JKW-KABAB-04-NGA-032

From Khyentse Lineage - A Tsadra Foundation Project

‎‎

ཡང་གཏེར་ཐུགས་རྗེ་ཆེན་པོ་པདྨའི་རྒྱལ་པོའི་དོན་དབང་འབྲིང་པོ་དང་གཏོར་དབང་བསྡུས་པ་ཁོལ་ཕྱུང་བཀླགས་ཆོག་ཏུ་བཀོད་པ།
Wylie title yang gter thugs rje chen po pad+ma'i rgyal po'i don dbang 'bring po dang gtor dbang bsdus pa khol phyung bklags chog tu bkod pa JKW-KABAB-04-NGA-032.pdf
Location mkhyen brtse'i bka' babs
Volume 4, Text 32, Pages 661-672 (Folios 1a to 6b5)
Author འཇམ་མགོན་ཀོང་སྤྲུལ་
Less details More details
Tertön ཉི་མ་སེངྒེ་, འཇམ་དབྱངས་མཁྱེན་བརྩེའི་དབང་པོ་ (nyi ma seng+ge, 'jam dbyangs mkhyen brtse'i dbang po)
Citation 'jam mgon kong sprul. yang gter thugs rje chen po pad+ma'i rgyal po'i don dbang 'bring po dang gtor dbang bsdus pa khol phyung bklags chog tu bkod pa. In Rdzong sar 'jam dbyangs mkhyen brtse'i dbang po'i bka' babs, Vol. 4: 661-672. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Revelations - gter ma  ·  Empowerment Ritual - dbang chog - dbang skur
Cycle ཐུགས་རྗེ་ཆེན་པོ་པདྨ་རྒྱལ་པོ་ཞི་ཁྲོ་རྣམ་པར་རོལ་པ་ (thugs rje chen po pad+ma rgyal po zhi khro rnam par rol pa)
Deity thugs rje chen po
Karchag page JKW-KABAB-Volume-04-NGA-Karchag
RTZ In the Rinchen Terdzö: https://rtz.tsadra.org/index.php/Terdzo-ZA-013
Colophon

།ཅེས་རྨད་དུ་བྱུང་བའི་ཟབ་ཆོས་ཀྱི་ཞབས་ཏོག་དང་རང་གཞན་ལ་ཉེ་བར་མཁོ་བའི་ཆ་རྐྱེན་དུ་དམིགས་ནས། པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བགྱིས་པ་དགེ་ལེགས་འཕེལ།།

ces rmad du byung ba'i zab chos kyi zhabs tog dang rang gzhan la nye bar mkho ba'i cha rkyen du dmigs nas/__pad+ma gar dbang phrin las 'gro 'dul rtsal gyis rdzong gsar bkra shis lha rtse'i chos grwar bgyis pa dge legs 'phel

[edit]
༄༅། །ཡང་གཏེར་ཐུགས་རྗེ་ཆེན་པོ་པདྨའི་རྒྱལ་པོའི་དོན་དབང་འབྲིང་པོ་དང་གཏོར་དབང་བསྡུས་པ་ཁོལ་ཕྱུང་བཀླགས་ཆོག་ཏུ་བཀོད་པ་བཞུགས་སོ།། འགྲོ་འདུལ་ཐུགས་རྗེའི་དབང་ཕྱུག་མཆོག །པདྨའི་རྒྱལ་པོར་གུས་བཏུད་དེ། །ཁྱེར་བདེའི་སླད་དུ་སྨིན་བྱེད་དབང༌། །འབྲིང་དང་བསྡུས་པའི་མཚམས་སྦྱོར་དགོད། །རྩ་དབང་རྒྱས་པ་མི་ལྕོགས་པའམ་ཁྲོམ་དབང་ལྟ་བུ་ལ་དོན་དབང་མདོར་བསྡུས་སུ་བསྐུར་ན། དང་པོ་སྦྱོར་བ་ཡོ་བྱད་ཀྱི་གཤོམ་ནི། སྟེགས་བུའི་སྟེང་དཀྱིལ་འཁོར་རས་བྲིས་བཀྲམ། མེད་ན་མཎྜལ་ལ་འབྲུ་ཚོམ་ལྷ་གྲངས་བཀོད་པའི་སྟེང་དུ་མཉྫི་ལ་རྣམ་རྒྱལ་བུམ་པ་བཅུད་ལྡན་མགུལ་ཆིངས་ཁ་རྒྱན་དང་བཅས་པ་བཀོད། གཡས་སུ་བནྡྷའི་ནང་ཆོས་སྨན་སྦྱར་བའི་ཆང༌། གཡོན་ཏུ་མེ་ལོང་དྭངས་བ། རྒྱབ་ཏུ་དཔལ་གཏོར་སྐུ་ཙཀ་དར་གདུགས་ཀྱིས་སྤྲས་པ། མྱང་གྲོལ་དབང་བསྐུར་སྦྲེལ་ན་རིལ་བུ་བུམ་པའང་བཞག །མདུན་ངོས་སུ་སྨན་རག་གཏོར་གསུམ། ཆུ་གཉིས་ཉེར་སྤྱོད་བསྐོར་བཤམ་བྱ། སྲུང་མའི་གཏོར་འབུལ། སྔོན་གཏོར། ཚོགས་ཆས། ལས་བུམ་གྱིས་མཚོན་པའི་ཉེར་མཁོ་རྣམས་ཚོགས་པར་བྱའོ། །ཐོག་མར་སྒྲུབ་མཆོད་ནི། བརྒྱུད་འདེབས་དང༌། སྔོན་འགྲོའི་ལས་རིམ་ལྟར། སྐྱབས་སེམས་ནས་མཆོད་བརླབ་བར་གཏང༌། དེ་ནས་བདག་བསྐྱེད་བཟླས་པ་དང་བཅས་པ། མདུན་རྟེན་ལྷར་བསྐྱེད། སྤྱན་འདྲེན་ནས་བསྟོད་བཤགས་བར། བསྙེན་སྒྲུབ་དང་ལས་སྦྱོར་ཐུན་མོང་བའི་བཟླས་པ་བྱ། བུམ་བསྐྱེད་བཟླས་དམིགས་མདོར་བསྡུས་སྤྱི་འགྲེ་གསལ་བཏབ་ལ་བཟླས་པའི་མཐར་གཏོར་འབུལ་མཆོད་བསྟོད་ལྷ་འོད་ཞུ་བྱ། མྱང་གྲོལ་གྱི་དབང་བསྐུར་ན་དེའི་སྒྲུབ་པའང་སྦྱར། སྲུང་བའི་གཏོར་འབུལ་མདོར་བསྡུས། ཚོགས་མཆོད་བསྒྲལ་བསྟབ་བར་དུ་བཏང༌། ལས་བུམ་རྟ་སྔགས་ཙམ་གྱིས་བྱིན་བརླབ། རིག་མེ་དོར་ལ་གནང་བ་ནོད་དོ། །དབང་དངོས་ལ། སློབ་མ་རྣམས་ལ་ཁྲུས་བྱ། བགེགས་གཏོར་བཏང༌། བཀའ་བསྒོ་ཞིང་མཚམས་བཅད། སེམས་བསྐྱེད་གསལ་གདབ་ལ། དེའང་ཕྱོགས་བཅུའི་རྒྱལ་བ་མ་ལུས་པའི་ཐུགས་རྗེ་ཆེན་པོའི་རང་གཟུགས་འཇིག་རྟེན་དབང་ཕྱུག་འཕགས་པ་སྤྱན་རས་གཟིགས་ལ་རྒྱུད་དང་སྒྲུབ་ཐབས་ཀྱི་བཀའ་སྲོལ་མཐའ་ཡས་པ་མཆིས་པ་ལས། འདིར་སྔ་འགྱུར་ཟབ་མོ་གཏེར་གྱི་ཆོས་སྡེར་གཏོགས་པ། བླ་མ་ཡི་དམ་ཐུགས་རྗེ་ཆེན་པོ་པདྨ་ཞི་ཁྲོ་རྣམ་པར་རོལ་པ་ཀུན་འདྲིལ་ཡིད་བཞིན་ནོར་བུ་ཞེས་བྱ་བ་ཁྱད་པར་འཕགས་པའི་ཆོས་སྐོར་རྣམས། བཅོམ་ལྡན་འདས་འཇིག་རྟེན་དབང་ཕྱུག་ཉིད་གྲུབ་པའི་སྐྱེས་བུ་མཆོག་གི་སྐུར་སྣང་བ་གུ་རུ་རིན་པོ་ཆེ་པདྨཱ་ཀ་རས་བོད་ཡུལ་སྐལ་ལྡན་གྱི་རྗེ་འབངས་འདུས་པ་ཕྱི་མ་རྣམས་ལ་སྩལ་ཅིང་གཏེར་དུ་སྦས་པ་ལ་རྒྱས་འབྲིང་བསྡུས་གསུམ་སྙིང་པོའི་སྐོར་དང་བཞིར་བཞུགས་པ་ལས། སྙིང་པོའི་ཡང་བཅུད་གཅིག་ཏུ་དྲིལ་བའི་ཆོས་སྐོར་འདི་ཉིད་རྒྱལ་སྲས་ལྷ་རྗེ་དང་འགོས་བློན་རྡོ་རྗེ་འབར་ཟུང་དུ་འཇུག་པའི་རྣམ་འཕྲུལ་གཏེར་སྟོན་ཉི་མ་སེང་གེས་མང་ཡུལ་བྱམས་སྤྲིན་གྱི་གཙུག་ལག་ཁང་ནས་སྤྱན་དྲངས་ཏེ་སླར་འདབ་གཏེར་དུ་བཞུགས་པ་ལ། དེང་སང་གདུལ་བའི་དུས་ལ་བབས་པའི་ཕྱིར་ན། གཏེར་སྟོན་གྲུབ་ཐོབ་རྒྱ་མཚོའི་སྤྱི་རྗེ་འགྲན་ཟླ་བྲལ་བའི་སློབ་དཔོན་ཆེན་པོ་པདྨ་འོད་གསལ་མདོ་སྔགས་གླིང་པ་ལ་ཆོས་བདག་ཡེ་ཤེས་མཁའ་འགྲོས་གཏེར་ཤོག་དངོས་སུ་ཕུལ་ཞིང༌། གུ་རུ་རིན་པོ་ཆེས་བྱིན་རླབས་དང་ལུང་བསྟན་དམིགས་སུ་སྩལ་བ་ལ་བརྟེན་ཚུལ་བཞིན་གཏན་ལ་ཕབ་པར་མཛད་པའི་བླ་རྫོགས་ཐུགས་གསུམ་ཀུན་འདྲིལ་གྱི་ཆོས་སྐོར་འདིའི་རྩ་བའི་སྨིན་བྱེད་ལ་རྒྱས་འབྲིང་བསྡུས་གསུམ་དུ་བཞུགས་པ་ལས། འདིར་དོན་གྱི་སྨིན་བྱེད་སྣོད་རུང་དུ་སྒྲུབ་པའི་དབང་བསྐུར་འབྲིང་པོ་བགྱི་བ་ལ་སོགས་ཀྱིས་མཚམས་སྦྱར་ལ་མཎྜལ་འབུལ་གཞུག །བླ་མ་དཀྱིལ་འཁོར་གྱི་གཙོ་བོ་དབྱེར་མི་ཕྱེད་པ་ལ་དད་མོས་ཀྱི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་མཛོད། ཁྱབ་བདག་གཙོ་བོ་ཁྱོད་ལ་འདུད༔ བྱང་ཆུབ་ཆེན་པོ་བདག་འདོད་དེ༔ བླ་མེད་གསང་བ་དམ་པ་ཡི༔ དཀྱིལ་འཁོར་ཆེན་པོར་གཞུག་ཏུ་གསོལ༔ ལན་གསུམ། བླ་མ་དང་ཐུགས་རྗེ་ཆེན་པོ་བདེ་གཤེགས་ཞི་ཁྲོ་རྩ་གསུམ་རྒྱལ་བ་རབ་འབྱམས་རྣམས་མངོན་སུམ་བཞིན་ཏུ་གསལ་བའི་སྤྱན་སྔར། བདག་གཞན་མཁའ་ཁྱབ་ཀྱི་འགྲོ་བ་མཐའ་དག་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བའི་འདུན་པ་རྩེ་གཅིག་པས་འདིའི་རྗེས་ཟློས། ན་མོ༔ བླ་མ་ཡི་དམ་ཐུགས་རྗེ་ཆེ༔ ཞི་ཁྲོ་རྒྱལ་བའི་དཀྱིལ་འཁོར་ལྷ༔ སྐྱབས་གནས་རྒྱ་མཚོའི་བདག་ཉིད་ལ༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ། ཕ་མར་གྱུར་པའི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ཏེ་མི་གནས་པའི་བྱང་ཆུབ་ཆེན་པོ་ལ་དགོད་པའི་སླད་དུ་བླ་མ་ཐུགས་རྗེ་ཆེན་པོ་ཞི་ཁྲོ་རྣམ་པར་རོལ་པའི་སྨིན་གྲོལ་གྱི་ལམ་ལ་འཇུག་པར་བགྱིའོ་སྙམ་པས་འདིའི་རྗེས་ཟློས། མར་གྱུར་འགྲོ་བ་ཀུན་དོན་ཏུ༔ བླ་མ་ཞི་ཁྲོ་བསྒྲུབས་ནས་ནི༔ སྟོང་ཉིད་སྙིང་རྗེ་དབྱེར་མེད་པས༔ གཞན་དོན་བྱེད་པར་སེམས་བསྐྱེད་དོ༔ ལན་གསུམ། ཚོགས་གྱི་ཞིང་མཆོག་དམ་པ་དེ་དག་གི་སྤྱན་སྔར་བདག་གཞན་འགྲོ་བ་མ་ལུས་པ་སྒོ་གསུམ་འཇུག་པ་གཅིག་པས་ཡན་ལག་བདུན་གྱི་བསགས་སྦྱང་ཚུལ་བཞིན་བགྱིད་པའི་མོས་པས་འདིའི་རྗེས་ཟློས། ཧོ༔ བླ་མ་ཞི་ཁྲོའི་ལྷ་ཚོགས་ལ༔ སྒོ་གསུམ་གུས་པས་ཕྱག་འཚལ་ལོ༔ ཀུན་བཟང་མཆོད་སྤྲིན་རྒྱ་མཚོས་མཆོད༔ སྡིག་ལྟུང་གནོང་འགྱོད་དྲག་པོས་བཤགས༔ དགེ་ཚོགས་ཀུན་ལ་ཡི་རང་ངོ་༔ ཕྱོགས་བཅུའི་རྒྱལ་བ་སྲས་བཅས་རྣམས༔ ཆོས་འཁོར་བསྐོར་བཞིན་བཞུགས་པར་གསོལ༔ བསོད་ནམས་བྱང་ཆུབ་ཆེན་པོར་བསྔོ༔ ལན་གསུམ། དབང་གི་གཞི་རྟེན་རྒྱུད་སྡོམ་པ་དང་ལྡན་པར་བྱ་དགོས་པས་ཕྱི་སོ་ཐར། ནང་བྱང་སེམས། གསང་བ་རིག་པ་འཛིན་པའི་སྡེ་སྣོད་ཀྱིས་བསྡུས་པའི་དམ་ཚིག་དང་སྡོམ་པ་རྣམས་ལེགས་པར་བླངས་ནས་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས། ཧོ༔ བླ་མ་ཞི་ཁྲོའི་ལྷ་ཚོགས་དགོངས༔ བདག་གིས་འགྲོ་བ་ཀུན་དོན་དུ༔ སོ་ཐར་བྱང་སེམས་རིག་འཛིན་གྱི༔ སྡོམ་པ་མ་ལུས་ཡོངས་སུ་བཟུང་༔ བྱང་ཆུབ་བར་དུ་མི་བཏང་ན༔ ཐུགས་རྗེས་བྱིན་གྱིས་བརླབ་ཏུ་གསོལ༔ ལན་གསུམ། དེ་ནས་དབང་གི་གཞི་དགོད་པའི་སླད་དུ་ཡེ་ཤེས་པ་དབབ་པ་ཡིན་པས་ཁྱེད་རང་རྣམས་ལུས་གནད་བསྲང༌། རླུང་རོ་བསལ། དྲན་པ་རྩེ་གཅིག་པས་དམིགས་པ་འདི་ལྟར་སྒོམས་ཤིག །ད་ལྟར་གྱི་སློབ་དཔོན་ལ་བླ་མ་ཡི་དམ་དབྱེར་མེད་པའི་མོས་གུས་དྲག་ཏུ་བྱས་པ་དང་༔ ཧྲཱི་ཧྲཱི་ཞེས་རྡོ་རྗེའི་སྔགས་ཀྱི་སྒྲ་བསྒྲགས་པའི་རྐྱེན་གྱིས་སློབ་མའི་ལུས་སོགས་གཟུང་འཛིན་གྱི་སྣང་བ་ཐམས་ཅད་ནམ་མཁའ་ལ་སྤྲིན་དེངས་པ་ལྟར་སྟོང་པར་སྦྱངས༔ སྟོང་པའི་ངང་ལས་རྡོ་རྗེའི་སྲུང་བའི་འཁོར་ལོ་གཞལ་མེད་ཁང་དྭངས་གསལ་འོད་ཀྱི་རང་བཞིན་ཅན་གྱི་དབུས་སུ་པདྨ་དང་ཉི་ཟླའི་གདན་ལ་ཁྱེད་རང་རྣམས་སྐད་ཅིག་གིས་ཐུགས་རྗེ་ཆེན་པོ་པདྨའི་རྒྱལ་པོ་སྐུ་མདོག་བྱེ་རུའི་སྡོང་པོ་ལ་ཏིལ་མར་གྱིས་བྱུགས་པར་ཉི་འོད་ཁྱབ་པ་ལྟ་བུ༔ ཞལ་གཅིག་ཕྱག་བཞི་པ༔ འཛུམ་ཞིང་ཆགས་ལ་ཅུང་ཟད་ཁྲོ་བའི་ཉམས་ཅན༔ ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བའི་བར་དུ་པདྨ་རཱ་གའི་རྡོ་རྗེ་རྩེ་ལྔ་པ་བསྣམས་པ༔ གཡས་འོག་མས་མུ་ཏིག་དམར་པོའི་ཕྲེང་བ་དང་༔ གཡོན་འོག་མས་ཨུཏྤལ་དམར་པོའི་སྡོང་བུ་བསྣམས་པ༔ ཡུམ་ཡི་གེ་དྲུག་མ་གསང་བ་ཡེ་ཤེས་དམར་མོ་ཌཱ་མ་རུ་དང་ཐོད་ཆང་བསྣམས་པས་འཁྲིལ་བ༔ གཉིས་ཀའང་དར་དང་རིན་ཆེན་རུས་པ་དང་མེ་ཏོག་གི་རྒྱན་གྱིས་བརྒྱན་པ༔ ཞབས་རྡོ་རྗེ་དང་པདྨའི་སྐྱིལ་མོ་ཀྲུང་གིས་ཐུགས་རྗེའི་འོད་ཟེར་དམར་པོ་འཕྲོ་བའི་ཀློང་ན་བཞུགས་པ༔ འཁོར་ལོ་ལྔའི་དབུས་སུ་རིགས་ལྔ་ཡབ་ཡུམ་དང་༔ དབང་པོ་བཞིའི་གཡས་གཡོན་དུ་སེམས་དཔའ་ཡབ་ཡུམ་མཉམ་པར་སྦྱོར་ཞིང་༔ དཔུང་པ་གཡས་སུ་སྲས་ནོར་བུ་འཛིན་པ༔ གཡོན་དུ་སྲས་མོ་གསང་སྔགས་འཛིན་མ༔ སྤྱི་བོ་ལ་སོགས་པའི་གནས་དྲུག་ཏུ་ཐུབ་པ་དྲུག༔ ཡན་ལག་བཞི་ལ་ཁྲོ་ཆེན་བཞི༔ བ་སྤུའི་བུ་ག་ཐམས་ཅད་དུ་བསྐལ་བཟང་གིས་སེམས་དཔའ་སྟོང་དང་ཁྲག་འཐུང་ལྔ་བཅུ་རྩ་བརྒྱད་སོགས་རྩ་གསུམ་རྒྱལ་བ་རབ་འབྱམས་ཏིལ་གྱི་གོང་བུ་ཁ་བྱེ་བ་ལྟར་ཤིགས་སེར་བཞུགས་པ༔ སྤྱི་བོའི་གཙུག་ཏུ་པདྨ་དང་ཉི་ཟླའི་གདན་ལ་དྲིན་ཅན་རྩ་བའི་བླ་མ་ཨོ་རྒྱན་པདྨ་རྡོ་རྗེ་འཆང་གི་རྣམ་པ་སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པས་ཡུམ་བདེ་བའི་དབང་ཕྱུག་མ་དམར་སྐྱ་པདྨ་དྲིལ་བུ་འཛིན་པ་འཁྲིལ་བ༔ གཉིས་ཀའང་དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ༔ ཞབས་རྡོ་རྗེའི་སྐྱིལ་མོ་ཀྲུང་གིས་འཇའ་འོད་ཐིག་ལེ་རིག་འཛིན་དཔའ་བོ་མཁའ་འགྲོའི་སྤྲིན་ཕུང་འཕྲོ་བའི་ཀློང་ན་བཞུགས་པའི་གཙོ་འཁོར་ཐམས་ཅད་ཀྱི་གནས་གསུམ་ཡིག་འབྲུ་གསུམ་གྱིས་མཚན་པར་གསལ་ཐོབ༔ སློབ་དཔོན་མདུན་བསྐྱེད་དང་བཅས་པའི་ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས་པས༔ བླ་མ་ཡི་དམ་ཞི་ཁྲོ་རབ་འབྱམས་ཀྱི་ཐུགས་རྒྱུད་བསྐུལ༔ གསང་བ་གསུམ་གྱི་ཡེ་ཤེས་ལྷ་སྔགས་ཕྱག་མཚན་གྱི་རྣམ་པར་སྤྱན་དྲངས་ཏེ་སློབ་མ་རྣམས་ལ་ཐིམ་པས་རྒྱུད་བྱིན་གྱིས་བརླབས་པར་མོས་ཤིག༔ །སྦྱར་སྤོས་བསྲེག །དབྱངས་རོལ་བཅས། ཧཱུྃ་ཧྲཱི༔ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ དྷ་ན་ཀོ་ཥའི་མཚོ་གླིང་དུ༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་རློབ་ཕྱིར་གཤེགས་སུ་གསོལ༔ རི་པོ་ཏ་ལའི་ཕོ་བྲང་ནས༔ ཐུགས་རྗེ་ཆེན་པོ་གཤེགས་སུ་གསོལ༔ ནུབ་ཕྱོགས་ཨོ་རྒྱན་དུར་ཁྲོད་ནས༔ གསང་བ་ཡེ་ཤེས་གཤེགས་སུ་གསོལ༔ གཞན་ཡང་ཕྱོགས་བཅུའི་ཞིང་ཁམས་ནས༔ རྩ་གསུམ་རྒྱ་མཚོ་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ལོ་ཀེ་ཤྭ་ར་པདྨ་རཱ་ཛ་བཛྲ་ས་མ་ཡ་ཛཿཛཿསིདྡྷི་ཕ་ལ་ཧཱུྃ་ཨཱཿ ཅེས་བརྗོད་ལ་དབབ། ཧཱུྃ་ཧཱུྃ་ཧཱུྃ་ཞེས་བྱིན་བསྡུ་ཛཿཧཱུྃ་བྃ་ཧོཿས་བསྟིམ། ཡེ་ཤེས་པའི་བྱིན་རླབས་སྒོ་གསུམ་ལ་རབ་ཏུ་གནས་པར་བྱས་པ་མོས་ཤིག །ཏིཥྛ་བཛྲ་ས་མ་ཡ་སྟྭྃ༔ ཞེས་བརྟན་པར་བྱ། དངོས་གཞིའི་དབང་ལ་སྐུ་གསུང་ཐུགས་ཀྱི་དབང་གསུམ་རིམ་བཞིན་འབྱུང་བ་ཡིན་པས་འདུན་པ་འདི་ལྟར་མཛོད། ཆོས་དབྱིངས་འོད་གསལ་གྱི་གཞལ་མེད་ཁང་ཆེན་པོ་མཚོན་པའི་རྣམ་རྒྱལ་བུམ་པའི་ནང་དུ། རིག་པ་ཡེ་ཤེས་པདྨ་ཞི་ཁྲོའི་དཀྱིལ་འཁོར་གྱི་ལྷ་ཚོགས་མཚོན་པའི་རྡོ་རྗེ་བདུད་རྩིའི་བཅུད་དུ་འཁྱིལ་བ་གཉིས་མེད་ཟུང་འཇུག་ལྷག་པ་བྱང་ཆུབ་སེམས་ཀྱིས་དབང་བསྐུར་བས། ལུས་གདོས་བཅས་སུ་འཛིན་པའི་དྲི་མ་དག །སྣང་སྟོང་ལྷའི་རྣལ་འབྱོར་བསྒོམ་པ་ལ་དབང༌། སྐུ་རྡོ་རྗེ་སྤྲུལ་པའི་སྐུ་མངོན་དུ་འཐོབ་པའི་སྐལ་བ་ཅན་དུ་བྱས་པར་མོས་ཤིག །རྣམ་བུམ་སྤྱི་བོར་བཞག་ཅིང་བུམ་ཆུ་སྦྱིན་ལ། ཨོཾ༔ བཀྲ་ཤིས་འོད་གསལ་དབྱིངས་ཀྱི་བུམ་པ་ན༔ ཡེ་ཤེས་རིག་པའི་ལྷ་ཚོགས་བདུད་རྩིར་འཁྱིལ༔ གཉིས་མེད་བྱང་ཆུབ་སེམས་ཀྱི་དབང་བསྐུར་བས༔ སྣང་སྟོང་སྐུ་ཡི་དབང་མཆོག་ཐོབ་པར་ཤོག༔ ཨོཾ་ཧཱུྃ་ཏྲཱྃ་ཧྲཱིཿཨཱཿཀ་ལ་ཤ་ཀཱ་ཡ་ཨ་བྷི་ཥིཉྩ་ཨོཾ༔ གནས་པ་རྩ་དང་གཡོ་བ་རླུང་གི་རང་བཞིན་ཅན་གྱི་ཕུང་པོ་སྣོད་ཀྱི་ངོ་བོ་པདྨ་བྷཉྫའི་ནང་དུ་དངོས་གྲུབ་ཐོགས་མེད་དུ་སྒྲུབ་པར་ནུས་པ་རང་བྱུང་རྡོ་རྗེའི་སྔགས་ཀྱི་ཡེ་ཤེས་བདུད་རྩིའི་བཅུད་གཉིས་མེད་ཟུང་འཇུག་བདེ་བ་ཆེན་པོའི་རྒྱུན་གྱིས་དབང་བསྐུར་བས། སྒྲ་སྐད་ཐ་མལ་དུ་འཛིན་པའི་དྲི་མ་དག །གྲགས་སྟོང་རྡོ་རྗེའི་བཟླས་བརྗོད་བྱ་བ་ལ་དབང༌། གསུང་རྡོ་རྗེ་ལོངས་སྐུ་མངོན་ཏུ་འཐོབ་པའི་སྐལ་བ་ཅན་དུ་བྱས་པར་མོས་ཤིག །བནྡྷ་མགྲིན་པར་བཞག་ཅིང་བདུད་རྩི་སྦྱིན་ལ། ཨཱཿ རྩ་རླུང་ཕུང་པོ་སྣོད་ཀྱི་བྷནྡྷ་རུ༔ ནུས་པ་སྔགས་ཀྱི་ཡེ་ཤེས་བཅུད་དུ་འཁྱིལ༔ གཉིས་མེད་བདེ་བ་ཆེན་པོའི་དབང་བསྐུར་བས༔ གྲགས་སྟོང་གསུང་གི་དབང་མཆོག་ཐོབ་པར་ཤོག༔ བོ་དྷི་ཙིཏྟ་ཝཱ་ཀ་ཨ་བྷི་ཥིཉྩ་ཨཱཿ སེམས་བྱུང་གི་རྟོག་ཚོགས་རང་སར་ཞི་བའི་དབྱིངས་སྤྲོས་བྲལ་མཚོན་པ་མེ་ལོང་དྲི་མ་མེད་པའི་ནང་དུ། མ་འགགས་རང་རྩལ་འཁོར་འདས་ཀྱི་གཟུགས་བརྙན་ཇི་ལྟར་ཤར་ཡང་གསལ་སྟོང་ཤར་གྲོལ་འཛིན་པ་མེད་པ་ཉམས་སུ་མྱོང་བ་གཉིས་མེད་ཟུང་འཇུག་བློ་འདས་ཆེན་པོའི་དབང་བསྐུར་བས། སེམས་རྟོག་རང་ག་མར་ཞེན་པའི་དྲི་མ་དག །རིག་སྟོང་འོད་གསལ་དེ་ཁོ་ན་ཉིད་བསྒོམ་པ་ལ་དབང༌། ཐུགས་རྡོ་རྗེ་ཆོས་སྐུ་མངོན་ཏུ་འཐོབ་པའི་སྐལ་བ་ཅན་ཏུ་བྱས་པར་མོས་ཤིག །མེ་ལོང་སྙིང་གར་བཞག་ཅིང་མིག་ལམ་དུ་བསྟན་ལ། ཧཱུྃ༔ མེ་ལོང་དྭངས་པ་རྟོག་ཚོགས་དབྱིངས་སུ་ཞི༔ གཟུགས་བརྙན་མ་འགགས་གསལ་སྟོང་ཉམས་སུ་མྱོང་༔ གཉིས་མེད་བློ་ལས་འདས་པའི་དབང་བསྐུར་བས༔ རིག་སྟོང་ཐུགས་ཀྱི་དབང་མཆོག་ཐོབ་པར་ཤོག༔ དྷརྨ་དྷཱ་ཏུ་ཙིཏྟ་ཨ་བྷི་ཥིཉྩ་ཧཱུྃ༔ མེ་ཏོག་འཐོར་ལ་སྨོན་ལམ་ནི། སྐལ་ལྡན་རིགས་ཀྱི་བུ་རྣམས་ལ་བླ་མ་ཐུགས་རྗེ་ཆེན་པོ་པདྨ་ཞི་ཁྲོ་རྣམ་པར་རོལ་པའི་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་དབང་བསྐུར་བས༔ ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་ཐམས་ཅད་དག༔ རྡོ་རྗེ་གསུམ་གྱི་ཡེ་ཤེས་མངོན་དུ་བྱེད་པའི་སྐལ་བ་དང་ལྡན་པར་གྱུར་ཅིག༔ དེང་ཕྱིན་ཆད་འདི་ལྟར་ཤར་བའི་སྣང་གྲགས་རྟོག་པའི་ཆོས་ཐམས་ཅད་པདྨ་ཞི་ཁྲོ་རྣམ་པར་རོལ་པའི་སྐུ་གསུང་ཐུགས་དང་དབྱེར་མེད་པར་ཤེས་པས་ཉམས་ལེན་ཆུ་བོའི་རྒྱུན་གྱི་རྣལ་འབྱོར་ལ་བརྩོན་པར་གྱིས་ཤིག༔ ཅེས་གདམས། དགོས་པ་ཡོད་ཅིང་སྤྲོ་ན་འདིར་མྱང་གྲོལ་རིལ་བུའི་དབང་གཞུང་གསལ་སྦྱར། དེ་ནས་དབང་དོན་གྱི་སྙིང་པོ་བསྡུས་པ་བྱིན་རླབས་གཏོར་མའི་བརྡ་དབང་བསྐུར་བ་ལ་དམིགས་པ་འདི་བཞིན་མཛོད། གཏོར་སྣོད་ཡེ་ཤེས་རང་སྣང་གི་གཞལ་མེད་ཁང་འཇའ་ཟེར་ཐིག་ལེ་འོད་ཕུང་འཁྱིལ་བའི་ཀློང་དུ་གཏོར་མ་ཐུགས་རྗེ་ཆེན་པོ་པདྨའི་རྒྱལ་པོ་ཡུམ་ཡི་གེ་དྲུག་མ་དང་མཉམ་པར་སྦྱོར་ཞིང་ནོར་འཛིན་དང་གསང་འཛིན་གཡས་གཡོན་ཏུ་བཞུགས་པའི་སྤྱི་བོར་རིགས་བདག་པདྨ་རྡོ་རྗེ་འཆང་ཡབ་ཡུམ། འཁོར་རྒྱལ་བ་རིགས་ལྔ། སེམས་དཔའ་ལྕམ་དྲལ་བཅུ་དྲུག་བསྐལ་བཟང་གི་སེམས་དཔའ་སྟོང༌། སྒོ་བ་ཡབ་ཡུམ་བརྒྱད། སྟེང་གི་ནམ་མཁར་ཁྲག་འཐུང་ལྔ་བཅུ་རྩ་བརྒྱད། གཞན་ཡང་རྩ་གསུམ་རྒྱལ་བ་རབ་འབྱམས་ཐམས་ཅད་ཏིལ་གྱི་གོང་བུ་ཁ་ཕྱེ་བ་ལྟར་བདེ་སྟོང་ཕུང་པོ་ཤིགས་སེར་བཞུགས་པ། དེ་ཉིད་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པ་ལ་མོས་གུས་དྲག་ཏུ་བསྐྱེད་པའི་རྐྱེན་གྱིས་གཙོ་འཁོར་ཐམས་ཅད་ཀྱི་གནས་གསུམ་ཡི་གེ་འབྲུ་གསུམ་གྱིས་མཚན་པ་ལས་འོད་ཟེར་དཀར་དམར་མཐིང་གསུམ་གྱི་རྒྱུན་བབས། ཁྱེད་རང་རྣམས་ཀྱི་གནས་གསུམ་དུ་ཐིམ་པས་སྐུ་གསུང་ཐུགས་ཡོངས་སུ་རྫོགས་པའི་དབང་དང་བྱིན་རླབས་ཐོབ། སྒོ་གསུམ་གྱི་སྒྲིབ་པ་བག་ཆགས་དང་བཅས་པ་དག །བསྐྱེད་བཟླས་རྫོགས་པའི་རྣལ་འབྱོར་ལ་དབང༌། སྐུ་གསུམ་གྱི་གོ་འཕང་མངོན་དུ་འཐོབ་པའི་སྐལ་བ་ཅན་དུ་བྱས་པར་མོས་ཤིག །གཏོར་ཆེན་ཐོགས་ལ། ཨོཾ་ཨཱཿཧཱུྃ༔ རིགས་ཀུན་ཁྱབ་བདག་བླ་མ་རྡོ་རྗེ་འཆང་༔ པདྨ་ཞི་ཁྲོ་རྣམ་པར་རོལ་པའི་ལྷ༔ རྩ་གསུམ་རྒྱལ་བ་རྒྱ་མཚོའི་ཚོགས་རྣམས་ཀུན༔ དད་མོས་ཅན་གྱི་སྤྱི་བོར་མངོན་སུམ་བྱོན༔ ནམ་མཁའ་ཆུ་ལ་འཇའ་ཚོན་ཤར་བ་ལྟར༔ ཡེ་ཤེས་འོད་ཟེར་སློབ་མའི་གནས་གསུམ་ཐིམ༔ སྐུ་གསུང་ཐུགས་ཀྱི་བྱིན་རླབས་རྒྱུད་ལ་ཞུགས༔ སྨིན་གྲོལ་ཟུང་འཇུག་དོན་གྱི་དབང་ཐོབ་ཤོག༔ བསྙེན་སྒྲུབ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ ཝཱ་ཀ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུྃ༔ ཞེས་གནས་གསུམ་དུ་རེག །སླར་སྤྱི་བོར་བཟུང་ལ་སྔགས་མཐར། ཛྙཱ་ན་ཨ་བྷི་ཥིཉྩ་ཨ་ཨཱཿ ཞེས་བརྗོད་པས། ལྷ་ཚོགས་ཐམས་ཅད་དགྱེས་པ་ཆེན་པོས་བདེ་སྟོང་གི་ངོ་བོར་འོད་དུ་ཞུ༔ སློབ་མ་ལ་ཐིམ་པས་དབང་བཞི་པའི་ཡེ་ཤེས་རྒྱུད་ལ་སྐྱེས་པར་མོས་ཤིག༔ དེ་རྣམས་ཀྱིས་སྐུ་གསུང་ཐུགས་སྒོམ་ཞིང་སྒྲུབ་པའི་སྣོད་དུ་འགྱུར་ཞིང་དོན་གྱི་དབང་རྫོགས་པ་ཡིན་ནོ། །ཤིས་པ་བརྗོད། དེས་ཐུགས་རྗེ་ཆེན་པོ་པདྨ་རྒྱལ་པོ་ཞི་ཁྲོ་རྣམ་པར་རོལ་པའི་དོན་དབང་འབྲིང་པོ་དང༌། སྙིང་པོ་བསྡུས་པ་གཏོར་དབང་བཅས་ལེགས་པར་གྲུབ་པ་ལགས་པས་ཞེས་སོགས་ཀྱིས་མཚམས་སྦྱར་ལ་དམ་ཚིག་བསྒྲག་བཟུང༌། གཏང་རག་མཎྜལ་སོགས་དབང་གི་རྗེས་སྤྱི་ལྟར་དང༌། སློབ་དཔོན་གྱིས་ཚོགས་ལ་རོལ་ཅིང་ལྷག་མ་བཏང༌། བསྐུལ་བ་ཆད་བརྟན་རྟ་བྲཽ། གཏང་རགས་མཆོད་བསྟོད། ནོངས་བཤགས། མདུན་བསྐྱེད་ཡེ་ཤེས་བརྟེན་ཡོད་མེད་དང་བསྟུན་པའི་གཤེགས་བཞུགས་གང་འོས། དམ་ཚིག་པ་རང་ལ་བསྟིམ། བདག་བསྐྱེད་བསྡུ་ལྡངས། བསྔོ་སྨོན་ཤིས་བརྗོད་ཀྱི་བར་རྗེས་རིམ་ལྟར་བྱའོ། །ཡང་གཏོར་དབང་ཁོ་ན་བསྐུར་ན། ཁྲུས། བགེགས་བསྐྲད། གསོལ་གདབ། རྒྱུན་བཤགས་གང་འོས་དང༌། བྱིན་འབེབས་ནས་གཏོར་དབང་ལ་འཇུག་པས་གྲུབ་བོ། །པདྨ་རྣམ་པར་རྒྱས་པའི་འཛུམ་ཞལ་གྱིས། །ཐར་མཆོག་བདེ་ཆེན་ཞིང་དུ་དབུགས་དབྱུང་ནས། །རིགས་བདག་མཐའ་ཡས་ཚངས་པའི་དབྱངས་སྙན་གྱིས། །བྱང་ཆུབ་ཆེན་པོར་ལུང་བསྟན་སྩལ་གྱུར་ཅིག །ཅེས་རྨད་དུ་བྱུང་བའི་ཟབ་ཆོས་ཀྱི་ཞབས་ཏོག་དང་རང་གཞན་ལ་ཉེ་བར་མཁོ་བའི་ཆ་རྐྱེན་དུ་དམིགས་ནས། པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བགྱིས་པ་དགེ་ལེགས་འཕེལ།། །།
[edit]

@#/___/yang gter thugs rje chen po pad+ma'i rgyal po'i don dbang 'bring po dang gtor dbang bsdus pa khol phyung bklags chog tu bkod pa bzhugs so//_'gro 'dul thugs rje'i dbang phyug mchog__/pad+ma'i rgyal por gus btud de/__/khyer bde'i slad du smin byed dbang*/__/'bring dang bsdus pa'i mtshams sbyor dgod/__/rtsa dbang rgyas pa mi lcogs pa'am khrom dbang lta bu la don dbang mdor bsdus su bskur na/__dang po sbyor ba yo byad kyi gshom ni/__stegs bu'i steng dkyil 'khor ras bris bkram/__med na maN+Dal la 'bru tshom lha grangs bkod pa'i steng du many+dzi la rnam rgyal bum pa bcud ldan mgul chings kha rgyan dang bcas pa bkod/__g.yas su ban+d+ha'i nang chos sman sbyar ba'i chang*/__g.yon tu me long dwangs ba/__rgyab tu dpal gtor sku tsaka dar gdugs kyis spras pa/__myang grol dbang bskur sbrel na ril bu bum pa'ang bzhag__/mdun ngos su sman rag gtor gsum/__chu gnyis nyer spyod bskor bsham bya/__srung ma'i gtor 'bul/__sngon gtor/__tshogs chas/__las bum gyis mtshon pa'i nyer mkho rnams tshogs par bya'o/__/thog mar sgrub mchod ni/__brgyud 'debs dang*/__sngon 'gro'i las rim ltar/__skyabs sems nas mchod brlab bar gtang*/__de nas bdag bskyed bzlas pa dang bcas pa/__mdun rten lhar bskyed/__spyan 'dren nas bstod bshags bar/__bsnyen sgrub dang las sbyor thun mong ba'i bzlas pa bya/__bum bskyed bzlas dmigs mdor bsdus spyi 'gre gsal btab la bzlas pa'i mthar gtor 'bul mchod bstod lha 'od zhu bya/__myang grol gyi dbang bskur na de'i sgrub pa'ang sbyar/__srung ba'i gtor 'bul mdor bsdus/__tshogs mchod bsgral bstab bar du btang*/__las bum rta sngags tsam gyis byin brlab/__rig me dor la gnang ba nod do/__/dbang dngos la/__slob ma rnams la khrus bya/__bgegs gtor btang*/__bka' bsgo zhing mtshams bcad/__sems bskyed gsal gdab la/__de'ang phyogs bcu'i rgyal ba ma lus pa'i thugs rje chen po'i rang gzugs 'jig rten dbang phyug 'phags pa spyan ras gzigs la rgyud dang sgrub thabs kyi bka' srol mtha' yas pa mchis pa las/__'dir snga 'gyur zab mo gter gyi chos sder gtogs pa/__bla ma yi dam thugs rje chen po pad+ma zhi khro rnam par rol pa kun 'dril yid bzhin nor bu zhes bya ba khyad par 'phags pa'i chos skor rnams/__bcom ldan 'das 'jig rten dbang phyug nyid grub pa'i skyes bu mchog gi skur snang ba gu ru rin po che pad+mA ka ras bod yul skal ldan gyi rje 'bangs 'dus pa phyi ma rnams la stsal cing gter du sbas pa la rgyas 'bring bsdus gsum snying po'i skor dang bzhir bzhugs pa las/__snying po'i yang bcud gcig tu dril ba'i chos skor 'di nyid rgyal sras lha rje dang 'gos blon rdo rje 'bar zung du 'jug pa'i rnam 'phrul gter ston nyi ma seng ges mang yul byams sprin gyi gtsug lag khang nas spyan drangs te slar 'dab gter du bzhugs pa la/__deng sang gdul ba'i dus la babs pa'i phyir na/__gter ston grub thob rgya mtsho'i spyi rje 'gran zla bral ba'i slob dpon chen po pad+ma 'od gsal mdo sngags gling pa la chos bdag ye shes mkha' 'gros gter shog dngos su phul zhing*/__gu ru rin po ches byin rlabs dang lung bstan dmigs su stsal ba la brten tshul bzhin gtan la phab par mdzad pa'i bla rdzogs thugs gsum kun 'dril gyi chos skor 'di'i rtsa ba'i smin byed la rgyas 'bring bsdus gsum du bzhugs pa las/__'dir don gyi smin byed snod rung du sgrub pa'i dbang bskur 'bring po bgyi ba la sogs kyis mtshams sbyar la maN+Dal 'bul gzhug__/bla ma dkyil 'khor gyi gtso bo dbyer mi phyed pa la dad mos kyi gdung shugs drag pos gsol ba 'debs pa 'di'i rjes zlos mdzod/__khyab bdag gtso bo khyod la 'dud:__byang chub chen po bdag 'dod de:__bla med gsang ba dam pa yi:__dkyil 'khor chen por gzhug tu gsol:__lan gsum/__bla ma dang thugs rje chen po bde gshegs zhi khro rtsa gsum rgyal ba rab 'byams rnams mngon sum bzhin tu gsal ba'i spyan sngar/__bdag gzhan mkha' khyab kyi 'gro ba mtha' dag byang chub snying po'i bar du skyabs su 'gro ba'i 'dun pa rtse gcig pas 'di'i rjes zlos/__na mo:__bla ma yi dam thugs rje che:__zhi khro rgyal ba'i dkyil 'khor lha:__skyabs gnas rgya mtsho'i bdag nyid la:__byang chub bar du skyabs su mchi:__lan gsum/__pha mar gyur pa'i sems can thams cad 'khor ba sdug bsngal gyi rgya mtsho las bsgral te mi gnas pa'i byang chub chen po la dgod pa'i slad du bla ma thugs rje chen po zhi khro rnam par rol pa'i smin grol gyi lam la 'jug par bgyi'o snyam pas 'di'i rjes zlos/__mar gyur 'gro ba kun don tu:__bla ma zhi khro bsgrubs nas ni:__stong nyid snying rje dbyer med pas:__gzhan don byed par sems bskyed do:__lan gsum/__tshogs gyi zhing mchog dam pa de dag gi spyan sngar bdag gzhan 'gro ba ma lus pa sgo gsum 'jug pa gcig pas yan lag bdun gyi bsags sbyang tshul bzhin bgyid pa'i mos pas 'di'i rjes zlos/__ho:__bla ma zhi khro'i lha tshogs la:__sgo gsum gus pas phyag 'tshal lo:__kun bzang mchod sprin rgya mtshos mchod:__sdig ltung gnong 'gyod drag pos bshags:__dge tshogs kun la yi rang ngo :__phyogs bcu'i rgyal ba sras bcas rnams:__chos 'khor bskor bzhin bzhugs par gsol:__bsod nams byang chub chen por bsngo:__lan gsum/__dbang gi gzhi rten rgyud sdom pa dang ldan par bya dgos pas phyi so thar/__nang byang sems/__gsang ba rig pa 'dzin pa'i sde snod kyis bsdus pa'i dam tshig dang sdom pa rnams legs par blangs nas tshul bzhin bsrung bar bgyi'o snyam pas 'di'i rjes zlos/__ho:__bla ma zhi khro'i lha tshogs dgongs:__bdag gis 'gro ba kun don du:__so thar byang sems rig 'dzin gyi:__sdom pa ma lus yongs su bzung :__byang chub bar du mi btang na:__thugs rjes byin gyis brlab tu gsol:_lan gsum/__de nas dbang gi gzhi dgod pa'i slad du ye shes pa dbab pa yin pas khyed rang rnams lus gnad bsrang*/__rlung ro bsal/__dran pa rtse gcig pas dmigs pa 'di ltar sgoms shig__/da ltar gyi slob dpon la bla ma yi dam dbyer med pa'i mos gus drag tu byas pa dang :__hrI hrI zhes rdo rje'i sngags kyi sgra bsgrags pa'i rkyen gyis slob ma'i lus sogs gzung 'dzin gyi snang ba thams cad nam mkha' la sprin dengs pa ltar stong par sbyangs:__stong pa'i ngang las rdo rje'i srung ba'i 'khor lo gzhal med khang dwangs gsal 'od kyi rang bzhin can gyi dbus su pad+ma dang nyi zla'i gdan la khyed rang rnams skad cig gis thugs rje chen po pad+ma'i rgyal po sku mdog bye ru'i sdong po la til mar gyis byugs par nyi 'od khyab pa lta bu:__zhal gcig phyag bzhi pa:__'dzum zhing chags la cung zad khro ba'i nyams can:__phyag dang po gnyis thugs kar thal mo sbyar ba'i bar du pad+ma rA ga'i rdo rje rtse lnga pa bsnams pa:__g.yas 'og mas mu tig dmar po'i phreng ba dang :__g.yon 'og mas ut+pal dmar po'i sdong bu bsnams pa:__yum yi ge drug ma gsang ba ye shes dmar mo DA ma ru dang thod chang bsnams pas 'khril ba:__gnyis ka'ang dar dang rin chen rus pa dang me tog gi rgyan gyis brgyan pa:__zhabs rdo rje dang pad+ma'i skyil mo krung gis thugs rje'i 'od zer dmar po 'phro ba'i klong na bzhugs pa:__'khor lo lnga'i dbus su rigs lnga yab yum dang :__dbang po bzhi'i g.yas g.yon du sems dpa' yab yum mnyam par sbyor zhing :__dpung pa g.yas su sras nor bu 'dzin pa:__g.yon du sras mo gsang sngags 'dzin ma:__spyi bo la sogs pa'i gnas drug tu thub pa drug:__yan lag bzhi la khro chen bzhi:__ba spu'i bu ga thams cad du bskal bzang gis sems dpa' stong dang khrag 'thung lnga bcu rtsa brgyad sogs rtsa gsum rgyal ba rab 'byams til gyi gong bu kha bye ba ltar shigs ser bzhugs pa:__spyi bo'i gtsug tu pad+ma dang nyi zla'i gdan la drin can rtsa ba'i bla ma o rgyan pad+ma rdo rje 'chang gi rnam pa sku mdog dmar po rdo rje dang dril bu 'dzin pas yum bde ba'i dbang phyug ma dmar skya pad+ma dril bu 'dzin pa 'khril ba:__gnyis ka'ang dar dang rin po che dang rus pa'i rgyan gyis brgyan pa:__zhabs rdo rje'i skyil mo krung gis 'ja' 'od thig le rig 'dzin dpa' bo mkha' 'gro'i sprin phung 'phro ba'i klong na bzhugs pa'i gtso 'khor thams cad kyi gnas gsum yig 'bru gsum gyis mtshan par gsal thob:__slob dpon mdun bskyed dang bcas pa'i ye shes kyi 'od zer mkha' khyab tu 'phros pas:__bla ma yi dam zhi khro rab 'byams kyi thugs rgyud bskul:__gsang ba gsum gyi ye shes lha sngags phyag mtshan gyi rnam par spyan drangs te slob ma rnams la thim pas rgyud byin gyis brlabs par mos shig:__/sbyar spos bsreg__/dbyangs rol bcas/__hU~M hrI:__sngon gyi bskal pa'i dang po la:__o rgyan yul gyi nub byang mtshams:__d+ha na ko Sha'i mtsho gling du:__pad+ma ge sar sdong po la:__ya mtshan mchog gi dngos grub brnyes:__pad+ma 'byung gnas zhes su grags:__'khor du mkha' 'gro mang pos bskor:__khyed kyi rjes su bdag sgrub kyi:__byin gyis rlob phyir gshegs su gsol:__ri po ta la'i pho brang nas:__thugs rje chen po gshegs su gsol:__nub phyogs o rgyan dur khrod nas:__gsang ba ye shes gshegs su gsol:__gzhan yang phyogs bcu'i zhing khams nas:__rtsa gsum rgya mtsho gshegs su gsol:__gnas mchog 'di ru byin phob la:__sgrub mchog bdag la dbang bzhi skur:__bgegs dang log 'dren bar chad sol:__mchog dang thun mong dngos grub stsol:__oM AHhU~M badz+ra gu ru d+he wa d+hA ki nI lo ke shwa ra pad+ma rA dza badz+ra sa ma ya dzaHdzaHsid+d+hi pha la hU~M AH__ces brjod la dbab/__hU~M hU~M hU~M zhes byin bsdu dzaHhU~M ba~M hoHsa bstim/__ye shes pa'i byin rlabs sgo gsum la rab tu gnas par byas pa mos shig__/tiSh+Tha badz+ra sa ma ya s+t+wa~M:__zhes brtan par bya/__dngos gzhi'i dbang la sku gsung thugs kyi dbang gsum rim bzhin 'byung ba yin pas 'dun pa 'di ltar mdzod/__chos dbyings 'od gsal gyi gzhal med khang chen po mtshon pa'i rnam rgyal bum pa'i nang du/__rig pa ye shes pad+ma zhi khro'i dkyil 'khor gyi lha tshogs mtshon pa'i rdo rje bdud rtsi'i bcud du 'khyil ba gnyis med zung 'jug lhag pa byang chub sems kyis dbang bskur bas/__lus gdos bcas su 'dzin pa'i dri ma dag__/snang stong lha'i rnal 'byor bsgom pa la dbang*/__sku rdo rje sprul pa'i sku mngon du 'thob pa'i skal ba can du byas par mos shig__/rnam bum spyi bor bzhag cing bum chu sbyin la/__oM:_bkra shis 'od gsal dbyings kyi bum pa na:__ye shes rig pa'i lha tshogs bdud rtsir 'khyil:__gnyis med byang chub sems kyi dbang bskur bas:__snang stong sku yi dbang mchog thob par shog:__oM hU~M trA~M hrIHAHka la sha kA ya a b+hi Shiny+tsa oM:__gnas pa rtsa dang g.yo ba rlung gi rang bzhin can gyi phung po snod kyi ngo bo pad+ma b+hany+dza'i nang du dngos grub thogs med du sgrub par nus pa rang byung rdo rje'i sngags kyi ye shes bdud rtsi'i bcud gnyis med zung 'jug bde ba chen po'i rgyun gyis dbang bskur bas/__sgra skad tha mal du 'dzin pa'i dri ma dag__/grags stong rdo rje'i bzlas brjod bya ba la dbang*/__gsung rdo rje longs sku mngon tu 'thob pa'i skal ba can du byas par mos shig__/ban+d+ha mgrin par bzhag cing bdud rtsi sbyin la/__AH__rtsa rlung phung po snod kyi b+han+d+ha ru:__nus pa sngags kyi ye shes bcud du 'khyil:__gnyis med bde ba chen po'i dbang bskur bas:__grags stong gsung gi dbang mchog thob par shog:__bo d+hi tsit+ta wA ka a b+hi Shiny+tsa AH__sems byung gi rtog tshogs rang sar zhi ba'i dbyings spros bral mtshon pa me long dri ma med pa'i nang du/__ma 'gags rang rtsal 'khor 'das kyi gzugs brnyan ji ltar shar yang gsal stong shar grol 'dzin pa med pa nyams su myong ba gnyis med zung 'jug blo 'das chen po'i dbang bskur bas/__sems rtog rang ga mar zhen pa'i dri ma dag__/rig stong 'od gsal de kho na nyid bsgom pa la dbang*/__thugs rdo rje chos sku mngon tu 'thob pa'i skal ba can tu byas par mos shig__/me long snying gar bzhag cing mig lam du bstan la/__hU~M:__me long dwangs pa rtog tshogs dbyings su zhi:___gzugs brnyan ma 'gags gsal stong nyams su myong :__gnyis med blo las 'das pa'i dbang bskur bas:__rig stong thugs kyi dbang mchog thob par shog:__d+harma d+hA tu tsit+ta a b+hi Shiny+tsa hU~M:__me tog 'thor la smon lam ni/__skal ldan rigs kyi bu rnams la bla ma thugs rje chen po pad+ma zhi khro rnam par rol pa'i lha tshogs rnams kyi sku gsung thugs kyi dbang bskur bas:__lus ngag yid gsum gyi dri ma bag chags dang bcas pa thams cad dag:__rdo rje gsum gyi ye shes mngon du byed pa'i skal ba dang ldan par gyur cig:__deng phyin chad 'di ltar shar ba'i snang grags rtog pa'i chos thams cad pad+ma zhi khro rnam par rol pa'i sku gsung thugs dang dbyer med par shes pas nyams len chu bo'i rgyun gyi rnal 'byor la brtson par gyis shig:__ces gdams/__dgos pa yod cing spro na 'dir myang grol ril bu'i dbang gzhung gsal sbyar/__de nas dbang don gyi snying po bsdus pa byin rlabs gtor ma'i brda dbang bskur ba la dmigs pa 'di bzhin mdzod/__gtor snod ye shes rang snang gi gzhal med khang 'ja' zer thig le 'od phung 'khyil ba'i klong du gtor ma thugs rje chen po pad+ma'i rgyal po yum yi ge drug ma dang mnyam par sbyor zhing nor 'dzin dang gsang 'dzin g.yas g.yon tu bzhugs pa'i spyi bor rigs bdag pad+ma rdo rje 'chang yab yum/__'khor rgyal ba rigs lnga/__sems dpa' lcam dral bcu drug bskal bzang gi sems dpa' stong*/__sgo ba yab yum brgyad/__steng gi nam mkhar khrag 'thung lnga bcu rtsa brgyad/__gzhan yang rtsa gsum rgyal ba rab 'byams thams cad til gyi gong bu kha phye ba ltar bde stong phung po shigs ser bzhugs pa/__de nyid khyed rang rnams kyi spyi bor spyan drangs shing byin gyis brlabs pa la mos gus drag tu bskyed pa'i rkyen gyis gtso 'khor thams cad kyi gnas gsum yi ge 'bru gsum gyis mtshan pa las 'od zer dkar dmar mthing gsum gyi rgyun babs/__khyed rang rnams kyi gnas gsum du thim pas sku gsung thugs yongs su rdzogs pa'i dbang dang byin rlabs thob/__sgo gsum gyi sgrib pa bag chags dang bcas pa dag__/bskyed bzlas rdzogs pa'i rnal 'byor la dbang*/__sku gsum gyi go 'phang mngon du 'thob pa'i skal ba can du byas par mos shig__/gtor chen thogs la/__oM AHhU~M:__rigs kun khyab bdag bla ma rdo rje 'chang :__pad+ma zhi khro rnam par rol pa'i lha:__rtsa gsum rgyal ba rgya mtsho'i tshogs rnams kun:__dad mos can gyi spyi bor mngon sum byon:__nam mkha' chu la 'ja' tshon shar ba ltar:__ye shes 'od zer slob ma'i gnas gsum thim:__sku gsung thugs kyi byin rlabs rgyud la zhugs:__smin grol zung 'jug don gyi dbang thob shog:__bsnyen sgrub sngags mthar/__kA ya a b+hi Shiny+tsa oM:__wA ka a b+hi Shiny+tsa AH__tsit+ta a b+hi Shiny+tsa hU~M:__zhes gnas gsum du reg__/slar spyi bor bzung la sngags mthar/__dz+nyA na a b+hi Shiny+tsa a AH__zhes brjod pas/__lha tshogs thams cad dgyes pa chen pos bde stong gi ngo bor 'od du zhu:__slob ma la thim pas dbang bzhi pa'i ye shes rgyud la skyes par mos shig:__de rnams kyis sku gsung thugs sgom zhing sgrub pa'i snod du 'gyur zhing don gyi dbang rdzogs pa yin no/__/shis pa brjod/__des thugs rje chen po pad+ma rgyal po zhi khro rnam par rol pa'i don dbang 'bring po dang*/__snying po bsdus pa gtor dbang bcas legs par grub pa lags pas zhes sogs kyis mtshams sbyar la dam tshig bsgrag bzung*/__gtang rag maN+Dal sogs dbang gi rjes spyi ltar dang*/__slob dpon gyis tshogs la rol cing lhag ma btang*/__bskul ba chad brtan rta brau/__gtang rags mchod bstod/__nongs bshags/__mdun bskyed ye shes brten yod med dang bstun pa'i gshegs bzhugs gang 'os/__dam tshig pa rang la bstim/__bdag bskyed bsdu ldangs/__bsngo smon shis brjod kyi bar rjes rim ltar bya'o/__/yang gtor dbang kho na bskur na/__khrus/__bgegs bskrad/__gsol gdab/__rgyun bshags gang 'os dang*/__byin 'bebs nas gtor dbang la 'jug pas grub bo/__/pad+ma rnam par rgyas pa'i 'dzum zhal gyis/__/thar mchog bde chen zhing du dbugs dbyung nas/__/rigs bdag mtha' yas tshangs pa'i dbyangs snyan gyis/__/byang chub chen por lung bstan stsal gyur cig__/ces rmad du byung ba'i zab chos kyi zhabs tog dang rang gzhan la nye bar mkho ba'i cha rkyen du dmigs nas/__pad+ma gar dbang phrin las 'gro 'dul rtsal gyis rdzong gsar bkra shis lha rtse'i chos grwar bgyis pa dge legs 'phel//__//___

Footnotes

Other Information