དཔལ་རྟ་མགྲིན་དྲེགས་པ་ཀུན་སྒྲོལ་གྱི་རྟེན་གཏོར།

🚧 This website is under continued development. We appreciate your patience!

Previous Text Back to Volume PageNext Text

Wylie title	dpal rta mgrin dregs pa kun sgrol gyi rten gtor
Location	mkhyen brtse'i bka' babs Volume 11, Text 20, Pages 457-468 (Folios 1a to 6b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	གྲུ་གུ་ཡང་དབང་, འཇམ་དབྱངས་མཁྱེན་བརྩེའི་དབང་པོ་ (gru gu yang dbang, 'jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. dpal rta mgrin dregs pa kun sgrol gyi rten gtor. In Rdzong sar 'jam dbyangs mkhyen brtse'i dbang po'i bka' babs, Vol. 11: 457-468. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Torma-offering Rituals - gtor chog
Cycle	རྟ་མགྲིན་དྲེགས་པ་ཀུན་སྒྲོལ་ (rta mgrin dregs pa kun sgrol)
Deity	rta mgrin
Karchag page	JKW-KABAB-Volume-11-DA-Karchag
RTZ	In the Rinchen Terdzö: https://rtz.tsadra.org/index.php/Terdzo-RA-044
Colophon	Treasure colophon: དཔལ་རྟ་མགྲིན་དྲེགས་པ་ཀུན་སྒྲོལ་གྱི་རྟེན་གཏོར་རྫོགས་སོ༔ མངྒ་ལཾ༔
	Treasure colophon: dpal rta mgrin dregs pa kun sgrol gyi rten gtor rdzogs so:__mang+ga laM:

Tibetan Text

Wylie

[edit]

༄༅། དཔལ་རྟ་མགྲིན་དྲེགས་པ་ཀུན་སྒྲོལ་གྱི་རྟེན་གཏོར་བཞུགས་སོ༔

༔ན་མོ་ཧ་ཡ་གྲཱི་ཝཱ་ཡ༔ རྟེན་གཏོར་གྱི་བཅས་ལ༔ དང་པོ་རྫས་བསགས་པ་ནི༔ སྨན་དང་༔ སྙིང་སྣ་དང་༔ ཤ་སྣ་ཚོགས༔ འབྲུ་སྣ་ཚོགས༔ རིན་པོ་ཆེ་སྣ་བདུན༔ ཆང་དང་རཀྟ་གང་འབྱོར་བཤམས་ལ་གཞི་བྱ༔ དང་པོ་རྩམ་པ་རིན་པོ་ཆེའི་སྣོད་ཀྱི་ནང་དུ་བླུགས་ལ༔ ཨོཾ་ཨཱཿཧཱུྃ་གསུམ་བྲིས་ལ༔ དེ་ནས་རང་ཉིད་ཡི་དམ་ལྷ་ཡི་ང་རྒྱལ་གྱིས་ལྷ་བསྐྱེད་ལ་རྩམ་པ་བསྲེ༔ དེ་ནས་སྭ་བྷཱ་བའི་སྔགས་ཀྱིས་སྟོང་པར་སྦྱང་༔ སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་དེའི་ནང་དུ་འདོད་ཡོན་གྱིས་གང་བར་བསམ་ལ༔ དེ་ནས་རང་གི་ས་བོན་ལས་འོད་ཟེར་གཅིག་འཕྲོས་པས༔ རྩམ་པའི་སྟེང་གི་ཨོཾ་ལ་ཕོག་པས་ཨོཾ་དེ་ནམ་མཁའ་ལ་ཡར་བཀྱག་པར་བསམ༔ དེ་ནས་རང་གི་ས་བོན་ལས་འོད་འཕྲོས་པས་ཨོཾ་དེ་ལ་ཕོག༔ ཨོཾ་དེ་ལས་འོད་ཟེར་དཀར་པོ་གཅིག་ཡར་འཕྲོས་པས༔ སྐུ་ཡི་ལྷ་ཚོགས་ལ་མཆོད་ཡོན་མ་སོགས་མཆོད་པའི་ལྷ་མོ་དཔག་ཏུ་མེད་པ་སྤྲོས་པས་མཆོད་ནས༔ ཨོཾ་བརྒྱ་རྩ་བརྒྱད་བརྗོད༔ ནམ་ཚར་ནས་ཡང་རྩམ་པའི་ཨོཾ་དེ་ལས་འོད་ཟེར་དཀར་པོ་ཡར་འཕྲོས་པས༔ སྐུ་ཡི་ལྷ་ཚོགས་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ་ནས་སྐུ་ཡི་འོད་ཟེར་དཀར་པོ་དང་བྱིན་རླབས་ཀྱི་རྣམ་པར་བཀུག་ནས༔ ཨོཾ་བརྒྱ་རྩ་བརྒྱད་བརྗོད༔ རང་གི་མདུན་གྱི་ནམ་མཁའི་ཨཱོཾ་ལ་ཐིམ༔ ཨོཾ་དེ་ཡང་རྩམ་པའི་སྟེང་དུ་བྲིས་ཟིན་དེ་ལ་ཐིམ་པས་རྩམ་པ་དང་ཨོཾ་འོད་དུ་ཞུ་ནས་བདུད་རྩིར་གྱུར་པར་བསམ༔ ཡང་ས་བོན་ལས་འོད་ཟེར་དམར་པོ་ཅིག་འཕྲོས་པས༔ རྩམ་པའི་སྟེང་གི་ཨཱཿདམར་པོ་ལ་ཕོག་པས་ཡང་ནམ་མཁའ་ལ་ཡར་བཀྱག་པས་ཁྲུ་གང་ཙམ་གྱི་སྟེང་ན་ཡོད་པར་བསམས་ལ༔ འོད་ཟེར་སྤྲོ་བསྡུ་གོང་དང་འདྲ༔ ཨཱཿབརྒྱ་རྩ་བརྒྱད་བརྗོད་ནས་སྣང་བ་མཐའ་ཡས་ལ་སོགས་གསུང་གི་ལྷ་ཚོགས་ཀྱི་ཐུགས་དམ་གྱི་རྒྱུད་བསྐུལ་ནས༔ གསུང་གི་ལྷ་ཚོགས་ཐམས་ཅད་ཀྱི་བྱིན་རླབས་དང་འོད་ཟེར་ཐམས་ཅད་མར་བཀུག་ནས༔ རྩམ་པ་ལ་བྲིས་ཟིན་གྱི་ཨཱཿདམར་པོ་ལ་ཐིམ་པ་ཙམ་གྱིས་ཨཱཿདང་རྩམ་པ་ཡང་འོད་དུ་ཞུ་བའི་བདུད་རྩིར་གྱུར་པར་བསམ༔ ཡང་ས་བོན་ལས་འོད་ཟེར་སྔོན་པོ་ཅིག་འཕྲོས་པས༔ ཧཱུཾ་དེ་ལ་ཕོག་པས་ཧཱུྃ་དེ་ནམ་མཁའ་ལ་ཡར་བཀྱག་ནས༔ ཧཱུྃ་བརྒྱ་རྩ་བརྒྱད་བརྗོད༔ འོད་ཟེར་སྤྲོ་བསྡུ་གོང་དང་འདྲ༔ ཡང་ཐུགས་ཀའི་ལྷ་ཚོགས་ཐམས་ཅད་ཀྱི་འོད་ཟེར་དང་བྱིན་རླབས་རྣམས་བཀུག་ནས༔ ནམ་མཁའི་ཧཱུྃ་ལ་ཐིམ༔ ཧཱུྃ་བརྒྱ་རྩ་བརྗོད༔ ནམ་མཁའི་ཧཱུཾ་དེ་རྩམ་པ་ལ་ཐིམ་པ་ཙམ་གྱིས་ཡང་འོད་དུ་ཞུ་ནས་བདུད་རྩིར་གྱུར་པར་བསམ༔ ཡང་ཨཱོཾ་ཨཱཿཧཱུྃ་གསུམ་ཀ་ལ་ཕོག་པས་འོད་ཟེར་དཀར་པོ་དམར་པོ་སྔོན་པོ་གསུམ་འཕྲོས་པས་སྐུ་གསུང་ཐུགས་ཀྱི་ལྷ་ཚོགས་ལ་ཕོག་པས༔ ཐུགས་དམ་གྱི་རྒྱུད་བསྐུལ་ནས༔ སྐུ་གསུང་ཐུགས་ཀྱི་ལྷ་ཚོགས་ཐམས་ཅད་ཀྱི་བྱིན་རླབས་དང་འོད་ཟེར་རྣམས་བཀུག་ནས༔ ཨོཾ་ཨཱཿཧཱུྃ་གསུམ་ལ་ཐིམ་པ་ཙམ་གྱིས་ཡང་འོད་དུ་ཞུ་ནས་བདུད་རྩིར་གྱུར་པར་བསམས་ལ༔ ཨོཾ་ཨཱཿཧཱུྃ་བརྒྱ་རྩ་བརྗོད་ཅིང་༔ དམིགས་པ་དེ་བཞིན་བྱེད༔ ཡི་དམ་སྙིང་པོ་བརྒྱ་རྩ་བརྒྱད་བརྗོད་པས་བདུད་རྩིར་གྱུར་པར་བསམས་ལ་སྔགས་ཕོག་བདུན་དང་༔ འབྲུ་གསུམ་གང་འཕྲོད་པས་རྩམ་པ་བྱིན་གྱིས་བརླབ༔ དེ་ནས་རཀྟ་དང་༔ ཆང་གི་ཉིང་ཁུ་དང་༔ སྨན་དང་༔ འབྲུ་དང་༔ རིན་པོ་ཆེ་དེ་རྣམས་ཀྱི་སུམ་ཆ་དེ་རྩམ་པ་ལ་བསྲེ༔ སུམ་གཉིས་དེ་ཐོད་པའི་ནང་དུ་བླུགས་ལ༔ དར་སྣ་ཚོགས་ཀྱིས་བཀབ་ལ་མདུན་དུ་བཞག༔ སྲོག་ཤིང་སྦ་དང་སྨྱུག་མ་གང་རུང་ཚིགས་གསུམ་པ༔ དེ་ཡི་སྟོད་ན་བླ་མ་ཡི་དམ་གྱི་མཚན་སྔགས་རྣམས་རིན་པོ་ཆེས་བྲིས་ལ་བཞག༔ བར་གྱི་ཚིགས་ལ་ཡི་དམ་སྙིང་པོ༔ སྨད་ན་ཆོས་སྐྱོང་གི་སྔགས༔ སྲོག་ཤིང་རྐང་ལ་མར་བཏགས་ཁྲུ་གང་༔ གཏོར་མ་རྐང་གང་གི་གཟུགས་ནི་ཞི་རྒྱས་དབང་དྲག་གང་ཡང་རུང་༔ གཏོར་མའི་གདན་དེ་ལ་དབུས་སུ་གྲུ་གསུམ༔ ཟླ་གམ༔ ཟླུམ་པོ༔ དེའི་རྒྱབ་གྲུ་བཞི་བྱ༔ དེ་ནས་གཏོར་མ་བསླངས་ལ༔ ཡི་དམ་ལྷའི་ང་རྒྱལ་གྱིས་བགེགས་ལ་སྲུང་འཁོར་བསྒོམ༔ དེ་ནས་བདག་བསྐྱེད་གཞུང་ལྟར་བྱས་ལ༔ དེ་ནས་སྭཱ་བྷཱ་བའི་སྔགས་ཀྱིས་སྟོང་པར་བསམས་ལ༔ སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར༔ རྃ་ལས་མེའི་དཀྱིལ་འཁོར༔ ཀེཾ་ལས་ཐོད་པའི་སྒྱེད་བུ་རི་རབ་ཙམ་གསུམ་བསམ༔ དེ་ནས་རང་གི་ཐུགས་ཀའི་ཧཱུྃ་ལས་ཨཱཿགཅིག་ཕར་ཆད་པས༔ སྣོད་ལ་ཕོག་པས་སྣོད་ཀྱི་ཉེས་སྐྱོན་དག་ནས༔ ཨ་ལས་བྱུང་བའི་བྷནྡྷའི་གཞལ་ཡས་ཁང་དབུས་སུ་གྲུ་གསུམ༔ ཟླ་གམ༔ ཐོད་པ་ཟླུམ་པོ༔ རྒྱབ་གྲུ་བཞི༔ ཕྱོགས་བཞི་ན་རིན་པོ་ཆེའི་སྐྱོགས་བཞི་རྡོ་རྗེའི་བྱ་མཆུ་བཞི་དང་ལྡན་པ༔ དེའི་དབུས་སུ་ཨ་ལས་ཟླ་བའི་སྟེང་ན་ཧཱུྃ་ལས་བྱང་ཆུབ་སེམས་ཀྱིས་མཚན་པ༔ དེའི་སྟེང་དུ་ཤ་ལྔ་བདུད་རྩི་ལྔ༔ དེའི་སྟེང་དུ་ཡེ་ཤེས་ལྔ༔ གཏོར་མ་གཞུང་དང་མཐུན༔ དེ་ནས་རང་གི་ཧཱུྃ་ལས་ཧཱུྃ་གཅིག་ཕར་ཆད་པས༔ གཏོར་མའི་སྟེང་ན་པདྨའི་གདན་ལ་གཞུགས་པར་བསམ༔ དེ་ནས་ཡང་རང་གི་ས་བོན་ཧཱུྃ་ལས་ཨོཾ་གཅིག་ཕར་འཕྲོས༔ ནང་བཅུད་ལ་ཕོགས་པས་མི་གཙང་བ་དང་ཉེས་སྐྱོན་ཐམས་ཅད་དག༔ དམ་ཚིག་གི་རྫས་ཞལ་ཟས་འདོད་ཡོན་ཚོགས་ཀྱིས་ཕྱུར་གྱིས་གང་བར་བསམ༔ དེ་ནས་ཡང་ཧཱུྃ་ལས་འོད་ཟེར་འཕྲོས་པས་ཧཱུྃ་དེ་ལ་ཕོག་པས་རྡོ་རྗེ་དང་༔ ཁྲོ་ཆུང་དང་༔ མེའི་ཚྭ་ཚྭ་དཔག་ཏུ་མེད་པ་འཕྲོས་པས་བགེགས་བསྐྲད་པར་བསམ༔ དེ་ནས་ཡང་རང་གི་ཧཱུྃ་ལས་མ་གཅིག་ཕར་འཕྲོས་པས༔ གཏོར་མ་དེའི་སྟེང་ན་འཁྱིལ་བ་ལས༔ ཉི་མའི་དཀྱིལ་འཁོར་རི་རབ་བས་རྒྱ་ཆེ་བ་གཅིག་ཏུ་གྱུར་པར་བསམ༔ རྒྱས་པ་ནི་རང་ཉིད་ལྷ་དྲན་ལ་སྔགས་བཟླ༔ དེ་ནས་ཧཱུྃ་གཅིག་ཕར་སྤྲོས་པ༔ རྟེན་གཏོར་གྱི་སྟེང་ན་གནས་པ་ལས༔ རིམ་པ་བཞིན་ཨེ་ཆད་བདག་བསྐྱེད་ལྟར་སྲུང་བའི་གུར༔ དེའི་སྟེང་དུ་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་༔ གྲུ་བཞི་སྒོ་བཞི་ར་བ་རིམ་པ་ལྔ་དང་ལྡན་པ༔ གཞལ་ཡས་ཁང་གི་མཚན་ཉིད་ཡོངས་སུ་རྫོགས་པ༔ གུར་ཁང་ཡང་དྲན་རྫོགས༔ དེའི་ཕྱི་རོལ་དུ་དུར་ཁྲོད་བརྒྱད༔ དེའི་དབུས་སུ་འཁོར་ལོ་སྔོན་པོ་རྩིབས་བཅུ་པ༔ དེའི་དབུས་སུ་འཁོར་ལོ་སེར་པོ་རྩིབས་བརྒྱད་པའི་ལྟེ་བར་ཟླ་གམ་དམར་པོ༔ གནམ་སྒོ་གཅིག་པ༔ དེའི་དབུས་སུ་ཀླུ་འབུམ་གཉན་ཁྲི་ས་བདག་སྟོང་༔ ཕྱོགས་སྐྱོང་མ་ཧཱ་དེ་བ་བྱི་ཆིངས་སུ་བསྣོལ་བའི་ཁྲི༔ དེའི་སྟེང་དུ་པྃ་ལས་པདྨ༔ རྃ་ལས་ཉི་མ༔ ཨ་ལས་ཟླ་བ༔ དེའི་སྟེང་དུ་ཧཱུྃ་དང་ཧྲཱི་ལས་འོད་འཕྲོས༔ འཕགས་པ་མཆོད༔ སེམས་ཅན་གྱི་སྡིག་སྒྲིབ་སྦྱངས༔ འོད་ཟེར་ཚུར་འདུས་ཧཱུྃ་ལ་ཐིམ༔ ཧཱུྃ་ཡོངས་སུ་གྱུར་པ་ལས༔ མདུན་བསྐྱེད་ཀྱི་གཙོ་བོ་པདྨ་ཧེ་རུ་ཀ༔ སྐུ་མདོག་སྨུག་ནག་འབར་བ་ཞལ་གསུམ་ཕྱག་དྲུག༔ ཞབས་བཞི་དང་ལྡན་ཅིང་སྤྱན་གསུམ་མཆེ་བ་བཞི་གཙིགས་པ༔ དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་པ༔ དེའི་པང་དུ་ཡུམ་པདྨ་གཟི་ལྡན་མ༔ དམར་མོ་འཁོར་ལོ་དང་ཐོད་ཁྲག་གཙོ་ལ་སྟོབ་པ༔ སྤྱི་བོའི་གཙུག་ཏུ་རྟ་དབུ་གསུམ༔ བྱ་ཁྱུང་གསུམ༔ དཔལ་ཆེན་པོ་ལྷ་ལྔ༔ འཁོར་གྱི་གཙོ་བོ་བཞི༔ ཡུམ་བཞི༔ སྲུང་བའི་ཁྲོ་བོ་བཅུ༔ ཟློག་པའི་ཁྲོ་བོ་བཅུ༔ སྒོ་སྲུང་བཞི་དང་བཅས་པ༔ དེ་དག་ཐམས་ཅད་ཀྱང་རང་རང་གི་རྒྱན་ཆ་ལུགས་དང་ལྡན་ཅིང་༔ ཡེ་ཤེས་ཀྱི་མེ་འབར་བའི་དབུས་ན་བཞུགས་པ༔ དེ་དག་ཐམས་ཅད་ཀྱི་དཔྲལ་བར་ཨོཾ༔ མགྲིན་པར་ཨཱ༔ སྙིང་གར་ཧཱུྃ༔ དེའི་མདུན་དུ་རྒྱུད་སྡེ་བཞི་དང་༔ ཐེག་པ་རིམ་དགུའི་ལྷ་ཚོགས༔ གཡས་སུ་སངས་རྒྱས༔ རྒྱབ་ཏུ་ཆོས༔ གཡོན་དུ་དགེ་འདུན༔ ཕྱོགས་མཚམས་ཀྱི་ཆ་ལ་སངས་རྒྱས་དང་བྱང་ཆུབ་སེམས་དཔའ༔ འོག་གི་ཆ་ལ་ཆོས་སྐྱོང་བཀའ་སྡོད་ཕོ་ཉ་ལས་མཁན༔ དེའི་རྒྱབ་ཏུ་སྲུང་འཁོར་དྲན་རྫོགས༔ དེ་དག་ཐམས་ཅད་ཀྱི་གཙུག་ཏུ་རིགས་ལྔ་དང་བླ་མ༔ དེ་ནས་སྤྱན་དྲངས་པ་ནི༔ རང་གི་ས་བོན་ལས་འོད་ཟེར་དམར་པོ་འཕྲོས་པས༔ མདུན་བསྐྱེད་ཀྱི་ཐུགས་དམ་གྱི་རྒྱུད་བསྐུལ་བས༔ འོད་ཟེར་འཕྲོས་པས་སྣང་བ་མཐའ་ཡས་ཀྱི་ཞིང་ཁམས་ནས་པདྨ་ཧེ་རུ་ཀའི་ལྷ་ཚོགས་ལ་མཉེས་པའི་མཆོད་པ་ཕུལ༔ དེ་ལས་འོད་ཟེར་དམར་པོ་ཉི་མའི་ཟེར་ལྟ་བུ་ཚུར་བྱུང་བ་མདུན་བསྐྱེད་ལྷ་ཚོགས་ཀྱི་ས་བོན་ལ་ཟུག༔ དེའི་རྒྱུད་ལ་ཐོག་རྡུགས་མེད་པར་སྐད་ཅིག་གིས་བྱོན་པར་བསམས་ལ༔ སྤྱན་འདྲེན་གྱི་ཚིག་བཤད་ཀྱང་བྱེད༔ དེ་ནས་རིགས་ལྔའི་གྲངས་ལ་ཕྱག་དང་མཆོད་པ་ཕུལ༔ གཉིས་མེད་དུ་བསྟིམས་ལ་བཞུགས་སུ་གསོལ༔ དེ་ནས་ཧཱུྃ་ལས་སྔགས་ཐང་གསུམ་འཁོར་བའི་འོད་ཟེར་གྱིས་རིགས་ལྔ་སྤྱན་དྲངས་ལ་ཕྱག་དང་མཆོད་པ་ཕུལ༔ དེ་ནས་མདུན་བསྐྱེད་ཀྱི་ལྷ་ལ་དབང་བསྐུར་དུ་གསོལ༔ ཞེས་གསོལ་བ་བཏབ་པས༔ རིགས་ལྔས་དགོངས་པ་མཛད་པ་ཙམ་གྱིས་ཁྲོ་བོ་རྣམས་ཀྱིས་བར་ཆོད་ཀྱི་བགེགས་བསྐྲད༔ དབང་བསྐུར༔ ཁྲུས་གསོལ༔ དབུ་བརྒྱན༔ དེ་ནས་འོད་ཟེར་མར་འཕྲོས་པས༔ ཡྃ་ལ་ཕོག་པས་རླུང་གཡོས༔ མེ་སྦར༔ ཐོད་པ་དྲོས༔ རྫས་རྣམས་ཞུ༔ དམ་ཚིག་གི་བདུད་རྩི་གྲུ་གསུམ་ནས༔ དེ་ནས་ཟླ་གམ་གསུམ་ནས༔ དེ་ནས་ཐོད་པ་ཟླུམ་པོ་ནས༔ གྲུ་བཞི་ནས་རིན་པོ་ཆེའི་སྐྱོགས་བཞི་ནས་གང་༔ རྡོ་རྗེའི་བྱ་མཆུ་བཞི་ནས༔ རྒྱུན་གཏོར་ནས་རྒྱུན་ཆད་མེད་པར་བབ་པར་བསམས་ལ༔ གཙོ་བོ་ཐུགས་ཀ་ན་ཐོད་པ་དུམ་བུ་གཅིག་པ་ཡངས་ཤིང་རྒྱ་ཆེ་བ༔ དེའི་ནང་དུ་བདུད་རྩི་ལྔས་གང་བ༔ དེའི་སྟེང་ན་རང་གི་ས་བོན་དེ་ཡོད་པར་བསམ༔ ཧཱུྃ་དེ་ལས་ཧཱུྃ་གཅིག་མར་ཆད་པ་ལས་རང་གི་གསང་གནས་སུ་རྡོ་རྗེ་རྩེ་ལྔ་པ་གཅིག་མར་འཕྱང་༔ དེའི་ལྟེ་བ་ན་ཧཱུྃ་གི་མར་སྣེ་ལ་ཨོཾ་བསམས་ལ༔ ཡང་ཐུགས་ཀའི་ཧཱུྃ་དེ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་ནས༔ གཙོ་བོའི་ཚངས་བུག་ནས་མར་སོང་ནས་ཐུགས་ཀའི་བདུད་རྩི་དང་འདྲེས་ནས༔ ཐུགས་ཀའི་བདུད་རྩི་དང་ཡེ་ཤེས་ཀྱི་བདུད་རྩི་གཉིས་སུ་མེད་པར་ཡེ་ཤེས་ཀྱི་བདུད་རྩིར་གྱུར༔ དེ་ནས་གཙོ་བོའི་སྐུ་བརྒྱུད་རྩ་དབུ་མའི་ནང་དུ་མར་སོང་ནས༔ རྡོ་རྗེའི་རྭ་དབུ་མའི་ནང་ནས་རྟེན་གཏོར་ལ་བབས་པས༔ གྲུ་གསུམ་ནས་སྐྱོགས་བཞི་ནས་གང་༔ རྡོ་རྗེའི་བྱ་མཆུ་བཞི་ནས་རྒྱུན་གཏོར་ལ་བབ༔ དེ་ནས་གཙོ་བོ་ཡབ་ཡུམ་གྱིས་སྙོམས་འཇུག་མཛད་པས་སྦྱོར་མཚམས་ནས་བདུད་རྩི་བབ༔ ཟླ་དལ་རྡོ་རྗེ་ནས་འབྲུ་དང་བཅས་པའི་ནང་དུ་ལྷུང་བ༔ ལན་གསུམ་བསྐོར་ཏེ༔ ཨོཾ་ཨཱཿཧཱུྃ་ཞེས་བརྗོད་པས༔ འོད་དུ་ཞུ་བས་བདུད་རྩི་ཡར་འཕྱུར་བ་རྡོ་རྗེའི་བྱ་མཆུ་བཞི་ནས་རྒྱུན་གཏོར་ལ་བབས་པར་བསམས་ལ༔ ཨོཾ་ཨཱཿཧཱུྃ་ལན་གསུམ་བརྗོད་པས༔ ཡེ་ཤེས་ཀྱི་བདུད་རྩི་ན་བ་མེད་པ་འཆི་བ་མེད་པ༔ གཟུགས་སྒྲ་དྲི་རོ་རེག་བྱ་དང་ལྡན་པ༔ རིན་པོ་ཆེ་སྣ་བདུན་གྱི་ཚྭ་ཚྭའི་ཚུལ་དུ་འཕྲོས་ཤིང་༔ དགོས་འདོད་མ་ལུས་པའི་ཆར་བྱ་མཆུ་བཞི་ནས་འབབ་པར་བསམས་ལ༔ བླ་མ་ཡི་དམ་ལ་དང་པོ༔ དེ་ནས་ཆོས་སྐྱོང་༔ དེ་ནས་བཀའ་སྡོད་ཕོ་ཉ་ལས་མཁན༔ ཕྱོགས་སྐྱོང་༔ མཁའ་འགྲོ་སྤྱི་གཏོར་གྱིས་གཏང་༔ ཡང་རྒྱུན་གཏོར་བཤམ༔ གོང་ལྟར་དམ་ཚིག་རིལ་བུ་གཅིག་བཞག་ལ༔ ཆང་ཕུད་ཅིག་བྲན༔ རྒྱུན་གཏོར་ལ་ཡང་ཆང་ཕུད་བྲན༔ རྟེན་གཏོར་གྱི་ལྷའི་ཐུགས་ཀའི་ཧཱུྃ་ལས་ཨ་གཅིག་མར་ཆད་པས༔ བྷནྡྷའི་གཞལ་ཡས་ཁང་གི་ཁ་ཆོད་ཀྱི་ཚུལ་དུ་ཡོད་པར་བསམས་ལ༔ ཟླ་བའི་དཀྱིལ་འཁོར་ལ་ཡི་དམ་གྱི་ལྷ་ཚོགས་རྣམས་ཀྱིས་རང་རང་གི་འདོད་པའི་གཟུགས་མཛེས་སྒྲ་སྙན་དྲི་ཞིམ་རོ་མངར་བ་འདོད་རྒུ་ཐམས་ཅད་འཆར་བར་གཟིགས་ནས་ཡིད་མ་ཡེངས་པར་ཆགས་ཤིང་ཞེན་པས་བདག་ལ་མཆོག་ཐུན་མོང་གི་དངོས་གྲུབ་སྟེར་བར་བསམ༔ རང་གི་ས་བོན་ལས་འོད་ཟེར་འཕྲོས༔ དེ་ནས་ལྷ་ཚོགས་རྣམས་ཀྱི་ས་བོན་ལས་འོད་ཟེར་དཀར་པོ་དམར་པོ་སྔོན་པོ་གསུམ་ཡར་འཕྲོས༔ ཡང་གཙོ་བོའི་ཧཱུྃ་ལས་ཧཱུྃ་གཅིག་མར་ཆད་པ་ལས༔ རྡོ་རྗེ་རྩེ་ལྔ་པ་ཅིག་ཡར་བསླངས་ལ༔ དེའི་རྩེ་མོར་རྟ་མགྲིན་གཡས་ཐོ་བ་གཡོན་སྡིགས་མཛུབ་ཅན་གཅིག་ཡར་བཞེངས་ནས་རྟ་སྐད་ཕྱོགས་བཅུར་འཚེར་བས་གཏོར་མ་སྲུང་ཞིང་དགྲ་བགེགས་བསད་པར་བསམ༔ སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་འོད་ཟེར་གྱི་རྣམ་པར་བཀུག་ནས༔ གཙོ་བོ་ཡབ་ཡུམ་གྱི་སྐུ་གསུང་ཐུགས་ཀྱི་ས་བོན་གསུམ་ལ་ཕོག་པ་ཙམ་གྱིས་སྐུ་གསུང་ཐུགས་ཀྱི་བྱིན་རླབས་དང་འདྲེས༔ དེ་ནས་ཨོཾ་ལས་འོད་ཟེར་དཀར་པོ༔ ཨཱཿལས་དམར་པོ༔ ཧཱུྃ་ལས་སྔོན་པོ་གསུམ་འཕྲོས་པས་རང་གི་ས་བོན་གསུམ་ལ་ཕོག༔ སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསམ་ལ༔ སྙིང་པོ་བརྒྱ་རྩ་བརྒྱད་འདོན་པར་བྱ༔ ཡང་འོད་ཟེར་ཕར་འཕྲོས་པས་རིགས་དྲུག་ལྷར་བསྐྱེད༔ དེ་ནས་བཀྲོལ་བའི་དུས༔ ཕྱི་སྣོད་འོད་དུ་ཞུ༔ ནང་བཅུད་ལ་ཐིམ༔ སེམས་ཅན་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ༔ དེ་ཡང་འོད་དུ་ཞུ་ནས་འཁོར་ལ་ཐིམ༔ ཐམས་ཅད་ཞུ་ནས་གཙོ་བོ་ལ་ཐིམ༔ གཙོ་བོ་ཧཱུྃ་ལ་ཐིམ༔ ཧཱུྃ་འོད་དུ་ཞུ་ནས༔ རང་གི་སྙིང་ག་ནས་ལུས་ལ་ཐིམ༔ དེ་བཞིན་ལན་བདུན་བྱ༔ སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམས་ལ་བྱིན་རླབས་ཞུ་བ་ལན་བདུན་བྱེད༔ དེ་ནས་བཟོད་པར་གསོལ་བ་དང་གཤེགས་གསོལ་ཐང་གསུམ་བྱེད་པ་ཡིན༔ དེ་ནས་དཀྱིལ་འཁོར་བསྡུ་བ་ཡིན་ནོ༔ དཔལ་རྟ་མགྲིན་དྲེགས་པ་ཀུན་སྒྲོལ་གྱི་རྟེན་གཏོར་རྫོགས་སོ༔ མངྒ་ལཾ༔

[edit]

@#/__dpal rta mgrin dregs pa kun sgrol gyi rten gtor bzhugs so:__:na mo ha ya grI wA ya:__rten gtor gyi bcas la:__dang po rdzas bsags pa ni:__sman dang :__snying sna dang :__sha sna tshogs:__'bru sna tshogs:__rin po che sna bdun:__chang dang rak+ta gang 'byor bshams la gzhi bya:__dang po rtsam pa rin po che'i snod kyi nang du blugs la:__oM AHhU~M gsum bris la:__de nas rang nyid yi dam lha yi nga rgyal gyis lha bskyed la rtsam pa bsre:__de nas swa b+hA ba'i sngags kyis stong par sbyang :__stong pa'i ngang las b+h+rU~M las rin po che'i snod de'i nang du 'dod yon gyis gang bar bsam la:__de nas rang gi sa bon las 'od zer gcig 'phros pas:__rtsam pa'i steng gi oM la phog pas oM de nam mkha' la yar bkyag par bsam:__de nas rang gi sa bon las 'od 'phros pas oM de la phog:__oM de las 'od zer dkar po gcig yar 'phros pas:__sku yi lha tshogs la mchod yon ma sogs mchod pa'i lha mo dpag tu med pa spros pas mchod nas:__oM brgya rtsa brgyad brjod:__nam tshar nas yang rtsam pa'i oM de las 'od zer dkar po yar 'phros pas:__sku yi lha tshogs thams cad kyi thugs dam gyi rgyud bskul nas sku yi 'od zer dkar po dang byin rlabs kyi rnam par bkug nas:__oM brgya rtsa brgyad brjod:__rang gi mdun gyi nam mkha'i A+oM la thim:__oM de yang rtsam pa'i steng du bris zin de la thim pas rtsam pa dang oM 'od du zhu nas bdud rtsir gyur par bsam:__yang sa bon las 'od zer dmar po cig 'phros pas:__rtsam pa'i steng gi AHdmar po la phog pas yang nam mkha' la yar bkyag pas khru gang tsam gyi steng na yod par bsams la:__'od zer spro bsdu gong dang 'dra:__AHbrgya rtsa brgyad brjod nas snang ba mtha' yas la sogs gsung gi lha tshogs kyi thugs dam gyi rgyud bskul nas:__gsung gi lha tshogs thams cad kyi byin rlabs dang 'od zer thams cad mar bkug nas:__rtsam pa la bris zin gyi AHdmar po la thim pa tsam gyis AHdang rtsam pa yang 'od du zhu ba'i bdud rtsir gyur par bsam:__yang sa bon las 'od zer sngon po cig 'phros pas:__hUM de la phog pas hU~M de nam mkha' la yar bkyag nas:__hU~M brgya rtsa brgyad brjod:__'od zer spro bsdu gong dang 'dra:__yang thugs ka'i lha tshogs thams cad kyi 'od zer dang byin rlabs rnams bkug nas:__nam mkha'i hU~M la thim:__hU~M brgya rtsa brjod:__nam mkha'i hUM de rtsam pa la thim pa tsam gyis yang 'od du zhu nas bdud rtsir gyur par bsam:__yang A+oM AHhU~M gsum ka la phog pas 'od zer dkar po dmar po sngon po gsum 'phros pas sku gsung thugs kyi lha tshogs la phog pas:__thugs dam gyi rgyud bskul nas:__sku gsung thugs kyi lha tshogs thams cad kyi byin rlabs dang 'od zer rnams bkug nas:__oM AHhU~M gsum la thim pa tsam gyis yang 'od du zhu nas bdud rtsir gyur par bsams la:__oM AHhU~M brgya rtsa brjod cing :__dmigs pa de bzhin byed:__yi dam snying po brgya rtsa brgyad brjod pas bdud rtsir gyur par bsams la sngags phog bdun dang :__'bru gsum gang 'phrod pas rtsam pa byin gyis brlab:__de nas rak+ta dang :__chang gi nying khu dang :__sman dang :__'bru dang :__rin po che de rnams kyi sum cha de rtsam pa la bsre:__sum gnyis de thod pa'i nang du blugs la:__dar sna tshogs kyis bkab la mdun du bzhag:__srog shing sba dang smyug ma gang rung tshigs gsum pa:__de yi stod na bla ma yi dam gyi mtshan sngags rnams rin po ches bris la bzhag:__bar gyi tshigs la yi dam snying po:__smad na chos skyong gi sngags:__srog shing rkang la mar btags khru gang :__gtor ma rkang gang gi gzugs ni zhi rgyas dbang drag gang yang rung :__gtor ma'i gdan de la dbus su gru gsum:__zla gam:__zlum po:__de'i rgyab gru bzhi bya:__de nas gtor ma bslangs la:__yi dam lha'i nga rgyal gyis bgegs la srung 'khor bsgom:__de nas bdag bskyed gzhung ltar byas la:__de nas swA b+hA ba'i sngags kyis stong par bsams la:__stong pa'i ngang las ya~M las rlung gi dkyil 'khor:__ra~M las me'i dkyil 'khor:__keM las thod pa'i sgyed bu ri rab tsam gsum bsam:__de nas rang gi thugs ka'i hU~M las AHgcig phar chad pas:__snod la phog pas snod kyi nyes skyon dag nas:__a las byung ba'i b+han+d+ha'i gzhal yas khang dbus su gru gsum:__zla gam:__thod pa zlum po:__rgyab gru bzhi:__phyogs bzhi na rin po che'i skyogs bzhi rdo rje'i bya mchu bzhi dang ldan pa:__de'i dbus su a las zla ba'i steng na hU~M las byang chub sems kyis mtshan pa:__de'i steng du sha lnga bdud rtsi lnga:__de'i steng du ye shes lnga:__gtor ma gzhung dang mthun:__de nas rang gi hU~M las hU~M gcig phar chad pas:__gtor ma'i steng na pad+ma'i gdan la gzhugs par bsam:__de nas yang rang gi sa bon hU~M las oM gcig phar 'phros:__nang bcud la phogs pas mi gtsang ba dang nyes skyon thams cad dag:__dam tshig gi rdzas zhal zas 'dod yon tshogs kyis phyur gyis gang bar bsam:__de nas yang hU~M las 'od zer 'phros pas hU~M de la phog pas rdo rje dang :__khro chung dang :__me'i tshwa tshwa dpag tu med pa 'phros pas bgegs bskrad par bsam:__de nas yang rang gi hU~M las ma gcig phar 'phros pas:__gtor ma de'i steng na 'khyil ba las:__nyi ma'i dkyil 'khor ri rab bas rgya che ba gcig tu gyur par bsam:__rgyas pa ni rang nyid lha dran la sngags bzla:__de nas hU~M gcig phar spros pa:__rten gtor gyi steng na gnas pa las:__rim pa bzhin e chad bdag bskyed ltar srung ba'i gur:__de'i steng du b+h+rU~M las rin po che sna tshogs las grub pa'i gzhal yas khang :__gru bzhi sgo bzhi ra ba rim pa lnga dang ldan pa:__gzhal yas khang gi mtshan nyid yongs su rdzogs pa:__gur khang yang dran rdzogs:__de'i phyi rol du dur khrod brgyad:__de'i dbus su 'khor lo sngon po rtsibs bcu pa:__de'i dbus su 'khor lo ser po rtsibs brgyad pa'i lte bar zla gam dmar po:__gnam sgo gcig pa:__de'i dbus su klu 'bum gnyan khri sa bdag stong :__phyogs skyong ma hA de ba byi chings su bsnol ba'i khri:__de'i steng du pa~M las pad+ma:__ra~M las nyi ma:__a las zla ba:__de'i steng du hU~M dang hrI las 'od 'phros:__'phags pa mchod:__sems can gyi sdig sgrib sbyangs:__'od zer tshur 'dus hU~M la thim:__hU~M yongs su gyur pa las:__mdun bskyed kyi gtso bo pad+ma he ru ka:__sku mdog smug nag 'bar ba zhal gsum phyag drug:__zhabs bzhi dang ldan cing spyan gsum mche ba bzhi gtsigs pa:__dur khrod kyi chas thams cad kyis brgyan pa:__de'i pang du yum pad+ma gzi ldan ma:__dmar mo 'khor lo dang thod khrag gtso la stob pa:__spyi bo'i gtsug tu rta dbu gsum:__bya khyung gsum:__dpal chen po lha lnga:__'khor gyi gtso bo bzhi:__yum bzhi:__srung ba'i khro bo bcu:__zlog pa'i khro bo bcu:__sgo srung bzhi dang bcas pa:__de dag thams cad kyang rang rang gi rgyan cha lugs dang ldan cing :__ye shes kyi me 'bar ba'i dbus na bzhugs pa:__de dag thams cad kyi dpral bar oM:__mgrin par A:__snying gar hU~M:__de'i mdun du rgyud sde bzhi dang :__theg pa rim dgu'i lha tshogs:__g.yas su sangs rgyas:__rgyab tu chos:__g.yon du dge 'dun:__phyogs mtshams kyi cha la sangs rgyas dang byang chub sems dpa':__'og gi cha la chos skyong bka' sdod pho nya las mkhan:__de'i rgyab tu srung 'khor dran rdzogs:__de dag thams cad kyi gtsug tu rigs lnga dang bla ma:__de nas spyan drangs pa ni:__rang gi sa bon las 'od zer dmar po 'phros pas:__mdun bskyed kyi thugs dam gyi rgyud bskul bas:__'od zer 'phros pas snang ba mtha' yas kyi zhing khams nas pad+ma he ru ka'i lha tshogs la mnyes pa'i mchod pa phul:__de las 'od zer dmar po nyi ma'i zer lta bu tshur byung ba mdun bskyed lha tshogs kyi sa bon la zug:__de'i rgyud la thog rdugs med par skad cig gis byon par bsams la:__spyan 'dren gyi tshig bshad kyang byed:__de nas rigs lnga'i grangs la phyag dang mchod pa phul:__gnyis med du bstims la bzhugs su gsol:__de nas hU~M las sngags thang gsum 'khor ba'i 'od zer gyis rigs lnga spyan drangs la phyag dang mchod pa phul:__de nas mdun bskyed kyi lha la dbang bskur du gsol:__zhes gsol ba btab pas:__rigs lngas dgongs pa mdzad pa tsam gyis khro bo rnams kyis bar chod kyi bgegs bskrad:__dbang bskur:__khrus gsol:__dbu brgyan:__de nas 'od zer mar 'phros pas:__ya~M la phog pas rlung g.yos:__me sbar:__thod pa dros:__rdzas rnams zhu:__dam tshig gi bdud rtsi gru gsum nas:__de nas zla gam gsum nas:__de nas thod pa zlum po nas:__gru bzhi nas rin po che'i skyogs bzhi nas gang :__rdo rje'i bya mchu bzhi nas:__rgyun gtor nas rgyun chad med par bab par bsams la:__gtso bo thugs ka na thod pa dum bu gcig pa yangs shing rgya che ba:__de'i nang du bdud rtsi lngas gang ba:__de'i steng na rang gi sa bon de yod par bsam:__hU~M de las hU~M gcig mar chad pa las rang gi gsang gnas su rdo rje rtse lnga pa gcig mar 'phyang :__de'i lte ba na hU~M gi mar sne la oM bsams la:__yang thugs ka'i hU~M de las 'od zer phyogs bcur 'phros pas sangs rgyas dang byang chub sems dpa' thams cad kyi thugs ka nas ye shes kyi bdud rtsi bkug nas:__gtso bo'i tshangs bug nas mar song nas thugs ka'i bdud rtsi dang 'dres nas:__thugs ka'i bdud rtsi dang ye shes kyi bdud rtsi gnyis su med par ye shes kyi bdud rtsir gyur:__de nas gtso bo'i sku brgyud rtsa dbu ma'i nang du mar song nas:__rdo rje'i rwa dbu ma'i nang nas rten gtor la babs pas:__gru gsum nas skyogs bzhi nas gang :__rdo rje'i bya mchu bzhi nas rgyun gtor la bab:__de nas gtso bo yab yum gyis snyoms 'jug mdzad pas sbyor mtshams nas bdud rtsi bab:__zla dal rdo rje nas 'bru dang bcas pa'i nang du lhung ba:__lan gsum bskor te:__oM AHhU~M zhes brjod pas:__'od du zhu bas bdud rtsi yar 'phyur ba rdo rje'i bya mchu bzhi nas rgyun gtor la babs par bsams la:__oM AHhU~M lan gsum brjod pas:__ye shes kyi bdud rtsi na ba med pa 'chi ba med pa:__gzugs sgra dri ro reg bya dang ldan pa:__rin po che sna bdun gyi tshwa tshwa'i tshul du 'phros shing :__dgos 'dod ma lus pa'i char bya mchu bzhi nas 'bab par bsams la:__bla ma yi dam la dang po:__de nas chos skyong :__de nas bka' sdod pho nya las mkhan:__phyogs skyong :__mkha' 'gro spyi gtor gyis gtang :__yang rgyun gtor bsham:__gong ltar dam tshig ril bu gcig bzhag la:__chang phud cig bran:__rgyun gtor la yang chang phud bran:__rten gtor gyi lha'i thugs ka'i hU~M las a gcig mar chad pas:__b+han+d+ha'i gzhal yas khang gi kha chod kyi tshul du yod par bsams la:__zla ba'i dkyil 'khor la yi dam gyi lha tshogs rnams kyis rang rang gi 'dod pa'i gzugs mdzes sgra snyan dri zhim ro mngar ba 'dod rgu thams cad 'char bar gzigs nas yid ma yengs par chags shing zhen pas bdag la mchog thun mong gi dngos grub ster bar bsam:__rang gi sa bon las 'od zer 'phros:__de nas lha tshogs rnams kyi sa bon las 'od zer dkar po dmar po sngon po gsum yar 'phros:__yang gtso bo'i hU~M las hU~M gcig mar chad pa las:__rdo rje rtse lnga pa cig yar bslangs la:__de'i rtse mor rta mgrin g.yas tho ba g.yon sdigs mdzub can gcig yar bzhengs nas rta skad phyogs bcur 'tsher bas gtor ma srung zhing dgra bgegs bsad par bsam:__sangs rgyas dang byang chub sems dpa' thams cad kyi sku gsung thugs kyi byin rlabs 'od zer gyi rnam par bkug nas:__gtso bo yab yum gyi sku gsung thugs kyi sa bon gsum la phog pa tsam gyis sku gsung thugs kyi byin rlabs dang 'dres:__de nas oM las 'od zer dkar po:__AHlas dmar po:__hU~M las sngon po gsum 'phros pas rang gi sa bon gsum la phog:__sku gsung thugs kyi dngos grub thams cad thob par bsam la:__snying po brgya rtsa brgyad 'don par bya:__yang 'od zer phar 'phros pas rigs drug lhar bskyed:__de nas bkrol ba'i dus:__phyi snod 'od du zhu:__nang bcud la thim:__sems can thams cad 'od du zhu nas gzhal yas khang la thim:__de yang 'od du zhu nas 'khor la thim:__thams cad zhu nas gtso bo la thim:__gtso bo hU~M la thim:__hU~M 'od du zhu nas:__rang gi snying ga nas lus la thim:__de bzhin lan bdun bya:__sku gsung thugs kyi dngos grub thob par bsams la byin rlabs zhu ba lan bdun byed:__de nas bzod par gsol ba dang gshegs gsol thang gsum byed pa yin:__de nas dkyil 'khor bsdu ba yin no:__dpal rta mgrin dregs pa kun sgrol gyi rten gtor rdzogs so:__mang+ga laM: