DKR-KABUM-23-'A-020

🚧 This website is under continued development. We appreciate your patience!

Previous Text Back to Volume PageNext Text

Wylie title	dgra 'dul wer ma'i snying tig las: zhi byed bsang khrus kyi cho ga bkra shis bdud rtsi'i me tog
Location	dil mgo mkhyen brtse bka' 'bum Volume 23, Text 20, Pages 363-373 (Folios 1a to 6a2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. Dgra 'dul wer ma'i snying tig las zhi byed bsang khrus kyi cho ga bkra shis bdud rtsi'i me tog. In Skyabs rje dil mgo mkhyen brtse rin po che'i bka' 'bum, Vol. 23: 363-373. Delhi: Shechen Publications, 1994.
Genre	Cleansing Ritual - khrus chog
Cycle	དགྲ་འདུལ་ཝེར་མའི་སྙིང་ཏིག་ (dgra 'dul wer ma'i snying tig)
Deity	ge sar

Tibetan Text

Wylie

[edit]

དྷཱིཿ།༔ དགྲ་འདུལ་ཝེར་མའི་སྙིང་ཏིག་ལས༔ ཞི་བྱེད་བསང་ཁྲུས་ཀྱི་ཆོ་ག་བཀྲ་ཤིས་བདུད་རྩིའི་མེ་ཏོག་བཞུགས་སོ༔

ཨོཾ་སྭསྟི་སིདྡྷཾ། འཛམ་གླིང་ཝེར་མ་སེང་ཆེན་རྒྱལ་པོའི་སྒོ་ནས་མི་མཐུན་རྒུད་པའི་ཚོགས་མཐའ་དག་ཞི་བར་བྱེད་པའི་བདུད་རྩིའི་བསང་ཁྲུས་ཀྱི་ཆོ་ག་རྒྱས་པར་བྱ་བ་ལ། གནས་གཙང་མར་བདུད་རྩིའི་ཤིང་སྣའི་བསང་དུད་དང༌། གཏོར་མ་དཀར་ཟླུམ་འཁོར་བཞི་ཅན། ཕྱེ་མར་འབྲུ་སྨན་རིན་ཆེན་དར་སྣས་བརྒྱན་པ། གསེར་སྐྱེམས་དཀར་སྔོན་དང་བཅས། སྤྲོ་ན་བུམ་པ་ཉེར་ལྔའི་བཅུད་ཀྱིས་གཏམས་པའམ། བསྡུ་ན་སྣོད་གཙང་མར་ཆུ་གཙང་བཅས་འདུ་བྱས་ལ། བདག་གི་རྣལ་འབྱོར་རྩ་གསུམ་གང་འོས་ཀྱི་བསྐྱེད་བཟླས་སྔོན་དུ་འགྲོ་བས། རཾ་ཡཾ་ཁཾ། བསང་གི་མ་དག་ཉེས་སྐྱོན་ཀུན་བསྲེགས་གཏོར་བཀྲུས་ཏེ་བདུད་རྩི་ཤིང་གི་སྤོས་སྤྲིན་དྲི་ཚོར་བ་ཙམ་གྱིས་མི་གཙང་བའི་ཉེས་གྲིབ་ཀྱི་ཚོགས་མཐའ་དག་སེལ་བར་བྱེད་ཅིང༌། དུ་བ་ཉིད་བདུག་སྤོས་ཀྱི་ལྷ་མོ་སྐུ་ལས་ཕུན་ཚོགས་འདོད་ཡོན་གྱི་རོལ་མོ་བསམ་ཡས་མཁའ་ཁྱབ་ཏུ་སྤྲོ་བས་མགྲོན་ཀུན་དགྱེས་པ་སྐྱེད་པའི་མཐུ་དང་ལྡན་པ་དང༌། བསང་ཆུའི་སྟེང་དུ་ཟླ་བ་ལ་བཾ་ལས་དག་བྱེདཡེ་ཤེས་ཀྱི་བདུད་རྩི་མི་གཙང་བའི་ཉེས་སྐྱོན་མཐའ་དག་སྦྱོང་བའི་ནུས་པ་དང་ལྡན་པའི་རང་བཞིན་དུ་གྱུར། ནམ་མཁའ་མཛོད་ཀྱི་སྔགས་རྒྱ་ལན་གསུམ་དང༌། ཨོཾ་བཛྲ་ཨ་མྲྀ་ཏ་ཧཱུྃ། ཤུདྡྷེ་ཤུདྡྷེ་ཨ་ཨ་སྭཱ་ཧཱ། ཞེས་བརྒྱའམ་ཉེར་གཅིག་བཟླས་པས་བྱིན་བརླབས་ཏེ། རྔ་རོལ་དབྱངས་དང་བཅས་པས། ཀྱཻ། ཡེ་ཤེས་རང་སྣང་དག་པའི་མཁའ། །འོད་གསལ་མཐོང་བ་ཀུན་སྨོན་གླིང༌། །རིགས་གསུམ་རྒྱལ་བའི་ཡེ་ཤེས་སྐུ། །ཨོ་རྒྱན་པདྨ་ཐོད་ཕྲེང་རྩལ། །ནག་ཕྱོགས་འཇོམས་ཕྱིར་སྐུར་བཞེངས་པ། །སེང་ཆེན་དགྲ་བླ་ཝེར་མའི་རྒྱལ། །དཔའ་ཐུལ་དྭངས་སྨན་རྒྱ་མཚོར་བཅས། །གནས་འདི་ཉིད་དུ་གཤེགས་སུ་གསོལ། །ས་མ་ཡ་ཛ་ཛཿ ྈ༔༔ ཀྱཻ༔ དཀར་གསལ་ཞི་བ་དབྱིངས་ཀྱི་ངང༔ བདུད་རྩིའི་ཤིང་གི་མཛེས་པའི་དབུས༔ དུ་བ་དྷཾ་ལས་ལྷ་མོ་ནི༔ སྔོ་བསང་རིན་ཆེན་རྒྱན་གྱིས་སྒེག༔ མཛེས་འཛུམ་གར་གྱི་ཆོ་འཕྲུལ་བསྒྱུར༔ ཕྱག་གཉིས་རིན་ཆེན་བུམ་པ་ལས༔ དྲི་ཞིམ་སྤོས་ཀྱི་སྤྲིན་ཕུང་སྤྲོ༔ ཟེག་མ་འདོད་ཡོན་མཁོ་རྒུའི་གཏེར༔ མི་ཟད་ནམ་མཁའ་མཛོད་དུ་ཤར༔ ཞལ་ནས་བྱིན་རླབས་རླངས་སྤྲིན་འཁྲིགས༔ དག་བྱེད་བདུད་རྩིའི་ཆར་པ་འབེབས༔ ཤངས་ནས་ཡེ་ཤེས་རླུང་ལྔ་སྤྲོ༔ སྣོད་བཅུད་མནོལ་ཞིང་རྨུགས་པ་བསང༔ ངོ་མཚར་མཆོག་གི་རོལ་མོ་འདིས༔ སྐུ་རྗེ་འཛམ་གླིང་གེ་སར་བསང༔ འདོད་དགུའི་ཕྲིན་ལས་འགྲུབ་པར་མཛོད༔ དཀར་གསལ་ཟླ་མདོག་དུད་པ་ཡིས༔ རྡོ་རྗེའི་སྤྱན་གྱི་དགྲ་བླ་བསང༔ བདག་ཅག་མི་རྣམས་སོ་པ་མྱུར༔ ཡ་མཚན་ལྟད་མོ་མཐོང་བར་མཛོད༔ སྙན་བརྗིད་རོལ་མོ་གླིང་བུ་ཡིས༔ རྫུ་འཕྲུལ་སྙན་གྱི་དགྲ་བླ་བསང༔ བདག་ཅག་རྣོ་སོའི་ཐོས་པ་ལྡན༔ རྟག་ཏུ་སྙན་པའི་སྒྲ་ཐོས་མཛོད༔ སྦྱར་དང་ལྷན་སྐྱེས་སྤོས་ཀྱི་ངད༔ ངོ་མཚར་ཤངས་ཀྱི་དགྲ་བླ་བསང༔ རྟག་ཏུ་དྲི་ཞིམ་ངད་པ་ཡིས༔ ལུས་ལ་འཁྱུད་ཅིང་སིམ་པར་མཛོད༔ ཞིམ་མངར་ཕུད་ཀྱི་བཟའ་བཏུང་གིས༔ ཟླ་གམ་ལྗགས་ཀྱི་དགྲ་བླ་བསང༔ ཕུན་ཚོགས་འཆི་མེད་བཅུད་ལེན་གྱིས༔ རིང་འཚོའི་སྲོག་དང་ལྡན་པར་མཛོད༔ དར་གོས་ཟ་འོག་འཇམ་འཁྲིལ་གྱིས༔ ཆེ་བརྗིད་སྐུ་ཡི་དགྲ་བླ་བསང༔ སྲ་མཁྲེག་རྡོ་རྗེའི་གོ་ལྡན་པའི༔ མི་ཤིགས་སྲུང་བའི་རྫོང་ཐོབ་མཛོད༔ སྦ་ལྕག་བསམ་པའི་དོན་འགྲུབ་ཀྱིས༔ དངོས་གྲུབ་སྩོལ་བའི་དགྲ་བླ་བསང༔ དགོས་འདོད་ཆར་དུ་བསྙིལ་བ་ཡིས༔ བསམ་དོན་ཡིད་བཞིན་འགྲུབ་པར་མཛོད༔ མདུང་མོ་ཁམས་གསུམ་དགྲ་འདུལ་གྱིས༔ ཕྱོགས་ལས་རྣམ་རྒྱལ་དགྲ་བླ་བསང༔ ཕས་རྒོལ་ཆམ་ལ་འབེབས་ནུས་པའི༔ མཐུ་སྟོབས་ནུས་པའི་དཔལ་ཐོབ་མཛོད༔ དབུ་རྨོག་རྒྱལ་བའི་དོན་འགྲུབ་བསང༔ དབུ་འཕང་དགུང་ལས་མཐོ་བར་མཛོད༔ གོ་ཁྲབ་སིལ་མ་ཐོག་རྡུགས་བསང༔ འཇིགས་པ་བརྒྱད་ལས་སྲུང་བར་མཛོད༔ དགྲ་བླའི་ཚེ་གོས་སྨུག་པོ་བསང༔ དགྲ་བླ་མི་དང་མ་འབྲལ་མཛོད༔ སྟག་དོང་དགྲ་བླའི་རྫོང་ཆེན་བསང༔ ཕྲག་ལྷ་ལུས་དང་གྲིབ་བཞིན་མཛོད༔ གཟིག་ཤུབས་ཝེར་མའི་བླ་གནས་བསང༔ ཚེ་འཛིན་ལྷ་སྲུང་གཡེལ་མེད་མཛོད༔ ཤེས་རབ་འཕྲུལ་གྱི་མདའ་བརྒྱ་བསང༔ བློ་གྲོས་རིག་པའི་རྩལ་རྣོ་མཛོད༔ སྙིང་རྗེའི་མཆོག་དཀར་གཞུ་མོ་བསང༔ སྤོབས་པའི་གདིངས་དང་ལྡན་པར་མཛོད༔ རལ་གྲི་ལན་མེད་མཚོན་གཅིག་བསང༔ སྨྲ་བའི་ཚིག་མཐའ་བཙན་པར་མཛོད༔ འཇའ་རིས་སོག་ལྷམ་བརྗིད་ཆགས་བསང༔ ཆེ་རྒུའི་གཉའ་ནས་གནོན་ནུས་མཛོད༔ རྫུ་འཕྲུལ་རྐྱང་རྒོད་ཕེར་པོ་བསང༔ མགྱོགས་པ་རླུང་གི་བང་ཐོབ་མཛོད༔ འཕྲུལ་གྱི་སྒ་སྲབ་རྒྱན་ཆས་བསང༔ རྫུལ་འཕྲུལ་རྐང་བཞི་ལྡན་པར་མཛོད༔ ཞལ་དཀར་དགྲ་འདུལ་རྒྱལ་པོ་བསང༔ མཛེས་བརྗིད་སེང་དང་མཉམ་པར་མཛོད༔ སྐུ་སྲུང་སྒ་བདེའི་བེར་ནག་བསང༔ མཐུ་སྟོབས་རྡོ་རྗེའི་མཚོན་ལྡན་མཛོད༔ ཁྲོ་ཐུང་དབང་གི་རྒྱལ་པོ་བསང༔ བདེ་སྟོང་སྒྱུ་མའི་འཕྲུལ་ལྡན་མཛོད༔ དམག་དཔོན་འདན་མ་གཡུ་རྩེ་བསང༔ དཔའ་བོ་གཡུལ་གྱི་དབང་ཕྱུག་མཛོད༔ དཔའ་ཐུལ་གྲུབ་ཆེན་སུམ་ཅུ་བསང༔ ཚེ་བསོད་གཡང་གི་དཔལ་ལྡན་མཛོད༔ རྩེ་གྲོགས་དགྲ་བླ་བཅུ་གསུམ་བསང༔ སྟོབས་བཅུ་སྐུ་གསུམ་མཆོག་ཐོབ་མཛོད༔ སྣང་སྲིད་དགྲ་བླའི་དཀྱིལ་འཁོར་བསང༔ ཅིར་སྣང་ཡེ་ཤེས་འཆར་བར་མཛོད༔ འདི་ནས་ཁྲུས་ཆབ་བསང་གནས་ཡོ་བྱད་ལ་འཐོར་སྟེ། དག་བྱེད་སྨན་གྱི་ཁྲུས་ཆབ་ཀྱིས༔ ལུས་ལ་ཟུག་རྔུ་མེད་པར་མཛོད༔ བཅུད་ལྡན་རིན་ཆེན་ཁྲུས་ཆབ་འདིས༔ ཕྱྭ་གཡང་ཉམས་རྒུད་མེད་པར་མཛོད༔ རོ་ལྡན་འབྲུ་ཡི་ཁྲུས་ཆབ་འདིས༔ བཟའ་བཏུང་སྲོག་གི་བཅུད་ལེན་མཛོད༔ ཀུན་ཁྱབ་དྲི་ཡི་ཁྲུས་ཆབ་ཀྱིས༔ དཔའ་བོའི་དྭངས་མ་འཕེལ་རྒྱས་མཛོད༔ སྙིང་པོ་ལྔ་ལྡན་ཁྲུས་ཆབ་འདིས༔ ཚེ་དཔལ་མནོལ་གྲིབ་བསང་བར་མཛོད༔ དག་བྱེད་བདུད་རྩིའི་ཆུ་ཡི་རྫིང༔ ཡེ་ཤེས་ལྔ་ལྡན་ཕ་རོལ་ཕྱིན༔ ངོ་མཚར་ཐུགས་རྗེའི་ཆུ་རྒྱུན་གྱིས༔ སྡིག་སྒྲིབ་ཉེས་ལྟུང་དག་པར་མཛོད༔ དཀར་ཕྱོགས་ལྷ་ཞལ་ཟླ་ལྟར་དཀར༔ ཉམས་གྲིབ་མནོལ་བཙོག་ཐམས་ཅད་སངས༔ འཁོན་འགྲས་འཁྲུགས་པ་རང་སར་ཞི༔ ཐོགས་མེད་ཕྲིན་ལས་སྟོབས་རྩལ་རྒྱས༔ བདག་ཅག་དཔོན་སློབ་འཁོར་དང་བཅས༔ གྲིབ་དང་མི་གཙང་གཡུལ་ལས་སྐྱོབས༔ དགྲ་བླ་ལུས་དང་གྲིབ་བཞིན་འགྲོགས༔ ཕྱོགས་ལས་རྣམ་པར་རྒྱལ་བར་མཛོད༔ རྟེན་འབྲེལ་ཉམས་གྲིབ་རྒུད་པ་སངས༔ ཚེ་བསོད་དཔལ་འབྱོར་གྲགས་པ་རྒྱས༔ འདོད་པའི་དོན་ཀུན་ལྷུན་གྱིས་གྲུབ༔ ཕྱོགས་ལས་རྣམ་པར་རྒྱལ་བར་མཛོད༔ ཨ་ཨ་ཤུདྡྷེ་ཤུདྡྷེ་སྭཱ་ཧཱ༔ ཞེས་བརྗོད་ཅིང་བསང་གཞུང་གཞན་དང་མ་འབྲེལ་ན་ནོངས་བཤགས་དང་མགྲོན་གཤེགས་པ་བསྔོ་སྨོན་ཤིས་བརྗོད་བཅས་བྱས་པས། གྲིབ་མནོལ་འཕྲལ་དུ་བསང་བར་བྱེད་ཐབས་རྨད་དུ་བྱུང་བ་དང༌། དགྲ་བླ་དགྱེས་ནས་ལུས་དང་གྲིབ་བཞིན་འགྲོགས་ཏེ་བྱ་ར་མཛད་པས་ཚེ་དཔལ་བསོད་ནམས་རླུང་རྟའི་དཔལ་གྱིས་འབྱོར་ཞིང་ཅི་འདོད་པའི་དོན་མཐའ་དག་ཐོགས་མེད་དུ་འགྲུབ་པར་འགྱུར་རོ། །ཅེས་པའང་ཐམས་ཅད་མཁྱེན་གཟིགས་རྗེ་བཙུན་བླ་མ་འཇམ་དབྱངས་དགའ་བའི་གོ་ཆའི་བཀའ་གསང་རིན་པོ་ཆེའི་ཅོད་པན་གྱིས་སྤུད་པ་བཞིན། གུས་སློབ་ཁྲག་འཐུང་ཡེ་ཤེས་རྡོ་རྗེ་གར་དབང་མདོ་སྔགས་གླིང་པས་ཕུན་ཚོགས་ལུགས་བརྒྱའི་འདུན་ས་དཔལ་ལྷུན་གྲུབ་སྟེང་གི་རྒྱལ་ཁབ་ཆེན་པོའི་ཕོ་བྲང་གི་བ་གམ་ནས་བྲིས་པ་འདིས་ཀྱང་ཕྱོགས་ལས་རྣམ་པར་རྒྱལ་བའི་མངའ་ཐང་གི་ཆབ་སྲིད་རྟག་བརྟན་འཕེལ་རྒྱས་ཀྱི་དཔལ་དུ་གྱུར་ཅིག། །། ༈ ྈ༔༔ རྩ་གསུམ་ཡོངས་རྫོགས་ལྷ་ལ་འདུད༔ བསྙེན་ཅིང་སྒྲུབ་པ་ལས་རུང་བས༔ སྐུ་འཁོར་དགྲ་བླ་ཝེར་མ་ཡི༔ དཀྱིལ་འཁོར་རྣམས་ལ་བརྟེན་ནས་སུ༔ གྲིབ་དང་མི་གཙང་མནོལ་བའི་ཚོགས༔ བསང་ཁྲུས་ཞི་བའི་ཆོ་ག་ནི༔ བདུད་རྩི་ཅན་གྱི་ཤིང་རྩི་དང༔ ཟས་སྣ་དར་རས་དཀར་མངར་ཕུད༔ གཙང་མའི་མེར་བསྲེགས་འཁྱིལ་པའི་ལྷས༔ བྱིན་བརླབས་ཁྲུས་ཀྱི་ཟེག་མ་འཐོར༔ ཀྱཻ༔ དཀར་གསལ་ཞི་བ་དབྱིངས་ཀྱི་ཐབ༔སོགས། ཨ་ཨ་ཤུདྡྷེ་ཤུདྡྷེ་སྭཱ་ཧཱ༔ ཅེས་བཟླས་འདིས་ནི་གྲིབ་ཀུན་བསང༔ དགེ་ལེགས་དཔལ་འབྱོར་ངེས་པར་འཕེལ༔ དཀར་ཕྱོགས་ལྷ་སྲུང་མི་འབྲལ་ཞིང༔ དགྱེས་པས་བྱ་ར་མཛད་པར་ངེས༔ ས་མ་ཡ༔ རྒྱ་རྒྱ་རྒྱ༔ ྈ༔༔ འབྱུང་ལྔའི་རླུང་རྟའི་ལྷར་འབྲེལ་ནས༔ རླུང་གི་ཀ་བ་གཟུག་འདོད་ན༔ རི་རབ་བང་རིམ་བཞི་པའི་སྟེང༔ རྣམ་རྒྱལ་ཁང་བཟང་མཛེས་པར་བཤམས༔ ཕྱོགས་མཚམས་འབྱུང་ལྔའི་འོད་ལྡན་གྱི༔ ཀ་བར་ལྷ་རྣམས་མཛེས་པར་བཀོད༔ མཐུན་བསྡེབས་མཆོད་པའི་ཚོགས་སྤྱི་དང༔ གཏོར་མ་སྐྱེམས་ཕུད་ཟས་གོས་དཔལ༔ ཁྱད་པར་ལྔ་ལྡན་དར་གྱི་ཕྲེང༔ ཅོད་པན་གྲངས་མེད་བཀོད་མཛེས་བསྟར༔ སྔགས་རྒྱས་བྱིན་བརླབས་མཁའ་ཁྱབ་སྤེལ༔ དབྱངས་ལྡན་སྨྲེང་གིས་འབུལ་བ་ནི༔ ཀྱཻ༔ བཀྲ་ཤིས་ཡིད་འོང་མཛེས་པའི་ཞིང༔སོགས། མཆོག་ཐུན་དངོས་གྲུབ་མ་ལུས་སྩོལ༔ ཅེས་བརྗོད་ཕུན་ཚོགས་མཆོད་པ་སྟོབས༔ ཁྱད་པར་དཔའ་བོ་གོ་ལྡན་པས༔ མཚོན་ཆ་སྣ་ཚོགས་ངོ་མཚར་བའི༔ ཤིས་པའི་རྟགས་རྫས་དང་བཅས་ཏེ༔ སྙན་བརྗིད་དབྱངས་དང་རོལ་མོ་ཡིས༔ ཐུགས་དམ་བསྐུལ་ཞིང་སྒྱུ་རྩལ་བཤམས༔ ཀྱེ༔ མཐུ་ལྡན་དགྲ་བླ་ཝེར་མ་ནི༔སོགས། ཕྱོག་ལས་རྣམ་པར་རྒྱལ་གྱུར་ཅིག༔ དེ་ལྟར་འདོད་རྒུའི་ལས་བཅོལ་ཏེ༔ ཁྱད་པར་རིག་པའི་སྔགས་འདི་བཟླ༔ ཨོཾ་མཉྫུ་ཤྲཱ་ིཛྙཱ་ན་ཀཱ་ཡ་དྷརྨ་དྷཱ་ཏུ་ཨཱཿ ཨོཾ་པདྨ་ཙིནྟ་མ་ཎི་ཛྭ་ལ་ཧཱུྃ༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཨོཾ་ཨཱཿཧཱུྃ་ྈྈྈ་སྭཱ་ཧཱ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་ཨརྠ་སིདྡྷི་སྭཱ་ཧཱ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུཾ༔ མ་མ་སརྦ་བི་ཛ་ཡ་སྭཱ་ཧཱ༔ ཨོཾ་ཧེ་ཧཻ་ཏིཥྛ་ཏིཥྛ་བྷནྡྷ་བྷནྡྷ་དྷཱ་ར་ཡ་དྷཱ་ར་ཡ་ནི་རུནྡྷ་ནི་རུནྡྷ་ཨ་མུ་ཀ་ཨུརྞ་མ་ཎི་ཡེ་སྭཱ་ཧཱ༔ ཨོཾ་མ་ཧཱ་སེངྷ་མ་ཎི་རཱ་ཛ་ཧ་ཧཱ་ཧི་ཧཱི་ཧེ་ཧཱེ་ཧོ་ཧཱོ་ཧཱུྃ་སརྦ་བི་ཛ་ཡ་ཧཱུྃ༔ མཐར་ནི་དབྱངས་ཀྱི་འགྱུར་བ་བཅས༔ བསྒྲུབ་བྱ་ཁྲིར་བཀོད་མདའ་དར་གཡབ༔ ཤིས་པའི་ཚིག་གིས་མངའ་གསོལ་ཏེ༔ གྲུབ་པའི་རྫས་རྣམས་རིམ་པར་གཏད༔ ཀྱཻ༔ སྔོན་ཚེ་རི་བོ་རྩེ་ལྔའི་ཞིང༔སོགས། འཇིག་རྟེན་གསུམ་ན་མཛེས་པར་མཛོད༔ ལྷ་རྒྱལ་འབོད་ཅིང་བསང་གིས་བརྔན༔ དར་སྣའི་ཕྲེང་བ་ཕྱོགས་ཀུན་བསྟར༔ བ་དན་སྒྲེང་ཞིང་རོལ་མོ་ལྡིར༔ དུང་ཆེན་བསྒྲག་ལ་དགའ་སྟོན་བྱ༔ ཤིན་ཏུ་སྙིགས་མའི་དུས་ཀྱི་ཚེ༔ རྟེན་འབྲེལ་ཐབས་ཀྱི་ཆོ་ག་འདིས༔ དཀར་ཕྱོགས་དགེ་ལེགས་དཔལ་བསྐྱེད་ནས༔ བསྟན་པའི་དབུ་འཕང་དར་བར་འགྱུར༔ ས་མ་ཡ༔ རྒྱ་རྒྱ་རྒྱ༔ དགེའོ། །མངྒ་ལཾ།། །།

[edit]

_dgra 'dul wer ma'i snying tig las:_zhi byed bsang khrus kyi cho ga bkra shis bdud rtsi'i me tog bzhugs so:

\u0f88oM swasti sid+d+haM/_'dzam gling wer ma seng chen rgyal po'i sgo nas mi mthun rgud pa'i tshogs mtha' dag zhi bar byed pa'i bdud rtsi'i bsang khrus kyi cho ga rgyas par bya ba la/_gnas gtsang mar bdud rtsi'i shing sna'i bsang dud dang*/_gtor ma dkar zlum 'khor bzhi can/_phye mar 'bru sman rin chen dar snas brgyan pa/_gser skyems dkar sngon dang bcas/_spro na bum pa nyer lnga'i bcud kyis gtams pa'am/_bsdu na snod gtsang mar chu gtsang bcas 'du byas la/_bdag gi rnal 'byor rtsa gsum gang 'os kyi bskyed bzlas sngon du 'gro bas/_raM yaM khaM/_bsang gi ma dag nyes skyon kun bsregs gtor bkrus te bdud rtsi shing gi spos sprin dri tshor ba tsam gyis mi gtsang ba'i nyes grib kyi tshogs mtha' dag sel bar byed cing*/_du ba nyid bdug spos kyi lha mo sku las phun tshogs 'dod yon gyi rol mo bsam yas mkha' khyab tu spro bas mgron kun dgyes pa skyed pa'i mthu dang ldan pa dang*/_bsang chu'i steng du zla ba la baM las dag byedaye shes kyi bdud rtsi mi gtsang ba'i nyes skyon mtha' dag sbyong ba'i nus pa dang ldan pa'i rang bzhin du gyur/_nam mkha' mdzod kyi sngags rgya lan gsum dang*/_oM badz+ra a mr-i ta hU~M/_shud+d+he shud+d+he a a swA hA/_zhes brgya'am nyer gcig bzlas pas byin brlabs te/_rnga rol dbyangs dang bcas pas/_kyai/_ye shes rang snang dag pa'i mkha'/_/'od gsal mthong ba kun smon gling*/_/rigs gsum rgyal ba'i ye shes sku/_/o rgyan pad+ma thod phreng rtsal/_/nag phyogs 'joms phyir skur bzhengs pa/_/seng chen dgra bla wer ma'i rgyal/_/dpa' thul dwangs sman rgya mtshor bcas/_/gnas 'di nyid du gshegs su gsol/_/sa ma ya dza dzaH_\u0f88::_kyai:_dkar gsal zhi ba dbyings kyi ngang:_bdud rtsi'i shing gi mdzes pa'i dbus:_du ba d+haM las lha mo ni:_sngo bsang rin chen rgyan gyis sgeg:_mdzes 'dzum gar gyi cho 'phrul bsgyur:_phyag gnyis rin chen bum pa las:_dri zhim spos kyi sprin phung spro:_zeg ma 'dod yon mkho rgu'i gter:_mi zad nam mkha' mdzod du shar:_zhal nas byin rlabs rlangs sprin 'khrigs:_dag byed bdud rtsi'i char pa 'bebs:_shangs nas ye shes rlung lnga spro:_snod bcud mnol zhing rmugs pa bsang:_ngo mtshar mchog gi rol mo 'dis:_sku rje 'dzam gling ge sar bsang:_'dod dgu'i phrin las 'grub par mdzod:_dkar gsal zla mdog dud pa yis:_rdo rje'i spyan gyi dgra bla bsang:_bdag cag mi rnams so pa myur:_ya mtshan ltad mo mthong bar mdzod:_snyan brjid rol mo gling bu yis:_rdzu 'phrul snyan gyi dgra bla bsang:_bdag cag rno so'i thos pa ldan:_rtag tu snyan pa'i sgra thos mdzod:_sbyar dang lhan skyes spos kyi ngad:_ngo mtshar shangs kyi dgra bla bsang:_rtag tu dri zhim ngad pa yis:_lus la 'khyud cing sim par mdzod:_zhim mngar phud kyi bza' btung gis:_zla gam ljags kyi dgra bla bsang:_phun tshogs 'chi med bcud len gyis:_ring 'tsho'i srog dang ldan par mdzod:_dar gos za 'og 'jam 'khril gyis:_che brjid sku yi dgra bla bsang:_sra mkhreg rdo rje'i go ldan pa'i:_mi shigs srung ba'i rdzong thob mdzod:_sba lcag bsam pa'i don 'grub kyis:_dngos grub stsol ba'i dgra bla bsang:_dgos 'dod char du bsnyil ba yis:_bsam don yid bzhin 'grub par mdzod:_mdung mo khams gsum dgra 'dul gyis:_phyogs las rnam rgyal dgra bla bsang:_phas rgol cham la 'bebs nus pa'i:_mthu stobs nus pa'i dpal thob mdzod:_dbu rmog rgyal ba'i don 'grub bsang:_dbu 'phang dgung las mtho bar mdzod:_go khrab sil ma thog rdugs bsang:_'jigs pa brgyad las srung bar mdzod:_dgra bla'i tshe gos smug po bsang:_dgra bla mi dang ma 'bral mdzod:_stag dong dgra bla'i rdzong chen bsang:_phrag lha lus dang grib bzhin mdzod:_gzig shubs wer ma'i bla gnas bsang:_tshe 'dzin lha srung g.yel med mdzod:_shes rab 'phrul gyi mda' brgya bsang:_blo gros rig pa'i rtsal rno mdzod:_snying rje'i mchog dkar gzhu mo bsang:_spobs pa'i gdings dang ldan par mdzod:_ral gri lan med mtshon gcig bsang:_smra ba'i tshig mtha' btsan par mdzod:_'ja' ris sog lham brjid chags bsang:_che rgu'i gnya' nas gnon nus mdzod:_rdzu 'phrul rkyang rgod pher po bsang:_mgyogs pa rlung gi bang thob mdzod:_'phrul gyi sga srab rgyan chas bsang:_rdzul 'phrul rkang bzhi ldan par mdzod:_zhal dkar dgra 'dul rgyal po bsang:_mdzes brjid seng dang mnyam par mdzod:_sku srung sga bde'i ber nag bsang:_mthu stobs rdo rje'i mtshon ldan mdzod:_khro thung dbang gi rgyal po bsang:_bde stong sgyu ma'i 'phrul ldan mdzod:_dmag dpon 'dan ma g.yu rtse bsang:_dpa' bo g.yul gyi dbang phyug mdzod:_dpa' thul grub chen sum cu bsang:_tshe bsod g.yang gi dpal ldan mdzod:_rtse grogs dgra bla bcu gsum bsang:_stobs bcu sku gsum mchog thob mdzod:_snang srid dgra bla'i dkyil 'khor bsang:_cir snang ye shes 'char bar mdzod:_'di nas khrus chab bsang gnas yo byad la 'thor ste/_dag byed sman gyi khrus chab kyis:_lus la zug rngu med par mdzod:_bcud ldan rin chen khrus chab 'dis:_phywa g.yang nyams rgud med par mdzod:_ro ldan 'bru yi khrus chab 'dis:_bza' btung srog gi bcud len mdzod:_kun khyab dri yi khrus chab kyis:_dpa' bo'i dwangs ma 'phel rgyas mdzod:_snying po lnga ldan khrus chab 'dis:_tshe dpal mnol grib bsang bar mdzod:_dag byed bdud rtsi'i chu yi rdzing:_ye shes lnga ldan pha rol phyin:_ngo mtshar thugs rje'i chu rgyun gyis:_sdig sgrib nyes ltung dag par mdzod:_dkar phyogs lha zhal zla ltar dkar:_nyams grib mnol btsog thams cad sangs:_'khon 'gras 'khrugs pa rang sar zhi:_thogs med phrin las stobs rtsal rgyas:_bdag cag dpon slob 'khor dang bcas:_grib dang mi gtsang g.yul las skyobs:_dgra bla lus dang grib bzhin 'grogs:_phyogs las rnam par rgyal bar mdzod:_rten 'brel nyams grib rgud pa sangs:_tshe bsod dpal 'byor grags pa rgyas:_'dod pa'i don kun lhun gyis grub:_phyogs las rnam par rgyal bar mdzod:_a a shud+d+he shud+d+he swA hA:_zhes brjod cing bsang gzhung gzhan dang ma 'brel na nongs bshags dang mgron gshegs pa bsngo smon shis brjod bcas byas pas/_grib mnol 'phral du bsang bar byed thabs rmad du byung ba dang*/_dgra bla dgyes nas lus dang grib bzhin 'grogs te bya ra mdzad pas tshe dpal bsod nams rlung rta'i dpal gyis 'byor zhing ci 'dod pa'i don mtha' dag thogs med du 'grub par 'gyur ro/_/ces pa'ang thams cad mkhyen gzigs rje btsun bla ma 'jam dbyangs dga' ba'i go cha'i bka' gsang rin po che'i cod pan gyis spud pa bzhin/_gus slob khrag 'thung ye shes rdo rje gar dbang mdo sngags gling pas phun tshogs lugs brgya'i 'dun sa dpal lhun grub steng gi rgyal khab chen po'i pho brang gi ba gam nas bris pa 'dis kyang phyogs las rnam par rgyal ba'i mnga' thang gi chab srid rtag brtan 'phel rgyas kyi dpal du gyur cig/__//_!_\u0f88::_rtsa gsum yongs rdzogs lha la 'dud:_bsnyen cing sgrub pa las rung bas:_sku 'khor dgra bla wer ma yi:_dkyil 'khor rnams la brten nas su:_grib dang mi gtsang mnol ba'i tshogs:_bsang khrus zhi ba'i cho ga ni:_bdud rtsi can gyi shing rtsi dang:_zas sna dar ras dkar mngar phud:_gtsang ma'i mer bsregs 'khyil pa'i lhas:_byin brlabs khrus kyi zeg ma 'thor:_kyai:_dkar gsal zhi ba dbyings kyi thab:sogs/_a a shud+d+he shud+d+he swA hA:_ces bzlas 'dis ni grib kun bsang:_dge legs dpal 'byor nges par 'phel:_dkar phyogs lha srung mi 'bral zhing:_dgyes pas bya ra mdzad par nges:_sa ma ya:_rgya rgya rgya:_\u0f88::_'byung lnga'i rlung rta'i lhar 'brel nas:_rlung gi ka ba gzug 'dod na:_ri rab bang rim bzhi pa'i steng:_rnam rgyal khang bzang mdzes par bshams:_phyogs mtshams 'byung lnga'i 'od ldan gyi:_ka bar lha rnams mdzes par bkod:_mthun bsdebs mchod pa'i tshogs spyi dang:_gtor ma skyems phud zas gos dpal:_khyad par lnga ldan dar gyi phreng:_cod pan grangs med bkod mdzes bstar:_sngags rgyas byin brlabs mkha' khyab spel:_dbyangs ldan smreng gis 'bul ba ni:_kyai:_bkra shis yid 'ong mdzes pa'i zhing:sogs/_mchog thun dngos grub ma lus stsol:_ces brjod phun tshogs mchod pa stobs:_khyad par dpa' bo go ldan pas:_mtshon cha sna tshogs ngo mtshar ba'i:_shis pa'i rtags rdzas dang bcas te:_snyan brjid dbyangs dang rol mo yis:_thugs dam bskul zhing sgyu rtsal bshams:_kye:_mthu ldan dgra bla wer ma ni:sogs/_phyog las rnam par rgyal gyur cig:_de ltar 'dod rgu'i las bcol te:_khyad par rig pa'i sngags 'di bzla:_oM many+dzu shrA \u0f72dz+nyA na kA ya d+harma d+hA tu AH_oM pad+ma tsin+ta ma Ni dz+wa la hU~M:_oM badz+ra tsaN+Da ma hA ro Sha Na sarba duSh+Tan ta ka ha na da ha pa tsa hU~M phaT:_oM AHhU~M \u0f88\u0f88\u0f88 swA hA:_oM tA re tut+tA re tu re sarba ar+tha sid+d+hi swA hA:_oM AHhU~M badz+ra gu ru pad+ma sid+d+hi hUM:_ma ma sarba bi dza ya swA hA:_oM he hai tiSh+Tha tiSh+Tha b+han+d+ha b+han+d+ha d+hA ra ya d+hA ra ya ni run+d+ha ni run+d+ha a mu ka ur+Na ma Ni ye swA hA:_oM ma hA seng+ha ma Ni rA dza ha hA hi hI he hA+e ho hA+o hU~M sarba bi dza ya hU~M:_mthar ni dbyangs kyi 'gyur ba bcas:_bsgrub bya khrir bkod mda' dar g.yab:_shis pa'i tshig gis mnga' gsol te:_grub pa'i rdzas rnams rim par gtad:_kyai:_sngon tshe ri bo rtse lnga'i zhing:sogs/_'jig rten gsum na mdzes par mdzod:_lha rgyal 'bod cing bsang gis brngan:_dar sna'i phreng ba phyogs kun bstar:_ba dan sgreng zhing rol mo ldir:_dung chen bsgrag la dga' ston bya:_shin tu snyigs ma'i dus kyi tshe:_rten 'brel thabs kyi cho ga 'dis:_dkar phyogs dge legs dpal bskyed nas:_bstan pa'i dbu 'phang dar bar 'gyur:_sa ma ya:_rgya rgya rgya:_dge'o/_/mang+ga laM//_//