JKW-KABAB-05-CA-017

From Khyentse Lineage - A Tsadra Foundation Project

‎‎

དཔལ་བཀའ་འདུས་ལས་སྙིང་པོའི་ཉམས་ལེན་རྒྱུན་གྱི་རྣལ་འབྱོར།
Wylie title dpal bka' 'dus las snying po'i nyams len rgyun gyi rnal 'byor JKW-KABAB-05-CA-017.pdf
Location mkhyen brtse'i bka' babs
Volume 5, Text 17, Pages 255-264 (Folios 1a to 5b2)
Author འཇམ་མགོན་ཀོང་སྤྲུལ་
Less details More details
Tertön ཨོ་རྒྱན་གླིང་པ་, འཇམ་དབྱངས་མཁྱེན་བརྩེའི་དབང་པོ་ (o rgyan gling pa, 'jam dbyangs mkhyen brtse'i dbang po)
Citation 'jam mgon kong sprul. dpal bka' 'dus las snying po'i nyams len rgyun gyi rnal 'byor. In Rdzong sar 'jam dbyangs mkhyen brtse'i dbang po'i bka' babs, Vol. 5: 255-264. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Daily Practice - rgyun khyer  ·  Revelations - gter ma
Cycle དཔལ་བཀའ་འདུས་ཆོས་ཀྱི་རྒྱ་མཚོ་ (dpal bka' 'dus chos kyi rgya mtsho)
Karchag page JKW-KABAB-Volume-05-CA-Karchag
RTZ In the Rinchen Terdzö: https://rtz.tsadra.org/index.php/Terdzo-BA-023
Colophon

།ཅེས་རང་གཞན་ལ་ཕན་པར་འདོད་པའི་ཡིད་ཀྱིས། ཁྱབ་བདག་བླ་མ་རིག་འཛིན་ཡོངས་ཀྱི་སྤྱི་རྗེ་ལ་གསོལ་བ་བཏབ་ཅིང་བཀའ་ལུང་ལེགས་པར་ཞུས་ཏེ། འཆི་མེད་བསྟན་གཉིས་གླིང་པས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བགྱིས་པ་དགེ་ལེགས་འཕེལ།།

ces rang gzhan la phan par 'dod pa'i yid kyis/__khyab bdag bla ma rig 'dzin yongs kyi spyi rje la gsol ba btab cing bka' lung legs par zhus te/__'chi med bstan gnyis gling pas rdzong gsar bkra shis lha rtse'i chos grwar bgyis pa dge legs 'phel

[edit]
༄༅། །དཔལ་བཀའ་འདུས་ལས་སྙིང་པོའི་ཉམས་ལེན་རྒྱུན་གྱི་རྣལ་འབྱོར་བཞུགས་སོ།། ན་མོ་གུ་རུ་བེ། སྲིད་ཞིའི་ཁྱབ་བདག་བདེ་བ་ཆེ། །འགྲོ་ངོར་རིག་འཛིན་བླ་མའི་སྐུར། །བསྟན་གང་ཚངས་པའི་ཡུལ་ས་རུ། །བཀོད་ནས་སྙིང་པོའི་རྣལ་འབྱོར་འཆད། ཡིད་བཞིན་གྱི་ནོར་བུ་ལྟར་དགོས་རྒུ་ལྷུན་གྱིས་གྲུབ་ཅིང་ཨུ་དུམྦ་ར་ལྟར་དཀོན་ལ་ངོ་མཚར་ཆེ་བའི་གསང་བ་ཟབ་མོ་དཔལ་བཀའ་འདུས་ཆོས་ཀྱི་རྒྱ་མཚོའི་སྙིང་པོའི་དོན་གྱི་རྣལ་འབྱོར་རྒྱུན་ཁྱེར་སྟན་ཐོག་གཅིག་ཏུ་ཉམས་སུ་བླང་བ་ལ་གསུམ། སྔོན་འགྲོ་དངོས་གཞི། རྗེས་ཀྱི་བྱ་བའོ། །དང་པོ་ལ་བཞི། ལྷ་མིའི་ཐེག་པས་བློ་ཆོས་ལ་བསྐུལ་བ། ཉན་རང་གི་ཐེག་པས་ངེས་འབྱུང་གི་བསམ་པ་སྒྲུབ་པ། ཐེག་པ་ཆེན་པོའི་ལམ་གྱིས་གཞི་བཟུང་བ། ཀྲི་ཡོག་གི་ཐེག་པས་བསང་སྦྱང་བྱ་བའོ། །དང་པོ་ནི། དབེན་པའི་གནས་སུ་ལུས་གནད་བསྲང༌། རླུང་རོ་བསལ་ལ། བདག་གིས་དལ་འབྱོར་གྱི་མི་ལུས་རྙེད་དཀའ་ལ་ཕན་འདོགས་ཆེ་བ་ཐོབ། བླ་མ་མཚན་ལྡན་ལས་གསང་སྔགས་ཟབ་མོ་ཐོབ་ཀྱང་ལེ་ལོས་གཡེངས་ན། འདུས་བྱས་ཐམས་ཅད་མི་རྟག་ཅིང་རང་ཡང་མྱུར་དུ་འཆི་ངེས། འཆི་བའི་ཚེ་དགེ་སྡིག་ལས་ཀྱི་རྣམ་སྨིན་ཁོ་ནའི་རྗེས་སུ་འབྲང༌། སྡིག་པས་ངན་འགྲོར་སྐྱེས་ཏེ་སྡུག་བསྔལ་མི་བཟད་པ་ཉམས་སུ་མྱོང་བ་ཇི་ལྟར་བྱ། དེ་ལས་སྐྱོབས་ནུས་པ་བླ་མ་དང་དཀོན་མཆོག་རིན་པོ་ཆེའི་ཡོན་ཏན་རྗེས་སུ་དྲན་ཏེ་སྙིང་ཐག་པ་ནས་གུས་པ་ཆེན་པོས་སྐྱབས་སུ་མཆིའོ་སྙམ་པའི་སྒོམ་དོན་ཡིད་ལ་བཀོད་ནས་སྐྱབས་འགྲོ་ནི། ན་མོ༔ བྱིན་རླབས་རྩ་བ་བླ་མ་དང་༔ བསླུ་མེད་དཀོན་མཆོག་རྣམ་པ་གསུམ༔ མཁའ་འགྲོ་ཆོས་སྐྱོང་ཚོགས་བཅས་ལ༔ སྙིང་ནས་གུས་པས་སྐྱབས་སུུ་མཆི༔ ཞེས་ལན་མང་དུ་བརྗོད་དོ། །གཉིས་པ་ནི། འཁོར་བའི་གནས་རིས་མཐོ་དམན་ཐམས་ཅད་སྡུག་བསྔལ་གསུམ་གྱི་རང་བཞིན་མེ་འོབས་དང་མཚུངས། སྡུག་བསྔལ་གྱི་རྒྱུ་ཀུན་འབྱུང་ཡིན་པས་དེའི་གཉེན་པོར་ལམ་རྒྱུད་ལ་བརྟེན་ཏེ་ཐར་པ་མངོན་དུ་བྱའོ་སྙམ་པས་ཚུལ་ཁྲིམས་ལེགས་པར་བསྲུང་ཞིང་ཞི་ལྷག་དང་རྟེན་འབྲེལ་བསྒོམ་པའོ། །གསུམ་པ་ནི། འགྲོ་བ་མཐའ་དག་ཕ་མར་ཤེས་པས་བདེ་བ་དང་འཕྲད་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ་བསྐྱེད། ཐམས་ཅད་ཕན་བདེ་བླ་ན་མེད་པ་ལ་འགོད་པར་བགྱི། དེའི་ཆེད་དུ་རྒྱལ་བ་སྲས་དང་བཅས་པའི་སྤྱོད་ཡུལ་རླབས་པོ་ཆེ་ལ་བསླབ་པར་བགྱིའོ་སྙམ་པས་སྨོན་འཇུག་གི་སེམས་བསྐྱེད་ལ། མ་གྱུར་རིགས་དྲུག་སེམས་ཅན་ལ༔ བྱམས་དང་སྙིང་རྗེས་ཀུན་བསླངས་ཏེ༔ སངས་རྒྱས་གོ་འཕང་ཐོབ་བྱའི་ཕྱིར༔ རྒྱལ་སྲས་སྤྱོད་ལ་བསླབ་པར་བགྱི༔ ཞེས་བརྗོད་ཅིང་བློ་སྦྱོང་ངོ༌། །བཞི་པ་ནི། སྣོད་དག་པའི་ཞིང་ཁམས༔ གནས་ཁང་རིན་པོ་ཆེའི་གཞལ་མེད་ཁང་༔ ཡོ་བྱད་བྱང་ཆུབ་སེམས་དཔའི་མཆོད་སྤྲིན་དུ་དམིགས༔ མདུན་གྱི་ནམ་མཁར་བླ་མ་ཡི་དམ་དཀོན་མཆོག་རྒྱ་མཚོ་མངོན་སུམ་བཞིན་དུ་བཞུགས་པ་ལ་བདག་གཞན་སེམས་ཅན་སྒོ་གསུམ་འཇུག་པ་གཅིག་པས་བསགས་སྦྱོང་གི་ལས་བྱ་བར་མོས་ལ། ན་མོ༔ བདག་དང་མཁའ་མཉམ་སེམས་ཅན་ཀུན༔ ཞིང་རྡུལ་སྙེད་ཀྱི་ལུས་སྤྲུལ་ཏེ༔ སྐྱབས་གནས་དཀོན་མཆོག་ཐམས་ཅད་ལ༔ སྒོ་གསུམ་གུས་པས་ཕྱག་འཚལ་ལོ༔ མཆོད་སྤྲིན་རྒྱ་མཚོས་རྟག་ཏུ་མཆོད༔ སྡིག་ལྟུང་འགྱོད་པས་སྙིང་ནས་བཤགས༔ བྱང་ཆུབ་སྤྱོད་ལ་རྗེས་ཡི་རང་༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་སུ་གསོལ༔ དགེ་ཚོགས་བྱང་ཆུབ་ཆེན་པོར་བསྔོ༔ གཞན་དོན་སངས་རྒྱས་མྱུར་འགྲུབ་ཤོག༔ ཅེས་ཡན་ལག་བདུན་པ་སྤྱིར་འབུལ༔ བྱེ་བྲག་ཏུ༔ རང་གཞན་གྱི་ལུས་ལོངས་སྤྱོད་དགེ་རྩ་དང་བཅས་པ་མཎྜལ་དུ་ཕུལ་ལ། ཨོཾ་ཨཱཿཧཱུྃཿ བདག་གཞན་ལུས་དང་ལོངས་སྤྱོད་དགེ་རྩར་བཅས༔ བཀོད་པ་རབ་རྫོགས་ཞིང་ཁམས་འབྱོར་པའི་སྤྲིན༔ ནམ་མཁའ་གང་བར་དམིགས་ཏེ་ཕུལ་བ་ཡིས༔ འགྲོ་ཀུན་རྡོ་རྗེའི་ཞིང་ལ་སྤྱོད་པར་ཤོག༔ ཨོཾ་སརྦ་ཏ་ཐཱ་ག་ཏེ་བྷྱོ་མཎྜལ་པཱུ་ཛ་ཧོཿ ལན་གྲངས་ཕུལ་ལ༔ མཐར་ཚོགས་ཞིང་རང་ལ་ཐིམ༔ སྒྲིབ་སྦྱོང་རྡོར་སེམས་སྒོམ་བཟླས་ནི། རང་གི་སྤྱི་བོར་བླ་མ་རྡོ་རྗེ་སེམས༔ དཀར་གསལ་ཞལ་གཅིག་ཕྱག་གཉིས་ཞི་ཞིང་འཛུམ༔ རྡོ་རྗེ་དྲིལ་འཛིན་དར་དང་རིན་ཆེན་བརྒྱན༔ པད་ཟླའི་གདན་ལ་སེམས་དཔའི་སྐྱིལ་ཀྲུང་བཞུགས༔ ཐུགས་ཀར་ཟླ་སྟེང་ཧཱུྃ་ཡིག་དཀར་པོས་མཚན༔ སྡིག་ལྟུང་ལ་འགྱོད་སྐྱབས་གསོལ་སྔགས་བཟླས་པས༔ ཧཱུྃ་ལས་བྱུང་བའི་ཡེ་ཤེས་བདུད་རྩིའི་རྒྱུན༔ ཞབས་ཀྱི་མཐེ་བོང་ལས་བརྒྱུད་རང་ལ་ཐིམ༔ ནད་གདོན་སྡིག་སྒྲིབ་བག་ཆགས་བཅས་པ་སྦྱངས༔ སྐུ་གསུང་ཐུགས་ཀྱི་བྱིན་གྱིས་བརླབ་པར་གྱུར༔ ཅེས་མོས་ལ་ཡིག་བརྒྱ་ཅི་ནུས་བཟླ། མཐར། རྡོར་སེམས་འོད་དུ་ཞུ་ནས་རང་ལ་ཐིམ་པས་རང་རྡོ་རྗེ་སེམས་དཔར་གསལ་ལ། ཨོཾ་བཛྲ་སཏྭ་ཧཱུྃ༔ ཞེས་བཟླས་ཏེ་ཐོག་མཐའ་མེད་པའི་བྱང་ཆུབ་ཀྱི་སེམས་རྡོ་རྗེའི་ངང་དུ་མཉམ་པར་བཞག་གོ །གཉིས་པ་དངོས་གཞི་ལ་བཞི། བླ་མའི་བྱིན་རླབས་ལམ་དུ་བྱ་བ། མ་ཧཱ་ཡོ་གའི་བསྐྱེད་བཟླས་བྱ་བ། ཨ་ནུ་ཡོ་གའི་རྫོགས་རིམ་བསྒོམ་པ། ཨ་ཏི་ཡོ་གའི་དགོངས་པར་ལ་བཟླ་བའོ། །དང་པོ་ལ། གསོལ་བ་འདེབས་པའི་རྟེན་གསལ་གདབ་པ་ནི། ཨོཾ་ཨཱཿཧཱུྃ༔ དབྱིངས་ནི་རྣམ་པར་དག་པ་ཆོས་ཀྱི་སྐུ༔ རིག་པ་ཡེ་ཤེས་འོད་ལྔ་ལོངས་སྤྱོད་རྫོགས༔ ཐུགས་རྗེས་འགྲོ་བའི་དོན་མཛད་སྤྲུལ་པའི་རྩལ༔ སྐུ་གསུམ་དབྱེར་མེད་བླ་མ་ཀུན་ཏུ་འཆང་༔ ནམ་མཁའི་མདོག་ཅན་རྡོ་རྗེ་དྲིལ་བུ་འཛིན༔ རང་འོད་ཡུམ་འཁྱུད་དར་དང་རིན་ཆེན་བརྒྱན༔ སེང་ཁྲི་པདྨ་ཉི་ཟླའི་གདན་སྟེང་དུ༔ ཡེ་ཤེས་འོད་ཟེར་འཕྲོ་བའི་ཀློང་ན་རོལ༔ བརྒྱུད་གསུམ་རིག་འཛིན་བླ་མ་སྤྲིན་ལྟར་གཏིབས༔ ཡི་དམ་ཞི་ཁྲོ་རབ་འབྱམས་འཇའ་ལྟར་ཤར༔ མཁའ་འགྲོ་ཆོས་སྐྱོང་སྲུང་མ་ཟེར་ལྟར་འཕྲོ༔ མདུན་གྱི་ནམ་མཁར་དགྱེས་བཞིན་བཞུགས་པར་གྱུར༔ ཅེས་མོས་ལ་ནུས་ན་བཀའ་འདུས་བརྒྱུད་པའི་གསོལ་འདེབས་འབྲིང་པོ་བྱ། མི་ལྕོག་ན་བྱང་གཏེར་བླ་མ་སྐུ་གསུམ་མའི་གསོལ་འདེབས་དང༌། ས་ཧོར་རཏྣ་པཱུ་རའི་གྲོང་ཁྱེར་དུ༔ སློབ་དཔོན་པདྨ་འབྱུང་གནས་མནྡྷ་རས༔ དཔལ་ཆེན་བཀའ་འདུས་ཡོངས་རྫོགས་དཀྱིལ་འཁོར་བསྒྲུབས༔ གྲུབ་རྟགས་སངས་རྒྱས་ཀུན་དང་གཉིས་སུ་མེད༔ དམ་པ་ཁྱེད་ཀྱི་རྗེས་སུ་བདག་སྒྲུབ་ཕྱིར༔ གསོལ་བ་འདེབས་སོ་འཆི་མེད་པདྨ་འབྱུང་༔ བྱིན་གྱིས་རློབས་ཤིག་ཨོ་རྒྱན་རིན་པོ་ཆེ༔ སྨིན་གྲོལ་དབང་བསྐུར་མཆོག་ཐུན་དངོས་གྲུབ་སྩོལ༔ ཞེས་མོས་གུས་ཀྱི་ཤུགས་བསྐྱེད་ལ་གསོལ་བ་གདབ་པས༔ བླ་མའི་གནས་གསུམ་ནས་འོད་ཟེར་དཀར་དམར་མཐིང་གསུམ་རིམ་དང་གཅིག་ཅར་དུ་སྤྲོས། རང་གི་གནས་གསུམ་དུ་རིམ་དང་གཅིག་ཆར་དུ་ཞུགས་ཤིང་ཐིམ་པས་དབང་དང་དངོས་གྲུབ་མ་ལུས་པ་ཐོབ་པར་བསམས་ལ། ཨོཾ་ཨཱཿཧཱུྃ་གི་བཟླས་པ་ཅི་ནུས་བྱ། མཐར་འཁོར་རྣམས་བླ་མ་ཡབ་ཡུམ་ལ་ཐིམ། དེ་ཉིད་རང་རིག་པ་སྐྱེ་མེད་ཀྱི་ངང་དུ་ཐིམ་པར་བསམས་ལ་དགོངས་པ་བསྐྱང་ངོ༌། །གཉིས་པ་ནི། ཧཱུྃ༔ དེ་བཞིན་ཉིད་དབྱིངས་བློ་འདས་འོད་གསལ་ངང་༔ དམིགས་མེད་སྙིང་རྗེ་ཀུན་སྣང་མཁའ་ལྟར་ཁྱབ༔ རྒྱུ་ཡི་རིག་པ་རང་བྱུང་ཧཱུྃ་མཐིང་ག༔ འོད་ཀྱིས་སྣོད་བཅུད་ཐམས་ཅད་སྟོང་པར་སྦྱངས༔ སྟོང་པའི་ངང་ལས་འབྱུང་རིམ་རི་རབ་སྟེང་༔ རིན་ཆེན་དུར་ཁྲོད་གཞལ་མེད་ཁང་ཆེན་པོ༔ རྡོ་རྗེའི་སྲུང་འཁོར་གསལ་བསྟན་འབར་བའི་དབུས༔ པད་ཟླ་ཉི་མ་དྲེགས་པ་ཁྱོ་ཤུགས་གདན༔ དེ་སྟེང་དབྱིངས་ནས་རྒྱུ་ཡི་ཡི་གེ་བབས༔ རྡོ་རྗེ་ཧཱུྃ་ཡིག་མཉམ་སྦྱོར་འཕྲོ་འདུ་ལས༔ སྤྱི་དཔལ་ཆེན་པོ་ཁྲག་འཐུང་རྩ་བའི་ལྷ༔ སྐུ་མདོག་མཐིང་ནག་ཞལ་གཅིག་ཕྱག་གཉིས་པ༔ གར་དགུའི་གཟི་འབར་རྡོ་རྗེ་དྲིལ་བུ་བསྣམས༔ དཔལ་དང་དུར་ཁྲོད་རུས་པའི་རྒྱན་གྱིས་སྤྲས༔ སྦྱོར་ཡུམ་དམར་མོ་གྲི་ཐོད་འཛིན་པས་འཁྱུད༔ ཞབས་གཉིས་འདོར་ཐབས་ཡེ་ཤེས་མེ་དཔུང་ཀློང་༔ ཕུང་ཁམས་སྐྱེ་མཆེད་བ་སྤུའི་བུ་ག་ཚུན༔ ཞི་ཁྲོ་ཡོངས་རྫོགས་འདུས་པའི་ངོ་བོ་ཉིད༔ སྲིད་ཞི་ཀུན་གྱི་དབང་ཕྱུག་ཆེན་པོར་བཞུགས༔ སྤྱི་བོར་རིགས་ཀུན་ཁྱབ་བདག་ཀུན་ཏུ་འཆང་༔ ནམ་མཁའི་མདོག་ཅན་ཞི་འཛུམ་རྡོར་དྲིལ་བསྣམས༔ དར་དང་རིན་ཆེན་རྒྱན་མཛེས་ཡུམ་དང་འཁྲིལ༔ པད་ཟླའི་གདན་ལ་རྡོ་རྗེའི་སྐྱིལ་ཀྲུང་རོལ༔ དེ་ལྟར་གསལ་བའི་ལྷར་སྣང་སྒྱུ་མའི་སྐུ༔ སྣང་སྟོང་དབྱེར་མེད་ཆུ་ཟླ་འཇའ་ཚོན་ལྟར༔ འོད་ཀྱི་ལུས་ལ་ཡེ་ཤེས་སྙིང་པོའི་སྲོག༔ ལྔ་ལྡན་ཐིག་ལེ་འོད་ཟེར་ཀུན་ཏུ་འཕྲོ༔ རང་བྱུང་དབང་བསྐུར་རིགས་ལྔའི་ཅོད་པན་རྫོགས༔ རྡོ་རྗེ་གསུམ་མཆོག་དབྱེར་མེད་ལྷུན་གྱིས་གྲུབ༔ ཨོཾ་ཧཱུྃ་ཏྲཱྃ་ཧྲཱིཿཨཱཿ ཨོཾ་ཨཱཿཧཱུྃ༔ ཞེས་བརྗོད་པས་ཚིག་གི་སྒྲོས་གསལ་བཏབ་ནས་ལྷ་སྐུའི་གསལ་སྣང་དང༌། སྤྱི་དཔལ་ཆེན་པོ་དངོས་སུ་བལྟ་བའི་ང་རྒྱལ་བསྐྱེད། སངས་རྒྱས་ཀྱི་ཡེ་ཤེས་རིས་མེད་པའི་གདུལ་བྱའི་སྣང་ངོར་གང་འདུལ་གཟུགས་སུ་ཤར་བའི་དག་དྲན་ལ་བསླབ་ཅིང་སེམས་འཛིན། དེ་ལ་མི་གནས་ན་བཟླས་པ་བྱ་བ་ནི། ཧཱུྃ༔ བདག་ཉིད་སྤྱི་དཔལ་ཆེན་པོའི་ཐུགས་ཀ་རུ༔ ཉི་ཟླའི་གདན་ལ་ཡེ་ཤེས་སེམས་དཔའ་འགྱིང་༔ རིན་ཆེན་ཟུར་བརྒྱད་རྒྱ་གྲམ་ལྟེ་བར་ཧཱུྃ༔ རྡོ་རྗེའི་སྔགས་ཀྱིས་བསྐོར་བའི་གསལ་སྣང་ལས༔ འོད་ཟེར་ཡར་འཕྲོས་རྩ་གསུམ་རྒྱལ་བ་མཆོད༔ མར་འཕྲོས་འགྲོ་དྲུག་ལུས་ངག་ཡིད་སྒྲིབ་སྦྱངས༔ བར་དུ་སྣང་སྲིད་ཁྱབ་པའི་ཕྲིན་ལས་བསྒྲུབས༔ ཚུར་འདུས་བདག་ཐིམ་དངོས་གྲུབ་རྣམ་གཉིས་ཐོབ༔ ཅེས་པའི་དམིགས་པ་རྩེ་གཅིག་ཏུ་བྱས་ལ། ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་ཞི་ཁྲོ་ཡོངས་རྫོགས་འདུས་པའི་སྙིང་པོ་ཉིད་བཟླ། ལས་རུང་ཙམ་གྱི་བསྙེན་ཚད་ནི་འབུམ་ཕྲག་བཞིའོ། །གསུམ་པ་ནི། རྩ་རླུང་ཐིག་ལེའི་རྣལ་འབྱོར་གྱི་རང་བྱིན་གྱིས་བརླབ་པ་དང༌། ལྷན་སྐྱེས་གསུམ་ཀྱི་ཡེ་ཤེས་གཞན་ལུས་ཕོ་ཉའི་ལམ་ལས་མཐར་བསྐྱེལ་བའོ། །བཞི་པ་ནི། སྒོ་གསུམ་གྱི་སྔོན་འགྲོ་རྣལ་དུ་ཕབ་ནས་སོ་སོ་རང་རིག་པའི་ཡེ་ཤེས་ཀྱི་སོར་གཞུག །སྣང་རིག་ཟུང་འཇུག་ཞི་ལྷག་དབྱེར་མེད་གང་ཤར་སྐུ་གསུམ་གྱི་རོལ་པར་ཤེས་པས། ལྟ་སྒོམ་སྤྱོད་འབྲས་རང་བྱུང་ཡེ་གྲོལ་ཀ་དག་ཆེན་པོར་ལ་བཟླ་བ་སྟེ། དེ་དག་གི་ཉམས་ལེན་རྒྱས་པ་རྩ་བའི་གཞུང་ལས་འབྱུང་བ་ལྟར་རོ། །གསུམ་པ་རྗེས་ཀྱི་རིམ་པ་ལ་བཞི། འོད་གསལ་དུ་བསྡུ་བ། ཟུང་འཇུག་གི་སྐུར་ལྡང་བ། དགེ་རྩ་བསྔོ་བ། ཤིས་པ་བརྗོད་པས་མཚམས་སྦྱར་ཏེ་སྤྱོད་ལམ་ལ་འཇུག་པའོ། །དང་པོ་ནི། ཧཱུྃ༔ སརྦ་མཎྜ་ལ་ཧཱུྃ༔ སྣོད་བཅུད་གཞལ་ཡས་ཁང་དང་ལྷ་ལ་ཐིམ༔ ལྷ་སྣང་ཐམས་ཅད་དཔལ་གྱི་སྐུ་ལ་འདུས༔ སྤྱི་དཔལ་ཡབ་ཡུམ་མཁའ་ལ་སྤྲིན་དེངས་ལྟར༔ དམིགས་བསམ་བརྗོད་པ་བྲལ་བའི་ངང་ལ་ཐིམ༔ ཅེས་མཉམ་པར་བཞག །གཉིས་པ་ནི། སླར་ཡང་འགགས་མེད་རིག་རྩལ་དཔལ་ཆེན་པོའི༔ སྐུ་གསུང་ཐུགས་ཀྱི་རྡོ་རྗེའི་རང་བཞིན་གྱུར༔ མ་ཧཱ་ཤྲཱི་ཧེ་རུ་ཀ་ཨདྨ་ཀོ྅ཧཾ༔ ཞེས་ང་རྒྱལ་བཟུང༌། གསུམ་པ་ནི། དགེ་བ་འདི་ཡིས་མཐའ་ཡས་སེམས་ཅན་རྣམས༔ ཕྱི་ནང་བདུད་བཞིའི་གཡུལ་ལས་རྣམ་པར་རྒྱལ༔ བསྐྱེད་རྫོགས་ལམ་གྱི་རིམ་པ་མཐར་ཕྱིན་ནས༔ སྤྱི་དཔལ་ཆེན་པོའི་གོ་འཕང་མྱུར་ཐོབ་ཤོག༔ བཞི་པ་ནི། བདེ་གཤེགས་ཞི་བ་རྡོ་རྗེ་དབྱིངས་ཀྱི་ངང་༔ ཁྲག་འཐུང་དཔལ་ཆེན་རིག་པའི་ཚོམ་བུ་འཇལ༔ ཟུང་འཇུག་སྒྱུ་འཕྲུལ་དྲྭ་བའི་སྤྲིན་ཕུང་འཕྲོ༔ དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག༔ ཅེས་ཤིས་པ་བརྗོད་ལ་སྤྱོད་ལམ་ཐམས་ཅད་སྤྱི་དཔལ་ཆེན་པོའི་ཡེ་ཤེས་ཀྱི་རོལ་པ་ལམ་དུ་ཁྱེར་བར་བྱའོ། །དེ་ནི་བསྐྱེད་རྫོགས་རྒྱུན་གྱི་རྣལ་འབྱོར་ཡོངས་རྫོགས་སྟན་ཐོག་གཅིག་ཏུ་ཉམས་སུ་བླང་བའི་ཚུལ་ཡིན་ལ། བསྐྱེད་བཟླས་རྒྱུན་ཆགས་མེད་དུ་བྱེད་ན། སྔོན་འགྲོ་གོང་གི་སྐྱབས་སེམས་ཤློ་ཀ་གཉིས་ཀྱི་འཕྲོས་སུ། དངོས་གཞི་བསྐྱེད་བཟླས་དང༌། མཇུག་བསྡུ་ལྡང་ཕྱིན་ཆད་བྱས་པས་དོན་གྲུབ་བོ། །བཀའ་འདུས་ཆོས་ཀྱི་རྒྱ་མཚོ་ཡི། །བླ་མ་ལྷ་དང་དབྱེར་མེད་པར། །བདག་གཞན་འགྲོ་ཀུན་བྱང་ཆུབ་སྟེ། །དོན་གཉིས་ལྷུན་གྱིས་འགྲུབ་པར་ཤོག །ཅེས་རང་གཞན་ལ་ཕན་པར་འདོད་པའི་ཡིད་ཀྱིས། ཁྱབ་བདག་བླ་མ་རིག་འཛིན་ཡོངས་ཀྱི་སྤྱི་རྗེ་ལ་གསོལ་བ་བཏབ་ཅིང་བཀའ་ལུང་ལེགས་པར་ཞུས་ཏེ། འཆི་མེད་བསྟན་གཉིས་གླིང་པས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་བགྱིས་པ་དགེ་ལེགས་འཕེལ།། །།
[edit]

@#/__/dpal bka' 'dus las snying po'i nyams len rgyun gyi rnal 'byor bzhugs so//__na mo gu ru be/__srid zhi'i khyab bdag bde ba che/__/'gro ngor rig 'dzin bla ma'i skur/__/bstan gang tshangs pa'i yul sa ru/__/bkod nas snying po'i rnal 'byor 'chad/__yid bzhin gyi nor bu ltar dgos rgu lhun gyis grub cing u dum+ba ra ltar dkon la ngo mtshar che ba'i gsang ba zab mo dpal bka' 'dus chos kyi rgya mtsho'i snying po'i don gyi rnal 'byor rgyun khyer stan thog gcig tu nyams su blang ba la gsum/__sngon 'gro dngos gzhi/__rjes kyi bya ba'o/__/dang po la bzhi/__lha mi'i theg pas blo chos la bskul ba/__nyan rang gi theg pas nges 'byung gi bsam pa sgrub pa/__theg pa chen po'i lam gyis gzhi bzung ba/__kri yog gi theg pas bsang sbyang bya ba'o/__/dang po ni/__dben pa'i gnas su lus gnad bsrang*/__rlung ro bsal la/__bdag gis dal 'byor gyi mi lus rnyed dka' la phan 'dogs che ba thob/__bla ma mtshan ldan las gsang sngags zab mo thob kyang le los g.yengs na/__'dus byas thams cad mi rtag cing rang yang myur du 'chi nges/__'chi ba'i tshe dge sdig las kyi rnam smin kho na'i rjes su 'brang*/__sdig pas ngan 'gror skyes te sdug bsngal mi bzad pa nyams su myong ba ji ltar bya/__de las skyobs nus pa bla ma dang dkon mchog rin po che'i yon tan rjes su dran te snying thag pa nas gus pa chen pos skyabs su mchi'o snyam pa'i sgom don yid la bkod nas skyabs 'gro ni/__na mo:__byin rlabs rtsa ba bla ma dang :__bslu med dkon mchog rnam pa gsum:__mkha' 'gro chos skyong tshogs bcas la:__snying nas gus pas skyabs su+u mchi:__zhes lan mang du brjod do/__/gnyis pa ni/__'khor ba'i gnas ris mtho dman thams cad sdug bsngal gsum gyi rang bzhin me 'obs dang mtshungs/__sdug bsngal gyi rgyu kun 'byung yin pas de'i gnyen por lam rgyud la brten te thar pa mngon du bya'o snyam pas tshul khrims legs par bsrung zhing zhi lhag dang rten 'brel bsgom pa'o/__/gsum pa ni/__'gro ba mtha' dag pha mar shes pas bde ba dang 'phrad 'dod kyi byams pa/__sdug bsngal dang bral 'dod kyi snying rje bskyed/__thams cad phan bde bla na med pa la 'god par bgyi/__de'i ched du rgyal ba sras dang bcas pa'i spyod yul rlabs po che la bslab par bgyi'o snyam pas smon 'jug gi sems bskyed la/__ma gyur rigs drug sems can la:__byams dang snying rjes kun bslangs te:__sangs rgyas go 'phang thob bya'i phyir:__rgyal sras spyod la bslab par bgyi:__zhes brjod cing blo sbyong ngo*/__/bzhi pa ni/__snod dag pa'i zhing khams:__gnas khang rin po che'i gzhal med khang :__yo byad byang chub sems dpa'i mchod sprin du dmigs:__mdun gyi nam mkhar bla ma yi dam dkon mchog rgya mtsho mngon sum bzhin du bzhugs pa la bdag gzhan sems can sgo gsum 'jug pa gcig pas bsags sbyong gi las bya bar mos la/__na mo:__bdag dang mkha' mnyam sems can kun:__zhing rdul snyed kyi lus sprul te:__skyabs gnas dkon mchog thams cad la:__sgo gsum gus pas phyag 'tshal lo:__mchod sprin rgya mtshos rtag tu mchod:__sdig ltung 'gyod pas snying nas bshags:__byang chub spyod la rjes yi rang :__chos kyi 'khor lo bskor bar bskul:__mya ngan mi 'da' bzhugs su gsol:__dge tshogs byang chub chen por bsngo:__gzhan don sangs rgyas myur 'grub shog:__ces yan lag bdun pa spyir 'bul:__bye brag tu:__rang gzhan gyi lus longs spyod dge rtsa dang bcas pa maN+Dal du phul la/__oM AHhU~MH__bdag gzhan lus dang longs spyod dge rtsar bcas:__bkod pa rab rdzogs zhing khams 'byor pa'i sprin:__nam mkha' gang bar dmigs te phul ba yis:__'gro kun rdo rje'i zhing la spyod par shog:__oM sarba ta thA ga te b+h+yo maN+Dal pU dza hoH__lan grangs phul la:__mthar tshogs zhing rang la thim:__sgrib sbyong rdor sems sgom bzlas ni/__rang gi spyi bor bla ma rdo rje sems:__dkar gsal zhal gcig phyag gnyis zhi zhing 'dzum:__rdo rje dril 'dzin dar dang rin chen brgyan:__pad zla'i gdan la sems dpa'i skyil krung bzhugs:__thugs kar zla steng hU~M yig dkar pos mtshan:__sdig ltung la 'gyod skyabs gsol sngags bzlas pas:__hU~M las byung ba'i ye shes bdud rtsi'i rgyun:__zhabs kyi mthe bong las brgyud rang la thim:__nad gdon sdig sgrib bag chags bcas pa sbyangs:__sku gsung thugs kyi byin gyis brlab par gyur:__ces mos la yig brgya ci nus bzla/__mthar/__rdor sems 'od du zhu nas rang la thim pas rang rdo rje sems dpar gsal la/__oM badz+ra satwa hU~M:__zhes bzlas te thog mtha' med pa'i byang chub kyi sems rdo rje'i ngang du mnyam par bzhag go__/gnyis pa dngos gzhi la bzhi/__bla ma'i byin rlabs lam du bya ba/__ma hA yo ga'i bskyed bzlas bya ba/__a nu yo ga'i rdzogs rim bsgom pa/__a ti yo ga'i dgongs par la bzla ba'o/__/dang po la/__gsol ba 'debs pa'i rten gsal gdab pa ni/__oM AHhU~M:__dbyings ni rnam par dag pa chos kyi sku:__rig pa ye shes 'od lnga longs spyod rdzogs:__thugs rjes 'gro ba'i don mdzad sprul pa'i rtsal:__sku gsum dbyer med bla ma kun tu 'chang :__nam mkha'i mdog can rdo rje dril bu 'dzin:__rang 'od yum 'khyud dar dang rin chen brgyan:__seng khri pad+ma nyi zla'i gdan steng du:__ye shes 'od zer 'phro ba'i klong na rol:__brgyud gsum rig 'dzin bla ma sprin ltar gtibs:__yi dam zhi khro rab 'byams 'ja' ltar shar:__mkha' 'gro chos skyong srung ma zer ltar 'phro:__mdun gyi nam mkhar dgyes bzhin bzhugs par gyur:__ces mos la nus na bka' 'dus brgyud pa'i gsol 'debs 'bring po bya/__mi lcog na byang gter bla ma sku gsum ma'i gsol 'debs dang*/__sa hor rat+na pU ra'i grong khyer du:__slob dpon pad+ma 'byung gnas man+d+ha ras:__dpal chen bka' 'dus yongs rdzogs dkyil 'khor bsgrubs:__grub rtags sangs rgyas kun dang gnyis su med:__dam pa khyed kyi rjes su bdag sgrub phyir:__gsol ba 'debs so 'chi med pad+ma 'byung :__byin gyis rlobs shig o rgyan rin po che:__smin grol dbang bskur mchog thun dngos grub stsol:__zhes mos gus kyi shugs bskyed la gsol ba gdab pas:__bla ma'i gnas gsum nas 'od zer dkar dmar mthing gsum rim dang gcig car du spros/__rang gi gnas gsum du rim dang gcig char du zhugs shing thim pas dbang dang dngos grub ma lus pa thob par bsams la/__oM AHhU~M gi bzlas pa ci nus bya/__mthar 'khor rnams bla ma yab yum la thim/__de nyid rang rig pa skye med kyi ngang du thim par bsams la dgongs pa bskyang ngo*/__/gnyis pa ni/__hU~M:__de bzhin nyid dbyings blo 'das 'od gsal ngang :__dmigs med snying rje kun snang mkha' ltar khyab:__rgyu yi rig pa rang byung hU~M mthing ga:__'od kyis snod bcud thams cad stong par sbyangs:__stong pa'i ngang las 'byung rim ri rab steng :__rin chen dur khrod gzhal med khang chen po:__rdo rje'i srung 'khor gsal bstan 'bar ba'i dbus:__pad zla nyi ma dregs pa khyo shugs gdan:__de steng dbyings nas rgyu yi yi ge babs:__rdo rje hU~M yig mnyam sbyor 'phro 'du las:__spyi dpal chen po khrag 'thung rtsa ba'i lha:__sku mdog mthing nag zhal gcig phyag gnyis pa:__gar dgu'i gzi 'bar rdo rje dril bu bsnams:__dpal dang dur khrod rus pa'i rgyan gyis spras:__sbyor yum dmar mo gri thod 'dzin pas 'khyud:__zhabs gnyis 'dor thabs ye shes me dpung klong :__phung khams skye mched ba spu'i bu ga tshun:__zhi khro yongs rdzogs 'dus pa'i ngo bo nyid:__srid zhi kun gyi dbang phyug chen por bzhugs:__spyi bor rigs kun khyab bdag kun tu 'chang :__nam mkha'i mdog can zhi 'dzum rdor dril bsnams:__dar dang rin chen rgyan mdzes yum dang 'khril:__pad zla'i gdan la rdo rje'i skyil krung rol:__de ltar gsal ba'i lhar snang sgyu ma'i sku:__snang stong dbyer med chu zla 'ja' tshon ltar:__'od kyi lus la ye shes snying po'i srog:__lnga ldan thig le 'od zer kun tu 'phro:__rang byung dbang bskur rigs lnga'i cod pan rdzogs:__rdo rje gsum mchog dbyer med lhun gyis grub:__oM hU~M trA~M hrIHAH__oM AHhU~M:__zhes brjod pas tshig gi sgros gsal btab nas lha sku'i gsal snang dang*/__spyi dpal chen po dngos su blta ba'i nga rgyal bskyed/__sangs rgyas kyi ye shes ris med pa'i gdul bya'i snang ngor gang 'dul gzugs su shar ba'i dag dran la bslab cing sems 'dzin/__de la mi gnas na bzlas pa bya ba ni/__hU~M:__bdag nyid spyi dpal chen po'i thugs ka ru:__nyi zla'i gdan la ye shes sems dpa' 'gying :__rin chen zur brgyad rgya gram lte bar hU~M:__rdo rje'i sngags kyis bskor ba'i gsal snang las:__'od zer yar 'phros rtsa gsum rgyal ba mchod:__mar 'phros 'gro drug lus ngag yid sgrib sbyangs:__bar du snang srid khyab pa'i phrin las bsgrubs:__tshur 'dus bdag thim dngos grub rnam gnyis thob:__ces pa'i dmigs pa rtse gcig tu byas la/__oM AHhU~M bo d+hi tsit+ta ma hA su kha ru lu ru lu hU~M b+h+yo hU~M:__zhes zhi khro yongs rdzogs 'dus pa'i snying po nyid bzla/__las rung tsam gyi bsnyen tshad ni 'bum phrag bzhi'o/__/gsum pa ni/__rtsa rlung thig le'i rnal 'byor gyi rang byin gyis brlab pa dang*/__lhan skyes gsum kyi ye shes gzhan lus pho nya'i lam las mthar bskyel ba'o/__/bzhi pa ni/__sgo gsum gyi sngon 'gro rnal du phab nas so so rang rig pa'i ye shes kyi sor gzhug__/snang rig zung 'jug zhi lhag dbyer med gang shar sku gsum gyi rol par shes pas/__lta sgom spyod 'bras rang byung ye grol ka dag chen por la bzla ba ste/__de dag gi nyams len rgyas pa rtsa ba'i gzhung las 'byung ba ltar ro/__/gsum pa rjes kyi rim pa la bzhi/__'od gsal du bsdu ba/__zung 'jug gi skur ldang ba/__dge rtsa bsngo ba/__shis pa brjod pas mtshams sbyar te spyod lam la 'jug pa'o/__/dang po ni/__hU~M:__sarba maN+Da la hU~M:__snod bcud gzhal yas khang dang lha la thim:__lha snang thams cad dpal gyi sku la 'dus:__spyi dpal yab yum mkha' la sprin dengs ltar:__dmigs bsam brjod pa bral ba'i ngang la thim:__ces mnyam par bzhag__/gnyis pa ni/__slar yang 'gags med rig rtsal dpal chen po'i:__sku gsung thugs kyi rdo rje'i rang bzhin gyur:__ma hA shrI he ru ka ad+ma ko\u0f85haM:__zhes nga rgyal bzung*/__gsum pa ni/__dge ba 'di yis mtha' yas sems can rnams:__phyi nang bdud bzhi'i g.yul las rnam par rgyal:__bskyed rdzogs lam gyi rim pa mthar phyin nas:__spyi dpal chen po'i go 'phang myur thob shog:__bzhi pa ni/__bde gshegs zhi ba rdo rje dbyings kyi ngang :__khrag 'thung dpal chen rig pa'i tshom bu 'jal:__zung 'jug sgyu 'phrul drwa ba'i sprin phung 'phro:__dkyil 'khor lha tshogs rnams kyi bkra shis shog:__ces shis pa brjod la spyod lam thams cad spyi dpal chen po'i ye shes kyi rol pa lam du khyer bar bya'o/_/de ni bskyed rdzogs rgyun gyi rnal 'byor yongs rdzogs stan thog gcig tu nyams su blang ba'i tshul yin la/__bskyed bzlas rgyun chags med du byed na/__sngon 'gro gong gi skyabs sems sh+lo ka gnyis kyi 'phros su/__dngos gzhi bskyed bzlas dang*/__mjug bsdu ldang phyin chad byas pas don grub bo/__/bka' 'dus chos kyi rgya mtsho yi/__/bla ma lha dang dbyer med par/__/bdag gzhan 'gro kun byang chub ste/__/don gnyis lhun gyis 'grub par shog__/ces rang gzhan la phan par 'dod pa'i yid kyis/__khyab bdag bla ma rig 'dzin yongs kyi spyi rje la gsol ba btab cing bka' lung legs par zhus te/__'chi med bstan gnyis gling pas rdzong gsar bkra shis lha rtse'i chos grwar bgyis pa dge legs 'phel//__//

Footnotes

Other Information