DKR-KABUM-10-THA-035

🚧 This website is under continued development. We appreciate your patience!

Previous Text Back to Volume PageNext Text

འཇམ་དཔལ་ཀུན་འབྱུང་ནོར་བུའི་ལས་ཚོགས་ལས་ཁོལ་དུ་ཕྱུང་བ་འཇམ་དཔལ་ཡིད་བཞིན་ནོར་བུའི་སྒྲུབ་ཐབས།

Wylie title	'jam dpal kun 'byung nor bu'i las tshogs las khol du phyung ba 'jam dpal yid bzhin nor bu'i sgrub thabs
Location	dil mgo mkhyen brtse bka' 'bum Volume 10, Text 35, Pages 171-176 (Folios 1a to 6a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. 'jam dpal kun 'byung nor bu'i las tshogs las khol du phyung ba 'jam dpal yid bzhin nor bu'i sgrub thabs. In Skyabs rje dil mgo mkhyen brtse rin po che'i bka' 'bum, Vol. 10: 171-176. Delhi: Shechen Publications, 1994.
Genre	Sadhanas - Evocation Ritual - sgrub thabs
Deity	'jam dpal dbyangs
Colophon	འཇམ་དཔལ་ཀུན་འབྱུང་ནོར་བུའི་ལས་ཚོགས་ལ་བརྟེན་པའི་ཆོ་ག་བཀྲ་ཤིས་འདོད་དགུའི་དཔལ་སྟེར་ལས་ལུང་རྟོགས་དཔལ་གྱིས་འབྱོར་བ་ར་ཧོར་མཁན་ཟླ་ཟེར་གྱི་གསུང་བསྐུལ་བཞིན་འཇམ་དཔལ་དགྱེས་པའི་འབངས་བཀྲ་ཤིས་དཔལ་འབྱོར་གྱིས་ཆོ་ག་རྒྱས་པ་ལས་ཁོལ་དུ་ཕྱུང་བའོ།།
	'jam dpal kun 'byung nor bu'i las tshogs la brten pa'i cho ga bkra shis 'dod dgu'i dpal ster las lung rtogs dpal gyis 'byor ba ra hor mkhan zla zer gyi gsung bskul bzhin 'jam dpal dgyes pa'i 'bangs bkra shis dpal 'byor gyis cho ga rgyas pa las khol du phyung ba'o//

Tibetan Text

Wylie

[edit]

༄༅། །འཇམ་དཔལ་ཀུན་འབྱུང་ནོར་བུའི་ལས་ཚོགས་ལས་ཁོལ་དུ་ཕྱུང་བ་འཇམ་དཔལ་ཡིད་བཞིན་ནོར་བུའི་སྒྲུབ་ཐབས་བཞུགས་སོ།།

༄༅། །ཨོཾ་སྭསྟི་བི་ཛ་ཡནྟུ། རྒྱལ་ཀུན་མཁྱེན་གཉིས་ཡེ་ཤེས་གར། །འདོད་དགུའི་སྐུ་མཚན་རིག་སྔགས་ཀྱི། །དངོས་གྲུབ་མཆོག་སྟེར་མཉྫུ་ཤྲཱི། །དབྱེར་མེད་བླ་མ་མཆོག་ལ་འདུད། །འཇམ་དཔལ་ཡིད་བཞིན་ནོར་བུའི་བླ་མའི་རྣལ་འབྱོར་ལ་བརྟེན་པའི་ཆོ་ག་ལ་འཇུག་པར་འདོད་པས་རྟེན་གྱི་དྲུང་དུ་མཆོད་པ་བཤམས་ལ་སྐྱབས་སུ་འགྲོ་བ་ནི། ན་མོ། སྐྱབས་ཀྱི་དམ་པ་སྐྱབས་སུ་འོས། །འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །སྐྱབས་གནས་རྣམས་ལ་སྐྱབས་སུ་མཆི། །ལན་གསུམ། སེམས་བསྐྱེད་ནི། མི་ཤེས་འདམ་དུ་བྱིང་བ་ཡི། །སེམས་ཅན་ཀུན་ལ་སྨན་པ་དང༌། །བླ་མེད་འབྲས་བུ་ཐོབ་བྱའི་ཕྱིར། །རྫོགས་པའི་བྱང་ཆུབ་སེམས་བསྐྱེད་དོ། །ལན་གསུམ། སེམས་ཅན་བདེ་དང་ལྡན་གྱུར་ཅིག །སོགས། མཆོག་གསུམ་ཚོགས་གཉིས་ཆོས་དབྱིངས་བདེན་སྟོབས་ཀྱིས། །སྣོད་བཅུད་དག་པའི་ཞིང་གི་འབྱོར་བའི་དབུས། །རིན་ཆེན་གཞལ་མེད་བཀོད་མཛེས་གདན་ཁྲི་དང༌། །ཕུལ་བྱུང་མཆོད་པའི་སྤྲིན་གྱིས་མཛེས་གྱུར་ཅིག །མཆོད་པའི་སྤྲིན་གཟུངས་དང་རྟེན་སྙིང་བཟླ། གུ་རུའི་ཚིག་བདུན་གསོལ་འདེབས་ལན་བདུན་བརྗོད་པས། ཕྱོགས་བཅུའི་ཞིང་རབ་འབྱམས་ནས་བླ་མ་རྒྱལ་བ་སྲས་དང་བཅས་པ་ཐམས་ཅད་དང་རྔ་ཡབ་གླིང་ནས་ཨོ་རྒྱན་རིན་པོ་ཆེ་འཁོར་དཔའ་བོ་མཁའ་འགྲོའི་ཚོགས་དང་བཅས་པ་སྤྱན་དྲངས་ནས་མདུན་གྱི་ནམ་མཁར་ཁྱབ་བདག་འཇམ་པའི་རྡོ་རྗེའི་རྣམ་པར་བཞུགས་པར་མོས། ཨོཾ། སྣང་སྲིད་རྣམ་དག་ཆོས་དབྱིངས་གཞལ་ཡས་སུ། །རང་བྱུང་ཡེ་ཤེས་འཇམ་དཔལ་གཞོན་ནུའི་སྐུ། །ཡིད་འོང་ཉི་མ་འཆར་ཀའི་ལང་ཚོ་ཅན། །དང་པོའི་ཕྱག་གཉིས་རལ་གྲི་ཨུཏྤ་ལ། །ཐ་མའི་ཕྱག་གཉིས་ནོར་བུ་བུམ་བཟང་བསྣམས། །དར་དང་རིན་ཆེན་རྒྱན་རྫོགས་སྐྱིལ་ཀྲུང་གིས། །རབ་མཛེས་པདྨ་ཟླ་བའི་གདན་སྟེང་ན། །དཔག་བསམ་ཤིང་ལ་སྐུ་རྒྱབ་བརྟེན་ནས་བཞུགས། །དེ་ཡི་ཕྱོགས་མཚམས་སྟེང་འོག་ཐམས་ཅད་དུ། །སྲིད་ཞིའི་དཔལ་འབྱོར་མཆོད་སྤྲིན་འཁྲིགས་པའི་ཀློང༌། །བཀྲ་ཤིས་ལྷ་མོ་བརྒྱད་ལ་སོགས་པ་ཡིས། །རབ་འབྱམས་མཆོད་པའི་སྤྲིན་གྱིས་མཁའ་དབྱིངས་གང༌། །དྲན་པ་ཙམ་གྱིས་ཕུན་ཚོགས་དཔལ་ཡོན་ཀུན། །ཡིད་བཞིན་ལེགས་པར་སྩོལ་བའི་བདག་ཉིད་ལ། །མ་ལུས་ཕྱོགས་དུས་ཞིང་གི་རྒྱལ་བ་དང༌། །རྒྱལ་བ་སྲས་བཅས་ཏིལ་གོང་ལྟར་བཞུགས་པ། །མེ་ཏོག་ཆར་འབེབས་ཤིས་པའི་གླུ་དབྱངས་སྒྲོགས། །ཡེ་ཤེས་འོད་ཟེར་འབར་བས་མཁའ་ཁྱབ་གསལ། །ཞེས་གསལ་གདབ། དེ་ནས་ཕྱག་མཆོད་སོགས་འབུལ་བཞིན། ཨོཾ། སྣང་སྲིད་རྣམ་དག་རང་བཞིན་ལྷུན་གྲུབ་པའི། །བཀྲ་ཤིས་ཕྱོགས་བཅུའི་ཞིང་ན་བཞུགས་པ་ཡི། །སངས་རྒྱས་ཆོས་དང་དགེ་འདུན་འཕགས་པའི་ཚོགས། །ཀུན་ལ་ཕྱག་འཚལ་མཆོད་འབུལ་སྐྱབས་སུ་མཆི། །སྒྲོན་མེའི་རྒྱལ་པོ་རྩལ་བརྟན་དོན་གྲུབ་དགོངས། །བྱམས་པའི་རྒྱན་དཔལ་དགེ་གྲགས་དཔལ་དམ་པ། །ཀུན་ལ་དགོངས་པ་རྒྱ་ཆེར་གྲགས་པ་ཅན། །ལྷུན་པོ་ལྟར་འཕགས་རྩལ་གྲགས་དཔལ་དང་ནི། །སེམས་ཅན་ཐམས་ཅད་ལ་དགོངས་གྲགས་པའི་དཔལ། །ཡིད་ཚིམ་མཛད་པ་རྩལ་རབ་གྲགས་དཔལ་ཏེ། །མཚན་ཙམ་ཐོས་པས་བཀྲ་ཤིས་དཔལ་འཕེལ་བ། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། འཇམ་དཔལ་གཞོན་ནུ་དཔལ་ལྡན་རྡོ་རྗེ་འཛིན། །སྤྱན་རས་གཟིགས་དབང་མགོན་པོ་བྱམས་པའི་དཔལ། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་འཕགས་མཆོག་ཀུན་ཏུ་བཟང༌། །ཨུཏྤལ་རྡོ་རྗེ་པད་དཀར་ཀླུ་ཤིང་དང༌། །ནོར་བུ་ཟླ་བ་རལ་གྲི་ཉི་མ་ཡི། །ཕྱག་མཚན་ལེགས་བསྣམས་བཀྲ་ཤིས་དཔལ་གྱི་མཆོག །བྱང་ཆུབ་སེམས་དཔའ་བརྒྱད་ལ་ཕྱག་འཚལ་ལོ། །རིན་ཆེན་གདུགས་མཆོག་བཀྲ་ཤིས་གསེར་གྱི་ཉ། །འདོད་འབྱུང་བུམ་བཟང་ཡིད་འོང་ཀ་མ་ལ། །སྙན་གྲགས་དུང་དང་ཕུན་ཚོགས་དཔལ་བེའུ། །མི་ནུབ་རྒྱལ་མཚན་དབང་བསྒྱུར་འཁོར་ལོ་སྟེ། །རིན་ཆེན་རྟགས་མཆོག་བརྒྱད་ཀྱི་ཕྱག་མཚན་ཅན། །ཕྱོགས་དུས་རྒྱལ་བ་མཆོད་ཅིང་དགྱེས་སྐྱེད་མ། །སྒེག་སོགས་ངོ་བོ་དྲན་པས་དཔལ་འཕེལ་བའི། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །ཚངས་པ་ཆེན་པོ་བདེ་འབྱུང་སྲེད་མེད་བུ། །མིག་སྟོང་ལྡན་དང་རྒྱལ་པོ་ཡུལ་འཁོར་སྲུང༌། །འཕགས་སྐྱེས་པོ་དང་ཀླུ་དབང་མིག་མི་བཟང༌། །རྣམ་ཐོས་སྲས་ཏེ་ལྷ་རྫས་འཁོར་ལོ་དང༌། །ཏྲི་ཤཱུ་ལ་དང་མདུང་ཐུང་རྡོ་རྗེ་ཅན། །པི་ཝཾ་རལ་གྲི་མཆོད་རྟེན་རྒྱལ་མཚན་འཛིན། །ས་གསུམ་གནས་སུ་དགེ་ལེགས་བཀྲ་ཤིས་སྤེལ། །འཇིག་རྟེན་སྐྱོང་བ་བརྒྱད་ལ་ཕྱག་འཚལ་ལོ། །དངོས་སུ་བཤམས་དང་ཡིད་ཀྱིས་རྣམ་སྤྲུལ་པའི། །དྲི་མེད་ཡིད་འོང་ལྷ་རྫས་བཀོད་པའི་ཆར། །མེ་ཏོག་བདུག་སྤོས་སྣང་གསལ་དྲི་ཡི་མཆོག །ཞལ་ཟས་རོལ་མོ་རྣམ་ལྔའི་འདོད་ཡོན་རྫས། །བཀྲ་ཤིས་རྟགས་རྫས་རྒྱལ་སྲིད་རིན་ཆེན་བདུན། །ཉེ་བའི་རིན་ཆེན་བདུན་དང་གླུ་གར་མ། །མཛེས་སྡུག་བཀོད་པའི་རོལ་མོ་མཐའ་ཡས་པ། །འབུལ་ལོ་བཞེས་ནས་བཀྲ་ཤིས་འཕེལ་བར་མཛོད། །ཁྱད་པར་བདག་ལུས་ལོངས་སྤྱོད་དགེ་རྩར་བཅས། །རང་རང་ཡིད་ལ་གང་བསམ་འདོད་དགུའི་སྤྲིན། །སྲིད་ཞིའི་འབྱོར་ཚོགས་མ་ཚང་མེད་པའི་ཆར། །མི་ཕྱེད་རོ་མཉམ་རྡོ་རྗེའི་དམ་ཚིག་རྫས། །ཀུན་བཟང་སྨོན་ལམ་སྟོབས་བཞིན་སྤྲུལ་ཏེ་འབུལ། །ཞེས་གང་འདོད་ཀྱི་མཆོད་པ་ཡིད་ཀྱི་དམིགས་པས་འབུལ་ཞིང༌། སྤྲོ་ན་མཎྜལ་རྒྱས་བསྡུས་ཀྱང་འབུལ། བདག་གཞན་ཐོག་མེད་དུས་ནས་ད་ལྟའི་བར། །མི་ཤེས་ཉོན་མོངས་སྒྲིབ་པའི་ཚོགས་ཀུན་བཤགས། །བསོད་ནམས་ཀུན་ལ་དགའ་བས་ཡི་རངས་ཤིང༌། །ཆོས་འཁོར་བསྐོར་བཞིན་རྟག་པར་བཞུགས་གསོལ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་རྣམས། །བྱང་ཆུབ་ཆེན་པོར་ཡོངས་སུ་བསྔོ་བྱེད་ཅིང༌། །རྒྱལ་བ་སྲས་བཅས་དགྱེས་པའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་བཟུང་བར་བགྱི། །མགོན་པོ་ཡེ་ཤེས་སྒྲིབ་པ་མི་མངའ་བས། །བདག་གི་ལྷག་པའི་བསམ་པ་ཁྱེད་ཀྱིས་མཁྱེན། །ཐུགས་དམ་མ་བསྙེལ་དགོངས་པའི་རྩལ་བསྐྱེད་ལ། །ཇི་ལྟར་གསོལ་བཏབ་འབྲས་བུ་མཆིས་པར་མཛོད། །བདག་ཅག་དེང་འདིར་བྱ་བ་རྩོམ་པ་ལ། །བགེགས་དང་ཉེ་བར་འཚེ་བ་ཀུན་ཞི་ནས། །འདོད་དོན་དཔལ་འཕེལ་བསམ་དོན་ཡིད་བཞིན་འགྲུབ། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །ཅེས་ལན་གསུམ་སོགས་ཅི་རིགས་དང༌། ཨེ་མ་ཧོ། རང་བྱུང་ཐུགས་རྗེའི་བདག་ཉིད་བཅོམ་ལྡན་འདས། །མཁྱེན་བརྩེ་ནུས་པ་མཚུངས་མེད་རྡོ་རྗེའི་སྐུ། །མ་ལུས་འགྲོ་བའི་གཏན་གྱི་མགོན་གྱུར་པ། །སྐྱབས་མཆོག་དམ་པ་བདག་ལ་དགོངས་སུ་གསོལ། །ཁྱེད་ནི་རང་བྱུང་ཡེ་ཤེས་བདེ་བ་ཆེ། །མ་ལུས་འགྲོ་ཀུན་ཁྱེད་ཀྱི་ངང་གྱུར་ཀྱང༌། །མི་ཤེས་རྒུད་པས་མནར་བ་བདག་ཅག་ལ། །དེང་ནས་རྟག་པ་དམ་པའི་མཆོག་སྩོལ་ཅིག །བཀྲ་ཤིས་ཀུན་གྱི་བཀྲ་ཤིས་བླ་མེད་པ། །གྲགས་པའི་བཀྲ་ཤིས་སྙན་གྲགས་དགེ་མཚན་ལྡན། །དབུགས་འབྱིན་ཆེན་པོ་དགའ་སྟོན་རྒྱ་ཆེ་བ། །དགའ་སྟོན་རོལ་མོ་ཆེན་པོས་དབུགས་དབྱུང་སྩོལ། །འཇམ་དཔལ་དཔལ་དང་ལྡན་པ་མཆོག་གྱུར་པ། །མཆོག་སྦྱིན་རྡོ་རྗེས་བདག་ལ་མཆོག་སྩོལ་ཅིག །དེ་བཞིན་གཤེགས་པ་ཀུན་གྱི་ཡེ་ཤེས་སྐུའི། །ཡེ་ཤེས་རྡོ་རྗེའི་དབང་བསྐུར་བདག་ལ་སྩོལ། །འདོད་འབྱུང་ཡིད་བཞིན་ནོར་བུ་ཆེན་པོ་འཆང༌། །དཔག་བསམ་ཤིང་ཆེན་རྒྱས་པ་འགྲོ་ཀུན་གསོས། །ཁྱབ་བདག་རིན་ཆེན་ཀུན་མཆོག་དབུལ་བ་སེལ། །བུམ་བཟང་ཆེ་མཆོག་བདག་ལ་དཔལ་གྱུར་ཅིག །དེང་ནས་བླ་མེད་བྱང་ཆུབ་མ་ཐོབ་པར། །ཚེ་རབ་ཀུན་ཏུ་ཁྱེད་ཀྱིས་རྗེས་བཟུང་སྟེ། །མི་མཐུན་རྒུད་པ་ཐམས་ཅད་རྒྱུན་ཆད་ནས། །དཔལ་དང་སྐལ་བཟང་བཀྲ་ཤིས་བདེ་ལེགས་ཤོག །དངོས་གཞི་གསོལ་བ་གདབ་པ་ནི། དད་མོས་རྩེ་གཅིག་པས། ཕྱོགས་དུས་རྒྱལ་བ་ཀུན་གྱི་ཡེ་ཤེས་སྐུ། །དཔལ་ལྡན་རྫོགས་པའི་སངས་རྒྱས་པདྨ་སྐྱེས། །འཇམ་དཔལ་ཡིད་བཞིན་ནོར་བུར་གསོལ་བ་འདེབས། །བཀྲ་ཤིས་དོན་ཀུན་འགྲུབ་པར་བྱིན་གྱིས་རློབས། །ཞེས་གྲངས་བསགས། ཨེ་མ་ཧོ། རང་བྱུང་ཐུགས་རྗེའི་བདག་ཉིད་བཅོམ་ལྡན་འདས། ཞེས་སོགས་ནས། དཔལ་དང་སྐལ་བཟང་བཀྲ་ཤིས་བདེ་ལེགས་ཤོག །ཅེས་པའི་བར་ལན་གསུམ་གྱིས་འདོད་དོན་གསོལ། མཐར། འཁོར་རྣམས་འོད་ཞུ་རིམ་གྱིས་གཙོ་ལ་ཐིམ། །གཙོ་བོའི་སྐུ་ལས་བདུད་རྩིའི་ཆར་རྒྱུན་བབས། །སྤྱི་བོ་ནས་ཞུགས་ལུས་གང་སྒྲིབ་ཀུན་ཞི། །བྱིན་རློབས་དབང་བསྐུར་རྡོ་རྗེའི་ཡེ་ཤེས་བསྐྱེད། །མཐར་ནི་འོད་ཞུ་རང་ཐིམ་དབྱེར་མེད་ངང༌། །འཇམ་དཔལ་ཡེ་ཤེས་སེམས་དཔའི་སྐུར་གྱུར་ནས། །སྣང་སྲིད་བདེ་ཆེན་མཉམ་ཉིད་བྱང་ཆུབ་སེམས། །མ་བཅོས་བློ་འདས་རྫོགས་པ་ཆེན་པོའོ། །ཞེས་མཉམ་པར་བཞག་ཅིང༌། གཟུངས་སྔགས། ཨ་ར་པ་ཙ་དང༌། ཨོཾ་མཉྫུ་ཤྲཱི་པ་ར་དྭ་བཛྲ་མཾ་སྭཱ་ཧཱ། ཞེས་ཅུང་ཟད་བཟླ་ཞིང་སྤྲོ་ན་འཇམ་དཔལ་སྒྱུ་འཕྲུལ་དྲྭ་བའི་རྒྱུད་རྒྱས་བསྡུས་དག་ཀྱང་བཀླག་པར་བྱའོ། །མགོན་པོ་ཁྱོད་ཀྱི་རྡོ་རྗེའི་མཚན། །ཡང་དག་བརྗོད་པས་རབ་བསྔགས་བདག །དེང་ནས་བྱང་ཆུབ་སྙིང་པོའི་བར། །དགྱེས་བཞིན་རྗེས་སུ་བཟུང་བར་མཛོད། །ཐོས་བསམ་བསྒོམ་པའི་དཀྱིལ་འཁོར་ཡོངས་སུ་རྫོགས། །འཆད་རྩོད་རྩོམ་པའི་འོད་ཟེར་རབ་ཏུ་གསལ། །སྙེམ་མེད་ཞི་བ་གཞན་ཕན་སྙིང་བརྩེ་དང༌། །དད་སོགས་ཡོན་ཏན་རྒྱ་མཚོས་མཛེས་གྱུར་ཅིག །དེ་ཡི་མཐུ་ལས་རྒྱལ་བའི་བསྟན་པ་ལ། བྱ་བ་རྒྱ་ཆེན་མཆོག་ཏུ་རབ་བགྱིད་ཅིང༌། །འཇམ་དཔལ་དཔའ་བོས་དགྱེས་བཞིན་རྗེས་བཟུང་ནས། །རང་གཞན་དོན་གཉིས་ལྷུན་གྱིས་འགྲུབ་པར་ཤོག །ཕན་བདེའི་འབྱུང་གནས་བསྟན་པ་འཕེལ་གྱུར་ཅིག །ཚེ་རབས་ཀུན་ཏུ་ཆོས་ལ་སྤྱོད་གྱུར་ཅིག །རྒྱལ་ཁམས་ཀུན་ཏུ་བཀྲ་ཤིས་རྒྱས་གྱུར་ཅིག །འགྲོ་ཀུན་ཕྱམ་གཅིག་སངས་རྒྱས་ཐོབ་པར་ཤོག །རྒྱལ་བའི་བསྟན་པ་དར་ཞིང་རྒྱས་པ་དང༌། །བསྟན་འཛིན་རྣམས་ཀྱི་བཞེད་པའི་དོན་ཀུན་འགྲུབ། །མ་ལུས་སྐྱེ་དགུའི་འགལ་རྐྱེན་ཀུན་ཞི་ཞིང༌། །ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །རྟེན་སྙིང་དང༌། ཕུན་སུམ་ཚོགས་པ་སོགས་ཀྱིས་དགེ་ལེགས་སུ་བྱའོ། འཇམ་དཔལ་ཀུན་འབྱུང་ནོར་བུའི་ལས་ཚོགས་ལ་བརྟེན་པའི་ཆོ་ག་བཀྲ་ཤིས་འདོད་དགུའི་དཔལ་སྟེར་ལས་ལུང་རྟོགས་དཔལ་གྱིས་འབྱོར་བ་ར་ཧོར་མཁན་ཟླ་ཟེར་གྱི་གསུང་བསྐུལ་བཞིན་འཇམ་དཔལ་དགྱེས་པའི་འབངས་བཀྲ་ཤིས་དཔལ་འབྱོར་གྱིས་ཆོ་ག་རྒྱས་པ་ལས་ཁོལ་དུ་ཕྱུང་བའོ།། །།

[edit]

@#/_/'jam dpal kun 'byung nor bu'i las tshogs las khol du phyung ba 'jam dpal yid bzhin nor bu'i sgrub thabs bzhugs so// oM swasti bi dza yan+tu/_rgyal kun mkhyen gnyis ye shes gar/_/'dod dgu'i sku mtshan rig sngags kyi/_/dngos grub mchog ster many+dzu shrI/_/dbyer med bla ma mchog la 'dud/_/'jam dpal yid bzhin nor bu'i bla ma'i rnal 'byor la brten pa'i cho ga la 'jug par 'dod pas rten gyi drung du mchod pa bshams la skyabs su 'gro ba ni/_na mo/_skyabs kyi dam pa skyabs su 'os/_/'jig rten dgra ste rab kyi mchog_/'jigs pa ma lus sel ba po/_/skyabs gnas rnams la skyabs su mchi/_/lan gsum/_sems bskyed ni/_mi shes 'dam du bying ba yi/_/sems can kun la sman pa dang*/_/bla med 'bras bu thob bya'i phyir/_/rdzogs pa'i byang chub sems bskyed do/__/lan gsum/_sems can bde dang ldan gyur cig_/sogs/_mchog gsum tshogs gnyis chos dbyings bden stobs kyis/_/snod bcud dag pa'i zhing gi 'byor ba'i dbus/_/rin chen gzhal med bkod mdzes gdan khri dang*/_/phul byung mchod pa'i sprin gyis mdzes gyur cig_/mchod pa'i sprin gzungs dang rten snying bzla/_gu ru'i tshig bdun gsol 'debs lan bdun brjod pas/_phyogs bcu'i zhing rab 'byams nas bla ma rgyal ba sras dang bcas pa thams cad dang rnga yab gling nas o rgyan rin po che 'khor dpa' bo mkha' 'gro'i tshogs dang bcas pa spyan drangs nas mdun gyi nam mkhar khyab bdag 'jam pa'i rdo rje'i rnam par bzhugs par mos/_oM/_snang srid rnam dag chos dbyings gzhal yas su/_/rang byung ye shes 'jam dpal gzhon nu'i sku/_/yid 'ong nyi ma 'char ka'i lang tsho can/_/dang po'i phyag gnyis ral gri ut+pa la/_/tha ma'i phyag gnyis nor bu bum bzang bsnams/_/dar dang rin chen rgyan rdzogs skyil krung gis/_/rab mdzes pad+ma zla ba'i gdan steng na/_/dpag bsam shing la sku rgyab brten nas bzhugs/_/de yi phyogs mtshams steng 'og thams cad du/_/srid zhi'i dpal 'byor mchod sprin 'khrigs pa'i klong*/_/bkra shis lha mo brgyad la sogs pa yis/_/rab 'byams mchod pa'i sprin gyis mkha' dbyings gang*/_/dran pa tsam gyis phun tshogs dpal yon kun/_/yid bzhin legs par stsol ba'i bdag nyid la/_/ma lus phyogs dus zhing gi rgyal ba dang*/_/rgyal ba sras bcas til gong ltar bzhugs pa/_/me tog char 'bebs shis pa'i glu dbyangs sgrogs/_/ye shes 'od zer 'bar bas mkha' khyab gsal/_/zhes gsal gdab/_de nas phyag mchod sogs 'bul bzhin/_oM/_snang srid rnam dag rang bzhin lhun grub pa'i/_/bkra shis phyogs bcu'i zhing na bzhugs pa yi/_/sangs rgyas chos dang dge 'dun 'phags pa'i tshogs/_/kun la phyag 'tshal mchod 'bul skyabs su mchi/_/sgron me'i rgyal po rtsal brtan don grub dgongs/_/byams pa'i rgyan dpal dge grags dpal dam pa/_/kun la dgongs pa rgya cher grags pa can/_/lhun po ltar 'phags rtsal grags dpal dang ni/_/sems can thams cad la dgongs grags pa'i dpal/_/yid tshim mdzad pa rtsal rab grags dpal te/_/mtshan tsam thos pas bkra shis dpal 'phel ba/_/bde bar gshegs pa brgyad la phyag 'tshal lo/_'jam dpal gzhon nu dpal ldan rdo rje 'dzin/_/spyan ras gzigs dbang mgon po byams pa'i dpal/_/sa yi snying po sgrib pa rnam par sel/_/nam mkha'i snying po 'phags mchog kun tu bzang*/_/ut+pal rdo rje pad dkar klu shing dang*/_/nor bu zla ba ral gri nyi ma yi/_/phyag mtshan legs bsnams bkra shis dpal gyi mchog_/byang chub sems dpa' brgyad la phyag 'tshal lo/_/rin chen gdugs mchog bkra shis gser gyi nya/_/'dod 'byung bum bzang yid 'ong ka ma la/_/snyan grags dung dang phun tshogs dpal be'u/_/mi nub rgyal mtshan dbang bsgyur 'khor lo ste/_/rin chen rtags mchog brgyad kyi phyag mtshan can/_/phyogs dus rgyal ba mchod cing dgyes skyed ma/_/sgeg sogs ngo bo dran pas dpal 'phel ba'i/_/bkra shis lha mo brgyad la phyag 'tshal lo/_/tshangs pa chen po bde 'byung sred med bu/_/mig stong ldan dang rgyal po yul 'khor srung*/_/'phags skyes po dang klu dbang mig mi bzang*/_/rnam thos sras te lha rdzas 'khor lo dang*/_/tri shU la dang mdung thung rdo rje can/_/pi waM ral gri mchod rten rgyal mtshan 'dzin/_/sa gsum gnas su dge legs bkra shis spel/_/'jig rten skyong ba brgyad la phyag 'tshal lo/_/dngos su bshams dang yid kyis rnam sprul pa'i/_/dri med yid 'ong lha rdzas bkod pa'i char/_/me tog bdug spos snang gsal dri yi mchog_/zhal zas rol mo rnam lnga'i 'dod yon rdzas/_/bkra shis rtags rdzas rgyal srid rin chen bdun/_/nye ba'i rin chen bdun dang glu gar ma/_/mdzes sdug bkod pa'i rol mo mtha' yas pa/_/'bul lo bzhes nas bkra shis 'phel bar mdzod/_/khyad par bdag lus longs spyod dge rtsar bcas/_/rang rang yid la gang bsam 'dod dgu'i sprin/_/srid zhi'i 'byor tshogs ma tshang med pa'i char/_/mi phyed ro mnyam rdo rje'i dam tshig rdzas/_/kun bzang smon lam stobs bzhin sprul te 'bul/_/zhes gang 'dod kyi mchod pa yid kyi dmigs pas 'bul zhing*/_spro na maN+Dal rgyas bsdus kyang 'bul/_bdag gzhan thog med dus nas da lta'i bar/_/mi shes nyon mongs sgrib pa'i tshogs kun bshags/_/bsod nams kun la dga' bas yi rangs shing*/_/chos 'khor bskor bzhin rtag par bzhugs gsol 'debs/_/'dis mtshon dus gsum bsags pa'i dge tshogs rnams/_/byang chub chen por yongs su bsngo byed cing*/_/rgyal ba sras bcas dgyes pa'i brtul zhugs mchog_/srog gi phyir yang mi gtong bzung bar bgyi/_/mgon po ye shes sgrib pa mi mnga' bas/_/bdag gi lhag pa'i bsam pa khyed kyis mkhyen/_/thugs dam ma bsnyel dgongs pa'i rtsal bskyed la/_/ji ltar gsol btab 'bras bu mchis par mdzod/_/bdag cag deng 'dir bya ba rtsom pa la/_/bgegs dang nye bar 'tshe ba kun zhi nas/_/'dod don dpal 'phel bsam don yid bzhin 'grub/_/bkra shis bde legs phun sum tshogs par shog_/ces lan gsum sogs ci rigs dang*/_e ma ho/_rang byung thugs rje'i bdag nyid bcom ldan 'das/_/mkhyen brtse nus pa mtshungs med rdo rje'i sku/_/ma lus 'gro ba'i gtan gyi mgon gyur pa/_/skyabs mchog dam pa bdag la dgongs su gsol/_/khyed ni rang byung ye shes bde ba che/_/ma lus 'gro kun khyed kyi ngang gyur kyang*/_/mi shes rgud pas mnar ba bdag cag la/_/deng nas rtag pa dam pa'i mchog stsol cig_/bkra shis kun gyi bkra shis bla med pa/_/grags pa'i bkra shis snyan grags dge mtshan ldan/_/dbugs 'byin chen po dga' ston rgya che ba/_/dga' ston rol mo chen pos dbugs dbyung stsol/_/'jam dpal dpal dang ldan pa mchog gyur pa/_/mchog sbyin rdo rjes bdag la mchog stsol cig_/de bzhin gshegs pa kun gyi ye shes sku'i/_/ye shes rdo rje'i dbang bskur bdag la stsol/_/'dod 'byung yid bzhin nor bu chen po 'chang*/_/dpag bsam shing chen rgyas pa 'gro kun gsos/_/khyab bdag rin chen kun mchog dbul ba sel/_/bum bzang che mchog bdag la dpal gyur cig_/deng nas bla med byang chub ma thob par/_/tshe rab kun tu khyed kyis rjes bzung ste/_/mi mthun rgud pa thams cad rgyun chad nas/_/dpal dang skal bzang bkra shis bde legs shog_/dngos gzhi gsol ba gdab pa ni/_dad mos rtse gcig pas/_phyogs dus rgyal ba kun gyi ye shes sku/_/dpal ldan rdzogs pa'i sangs rgyas pad+ma skyes/_/'jam dpal yid bzhin nor bur gsol ba 'debs/_/bkra shis don kun 'grub par byin gyis rlobs/_/zhes grangs bsags/_e ma ho/_rang byung thugs rje'i bdag nyid bcom ldan 'das/_zhes sogs nas/_dpal dang skal bzang bkra shis bde legs shog_/ces pa'i bar lan gsum gyis 'dod don gsol/_mthar/_'khor rnams 'od zhu rim gyis gtso la thim/_/gtso bo'i sku las bdud rtsi'i char rgyun babs/_/spyi bo nas zhugs lus gang sgrib kun zhi/_/byin rlobs dbang bskur rdo rje'i ye shes bskyed/_/mthar ni 'od zhu rang thim dbyer med ngang*/_/'jam dpal ye shes sems dpa'i skur gyur nas/_/snang srid bde chen mnyam nyid byang chub sems/_/ma bcos blo 'das rdzogs pa chen po'o/_/zhes mnyam par bzhag cing*/_gzungs sngags/_a ra pa tsa dang*/_oM many+dzu shrI pa ra dwa badz+ra maM swA hA/_zhes cung zad bzla zhing spro na 'jam dpal sgyu 'phrul drwa ba'i rgyud rgyas bsdus dag kyang bklag par bya'o/__/mgon po khyod kyi rdo rje'i mtshan/_/yang dag brjod pas rab bsngags bdag_/deng nas byang chub snying po'i bar/_/dgyes bzhin rjes su bzung bar mdzod/_/thos bsam bsgom pa'i dkyil 'khor yongs su rdzogs/_/'chad rtsod rtsom pa'i 'od zer rab tu gsal/_/snyem med zhi ba gzhan phan snying brtse dang*/_/dad sogs yon tan rgya mtshos mdzes gyur cig_/de yi mthu las rgyal ba'i bstan pa la/_bya ba rgya chen mchog tu rab bgyid cing*/_/'jam dpal dpa' bos dgyes bzhin rjes bzung nas/_/rang gzhan don gnyis lhun gyis 'grub par shog_/phan bde'i 'byung gnas bstan pa 'phel gyur cig_/tshe rabs kun tu chos la spyod gyur cig_/rgyal khams kun tu bkra shis rgyas gyur cig_/'gro kun phyam gcig sangs rgyas thob par shog_/rgyal ba'i bstan pa dar zhing rgyas pa dang*/_/bstan 'dzin rnams kyi bzhed pa'i don kun 'grub/_/ma lus skye dgu'i 'gal rkyen kun zhi zhing*/_/phun tshogs mtha' dag yid bzhin 'byor gyur cig_/rten snying dang*/_phun sum tshogs pa sogs kyis dge legs su bya'o/_'jam dpal kun 'byung nor bu'i las tshogs la brten pa'i cho ga bkra shis 'dod dgu'i dpal ster las lung rtogs dpal gyis 'byor ba ra hor mkhan zla zer gyi gsung bskul bzhin 'jam dpal dgyes pa'i 'bangs bkra shis dpal 'byor gyis cho ga rgyas pa las khol du phyung ba'o//_//