JKW-KABAB-05-CA-012

Previous Text Back to Volume PageNext Text

དཔལ་བཀའ་འདུས་ཀྱི་ཕྲིན་ལས་ནར་མ་རིན་ཆེན་སྙིང་པོའི་ཟུར་འདེབས་རིན་ཆེན་ཕྲ་ཚོམ།

Wylie title	dpal bka' 'dus kyi phrin las nar ma rin chen snying po'i zur 'debs rin chen phra tshom
Location	mkhyen brtse'i bka' babs Volume 5, Text 12, Pages 193-205 (Folios 1a to 7a3)
Author	མཁའ་ཁྱབ་རྡོ་རྗེ་
Less details More details
Tertön	མཆོག་གྱུར་གླིང་པ་, འཇམ་དབྱངས་མཁྱེན་བརྩེའི་དབང་པོ་ (o rgyan gling pa, 'jam dbyangs mkhyen brtse'i dbang po)
Citation	Karmapa, 15th. dpal bka' 'dus kyi phrin las nar ma rin chen snying po'i zur 'debs rin chen phra tshom. In Rdzong sar 'jam dbyangs mkhyen brtse'i dbang po'i bka' babs, Vol. 5: 193-205. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Revelations - gter ma  ·  Supplemental Instructions - zur 'debs - zur rgyan
Cycle	དཔལ་བཀའ་འདུས་ཆོས་ཀྱི་རྒྱ་མཚོ་ (dpal bka' 'dus chos kyi rgya mtsho)
Karchag page	JKW-KABAB-Volume-05-CA-Karchag
Colophon	།ཅེས་པའང་ཉེར་མཁོའི་ཆེད་དུ་ཀརྨ་པས་སྤེལ་བ་དགེ།
	ces pa'ang nyer mkho'i ched du karma pas spel ba dge

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །དཔལ་བཀའ་འདུས་ཀྱི་ཕྲིན་ལས་ནར་མ་རིན་ཆེན་སྙིང་པོའི་ཟུར་འདེབས་རིན་ཆེན་ཕྲ་ཚོམ་ཞེས་བྱ་བ་བཞུགས་སོ།།

ཤྲཱི་ཧེ་རུ་ཀ་གུ་ར་ཝེ། གཉུག་མ་གཤིས་ཀྱི་ཧེ་རུ་ཀ །རང་རིག་ངོ་བོར་མཇལ་ཕྱག་གིས། །བཏུད་ནས་ཕྲིན་ལས་སྙིང་པོའི་གཞུང༌། །མཛེས་བྱེད་རིན་ཆེན་ཕྲ་ཚོམ་སྤེལ། །འདིར་གཏེར་ཆེན་རྒྱལ་པོ་ཨོ་རྒྱན་གླིང་པའི་ཟབ་གཏེར་གྱི་གསང་བའི་ཆ་ཤས་མཁས་གྲུབ་གཏེར་ཆེན་ཡོངས་ཀྱི་ཁྱུ་མཆོག །པདྨ་འོད་གསལ་མདོ་སྔགས་གླིང་པའི་ཡང་གཏེར་གྱི་ཆོས་སྡེ་ལས་བྱོན་པའི་རྒྱུན་གྱི་ཕྲིན་ལས་ནར་མ་རིན་ཆེན་སྙིང་པོའི་བྱང་བུ་ཉམས་སུ་ལེན་པར་འདོད་པས། ཉེར་མཁོའི་ཟུར་འདེབས་འགའ་ཞིག་སྤེལ་བ་ལ། ཐོག་མར་ཚིག་བདུན་དང། སྐུ་གསུམ་གསོལ་འདེབས་རྗེས། བརྒྱུད་པའི་གསོལ་འདེབས་གང་རུང་གི་མཐར་རོལ་མོ་བརྒྱ་བརྡུང་གིས་བྱིན་གྱིས་བརླབ། ང་རྒྱལ་བཟུང་བ་ནི། རང་ཉིད་སྐད་ཅིག་གིས་ནམ་མཁའ་ལས་སྐར་ཆེན་ཐང་ལ་ལྷག་པ་བཞིན་དུ། སྤྱི་དཔལ་ཆེན་པོ་ཁྲག་འཐུང་རྩ་བའི་ལྷ་སྐུ་མདོག་མཐིང་ནག །ཞལ་གཅིག་ཕྱག་གཉིས་པ། གར་དགུའི་གཟི་བྱིན་འབར་བ། རྡོ་རྗེ་དང་དྲིལ་བུ་བསྣོལ་སྟབས་སུ་བསྣམས་ཤིང༌། དཔལ་དང་དུར་ཁྲོད་རུས་པའི་རྒྱན་གྱིས་སྤྲས་པ། ཞབས་གཉིས་དོར་སྟབས་ཀྱིས་རུ་དྲ་ཉི་ཟླ་པདྨའི་གདན་ལ་འགྱིང་བ། དེའི་པང་དུ་སྦྱོར་ཡུལ་དམར་མོ་གྲི་ཐོད་འཛིན་ཅིང༌། ཁྲག་འཐུང་མའི་ཆ་ལུགས་ཅན་གྱིས་འཁྱུད་པའི་སྐུར་གྱུར་པར་བལྟས་ལ། བསང་ཆུའམ་ལས་བུམ་བསྒྲུབ་པ་ནི། དུང་ཞལ་ལམ་བུམ་པ་དྲི་བཟང་གི་ཆུས་བཀང་བ་རྃ་ཡྃ་ཁྃ་གིས་བསྲེག་གཏོར་བཀྲུས། སྭ་བྷཱ་ཝས་སྟོང་པར་སྦྱང༌། སྟོང་པའི་ངང་ལས་བསང་ཆུའི་སྟེང་དུའམ། ལས་བུམ་གྱི་ནང་དུ་པདྨ་དང༌། ཉི་མ་ལ་གནས་པའི་ཧཱུྃ་ཡིག་ལྗང་ནག་ཡོངས་སུ་གྱུར་པ་ལས། བཅོམ་ལྡན་འདས་བདུད་རྩི་འཁྱིལ་བ་ལྗང་ནག་གཡས་རྒྱ་གྲམ་དང༌། གཡོན་ཞགས་པ་འཛིན་པ། དཔལ་དང་དུར་ཁྲོད་ཀྱི་ཆས་ཅན། བསྐལ་མེའི་གཟི་བྱིན་འབར་ཞིང༌། ཡེ་ཤེས་ཀྱི་མེ་འོད་འཕྲོ་བའི་ཀློང་དུ་ཞབས་གཉིས་དོར་སྟབས་ཀྱིས་འགྱིང་བ། ཐུགས་ཀར་ཉི་སྟེང་ཧཱུྃ་མཐར་སྔགས་ཀྱི་ཕྲེང་བས་གཡས་སུ་བསྐོར་བ་ལ། བཟླས་པའི་རྐྱེན་གྱིས་བསྐུལ་བས། འོད་ཟེར་སྤྲོ་བསྡུས་དོན་གཉིས་བྱས་ཤིང་རྒྱལ་བའི་བྱིན་བརླབས་བསྡུས། སྔགས་ཕྲེང་དང་སྐུའི་ཆ་ཐམས་ཅད་ལས་བདུད་རྩིའི་རྒྱུན་བྱུང་བས། བདུད་རྩིའི་རྒྱ་མཚོར་འཁྱིལ་ཞིང་བདེ་བའི་འོད་ཟེར་གྱིས། ལྷ་འོད་དུ་ཞུ་ནས་འདྲེས་པས། ཟེག་མ་གང་ལ་འཐོར་བས་མི་མཐུན་པའི་ཕྱོགས་ཀུན་འཇོམས་པར་ནུས་པའི་བདུད་རྩིར་གྱུར་པར་བལྟས་ལ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཕཊ། །ཅེས་བརྒྱ་རྩ་བཟླས་པས་ནུས་ལྡན་དུ་བསྒྲུབ་ཅིང༌། གནས་ཡོ་རྣམས་ལ་བསང་གཏོར་བྱ། གཞི་གནས་ཀྱི་བདག་པོར་གཏོར་མ་བསྔོ་བ་དམིགས་བསལ་དགོས་ན། དཀར་གཏོར་གསེར་སྐྱེམས་བཅས་ལས་སྔགས་ཀྱིས་བསང༌། སྭ་བྷཱ་ཝས་སྦྱང༌། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ། གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར་པར་བསམས་ལ། ཨོཾ་ཨཱཿཧཱུྃ་ཧོ་ལན་གསུམ་གྱིས་བརླབ། བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་མགྲོན་བཀུག །སྠ་ན་པ་ཏི་ཀྵེ་ཏྲ་པ་ལཉྩ་ན་མཿསརྦ་ཏ་ཐཱ་ག་ཏེ་བྷྱོ་སོགས་ནམ་མཁའ་མཛོད་སྔགས་ལན་གསུམ་གྱིས་བསྔོས་ལ། ཧཱུྃ༔ ས་བདག་ལྷ་ཀླུ་འབྱུང་པོའི་ཚོགསཿ མཆོད་གཏོར་བཟང་པོ་འདི་བཞེས་ལ༔ ས་འདི་བདག་ལ་སྩལ་ནས་ཀྱང་༔ དགེ་ཞིང་བཀྲ་ཤིས་མཛད་དུ་གསོལ༔ ཞེས་པས་ཕྲིན་ལས་བཅོལ། བྷཱུ་མི་པ་ཏི་ས་པ་རི་ཝཱ་ར་གཙྪས་དཀར་གཏོར་གསེར་སྐྱེམས་བཅས་སྦྱིན་ལ་གཤེགས། བགེགས་གཏོར་ཤ་ཆང་གིས་བརྒྱན་པ་བཤམས་ཏེ། ཡི་གེ་གསུམ་གྱིས་སྦྱང༌། ཡིད་མཐུན་ཀྱི་སྣོད་དུ་གཏོར་མ་འདོད་པའི་ཡོན་ཏན་ལྔ་དང་ལྡན་པ། སོ་སོའི་སྤྱོད་ཡུལ་དུ་འཛད་མེད་ཀྱི་གཏེར་ཆེན་པོར་འཆར་བར་གྱུར་པར་བསམས་ལ་སྤེལ། ཨོཾ་ཨཱཿཧཱུྃ་ལན་གསུམ་གྱིས་ཟག་པ་མེད་པའི་རྫས་འཆི་སོས་ཀྱི་བདུད་རྩིར་བྱིན་གྱིས་བརླབ། ལྕགས་ཀྱུའི་ཕྱག་རྒྱ་བཅས། ཨོཾ་སརྦ་བིགྷྣཱན་ཨཱ་ཀརྵ་ཡ་ཛཿས་མགྲོན་བཀུག །སརྦ་བིགྷྣཱན་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས། ག་ག་ན་ཁཾ་གྲྀ་ཧྞེ་དཾ་བ་ལྱཱ་དི་སྭཱ་ཧཱ། ཞེས་ནམ་མཁའ་མཛོད་སྔགས་ལན་གསུམ་གྱིས་བསྔོས་ལ། ཕྲིན་ལས་ནར་མ་རིན་ཆེན་སྙིང་པོ་ནས་འབྱུང་བའི་བཀའ་བསྒོ། ཧཱུྃ༔ ང་ནི་འཁོར་འདས་སྤྱི་དཔལ་སོགས། དྲག་སྔགས་ནི། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུྃ། ཞེས་དང༌། ཧཱུྃ་བཞི་པའི་སྔགས་བརྗོད་པས་བགེགས་བསྐྲད། མཚམས་གཅོད་ནི། ཧཱུྃ༔ རྒྱལ་ཆེན་སྡེ་བཞིས་སོགས་གྱེར་མཐར། བཀའ་ནན་རྣམ་པ་བཅུས་མཚམས་བཅད་པའི་སླད་ཚོགས་བསགས་པའི་ཡུལ་གསལ་གདབ་པ་ནི། རང་གི་སྙིང་གའི་འོད་ཟེར་གྱིས་དཔལ་ཆེན་ཚོམ་བུ་ཉེར་གཅིག་གི་ལྷ་ཚོགས་ལ། ཕྱོགས་དུས་ཀྱི་རྩ་གསུམ་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱིས་བསྐོར་བ་བཛྲ་ས་མཱ་ཛཿས་སྤྱན་དྲངས། མདུན་གྱི་ནམ་མཁར་རིན་པོ་ཆེའི་སྤྲིན་ཕུང་འོད་ཟེར་གྱི་སྣང་བས་ཁྱབ་པའི་ཀློང་དུ་དགྱེས་བཞིན་བཞུགས་པར་གསལ་བཏབ་ནས། ན་མོཿ བདག་སོགས་འགྲོ་ཀུན་སོགས་ལན་གསུམ་མཐར། སླར་ཡང་སྣང་སྲིད་ཐམས་ཅད་ཁྱབ་བརྡལ་ཡེ་ཤེས་གཞིར་བཞེངས་ཀྱི་འཁོར་ལོར་བལྟས་ལ། ཧཱུྃ༔ ཕྱི་ནང་སྣོད་བཅུད་སོགས། བརྡ་སྒོ་ཕྱག་བཤགས་པ་དང༌། མཆོད་རྫས་བྱིན་བརླབ། གནས་ཡོ་བྱིན་འབེབས། དངོས་གཞི་ཏིང་ངེ་འཛིན་རྣམ་གསུམ་ནས་བརྩམས་སྤྲོ་ན་མཆོད་པ་ཟུར་འདེབས་ལྟར་བཏང༌། བསྡུ་ན་རང་གཞུང་ལྟར་དང༌། གང་ལྟར་ཡང་བསྟོད་པ་རྫོགས་ཀྱི་བར་གཞུང་མཐར་ཆགས་སུ་འདེད། ཚོགས་མཆོད་ལྟ་བུའི་སྤྱིར་བཏང་ལ་ཛབ¿་སྒོ་དབྱེ་བས་འཐུས་ཤིང༌། བསྙེན་སྒྲུབ། སྒྲུབ་མཆོད་སོགས་ཀྱི་སྐབས་ཛབ¿་ཁང་དབྱེ་དགོས་པས། བྷྲཱུྃ་བི་ཤྭ་བི་ཤུདྡྷེའི་མཐར། ཞི་ཁྲོའི་སྤྱི་སྔགས་ལ། ཕཊ་ཛཿབཏགས་པས། མདུན་བསྐྱེད་དཀྱིལ་འཁོར་གྱི་གོ་སར་མར་མེ་གཅིག་ལས་གཉིས་མཆེད་ལྟར། ཡེ་ཤེས་ཀྱི་དཀྱིལ་འཁོར་གསལ་བརྟན་འོད་ཟེར་གཟི་བརྗིད་འབར་བ། བདག་མདུན་མེ་རི་འདབ་འབྱར་གྱི་ཚུལ་དུ། སྐུ་གསུང་ཐུགས་དགྱེས་ཤིང༌། རྔམས་པའི་རོལ་གར་མཐའ་ཡས་པས་གསལ་བརྟན་དུ་བཞུགས་པར་གྱུར་པར་བསམས་ལ། ལྷ་སྐུའི་གསལ་སྣང་དང་ང་རྒྱལ། སངས་རྒྱས་ཀྱི་ཡེ་ཤེས་རིས་མེད་པའི་གདུལ་བྱའི་སྣང་ངོར་གང་འདུལ་གཟུགས་སུ་ཤར་བའི་དག་དྲན་ལ་བསླབ་ཅིང་སེམས་འཛིན། ངག་བཟླས་ཀྱི་སྐབས་སུ་བབ་པ་ན། ཧཱུྃ༔ བདག་ཉིད་སྤྱི་དཔལ་ཆེན་པོའི་ཐུགས་ཀ་རུཿསོགས། ཛབ¿་སྒོ་དབྱེ་བའི་ཏིང་འཛིན་རྩེ་གཅིག་ཏུ་བྱས་ལ། ཞི་བ་སྤྱི་དྲིལ་དང༌། སྤྱི་དཔལ་ཆེན་པོའི་སྔགས་སུམ་བརྒྱ་ནས་སྟོང་རྩའི་བར་དང༌། དཔལ་ཆེན་ཉི་ཤུ་པོར་དེའི་བཅུ་ཆ་རེ། སྤྱི་དྲིལ་ཆེན་མོ་གཙོ་སྔགས་དང་གྲངས་མཉམ་པར་བཟླ་ཞིང༌། རྒྱས་པར་སྒྲུབ་ཆེན་ལྟ་བུའི་སྐབས་སྔགས་ཚན་ཉེར་གཉིས་པོ་སོ་སོའི་མཐར། ཧཱུྃ༔ འབར་བའི་དཀྱིལ་འཁོར་སོགས་ཤྭ་ལོ་ཀའི་རྗེས་སུ། སོ་སོའི་ཛབ¿་ལ། མ་ཧཱ་པཉྩ་སོགས་བཏགས་པས་ཛབ¿་མཆོད་འབུལ། འབྲིང་པོ་ལྟར་ན། ཞི་བ་དང༌། གཙོ་བོ་སྤྱི་དཔལ་ཆེན་པོར་ཛབ¿་མཆོད་རེ་རེ་དང༌། དཔལ་ཉི་ཤུ་སྤྱིར་གཅིག །སྤྱི་དྲིལ་མཐར་གཅིག་བཅས་འབུལ། ཤིན་ཏུ་བསྡུ་ན། བཟླས་པ་ཐམས་ཅད་གྲུབ་ནས་ཛབ¿་མཆོད་འབུལ། ཚེ་སྒྲུབ་མི་སྦྱོར་ན། རཀྟས་མཆོད་བཞིན། ཧཱུྃ༔ སྐུ་གསུང་ཐུགས་ལྡན་སོགས་ཀྱིས་ང་རྒྱལ་བསྐྱེད་པའི་བསྟོད་པ་བྱ། ཚེ་སྒྲུབ་སྤྲོ་ན། ཛབ¿་མཆོད་རྗེས། རྣལ་འབྱོར་རྒྱུན་གྱི་ལས་སྦྱོར་ལས་འབྱུང་བ། ཧཱུྃ༔ སྤྱི་དཔལ་ཆེན་པོའི་ཐུགས་ཀ་སོགས་ཀྱིས་ཏིང་འཛིན་གསལ་ལ། བཟླས་པ་ཅི་ནུས་མཐར། ཚེ་འགུགས་ཕོ་ཉ་བཏང་བའི་རྗེས་སྟོང་ཚིག་ལ་འཇུག་པའམ། སྒྲུབ་ཆེན་སྐབས་ལྟ་བུར་ཆེད་ཀྱིས་སྤྲོ་ན། ཧེ་རུ་ཀ་དཔལ་ཚེ་ཡི་སོགས་གསོལ་གདབ་ནས། དབང་བླངས་བའི་མཐའ་བར་རྫོགས་པར་བཏང་ཞིང༌། ཐབས་ཤེས་ཀྱི་རྫས་ལ་རོལ་པ་ཉིན་རེ་བཞིན་བགྱིས་ན་ལེགས་པའི་ཡན་ལག་ཏུ་འགྱུར། གང་ལྟར་ཡང༌། སླར་ཛབ¿་མཆོད་དང༌། རཀྟ་ཕྱར་ཞིང༌། ཧཱུྃ༔ སྐུ་གསུང་ཐུགས་ལྡན་སོགས་ཀྱི་ང་རྒྱལ་བསྐྱེད་པས་བསྟོད་ཅིང་ཡི་གེ་བརྒྱ་པ་ལན་གསུམ་བཟླས་པས་སྔགས་ཀྱི་ནུས་པ་བརྟན་པར་བྱ། བཀའ་སྲུང་མཆོད་ཐབས་ཤིན་ཏུ་བསྡུས་པ་ལྟར། མགོན་པོ་གནམ་ལྕགས་མེ་འབར་དམ་ཅན་འདུས་པའི་བྱིན་བརླབ་ནས། བཟླས་པའི་མཐའ་བར་བཏང༌། སྐབས་འདིར་རང་ལུགས་ཀྱི་སྲུང་མའི་རྒྱུན་གཏོར་རིགས་སྤྲོ་ན་བྱ། སྐོང་ཆོག་མདོར་བསྡུས་སྦྱར་བར་འདོད་ན། གྲུབ་ཐོབ་ཐུགས་ཐིག་ལས་ཁོལ་བྱུང་ལྟ་བུ་གཏེར་ཁ་རིགས་མཐུན་ནས་བླངས་ཏེ་ཚོགས་སྐོང་གི་འགྲོས་དེ་དག་དང་བསྟུན་དགོས་པ་དང༌། སྨད་ལས་སྦྱར་ཚེ་འདོན་འགྲིགས་དེ་ཉིད་དང་བསྟུན་དགོས་པ་བཅས་སྐབས་ཐོབ་ཀྱི་དམིགས་ཕྱེད་པ་དགོས་པ་ནི་ཁྱད་པར་རོ། །དཀྱུས་ཀྱི་ངག་འདོན་ནི། ཞིང་ངམ། གཅན་གཟན་གྱི་པགས་པའི་སྟེང་ཐབས་ཤེས་ཀྱི་རྫས་ཚོགས་པར་བྱས་ལ། གཞུང་ལས། གསོལ་བ་གདབ། ཅེས་གསུངས་པས། ཚོགས་སྒྲུབ་དང༌། སྒྲུབ་མཆོད་སྐབས་ལྟ་བུ། འདུས་པ་མང་དུ་ཚོགས་པའི་ཚེ་ཚོགས་ཀྱི་ཕྲིན་ལས་གསོལ་གདབ་ནི། ལས་ཀྱི་རྡོ་རྗེས་ཕྱག་བཅས་ཐལ་མོ་སྦྱར་ཏེ། ཨེ་མ་ཧོཿ ཨེ་མ་ཧོཿ ཨེ་མ་ཧོཿ ཆོས་དབྱིངས་མཐའ་དབུས་མེད་པའི་ཕོ་བྲང་ནས༔ གང་ལ་གང་འདུལ་ཚུལ་དུ་སྐུར་སྤྲུལ་པའི༔ དུས་གསུམ་བདེ་གཤེགས་རྒྱལ་བ་སྲས་བཅས་དང་༔ བླ་མ་ཡི་དམ་དཔའ་བོ་མཁའ་འགྲོ་དང་༔ བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ལྷ༔ སྟོན་པ་རྡོ་རྗེ་རྒྱལ་པོ་རྒྱལ་ཚབ་དང་༔ རྒྱལ་ཐེབ་གཟུངས་མ་མཆེད་དང་ལྕམ་དྲལ་བཅས༔ བཀའ་སྲུང་ཆོས་སྐྱོང་ཕོ་ཉ་ལས་མཁན་ཚོགས༔ འདུས་པ་རྒྱ་མཚོར་བཅས་རྣམས་དགོངས་སུ་གསོལ༔ དེང་འདིར་བདག་ཅག་རྣལ་འབྱོར་ཚོགས་རྣམས་དང་༔ རྡོ་རྗེ་སློབ་དཔོན་གཙོ་མཛད་ཡོངས་འདུས་ནས༔ དཀྱིལ་འཁོར་ལྷ་ཚོགས་ཐུགས་དམ་བསྐང་བའི་ཕྱིར༔ འདོད་ཡོན་ལོངས་སྤྱོད་ཚོགས་ཀྱི་མཆོད་པ་འདི༔ དངོས་སུ་འབྱོར་བཤམས་ཡིད་ཀྱིས་རྣམ་སྤྲུལ་ཞིང་༔ བདག་གིས་གུས་པར་མཆོད་ཅིང་གསོལ་མཆིས་ན༔ དགྱེས་པར་སྐྱོང་ཞིང་ཐུགས་རྗེས་ལོངས་སྤྱོད་དམ༔ ཞེས་གསོལ་བ་བཏབ་ལ། སྟོན་པ་རྡོ་རྗེ་རྒྱལ་པོས་གནང་བ་སྦྱིན་པ་ནི། ཧོཿ འདུས་པ་རྒྱ་མཚོའི་ཚོགས་རྣམས་གསན་དུ་གསོལཿ དེང་གི་གནས་དུས་ཁྱད་པར་ཅན་འདི་རུཿ དཀྱིལ་འཁོར་ལྷ་ཚོགས་བཞུགས་པའི་སྤྱན་སྔ་ན༔ འབྱོར་ལྡན་ལོངས་སྤྱོད་ཚོགས་ཀྱི་མཆོད་པ་རྣམས༔ འདུས་པའི་མཆེད་དང་ལྕམ་དྲལ་ཐམས་ཅད་ཀྱིས༔ ཚོགས་གཉིས་རྫོགས་ཤིང་སྒྲིབ་གཉིས་སྦྱང་བ་དང་༔ དངོས་གྲུབ་མ་ལུས་མྱུར་དུ་ཐོབ་བྱའི་ཕྱིར༔ ཕུན་སུམ་ཚོགས་པར་བཤམས་པ་འདི་དག་ནི༔ དགྱེས་པ་ཆེན་པོས་རོལ་པར་གནང་བས་ན༔ བསྟབ་དང་འབུལ་སོགས་རོལ་པར་ད་མཛོད་ཅིག༔ ཨ་ལ་ལ་ཧོ༔ ཞེས་པས་ལན་སྦྱིན། ལས་རྡོར་གྱིས་ཕྱག་བཅས། ཚོགས་བསང་སྦྱང་བྱིན་གྱིས་བརླབ་པ་ལ་ཐུགས་གཏད་པར་ཞུ། ཞེས་གསོལ་བ་གདབ། ཕྲིན་ལས་ནར་མ་ལྟར། ཧཱུྃ༔ བདག་ཉིད་འབར་བ་སོགས་ཀྱིས་ཚོགས་རྫས་བསང་སྦྱང་བྱིན་བརླབ། སྤྱན་འདྲེན་མཐར། ཕྱག་སྔོན་འགྲོས། ཚོགས་དང་པོ་ཚོགས་ཕུད་འབུལ་བ་ལ་ཐུགས་གཏད་པར་ཞུ། ཞེས་གསོལ་མཐར། ཧཱུྃ༔ དཔལ་ཆེན་བཀའ་འདུས་སོགས་ཀྱིས་ཚོགས་ཕུད་འབུལ། ཡང་ཕྱག་བཅས། ཚོགས་བར་པ་བསྐང་བཤགས་གནང་བ་ལ་སོགས་ཞུ། ཧོཿ དཔལ་ཆེན་ལྷ་ཚོགས་སོགས་ཀྱིས་ཚོགས་བར་པ་ཕུལ། ཡང་ཕྱག་བཅས། ཚོགས་ཐ་མ་བསྒྲལ་མཆོད་གནང་བ་ལ་སོགས་ཞུ་བ་སྔོན་འགྲོས། འགུགས་པ་ནི། གཡབ་དྲིལ་ལྕགས་ཀྱུའི་ཕྱག་རྒྱ་བཅས། ན་མོ་དགོངས་བརྡ་སྙན་བརྒྱུད་བླ་མའི་ཚོགས༔ ཡི་དམ་བདེ་གཤེགས་དཔལ་ཆེན་བཀའ་འདུས་ལྷ༔ སངས་རྒྱས་ཆོས་དང་དགེ་འདུན་འདུས་པའི་ཚོགས༔ མཁའ་འགྲོ་དམ་ཅན་སྲུང་མ་རྒྱ་མཚོ་དང་༔ ལྷ་སྔགས་ཏིང་འཛིན་རྒྱུ་འབྲས་བསླུ་བ་མེད༔ ཆོས་ཉིད་རྣམ་པར་དག་པའི་བདེན་པ་ཡིས༔ བསྒྲལ་བའི་ཞིང་བཅུར་གྱུར་པའི་དམ་སྲིའི་ཚོགས༔ ད་ལྟ་ཉིད་དུ་གཟུགས་བྱང་འདི་ལ་ཁུག༔ ཅེས་རྩ་བའི་ཐུགས་སྒྲུབ་དགོངས་པ་ཀུན་འདུས་ཀྱི་སྒྲུབ་ཁོག་ནས་འབྱུང་བ་བརྗོད་པའི་མཐར། སྤྱི་དྲིལ་གྱི་ཤམ་བུར། ནྲྀ་ཡཾ་ཛཿ ནྲྀ་བཛྲ་ཨཾ་ཀུ་ཤཱ་ཛཿ ཏྲི་ཡཾ་ཛཿ ཏྲི་བཛྲ་ཨཾ་ཀུ་ཤཱ་ཛཿས་གཟུགས་ལ་བཀུག །ཕོ་ཉ་འགྱེད་པ་ནི། ཧཱུྃ༔ འབར་བའི་ཕོ་ཉ་སོགས་ནས། བསྒྲལ་བསྟབ་རྗེས། བསྐང་རྫས་ནམ་མཁའ་མཛོད་སྔགས་ལན་གསུམ་བརྗོད་པས་བྱིན་གྱིས་བརླབ། ཨོཾ་བཛྲ་སྥ་ར་ཎ་ཁྃ་གིས་སྤེལ་ལ། ཧཱུྃ༔ ཆོས་ཀྱི་དབྱིངས་ལ་སོགས་བསྐང་བསྡུས་རིན་ཆེན་སིལ་མ་བཤགས་པ་བཅས་ཀྱི་མཐར། ཧཱུྃ༔ ཡེ་ཤེས་ལས་གྲུབ་སོགས་བཀའ་སྲུང་མཆོད་ཐབས་ལས་འབྱུང་བའི་སྲུང་མའི་སྒེར་སྐོང་བཤགས་པའི་མཐའ་བར་བཏང༌། ཧཱུྃ༔ བསྐལ་པ་མེ་ལྟར་སོགས་ཕྲིན་ལས་བཞིན། སིདྡྷི་ཧཱུྃ། བར་གྱིས་བསྒྲལ་མཐའ་དངོས་གྲུབ་གསོལ། ཧོཿ ཚོམ་བུ་ཉེར་གཅིག་སོགས་ཀྱིས་ཚོགས་ཀྱི་དངོས་གྲུབ་ཞུས་མཐར། ལས་རྡོར་རྣམས་ནས་ཐབས་ཤེས་ཀྱི་རྫས་བཏེགས་ཏེ། གཟིགས་ཤིག་མཛེས་ལྡན་སོགས་ཀྱིས་དྲངས། ལེན་པ་པོས། ཨ་ལ་ལ་ཧོཿབརྗོད། དཔོན་སློབ་ཀུན་གྱིས། རིན་ཐང་མེད་ལས་སོགས་ཀྱིས་བླངས། ཧོཿ ཕུང་ཁམས་སྐྱེ་མཆེད་ཞི་ཁྲོ་རབ་འབྱམས་ལྷ༔ རྩ་ཁམས་བརྒྱུད་གསུམ་རིག་འཛིན་དྷཱ་ཀིའི་ཚོགས༔ དགྱེས་མཆོད་རྡོ་རྗེ་བདེ་བའི་ཚོགས་ལ་རོལ༔ བསོད་ནམས་ཡེ་ཤེས་ཚོགས་གཉིས་ཡོངས་རྫོགས་ཤོག༔ མ་ཧཱ་པཱུ་ཛ་ཨ་ལ་ལ་ཧོཿ ནང་གི་སྲེག་བླུག་གི་རྣལ་འབྱོར་དང་ལྡན་པས་ལོངས་སྤྱོད་ཅིང༌། གསོལ་འདེབས་སྨོན་ལམ་གྱི་རིམ་པ་ཇི་ལྟར་འདོད་པ་སྦྱར། དཀྱིལ་འཁོར་པའི་ཕུད་ལྷག་སྟེགས་ཟུར་པར་ཞིང་ལྤགས་བཏིང་བའི་ཁར་མེ་ཏོག་སོགས་ཉེར་སྤྱོད་ལྔས་བསྐོར་བཤམས་གྱི་དབུས་སུ་མཉྫིའི་སྟེང་དང་འོག་ཏུ་འདུས་པ་རྣམས་ཀྱི་ཚོགས་ལྷག་སློབ་དཔོན་གྱི་ལྷག་མས་མནན་པ་བཀོད། གཙང་ལྷག་བདུད་རྩིས་བྲན་ལ། ཨོཾ་ཨཱཿཧཱུྃ༔ རིགས་ཀྱི་ལྷ་མོ་སོགས་ཀྱིས་གཙང་ལྷག་མཆོད་གཏོར་དུ་བསྟབ་པའི་རས་མ་སྔར་གྱི་ཤུལ་དུ་བཀོད་ཅིང་བདུད་རྩིས་བྲན་ལ། བྷྱོཿ ཀེ་སེང་ཕྲ་མེན་སོགས་བརྗོད་མཐར། གཙང་ལྷག་གི་རས་མ་དེ་མང་ལྷག་ཏུ་ཕྱིར་བསྲེས། ཕྱག་བཅས། ལྷག་གཏོར་བྱིན་གྱིས་བརླབ་ཅིང་བསྔོ་བ་ལ་ཐུགས་གཏད་པ་སོགས་ཞུ་བ་སྔོན་འགྲོས། སློབ་དཔོན་གྱིས་མཁའ་དབྱིངས་ཀྱི་རྒྱས་བཀབ་པར། ཞལ་ཆབ་ཚུལ་དུ་བདུད་རྩིས་བྲན་བཞིན། ཨོཾ་སརྦ་པཉྩ་ཨ་མྲྀ་ཏ་ཧཱུྃ་ཧ་ཧོཿཧྲཱིཿ ལྷག་མའི་དམ་རྫས་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་གྱུར་པར་བསམ་པས་བརླབ་ཅིང་སྤེལ། བཤུག་པའི་བརྡ་དང་འབར་བའི་རྒྱས་ཨེ་ཨ་རལླི་ཧྲཱིཾ་ཧྲཱིཾ་བརྗོད་པས་མགྲོན་བཀུག །ཨོཾ་བཛྲ་པུཥྤེ་དྷུ་པེ་ནས། ཤབྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད། ཧཱུྃ༔བྷྱོ༔ དང་པོ་ཕུད་ཀྱིས་སོགས་དམར་ལམ་གྱིས་ཕྱེ་སྟེ་ལྷག་མ་བཏང༌། གོང་གི་ཧཱུྃ་ཧཱུྃཿ ནམ་མཁའི་མཁའ་དང་སོགས་ནས། དུས་ལ་བབ་པོ་ས་མ་ཡཿ བར་གྱིས་དཀྱིལ་འཁོར་ཡོངས་རྫོགས་དང༌། ཧཱུྃ༔ ཕུད་ཀྱིས་གསོལ་ལོ་སོགས་བཀའ་སྲུང་མཆོད་ཐབས་མཇུག་གི་སྲུང་མའི་བསྐུལ་བཅས་བཏང༌། ཧཱུྃ་བྷྱོ༔ སྔོན་ཚེ་འདས་དུས་སོགས་ཀྱི་ཆད་ཐོ་བསྒྲག །གཏོར་ཟོར་དམིགས་བསལ་ལ་མ་གཏོགས་རྒྱུན་དུ་མི་དགོས་པས། བྷྱོ༔ བོད་ཁམས་སོགས་བརྟན་མ་ནས། རྟ་བྲོའི་མཐར། རྗེས་ཀྱི་མཆོད་པ་ནི། ཧཱུྃ༔ བླ་མེད་མཆོག་གི་མཆོད་པ་དམ་པ་ནི༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡིས་རབ་བརྒྱན་ཏེ༔ དམ་ཚིག་བཞིན་ལས་ཅི་བདེར་བཞེས་སུ་གསོལ༔ ཨོཾ་ཤྲཱི་བཛྲ་རཱ་ག་ནཱིརྟི་ཧོཿ ཨོཾ་ཤྲཱི་བཛྲ་རཱ་ག་པུཥྤེ་དྷུ་པེ་ཨཱ་ལོ་ཀེ་གནྡྷེ་ནི་བིདྱ་ཤབྡ་སརྦ་པཱུ་ཛ་ཧཱུྃ༔ ཨོཾ་ཤྲཱི་བཛྲ་རཱ་ག་མ་ཧཱ་ཛྙཱ་ན་ཧོཿ ཨོཾ་ཤྲཱི་བཛྲ་རཱ་ག་ས་མནྟ་པཱུ་ཛ་ཧོཿ མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧིཿ སྟ་ན་ག་ཎ་མ་ཧཱ་སུ་ཁ་དྷཱ་ཏུ་ཨ་ཨཿ བསྟོད་པ་ནི། ཧཱུྃ༔ ཞི་ཁྲོའི་སྐུ་ནི་གང་འདུལ་ཉམས་དང་ལྡན༔ རྡོ་རྗེ་དགྱེས་པ་སྔགས་ཀྱི་རང་སྒྲ་ཅན༔ ཡེ་ཤེས་ཀློང་ལས་ཡོན་ཏན་ཕྲིན་ལས་རྫོགས༔ དཔལ་ཆེན་བཀའ་འདུས་དཀྱིལ་འཁོར་ལྷ་ལ་བསྟོད༔ རྒྱུན་གྱི་དངོས་གྲུབ་བླང་བ་ནི། ཨོཾ་ཨཱཿཧཱུྃ༔ དཔལ་ཆེན་ཞི་ཁྲོ་རྡོ་རྗེའི་གཡར་དམ་ཅན༔ བསྙེན་སྒྲུབ་འབྲས་བུ་དུས་འདིར་སྩལ་ནས་ཀྱང་༔ ཐུན་མོང་མཆོག་གི་དངོས་གྲུབ་བླ་མེད་པས༔ སྐུ་གསུང་ཐུགས་དང་དབྱེར་མེད་མཛད་དུ་གསོལ༔ སྤྱི་དྲིལ་ཤམ་བུར། ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཧཱུྃ༔ ཞེས་བརྗོད་ཅིང་བདུད་རྩི་རོལ། ནོངས་བཤགས་ནི། མ་རྙེད་ཡོངས་སུ་མ་ཚང་དང༌། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། ཞེས་དང༌། ཡིག་བརྒྱ་བཟླ། ཚོགས་མགྲོན་རྟེན་ཡོད་ན་བརྟན་བཞུགས་དང༌། མེད་ན་གཤེགས་གསོལ་སྤྱི་ལྟར་བྱ། གང་ལྟར་ཡང༌། དམ་ཚིག་པ་རང་ལ་བསྡུས་ནས། བདག་བསྐྱེད་འོད་གསལ་དུ་བསྡུ་བ་ནི། ཧཱུྃ་སརྦ་མཎྜལ་སོགས་ཕྲིན་ལས་ལྟར་བརྗོད་ཅིང་མཉམ་པར་བཞག །ཟུང་འཇུག་གི་སྐུར་ལྡང་བ་ནི། སླར་ཡང་འགགས་མེད་རིག་རྩལ་དཔལ་ཆེན་པོའི༔ སྐུ་གསུང་ཐུགས་ཀྱི་རྡོ་རྗེའི་རང་བཞིན་གྱུར༔ མ་ཧཱ་ཤྲཱི་ཧེ་རུ་ཀ་ཨཱཏྨ་ཀོ྅ཧཾཿ ཞེས་ང་རྒྱལ་བཟུང༌། དགེ་རྩ་བསྔོ་བ་ནི། དགེ་བ་འདི་ཡིས་མཐའ་ཡས་སེམས་ཅན་རྣམས༔ ཕྱི་ནང་བདུད་བཞིའི་གཡུལ་ལས་རྣམ་པར་རྒྱལ༔ བསྐྱེད་རྫོགས་ལམ་གྱི་རིམ་པ་མཐར་ཕྱིན་ནས༔ སྤྱི་དཔལ་ཆེན་པོའི་གོ་འཕང་མྱུར་ཐོབ་ཤོག༔ སྨོན་ལམ་གདབ་པ་ནི། ཧོཿ ཕྱོགས་དུས་རྩ་བརྒྱུད་སོགས་དྲི་མེད་ཀུན་དགའི་ཟབ་གཏེར་ལས་ཕྱུངས་བ་ཟུར་གསལ་ལྟར་དང༌། བཀྲ་ཤིས་བརྗོད་པ་ནི། ཨོཾཿ ཕུན་སུམ་ཚོགས་པ་སོགས་ཟུར་གསལ་ལྟར་སྦྱར་བས་འགྲུབ་བོ། །ཅེས་པའང་ཉེར་མཁོའི་ཆེད་དུ་ཀརྨ་པས་སྤེལ་བ་དགེ། །།

[edit]

@#/__/dpal bka' 'dus kyi phrin las nar ma rin chen snying po'i zur 'debs rin chen phra tshom zhes bya ba bzhugs so//__shrI he ru ka gu ra we/__gnyug ma gshis kyi he ru ka__/rang rig ngo bor mjal phyag gis/__/btud nas phrin las snying po'i gzhung*/__/mdzes byed rin chen phra tshom spel/__/'dir gter chen rgyal po o rgyan gling pa'i zab gter gyi gsang ba'i cha shas mkhas grub gter chen yongs kyi khyu mchog__/pad+ma 'od gsal mdo sngags gling pa'i yang gter gyi chos sde las byon pa'i rgyun gyi phrin las nar ma rin chen snying po'i byang bu nyams su len par 'dod pas/__nyer mkho'i zur 'debs 'ga' zhig spel ba la/__thog mar tshig bdun dang/__sku gsum gsol 'debs rjes/__brgyud pa'i gsol 'debs gang rung gi mthar rol mo brgya brdung gis byin gyis brlab/__nga rgyal bzung ba ni/__rang nyid skad cig gis nam mkha' las skar chen thang la lhag pa bzhin du/__spyi dpal chen po khrag 'thung rtsa ba'i lha sku mdog mthing nag__/zhal gcig phyag gnyis pa/__gar dgu'i gzi byin 'bar ba/__rdo rje dang dril bu bsnol stabs su bsnams shing*/__dpal dang dur khrod rus pa'i rgyan gyis spras pa/__zhabs gnyis dor stabs kyis ru dra nyi zla pad+ma'i gdan la 'gying ba/__de'i pang du sbyor yul dmar mo gri thod 'dzin cing*/__khrag 'thung ma'i cha lugs can gyis 'khyud pa'i skur gyur par bltas la/__bsang chu'am las bum bsgrub pa ni/__dung zhal lam bum pa dri bzang gi chus bkang ba ra~M ya~M kha~M gis bsreg gtor bkrus/__swa b+hA was stong par sbyang*/__stong pa'i ngang las bsang chu'i steng du'am/__las bum gyi nang du pad+ma dang*/__nyi ma la gnas pa'i hU~M yig ljang nag yongs su gyur pa las/__bcom ldan 'das bdud rtsi 'khyil ba ljang nag g.yas rgya gram dang*/__g.yon zhags pa 'dzin pa/__dpal dang dur khrod kyi chas can/__bskal me'i gzi byin 'bar zhing*/__ye shes kyi me 'od 'phro ba'i klong du zhabs gnyis dor stabs kyis 'gying ba/__thugs kar nyi steng hU~M mthar sngags kyi phreng bas g.yas su bskor ba la/__bzlas pa'i rkyen gyis bskul bas/__'od zer spro bsdus don gnyis byas shing rgyal ba'i byin brlabs bsdus/__sngags phreng dang sku'i cha thams cad las bdud rtsi'i rgyun byung bas/__bdud rtsi'i rgya mtshor 'khyil zhing bde ba'i 'od zer gyis/__lha 'od du zhu nas 'dres pas/__zeg ma gang la 'thor bas mi mthun pa'i phyogs kun 'joms par nus pa'i bdud rtsir gyur par bltas la/__oM badz+ra kro d+ha a mr-i ta kuN+Da lI hU~M phaT/__/ces brgya rtsa bzlas pas nus ldan du bsgrub cing*/__gnas yo rnams la bsang gtor bya/__gzhi gnas kyi bdag por gtor ma bsngo ba dmigs bsal dgos na/__dkar gtor gser skyems bcas las sngags kyis bsang*/__swa b+hA was sbyang*/__stong pa'i ngang las b+h+rU~M las rin po che'i snod zab cing rgya che ba'i nang du/__gtor ma kha dog dri ro nus pa phun sum tshogs par gyur par bsams la/__oM AHhU~M ho lan gsum gyis brlab/__b+hU mi pa ti sa pa ri wA ra badz+ra sa mA dzaHsa mgron bkug__/s+tha na pa ti k+She tra pa lany+tsa na maHsarba ta thA ga te b+h+yo sogs nam mkha' mdzod sngags lan gsum gyis bsngos la/__hU~M:__sa bdag lha klu 'byung po'i tshogasaH__mchod gtor bzang po 'di bzhes la:__sa 'di bdag la stsal nas kyang :__dge zhing bkra shis mdzad du gsol:__zhes pas phrin las bcol/__b+hU mi pa ti sa pa ri wA ra gats+tshas dkar gtor gser skyems bcas sbyin la gshegs/__bgegs gtor sha chang gis brgyan pa bshams te/__yi ge gsum gyis sbyang*/__yid mthun kyi snod du gtor ma 'dod pa'i yon tan lnga dang ldan pa/__so so'i spyod yul du 'dzad med kyi gter chen por 'char bar gyur par bsams la spel/__oM AHhU~M lan gsum gyis zag pa med pa'i rdzas 'chi sos kyi bdud rtsir byin gyis brlab/__lcags kyu'i phyag rgya bcas/__oM sarba big+h+nAn A kar+Sha ya dzaHsa mgron bkug__/sarba big+h+nAn na maHsarba ta thA ga ta b+h+yo bi shwa sogs/__ga ga na khaM gr-i h+Ne daM ba l+yA di swA hA/__zhes nam mkha' mdzod sngags lan gsum gyis bsngos la/__phrin las nar ma rin chen snying po nas 'byung ba'i bka' bsgo/__hU~M:__nga ni 'khor 'das spyi dpal sogs/__drag sngags ni/__hU~M hU~M hU~M bi shwa badz+ra kro d+ha dz+wa la maN+Dal phaT phaT phaT ha la ha la ha la hU~M/__zhes dang*/__hU~M bzhi pa'i sngags brjod pas bgegs bskrad/__mtshams gcod ni/__hU~M:__rgyal chen sde bzhis sogs gyer mthar/__bka' nan rnam pa bcus mtshams bcad pa'i slad tshogs bsags pa'i yul gsal gdab pa ni/__rang gi snying ga'i 'od zer gyis dpal chen tshom bu nyer gcig gi lha tshogs la/__phyogs dus kyi rtsa gsum srung ma ye shes kyi spyan dang ldan pa rnams kyis bskor ba badz+ra sa mA dzaHsa spyan drangs/__mdun gyi nam mkhar rin po che'i sprin phung 'od zer gyi snang bas khyab pa'i klong du dgyes bzhin bzhugs par gsal btab nas/__na moH__bdag sogs 'gro kun sogs lan gsum mthar/__slar yang snang srid thams cad khyab brdal ye shes gzhir bzhengs kyi 'khor lor bltas la/__hU~M:__phyi nang snod bcud sogs/__brda sgo phyag bshags pa dang*/__mchod rdzas byin brlab/__gnas yo byin 'bebs/__dngos gzhi ting nge 'dzin rnam gsum nas brtsams spro na mchod pa zur 'debs ltar btang*/__bsdu na rang gzhung ltar dang*/__gang ltar yang bstod pa rdzogs kyi bar gzhung mthar chags su 'ded/__tshogs mchod lta bu'i spyir btang la dzab[¿] sgo dbye bas 'thus shing*/__bsnyen sgrub/__sgrub mchod sogs kyi skabs dzab[¿] khang dbye dgos pas/__b+h+rU~M bi shwa bi shud+d+he'i mthar/__zhi khro'i spyi sngags la/__phaT dzaHbtags pas/__mdun bskyed dkyil 'khor gyi go sar mar me gcig las gnyis mched ltar/__ye shes kyi dkyil 'khor gsal brtan 'od zer gzi brjid 'bar ba/__bdag mdun me ri 'dab 'byar gyi tshul du/__sku gsung thugs dgyes shing*/__rngams pa'i rol gar mtha' yas pas gsal brtan du bzhugs par gyur par bsams la/__lha sku'i gsal snang dang nga rgyal/__sangs rgyas kyi ye shes ris med pa'i gdul bya'i snang ngor gang 'dul gzugs su shar ba'i dag dran la bslab cing sems 'dzin/__ngag bzlas kyi skabs su bab pa na/__hU~M:__bdag nyid spyi dpal chen po'i thugs ka ruHsogs/__dzab[¿] sgo dbye ba'i ting 'dzin rtse gcig tu byas la/__zhi ba spyi dril dang*/__spyi dpal chen po'i sngags sum brgya nas stong rtsa'i bar dang*/__dpal chen nyi shu por de'i bcu cha re/__spyi dril chen mo gtso sngags dang grangs mnyam par bzla zhing*/__rgyas par sgrub chen lta bu'i skabs sngags tshan nyer gnyis po so so'i mthar/__hU~M:__'bar ba'i dkyil 'khor sogs shwa lo ka'i rjes su/__so so'i dzab[¿] la/__ma hA pany+tsa sogs btags pas dzab[¿] mchod 'bul/__'bring po ltar na/__zhi ba dang*/__gtso bo spyi dpal chen por dzab[¿] mchod re re dang*/__dpal nyi shu spyir gcig__/spyi dril mthar gcig bcas 'bul/__shin tu bsdu na/__bzlas pa thams cad grub nas dzab[¿] mchod 'bul/__tshe sgrub mi sbyor na/__rak+tas mchod bzhin/__hU~M:__sku gsung thugs ldan sogs kyis nga rgyal bskyed pa'i bstod pa bya/__tshe sgrub spro na/__dzab[¿] mchod rjes/__rnal 'byor rgyun gyi las sbyor las 'byung ba/__hU~M:__spyi dpal chen po'i thugs ka sogs kyis ting 'dzin gsal la/__bzlas pa ci nus mthar/__tshe 'gugs pho nya btang ba'i rjes stong tshig la 'jug pa'am/__sgrub chen skabs lta bur ched kyis spro na/__he ru ka dpal tshe yi sogs gsol gdab nas/__dbang blangs ba'i mtha' bar rdzogs par btang zhing*/__thabs shes kyi rdzas la rol pa nyin re bzhin bgyis na legs pa'i yan lag tu 'gyur/__gang ltar yang*/__slar dzab[¿] mchod dang*/__rak+ta phyar zhing*/__hU~M:__sku gsung thugs ldan sogs kyi nga rgyal bskyed pas bstod cing yi ge brgya pa lan gsum bzlas pas sngags kyi nus pa brtan par bya/__bka' srung mchod thabs shin tu bsdus pa ltar/__mgon po gnam lcags me 'bar dam can 'dus pa'i byin brlab nas/__bzlas pa'i mtha' bar btang*/__skabs 'dir rang lugs kyi srung ma'i rgyun gtor rigs spro na bya/__skong chog mdor bsdus sbyar bar 'dod na/__grub thob thugs thig las khol byung lta bu gter kha rigs mthun nas blangs te tshogs skong gi 'gros de dag dang bstun dgos pa dang*/__smad las sbyar tshe 'don 'grigs de nyid dang bstun dgos pa bcas skabs thob kyi dmigs phyed pa dgos pa ni khyad par ro/__/dkyus kyi ngag 'don ni/__zhing ngam/__gcan gzan gyi pags pa'i steng thabs shes kyi rdzas tshogs par byas la/__gzhung las/__gsol ba gdab/__ces gsungs pas/__tshogs sgrub dang*/__sgrub mchod skabs lta bu/__'dus pa mang du tshogs pa'i tshe tshogs kyi phrin las gsol gdab ni/__las kyi rdo rjes phyag bcas thal mo sbyar te/__e ma hoH__e ma hoH__e ma hoH__chos dbyings mtha' dbus med pa'i pho brang nas:__gang la gang 'dul tshul du skur sprul pa'i:__dus gsum bde gshegs rgyal ba sras bcas dang :__bla ma yi dam dpa' bo mkha' 'gro dang :__bka' 'dus chos kyi rgya mtsho'i dkyil 'khor lha:__ston pa rdo rje rgyal po rgyal tshab dang :__rgyal theb gzungs ma mched dang lcam dral bcas:__bka' srung chos skyong pho nya las mkhan tshogs:__'dus pa rgya mtshor bcas rnams dgongs su gsol:__deng 'dir bdag cag rnal 'byor tshogs rnams dang :__rdo rje slob dpon gtso mdzad yongs 'dus nas:__dkyil 'khor lha tshogs thugs dam bskang ba'i phyir:__'dod yon longs spyod tshogs kyi mchod pa 'di:__dngos su 'byor bshams yid kyis rnam sprul zhing :__bdag gis gus par mchod cing gsol mchis na:__dgyes par skyong zhing thugs rjes longs spyod dam:__zhes gsol ba btab la/__ston pa rdo rje rgyal pos gnang ba sbyin pa ni/__hoH__'dus pa rgya mtsho'i tshogs rnams gsan du gsolaH__deng gi gnas dus khyad par can 'di ruH__dkyil 'khor lha tshogs bzhugs pa'i spyan snga na:__'byor ldan longs spyod tshogs kyi mchod pa rnams:__'dus pa'i mched dang lcam dral thams cad kyis:__tshogs gnyis rdzogs shing sgrib gnyis sbyang ba dang :__dngos grub ma lus myur du thob bya'i phyir:__phun sum tshogs par bshams pa 'di dag ni:__dgyes pa chen pos rol par gnang bas na:__bstab dang 'bul sogs rol par da mdzod cig:__a la la ho:__zhes pas lan sbyin/__las rdor gyis phyag bcas/__tshogs bsang sbyang byin gyis brlab pa la thugs gtad par zhu/__zhes gsol ba gdab/__phrin las nar ma ltar/__hU~M:__bdag nyid 'bar ba sogs kyis tshogs rdzas bsang sbyang byin brlab/__spyan 'dren mthar/__phyag sngon 'gros/__tshogs dang po tshogs phud 'bul ba la thugs gtad par zhu/__zhes gsol mthar/__hU~M:__dpal chen bka' 'dus sogs kyis tshogs phud 'bul/__yang phyag bcas/__tshogs bar pa bskang bshags gnang ba la sogs zhu/__hoH__dpal chen lha tshogs sogs kyis tshogs bar pa phul/__yang phyag bcas/__tshogs tha ma bsgral mchod gnang ba la sogs zhu ba sngon 'gros/__'gugs pa ni/__g.yab dril lcags kyu'i phyag rgya bcas/__na mo dgongs brda snyan brgyud bla ma'i tshogs:__yi dam bde gshegs dpal chen bka' 'dus lha:__sangs rgyas chos dang dge 'dun 'dus pa'i tshogs:__mkha' 'gro dam can srung ma rgya mtsho dang :__lha sngags ting 'dzin rgyu 'bras bslu ba med:__chos nyid rnam par dag pa'i bden pa yis:__bsgral ba'i zhing bcur gyur pa'i dam sri'i tshogs:__da lta nyid du gzugs byang 'di la khug:__ces rtsa ba'i thugs sgrub dgongs pa kun 'dus kyi sgrub khog nas 'byung ba brjod pa'i mthar/__spyi dril gyi sham bur/__nr-i yaM dzaH__nr-i badz+ra aM ku shA dzaH__tri yaM dzaH__tri badz+ra aM ku shA dzaHsa gzugs la bkug__/pho nya 'gyed pa ni/__hU~M:__'bar ba'i pho nya sogs nas/__bsgral bstab rjes/__bskang rdzas nam mkha' mdzod sngags lan gsum brjod pas byin gyis brlab/__oM badz+ra s+pha ra Na kha~M gis spel la/__hU~M:__chos kyi dbyings la sogs bskang bsdus rin chen sil ma bshags pa bcas kyi mthar/__hU~M:__ye shes las grub sogs bka' srung mchod thabs las 'byung ba'i srung ma'i sger skong bshags pa'i mtha' bar btang*/__hU~M:__bskal pa me ltar sogs phrin las bzhin/__sid+d+hi hU~M/__bar gyis bsgral mtha' dngos grub gsol/__hoH__tshom bu nyer gcig sogs kyis tshogs kyi dngos grub zhus mthar/__las rdor rnams nas thabs shes kyi rdzas btegs te/__gzigs shig mdzes ldan sogs kyis drangs/__len pa pos/__a la la hoHbrjod/__dpon slob kun gyis/__rin thang med las sogs kyis blangs/__hoH__phung khams skye mched zhi khro rab 'byams lha:__rtsa khams brgyud gsum rig 'dzin d+hA ki'i tshogs:__dgyes mchod rdo rje bde ba'i tshogs la rol:__bsod nams ye shes tshogs gnyis yongs rdzogs shog:__ma hA pU dza a la la hoH__nang gi sreg blug gi rnal 'byor dang ldan pas longs spyod cing*/__gsol 'debs smon lam gyi rim pa ji ltar 'dod pa sbyar/__dkyil 'khor pa'i phud lhag stegs zur par zhing lpags bting ba'i khar me tog sogs nyer spyod lngas bskor bshams gyi dbus su many+dzi'i steng dang 'og tu 'dus pa rnams kyi tshogs lhag slob dpon gyi lhag mas mnan pa bkod/__gtsang lhag bdud rtsis bran la/__oM AHhU~M:__rigs kyi lha mo sogs kyis gtsang lhag mchod gtor du bstab pa'i ras ma sngar gyi shul du bkod cing bdud rtsis bran la/__b+h+yoH__ke seng phra men sogs brjod mthar/__gtsang lhag gi ras ma de mang lhag tu phyir bsres/__phyag bcas/_lhag gtor byin gyis brlab cing bsngo ba la thugs gtad pa sogs zhu ba sngon 'gros/__slob dpon gyis mkha' dbyings kyi rgyas bkab par/__zhal chab tshul du bdud rtsis bran bzhin/__oM sarba pany+tsa a mr-i ta hU~M ha hoHhrIH__lhag ma'i dam rdzas 'dod yon gyi phung po zad mi shes pas nam mkha' gang bar gyur par bsam pas brlab cing spel/__bshug pa'i brda dang 'bar ba'i rgyas e a ral+li hrIM hrIM brjod pas mgron bkug__/oM badz+ra puSh+pe d+hu pe nas/__shab+da pra tIts+tsha swA hA'i bar gyis mchod/__hU~M:b+h+yo:__dang po phud kyis sogs dmar lam gyis phye ste lhag ma btang*/__gong gi hU~M hU~MH__nam mkha'i mkha' dang sogs nas/__dus la bab po sa ma yaH__bar gyis dkyil 'khor yongs rdzogs dang*/__hU~M:__phud kyis gsol lo sogs bka' srung mchod thabs mjug gi srung ma'i bskul bcas btang*/__hU~M b+h+yo:__sngon tshe 'das dus sogs kyi chad tho bsgrag__/gtor zor dmigs bsal la ma gtogs rgyun du mi dgos pas/__b+h+yo:__bod khams sogs brtan ma nas/__rta bro'i mthar/__rjes kyi mchod pa ni/__hU~M:__bla med mchog gi mchod pa dam pa ni:__ye shes lnga yi 'od zer rnam par 'phro:__'dod pa'i yon tan lnga yis rab brgyan te:__dam tshig bzhin las ci bder bzhes su gsol:__oM shrI badz+ra rA ga nIrti hoH__oM shrI badz+ra rA ga puSh+pe d+hu pe A lo ke gan+d+he ni bid+ya shab+da sarba pU dza hU~M:__oM shrI badz+ra rA ga ma hA dz+nyA na hoH__oM shrI badz+ra rA ga sa man+ta pU dza hoH__ma hA pany+tsa a mr-i ta rak+ta ba liM ta khA hiH__sta na ga Na ma hA su kha d+hA tu a aH__bstod pa ni/__hU~M:__zhi khro'i sku ni gang 'dul nyams dang ldan:__rdo rje dgyes pa sngags kyi rang sgra can:__ye shes klong las yon tan phrin las rdzogs:__dpal chen bka' 'dus dkyil 'khor lha la bstod:__rgyun gyi dngos grub blang ba ni/__oM AHhU~M:__dpal chen zhi khro rdo rje'i g.yar dam can:__bsnyen sgrub 'bras bu dus 'dir stsal nas kyang :__thun mong mchog gi dngos grub bla med pas:__sku gsung thugs dang dbyer med mdzad du gsol:__spyi dril sham bur/__kA ya wA ka tsit+ta sarba sid+d+hi pha la hU~M hU~M:__zhes brjod cing bdud rtsi rol/__nongs bshags ni/__ma rnyed yongs su ma tshang dang*/__/gang yang nus pa ma mchis pas/__/'dir ni bgyi ba gang nongs pa/__/de kun khyod kyis bzod mdzad rigs/__zhes dang*/__yig brgya bzla/__tshogs mgron rten yod na brtan bzhugs dang*/__med na gshegs gsol spyi ltar bya/__gang ltar yang*/__dam tshig pa rang la bsdus nas/__bdag bskyed 'od gsal du bsdu ba ni/__hU~M sarba maN+Dal sogs phrin las ltar brjod cing mnyam par bzhag__/zung 'jug gi skur ldang ba ni/__slar yang 'gags med rig rtsal dpal chen po'i:__sku gsung thugs kyi rdo rje'i rang bzhin gyur:__ma hA shrI he ru ka At+ma ko\u0f85haMH__zhes nga rgyal bzung*/__dge rtsa bsngo ba ni/__dge ba 'di yis mtha' yas sems can rnams:__phyi nang bdud bzhi'i g.yul las rnam par rgyal:__bskyed rdzogs lam gyi rim pa mthar phyin nas:__spyi dpal chen po'i go 'phang myur thob shog:__smon lam gdab pa ni/__hoH__phyogs dus rtsa brgyud sogs dri med kun dga'i zab gter las phyungs ba zur gsal ltar dang*/__bkra shis brjod pa ni/__oMH__phun sum tshogs pa sogs zur gsal ltar sbyar bas 'grub bo/__/ces pa'ang nyer mkho'i ched du karma pas spel ba dge/__//