JKW-KABAB-03-GA-001

From Khyentse Lineage - A Tsadra Foundation Project

‎‎

བླ་མའི་ཐུགས་སྒྲུབ་བར་ཆད་ཀུན་སེལ་ལས༔ འཕགས་མ་སྒྲོལ་མའི་སྒྲུབ་ཐབས་འཇིགས་པ་ཀུན་སེལ།
Wylie title bla ma'i thugs sgrub bar chad kun sel las 'phags ma sgrol ma'i sgrub thabs 'jigs pa kun sel JKW-KABAB-03-GA-001.pdf
Location mkhyen brtse'i bka' babs
Volume 3, Text 1, Pages 1-21 (Folios 1a to 11a6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön མཆོག་གྱུར་གླིང་པ་ (mchog gyur gling pa)
Citation 'jam dbyangs mkhyen brtse'i dbang po. bla ma'i thugs sgrub bar chad kun sel las 'phags ma sgrol ma'i sgrub thabs 'jigs pa kun sel. In Rdzong sar 'jam dbyangs mkhyen brtse'i dbang po'i bka' babs, Vol. 3: 1-21. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Revelations - gter ma  ·  Root Treasure - gter gzhung  ·  Sadhanas - Evocation Ritual - sgrub thabs
Cycle འཕགས་མ་སྒྲོལ་མ་འཇིགས་པ་ཀུན་སེལ་ ('phags ma sgrol ma 'jigs pa kun sel)
Parent Cycle བླ་མའི་ཐུགས་སྒྲུབ་བར་ཆད་ཀུན་སེལ་ (bla ma'i thugs sgrub bar chad kun sel)
Deity sgrol ma
Karchag page JKW-KABAB-Volume-03-GA-Karchag
RTZ In the Rinchen Terdzö: https://rtz.tsadra.org/index.php/Terdzo-CHI-037
Colophon

རྩོད་བྲལ་དུས་བབས་ཀྱི་སྤྲུལ་པའི་གཏེར་སྟོན་ཆེན་པོ་ཨོ་རྒྱན་མཆོག་གྱུར་བདེ་ཆེན་གླིང་པས་མདོ་ཁམས་ཤར་ཕྱོགས་ཕྲིན་ལས་འགྲོ་བ་འདུལ་བའི་གནས་ཆེན་བརྒྱད་ཀྱི་ཡ་གྱལ་རི་བོ་དབང་ཞུའི་བྲག་ནས་སྤྱན་དྲངས་པའི་ཤོག་སེར་གྱི་བུ་དཔེ་ཕྱག་བྲིས་དངོས་ལས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་བཤུས་པ་དགེ་ལེགས་སུ་གྱུར་ཅིག།

rtsod bral dus babs kyi sprul pa'i gter ston chen po o rgyan mchog gyur bde chen gling pas mdo khams shar phyogs phrin las 'gro ba 'dul ba'i gnas chen brgyad kyi ya gyal ri bo dbang zhu'i brag nas spyan drangs pa'i shog ser gyi bu dpe phyag bris dngos las mtsho skyes bla ma dgyes pa'i 'bangs mkhyen brtse'i dbang pos zhal bshus pa dge legs su gyur cig

[edit]
༁ྃ༔ བླ་མའི་ཐུགས་སྒྲུབ་བར་ཆད་ཀུན་སེལ་ལས༔ འཕགས་མ་སྒྲོལ་མའི་སྒྲུབ་ཐབས་འཇིགས་པ་ཀུན་སེལ་ཞེས་བྱ་བ་བཞུགས་སོ༔

༔ཕྱི་འཇིགས་པ་བཅུ་དྲུག་གི་བར་ཆད་སེལ་བ།

༁ྃ༔ ༡༢༣༔ འཕགས་མ་སྒྲོལ་མ་ལ་ཕྱག་འཚལ་ལོ༔ ཤིན་ཏུ་གསང་བའི་གསང་བ་མཆོག༔ གཙོ་བོའི་སྦས་ཡུམ་ཁ་ཊྭཱཾ་ག༔ ཕྱི་ལྟར་རྗེ་བཙུན་སྒྲོལ་མ་སྟེ༔ ནང་ལྟར་བཛྲ་ཝཱ་རཱ་ཧཱི༔ གསང་བ་ཡེ་ཤེས་མཚོ་རྒྱལ་ཡུམ༔ ཡང་གསང་འཆི་མེད་མནྡར༔ དོན་དམ་ཤེས་རབ་ཕ་རོལ་ཕྱིན༔ རྣམ་པ་རྟགས་ཀྱི་ཕྱག་རྒྱར་སྣང་༔ མཆོག་ཏུ་མི་འགྱུར་གསང་བའི་ལྕམ༔ སྲས་བཅས་རྒྱལ་ཀུན་སྐྱེད་པ་དང་༔ བདེ་ཆེན་རོལ་པའི་བཙུན་མོ་ནི༔ མྱུར་མ་དཔའ་མོའི་སྒྲུབ་པའི་ཐབས༔ མ་འོངས་རྗེས་འཇུག་རྣལ་འབྱོར་རྣམས༔ ཕྱི་ཡི་བར་ཆད་ཀུན་སེལ་ཕྱིར༔ རང་བྱུང་པདྨ་བདག་གིས་བསྟན༔ ས་མ་ཡ༔ སྐྱབས་སེམས་ཚོགས་བསགས་སྔོན་སོང་ནས༔ ཨཿ སྟོང་གསལ་རང་རིག་གཉུག་མའི་དབྱིངས༔ ཡེ་ཤེས་རོལ་པའི་སྣང་ཆ་ལས༔ པད་དཀར་ཟླ་བ་རྒྱས་པའི་སྟེང་༔ ཏཱྃ་ཡིག་ལྗང་གུའི་འོད་ཟེར་གྱིས༔ འཕགས་མཆོད་འགྲོ་ཀུན་བར་ཆད་བསལ༔ ཚུར་འདུས་སྐད་ཅིག་དྲན་རྫོགས་སུ༔ རྡོ་རྗེ་སྲུང་བའི་གུར་ཆེན་དབུས༔ བདག་ཉིད་རྗེ་བཙུན་སྒྲོལ་མ་ལྗང་༔ ཞལ་གཅིག་ཕྱག་གཉིས་ཞི་ཞིང་འཛུམ༔ ཕྱག་གཡས་མཆོག་སྦྱིན་ཕྱག་རྒྱ་མཛད༔ གཡོན་པས་སྐྱབས་སྦྱིན་ཨུཏྤལ་བསྣམས༔ དར་དང་རིན་ཆེན་རྒྱན་གྱིས་སྤྲས༔ ཟླ་བའི་རྒྱབ་ཡོལ་ལ་བརྟེན་ནས༔ སྣང་སྟོང་འོད་ལྔ་འཁྲིགས་པའི་ཀློང་༔ ཞབས་གཉིས་ཕྱེད་སྐྱིལ་རོལ་པས་བཞུགས༔ སྐུ་ལས་རང་འདྲའི་རྗེ་བཙུན་མ༔ ནམ་མཁའ་གང་བར་རབ་སྤྲོ་བས༔ འགྲོ་རྣམས་གནས་སྐབས་མཐར་ཐུག་གི༔ འཇིགས་པ་ཀུན་ལས་སྐྱོབ་མཛད་པའི༔ གནས་གསུམ་རྡོ་རྗེའི་འབྲུ་གསུམ་མཚན༔ རང་འདྲའི་ཡེ་ཤེས་སྤྱན་དྲངས་བསམ༔ ཏཱྃ༔ སྐྱེ་མེད་འོད་གསལ་ཆོས་སྐུའི་དབྱིངས༔ འགགས་མེད་འཕགས་མའི་ཡེ་ཤེས་སྐུར༔ གང་འདུལ་སྒྱུ་འཕྲུལ་དྲྭ་བར་ཤར༔ ཚུར་གཤེགས་ཨཱརྻ་ཏཱ་རེ་ཛ༔ ཛཿཧཱུྃ་བྃ་ཧོཿ ནམ་མཁའ་གང་བའི་དབང་གི་ལྷས༔ དབང་བསྐུར་སྣང་མཐས་དབུར་བརྒྱན་བསམ༔ ཨོཾ་ཨཱརྻ་ཏཱ་རེ་ས་པ་རི་ཝཱ་ར་ཨརྒྷཾ་སོགས༔ ཨོཾ༔ སྣང་བ་མཐའ་ཡས་པདྨའི་རིགས༔ འཇིག་རྟེན་དབང་ཕྱུག་ཞལ་ལས་བྱུང་༔ སངས་རྒྱས་ཀུན་གྱི་ཕྲིན་ལས་རྫོགས༔ འཕགས་མ་སྒྲོལ་མར་ཕྱག་འཚལ་བསྟོད༔ བདག་ཅག་འཁོར་དང་བཅས་རྣམས་ཀྱི༔ འཇིགས་པ་བརྒྱད་དང་བཅུ་དྲུག་སོགས༔ མི་མཐུན་ཕྱོགས་ཀུན་ཞི་བ་དང་༔ རྟག་ཏུ་ཐུགས་རྗེས་བསྐྱང་མཛད་གསོལ༔ ཐུགས་ཀར་པདྨ་ཟླ་བའི་སྟེང་༔ ཏཱྃ་ཡིག་ལྗང་གུའི་མཐའ་སྐོར་དུ༔ རྡོ་རྗེའི་ཡི་གེ་བཅུ་པས་བསྐོར༔ བཟླས་པས་སྔགས་རྣམས་སྒྲར་བཅས་འཁོར༔ འོད་ཟེར་དཔག་ཡས་ཕྱོགས་བཅུར་འཕྲོས༔ འཕགས་མཆོད་བྱིན་རླབས་རང་ལ་ཐིམ༔ འགྲོ་ཀུན་འཇིགས་པ་ཀུན་བསལ་ནས༔ འཕགས་མ་སྒྲོལ་མའི་གོ་འཕང་བཀོད༔ བདག་གི་ལུས་ངག་ཡིད་གསུམ་དང་༔ རྗེ་བཙུན་འཕགས་མའི་སྐུ་གསུང་ཐུགས༔ དབྱེར་མེད་སྲུང་བ་ཆེན་པོར་བསམ༔ ཨོཾ་ཨཱཿཧཱུྃ་ཞེས་པས་སྒོ་གསུམ་རྡོ་རྗེ་གསུམ་གྱི་ཡེ་ཤེས་སུ་བྱིན་གྱིས་བརླབས་ཏེ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཞེས་སྨྲ་བ་བཅད་དེ་འབུམ་ཕྲག་ལ་སོགས་པ་བཟླས་པས་བཅོམ་ལྡན་འདས་མས་བྱིན་གྱིས་རློབ་པར་འགྱུར་རོ༔ འཇིགས་པ་ཐམས་ཅད་ཞི་བར་འགྱུར་རོ༔ བསམ་པའི་དོན་ཐམས་ཅད་འགྲུབ་པར་འགྱུར་རོ༔ རྟག་ཏུ་ཚེ་རབས་དྲན་ཅིང་མི་བརྗེད་པའི་གཟུངས་ཐོབ་པར་འགྱུར་རོ༔ བར་དོར་ཡང་རྗེ་བཙུན་མས་རྗེས་སུ་འཛིན་ཅིང་འཇིགས་པ་ཐམས་ཅད་ལས་གྲོལ་བར་འགྱུར་རོ༔ སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་རོ༔ ཐུན་བསྡུ་བ་ན་ལྷ་སྐུ་འོད་གསལ་དུ་སྦྱངས་ཏེ་མཉམ་པར་འཇོག༔ ཐུན་མཚམས་སུ་འཇུག་པའི་ཚེ་སླར་ཡང་ལྷར་ལངས་རྟེན་གསུམ་ལ་བསྐོར་བ་དང་༔ ཡན་ལག་བདུན་པ་དང་༔ མཎྜལ་སོགས་ལ་བརྩོན་པར་བྱའོ༔ ས་མ་ཡ༔ སློབ་མ་རྗེས་སུ་འཛིན་འདོད་ན༔ དཀྱིལ་འཁོར་མཚན་མའི་རྫས་བཤམས་ཏེ༔ སྒོམ་བཟླས་བྱ་བ་སྔོན་སོང་ནས༔ སློབ་མས་གསོལ་བ་འདི་སྐད་གདབ༔ ཨེ་མ་སངས་རྒྱས་ཐམས་ཅད་ཀྱི༔ ཕྲིན་ལས་བདག་ཉིད་འཕགས་མ་དང་༔ དབྱེར་མེད་རྡོ་རྗེ་སློབ་དཔོན་གྱིས༔ བདག་ལ་བྱིན་གྱིས་བརླབ་ཏུ་གསོལ༔ སྐྱབས་འགྲོ་སེམས་བསྐྱེད་ཚོགས་བསགས་བྱ༔་་་དཀོན་མཆོག་གསུམ་ལ་བདག་སྐྱབས་མཆི་སོགས་དང༌། རྗེ་བཙུན་འཕགས་མ་སྒྲོལ་མ་དང་སོགས་ཀྱི་ཡན་ལག་བདུན་པ་བྱ། དེ་ནས་བུམ་པའི་བདུད་རྩིས་བཀྲུ༔ ཨོཾ༔ བཀྲ་ཤིས་བུམ་པའི་བདུད་རྩིའི་ཆུས༔ སྐལ་ལྡན་ཁྱོད་ལ་ཁྲུས་བགྱིས་པས༔ བག་ཆགས་དྲི་མ་ཀུན་བྱང་ནས༔ འཕགས་མའི་ཕྱག་རྒྱ་མངོན་གྱུར་ཤོག༔ རྩ་སྔགས་དང་༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ སརྦ་པཱ་པཾ་ཨཱ་ཝ་ར་ཎ་བི་ཤོ་དྷ་ན་སྭཱ་ཧཱ༔ ཞེས་པས་དབང་བསྐུར་བདུད་རྩིའི་ཆུས༔ ལུས་གང་སྒྲིབ་དག་སྐད་ཅིག་གིས༔ སྒྲོལ་མའི་སྐུ་རུ་གྱུར་པ་ལ༔ ཡེ་ཤེས་ལྷ་ཡི་ཕྱག་རྒྱ་བསྟིམ༔ ཨོཾ༔ སྣང་སྟོང་དབྱེར་མེད་རྡོ་རྗེའི་སྐུ༔ རྗེ་བཙུན་འཕགས་མའི་སྐུ་ཡི་དབང་༔ དེ་རིང་སྐལ་ལྡན་ཁྱོད་ལ་བསྐུར༔ རྡོ་རྗེའི་སྐུ་རུ་འགྲུབ་པར་མཛོད༔ རྩ་སྔགས་དང་ཀཱ་ཡ་ཨ་བྷི་ཥིཉྩ་ཨོཾ༔ བཟླས་པའི་ལུང་བྱིན་སྔགས་ཕྲེང་ལས༔ འཇིགས་པའི་ཚོགས་ཀུན་སྐྱོབ་པ་ཡི༔ འཕགས་མ་སྒྲོལ་མ་མཁའ་ཁྱབ་འཕྲོས༔ འགྲོ་འདུལ་མཛད་པ་ཡོངས་རྫོགས་བསམ༔ བརྟན་ཕྱིར་སྔགས་ཕྲེང་མགྲིན་པར་བཞག༔ ཨཱཿ གྲགས་སྟོང་དབྱེར་མེད་རྡོ་རྗེའི་གསུང་༔ རྗེ་བཙུན་འཕགས་མའི་གསུང་གི་དབང་༔ དེང་འདིར་སྐལ་ལྡན་ཁྱོད་ལ་བསྐུར༔ རྡོ་རྗེའི་གསུང་དུ་འགྲུབ་པར་ཤོག༔ ཝཱཀ་ཨ་བྷི་ཥིཉྩ་ཨཱཿ ཕྱག་མཚན་ཨུཏྤལ་སྙིང་གར་བསྟིམ༔ ཐུགས་དང་དབྱེར་མེད་མཉམ་པར་འཇོག༔ ཧཱུྃ༔ རིག་སྟོང་དབྱེར་མེད་རྡོ་རྗེའི་ཐུགས༔ རྗེ་བཙུན་འཕགས་མའི་ཐུགས་ཀྱི་དབང་༔ དེང་འདིར་སྐལ་ལྡན་ཁྱོད་ལ་བསྐུར༔ རྡོ་རྗེའི་ཐུགས་སུ་འགྲུབ་པར་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ གཏོར་མ་ལྷར་གསལ་སྤྱི་བོར་བཞག༔ ཏཱྃ༔ གཏོར་མ་ལྷ་ཡི་ཕྱག་རྒྱར་རྫོགས༔ ཐུགས་རྗེའི་འོད་ཕུང་ལམས་སེ་ལམ༔ རྗེ་བཙུན་སྒྲོལ་མའི་བྱིན་རླབས་ཀྱིས༔ སྐལ་ལྡན་སྨིན་ཅིང་གྲོལ་བར་ཤོག༔ ཀཱ་ཡ་ཝཱཀ་ཙིཏྟ་གུ་ཎ་ཀརྨ་བ་ལིཾ་ཏ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ ལྷ་བསྟིམ་ཤིས་བརྗོད་མེ་ཏོག་འཐོར༔ རྗེས་ཀྱི་བྱ་བ་སྤྱི་ལྟར་བྱ༔ འཇིགས་པ་སོ་སོ་ཞི་བའི་ཕྱིར༔ སྒྲོལ་མ་སོ་སོའི་དབང་བསྐུར་ན༔ ལྷ་སྔགས་བསྒྱུར་ལ་གོང་ལྟར་བསྐུར༔ བྱིན་རླབས་རྟགས་མཚན་མྱུར་དུ་འབྱུང་༔ ས་མ་ཡ༔ དེ་ནས་ལས་ཀྱི་ཁ་བསྒྱུར་ལ༔ ས་ཡི་འཇིགས་པ་ཞི་བྱའི་ཕྱིར༔ རང་ཉིད་རྡོ་རྗེ་སྒྲོལ་མ་མཐིང་༔ ཕྱག་གཡས་མཆོག་སྦྱིན་གཡོན་པ་ནི༔ སྐྱབས་སྦྱིན་ཕྱག་རྒྱས་ཨུཏྤ་ལ༔ རྡོ་རྗེ་རྩེ་ལྔས་མཚན་པ་བསྣམས༔ དར་དང་རིན་ཆེན་རྒྱན་གྱིས་བརྒྱན༔ གནས་གསུམ་བྱིན་རླབས་ཡེ་ཤེས་བསྟིམ༔ དབང་བསྐུར་མཆོད་བསྟོད་གསོལ་བ་གདབ༔ ཐུགས་ཀར་ཟླ་སྟེང་ཏཱྃ་མཐིང་ག༔ མཐའ་སྐོར་སྔགས་ཀྱི་ཕྲེང་བས་བསྐོར༔ འོད་ཟེར་རྡོ་རྗེའི་རང་བཞིན་འཕྲོས༔ འཕགས་མཆོད་འགྲོ་བའི་དོན་ཀུན་བྱས༔ ཁྱད་པར་ང་རྒྱལ་ལས་གྱུར་པའི༔ ས་ཡི་འཇིགས་པ་ཀུན་ཞི་བསམ༔ རྩ་སྔགས་ཡི་གེ་བཅུ་པའི་མཐར༔ མ་མ་སརྦ་ལྃ་ལྃ་བྷཱ་ཡ་ཤཱནྟིཾ་ཀུ་རུ༔ ཞེས་པ་སྭཱ་ཧཱའི་གོང་དུ་སྤེལ༔ གཞན་ཡང་རྩ་བའི་སྔགས་ཤམ་དུ༔ ས་ར་ཙཀྲ་ཧྲྀ་དི་པུ་ནེ་ཡེ་ལྃ་ཙ་ལ་སྟྭཾ་བྷཱ་ཡ་ནན༔ ཞེས་བྲིས་གུར་གུམ་གི་ཝཾ་བྱུགས༔ རིན་ཆེན་སྣ་ཚོགས་བསྲེས་པ་ཡི༔ སཱཙྪར་བཅུག་ལ་འཆང་བའམ༔ གནོད་པའི་ཕྱོགས་སུ་བཞག་པ་ཡིས༔ ས་གཡོས་རི་རུད་ཐོག་བརྡིབ་སོགས༔ ས་ཡི་འཇིགས་པ་ཐམས་ཅད་ཀུན༔ སྲུང་དང་ཞི་དང་ཕྱིར་བཟློག་འགྱུར༔ ས་མ་ཡ༔ ཆུ་ཡི་འཇིགས་སྐྱོབ་སྒྲོལ་མ་དམར༔ ཕྱག་གཡོན་ནོར་བུ་མེ་ཤེལ་གྱིས༔ མཚན་པའི་ཨུཏྤལ་བསྣམས་པར་གསལ༔ སྔགས་ཀྱི་ཕྲེང་བའི་འོད་ཟེར་གྱིས༔ ཆུ་ཡི་འཇིགས་པ་ཞི་བར་བསྒོམ༔ མ་མ་སརྦ་བྃ་བྃ་ཛ་ལ་བྷཱ་ཡ་ཤཱནྟིཾ་ཀུ་རུ༔ ཞེས་དང་རྩ་སྔགས་སྤེལ་ལ་བཟླ༔ སེང་ལྡེང་ཕུར་པ་སྔགས་བཏབ་བཅང་༔ ཆུ་ཆེན་གྲུ་དང་ཤྭ་འུད་སོགས༔ འདོད་ཆགས་ཆུ་ཡི་གནོད་པ་སེལ༔ ས་མ་ཡ༔ མེ་ཡི་འཇིགས་སྐྱོབ་སྒྲོལ་མ་སེར༔ ཕྱག་གཡོན་ནོར་བུ་ཆུ་ཤེལ་ནི༔ ཆུ་རྒྱུན་འབེབས་པ་བསྣམས་པར་གསལ༔ རྩ་སྔགས་ཡི་གེ་བཅུ་པའི་ཁོང་༔ མ་མ་སརྦ་རྃ་རྃ་ཛྭ་ལ་བྷཱ་ཡ་ཤཱནྟིཾ་ཀུ་རུ༔ ཞེས་སྤེལ་ཆུ་ཤིང་ཕུར་པ་ལ༔ སྔགས་ཀྱིས་བཏབ་པ་འཆང་བ་ཡིས༔ ཞེ་སྡང་མེ་ཡི་འཇིགས་པ་ཞི༔ ས་མ་ཡ༔ རླུང་གི་འཇིགས་སྐྱོབ་སྒྲོལ་མ་དཀར༔ ཕྱག་གཡོན་འཁོར་ལོས་མཚན་པ་ཡི༔ རི་རབ་བསྣམས་པའི་སྐུར་གསལ་ལ༔ མ་མ་སརྦ་ཡྃ་ཡྃ་ཙ་ལ་བྷཱ་ཡ་ཤཱཏྣིཾ་ཀུ་རུ༔ ཞེས་དང་རྩ་སྔགས་སྤེལ་ལ་བཟླ༔ ཙནྡན་ཕུར་པ་སྔགས་བཏབ་བཅང་༔ རླུང་ཆེན་འཁྲུགས་དང་གཡང་ལྷུང་སོགས༔ ཕྲག་དོག་རླུང་གི་འཇིགས་པ་ཞི༔ ས་མ་ཡཿ རྡོ་རྗེའི་འཇིགས་སྐྱོབ་སྒྲོལ་མ་ལྗང་༔ ཕྱག་གཡོན་སྣ་ཚོགས་རྡོ་རྗེ་དམར་པོ་ཡིས༔ མཚན་པའི་ཨུཏྤལ་བསྣམས་པར་གསལ༔ སྔགས་འདི་རྩ་སྔགས་སྤེལ་ལ་བཟླ༔ མ་མ་སརྦ་ཨེ་ཨེ་མ་ཧཱ་ཧ་ན་བྷཱ་ཡ་ཤཱནྟིཾ་ཀུ་རུ༔ གྲི་ལྕགས་རལ་གྲི་སོར་བཞི་པར༔ བཏབ་ནས་འཆང་བ་ཙམ་གྱིས་ཀྱང་༔ གནམ་ལྕགས་ཐོག་སེར་འཇིགས་པ་སྲུང་༔ ས་མ་ཡ༔ མཚོན་ཆའི་འཇིགས་སྐྱོབ་སྒྲོལ་མ་སྔོ༔ ཕྱག་གཡོན་རལ་གྲི་བསྣམས་པར་གསལ༔ མ་མ་སརྦ་ཏིག་ཏིག་ཏཱིཀྵྞ་རཀྵ་རཀྵ་ཀུ་རུ༔ ཞེས་པ་རྩ་སྔགས་སྤེལ་ལ་བཟླ༔ ལོངས་སུ་མ་སྤྱད་རྒྱ་ཁབ་ལ༔ སྔགས་བཏབ་གོང་བའི་ནང་དུ་འཆང་༔ མཚོན་ཆའི་འཇིགས་པ་ཀུན་ལས་སྲུང་༔ ས་མ་ཡ༔ རྒྱལ་པོའི་འཇིགས་སྐྱོབ་སྒྲོལ་མ་དམར༔ ཕྱག་གཡོན་ལྕགས་ཀྱུ་བསྣམས་པར་གསལ༔ རྩ་བའི་སྔགས་ལ་འདི་སྤེལ་བཟླ༔ མ་མ་སརྦ་རཱ་ཛ་དུཥྟཱན་ཀྲོ་དྷ་ཤཱནྟིཾ་ཀུ་རུ༔ མེ་ཏོག་དམར་པོར་སྔགས་འདི་བཏབ༔ མེ་ལ་བསྲེགས་པས་དབང་དུ་འགྱུར༔ སརྦ་རཱ་ཛ་དུཥྟཱན་ཧ་ཡེ་མོ་ཧ་ཧ་ར་ཧ་ར་ཛཿཛཿ རྒྱལ་པོ་ཁྲོས་པས་སྡང་བ་དང་༔ བཙོན་རའི་འཇིགས་པ་ཀུན་ལས་སྐྱོབ༔ ས་མ་ཡ༔ ཆོམ་རྐུན་འཇིགས་སྐྱོབ་སྒྲོལ་མ་ནག༔ ཕྱག་གཡོན་དགྲ་སྟྭ་བསྣམས་པར་གསལ༔ རྩ་བའི་སྔགས་ལ་འདི་སྤེལ་བཟླ༔ སརྦ་ཙཽ་ར་བྷནྡྷ་བྷནྡྷ་ཏྲིག་ཐུཾ༔ སྐུད་པ་ནག་པོར་མདུད་པ་བོར༔ སྔགས་འདི་ཁྲི་བཟླས་དཔུང་པར་འཆིང་༔ ཨོཾ་ཐར་ནི་ཐར་ནི་མ་ཧཱ་ཐར་ནི་བྃ་ཧ་ཡ་མོ་ཧ་ཧཱུྃ་ཕཊ྄༔ དགྲ་ཇག་ཆོམ་རྐུན་འཇིགས་ལས་སྐྱོབ༔ ས་མ་ཡ༔ ཤ་ཟའི་འཇིགས་སྐྱོབ་སྒྲོལ་མ་ནག༔ ཕྱག་གཡོན་ཕུར་པ་བསྣམས་པར་གསལ༔ རྩ་བའི་སྔགས་ལ་འདི་སྤེལ་བཟླ༔ སརྦ་དུཥྟཱན་བིགྷན་བཾ་ཕཊ྄༔ སྐུད་པ་དམར་པོར་མདུད་པ་བོར༔ ཨོཾ་མ་མ་བི་བི་ནི་ནི་ཟློག་ཟློག༔ སྔགས་འདི་མང་དུ་བཏབ་ལ་བཅིང་༔ གཟའ་ཀླུ་རྒྱལ་འགོང་བསེན་མོ་སོགས༔ ཤ་ཟ་འབྱུང་པོའི་གནོད་པ་སྐྱོབ༔ ས་མ་ཡ༔ གླང་ཆེན་འཇིགས་སྐྱོབ་སྒྲོལ་མ་ནི༔ དུད་ཀ་ཕྱག་གཡོན་མདུང་ཐུང་བསྣམས༔ གསལ་བཏབ་རྩ་སྔགས་འདི་སྤེལ་བཟླ༔ སརྦ་ཧྃ་ཧྃ་དུཥྟཱན་ཧ་ན་ཧ་ན་ཏྲ་ས་ཡ་ཕཊ༔ ས་ལ་བསྔགས་ནས་གཏོར་བ་ཡིས༔ གླང་ཆེན་ཁྲོས་དང་གཡག་རྒོད་སོགས༔ མ་རུང་སྲོག་ཆགས་འཚེ་བ་སྐྱོབ༔ ས་མ་ཡ༔ སེང་གེའི་འཇིགས་སྐྱོབ་སྒྲོལ་མ་ནག༔ ཕྱག་གཡོན་མེ་ཕུང་བསྣམས་པར་གསལ༔ སརྦ་ཧེ་ཧེ་ཙ་ལེ་ཙ་ལེ་བྷནྡྷ་ཕཊ༔ ཞེས་འདི་རྩ་སྔགས་སྤེལ་ལ་བཟླ༔ མ་མ་བེ་བེ་ཟློག་ཟློག༔ སེང་ལྡེང་བྱང་བུར་བྲིས་ལ་བཅང་༔ སེང་གེ་སྟག་གཟིག་དོམ་དྲེད་སོགས༔ གཅན་གཟན་ཀུན་གྱི་འཇིགས་ལས་གྲོལ༔ ས་མ་ཡ༔ སྦྲུལ་གྱི་འཇིགས་སྐྱོབ་སྒྲོལ་མ་དཀར༔ ཕྱག་གཡོན་ཆུ་ཤེལ་ལས་གྲུབ་པའི༔ བདུད་རྩིའི་བུམ་པ་བསྣམས་པར་གསལ༔ རྩ་བའི་སྔགས་ལ་འདི་སྤེལ་བཟླ༔ སརྦ་བི་ཥ་ཙ་ལ་ཡ་ཧ་ར་ཧ་ར་ཕཊ༔ ཨ་རུ་གླ་རྩི་ཚ་ལིར་ཆུར༔ མ་མ་ཏྲུཾ་ཏྲུཾ་ཞི་ཞི་ཕཊ༔ ཞེས་བཏབ་བཏང་བས་སྦྲུལ་ལ་སོགས༔ བརྟན་གཡོའི་དུག་རིགས་ཐམས་ཅད་འཇོམས༔ ས་མ་ཡ༔ ནད་ཀྱི་འཇིགས་སྐྱོབ་སྒྲོལ་མ་ནི༔ ལྗང་སེར་ཕྱག་གཡོན་ཨ་རུ་བསྣམས༔ བདུད་རྩིའི་འོད་ཟེར་སྤྲོ་བར་གསལ༔ སརྦ་ཛྭ་ར་སརྦ་དུཿཁ་པྲ་ཤ་མ་ན་ཡ་ཕཊ༔ ཞེས་པ་རྩ་སྔགས་སྤེལ་ལ་བཟླ༔ ཡུང་བ་ཤུ་དག་སྤྲུ་ནག་ལ༔ སྔགས་བཏབ་འཆང་བ་ཡམས་རིམས་སོགས༔ ནད་ཀྱི་འཇིགས་པ་ཞི་ཞིང་སྲུང་༔ ས་མ་ཡ༔ འཆི་བའི་འཇིགས་སྐྱོབ་སྒྲོལ་མ་དཀར༔ ཕྱག་གཡོན་ཚེ་བུམ་བསྣམས་པར་གསལ༔ ཚེ་བཅུད་བསྡུ་བསྟིམ་རྩ་སྔགས་དང་༔ བཛྲ་ཨཱ་ཡུ་ཥེ་སྤེལ་བཟླ༔ གཡུ་བྱང་ནྲྀཿམཚན་དར་དམར་དྲིལ༔ སྔགས་ཀྱིས་བཏབ་ལ་མགུལ་དུ་འཆང་༔ དུས་མིན་འཆི་བའི་འཇིགས་པ་ཞི༔ ས་མ་ཡ༔ ཕོངས་པའི་འཇིགས་སྐྱོབ་སྒྲོལ་མ་སེར༔ ཕྱག་གཡོན་འདོད་དགུའི་ཆར་འབེབས་པའི༔ གཏེར་གྱི་བུམ་བཟང་བསྣམས་པར་གསལ༔ རྩ་བའི་སྔགས་ལ་འདི་སྤེལ་བཟླ༔ ཛམྦྷེ་མོ་ཧེ་དྷ་ན་མེ་དྷི་ཧྲཱིཿ མེ་ཏོག་སེར་པོ་བསྔགས་བྱས་ཏེ༔ མཎྜལ་བརྒྱ་སྟོང་ཁྲི་འབུམ་ཕུལ༔ དབུལ་བའི་འཇིགས་པ་ཀུན་ཞི་འགྱུར༔ ས་མ་ཡ༔ དོན་ཉམས་འཇིགས་པ་ལས་སྐྱོབ་པའི༔ སྒྲོལ་མ་ལྗང་སེར་འོད་འབར་གསལ༔ ཕྱག་གཡོན་དཔལ་བེའུ་བསྣམས་པ་ལས༔ ཉི་མ་འཆར་ཀའི་འོད་འཕྲོ་བསྒོམ༔ སརྦ་ཨརྠ་སིདྡྷི་སིདྡྷི་ཀུ་རུ༔ ཞེས་དང་རྩ་སྔགས་སྤེལ་ལ་བཟླ༔ བྲིས་སྐུའི་མདུན་ཏུ་ཅི་འབྱོར་པའི༔ མཎྜལ་བརྒྱ་ཕྲག་རེ་རེའི་མཚམས༔ སྔགས་འདི་སྟོང་ཕྲག་སྤེལ་ལ་བཟླ༔ ཨོཾ་ཨུཥྞི་ཥ་དྷ་ར་དྷ་ར་དྷི་རི་དྷི་རི་སྭཱ་ཧཱ༔ ཇི་ལྟར་འདོད་པའི་དོན་གྲུབ་ཅིང་༔ དོན་ཉམས་འཇིགས་པ་ཀུན་ཞི་འགྱུར༔ ས་མ་ཡ༔ དེ་ལྟར་དེ་དག་ཐམས་ཅད་ཀྱང་༔ བསྡུ་ན་རང་ཉིད་སྐད་ཅིག་གིས༔ རྩ་བའི་སྒྲོལ་མར་བསྒོམས་བྱས་ལ༔ ལས་ལྷ་སོ་སོར་སྤྲོ་དང་བཅས༔ རྩ་སྔགས་སྤེལ་ཚིག་བཅས་པ་བཟླ༔ རྒྱས་པར་སྤྲོ་ན་བདག་བསྐྱེད་དང་༔ མདུན་བསྐྱེད་སོ་སོར་བསྒོམས་བྱས་ལ༔ མཎྜལ་མཆོད་བསྟོད་རྒྱས་པར་བྱ༔ སྲུང་བ་འདོད་ན་རཀྵ་དང་༔ ཞི་བར་ཤཱནྟིཾ་ཕྱིར་ཟློག་པར༔ ཟློག་ཅེས་བྱ་བའི་སྔགས་ཤམ་བསྒྱུར༔ ལས་ཀྱི་རིམ་པ་མཐའ་ཡས་འབྱུང་༔ ས་མ་ཡ༔ གཙོ་འཁོར་ཡོངས་རྫོགས་ལ་བརྟེན་པའི༔ སྲུང་བ་ཆེན་པོའི་འཁོར་ལོ་ནི༔ གྲོ་གའམ་ནི་ཤོག་བུ་ལ༔ ཙཀྲ་རྩིབས་བརྒྱད་ལྟེ་བར་ཏཱྃ༔ དེ་མཐར་ཨོཾ་དང་ཧཱ་ཡི་བར༔ ཇི་ལྟར་འདོད་པའི་སྤེལ་ཚིག་བྲི༔ རྩིབས་བརྒྱད་ཏཱ་རེ་ལ་སོགས་བརྒྱད༔ རྩིབས་མཆན་བཀྲ་ཤིས་རྟགས་བརྒྱད་དགོད༔ དེ་ཡི་ཕྱི་རིམ་མུ་༼༡༽ཁྱུད་ལ༔ ན་མོ་རཏྣ་ཏྲ་ཡཱ་ཡ་སོགས། གཟུངས་རིང་སྤེལ་ཚིག་བཅས་པ་བྲི༔ དེ་༼༢༽རྒྱབ་པད་འདབ་བཅུ་དྲུག་ལ༔ ལས་ཀྱི་སྔགས་རྣམས་སོ་སོར་དགོད༔ དེ་༼༣༽རྒྱབ་དབྱངས་གསལ་རྟེན་སྙིང་དང་༔ ཨུཏྤལ་༼༤༽རྡོར་༼༥༽མེ་རིས་བསྐོར༔ གུར་གུམ་གི་ཝཾ་ཙནྡན་དཀར༔ ཨུཏྤལ་ཤུ་དག་གླ་རྩིས་བྱུགས༔ ལྷར་བསྐྱེད་རབ་གནས་ལེགས་པར་བྱ༔ དར་སྣ་ལྔ་ཡིས་དྲིལ་བྱས་ཏེ༔ ལུས་ལ་དྲོད་དང་མ་བྲལ་འཆང་༔ སྤྱི་ཡི་འཇིགས་པ་ཐམས་ཅད་ལ༔ རྡོ་རྗེའི་མཁར་དུ་ཚུད་དང་འདྲ༔ ས་མ་ཡ༔ སོ་སོའི་ཙཀྲ་བྱ་འདོད་ན༔ ལྟེ་བ་རྩིབས་བཅས་གོང་ལྟར་ལ༔ མུ་ཁྱུད་དང་པོར་སོ་སོའི་སྔགས༔ ལས་ཀྱི་སྤེལ་ཚིག་རྒྱས་པར་འདྲི༔ གཉིས་པར་དབྱངས་གསལ་རྟེན་སྙིང་དང་༔ གསུམ་པར་རང་རང་ཕྱག་མཚན་ཏེ༔ དེ་རྒྱབ་རྡོ་ར་མེ་རིས་བསྐོར༔ རྫས་བྱུགས་རབ་གནས་མགུལ་དུ་གདགས༔ འཇིགས་པ་སོ་སོ་སྲུང་བའི་མཆོག༔ ས་མ་ཡ༔ རྣལ་འབྱོར་གཏོར་མ་ལ་བརྩོན་ན༔ འཕྲལ་རྐྱེན་བར་ཆད་ངང་གིས་ཞི༔ རིན་ཆེན་སྣོད་དུ་ཅི་འབྱོར་པའི༔ གཏོར་མ་བསང་སྦྱང་བྱིན་གྱིས་བརླབ༔ རང་གི་ཐུགས་ནས་འོད་འཕྲོས་པས༔ སྒྲོལ་མ་འཁོར་བཅས་སྤྱན་དྲངས་ནས༔ མདུན་གྱི་ནམ་མཁར་བཞུགས་པ་ལ༔ མཆོད་གཏོར་ཕུལ་བས་མཉེས་པར་བསམ༔ ན་མཿསརྦ་བུདྡྷ་བོ་དྷི་སཏྭཱ་ནཱཾ༔ ཨ་པྲ་ཏི་ཧ་ཏ་ཤ་ས་ནཱ་ནཱཾ༔ ཧེ་ཧེ་བྷ་ག་ཝ་ཏཱི༔ མ་ཧཱ་སརྦ་བུདྡྷ་ཨ་ཝ་ལོ་ཀི་ཏེ༔ མཱ་བི་ལམྦ་མཱ་པི་ལམྦ༔ ཨི་དཾ་བ་ལིཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ་ཧཱུྃ་སརྦ་པི་སཉྩ་རེ་སྭཱ་ཧཱ༔ ལན་མང་ཕུལ་མཐར་མཆོད་པས་མཆོད༔ ཨོཾ༔ སངས་རྒྱས་ཀུན་གྱི་ཕྲིན་ལས་བདག༔ རྗེ་བཙུན་མྱུར་མ་དཔའ་མོ་དང་༔ འཇིགས་པ་ཐམས་ཅད་སེལ་མཛད་མ༔ འཁོར་གྱི་ཚོགས་དང་བཅས་ལ་བསྟོད༔ མཆོད་སྦྱིན་གཏོར་མ་དམ་པ་འདི༔ ཡེ་ཤེས་ཆེན་པོས་རྗེས་དགོངས་ལ༔ བདེ་བ་ཆེན་པོར་བཞེས་ནས་ཀྱང་༔ དངོས་གྲུབ་མ་ལུས་སྩལ་དུ་གསོལ༔ འབྱུང་བཞི་འཁྲུགས་དང་གནམ་ལྕགས་ལྟུང་༔ མཚོན་ཆ་རྒྱལ་པོའི་ཆད་པ་དང་༔ ཆོམ་རྐུན་ཤ་ཟ་གླང་ཆེན་ཁྲོས༔ གཅན་གཟན་ཁྲོ་བོ་གདུག་པའི་སྦྲུལ༔ ནད་གདོན་དུས་མིན་འཆི་བའི་རྐྱེན༔ དབུལ་ཕོངས་འདོད་དོན་ཉམས་པ་སོགས༔ མི་བཟད་འཇིགས་པའི་ཚོགས་རྣམས་ཀུན༔ སྲུང་དང་ཞི་དང་ཟློག་པར་མཛོད༔ འཁོར་བ་ངན་སོང་སྡུག་བསྔལ་སྒྲོལ༔ ཚེ་དང་བསོད་ནམས་ཡེ་ཤེས་སོགས༔ མཆོག་ཐུན་ཕྲིན་ལས་རྒྱས་པར་མཛོད༔ ཅེས་པས་གསོལ་བཏབ་ལྷ་ཚོགས་རྣམས་ཀུན༔ རང་ལ་བསྟིམ་མམ་དབྱིངས་སུ་གཤེགས༔ རྣལ་འབྱོར་རྒྱུན་གྱི་བར་ཆད་ཞི༔ ས་མ་ཡ༔ མཎྜལ་ལ་བརྟེན་ཚོགས་རྫོགས་པས༔ འདོད་པའི་དོན་རྣམས་ཐམས་ཅད་འགྲུབ༔ དེ་ཕྱིར་ཕྱིར་རབས་དད་ལྡན་རྣམས༔ འདི་ལ་རྟག་ཏུ་བརྩོན་པར་བྱ༔ གཙང་མའི་གནས་སུ་བྲིས་སྐུའི་མདུན༔ མཎྜལ་མཆོད་གཏོར་རྒྱས་པར་བཤམ༔ སྐྱབས་སོང་བྱང་ཆུབ་སེམས་གཉིས་བསྐྱེད༔ མཆོད་པའི་ཚོགས་རྣམས་བྱིན་བརླབས་ལ༔ དཀོན་མཆོག་རྒྱ་མཚོ་མདུན་དུ་དམིགས༔ མཎྜལ་འབུལ་ཞིང་གསོལ་བ་གདབ༔ དེ་ནས་མདུན་ཏུ་རྗེ་བཙུན་མ༔ འཁོར་བཅས་བསྐྱེད་ཅིང་སྤྱན་དྲངས་བསྟིམ༔ དབང་བསྐུར་མཆོད་བསྟོད་ཁྱད་པར་དུ༔ ཕྱག་འཚལ་ཉི་ཤུ་རྩ་གཅིག་ནི༔ གཉིས་གསུམ་བདུན་དང་མཎྜལ་བསྐྱར༔ བཟླས་པ་བྱ་ཞིང་ཐུགས་རྒྱུད་བསྐུལ༔ གཏོར་མ་འབུལ་ཞིང་འདོད་དོན་གསོལ༔ མཐར་ནི་ནོངས་བཤགས་ཡེ་ཤེས་གཤེགས༔ དམ་ཚིག་རང་བསྟིམ་བསྔོ་སྨོན་དང་༔ ཤིས་པ་བརྗོད་ཅིང་མེ་ཏོག་འཐོར༔ བར་ཆད་ཐམས་ཅད་ཞི་བ་དང་༔ འདོད་དོན་ཡིད་བཞིན་འགྲུབ་པར་འགྱུར༔ བྱེ་བྲག་སོ་སོའི་ལས་བསྒྲུབ་ན༔ ལས་ལྷ་གཙོ་བོར་བྱ་བའམ༔ སོ་སོའི་བཟླས་པ་གཙོ་བོར་བྱ༔ འཇིགས་པའི་ཚོགས་རྣམས་མྱུར་དུ་ཞི༔ ས་མ་ཡ༔ རང་ཉིད་འཕགས་མར་གསལ་བ་ཡི༔ ཐུགས་ནས་ཞི་བའི་སྒྲོལ་མ་དཀར༔ སྐྱབས་སྦྱིན་ཨུཏྤལ་བསྣམས་པ་ནི༔ གྲངས་མེད་ནམ་མཁའ་གང་བར་འཕྲོས༔ བར་ཆད་ཐམས་ཅད་ཞི་བར་བསམ༔ ཨོཾ་བཛྲ་ཏཱ་རེ་སརྦ་བིགྷྣཱན་ཤཱནྟིཾ་ཀུ་རུ་སྭཱ་ཧཱ༔ བཟླས་པས་བར་ཆད་ཐམས་ཅད་ཞི༔ ས་མ་ཡ༔ རང་ཉིད་འཕགས་མར་གསལ་བ་ཡི༔ ཐུགས་ནས་རྒྱས་པའི་སྒྲོལ་མ་སེར༔ རིན་ཆེན་ལྕགས་ཀྱུ་འཛིན་པ་ནི༔ ནམ་མཁའ་གང་བར་རབ་སྤྲོས་ཏེ༔ ཕྱོགས་བཅུའི་སངས་རྒྱས་བྱང་ཆུབ་སེམས༔ ཉན་རང་འཕགས་ཚོགས་ཡེ་ཤེས་དང་༔ ལྷ་དང་དྲང་སྲོང་རིག་འཛིན་གྱི༔ མངོན་པར་ཤེས་པ་ཐམས་ཅད་ཀུན༔ འོད་ཀྱི་རྣམ་པར་རབ་བསྡུས་ཏེ༔ རང་གི་སྙིང་དབུས་ཐིམ་པ་ཡིས༔ མངོན་ཤེས་རྩལ་ཁ་རྒྱས་པར་བསམ༔ ཨོཾ་རཏྣ་ཏཱ་རེ་སརྦ་ལོ་ཀ་ཛྙཱ་ན་བིདྱཱ་དྷ་ར་དྷ་ར་དྷི་རི་དྷི་རི་ཧྲཱིང་ཧྲཱིང་ཛ་ཛྙཱ་ན་པུཥྟིཾ་ཀུ་རུ་ཨོཾ༔ ཞེས་བཟླས་དུས་གསུམ་ཐམས་ཅད་ཤེས༔ ཁྱད་པར་ཉལ་བའི་དུས་ཀྱི་ཚེ༔ རུ་རྟ་གི་ཝཾ་ག་བུར་དང་༔ ཤུ་དག་ཆུ་ལ་སྔགས་འདི་གདབ༔ ཨོཾ་མུ་ཙི་ལི་སྭཱ་ཧཱ༔ མོ་ཧ་ནི་སྭཱ་ཧཱ༔ དན་ཏི་ལི་སྭཱ་ཧཱ༔ མ་མ་སརྦ་ཙིཏྟ་སྨ་ར་སལ་སལ་ཕྱེ་ཕྱེ་སྭཱ་ཧཱ༔ འཐོར་འཐུང་ཁྲུས་བྱས་འདོད་པའི་དོན༔ ཡིད་ལ་བསམ་སྟེ་ཉལ་བ་ཡིས༔ མངོན་ཤེས་ལྟ་བུའི་རྨི་ལམ་འབྱུང་༔ ས་མ་ཡ༔ རང་ཉིད་སྒྲོལ་མའི་སྐུར་གསལ་བའི༔ ཐུགས་ནས་དྲག་པོའི་སྒྲོལ་མ་ནག༔ ཕུར་པ་ཐོགས་པ་དཔག་མེད་སྤྲོས༔ བཞད་པ་བརྒྱད་ཀྱི་སྒྲ་དང་བཅས༔ བྱད་ཕུར་རྦོད་གཏོང་ཚར་བཅད་བསམ༔ ཨོཾ་ཀརྨ་ཏཱ་རེ་སརྦ་ཤ་ཏྲཱུན་བིགྷྣཱན་མ་ར་སེ་ན་ཧ་ཧ་ཧེ་ཧེ་ཧོ་ཧོ་ཧཾ་ཧཾ་བྷིནྡྷ་བྷིནྡྷ་ཕཊ༔ བདུད་ཚར་བཅད་པའི་སྔགས་ཀྱང་བཟླ༔ བྱད་ཕུར་རྦོད་གཏོང་བདུད་བགེགས་ཚོགས༔ རླུང་ལྟར་འཚུབས་ཀྱང་ཉམ་མི་ང་༔ ས་མ་ཡ༔ རང་ཉིད་འཕགས་མར་གསལ་བ་ཡི༔ ཐུགས་ནས་དབང་གི་སྒྲོལ་མ་དམར༔ པདྨའི་ལྕགས་ཀྱུ་ཞགས་པ་འཛིན༔ ཆགས་པའི་ཉམས་ལྡན་དཔག་མེད་སྤྲོས༔ བསྒྲུབ་བྱ་ལྕགས་ཀྱུས་སྙིང་ནས་བཟུང་༔ ཞགས་པས་དྲངས་ཤིང་རླུང་དམར་པོའི༔ དཀྱིལ་འཁོར་ལ་བཞག་མདུན་ཏུ་དགུག༔ རང་གི་གསང་བའི་པདྨོ་ནས༔ བདུད་རྩི་དམར་པོ་དཔག་མེད་བབས༔ དམིགས་བྱའི་ཚངས་པའི་སྒོ་ནས་ཞུགས༔ ལུས་ཀྱི་ནང་ཀུན་ཁྱབ་པ་ཡིས༔ ཁེངས་དྲེགས་མ་གུས་སྡང་སེམས་ཞི༔ ཆགས་ཤིང་ཞེན་པའི་ཡིད་གཡོས་བསམ༔ ཨོཾ་པདྨ་ཏཱ་རེ་སནྟཱ་ར་ཧྲཱིཿམིང་འདི་ཞེས་བྱ་བ་ཝཱ་ཤཾ་ཀུ་རུ་ཧོ༔ མཐར་ནི་འོད་དམར་བདེ་ཆེན་གྱི༔ ཐིག་ལེའི་རྣམ་པ་མེར་གྱིས་ཞུ༔ གསང་བའི་ལམ་ནས་སྙིང་གར་དྲང༌། རང་གི་ཐུགས་སྲོག་ཏཱྃ་ཡིག་དང་༔ དབྱེར་མེད་བློ་འདས་ངང་དུ་བཞག༔ མེ་ཏོག་དམར་པོའི་སྦྱིན་སྲེག་བྱ༔ དབང་གི་ལས་ཀྱི་མཐར་ཐུག་གོ༔ ས་མ་ཡ༔ གཞན་ཡང་ལས་ཀྱི་མཐའ་རྒྱས་ནི༔ རྩ་བ་ཡན་ལག་གང་ཡིན་ཀྱང་༔ ལས་དེ་བརྟན་པར་བྱ་བའི་སླད༔ སཱཙྪ་སོ་སོའི་སྔགས་ལྡན་པ༔ ཁ་དོག་བསྒྱུར་བ་མང་དུ་གདབ༔ རབ་གནས་བྱས་ཤིང་མཆོད་པས་མཆོད༔ ཆུ་སྣ་མང་དུ་ཚོགས་པ་ལ༔ རིན་ཆེན་སྨན་འབྲུ་མེ་ཏོག་བསྲེ༔ གཏོར་མའི་ཚུལ་དུ་གྲངས་མང་དབུལ༔ ལས་གང་ཡིན་ཀྱང་རིང་དུ་འགྲུབ༔ ལས་རྣམས་མྱུར་དུ་འགྲུབ་པའི་ཕྱིར༔ ལྷ་རྫས་བུད་ཤིང་མེ་སྦར་ཏེ༔ སོ་སོའི་རིགས་ཀྱི་ལྷར་བསྐྱེད་ལ༔ མཆོད་བསྟོད་བསྲེག་རྫས་སྤྱི་དང་ནི༔ ཁྱད་པར་སོ་སོའི་སྐུ་མདོག་དང་༔ མཐུན་པའི་མེ་ཏོག་གཙང་མ་ལ༔ སྔགས་མཐར་སྤེལ་ཚིག་བཅས་པ་ནི༔ བརྒྱ་སྟོང་ཁྲི་ལ་སོགས་པ་འབུལ༔ ལས་རྣམས་རྩོལ་མེད་མྱུར་དུ་འགྲུབ༔ ལས་ཀྱི་ནུས་པ་བསྐྱེད་པའི་ཕྱིར༔ སྔགས་རྣམས་བྲིས་ཏེ་རླུང་ལ་བསྐོར༔ སྐབས་སུ་ལྷར་བསྐྱེད་མཆོད་བསྟོད་དང་༔ བཟླས་པ་བྱ་ཞིང་ཕྲིན་ལས་བཅོལ༔ མ་བསྒྲུབས་པར་ཡང་ལས་རྣམས་ཀུན༔ འགྲུབ་ཅིང་ཕུན་སུམ་ཚོགས་པར་འགྱུར༔ ས་མ་ཡ༔ མན་ངག་གུད་དུ་སྦས་པ་ནི༔ བར་ཆད་སྐྱོབ་པའི་ཐབས་ཀྱི་མཆོག༔ གསུམ་ལ་སྐྱབས་སུ་འགྲོ་བ་སྟེ༔ མདུན་མཁར་བླ་མ་རྗེ་བཙུན་མར༔ སྐྱབས་གནས་རྒྱ་མཚོས་བསྐོར་བར་བསྒོམ༔ ཕྱག་གཡས་སྐྱབས་སྦྱིན་བརྐྱངས་པའི་འོག༔ བདག་དང་འགྲོ་བ་ཐམས་ཅད་ཚུད༔ འཁོར་བ་དང་ནི་ངན་སོང་གི༔ འཇིགས་པ་ཀུན་ལས་སྐྱོབ་པར་བསམ༔ ན་མོ༔ བླ་མ་ཡི་དམ་རྗེ་བཙུན་མ༔ མཆོག་གསུམ་རྒྱལ་བ་རྒྱ་མཚོ་ལ༔ བདག་སོགས་འགྲོ་ཀུན་བྱང་ཆུབ་བར༔ རྩེ་གཅིག་གུས་པས་སྐྱབས་སུ་མཆི༔ མཐར་ནི་སྐྱབས་ཡུལ་རང་ལ་བསྟིམ༔ བྱང་ཆུབ་སེམས་གཉིས་ལྡན་པ་ལ༔ བར་ཆད་ཀུན་གྱིས་ཉེ་མི་ནུས༔ དེ་ཕྱིར་སྐྱབས་ཡུལ་དཔང་བྱས་ཏེ༔ སྨོན་དང་འཇུག་པའི་བྱང་སེམས་བསྐྱེད༔ ཧོཿ མ་གྱུར་སེམས་ཅན་ཐམས་ཅད་ཀུན༔ སངས་རྒྱས་གོ་འཕང་ཐོབ་བྱའི་ཕྱིར༔ ཉེས་སྤྱོད་ཀུན་བསྡམ་དགེ་ཆོས་སྡུད༔ གཞན་ཕན་བྱང་སེམས་རྟག་ཏུ་བསྐྱེད༔ ཐུན་མཐར་བདེ་སྡུག་གཏོང་ལེན་བསྒོམ༔ འཁོར་གསུམ་དམིགས་པ་པྲལ་བར་བཞག༔ སྡིག་ལྟུང་ལ་བརྟེན་བར་ཆད་འཇུག༔ དེ་ཕྱིར་དེ་ཉིད་སྦྱོང་བ་ནི༔ རང་ཉིད་ཐ་མལ་སྤྱི་བོ་རུ༔ པད་དཀར་ཟླ་བའི་གདན་གྱི་སྟེང་༔ བླ་མ་དོན་ཡོད་གྲུབ་པ་ལྗང་༔ རལ་གྲི་དང་ནི་དྲིལ་བུ་འཛིན༔ རང་འདྲའི་སྒྲོལ་མ་ཡུམ་དང་སྦྱོར༔ དར་དང་རིན་ཆེན་རུས་པས་བརྒྱན༔ མཚན་དཔེའི་གཟི་འབར་སྐྱིལ་ཀྲུང་བཞུགས༔ ཐུགས་ཀར་ཟླ་སྟེང་ཧཱ་ཡིག་མཐར༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་འཕགས་མཆོད་འགྲོ་སྒྲིབ་སྦྱངས༔ ཚུར་འདུས་བདུད་རྩིའི་རྒྱུན་བབས་པ༔ རང་གི་ཚངས་པའི་སྒོ་ནས་ཞུགས༔ ལུས་གང་ནད་གདོན་སྡིག་སྒྲིབ་དག༔ བདེ་ཆེན་ཡེ་ཤེས་སྐྱེས་པར་བསམ༔ ཨོཾ་ཨཱཿཧཱུྃ་མ་ཧཱ་གུ་རུ་ཧཱ་པྲཛྙཱ་དྷྲྀག་ཏཱྃ་བཛྲ་རཱ་ཏི་སརྦ་པཱ་པྃ་ཨཱ་ཝ་ར་ཎ་བི་ཤོ་དྷ་ན་སྭཱ་ཧཱ༔ སྡིག་ལྟུང་འགྱོད་པས་བཤགས་ཤིང་བསྡམ༔ ཚོགས་རྟེན་འོད་ཞུ་རང་ལ་ཐིམ༔ སྐྱེ་མེད་གཉུག་མའི་ངང་དུ་བཞག༔ བླ་མས་བྱིན་བརླབས་ཚོགས་རྫོགས་ན༔ བར་ཆད་ཐམས་ཅད་རང་སར་གྲོལ༔ དངོས་གྲུབ་མྱུར་དུ་ཐོབ་པར་འགྱུར༔ དེ་ཕྱིར་རྩེ་གཅིག་འདི་ལྟར་བསྒོམ༔ ཨཿ རང་མདུན་ནམ་མཁར་འོད་ལྔའི་ཀློང་༔ པད་དཀར་ཟླ་བ་རྒྱས་པའི་དབུས༔ བླ་མ་རྗེ་བཙུན་སྒྲོལ་མ་ལྗང་༔ མཆོག་སྦྱིན་ཨུཏྤལ་ཕྱག་རྒྱ་ཅན༔ དར་དང་རིན་ཆེན་རྒྱན་གྱིས་བརྒྱན༔ ཞི་འཛུམ་མཚན་དཔེའི་དཔལ་འབར་བ༔ མཆོག་གསུམ་འདུས་པའི་ངོ་བོ་ཉིད༔ རྩ་གསུམ་རྒྱ་མཚོའི་སྤྲིན་ཕུང་འཕྲོ༔ རང་བཞིན་ཡོངས་གྲུབ་ངང་དུ་གསལ༔ ཨོཾ་ཨཱཿཧཱུྃ༔ ཁམས་གསུམ་སྣོད་བཅུད་དཔལ་འབྱོར་དང་༔ བདག་ལུས་ལོངས་སྤྱོད་དགེ་ཚོགས་ཀུན༔ ཐུགས་རྗེའི་བདག་ཉིད་རྣམས་ལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཨོཾ་སརྦ་ཏ་ཐཱ་ག་ཏ་རཏྣ་མཎྜ་ལ་པཱུ་ཛ་ཧོ༔ ཀྱེ་ཀྱེ་བླ་མ་རྗེ་བཙུན་མར༔ སྙིང་ནས་གུས་པས་གསོལ་བ་འདེབས༔ བྱིན་གྱིས་རློབས་ཤིག་བར་ཆད་སོལ༔ དབང་བཞི་སྐུར་ཅིག་དངོས་གྲུབ་སྩོལ༔ ཨོཾ་ཨཱཿཧཱུྃ་མ་ཧཱ་གུ་རུ་ཏཱ་རེ་སྭཱ་ཧཱ༔ ཞེས་པས་གསོལ་བཏབ་དབང་བཞི་བླང་༔ རང་ལ་བསྟིམས་ནས་དབྱེར་མེད་ངང་༔ འོད་གསལ་ཆོས་སྐུའི་རང་ཞལ་བལྟ༔ བསྐྱེད་རྫོགས་ཟབ་མོའི་གནད་ཤེས་ན༔ བར་ཆད་ཀུན་ཀྱང་ལམ་དུ་འགྱུར༔ བསྐྱེད་རིམ་རང་ལུས་རྗེ་བཙུན་མ༔ ཆུ་ཟླ་འཇའ་ཚོན་ལྟ་བུར་གསལ༔ བསོད་ནམས་ཚོགས་རྫོགས་སྣང་ཞེན་འཇིག༔ དེ་ཉིད་རང་བཞིན་མེད་པར་བསྒོམ༔ ཡེ་ཤེས་ཚོགས་རྫོགས་རྟོག་ཚོགས་སྦྱོང་༔ དབྱེར་མེད་དུ་མ་རོ་གཅིག་ངང་༔ བར་ཆད་རྐྱེན་སྣང་ཅི་ཤར་ཡང་༔ འཁུ་འཕྲིག་མི་བྱ་རར་ངོར་བཞག༔ སྦྲུལ་མདུད་ནམ་མཁར་གྲོལ་བ་བཞིན༔ བར་ཆད་འཇིགས་པ་ལམ་ལོངས་ནས༔ བླ་མེད་མཆོག་གི་དངོས་གྲུབ་ཐོབ༔ ས་མ་ཡ༔ དེ་ལྟར་རྒྱལ་བ་ཀུན་གྱི་ཡུམ༔ འཕགས་མའི་རྒྱུད་དང་མན་ངག་ཚོགས༔ རྒྱུད་སྡེ་བཞི་དང་རབ་སྦྱར་ནས༔ རྒྱས་པར་གཞན་ཏུ་བསྟན་པ་ཡིན༔ འདིར་ནི་ཟབ་ཅིང་འདྲིལ་བའི་དོན༔ བྱ་སླ་ཚེགས་ཆུང་བྱིན་རླབས་མྱུར༔ རིག་སྔགས་འཆང་བས་དོན་ཡོད་པའི༔ ཡང་གསང་སྙིང་གི་དུམ་བུར་བསྟན༔ ད་ལྟའི་མངའ་བདག་རྗེ་འབངས་ཀྱི༔ འཇིགས་པའི་ཚོགས་ཀུན་ཞི་བ་དང་༔ མ་འོངས་ཆོས་བདག་སྐྱེས་བུ་ཡི༔ བར་ཆད་སྣ་ཚོགས་སེལ་བ་དང་༔ བོད་ཁམས་མཐའ་དབུས་ཐམས་ཅད་ཀུན༔ ཕན་དང་བདེ་ལ་འགོད་པའི་སླད༔ ཆོས་ཉིད་རྡོ་རྗེའི་རང་སྒྲར་ཤར༔ མཚོ་རྒྱལ་མོས་པས་ཡི་གེར་ཐོབ༔ འགྲོ་ཕན་ཕྲིན་ལས་མཐའ་རྒྱས་འགྱུར༔ ས་མ་ཡ༔ རྒྱ་རྒྱ༔ ན་དྷཱ༔ ཁ་ཐཾ༔ གུ་ཧྱ་ས་མ་ཡ༔ རྩོད་བྲལ་དུས་བབས་ཀྱི་སྤྲུལ་པའི་གཏེར་སྟོན་ཆེན་པོ་ཨོ་རྒྱན་མཆོག་གྱུར་བདེ་ཆེན་གླིང་པས་མདོ་ཁམས་ཤར་ཕྱོགས་ཕྲིན་ལས་འགྲོ་བ་འདུལ་བའི་གནས་ཆེན་བརྒྱད་ཀྱི་ཡ་གྱལ་རི་བོ་དབང་ཞུའི་བྲག་ནས་སྤྱན་དྲངས་པའི་ཤོག་སེར་གྱི་བུ་དཔེ་ཕྱག་བྲིས་དངོས་ལས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་བཤུས་པ་དགེ་ལེགས་སུ་གྱུར་ཅིག། །།

[edit]

\u0f01\u0f83:__bla ma'i thugs sgrub bar chad kun sel las:__'phags ma sgrol ma'i sgrub thabs 'jigs pa kun sel zhes bya ba bzhugs so:__:phyi 'jigs pa bcu drug gi bar chad sel ba/ \u0f01\u0f83:__123:__'phags ma sgrol ma la phyag 'tshal lo:__shin tu gsang ba'i gsang ba mchog:__gtso bo'i sbas yum kha T+wAM ga:__phyi ltar rje btsun sgrol ma ste:__nang ltar badz+ra wA rA hI:__gsang ba ye shes mtsho rgyal yum:__yang gsang 'chi med man+dar:__don dam shes rab pha rol phyin:__rnam pa rtags kyi phyag rgyar snang :__mchog tu mi 'gyur gsang ba'i lcam:__sras bcas rgyal kun skyed pa dang :__bde chen rol pa'i btsun mo ni:__myur ma dpa' mo'i sgrub pa'i thabs:__ma 'ongs rjes 'jug rnal 'byor rnams:__phyi yi bar chad kun sel phyir:__rang byung pad+ma bdag gis bstan:__sa ma ya:__skyabs sems tshogs bsags sngon song nas:__aH__stong gsal rang rig gnyug ma'i dbyings:__ye shes rol pa'i snang cha las:__pad dkar zla ba rgyas pa'i steng :__tA~M yig ljang gu'i 'od zer gyis:__'phags mchod 'gro kun bar chad bsal:__tshur 'dus skad cig dran rdzogs su:__rdo rje srung ba'i gur chen dbus:__bdag nyid rje btsun sgrol ma ljang :__zhal gcig phyag gnyis zhi zhing 'dzum:__phyag g.yas mchog sbyin phyag rgya mdzad:__g.yon pas skyabs sbyin ut+pal bsnams:__dar dang rin chen rgyan gyis spras:__zla ba'i rgyab yol la brten nas:__snang stong 'od lnga 'khrigs pa'i klong :__zhabs gnyis phyed skyil rol pas bzhugs:__sku las rang 'dra'i rje btsun ma:__nam mkha' gang bar rab spro bas:__'gro rnams gnas skabs mthar thug gi:__'jigs pa kun las skyob mdzad pa'i:__gnas gsum rdo rje'i 'bru gsum mtshan:__rang 'dra'i ye shes spyan drangs bsam:__tA~M:__skye med 'od gsal chos sku'i dbyings:__'gags med 'phags ma'i ye shes skur:__gang 'dul sgyu 'phrul drwa bar shar:__tshur gshegs Ar+Ya tA re dza:__dzaHhU~M ba~M hoH__nam mkha' gang ba'i dbang gi lhas:__dbang bskur snang mthas dbur brgyan bsam:__oM Ar+Ya tA re sa pa ri wA ra ar+g+haM sogs:__oM:__snang ba mtha' yas pad+ma'i rigs:__'jig rten dbang phyug zhal las byung :__sangs rgyas kun gyi phrin las rdzogs:__'phags ma sgrol mar phyag 'tshal bstod:__bdag cag 'khor dang bcas rnams kyi:__'jigs pa brgyad dang bcu drug sogs:__mi mthun phyogs kun zhi ba dang :__rtag tu thugs rjes bskyang mdzad gsol:__thugs kar pad+ma zla ba'i steng :__tA~M yig ljang gu'i mtha' skor du:__rdo rje'i yi ge bcu pas bskor:__bzlas pas sngags rnams sgrar bcas 'khor:__'od zer dpag yas phyogs bcur 'phros:__'phags mchod byin rlabs rang la thim:__'gro kun 'jigs pa kun bsal nas:__'phags ma sgrol ma'i go 'phang bkod:__bdag gi lus ngag yid gsum dang :__rje btsun 'phags ma'i sku gsung thugs:__dbyer med srung ba chen por bsam:__oM AHhU~M zhes pas sgo gsum rdo rje gsum gyi ye shes su byin gyis brlabs te:__oM tA re tut+tA re tu re swA hA:__zhes smra ba bcad de 'bum phrag la sogs pa bzlas pas bcom ldan 'das mas byin gyis rlob par 'gyur ro:__'jigs pa thams cad zhi bar 'gyur ro:__bsam pa'i don thams cad 'grub par 'gyur ro:__rtag tu tshe rabs dran cing mi brjed pa'i gzungs thob par 'gyur ro:__bar dor yang rje btsun mas rjes su 'dzin cing 'jigs pa thams cad las grol bar 'gyur ro:__sangs rgyas kyi zhing nas sangs rgyas kyi zhing du 'gro bar 'gyur ro:__thun bsdu ba na lha sku 'od gsal du sbyangs te mnyam par 'jog:__thun mtshams su 'jug pa'i tshe slar yang lhar langs rten gsum la bskor ba dang :__yan lag bdun pa dang :__maN+Dal sogs la brtson par bya'o:__sa ma ya:__slob ma rjes su 'dzin 'dod na:__dkyil 'khor mtshan ma'i rdzas bshams te:__sgom bzlas bya ba sngon song nas:__slob mas gsol ba 'di skad gdab:__e ma sangs rgyas thams cad kyi:__phrin las bdag nyid 'phags ma dang :__dbyer med rdo rje slob dpon gyis:__bdag la byin gyis brlab tu gsol:__skyabs 'gro sems bskyed tshogs bsags bya: dkon mchog gsum la bdag skyabs mchi sogs dang*/__rje btsun 'phags ma sgrol ma dang sogs kyi yan lag bdun pa bya/____de nas bum pa'i bdud rtsis bkru:__oM:__bkra shis bum pa'i bdud rtsi'i chus:__skal ldan khyod la khrus bgyis pas:__bag chags dri ma kun byang nas:__'phags ma'i phyag rgya mngon gyur shog:__rtsa sngags dang :__oM sarba ta thA ga ta a b+hi She ka te sa ma ya shrI hU~M:__sarba pA paM A wa ra Na bi sho d+ha na swA hA:__zhes pas dbang bskur bdud rtsi'i chus:__lus gang sgrib dag skad cig gis:__sgrol ma'i sku ru gyur pa la:__ye shes lha yi phyag rgya bstim:__oM:__snang stong dbyer med rdo rje'i sku:__rje btsun 'phags ma'i sku yi dbang :__de ring skal ldan khyod la bskur:__rdo rje'i sku ru 'grub par mdzod:__rtsa sngags dang kA ya a b+hi Shiny+tsa oM:__bzlas pa'i lung byin sngags phreng las:__'jigs pa'i tshogs kun skyob pa yi:__'phags ma sgrol ma mkha' khyab 'phros:__'gro 'dul mdzad pa yongs rdzogs bsam:__brtan phyir sngags phreng mgrin par bzhag:__AH__grags stong dbyer med rdo rje'i gsung :__rje btsun 'phags ma'i gsung gi dbang :__deng 'dir skal ldan khyod la bskur:__rdo rje'i gsung du 'grub par shog:__wAka a b+hi Shiny+tsa AH__phyag mtshan ut+pal snying gar bstim:__thugs dang dbyer med mnyam par 'jog:__hU~M:__rig stong dbyer med rdo rje'i thugs:__rje btsun 'phags ma'i thugs kyi dbang :__deng 'dir skal ldan khyod la bskur:__rdo rje'i thugs su 'grub par shog:__tsit+ta a b+hi Shiny+tsa hU~M:__gtor ma lhar gsal spyi bor bzhag:__tA~M:__gtor ma lha yi phyag rgyar rdzogs:__thugs rje'i 'od phung lams se lam:__rje btsun sgrol ma'i byin rlabs kyis:__skal ldan smin cing grol bar shog:__kA ya wAka tsit+ta gu Na karma ba liM ta a b+hi Shiny+tsa oM AHhU~M hrIH__lha bstim shis brjod me tog 'thor:__rjes kyi bya ba spyi ltar bya:__'jigs pa so so zhi ba'i phyir:__sgrol ma so so'i dbang bskur na:__lha sngags bsgyur la gong ltar bskur:__byin rlabs rtags mtshan myur du 'byung :__sa ma ya:__de nas las kyi kha bsgyur la:__sa yi 'jigs pa zhi bya'i phyir:__rang nyid rdo rje sgrol ma mthing :__phyag g.yas mchog sbyin g.yon pa ni:__skyabs sbyin phyag rgyas ut+pa la:__rdo rje rtse lngas mtshan pa bsnams:__dar dang rin chen rgyan gyis brgyan:__gnas gsum byin rlabs ye shes bstim:__dbang bskur mchod bstod gsol ba gdab:__thugs kar zla steng tA~M mthing ga:__mtha' skor sngags kyi phreng bas bskor:__'od zer rdo rje'i rang bzhin 'phros:__'phags mchod 'gro ba'i don kun byas:__khyad par nga rgyal las gyur pa'i:__sa yi 'jigs pa kun zhi bsam:__rtsa sngags yi ge bcu pa'i mthar:__ma ma sarba la~M la~M b+hA ya shAn+tiM ku ru:__zhes pa swA hA'i gong du spel:__gzhan yang rtsa ba'i sngags sham du:__sa ra tsakra hr-i di pu ne ye la~M tsa la s+t+waM b+hA ya nan:__zhes bris gur gum gi waM byugs:__rin chen sna tshogs bsres pa yi:__sAts+tshar bcug la 'chang ba'am:__gnod pa'i phyogs su bzhag pa yis:__sa g.yos ri rud thog brdib sogs:__sa yi 'jigs pa thams cad kun:__srung dang zhi dang phyir bzlog 'gyur:__sa ma ya:__chu yi 'jigs skyob sgrol ma dmar:__phyag g.yon nor bu me shel gyis:__mtshan pa'i ut+pal bsnams par gsal:__sngags kyi phreng ba'i 'od zer gyis:__chu yi 'jigs pa zhi bar bsgom:__ma ma sarba ba~M ba~M dza la b+hA ya shAn+tiM ku ru:__zhes dang rtsa sngags spel la bzla:__seng ldeng phur pa sngags btab bcang :__chu chen gru dang shwa 'ud sogs:__'dod chags chu yi gnod pa sel:__sa ma ya:__me yi 'jigs skyob sgrol ma ser:__phyag g.yon nor bu chu shel ni:__chu rgyun 'bebs pa bsnams par gsal:__rtsa sngags yi ge bcu pa'i khong :__ma ma sarba ra~M ra~M dz+wa la b+hA ya shAn+tiM ku ru:__zhes spel chu shing phur pa la:__sngags kyis btab pa 'chang ba yis:__zhe sdang me yi 'jigs pa zhi:__sa ma ya:__rlung gi 'jigs skyob sgrol ma dkar:__phyag g.yon 'khor los mtshan pa yi:__ri rab bsnams pa'i skur gsal la:__ma ma sarba ya~M ya~M tsa la b+hA ya shAt+niM ku ru:__zhes dang rtsa sngags spel la bzla:__tsan+dan phur pa sngags btab bcang :__rlung chen 'khrugs dang g.yang lhung sogs:__phrag dog rlung gi 'jigs pa zhi:__sa ma yaH__rdo rje'i 'jigs skyob sgrol ma ljang :__phyag g.yon sna tshogs rdo rje dmar po yis:__mtshan pa'i ut+pal bsnams par gsal:__sngags 'di rtsa sngags spel la bzla:__ma ma sarba e e ma hA ha na b+hA ya shAn+tiM ku ru:__gri lcags ral gri sor bzhi par:__btab nas 'chang ba tsam gyis kyang :__gnam lcags thog ser 'jigs pa srung :__sa ma ya:__mtshon cha'i 'jigs skyob sgrol ma sngo:__phyag g.yon ral gri bsnams par gsal:__ma ma sarba tig tig tIk+Sh+Na rak+Sha rak+Sha ku ru:__zhes pa rtsa sngags spel la bzla:__longs su ma spyad rgya khab la:__sngags btab gong ba'i nang du 'chang :__mtshon cha'i 'jigs pa kun las srung :__sa ma ya:__rgyal po'i 'jigs skyob sgrol ma dmar:__phyag g.yon lcags kyu bsnams par gsal:__rtsa ba'i sngags la 'di spel bzla:__ma ma sarba rA dza duSh+tAn kro d+ha shAn+tiM ku ru:__me tog dmar por sngags 'di btab:__me la bsregs pas dbang du 'gyur:__sarba rA dza duSh+tAn ha ye mo ha ha ra ha ra dzaHdzaH__rgyal po khros pas sdang ba dang :__btson ra'i 'jigs pa kun las skyob:__sa ma ya:__chom rkun 'jigs skyob sgrol ma nag:__phyag g.yon dgra s+t+wa bsnams par gsal:__rtsa ba'i sngags la 'di spel bzla:__sarba tsau ra b+han+d+ha b+han+d+ha trig thuM:__skud pa nag por mdud pa bor:__sngags 'di khri bzlas dpung par 'ching :__oM thar ni thar ni ma hA thar ni ba~M ha ya mo ha hU~M phaTa?:__dgra jag chom rkun 'jigs las skyob:__sa ma ya:__sha za'i 'jigs skyob sgrol ma nag:__phyag g.yon phur pa bsnams par gsal:__rtsa ba'i sngags la 'di spel bzla:__sarba duSh+tAn big+han baM phaTa?:__skud pa dmar por mdud pa bor:__oM ma ma bi bi ni ni zlog zlog:__sngags 'di mang du btab la bcing :__gza' klu rgyal 'gong bsen mo sogs:__sha za 'byung po'i gnod pa skyob:__sa ma ya:__glang chen 'jigs skyob sgrol ma ni:__dud ka phyag g.yon mdung thung bsnams:__gsal btab rtsa sngags 'di spel bzla:__sarba ha~M ha~M duSh+tAn ha na ha na tra sa ya phaT:__sa la bsngags nas gtor ba yis:__glang chen khros dang g.yag rgod sogs:__ma rung srog chags 'tshe ba skyob:__sa ma ya:__seng ge'i 'jigs skyob sgrol ma nag:__phyag g.yon me phung bsnams par gsal:__sarba he he tsa le tsa le b+han+d+ha phaT:__zhes 'di rtsa sngags spel la bzla:__ma ma be be zlog zlog:__seng ldeng byang bur bris la bcang :__seng ge stag gzig dom dred sogs:__gcan gzan kun gyi 'jigs las grol:__sa ma ya:__sbrul gyi 'jigs skyob sgrol ma dkar:__phyag g.yon chu shel las grub pa'i:__bdud rtsi'i bum pa bsnams par gsal:__rtsa ba'i sngags la 'di spel bzla:__sarba bi Sha tsa la ya ha ra ha ra phaT:__a ru gla rtsi tsha lir chur:__ma ma truM truM zhi zhi phaT:__zhes btab btang bas sbrul la sogs:__brtan g.yo'i dug rigs thams cad 'joms:__sa ma ya:__nad kyi 'jigs skyob sgrol ma ni:__ljang ser phyag g.yon a ru bsnams:__bdud rtsi'i 'od zer spro bar gsal:__sarba dz+wa ra sarba duHkha pra sha ma na ya phaT:__zhes pa rtsa sngags spel la bzla:__yung ba shu dag spru nag la:__sngags btab 'chang ba yams rims sogs:__nad kyi 'jigs pa zhi zhing srung :__sa ma ya:__'chi ba'i 'jigs skyob sgrol ma dkar:__phyag g.yon tshe bum bsnams par gsal:__tshe bcud bsdu bstim rtsa sngags dang :__badz+ra A yu She spel bzla:__g.yu byang nr-iHmtshan dar dmar dril:__sngags kyis btab la mgul du 'chang :__dus min 'chi ba'i 'jigs pa zhi:__sa ma ya:__phongs pa'i 'jigs skyob sgrol ma ser:__phyag g.yon 'dod dgu'i char 'bebs pa'i:__gter gyi bum bzang bsnams par gsal:__rtsa ba'i sngags la 'di spel bzla:__dzam+b+he mo he d+ha na me d+hi hrIH__me tog ser po bsngags byas te:__maN+Dal brgya stong khri 'bum phul:__dbul ba'i 'jigs pa kun zhi 'gyur:__sa ma ya:__don nyams 'jigs pa las skyob pa'i:__sgrol ma ljang ser 'od 'bar gsal:__phyag g.yon dpal be'u bsnams pa las:__nyi ma 'char ka'i 'od 'phro bsgom:__sarba ar+tha sid+d+hi sid+d+hi ku ru:__zhes dang rtsa sngags spel la bzla:__bris sku'i mdun tu ci 'byor pa'i:__maN+Dal brgya phrag re re'i mtshams:__sngags 'di stong phrag spel la bzla:__oM uSh+Ni Sha d+ha ra d+ha ra d+hi ri d+hi ri swA hA:__ji ltar 'dod pa'i don grub cing :__don nyams 'jigs pa kun zhi 'gyur:__sa ma ya:__de ltar de dag thams cad kyang :__bsdu na rang nyid skad cig gis:__rtsa ba'i sgrol mar bsgoms byas la:__las lha so sor spro dang bcas:__rtsa sngags spel tshig bcas pa bzla:__rgyas par spro na bdag bskyed dang :__mdun bskyed so sor bsgoms byas la:__maN+Dal mchod bstod rgyas par bya:__srung ba 'dod na rak+Sha dang :__zhi bar shAn+tiM phyir zlog par:__zlog ces bya ba'i sngags sham bsgyur:__las kyi rim pa mtha' yas 'byung :__sa ma ya:__gtso 'khor yongs rdzogs la brten pa'i:__srung ba chen po'i 'khor lo ni:__gro ga'am ni shog bu la:__tsakra rtsibs brgyad lte bar tA~M:__de mthar oM dang hA yi bar:__ji ltar 'dod pa'i spel tshig bri:__rtsibs brgyad tA re la sogs brgyad:__rtsibs mchan bkra shis rtags brgyad dgod:__de yi phyi rim mu (1)khyud la:__na mo rat+na tra yA ya sogs/__gzungs ring spel tshig bcas pa bri:__de (2)rgyab pad 'dab bcu drug la:__las kyi sngags rnams so sor dgod:__de (3)rgyab dbyangs gsal rten snying dang :__ut+pal (4)rdor (5)me ris bskor:__gur gum gi waM tsan+dan dkar:__ut+pal shu dag gla rtsis byugs:__lhar bskyed rab gnas legs par bya:__dar sna lnga yis dril byas te:__lus la drod dang ma bral 'chang :__spyi yi 'jigs pa thams cad la:__rdo rje'i mkhar du tshud dang 'dra:__sa ma ya:__so so'i tsakra bya 'dod na:__lte ba rtsibs bcas gong ltar la:__mu khyud dang por so so'i sngags:__las kyi spel tshig rgyas par 'dri:__gnyis par dbyangs gsal rten snying dang :__gsum par rang rang phyag mtshan te:__de rgyab rdo ra me ris bskor:__rdzas byugs rab gnas mgul du gdags:__'jigs pa so so srung ba'i mchog:__sa ma ya:__rnal 'byor gtor ma la brtson na:__'phral rkyen bar chad ngang gis zhi:__rin chen snod du ci 'byor pa'i:__gtor ma bsang sbyang byin gyis brlab:__rang gi thugs nas 'od 'phros pas:__sgrol ma 'khor bcas spyan drangs nas:__mdun gyi nam mkhar bzhugs pa la:__mchod gtor phul bas mnyes par bsam:__na maHsarba bud+d+ha bo d+hi satwA nAM:__a pra ti ha ta sha sa nA nAM:__he he b+ha ga wa tI:__ma hA sarba bud+d+ha a wa lo ki te:__mA bi lam+ba mA pi lam+ba:__i daM ba liM gr-ih+NA pa ya gr-ih+NA pa ya hU~M hU~M sarba pi sany+tsa re swA hA:__lan mang phul mthar mchod pas mchod:__oM:__sangs rgyas kun gyi phrin las bdag:__rje btsun myur ma dpa' mo dang :__'jigs pa thams cad sel mdzad ma:__'khor gyi tshogs dang bcas la bstod:__mchod sbyin gtor ma dam pa 'di:__ye shes chen pos rjes dgongs la:__bde ba chen por bzhes nas kyang :__dngos grub ma lus stsal du gsol:__'byung bzhi 'khrugs dang gnam lcags ltung :__mtshon cha rgyal po'i chad pa dang :__chom rkun sha za glang chen khros:__gcan gzan khro bo gdug pa'i sbrul:__nad gdon dus min 'chi ba'i rkyen:__dbul phongs 'dod don nyams pa sogs:__mi bzad 'jigs pa'i tshogs rnams kun:__srung dang zhi dang zlog par mdzod:__'khor ba ngan song sdug bsngal sgrol:__tshe dang bsod nams ye shes sogs:__mchog thun phrin las rgyas par mdzod:__ces pas gsol btab lha tshogs rnams kun:__rang la bstim mam dbyings su gshegs:__rnal 'byor rgyun gyi bar chad zhi:__sa ma ya:__maN+Dal la brten tshogs rdzogs pas:__'dod pa'i don rnams thams cad 'grub:__de phyir phyir rabs dad ldan rnams:__'di la rtag tu brtson par bya:__gtsang ma'i gnas su bris sku'i mdun:__maN+Dal mchod gtor rgyas par bsham:__skyabs song byang chub sems gnyis bskyed:__mchod pa'i tshogs rnams byin brlabs la:__dkon mchog rgya mtsho mdun du dmigs:__maN+Dal 'bul zhing gsol ba gdab:__de nas mdun tu rje btsun ma:__'khor bcas bskyed cing spyan drangs bstim:__dbang bskur mchod bstod khyad par du:__phyag 'tshal nyi shu rtsa gcig ni:__gnyis gsum bdun dang maN+Dal bskyar:__bzlas pa bya zhing thugs rgyud bskul:__gtor ma 'bul zhing 'dod don gsol:__mthar ni nongs bshags ye shes gshegs:__dam tshig rang bstim bsngo smon dang :__shis pa brjod cing me tog 'thor:__bar chad thams cad zhi ba dang :__'dod don yid bzhin 'grub par 'gyur:__bye brag so so'i las bsgrub na:__las lha gtso bor bya ba'am:__so so'i bzlas pa gtso bor bya:__'jigs pa'i tshogs rnams myur du zhi:__sa ma ya:__rang nyid 'phags mar gsal ba yi:__thugs nas zhi ba'i sgrol ma dkar:__skyabs sbyin ut+pal bsnams pa ni:__grangs med nam mkha' gang bar 'phros:__bar chad thams cad zhi bar bsam:__oM badz+ra tA re sarba big+h+nAn shAn+tiM ku ru swA hA:__bzlas pas bar chad thams cad zhi:__sa ma ya:__rang nyid 'phags mar gsal ba yi:__thugs nas rgyas pa'i sgrol ma ser:__rin chen lcags kyu 'dzin pa ni:__nam mkha' gang bar rab spros te:__phyogs bcu'i sangs rgyas byang chub sems:__nyan rang 'phags tshogs ye shes dang :__lha dang drang srong rig 'dzin gyi:__mngon par shes pa thams cad kun:__'od kyi rnam par rab bsdus te:__rang gi snying dbus thim pa yis:__mngon shes rtsal kha rgyas par bsam:__oM rat+na tA re sarba lo ka dz+nyA na bid+yA d+ha ra d+ha ra d+hi ri d+hi ri hrIng hrIng dza dz+nyA na puSh+tiM ku ru oM:__zhes bzlas dus gsum thams cad shes:__khyad par nyal ba'i dus kyi tshe:__ru rta gi waM ga bur dang :__shu dag chu la sngags 'di gdab:__oM mu tsi li swA hA:__mo ha ni swA hA:__dan ti li swA hA:__ma ma sarba tsit+ta sma ra sal sal phye phye swA hA:__'thor 'thung khrus byas 'dod pa'i don:__yid la bsam ste nyal ba yis:__mngon shes lta bu'i rmi lam 'byung :__sa ma ya:__rang nyid sgrol ma'i skur gsal ba'i:__thugs nas drag po'i sgrol ma nag:__phur pa thogs pa dpag med spros:__bzhad pa brgyad kyi sgra dang bcas:__byad phur rbod gtong tshar bcad bsam:__oM karma tA re sarba sha trUn big+h+nAn ma ra se na ha ha he he ho ho haM haM b+hin+d+ha b+hin+d+ha phaT:__bdud tshar bcad pa'i sngags kyang bzla:__byad phur rbod gtong bdud bgegs tshogs:__rlung ltar 'tshubs kyang nyam mi nga :__sa ma ya:__rang nyid 'phags mar gsal ba yi:__thugs nas dbang gi sgrol ma dmar:__pad+ma'i lcags kyu zhags pa 'dzin:__chags pa'i nyams ldan dpag med spros:__bsgrub bya lcags kyus snying nas bzung :__zhags pas drangs shing rlung dmar po'i:__dkyil 'khor la bzhag mdun tu dgug:__rang gi gsang ba'i pad+mo nas:__bdud rtsi dmar po dpag med babs:__dmigs bya'i tshangs pa'i sgo nas zhugs:__lus kyi nang kun khyab pa yis:__khengs dregs ma gus sdang sems zhi:__chags shing zhen pa'i yid g.yos bsam:__oM pad+ma tA re san+tA ra hrIHming 'di zhes bya ba wA shaM ku ru ho:__mthar ni 'od dmar bde chen gyi:__thig le'i rnam pa mer gyis zhu:__gsang ba'i lam nas snying gar drang*/__rang gi thugs srog tA~M yig dang :__dbyer med blo 'das ngang du bzhag:__me tog dmar po'i sbyin sreg bya:__dbang gi las kyi mthar thug go:__sa ma ya:__gzhan yang las kyi mtha' rgyas ni:__rtsa ba yan lag gang yin kyang :__las de brtan par bya ba'i slad:__sAts+tsha so so'i sngags ldan pa:__kha dog bsgyur ba mang du gdab:__rab gnas byas shing mchod pas mchod:__chu sna mang du tshogs pa la:__rin chen sman 'bru me tog bsre:__gtor ma'i tshul du grangs mang dbul:__las gang yin kyang ring du 'grub:__las rnams myur du 'grub pa'i phyir:__lha rdzas bud shing me sbar te:__so so'i rigs kyi lhar bskyed la:__mchod bstod bsreg rdzas spyi dang ni:__khyad par so so'i sku mdog dang :__mthun pa'i me tog gtsang ma la:__sngags mthar spel tshig bcas pa ni:__brgya stong khri la sogs pa 'bul:__las rnams rtsol med myur du 'grub:__las kyi nus pa bskyed pa'i phyir:__sngags rnams bris te rlung la bskor:__skabs su lhar bskyed mchod bstod dang :__bzlas pa bya zhing phrin las bcol:__ma bsgrubs par yang las rnams kun:__'grub cing phun sum tshogs par 'gyur:__sa ma ya:__man ngag gud du sbas pa ni:__bar chad skyob pa'i thabs kyi mchog:__gsum la skyabs su 'gro ba ste:__mdun mkhar bla ma rje btsun mar:__skyabs gnas rgya mtshos bskor bar bsgom:__phyag g.yas skyabs sbyin brkyangs pa'i 'og:__bdag dang 'gro ba thams cad tshud:__'khor ba dang ni ngan song gi:__'jigs pa kun las skyob par bsam:__na mo:__bla ma yi dam rje btsun ma:__mchog gsum rgyal ba rgya mtsho la:__bdag sogs 'gro kun byang chub bar:__rtse gcig gus pas skyabs su mchi:__mthar ni skyabs yul rang la bstim:__byang chub sems gnyis ldan pa la:__bar chad kun gyis nye mi nus:__de phyir skyabs yul dpang byas te:__smon dang 'jug pa'i byang sems bskyed:__hoH__ma gyur sems can thams cad kun:__sangs rgyas go 'phang thob bya'i phyir:__nyes spyod kun bsdam dge chos sdud:__gzhan phan byang sems rtag tu bskyed:__thun mthar bde sdug gtong len bsgom:__'khor gsum dmigs pa pral bar bzhag:__sdig ltung la brten bar chad 'jug:__de phyir de nyid sbyong ba ni:__rang nyid tha mal spyi bo ru:__pad dkar zla ba'i gdan gyi steng :__bla ma don yod grub pa ljang :__ral gri dang ni dril bu 'dzin:__rang 'dra'i sgrol ma yum dang sbyor:__dar dang rin chen rus pas brgyan:__mtshan dpe'i gzi 'bar skyil krung bzhugs:__thugs kar zla steng hA yig mthar:__sngags kyi phreng bas bskor ba las:__'od 'phros 'phags mchod 'gro sgrib sbyangs:__tshur 'dus bdud rtsi'i rgyun babs pa:__rang gi tshangs pa'i sgo nas zhugs:__lus gang nad gdon sdig sgrib dag:__bde chen ye shes skyes par bsam:__oM AHhU~M ma hA gu ru hA pradz+nyA d+hr-ig tA~M badz+ra rA ti sarba pA pa~M A wa ra Na bi sho d+ha na swA hA:__sdig ltung 'gyod pas bshags shing bsdam:__tshogs rten 'od zhu rang la thim:__skye med gnyug ma'i ngang du bzhag:__bla mas byin brlabs tshogs rdzogs na:__bar chad thams cad rang sar grol:__dngos grub myur du thob par 'gyur:__de phyir rtse gcig 'di ltar bsgom:__aH__rang mdun nam mkhar 'od lnga'i klong :__pad dkar zla ba rgyas pa'i dbus:__bla ma rje btsun sgrol ma ljang :__mchog sbyin ut+pal phyag rgya can:__dar dang rin chen rgyan gyis brgyan:__zhi 'dzum mtshan dpe'i dpal 'bar ba:__mchog gsum 'dus pa'i ngo bo nyid:__rtsa gsum rgya mtsho'i sprin phung 'phro:__rang bzhin yongs grub ngang du gsal:__oM AHhU~M:__khams gsum snod bcud dpal 'byor dang :__bdag lus longs spyod dge tshogs kun:__thugs rje'i bdag nyid rnams la 'bul:__bzhes nas byin gyis brlab tu gsol:__oM sarba ta thA ga ta rat+na maN+Da la pU dza ho:__kye kye bla ma rje btsun mar:__snying nas gus pas gsol ba 'debs:__byin gyis rlobs shig bar chad sol:__dbang bzhi skur cig dngos grub stsol:__oM AHhU~M ma hA gu ru tA re swA hA:__zhes pas gsol btab dbang bzhi blang :__rang la bstims nas dbyer med ngang :__'od gsal chos sku'i rang zhal blta:__bskyed rdzogs zab mo'i gnad shes na:__bar chad kun kyang lam du 'gyur:__bskyed rim rang lus rje btsun ma:__chu zla 'ja' tshon lta bur gsal:__bsod nams tshogs rdzogs snang zhen 'jig:__de nyid rang bzhin med par bsgom:__ye shes tshogs rdzogs rtog tshogs sbyong :__dbyer med du ma ro gcig ngang :__bar chad rkyen snang ci shar yang :__'khu 'phrig mi bya rar ngor bzhag:__sbrul mdud nam mkhar grol ba bzhin:__bar chad 'jigs pa lam longs nas:__bla med mchog gi dngos grub thob:__sa ma ya:__de ltar rgyal ba kun gyi yum:__'phags ma'i rgyud dang man ngag tshogs:__rgyud sde bzhi dang rab sbyar nas:__rgyas par gzhan tu bstan pa yin:__'dir ni zab cing 'dril ba'i don:__bya sla tshegs chung byin rlabs myur:__rig sngags 'chang bas don yod pa'i:__yang gsang snying gi dum bur bstan:__da lta'i mnga' bdag rje 'bangs kyi:__'jigs pa'i tshogs kun zhi ba dang :__ma 'ongs chos bdag skyes bu yi:__bar chad sna tshogs sel ba dang :__bod khams mtha' dbus thams cad kun:__phan dang bde la 'god pa'i slad:__chos nyid rdo rje'i rang sgrar shar:__mtsho rgyal mos pas yi ger thob:__'gro phan phrin las mtha' rgyas 'gyur:__sa ma ya:__rgya rgya:__na d+hA:__kha thaM:__gu h+ya sa ma ya:__rtsod bral dus babs kyi sprul pa'i gter ston chen po o rgyan mchog gyur bde chen gling pas mdo khams shar phyogs phrin las 'gro ba 'dul ba'i gnas chen brgyad kyi ya gyal ri bo dbang zhu'i brag nas spyan drangs pa'i shog ser gyi bu dpe phyag bris dngos las mtsho skyes bla ma dgyes pa'i 'bangs mkhyen brtse'i dbang pos zhal bshus pa dge legs su gyur cig/__//

Footnotes

Other Information