རིག་འཛིན་ཌཱ་ཀིའི་སྲོག་ཏིག་རྡོ་རྗེ་སྙིང་པོ་དོན་གྱི་ཐོལ་གླུའི་བསྐྱེད་རྫོགས་ཀྱི་དམར་ཁྲིད་ཡེ་ཤེས་སྣང་བ་སྲོག་གི་རྒྱ་ཅན།

🚧 This website is under continued development. We appreciate your patience!

Previous Text Back to Volume PageNext Text

Wylie title	rig 'dzin DA ki'i srog tig rdo rje snying po don gyi thol glu'i bskyed rdzogs kyi dmar khrid ye shes snang ba srog gi rgya can
Location	dil mgo mkhyen brtse bka' 'bum Volume 18, Text 9, Pages 33-49 (Folios 1a to 17b2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	ལྷ་བཙུན་ནམ་མཁའ་འཇིགས་མེད་ (lha btsun nam mkha' 'jigs med)
Citation	Khyentse, Dilgo. Rig 'dzin DA ki'i srog tig rdo rje snying po don gyi thol glu'i bskyed rdzogs kyi dmar khrid ye shes snang ba srog gi rgya can. In Skyabs rje dil mgo mkhyen brtse rin po che'i bka' 'bum, Vol. 18: 33-49. Delhi: Shechen Publications, 1994.
Genre	Contemplative Guide Books and Instructional Manuals - khrid yig
Cycle	རིག་འཛིན་ཌཱ་ཀིའི་སྲོག་ཏིག་རྡོ་རྗེ་སྙིང་པོ་དོན་གྱི་ཐོལ་གླུ་ (rig 'dzin da ki'i srog tig rdo rje snying po don gyi thol glu)
Colophon	།ཅེས་ལྔ་བརྒྱའི་མུན་ཁྲོད་དུ་སྐྱེས་པའི་སོ་སྐྱེ་འཆིང་བ་ཀུན་ལྡན་གྱི་རྟོག་ངོར་གསལ་བའི་ཚིག་རིས་ལ་གསལ་བྱེད་ཀྱི་ཟིན་ཐོ་བྲི་བ་རང་ཉིད་ངལ་བའི་རྒྱུ་ཙམ་དུ་ཟད་ཀྱང༌། རིགས་བརྒྱའི་ཁྱབ་བདག་ཁྲག་འཐུང་ནམ་མཁའ་འཇིགས་མེད་དངོས་བྱོན་པདྨ་ཡེ་ཤེས་རྡོ་རྗེས་ཁྱོད་ཀྱི་དགོངས་གཏེར་དགོས་པ་དང་འབྲེལ་རིགས་སྤེལ་ཞེས་ཐུན་མིན་དགོངས་གཏད་ཀྱིས་ཡང་ཡང་བཀའ་བསྩལ་པ་རྗེས་སུ་སྒྲུབ་པའི་འདུན་པ་དང༌། འཕགས་པའི་ཡོན་ཏན་རྨད་དུ་བྱུང་བ་དུ་མས་ཐུགས་རྒྱུད་མཛེས་ཤིང་ཀུན་བཟང་བཀའ་བརྒྱུད་ཀྱི་ཤིང་རྟའི་ལམ་སྲོལ་ལ་གདོད་ནས་སྨོན་ལམ་གྱིས་འབྲེལ་བའི་ཟུར་མང་དྲུང་པ་མཆོག་སྤྲུལ་འཇིགས་མེད་ནམ་མཁའ་ཆོས་ཀྱི་རྒྱ་མཚོས་ནན་ཏན་ཆེན་པོའི་གསུང་གིས་བསྐུལ་བ་དང༌། སྒྲུབ་བརྩོན་ཀུན་སྤངས་ཀརྨ་ཡེ་ཤེས་ཆོས་འཕེལ་ནས་ཀྱང་བསྙེན་སྒྲུབ་ཉམས་ལེན་མཛད་པའི་གསལ་འདེབས་ཙམ་དུ་གཏད་མེད་ཀྱི་སྨྱོན་པ་ཀུན་བཟང་འོད་གསལ་རྡོ་རྗེ་ཐུགས་མཆོག་རྩལ་ལམ་མིང་དངོས་བཀྲ་ཤིས་དཔལ་འབྱོར་མཁྱེན་བརྩེའི་འོད་ཟེར་དུ་འབོད་པས་སྦས་ཡུལ་དེ་ཉིད་དང་འདབས་འབྱོར་བའི་གུ་ཡངས་ཀྱི་གནས་སུ་བྲིས་པ་འདིས་ཀྱང་ཐེག་མཆོག་རྡོ་རྗེ་སྙིང་པོའི་ལམ་ལ་བྱ་བ་མཆོག་ཏུ་བྱེད་པར་གྱུར་ཅིག།
	/ces lnga brgya'i mun khrod du skyes pa'i so skye 'ching ba kun ldan gyi rtog ngor gsal ba'i tshig ris la gsal byed kyi zin tho bri ba rang nyid ngal ba'i rgyu tsam du zad kyang*/_rigs brgya'i khyab bdag khrag 'thung nam mkha' 'jigs med dngos byon pad+ma ye shes rdo rjes khyod kyi dgongs gter dgos pa dang 'brel rigs spel zhes thun min dgongs gtad kyis yang yang bka' bstsal pa rjes su sgrub pa'i 'dun pa dang*/_'phags pa'i yon tan rmad du byung ba du mas thugs rgyud mdzes shing kun bzang bka' brgyud kyi shing rta'i lam srol la gdod nas smon lam gyis 'brel ba'i zur mang drung pa mchog sprul 'jigs med nam mkha' chos kyi rgya mtshos nan tan chen po'i gsung gis bskul ba dang*/_sgrub brtson kun spangs karma ye shes chos 'phel nas kyang bsnyen sgrub nyams len mdzad pa'i gsal 'debs tsam du gtad med kyi smyon pa kun bzang 'od gsal rdo rje thugs mchog rtsal lam ming dngos bkra shis dpal 'byor mkhyen brtse'i 'od zer du 'bod pas sbas yul de nyid dang 'dabs 'byor ba'i gu yangs kyi gnas su bris pa 'dis kyang theg mchog rdo rje snying po'i lam la bya ba mchog tu byed par gyur cig/

Tibetan Text

Wylie

[edit]

༄༅ །རིག་འཛིན་ཌཱ་ཀིའི་སྲོག་ཏིག་རྡོ་རྗེ་སྙིང་པོ་དོན་གྱི་ཐོལ་གླུའི་བསྐྱེད་རྫོགས་ཀྱི་དམར་ཁྲིད་ཡེ་ཤེས་སྣང་བ་སྲོག་གི་རྒྱ་ཅན་ཞེས་བྱ་བ་བཞུགས་སོ།། ༄༅། །ཀུན་འབྱུང་ཟག་པ་ཟད་པའི་དབྱིངས་ཀྱི་སྦུབས། །འོད་གསལ་སྣང་བཞི་མཐར་སོན་ཧེ་རུ་ཀཿ །རྡོ་རྗེ་ཁྲག་འཐུང་ནམ་མཁའ་འཇིགས་མེད་དང༌། དབྱེར་མེད་ཡེ་ཤེས་རྡོ་རྗེ་སྙིང་དབུས་རོལ། །བླ་མའི་བྱིན་རླབས་སྐྱ་རེངས་ཀྱིས། །ལེགས་བསུས་ཟབ་གསང་རྡོ་རྗེ་སྙིང༌། །བསྐྱེད་རྫོགས་ཉམས་ལེན་སྲོག་ཕུར་ཙམ། །ཉུང་ངུའི་ངག་གིས་རྣམ་པར་དབྱེ། །འཕགས་ཡུལ་པཎ་གྲུབ་ལྔ་བརྒྱའི་གཙུག་རྒྱན། འོད་གསལ་ཡེ་ཤེས་རྡོ་རྗེའི་སྐུ་བརྙེས་པའི་རིག་འཛིན་ཆེན་པོ། ཐེག་མཆོག་རྫོགས་པ་ཆེན་པོའི་ཤིང་རྟ་པཎ་ཆེན་བི་མ་ལ་མི་ཏྲའི་ཡེ་ཤེས་སྒྱུ་འཕྲུལ་དྲྭ་བའི་ཟློས་གར་རྟོགས་པའི་དབང་ཕྱུག་ལྷ་བཙུན་ཆེན་པོ་ནམ་མཁའ་འཇིགས་མེད་ཀྱི་རྡོ་རྗེའི་བྱིན་རླབས་བཙན་ཐབས་སུ་འཕོས་པ་ལས་རང་ཤར་བའི། རིག་འཛིན་བླ་མའི་སྲོག་སྒྲུབ་རྡོ་རྗེ་སྙིང་པོ་དོན་གྱི་ཐོལ་གླུ་ཉིད། ཇི་ལྟར་ཉམས་སུ་ལེན་པ་ལ་བསྙེན་སྒྲུབ་ཡན་ལག་བཞི་ལས། དང་པོ་ཉེ་བར་བསྙེན་པ་སྔོན་འགྲོའི་རིམ་པ་ལ། མཚན་ཉིད་དང་ལྡན་པའི་སློབ་དཔོན་གྱིས། གདམས་ངག་གི་བཅུད་འཛིན་ནུས་ཤིང་རྡོ་རྗེའི་གསེང་ལམ་ལ་དད་བརྩོན་བློ་གྲོས་ཀྱི་སྒོ་དང་ལྡན་པའི་སློབ་མ་རྗེས་སུ་འཛིན་པ་ལ། ཐོག་མར་དབང་བཞི་མཐའ་རྟེན་དང་བཅས་པས་རྒྱུད་སྨིན་པར་བྱས་ཤིང༌། རྣམ་པར་དག་པའི་དམ་ཚིག་གིས་གཞི་བཟུང་སྟེ། ཇི་ལྟར་ཉམས་སུ་ལེན་པའི་རྣལ་འབྱོར་དུ་འཇུག་པ་ལ་སྔོན་འགྲོས་རྒྱུད་སྦྱང་བ་གལ་ཆེ་བས། དབེན་པའི་གནས་སུ་བསམ་གཏན་དང་མཐུན་པའི་སྤྱོད་ལམ་གྱིས་འཁོད་དེ། འདི་ལྟར་སྔོན་གྱི་སངས་རྒྱས་བྱང་སེམས་ཐམས་ཅད་ཀྱང་སངས་རྒྱས་སྒྲུབ་པའི་རྟེན་མི་ཡི་ལུས་ཁོ་ནར་བསྔགས། རྟེན་འདི་ནི་རྒྱུ་འབྲས་ཀྱི་ཐེག་པ་ཐམས་ཅད་ཀྱི་ལམ་གྱི་རྟེན་ཁྱད་པར་ཅན་ཡིན། འདི་རྙེད་པའི་རྒྱུ་ཡང་ཟག་བཅས་ཟག་མེད་ཀྱི་དགེ་བའི་རྒྱུ་ཁོ་ནས་ཐོབ་དགོས། དེ་ཡང་དགེ་བ་སྤྱོད་པའི་སྐྱེས་བུ་ནི་དཀའ་བས་ཕྱིས་དེ་འདྲའི་ལུས་ཤིན་ཏུ་ཐོབ་པར་དཀའ། ངན་སོང་གསུམ་ནི་གྲངས་ཀྱང་མང་ལ་སྡུག་བསྔལ་ཆེ། མཐོ་རིས་གསུམ་བདེ་འགྲོའི་རྟེན་ཡིན་ཀྱང་སྲིད་པའི་རྩ་བ་མ་ཆོད་ན་སླར་ཡང་ངན་འགྲོར་འཇུག་འགྲོ་བས། ལུས་རྟེན་ཐམས་ཅད་ཀྱི་རྩེ་མོ་དལ་འབྱོར་གྱི་མི་ལུས་ཡིན་པས་ཡིད་བཞིན་གྱི་ནོར་བུ་ལས་ལྷག །འཇིག་རྟེན་ན་ཨུ་དུམ་ཝ་རའི་མེ་ཏོག་འབྱུང་བ་ལས་ཀྱང་དལ་འབྱོར་མཚན་ལྡན་རྙེད་པར་དཀའ་བ་སོགས་དཔེ་དུ་མས་བསྟན་པ་འདི་ད་རེས་བདག་གིས་ཐོབ་ཀྱང༌། འདི་ནི་ནད་གདོན་བགེགས་སོགས་འགལ་རྐྱེན་དུ་མས་གཙེས། འཚོ་བའི་རྐྱེན་ཕལ་ཆེར་ཡང་འཆི་རྐྱེན་དུ་འགྱུར་བ་ཤིན་ཏུ་མང་བས་ཡུན་རིང་རྟག་མི་ཐུབ། གནས་གྲོགས་རྐྱེན་དུས་འདི་རུ་འཆི་ཞེས་ངེས་པ་མེད། འཆི་བའི་ཉིན་པར་ནོར་གྲོགས་དང་གནས་སྲོག་དང་བཅས་བཏང་སྟེ་ཆ་མེད་ཀྱི་ཡུལ་ཡ་ང་བའི་གནས་སུ་འགྲོ་དགོས། ལུས་གྲོག་སྟོང་དུ་བསྐྱལ། བཏགས་པའི་མིང་ཡལ། སེམས་གཏད་མེད་རྟེན་མེད་སྲིད་གསུམ་རིགས་དྲུག་ཏུ་ལས་རྗེས་སུ་སྐྱབས་མེད་མགོན་མེད་དུ་འཁྱམས་པ་ཨ་རེ་སྐྱོ། མགོ་སྟོང་སྙིང་མེད་ཚེ་འདིར་ཞེན་པ་རྣམས་བསམ་མནོ་ཐོངས་དང༌། སྔོན་འཁོར་འདས་གཉིས་སུ་རྒྱབ་གྱེས་པ་ནས་འདུས་བྱས་ཀྱི་སྣང་བ་ལ་རྟག་པ་ཡེ་མེད། ཕྱི་སྣོད་འཇིག་རྟེན་གནས་སྐབས་སུ་ཉིན་མཚན་དུས་བཞི། མཐར་མེ་བདུན་ཆུ་གཅིག་གིས་འཇིག །ནང་བཅུད་སྐྱེ་འགྲོའི་ཕུང་ཁམས་སྐྱེ་མཆེད་སྐྱེ་རྒ་ན་འཆི་ལ་འགྱུར། ཐམས་ཅད་འདུས་མཐའ་འབྲལ། བསགས་མཐའ་འཛད། བརྩིགས་མཐའ་འགྱེལ། །སྐྱེས་མཐའ་འཆི་བ་བཞིས་མ་བསྡུས་པ་མེད་པས་ཆོས་ལ་མྱུར་དུ་འཇུག་པ་གལ་ཆེ། ཆོས་ཀྱི་རྩ་བ་རྒྱུ་འབྲས་བསླུ་མེད་ལ་ཡིད་ཆེས་པ་སྟེ། རྒྱུ་དགེ་སྡིག་སོ་སོའི་འབྲས་བུ་བདེ་སྡུག་བསླུ་བ་མེད་པ་ལ་བརྟེན་ནས་རིགས་དྲུག་གི་བདེ་སྡུག་བསམ་མི་ཁྱབ་པ་འདི་བྱུང༌། ལས་རེ་རེའང་རྣམ་སྨིན། བྱེད་པ་རྒྱུ་མཐུན། མྱོང་བ་རྒྱུ་མཐུན། དབང་གི་འབྲས་བུ་སྟེ་བཞི་རེ་སྨིན་དགོས། སྔོན་གྱི་རྒྱལ་བ་སྲས་བཅས་ཀྱང་རྒྱུ་འབྲས་བླང་དོར་ཚུལ་བཞིན་མཛད་པས་མཐར་ཐུག་གི་འབྲས་བུ་མངོན་དུ་གྱུར། ད་ལྟ་བདག་ཅག་གི་སྟོན་པས་ཀྱང་རྒྱུ་འབྲས་བསླུ་བ་མེད་པའི་ཚུལ་ལས་བརྩམས་ཏེ་ཆོས་སྒོ་ཐམས་ཅད་བསྟན་པས་ན་ཉམས་ལེན་གྱི་སྙིང་པོ་འདི་ལག་ལེན་དུ་ཐེབས་པ་གལ་ཆེ། རྒྱུ་འབྲས་བསླུ་མེད་ལ་བསམ་ཞིང་གཞུང་བཞིན་སྤང་བླང་མ་ནོར་བས་དཔྱད་ན་འཁོར་བའི་བྱ་སྤྱོད་ཐམས་ཅད་ནི་ངན་སོང་གི་སྣོན་མ། དུག་ལྔ་ཆོས་བརྒྱད་ཀྱི་ཡོ་ལང༌། ལས་དགེ་སྡིག་ཕྱིན་ཅི་ལོག་ཏུ་སྤྱད་པ། མི་རྟག་ཅིང་འགྱུར་བ། མནར་ཞིང་མགོན་སྐྱབས་དང་བྲལ་བ། ཟླ་མེད་གཅིག་པུར་མྱོང་དགོས་པ། སྡུག་བསྔལ་གྱི་འབྱུང་གནས་སྡུག་བསྔལ་གྱི་རྟེན། བདེ་བའི་གོ་སྐབས་མེད་པ། སུ་དང་འགྲོགས་ཀྱང་མི་དགེ་བའི་གྲོགས། ལས་དང་བྱ་བ་ཐམས་ཅད་ངན་སོང་གི་སྣོན་མ། ཐར་པ་དང་བདེ་འབྱོར་དབང་མེད་དུ་འཕྲོག་པ་དམྱལ་བའི་གཏིང་རུམ་ཆེན་པོ་འདི་ལས་ངེས་འབྱུང་གི་བསམ་པས་ཐར་པ་ཡང་དག་པའི་ལམ་ལ་འཇུག་དགོས་སྙམ་དུ་ཡང་ཡང་བསམ། འཁོར་བའི་གནས་ངན་དེ་ལས་གྲོལ་ཞིང༌། ཞི་བསིལ་བདེ་ཆེན་ཐར་པའི་ལམ་གྱི་བཙན་ས་འཛིན་པ་ལ་རང་སྟོབས་ཀྱིས་མི་ནུས་རྒྱབ་དཔུང་དུ་སྐྱབས་ཁྱད་པར་ཅན་ལ་བརྟེན་དགོས་པས། རང་ཉིད་ཐ་མལ་དུ་གནས་པའི་མདུན་གྱི་ནམ་མཁར་འཇའ་ཟེར་གྱི་ཐིག་ལེ་འོད་ཕུང་གི་སྣང་བས་མཁའ་དབྱིངས་ཁྱབ་པར་འཕྲོས་པའི་ནང་དུ་ཕྱི་ལྟར་ན་དཀོན་མཆོག་གསུམ། ནང་ལྟར་རྩ་གསུམ། གསང་བ་སྐུ་གསུམ། ཐམས་ཅད་དོན་ལ་ངོ་བོ་རང་བཞིན་ཐུགས་རྗེའི་ཡེ་ཤེས་གཅིག་དུ་གདོད་ནས་ལྷུན་གྱིས་གྲུབ་པ་འཁོར་འདས་ཀྱི་སྤྲོ་གཞི་ཉིད། རྣམ་པ་སྐྱབས་ཡུལ་རྒྱ་མཚོའི་སྙིང་པོ་རིག་འཛིན་བླ་མ་ཀུན་འདུས་ཡིད་བཞིན་ནོར་བུའི་ཚུལ་དུ་བཞུགས་པ་ལ་ཡིད་ཆེས་ཀྱི་དད་མོས་རྩལ་དུ་སྤྲུགས་པས་བློ་གཏད་ལིང་འགེལ་གྱིས་སྐྱབས་སུ་འགྲོ་སྙམ་ཞིང༌། མ་རྒན་མཁའ་མཉམ་གྱི་སེམས་ཅན་འཁོར་བ་གཏིང་མཐའ་མེད་པར་བྱིང་བ་ལ། རང་ཉིད་གཅིག་པུར་ཐར་པ་འདོད་པའི་བློས་གར་ཡང་མི་ཕྱིན་པས། སྐྱབས་ཡུལ་ལ་དཔང་བཅོལ་ཏེ། འགྲོ་ཀུན་ཐར་པ་བླ་ན་མེད་པ་རྫོགས་པའི་བྱང་ཆུབ་ཆེན་པོའི་གོ་འཕང་ལ་ཅིས་ཀྱང་དགོད་པར་བྱ། དེའི་ཆེད་དུ་མྱུར་ལམ་མཐར་ཐུག་ཟབ་མོ་བླ་མ་སྒྲུབ་པའི་རྣལ་འབྱོར་ལ་འཇུག་པར་བགྱི་སྙམ་པས། ཨ༔ ཆོས་དབྱིངས་འོད་གསལ་སོགས། སྐྱབས་སེམས་སྦྲེལ་མ་ཉིད་བྱ། མཐར་བདག་གཞན་སྐྱབས་ཡུལ་དང་བཅས་པ་རང་སྣང་སྒྱུ་མའི་ཆོ་འཕྲུལ་འཁོར་འདས་མཉམ་ཉིད་བྱང་ཆུབ་སེམས་ཀྱི་རང་བཞིན་དུ་ཤེས་པས་ཆོས་ཉིད་ཕྱོགས་རིས་དང་བྲལ་བའི་དབྱིངས་སུ་ངལ་གསོ། སྐབས་འདིར་བསག་སྦྱོང་བླ་མའི་རྣལ་འབྱོར་བཅས་བྱ་བར་འདོད་ན་རྡོ་རྗེ་སེམས་དཔའི་སྒོམ་བཟླས་ནི། པད་ཟླ་ཉི་སྟེང་རང་རིག་ཨར་གསལ་བའི༔ འོད་ཟེར་འཕྲོ་འདུས་ཁམས་གསུམ་སྲིད་གསུམ་གྱི༔ སྣང་གྲགས་ཐམས་ཅད་རྡོ་རྗེ་སྙིང་པོའི་ཞིང༔ ཡེ་ཤེས་འོད་ལྔ་འཇའ་ཟེར་ཐིག་ལེ་འཁྲུགས༔ དེ་སྟེང་ཡི་གེ་ཧཱུྃ་གི་འཕྲོ་འདུས་ལས༔ རང་རིག་སྣང་སྟོང་རྡོ་རྗེ་སེམས་དཔའི་སྐུ༔ ངོ་བོ་གཅིག་ལ་རིགས་བརྒྱ་རིགས་ལྔ་སོགས༔ ནམ་མཁའི་ཁམས་གང་ཆོས་དབྱིངས་ཁྱབ་པར་གསལ༔ རྒྱུད་སྡེ་བཞི་དྲུག་ཐེག་པ་རིམ་དགུ་ཡི༔ སོ་སོའི་གནས་ནས་རྒྱལ་བའི་དཀྱིལ་འཁོར་གང༔ ཐམས་ཅད་གནས་གསུམ་འབྲུ་གསུམ་ཧཱུྃ་ཡིག་མཐར༔ ཡིག་བརྒྱའི་འཕྲོ་འདུས་སྒྲིབ་གསུམ་བག་ཆགས་སྦྱངས༔ སྟོབས་བཞིའི་གནད་དང་ལྡན་པས་བདུད་རྩི་འབེབས་སྦྱོང་ནི་དམིགས་གནད་སྤྱི་ལྟར་བྱས་ལ་ཡིག་བརྒྱ་ཇི་ལྟར་རིགས་པ་བཟླས་མཐར། མགོན་པོ་བདག་ནི་མི་ཤེས་རྨོངས་པ་སོགས། མཐོལ་བཤགས་ཕུལ་བས་སྡིག་ལྟུང་དག་པའི་གནང་བ་བསྩལ་ནས་རང་ལ་ཐིམ་པར་མོས། བླ་མའི་རྣལ་འབྱོར་ནི། ཨ༔ མ་ཡེངས་མ་བཅོས་དྲན་རིག་ཆོས་སྐུའི་ངང༔ གསལ་སྟོང་དབྱེར་མེད་བླ་མ་སྐུ་གསུམ་གྱི༔ དག་པ་རབ་འབྱམས་རྒྱན་གྱི་འཁོར་ལོའི་གཞིར༔ རང་ལུས་འོད་སྣང་རྡོ་རྗེ་བཙུན་མོར་གསལ༔ སྤྱི་བོའི་གཙུག་ཏུ་པད་སྟེང་འཇའ་ཟེར་དང༔ འོད་ལྔའི་ཐིག་ལེ་འཁྲུགས་པའི་ཚོམ་བུའི་དབུས༔ རྩ་བའི་བླ་མ་ཡིད་བཞིན་ནོར་བུ་ལ༔ འདྲེན་མཆོག་བརྒྱུད་གསུམ་བླ་མའི་སྤྲིན་ཕུང་གཏིབས༔ སྐུ་གསུང་ཐུགས་ཀྱི་འོད་ཟེར་སྣང་སྲིད་ཁྱབ༔ སྣང་སྲིད་རྡུལ་ཕྲན་བདེ་གཤེགས་གཞལ་ཡས་ཁང༔ ལྷ་དང་བླ་མ་ཐུགས་རྗེའི་བྱིན་འོད་འཁྱིལ༔ ཐུགས་གསང་རྒྱན་གྱི་འཁོར་ལོ་དམ་པར་གྱུར༔ ཞེས་ཚོགས་རྟེན་གསལ་བཏབ་སྟེ༔ ཡན་ལག་བདུན་པ་ནི༔ གཤིས་རིག་མ་བཅོས་གཉུག་མར་ཕྱག་འཚལ་ཞིང༔ ནས་ཕ་མཐར་བསྔོ༔ ཞེས་དམིགས་རིམ་རྗེས་སུ་དྲན་པས་བྱ། མཎྜལ་འབུལ་ན། ཨོཾ་ཨཱཿཧཱུྃ། ཆོས་དབྱིངས་མཉམ་ཉིད་ཆོས་སྐུའི་ཞིང་ཁམས་སུ། །རང་སྣང་མ་འགགས་ལོངས་སྐུ་རིགས་ལྔའི་ཞིང༌། །མཁའ་ཁྱབ་སྤྲུལ་སྐུའི་ཞིང་གི་བཀོད་པ་རྣམས། །ཀུན་བཟང་བདེ་ཆེན་མཆོད་པའི་སྤྲིན་དུ་འབུལ། ཨོཾ་རཏྣ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། གསོལ་འདེབས་ནི། མདུན་གྱི་བླ་མ་སྐྱབས་གནས་ཀུན་འདུས་ཀྱི་བདག་ཉིད་ལ་ཡིད་ཆེས་ཀྱི་དད་པ་གཏིང་ནས་གཡོ་ཞིང་གདུང་བའི་ཤུགས་དང་བཅས་ཏེ། མདོ་རྒྱུད་ལུང་དང་མན་ངག་ཆུ་བོའི་འགོ༔ བཀའ་གཏེར་སྙན་བརྒྱུད་ངེས་དོན་ཡོངས་ཀྱི་མཛོད༔ ཐར་གླིང་འགྲོ་བ་འདྲེན་པའི་དེད་དཔོན་མཆོག༔ དྲིན་ཅན་རྩ་བའི་བླ་མར་གསོལ་བ་འདེབས༔ ཞེས་དང༌། སྤྲོ་ན་བརྒྱུད་པའི་གསོལ་འདེབས་དང༌། བླ་སྒྲུབ་དཀྱུས་ནས་འབྱུང་བའི་མཚན་སྔགས་ཀྱང་བཟླ། མཐར་དབང་ལེན་ནི། སྣང་གྲགས་ཐམས་ཅད་རྒྱལ་བའི་སྐུ་དང་གསུང༔ ཐུགས་ཀྱི་རྡོ་རྗེ་ཐིག་ལེ་འོད་ལྔའི་བཅུད༔ སྤྱི་མགྲིན་སྙིང་ག་ལྟེ་གསང་གནས་ལྔར་བབས༔ སྒོ་ལྔའི་འཛིན་སྣང་འོད་སྐུར་རྒྱ་རལ་ནས༔ འོག་མིན་རྡོ་རྗེ་གདན་གཞིར་དབང་བཞི་རྫོགས༔ ཁམས་གསུམ་འཁོར་བ་དོང་ནས་སྤྲུགས་པར་ཤོག༔ ཅེས་མདུན་གྱི་བླ་མའི་གནས་ལྔའི་འོད་ཟེར་ཁ་དོག་ལྔ་ལྡན་རང་གི་གནས་ལྔར་ཞུགས་ཤིང་ཐིམ་པས་དབང་བཞི་ཐོབ། སྒྲིབ་བཞི་དག །ལམ་བཞི་སྒོམ་པ་ལ་དབང༌། འབྲས་བུ་སྐུ་བཞི་མངོན་དུ་གྱུར་ནས་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོར་གཉིས་སུ་མེད་པར་སངས་རྒྱས་པའི་མོས་པ་བྱའོ། །གཉིས་པ་ཉེ་བསྙེན་སྣང་གྲགས་རིག་པའི་འཁོར་ལོ་རིག་འཛིན་བླ་མའི་སྐུ་གསུང་ཐུགས་ཀྱི་རྣལ་འབྱོར་དུ་ལམ་ཁྱེར་བསྐྱེད་པའི་རིམ་པ་ནི། ཡར་མར་ཚེས་བཅུ་ལ་སོགས་པར་སྤྲོས་པ་ཅུང་ཟད་འདོད་ན་གཞུང་མཐུན་གྱི་བླ་མའི་སྐུ་འབག་རང་དང་མདུན་སྤྲོད་དུ་བཀྲམ་པའི་སྤྱན་སྔར་སྨན་རཀ་གཏོར་མ་ཉེར་སྤྱོད་བཅས་བཤམ། བསྙེན་སྒྲུབ་ལ་འཇུག་པའི་དང་པོར་དཀར་བགེགས་ཀྱི་གཏོར་མ། རྒྱལ་ཐོ་འཛུགས་པར་སྤྲོ་ན་རྒྱལ་ཆེན་བཞིའི་གཏོར་མ་གསེར་སྐྱེམས་བཅས་འདུ་བྱ། ཚོགས་ཀྱི་ཡོ་བྱད་ཀྱང་བཤམ། བསྡུ་ན་ནང་གི་རྣལ་འབྱོར་གཙོ་བོར་བཏོན་ཏེ། དེ་རིགས་མ་གྲུབ་ཀྱང་འགལ་བ་མེད། གང་ལྟར་ཡང་བརྒྱུད་པའི་གསོལ་འདེབས་སྔོན་དུ་འགྲོ་བས་ལས་བྱང་གི་སྐྱབས་སེམས་ནས་བརྩམས་དངོས་གཞིའི་བསྐྱེད་རིམ་ལ་འཇུག །དེ་ཡང་སྣོད་བཅུད་དག་ཆེན་ཡེ་ཤེས་ཀྱི་རོལ་པ་འོག་མིན་རྡོ་རྗེ་དབྱིངས་ཀྱི་ཞིང་འཇའ་ཟེར་ཐིག་ལེའི་སྣང་བ་མུ་མེད་དུ་བརྡལ་བའི་དབུས་སུ་པད་ཉི་ཞིང་ལྤགས་ཀྱི་གདན་ལ་རིག་འཛིན་བླ་མ་དཔལ་ཧེ་རུ་ཀཿ ནམ་མཁའ་འཇིགས་མེད་སྣང་སྟོང་སྒྱུ་མ་འཕོ་ཆེན་དྭངས་མའི་མཚན་དཔེ་ཅན། རྣལ་འབྱོར་བརྟུལ་ཞུགས་སྤྱོད་པའི་ཆས་ཀྱིས་སྒེག་པ། ཕྱག་གཡས་མི་རྐང་གི་གླིང་བུ་དང༌། གཡོན་པས་བྷནྡྷ་བདུད་རྩིའི་བཅུད་ལྡན་ནམ་མཁའི་དབྱིངས་སུ་གཏོད་པའི་མཆན་དུ་རྡོ་རྗེའི་ཁཊྭཱཾ་ག་བསྒྲེང་པ། ཞབས་རྒྱལ་པོའི་རོལ་སྟབས་ཅན། སྐུ་ལ་སྟག་ཤམ་རུས་རྒྱན་ཐོད་སྐམ་གྱི་དབུ་རྒྱན་ཐལ་ཆེན་གྱི་ཚོམ་བུས་བྱུགས་པ། ཏིང་ངེ་འཛིན་གྱི་ཟིལ་དང་ལྡན་པས་ཧེ་རུ་ཀ་དངོས་སུ་བྱོན་པ་ལྟ་བུ་དྲན་པ་ཙམ་གྱིས་ཐ་མལ་གྱི་སྣང་བ་རང་འགགས་སུ་འགྲོ་བའི་རྡོ་རྗེའི་སྐུ་ཡི་གནས་ཐུགས་ཀར་ཞི་བ་བཞི་བཅུ་རྩ་གཉིས། དུང་ཁང་དུ་ཁྲག་འཐུང་ལྔ་བཅུ་རྩ་བརྒྱད། དཔྲལ་བར་སྐུ་རྡོ་རྗེ་འཇམ་དཔལ་གཤིན་རྗེ་སེར་ནག་གཡས་བེ་ཅོན། མགྲིན་པར་གསུང་རྡོ་རྗེ་པདྨ་དབང་དམར་ནག་པདྨ། ཐུགས་ཀར་ཐུགས་རྡོ་རྗེ་ཡང་དག་མཐིང་ནག་རྡོ་རྗེ། ལྟེ་བར་ཡོན་ཏན་ཆེ་མཆོག་ལྗང་སེར་རྡོ་རྗེ། གསང་བར་ཕྲིན་ལས་རྡོ་རྗེ་ཕུར་པ་ལྗང་ནག་ཕྱག་གཉིས་ཕུར་པ་འདྲིལ་བ། ཡན་ལག་བཞིར་མཆོད་བསྟོད་དང་དྲག་སྔགས་གཉིས་ཀ་མཐིང་ནག་ཐོ་བ་དང༌། མདུང་ཐུང༌། གཡོན་ཐམས་ཅད་ཐོད་ཁྲག་ཅན་གྱི་གཙོ་བོ་རྣམས་ཞལ་གཅིག་ཕྱག་གཉིས་ཡུམ་དང་བཅས་པ། འཁོར་རྣམས་ཉི་མ་དང་འོད་ཟེར་བཞིན་མོས་པས་དཀྱིལ་འཁོར་བསམ་ཡས་ལྷུན་གྲུབ་ཏུ་གདོད་ནས་དག་པའི་རང་མདངས་རྣམ་པ་ཡེ་ཤེས་ཀློང་དགུ་ཞི་ཁྲོ་རྒྱལ་བ་འདུས་པའི་དཀྱིལ་འཁོར་ཡོངས་རྫོགས་སུ་ཤར་བའི་ངེས་ཤེས་དང་བཅས་ལེགས་པར་གསལ་བཏབ་ལ་སྤྱན་འདྲེན་སོགས་ལས་རིམ་རྫོགས་པར་སྦྱར། ལས་བྱང་གིས་བསྟན་དོན་ལྟར་དག་པ་དྲན། ཐུགས་ཡིད་གཅིག་ཏུ་བསྲེ་བའི་ང་རྒྱལ་བརྟན་པོ་ཡང་ཡང་སྦྱངས་པ་གལ་ཆེ། དམིགས་པའི་རིམ་པ་གཞུང་ལྟར་གསལ་མ་ནུས་ན་ཡང་རང་གི་ལུས་ཕུང་ཁམས། ངག་རླུང༌། སེམས་རྟོག་པའི་འཕྲོ་འདུ་ཅན་འདིས་གནས་ལུགས་ངོ་མ་ཤེས་པའི་ཟག་བཅས་སྡུག་བསྔལ་གྱི་ཕུང་པོར་འཛིན་པས་ལས་ཉོན་བསགས་པ་མ་གཏོགས། ཡིན་ལུགས་ངེས་པ་སངས་རྒྱས་ཀུན་གྱི་ཡེ་ཤེས་ཀྱི་སྤྱི་གཟུགས་རིག་འཛིན་དཔལ་མགོན་བླ་མའི་ཡེ་ཤེས་ཀྱི་སྐུ། རྡོ་རྗེའི་གསུང༌། བདེ་བ་ཆེན་པོའི་ཐུགས་སུ་རྣམ་པར་དག་པའི་གསང་བ་མི་ཟད་རྒྱན་གྱི་འཁོར་ལོ་ཆེ་མཆོག་དཔལ་དགུ་ཞི་ཁྲོ་རབ་འབྱམས་ཀྱི་ལྷ་དངོས་ཡིན་པས་ན། དེ་ཚིག་གིས་གསལ་འདེབས། ཡིད་ཀྱིས་དངོས་སུ་གྱུར་བའི་ངེས་ཤེས་འཕོ་འགྱུར་མེད་པའི་དག་སྣང་དུ་ཤར་ནུས་པ་བྱུང་ན་དེ་གའི་ངང་ནས་བླ་མ་དང་རང་ཉིད་བཟང་ངན་ཐ་མལ་གྱི་འཛིན་རྟོག་བཤིག་སྟེ་གཉིས་མེད་རང་རིག་ཁྱབ་བརྡལ་གྱི་དགོངས་པའི་གཟེར་འདེབས་པ་ལ་ཡོངས་གྲུབ་ཆེན་པོའི་མོས་གུས་ཞེས་པ་ཉམས་ལེན་གྱི་མཐར་ཐུག་ཡིན། དེ་ནས་བཟླས་པ་སྔགས་ཀྱི་རྣལ་འབྱོར་ལ་བསྙེན་སྒྲུབ་ལས་གསུམ་ལས། དང་པོ་ནི། རིག་འཛིན་བླ་མའི་ཐུགས་ཀར་ཡེ་ཤེས་སེམས་དཔའ་ཆོས་སྐུ་ཀུན་ཏུ་བཟང་པོ་ཡབ་ཡུམ་སྐུ་ཤིན་ཏུ་ཕྲ་བ་འོད་ཀྱི་རང་བཞིན་དྭངས་ལ་སྐྱེ་མཆེད་རྫོགས་པ། རྣམ་པ་མ་འགགས་ཆུ་ཟླའམ་འཇའ་ཚོན་ལྟ་བུའི་ཐུགས་སྲོག་འོད་ལྔའི་ཐིག་ཟླུམ་གྱི་སྙིང་པོར་ཨ་ཡིག་མཐིང་གསལ་མི་ཤིགས་ཡེ་ཤེས་རྡོ་རྗེའི་སྲོག་ཆེན་པོ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་འབྱུང་གནས། ཀུན་བཟང་ཤེས་རབ་ཀྱི་ཕ་རོལ་ཏུ་ཕྱིན་མ་ཀ་དག་དབྱིངས་ཀྱི་ཡི་གེའི་ས་བོན་ཨ་ལས་ལྔ་ལྡན་འོད་ཀྱི་འཕྲོ་འདུས་འཁོར་འདས་ཀྱི་ཞིང་ཀུན་ཁྱབ། སངས་རྒྱས་ཀྱི་མཛད་པ་མཐའ་དག་བསྒྲུབས། སྣོད་བཅུད་ཁྱབ་བརྡལ་ཡེ་ཤེས་ཀྱི་རང་བཞིན་དུ་སད་པར་མོས་ལ་སྲོག་སྔགས་བཟླ་བའོ། །གཉིས་པ་སྒྲུབ་པ་ནི་ངོ་བོ་རིགས་ཀུན་ཁྱབ་བདག་བླ་མ་གཅིག་པུའི་རྡོ་རྗེའི་གསང་བ་གསུམ་གྱི་སྤྲོ་བསྡུ་ལས། རྣམ་པ་བརྒྱུད་གསུམ་རིག་འཛིན་བླ་མ་ཞི་ཁྲོ་ཡི་དམ་དཔལ་ཆེན་སྒྲུབ་སྡེ་བརྒྱད་གནས་གསུམ་དཔའ་བོ་ཌཱ་ཀི་ཆོས་སྲུང་བཅས་གང་འདུལ་ཅིར་ཡང་སྣང་ཞིང་སྟོན་པ་ལས། མཆོག་གི་ཡེ་ཤེས་ཀྱི་བྱིན་རླབས་ཐུན་མོང་གི་དངོས་གྲུབ་སྣ་ཚོགས་ལས་བཞིའི་ཕྲིན་ལས་སོགས་གང་འདོད་ཡིད་བཞིན་སྩོལ་ནུས་པ་ནོར་བུ་གཅིག་ལས་འདོད་དགུ་འབྱུང་བ་ལྟར་ཡིན་པས་བླ་མའི་ཐུགས་སྲོག་ལས་འཕྲོས་འོད་ཀྱིས་རེག་པས། སྣང་སྲིད་ལྷ་དང་བླ་མའི་འཁོར་ལོར་ཤར་བ་ཀུན་ཀྱང་སྐུ་རྡོ་རྗེའི་གར་སྟབས་ཡོམ་ཡོམ་ཤིག་ཤིག །གསུང་སྔགས་དང་གླུ་དབྱངས་རོལ་མོ་འུར་འུར། ཐུགས་ཡེ་ཤེས་ཟང་ཐལ་གྱི་དགོངས་པ་ས་ལེར་སད་པར་དབང་དང་བྱིན་རླབས་དངོས་གྲུབ་ཐམས་ཅད་འབད་མེད་དུ་ཐོབ་པར་མོས་ལ་རྩ་སྔགས་བཟླ་བའོ། །གསུམ་པ་ལས་སྦྱོར་ནི། བླ་མའི་ཐུགས་ཀའི་ཨ་ལས་འོད་དཀར་གསལ་ཟླ་བ་དྭངས་པ་ལྟ་བུ་འཕྲོས། ནམ་མཁའི་དབྱིངས་སུ་ཁྱབ། འཇིགས་པ་བརྒྱད་སོགས་གནས་སྐབས་དང༌། གཟུང་འཛིན་གྱི་འཁྲུལ་པ་རྒྱུ་འབྲས་ཞི་བ་མཐར་ཐུག་གི་ཕྲིན་ལས་མཐར་ཕྱིན་པར་མོས་ལ་ཤཱནྟིཾ་ཀུ་རུ་སྦྱར་བ་བཟླ། དེས་འགྲེས་ཏེ་བླ་མའི་ཐུགས་སྲོག་གི་འོད་ཟེར་གསེར་བཙོ་མ་ལྟ་བུས་འབྱོར་བ་དྲུག་དང་ཟག་མེད་ཀྱི་ཡོན་ཏན་རྒྱས་པ། རྗེས་ཆགས་བདེ་སྟོང་གི་འོད་དམར་འཆར་ཀའི་ཟེར་ཐག་ལྟ་བུས་སྣོད་བཅུད་ཀྱི་དཔལ་དང་རླུང་སེམས་དབང་དུ་སྡུད་པ། དྲག་ཤུལ་མཚོན་ཆའི་འཇའ་ཟེར་ལྗང་ནག་གི་མེ་ལྕེས་བདུད་དགྲ་འཁྲུལ་རྒྱུ་ཐམས་ཅད་རྩད་ནས་གཅོད་པའི་དམིགས་འདུན་དང་བཅས་རྩ་སྔགས་ལ་ལས་སོ་སོའི་སྤེལ་ཚིག་སྦྱར་བ་བཟླ། གྲངས་བསྙེན་གཙོ་བོར་བྱེད་ན་བསྙེན་སྒྲུབ་གཉིས་ལ་རྩ་སྔགས་འབུམ་བཞི་རེ། ལས་སྦྱོར་ཁྲི་གཅིག་ཙམ་བཟླ་ཞིང༌། འབྲེལ་འཇོག་ཙམ་ལ་བདུན་ཕྲག་གསུམ། སྒྲུབ་པ་བདུན་གཅིག་ལས་སྦྱོར་ཉིན་གསུམ་ཙམ་བྱས་ཀྱང་རུང་ངོ༌། །དེ་དག་གི་ཚེ་བསྙེན་སྒྲུབ་ལ་འཇུག་པའི་ཐོག་མཐའ་དང༌། ཡར་མར་གྱི་ཚེས་བཅུ་སོགས་དུས་བཟང་པོ་ལ་ཚོགས་མཆོད་ཀྱང་བྱ་བ་གལ་ཆེ་ཞིང༌། བསྙེན་སྒྲུབ་གྲུབ་པའི་རྗེས་དཀྱིལ་འཁོར་ཚུལ་བཞིན་བཤམས་ཏེ་བདག་འཇུག་གིས་ལམ་དབང་ལེན་པའང་གྲུབ་ན་ལེགས་པ་སོགས་གསང་བ་སྤྱི་ལྟར་རོ། །གསུམ་པ་སྒྲུབ་པ་ཟབ་མོ་རྫོགས་པའི་རིམ་པ་ཀ་དག་ཟང་ཐལ་གྱི་རྣལ་འབྱོར་ཉམས་སུ་ལེན་པ་ལ་སེམས་རིག་ཤན་འབྱེད་ཞི་ལྷག་གི་རྣལ་འབྱོར་གྱིས་གེགས་སེལ། རིག་པ་ལྟ་སྒོམ་སྤྱོད་འབྲས་ཀྱི་རྣལ་འབྱོར་གྱིས་བོགས་དབྱུང་བའི། དང་པོ་ལའང་གཉིས་ལས། དང་པོ་སེམས་མི་གནས་པ་གནས་པར་བྱེད་པའི་ཐབས་ནི། རྩ་བ་ལས། བློ་བྲལ་ཁྱབ་བརྡལ་སོགས་ནས་གནད་ཀྱང་མཐོང༔ ཞེས་པ་སྟེ་དབྱིངས་ཀ་དག་ཟང་ཐལ་གྱི་གནས་ལུགས་དངོས་སུ་རྟོགས་ན་འཁྲུལ་པ་གཞི་མེད་དུ་དག་ནས་ཡེ་གྲོལ་གྱི་དགོངས་པའི་ཀློང་དུ་གྲོལ་བར་ངེས་ན་ཡང༌། རིག་རྩལ་ཚོགས་དྲུག་གི་ཡུལ་ལ་ཤར་ཏེ་ཆགས་སྡང་རྨོངས་གསུམ་གྱིས་ཀུན་གཞི་ཉོན་ཡིད་ཀྱི་སྟེང་དུ་ལས་བསགས་པའི་འཁྲུལ་པས་ཁམས་གསུམ་རིགས་དྲུག་ཏུ་འཁྱམས་པའི་ཉེར་ལེན་ཐམས་ཅད་སེམས་ལ་ཐུག །སེམས་འདི་དག་པ་ལྷ་དང་བླ་མ། མ་དག་པ་དགྲ་གཉེན་གང་ལ་ཤར་ཡང་ཤར་སའི་གཞི་དེར་བལྟས་ནས་སེམས་བཟུང་བས། རྣམ་རྟོག་གི་ཕྲེང་བ་ལུ་གུ་རྒྱུད་ཅིག་ལ་སེམས་སུ་བཏགས་པར་གོ །རྣམ་རྟོག་དེ་དུས་གསུམ་གྱི་ཟླས་ཕྱེ་བས་དཔྱད་ན་སིལ་བུ་ཡིན། འདས་པ་ནི་དངོས་མེད། ད་ལྟ་བ་སྣང་ཙམ། མ་འོངས་པ་མ་སྐྱེས་པས་དེ་དག་གཅིག་ཏུ་ཇི་ལྟར་འབྲེལ། མཚན་ཉིད་མི་མཐུན་པས་འབྲེལ་ཡང་དོན་ཇི་ལྟར་བྱེད་དཔྱད་གཞིགས་དུ་མས་གཏན་ལ་ཕབ་པས་མེད་བཞིན་སྣང་བ་ཞིག་ལ་སེམས་སུ་སྒྲོ་བཏགས། དེ་གང་ལས་བྱུང་ན་ཆོས་ཉིད་རིག་པའི་རང་རྩལ་ལས་བྱུང༌། སེམས་ནི་དང་པོ་རི་གཟར་གྱི་འབབ་ཆུ་ལྟར་མི་བརྟན་པ་དྲག་ཏུ་འགྱུ་བ། གཉིས་པ་ལྷོ་སྤྲིན་ལྟར་བན་བུན་དུ་འགྱུ་བ། གསུམ་པ་ཆུ་ཀླུང་དལ་འབབ་ལྟར་ལྷོད་ཆགས་པ། བཞི་པ་རླབས་དང་བྲལ་བའི་རྒྱ་མཚོ་ལྟར་གཞི་ཐོག་ནས་མི་གཡོ་བ་རྣམས་ཀྱི་ཉམས་རིམ་གྱིས་འབྱུང་བས་བསྐྱངས། དེའི་ཚེ་བདེ་གསལ་མི་རྟོག་པའི་འཆར་སྒོ་བྱུང་ན་སྣང་སྟོང་བདེ་བ་ཆེན་པོའི་ལམ་དུ་ཁྱེར་ཏེ་རེ་དོགས་དང་བྲལ་བར་བྱས་པས། སེམས་སྐྱེ་འགག་གནས་བྲལ་ཆོས་ཉིད་སྟོང་པ་ཉིད་ལ་ངེས་པ་རྙེད་ན་དེ་ཀ་སྐྱོང་དུ་གཞུག །ད་དུང་ངོ་མ་འཕྲོད་ན་བྱུང་གནས་འགྲོ་གསུམ་གྱིས་སེམས་འཚོལ་ཞིབ་མོར་བཏང༌། ནམ་ཞིག་གནས་ཐོག་ཏུ་འཛིན་པ་ཟད་པ་རང་གྲོལ་ཀ་དག །འགྱུ་ཐོག་ཏུ་འབད་རྩོལ་མེད་པར་རང་ཤུགས་ལྡིང་འགྲོས། གནས་འགྱུ་གཉིས་མེད་གཞི་ཐིམ་ལ་སོང་ནས་ངོ་བོ་སྟོང་པ། རང་བཞིན་འོད་གསལ། ཐུགས་རྗེ་འགག་མེད་ཀྱི་ཡེ་ཤེས་སྒྲ་ཇི་བཞིན་སོ་སོ་རང་རིག་གིས་ཉམས་སུ་མྱོང་བས་རིག་པ་རང་མལ་གྱི་ཆོས་སྐུ། ཕྱལ་བ་བར་མེད་རྒྱ་ཡན། རང་བབ་རྣལ་མའི་བཞུགས་ཚུལ། ཟང་ཐལ་སྐྱེ་མེད་ཀྱི་རང་ངོ་ཉམས་སུ་མྱོང་བས་སྲིད་གསུམ་ཀ་དག་གི་དགོངས་པར་ངོ་འཕྲོད་པའོ། །གཉིས་པ་ནང་སེམས་ཐོག་ཏུ་འཇོག་པ་གནས་པ་བརྟན་པར་བྱེད་པའི་ཐབས་ནི། ཕྱོགས་སུ་མ་ལྷུང་སོགས། ལྷོད་དེ་གསལ༔ ཞེས་པ་ལ་གསུམ་ལས། དང་པོ་ཐག་གཅིག་ཐོག་ཏུ་བཅད་པ་སྟེ་འདི་ལྟར་ཕྱི་ཡུལ། བར་ལུས། ནང་སེམས་དང་བཅས་པ་གཞི་མེད་སྣང་སྟོང་ཆོ་འཕྲུལ་ཙམ་དུ་ཤར་བ་ལས་གདོད་ནས་བདེན་རྫུན་གྱི་མཐའ་ལས་འདས། དང་པོ་འཁྲུལ་མ་མྱོང༌། ད་ལྟར་འཁྲུལ་པ་ལ་མི་གནས། ཐ་མ་འཁྲུལ་མི་སྲིད་པ་སྲིད་གསུམ་ཀ་དག་གི་དགོངས་པ་ཆོས་ཉིད་རང་གི་འདུག་ཚུལ་ཚིག་གིས་བརྗོད་དུ་མེད་པ། བློས་བསམ་དུ་མེད་པ། དཔེས་མཚོན་དུ་མེད་པའི་ངང་དུ་ཀུན་རྫོབ་བག་ཆགས་རྣམ་རྟོག་གི་རྫུན་ཕུག་བརྡིབས་ཏེ་རང་ངོ་རང་གིས་ཤེས་པ་ནི་ཐག་ཆོད་པ་སྟེ། དེའི་སྐབས་ཕྱི་ཉིན་མཚན་དུ་སོང་བ་མི་ཚོར། ནང་ཏིང་འཛིན་གསལ་འགྲིབ་མི་ཚོར། མི་རྟོག་བག་ཉལ་གྱི་ངང་དུ་བྱིང་ན་དེ་གའི་ངང་དུ་མཉམ་པར་བཞག་པས་སྐབས་ཤིག་རྐྱེན་བཟང་ངན་ཞིག་གིས་བསྐུལ་ནས་ངེས་པར་འཕྲོ་འོང༌། འཕྲོ་མཁན་ཁ་ཡན་དུ་མ་ཤོར་བར་བསྐྱངས་པས་བྱིང་བའི་སྐྱོན་དག་པས་གསལ་སྟོང་མཉམ་ཉིད་དུ་གྲོལ། རྒོད་པ་ལ་སྐྱེ་མེད་རྡོ་རྗེའི་བཟླས་པ་སྐབས་དང་སྦྱར་ཏེ་རང་ངོ་སྐྱོང་བ་ཟབ། གཉིས་པ་ངོ་རང་ཐོག་ཏུ་སྤྲོད་པ་སྟེ། རང་རིག་ཟང་ཐལ་ཅི་ཡང་མ་གྲུབ་པ་སྟོང་ཆ་ནས་སངས་རྒྱས་ཆོས་སྐུ། རང་མདངས་འགག་མེད་ལོངས་སྐུ། རང་རྩལ་མ་ངེས་སྣ་ཚོགས་སྤྲུལ་སྐུ། ལྡོག་པ་ཐ་དད་ལས་ངོ་བོ་གཅིག་ཏུ་བསྡུས་པ་ངོ་བོ་ཉིད་སྐུ་སྟེ། སྲིད་ཞིའི་ཁམས་ཀྱི་ཆེ་བའི་ཡོན་ཏན་ལྷུན་རྫོགས་ཀྱི་གཤིས་ལུགས་ཞེན་འཛིན་མ་གྲོལ་བའི་ཨ་འཐས་ཀྱི་ཞི་གནས་ལྟིང་པོ་དང་མ་ནོར་བ་གཉིས་མེད་ཡེ་ཤེས་ཀྱི་སྤྱོད་ཡུལ་དུ་ལམ་ཁྱེར་བྱ་བ་གལ་ཆེ། །གསུམ་པ་གདེང་གྲོལ་ཐོག་ཏུ་བཅའ་བ་ལ། དེ་ལྟར་བསྐྱངས་པས་ཤར་གྲོལ་གྱིས་ཞེན་འཛིན་གྱི་རྟོག་པ་དག་པ། ཅེར་གྲོལ་གྱིས་མི་རྟོག་པའི་རྣམ་རྟོག་དག་པ། རང་གྲོལ་གྱིས་ཚོར་བ་ངོ་མི་ཤེས་པའི་རྣམ་རྟོག་དག་པ། ཡོངས་གྲོལ་གྱིས་སྟོང་ཉིད་ངོ་མི་ཤེས་པའི་རྣམ་རྟོག་དག་པར་བསྐྱངས་པས་སངས་རྒྱས་ཀྱི་དགོངས་པ་མངོན་དུ་འགྱུར་བའོ། །གཉིས་པ་རིག་པ་ལྟ་སྒོམ་སྤྱོད་འབྲས་ཀྱི་རྣལ་འབྱོར་གྱིས་བརྟན་པ་བོགས་དབྱུང་བ་ལ། ལྟ་སྒོམ་སྤྱོད་འབྲས་བཞི་ལས། དང་པོ་ལྟ་བ་གྲོང་ཁྱེར་རྒྱུན་གཅོད་ནི། སྣ་ཚོགས་ཡུལ་སྣང་སོགས། རུང་བ་ཤེས༔ ཞེས་པ་སྟེ་ཕྱི་ཡུལ་སྣང༌། ནང་ཕུང་ཁམས་སྐྱེ་མཆེད། གསང་བ་ཤེས་རིག་གི་ཆ་ལ་དེར་འཛིན་གྱི་བག་ཆགས་སྣ་ཚོགས་རྣམ་རྟོག་གི་བརྫུན་ཕུག་རྡིབ་སྟེ་གཟུང་འཛིན་རང་གྲོལ་གྱི་ངང་དུ་ཆགས་སྡང་རེ་དོགས་ཀྱི་མདུད་པ་ཞིག་པས། རང་རྩལ་གྱི་སྣང་ཆ་སྐུ་གསུམ་ལྷུན་གྲུབ་ཡེ་ཤེས་ཀྱི་རོལ་པ་ལྷའི་འཁོར་ལོར་དག་པའི་དབྱིངས་དང་ཡེ་ཤེས་གཉིས་སུ་མེད་པའི་ཡིན་ལུགས་རྟོགས་པ་ནི་ལྟ་བའི་རྒྱལ་པོ་ཞེས་བྱའོ། །གཉིས་པ་སྒོམ་པའི་མན་ངག་རི་བོ་ཅོག་བཞག་ནི། དབང་པོ་མི་འགུལ་སོགས། ད་གདོད་ཤེས༔ ཞེས་པ་སྟེ་མ་བཅོས་དབྱིངས་རིག་གི་སྒོམ་པ་སོ་མའི་ངང་དུ་དབང་པོའི་དྭངས་མ་མིག་མི་འགུལ། ཕྱིར་མི་འཕྲོ། ནང་དུ་མི་སྡུད། ཡུལ་རྗེས་སུ་མི་འབྲང་བར་ཚོགས་དྲུག་གང་ཤར་འཛིན་མེད་ཀ་དག་ཆེན་པོའི་དབྱིངས་ལ་གཟིར་བས་སྣང་ཞེན་རང་སར་གྲོལ་ཏེ་ཇི་ལྟར་ཤར་ཡང་རིག་པའི་གསལ་འདེབས་ཀྱི་རྒྱན་དུ་འཆར་བས་ཕྱི་སྣང་བས་ནང་ཏིང་ངེ་འཛིན་གྱི་རྩལ་མ་བཀག །ནང་གི་རིག་པས་ཕྱི་སྣང་བའི་གོ་མི་བཀག །བསྒོམ་བྱ་སྒོམ་བྱེད་གཉིས་སུ་མེད་ཀྱང་ཡེངས་པ་ཐ་མལ་དུ་མ་ཤོར་བ་ནི་སྒོམ་པའི་རྒྱལ་པོ་ཞེས་བྱའོ། །གསུམ་པ་སྤྱོད་པ་ཁམས་གསུམ་ཡོངས་གྲོལ་གྱི་དགོངས་པ་ནི། ནང་གི་སེམས་ཀྱི་སོགས། བབ་ཀྱིས་ཤེས༔ ཞེས་པ་སྟེ་རང་གི་རིག་པ་འཛིན་མེད་ལ་ཕྱི་ཡི་སྣང་སྲིད་རང་གྲོལ་དུ་ཤར་ནས་གཡོ་འཁྲུག་མ་ནུས་པས་རེ་དོགས་ཁུང་རྡིབ་ཚེ་ཡུལ་སེམས་ཀྱི་སྤྱོད་པ་ཐམས་ཅད་ཡེ་ཤེས་གཅིག་ཏུ་དག་པས་སྤོང་སྒྱུར་གྱི་ལམ་བྱེད་གཞན་ལ་མ་ལྟོས་པར་དམིགས་བསམ་སྤྲོ་བསྡུ་བྲལ་བའི་ཐབས་མཁས་ཀྱིས་དབང་བསྒྱུར་བས་འོད་གསལ་སྒྱུ་མ་རང་གྲོལ་གྱི་རྣལ་འབྱོར་གྱི་སྤྱོད་པ་མཆོག་གི་སྐྱེལ་སོ་རུ་ཤེས་པར་བྱའོ། །བཞི་པ་འབྲས་བུ་ལྷུན་རྫོགས་ཆེན་པོ་ནི། དབྱིངས་ཀྱི་ངོ་བོ་ཆོས་སྐུ་སོགས། གནད་དུ་བསྣུན༔ ཞེས་པ་སྟེ་སྐུ་གསུམ་དབྱེར་མེད་མི་འགྱུར་རྡོ་རྗེའི་སྐུ་དང༌། དེ་དག་ཀྱང་གདོད་ནས་ལྷུན་གྲུབ་མངོན་པར་བྱང་ཆུབ་སྟེ་སྐུ་དང་ཡེ་ཤེས་ལྔ་ལྡན་རང་ངོ་ལྷུན་གྲུབ་ཀྱི་ཆོས་སུ་གྱུར་པས་ན་མ་དག་འཁྲུལ་པའི་ཁྱད་ཆོས་ཡེ་ནས་མི་དམིགས་པའི་དབྱིངས་སུ་བཙན་ས་ཟིན་པ་འབྲས་བུ་སྟེ། དེ་ལྟར་བསྟན་པ་དེ་དག་ཀྱང་རྣམ་པའི་ལྡོག་ཆས་དབྱེ་བ་ཙམ་ལས། དོན་ལ་ཐ་དད་དུ་མི་གནས་པ་ཆོས་དབྱིངས་བརྡལ་བ་ཆེན་པོ་གཅིག་གི་ངོ་བོར་གྱུར་པ་སྟེ་རྣལ་འབྱོར་དེ་དག་ཀྱང་རིམ་སྐྱེས་དང༌། ཐོད་རྒལ། གཅིག་ཅར་གྱི་འཇུག་ཚུལ་གང་ཟག་སོ་སོའི་ཁྱད་པར་ལས་མཐའ་གཅིག་ཏུ་ངེས་བཟུང་བྱར་མེད་དོ། །བཞི་པ་སྒྲུབ་པ་ཆེན་པོ་འོད་གསལ་ལྷུན་གྲུབ་ཀྱི་ཉམས་ལེན་ལ་དངོས་དང༌། མཐའ་རྟེན་གཉིས་ལས། དངོས་ལའང་གསུམ། གནད་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་ནི། སྒྲོན་མའི་འོད་གསལ་སོགས། ཐལ་བྱུང་ཟད༔ ཅེས་པ་སྟེ་རྡོ་རྗེའི་ལུས་ལ་རྩ་རླུང་ཐིག་ལེ་ཡེ་ཤེས་ཀྱི་ཁམས་རྣམས་རྟེན་བརྟེན་པའི་ཚུལ་དུ་འབྲེལ་བ་ལས། སྐབས་འདིར་གནད་དུ་བསྣུན་བྱའི་ལམ་གྱི་གཙོ་བོ་འོད་གསལ་གནས་པའི་རྩ་ཁྱད་པར་བཞི་ལྡན་ཞེས་ཀ་ཏི་གསེར་གྱི་རྩ་ཆེན་དབུ་མ་དང་སྙིང་གི་དབུས་ན་ཀུན་བཟང་གཞིའི་ཐིག་ལེ་དར་དཀར་སྣལ་མ་ལྟ་བུ། ཚངས་བུག་ལ་བསྟན་པ་ཕྲ་ལ་འདྲིལ་བ་འཁོར་ལོ་བཞིའི་དབུས་ན་འོད་ལྔའི་ཐིག་ལེ་ཐིག་ཕྲན་གྱི་ཚུལ་དུ་གནས་པ། ཤེལ་སྦུག་ཅན་ནི་སྙིང་ནས་མིག་ཏུ་འབྲེལ་བ་རྡོ་རྗེ་ལུག་རྒྱུད་ཀྱི་རྟེན་བྱེད་པ་སྟེ། གཟོད་ནས་གནས་ཀྱང་ངོ་བོ་སྟོང་པ་ལ་ཀུན་གཞི་ཚོགས་བརྒྱད་ཀྱིས་བསྒྲིབས། རང་བཞིན་གསལ་བ་ལ་གདོས་བཅས་ཤ་ཁྲག་གིས་བསྒྲིབས། ཐུགས་རྗེའི་རིག་རྩལ་ལས་དང་བག་ཆགས་ཀྱིས་བསྒྲིབས་པ་མངོན་དུ་སད་པར་བྱ་བའི་ཕྱིར། ལུས་གནད་བཞུགས་སྟངས་གསུམ་བྱ། ངག་གནད་མི་སྨྲ་བར་རླུང་རིག་ཤིན་ཏུ་དལ་བ། སེམས་གཏད་མེད་ཀྱིས་སྒོ་ཡི་གནད་གཟིགས་སྟངས་གསུམ་གྱིས། ཡུལ་གནད་ནམ་མཁའ་སྤྲིན་བྲལ་དང་ཉི་ཟླ་ལ་བརྟེན་ཏེ་བསླབ་པས། ཉམས་ཀྱི་སྣང་བ་བཞི་པོ་རིམ་གྱིས་ཤར་ནས་རྩལ་རྫོགས་པར་བྱས་ཏེ་སྒོ་གསུམ་འོད་གསལ་དུ་གྲོལ་བའོ། །གཉིས་པ་ལམ་སྣང་བ་བཞིའི་ས་མཚམས་ནི། མངོན་སུམ་རྟོགས་པའི་སོགས། འཁྱིལ་བས་བདེ༔ ཞེས་པ་ལྟར་གནད་ཀྱིས་དབྱིངས་རིག་གཅུན་པས་རིག་རྩལ་ནམ་མཁའ་ལ་འཕུལ་ཏེ་དབྱིངས་སྣང་ལུ་གུ་རྒྱུད་དང་བཅས་དཀར་ཟ་ཟི་ཁྲ་ཁྲོ་དང༌། ཐིག་ལེ་སྟོང་སྒྲོན་སུམ་འབྲེལ་སོགས་མངོན་གྱུར་གྱི་སྒོ་རྒྱང་ཞགས་དང༌། ལྐོག་གྱུར་གྱི་སྒོ་སྙིང་ནས་གློ་བར་འབྲེལ་བའི་རྩལ་ལས་གཡོས་ཏེ་འཆར་ཞིང་རིག་པ་སྟོང་གསལ་འགག་མེད་དུ་འཆར་བས་ཡེ་ཤེས་སུམ་ཆ་ལ་དབང་ཞིང་རྟགས་ལུས་ངག་ལ་འཆར་ཡང་དགག་སྒྲུབ་མི་བྱ་ཞིང་སྐྱོང་བ་ཚོགས་ཀྱི་ལམ་མོ། །དེའི་ཚེ་ཤེས་ཉམས་བདེ་གསལ་མི་རྟོག་པ་སོགས་ཤར་ཡང་མི་བརྟན་ལ། སྣང་ཉམས་འོད་ལྔའི་སྣང་བ་རྩིབས་ཤར། གྱེན་འགྲེང༌། མདུང་རྩེ་དང་རེ་ལྡེའི་རྣམ་པ་དང༌། པདྨ་སྟོང་ལྡན། མཆོད་རྟེན་བརྩེགས་པ། ཐིག་ལེ་མེ་ལོང༌། འཁར་གཞོང༌། བསེ་ཕུབ་ཙམ། འོད་ཀྱང་ཡུལ་གྲུ་དང་གར་བལྟས་ཁྱབ་པར་གསལ། རིག་པ་ལ་ཉིན་མཚན་མེད། ལུས་ལ་གཉེར་མ་མེད། ཟས་སྐོམ་མི་འདོད། རང་སྣང་ལས་འབྲལ་མི་ཕོད། དགྲ་གཉེན་གྱི་འཁྲུལ་པ་ཞིག་སྟེ་ཕྱིའི་སྣང་བ། ནང་དུ་སྒྱུ་ལུས། གསང་བ་རླུང་སེམས་སྡོད་པས་འཁྲུལ་པའི་སྣང་བ་ནུབ་ནས་ཡེ་ཤེས་ཀྱི་སྣང་བ་འཆར་བ་ནི་ཉམས་གོང་འཕེལ་སྦྱོར་ལམ་མོ། །ཕྱི་ས་རྡོ་རི་བྲག་གི་སྣང་བ་ནུབ་ནས་ཐིག་ལེ་རེ་རེའི་ནང་དུ་རིགས་ལྔ་ཡབ་ཡུམ་གྱི་སྐུ་སོགས་དག་པའི་སྣང་བས་སྟོང་གསུམ་འཇིག་རྟེན་གྱི་ཁམས་གང་སྟེ། རིག་པ་དབྱིངས་ཀྱི་གཟེར་ཐེབས་ནས་ལམ་སྨིན་ཏེ་ལུས་ཟང་ཐལ་དུ་འགྲོ། ལྔ་ལྡན་སྐུ་རུ་སྨིན་པ་རིག་པ་ཚད་ཕེབས་ཏེ་མཐོང་ལམ་མོ། །གདོས་བཅས་ལུས་དང་སེམས་ཀྱི་སྤྲོས་པ་ཟད་དེ་སྔར་གྱི་རྟགས་རྣམས་སྐྱེ་མེད་ཀྱི་ངང་དུ་མྱ་ངན་འདས་པ་ཞེས། གདོས་བཅས་ལུས་ཀྱི་སྤྲོས་པ་ཟད་ནས་གཉིས་མེད་ཀུན་ཏུ་བཟང་པོའི་ཀློང་དུ་འདྲེས་ཏེ་ཆོས་ཅན་དང་ཆོས་ཉིད་ཀྱི་སྤྲོས་པ་ཟད་སར་འཁྱོལ་བསྒོམ་ལམ་ས་དགུ་སྟེ། སྐྱེ་འཇུག་ལ་དབང་ཐོབ་པའོ། །དེ་ལྟར་སྣང་བ་གསུམ་གྱི་སྐབས་རིག་པའི་ངོ་བོའི་སྣང་བ་ཆེར་གསལ་བ་དང༌། ཟད་པའི་སྐབས་ཕྱིར་འགྲིབ་པ་མེད་པ་ཆོས་ཉིད་གཅིག་ལ་འཕོ་འགྱུར་མེད་ཀྱང་ལམ་གྱི་སྣང་ཆ་མ་དག་འཁྲུལ་པའི་སྦུབས་བརྡོལ་པས་སྣང་བ་ཕྱི་གསལ་དུ་ཤར་ཏེ་འཕེལ་བ་དང༌། སྤྲོས་སྣང་གི་བག་ཆགས་ཆ་དང་བཅས་པ་དག་ནས་ཞེ་འདོད་མཐའ་དག་ཟད་པ་ངོ་བོ་ཀ་དག་གི་ཀློང་དུ་གྲོལ་བའི་གདེང་ཐོབ་པས་སྣང་བ་དབྱིངས་སུ་བསྡུས་ནས་བཅུ་གཅིག་ཀུན་ཏུ་འོད་ཀྱི་ས་ལ་ཕྱིན་ཏེ། སྐུ་གསུམ་འདུ་འབྲལ་མེད་པ་རང་ལ་གནས་པ་དོན་གྱི་འོག་མིན་གྱི་གནས་སུ་བྱང་ཆུབ་པའོ། །གསུམ་པ་འབྲས་བུའི་མཐར་ཐུག་བསྟན་པ་ནི། ཟག་པ་འབྱུང་བ་སོགས། ཨ་ཏི་ཧོ༔ ཞེས་པ་སྟེ་དེ་ལྟར་ཉམས་སུ་ལེན་པའི་ཚེ་མི་འགུལ་བ་གསུམ་གྱིས་གཞི་བཅའ། སྡོད་པ་གསུམ་གྱིས་ཚད་བཟུང༌། ཐོབ་པ་གསུམ་གྱིས་གཟེར་བཏབ་སྟེ་ཉམས་སུ་བླངས་པས་ཆོས་ཉིད་ཕྱིན་ཅི་མ་ལོག་པ་རྟོགས་ནས་ཕྱི་ནང་གསང་བའི་ཟག་པ་ཟད་ནས་ལུས་འོད་སྐུ། ངག་ནཱ་ད། སེམས་ཆོས་སྐུའི་ཀློང་དུ་གཏན་སྲིད་ཟིན་ཏེ་ཡང་དག་པར་སངས་རྒྱས་པ་དང༌། མངོན་པར་རྫོགས་པར་སངས་རྒྱས་པའི་རྟགས་ཚད་མངོན་དུ་གྱུར་ནས་སྐུ་བཞི་ལྷུན་གྱིས་གྲུབ་པའི་དཔལ་ལ་རྟེན་འདིར་སྤྱོད་པའི་སྐལ་བཟང་དུ་ངེས་པར་འགྱུར་རོ། །གཉིས་པ་ཞར་བྱུང་མཐའ་རྟེན་མན་ངག་བཤད་པ་དང་མཇུག་བསྡུ་བ་ནི། བར་དོ། འཕོ་བ། གཅོད་ཡུལ་གསུམ་ལས་དང་པོ་བར་དོ་ལམ་ཁྱེར་ནི། རྒྱུ་འབྲས་མཐར་ཕྱིན་གྲོལ་སོགས། བཙན་ས་ཟིན༔ ཞེས་པ་སྟེ་རིག་པ་སྙིང་གར་གནས་དུས་གཞིའི་ཆོས་སྐུ། རྩ་དང་དབང་པོའི་སྒོར་ཤར་དུས་རྩལ་གྱི་ཆོས་སྐུ། དབྱིངས་ལ་འཆར་དུས་རོལ་པའི་ཆོས་སྐུ། དེ་གསུམ་དབྱེར་མེད་འབྲས་བུའི་ཆོས་སྐུ་སྟེ། དེའི་རང་མདངས་སྐྱེ་འཆི་བར་དོའི་སྣང་བ་གང་ཤར་ཡང་འཁྲུལ་གྲོལ་དབྱིངས་སུ་ནུབ་པའི་ཤེས་རིག་བཀྲ་ས་ལེ་བ་ཟང་ཁ་འདི་ལས་མ་གཡོས་པར་ལམ་དུ་བྱས་པས་རང་ཞི་རང་གྲོལ་དུ་གྱུར་པ་ནི་གནད་ཀྱི་སྙིང་པོ་ཡིན་ལ། གཞན་དུ་རང་བཞིན། བསམ་གཏན། རྨི་ལམ། འཆི་ཀ །ཆོས་ཉིད། སྲིད་པ་བར་དོའི་སྣང་བའི་རྣམ་གཞག་དང༌། དེ་དག་ཏུ་གྲོལ་ཚུལ། དེ་ལས་ཀྱང་སྲིད་པ་བར་དོར་འཁྱམས་ན་རང་བཞིན་སྤྲུལ་པའི་ཞིང་དུ་དབུགས་འབྱིན་པའི་གདམས་པ་བཅས་ཁྲིད་རིམ་སྤྱི་དང་བར་དོ་འཇའ་ཕུང་རང་གྲོལ་ལྟར་ཉམས་སུ་བླང་བར་བྱ་དགོས་སོ། །འདི་དག་གི་སྐབས་སུ་འོད་གསལ་དང་རྨི་ལམ་བཟུང་ན་སྙིང་དབུས་ཉི་ཟླའི་གྭའུའི་དབུས་སུ་བླ་མ་ཧེ་རུ་ཀཿདམར་པོ་ཡབ་ཡུམ་ཞལ་སྦྱོར་གྱི་ཐུགས་ཀར་འོད་ལྔའི་འཁོར་ལོའི་སྦུབས་སུ་ཨཿདམར་པོ་ཚེག་དྲག་ཅན་སྤུས་བྲིས་པ་ཙམ་ལ་ཤེས་པ་གཏད་དེ། ཨོཾ་ཨཱཿཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿདང༌། ཨཱ་ལི་ཀཱ་ལི་སྤེལ་ཏེ་བཟླས་པའི་ངང་དུ་གཉིད་ལོག་པས་སྣང་བ་སེམས་ཉིད་ཟ་ཟི་བའི་སྐབས། མཆེད་པ་རྨི་ལམ་གསལ་བ། ཐོབ་པ་རྨི་ལམ་ཆོས་ཉིད་དུ་ངོ་ཤེས་པ། ཉེར་ཐོབ་གཉིད་ལོག་མ་ལོག་དབྱེ་བ་མེད་པ་ཆོས་ཉིད་དང་འདྲེས་པས་རྨི་ལམ་འབྱོངས་པ་སྟེ། དེའི་བར་དུ་སད་འབྱམས། བརྗེད་འབྱམས། སྟོང་འབྱམས། འཁྲུལ་འབྱམས་ཀྱི་གེགས་བསལ། གཞི་ལམ་འབྲས་བུའི་འོད་གསལ་གྱི་སྤུ་རིས་ཕྱེས་སྟེ་ངོས་ཟིན་དགོས་པའང་ཞར་ལ་འཕྲོས་པའོ། །གཉིས་པ་མྱུར་ལམ་འཕོ་བའི་མན་ངག་ནི། འཁྲུལ་པས་སྒྲོ་བཏགས་སོགས། མན་ངག་གཅེས༔ ཞེས་པ་སྟེ་མདུན་གྱི་ནམ་མཁར་མཁའ་སྤྱོད་འོད་ཀྱི་གཞལ་ཡས་ཁང་སྐུ་གསུམ་རྒྱལ་བའི་ཞིང་ཁམས་ཆེན་པོའི་དབུས་སུ་ཧེ་རུ་ཀ་ཆེན་པོ་ནམ་མཁའ་འཇིགས་མེད་བླ་སྒྲུབ་གཞུང་ལྟར་གསལ་བའི་མདུན་དུ། རང་ཉིད་ཧེ་རུ་ཀ་གཅེར་བུ་རུས་རྒྱན་ཅན་ཕྱག་རྡོར་དྲིལ་འཛིན་པ་གསལ་བས་མདུན་གྱི་བླ་མ་ལ་མོས་གུས་རྩེ་གཅིག་པའི་ཡིད་ཀྱི་གསོལ་བ་དྲག་ཏུ་བཏབ་པ་དང་མདུན་གྱི་རིག་འཛིན་བླ་མའི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པ་དང་རང་གི་རྣམ་ཤེས་ཧྲཱིཿདམར་གྱི་རང་བཞིན་ཚངས་པའི་ལམ་ནས་རྒྱངས་ཀྱིས་ཐོན་ཏེ་རིག་འཛིན་བླ་མའི་ཐུགས་ཀར་སིབ་ཀྱིས་ཐིམ་པར་མོས་ལ་ཧིཀ་ཅེས་བརྗོད་ལ་འཕང༌། ཡང་ཀ་ཞེས་ཕྱིར་ཕབ། དེ་ལྟར་ཡང་ཡང་སྦྱངས་ཤིང་རྟགས་ཐོན་པར་བྱ། ཐུན་མཐར་བླ་མ་ཧེ་རུ་ཀའི་སྐུ་ལས་འཆི་མེད་ཡེ་ཤེས་ཀྱི་བདུད་རྩིའི་རྒྱུན་ཕྱུང༌། རང་གི་སྤྱི་བོ་ནས་ཞུགས་ལུས་ཀྱི་ནང་ཐམས་ཅད་གང་བས་འཆི་མེད་ཚེ་ཡི་དངོས་གྲུབ་ཐོབ་པར་བསམས་ལ། རྡོ་རྗེའི་བཟླས་པ་ཅུང་ཟད་བྱས་པས་ཚེ་གེགས་བར་ཆད་ཞི། མཐར་དགེ་བ་བསྔོ་ཞིང་སྨོན་ལམ་བྱའོ། །ནམ་ཞིག་དུས་ལ་བབ་ཚེ་དམིགས་པ་སྔ་མ་ལྟར་ལ་མཐར་བླ་མའི་ཐུགས་ཀ་ནས་དྭངས་མའི་འོད་ཟེར་ཁ་དོག་ལྔ་ལྡན་སྣམ་བུ་ལྟར་བརྐྱངས་ཏེ་མདུན་དུ་ཤར་གྱིས་བྱུང་བ་དང༌། རང་ཉིད་དཔའ་བོ་ཌཱ་ཀིའི་སྤྲིན་ཕུང་འབུམ་ཕྲག་དང་བཅས་ཡེ་ཤེས་རླུང་གི་འཁོར་ལོ་བསྐྱོད་ནས་བླ་མའི་ཐུགས་ཀར་ཐིམ་པར་བསམས་ལ་བརྗོད་བྲལ་ཏིང་ངེ་འཛིན་གྱི་ངང་དུ་མཉམ་པར་བཞག་པས་མཁའ་སྤྱོད་དག་པའི་ཞིང་དུ་དབུགས་འབྱིན་པའི་མན་ངག་བྱ་སླ་ལ་ཐབས་ཟབ་པས་དམིགས་སུ་བཤད་པའོ། །གསུམ་པ་གཅོད་ཡུལ་གདམས་པའི་གནད་གཟེར་ནི། སྣང་བའི་བདེ་སྡུག་སོགས། རྣམ་པར་འཕྲོ༔ ཞེས་པ་སྟེ་ཀུན་གཞིའི་རང་མདངས་ལས་གྲུབ་པའི་ཕྱི་སྣང་བ། ནང་དུག་ལྔ། བར་ལྷ་འདྲེའི་བདེ་སྡུག་གི་ཆོ་འཕྲུལ་མཐའ་ཡས་པ་རྣམས་ཡེ་གྲོལ་ཆོས་དབྱིངས་སྐྱེ་མེད་ཀ་དག་གི་དབྱིངས་ཤེས་རབ་ཕར་ཕྱིན་རྒྱལ་བའི་ཡུམ་གྱི་དགོངས་པའི་ཀློང་དུ་ཟད་སར་བསྐྱལ་ནུས་པའི་གདེང་བྱུང་ན་འགལ་རྐྱེན་དེ་དག་ལམ་གྱི་བོགས་འབྱིན་དུ་བྱེད་པའི་གདམས་ངག་གི་གསེང་ལམ་རྨད་དུ་བྱུང་བ་སྟེ། དེ་ཉིད་ཉམས་སུ་ལེན་པའི་གནས་ཀྱང་དུར་ཁྲོད་མཚོ་གླིང་བྲག་རིའི་ཁོངས་སོགས་ཡ་ང་བག་ཚ་ཁུ་འཕྲིག་སྐྱེ་བའི་གནས་སུ་རང་ཉིད་ཆོས་སྐུ་ཡུམ་ཆེན་རྡོ་རྗེ་ཕག་མོའི་འཁོར་དུ་སྣང་སྲིད་ཀྱི་དཔའ་བོ་མཁའ་འགྲོས་བསྐོར་ནས་ཧཱུྃ་སྒྲ་འབྲུག་སྟོང་ལྡིར་བ་ཙམ་གྱིས་འཁྲུལ་སྣང་གཏད་མེད་དུ་བཤིག །ཚོགས་བརྒྱད་འཁྲུལ་པའི་ལྷ་འདྲེ་ཡེ་ཤེས་ཀྱི་དབྱིངས་སུ་བསྒྲལ་བར་མོས་ལ་ལྟ་བའི་ངང་བསྐྱངས། ཐུན་མཚམས་ཀྱི་ཉམས་ལེན་དུ་རང་ལུས་གདོས་བཅས་ཤ་ཁྲག་སྦྲུལ་ཤུན་བརྗེས་པ་ལྟར་དོར་ཏེ་རང་རིག་དྭངས་མ་སྐད་ཅིག་གིས་རྡོ་རྗེ་ཕག་མོར་གསལ་བ་ནམ་མཁར་འཕགས། ནམ་མཁའི་དབྱིངས་སུ་གཙོ་མཆོག་རྡོ་རྗེ་ཕག་མོ་ལ་རིགས་བཞིའི་ཌཱ་ཀི་ཕྱོགས་མདོག་མཚམས་བཞིར་ཕྱེད་གཟུགས་ཅན་གྲི་ཐོད་འཛིན་པ་གར་བསྒྱུར་བའི་གསང་བ་ནས་བྱང་སེམས་བདུད་རྩི་དཀར་དམར་གྱི་རྒྱུན་བབས་པ་རང་གི་སྒྱུ་ལུས་དང་འདྲེས་པས། སྟོང་གསུམ་གང་བའི་མི་མགོའི་སྒྱེད་པུའི་སྟེང་དུ་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བསྐྱིལ་ཏེ། ཆོས་དབྱིངས་ཀྱི་ཁྱོན་གང་བ་བསྐལ་པ་མ་སྟོང་བར་གནས་པ་ཁ་དོག་དྲི་རོ་མི་ཟད་པའི་འདོད་ཡོན་ཅིར་ཡང་འཆར་བས། བརྒྱུད་གསུམ་རིག་འཛིན་བླ་མ། རྩ་གསུམ་རྒྱལ་བ་རབ་འབྱམས། ཆོས་སྲུང་དཔའ་བོ་ཌཱ་ཀི །མཁའ་ཁྱབ་རིགས་དྲུག་སེམས་ཅན། ཕྱི་ནང་གསང་བའི་སྡེ་བརྒྱད། ལན་ཆགས་བགེགས་རིགས་འབྱུང་པོ་ཐམས་ཅད་ལ་ཇི་ལྟར་བཞེད་པའི་ལོངས་སྤྱོད་དུ་ཕུལ་བས་མཉེས་ཤིང་ཚིམས། སྐྱབས་ཡུལ་རྣམས་ཀྱི་སྐུ་ལས་ཟག་མེད་ཡེ་ཤེས་བདུད་རྩིའི་རྒྱུན་གྱིས་རིགས་དྲུག་བགེགས་རིགས་ཀུན་གྱི་སྒྲིབ་གཉིས་སྦྱངས་ཏེ་ཀུན་ཀྱང་དཔའ་བོ་ཌཱ་ཀིའི་རང་བཞིན་དུ་གྱུར། སྣང་སྲིད་བདེ་སྟོང་ཡེ་ཤེས་ཀྱི་འཁོར་ལོར་འབྱམས་ཀླས་པས་ཚོགས་རྫོགས། སྒྲིབ་པ་བྱང༌། བདག་གཞན་སངས་རྒྱས་ཀྱི་གོ་འཕང་ཐོབ་པར་བསམ། མཐར་སྣང་སྲིད་འཁོར་འདས་ཐམས་ཅད་སེམས་ཉིད་ཡེ་ཤེས་ཀྱི་རོལ་རྩལ་འཁོར་གསུམ་དམིགས་མེད་ནམ་མཁའ་ལྟ་བུའི་ངང་དུ་མཉམ་པར་བཞག་པས་དགེ་སྡིག །ལྷ་འདྲེ། བདེ་སྡུག སྐྱེ་ཤི། ཐམས་ཅད་རོ་མཉམ་ཆོས་ཉིད་ཀྱི་དགོངས་པའི་དབྱིངས་སུ་ཐག་ཆོད་དེ་ལམ་ཁྱེར་ནུས་པ་འབྱུང་ངོ༌། །དེ་ལྟར་སྔོན་དངོས་རྗེས་ཀྱིས་བསྟན་པ་རྣམས་ཚུལ་བཞིན་ཉམས་སུ་བླངས་པས་གང་ཟག་གཅིག་འཚང་རྒྱ་བའི་ལམ་ཡོངས་སུ་རྫོགས་པས་ན། འདི་ཉིད་ཁོ་ནས་ཀྱང་སྐྱེ་འཆི་བར་དོའི་འཁྲུལ་པ་སྐུ་གསུམ་གྱི་དབྱིངས་སུ་བསྐྱངས་ནས་རང་གྲོལ་གདོད་མའི་དབྱིངས་སུ་འཚང་རྒྱ་བ་ལ་ཐེ་ཚོམ་མེད་དེ། དོན་གྱི་གནད་སྔ་འགྱུར་བཀའ་གཏེར་གྱི་མན་ངག་ཚང་ལ་མ་ནོར་བར་བཞུགས་པ་རྣམས་དང་ཞལ་བསྡུར་བས་ཞུས་དག་འཕེར་བ་ལྟར་བཞུགས་ཤིང༌། ཚིག་གི་རིམ་པའང་བླ་མ་དང་ལྷག་པའི་ལྷས་གནང་བས་བྱིན་རླབས་ཀྱི་གོ་ཕྱེ་བའི་ངེས་ཤེས་དང་ལྡན་པས་ན། སྐལ་བཟང་མོས་པ་ཅན་དག་ལ་ཕན་པ་སྲིད་སྙམ་ནས་གཞུང་གི་དངོས་བསྟན་གྱི་དོན་རྣམས་ཚིག་ཉུང་ངུས་གསལ་བར་བྱས་པའོ། །རིག་འཛིན་ལྷ་དང་བླ་མས་བྱིན་བརླབས་པའི། །མཁའ་སྤྱོད་འབྲས་གཤོངས་བྲག་དཀར་བཀྲ་ཤིས་སྡིངས། །སྦས་པའི་གནས་ཕྱིན་བྱིན་རླབས་དབུགས་དབྱུང་ཆོས། །གསལ་བྱེད་བདུད་རྩིའི་ཐིག་ལེ་འདི་རྨད་བྱུང༌། །རབ་དཀར་དགེ་བས་རྩོད་དུས་མུན་པ་ནི། །ཡེ་ཤེས་སྣང་བས་ཐེག་དགུའི་ཟབ་ཆོས་འབྱེད། །འབྲེལ་ཚད་རྡོ་རྗེའི་དབྱིངས་སུ་ངལ་འཚོ་བའི། །དགེ་མཚན་བཀྲ་ཤིས་དཔལ་དུ་འབར་གྱུར་ཅིག །ཅེས་ལྔ་བརྒྱའི་མུན་ཁྲོད་དུ་སྐྱེས་པའི་སོ་སྐྱེ་འཆིང་བ་ཀུན་ལྡན་གྱི་རྟོག་ངོར་གསལ་བའི་ཚིག་རིས་ལ་གསལ་བྱེད་ཀྱི་ཟིན་ཐོ་བྲི་བ་རང་ཉིད་ངལ་བའི་རྒྱུ་ཙམ་དུ་ཟད་ཀྱང༌། རིགས་བརྒྱའི་ཁྱབ་བདག་ཁྲག་འཐུང་ནམ་མཁའ་འཇིགས་མེད་དངོས་བྱོན་པདྨ་ཡེ་ཤེས་རྡོ་རྗེས་ཁྱོད་ཀྱི་དགོངས་གཏེར་དགོས་པ་དང་འབྲེལ་རིགས་སྤེལ་ཞེས་ཐུན་མིན་དགོངས་གཏད་ཀྱིས་ཡང་ཡང་བཀའ་བསྩལ་པ་རྗེས་སུ་སྒྲུབ་པའི་འདུན་པ་དང༌། འཕགས་པའི་ཡོན་ཏན་རྨད་དུ་བྱུང་བ་དུ་མས་ཐུགས་རྒྱུད་མཛེས་ཤིང་ཀུན་བཟང་བཀའ་བརྒྱུད་ཀྱི་ཤིང་རྟའི་ལམ་སྲོལ་ལ་གདོད་ནས་སྨོན་ལམ་གྱིས་འབྲེལ་བའི་ཟུར་མང་དྲུང་པ་མཆོག་སྤྲུལ་འཇིགས་མེད་ནམ་མཁའ་ཆོས་ཀྱི་རྒྱ་མཚོས་ནན་ཏན་ཆེན་པོའི་གསུང་གིས་བསྐུལ་བ་དང༌། སྒྲུབ་བརྩོན་ཀུན་སྤངས་ཀརྨ་ཡེ་ཤེས་ཆོས་འཕེལ་ནས་ཀྱང་བསྙེན་སྒྲུབ་ཉམས་ལེན་མཛད་པའི་གསལ་འདེབས་ཙམ་དུ་གཏད་མེད་ཀྱི་སྨྱོན་པ་ཀུན་བཟང་འོད་གསལ་རྡོ་རྗེ་ཐུགས་མཆོག་རྩལ་ལམ་མིང་དངོས་བཀྲ་ཤིས་དཔལ་འབྱོར་མཁྱེན་བརྩེའི་འོད་ཟེར་དུ་འབོད་པས་སྦས་ཡུལ་དེ་ཉིད་དང་འདབས་འབྱོར་བའི་གུ་ཡངས་ཀྱི་གནས་སུ་བྲིས་པ་འདིས་ཀྱང་ཐེག་མཆོག་རྡོ་རྗེ་སྙིང་པོའི་ལམ་ལ་བྱ་བ་མཆོག་ཏུ་བྱེད་པར་གྱུར་ཅིག། །།

[edit]

@#__/rig 'dzin DA ki'i srog tig rdo rje snying po don gyi thol glu'i bskyed rdzogs kyi dmar khrid ye shes snang ba srog gi rgya can zhes bya ba bzhugs so// @#/__/kun 'byung zag pa zad pa'i dbyings kyi sbubs/_/'od gsal snang bzhi mthar son he ru kaH_/rdo rje khrag 'thung nam mkha' 'jigs med dang*/_dbyer med ye shes rdo rje snying dbus rol/_/bla ma'i byin rlabs skya rengs kyis/_/legs bsus zab gsang rdo rje snying*/_/bskyed rdzogs nyams len srog phur tsam/_/nyung ngu'i ngag gis rnam par dbye/_/'phags yul paN grub lnga brgya'i gtsug rgyan/_'od gsal ye shes rdo rje'i sku brnyes pa'i rig 'dzin chen po/_theg mchog rdzogs pa chen po'i shing rta paN chen bi ma la mi tra'i ye shes sgyu 'phrul drwa ba'i zlos gar rtogs pa'i dbang phyug lha btsun chen po nam mkha' 'jigs med kyi rdo rje'i byin rlabs btsan thabs su 'phos pa las rang shar ba'i/_rig 'dzin bla ma'i srog sgrub rdo rje snying po don gyi thol glu nyid/_ji ltar nyams su len pa la bsnyen sgrub yan lag bzhi las/_dang po nye bar bsnyen pa sngon 'gro'i rim pa la/_mtshan nyid dang ldan pa'i slob dpon gyis/_gdams ngag gi bcud 'dzin nus shing rdo rje'i gseng lam la dad brtson blo gros kyi sgo dang ldan pa'i slob ma rjes su 'dzin pa la/_thog mar dbang bzhi mtha' rten dang bcas pas rgyud smin par byas shing*/_rnam par dag pa'i dam tshig gis gzhi bzung ste/_ji ltar nyams su len pa'i rnal 'byor du 'jug pa la sngon 'gros rgyud sbyang ba gal che bas/_dben pa'i gnas su bsam gtan dang mthun pa'i spyod lam gyis 'khod de/_'di ltar sngon gyi sangs rgyas byang sems thams cad kyang sangs rgyas sgrub pa'i rten mi yi lus kho nar bsngags/_rten 'di ni rgyu 'bras kyi theg pa thams cad kyi lam gyi rten khyad par can yin/_'di rnyed pa'i rgyu yang zag bcas zag med kyi dge ba'i rgyu kho nas thob dgos/_de yang dge ba spyod pa'i skyes bu ni dka' bas phyis de 'dra'i lus shin tu thob par dka'/_ngan song gsum ni grangs kyang mang la sdug bsngal che/_mtho ris gsum bde 'gro'i rten yin kyang srid pa'i rtsa ba ma chod na slar yang ngan 'gror 'jug 'gro bas/_lus rten thams cad kyi rtse mo dal 'byor gyi mi lus yin pas yid bzhin gyi nor bu las lhag_/'jig rten na u dum wa ra'i me tog 'byung ba las kyang dal 'byor mtshan ldan rnyed par dka' ba sogs dpe du mas bstan pa 'di da res bdag gis thob kyang*/_'di ni nad gdon bgegs sogs 'gal rkyen du mas gtses/_'tsho ba'i rkyen phal cher yang 'chi rkyen du 'gyur ba shin tu mang bas yun ring rtag mi thub/_gnas grogs rkyen dus 'di ru 'chi zhes nges pa med/_'chi ba'i nyin par nor grogs dang gnas srog dang bcas btang ste cha med kyi yul ya nga ba'i gnas su 'gro dgos/_lus grog stong du bskyal/_btags pa'i ming yal/_sems gtad med rten med srid gsum rigs drug tu las rjes su skyabs med mgon med du 'khyams pa a re skyo/_mgo stong snying med tshe 'dir zhen pa rnams bsam mno thongs dang*/_sngon 'khor 'das gnyis su rgyab gyes pa nas 'dus byas kyi snang ba la rtag pa ye med/_phyi snod 'jig rten gnas skabs su nyin mtshan dus bzhi/_mthar me bdun chu gcig gis 'jig_/nang bcud skye 'gro'i phung khams skye mched skye rga na 'chi la 'gyur/_thams cad 'dus mtha' 'bral/_bsags mtha' 'dzad/_brtsigs mtha' 'gyel/_/skyes mtha' 'chi ba bzhis ma bsdus pa med pas chos la myur du 'jug pa gal che/_chos kyi rtsa ba rgyu 'bras bslu med la yid ches pa ste/_rgyu dge sdig so so'i 'bras bu bde sdug bslu ba med pa la brten nas rigs drug gi bde sdug bsam mi khyab pa 'di byung*/_las re re'ang rnam smin/_byed pa rgyu mthun/_myong ba rgyu mthun/_dbang gi 'bras bu ste bzhi re smin dgos/_sngon gyi rgyal ba sras bcas kyang rgyu 'bras blang dor tshul bzhin mdzad pas mthar thug gi 'bras bu mngon du gyur/_da lta bdag cag gi ston pas kyang rgyu 'bras bslu ba med pa'i tshul las brtsams te chos sgo thams cad bstan pas na nyams len gyi snying po 'di lag len du thebs pa gal che/_rgyu 'bras bslu med la bsam zhing gzhung bzhin spang blang ma nor bas dpyad na 'khor ba'i bya spyod thams cad ni ngan song gi snon ma/_dug lnga chos brgyad kyi yo lang*/_las dge sdig phyin ci log tu spyad pa/_mi rtag cing 'gyur ba/_mnar zhing mgon skyabs dang bral ba/_zla med gcig pur myong dgos pa/_sdug bsngal gyi 'byung gnas sdug bsngal gyi rten/_bde ba'i go skabs med pa/_su dang 'grogs kyang mi dge ba'i grogs/_las dang bya ba thams cad ngan song gi snon ma/_thar pa dang bde 'byor dbang med du 'phrog pa dmyal ba'i gting rum chen po 'di las nges 'byung gi bsam pas thar pa yang dag pa'i lam la 'jug dgos snyam du yang yang bsam/_'khor ba'i gnas ngan de las grol zhing*/_zhi bsil bde chen thar pa'i lam gyi btsan sa 'dzin pa la rang stobs kyis mi nus rgyab dpung du skyabs khyad par can la brten dgos pas/_rang nyid tha mal du gnas pa'i mdun gyi nam mkhar 'ja' zer gyi thig le 'od phung gi snang bas mkha' dbyings khyab par 'phros pa'i nang du phyi ltar na dkon mchog gsum/_nang ltar rtsa gsum/_gsang ba sku gsum/_thams cad don la ngo bo rang bzhin thugs rje'i ye shes gcig du gdod nas lhun gyis grub pa 'khor 'das kyi spro gzhi nyid/_rnam pa skyabs yul rgya mtsho'i snying po rig 'dzin bla ma kun 'dus yid bzhin nor bu'i tshul du bzhugs pa la yid ches kyi dad mos rtsal du sprugs pas blo gtad ling 'gel gyis skyabs su 'gro snyam zhing*/_ma rgan mkha' mnyam gyi sems can 'khor ba gting mtha' med par bying ba la/_rang nyid gcig pur thar pa 'dod pa'i blos gar yang mi phyin pas/_skyabs yul la dpang bcol te/_'gro kun thar pa bla na med pa rdzogs pa'i byang chub chen po'i go 'phang la cis kyang dgod par bya/_de'i ched du myur lam mthar thug zab mo bla ma sgrub pa'i rnal 'byor la 'jug par bgyi snyam pas/_a:_chos dbyings 'od gsal sogs/_skyabs sems sbrel ma nyid bya/_mthar bdag gzhan skyabs yul dang bcas pa rang snang sgyu ma'i cho 'phrul 'khor 'das mnyam nyid byang chub sems kyi rang bzhin du shes pas chos nyid phyogs ris dang bral ba'i dbyings su ngal gso/_skabs 'dir bsag sbyong bla ma'i rnal 'byor bcas bya bar 'dod na rdo rje sems dpa'i sgom bzlas ni/_pad zla nyi steng rang rig ar gsal ba'i:_'od zer 'phro 'dus khams gsum srid gsum gyi:_snang grags thams cad rdo rje snying po'i zhing:_ye shes 'od lnga 'ja' zer thig le 'khrugs:_de steng yi ge hU~M gi 'phro 'dus las:_rang rig snang stong rdo rje sems dpa'i sku:_ngo bo gcig la rigs brgya rigs lnga sogs:_nam mkha'i khams gang chos dbyings khyab par gsal:_rgyud sde bzhi drug theg pa rim dgu yi:_so so'i gnas nas rgyal ba'i dkyil 'khor gang:_thams cad gnas gsum 'bru gsum hU~M yig mthar:_yig brgya'i 'phro 'dus sgrib gsum bag chags sbyangs:_stobs bzhi'i gnad dang ldan pas bdud rtsi 'bebs sbyong ni dmigs gnad spyi ltar byas la yig brgya ji ltar rigs pa bzlas mthar/_mgon po bdag ni mi shes rmongs pa sogs/_mthol bshags phul bas sdig ltung dag pa'i gnang ba bstsal nas rang la thim par mos/_bla ma'i rnal 'byor ni/_a:_ma yengs ma bcos dran rig chos sku'i ngang:_gsal stong dbyer med bla ma sku gsum gyi:_dag pa rab 'byams rgyan gyi 'khor lo'i gzhir:_rang lus 'od snang rdo rje btsun mor gsal:_spyi bo'i gtsug tu pad steng 'ja' zer dang:_'od lnga'i thig le 'khrugs pa'i tshom bu'i dbus:_rtsa ba'i bla ma yid bzhin nor bu la:_'dren mchog brgyud gsum bla ma'i sprin phung gtibs:_sku gsung thugs kyi 'od zer snang srid khyab:_snang srid rdul phran bde gshegs gzhal yas khang:_lha dang bla ma thugs rje'i byin 'od 'khyil:_thugs gsang rgyan gyi 'khor lo dam par gyur:_zhes tshogs rten gsal btab ste:_yan lag bdun pa ni:_gshis rig ma bcos gnyug mar phyag 'tshal zhing:_nas pha mthar bsngo:_zhes dmigs rim rjes su dran pas bya/_maN+Dal 'bul na/_oM AHhU~M/_chos dbyings mnyam nyid chos sku'i zhing khams su/_/rang snang ma 'gags longs sku rigs lnga'i zhing*/_/mkha' khyab sprul sku'i zhing gi bkod pa rnams/_/kun bzang bde chen mchod pa'i sprin du 'bul/_oM rat+na pU dza me g+ha sa mu dra s+pha ra Na sa ma ye AHhU~M/_gsol 'debs ni/_mdun gyi bla ma skyabs gnas kun 'dus kyi bdag nyid la yid ches kyi dad pa gting nas g.yo zhing gdung ba'i shugs dang bcas te/_mdo rgyud lung dang man ngag chu bo'i 'go:_bka' gter snyan brgyud nges don yongs kyi mdzod:_thar gling 'gro ba 'dren pa'i ded dpon mchog:_drin can rtsa ba'i bla mar gsol ba 'debs:_zhes dang*/_spro na brgyud pa'i gsol 'debs dang*/_bla sgrub dkyus nas 'byung ba'i mtshan sngags kyang bzla/_mthar dbang len ni/_snang grags thams cad rgyal ba'i sku dang gsung:_thugs kyi rdo rje thig le 'od lnga'i bcud:_spyi mgrin snying ga lte gsang gnas lngar babs:_sgo lnga'i 'dzin snang 'od skur rgya ral nas:_'og min rdo rje gdan gzhir dbang bzhi rdzogs:_khams gsum 'khor ba dong nas sprugs par shog:_ces mdun gyi bla ma'i gnas lnga'i 'od zer kha dog lnga ldan rang gi gnas lngar zhugs shing thim pas dbang bzhi thob/_sgrib bzhi dag_/lam bzhi sgom pa la dbang*/_'bras bu sku bzhi mngon du gyur nas bla ma'i sku gsung thugs yon tan phrin las kyi ngo bor gnyis su med par sangs rgyas pa'i mos pa bya'o/__/gnyis pa nye bsnyen snang grags rig pa'i 'khor lo rig 'dzin bla ma'i sku gsung thugs kyi rnal 'byor du lam khyer bskyed pa'i rim pa ni/_yar mar tshes bcu la sogs par spros pa cung zad 'dod na gzhung mthun gyi bla ma'i sku 'bag rang dang mdun sprod du bkram pa'i spyan sngar sman raka gtor ma nyer spyod bcas bsham/_bsnyen sgrub la 'jug pa'i dang por dkar bgegs kyi gtor ma/_rgyal tho 'dzugs par spro na rgyal chen bzhi'i gtor ma gser skyems bcas 'du bya/_tshogs kyi yo byad kyang bsham/_bsdu na nang gi rnal 'byor gtso bor bton te/_de rigs ma grub kyang 'gal ba med/_gang ltar yang brgyud pa'i gsol 'debs sngon du 'gro bas las byang gi skyabs sems nas brtsams dngos gzhi'i bskyed rim la 'jug_/de yang snod bcud dag chen ye shes kyi rol pa 'og min rdo rje dbyings kyi zhing 'ja' zer thig le'i snang ba mu med du brdal ba'i dbus su pad nyi zhing lpags kyi gdan la rig 'dzin bla ma dpal he ru kaH_nam mkha' 'jigs med snang stong sgyu ma 'pho chen dwangs ma'i mtshan dpe can/_rnal 'byor brtul zhugs spyod pa'i chas kyis sgeg pa/_phyag g.yas mi rkang gi gling bu dang*/_g.yon pas b+han+d+ha bdud rtsi'i bcud ldan nam mkha'i dbyings su gtod pa'i mchan du rdo rje'i khaT+wAM ga bsgreng pa/_zhabs rgyal po'i rol stabs can/_sku la stag sham rus rgyan thod skam gyi dbu rgyan thal chen gyi tshom bus byugs pa/_ting nge 'dzin gyi zil dang ldan pas he ru ka dngos su byon pa lta bu dran pa tsam gyis tha mal gyi snang ba rang 'gags su 'gro ba'i rdo rje'i sku yi gnas thugs kar zhi ba bzhi bcu rtsa gnyis/_dung khang du khrag 'thung lnga bcu rtsa brgyad/_dpral bar sku rdo rje 'jam dpal gshin rje ser nag g.yas be con/_mgrin par gsung rdo rje pad+ma dbang dmar nag pad+ma/_thugs kar thugs rdo rje yang dag mthing nag rdo rje/_lte bar yon tan che mchog ljang ser rdo rje/_gsang bar phrin las rdo rje phur pa ljang nag phyag gnyis phur pa 'dril ba/_yan lag bzhir mchod bstod dang drag sngags gnyis ka mthing nag tho ba dang*/_mdung thung*/_g.yon thams cad thod khrag can gyi gtso bo rnams zhal gcig phyag gnyis yum dang bcas pa/_'khor rnams nyi ma dang 'od zer bzhin mos pas dkyil 'khor bsam yas lhun grub tu gdod nas dag pa'i rang mdangs rnam pa ye shes klong dgu zhi khro rgyal ba 'dus pa'i dkyil 'khor yongs rdzogs su shar ba'i nges shes dang bcas legs par gsal btab la spyan 'dren sogs las rim rdzogs par sbyar/_las byang gis bstan don ltar dag pa dran/_thugs yid gcig tu bsre ba'i nga rgyal brtan po yang yang sbyangs pa gal che/_dmigs pa'i rim pa gzhung ltar gsal ma nus na yang rang gi lus phung khams/_ngag rlung*/_sems rtog pa'i 'phro 'du can 'dis gnas lugs ngo ma shes pa'i zag bcas sdug bsngal gyi phung por 'dzin pas las nyon bsags pa ma gtogs/_yin lugs nges pa sangs rgyas kun gyi ye shes kyi spyi gzugs rig 'dzin dpal mgon bla ma'i ye shes kyi sku/_rdo rje'i gsung*/_bde ba chen po'i thugs su rnam par dag pa'i gsang ba mi zad rgyan gyi 'khor lo che mchog dpal dgu zhi khro rab 'byams kyi lha dngos yin pas na/_de tshig gis gsal 'debs/_yid kyis dngos su gyur ba'i nges shes 'pho 'gyur med pa'i dag snang du shar nus pa byung na de ga'i ngang nas bla ma dang rang nyid bzang ngan tha mal gyi 'dzin rtog bshig ste gnyis med rang rig khyab brdal gyi dgongs pa'i gzer 'debs pa la yongs grub chen po'i mos gus zhes pa nyams len gyi mthar thug yin/_de nas bzlas pa sngags kyi rnal 'byor la bsnyen sgrub las gsum las/_dang po ni/_rig 'dzin bla ma'i thugs kar ye shes sems dpa' chos sku kun tu bzang po yab yum sku shin tu phra ba 'od kyi rang bzhin dwangs la skye mched rdzogs pa/_rnam pa ma 'gags chu zla'am 'ja' tshon lta bu'i thugs srog 'od lnga'i thig zlum gyi snying por a yig mthing gsal mi shigs ye shes rdo rje'i srog chen po/_chos kyi phung po brgyad khri bzhi stong gi 'byung gnas/_kun bzang shes rab kyi pha rol tu phyin ma ka dag dbyings kyi yi ge'i sa bon a las lnga ldan 'od kyi 'phro 'dus 'khor 'das kyi zhing kun khyab/_sangs rgyas kyi mdzad pa mtha' dag bsgrubs/_snod bcud khyab brdal ye shes kyi rang bzhin du sad par mos la srog sngags bzla ba'o/__/gnyis pa sgrub pa ni ngo bo rigs kun khyab bdag bla ma gcig pu'i rdo rje'i gsang ba gsum gyi spro bsdu las/_rnam pa brgyud gsum rig 'dzin bla ma zhi khro yi dam dpal chen sgrub sde brgyad gnas gsum dpa' bo DA ki chos srung bcas gang 'dul cir yang snang zhing ston pa las/_mchog gi ye shes kyi byin rlabs thun mong gi dngos grub sna tshogs las bzhi'i phrin las sogs gang 'dod yid bzhin stsol nus pa nor bu gcig las 'dod dgu 'byung ba ltar yin pas bla ma'i thugs srog las 'phros 'od kyis reg pas/_snang srid lha dang bla ma'i 'khor lor shar ba kun kyang sku rdo rje'i gar stabs yom yom shig shig_/gsung sngags dang glu dbyangs rol mo 'ur 'ur/_thugs ye shes zang thal gyi dgongs pa sa ler sad par dbang dang byin rlabs dngos grub thams cad 'bad med du thob par mos la rtsa sngags bzla ba'o/__/gsum pa las sbyor ni/_bla ma'i thugs ka'i a las 'od dkar gsal zla ba dwangs pa lta bu 'phros/_nam mkha'i dbyings su khyab/_'jigs pa brgyad sogs gnas skabs dang*/_gzung 'dzin gyi 'khrul pa rgyu 'bras zhi ba mthar thug gi phrin las mthar phyin par mos la shAn+tiM ku ru sbyar ba bzla/_des 'gres te bla ma'i thugs srog gi 'od zer gser btso ma lta bus 'byor ba drug dang zag med kyi yon tan rgyas pa/_rjes chags bde stong gi 'od dmar 'char ka'i zer thag lta bus snod bcud kyi dpal dang rlung sems dbang du sdud pa/_drag shul mtshon cha'i 'ja' zer ljang nag gi me lces bdud dgra 'khrul rgyu thams cad rtsad nas gcod pa'i dmigs 'dun dang bcas rtsa sngags la las so so'i spel tshig sbyar ba bzla/_grangs bsnyen gtso bor byed na bsnyen sgrub gnyis la rtsa sngags 'bum bzhi re/_las sbyor khri gcig tsam bzla zhing*/_'brel 'jog tsam la bdun phrag gsum/_sgrub pa bdun gcig las sbyor nyin gsum tsam byas kyang rung ngo*/__/de dag gi tshe bsnyen sgrub la 'jug pa'i thog mtha' dang*/_yar mar gyi tshes bcu sogs dus bzang po la tshogs mchod kyang bya ba gal che zhing*/_bsnyen sgrub grub pa'i rjes dkyil 'khor tshul bzhin bshams te bdag 'jug gis lam dbang len pa'ang grub na legs pa sogs gsang ba spyi ltar ro/__/gsum pa sgrub pa zab mo rdzogs pa'i rim pa ka dag zang thal gyi rnal 'byor nyams su len pa la sems rig shan 'byed zhi lhag gi rnal 'byor gyis gegs sel/_rig pa lta sgom spyod 'bras kyi rnal 'byor gyis bogs dbyung ba'i/_dang po la'ang gnyis las/_dang po sems mi gnas pa gnas par byed pa'i thabs ni/_rtsa ba las/_blo bral khyab brdal sogs nas gnad kyang mthong:_zhes pa ste dbyings ka dag zang thal gyi gnas lugs dngos su rtogs na 'khrul pa gzhi med du dag nas ye grol gyi dgongs pa'i klong du grol bar nges na yang*/_rig rtsal tshogs drug gi yul la shar te chags sdang rmongs gsum gyis kun gzhi nyon yid kyi steng du las bsags pa'i 'khrul pas khams gsum rigs drug tu 'khyams pa'i nyer len thams cad sems la thug_/sems 'di dag pa lha dang bla ma/_ma dag pa dgra gnyen gang la shar yang shar sa'i gzhi der bltas nas sems bzung bas/_rnam rtog gi phreng ba lu gu rgyud cig la sems su btags par go_/rnam rtog de dus gsum gyi zlas phye bas dpyad na sil bu yin/_'das pa ni dngos med/_da lta ba snang tsam/_ma 'ongs pa ma skyes pas de dag gcig tu ji ltar 'brel/_mtshan nyid mi mthun pas 'brel yang don ji ltar byed dpyad gzhigs du mas gtan la phab pas med bzhin snang ba zhig la sems su sgro btags/_de gang las byung na chos nyid rig pa'i rang rtsal las byung*/_sems ni dang po ri gzar gyi 'bab chu ltar mi brtan pa drag tu 'gyu ba/_gnyis pa lho sprin ltar ban bun du 'gyu ba/_gsum pa chu klung dal 'bab ltar lhod chags pa/_bzhi pa rlabs dang bral ba'i rgya mtsho ltar gzhi thog nas mi g.yo ba rnams kyi nyams rim gyis 'byung bas bskyangs/_de'i tshe bde gsal mi rtog pa'i 'char sgo byung na snang stong bde ba chen po'i lam du khyer te re dogs dang bral bar byas pas/_sems skye 'gag gnas bral chos nyid stong pa nyid la nges pa rnyed na de ka skyong du gzhug_/da dung ngo ma 'phrod na byung gnas 'gro gsum gyis sems 'tshol zhib mor btang*/_nam zhig gnas thog tu 'dzin pa zad pa rang grol ka dag_/'gyu thog tu 'bad rtsol med par rang shugs lding 'gros/_gnas 'gyu gnyis med gzhi thim la song nas ngo bo stong pa/_rang bzhin 'od gsal/_thugs rje 'gag med kyi ye shes sgra ji bzhin so so rang rig gis nyams su myong bas rig pa rang mal gyi chos sku/_phyal ba bar med rgya yan/_rang bab rnal ma'i bzhugs tshul/_zang thal skye med kyi rang ngo nyams su myong bas srid gsum ka dag gi dgongs par ngo 'phrod pa'o/__/gnyis pa nang sems thog tu 'jog pa gnas pa brtan par byed pa'i thabs ni/_phyogs su ma lhung sogs/_lhod de gsal:_zhes pa la gsum las/_dang po thag gcig thog tu bcad pa ste 'di ltar phyi yul/_bar lus/_nang sems dang bcas pa gzhi med snang stong cho 'phrul tsam du shar ba las gdod nas bden rdzun gyi mtha' las 'das/_dang po 'khrul ma myong*/_da ltar 'khrul pa la mi gnas/_tha ma 'khrul mi srid pa srid gsum ka dag gi dgongs pa chos nyid rang gi 'dug tshul tshig gis brjod du med pa/_blos bsam du med pa/_dpes mtshon du med pa'i ngang du kun rdzob bag chags rnam rtog gi rdzun phug brdibs te rang ngo rang gis shes pa ni thag chod pa ste/_de'i skabs phyi nyin mtshan du song ba mi tshor/_nang ting 'dzin gsal 'grib mi tshor/_mi rtog bag nyal gyi ngang du bying na de ga'i ngang du mnyam par bzhag pas skabs shig rkyen bzang ngan zhig gis bskul nas nges par 'phro 'ong*/_'phro mkhan kha yan du ma shor bar bskyangs pas bying ba'i skyon dag pas gsal stong mnyam nyid du grol/_rgod pa la skye med rdo rje'i bzlas pa skabs dang sbyar te rang ngo skyong ba zab/_gnyis pa ngo rang thog tu sprod pa ste/_rang rig zang thal ci yang ma grub pa stong cha nas sangs rgyas chos sku/_rang mdangs 'gag med longs sku/_rang rtsal ma nges sna tshogs sprul sku/_ldog pa tha dad las ngo bo gcig tu bsdus pa ngo bo nyid sku ste/_srid zhi'i khams kyi che ba'i yon tan lhun rdzogs kyi gshis lugs zhen 'dzin ma grol ba'i a 'thas kyi zhi gnas lting po dang ma nor ba gnyis med ye shes kyi spyod yul du lam khyer bya ba gal che/__/gsum pa gdeng grol thog tu bca' ba la/_de ltar bskyangs pas shar grol gyis zhen 'dzin gyi rtog pa dag pa/_cer grol gyis mi rtog pa'i rnam rtog dag pa/_rang grol gyis tshor ba ngo mi shes pa'i rnam rtog dag pa/_yongs grol gyis stong nyid ngo mi shes pa'i rnam rtog dag par bskyangs pas sangs rgyas kyi dgongs pa mngon du 'gyur ba'o/__/gnyis pa rig pa lta sgom spyod 'bras kyi rnal 'byor gyis brtan pa bogs dbyung ba la/_lta sgom spyod 'bras bzhi las/_dang po lta ba grong khyer rgyun gcod ni/_sna tshogs yul snang sogs/_rung ba shes:_zhes pa ste phyi yul snang*/_nang phung khams skye mched/_gsang ba shes rig gi cha la der 'dzin gyi bag chags sna tshogs rnam rtog gi brdzun phug rdib ste gzung 'dzin rang grol gyi ngang du chags sdang re dogs kyi mdud pa zhig pas/_rang rtsal gyi snang cha sku gsum lhun grub ye shes kyi rol pa lha'i 'khor lor dag pa'i dbyings dang ye shes gnyis su med pa'i yin lugs rtogs pa ni lta ba'i rgyal po zhes bya'o/__/gnyis pa sgom pa'i man ngag ri bo cog bzhag ni/_dbang po mi 'gul sogs/_da gdod shes:_zhes pa ste ma bcos dbyings rig gi sgom pa so ma'i ngang du dbang po'i dwangs ma mig mi 'gul/_phyir mi 'phro/_nang du mi sdud/_yul rjes su mi 'brang bar tshogs drug gang shar 'dzin med ka dag chen po'i dbyings la gzir bas snang zhen rang sar grol te ji ltar shar yang rig pa'i gsal 'debs kyi rgyan du 'char bas phyi snang bas nang ting nge 'dzin gyi rtsal ma bkag_/nang gi rig pas phyi snang ba'i go mi bkag_/bsgom bya sgom byed gnyis su med kyang yengs pa tha mal du ma shor ba ni sgom pa'i rgyal po zhes bya'o/__/gsum pa spyod pa khams gsum yongs grol gyi dgongs pa ni/_nang gi sems kyi sogs/_bab kyis shes:_zhes pa ste rang gi rig pa 'dzin med la phyi yi snang srid rang grol du shar nas g.yo 'khrug ma nus pas re dogs khung rdib tshe yul sems kyi spyod pa thams cad ye shes gcig tu dag pas spong sgyur gyi lam byed gzhan la ma ltos par dmigs bsam spro bsdu bral ba'i thabs mkhas kyis dbang bsgyur bas 'od gsal sgyu ma rang grol gyi rnal 'byor gyi spyod pa mchog gi skyel so ru shes par bya'o/__/bzhi pa 'bras bu lhun rdzogs chen po ni/_dbyings kyi ngo bo chos sku sogs/_gnad du bsnun:_zhes pa ste sku gsum dbyer med mi 'gyur rdo rje'i sku dang*/_de dag kyang gdod nas lhun grub mngon par byang chub ste sku dang ye shes lnga ldan rang ngo lhun grub kyi chos su gyur pas na ma dag 'khrul pa'i khyad chos ye nas mi dmigs pa'i dbyings su btsan sa zin pa 'bras bu ste/_de ltar bstan pa de dag kyang rnam pa'i ldog chas dbye ba tsam las/_don la tha dad du mi gnas pa chos dbyings brdal ba chen po gcig gi ngo bor gyur pa ste rnal 'byor de dag kyang rim skyes dang*/_thod rgal/_gcig car gyi 'jug tshul gang zag so so'i khyad par las mtha' gcig tu nges bzung byar med do/__/bzhi pa sgrub pa chen po 'od gsal lhun grub kyi nyams len la dngos dang*/_mtha' rten gnyis las/_dngos la'ang gsum/_gnad gsum la brten nas mngon sum rang thog tu dbab pa ni/_sgron ma'i 'od gsal sogs/_thal byung zad:_ces pa ste rdo rje'i lus la rtsa rlung thig le ye shes kyi khams rnams rten brten pa'i tshul du 'brel ba las/_skabs 'dir gnad du bsnun bya'i lam gyi gtso bo 'od gsal gnas pa'i rtsa khyad par bzhi ldan zhes ka ti gser gyi rtsa chen dbu ma dang snying gi dbus na kun bzang gzhi'i thig le dar dkar snal ma lta bu/_tshangs bug la bstan pa phra la 'dril ba 'khor lo bzhi'i dbus na 'od lnga'i thig le thig phran gyi tshul du gnas pa/_shel sbug can ni snying nas mig tu 'brel ba rdo rje lug rgyud kyi rten byed pa ste/_gzod nas gnas kyang ngo bo stong pa la kun gzhi tshogs brgyad kyis bsgribs/_rang bzhin gsal ba la gdos bcas sha khrag gis bsgribs/_thugs rje'i rig rtsal las dang bag chags kyis bsgribs pa mngon du sad par bya ba'i phyir/_lus gnad bzhugs stangs gsum bya/_ngag gnad mi smra bar rlung rig shin tu dal ba/_sems gtad med kyis sgo yi gnad gzigs stangs gsum gyis/_yul gnad nam mkha' sprin bral dang nyi zla la brten te bslab pas/_nyams kyi snang ba bzhi po rim gyis shar nas rtsal rdzogs par byas te sgo gsum 'od gsal du grol ba'o/__/gnyis pa lam snang ba bzhi'i sa mtshams ni/_mngon sum rtogs pa'i sogs/_'khyil bas bde:_zhes pa ltar gnad kyis dbyings rig gcun pas rig rtsal nam mkha' la 'phul te dbyings snang lu gu rgyud dang bcas dkar za zi khra khro dang*/_thig le stong sgron sum 'brel sogs mngon gyur gyi sgo rgyang zhags dang*/_lkog gyur gyi sgo snying nas glo bar 'brel ba'i rtsal las g.yos te 'char zhing rig pa stong gsal 'gag med du 'char bas ye shes sum cha la dbang zhing rtags lus ngag la 'char yang dgag sgrub mi bya zhing skyong ba tshogs kyi lam mo/__/de'i tshe shes nyams bde gsal mi rtog pa sogs shar yang mi brtan la/_snang nyams 'od lnga'i snang ba rtsibs shar/_gyen 'greng*/_mdung rtse dang re lde'i rnam pa dang*/_pad+ma stong ldan/_mchod rten brtsegs pa/_thig le me long*/_'khar gzhong*/_bse phub tsam/_'od kyang yul gru dang gar bltas khyab par gsal/_rig pa la nyin mtshan med/_lus la gnyer ma med/_zas skom mi 'dod/_rang snang las 'bral mi phod/_dgra gnyen gyi 'khrul pa zhig ste phyi'i snang ba/_nang du sgyu lus/_gsang ba rlung sems sdod pas 'khrul pa'i snang ba nub nas ye shes kyi snang ba 'char ba ni nyams gong 'phel sbyor lam mo/__/phyi sa rdo ri brag gi snang ba nub nas thig le re re'i nang du rigs lnga yab yum gyi sku sogs dag pa'i snang bas stong gsum 'jig rten gyi khams gang ste/_rig pa dbyings kyi gzer thebs nas lam smin te lus zang thal du 'gro/_lnga ldan sku ru smin pa rig pa tshad phebs te mthong lam mo/__/gdos bcas lus dang sems kyi spros pa zad de sngar gyi rtags rnams skye med kyi ngang du mya ngan 'das pa zhes/_gdos bcas lus kyi spros pa zad nas gnyis med kun tu bzang po'i klong du 'dres te chos can dang chos nyid kyi spros pa zad sar 'khyol bsgom lam sa dgu ste/_skye 'jug la dbang thob pa'o/__/de ltar snang ba gsum gyi skabs rig pa'i ngo bo'i snang ba cher gsal ba dang*/_zad pa'i skabs phyir 'grib pa med pa chos nyid gcig la 'pho 'gyur med kyang lam gyi snang cha ma dag 'khrul pa'i sbubs brdol pas snang ba phyi gsal du shar te 'phel ba dang*/_spros snang gi bag chags cha dang bcas pa dag nas zhe 'dod mtha' dag zad pa ngo bo ka dag gi klong du grol ba'i gdeng thob pas snang ba dbyings su bsdus nas bcu gcig kun tu 'od kyi sa la phyin te/_sku gsum 'du 'bral med pa rang la gnas pa don gyi 'og min gyi gnas su byang chub pa'o/__/gsum pa 'bras bu'i mthar thug bstan pa ni/_zag pa 'byung ba sogs/_a ti ho:_zhes pa ste de ltar nyams su len pa'i tshe mi 'gul ba gsum gyis gzhi bca'/_sdod pa gsum gyis tshad bzung*/_thob pa gsum gyis gzer btab ste nyams su blangs pas chos nyid phyin ci ma log pa rtogs nas phyi nang gsang ba'i zag pa zad nas lus 'od sku/_ngag nA da/_sems chos sku'i klong du gtan srid zin te yang dag par sangs rgyas pa dang*/_mngon par rdzogs par sangs rgyas pa'i rtags tshad mngon du gyur nas sku bzhi lhun gyis grub pa'i dpal la rten 'dir spyod pa'i skal bzang du nges par 'gyur ro/__/gnyis pa zhar byung mtha' rten man ngag bshad pa dang mjug bsdu ba ni/_bar do/_'pho ba/_gcod yul gsum las dang po bar do lam khyer ni/_rgyu 'bras mthar phyin grol sogs/_btsan sa zin:_zhes pa ste rig pa snying gar gnas dus gzhi'i chos sku/_rtsa dang dbang po'i sgor shar dus rtsal gyi chos sku/_dbyings la 'char dus rol pa'i chos sku/_de gsum dbyer med 'bras bu'i chos sku ste/_de'i rang mdangs skye 'chi bar do'i snang ba gang shar yang 'khrul grol dbyings su nub pa'i shes rig bkra sa le ba zang kha 'di las ma g.yos par lam du byas pas rang zhi rang grol du gyur pa ni gnad kyi snying po yin la/_gzhan du rang bzhin/_bsam gtan/_rmi lam/_'chi ka_/chos nyid/_srid pa bar do'i snang ba'i rnam gzhag dang*/_de dag tu grol tshul/_de las kyang srid pa bar dor 'khyams na rang bzhin sprul pa'i zhing du dbugs 'byin pa'i gdams pa bcas khrid rim spyi dang bar do 'ja' phung rang grol ltar nyams su blang bar bya dgos so/__/'di dag gi skabs su 'od gsal dang rmi lam bzung na snying dbus nyi zla'i gwa'u'i dbus su bla ma he ru kaHdmar po yab yum zhal sbyor gyi thugs kar 'od lnga'i 'khor lo'i sbubs su aHdmar po tsheg drag can spus bris pa tsam la shes pa gtad de/_oM AHhU~M/_oM hU~M trA~M hrIHAHdang*/_A li kA li spel te bzlas pa'i ngang du gnyid log pas snang ba sems nyid za zi ba'i skabs/_mched pa rmi lam gsal ba/_thob pa rmi lam chos nyid du ngo shes pa/_nyer thob gnyid log ma log dbye ba med pa chos nyid dang 'dres pas rmi lam 'byongs pa ste/_de'i bar du sad 'byams/_brjed 'byams/_stong 'byams/_'khrul 'byams kyi gegs bsal/_gzhi lam 'bras bu'i 'od gsal gyi spu ris phyes ste ngos zin dgos pa'ang zhar la 'phros pa'o/__/gnyis pa myur lam 'pho ba'i man ngag ni/_'khrul pas sgro btags sogs/_man ngag gces:_zhes pa ste mdun gyi nam mkhar mkha' spyod 'od kyi gzhal yas khang sku gsum rgyal ba'i zhing khams chen po'i dbus su he ru ka chen po nam mkha' 'jigs med bla sgrub gzhung ltar gsal ba'i mdun du/_rang nyid he ru ka gcer bu rus rgyan can phyag rdor dril 'dzin pa gsal bas mdun gyi bla ma la mos gus rtse gcig pa'i yid kyi gsol ba drag tu btab pa dang mdun gyi rig 'dzin bla ma'i thugs ka'i hU~M las 'od zer lcags kyu lta bu 'phros pa dang rang gi rnam shes hrIHdmar gyi rang bzhin tshangs pa'i lam nas rgyangs kyis thon te rig 'dzin bla ma'i thugs kar sib kyis thim par mos la hika ces brjod la 'phang*/_yang ka zhes phyir phab/_de ltar yang yang sbyangs shing rtags thon par bya/_thun mthar bla ma he ru ka'i sku las 'chi med ye shes kyi bdud rtsi'i rgyun phyung*/_rang gi spyi bo nas zhugs lus kyi nang thams cad gang bas 'chi med tshe yi dngos grub thob par bsams la/_rdo rje'i bzlas pa cung zad byas pas tshe gegs bar chad zhi/_mthar dge ba bsngo zhing smon lam bya'o/__/nam zhig dus la bab tshe dmigs pa snga ma ltar la mthar bla ma'i thugs ka nas dwangs ma'i 'od zer kha dog lnga ldan snam bu ltar brkyangs te mdun du shar gyis byung ba dang*/_rang nyid dpa' bo DA ki'i sprin phung 'bum phrag dang bcas ye shes rlung gi 'khor lo bskyod nas bla ma'i thugs kar thim par bsams la brjod bral ting nge 'dzin gyi ngang du mnyam par bzhag pas mkha' spyod dag pa'i zhing du dbugs 'byin pa'i man ngag bya sla la thabs zab pas dmigs su bshad pa'o/__/gsum pa gcod yul gdams pa'i gnad gzer ni/_snang ba'i bde sdug sogs/_rnam par 'phro:_zhes pa ste kun gzhi'i rang mdangs las grub pa'i phyi snang ba/_nang dug lnga/_bar lha 'dre'i bde sdug gi cho 'phrul mtha' yas pa rnams ye grol chos dbyings skye med ka dag gi dbyings shes rab phar phyin rgyal ba'i yum gyi dgongs pa'i klong du zad sar bskyal nus pa'i gdeng byung na 'gal rkyen de dag lam gyi bogs 'byin du byed pa'i gdams ngag gi gseng lam rmad du byung ba ste/_de nyid nyams su len pa'i gnas kyang dur khrod mtsho gling brag ri'i khongs sogs ya nga bag tsha khu 'phrig skye ba'i gnas su rang nyid chos sku yum chen rdo rje phag mo'i 'khor du snang srid kyi dpa' bo mkha' 'gros bskor nas hU~M sgra 'brug stong ldir ba tsam gyis 'khrul snang gtad med du bshig_/tshogs brgyad 'khrul pa'i lha 'dre ye shes kyi dbyings su bsgral bar mos la lta ba'i ngang bskyangs/_thun mtshams kyi nyams len du rang lus gdos bcas sha khrag sbrul shun brjes pa ltar dor te rang rig dwangs ma skad cig gis rdo rje phag mor gsal ba nam mkhar 'phags/_nam mkha'i dbyings su gtso mchog rdo rje phag mo la rigs bzhi'i DA ki phyogs mdog mtshams bzhir phyed gzugs can gri thod 'dzin pa gar bsgyur ba'i gsang ba nas byang sems bdud rtsi dkar dmar gyi rgyun babs pa rang gi sgyu lus dang 'dres pas/_stong gsum gang ba'i mi mgo'i sgyed pu'i steng du ka pA la yangs shing rgya che ba'i nang du bskyil te/_chos dbyings kyi khyon gang ba bskal pa ma stong bar gnas pa kha dog dri ro mi zad pa'i 'dod yon cir yang 'char bas/_brgyud gsum rig 'dzin bla ma/_rtsa gsum rgyal ba rab 'byams/_chos srung dpa' bo DA ki_/mkha' khyab rigs drug sems can/_phyi nang gsang ba'i sde brgyad/_lan chags bgegs rigs 'byung po thams cad la ji ltar bzhed pa'i longs spyod du phul bas mnyes shing tshims/_skyabs yul rnams kyi sku las zag med ye shes bdud rtsi'i rgyun gyis rigs drug bgegs rigs kun gyi sgrib gnyis sbyangs te kun kyang dpa' bo DA ki'i rang bzhin du gyur/_snang srid bde stong ye shes kyi 'khor lor 'byams klas pas tshogs rdzogs/_sgrib pa byang*/_bdag gzhan sangs rgyas kyi go 'phang thob par bsam/_mthar snang srid 'khor 'das thams cad sems nyid ye shes kyi rol rtsal 'khor gsum dmigs med nam mkha' lta bu'i ngang du mnyam par bzhag pas dge sdig_/lha 'dre/_bde sdug_skye shi/_thams cad ro mnyam chos nyid kyi dgongs pa'i dbyings su thag chod de lam khyer nus pa 'byung ngo*/_/de ltar sngon dngos rjes kyis bstan pa rnams tshul bzhin nyams su blangs pas gang zag gcig 'tshang rgya ba'i lam yongs su rdzogs pas na/_'di nyid kho nas kyang skye 'chi bar do'i 'khrul pa sku gsum gyi dbyings su bskyangs nas rang grol gdod ma'i dbyings su 'tshang rgya ba la the tshom med de/_don gyi gnad snga 'gyur bka' gter gyi man ngag tshang la ma nor bar bzhugs pa rnams dang zhal bsdur bas zhus dag 'pher ba ltar bzhugs shing*/_tshig gi rim pa'ang bla ma dang lhag pa'i lhas gnang bas byin rlabs kyi go phye ba'i nges shes dang ldan pas na/_skal bzang mos pa can dag la phan pa srid snyam nas gzhung gi dngos bstan gyi don rnams tshig nyung ngus gsal bar byas pa'o/__/rig 'dzin lha dang bla mas byin brlabs pa'i/_/mkha' spyod 'bras gshongs brag dkar bkra shis sdings/_/sbas pa'i gnas phyin byin rlabs dbugs dbyung chos/_/gsal byed bdud rtsi'i thig le 'di rmad byung*/_/rab dkar dge bas rtsod dus mun pa ni/_/ye shes snang bas theg dgu'i zab chos 'byed/_/'brel tshad rdo rje'i dbyings su ngal 'tsho ba'i/_/dge mtshan bkra shis dpal du 'bar gyur cig_/ces lnga brgya'i mun khrod du skyes pa'i so skye 'ching ba kun ldan gyi rtog ngor gsal ba'i tshig ris la gsal byed kyi zin tho bri ba rang nyid ngal ba'i rgyu tsam du zad kyang*/_rigs brgya'i khyab bdag khrag 'thung nam mkha' 'jigs med dngos byon pad+ma ye shes rdo rjes khyod kyi dgongs gter dgos pa dang 'brel rigs spel zhes thun min dgongs gtad kyis yang yang bka' bstsal pa rjes su sgrub pa'i 'dun pa dang*/_'phags pa'i yon tan rmad du byung ba du mas thugs rgyud mdzes shing kun bzang bka' brgyud kyi shing rta'i lam srol la gdod nas smon lam gyis 'brel ba'i zur mang drung pa mchog sprul 'jigs med nam mkha' chos kyi rgya mtshos nan tan chen po'i gsung gis bskul ba dang*/_sgrub brtson kun spangs karma ye shes chos 'phel nas kyang bsnyen sgrub nyams len mdzad pa'i gsal 'debs tsam du gtad med kyi smyon pa kun bzang 'od gsal rdo rje thugs mchog rtsal lam ming dngos bkra shis dpal 'byor mkhyen brtse'i 'od zer du 'bod pas sbas yul de nyid dang 'dabs 'byor ba'i gu yangs kyi gnas su bris pa 'dis kyang theg mchog rdo rje snying po'i lam la bya ba mchog tu byed par gyur cig/_//