JKW-KABUM-15-BA-006-003

🚧 This website is under continued development. We appreciate your patience!

Previous Text Back to Volume PageNext Text

བླ་མའི་ཐུགས་སྒྲུབ་བར་ཆད་ཀུན་སེལ་ལས༔ དཔལ་ཡང་དག་ཧེ་རུ་ཀའི་རིམ་གཉིས་རྒྱུན་གྱི་རྣལ་འབྱོར།

Wylie title	bla ma'i thugs sgrub bar chad kun sel las: dpal yang dag he ru ka'i rim gnyis rgyun gyi rnal 'byor
Location	mkhyen brtse'i bka' 'bum Volume 15, sde tshan 6, Text 3, Pages 141-149 (Folios 8a2 to 12a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. bla ma'i thugs sgrub bar chad kun sel las dpal yang dag he ru ka'i rim gnyis rgyun gyi rnal 'byor. In 'jam dbyangs mkhyen brtse'i dbang po'i bka' 'bum, Vol. 15: 141-149. Khams sde dge rdzong sar dgon: Rdzong sar blo gros phun tshogs, 2020.
Genre	Daily Practice - rgyun khyer  ·  Contemplative Guide Books and Instructional Manuals - khrid yig
Cycle	རིག་འཛིན་འཛམ་གླིང་རྒྱན་མཆོག་ཡང་དག་ཧེ་རུ་ཀ་ (rig 'dzin 'dzam gling rgyan mchog yang dag he ru ka)
Parent Cycle	བླ་མའི་ཐུགས་སྒྲུབ་བར་ཆད་ཀུན་ (bla ma'i thugs sgrub bar chad kun sel)
Deity	yang dag he ru ka
RTZ	In the Rinchen Terdzö: https://rtz.tsadra.org/index.php/Terdzo-SA-001
Colophon	ཞེས་པའང་གྲུབ་མཐའ་རིས་མེད་པའི་སྐྱེས་ཆེན་དམ་པ་མང་དུ་འདུས་པ་ལ་ལམ་འདིའི་དམིགས་ཁྲིད་རྫོགས་པར་ཕུལ་བའི་སྐབས། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རང་འདྲའི་བློ་གྲོས་ཤིན་ཏུ་དམན་པ་རྣམས་ལ་ཕན་པའི་བསམ་པས་བྲིས་པ་སྟེ། དགེ་བས་གྲོང་ཁྱེར་གསུམ་གྱི་འགྲོ་བ་ཐམས་ཅད་ ཤྲཱི་ཧེ་རུ་ཀའི་གོ་འཕང་ལ་མྱུར་དུ་འགོད་པའི་རྒྱུར་གྱུར་ཅིག
	zhes pa'ang grub mtha' ris med pa'i skyes chen dam pa mang du 'dus pa la lam 'di'i dmigs khrid rdzogs par phul ba'i skabs/__mtsho skyes bla ma dgyes pa'i 'bangs mkhyen brtse'i dbang pos rang 'dra'i blo gros shin tu dman pa rnams la phan pa'i bsam pas bris pa ste/__dge bas grong khyer gsum gyi 'gro ba thams cad _shrI he ru ka'i go 'phang la myur du 'god pa'i rgyur gyur cig

1 Texts in this Section (sde tshan or chos tshan)

3 141-149	བླ་མའི་ཐུགས་སྒྲུབ་བར་ཆད་ཀུན་སེལ་ལས༔ དཔལ་ཡང་དག་ཧེ་རུ་ཀའི་རིམ་གཉིས་རྒྱུན་གྱི་རྣལ་འབྱོར། bla ma'i thugs sgrub bar chad kun sel las: dpal yang dag he ru ka'i rim gnyis rgyun gyi rnal 'byor Daily Practice - rgyun khyer   ·   Contemplative Guide Books and Instructional Manuals - khrid yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་ལས༔ དཔལ་ཡང་དག་ཧེ་རུ་ཀའི་རིམ་གཉིས་རྒྱུན་གྱི་རྣལ་འབྱོར་བཞུགས་སོ༔ ན་མོ་གུ་རུ་བཛྲ་ཤྲཱི་ཧེ་རུ་ཀཱ་ཡ། །འདིར་དཔལ་དུས་གསུམ་མཁྱེན་པ་ཨོ་རྒྱན་ཆེན་པོའི་ཐུགས་དམ་མཐར་ཐུག་པ་དཔལ་ཡང་དག་ཧེ་རུ་ཀའི་རིམ་གཉིས་ཀྱི་ལམ་ཟབ་མོ་རྒྱུན་གྱི་རྣལ་འབྱོར་དུ་མདོར་བསྡུས་ཏེ་བསྒོམ་པར་འདོད་པས། གནས་དབེན་པར་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་སྔོན་འགྲོའི་རིམ་པ་རྒྱས་པར་བྱ་བའམ། ངེས་འབྱུང་དང་སྙིང་རྗེ་ཤུགས་དྲག་ཏུ་བསྐྱེད་ལ་ཚོགས་ཞིང་ནམ་མཁར་གང་བར་སད་པའི་སྤྱན་སྔར། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པ། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་དབུལ་ལོ། །ཚེ་རབ་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ལན་གསུམ་གྱིས་རྒྱུད་སྦྱངས། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ཚད་མེད་བཞི་བསྒོམ་པ་སྔོན་དུ་འགྲོ་བས། དངོས་གཞིའི་ཐོག་མར། རྣལ་འབྱོར་བསྐྱེད་པའི་རིམ་པ་ལ། དང་པོ་ཞི་བར་བསྙེན་པ་ནི། ཨཿ །རྡོ་རྗེ་སེམས་དཔའ་ནམ་མཁའ་ཆེ། །བཟུང་བས་མི་ཟིན་ཆུ་ཟླ་འདྲ། །ཀུན་ཏུ་བཟང་པོའི་རོལ་པ་ལས། །ཐབས་ཤེས་ཟུང་འཇུག་རྩ་བའི་ལྷ། །སེམས་དཔའ་དཀར་པོ་རྡོར་དྲིལ་བསྣམས། །རང་འོད་ཡུམ་འཁྱུད་བདེ་སྟོང་སྦྱོར། །དར་དང་རིན་ཆེན་རྒྱན་གྱིས་བརྒྱན། །མ་བཅོས་ལྷུག་པའི་ངང་དུ་གསལ། །ཨོཾ་བཛྲ་སཏྭ་ཨཿ ཞེས་ཅི་ནུས་བཟླ། དེ་ནས་ཁྲོ་བོར་སྒྲུབ་པ་ནི། །དེ་ཉིད་ཡོངས་གྱུར་སྐད་ཅིག་གིས༔ བདག་ཉིད་རིག་འཛིན་འཛམ་གླིང་རྒྱན༔ རྣམ་པ་ཡང་དག་ཧེ་རུ་ཀཿ མཐིང་དཀར་དམར་བའི་ཞལ་གསུམ་འབར༔ ཕྱག་དྲུག་ཡེ་ཤེས་རྟགས་ཀྱི་རྒྱ༔ རྡོ་རྗེ་ཁ་ཊྭཱྃ་རྡེའུ་ཆུང་གཡས༔ དྲིལ་བུ་བྷན་དམར་རྒྱུ་ཞགས་གཡོན༔ བཛྲ་ཀྲོ་དྷི་ཤྭ་རི་མ༔ རྡོ་རྗེ་དུང་ཁྲག་བསྣམས་པས་འཁྲིལ༔ གར་དགུའི་ཉམས་ལྡན་ཁྲོ་བོའི་ཆས༔ ཡེ་ཤེས་མེ་དཔུང་ཆེར་འབར་དབུས༔ ཞབས་བཞི་གྱད་ཀྱི་དོར་སྟབས་ཀྱིས༔ པད་ཉི་བདུད་བཞིའི་གདན་ལ་འགྱིངས༔ གཡས་གཡོན་ཞལ་དང་ཕྱག་དྲུག་ནི༔ གཽ་རཱི་ལ་སོགས་ངོ་བོར་རྫོགས༔ རྡོ་རྗེ་ཕུང་པོའི་གྲོང་ཁྱེར་ཀུན༔ མ་བསྐྱེད་རང་བྱུང་རོལ་བའི་རྒྱན༔ ཁྲག་འཐུང་ལྷ་ཚོགས་ཕྱག་རྒྱར་བཞེངས༔ ཞེས་རྩེ་གཅིག་ཏུ་བསྒོམས་ལ། ལྷར་སྣང་སྒྱུ་མ་ལྟ་བུར་སེམས་འཛིན་ཅིང་ང་རྒྱལ་དང་། གཞི་འབྲས་སྦྲེལ་བའི་དག་དྲན་ལ་བསླབ༔ ཞར་བྱུང་བཟླས་པའི་རྣལ་འབྱོར་ནི། ཐུགས་ནི་དཔལ་བེའུ་ཟུར་བརྒྱད་ཀློང་༔ རུ་ལུ་འབྲུ་བརྒྱད་འཕྲོ་ཞིང་འདུ༔ འགལ་མེ་ལྟ་བུར་འཁོར་བ་ཡིས༔ བདེ་ཆེན་ཡེ་ཤེས་བརྟན་པར་གྱུར༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་ཅི་ནུས་དང་༔ རྫོགས་རིམ་བསྒོམ་པར་སྤྲོ་ན་ཇི་ལྟར་རིག་པ་བསྒོམ་ཞིང་༔ ཐུན་བསྡུ་བ་ནི། ཧཱུྃ་ཧཱུྃ་ཧཱུྃ༔ ཞེས་པས་སྣང་ཆའི་ལྷ་སྐུ་འོད་གསལ་གྱི་དབྱིངས་སུ་ཐིམ་པར་བསམ་ཞིང་མཉམ་པར་བཞག༔ ལྡང་བའི་ཚེ༔ ཕཊ་ཕཊ་ཕཊ༔ རང་དང་སྣང་བ་ཐམས་ཅད་དཔལ་ཧེ་རུ་ཀའི་སྐུ་གསུང་ཐུགས་སུ་གྱུར་པར་མོས་ལ། དགེ་བ་འདི་ཡིས་མྱུར་དུ་བདག༔ ཧེ་རུ་ཀ་དཔལ་འགྲུབ་གྱུར་ནས༔ ཞེས་སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ༔ གཉིས་པ་མན་ངག་རྫོགས་པའི་རིམ་པ་ལ་དྲུག༔ གཏུམ་མོ། སྒྱུ་ལུས། འོད་གསལ། རྨི་ལམ། འཕོ་བ། བར་དོའོ། །དང་པོ་ལམ་གྱི་རྩ་བ་གཏུམ་མོའི་རྣལ་འབྱོར་ནི། རང་ཉིད་དཔལ་ཧེ་རུ་ཀ་ཞལ་གཅིག་ཕྱག་གཉིས་པའམ་ཞལ་ཕྱག་རྫོགས་པར་གསལ་བའི་ལུས་ཀྱི་ནང་སྟོང་ཆེན་སྒྲིབ་རྟོགས་དང་བྲལ་བའི་དབུས་སུ་རྩ་གསུམ་འཁོར་ལོ་བཞི་སྤྱི་ལྟར་གསལ་ནས་རླུང་རོ་བསལ། ཆེད་དུ་དམིགས་པ་ཐུགས་ཀར་ཆོས་ཀྱི་འཁོར་ལོའི་དབུ་མའི་ནང་དུ་ཧཱུྃ་མཐིང་གསལ་མར་མེ་ལྟར་འབར་བའི་ནཱ་ད་ལས་རུ་ལུ་འབྲུ་བརྒྱད་འཕྲོ་ཞིང་འདུ་བར་གསལ་བཏབ་ལ་སེམས་བཟུང་ཟིན་པ་ན་རླུང་བུམ་པ་ཅན་སྙིང་གར་ཁ་སྦྱོར་དུ་བཟུང་ཞིང་ཧཱུྃ་ལ་བསྟིམ་པའམ། ལས་དང་པོ་པས་ལྟེ་བའི་བུམ་པ་ཅན་གཙོ་བོར་བྱ། རྒྱུན་གྱི་རྣལ་འབྱོར་ལ་འདི་ཙམ་གྱི་འཐུས། སྤྲོ་ན་རླུང་ནང་དུ་འཇུག་པ་ཨོཾ། གནས་པ་རུ་ལུ་རུ་ལུ། ལྡང་བ་ཧཱུྃ་བྷྱོ་ཧཱུྃ་ཞེས་པའི་གདངས་སུ་མོས་པའི་རྡོ་རྗེའི་བཟླས་པ་བྱ་ཞིང་། དེ་ནས་དབུ་མའི་མས་སྣ་རྩ་གསུམ་འདུས་མདོར་ཨ་ཤད་མེ་འབར་ལ་ཁད་པ་དང་། ཡས་སྣ་ཧྃ་མགོ་ཐུར་བསྟན་གསལ་བཏབ། བུམ་ཅན་གྱི་སྦྱོར་བས་ལྟེ་བའི་ཨ་ཤད་ལས་མེ་སྦར། ཁམ་སྙིགས་མ་ཐམས་ཅད་བསྲེག །མཐར་སྤྱི་བོའི་ཧྃ་ལ་རེག་པས་བདུད་རྩི་བབས། འཁོར་ལོ་བཞི་གང་ཞིང་། དྭང་མ་སྙིང་གའི་ཧཱུྃ་ལས་འདུས་པས་དྲོད་དང་བདེ་བའི་ཡེ་ཤེས་བསམ་གྱིས་མི་ཁྱབ་པ་སྐྱེས་པར་བསམས་ལ་གསལ་རིག་འཛིན་པ་མེད་པའི་ངང་དུ་མཉམ་པར་བཞག །གཉིས་པ་ལམ་གྱི་གཞི་མ་སྒྱུ་ལུས་ནི། སྤྱིར་འཁོར་འདས་ཀྱི་ཆོས་ཐམས་ཅད་སྒྱུ་མའི་དཔེ་བརྒྱད་ཀྱིས་མཚོན་པར་གཏན་ལ་དབབ། བྱེ་བྲག་ཏུ་སྟོད་སྨད་ཆགས་སྡང་སོགས་མེ་ལོང་གི་གཟུགས་བརྙན་ལྟ་བུར་དཔྱད་ཅིང་། ཁྱད་པར་མཉམ་རྗེས་ཀུན་ཏུ་སྣང་བ་ཐམས་ཅད་ལྷ་སྐུ་འཇའ་ཚོན་དང་ཆུ་ཟླ་ལྟ་བུའི་ཏིང་ངེ་འཛིན་ལ་རྩལ་སྦྱང་། ལམ་སྔ་མ་ལ་གོམས་པ་བརྟན་པས་རླུང་སེམས་སྒྱུ་མའི་ལྷ་སྐུར་ལྡང་ཞིང་སྐབས་ཅི་རིགས་པར་སྙིང་གའི་ཧཱུྃ་ལས་ཧཱུྃ་ཡིག་ནམ་མཁའ་ཁྱབ་པར་སྤྲོས་པས་སྣོད་བཅུད་ཀྱི་དངོས་འཛིན་གཞིག་སྟེ་སྒྱུ་མ་ལྟ་བུའི་ཡེ་ཤེས་ལྷ་ཡི་ཕྱག་རྒྱར་ཤར་བ་ལ་སེམས་འཛིན་པར་བྱའོ། །གསུམ་པ་ལམ་གྱི་སྙིང་པོ་འོད་གསལ་ནི། ཉིན་པར་གང་ཤར་གྱི་རྟོག་པའི་རྗེས་སུ་མི་འབྲང་བ་འོད་གསལ་གཉུག་མའི་ངང་དུ་མཉམ་པར་བཞག་ཅིང་། བསྐྱེད་རིམ་དང་འབྲེལ་བ་ཐུན་གྱི་མཇུག་ཏུ་ལྷ་སྐུ་འོད་གསལ་དུ་སྦྱངས་པ་དང་། ཟུང་འཇུག་གི་སྐུར་ལྡང་བའི་ཏིང་ངེ་འཛིན་ལ་ཡང་ནས་ཡང་དུ་རྩལ་སྦྱངས། ནུབ་མོ་ལུས་ཙོག་པུར་འཁོད། རང་ཧེ་རུ་ཀར་གསལ་བའི་སྙིང་འོད་ལྔའི་གོང་བུའི་དབུས་སུ་པདྨ་འདབ་མ་བཞིའི་ལྟེ་བར་ཧཱུྃ་དང་༔ འདབ་མ་རྣམས་ལ་ཨ་ནུ་ཏ་ར་མཐིང་གསལ་བཀོད་པ་ལ་རིམ་བཞིན་དུ་སེམས་བཟུང་ཞིང་། རིམ་པར་ཧཱུྃ་ལ་བསྟིམ། དེའང་མི་དམིགས་པའི་དབྱིངས་སུ་སྦྱངས་ཏེ་གནས་ལུགས་མ་བཅོས་པའི་ངང་དུ་མཉམ་པར་བཞག་པས་གཉིད་ཀྱི་འོད་གསལ་འཆར་བར་འགྱུར་རོ། །བཞི་པ་ལམ་གྱི་ཚོད་འཛིན་རྨི་ལམ་ལ། ཐོག་མར་སྦྱོར་བ་ནི། ཉིན་པར་སྣང་གྲག་རྟོག་གསུམ་ཐམས་ཅད་རྨི་ལམ་དུ་ངོས་བཟུང་ཞིང་ངེས་ཤེས་བསྐྱེད། ཉལ་ཁར་མགྲིན་པར་པདྨ་དམར་པོ་འདབ་མ་བཞི་པའི་དབུས་སུ་ཧཱུྃ་དང་། འདབ་བཞིར་ཨ་ནུ་ཏ་ར་དམར་པོ་ལ་སེམས་བཟུང་ཞིང་འདི་རྨི་ལམ་རྨི་བ་ཡིན་འདུག་སྙམ་པའི་འདུན་པས་མཚམས་སྦྱར་ཏེ་རིམ་གྱིས་ཧཱུྃ་གིས་བར་དུ་བསྡུ། དེ་ཐིག་ལེ་དམར་པོ་བདེ་གསལ་འོད་ཀྱི་རང་བཞིན་ཏུ་གྱུར་པ་ལ་སེམས་བཟུང་ནས་མ་ཡེངས་པའི་ངང་དུ་གཉིད་ལོག་པས་རྨི་ལམ་ལ་རྨི་ལམ་དུ་ངོ་ཤེས་པར་འབྱུང་ཞིང་། དེ་ལ་གོམས་ནས་སྦྱངས་སྤེལ་སྤྲུལ་བསྒྱུར་སོགས་ལ་བསླབ་པར་བྱའོ། །ལྔ་པ་ལམ་གྱི་སུན་མ་འཕོ་བ་ནི། །རང་ཧེ་རུ་ཀར་གསལ་བའི་སྙིང་གའི་ཧཱུྃ་ལས་ཧཱུྃ་མང་དུ་སྤྲོས་ཏེ་དབང་པོའི་སྒོ་དགུ་དང་བ་སྤུའི་བུ་ག་ཚུན་ཧཱུྃ་གིས་དགག །ལུས་ཀྱི་དབུས་དྲང་པོར་རྩ་དབུ་མ་ཡར་སྣ་ཚངས་བུག་ཏུ་ཟང་ཐལ་ལེར་ཟུག་ཅིང་། མར་སྣ་ལྟེ་འོག་སོར་བཞིར་ཕུག་རྡུག་གི་རྣམ་པར་གྱུར་པའི་སྙིང་གའི་ནང་དུ་རླུང་སེམས་དབྱེར་མེད་ཀྱི་ངོ་བོ་ཧཱུྃ་ཡིག་འོད་ཟེར་ལྔ་འཕྲོ་བ་ལ་སེམས་བཟུང་རླུང་ཁ་སྦྱོར་ཏུ་འཆིང་། ཟིན་པ་ན་མདུན་གྱི་ནམ་མཁར་དུར་ཁྲོད་ཆེན་པོ་མེ་རི་འབར་བ་ཞིང་གི་བཀོད་པ་འབྱམས་ཀླས་པའི་དབུས་སུ། བླ་མ་ཧེ་རུ་ཀ་འཁོར་དང་བཅས་པ་མངོན་སུམ་བཞིན་དུ་གསལ་བའི་ཐུགས་ཀར་འཕོ་བའི་འདུན་པ་དྲག་པོས་རླུང་ཕྱིར་བཏང་བ་དང་ཧིཀ྄་ཅེས་དྲག་ཏུ་བརྗོད་པས་སྙིང་གའི་ཧཱུྃ་གློག་འཁྱུགས་པ་ལྟར་ཁྲག་འཐུང་ཡབ་ཡུམ་གྱི་སྦྱོར་མཚམས་ནས་ཞུགས་ཏེ་ཐུགས་ཀར་འཕོས་པར་བསམ། རླུང་ནང་དུ་འཇུག་པ་ན་ཀ་ཞེས་བརྗོད་ཅིང་མར་དབབ། ཐུན་བསྡུ་བའི་ཚེ་མདུན་གྱི་ཞིང་ཁམས་རྟེན་དང་བརྟེན་པར་བཅས་པ་མི་དམིགས་པར་བཞག་ཅིང་། ཚངས་བུག་སྣ་ཚོགས་རྡོ་རྗེས་བཀག་པར་བསམས་ལ་རྡོ་རྗེའི་བཟླས་པ་ཅི་ནུས་བྱ། ལས་ལ་སྦྱར་བའི་ཚེ་བླ་མའི་ཐུགས་དང་རང་སེམས་དབྱེར་མེད་པར་འདྲེས་པའི་ངང་དུ་མཉམ་པར་བཞག་གོ། །དྲུག་པ་ལམ་གྱི་མཚམས་སྦྱོར་བར་དོ་ནི། །ད་ལྟ་ནས་སྣང་བ་ཐམས་ཅད་སྲིད་པ་བར་དོའི་གནས་སྐབས་སུ་ཤེས་པ་དང་། ཁྱད་པར་དུ་ཆགས་སྡང་དགའ་སྡུག་སོགས་རྟོག་པ་རགས་པ་ནམ་འཆར་ན་དྲན་པས་ཟིན་པར་བྱས་ཏེ་བར་དོ་དང་བསྲེ། དེ་ཐམས་ཅད་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་བསྲེ་བ་མཚམས་སྦྱར་བ་ལ་བསླབས་པས་བར་དོར་ཡང་དྲན་པས་ཟིན་ནས་ལམ་གྱི་འཕྲོ་མཐུད་དེ་གྲོལ་བར་འགྱུར་རོ། །དེ་ལྟ་བུའི་ལམ་འདི་རྣམས་རྒྱུན་གྱི་རྣལ་འབྱོར་ལ་སྦྱར་བའི་ཚེ། མཉམ་བཞག་ཏུ་བསྐྱེད་རིམ་དང་གཏུམ་མོ་གཙོ་བོར་བསྟེན་ནོ། །ཐུན་བསྡུ་བ་ན་འོད་གསལ་བསྒོམ། ཐུན་མཚམས་ཐམས་ཅད་དུ་སྒྱུ་མ་ལྟ་བུར་བསླབ་པ་དང་། རྨི་ལམ་དང་བར་དོའི་ཉམས་ལེན་སྤེལ། ཉལ་བའི་ཚེ་འོད་གསལ་དང་རྨི་ལམ་གྱི་དམིགས་པ་གང་རུང་གསལ་ངེས་པ་རེ་བྱ། སྐབས་ཅི་རིགས་པའམ། ཐུན་རེའི་མཐར་འཕོ་བའི་དམིགས་པའང་མ་བརྗེད་ཙམ་རེ་བྱ་ཞིང་། རྣམ་པ་ཀུན་ཏུ་སྣང་གྲགས་རྟོག་གསུམ་དཔལ་ཆེན་པོའི་སྐུ་གསུང་ཐུགས་སུ་ཤེས་ཤིང་གོམས་པར་བྱ་བ་ནི་ལམ་གྱི་མདོ་ཆིངས་བླ་ན་མེད་པ་སྟེ། དེ་ལྟར་བརྩོན་པས་དངོས་གྲུབ་རྣམ་གཉིས་མྱུར་དུ་འཐོབ་པར་འགྱུར་བའི་ཚུལ་སོགས་རྒྱས་པར་གཞུང་རྡོ་རྗེའི་ཚིག་རྐང་བླ་མའི་མན་ངག་གིས་ཕྱེ་བའི་རྗེས་སུ་འབྲངས་ནས་ཤེས་པར་བྱ་ཞིང་ལས་དང་པོ་པ་ལ་དམིགས་པའི་རིམ་པ་འདི་ཙམ་གྱིས་ཀྱང་དོན་འགྲུབ་པར་འགྱུར་བ་ཡིན་ནོ། །མདོར་ན་གཞུང་རྩ་བ་ལས། དེ་ལྟར་ཤིན་ཏུ་ཟབ་པའི་བཅུད༔ ཁྲག་འཐུང་བདེ་ཆེན་རྣམ་རོལ་པའི༔ ལུང་དང་ཏནྟྲ་མང་པོའི་དོན༔ བསྒོམ་པས་མྱུར་དུ་འཚང་རྒྱ་བའི༔ མན་ངག་ཀུན་གྱི་སྙིང་པོ་འདི༔ ཨོ་རྒྱན་བདག་གིས་ཐུགས་ཁྲག་སྟེ༔ བརྗོད་པར་དཀའ་བ་ཉིད་ཡིན་ཀྱང་༔ མངའ་བདག་ཡབ་སྲས་སྐུ་ཆེ་ཞིང་༔ མཚོ་རྒྱལ་ཞབས་ཏོག་ཆེ་བ་དང་༔ རྗེ་འབངས་གྲོགས་རྣམས་དམ་ཚིག་གཙང་༔ དེ་ཕྱིར་ཐུགས་དམ་སྙིང་པོར་གདམས༔ ཞེས་གསུངས་པ་ལྟར་བདག་ལེགས་སུ་འདོད་པའི་སྐལ་བཟང་རྣམ་དཔྱོད་ཅན་རྣམས་ཀྱིས་འདི་ཁོ་ན་ཉམས་ལེན་སྙིང་པོར་མཛད་འཚལ་ལོ༔ ཞེས་པའང་གྲུབ་མཐའ་རིས་མེད་པའི་སྐྱེས་ཆེན་དམ་པ་མང་དུ་འདུས་པ་ལ་ལམ་འདིའི་དམིགས་ཁྲིད་རྫོགས་པར་ཕུལ་བའི་སྐབས། མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རང་འདྲའི་བློ་གྲོས་ཤིན་ཏུ་དམན་པ་རྣམས་ལ་ཕན་པའི་བསམ་པས་བྲིས་པ་སྟེ། དགེ་བས་གྲོང་ཁྱེར་གསུམ་གྱི་འགྲོ་བ་ཐམས་ཅད་ ཤྲཱི་ཧེ་རུ་ཀའི་གོ་འཕང་ལ་མྱུར་དུ་འགོད་པའི་རྒྱུར་གྱུར་ཅིག ། ༈

[edit]

yang dag he ru ka'i rgyun khyer/__ @#/_/bla ma'i thugs sgrub bar chad kun sel las:__dpal yang dag he ru ka'i rim gnyis rgyun gyi rnal 'byor bzhugs so:__na mo gu ru badz+ra shrI he ru kA ya/__/'dir dpal dus gsum mkhyen pa o rgyan chen po'i thugs dam mthar thug pa dpal yang dag he ru ka'i rim gnyis kyi lam zab mo rgyun gyi rnal 'byor du mdor bsdus te bsgom par 'dod pas/__gnas dben par bde ba'i stan la bsam gtan gyi spyod lam dang ldan pas sngon 'gro'i rim pa rgyas par bya ba'am/__nges 'byung dang snying rje shugs drag tu bskyed la tshogs zhing nam mkhar gang bar sad pa'i spyan sngar/__rdo rje slob dpon sangs rgyas dpal/__/dus gsum bzhugs la phyag 'tshal lo/__/mchog gsum bstan pa'i zhing gyur la/__/gnyis med yid kyis skyabs su mchi/__/dngos 'byor yid kyis rnam sprul pa/__/dag pa'i mchod pa bzhes su gsol/__/dngos grub chu bo gcod pa'i bgegs/__/nyes byas ma lus bshags par bgyi/__/phyogs bcu 'khor gsum dag pa'i chos/__/ma chags spyod la rjes yi rang /__/dag pa'i mtha' bzhi dri ma med/__/rdzogs pa'i byang chub sems bskyed do/__/bde gshegs byang chub sems dpa' la/__/dag pa gsum gyi lus dbul lo/__/tshe rab bgrangs pa'i las rnams kun/__/bsdus te byang chub chen por bsngo/__/lan gsum gyis rgyud sbyangs/__/sems can bde dang ldan gyur cig__/sdug bsngal kun dang bral bar shog__/bde dang rtag tu mi 'bral zhing /__/chos kun mnyam nyid rtogs par shog__/ces tshad med bzhi bsgom pa sngon du 'gro bas/__dngos gzhi'i thog mar/__rnal 'byor bskyed pa'i rim pa la/__dang po zhi bar bsnyen pa ni/__aH__/rdo rje sems dpa' nam mkha' che/__/bzung bas mi zin chu zla 'dra/__/kun tu bzang po'i rol pa las/__/thabs shes zung 'jug rtsa ba'i lha/__/sems dpa' dkar po rdor dril bsnams/__/rang 'od yum 'khyud bde stong sbyor/__/dar dang rin chen rgyan gyis brgyan/__/ma bcos lhug pa'i ngang du gsal/__/oM badz+ra satwa aH__zhes ci nus bzla/__de nas khro bor sgrub pa ni/__/de nyid yongs gyur skad cig gis:__bdag nyid rig 'dzin 'dzam gling rgyan:__rnam pa yang dag he ru kaH__mthing dkar dmar ba'i zhal gsum 'bar:__phyag drug ye shes rtags kyi rgya:__rdo rje kha T+wA~M rde'u chung g.yas:__dril bu b+han dmar rgyu zhags g.yon:__badz+ra kro d+hi shwa ri ma:__rdo rje dung khrag bsnams pas 'khril:__gar dgu'i nyams ldan khro bo'i chas:__ye shes me dpung cher 'bar dbus:__zhabs bzhi gyad kyi dor stabs kyis:__pad nyi bdud bzhi'i gdan la 'gyings:__g.yas g.yon zhal dang phyag drug ni:__gau rI la sogs ngo bor rdzogs:__rdo rje phung po'i grong khyer kun:__ma bskyed rang byung rol ba'i rgyan:__khrag 'thung lha tshogs phyag rgyar bzhengs:__zhes rtse gcig tu bsgoms la/__lhar snang sgyu ma lta bur sems 'dzin cing nga rgyal dang /__gzhi 'bras sbrel ba'i dag dran la bslab:__zhar byung bzlas pa'i rnal 'byor ni/__thugs ni dpal be'u zur brgyad klong :__ru lu 'bru brgyad 'phro zhing 'du:__'gal me lta bur 'khor ba yis:__bde chen ye shes brtan par gyur:__oM ru lu ru lu hU~M b+h+yo hU~M:__zhes ci nus dang :__rdzogs rim bsgom par spro na ji ltar rig pa bsgom zhing :__thun bsdu ba ni/__hU~M hU~M hU~M:__zhes pas snang cha'i lha sku 'od gsal gyi dbyings su thim par bsam zhing mnyam par bzhag:__ldang ba'i tshe:__phaT phaT phaT:__rang dang snang ba thams cad dpal he ru ka'i sku gsung thugs su gyur par mos la/__dge ba 'di yis myur du bdag:__he ru ka dpal 'grub gyur nas:__zhes sogs bsngo smon gyis mtshams sbyar te spyod lam la 'jug go:__gnyis pa man ngag rdzogs pa'i rim pa la drug:__gtum mo/__sgyu lus/__'od gsal/__rmi lam/__'pho ba/__bar do'o/__/dang po lam gyi rtsa ba gtum mo'i rnal 'byor ni/__rang nyid dpal he ru ka zhal gcig phyag gnyis pa'am zhal phyag rdzogs par gsal ba'i lus kyi nang stong chen sgrib rtogs dang bral ba'i dbus su rtsa gsum 'khor lo bzhi spyi ltar gsal nas rlung ro bsal/__ched du dmigs pa thugs kar chos kyi 'khor lo'i dbu ma'i nang du hU~M mthing gsal mar me ltar 'bar ba'i nA da las ru lu 'bru brgyad 'phro zhing 'du bar gsal btab la sems bzung zin pa na rlung bum pa can snying gar kha sbyor du bzung zhing hU~M la bstim pa'am/__las dang po pas lte ba'i bum pa can gtso bor bya/__rgyun gyi rnal 'byor la 'di tsam gyi 'thus/__spro na rlung nang du 'jug pa oM/__gnas pa ru lu ru lu/__ldang ba hU~M b+h+yo hU~M zhes pa'i gdangs su mos pa'i rdo rje'i bzlas pa bya zhing /__de nas dbu ma'i mas sna rtsa gsum 'dus mdor a shad me 'bar la khad pa dang /__yas sna ha~M mgo thur bstan gsal btab/__bum can gyi sbyor bas lte ba'i a shad las me sbar/__kham snyigs ma thams cad bsreg__/mthar spyi bo'i ha~M la reg pas bdud rtsi babs/__'khor lo bzhi gang zhing /__dwang ma snying ga'i hU~M las 'dus pas drod dang bde ba'i ye shes bsam gyis mi khyab pa skyes par bsams la gsal rig 'dzin pa med pa'i ngang du mnyam par bzhag__/gnyis pa lam gyi gzhi ma sgyu lus ni/__spyir 'khor 'das kyi chos thams cad sgyu ma'i dpe brgyad kyis mtshon par gtan la dbab/__bye brag tu stod smad chags sdang sogs me long gi gzugs brnyan lta bur dpyad cing /__khyad par mnyam rjes kun tu snang ba thams cad lha sku 'ja' tshon dang chu zla lta bu'i ting nge 'dzin la rtsal sbyang /__lam snga ma la goms pa brtan pas rlung sems sgyu ma'i lha skur ldang zhing skabs ci rigs par snying ga'i hU~M las hU~M yig nam mkha' khyab par spros pas snod bcud kyi dngos 'dzin gzhig ste sgyu ma lta bu'i ye shes lha yi phyag rgyar shar ba la sems 'dzin par bya'o/__/gsum pa lam gyi snying po 'od gsal ni/__nyin par gang shar gyi rtog pa'i rjes su mi 'brang ba 'od gsal gnyug ma'i ngang du mnyam par bzhag cing /__bskyed rim dang 'brel ba thun gyi mjug tu lha sku 'od gsal du sbyangs pa dang /__zung 'jug gi skur ldang ba'i ting nge 'dzin la yang nas yang du rtsal sbyangs/__nub mo lus tsog pur 'khod/__rang he ru kar gsal ba'i snying 'od lnga'i gong bu'i dbus su pad+ma 'dab ma bzhi'i lte bar hU~M dang :__'dab ma rnams la a nu ta ra mthing gsal bkod pa la rim bzhin du sems bzung zhing /__rim par hU~M la bstim/__de'ang mi dmigs pa'i dbyings su sbyangs te gnas lugs ma bcos pa'i ngang du mnyam par bzhag pas gnyid kyi 'od gsal 'char bar 'gyur ro/__/bzhi pa lam gyi tshod 'dzin rmi lam la/__thog mar sbyor ba ni/__nyin par snang grag rtog gsum thams cad rmi lam du ngos bzung zhing nges shes bskyed/__nyal khar mgrin par pad+ma dmar po 'dab ma bzhi pa'i dbus su hU~M dang /__'dab bzhir a nu ta ra dmar po la sems bzung zhing 'di rmi lam rmi ba yin 'dug snyam pa'i 'dun pas mtshams sbyar te rim gyis hU~M gis bar du bsdu/__de thig le dmar po bde gsal 'od kyi rang bzhin tu gyur pa la sems bzung nas ma yengs pa'i ngang du gnyid log pas rmi lam la rmi lam du ngo shes par 'byung zhing /__de la goms nas sbyangs spel sprul bsgyur sogs la bslab par bya'o/__/lnga pa lam gyi sun ma 'pho ba ni/__/rang he ru kar gsal ba'i snying ga'i hU~M las hU~M mang du spros te dbang po'i sgo dgu dang ba spu'i bu ga tshun hU~M gis dgag__/lus kyi dbus drang por rtsa dbu ma yar sna tshangs bug tu zang thal ler zug cing /__mar sna lte 'og sor bzhir phug rdug gi rnam par gyur pa'i snying ga'i nang du rlung sems dbyer med kyi ngo bo hU~M yig 'od zer lnga 'phro ba la sems bzung rlung kha sbyor tu 'ching /__zin pa na mdun gyi nam mkhar dur khrod chen po me ri 'bar ba zhing gi bkod pa 'byams klas pa'i dbus su/__bla ma he ru ka 'khor dang bcas pa mngon sum bzhin du gsal ba'i thugs kar 'pho ba'i 'dun pa drag pos rlung phyir btang ba dang hika? ces drag tu brjod pas snying ga'i hU~M glog 'khyugs pa ltar khrag 'thung yab yum gyi sbyor mtshams nas zhugs te thugs kar 'phos par bsam/__rlung nang du 'jug pa na ka zhes brjod cing mar dbab/__thun bsdu ba'i tshe mdun gyi zhing khams rten dang brten par bcas pa mi dmigs par bzhag cing /__tshangs bug sna tshogs rdo rjes bkag par bsams la rdo rje'i bzlas pa ci nus bya/__las la sbyar ba'i tshe bla ma'i thugs dang rang sems dbyer med par 'dres pa'i ngang du mnyam par bzhag go/__/drug pa lam gyi mtshams sbyor bar do ni/__/da lta nas snang ba thams cad srid pa bar do'i gnas skabs su shes pa dang /__khyad par du chags sdang dga' sdug sogs rtog pa rags pa nam 'char na dran pas zin par byas te bar do dang bsre/__de thams cad he ru ka'i sku gsung thugs kyi ngo bor bsre ba mtshams sbyar ba la bslabs pas bar dor yang dran pas zin nas lam gyi 'phro mthud de grol bar 'gyur ro/__/de lta bu'i lam 'di rnams rgyun gyi rnal 'byor la sbyar ba'i tshe/__mnyam bzhag tu bskyed rim dang gtum mo gtso bor bsten no/__/thun bsdu ba na 'od gsal bsgom/__thun mtshams thams cad du sgyu ma lta bur bslab pa dang /__rmi lam dang bar do'i nyams len spel/__nyal ba'i tshe 'od gsal dang rmi lam gyi dmigs pa gang rung gsal nges pa re bya/__skabs ci rigs pa'am/__thun re'i mthar 'pho ba'i dmigs pa'ang ma brjed tsam re bya zhing /__rnam pa kun tu snang grags rtog gsum dpal chen po'i sku gsung thugs su shes shing goms par bya ba ni lam gyi mdo chings bla na med pa ste/__de ltar brtson pas dngos grub rnam gnyis myur du 'thob par 'gyur ba'i tshul sogs rgyas par gzhung rdo rje'i tshig rkang bla ma'i man ngag gis phye ba'i rjes su 'brangs nas shes par bya zhing las dang po pa la dmigs pa'i rim pa 'di tsam gyis kyang don 'grub par 'gyur ba yin no/__/mdor na gzhung rtsa ba las/__de ltar shin tu zab pa'i bcud:__khrag 'thung bde chen rnam rol pa'i:__lung dang tan+t+ra mang po'i don:__bsgom pas myur du 'tshang rgya ba'i:__man ngag kun gyi snying po 'di:__o rgyan bdag gis thugs khrag ste:__brjod par dka' ba nyid yin kyang :__mnga' bdag yab sras sku che zhing :__mtsho rgyal zhabs tog che ba dang :__rje 'bangs grogs rnams dam tshig gtsang :__de phyir thugs dam snying por gdams:__zhes gsungs pa ltar bdag legs su 'dod pa'i skal bzang rnam dpyod can rnams kyis 'di kho na nyams len snying por mdzad 'tshal lo:__zhes pa'ang grub mtha' ris med pa'i skyes chen dam pa mang du 'dus pa la lam 'di'i dmigs khrid rdzogs par phul ba'i skabs/__mtsho skyes bla ma dgyes pa'i 'bangs mkhyen brtse'i dbang pos rang 'dra'i blo gros shin tu dman pa rnams la phan pa'i bsam pas bris pa ste/__dge bas grong khyer gsum gyi 'gro ba thams cad _shrI he ru ka'i go 'phang la myur du 'god pa'i rgyur gyur cig___/__!_