གཞན་ཕན་གྱི་བསམ་པ་བག་ཙམ་འདི། །རྗེ་འགྲོ་བའི་མགོན་པོ་ཁྱེད་ཀྱི་དྲིན། །ཆོས་བཀའ་གཏེར་གྱི་གདམས་ཟབ་རྒྱ་མཚོ་ལ། །རང་ཅི་འདོད་སྤྱོད་དུ་ཡོད་པ་དང་། །སྒྲུབ་ནུས་ན་ཚེ་འདིར་གྲོལ་བར་ནུས། །འདི་ཀུན་ཡང་རྡོ་རྗེ་འཆང་ཁྱེད་དྲིན། །ལས་བཟང་པོ་རྟེན་བཞེངས་མཆོད་པ་སོགས། །རྣམ་དཀར་གྱི་ལས་ལ་དཀར་བ་དང་། །རིས་མེད་ལ་དད་པ་དག་སྣང་ནི། །ཕྱོགས་འདུ་མེད་རྒྱས་པ་ཁྱེད་ཀྱི་དྲིན། །མདོར་བསྡུ་ན་ད་སྔ་ཡན་ཆོད་ལ། །ཡོན་ཏན་གྱི་རྣམ་པ་ཅི་མཆིས་པ། །ཕ་ནོར་བུ་ཁྱེད་ཀྱི་དྲིན་ལས་རྙེད། །བུས་བྱང་ཆུབ་བར་དུ་ཁྱེད་ཀྱི་དྲིན། །སྒོ་གསུམ་གྱི་མཆོད་པས་མཉེས་བྱེད་ན། །རྗེ་དྲིན་ཆོག་རྒྱལ་པོས་བྱིན་གྱིས་རློབས། །ཤིང་ཁྱི་ཟླ་༨ཚེས་༢༣ལའོ།། །། ༈ ཨ་ཧོ་ཡེ། དགུང་སྔོན་མཐོན་པོའི་དཀྱིལ་ན། །སྤྲིན་དཀར་ལང་ལོང་འཁྲིག་པ། །ཕ་ཅིག་དྲིན་ཅན་བླ་མ། །དྲན་པའི་གསོས་འདེབས་བྱས་བྱུང་། །འཇའ་ཚོན་སྣ་ལྔ་འཁྲིགས་པའི། །གུར་ཁྱིམ་མཛེས་པའི་དབུས་ན། །ཨོ་རྒྱན་མ་ཧཱ་གུ་རུ། །བཞུགས་པར་མོས་ན་བཞུགས་ཡོད། །བྱིན་རླབས་ཆར་རྒྱུན་འབེབས་རན། །གནམ་སྔོན་དྭངས་པའི་ངོས་ལ། །རྟ་བདུན་རྒྱལ་པོས་འོད་འབར། །རང་བཞིན་གདོད་མའི་བཞུགས་ཚུལ། །ངེས་གསང་བརྡ་འདིས་མཚོན་བྱུང་། །སྐད་ཅིག་འགྱུར་བའི་ཚུལ་འདིས། །མི་རྟག་སྒྱུ་མའི་དོན་སྟོན། །ཡིད་ལ་སྐྱོ་གདུང་འདྲེས་པ། །རང་གི་སེམས་ཀྱི་སྣང་བ། །ཉམས་མཚར་སྒྱུ་མའི་ལྟད་མོ། །བཀྲག་གསལ་མཚར་སྡུག་ལྡན་འདིས། །ཡིད་ག་ཤར་གྱི་རི་རྩེར། །མོས་སོ་བཞུགས་ལ་གཏོད་དོ། །ཡུན་རིང་སྲིད་པར་དུབ་ཤིང་། །ཀུན་རྟོག་ནད་བརྒྱས་གཙེས་པའི། །རྒྱ་མཚོས་རྦ་རླབས་དྲག་པོ། །རང་མལ་འཇམ་གྱི་ཞི་ནས། །བདེ་ཆེན་ཡངས་པའི་ཐང་ལ། །རྟ་མཆོག་ཅང་ཤེས་མཛེས་པ། །ཧི་ཧིའི་སྒྲ་སྙན་འཚེར་བཞིན། །ཀུན་ཏུ་དགའ་བའི་སྐྱེས་བུ། །དལ་གྱིས་བསྒྲོད་པས་མི་ངལ། །སྣ་ཚོགས་རིན་ཆེན་རྒྱན་གྱིས། །རྣམ་པར་བརྒྱན་པའི་གླང་བར་བརྟགས། ཆེན། །གཉིས་འཐུང་གངས་རིའི་མདངས་ལྡན། །གངས་ཅན་རི་བོའི་ཁོངས་སུ། །འཇིགས་པ་མེད་པར་རྒྱུ་ན། །ས་སྟེང་སྐྱེ་རྒུ་ཐམས་ཅད། །དགའ་བའི་གར་བརྒྱ་བསྒྱུར་ཏེ། །ཨ་ལ་ལ་ཡི་སྒྲ་སྒྲོགས། །དགྲ་ལྷའི་བ་དན་དཀར་པོ། །ཕྱོགས་བཅུར་སྒྲེངས་པས་བཀྲ་ཤིས། །ཅེས་མེ་ཁྱི་ཟླ་༣ཚེས་༧སྔ་ཆར་ལའོ།། །། ༈ སྟེང་ཡ་གི་དགའ་ལྡན་ལྷ་ཡུལ་ན། །དཔལ་མི་ཕམ་བྱམས་པ་མགོན་པོ་བཞུགས། །ཆོས་ཐེག་ཆེན་ཆོས་ཀྱི་རྒྱལ་རྔ་སྒྲོགས། །གནས་དེ་ལས་སྐྱིད་པ་ག་ལ་ཡོད། །རི་ལྷུན་པོ་གསེར་གྱི་རི་བོའི་སྟེང་། །ལྷ་སུམ་ཅུ་རྩ་གསུམ་རོལ་པ་དེར། །ལྷ་བརྒྱ་སྦྱིན་ལྷ་བུའི་འཁོར་གྱིས་བསྐོར། །དཔའ་ཞལ་དཀར་འབུམ་པ་ཡིན་པར་འདུག། ལྷ་དེ་ཡི་མགོན་སྐྱབས་ཁ་འཛིན་མཛོད། །ལྷོ་འཛམ་གླིང་ས་ཡི་ལྟེ་བ་ན། །རྗེ་དུས་གསུམ་རྒྱལ་བ་འཚང་རྒྱའི་གནས། །དཔལ་རྡོ་རྗེ་གདན་ཞེས་གྲགས་པ་དེར། །རྟེན་བྱང་ཆུབ་ཆེན་པོ་ཞེས་བྱ་བཞུགས། །དེ་མཇལ་ན་དགའ་ཡོ་སྐྱིད་དོ་ཡོ། །བྱང་ཁ་པ་ཅན་གྱི་རྒྱལ་ཁམས་འདིར། །ཞིང་གྲུ་འཛིན་རི་བོའི་ཉེ་འདབས་ན། །ལྷ་ཇོ་བོ་ཤཱཀྱ་མུ་ནེ་བཞུགས། །དེ་ཡང་ཡང་མཇལ་བའི་སྨོན་འདུན་ཡོད། །བུ་སང་ཉིན་སླེབས་ན་དགའ་བ་ལ། །རྐང་བྲོ་འཁྲབ་ཁ་ནས་སྐྱིད་གླུ་ལེན། །གྲོགས་ལྷ་ཚོགས་རྣམས་དང་འགྲོགས་ནས་འགྲོ། །མགོན་ཆོས་སྐྱོང་ནོར་ལྷས་བསུ་སྐྱེལ་བྱེད། །སེམས་དེ་ལས་སྐྱིད་པ་མེད་དོ་ཨང་། །ཉམས་དགའ་ཡོ་སྐྱིད་དོ་ཨ་ལ་ལ། །ཟླ་༡ཚེས་༢༧ལའོ།། །། ༈ རང་ལ་ཁྲེལ་བདས། ཨུ་ཧུ་ཧུ། བུ་ལས་ངན་གྱི་བློ་ངན་ཅན་ཁྱོད། །ལུས་མཚམས་ཁང་དུ་ཁེར་བུ་འདུག་ནས། །སེམས་ཀྱི་རྟ་རྒོད་སྲབ་མེད་སྒྲོགས་མེད་འདི་རྒྱ་ཡན། །རྣམ་རྟོག་གི་རླུང་གིས་རྒྱལ་ཁམས་ལ་ཁྲིད་དེ། །འདི་མི་དྲན་བྱ་བ་སྣེ་གཅིག་མེད་པ་དེ་ཨེ་ཧོ་ཧོཿབསམ་པ་བཟང་པོའི་རྟོག་པ་ནི་སྣེ་རེ་རེ་གཅིག་གཉིས་ལས་མེད་དོ། །དེ་ཡང་ཐར་པའི་རྒྱུར་འགྲོ་བའི་བསམ་བཟང་ཞིག་ནི་ཉིན་སྐར་ཙམ་དཀོན་ངེས། །བུ་རེ་སྡུག་རེ་སྡུག་བསམ་མནོ་ཞིག་ཐོངས་དང་། །ད་མི་ཚེ་ཉི་མ་ཕལ་ཆེར་ཞིག་སོང་ནས། །འཆི་བ་ཁོ་ངམ་གནག་ཙེ་རེ་སླེབ་འདུག་གོ །རང་གི་མགོ་ལུས་པགས་བརྒྱད་རྒས་ལུགས་ལ་སོམས་དང་། །ད་ཡུན་རིང་སྡོད་པའི་ངེས་པ་ཞིག་མི་འདུག། འཆི་དུས་ཀྱི་ཕྱི་མའི་བརྒྱག་དགེ་ཅི་འདུག་ཞིག་ལྟོས་དང་། །དོན་ཉེན་པའི་དགེ་སྦྱོར་སྣ་གཅིག་ཀྱང་བྱས་མི་འདུག། ད་བསམ་གྱིན་བསམ་གྱིན་ང་རེ་སྡུག་ཨུ་ཧུ་ཧུ། །ཆོས་མི་ལ་བཤད་པའི་བན་རྒན་ཁྱོད་ད་རན། །རང་གཅིག་པུ་ག་ཤེད་ཆ་མེད་དུ་ཁྱོགས་ཉེ། །ཕོ་བྱས་བྱས་སྣེ་གཅིག་བགྲང་རྒྱུ་ཁུར་རྒྱུ་ནི་མི་འདུག། ལས་ངན་པ་བསགས་བའི་སྡིག་པའི་ཕུང་པོ་དེ་བཏེགས་ན། །ད་ཁྱོད་བསམ་མནོ་ལན་དགུ་ཞིག་བཏང་རྒྱུ་མ་འཆུག། འཇིག་རྟེན་ཚེ་འདིའི་སྣང་བ་ལ་སྲེད་པ་མ་ཆེ་སྐུ་ཚེ་རིང་། །དམ་ཆོས་སྦྱོར་དངོས་རྗེས་གསུམ་ཚང་བའི་རྣམ་དག་ཞིག་ཨི་འགྲུབ་ལྟོས། །ད་དྲན་རྒྱུ་མ་མང་བློ་སྣ་བསྟུངས་རོགས་བློ་གྲོས་མཁྱེན། །སེམས་གྱི་རྟ་རྒོད་འདི་རྒྱ་ཡན་མ་བཏང་འདུལ་སྦྱངས་གི་ཐབས་ནི། །བླ་མའི་བཀའ་དྲིན་གྱིས་ཅུང་ཟད་ཤེས་ཚོད་ནི་རེད་པས། །དེ་ཡལ་བར་མ་དོར་རང་ཉམས་ལོང་དང་རང་ལ་སྐུ་དྲིན་ཆེ། །དེ་ལྟར་མ་བརྩོན་ཕྱིན་གཏན་གྱི་ཆགས་སྒོ་ཆེན་པོ་ཞིག་འོང་ངེས་ལྷ་དཔང་རེད། །དེ་བློ་གྲོས་ཁྱོད་ཀྱི་ཐུགས་ལ་བསྟིམ་ལ། །རྒྱུ་འབྲས་ལ་བླངས་དོར་ཞིག་མཛད་རོགས་ཁྱེད་མཁྱེན། །ནེ་ཚོའི་ཆོས་བཤད་ལྟ་བུས་ཁ་དོན་མི་མཚུངས་པ་དེ་བསྐྱུར་ཐོངས། །བླ་མ་རྒྱལ་བ་སྲས་བཅས་ཀྱི་ཐུགས་ཁྲེལ་གནང་འོང་། །རང་ལ་མེད་པའི་ཁ་བཤད་དེ་ངོ་ཚ་མོ་རེད། །གཞན་ལ་མི་ཕན་པའི་ཁར་ཕྱིན་ཅི་ལོག་ཏུ་ཁྲིད་འགྲོ། །སློབ་མའི་རྒྱུད་ཆུད་གཟན། །རང་གཞན་གཉིས་ཀ་མགོ་བསྐོར་གྱི་ཕུང་བསྐྱེད་དེ་ཞོགས་ལ་ཐོངས། །བློ་གྲོས་བློ་གྲོས་སྐུ་ཚེ་རིང་བའི་རྟེན་འབྱུང་བྱེད་དང་སྟེ། །ད་ཨི་བྱེད་མ་ཤེས་དེ་སྔ་ཕན་ཅི་ཐོན་འདི་ཐོན་མ་ཐོན་བྱ་བ་ཐམས་ཅད་སྟོང་ལྡིར་ཤ་སྟག་རེད། །ད་ཞག་དང་ཟླ་བ་ལོ་དུ་འདུག་ནང་། །ཆོས་རྣམ་དག་ཞིག་སྒྲུབ་ནས་ཉམས་ལེན་ལ་བརྩོན་ཨི་གོ །ཚེ་འདིར་སྣང་གི་ཞེན་པ་ཆོད། །ཁྱད་པར་ན་ནིང་ད་ལོའི་བྱ་བ་སྨྱོན་བ་ལྟ་བུ་དེ། །སྨྱོ་ལེ་ངེས་པར་རེད་ཨི་གོ །ད་རང་སྡུག་ཉོ་སྤྱད་ལས་ཕན་པ་ཅི་འདུག། ལག་པ་བྲང་ཐོག་ཞོག་ལ་སྣང་བ་ནང་དུ་བཀུག། བསམ་མནོ་ལན་མ་དགུ་ལ་ཐོངས་དང་། །བྱ་བ་ཐམས་ཅད་ལ་ཟན་གང་གཅིག་རི་བ་མེད་ངེས། །ངན་སོང་དུ་ནི་འགྲོ་རན། །དམྱལ་ཆུས་ནི་ཚིག་རན། ཨུ་ཧུ་ཧུ། །སྡུག་པོ་ཟེར་ན་དེ་ལ་ཟེར། །མདོ་མེད་ཁྱོད་འདྲ་འཇིག་རྟེན་ན་ཡོད་ཨི་དར་ན། །ཨི་ཤི་རེ། །དམ་འཆུག་མ་འཆུག་གཟོབ། །བླ་མ་དཀོན་མཆོག་མཁྱེན། །རང་རྒྱུད་འདུལ་ནུས་པར་བྱིན་གྱིས་རློབས། །བློ་ངན་དེས་སྡུག་སྐད་ཆལ་ཆོལ་དུ་བྲིས་པའོ།། །། ༈ ཨ་ཧོ། ཡེ་ཤེས་ཆེན་པོ་གྲུབ་པའི་རིག་འཛིན་གྱི་ཁྱུ་མཆོག། མ་ཧཱ་གུ་རུའི་རྒྱལ་ཚབ་བླ་མ་དེ་མཁྱེན་ནོ། །བདེ་ཆེན་ཡེ་ཤེས་རྡོ་རྗེའི་དབང་མཆོག་ཞིག་བསྐུར་དང་། །ང་ཅག་རང་གྲོལ་ཆེན་པོའི་ས་མཆོག་ལ་གཤེགས་འགྲོ། །སྙིང་དབུས་འོད་ལྔའི་གུར་ཁྱིམ་པད་དཀར་གྱི་ཟེའུ་འབྲུར། །རིགས་འདུས་སེམས་དཔའ་པདྨའི་མྱུ་གུ་དེ་བཞུགས་པས། །སྐུ་གསུམ་རིགས་འདུས་བླ་མ་རང་ཆས་སུ་ལྷུན་རྫོགས། །འབྲས་བུ་ཕྱི་དུས་ཡིད་སྨོན་མ་དགོས་པས་དགའོ། །རང་སྣང་རྔ་ཡབ་དཔལ་རི་པདྨ་ཡི་ཕོ་བྲང་། །དཀྱིལ་འཁོར་གཙོ་མཆོག་རྡོ་རྗེ་ཐོད་ཕྲེང་དང་དབྱེར་མེད། །མཁའ་འགྲོ་རྒྱ་མཚོའི་མིང་པོ་བླ་མ་དེ་མཁྱེན་ནོ། །ད་ལྟ་ཉིད་དུ་བདག་ལ་བྱིན་གྱིས་རང་རློབས་ཤིག། ཇི་བཞིན་མ་བཅོས་ཡེ་བབས་ཕྱོགས་ལྷུང་དང་བྲལ་ཞིང་། །སྤྲོས་པའི་རྙོག་པ་བྲལ་བའི་ཆོས་དབྱིངས་ཀྱི་ཀློང་དུ། །ཞལ་ཕྱག་མཚན་མ་ལས་འདས་མཆོག་གྱུར་གྱི་གླིང་པ། །རང་ངོ་ཤེས་པའི་ངང་ནས་གསོལ་བ་རང་འདེབས་སོ། །ཡིད་དཔྱོད་བློ་ཡི་སྒྲུབ་པའི་འཆིང་བ་ཀུན་དོར་ནས། །བྱར་མེད་གཉུག་མའི་ངང་དེར་ཉེ་ལམ་ཞིག་བསྒྲོད་པས། །དངོས་སྣང་འགྱུར་མེད་བདེ་ཆེན་བླ་མ་རུ་ཤར་བར། །གཉིས་འཛིན་བྲལ་བའི་ངང་ནས་གསོལ་བ་རང་འདེབས་སོ། །འཁོར་འདས་ཆོས་རྣམས་རིག་པའི་གཤིས་ལུགས་ལ་རྫོགས་པས། །སྤངས་ཐོབ་འཕེལ་འགྲིབ་ལས་འདས་འོད་གསལ་གྱི་ཐིག་ལེར། །ཞེན་མེད་ངང་ནས་འཁྲུལ་པའི་ཆོས་རྣམས་ཀུན་རང་ཞིག། རང་གྲོལ་རྒྱལ་པོ་འོད་གསལ་གླིང་པ་དེ་མཁྱེན་ནོ། །རང་སྣང་དབྱེར་མེད་ངང་ནས་གསོལ་བ་ཞིག་འདེབས་ན། །ང་ཡི་སྒོ་གསུམ་མ་རིག་སྦུབས་རྒྱ་ལས་གྲོལ་ནས། །འཇའ་ལུས་རྡོ་རྗེའི་སྐུ་རུ་ད་ལྟ་རང་སྨིན་ནས། །ཆོས་ཟད་ཆེན་པོའི་གླིང་དུ་རྣལ་འབྱོར་རང་སྐྱིད་དོ། །ཡེ་ཤེས་ལྷུན་གྲུབ་ཆེན་པོ་ཕྱིར་གསལ་དུ་ཤར་བས། །རང་སྣང་སྐུ་དང་ཞིང་ཁམས་བཀོད་པ་ནི་བསམ་ཡས། །དོན་གཉིས་ལྷུན་གྲུབ་འདོད་འབྱུང་བསམ་འཕེལ་གྱི་ནོར་བུ། །འགྲོ་ཀུན་བྱང་ཆུབ་མཆོག་ལ་འགོད་པ་རུ་གྱུར་ཅིག། །མདོར་ན་དེང་བཟུང་བྱང་ཆུབ་སྙིང་པོ་ཡི་བར་དུ། །དཔལ་ལྡན་བླ་མ་མཚོ་སྐྱེས་རྡོ་རྗེ་ཡི་རང་ཞལ། །དུས་གསུམ་འབྲལ་མེད་མཇལ་བའི་བྱིན་བརླབ་ཀྱི་མཐུ་ལས། །རྩ་རླུང་ཐིག་ལེའི་མདུད་པ་རང་གྲོལ་དུ་སོང་ནས། །ཡེ་ཤེས་རིག་པའི་རྩལ་ཁ་ཕྱོགས་མེད་དུ་རྒྱས་མཛོད། །སྐུ་གསུམ་ལམ་གྱི་སྣང་བ་ཚེ་འདི་ལ་རྫོགས་ནས། །རྣམ་ཤེས་ལས་འདས་ཡེ་ཤེས་ཆོས་སྐུ་ཡི་རྒྱལ་ཁམས། །ཚེ་འདི་ཉིད་ལ་སྙོགས་པའི་དངོས་གྲུབ་ཞིག་ཞུའོ། །མཁྱེན་ནོ་མཁྱེན་ནོ་གཏེར་ཆེན་བླ་མ་རང་མཁྱེན་ནོ། །ཀྱེ་མ་ཀྱེ་ཧུད་ལས་ངན་བདག་འདྲ་ལ་གཟིགས་ཤིག། གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། མཆོག་ཐུན་དངོས་གྲུབ་སྟན་ཐོག་འདི་ཉིད་དུ་སྩོལ་ཅིག། །འཆི་མེད་ཡེ་ཤེས་སྐུ་ཅན་བླ་མ་དེ་མཁྱེན་ནོ། །གསོལ་འདེབས་བུ་ལ་ཚེ་དང་ཡེ་ཤེས་ཀྱི་དངོས་གྲུབ། །མི་འགྱུར་མི་བཤིག་རྡོ་རྗེ་སེམས་དཔའ་ཡི་ལང་ཚོ། །དཀའ་བ་མེད་པ་འགྲུབ་པའི་སྨོན་ལམ་ཞིག་ཞུའོ། །ཅེས་པའང་པདྨ་ཡེ་ཤེས་རྡོ་རྗེས་གསོལ་བ་བཏབ་པ་ཡེ་ཤེས་གཟིགས་པའི་བྱིན་རླབས་སྙིང་དབུས་སུ་ཐིམ་པར་གྱུར་ཅིག། སརྦ་སིདྡྷི་རསྟུ། མངྒ་ལཾ།། །། ༈ རྗེ་སྐྱབས་གནས་རྒྱ་མཚོ་རིགས་ཀུན་གྱི་བདག་ཉིད། །དཔལ་གདོད་མའི་མགོན་པོ་བླ་མ་དེ་མཁྱེན་ནོ། །ཚུར་འདི་ལ་སེམས་དང་ལས་ལྡན་གྱི་ནཱི་གུ། །མི་མདོ་མེད་འཆལ་པོའི་བྱུང་རྒྱལ་གྱིས་ངག་འཁྱལ། །རྟེན་དལ་འབྱོར་མི་ལུས་གྲུ་ཆེན་ལ་བརྟེན་ནས། །གནས་ཁམས་གསུམ་འཁོར་བའི་རྒྱ་མཚོ་ལས་བསྒྲལ་ཏེ། །དབྱིངས་གདོད་མའི་རྒྱལ་ཁམས་རིན་ཆེན་གྱི་གླིང་དུ། །ཚིག་ངལ་མེད་བགྲོད་ཐབས་ཟབ་ལམ་གྱི་གདམས་པ། །དོན་ལྟ་སྒོམ་སྤྱོད་པའི་གནད་ཀ་ཡི་མདོ་ཆིངས། །དྲིན་ཆེ་བའི་བླ་མ་སངས་རྒྱས་སུ་མཐོང་བའི། །ཡིད་མོས་གུས་གསོལ་འདེབས་གཅིག་པུ་ལ་འདུ་སྐད། །སེམས་རྟོག་པ་བྲལ་བ་ཟང་ཐལ་གྱི་རིག་པ། །འདི་གཏང་མེད་རང་བབ་བསྒོམ་མེད་དུ་བཞག་ཚེ། །རྩལ་གང་ཤར་ཆུ་ཡི་རི་མོ་ལྟར་དག་ཅིང་། །བློ་ངེས་ཤེས་བྲལ་བའི་གནས་ལུགས་ཀྱི་དགོངས་པ། །དོན་འདི་ལས་མི་དགོས་གཅིག་ཤེས་དེ་ཀུན་གྲོལ། །གདངས་རོལ་པ་སྣོད་བཅུད་ཕྱི་ནང་གི་ཆོས་ཀུན། །ཡེ་དག་པ་རབ་འབྱམས་ལྷ་སྔགས་དང་ཡེ་ཤེས། །སྲིད་འཁོར་འདས་གཉིས་མེད་མཉམ་ཉིད་དུ་ལྷུན་གྲུབ། །བློ་ཨ་འཐས་གཉིས་འཛིན་སྣང་བ་ནི་མ་དགོས། །ཚིག་འདི་ལ་སྙན་པའི་སྡེབ་ལེགས་ཡང་མེད་ཀྱང་། །དོན་ལམ་གནད་བཅུད་ཀྱི་ཉིང་ཁུ་དེ་བསྟན་ཡོད། །ཡིད་སྤྲོ་བས་སྙིང་གི་ཐིག་ལེ་རུ་བསྐྱིལ་དང་། །གནས་རྔ་ཡབ་དཔལ་རི་པདྨ་ཡི་འོད་གླིང་། །མགོན་མཚོ་སྐྱེས་རྒྱལ་བའི་ཞལ་བཟང་དེ་མཇལ་བཞིན། །མ་དཔའ་བོ་མཁའ་འགྲོའི་བརྟུལ་ཞུགས་ཀྱི་ཚོགས་གྲལ། །ཆོས་ཐེག་ཆེན་དོན་ལ་གནས་པར་ཞུ་ཅི་དགོས། །ཅེས་རྡོ་རྗེ་དམ་ཚིག་གཅིག་གིས་བསྡུས་པའི་མཆེད་གྲོགས་ལས་ཀྱི་མཚན་ཅན་མ་ལ་སྤྲིང་བ་དགེ། །། ༈ བླ་མ་རྒྱང་འབོད་ཀྱི་གསོལ་འདེབས་སྲིད་ཞིའི་གདུང་སེལ་ཞེས་བྱ་བ་བཞུགས་སོ། །འེ་འེ། །བླ་མ་མཁྱེན་ནོ། །མཁྱེན་ནོ་མཁྱེན་ནོ་བླ་མ་མཁྱེན་ནོ། །སངས་རྒྱས་ཀུན་འདུས་ཀྱི་ངོ་བོ། །དམ་ཆོས་རིན་ཆེན་གྱི་འབྱུང་གནས། །འཕགས་ཚོགས་དགེ་འདུན་གྱི་མངའ་བདག། རྩ་བའི་བླ་མ་རང་མཁྱེན་ནོ། །རྩ་བརྒྱུད་བླ་མ་ཡི་སྤྲོ་གཞི། །ཡི་དམ་ཞི་ཁྲོ་ཀུན་འདུས་པ། །མཁའ་འགྲོ་ཆོས་སྐྱོང་གི་གཏེར་མཛོད། །བླ་མ་བཀའ་དྲིན་ཅན་མཁྱེན་ནོ། །ཞེས་པའི་རྒྱང་འབོད་ལན་གསུམ་སོགས་ཀྱིས་བོས་ནས། ལས་ངན་བདག་ལ་ཐུགས་རྗེས་གཟིགས་ཤིག། སྐལ་དམན་སྐྱེ་ངན་སྡུག་བསྔལ་མཚོ་ལས། །བྱམས་པའི་ཕྱག་གིས་དྲོངས་པར་མཛོད་ཅིག། ཐར་པའི་སྐམ་སར་དབུགས་དབྱུང་སྩོལ་ཅིག། ཀྱེ་མ་བདག་འདྲའི་སེམས་ཅན་ལས་ངན་རྣམས། །དལ་འབྱོར་ཐོབ་ཀྱང་དོན་མེད་ཆུད་ཟོས་བཏང་། །འཆི་བ་མི་དྲན་འདིར་སྣང་དབང་དུ་སོང་། །ཉིན་རེ་བཞིན་དུ་སྒོ་གསུམ་སྡིག་པར་སྤྱོད། །དགེ་བའི་ལས་ནི་སྐྲ་རྩེའི་ཆུ་ཐིག་ཙམ། །དྲན་དང་ཤེས་བཞིན་མེད་དེ་སྨྱོན་པ་འདྲ། །བག་ཡོད་སྟོར་ནས་བག་མེད་རྣམ་གཡེང་ངང་། །མི་ཚེ་ཉི་མ་ནུབ་རིའི་ཕག་ཏུ་བསྐྱལ། །ཕ་མ་འབྱོར་ལྡན་ཁྱིམ་དུ་སྐྱེས་པའམ། །འབྱོར་མེད་དབུལ་པོའི་ཁྱིམ་དུ་སྐྱེས་ཀྱང་རུང་། །གཅེས་ཕྲུག་རྒྱ་ཡན་གང་བྱུང་གང་ཤར་གྱིས། །རང་བློ་ནང་དུ་མ་ཁུག་ངན་གོམས་ཀྱི། །ཆུ་ངན་ལམ་རྒྱུག་དབང་དུ་ཤོར་བ་དང་། །དམ་ཆོས་བྱེད་བློ་མ་ཤར་སེམས་འདི་ནི། །རྡོ་བ་དང་མཚུངས་འཆི་བ་འོང་སྙམ་མེད། །ཉིན་མཚན་ཐམས་ཅད་སྐྱིད་ཀྱི་ངང་དུ་ཟད། །ཡང་ན་སྡུག་གི་ངང་དུ་དུས་འདའ་ཞིང་། །སྐྱིད་འདོད་སྡུག་བསྔལ་ཉོ་བ་ཀྱེ་མ་ཧུད། །ལང་ཚོ་མཛེས་པའི་བཀྲག་མདངས་མྱུར་དུ་ཡལ། །གཤིན་རྗེའི་མཆེ་བའི་བར་དུ་བཟུང་ནས་འདུག། སོ་ཡི་མ་བཏབ་ཙམ་ན་ཁ་རྗེ་ཆེ། །འཆི་བ་ཞེས་བྱའི་བདུད་པོ་ངམ་ནག་དེས། །ཞགས་པ་བཟུང་ནས་གམ་ན་སླེབས་པའི་དུས། །ཁ་བཤད་མཁས་པས་མགོ་བསྐོར་བྱ་ས་མེད། །རྒྱུ་ནོར་ཆེ་བས་བསླུ་རུ་མི་བཏུབ་ཅིང་། །མཐུ་དང་ནུས་པའི་སྟོབས་ཀྱིས་བཟློག་ཏུ་མེད། །ལག་པ་བྲང་འཐབ་མིག་སྒོར་མཆི་མ་ལུག། གྲོགས་དང་མཛའ་བཤེས་ཁང་ཁྱིམ་ནོར་རྫས་སོགས། །ཤུལ་དུ་བཞག་ནས་འགྲོ་བའི་དུས་ཤིག་འོང་། །དེ་ཚེ་སྡིག་བསགས་ལས་ཀྱི་ཁུར་པོ་ནི། །ལྷུན་པོའི་གཏོས་ཙམ་ཁྱེར་ནས་བར་དོར་འཁྱམས། །དགེ་བའི་བསགས་པ་རྡུལ་ཕྲན་ཙམ་མཆིས་ཀྱང་། །དེ་ཚེ་བསོད་ནམས་སྐྱབས་ཤིག་ཡོད་ན་ཡང་། །ད་ལྟ་མ་བསགས་དེ་དུས་ཁྱེར་རྒྱུ་མེད། །བར་དོར་འཇིགས་སྐྲག་སྡུག་བསྔལ་དཔག་མེད་མྱོང་། །ངན་སོང་གནས་ལྟུང་སྡུག་བསྔལ་བཟོད་བླག་མེད། །ད་ལྟ་མེ་སྟག་ཕོག་དང་ཉིན་གཅིག་གི །འཆག་ལྟོག་མི་བཟོད་དེ་དུས་ག་ལ་བཟོད། །ཤུགས་དྲག་རྒྱུན་རིང་བཟོད་དཀའི་སྡུག་བསྔལ་དེ། །ལེགས་པར་བསམ་ནས་དམ་ཆོས་སྙིང་ནས་སྒྲུབ། །སྒོ་གསུམ་དགེ་ལ་འབད་ནུས་བྱིན་གྱིས་རློབས། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །དལ་འབྱོར་ཐོབ་པ་ད་རེས་ཙམ་ཞིག་ཡིན། །ཕྱིས་ནས་འདི་འདྲ་ཐོབ་པ་སྲིད་མཐའ་ཙམ། །གལ་ཏེ་མཐའ་འཁོབ་ཀླ་ཀློ་ཆོས་མེད་སར། །མི་ལུས་ཐོབ་ཀྱང་སྙིང་པོ་ཅུང་ཟད་མེད། །དེ་རུ་མི་སྐྱེ་བ་ཡི་སྨོན་ལམ་ཐོབ། །ལྷ་ཡི་གནས་སུ་སྐྱེས་ཀྱང་དགོས་པ་ཆུང་། །ཟག་བཅས་བདེ་འབྲས་ཟད་ནས་ངན་འགྲོར་ལྟུང་། །དེས་ན་རྙེད་དཀའི་མི་ལུས་རིན་ཆེན་འདི། །ནོར་བུ་བརྒྱ་སྟོང་ཐོབ་པའི་དཔེས་མི་མཚོན། །འདི་ཐོབ་སྡིག་ལ་སྤྱོད་པ་ཤིན་ཏུ་བླུན། །དཔེར་ན་ནོར་བུ་འདམ་རྫབ་འཕང་བཞིན་གྱུར། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །ལེགས་ན་ཐར་པའི་གྲུ་གཟིངས་ལུས་འདི་ཡིན། །ཉེས་ན་འཁོར་བའི་གཏིང་རྡོ་འདིས་བྱེད་པས། །ཡར་འགྲོ་མར་འགྲོའི་ས་མཚམས་ད་རེས་ཡིན། །རྟ་ཁ་སྲབ་ཀྱིས་བསྒྱུར་བ་ཇི་བཞིན་དུ། །ཉེས་སྤྱོད་ལམ་ལས་ལྡོག་ཅིག་བླ་མ་མཁྱེན། །འདོད་པ་ལ་ཆགས་ཕུང་ཁྲོལ་བསྐྱེད་པའི་རྒྱུ། །གསོག་དཀའ་སྤེལ་དཀའ་སེར་སྣའི་མདུད་པ་དམ། །སྦྱིན་འབྲས་མེད་ན་སྦྲང་མའི་སྦྲང་རྩི་བཞིན། །སྔོན་བསགས་བསོད་ནམས་ཡོད་ན་འབད་མེད་འབྱོར། །དེ་བས་མཆོད་སྦྱིན་ནུས་པར་བླ་མ་མཁྱེན། །ཁྱིམ་ན་གནས་པ་ཉེས་པ་ཀུན་གྱི་གཞི། །ཆགས་སྡང་གཉིས་ཀྱིས་ཉིན་མཚན་ཐམས་ཅད་འདའ། །དགྲ་འདུལ་གཉེན་སྐྱོང་སོ་ནམ་ཅི་བྱས་ཀྱང་། །ཟིན་པའི་དུས་མེད་ཕྱི་ཕྱིར་ཇེ་ཆེར་འཕེལ། །འདོད་པའི་དོན་མ་གྲུབ་པའི་སྡུག་གིས་གཙེར། །རང་སྡུག་རང་ཉོ་མ་དགོས་བླ་མ་མཁྱེན། །འཁོར་བའི་གནས་ནི་མེ་ཡི་འོབ་དང་མཚུངས། །སྲིན་མོའི་གླིང་དང་རལ་གྲི་རྣོན་པོའི་སོ། །དུག་དང་འདྲ་བའི་ཉེས་དམིགས་དྲན་བྱས་ནས། །སྲིད་ལས་ངེས་འབྱུང་སྐྱེ་བར་བླ་མ་མཁྱེན། །འཁོར་བ་ངན་སོང་སྡུག་བསྔལ་མཐའ་དག་ལས། །སྐྱོབས་པར་ནུས་པ་བླ་མ་དཀོན་མཆོག་ཡིན། །དེ་ལས་གཞན་པའི་སྐྱོབས་པ་སུ་ཡང་མེད། །དང་འདོད་ཡིད་ཆེས་དད་མོས་དྲག་པོ་ཡིས། །སྐྱབས་གསུམ་རང་ངོ་ཤེས་པར་བླ་མ་མཁྱེན། །སེམས་ཅན་ཐམས་ཅད་ཕ་མར་མ་གྱུར་མེད། །ད་ལྟ་འཁྲུལ་ཏེ་བདག་གཞན་ཕྱོགས་རིས་འབྱེད། །ཆགས་དང་སྡང་བའི་སྒྲོག་གིས་བཅིང་བ་འདིའི། །རྩ་བ་བདག་ཏུ་འཛིན་པ་ངོས་ཟིན་ནས། །བདག་མེད་གནས་ལུགས་རྟོགས་པར་བླ་མ་མཁྱེན། །འགྲོ་ཀུན་ཕ་མར་གྱུར་པ་ཤེས་བྱས་ཏེ། །དྲིན་གཟོ་ཕན་འདོད་ལྷག་བསམ་བཟང་པོ་ཡི། །བྱམས་དང་སྙིང་རྗེ་བྱང་ཆུབ་སེམས་མཆོག་ལ། །ཡང་ཡང་བློ་སྦྱོང་ནུས་པར་བླ་མ་མཁྱེན། །ཚོགས་གཉིས་མ་བསགས་སྒྲིབ་པ་མ་བྱང་ན། །སྐུ་བཞིའི་གོ་འཕང་ནམ་ཡང་མི་ཐོབ་པས། །འདྲེ་བཀྲེན་ཡི་དྭགས་སྐྱེ་བའི་རྒྱུ་སྤངས་ནས། །བསོད་ནམས་ཚོགས་ཆེན་བསགས་ལ་འབད་པ་དང་། །དེ་ཡང་དངོས་ཞེན་བདེན་འཛིན་གྱིས་མ་བསླད། །ཆོས་ཀུན་སྒྱུ་མ་སྒྱུ་མའི་རང་བཞིན་སྟོང་། །འཁོར་གསུམ་དམིགས་པ་མེད་པའི་ཤེས་རབ་ལ། །བློ་བཞག་ཡེ་ཤེས་ཚོགས་ཆེན་བསགས་པ་དང་། །འདིས་མཚོན་དགེ་བ་ནམ་མཁའི་མཐའ་ཁྱབ་ཀྱི། །འགྲོ་ལ་ཡོངས་བསྔོ་འཇམ་དཔལ་དཔའ་བོ་ཡི། །རྗེས་སུ་ཞུགས་ནས་བསྔོས་བཞིན་འགྲུབ་པ་དང་། །ལན་དང་རྣམ་པར་སྨིན་ལ་མི་ལྟོས་པར། །འཁོར་གསུམ་ཡོངས་དག་ནུས་པར་བླ་མ་མཁྱེན། །ཐོག་མེད་དུས་ནས་བསགས་པའི་སྡིག་སྒྲིབ་ཀྱིས། །བདེ་གཤེགས་སྙིང་པོའི་རང་ཞལ་བསྒྲིབས་པས་ན། །མ་རིག་གིས་བསྐྱེད་དུག་གསུམ་གྱིས་བསླང་བའི། །མི་དགེའི་ལས་རྣམས་སྟོབས་བཞི་ཚང་བས་བཤགས། །འགྱོད་དང་བསྡམ་སེམས་མེད་ན་མི་འདག་པས། །སྙིང་ནས་གནོང་འགྱོད་དྲག་པོས་མཐོལ་ཞིང་བཤགས། །མ་བཤགས་ཉེས་པ་ཕྲ་མོ་ཞིག་གིས་ཀྱང་། །རྩ་ཡི་ཕུང་པོར་མེ་ནི་འཛིན་པ་བཞིན། །རང་རྒྱུད་བསྲེགས་ཤིང་འཁོར་བར་འཕེན་པས་ན། །བཤགས་པས་སྡིག་སྒྲིབ་དག་པར་བླ་མ་མཁྱེན། །རང་གི་སེམས་ཀྱི་གནས་ལུགས་མ་རྟོགས་ན། །ཁ་བཤད་མཁས་དང་རྣམ་རྟོག་བསྒོམས་པ་ཡིས། །བྱང་ཆུབ་ཆེན་པོ་ནམ་ཡང་མི་ཐོབ་པས། །རང་གི་སེམས་ཀྱི་རྩ་བ་ཆོད་པ་དང་། །ཇི་ལྟར་སྣང་བ་སེམས་ཀྱི་ཆོ་འཕྲུལ་ཡིན། །འཁོར་འདས་རེ་དོགས་སེམས་ཀྱི་འཛིན་སྟངས་ཏེ། །སེམས་ཉིད་རྩ་བ་བཅད་ན་གཞི་རྩ་བྲལ། །མེད་སྣང་སྟོང་པའི་རང་གཟུགས་ཁོ་ན་ལ། །བྱིས་པ་རྣམས་ཀྱི་བདེན་པར་བཟུང་བ་སྟེ། །ཇི་ལྟར་མཁའ་ལ་སྐྲ་ཤད་སྣང་བ་བཞིན། །སྣང་བ་ཉིད་ནས་རང་གི་ངོ་བོས་སྟོང་། །དེས་ན་སེམས་ཉིད་ཡེ་སྟོང་ཀ་ནས་དག། ཡོད་པ་མ་ཡིན་རྒྱལ་བས་ཀྱང་མ་གཟིགས། །མེད་པ་མ་ཡིན་འཁོར་འདས་གཞིར་གྱུར་ཀྱང་། །དངོས་པོ་མཚན་མ་ཅན་དུ་གྲུབ་པ་མེད། །རྒྱ་ཆད་ཕྱོགས་བྲལ་ནམ་མཁའི་དཔེ་ཡིས་མཚོན། །ངོ་བོ་སྟོང་ལ་རང་བཞིན་འོད་གསལ་བ། །ཐུགས་རྗེ་རིག་པ་འཁོར་འདས་ཀུན་ལ་ཁྱབ། །རིག་རྩལ་དག་དང་མ་དག་ཅིར་ཡང་ཤར། །གསུམ་དུ་ཕྱེ་ཡང་དོན་ལ་རིག་པར་གཅིག། གཞི་ཡི་གནས་ལུགས་རྟོགས་པར་བླ་མ་མཁྱེན། །དེ་ཉིད་བླ་མའི་དྲིན་གྱིས་ངོ་འཕྲོད་ནས། །སྤྲོས་པའི་སྒྲོ་འདོགས་ཆོད་པའི་ལྟ་བ་དང་། །མ་བཅོས་ཡེངས་མེད་འཛིན་བྲལ་སྒོམ་པའི་གནད། །གང་ཤར་རང་གྲོལ་འགྲོ་བ་སྤྱོད་པ་སྟེ། །དེ་གསུམ་དབྱེར་མེད་ཤེས་པ་བླ་མ་མཁྱེན། །གདོད་ནས་ལྷུན་གྲུབ་སྐུ་གསུམ་ཆེན་པོར་བཞུགས། །གཉིས་ཆོས་ཀ་ནས་དག་པ་དབུ་མ་ཆེ། །ཐབས་ཤེས་དབྱེར་མེད་ཕྱག་རྒྱ་ཆེན་པོ་དང་། །རིག་སྟོང་འོད་གསལ་རྫོགས་པ་ཆེན་པོ་ཡི། །རང་བཞིན་མངོན་སུམ་རྟོགས་པ་མཐར་ཕྱིན་ནས། །འབྲས་བུ་ཆོས་སྐུ་རིག་པའི་བཙན་ས་ཟིན། །འཁོར་བ་དོང་ནས་སྤྲུགས་ནུས་བླ་མ་མཁྱེན། །ཀྱེ་མ་ཀྱི་ཧུད་རིག་འཛིན་པདྨ་འབྱུང་། །བློ་སྣ་ཆོས་ལ་སྒྱུར་ཅིག་བླ་མ་མཁྱེན། །ངན་སོང་སྒོ་ཆེན་ཆོད་ཅིག་བླ་མ་མཁྱེན། །ལས་ངན་སྡིག་སྒྲིབ་དག་པར༴ །རྐྱེན་ངན་བྱང་ཆུབ་ལམ་ཁྱེར༴ །སྐྱིད་སྡུག་རོ་སྙོམས་ནུས་པར༴ །འཁོར་འདས་དབྱེར་མེད་རྟོགས་པར༴ །སྣང་སེམས་གཞི་གྲོལ་འགྱུར་བ༴ །སྐུ་གསུམ་རང་ཞལ་མཇལ་བར༴ །འཇའ་ལུས་ཆོས་སྐུ་འགྲུབ་པར༴ །མཁྱེན་ནོ་མཁྱེན་ནོ་རྗེ་བཙུན་བླ་མ་མཁྱེན། །རེ་ས་གཞན་ན་མེད་དོ་ཐུགས་རྗེས་ཟུངས། །ཅེས་དད་གདུང་དྲག་པོས་འབོད་པར་བྱའོ། །ཞེས་པའང་ཌཱ་ཀིའི་དབང་མོ་ཚེ་རིང་ཆོས་སྒྲོན་ནས་གསུང་བསྐུལ་ངོར། ཆོས་མེད་དྲེད་པོ་ཆོས་ཀྱི་བློ་གྲོས་པས་བྲིས་པའོ།། །། ༈ གསུང་ངག་ལམ་འབྲས་ཀྱི་བླ་མ་བརྒྱུད་པར་གསོལ་འདེབས་རྒྱང་འབོད་ཡེ་ཤེས་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། །བླ་མ་མཁྱེན་ནོ། །མཁྱེན་ནོ་མཁྱེན་ནོ་བླ་མ་མཁྱེན་ནོ། །སངས་རྒྱས་ཀུན་གྱི་བདག་ཉིད། །དྲུག་པ་རྡོ་རྗེ་འཆང་ཆེན། །འོག་མིན་དབྱིངས་ནས་དགོངས་མཛོད། །སྐུ་གསུམ་ཞིང་དུ་དྲོངས་ཤིག། མཁྱེན་ནོ་མཁྱེན་ནོ་བླ་མ་མཁྱེན་ནོ། །སྟོང་ཉིད་ཤེས་རབ་ཕར་ཕྱིན། །བདག་མེད་རྣལ་འབྱོར་མ་དཔལ། །མཁའ་སྤྱོད་ཞིང་ནས་གཟིགས་ཤིག། མཆོག་ཐུན་དངོས་གྲུབ་སྩོལ་ཅིག། མཁྱེན་ནོ༴ །གཟུང་འཛིན་དྷུ་ཏིར་གསོད་པའི། །རྣལ་འབྱོར་དབང་ཕྱུག་བིཪྺས། །གྲུབ་བརྒྱའི་དབུས་ནས་གཟིགས་ཤིག། བདེ་སྟོང་རྟོགས་པ་བསྐྱེད་ཅིག། མཁྱེན་ནོ༴ །ཕྱོགས་ལས་རྣམ་རྒྱལ་མཐར་ཕྱིན། །སློབ་དཔོན་ནག་པོ་སྤྱོད་པས། །རོ་སྙོམས་ངང་ནས་མཁྱེན་ཏེ། །གཉིས་འཛིན་རྡུལ་དུ་རློགས་ཤིག། མཁྱེན་ནོ༴ །ཡེ་ཤེས་སྒྱུ་མའི་གར་མཁན། །རྒྱལ་རིགས་ཌཱ་མ་རུ་པས། །རྡོ་རྗེའི་ལྟ་བས་བལྟས་ཏེ། །འཁྲུལ་པ་རུ་ལོག་ཐོངས་ཤིག། མཁྱེན་ནོ༴ །རྣལ་འབྱོར་སྤྱོད་པའི་དབུས་ནས། །གཉིས་སྤངས་ཨ་ཝ་དྷུ་ཏིས། །འཛིན་བྲལ་ཀློང་ནས་དགོངས་ཏེ། །བརྟུལ་ཞུགས་ལམ་དུ་སློངས་མཛོད། །མཁྱེན་ནོ༴ །མཁས་གྲུབ་རྒྱ་མཚོའི་དབུས་ནས། །པཎ་ཆེན་ག་ཡ་དྷ་རས། །ཡེ་ཤེས་སྤྱན་གྱིས་གཟིགས་ཏེ། །འགྲོ་དོན་མཁའ་ཁྱབ་བྱིན་རློབས། །མཁྱེན་ནོ༴ །གངས་ཅན་རི་བོའི་སུལ་ནས། །སྒྲ་བསྒྱུར་རྒྱལ་པོ་འབྲོག་མིས། །མཁྱེན་གཉིས་ཀློང་ནས་གཟིགས་མཛོད། །མ་རིག་གཉིད་ལས་དཀྲོགས་ཤིག། མཁྱེན་ནོ༴ །སྙན་བརྒྱུད་རྒྱ་མཚོའི་མཛོད་ནས། །སེ་སྟོན་ཀུན་རིག་ཆེན་པོས། །བྱམས་ཐུགས་བརྩེ་བས་དགོངས་ནས། །སྙིང་རྗེའི་ཆར་གྱིས་བསིལ་མཛོད། །མཁྱེན་ནོ༴ །གྲུབ་ཐོབ་བྱེ་བའི་དབུས་ནས། །ཞང་གི་སྟོན་པ་ཆོས་འབར། །འོད་གསལ་ཀློང་ནས་གཟིགས་ཤིག། རྡོ་རྗེའི་སྐུ་མཆོག་སྒྲུབས་མཛོད། །མཁྱེན་ནོ༴ །དམར་སེར་དྷཱིཿཡིག་འོད་ཀློང་། །ས་ཆེན་ཀུན་དགའ་སྙིང་པོས། །རྟག་པར་འབྲལ་མེད་རྗེས་ཟུངས། །དོན་གཉིས་ལྷུན་གྲུབ་འབྱུང་མཛོད། །མཁྱེན་ནོ༴ །མཁྱེན་རབ་ཕ་མཐའ་ཡས་པ། །སློབ་དཔོན་བསོད་ནམས་རྩེ་མོས། །རྣམ་ཐར་སྒོ་གསུམ་དབྱིངས་ནས། །ཤེས་རབ་སྣང་བ་རྒྱས་མཛོད། །མཁྱེན་ནོ༴ །རྡོར་འཛིན་བྱེ་བའི་གཙུག་རྒྱན། །རྗེ་བཙུན་གྲགས་པ་རྒྱལ་མཚན། །མི་མངོན་དབྱིངས་ནས་གཟིགས་ཏེ། །ལས་རླུང་དབུ་མར་འཆིང་མཛོད། །མཁྱེན་ནོ༴ །འཇམ་དཔལ་ཟུར་ཕུད་ལྔ་པ། །འཇམ་མགོན་ཀུན་དགའ་རྒྱལ་མཚན། །མངོན་དགའི་ཞིང་ནས་བཞེངས་ཏེ། །བདག་གི་སྙིང་དབུས་བཞུགས་མཛོད། །མཁྱེན་ནོ༴ །ཆེ་དགུས་བཏེགས་པའི་ཁྲི་ལ། །བླ་ཆེན་ཆོས་ཀྱི་རྒྱལ་པོ། །འགྲོ་མགོན་འཕགས་པས་གཟིགས་ཤིག། ཆོས་ཀྱི་རྒྱལ་པོར་མཛོད་ཅིག། མཁྱེན་ནོ༴ །རྟག་ཏུ་བླ་མ་མཉེས་པ། །ཞང་སྟོན་དཀོན་མཆོག་དཔལ་བས། །བདག་མེད་རྟོགས་པའི་སྤྱན་གྱིས། །སྐད་ཅིག་མི་འབྲལ་གཟིགས་ཤིག། མཁྱེན་ནོ༴ །བྱ་བཏང་ཡོངས་ཀྱི་རྒྱལ་པོ། །བྲག་ཕུག་བསོད་ནམས་དཔལ་བས། །འཁྲུལ་བྲལ་ཡེ་ཤེས་ཆེན་པོས། །བདག་ལ་དགོངས་པར་མཛོད་ཅིག། མཁྱེན་ནོ༴ །གསུང་རབ་རྒྱ་མཚོའི་དབུས་ནས། །ཆོས་རྗེ་བླ་མ་དམ་པས། །མདོ་རྒྱུད་ཟབ་དོན་སྦྱིན་ཏེ། །བློ་གྲོས་གཏེར་ཆེན་རྒྱས་མཛོད། །མཁྱེན་ནོ༴ །ཉམས་རྟོགས་སྤྲིན་དཀར་འཛུམ་པར། །བླ་མ་དཔལ་ལྡན་ཚུལ་ཁྲིམས། །ངེས་ལེགས་ཐར་པའི་ལམ་་རྟེན། །བྱང་ཆུབ་སེམས་གཉིས་རྒྱས་མཛོད། །མཁྱེན་ནོ༴ །བསྐྱེད་རྫོགས་རྡོ་རྗེའི་གུར་ཁང་། །གྲུབ་ཆེན་བུདྡྷ་ཤྲཱི། །ངེས་དོན་རྟོགས་པའི་བདུད་རྩིས། །བདག་གི་སྒོ་གསུམ་སྨིན་མཛོད། །མཁྱེན་ནོ༴ །བསླབ་གསུམ་ཁང་བཟང་ཉམས་དགར། །ངོར་ཆེན་རྡོ་རྗེ་འཆང་ཆེན། །མཁས་གྲུབ་རྒྱ་མཚོའི་གཙུག་རྒྱན། །ཁྱེད་ཀྱི་ཐུགས་རྗེས་གཟིགས་ཤིག། མཁྱེན་ནོ༴ །ཨེ་ཝྃ་ཆོས་ལྡན་དགའ་ཚལ། །མུས་ཆེན་དཀོན་མཆོག་རྒྱལ་མཚན། །སྙན་བརྒྱུད་གདམས་པའི་འབྱུང་གནས། །ཁྱེད་དང་དབྱེར་མེད་མཛོད་ཅིག། མཁྱེན་ནོ༴ །དཔལ་ལྡན་ས་སྐྱའི་གཞི་ཐོག། བདག་ཆེན་རྡོ་རྗེ་འཆང་དབང་། །བློ་གྲོས་རྒྱལ་མཚན་མཆོག་དེས། །སྒོ་གསུམ་རྡོ་རྗེར་སྒྲུབས་མཛོད། །མཁྱེན་ནོ༴ །ཁའུ་བྲག་རྫོང་གནས་མཆོག། དཔལ་ལྡན་སྟོབས་ཀྱི་མགོན་པོ། །ཀུན་བཟང་ཆོས་ཀྱི་ཉི་མས། །རྡོ་རྗེའི་ཡེ་ཤེས་འབེབས་མཛོད། །མཁྱེན་ནོ༴ །གྲོང་ཆེན་ཆོས་འཁོར་ཡང་རྩེར། །ཕ་རྒོད་ཚར་པ་ཆོས་རྗེ། །སྙན་བརྒྱུད་བསྟན་པའི་སྲོག་ཤིང་། །ཁྱེད་ཀྱིས་བྱིན་གྱིས་རློབས་ཤིག། མཁྱེན་ནོ༴ །ཕྱོགས་བྲལ་རྒྱལ་ཁམས་ཡངས་པར། །འཇམ་དབྱངས་མཁྱེན་བརྩེའི་དབང་ཕྱུག། ཕྲིན་ལས་ནམ་མཁའི་མཐར་ཁྱབ། །ཉིད་དང་དབྱེར་མེད་མཛོད་ཅིག། མཁྱེན་ནོ༴ །མཁས་གྲུབ་འདུ་བའི་ཚལ་དུ། །མཁན་ཆེན་བསླབ་གསུམ་རྒྱལ་མཚན། །གསུང་ངག་ཆོས་སྒྲ་སྒྲོགས་བཞིན། །བདག་རྟོག་མུན་པ་སེལ་མཛོད། །མཁྱེན་ནོ༴ །འཆི་མེད་རྡོ་རྗེའི་གུར་དུ། །ཁྱབ་བདག་དབང་ཕྱུག་རབ་བརྟན། །གཞོམ་མེད་རྡོ་རྗེའི་སྐུ་གྲུབ། །འཆི་མེད་ཚེ་དབང་སྩོལ་ཅིག། མཁྱེན་ནོ༴ །ཐུབ་གསུང་ནོར་བུའི་སྒྲོམ་ཆེན། །རང་དབང་བསྒྱུར་བའི་བདག་པོ། །མགོན་པོ་བསོད་ནམས་མཆོག་ལྡན། །ལུང་རྟོགས་ཡོན་ཏན་རྒྱས་མཛོད། །མཁྱེན་ནོ༴ །ཞྭ་ལུ་གསེར་ཁང་ཁྲ་མོར། །རྒྱུད་སྡེ་རྒྱ་མཚོའི་མངའ་བདག། རིན་ཆེན་བསོད་ནམས་མཆོག་གྲུབ། །དབང་བསྐུར་བྱིན་གྱིས་རློབས་ཤིག། མཁྱེན་ནོ༴ །རྒྱུན་གྱི་དབང་པོའི་ཆོས་གྲྭར། །སྙན་བརྒྱུད་གདམས་པ་སྤེལ་མཁས། །བྱམས་པ་ངག་དབང་ལྷུན་གྲུབ། །ཕྲིན་ལས་འབད་མེད་འགྲུབ་མཛོད། །མཁྱེན་ནོ༴ །དག་པའི་སྣང་བ་འབྱམས་ཀླས། །བརྩེ་ཆེན་བསྟན་པའི་གསལ་བྱེད། །ངག་དབང་ཀུན་དགའ་ལྷུན་གྲུབ། །བདག་ལ་དབང་བཞི་བསྐུར་ཞིག། མཁྱེན་ནོ༴ །བཀྲ་ཤིས་ཆོས་ཀྱི་གཞལ་མེད། །ཀུན་དགའ་ལེགས་པའི་འབྱུང་གནས། །གསང་ཆེན་ཆོས་རྔ་སྒྲོགས་པས། །མ་རིག་འཐིབ་པོ་བསལ་མཛོད། །མཁྱེན་ནོ༴ །ཁམས་གསུམ་ཟིལ་གནོན་ཁྲི་ལ། །ངག་དབང་ཀུན་དགའ་བློ་གྲོས། །མཁྱེན་རྟོགས་ཡོན་ཏན་བསམ་ཡས། །དགོངས་པའི་བྱིན་རླབས་སྩོལ་མཛོད། །མཁྱེན་ནོ༴ །གང་འདུལ་སྤྲུལ་པའི་ཞིང་ཁམས། །གསང་ཆེན་བསྟན་པའི་ཉིན་བྱེད། །ཐར་རྩེ་ནམ་མཁའ་འཆི་མེད། །བདག་ལ་བྱིན་གྱིས་རློབས་ཤིག། མཁྱེན་ནོ༴ །ཁམས་དབུས་གྲུབ་པའི་སྨན་ལྗོངས། །བྱམས་པ་ཀུན་དགའ་བསྟན་འཛིན། །རིས་བྲལ་མཁས་གྲུབ་དབུས་ནས། །རྡོ་རྗེའི་བྱིན་ཆེན་ཕོབས་ཤིག། མཁྱེན་ནོ༴ །ཨེ་ཝྃ་ཐར་པའི་ཡང་རྩེར། །གྲུབ་པའི་དཔལ་ལ་དབང་འབྱོར། །རྣལ་འབྱོར་འཇམ་དཔལ་བཟང་པོས། །སྐུ་བཞིའི་ས་བོན་ཐོབས་མཛོད། །མཁྱེན་ནོ༴ །རྣམ་གྲོལ་འཆི་མེད་དགའ་ཚལ། །སྡེ་སྣོད་གསུམ་གྱི་བང་མཛོད། །ཀུན་དགའ་བསྟན་པའི་རྒྱལ་མཚན། །མཁྱེན་རབ་དངོས་གྲུབ་སྩོལ་ཅིག། མཁྱེན་ནོ༴ །སྙིང་རྗེའི་སྤྲིན་དཀར་དབུས་ན། །བྱང་ཆུབ་སེམས་དཔའི་ཁྱུ་མཆོག། འཇམ་དབྱངས་རིན་ཆེན་རྡོ་རྗེས། །གཞན་ཕན་མཐའ་ཡས་མཛོད་ཅིག། མཁྱེན་ནོ༴ །རྒྱ་ནག་རི་བོ་རྩེ་ལྔར། །བཀའ་བབས་བདུན་གྱི་མངའ་བདག། འཇམ་དབྱངས་མཁྱེན་བརྩེའི་དབང་པོས། །ཡེ་ཤེས་རིག་རྩལ་སྦར་མཛོད། །མཁྱེན་ནོ༴ །ལྕང་ལོ་ཅན་གྱི་ཞིང་ན། །དཔལ་ཆེན་གསང་བའི་བདག་པོ། །འཇམ་དབྱངས་བློ་གཏེར་དབང་པོས། །སྒོ་གསུམ་བྱིན་གྱིས་བརླབ་མཛོད། །མཁྱེན་ནོ༴ །ནུབ་ཕྱོགས་བདེ་ཆེན་ཞིང་ནས། །མཁས་གྲུབ་རྒྱ་མཚོའི་སྤྱི་རྗེ། །འཇམ་མགོན་ངག་དབང་ལེགས་པས། །དལ་བཞིའི་སྨིན་གྲོལ་མཛོད་ཅིག། མཁྱེན་ནོ་མཁྱེན་ནོ་བླ་མ་མཁྱེན་ནོ། །སྤྱི་གཙུག་ཉི་ཟླའི་སྟེང་ན། །དྲིན་ཆེན་རྩ་བའི་བླ་མ། །རིགས་བརྒྱའི་བདག་པོས་གཟིགས་ཤིག། སྐད་ཅིག་མི་འབྲལ་བྱིན་རློབས། །མཁྱེན་ནོ་མཁྱེན་ནོ་བླ་མ་མཁྱེན་ནོ། །བདག་བློ་ཆོས་སུ་འགྲོ་བར་བྱིན་གྱིས་རློབས། །དམ་ཆོས་ལམ་དུ་ལོངས་པར་བྱིན་གྱིས་རློབས། །ལམ་གྱི་འཁྲུལ་པ་ཞི་བར་བྱིན་གྱིས་རློབས། །འཁྲུལ་སྣང་དབྱིངས་སུ་གྲོལ་བར་བྱིན་གྱིས་རློབས། །རྐྱེན་ངན་བར་ཆད་ཞི་བར་བྱིན་གྱིས་རློབས། །སྡོམ་དང་དམ་ཚིག་གཙང་བར་བྱིན་གྱིས་རློབས། །རིམ་གཉིས་རྟོགས་པ་སྐྱེ་བར་བྱིན་གྱིས་རློབས། །སྐུ་བཞིའི་གོ་འཕང་ཐོབ་པར་བྱིན་གྱིས་རློབས། །མཁྱེན་ནོ་མཁྱེན་ནོ་དྲིན་ཅན་རྩ་བའི་བླ་མ་ཁྱེད་རང་མཁྱེན་ནོ།། །།ཞེས་གསོལ་བ་བཏབ་པར་བྱའོ། །ཞེས་པའང་ཨ་མདོ་བླ་མ་ངག་དབང་དཔལ་འབྱོར་ནས་གསུང་བསྐུལ་ངོར་ཆོས་ཀྱི་བློ་གྲོས་པས་བྲིས་པ་དོན་དང་ལྡན་པར་གྱུར་ཅིག། སརྦ་མངྒ་ལཾ།། །། ༈ ཕ་བླ་མ་རྗེ་ལ་གུས་པས་འདུད། །བུ་ཉོན་དང་རིགས་ལྡན་ཡེ་ཤེས་སྒྲོན། །ངག་ཏུ་འཚོགས་གྲལ་ལྟ་བུར་འདོན་ཚེ་འདི་ནས་མགོ་བཟུང་ན་ལེགས། འཁོར་འདས་སྟོང་ཆེན་གྱི་ཀོང་བུ་རུ། །ཀ་དག་ཡེ་ཤེས་ཀྱི་མར་མེ་སྦར། །ཆོས་ཉིད་རང་གསལ་གྱི་མཆོད་པ་འབུལ། །ཡེ་ཤེས་སྐུ་ལྔ་ཡི་དངོས་གྲུབ་སྩོལ། །རིག་པ་ཀ་དག་གི་ཀོང་བུ་རུ། །ལྷུན་གྲུབ་འོད་གསལ་གྱི་མར་མེ་སྦར། །བྱ་རྩོལ་བློ་བྲལ་གྱི་མཆོད་པ་འབུལ། །སྣང་བཞི་མཐར་ཕྱིན་གྱི་དངོས་གྲུབ་སྩོལ། །སྣང་བ་འོད་གསལ་གྱི་ཀོང་བུ་རུ། །སྐུ་དང་ཡེ་ཤེས་ཀྱི་མར་མེ་སྦར། །ཀ་དག་གཏིང་གསལ་གྱི་མཆོད་པ་འབུལ། །ཆོས་ཟད་ཆེན་པོ་ཡི་དངོས་གྲུབ་སྩོལ། །ཆོས་ཟད་བློ་འདས་ཀྱི་ཀོང་བུ་རུ། །སྐུ་གསུམ་དབྱེར་མེད་ཀྱི་མར་མེ་སྦར། །འཁོར་བ་དོང་སྤྲུགས་ཀྱི་མཆོད་པ་འབུལ། །གཞན་དོན་མཐར་ཕྱིན་གྱི་དངོས་གྲུབ་སྩོལ། །གྲགས་སྟོང་རྡོ་རྗེའི་ཐོལ་གླུ། །གང་ཤར་ཤུགས་འབྱུང་བརྗོད་འདིས། །གཉིས་སྣང་འཁྲུལ་པའི་སེམས་ཅན། །གཉིས་མེད་ཀློང་དུ་གྱུར་ཅིག། བདེ་ཆེན་པདྨ་ཤེལ་ཕུག། འོད་གསལ་ཆེན་པོའི་ཁང་པར། །ཡེ་ཤེས་རིག་པའི་ཁྱེའུ་ཆུང་། །ཉམས་ཀྱི་སྣང་བ་འབར་བས། །རྡོ་རྗེའི་གླུ་འདི་སྒྲོགས་སོ། །དགེའོ།། །། ༈ ན་མོ་གུ་རུ། སེམས་ཉིད་ཀ་དག་ཀུན་བཟང་ཆོས་སྐུའི་ཀློང་། །གདོད་ནས་འདུ་འབྲལ་མེད་པར་གསོལ་བ་འདེབས། །གཞི་རྫོགས་འཕོ་འགྱུར་བྲལ་བའི་དོན་རྟོགས་ཏེ། །ཡེ་གྲོལ་མངོན་དུ་འགྱུར་བར་བྱིན་གྱིས་རློབས། །རང་བཞིན་གསལ་གདངས་འགགས་མེད་ལོངས་སྐུའི་གཤིས། །ཡེ་རྫོགས་ལྷུན་གྲུབ་ཆེན་པོར་གསོལ་བ་འདེབས། །དུས་གསུམ་རྒྱུན་ཆད་མེད་པའི་འོད་གསལ་གྱི། །དགོངས་པ་ཚད་ལ་ཕེབས་པར་བྱིན་གྱིས་རློབས། །རིག་གདངས་ཐུགས་རྗེའི་རིག་རྩལ་སྤྲུལ་པའི་སྐུ། །ཅིར་སྣང་ཤར་གྲོལ་ཆེན་པོར་གསོལ་བ་འདེབས། །འཁོར་འདས་རང་སར་གྲོལ་བའི་གདིང་ཐོབ་སྟེ། །སྤྲུལ་སྐུའི་དགོངས་པ་ཇི་བཞིན་མངོན་འགྱུར་ཤོག། །ཅེས་པའང་བཙུན་ཞབས་སྦྱིན་པ་ནས་བཀྲ་ཤིས་པའི་ལྷ་རྫས་རིན་གཉིས་ཀྱི་རྟེན་བཅས་གསུང་བསྐུལ་ངོར་འཇམ་དབྱངས་ཆོས་ཀྱི་བློ་གྲོས་པས་སོ།། །། ༈ རྗེ་བླ་མ་རྣམས་ལ་གསོལ་བ་འདེབས། །སྒོས་རྩ་བའི་བླ་མས་བྱིན་གྱིས་རློབས། །ཕས་མི་མངོན་དབྱིངས་ནས་ཐུགས་རྗེས་གཟིགས། །བུ་འཁོར་བའི་མཚོ་ལས་དྲངས་ཏུ་གསོལ། །མི་རྟག་འཆི་བ་དྲན་པར་བྱིན་གྱིས་རློབས། །འཁོར་བའི་ཉེས་དམིགས་མཐོང་བར༴ །རྒྱུ་འབྲས་བླངས་དོར་བྱེད་པ༴ །དལ་འབྱོར་དོན་ཡོད་བྱེད་པར༴ །ཡིད་ཆེས་དད་པ་སྐྱེ་བར༴ །སྐྱབས་གསུམ་རང་ངོ་ཤེས་པ༴ །བྱང་ཆུབ་སེམས་གཉིས་འབྱོངས་པར༴ །མོས་གུས་རྩ་བ་ཚུགས་པར༴ །དམ་ཚིག་རྣམ་པར་དག་པར༴ །བླ་མ་སངས་རྒྱས་མཐོང་བར༴ །ཅིར་སྣང་བླ་མར་འཆར་བར༴ །སྣང་བ་སེམས་སུ་རྟོགས་པར༴ །སེམས་ཉིད་སྒྱུ་མར་རྟོགས་པར༴ །རང་བཞིན་མེད་པར་རྟོགས་པར༴ །སྟོང་ཉིད་བརྗོད་བྲལ་རྟོགས་པར༴ །རང་སེམས་ལྷ་སྐུར་འཆར་བར༴ །སྒྲ་གྲགས་སྔགས་སུ་ཤེས་པར༴ །རིག་སྟོང་ཆོས་སྐུར་ཤེས་པར༴ །གཟུང་འཛིན་རྟོག་པ་ཟད་པར༴ །མཚན་མ་རང་སར་གྲོལ་བར༴ །རླུང་སེམས་དབུ་མར་ཐིམ་པར༴ །སྐུ་བཞི་མངོན་དུ་འགྱུར་བར་བྱིན་གྱིས་རློབས། །ཅེས་གསོལ་བ་འདེབས་པར་བྱའོ། །ཅེས་པའང་འཇམ་དབྱངས་ཆོས་འཕེལ་ནས་བསྐུལ་ངོར་ཆོས་ཀྱི་བློ་གྲོས་པས་སོ།། །། ༈ འོད་གསལ་རྫོགས་པ་ཆེན་པོའི་བསྟན་པའི་སྲོལ་འབྱེད་ཆེན་པོ་རྣམས་རྗེས་སུ་དྲན་པའི་གླུ་གཉུག་མའི་སྒྲ་དབྱངས་ཞེས་བྱ་བ་བཞུགས་སོ། ཨེ་མ་ཧོ། ཡེ་གྲོལ་དང་པོའི་སང༵ས་རྒྱས༵་ཀུན༵་ཏུ་བཟ༵ང་། །མཁའ་ལྟར་ཁྱབ་ཅིང་ཐིག་ལེ་ཉག་གཅིག་སྐུ། །མཚན་མ་ཀུན་བྲལ་བྱང་ཆུབ་སེམས་རྒྱལ་པོ། །དེ་ལ་རང་རིག་ལྟ་བའི་ཕྱག་གིས་འདུད། །སྲིད་ཞི་ཀུན་བདག་བདེ་སྟོང་རྡོ་རྗེའི་སྐུ། །ཡེ་ཤེས་ལྷུན་རྫོགས་དཀྱིལ་འཁོར་ཀུན་གྱི་གཙོ། །བརྟན་གཡོའི་སྤྲོ་བསྡུ་ཀུན་སྣང་སྒྱུ་མའི་གར། །དཔལ་ལྡན་རྡོ༵་རྗེ༵་སེམ༵ས་དཔ༵འ་སྙིང་ནས་དྲན། །གང་གི་ཡེ་ཤེས་སྒྱུ་མའི་ཆོ་འཕྲུལ་ལས། །ཐེག་མཆོག་སྟོན་པ་གསང་བདག་དག༵འ་ར༵བ་ཞབས། །དགྱེས་པ་རྡོ༵་རྗེ༵་རིག་འཛིན་ཡོངས་ཀྱི་རྗེ། །སྙིང་དབུས་མི་ཤིག་ཐིག་ལེར་འབྲལ་མེད་བཞུགས། །རྒྱལ་ཀུན་མཁྱེན་རབ་ཕུང་པོ་མཐའ་ཀླས་པ། །གཅིག་ཏུ་བསྡུས་པ་མགོན་པོ་འཇ༵མ་པའི་དཔ༵ལ། །འོད་གསལ་སྙིང་པོའི་བསྟན་པའི་བཤེས༵་གཉེན༵་དེ། །རིག་སྟོང་ཟུང་འཇུག་ཀློང་དུ་དགྱེས་པར་བཞུགས། །རང་བཞིན་འོད་གསལ་ཀ་དག་སྟོང་ཆེན་དབྱིངས། །གདོད་ནས་ལྷུན་གྲུབ་ཡོན་ཏན་མངོན་གྱུར་པ། །མཁས་པའི་ཚོགས་རྗེ་རིག་འཛིན་གྲུབ་པའི་གཙོ། །དཔ༵ལ་གྱི༵་སེ༵ངྒེ་ཡ༵ང་ཡང་རྗེས་སུ་དྲན། །བདེ་བའི་བདག་ཉིད་བདེ་མཆོག་སྒྱུ་མའི་གར། །ཆགས་མེད་སོར་རྟོགས་རྒྱལ་ཀུན་གསུང་རྡོ་རྗེ། །རྩ་གསུམ་འདུས་ཞལ་མཚོ༵་སྐྱེས༵་རྡོ༵་རྗེ༵་འཆ༵ང་། །འོད་གསལ་དབུ་མའི་ཁང་བཟང་ཉམས་དགར་བཞུགས། །ཐེག་པའི་རྩེ་རྒྱལ་གསང་མཆོག་རྡོ་རྗེའི་མཛོད། །འཁོར་འདས་ཆོས་ཀུན་མ་བཙལ་ཡེ་ནས་རྫོགས། །རང་བྱུང་ཡེ་ཤེས་དྭངས་མ་ཕྱག་རྒྱའི་གཟུགས། །བི༵་མ༵་མི༵་ཏྲ༵་རང་གི་རིག་སྐུར་སྨིན། །རང་གནས་སྐུ་གསུམ་དགོངས་པའི་རྩལ་ཆེན་རྫོགས། །རླུང་སེམས་བག་ཆགས་ཆོས་ཉིད་དབྱིངས་སུ་ཟད། །ཟག་བཅས་འབྱུང་བ་རང་དེངས་འཕོ་ཆེན་སྐུ། །སེང༵་ཧ༵་ཤྭ༵་ར༵་འབྲལ་མེད་སྙིང་དབུས་རོལ། །ཤེས་བྱ་རབ་འབྱམས་རྒྱ་མཚོའི་དྭངས་པའི་ངོགས། །ཡེ་ཤེས་ཐུགས་རྗེའི་ཉི་མ་རྟག་འཆར་བས། །འགྲོ་བློའི་མུན་སེལ་ཡོངས་རྫོགས་བསྟན་པའི་མགོན། །ཀུན༵་མཁྱེན༵་བླ༵་མ༵་སྤྱི་བོའི་གཙུག་ན་མཆོད། །བརྒྱུད་གསུམ་རིག་འཛིན་ཡོངས་ཀྱི་བཀའ་བགྲོས་ཤིང་། །གསང་གསུམ་བྱིན་རླབས་གཅིག་ཏུ་བསྡུས་པ་ལས། །འཇི༵གས་བྲལ་གླིང༵་པ་ར༵ང་བྱུང༵་རྡོ༵་རྗེ༵འི་སྐུ། །པདྨ་དབང་ཆེན་དགྱེས་ཞལ་ཡིད་མཁར་བཀོད། །རབ་འབྱམས་ལྷག་པའི་ལྷ་ཡི་གསང་མཛོད་བྱིན། །རྒྱལ་བ་ཀུན་དང་དགོངས་པ་དབྱེར་མི་ཕྱེད། །སྐུ་དང་ཞིང་ཁམས་རྡུལ་སྙེད་ལོངས་སྤྱོད་བདག། འོ༵ད་གས༵ལ་སྤྲུལ༵་པའི༵་རྡོ༵་རྗེ༵འི་ཞབས་པད་བསྙེན། །ཀུན་ཏུ་བཟང་པོ་རང་ལ་བཞུགས་པ་དེ། །བྱིན་རླབས་དགོངས་པའི་རྩལ་ཆེན་ངོ་སྤྲོད་པ། །སྙིང་དབུས་དད་པའི་པད་དཀར་བཞད་པའི་རྩེར། །རྟག་ཏུ་འབྲལ་མེད་སྐུ་གསུམ་རང་ཞལ་མཇལ། །སྙིང་ནས་གདུང་ཤུགས་དྲག་པོས་གསོལ་བ་འདེབས། །རིག་འཛིན་བརྒྱུད་པའི་ཚོགས་ཀྱི་བྱིན་གྱིས་རློབས། །དེ་བཞིན་གཤེགས་པ་ཀུན་གྱི་གསང་བའི་མཛོད། །འོད་གསལ་སེམས་ཀྱི་རྡོ་རྗེའི་གནས་ལུགས་དེ། །སྤྲིན་མེད་མཁའ་ལ་ཉི་ཟླ་འཆར་བ་བཞིན། །མ་ནོར་མངོན་སུམ་བདེན་པའི་དོན་རྟོགས་ཤིང་། །ས་དང་ལམ་གྱི་ཡོན་ཏན་རབ་རྫོགས་ནས། །དོན་གཉིས་ལྷུན་གྲུབ་གོ་འཕང་མཆོག་ཐོབ་ཤོག། །ཅེས་པའང་བླ་མའི་རྣལ་འབྱོར་ལ་བརྩོན་སྐབས་དད་མོས་ཀྱི་མཚམས་སྦྱར་ཏེ་ལག་མ་བཟུང་བར་སྣག་ཤོག་དྲོན་པའི་ངལ་བ་ལྷུར་བླངས་པའི་རྨོངས་བརྩམ་ཚིགས་སུ་བཅད་པའི་ཕྲེང་བ་འདིས་ཀྱང་རིག་འཛིན་བརྒྱུད་པའི་བྱིན་བརླབས་སྙིང་ལ་འཇུག་པར་གྱུར་ཅིག། ། ༈ ཨ་ཧོ་ཡེ། རང་བྱུང་འོད་ལྔ་འཁྲིགས་པའི་གུར་ཁྱིམ་གྱི་ཀློང་ན། །ཐེག་མཆོག་སྟོན་པ་དགའ་རབ་དཔའ་བོ་དེ་དྲན་བྱུང་། །རྡོ་རྗེ་སེམས་དཔའ་རྒྱལ་ཐབས་སྤྱི་བླུགས་ཀྱི་དབང་བསྐུར། །མངོན་སུམ་འོད་སྐུར་གཤེགས་པའི་རྫོགས་ཆེན་གྱི་ཤིང་རྟར། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། ཇི་ལྟ་ཇི་སྙེད་ཆོས་ཀུན་ས་ལེར་ནི་གཟིགས་པའི། །གླེགས་བམ་དབང་ཐོབ་འཇམ་དཔལ་གཤེས་གཉེན་དེ་དྲན་བྱུང་། །ཆོས་ཀུན་རང་གྲོལ་སྣང་བཞིའི་ཕ་མཐའ་རུ་ཕྱིན་ནས། །འབྱུང་བའི་ལུས་ཟད་འཇའ་ལུས་སྐུ་མཆོག་ནི་བརྙེས་པར། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། གནས་ཡུལ་དུར་ཁྲོད་ཀུན་ཏུ་བརྟུལ་ཞུགས་ཀྱིས་རྒྱུ་ཞིང་། །རིག་རྩལ་དབང་ཐོབ་ཤྲཱི་སིང་ཧ་དེ་དྲན་བྱུང་། །འཁོར་འདས་གཉིས་ཆོས་ཐམས་ཅད་གཞི་གྲོལ་དུ་བསྐྱལ་བར། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས༴ །བྷ་སེང་ཞེས་བྱའི་དུར་ཁྲོད་ཆེན་པོ་ཡི་ཚལ་ནས། །མཁས་པ་ཆེན་པོ་ཛྙཱ་ན་སུ་ཏྲ་དེ༴ །ཡང་གསང་བླ་ན་མེད་པའི་མན་ངག་གི་གནད་རྫོང་། །ཆོས་དབྱིངས་བརྡལ་ཁྱབ་ཆེན་པོའི་དགོངས་པ་ལས་མི་གཡོ། །གསོལ་བ་སྙིང་ནས་འདེབས་སོ༴ །ཤར་ཕྱོགས་དྭངས་བསིལ་རི་བོ་ལྔ་ལྡན་གྱི་རྩེ་ནས། །ཕྱག་རྒྱའི་དབང་ཐོབ་དྲི་མེད་བཤེས་གཉེན་དེ༴ །འོད་གསལ་ལྷུན་གྲུབ་ཆེན་པོའི་གསང་ལམ་དེ་མཐར་ཕྱིན། །འཇའ་ལུས་འཕོ་ཆེན་རྡོ་རྗེའི་སྐུ་རུ་ནི་བཞུགས་པར། །གསོལ་བ་སྙིང་ནས་འདེབས་སོ༴ །སྐུ་གསུམ་དག་པའི་ཞིང་མཆོག་དཔལ་རི་ཡི་གཞལ་ཡས། །རྩ་གསུམ་འདུས་ཞལ་པདྨ་འབྱུང་གནས་དེ་དྲན་བྱུང་། །དཔའ་བོ་མཁའ་འགྲོ་སྤྲོ་བསྡུའི་ཆོ་འཕྲུལ་ནི་ཚད་མེད། །ད་ལྟ་ཉིད་དུ་རྡོ་རྗེའི་བྱིན་ཆེན་ནི་ཕོབ་ཅིག། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། བསམ་ཡས་ལྷུན་གྱིས་གྲུབ་པའི་གཞལ་ཡས་ཀྱི་དབུ་རྩེར། །མངའ་བདག་ཚངས་པ་ལྷ་ཡི་མེ་ཏོག་དེ༴ །བོད་ཁམས་འདུལ་བའི་ཐུགས་བསྐྱེད་ཕྲིན་ལས་ནི་མཐའ་ཡས། །བཀའ་དྲིན་མཉམ་མེད་འཇམ་དབྱངས་སྤྲུལ་པ་ཡི་རྒྱལ་པོར། །གསོལ་བ་སྙིང་ནས་འདེབས་སོ༴ །འོ་ཡུག་ཕྱི་གོང་རྫ་ཡི་ར་བ་ཡི་གནས་སུ། །འོད་གསལ་སྐུ་བརྙེས་སེངྒེའི་དབང་ཕྱུག༴ །ཚེ་འདིར་འོད་གསལ་འཇའ་ལུས་རྡོ་རྗེ་ཡི་སྐུ་བརྙེས། །མངོན་སུམ་མན་ངག་གནད་སྟོན་ཞལ་ཆེམ་དུ་འཇོག་པར། །གསོལ་བ་སྙིང་ནས་འདེབས་སོ༴ །ཕྱི་ནང་གྲུབ་མཐའ་རྒྱ་མཚོའི་ཕ་རོལ་དུ་སོན་པའི། །ཀུན་མཁྱེན་བླ་མ་དྲི་མེད་འོད་ཟེར་དེ༴ །སྡེ་གསུམ་བསྟན་པའི་ཤིང་རྟ་རང་དབང་དུ་འདྲེན་ཞིང་། །འོད་གསལ་ལྷུན་གྲུབ་ཆེན་པོའི་དགོངས་པ་ལས་མི་གཡོ། །གསོལ་བ་སྙིང་ནས་འདེབས་སོ༴ །རྩོད་ལྡན་སྙིགས་མའི་སྐྱེ་འགྲོ་སྐྱོབས་པ་ཡི་དཔལ་མགོན། །རང་བྱུང་རྡོ་རྗེ་འཇིགས་མེད་གླིང་པ༴ །མཁྱེན་བརྩེའི་འོད་ཟེར་སྣང་བ་འབུམ་ཕྲག་ཏུ་བརྡལ་བས། །ཐེག་མཆོག་བསྟན་པའི་པད་ཚལ་རྒྱས་མཛད་ཀྱི་མགོན་པོར། །གསོལ་བ་སྙིང་ནས་འདེབས་སོ༴ །ཕྱོགས་བྲལ་འགྲོ་བ་འདུལ་བའི་སྨན་ལྗོངས་ནི་ཉམས་དགར། །གྲུབ་པའི་གཙུག་རྒྱན་ཕྲིན་ལས་འོད་ཟེར༴ །བྱང་ཆུབ་སེམས་གཉིས་དགོངས་པའི་རྩལ་ཆེན་ནི་རྫོགས་ཤིང་། །འཁོར་བ་དོང་ནས་སྤྲུག་པའི་དཔལ་མགོན་གྱི་བླ་མར། །གསོལ་བ་སྙིང་ནས་འདེབས་སོ༴ །དག་པའི་ཞིང་མཆོག་རྔ་ཡབ་དཔལ་རི་ཡི་གནས་སུ། །ཐུགས་བསྐྱེད་རྨད་བྱུང་རྒྱལ་བའི་མྱུ་གུ༴ །སྲིད་ལས་ངེས་འབྱུང་ཐེག་མཆོག་དམ་ཆོས་ཀྱི་གྲུ་ཆར། །སྐལ་བཟང་ཡོངས་ལ་འབེབས་ཤིང་རྣམ་གྲོལ་དུ་འགོད་མཛད། །གསོལ་བ་སྙིང་ནས་འདེབས་སོ༴ །ཨོ་རྒྱན་དཔའ་བོ་མཁའ་འགྲོའི་ཚོགས་གྲལ་གྱི་སྟོན་པ། །ཧེ་རུ་ཀ་དཔལ་ཡེ་ཤེས་རྡོ་རྗེ༴ །སྣང་སེམས་དབང་འདུས་གཞན་སྣང་ཟིལ་གནོན་གྱི་སྤྱོད་པས། །མ་རུངས་གདུག་པ་འདུལ་ཞིང་ཟབ་གཏེར་ལ་དབང་བསྒྱུར། །གསོལ་བ་སྙིང་ནས་འདེབས་སོ༴ །དྲི་མེད་བཤེས་གཉེན་སླར་ཡང་མངོན་སུམ་དུ་བྱོན་པ། །གྲུབ་དབང་མི་འགྱུར་ནམ་མཁའི་རྡོ་རྗེ༴ །ཆོས་ཅན་གཟུང་འཛིན་འཁྲུལ་པའི་བྱ་བཞག་ནི་ཟད་ཅིང་། །ནམ་མཁའི་རྣལ་འབྱོར་བྱར་མེད་རང་གྲོལ་གྱི་བླ་མར། །གསོལ་བ་སྙིང་ནས་འདེབས་སོ༴ །དཔལ་གྱི་སེངྒེ་དགྱེས་པའི་ནགས་ཁྲོད་ནི་དམ་པར། །གངས་ཅན་རྒྱན་གཅིག་གཞན་ཕན་མཐའ་ཡས༴ །འཆད་རྩོད་རྩོམ་ལ་དབང་འབྱོར་སྨྲ་བ་ཡི་དབང་ཕྱུག། བསླབ་པ་གསུམ་གྱི་མངའ་བདག་དགྲ་བཅོམ་ནི་ཆེན་པོར། །གསོལ་བ་སྙིང་ནས་འདེབས་སོ༴ །འཕགས་པ་དགྱེས་པའི་མང་ཐོས་གཞལ་མེད་ཀྱི་ཁང་ནས། །མཁན་ཆེན་བླ་མ་པདྨ་བཛྲ༴ །མདོ་སྔགས་བཤད་དང་སྒྲུབ་པའི་བསྟན་པ་ནི་སྤེལ་ཏེ། །པདྨ་ཀ་རའི་མཆོག་བསྟན་རྒྱས་མཛད་ཀྱི་ཆོས་རྗེར། །གསོལ་བ་སྙིང་ནས་འདེབས་སོ༴ །གར་བཞུགས་དག་པ་རབ་འབྱམས་ཡེ་ཤེས་ཀྱི་ཀློང་ནས། །པདྨ་འོད་གསལ་མདོ་སྔགས་གླིང་པ༴ །ངོ་མཚར་བཀའ་བབས་བདུན་གྱི་གསང་མཛོད་ལ་དབང་བསྒྱུར། །འགྲན་ཟླ་ཀུན་བྲལ་ངོ་མཚར་མཛད་པ་ནི་འབྱམས་ཀླས། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། །དཔལ་རི་པདྨ་འོད་ཀྱི་རིག་འཛིན་གྱི་ཚོགས་གྲལ། །སྤྲུལ་པའི་གཏེར་ཆེན་མཆོག་གྱུར་གླིང་པ༴ །སྔར་མེད་ཟབ་གཏེར་གསང་བའི་སྒོ་འཕར་ནི་ཕྱེ་སྟེ། །བསྟན་འགྲོའི་དོན་ཆེན་བྱིས་པའི་སྤྱོད་ཡུལ་ལས་འདས་པར། །གསོལ་བ་སྙིང་ནས་འདེབས་སོ༴དཔའ་བོ་ཆེན་པོ་ཐོད་པའི་དུམ་བུ་ཡི་གྲོང་ནས། །འཇམ་མགོན་བླ་མ་བློ་གྲོས་མཐའ་ཡས༴ །མཛོད་ཆེན་རྣམ་ལྔའི་སྔགས་ཀྱི་སྒོ་འཕར་ནི་ཕྱེས་སྟེ། །དུས་ཀྱི་མཐར་ཡང་བསྟན་སྲོལ་ནུབ་མེད་ནི་འཛིན་པར། །གསོལ་བ་སྙིང་ནས་འདེབས་སོ༴ །གཞན་ཕན་བྱང་ཆུབ་སྤྱོད་པའི་ཁང་བཟང་ནི་ཉམས་དགར། །རྒྱལ་སྲས་འཇིགས་མེད་ཆོས་ཀྱི་དབང་པོ༴ །རྨད་བྱུང་བྱང་ཆུབ་སེམས་ལ་རང་དབང་ནི་འབྱོར་ནས། །རྒྱུ་འབྲས་ཐེག་པ་རྒྱ་མཚོའི་བཤད་སྲོལ་ནི་རྒྱས་མཛད། །གསོལ་བ་སྙིང་ནས་འདེབས་སོ༴ །མང་ཐོས་མཁས་པའི་ཆུ་གཏེར་ཆེན་པོ་ཡི་དབུས་ནས། །སྨྲ་བའི་སེང་གེ་མི་ཕམ་རྒྱ་མཚོ༴ །གསུར་རབ་དམ་ཆོས་རྒྱ་མཚོར་ཆགས་ཐོགས་ནི་ཀུན་བྲལ། །ཡང་དག་ལྟ་བ་རྒྱས་མཛད་སྨྲ་ངན་གྱི་ཀླད་འགེམས། །གསོལ་བ་སྙིང་ནས་འདེབས་སོ༴ །ཤེས་བྱ་རབ་འབྱམས་གཟིགས་པའི་གུར་ཁང་གི་དབུས་ནས། །དྲན་པས་གདུང་སེལ་བསྟན་པའི་ཉི་མ༴ །མཁས་དང་གྲུབ་པའི་རྣམ་ཐར་བཟང་དགུས་ནི་བརྒྱན་བཞིན། །འཇམ་དབྱངས་མི་ཡི་གཟུགས་འཛིན་ཀུན་མཁྱེན་གྱི་ཆོས་རྗེར། །གསོལ་བ་སྙིང་ནས་འདེབས་སོ༴ །སྙིང་དབུས་པད་དཀར་བཞད་པའི་ཟེའུ་འབྲུ་ཡི་དབུས་ནས། །འོད་གསལ་སྒྱུ་མ་སྣ་ཚོགས་རང་གྲོལ༴ །ཆོས་ཀུན་ཟད་སར་འཁྱོལ་བའི་བཙན་ས་ནི་བཟུང་ནས། །འགྲོ་བ་འདུལ་ལ་རིག་འཛིན་དཔའ་བོ་ནི་རྡོ་རྗེར། །གསོལ་བ་སྙིང་ནས་འདེབས་སོ༴ །སྤྱི་གཙུག་འདབ་སྟོང་རྒྱས་པའི་བསིལ་ཟེར་གྱི་སྟེང་ནས། །འཁོར་ལོའི་མགོན་པོ་པདྨ་བི་ཛ༴ །གདོད་ནས་མངོན་བྱང་ཆུབ་ཀྱང་ཐ་མལ་གྱི་གཟུགས་ཀྱིས། །དབང་བསྐུར་གདམས་ངག་སྟོན་མཁས་དྲིན་ཆེན་གྱི་བླ་མར། །གསོལ་བ་སྙིང་ནས་འདེབས་སོ༴ །ཙིཏྟའི་དྭངས་མ་མི་ཤིགས་ཐིག་ལེ་ཡི་ཀློང་ནས། །བཀའ་དྲིན་འཁོར་མེད་ཆོས་ཀྱི་རྒྱ་མཚོ་དེ་དྲན་བྱུང་། །བསྟན་འགྲོར་སྨན་པའི་མཛད་འཕྲིན་ཆོ་འཕྲུལ་ནི་བསམ་ཡས། །ཉེས་ལས་ལྡོག་ཅིང་ལེགས་པའི་ལམ་སྟོན་གྱི་འདྲེན་པར། །གསོལ་བ་སྙིང་ནས་འདེབས་སོ༴ །འོག་མིན་བླ་མ་བཞུགས་པའི་སྒྲུབ་ཁང་གི་ཡང་རྩེར། །འཕྲིན་ལས་འགྲོ་འདུལ་སྤྲུལ་པའི་སྐུ་མཆོག་དེ་དྲན་བྱུང་། །དད་དང་དམ་ཚིག་འགྱུར་བ་མེད་པ་ཡི་ངང་ནས། །སྐྱབས་གནས་གཅིག་ཆོག་རིགས་ཀུན་འདུས་པ་ཡི་བདག་ཉིད། །གསོལ་བ་སྙིང་ནས་འདེབས་སོ་བྱིན་གྱིས་རང་རློབས་ཤིག། དེ་ལྟར་བརྒྱུད་གསུམ་བླ་མ་རིག་འཛིན་གྱི་ཚོགས་ལ། །བུ་ཡིས་གསོལ་བ་སྙིང་གི་དཀྱིལ་ནས་རང་འདེབས་ན། །མ་ཡིས་བུ་ལ་བརྩེ་ལྟར་ཐུགས་རྗེ་ཡིས་གཟིགས་ཤིག། འདི་ཕྱི་བར་དོ་ཀུན་ཏུ་ཁྱེད་ལ་ནི་རེའོ། །དད་མོས་གདུང་ཤུགས་དྲག་པོས་སྒོ་གསུམ་ནི་འབུལ་ལོ། །བྱམས་དང་བརྩེ་བའི་ཐག་པས་འཁོར་བ་ཡི་འོབས་ལས། །ད་ལྟ་ཉིད་དུ་དྲོངས་ཤིག་བླ་མ་ཁྱེད་མཁྱེན་ནོ། །གསང་གསུམ་བྱིན་རླབས་རྩོལ་ཅིག་བླ་མ་རྗེ་མཁྱེན་ནོ། །ཐུགས་རྒྱུད་དགོངས་པ་འཕོས་ཤིག་བླ་མ་ཁྱེད་མཁྱེན་ནོ། །བླ་མ་ཁྱེད་དང་མཉམ་པར་བྱིན་གྱིས་རང་རློབས་ཤིག། འབྲེལ་ཚད་ཐར་ལམ་འདྲེན་པར་བྱིན་གྱིས་ནི་རློབས་ཤིག། འཁོར་བ་དོང་ནས་སྤྲུག་པའི་སྨོན་ལམ་ཞིག་ཞུའོ། །ཅེས་པའང་རང་སློབ་བློ་གྲོས་དབང་ཕྱུག་ནས་བསྐུལ་བ་དང་། རང་གིས་ཀྱང་དད་པའི་གསོས་སུ་མེ་བྱི་ས་ཟླའི་ཚེས་༡༥ལ་བླ་མའི་གདན་ས་བཀྲ་ཤིས་ལྷ་རྩེའི་གཟིམ་བསྐྱིལ་དུ་ཆོས་ཀྱི་བློ་གྲོས་པས་གསོལ་བ་བཏབ་པ་བྱིན་རླབས་འཇུག་པའི་རྒྱུར་གྱུར་ཅིག། ། ༈ བླ་མ་ས་སྐྱ་པར་གདུང་དབྱངས་མོས་གུས་ཀྱི་གཟེར་འདེབས་ཅེས་བྱ་བ། ཨོཾ་སྭསྟི། སྲིད་དང་ཞི་བའི་འདྲེན་པ། །མཁས་གྲུབ་ཀུན་གྱི་གཙུག་རྒྱན། །ཁྱབ་བདག་རྡོ་རྗེ་འཆང་དབང་། །ས་ཆེན་ཀུན་དགའི་སྙིང་པོ། །བྱང་སེམས་སྦྱིན་པ་དཔལ་ཞེས། །འཕགས་མཆོག་སྤྱན་རས་གཟིགས་དངོས། །བརྩེ་ཆེན་ལག་ན་པདྨོ། །མཁྱེན་རབ་རྒྱ་མཚོ་ཆེ་བཞིན། །འཇམ་པའི་དཔལ་དང་དབྱེར་མེད། །ངེས་དོན་སྨྲ་བའི་སེངྒེ། །ཆགས་ཐོགས་སྒྲིབ་པ་ཀུན་གྲོལ། །རླུང་སེམས་དྷུ་ཏིར་ཚུད་ཅིང་། །འཕོ་མེད་དབྱིངས་སུ་དག་པ། །རྣལ་འབྱོར་དབང་ཕྱུག་ཆེན་པོ། །བིཪྺ་པ་དང་གཉིས་མེད། །རྡོ་རྗེ་ཐེག་པའི་གསང་མཛོད། །ཟབ་རྒྱས་ནོར་བུའི་གཏེར་འཆང་། །སྐལ་ལྡན་གྲུབ་མཆོག་སར་འགོད། །གསང་འཛིན་ལག་ན་རྡོ་རྗེ། །སྐུ་གཅིག་དུ་མར་བསྒྱུར་ནས། །དུས་གཅིག་ཉིད་ལ་འགྲོ་དོན། །བསམ་མི་ཁྱབ་པར་མཛད་པའི། །ངོ་མཚར་ཆོ་འཕྲུལ་འབྱམས་ཀླས། །རིགས་གསུམ་སེམས་དཔའི་སྤྲུལ་པ། །འཁོན་གདུང་དྲི་མ་མེད་པ། །ཟླ་བྲལ་ཀུན་གྱི་སྤྱི་མེས། །འཇམ་མགོན་ཐུགས་རྗེའི་གཏེར་ཆེན། །བླ་མ་ས་སྐྱ་པ་ལ། །གསོལ་བ་སྙིང་ནས་འདེབས་སོ། །རྟག་ཏུ་ཐུགས་རྗེས་གཟིགས་ནས། །གསང་གསུམ་བྱིན་བརླབས་སྩོལ་ཅིག། བདག་དང་བདག་ལ་འབྲེལ་ཐོབ། །བདེ་ཆེན་ཞིང་དུ་དྲོངས་ཤིག། རིགས་དྲུག་འཁོར་བའི་སེམས་ཅན། །སྡུག་བསྔལ་མཚོ་ལས་སྒྲོལ་ཅིག། བསྟན་དང་བསྟན་འཛིན་དར་རྒྱས། །བསྟན་ལ་གནོད་རྣམས་མིང་མེད། །ཁྱོད་ཀྱིས་མཐུ་ཡིས་བཅོམ་ནས། །འཇིག་རྟེན་བདེ་སྐྱིད་ཕུན་ཚོགས། །ཉི་ཟླ་བཞིན་དུ་རྒྱས་པར། །མགོན་པོས་བྱིན་གྱིས་བརླབ་མཛོད། །ཅེས་པ་འང་ཆོས་ཀྱི་བློ་གྲོས་པས་ཟླ་༩ཚེས་༡༥ལའོ།། །། ༈ ཀུན་མཁྱེན་ཆེན་པོར་གསོལ་འདེབས་རྒྱང་འབོད་བཞུགས་སོ། །སྐྱབས་གནས་ཀུན་འདུས་རྩ་བའི་བླ་མ་ཁྱེད་མཁྱེན་ནོ། །རྒྱལ་ཀུན་ཡེ་ཤེས་སྒྱུ་མའི་རང་གཟུགས། །དྲན་པ་ཙམ་གྱིས་སྲིད་ཞིའི་འཇིགས་འཕྲོག། ཀུན་མཁྱེན་དྲི་མེད་འོད་ཟེར་མཁྱེན་ནོ། །ད་ལྟ་ཉིད་དུ་ཐུགས་རྗེས་གཟིགས་ཤིག། །གདན་གསུམ་ཚང་བའི་སྐུ་ཡི་དཀྱིལ་འཁོར། །གྲགས་སྟོང་ཚངས་དབྱངས་དྲུག་ཅུའི་གསུང་ལྡན། །ཟབ་ཞི་སྤྲོས་བྲལ་འོད་གསལ་སྙིང་པོ། །སྐུ་གསུམ་དབྱེར་མེད་ཀློང་ཆེན་རབ་འབྱམས། །མི་མངོན་དབྱིངས་ནས་འབྲལ་མེད་གཟིགས་ཤིག། སྤྱི་གཙུག་བདེ་ཆེན་འཁོར་ལོའི་རྒྱན་དང་། །སྙིང་དབུས་འོད་ཀྱི་གུར་ཁང་ནང་དུ། །འབྲལ་བ་མེད་པར་རྟག་པར་བཞུགས་ནས། །བྱིན་རླབས་དབང་དང་དངོས་གྲུབ་སྩོལ་ཅིག། བདག་གི་སྙིང་ལ་གནས་པའི་མུན་པ། །ཁྱེད་ཀྱི་མཁྱེན་བརྩེའི་འོད་ཀྱི་སྣང་བས། །རྩ་བ་དྲུང་ནས་འབྱིན་པར་མཛོད་ཅིག། ཕྱི་ནང་རིག་པའི་གཞུང་ལུགས་ཀུན་དང་། །ཁྱད་པར་ཟབ་དོན་དེ་ཉིད་གནས་ལུགས། །མ་ནོར་མངོན་སུམ་བཞིན་དུ་རྟོགས་ནས། །རིག་པའི་ཡེ་ཤེས་རྩལ་ཁ་ཕྱེས་ཏེ། །སྤོབས་པའི་གཏེར་ཆེན་གྲོལ་བར་མཛོད་ཅིག། འོད་གསལ་སྣང་བ་བཞི་ཡི་ལམ་ལ། །ཉིན་མཚན་ཆུ་བོའི་རྒྱུན་བཞིན་བརྩོན་པས། །ཆོས་ཅན་སྣང་བ་ཆོས་ཉིད་ཀློང་དུ། །ཟད་ནས་སྲིད་པ་ཇི་སྲིད་བར་དུ། །འཇའ་ལུས་རྡོ་རྗེའི་སྐུ་མཆོག་བརྙེས་ཏེ། །གཞན་དོན་དཔག་མེད་འབྱུང་བར་ཤོག་ཅིག། འོད་གསལ་གཞོན་ནུ་བུམ་སྐུའི་སྦུབས་སུ། །ཡེ་ཤེས་ནང་གསལ་ཐིམ་ལ་མ་རྨུག། ཕྱིར་སྣང་སྐུ་དང་ཡེ་ཤེས་ཞིང་ཁམས། །རབ་འབྱམས་མུ་མཐའ་མེད་པར་བཀོད་དེ། །འགྲོ་བ་སྒྲོལ་བའི་ཕྲིན་ལས་ཚད་མེད། །རྟག་ཁྱབ་ལྷུན་གྲུབ་འབྱུང་བར་ཤོག་ཅིག། སྐྱེ་བ་འདི་དང་ཚེ་རབས་ཀུན་ཏུ། །ཀུན་མཁྱེན་རྫོགས་པའི་སངས་རྒྱས་ཁྱེད་ཉིད། །རིགས་བདག་ཐོབ་ནས་འབྲལ་བ་མེད་པར། །རྡོ་རྗེའི་ཡེ་ཤེས་སྩོལ་བར་མཛོད་ཅིག། མཁྱེན་ནོ་མཁྱེན་ནོ་བླ་མ་མཁྱེན་ནོ།། །། ༈ ཀུན་མཁྱེན་ཇོ་ནང་པ་ཆེན་པོར་རྒྱང་འབོད་ངེས་དོན་བྱིན་རླབས་མྱུར་དུ་འགུགས་པའི་ཕོ་ཉ་ཞེས་བྱ་བ་བཞུགས་སོ། །བླ་མ་དམ་པ་དང་པོའི་སངས་རྒྱས་དཔལ་དུས་ཀྱི་འཁོར་ལོ་དང་དབྱེར་མེད་པ་མཆོག་ཏུ་མི་འགྱུར་བ་བདེ་བ་ཆེན་པོ་ཡེ་ཤེས་ཕྱག་རྒྱའི་སྐུ་རྣམ་པ་ཐམས་ཅད་པའི་མཆོག་དང་ལྡན་པའི་སྟོང་པ་ཉིད་ཀྱི་ཐུགས་དང་ལྡན་པ་བདེན་དོན་རྣམ་པ་བཅུ་གཉིས་ཀྱི་གསུང་ངེས་དོན་ཟབ་མོའི་སྒྲ་དབྱངས་ཨ་དཱི་ཀ་དཱིའི་བདག་ཉིད་ཕྱོགས་བཅུའི་ཞིང་ཐམས་ཅད་དུ་སྒྲོགས་པས་སྐུ་མི་འགྱུར་བ་ཡང་དག་པའི་མཚན་དང་དཔེ་བྱད་དམ་པས་བརྒྱན་པའི་སྐུ་རྣམ་བཅས་ཕྱག་རྒྱ་ཆེན་པོ་རྡོ་རྗེ་ཉི་མ་སྟོང་གི་གཟི་འོད་ཀྱིས་ས་གསུམ་ཀུན་ཏུ་ཡང་དག་པར་ཁྱབ་པ་ནམ་མཁའ་ལྟར་མཐའ་དང་མུ་མེད་པ་བརྟན་གཡོ་ཐམས་ཅད་ཀྱི་སྲོག་ཏུ་ཞུགས་པ་ཤིན་ཏུ་ཕྲ་ཞིང་ཟབ་ལ་བརྟགས་པར་དཀའ་བ་རྡུལ་མེད་རྡུལ་བྲལ་གྱི་བདག་ཉིད་མཆོག་ཏུ་བདེ་བ་དམ་པའི་བདག་ཉིད་ཆེན་པོར་རྣམ་མེད་ཤེས་རབ་སྟོང་ཉིད་ཀྱི་ཕྱག་རྒྱ་ཆེན་པོ་དང་མཉམ་པར་སྦྱོར་ཞིང་ནམ་མཁའ་གང་བའི་དེ་བཞིན་གཤེགས་པ་ཐམས་ཅད་གང་གི་སྐུ་ལ་ཡང་དག་པར་ཞུགས་པ་ཉིད་དུ་རྗེས་སུ་ཆགས་པ་ཆེན་པོས་མྱོས་ཤིང་ཟག་མེད་དགའ་བཞིའི་རོལ་རྩེད་ཧཾ་ཡིག་གི་སྒྲ་ཆེན་སྒྲོགས་ཤིང་བཞུས་པ་ལས་བདེ་གཤེགས་ཞི་བ་དང་ཁྲོ་བོ་ཆགས་བྲལ་དང་ཆགས་ཅན་གྱི་སངས་རྒྱས་དང་བྱང་སེམས་རིག་འཛིན་དཔའ་བོ་མཁའ་འགྲོ་སྟོང་གསུམ་གྱི་སྟོང་ཆེན་པོ་རབ་འབྱམས་རྒྱ་མཚོའི་རྡུལ་གྱི་གྲངས་དང་མཉམ་པ་མངོན་པར་སྤྲོ་ཞིང་སྡུད་པའི་སྤྱི་དཔལ་སྲིད་ཞིའི་དབང་ཕྱུག་ཆེན་པོ་དུས་གསུམ་སངས་རྒྱས་ཐམས་ཅད་ཀྱི་འབྱུང་གནས་ཀུན་མཁྱེན་ཆོས་ཀྱི་རྗེ་དོལ་པོ་ཤེས་རབ་རྒྱལ་མཚན་དཔལ་བཟང་པོའི་ཞབས་ལ་དུས་རྟག་ཏུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །སྐྱེ་བ་དང་ཚེ་རབས་ཐམས་ཅད་དུ་ཐུགས་རྗེས་བཟུང་དུ་གསོལ། བདག་སོགས་སེམས་ཅན་ཐམས་ཅད་ལས་ངན་པའི་དབང་དུ་མི་གཏོང་ཞིང་འཁོར་བའི་འདམ་རྫབ་ལས་དྲང་དུ་གསོལ། ཞི་བ་མྱང་འདས་ཀྱི་མཐའ་དག་ཏུ་གསོལ། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཀྱི་ཕུང་པོ་ཡོངས་སུ་རྫོགས་པར་བྱིན་གྱིས་བརླབ་ཏུ་གསོལ། ངེས་འབྱུང་དང་བྱང་སེམས་ཡང་དག་པའི་ལྟ་བ་རྒྱུད་ལ་སྐྱེ་བ་དང་། དཔལ་རྡོ་རྗེའི་རྣལ་འབྱོར་ཟབ་ལམ་མཐར་ཐུག་སྦྱོར་བ་ཡན་ལག་དྲུག་གི་རྣལ་འབྱོར་ཚེ་འདི་ཉིད་ལ་འགྲུབ་བར་བྱིན་གྱིས་རློབས་ཤིག། འཁྲུལ་པ་གཞན་སྟོང་དུ་རྟོགས་པར་བྱིན་གྱིས་རློབས་ཤིག། ཀུན་མཁྱེན་རྫོགས་པའི་སངས་རྒྱས་ཁྱེད་བདག་གི་སྙིང་དབུས་སུ་རྟག་པར་བཞུགས་ནས་རྡོ་རྗེ་ཡེ་ཤེས་ཀྱི་སྣང་བ་འབར་བ་དང་། །གཟུངས་སྤོབས་ཏིང་ངེ་འཛིན་གྱི་སྒོ་བརྒྱ་འབྱེད་པར་བྱིན་གྱིས་རློབས་ཤིག། མཁྱེན་ནོ་མཁྱེན་ནོ་བླ་མ་ཁྱེད་རང་མཁྱེན་ནོ། །ཅེས་པའང་མགོ་ཟླའི་ཚེས་བཅོ་བརྒྱད་ལ་གསོལ་བ་བཏབ་པ་སིདྡྷི་རསྟུ།། །། ༈ བླ་མ་རྒྱང་འབོད་བཞུགས་སོ། །དུས་གསུམ་སངས་རྒྱས་ཐམས་ཅད་འདུས་པའི་ངོ་བོ། །གུ་རུ་པདྨ་འབྱུང་གནས་དང་དབྱེར་མེད། །ཁྲི་སྲོང་ལྡེའུ་བཙན་བསམ་བཞིན་དུ་བྱོན་པ། །ཀུན་མཁྱེན་རིག་འཛིན་ཆོས་ཀྱི་རྒྱལ་པོ། །རང་བྱུང་རྡོ་རྗེ་འཇིགས་མེད་གླིང་པ་ཁྱེད་མཁྱེན་ནོ། །བཀའ་གཏེར་མན་ངག་གི་གཏེར་མཛོད། །སྔ་འགྱུར་རིག་འཛིན་གྱི་གཙུག་རྒྱན། །མཁའ་འགྲོ་འབུམ་ཕྲག་གི་མིང་པོ། །མཁྱེན་བརྩེའི་འོད་ཟེར་ཁྱེད་མཁྱེན་ནོ། །ཐེག་མཆོག་རྡོ་རྗེ་རྩེ་མོ་ཡི་ཤིང་རྟ། །གསང་བདག་དཔའ་བོའི་ཐུགས་སྲས་ཀྱི་རྒྱལ་པོ། །འཇམ་དཔལ་ཆོས་ཀྱི་བཤེས་གཉེན་ཁྱེད་མཁྱེན་ནོ། །གཏེར་སྟོན་གྲུབ་ཐོབ་ཐམས་ཅད་ཀྱི་རྒྱལ་པོ། །སྙིགས་དུས་བསྟན་འགྲོ་མཐའ་དག་གི་སྐྱབས་གཅིག། །གསང་བ་སྙིང་ཐིག་ཟབ་མོ་ཡི་མཛོད་འཛིན། །པདྨ་དབང་ཆེན་རོལ་པ་རྩལ་མཁྱེན་ནོ། །མཁས་གྲུབ་ཀློང་ཆེན་རབ་འབྱམས་ཀྱིས་རྗེས་བཟུང་། །ཐུགས་རྒྱུད་བྱང་ཆུབ་སེམས་གཉིས་ཀྱི་རྩལ་འབྱོངས། །སྣང་སྲིད་འོད་གསལ་ཆོས་སྐུ་རུ་རྟོགས་པ། །རྒྱལ་བའི་མྱུ་གུ་མཁྱེན་བརྩེའི་ལྷ་མཁྱེན་ནོ། །ཁྱེད་ཀྱི་ཐུགས་རྗེ་ཡིས་བདག་ལ། །ཉིན་མཚན་དུས་དྲུག་ཏུ་གཟིགས་ཤིག། ཕྱི་ནང་གསང་བ་ཡི་བར་ཆད། །རང་ཞི་རང་གྲོལ་དུ་གྱུར་ནས། །ཚེ་ལྷག་ཇི་གནས་ཀྱི་བར་དུ། །རིས་མེད་རྒྱལ་བསྟན་ནི་སྤེལ་བའི། །ལྷག་བསམ་གོང་འཕེལ་དུ་ཤོག་ཅིག། བཀའ་གཏེར་སྨིན་གྲོལ་གྱི་གདམས་པ། །བྱེ་བྲག་སྙིང་ཐིག་གི་བསྟན་པ། །རི་མོའི་མར་མེ་ལྟར་གྱུར་པ། །ཆེས་ཆེར་གསལ་བ་རུ་བྱེད་པའི། །མཐུ་དང་དངོས་གྲུབ་དེ་སྩོལ་ཅིག། འཁོར་བ་དོང་ནས་སྤྲུགས་ནུས་བྱིན་གྱིས་རང་རློབས་ཤིག། ཅེས་པའང་སྣྲོན་ཟླའི་ཚེས་ལྔ་ལ་རྡོ་རྗེ་གླིང་དུ་གང་ཤར་བྲིས་པ་དགེའོ།། །། ༈ བླ་མ་མཁྱེན་ནོ། །སངས་རྒྱས་ཀུན་འདུས་ཀྱི་ངོ་བོ། །རྗེ་བཙུན་མཁྱེན་པའི་གཏེར་ཆེན། །འཇམ་དབྱངས་མཁྱེན༵་རྩེའི༵་དབ༵ང་པོ༵ས། །མི་མངོན་དབྱིངས་ནས་གཟིགས་ཤིག། །དེ་ཡི་ཡེ་ཤེས་རང་གཟུགས། །གསུང་རབ་ཆོས་ཀྱི་གཏེར་ཆེན། །འཇམ་མགོན་ཆོས༵་ཀྱི༵་བློ༵་གྲོས༵། །ཁྱེད་ལ་གསོལ་བ་འདེབས་སོ། །ཐུགས་རྗེའི་བརྩེ་བས་དགོངས་མཛོད། །བདག་རྒྱུད་ཆོས་དང་འདྲེས་ཤིང་། །ཉམས་ལེན་མཐའ་རུ་ཕྱིན་པར། །རྗེ་བཙུན་ཁྱེད་ཀྱིས་བྱིན་རློབས། །སྐྱིད་སྡུག་ལེགས་ཉེས་ཅི་བྱུང་། །བླ་མ་ཁྱེད་རང་མཁྱེན་ནོ། །ཆོས་ཀྱི་བློ་གྲོས་པས་སོ། །ཤུ་བྷཾ།། །། ༈ ཨོཾ་སྭསྟི། སྐྱབས་གནས་ཀུན་འདུས་བླ་མ་རྡོ་རྗེ་འཆང་། །བཀའ་དྲིན་མཉམ་མེད་ཆོས྄༵་ཀྱ྄ི༵་བླ྄ོ༵་གྲོས྄༵་མཁྱེན། །བདག་རྒྱུད་ཆོས་དང་འདྲེས་པར་བྱིན་གྱིས་བརློབས། །གསལ་སྟོང་ཟུང་འཇུག་སྤྲོས་བྲལ་ལྟ་བ་རྟོགས། །ཡེངས་མེད་འཛིན་མེད་བསྒོམ་པ་ལམ་དུ་ཁྱེར། སྡོམ་པ་གསུམ་གྱི་ཀུན་སྤྱོད་རྣམ་པར་དག། དབང་བཞིའི་འབྲས་བུ་ཚེ་འདིར་སྨིན་པར་ཤོག། མདོར་ན་སྐྱིད་སྡུག་ལེགས་ཉེས་ཅི་བྱུང་ཡང་། །རེ་ས་གཞན་ན་མེད་དོ་བླ་མ་མཁྱེན། །བྱང་ཆུབ་བར་དུ་འབྲལ་མེད་ཐུགས་རྗེས་ཟུངས། །ཞེས་པའང་ཤཱཀྱའི་དགེ་སློང་འཇམ་དབྱངས་ཡོན་ཏན་རྒྱ་མཚོས་བསྐུལ་ངོར་མཁྱེན་སྤྲུལ་ཆོས་ཀྱི་བློ་གྲོས་པས་བྲིས་པའོ། །དགེ་ལེགས་འཕེལ།། །། ༈ བླ་མ་ལ་གསོལ་བ་འདེབས་པའི་གླུ་ཡེ་ཤེས་བྱིན་འབེབས་ཞེས་བྱ་བ་བཞུགས་སོ། །ཨ་ཧོ། །རང་བྱུང་ལྔ་ལྡན་འཇའ་ཟེར་འཁྲུགས་པ་ཡི་ཀློང་ན། །ཕ་གཅིག་དྲིན་ཆེན་བླ་མ་ཆོས༵་ཀྱི༵་བློ༵་གྲོས༵་ཁྱེད་མཁྱེན་ནོ། །བདག་ཅག་ལས་ངན་འཁྲུལ་པ་ཡི་དབང་དུ་མ་གཏོང་། །སྲིད་ལས་ངེས་འབྱུང་སྐྱེ་བར་བྱིན་གྱིས་རང་རློབས་ཤིག༔ གཞན་ཕན་ཐུགས་རྗེའི་གཏེར་ཆེན་རྒྱལ་སྲས་ཁྱེད་མཁྱེན་ནོ། །བདག་འཛིན་འགོང་པོ་འདི་ཉིད་ཚར་གཅོད་ཞིག་བྱས་ཏེ། །བདག་བས་གཞན་གཅེས་བྱང་ཆུབ་སེམས་མཆོག་ནི་འབྱོངས་ནས། །འགྲོ་དོན་མཁའ་ཁྱབ་འབྱུང་བར་བྱིན་གྱིས་རང་རློབས་ཤིག༔ ། རྡོ་རྗེའི་རིག་འཛིན་པ༵དྨཱ་ཀ༵་ར༵་ཡི༵་རྒྱལ་ཚབ། །ཡེ༵་ཤེས༵་རྡོ༵་རྗེ༵་འོད༵་གས༵ལ་སྙིང༵་པོ༵་རྩལ༵་མཁྱེན་ནོ། །དབང་བཞིའི་ཆུ་རྒྱུན་བདག་གི་སྒོ་གསུམ་ལ་བསྐུར་ནས། །རྡོ་རྗེ་བཞི་རུ་སྨིན་པར་བྱིན་གྱིས་རང་རློབས་ཤིག། །འཇིག༵ས་མེད༵་ནམ༵་མཁ༵འི་རྡོ༵་རྗེ༵་ཡེ་ཤེས་ཀྱི་སྐུ་ཅན། །བི་མའི་སྤྲུལ་པ་ཚེ༵་དབ༵ང་གྲུབ༵་པ༵་རྩལ༵་མཁྱེན་ནོ། །གཟུང་འཛིན་རྟོག་ཚོགས་ཆོས་ཉིད་ནམ་མཁའ་ལ་དེངས་ནས། །འོད་གསལ་སྣང་བཞི་མཐར་ཕྱིན་བྱིན་གྱིས་རང་རློབས་ཤིག། །དེང་ནས་བཟུང་སྟེ་བྱང་ཆུབ་སྙིང་པོ་ཡི་བར་དུ། །དཔལ་མགོན་ཆོས་རྗེ་བླ་མ་ཁྱེད་ཞབས་སུ་སྐྱེས་ནས། །ཐུགས་ཀྱི་བཅུད་ཐོབ་ཉམས་ལེན་མཐའ་རུ་ནི་ཕྱིན་ཏེ། །ཁམས་གསུམ་དོང་ནས་སྤྲུགས་པར་བྱིན་གྱིས་རང་རློབས་ཤིག། ཅེས་པའང་རང་སློབ་དད་པ་དང་དག་སྣང་གི་བློ་ཅན་སྤར་བརྐོས་ཆོས་འཕེལ་ནས་རིན་ཆེན་སྣ་ཚོགས་ཀྱི་རྟེན་དང་བྲིས་གཞི་བཅས་མཆིམ་ཕུའི་གུར་དཀར་ཕུག་ཏུ་བསྐུལ་བར་བྲག་དམར་ཀེའུ་ཚང་དུ་ཆོས་ཀྱི་བློ་གྲོས་པས་བྲིས་པ་སིདྡྷི་རསྟུ། སརྦ་མངྒ་ལཾ།། །། ༈ བླ་མ་རྒྱང་འབོད་ཐུགས་རྗེའི་ལྕགས་ཀྱུ། བླ་མ་མཁྱེན་ནོ། །ལན་གསུམ། སངས་རྒྱས་ཀུན་འདུས་ཀྱི་ངོ་བོ། །ལུང་རྟོགས་དམ་ཆོས་ཀྱི་མཛོད་ཆེན། །འཕགས་པའི་དགེ་འདུན་གྱི་མངའ་བདག། རྩ་བའི་བླ་མ་དེ་མཁྱེན་ནོ། །བདག་རྒྱུད་ཆོས་དང་འདྲེས་པར་བྱིན་གྱིས་རང་རློབས་ཤིག། མ་རིག་མུན་པ་སེལ་བའི་ཉི་མ། །དགོས་འདོད་ཅི་དགར་འབྱུང་བའི་ནོར་བུ། །འཁོར་བའི་རྒྱ་མཚོར་སྒྲོལ་བའི་དེད་དཔོན། །རྩ་བའི་བླ་མ་དེ་མཁྱེན་ནོ། །བདག་རྒྱུད༴ །སྐྱབས་ཀུན་འདུས་པ་རྩ་གསུམ་གྱི་རྒྱལ་པོ། །དྲན་པ་ཙམ་གྱི་སྲིད་ཞི་ཡི་གདུང་སེལ། །བཀའ་བབས་བདུན་གྱི་གསང་མཛོད་ལ་དབང་བསྒྱུར། །འོད་གསལ་སྤྲུལ་པའི་བཤེས་གཉེན་དེ་མཁྱེན་ནོ། །བདག་རྒྱུད༴ །རྒྱལ་ཀུན་མཁྱེན་རབ་མ་ལུས་པ་གཅིག་བསྡུས། །སྤྲུལ་པའི་ལོ་ཙཱ་རྣམ་པར་སྣང་མཛད་ཀྱི་ངོ་བོ། །མཛོད་ལྔའི་ཤིང་རྟ་གངས་ཅན་འགྲོ་བ་ཡི་མགོན་པོ། །པདྨ་གར་དབང་བློ་གྲོས་མཐའ་ཡས་དེ་མཁྱེན་ནོ། །བདག་རྒྱུད༴ །གཞན་ཕན་ཐུགས་བསྐྱེད་ཀྱི་གོ་ཆ། །རྒྱལ་སྲས་བྱང་སེམས་ཀྱི་ཚུལ་བཟུང་། །མདོ་སྔགས་ཆོས་ཚུལ་གྱི་བང་མཛོད། །འཇམ་དབྱངས་ཆོས་ཀྱི་བློ་གྲོས་དེ་མཁྱེན་ནོ། །བདག་རྒྱུད་ཆོས་དང་འདྲེས་པར་བྱིན་གྱིས་རང་རློབས་ཤིག། གནས་འཁོར་ལོ་བཞི་པའི་ཕོ་བྲང་ན། །བླ་མ་སྐུ་བཞིའི་ལྷ་ཚོགས་དེ་མཁྱེན་ནོ། །བུམ་གསང་ཤེར་ཡེའི་དབང་མཆོག་དེ་བསྐུར་ནས། །སྐུ་བཞིའི་གོ་འཕང་ཐོབ་པ་བྱིན་གྱིས་རང་རློབས་ཤིག། མདོར་ན་བྱང་ཆུབ་སྙིང་པོའི་བར་དུ། །རྩ་བའི་བླ་མ་རིན་པོ་ཆེ་ལ། །རྟག་ཏུ་རྩེ་གཅིག་གསོལ་བ་འདེབས་ན། །འབད་མེད་ཆོས་མཐུན་དངོས་གྲུབ་སྩོལ་ཅིག། ཅེས་པའང་འཇམ་དབྱངས་ཆོས་ཀྱི་བློ་གྲོས་པས་བྲིས་བ་དགེ། །། ༈ བླ་མ་ལ་གསོལ་འདེབས་ཞལ་གདམས་སྨོན་ལམ་དང་འབྲེལ་བ་བདུད་རྩིའི་ཐིག་ཕྲེང་ཞེས་བྱ་བ་བཞུགས་སོ། །ན་མོ་གུ་ར་ཝེ། གཟོད་ནས་རྣམ་གྲོལ་བྱང་ཆུབ་མངོན་བརྙེས་ཀྱང་། །བདག་སོགས་གདུལ་བྱའི་མགོན་དུ་བྱོན་པའི་སྐུ། །དཔལ་ལྡན་བླ་མའི་ཞབས་ལ་གསོལ་བ་འདེབས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །བི་མ་ཆོས་རྒྱལ་ཉང་རལ་ཀུན་མཁྱེན་སོགས། །འཕགས་བོད་མཁས་གྲུབ་རྒྱ་མཚོའི་སྤྲུལ་པའི་སྐུ། །འཇམ་དབྱངས་མཁྱེན་བརྩེའི་དབང་པོར་གསོལ་བ་འདེབས། །དགོངས་བརྒྱུད་འཕོ་བ་ཐོབ་པར་བྱིན་གྱིས་རློབས། །དེ་ཡི་གསང་གསུམ་མི་ཟད་རྒྱན་འཁོར་ལོའི། །ཕྲིན་ལས་སྒྱུ་འཁྲུལ་རོལ་མོའི་མངའ་བདག་མཆོག། ཆོས་ཀྱི་བློ་གྲོས་ཞབས་ལ་གསོལ་བ་འདེབས། །བསྟན་འགྲོར་ཕན་བདེ་འབྱུང་བར་བྱིན་གྱིས་རློབས། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །བདག་ལ་ཐུགས་རྗེས་མྱུར་དུ་གཟིགས་སུ་གསོལ། །བློ་སྣ་དམ་པའི་ཆོས་ལ་དྲོངས་པ་དང་། །ཐར་པའི་ལམ་སྣ་ཟིན་པར་བྱིན་གྱིས་རློབས། །སྲིད་པའི་ཕུན་ཚོགས་ཇི་ལྟར་འབྱོར་གྱུར་ཀྱང་། །སྡིག་དང་སྡུག་བསྔལ་རྒྱུ་འབྲས་འབའ་ཞིག་ལས། །གཏན་བདེ་ཕྲ་མོ་ཙམ་ཡང་མ་མཆིས་པས། །འཁོར་བར་ཞེན་པ་ལོག་པར་བྱིན་གྱིས་རློབས། །འདུས་བྱས་ཐམས་ཅད་མི་རྟག་མི་བརྟན་ཅིང་། །རྩ་རྩེའི་ཟིལ་པ་ཆུ་བུར་སྤྲིན་བཞིན་དུ། །ད་ལྟ་ཡོད་ཀྱང་ད་ལྟ་འཇིག་པའི་དཔེས། །མི་རྟག་འཆི་བ་དྲན་པར་བྱིན་གྱིས་རློབས། །དལ་དང་འབྱོར་པའི་རྟེན་བཟང་རིན་ཆེན་འདི། །ལན་ཅིག་ཐོབ་པ་ད་རེས་ཙམ་ཡིན་ཞིང་། །དེ་རྒྱུ་ཚུལ་ཁྲིམས་བསྲུང་བ་དཀོན་པས་ན། །དལ་རྟེན་དོན་ཡོད་བྱེད་པར་བྱིན་གྱིས་རློབས། །དགེ་སྡིག་ལས་བསག་འབྲས་བུ་ཆུད་མི་ཟ། །རང་གི་སྟེང་དུ་སྨིན་པར་ངེས་པ་དང་། །རྒྱུ་འབྲས་བསླུ་བ་མེད་པ་ཡིན་པའི་ཕྱིར། །དཀར་ནག་བླངས་དོར་བྱེད་པར་བྱིན༴ །སྲིད་དང་ཞི་བའི་འཇིགས་པ་ཇི་སྙེད་པ། །སྐྱོབ་པ་བླ་མེད་དཀོན་མཆོག་རིན་ཆེན་གསུམ། །གང་ལ་བསྙེན་པས་ཉེས་པ་ཀུན་ལས་སྐྱོབ། །ཡིད་ཆེས་དད་པ་བརྟན་པར༴ །བདེ་དང་སྡུག་བསྔལ་ཅི་བྱུང་སྔོན་ལས་ཀྱི། །སྨིན་པར་ཤེས་ནས་དགའ་སྡུག་མི་བྱེད་པར། །བློ་གཏད་ལིང་བསྐྱུར་མོས་འདུན་རྩེ་གཅིག་པས། །སྐྱབས་འགྲོའི་རྩ་བ་བརྟན་པར༴ །མཁའ་ཁྱབ་འགྲོ་བ་བསྒྲངས་ལས་འདས་པ་རྣམས། །རང་གི་ཕ་མར་ཡིན་པར་ཤེས་པ་དང་། །བཀའ་དྲིན་དྲན་ཞིང་དྲིན་ལན་བཟོ་འདོད་པས། །ཚད་མེད་རྣམ་བཞི་འབྱོངས་བར༴ །རང་དོན་ཡིད་བྱེད་ཞི་བདེའི་སེམས་སྤངས་ནས། །གཞན་ཕན་ལྷག་པའི་བསམ་པ་བཟང་པོ་བསྐྱེད། །ལུས་དང་ལོངས་སྤྱོད་དགེ་ཚོགས་འགྲོ་ལ་སྦྱིན། །བྱང་ཆུབ་སེམས་མཆོག་འབྱོངས་བར༴ །ཉོན་མོངས་ཉེས་པ་བརྒྱ་ཕྲག་ཚོགས་རྣམས་ཀུན། །བདག་ཏུ་འཛིན་པའི་འདྲེ་ཆེན་འདི་ལས་བྱུང་། །འདི་ཡིས་བདག་ནི་རྟག་ཏུ་སྡུག་བསྔལ་བསྐྱེད། །བདག་འཛིན་འགོང་པོ་ཆོམ་པར༴ །རང་སེམས་གདོད་ནས་དག་པའི་ཆོས་ཉིད་ལ། །མ་རིག་གསུམ་གྱི་སྤྲིན་ནག་སྟུག་པོས་སྒྲིབ། །ཐར་པ་ཐམས་ཅད་མཁྱེན་པར་བར་དུ་གཅོད། །སྒྲིབ་ཚོགས་སྟོབས་བཞིས་སྦྱངས་བ༴ །དགེ་ཚོགས་རིན་ཆེན་རྡུལ་མང་སྐད་ཅིག་གི །ཡོངས་སུ་སྡུད་པའི་ཐབས་མཁས་ཁྱད་པར་ཅན། །དཀོན་མཆོག་མཆོད་དང་འགྲོ་ལ་སྦྱིན་གཏོང་སོགས། །ཚོགས་གཉིས་རྒྱ་ཆེན་སྡུད་པར༴ །མཚན་ཉིད་ཀུན་ལྡན་རྡོ་རྗེ་སློབ་དཔོན་ལས། །རྣམ་དག་དབང་བཞིའི་དལ་བཞི་སྨིན་བྱས་ནས། །བསྐྱེད་དང་རྫོགས་པའི་རིམ་པ་ལེགས་བསྒོམ་པས། །རིག་འཛིན་རྣམ་བཞི་བསྒྲོད་པར༴ །ཁྱད་པར་སངས་རྒྱས་ཀུན་གྱི་གསང་བའི་ལམ། །ཟབ་མོ་བླ་མའི་རྣལ་འབྱོར་སྒོམ་པ་ཡི། །རྩ་བའི་བླ་མ་སངས་རྒྱས་དངོས་སུ་མཐོང་། །བཅོས་མིན་མོས་གུས་བརྟན་པར༴ །ཐ་མལ་འཁྲུལ་པའི་རྟོག་པས་མ་གོས་པར། །སྣང་གྲགས་རིག་གསུམ་བླ་མའི་རོལ་པར་ཤར། །གདོད་ནས་གནས་པའི་རིག་སྟོང་རྡོ་རྗེ་འདི། །བླ་མའི་ངོ་བོར་མཐོང་བར༴ །གསོལ་འདེབས་གདུང་བའི་དབྱངས་ཀྱིས་བསྐུལ་བ་དང་། །དབང་གི་སྙིང་པོ་འོད་ཟེར་ཆེན་པོ་ཡི། །དབང་བླངས་རང་ལ་ཐིམ་པ་དེ་ཡི་མོད། །གསང་བ་གསུམ་དང་དབྱེ་མེད་བྱིན༴ །རྡོ་རྗེའི་ཡེ་ཤེས་སྙིང་ལ་འབེབས་པ་དང་། །རང་གནས་རིག་པ་སྐུ་གསུམ་མངོན་གྱུར་ཏེ། །ཀ་དག་ལྷུན་གྲུབ་དགོངས་པའི་རྩལ་ཆེན་རྫོགས། །གཞི༵་ཡི་གནས་ལུགས་རྟོགས་པར༴ །འཁོར་འདས་ཕྱི་ནང་རུ་ཤན་ལེགས་ཕྱེད་ཅིང་། །རང་སེམས་འཁྲུལ་པའི་གཞི་རྩ་བཅད་པ་ཡི། །སྐྱེ་འགག་གནས་པའི་གཞི་མེད་རྩ་བ་བྲལ། །རིག་པ་ཆོས་སྐུ་རྟོགས་པར༴ །བྱུང་ཚོར་སྤྲོས་པ་ཐམས་ཅད་ཉེར་ཞི་ཞིང་། །དབྱིངས་ལས་བྱུང་ཡང་དབྱིངས་ལས་མ་གཡོས་པར། །ནམ་མཁའི་རྣལ་འབྱོར་བྱར་མེད་ཡངས་པ་ཆེ། །ཁྱབ་བརྡལ་དགོངས་པ་མངོན་གྱུར་བྱིན༴ །སྐུ་གསུམ་ལྷུན་གྱིས་གྲུབ་པའི་རང་གདང་ནི། །དབྱིངས་སྣང་ཆེན་པོར་ཐིག་སྐུའི་ཚོམ་བུ་བཀོད། །སྒྲོན་དྲུག་གསེང་ལམ༵་ཐོད་རྒལ་སྒོམ་པ་ཡི། །སྣང་བཞིའི་ཕ་མཐར་སོན་པར༴ །ཆོས་ཅན་སྣང་བ་ཆོས་ཉིད་དབྱིངས་སུ་ཟད། །རིག་པ་འབྲས༵་སྨིན་འཇའ་ལུས་རྡོ་རྗེའི་སྐུར། །བཞུགས་ནས་འགྲོ་བ་དཔག་མེད་སྒྲོལ་བ་དང་། །འཁོར་བ་དོང་ནས་སྤྲུགས་པར༴ །མདོར་ན་དེང་བཟུང་ཚེ་རབ་ཐམས་ཅད་དུ། །རྗེ་བཙུན་བླ་མ་གཙུག་གི་ནོར་བུར་བསྟེན། །མཉེས་པ་གསུམ་གྱིས་སྒྲུབ་པ་མཐར་ཕྱིན་ནས། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །བསྟན་འཛིན་སྐྱེས་རྣམས་ཞབས་བརྟན་བསྟན་པ་དར། །བསྟན་པའི་སྦྱིན་བདག་དབུ་འཕང་མཐོ་བ་དང་། །བསྟན་ལ་གནོད་བྱེད་མིང་ཙམ་འགྱུར་བ་དང་། །བསྟན་གཉིས་དར་ཤིང་རྒྱས་པའི་བཀྲ་ཤིས་ཤོག། །ཅེས་པའང་ཨ་མདོ་རེ་སྐོང་གི་སྔགས་ཆེན་རྡོ་རྗེ་འཛིན་པ་ཆེན་པོ་གཞན་ཕན་བྱང་ཆུབ་སེམས་ཀྱིས་ཐུགས་མངའ་བཀྲ་ཤིས་དཔལ་ལྡན་ནས་བླ་མ་ལ་གསོལ་བ་འདེབས་པ་ཞལ་གདམས་སྨོན་ལམ་དང་འབྲེལ་བར་བྲིས་ཤིག་ཅེས་རྟེན་དང་བཅས་གསུང་བསྐུལ་ངོར་སྙིགས་མའི་དུས་ཀྱི་དམ་ཆོས་འཛིན་པའི་གྲལ་མཐར་སྐྱེས་ཤིང་དགེ་སྦྱོང་གི་གཟུགས་བརྙན་འཛིན་པ་འཇམ་དབྱངས་ཆོས་ཀྱི་བློ་གྲོས་པས་ས་བྱི་གནམ་ལོ་གསར་འཆར་གྱི་ཆོ་འཕྲུལ་ཟླ་བའི་ཚེས་བཅུ་གཅིག་ལ་སྡེ་དགེ་རྫོང་གསར་བཀྲ་ཤིས་ལྷ་རྩེའི་ཆོས་གྲྭ་ཆེན་པོར་བྲིས་པ་འདིས་ཀྱང་དཔལ་ལྡན་བླ་མའི་བྱིན་བརླབ་སྙིང་དབུས་སིམ་པའི་རྒྱུར་གྱུར་ཅིག། སརྦ་དཱ་མངྒ་ལཾ།། །། ༈ བླ་མ་དྲན་པའི་གདུང་དབྱངས་སྙིང་གི་གཟེར་ཆེན་ཅེས་བྱ་བ་བཞུགས་སོ། །ན་མོ་གུ་རུ། ཨོ་རྒྱན་རྡོ་རྗེ་འཆང་གི་རྒྱལ་ཚབ་ཆེ། །བཀའ་གཏེར་ཆོས་ཀྱི་རྒྱ་མཚོ་བླ་མ་རྗེ། །མི་མངོན་དབྱིངས་ནས་བདག་ལ་བརྩེ་བས་དགོངས། །ལས་ངན་བདག་ཅག་ཐུགས་རྗེས་འདོར་ཕོད་དམ། ༡། དེང་དུས་རྒྱལ་བསྟན་རིན་ཆེན་ཉམས་དུས་འདིར། །མགོན་ཁྱོད་ཞི་བའི་དབྱིངས་སུ་མནལ་བ་ལ། །སྔོན་གྱི་ཐུགས་བསྐྱེད་ཉམས་པར་མ་གྱུར་ཏམ། །རྒྱལ་དང་དེ་སྲས་གཞན་དོན་སྒྲུབ་ལས་ཅི། ༢། དེས་ན་མཁྱེན་བརྩེ་ནུས་པའི་ཤུགས་བསྐྱེད་ནས། །ཆོས་དབྱིངས་དགའ་མའི་ཀློང་ནས་བཞེངས་སུ་གསོལ། །ཀྱེ་མ་ཀྱི་ཧུད་བུ་ཡི་གདུང་དབྱངས་ལ། །ཡེ་ཤེས་དབང་པོ་རྣམ་པ་ཐམས་ཅད་པས། ༣། དགོངས་པར་མཛོད་ལ་འོད་གསལ་ཆེན་པོའི་སྐུ། །ད་ལྟ་ཉིད་དུ་སྣང་བར་མཛད་དུ་གསོལ། །བདག་ནི་སྔོན་ཚེ་བྱིས་བློའི་ཉེས་པས་ནོངས། །དྲན་ཤེས་ལྡན་ཚེ་བླ་མ་དབྱིངས་སུ་གཤེགས། ༤། ཀྱི་ཧུད་བདག་གི་ཆོས་ཀྱི་ཕོངས་པར་གྱུར། །འོན་ཀྱང་ཡེ་ཤེས་སྐུ་ལ་སྐྱེ་འཆི་བྲལ། །ཐུགས་རྒྱུད་དགོངས་པའི་བྱིན་རླབས་འཕོ་བར་མཛོད། །ཡེ་ཤེས་རིག་པའི་རྩལ་ཆེན་སྦར་དུ་གསོལ། ༥། ཉམས་དང་རྟོགས་པའི་རྩལ་ཆེན་རབ་རྫོགས་ནས། །བསྟན་དང་འགྲོ་བའི་དོན་ཆེན་སྒྲུབ་པ་ལ། །བླ་མའི་གསང་གསུམ་ཡོན་ཏན་མཐའ་ཀླས་པ། །མ་ལུས་བདག་ལ་དབང་འབྱོར་བྱིན་གྱིས་རློབས། །དེང་ནས་བཟུང་སྟེ་བྱང་ཆུབ་སྙིང་པོའི་བར། །དཔལ་ལྡན་བླ་མ་དངོས་ཉམས་རྨི་ལམ་དུ། །ཡང་ཡང་རྗེས་སུ་བཟུང་ཞིང་རིག་དབྱིངས་སུ། །དབྱེར་མེད་བཞུགས་ནས་རྟག་ཏུ་དགོངས་པར་མཛོད། ཁྱོད་ཀྱི་ཟབ་དགོངས་ཡོངས་སུ་རྫོགས་པ་དང་། །མཛད་པ་ཕྲིན་ལས་བདག་གིར་བྱེད་པར་ཤོག། དེ་ཚེ་གཞན་དབང་རྐྱེན་གྱིས་མི་བརྫི་ཞིང་། །བསམ་པ་ཙམ་གྱིས་ཡིད་བཞིན་འགྲུབ་པར་ཤོག། གསང་གསུམ་མཆོག་གི་སྤྲུལ་སྐུ་མྱུར་སྣང་ནས། །གསན་བསམ་སྒོམ་པའི་ཡོན་ཏན་ལྷུན་གྱིས་གྲུབ། །མུན་པའི་སྨག་ལ་ཉི་ཟླའི་འོད་སྣང་བཞིན། །འགྲན་མེད་ཕྱོགས་ལས་རྣམ་པར་རྒྱལ་གྱུར་ཅིག། དཀོན་མཆོག་རྩ་གསུམ་རྒྱ་མཚོའི་བདེན་སྟོབས་ཀྱིས། །མི་མཐུན་བདུད་བཞིའི་གཡུལ་ལས་རྣམ་རྒྱལ་ཞིང་། །མཁྱེན་ནུས་བརྩེ་བའི་བློ་གྲོས་ཟབ་ཅིང་རྒྱས། །བསྟན་འགྲོའི་དགེ་མཚན་རྒྱས་པའི་བཀྲ་ཤིས་ཤོག། ཅེས་པའང་འཁོར་ལོའི་མགོན་པོ་ཉིད་ཤིང་གླང་ཐ་སྐར་ཟླ་བའི་ཚེས་ལ་གཟུགས་སྐུའི་བཀོད་པ་ཉེ་བར་བསྡུས་པའི་གཏམ་སྨིན་ཟླའི་ཚེས་བཅུ་གཉིས་ལ་སྒྲ་འཛིན་གྱི་བུ་གར་སོན་པ་ན་མོས་གུས་ཚད་མེད་པའི་གདུང་ཤུགས་མཆི་མ་འཁྲུགས་པ་རྩམ་དུ་གྱུར་པའི་ངང་ནས་གུས་སློབ་ཀྱི་ཐ་ཤལ་འཇམ་དབྱངས་བློ་གྲོས་རྒྱ་མཚོས་ཡེ་རྒྱལ་ནམ་མཁའ་མཛོད་ཆོས་ཀྱི་སྒོམ་ཆེན་པོའི་ལྷོ་ཕྱོགས་གནས་བརྟན་ཀླུའི་སྡེའི་ཕོ་བྲང་གསེར་གྱི་དེའུའི་མདུན་རོལ་གསང་སྔགས་ཕོ་བྲང་གི་ཡང་རྩེར་གསོལ་བ་འདེབས་པ་འདིས་ཀྱང་ཚེ་རབས་ཀུན་ཏུ་རྗེ་བཙུན་དམ་པ་དེ་ཉིད་ཀྱིས་རྗེས་སུ་འཛིན་པའི་རྒྱུར་འགྱུར་བ་བླ་མ་རྩ་བ་གསུམ་གྱི་བྱིན་གྱིས་བརླབ་ཏུ་གསོལ། ཤུ་བྷི་རསྟུ་སརྦ་ཛ་ག་ཏཾ།། །། ༈ ལུང་བསྟན་རྫུན་རིས། མ་ཡེ་ཤེས་མཁའ་འགྲོ་རྟེན་འགྲེལ་བརྡའ། །དབྱིངས་དཔལ་གྱི་རྒྱལ་མོའི་ངང་ཚུལ་འབར། །གང་འདུལ་གྱི་སྒྱུ་འཕྲུལ་གཉིས་པ་ནི། །ལ་དཀར་པོའི་ཁྱིམ་དུ་ས་ཁམས་ཀྱི། །ལྟོ་འགྲོས་དེས་མིག་དཀྱུས་མཛེས་པ་ནི། །དཔལ་རྔ་ཡབ་ཡུལ་ནས་འོང་བ་ཡིན། །ལྷ་སྦྲུལ་དཀར་པོས་སྨན་ལྕེ་དེས། །ཞིམ་མངར་གྱི་རོ་བཅུད་སྟེར་ནུས་ན། །དཔལ་བདེ་བའི་རྡོ་རྗེ་ལང་ཚོ་རྒྱས། །དབྱིངས་ཡེ་ཤེས་མཁའ་འགྲོའི་གསང་མཛོད་འཛིན། །བསྟན་འགྲོ་ལ་ཕན་པ་མཐའ་ཡས་སྦྱིན། །བསྐལ་ངན་གྱི་ཞུག་ལྕེ་བཟློག་པར་ངེས། །དེ་འབྱངས་ན་ཡེ་ཤེས་ཌཱ་ཀི་ཡི། །དར་ལམ་གྱི་དོ་ལིས་བཏེགས་ནས་འགྲོ། །ཡུན་མི་རིང་རྔ་ཡབ་དཔལ་རིར་འཁོད། །རྒྱ་འདྲེ་ཡི་འཚུབ་མ་ལྡང་བ་དང་། །རྒྱ་འགོང་དམ་སྲིའི་གནོད་པ་ཡིས། །བོད་ཁམས་མཐའ་དབུས་སིལ་བུར་འགྲོ། །ཆོས་འཁོར་གྱི་གཙུག་ལག་གཉེན་པོར་འཇིག། མདོ་སྨད་དུ་ནང་འཁྲུགས་དྲག་པོ་ཡི། །བསྟན་དགོན་འགའ་ཞིག་ཁྲལ་ཁྲོལ་བཏང་། །ཆོས་ཕུང་ལ་བྱིན་ཟའི་གནོད་པས་འཚེ། །མི་ཕྱུགས་ལ་ནད་ཡམས་སྤྲིན་ལྟར་གཏིབས། །སྐྱེས་གཞོན་ཕལ་ཆེར་གྲི་རུ་འཆི། །དེ་འདྲ་ཡི་སྐལ་ངན་བཟློག་པ་ལ། །ལྷ་ཨོ་རྒྱན་གུ་རུ་པདྨ་དང་། །རྗེ་འཕགས་མ་སྒྲོལ་མའི་ཐུགས་རྗེ་དང་། །གུར་དྲག་དང་མ་གཤིན་ཕུར་གསུམ་གྱི། །བཟློག་པ་དང་སྦྱིན་བསྲེགས་མནན་པ་སྒྲུབ། །མདོ་བཞི་ཡི་མཆོད་རྟེན་སྐྱར་སྒྲུབ་བྱ། །རྒྱལ་བཀའ་ཡི་གསུང་སྒྲུབ་མདོ་བཟློག་དང་། །རབ་གནས་དང་སྦྱིན་བསྲེགས་ལས་ལ་བརྩོན། །མ་ཎི་དང་རིགས་གསུམ་སིདྡྷི་དང་། །ཏཱ་རེ་ཡི་བསྙེན་པ་རྡོ་ལ་བརྐོ། །ཇོ་དར་དང་རི་ཁྲུས་བུམ་གཏེར་སྦ། །རྟེན་གསུམ་ལ་མངའ་གསོལ་མཆོད་འབུལ་བྱ། །དེ་གྲུབ་ན་བར་ཁུགས་རྐྱེན་ངན་བཟློག། དུས་རྒུད་ཀྱི་མུན་པ་ཉེར་ཞི་ནས། །སྣོད་བཅུད་ཀྱི་དགེ་མཚན་རྒྱས་པར་ངེས། །མཆོག་མི་འགྱུར་ཐབས་ཤེས་རྡོ་རྗེའི་རྒྱ། །དེའི་རྟེན་འབྲེལ་མདུད་པ་རྩ་བར་ངེས། །དེ་སྙིང་ལ་འཆངས་ཤིག་ས་མཱ་ཡ། །ཁོ་བོ་པདྨ་ཡེ་ཤེས་རྡོ་རྗེ་ལ་མེ་ཕག་ཟླ་༡༡པའི་ཚེས་༡༥ཉིན་གུང་ལ་འབྲི་གཏེར་འོད་གསལ་རྡོ་རྗེ་སོགས་ཀྱིས་སྡེ་དགེའི་ཞབས་རིམ་ཇི་འགྱུར་ཀྱི་རྟོགས་འཆར་སྐབས་རིག་ངོར་མ་བཅོས་ཐོལ་སྐྱེས་སུ་ཤར་བ་ཡི་གེར་བཀོད་པ་དགེ་ལེགས་སུ་གྱུར་ཅིག། ཤྲཱི་མཱཾ་བྷ་དྲ། མངྒ།། །། ༈ རང་བྱུང་རྡོ་རྗེའི་བྲོ་གླུ་བཀྲ་ཤིས་འཁྱིལ་བ། །ཐོས་གྲོལ་འབྲེལ་ཚད་དོན་ལྡན་བཞུགས་སོ། ཨ་ལ་ལ་ལ་ཧོཿཨ་ཧོ་གི་རྟི་ཨ་ཧོ་ཡེ༔ རྩ་གསུམ་དགྱེས་པའི་དགའ་ཚལ༔ བཀྲ་ཤིས་ལེགས་ཀྱི་འབྱུང་གནས། །ཉམས་དགའི་འདོད་ཡོན་ཕུན་ཚོགས༔ ། ནགས་ཚལ་ལྗོན་པའི་ར་བ། །གཡུ་ཡི་ནེའུ་སེང་སྔོ་ལྗང་། །གསེར་གྱི་མེ་ཏོག་བཀྲ་བ། །བུང་བ་ལིང་ལིང་ལྡིང་ཞིང་། །ཕུ་གསུམ་གངས་རི་དཀར་པོ། །རྩལ་གསུམ་ལྡན་པའི་སེང་གེའི། །ཐེག་མཆོག་ཆོས་ཀྱི་ང་རོས། །ལོག་ལྟའི་ཝ་ཚོགས་བཅོམ་སོང་། །གཡུ་ཡི་རལ་པ་སྔོ་སང་། །ནམ་མཁའི་དབྱིངས་ལ་སྤྱོད་དོ། །ཡན་ལག་བརྒྱད་ལྡན་ཆུ་ཀླུང་། །དལ་གྱིས་འབེབས་པའི་ཀློང་དུ། །བྱ་རིགས་སྣ་ཚོགས་སྐད་སྙན། །ཅ་ཅོ་སྒྲོགས་པས་དགའ་འོ། །ཉོན་མོངས་གདུང་སེལ་སྨན་ཆར། །ལྷ་ཡི་བུམ་བཟང་ནས་བབས། །དག་བྱེད་བདུད་རྩིའི་ཁྲུས་ཀྱིས། །ལུས་སེམས་དགའ་བདེས་ཁྱབ་བྱུང་། །གཟུགས་བཟང་ལྟ་ན་སྡུག་པའི། །ལྷ་ཡི་བུ་དང་བུ་མོར། །འགྲན་པའི་ལང་ཚོའི་མཚར་སྡུག། མང་དུ་འཛོམ་པའི་བདེ་སྐྱིད། །འཆི་མེད་དཔལ་དུ་ཆས་བྱུང་། །སྲིད་དང་ཞི་བའི་ཕུན་ཚོགས། །ས་འདིར་མངོན་སུམ་བཀུག་སྟེ། །དགའ་བ་བརྒྱ་ལྡན་གྲོང་ཁྱེར། །མི་ཕམ་འཇམ་དབྱངས་ཞལ་རས། །ལྟ་བའི་ཆོག་མི་ཤེས་པ། །བསྟན་འགྲོའི་མགོན་དུ་འཆར་བྱུང་། །ནག་ཕྱོགས་དམ་སྲིའི་དཔུང་ཚོགས། །ཁྲོ་རྒྱལ་རྟ་མགྲིན་སྤྲུལ་པ། །ཅང་ཤེས་རྨིག་གི་ཐལ་སྒྲས། །སྲོག་སྙིང་ཚལ་པར་གཏོར་སོང་། །འཇམ་དཔལ་ཁྲོས་པའི་འཁོར་ལོ། །ཕྱོགས་ཀུན་གཡས་སུ་འཁོར་བས། །ལྷ་མིན་འབྱུང་པོའི་མགོ་གཅོད། །དཔའ་བོའི་རྒྱན་དུ་བྱས་སོ། །ཕྲིན་ལས་ཕུར་པའི་མེ་སྒྱོག། རྡོ་རྗེའི་མདེའུ་རྩེ་བརྒྱས། །འབྲུག་གི་སྒྲ་ལྟར་སྒྲོགས་པས། །ཕ་རོལ་བདུད་སྡེའི་དམག་ཚོགས། །མིང་ཙམ་མེད་པར་བྱས་སོང་། །གཡུལ་རྒྱལ་རུ་དར་དཀར་པོ། །ཕྱོགས་ལས་རྣམ་པར་རྒྱལ་ལོ། །བདེ་ཞིང་སྐྱིད་པའི་ཉི་མ། །བཀྲ་ཤིས་ལྷ་ཡི་ཟླ་བ། །རྒྱུ་སྐར་ལྷ་མོ་གསུམ་པོ། །དུས་གཅིག་འཛོམ་པའི་དགའ་སྟོན། །དེ་རིང་ཆོས་ཀྱི་ཉི་མར། །འཆར་བའི་བཀྲ་ཤིས་ལེགས་བྱས། །འདི་འདྲ་འཛོམ་པའི་དགའ་མོ། །རྐང་གཡས་ཐབས་ཀྱི་བྲོ་ཆེན། །རྐང་གཡོན་ཤེས་རབ་བྲོ་མོ། །ཐབས་ཤེས་ཟུང་འཇུག་ཞབས་བྲོ། །ཁྲིགས་སེ་ཁྲིགས་སེ་ཆེམ་ཆེམ། །རྐང་པའི་སྟངས་ཀྱིས་བསྒྱུར་ཞིང་། །ས་གཞི་ཡོངས་པའི་ཁྱོན་ལ། །ཚངས་པའི་ཡུལ་ས་རྩེ་གནོན། །ལག་མཐིལ་དར་གྱི་གཤོག་རླབས། །སྟེང་འོག་ཕྱོགས་བཅུར་གཡོ་བས། །སྣོད་བཅུད་དཔལ་ཡོན་ཀུན་སྡུས། །ཕྱ་དང་གཡང་གི་དགེ་ལེགས། །བྲོ་ར་འདི་རུ་ཁུག་ཅིག། ཁུ་ཡེ་ཁུ་ཡེ་གཡང་ཁུག། རྒྱལ་ལོ་རྒྱལ་ལོ་ལྷ་རྒྱལ། །བཀྲ་ཤིས་འཁྱིལ་པའི་བྲོ་འདིས། །སྡེ་བཞི་དགེ་བཅུར་བཀྲ་ཤིས། །དགེ་ལེགས་རྣམ་རྒྱལ་གྱུར་ཅིག། ཅེས་པའང་ལྕགས་སྟག་སྣྲོན་གྱི་ཟླ་བའི་ཚེས་ལྔ་ལ། པདྨ་ཡེ་ཤེས་རྡོ་རྗེས་རང་བཞིན་དབྱིངས་སུ་ཇི་ལྟར་ཤར་བ། ཐུགས་རྗེ་དཔལ་མགོན་མཚུངས་མེད་དགེ་རྟག་མཆོག་སྤྲུལ་རིན་པོ་ཆེས་ཕྱག་བྲིས་སུ་མཛད་པ་འདིས་ཀྱང་བསྟན་པའི་རྒྱལ་མཚན་ཕྱོགས་བཅུར་བསྒྲེངས་ཤིང་། མི་མཐུན་དུས་ཀྱི་རྒུད་པ་འཇོམས་པའི་རྒྱུར་བླ་མ་རྒྱལ་བ་སྲས་བཅས་ཀྱིས་བྱིན་གྱིས་རླབས་ཏུ་གསོལ། ཤུ་བྷཾ། མངྒ་ལཾ།། །།}}
| |
| </onlyinclude>
| |
| {{TsagliCall}} | | {{TsagliCall}} |
| <headertabs/> | | <headertabs/> |
