འཆི་མེད་མཚོ་སྐྱེས་སྙིང་ཏིག་ལས། རྩ་བའི་སྒྲུབ་ཐབས་སྒྱུ་འཕྲུལ་དྲྭ་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	'chi med mtsho skyes snying tig las rtsa ba'i sgrub thabs sgyu 'phrul drwa ba
Location	mkhyen brtse'i bka' babs Volume 13, Text 7, Pages 79-94 (Folios 1a to 8b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. 'chi med mtsho skyes snying tig las rtsa ba'i sgrub thabs sgyu 'phrul drwa ba. In Rdzong sar 'jam dbyangs mkhyen brtse'i dbang po'i bka' babs, Vol. 13: 79-94. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Revelations - gter ma  ·  Root Treasure - gter gzhung
Cycle	འཆི་མེད་མཚོ་སྐྱེས་སྙིང་ཏིག་ ('chi med mtsho skyes snying tig)
Deity	gu ru mtsho skyes rdo rje
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-THA-040

Tibetan Text

Wylie

[edit]

དྷཱི།༔ འཆི་མེད་མཚོ་སྐྱེས་སྙིང་ཏིག་ལས༔ རྩ་བའི་སྒྲུབ་ཐབས་སྒྱུ་འཕྲུལ་དྲྭ་བ་བཞུགས་སོ༔

༔ འཆི་མེད་རྩ་གསུམ་ལྷ་ལ་འདུད༔ མ་འོངས་སྐལ་ལྡན་སྐྱེས་བུ་རྣམས༔ པདྨ་བདག་ལ་སྐྱབས་གསོལ་ནས༔ དངོས་གྲུབ་རྣམ་གཉིས་དོན་གཉེར་ན༔ དབང་ཐོབ་དམ་ཚིག་ལ་གནས་པས༔ དབེན་ཞིང་ཉམས་དགའི་གནས་མཆོག་ཏུ༔ ཡར་མར་ཚེས་བཅུའི་དུས་ཀྱི་ཚེ༔ སྐུ་གསུང་ཐུགས་ཀྱི་སྣང་བརྙན་མདུན༔ ཕྱི་ནང་མཆོད་ཚོགས་བཟང་དུ་བཤམ༔ ངེས་འབྱུང་དྲག་པོས་རྒྱུད་བསྐུལ་ཏེ༔ སྔོན་དངོས་རྗེས་ཀྱི་རྣལ་འབྱོར་གྱིས༔ ཟབ་མོའི་ལམ་འདིར་འཇུག་པར་བྱ༔ ས་མ་ཡ༔ སྔོན་འགྲོའི་དང་པོ་སྐྱབས་འགྲོ་ནི༔ ན་མོ༔ བདག་སོགས་འགྲོ་ཀུན་བྱང་ཆུབ་བར༔ དཀོན་མཆོག་རྩ་བ་གསུམ་གྱི་དངོས༔ རང་རིག་མཚོ་སྐྱེས་རྡོ་རྗེ་ལ༔ འདུ་འབྲལ་མེད་པར་སྐྱབས་སུ་མཆི༔ གཉིས་པ་སྨོན་འཇུག་སེམས་བསྐྱེད་ནི༔ ཧོཿ གཞན་དོན་སངས་རྒྱས་འཐོབ་བྱའི་ཕྱིར༔ རིམ་གཉིས་རྣལ་འབྱོར་ཉམས་བླངས་ནས༔ སྲིད་ཞིར་མི་གནས་འོད་གསལ་དབྱིངས༔ ཁམས་གསུམ་བསྒྲལ་བར་སེམས་བསྐྱེད་དོ༔ གསུམ་པ་ཡན་ལག་བདུན་པ་ནི༔ ཧོཿ འཆི་མེད་རྩ་གསུམ་ལྷ་ཚོགས་ལ༔ མི་ཕྱེད་གུས་པས་ཕྱག་འཚལ་ལོ༔ ཕྱི་ནང་གསང་བའི་མཆོད་པ་འབུལ༔ སྡིག་སྒྲིབ་ཉེས་ལྟུང་མཐོལ་ཞིང་བཤགས༔ བྱང་ཆུབ་སྤྱོད་ལ་རྗེས་ཡི་རང་༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་ཆོས་དབྱིངས་སྙིང་པོར་བསྔོ༔ བཞི་པ་སྔོན་གཏོར་སྦྱིན་པ་ནི༔ ཧཱུྃ༔ ཀུན་བརྟགས་འཁྲུལ་པའི་གདོན་བགེགས་ཚོགས༔ གཞན་དབང་དག་པ་རབ་འབྱམས་ཀྱི༔ འདོད་ཡོན་གཏོར་མ་འདི་ལོངས་ལ༔ ཡོངས་གྲུབ་གཉུག་མའི་དབྱིངས་སུ་དེངས༔ ཧཱུྃ་ཧཱུྃ་ཧཱུྃ༔ ལྔ་པ་སྲུང་འཁོར་བསྒོམ་པ་ནི༔ ཧྲཱིཿ བདག་ཉིད་ལྷར་གསལ་ཐུགས་ཀ་ནས༔ འཕྲོས་པའི་འོད་ཀྱིས་ཕྱོགས་མཚམས་ཀུན༔ གཟུང་འཛིན་མཚན་མས་མི་ཕྱེད་པའི༔ རྡོ་རྗེའི་སྲུང་འཁོར་ལྷུན་གྱིས་གྲུབ༔ ཨོཾ་བཛྲ་ཛྙཱ་ན་རཀྵ་ཧཱུྃ་བྷཱུྃ༔ དྲུག་པ་ཡེ་ཤེས་བྱིན་འབེབས་ནི༔ ཧཱུྃ་ཧྲཱིཿ དབྱིངས་རིག་ཟུང་འཇུག་ཕོ་བྲང་ནས༔ འཆི་མེད་རྩ་གསུམ་ལྷ་ཚོགས་ཀྱིས༔ གནས་འདིར་དབང་སྐུར་བྱིན་ཆེན་ཕོབ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་སརྦ་ས་མ་ཡ་ཨཱ་བེ་ཤ་ཡ་ཨ་ཨཱཿ ཧྲཱིཾ་ཧྲཱིཾ་ཕེཾ་ཕེཾ༔ ཧཱུྃ་ཧཱུྃ་ཧཱུྃ༔ བདུན་པ་མཆོད་རྫས་བྱིན་རླབས་ནི༔ ཨོཾ་ཨཱཿཧཱུྃ༔ གནས་ཡུལ་བདེ་ཆེན་པདྨོ་བཀོད༔ དག་པ་རབ་འབྱམས་ཞིང་གི་དབུས༔ ཕྱི་ནང་གསང་བའི་འདོད་ཡོན་ཀུན༔ མཆོད་པའི་ཕྱག་རྒྱ་ཆེན་པོར་རྫོགས༔ ཨོཾ་སརྦ་པཱུ་ཛ་ཨཱཿཧཱུྃ༔ ས་མ་ཡ༔ གཉིས་པ་དངོས་གཞིའི་རིམ་པ་ལ༔ དང་པོ་བསྐྱེད་པའི་རྣལ་འབྱོར་ལས༔ དམ་ཚིག་འཁོར་ལོ་བསྐྱེད་པ་ནི༔ ཨཿ གཞི་དབྱིངས་ཀ་དག་དེ་བཞིན་ཉིད༔ སྔོན་གྱི་བསྐལ་པ་དང་པོ་ལ༔ གཞི་སྣང་ལྷུན་གྲུབ་སྙིང་རྗེའི་རྩལ༔ སྐུ་དང་ཞིང་ཁམས་རང་ཤར་བའི༔ ཨོ་རྒྱན་ཡུལ་གྱི་ནུབ་བྱང་མཚམས༔ སིནྡྷུ་རྒྱ་མཚོ་རོལ་པའི་གླིང་༔ ཤིན་ཏུ་ཉམས་དགའ་ངོ་མཚར་གྱི༔ བཀོད་པ་དུ་མས་མཛེས་པའི་གཞིར༔ ཡན་ལག་བརྒྱད་ལྡན་ཆུ་གཏེར་དབུས༔ པདྨ་གེ་སར་སྡོང་པོ་ལ༔ ཐབས་ཤེས་ཉི་ཟླའི་གདན་གྱི་སྟེང་༔ སོ་སོར་རྟོག་པའི་རིག་མདངས་རྩལ༔ རང་སེམས་ཧྲཱིཿཡིག་དམར་པོ་ལས༔ འོད་འཕྲོས་རྒྱལ་བ་སྲས་བཅས་མཆོད༔ འགྲོ་ཀུན་སྒྲིབ་སྦྱངས་སྣོད་དང་བཅུད༔ འོག་མིན་པདྨོ་བཀོད་པའི་ཞིང་༔ མི་ཟད་རྒྱན་གྱི་འཁོར་ལོར་རྫོགས༔ ཚུར་འདུས་རྡོ་རྗེ་རྩེ་ལྔ་པའི༔ ལྟེ་བར་ཧྲཱིཿཡིས་མཚན་པར་གྱུར༔ དེ་ལས་སྐད་ཅིག་དྲན་རྫོགས་སུ༔ བདག་ཉིད་འཆི་མེད་མཚོ་སྐྱེས་རྗེ༔ རིག་འཛིན་བླ་མ་ཀུན་གྱི་དངོས༔ ཞལ་གཅིག་ཕྱག་གཉིས་དཀར་དམར་མདངས༔ ཞི་འཛུམ་གཞོན་ཚུལ་མཚན་དཔེར་ལྡན༔ ཕྱག་གཡས་སྡིགས་མཛུབ་དང་བཅས་པས༔ གསེར་གྱི་རྡོ་རྗེ་ཐུགས་ཀར་གཏོད༔ གཡོན་པས་མཉམ་གཞག་ཀ་པཱ་ལ༔ འཆི་མེད་བདུད་རྩིས་བཀང་བ་བསྣམས༔ རང་འོད་བདེ་སྟེར་གསང་བའི་ཡུམ༔ གྲི་གུག་ཐོད་པ་འཛིན་པས་འཁྱུད༔ དར་དང་རིན་ཆེན་ཨུཏྤལ་བརྒྱན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཐུགས་ཀར་པདྨ་ཟླ་བའི་དབུས༔ ཡེ་ཤེས་སེམས་དཔའ་སྤྱན་རས་གཟིགས༔ དབང་མདོག་ཞལ་གཅིག་ཕྱག་བཞི་པ༔ ཐལ་སྦྱར་ཕྲེང་བ་པདྨ་བསྣམས༔ སྤྱི་བོར་པད་ཉི་བམ་རོའི་སྟེང་༔ ཡི་དམ་ཡོངས་འདུས་རྟ་མཆོག་དཔལ༔ དམར་སྨུག་གར་དགུའི་ཉམས་དང་ལྡན༔ དཔལ་དང་དུར་ཁྲོད་ཆས་ཀུན་རྫོགས༔ སྦྱོར་ཡུམ་འབུམ་ཕྲག་མཁའ་འགྲོའི་གཙོ༔ ཕག་མོ་མཐིང་ནག་དགྱེས་པར་རོལ༔ སྤྱི་གཙུག་རྟ་གདོང་ཕག་ཞལ་བཞད༔ ཕྱག་གཉིས་གྲི་གུག་ཐོད་ཁྲག་བསྣམས༔ ཞབས་ཟུང་གྱད་ཀྱི་དོར་སྟབས་ཀྱིས༔ ཡེ་ཤེས་མེ་དཔུང་དབུས་ན་འགྱིངས༔ དེ་ཡི་སྤྱི་བོར་པད་ཟླའི་སྟེང་༔ རིགས་ཀྱི་བདག་པོ་སྣང་མཐའ་ཡས༔ དམར་གསལ་མཉམ་གཞག་ལྷུང་བཟེད་འཛིན༔ སྤྲུལ་སྐུའི་ཆ་ལུགས་མཚན་དཔེས་མཛེས༔ སྟེང་ཕྱོགས་འཇའ་ཟེར་ཐིག་ལེའི་ཀློང་༔ རྩ་བརྒྱུད་བླ་མ་རིག་འཛིན་དང་༔ ཡི་དམ་ཞི་ཁྲོ་རབ་འབྱམས་ལྷ༔ ཕྱོགས་བཅུའི་རྒྱལ་བ་སྲས་བཅས་ཀྱིས༔ ཡེ་ཤེས་བདུད་རྩིས་དབང་བསྐུར་ཞིང་༔ མེ་ཏོག་ཆར་འབེབས་རོལ་མོ་སྒྲོགས༔ ཤིས་བརྗོད་རྡོ་རྗེའི་དབྱངས་སུ་ལེན༔ བར་མཚམས་དཔའ་བོ་རྣལ་འབྱོར་མས༔ ཕྱི་ནང་མཆོད་པ་སྤྲིན་ལྟར་གཏིབས༔ མཐའ་སྐོར་རྒྱུད་གསུམ་དྲེགས་པའི་སྡེ༔ བཀའ་ཉན་བྲན་གཡོག་ཚུལ་དུ་འཁོད༔ ཀུན་ཀྱང་སྣང་སྟོང་ཟུང་འཇུག་ངང་༔ གཙོ་བོ་གསུམ་གྱི་གནས་གསུམ་དུ༔ རྡོ་རྗེ་གསུམ་གྱི་ཡི་གེས་མཚན༔ དེ་ལས་འཕྲོས་པའི་འོད་ཟེར་གྱིས༔ ཡེ་ཤེས་སེམས་དཔའ་སྤྱན་དྲངས་གྱུར༔ དེ་ནས་ཡེ་ཤེས་སྤྱན་འདྲེན་ནི༔ ཧཱུྃ༔ སྔོན་གྱི་བསྐལ་པ་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབས་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ས་པ་རི་ཝཱ་ར་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ མདུན་གྱི་ནམ་མཁར་བཞུགས་པ་ཡི༔ ཡེ་ཤེས་ལྷ་ཚོགས་གནས་གསུམ་ནས༔ གསང་བ་གསུམ་གྱི་བྱིན་རླབས་ཀུན༔ ལྷ་སྔགས་ཕྱག་མཚན་འོད་ཟེར་གྱི༔ རྣམ་པར་བྱོན་ཏེ་རང་ལ་ཐིམ༔ སྒྲིབ་བཞི་དག་ཅིང་དབང་བཞིས་སྨིན༔ སྐུ་བཞིའི་ས་བོན་རྒྱུད་ལ་བཞག༔ མཆོག་ཐུན་དངོས་གྲུབ་ཐོབ་པར་བསམ༔ གསོལ་འདེབས་རྡོ་རྗེའི་ཚིག་བདུན་དང་༔ བསྙེན་པའི་སྔགས་འདི་སྤེལ་ལ་བཟླ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ས་མ་ཡ༔ གཉིས་པ་སྒྲུབ་པའི་རིམ་པ་ནི༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ས་པ་རི་ཝཱ་ར་ས་མ་ཡ་ཛཿཧཱུྃ་བྃ་ཧོཿ ཀཱ་ལ་ཝཱ་ཀ་ཙིཏྟ་ཏིཥྛ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ༔ དམ་ཚིག་ཡེ་ཤེས་དབྱེར་མེད་པའི༔ ལྷ་སྣང་གསལ་ཞིང་བརྟན་པ་ལ༔ རང་ལས་སྤྲུལ་པའི་ལྷ་མོ་ཡིས༔ ཕྱག་འཚལ་མཆོད་ཅིང་བསྟོད་པར་བསམ༔ ཧོཿ གདོད་ནས་རང་རིག་རྩ་གསུམ་ལྷ༔ འདུ་འབྲལ་མེད་པར་རོ་གཅིག་ཀྱང་༔ གཉིས་འཛིན་འཁྲུལ་པ་སྦྱང་བའི་ཕྱིར༔ གུས་པའི་བརྡ་ཡིས་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏིཙྪ་ཧོཿ ཨོཾ་ཨཱཿཧཱུྃ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ རབ་འབྱམས་རྒྱ་མཚོའི་མཆོད་རྫས་རིགས༔ ཀུན་བཟང་མཆོད་སྤྲིན་ཆེར་སྤེལ་ནས༔ འཆི་མེད་རྩ་གསུམ་ལྷ་ཚོགས་མཆོད༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ས་པ་རི་ཝཱ་ར་ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནི་ཝིདྱ་ཤབྡ་པྲ་ཏཱིཙྪ་སྭཱ་ཧཱ༔ ཡུལ་དང་དབང་པོ་མཉམ་སྦྱོར་བའི༔ བདེ་ཆེན་རྡོ་རྗེའི་དམ་ཚིག་མཆོག༔ འདོད་ཡོན་རྣམ་པ་ཐམས་ཅད་པས༔ དཀྱིལ་འཁོར་ལྷ་ཚོགས་མཉེས་གྱུར་ཅིག༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ས་པ་རི་ཝཱ་ར་རཱུ་པ་ཤབྡ་གནྡྷེ་རཱ་ས་སྤརྴེ་པྲ་ཏིཙྪ་སྭཱ་ཧཱ༔ ཨོཾ༔ རྩ་བརྒྱད་སྟོང་སྦྱར་ཨ་མྲྀ་ཏ༔ ཁམས་གསུམ་བསྒྲལ་བའི་རཀྟ་དང་༔ འདོད་ཡོན་ལྔ་ལྡན་བ་ལིཾ་ཏས༔ འཆི་མེད་རྩ་གསུམ་ལྷ་ཚོགས་མཆོད༔ ཨོཾ་ཨཱཿཧཱུྃ་གུ་རུ་དྷེ་ཝ་དྷཱ་ཀི་ནཱི་ས་པ་རཱི་ཝཱ་ར་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་པཱུ་ཛ་ཧོ༔ ཨཱ༔ དགའ་བཞི་དབུ་མར་སྦྱར་བ་ལས༔ གཟུང་འཛིན་རྟོག་ཚོགས་དབྱིངས་སུ་བསྒྲལ༔ འཁོར་གསུམ་མཚན་མ་ལས་འདས་པའི༔ མཆོག་གི་མཆོད་པ་ཆེན་པོ་བཞེས༔ སྟ་ན་ག་ཎ་ཛྙཱ་ན་པུ་ཛ་ཧོ༔ ཧྲཱི༔ ངོ་བོ་ཆོས་སྐུ་སྣང་མཐའ་ཡས༔ རང་བཞིན་ལོངས་སྐུ་སྤྱན་རས་གཟིགས༔ ཐུགས་རྗེ་སྤྲུལ་སྐུ་པདྨ་འབྱུང་༔ སྐུ་གསུམ་དབྱེར་མེད་ཁྱོད་ལ་བསྟོད༔ རིག་འཛིན་བླ་མ་ཀུན་གྱི་དངོས༔ ཡི་དམ་ཞི་ཁྲོའི་འཁོར་ལོས་སྒྱུར༔ དཔའ་བོ་མཁའ་འགྲོའི་ཚོགས་ཀྱི་རྗེ༔ རྩ་གསུམ་ཀུན་འདུས་ཁྱོད་ལ་བསྟོད༔ ཕྱོགས་བཅུའི་རྒྱལ་བ་སྲས་བཅས་ཀྱི༔ ཡེ་ཤེས་ལུས་ཅན་དེ་བཞིན་གཤེགས༔ མཆོག་གསུམ་ངོ་བོ་མཚོ་སྐྱེས་རྗེ༔ གཙོ་འཁོར་སྤྲུལ་པར་བཅས་ལ་བསྟོད༔ དེ་ལྟར་མཆོད་ཅིང་བསྟོད་པའི་མཐུས༔ གནས་སྐབས་རྣམ་བཞིའི་ཕྲིན་ལས་དང་༔ མཐར་ཐུག་འཆི་མེད་སྐུ་གསུམ་གྱི༔ གོ་འཕང་ཚེ་འདིར་འགྲུབ་གྱུར་ཅིག༔ དེ་ནས་ཛབ྄་ཀྱི་དགོངས་པ་ནི༔ ཡེ་ཤེས་སེམས་དཔའི་ཐུགས་ཀ་རུ༔ ཐབས་ཤེས་ཉི་ཟླའི་གྭའུའི་དབུས༔ ཏིང་འཛིན་སེམས་དཔའི་ཧྲིཿདམར་པོ༔ དེ་མཐར་སྔགས་ཕྲེང་གཡས་སུ་འཁོར༔ འོད་ཀྱིས་རྩ་གསུམ་ལྷ་ཚོགས་མཆོད༔ བྱིན་རླབས་དངོས་གྲུབ་རང་ལ་ཐིམ༔ སླར་འཕྲོས་སྣོད་བཅུད་དངོས་འཛིན་སྦྱངས༔ ལྷ་སྔགས་ཡེ་ཤེས་འཁོར་ལོར་བསམ༔ ཨོཾ་ཨཱཿཧཱུྃ་བཛྲ་གུ་རུ་པདྨ་དྷེ་ཝ་དྷཱ་ཀི་ནཱི་སརྦ་སིདྡྷི་ཕ་ལ་ཧཱུྃ་ཨཱཿ དེ་ལྟར་བསྙེན་དང་སྒྲུབ་པའི་སྔགས༔ རྩེ་གཅིག་འབུམ་ཕྲག་བཅུ་གཉིས་བཟླཿ དངོས་སམ་ཉམས་དང་རྨི་ལམ་དུ༔ དངོས་གྲུབ་ཐོབ་པའི་རྟགས་རྣམས་འབྱུང་༔ ས་མ་ཡ༔ གསུམ་པ་ལས་ལ་སྦྱར་བ་ནི༔ མཆོད་ཅིང་བསྟོད་པ་སྔོན་འགྲོ་བས༔ གདུང་བའི་དབྱངས་དང་རོལ་མོར་བཅས༔ མི་ཕྱེད་དད་པས་ཐུགས་དམ་བསྐུལ༔ ཨོཾ་ཨཱཿཧཱུྃ༔ ཀ་དག་དབྱིངས་ཀྱི་ཕོ་བྲང་ནས༔ ངོ་བོ་ཆོས་སྐུ་འོད་མི་འགྱུར༔ མཚོ་སྐྱེས་རྡོ་རྗེའི་ཐུགས་དམ་སྐུལ༔ གཟུང་འཛིན་ཞི་བའི་ཕྲིན་ལས་མཛོད༔ ལྷུན་གྲུབ་རིག་པའི་ཕོ་བྲང་ནས༔ རང་བཞིན་ལོངས་སྐུ་སྙིང་རྗེའི་གཏེར༔ ཐོད་ཕྲེང་རིགས་ལྔའི་ཐུགས་དམ་སྐུལ༔ ཡེ་ཤེས་རྒྱས་པའི་ཕྲིན་ལས་མཛོད༔ ཟུང་འཇུག་འགྲོ་འདུལ་ཕོ་བྲང་ནས༔ ཐུགས་རྗེ་ཀུན་ཁྱབ་སྤྲུལ་པའི་གར༔ མཚན་མཆོག་བརྒྱད་ཀྱི་ཐུགས་དམ་སྐུལ༔ རླུང་སེམས་དབང་འདུས་ཕྲིན་ལས་མཛོད༔ སྐུ་བཞི་དབྱེར་མེད་ཕོ་བྲང་ནས༔ རྩ་གསུམ་ཀུན་འདུས་ཧེ་རུ་ཀ༔ པདྨ་དྲག་པོའི་ཐུགས་དམ་སྐུལ༔ གཉིས་འཛིན་ཚར་གཅོད་ཕྲིན་ལས་མཛོད༔ གཟུགས་སྣང་རྡོ་རྗེའི་སྐུ་རུ་ཟློག༔ སྲོག་རྩོལ་དབུ་མའི་ཕྱག་རྒྱར་སྟིམས༔ རྟོག་ཚོགས་གདོད་ནས་རང་གྲོལ་བར༔ སྐྱེ་འཆི་བྲལ་བའི་ཕྲིན་ལས་མཛོད༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་སརྦ་ཀརྨ་སིདྡྷི་ཕ་ལ་ཧཱུྃ་ཨཱཿ ལྷ་ཚོགས་ཀུན་གྱི་ཐུགས་ཀ་ནས༔ ཐུགས་རྗེའི་འོད་ཟེར་ཕྱོགས་བཅུར་འཕྲོས༔ ཐུན་མོང་མཆོག་གི་དངོས་གྲུབ་དང་༔ ཕྲིན་ལས་རྣམ་བཞི་འགྲུབ་པར་བསམ༔ སྒྲུབ་པའི་སྔགས་ཀྱི་ཤམ་བུ་རུ༔ ཨོཾ་ཤཱནྟིཾ་ཀུ་རུ་སྭཱ་ཧཱ༔ བྷཱུྃ་པུཥྟིཾ་ཀུ་རུ་ཨོཾ༔ ཧྲཱིཿཝཱ་ཤཾ་ཀུ་རུ་ཧོཿ ཧཱུྃ་མཱ་ར་ཡ་ཕཊ༔ ཅེས་བཟླས་རླུང་སེམས་དབྱིངས་ལ་བསྐྱལ༔ རྣམ་བཞིའི་ཕྲིན་ལས་གང་བརྩམ་འགྲུབ༔ ས་མ་ཡ༔ ཐུན་མཚམས་ཚོགས་ཀྱི་མཆོད་པ་ནི༔ ཐབས་ཤེས་བཟའ་བཏུང་དམ་ཚིག་རྫས༔ གཙང་ཞིང་བཀོད་པས་མཛེས་པར་བཤམ༔ བདུད་རྩིས་བྲན་ལ་བྱིན་གྱིས་བརླབ༔ ཧྲཱིཿ བདག་ཉིད་ཐུགས་ལས་འོད་འཕྲོས་པས༔ ཚོགས་ཀྱི་དངོས་འཛིན་བསྲེག་གཏོར་སྦྱངས༔ ཕྱི་སྣོད་བདེ་ཆེན་ཀ་པཱ་ལར༔ ནང་བཅུད་འདོད་ཡོན་བདུད་རྩིར་གྱུར༔ རྃ་ཡྃ་ཁྃ༔ ཨོཾ་ཨཱཿཧཱུྃ་ཧྲཱིཿ དེ་ནས་ཚོགས་ཞིང་སྤྱན་འདྲེན་ནི༔ ཧྲཱི༔ འོག་མིན་བདེ་ཆེན་ཞིང་ཁམས་ནས༔ ཆོས་སྐུ་འོད་མི་འགྱུར་བ་ལ༔ བདེ་གཤེགས་རྒྱ་མཚོའི་འཁོར་གྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ལྷོ་ཕྱོགས་རི་པོ་ཏ་ལ་ནས༔ ལོངས་སྐུ་ཐུགས་རྗེ་ཆེན་པོ་ལ༔ རྒྱལ་སྲས་རྒྱ་མཚོའི་འཁོར་གྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ལྷོ་ནུབ་རྔ་ཡབ་དཔལ་རི་ནས༔ སྤྲུལ་སྐུ་པདྨ་ཐོད་ཕྲེང་ལ༔ རྩ་གསུམ་རྒྱ་མཚོའི་འཁོར་གྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ གནས་ཡུལ་དུར་ཁྲོད་བརྒྱད་རྣམས་ནས༔ ཡེ་ཤེས་མགོན་པོ་མ་ནིང་ནག༔ ཆོས་སྐྱོང་རྒྱ་མཚོའི་འཁོར་གྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ཚོགས་ཁང་རང་བཞིན་སྤྲུལ་པའི་ཞིང་༔ ཚོགས་རྫས་ཟག་མེད་བདུད་རྩིའི་བཅུད༔ སྣང་གྲགས་རིག་པ་ལྷ་དང་སྔགས༔ ཡེ་ཤེས་ཆེན་པོར་བྱིན་ཕོབ་ཅིག༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱ་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཛཿ ཚོགས་ཕུད་རིམ་པ་གསུམ་དུ་སྤྲོས༔ དང་པོ་འདོད་ཡོན་རྒྱ་མཚོས་མཆོད༔ ཨོཾ་ཨཱཿཧཱུྃ༔ སྣང་བ་སྣོད་ཀྱི་ཀ་པཱ་ལར༔ སྲིད་པ་བཅུད་ཀྱི་ཚོགས་གཏོར་བཤམས༔ འདོད་ཡོན་རྒྱ་མཚོའི་མཆོད་སྤྲིན་འདིས༔ རྩ་གསུམ་ལྷ་ཚོགས་མཉེས་གྱུར་ཅིག༔ ལྷུན་གྲུབ་ཕུང་པོའི་ཀ་པཱ་ལར༔ རྩ་རླུང་ཐིག་ལེའི་ཚོགས་གཏོར་བཤམས༔ སྣང་སྟོང་ཟུང་འཇུག་མཆོད་སྤྲིན་འདིས༔ རྩ་གསུམ་ལྷ་ཚོགས་མཉེས་གྱུར་ཅིག༔ འོད་གསལ་དབུ་མའི་ཀ་པཱ་ལར༔ སྲོག་རྩོལ་ཁ་སྦྱོར་ཚོགས་གཏོར་བཤམས༔ གྲགས་སྟོང་རང་གྲོལ་མཆོད་སྤྲིན་འདིས༔ རྩ་གསུམ་ལྷ་ཚོགས་མཉེས་གྱུར་ཅིག༔ ལུགས་ལྡོག་ཐིག་ལེའི་ཀ་པཱ་ལར༔ དགའ་བཞིའི་ཡེ་ཤེས་ཚོགས་གཏོར་བཤམས༔ བདེ་སྟོང་དབྱེར་མེད་མཆོད་སྤྲིན་འདིས༔ རྩ་གསུམ་ལྷ་ཚོགས་མཉེས་གྱུར་ཅིག༔ གཞི་དབྱིངས་གདོད་མའི་ཀ་པཱ་ལར༔ གཞི་སྣང་ཡེ་ཤེས་ཚོགས་གཏོར་བཤམས༔ བླ་མེད་མཆོག་གི་མཆོད་སྤྲིན་འདིས༔ རྩ་གསུམ་ལྷ་ཚོགས་མཉེས་གྱུར་ཅིག༔ ཡིད་བཞིན་འདོད་འབྱུང་ཀ་པཱ་ལར༔ བཟའ་བཅའ་བཏུང་བའི་ཚོགས་གཏོར་བཤམས༔ ལོངས་སྤྱོད་རྣམ་པ་ཐམས་ཅད་པས༔ རྩ་གསུམ་ལྷ་ཚོགས་མཉེས་གྱུར་ཅིག༔ འཆི་མེད་རྩ་གསུམ་དཀྱིལ་འཁོར་ལྷས༔ ཕྱི་ནང་གསང་བ་དེ་ཁོ་ནའི༔ ཚོགས་ཀྱི་མཆོད་པ་འདི་བཞེས་ལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་དྷརྨ་པཱ་ལ་ས་པ་རི་ཝཱ་ར་ག་ཎ་ཙ་ཀྲ་པཱུ་ཛ་ཧོཿ བར་པས་དམ་ཚིག་ཉམས་ཆག་བཤགས༔ ཧོཿ ཐོག་མེད་དུས་ནས་ད་ལྟའི་བར༔ ལས་དང་ཉོན་མོངས་གཞན་དབང་གིས༔ བསགས་པའི་སྡིག་སྒྲིབ་ཉེས་ལྟུང་ཀུན༔ ཚོགས་ཀྱི་མཆོད་པས་བསྐང་ཞིང་བཤགས༔ ཡི་གེ་བརྒྱ་པ་བརྗོད༔ ཐ་མ་བསྒྲལ་ཞིང་བསྟབ་པ་ནི༔ ཧཱུྃ༔ བདག་ཏུ་ལྟ་བའི་དགྲ་དང་བགེགས༔ བདག་མེད་རྡོ་རྗེའི་མཚོན་གྱིས་བསྒྲལ༔ ཕུང་ཁམས་རིགས་ལྔའི་དམ་ཚིག་རྫས༔ རྩ་གསུམ་ལྷ་ཚོགས་ཞལ་དུ་སྦྱོར༔ སརྦ་ཤཱའ་ཏྲཱུན་བིགྷྣཱན་མཱ་ར་ཡ་མ་ཧཱ་པཉྩ་ཨ་མྲྀ་ཏ་པཱུ་ཛ་ཧོཿ དེ་ནས་ལུས་ཀྱི་དཀྱིལ་འཁོར་ལྷ༔ འདོད་ཡོན་རྡོ་རྗེའི་དམ་ཚིག་དང་༔ སྙོམས་འཇུག་བྱང་སེམས་བདུད་རྩིས་མཆོད༔ ལྷག་གཏོར་བསྡུས་ཏེ་བྱིན་གྱིས་བརླབ༔ ཕེཾ་ཕེཾ༔ དཀྱིལ་འཁོར་མུ་རན་སྐྱོང་བ་ཡི༔ དབང་ཕྱུག་གིང་དང་ལངྐའི་ཚོགས༔ དཔལ་གྱི་ཕམ་ཕབ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་ཨུཙྪིཥྟ་བ་ལིཾ་ཏ་བྷུཉྫ་ཧོ༔ སྲུང་མར་སྔོན་གྱི་ཐ་ཚིག་བསྒྲག༔ ཧཱུྃ་བྷྱོ༔ དབྱིངས་ཀྱི་ཐིག་ལེ་ཨེ་ཀ་ཛ༔ རིག་པ་རང་ཤར་རཱ་ཧུ་ལ༔ གཉིས་མེད་ཡེ་ཤེས་མ་ནིང་ནག༔ རྒྱུད་གསུམ་དྲེགས་པའི་ཚོགས་དང་བཅས༔ སྔོན་ཚེ་ཀུན་བཟང་ཆེ་བའི་མཆོག༔ པདྨ་ཐོད་ཕྲེང་སྤྱན་སྔ་རུ༔ ཇི་ལྟར་ཞལ་བཞེས་དམ་བཅས་བཞིན༔ འདིར་གཤེགས་དམ་རྫས་གཏོར་མ་ལོངས༔ རིག་འཛིན་བདག་ཅག་འཁོར་བཅས་ཀྱི༔ དུས་མིན་འཆི་དང་བར་ཆད་སོལ༔ ཚེ་བསོད་དཔལ་འབྱོར་འཁོར་སློབ་སྤེལ༔ རྣམ་བཞིའི་ཕྲིན་ལས་འགྲུབ་པར་མཛོད༔ ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་བྷུཉྫ་ཧོཿ བཤལ་ཆུས་བརྟན་མ་སྐྱོང་བ་ནི༔ ཧཱུྃ༔ དུས་སྦྱོར་འཕོ་བ་གནས་དག་པའི༔ བདེན་དོན་ཡན་ལག་བཅུ་གཉིས་ཀློང་༔ ཡེ་ཤེས་གྲུབ་ཀྱང་ལས་ཀྱི་ཚུལ༔ བོད་ཁམས་སྐྱོང་བའི་བརྟན་མའི་ཚོགས༔ ཨ་སུ་ར་ཡི་བྲག་ཕུག་ཏུ༔ འཆི་མེད་པདྨ་འབྱུང་གནས་ཀྱིས༔ ཇི་ལྟར་བཀའ་བསྒོས་དམ་བཞག་བཞིན༔ ཚུར་གཤེགས་རྩ་གསུམ་དཀྱིལ་འཁོར་དུ༔ ཧེ་རུ་ཀ་ཡི་འདུ་བར་སྤྱོན༔ བཤལ་ཆུའི་བདུད་རྩི་འདི་གསོལ་ལ༔ གངས་ཅན་འགྲོ་ཀུན་བདེ་བ་དང་༔ བསྟན་པ་དར་བའི་ཕྲིན་ལས་མཛོད༔ མ་མ་ཧྲཱིང་ཧྲཱིང་ཨ་མྲྀ་ཏ་པཱུ་ཛ་ཧོ༔ ལས་མཐའ་རྡོ་རྗེའི་བྲོ་ཡིས་བསྡུ༔ ཧཱུྃ༔ གཉིས་འཛིན་འཁྲུལ་པའི་དམ་སྲིའི་ཚོགས༔ རྣམ་ཐར་གསུམ་ལྡན་དབྱིངས་སུ་མནན༔ རྡོ་རྗེའི་གར་གྱི་རྒྱས་བཏབ་པས༔ བྱང་ཆུབ་བར་དུུ་མ་ལྡངས་ཤིག༔ སརྦ་ཤཱ་ཏྲུན་བིགྷྣན་སྟྭཱམྦྷ་ཡ་ནན༔ དེ་ལྟར་བརྩོན་པའི་རྣལ་འབྱོར་པར༔ བསོད་ནམས་ཡེ་ཤེས་ཚོགས་རྫོགས་ཤིང་༔ མི་མཐུན་བར་ཆད་ཞི་བ་དང་༔ འདོད་པའི་དངོས་གྲུབ་མྱུར་ཐོབ་འགྱུར༔ ས་མ་ཡ༔ གསུམ་པ་རྗེས་ཀྱི་རིམ་པ་ལ༔ དང་པོ་དངོས་གྲུབ་བླང་བ་ནི༔ ཨོཾ་ཨཱཿ་ཧཱུྃ༔ བྱིན་རླབས་གཏེར་ཆེན་དངོས་གྲུབ་མཛོད༔ ཕྲིན་ལས་ཆར་འབེབས་ལྷག་པའི་ལྷ༔ རྩ་གསུམ་ཀུན་འདུས་ལྷ་ཚོགས་རྣམས༔ དེང་འདིར་རྣལ་འབྱོར་བདག་ཅག་ལ༔ འཆི་མེད་ཚེ་དང་འཛད་མེད་ནོར༔ ནུས་པ་སྔགས་དང་ཏིང་འཛིན་སྒོ༔ ལས་བཞི་གྲུབ་པ་ཆེན་པོ་བརྒྱད༔ རིག་འཛིན་བཞི་དང་དབང་བཅུའི་དཔལ༔ སྐུ་དང་ཡེ་ཤེས་དབྱེར་མེད་པའི༔ ཐུན་མོང་མཆོག་གི་དངོས་གྲུབ་རྣམས༔ ད་ལྟ་ཉིད་དུ་སྩལ་ནས་ཀྱང་༔ དོན་གཉིས་འགྲུབ་པར་མཛད་དུ་གསོལ༔ ཨོཾ་ཨཱཿཧཱུྃ་ཧྲཱིཿབཛྲ་གུ་རུ་པདྨ་དྷེ་ཝ་དྷཱ་ཀི་ནཱི་ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱཿ གཉིས་པ་ནོངས་པ་བཤགས་པ་ནི༔ ཧོཿ དོན་དམ་གཟོད་ནས་སྤྲོས་བྲལ་ལ༔ གཟུང་འཛིན་མཚན་མ་ལས་འདས་ཕྱིར༔ ཀུན་རྫོབ་གློ་བུར་འཁྲུལ་པའི་ཚོགས༔ འཁོར་གསུམ་དམིགས་མེད་དབྱིངས་སུ་བཤགས༔ ཡི་གེ་བརྒྱ་པ་ལན་གསུམ་བརྗོད༔ གསུམ་པ་ཉེར་བསྡུའི་རྣལ་འབྱོར་ནི༔ ཨཿ སེམས་ཉིད་སྐྱེ་བ་མེད་པ་ལས༔ སྐྱེ་བའི་ཆོ་འཕྲུལ་དཀྱིལ་འཁོར་ལྷ༔ མཁའ་ལ་འཇའ་ཚོན་ཡལ་བ་ལྟར༔ འོད་གསལ་གཉུག་མའི་ཀློང་དུ་ཐིམ༔ ཨ་ཨ་ཨཿ བཞི་པ་ཆད་མཐའ་བསལ་བ་ནི༔ ཨོཾ་ཨཱཿཧཱུྃ༔ སླར་ཡང་ཅིར་སྣང་ལྷ་ཡི་སྐུ༔ སྒྲར་གྲགས་གཞོམ་མེད་རྡོ་རྗེའི་སྒྲ༔ རྟོག་ཚོགས་རང་གྲོལ་རིག་པའི་དབྱིངས༔ ཟུང་འཇུག་སྒྱུ་མའི་ངང་ནས་སྤྱོད༔ ལྔ་པ་དགེ་བ་བསྔོ་བ་ནི༔ ཧོཿ བདག་དང་མཐའ་ཡས་སེམས་ཅན་གྱིས༔ བསོད་ནམས་ཡེ་ཤེས་དགེ་བའི་ཚོགས༔ དུས་གསུམ་བསགས་དང་བསག་འགྱུར་ཀུན༔ བྱང་ཆུབ་སྙིང་པོར་བསྔོ་བར་བགྱི༔ དྲུག་པ་སྨོན་ལམ་གདབ་པ་ནི༔ དེང་ནས་ཚེ་རབས་ཐམས་ཅད་དུ༔ བླ་མ་མཆོག་དང་མི་འབྲལ་ཞིང༌། རིམ་གཉིས་ཟབ་མོའི་རྣལ་འབྱོར་གྱིས༔ རང་གཞན་དོན་གཉིས་མྱུར་འགྲུབ་ཤོག༔ བདུན་པ་ཤིས་པ་བརྗོད་པ་ནི༔ ཧོཿ ཕྱོགས་དུས་རྒྱལ་བ་སྲས་བཅས་ཀྱི༔ ཡེ་ཤེས་གཅིག་ཏུ་བསྡུས་པའི་དངོས༔ རྩ་བརྒྱུད་རིག་འཛིན་བླ་མ་ཡིས༔ བྱིན་གྱིས་རློབ་པའི་བཀྲ་ཤིས་ཤོག༔ ཆོས་སྐུའི་ངང་ལས་ལོངས་སྤྱོད་རྫོགས༔ སྤྲུལ་པའི་རྣམ་འཕྲུལ་ཅིར་ཡང་ཤར༔ ཡི་དམ་ཞི་ཁྲོའི་ལྷ་ཚོགས་ཀྱིས༔ དངོས་གྲུབ་སྩོལ་བའི་བཀྲ་ཤིས་ཤོག༔ གནས་ཡུལ་དུར་ཁྲོད་ཞིང་རྣམས་སུ༔ ཚར་གཅོད་རྗེས་འཛིན་བསྟན་པ་བསྲུང་༔ དཔའ་བོ་མཁའ་འགྲོ་ཆོས་སྐྱོང་གིས༔ བཀའ་བཞིན་སྒྲུབ་པའི་བཀྲ་ཤིས་ཤོག༔ སྲིད་ཞིའི་ཕན་བདེ་འབྱུང་བའི་གནས༔ རྒྱལ་བསྟན་ཕྱོགས་བཅུར་དར་བ་དང་༔ བསྟན་འཛིན་སྐྱེས་བུ་ཞབས་པད་བརྟན༔ འཇིག་རྟེན་དགེ་བའི་བཀྲ་ཤིས་ཤོག༔ ཐུན་མོང་ཞི་རྒྱས་དབང་དྲག་གི༔ ཕྲིན་ལས་གང་བརྩམ་མྱུར་འགྲུབ་ཅིང་༔ མཐར་ཐུག་མཆོག་ཏུ་མི་འགྱུར་དབྱིངས༔ མངོན་པར་བྱང་ཆུབ་བཀྲ་ཤིས་ཤོག༔ ཅེས་བརྗོད་མེ་ཏོག་ཆར་དུ་བསྙིལ༔ ས་མ་ཡ༔ དེ་ལྟར་སྦྱོར་དངོས་རྗེས་གསུམ་གྱིས༔ རྩ་གསུམ་ཀུན་འདུས་དཀྱིལ་འཁོར་ལྷ༔ བསྙེན་ཅིང་སྒྲུབ་པའི་ཕྲིན་ལས་འདི༔ དད་བརྩོན་ལྡན་པས་ཉམས་བླངས་ན༔ ཚེ་འདིར་མི་མཐུན་ཕྱོགས་ཀུན་ཞི༔ མཆོག་ཐུན་དངོས་གྲུབ་འབད་མེད་འབྱུང་༔ ཕྱི་མ་རྔ་ཡབ་དཔལ་གྱི་རིར༔ འཆི་མེད་རིག་འཛིན་ངེས་པར་འགྲུབ༔ རྒྱ་རྒྱ་རྒྱ༔ དྷ་ཐིམ༔

[edit]

d+hI/:__'chi med mtsho skyes snying tig las:__rtsa ba'i sgrub thabs sgyu 'phrul drwa ba bzhugs so:__:_'chi med rtsa gsum lha la 'dud:__ma 'ongs skal ldan skyes bu rnams:__pad+ma bdag la skyabs gsol nas:__dngos grub rnam gnyis don gnyer na:__dbang thob dam tshig la gnas pas:__dben zhing nyams dga'i gnas mchog tu:__yar mar tshes bcu'i dus kyi tshe:__sku gsung thugs kyi snang brnyan mdun:__phyi nang mchod tshogs bzang du bsham:__nges 'byung drag pos rgyud bskul te:__sngon dngos rjes kyi rnal 'byor gyis:__zab mo'i lam 'dir 'jug par bya:__sa ma ya:__sngon 'gro'i dang po skyabs 'gro ni:__na mo:__bdag sogs 'gro kun byang chub bar:__dkon mchog rtsa ba gsum gyi dngos:__rang rig mtsho skyes rdo rje la:__'du 'bral med par skyabs su mchi:__gnyis pa smon 'jug sems bskyed ni:__hoH__gzhan don sangs rgyas 'thob bya'i phyir:__rim gnyis rnal 'byor nyams blangs nas:__srid zhir mi gnas 'od gsal dbyings:__khams gsum bsgral bar sems bskyed do:__gsum pa yan lag bdun pa ni:__hoH__'chi med rtsa gsum lha tshogs la:__mi phyed gus pas phyag 'tshal lo:__phyi nang gsang ba'i mchod pa 'bul:__sdig sgrib nyes ltung mthol zhing bshags:__byang chub spyod la rjes yi rang :__chos kyi 'khor lo bskor bar bskul:__mya ngan mi 'da' bzhugs gsol 'debs:__dge tshogs chos dbyings snying por bsngo:__bzhi pa sngon gtor sbyin pa ni:__hU~M:__kun brtags 'khrul pa'i gdon bgegs tshogs:__gzhan dbang dag pa rab 'byams kyi:__'dod yon gtor ma 'di longs la:__yongs grub gnyug ma'i dbyings su dengs:__hU~M hU~M hU~M:__lnga pa srung 'khor bsgom pa ni:__hrIH__bdag nyid lhar gsal thugs ka nas:__'phros pa'i 'od kyis phyogs mtshams kun:__gzung 'dzin mtshan mas mi phyed pa'i:__rdo rje'i srung 'khor lhun gyis grub:__oM badz+ra dz+nyA na rak+Sha hU~M b+hU~M:__drug pa ye shes byin 'bebs ni:__hU~M hrIH__dbyings rig zung 'jug pho brang nas:__'chi med rtsa gsum lha tshogs kyis:__gnas 'dir dbang skur byin chen phob:__mchog dang thun mong dngos grub stsol:__oM AHhU~M badz+ra gu ru d+he wa d+hA ki nI sarba sa ma ya A be sha ya a AH__hrIM hrIM pheM pheM:__hU~M hU~M hU~M:__bdun pa mchod rdzas byin rlabs ni:__oM AHhU~M:__gnas yul bde chen pad+mo bkod:__dag pa rab 'byams zhing gi dbus:__phyi nang gsang ba'i 'dod yon kun:__mchod pa'i phyag rgya chen por rdzogs:__oM sarba pU dza AHhU~M:__sa ma ya:__gnyis pa dngos gzhi'i rim pa la:__dang po bskyed pa'i rnal 'byor las:__dam tshig 'khor lo bskyed pa ni:__aH__gzhi dbyings ka dag de bzhin nyid:__sngon gyi bskal pa dang po la:__gzhi snang lhun grub snying rje'i rtsal:__sku dang zhing khams rang shar ba'i:__o rgyan yul gyi nub byang mtshams:__sin+d+hu rgya mtsho rol pa'i gling :__shin tu nyams dga' ngo mtshar gyi:__bkod pa du mas mdzes pa'i gzhir:__yan lag brgyad ldan chu gter dbus:__pad+ma ge sar sdong po la:__thabs shes nyi zla'i gdan gyi steng :__so sor rtog pa'i rig mdangs rtsal:__rang sems hrIHyig dmar po las:__'od 'phros rgyal ba sras bcas mchod:__'gro kun sgrib sbyangs snod dang bcud:__'og min pad+mo bkod pa'i zhing :__mi zad rgyan gyi 'khor lor rdzogs:__tshur 'dus rdo rje rtse lnga pa'i:__lte bar hrIHyis mtshan par gyur:__de las skad cig dran rdzogs su:__bdag nyid 'chi med mtsho skyes rje:__rig 'dzin bla ma kun gyi dngos:__zhal gcig phyag gnyis dkar dmar mdangs:__zhi 'dzum gzhon tshul mtshan dper ldan:__phyag g.yas sdigs mdzub dang bcas pas:__gser gyi rdo rje thugs kar gtod:__g.yon pas mnyam gzhag ka pA la:__'chi med bdud rtsis bkang ba bsnams:__rang 'od bde ster gsang ba'i yum:__gri gug thod pa 'dzin pas 'khyud:__dar dang rin chen ut+pal brgyan:__zhabs gnyis rdo rje'i skyil krung bzhugs:__thugs kar pad+ma zla ba'i dbus:__ye shes sems dpa' spyan ras gzigs:__dbang mdog zhal gcig phyag bzhi pa:__thal sbyar phreng ba pad+ma bsnams:__spyi bor pad nyi bam ro'i steng :__yi dam yongs 'dus rta mchog dpal:__dmar smug gar dgu'i nyams dang ldan:__dpal dang dur khrod chas kun rdzogs:__sbyor yum 'bum phrag mkha' 'gro'i gtso:__phag mo mthing nag dgyes par rol:__spyi gtsug rta gdong phag zhal bzhad:__phyag gnyis gri gug thod khrag bsnams:__zhabs zung gyad kyi dor stabs kyis:__ye shes me dpung dbus na 'gyings:__de yi spyi bor pad zla'i steng :__rigs kyi bdag po snang mtha' yas:__dmar gsal mnyam gzhag lhung bzed 'dzin:__sprul sku'i cha lugs mtshan dpes mdzes:__steng phyogs 'ja' zer thig le'i klong :__rtsa brgyud bla ma rig 'dzin dang :__yi dam zhi khro rab 'byams lha:__phyogs bcu'i rgyal ba sras bcas kyis:__ye shes bdud rtsis dbang bskur zhing :__me tog char 'bebs rol mo sgrogs:__shis brjod rdo rje'i dbyangs su len:__bar mtshams dpa' bo rnal 'byor mas:__phyi nang mchod pa sprin ltar gtibs:__mtha' skor rgyud gsum dregs pa'i sde:__bka' nyan bran g.yog tshul du 'khod:__kun kyang snang stong zung 'jug ngang :__gtso bo gsum gyi gnas gsum du:__rdo rje gsum gyi yi ges mtshan:__de las 'phros pa'i 'od zer gyis:__ye shes sems dpa' spyan drangs gyur:__de nas ye shes spyan 'dren ni:__hU~M:__sngon gyi bskal pa dang po la:__o rgyan yul gyi nub byang mtshams:__pad+ma ge sar sdong po la:__ya mtshan mchog gi dngos grub brnyes:__pad+ma 'byung gnas zhes su grags:__'khor du mkha' 'gro mang pos bskor:__khyed kyi rjes su bdag sgrub kyi:__byin gyis brlab phyir gshegs su gsol:__gnas mchog 'di ru byin phobs la:__sgrub mchog bdag la dbang bzhi skur:__bgegs dang log 'dren bar chad sol:__mchog dang thun mong dngos grub stsol:__oM AHhU~M badz+ra gu ru d+he wa d+hA ki nI sa pa ri wA ra badz+ra sa ma ya dzaHsid+d+hi pha la hU~M AH__mdun gyi nam mkhar bzhugs pa yi:__ye shes lha tshogs gnas gsum nas:__gsang ba gsum gyi byin rlabs kun:__lha sngags phyag mtshan 'od zer gyi:__rnam par byon te rang la thim:__sgrib bzhi dag cing dbang bzhis smin:__sku bzhi'i sa bon rgyud la bzhag:__mchog thun dngos grub thob par bsam:__gsol 'debs rdo rje'i tshig bdun dang :__bsnyen pa'i sngags 'di spel la bzla:__oM AHhU~M badz+ra gu ru pad+ma sid+d+hi hU~M:__sa ma ya:__gnyis pa sgrub pa'i rim pa ni:__oM AHhU~M badz+ra gu ru d+he wa d+hA ki nI sa pa ri wA ra sa ma ya dzaHhU~M ba~M hoH__kA la wA ka tsit+ta tiSh+Tha dz+nyA na badz+ra swa b+hA wa At+ma ko\u0f85 haM:__dam tshig ye shes dbyer med pa'i:__lha snang gsal zhing brtan pa la:__rang las sprul pa'i lha mo yis:__phyag 'tshal mchod cing bstod par bsam:__hoH__gdod nas rang rig rtsa gsum lha:__'du 'bral med par ro gcig kyang :__gnyis 'dzin 'khrul pa sbyang ba'i phyir:__gus pa'i brda yis phyag 'tshal lo:__a ti pU hoH__pra tits+tsha hoH__oM AHhU~M:__dngos 'byor yid kyis rnam sprul pa'i:__rab 'byams rgya mtsho'i mchod rdzas rigs:__kun bzang mchod sprin cher spel nas:__'chi med rtsa gsum lha tshogs mchod:__oM AHhU~M badz+ra gu ru d+he wa d+hA ki nI sa pa ri wA ra ar+g+haM pAd+yaM puSh+pe d+hU pe A lo ke gan+d+he ni wid+ya shab+da pra tIts+tsha swA hA:__yul dang dbang po mnyam sbyor ba'i:__bde chen rdo rje'i dam tshig mchog:__'dod yon rnam pa thams cad pas:__dkyil 'khor lha tshogs mnyes gyur cig:__oM AHhU~M badz+ra gu ru d+he wa d+hA ki nI sa pa ri wA ra rU pa shab+da gan+d+he rA sa spar+she pra tits+tsha swA hA:__oM:__rtsa brgyad stong sbyar a mr-i ta:__khams gsum bsgral ba'i rak+ta dang :__'dod yon lnga ldan ba liM tas:__'chi med rtsa gsum lha tshogs mchod:__oM AHhU~M gu ru d+he wa d+hA ki nI sa pa rI wA ra sarba pany+tsa a mr-i ta rak+ta ba liM ta pU dza ho:__A:__dga' bzhi dbu mar sbyar ba las:__gzung 'dzin rtog tshogs dbyings su bsgral:__'khor gsum mtshan ma las 'das pa'i:__mchog gi mchod pa chen po bzhes:__sta na ga Na dz+nyA na pu dza ho:__hrI:__ngo bo chos sku snang mtha' yas:__rang bzhin longs sku spyan ras gzigs:__thugs rje sprul sku pad+ma 'byung :__sku gsum dbyer med khyod la bstod:__rig 'dzin bla ma kun gyi dngos:__yi dam zhi khro'i 'khor los sgyur:__dpa' bo mkha' 'gro'i tshogs kyi rje:__rtsa gsum kun 'dus khyod la bstod:__phyogs bcu'i rgyal ba sras bcas kyi:__ye shes lus can de bzhin gshegs:__mchog gsum ngo bo mtsho skyes rje:__gtso 'khor sprul par bcas la bstod:__de ltar mchod cing bstod pa'i mthus:__gnas skabs rnam bzhi'i phrin las dang :__mthar thug 'chi med sku gsum gyi:__go 'phang tshe 'dir 'grub gyur cig:__de nas dzaba? kyi dgongs pa ni:__ye shes sems dpa'i thugs ka ru:__thabs shes nyi zla'i gwa'u'i dbus:__ting 'dzin sems dpa'i hriHdmar po:__de mthar sngags phreng g.yas su 'khor:__'od kyis rtsa gsum lha tshogs mchod:__byin rlabs dngos grub rang la thim:__slar 'phros snod bcud dngos 'dzin sbyangs:__lha sngags ye shes 'khor lor bsam:__oM AHhU~M badz+ra gu ru pad+ma d+he wa d+hA ki nI sarba sid+d+hi pha la hU~M AH__de ltar bsnyen dang sgrub pa'i sngags:__rtse gcig 'bum phrag bcu gnyis bzlaH__dngos sam nyams dang rmi lam du:__dngos grub thob pa'i rtags rnams 'byung :__sa ma ya:__gsum pa las la sbyar ba ni:__mchod cing bstod pa sngon 'gro bas:__gdung ba'i dbyangs dang rol mor bcas:__mi phyed dad pas thugs dam bskul:__oM AHhU~M:__ka dag dbyings kyi pho brang nas:__ngo bo chos sku 'od mi 'gyur:__mtsho skyes rdo rje'i thugs dam skul:__gzung 'dzin zhi ba'i phrin las mdzod:__lhun grub rig pa'i pho brang nas:__rang bzhin longs sku snying rje'i gter:__thod phreng rigs lnga'i thugs dam skul:__ye shes rgyas pa'i phrin las mdzod:__zung 'jug 'gro 'dul pho brang nas:__thugs rje kun khyab sprul pa'i gar:__mtshan mchog brgyad kyi thugs dam skul:__rlung sems dbang 'dus phrin las mdzod:__sku bzhi dbyer med pho brang nas:__rtsa gsum kun 'dus he ru ka:__pad+ma drag po'i thugs dam skul:__gnyis 'dzin tshar gcod phrin las mdzod:__gzugs snang rdo rje'i sku ru zlog:__srog rtsol dbu ma'i phyag rgyar stims:__rtog tshogs gdod nas rang grol bar:__skye 'chi bral ba'i phrin las mdzod:__oM AHhU~M badz+ra gu ru d+he wa d+hA ki nI sarba karma sid+d+hi pha la hU~M AH__lha tshogs kun gyi thugs ka nas:__thugs rje'i 'od zer phyogs bcur 'phros:__thun mong mchog gi dngos grub dang :__phrin las rnam bzhi 'grub par bsam:__sgrub pa'i sngags kyi sham bu ru:__oM shAn+tiM ku ru swA hA:__b+hU~M puSh+tiM ku ru oM:__hrIHwA shaM ku ru hoH__hU~M mA ra ya phaT:__ces bzlas rlung sems dbyings la bskyal:__rnam bzhi'i phrin las gang brtsam 'grub:__sa ma ya:__thun mtshams tshogs kyi mchod pa ni:__thabs shes bza' btung dam tshig rdzas:__gtsang zhing bkod pas mdzes par bsham:__bdud rtsis bran la byin gyis brlab:__hrIH__bdag nyid thugs las 'od 'phros pas:__tshogs kyi dngos 'dzin bsreg gtor sbyangs:__phyi snod bde chen ka pA lar:__nang bcud 'dod yon bdud rtsir gyur:__ra~M ya~M kha~M:__oM AHhU~M hrIH__de nas tshogs zhing spyan 'dren ni:__hrI:__'og min bde chen zhing khams nas:__chos sku 'od mi 'gyur ba la:__bde gshegs rgya mtsho'i 'khor gyis bskor:__tshogs la spyan 'dren gshegs su gsol:__lho phyogs ri po ta la nas:__longs sku thugs rje chen po la:__rgyal sras rgya mtsho'i 'khor gyis bskor:__tshogs la spyan 'dren gshegs su gsol:__lho nub rnga yab dpal ri nas:__sprul sku pad+ma thod phreng la:__rtsa gsum rgya mtsho'i 'khor gyis bskor:__tshogs la spyan 'dren gshegs su gsol:__gnas yul dur khrod brgyad rnams nas:__ye shes mgon po ma ning nag:__chos skyong rgya mtsho'i 'khor gyis bskor:__tshogs la spyan 'dren gshegs su gsol:__tshogs khang rang bzhin sprul pa'i zhing :__tshogs rdzas zag med bdud rtsi'i bcud:__snang grags rig pa lha dang sngags:__ye shes chen por byin phob cig:__oM AHhU~M badz+ra gu ru d+he wa d+hA ki nA d+harma pA la sa pa ri wA ra badz+ra sa ma ya dzaHdzaH__tshogs phud rim pa gsum du spros:__dang po 'dod yon rgya mtshos mchod:__oM AHhU~M:__snang ba snod kyi ka pA lar:__srid pa bcud kyi tshogs gtor bshams:__'dod yon rgya mtsho'i mchod sprin 'dis:__rtsa gsum lha tshogs mnyes gyur cig:__lhun grub phung po'i ka pA lar:__rtsa rlung thig le'i tshogs gtor bshams:__snang stong zung 'jug mchod sprin 'dis:__rtsa gsum lha tshogs mnyes gyur cig:__'od gsal dbu ma'i ka pA lar:__srog rtsol kha sbyor tshogs gtor bshams:__grags stong rang grol mchod sprin 'dis:__rtsa gsum lha tshogs mnyes gyur cig:__lugs ldog thig le'i ka pA lar:__dga' bzhi'i ye shes tshogs gtor bshams:__bde stong dbyer med mchod sprin 'dis:__rtsa gsum lha tshogs mnyes gyur cig:__gzhi dbyings gdod ma'i ka pA lar:__gzhi snang ye shes tshogs gtor bshams:__bla med mchog gi mchod sprin 'dis:__rtsa gsum lha tshogs mnyes gyur cig:__yid bzhin 'dod 'byung ka pA lar:__bza' bca' btung ba'i tshogs gtor bshams:__longs spyod rnam pa thams cad pas:__rtsa gsum lha tshogs mnyes gyur cig:__'chi med rtsa gsum dkyil 'khor lhas:__phyi nang gsang ba de kho na'i:__tshogs kyi mchod pa 'di bzhes la:__mchog dang thun mong dngos grub stsol:__oM AHhU~M badz+ra gu ru d+he wa d+hA ki nI d+harma pA la sa pa ri wA ra ga Na tsa kra pU dza hoH__bar pas dam tshig nyams chag bshags:__hoH__thog med dus nas da lta'i bar:__las dang nyon mongs gzhan dbang gis:__bsags pa'i sdig sgrib nyes ltung kun:__tshogs kyi mchod pas bskang zhing bshags:__yi ge brgya pa brjod:__tha ma bsgral zhing bstab pa ni:__hU~M:__bdag tu lta ba'i dgra dang bgegs:__bdag med rdo rje'i mtshon gyis bsgral:__phung khams rigs lnga'i dam tshig rdzas:__rtsa gsum lha tshogs zhal du sbyor:__sarba shA' trUn big+h+nAn mA ra ya ma hA pany+tsa a mr-i ta pU dza hoH__de nas lus kyi dkyil 'khor lha:__'dod yon rdo rje'i dam tshig dang :__snyoms 'jug byang sems bdud rtsis mchod:__lhag gtor bsdus te byin gyis brlab:__pheM pheM:__dkyil 'khor mu ran skyong ba yi:__dbang phyug ging dang lang+ka'i tshogs:__dpal gyi pham phab 'di bzhes la:__bcol ba'i phrin las 'grub par mdzod:__oM uts+tshiSh+ta ba liM ta b+huny+dza ho:__srung mar sngon gyi tha tshig bsgrag:__hU~M b+h+yo:__dbyings kyi thig le e ka dza:__rig pa rang shar rA hu la:__gnyis med ye shes ma ning nag:__rgyud gsum dregs pa'i tshogs dang bcas:__sngon tshe kun bzang che ba'i mchog:__pad+ma thod phreng spyan snga ru:__ji ltar zhal bzhes dam bcas bzhin:__'dir gshegs dam rdzas gtor ma longs:__rig 'dzin bdag cag 'khor bcas kyi:__dus min 'chi dang bar chad sol:__tshe bsod dpal 'byor 'khor slob spel:__rnam bzhi'i phrin las 'grub par mdzod:__shrI badz+ra d+harma pA la sa pa ri wA ra i daM ba liM ta b+huny+dza hoH__bshal chus brtan ma skyong ba ni:__hU~M:__dus sbyor 'pho ba gnas dag pa'i:__bden don yan lag bcu gnyis klong :__ye shes grub kyang las kyi tshul:__bod khams skyong ba'i brtan ma'i tshogs:__a su ra yi brag phug tu:__'chi med pad+ma 'byung gnas kyis:__ji ltar bka' bsgos dam bzhag bzhin:__tshur gshegs rtsa gsum dkyil 'khor du:__he ru ka yi 'du bar spyon:__bshal chu'i bdud rtsi 'di gsol la:__gangs can 'gro kun bde ba dang :__bstan pa dar ba'i phrin las mdzod:__ma ma hrIng hrIng a mr-i ta pU dza ho:__las mtha' rdo rje'i bro yis bsdu:__hU~M:__gnyis 'dzin 'khrul pa'i dam sri'i tshogs:__rnam thar gsum ldan dbyings su mnan:__rdo rje'i gar gyi rgyas btab pas:__byang chub bar du+u ma ldangs shig:__sarba shA trun big+h+nan s+t+wAm+b+ha ya nan:__de ltar brtson pa'i rnal 'byor par:__bsod nams ye shes tshogs rdzogs shing :__mi mthun bar chad zhi ba dang :__'dod pa'i dngos grub myur thob 'gyur:__sa ma ya:__gsum pa rjes kyi rim pa la:__dang po dngos grub blang ba ni:__oM AH hU~M:__byin rlabs gter chen dngos grub mdzod:__phrin las char 'bebs lhag pa'i lha:__rtsa gsum kun 'dus lha tshogs rnams:__deng 'dir rnal 'byor bdag cag la:__'chi med tshe dang 'dzad med nor:__nus pa sngags dang ting 'dzin sgo:__las bzhi grub pa chen po brgyad:__rig 'dzin bzhi dang dbang bcu'i dpal:__sku dang ye shes dbyer med pa'i:__thun mong mchog gi dngos grub rnams:__da lta nyid du stsal nas kyang :__don gnyis 'grub par mdzad du gsol:__oM AHhU~M hrIHbadz+ra gu ru pad+ma d+he wa d+hA ki nI kA ya wA ka tsit+ta sarba sid+d+hi pha la hU~M AH__gnyis pa nongs pa bshags pa ni:__hoH__don dam gzod nas spros bral la:__gzung 'dzin mtshan ma las 'das phyir:__kun rdzob glo bur 'khrul pa'i tshogs:__'khor gsum dmigs med dbyings su bshags:__yi ge brgya pa lan gsum brjod:__gsum pa nyer bsdu'i rnal 'byor ni:__aH__sems nyid skye ba med pa las:__skye ba'i cho 'phrul dkyil 'khor lha:__mkha' la 'ja' tshon yal ba ltar:__'od gsal gnyug ma'i klong du thim:__a a aH__bzhi pa chad mtha' bsal ba ni:__oM AHhU~M:__slar yang cir snang lha yi sku:__sgrar grags gzhom med rdo rje'i sgra:__rtog tshogs rang grol rig pa'i dbyings:__zung 'jug sgyu ma'i ngang nas spyod:__lnga pa dge ba bsngo ba ni:__hoH__bdag dang mtha' yas sems can gyis:__bsod nams ye shes dge ba'i tshogs:__dus gsum bsags dang bsag 'gyur kun:__byang chub snying por bsngo bar bgyi:__drug pa smon lam gdab pa ni:__deng nas tshe rabs thams cad du:__bla ma mchog dang mi 'bral zhing*/__rim gnyis zab mo'i rnal 'byor gyis:__rang gzhan don gnyis myur 'grub shog:__bdun pa shis pa brjod pa ni:__hoH__phyogs dus rgyal ba sras bcas kyi:__ye shes gcig tu bsdus pa'i dngos:__rtsa brgyud rig 'dzin bla ma yis:__byin gyis rlob pa'i bkra shis shog:__chos sku'i ngang las longs spyod rdzogs:__sprul pa'i rnam 'phrul cir yang shar:__yi dam zhi khro'i lha tshogs kyis:__dngos grub stsol ba'i bkra shis shog:__gnas yul dur khrod zhing rnams su:__tshar gcod rjes 'dzin bstan pa bsrung :__dpa' bo mkha' 'gro chos skyong gis:__bka' bzhin sgrub pa'i bkra shis shog:__srid zhi'i phan bde 'byung ba'i gnas:__rgyal bstan phyogs bcur dar ba dang :__bstan 'dzin skyes bu zhabs pad brtan:__'jig rten dge ba'i bkra shis shog:__thun mong zhi rgyas dbang drag gi:__phrin las gang brtsam myur 'grub cing :__mthar thug mchog tu mi 'gyur dbyings:__mngon par byang chub bkra shis shog:__ces brjod me tog char du bsnyil:__sa ma ya:__de ltar sbyor dngos rjes gsum gyis:__rtsa gsum kun 'dus dkyil 'khor lha:__bsnyen cing sgrub pa'i phrin las 'di:__dad brtson ldan pas nyams blangs na:__tshe 'dir mi mthun phyogs kun zhi:__mchog thun dngos grub 'bad med 'byung :__phyi ma rnga yab dpal gyi rir:__'chi med rig 'dzin nges par 'grub:__rgya rgya rgya:__d+ha thim: