JKCL-KABUM-08-NYA-012-047

Previous Text Back to Volume PageNext Text

མཁྱེན་ནོ་མཁྱེན་ནོ་བླ་མ་མཁྱེན་ནོ།

Wylie title	mkhyen no mkhyen no bla ma mkhyen no
Location	chos kyi blo gros bka' 'bum Volume 8, sde tshan 12, Text 47, Pages 481-483 (Folios 34a5 to 35a2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. mkhyen no mkhyen no bla ma mkhyen no. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 481-483. Bir, H.P.: Khyentse Labrang, 2012.
Genre	Vajra Songs - rdo rje'i glu
Colophon	།ཅེས་པའང་མེ་གླང་ཟླ་༦ཚེས་༢༩ལ་བླ་མ་དྲན་པས་ཐོལ་བྱུང་དུ་བྲིས་པའོ།།
	/ces pa'ang me glang zla 6tshes 29la bla ma dran pas thol byung du bris pa'o//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ མཁྱེན་ནོ་མཁྱེན་ནོ་བླ་མ་མཁྱེན་ནོ། །ཕ་ཅིག་རྫོགས་པའི་སངས་རྒྱས། །དྲན་པས་སེམས་གྱི་འཇིགས་འཕྲོག། དཔལ་ཆེན་གསང་བའི་བདག་པོ། །དགྱེས་མཛད་ཧེ་རུ་ཀ་དཔལ། །བདག་ཅག་མགོན་དུ་བྱོན་པ། །འཇམ་དབྱངས་བློ་གཏེར་དབང་པོར། །སྙིང་ནས་གསོལ་བ་འདེབས་སོ། །བདག་རྒྱུད་བྱིན་གྱིས་རང་རློབས་ཤིག། དཀོན་མཆོག་རྒྱ་མཚོའི་ངོ་བོ། །ཁམས་གསུམ་ཆོས་ཀྱི་རྒྱལ་པོ། །འགྲོ་དྲུག་ངན་སོང་གཡང་ལས། །ཐུགས་རྗེའི་ཕྱག་གི་འདྲེན་མཛད། །བླ་མ་རྡོ་རྗེ་འཆང་ཆེན། །ཁྱེད་ལ་སྙིང་ནས་གསོལ་འདེབས། །ལས་ངན་བདག་ནི་འདྲེན་མཛོད། །ཀྱི་ཧུད་བུ་ཧྲུལ་བདག་ནི། །ཕྱི་ཚུལ་ཆོས་གོས་ཟང་ཟོངས། །ནང་དུ་མི་དགེའི་བང་མཛོད། །ཁ་ནས་ཆོས་བཤད་ཝ་ལེ། །རང་རྒྱུད་ཆུ་ནང་རྡོ་བ། །བྱང་ཆུབ་སེམས་དཔའ་ཡིན་ཞེས། །རང་དོན་འབའ་ཞིག་སྒྲུབ་སྒྲུབ། །གསང་སྔགས་དབང་བསྐུར་ཐོབ་ཐོབ། །རྣམ་གྲངས་བསམ་ལས་འདས་ཀྱང་། །བསྐྱེད་རྫོགས་ཐུན་གཅིག་མི་སྒོམ། །ཐ་མལ་ཞེན་སྣང་དང་བཅས། །དམ་སྡོམ་ཆུ་ལ་ཕོ་བ། །སྐལ་ངན་བདག་འདྲའི་སེམས་ཅན། །དབུགས་ཀྱི་རྒྱུ་བ་ཆད་ཚེ། །མནར་མེད་དམྱལ་བར་ཐིབས་པོ། །འཇུག་པར་གདོན་མི་ཟ་བ། །བདག་ལ་ཐུགས་རྗེས་གཟིགས་ཤིག། ཚེ་རབས་སྔོན་ནས་འབྲེལ་ཞིང་། །དྭངས་བའི་སེམས་ཀྱིས་མཎྜལ། །ཐོག་མ་ཉིད་ནས་སྒྲིབ་བྲལ། །སྐུ་མཐོང་ཉམས་དགའ་བག་ཕེབས། །རིག་པ་དྭངས་སང་བྱེད་དེ། །གསུང་གསང་གདམས་པའི་གནད་ཀྱི། །སེམས་ཀྱི་མདུད་གྲོལ་མཁན་པོ། །སྐུ་གསུམ་རང་ཞལ་བསྟན་པའི། །ཕ་ཅིག་དྲན་ཆོག་རྒྱལ་པོ། །ཁྱེད་ལ་གསོལ་བ་འདེབས་ན། །ལས་ངན་བདག་ལ་སྐྱོབས་ཤིག། སྒོ་གསུམ་བྱ་བ་ཅི་བྱས། །རྣམ་ཀུན་དོན་ཡོད་འགྱུར་བར། །དྲན་ཆོག་ཡིད་བཞིན་ནོར་བུ། །བླ་མ་རྡོ་རྗེ་འཆང་ཁྱེད་རང་མཁྱེན་ནོ། །མཁྱེན་ནོ་མཁྱེན་ནོ་བླ་མ་མཁྱེན་ནོ། །ཅེས་པའང་མེ་གླང་ཟླ་༦ཚེས་༢༩ལ་བླ་མ་དྲན་པས་ཐོལ་བྱུང་དུ་བྲིས་པའོ།། །།

[edit]

!_mkhyen no mkhyen no bla ma mkhyen no/__/pha cig rdzogs pa'i sangs rgyas/__/dran pas sems gyi 'jigs 'phrog/__dpal chen gsang ba'i bdag po/__/dgyes mdzad he ru ka dpal/__/bdag cag mgon du byon pa/__/'jam dbyangs blo gter dbang por/__/snying nas gsol ba 'debs so/__/bdag rgyud byin gyis rang rlobs shig/__dkon mchog rgya mtsho'i ngo bo/__/khams gsum chos kyi rgyal po/__/'gro drug ngan song g.yang las/__/thugs rje'i phyag gi 'dren mdzad/__/bla ma rdo rje 'chang chen/__/khyed la snying nas gsol 'debs/__/las ngan bdag ni 'dren mdzod/__/kyi hud bu hrul bdag ni/__/phyi tshul chos gos zang zongs/__/nang du mi dge'i bang mdzod/__/kha nas chos bshad wa le/__/rang rgyud chu nang rdo ba/__/byang chub sems dpa' yin zhes/__/rang don 'ba' zhig sgrub sgrub/__/gsang sngags dbang bskur thob thob/__/rnam grangs bsam las 'das kyang /__/bskyed rdzogs thun gcig mi sgom/__/tha mal zhen snang dang bcas/__/dam sdom chu la pho ba/__/skal ngan bdag 'dra'i sems can/__/dbugs kyi rgyu ba chad tshe/__/mnar med dmyal bar thibs po/__/'jug par gdon mi za ba/__/bdag la thugs rjes gzigs shig/__tshe rabs sngon nas 'brel zhing /__/dwangs ba'i sems kyis maN+Dal/__/thog ma nyid nas sgrib bral/__/sku mthong nyams dga' bag phebs/__/rig pa dwangs sang byed de/__/gsung gsang gdams pa'i gnad kyi/__/sems kyi mdud grol mkhan po/__/sku gsum rang zhal bstan pa'i/__/pha cig dran chog rgyal po/__/khyed la gsol ba 'debs na/__/las ngan bdag la skyobs shig/__sgo gsum bya ba ci byas/__/rnam kun don yod 'gyur bar/__/dran chog yid bzhin nor bu/__/bla ma rdo rje 'chang khyed rang mkhyen no/__/mkhyen no mkhyen no bla ma mkhyen no/__/ces pa'ang me glang zla 6tshes 29la bla ma dran pas thol byung du bris pa'o//___//