JKW-KABAB-04-NGA-023

🚧 This website is under continued development. We appreciate your patience!

Previous Text Back to Volume PageNext Text

རྩ་གསུམ་དྲིལ་སྒྲུབ་ཞལ་ཐང་འབྲིང་པོའི་བཀོད་ཡིག།

Wylie title	rtsa gsum dril sgrub zhal thang 'bring po'i bkod yig
Location	mkhyen brtse'i bka' babs Volume 4, Text 23, Pages 277-283 (Folios 1a1 to 4a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་, སངས་རྒྱས་བླ་མ་ ('jam dbyangs mkhyen brtse'i dbang po, sangs rgyas bla ma)
Citation	'jam dbyangs mkhyen brtse'i dbang po. rtsa gsum dril sgrub zhal thang 'bring po'i bkod yig. In Rdzong sar 'jam dbyangs mkhyen brtse'i dbang po'i bka' babs, Vol. 4: 277-283. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Art - rtsom rig / ri mo / bris cha  ·  Guides to Paintings - bri yig  ·  Revelations - gter ma
Cycle	རྩ་གསུམ་དྲིལ་སྒྲུབ་ (rtsa gsum dril sgrub)
Karchag page	JKW-KABAB-Volume-04-NGA-Karchag
Recension Link	Other Versions on this site: རྩ་གསུམ་དྲིལ་སྒྲུབ་ཞལ་ཐང་འབྲིང་པོའི་བཀོད་ཡིག།

Tibetan Text

Wylie

[edit]

༄༅། །རྩ་གསུམ་དྲིལ་སྒྲུབ་ཞལ་ཐང་འབྲིང་པོའི་བཀོད་ཡིག་བཞུགས་སོ།། ༈ །ཞལ་ཐང་འབྲིང་པོའི་བཀོད་ཡིག་ནི། ཨོཾ་སྭ་སྟི་སིདྡྷཾ། རྩ་གསུམ་དྲིལ་སྒྲུབ་ཀྱི་ཞལ་ཐང་བཀོད་པ་འབྲིང་པོ་ཀུན་གོ་གཅིག་ཆོད་ཀྱི་བཀོད་ཡིག་ལ། དབུས་སུ་བླ་མ་ཀུན་འདུས་པདྨ་འབྱུང་གནས་སྣང་སྲིད་ཟིལ་གནོན་སྐུ་མདོག་དཀར་ལ་དམར་མདངས་ཆགས་པ། ཞལ་རས་ཞི་ཞིང་སྒེག་ལ་སྤྱན་ལྟ་སྟངས་ཧྲིག་གེ་བ་ཧུར་བག་ལྟ་བུའི་ཁྲོ་ཉམས་དང༌། ཞལ་འཛུམ་ཞིང་ཅུང་ཁྲོ་ཉམས། ན་བཟའ་ནང་དུ་གསང་གོས་དཀར་པོ། དེ་སྟེང་ཕོད་ཀ་མཐིང་ནག་གསེར་རིས་ཅན། དེ་སྟེང་ཆོས་གོས་དམར་པོ། དེ་སྟེང་སྣམ་སྦྱར་དམར་སེར་ལེའུ་ལ་གསེར་ཀྱི་མེ་གོར་རྩིང་ཞད་ཡོད་པ། དེ་སྟེང་གོས་བེར་དམར་སྨུག་གསེར་གྱི་འབྲུག་རིས་སོགས་ཅི་མཛེས། དབུ་ཞྭ་ཤེའུའི་སྙན་ཞུ་ཞེས་ཤ་བ་ཆུང་ངུའི་པགས་པས་ནང་གི་ཁ་དྲིལ་བྱས་པ་རྒོད་ལྡེམ་མེ་ལོང་རྨ་བྱའི་སྒྲོ་ཕོད་དར་སྣས་བརྒྱན་པ་སོགས་སྤྱི་ལྟར། ཕྱག་གཡས་སྡིགས་མཛུབ་དང་བཅས་གསེར་རྡོར་རྩེ་ལྔ་པ་ནམ་མཁར་འཕྱར་བའི་རྭ་རྩེ་ལས་མེ་ལྕེ་ཕྲ་མོ་གློག་གི་ཟེགས་མ་ལྟ་བུའི་རྩེ་མོ་ཇེ་སྦོམ་དུ་སོང་བ། འཇའ་གུར་གྱི་ཕྱིར་སླེབ་དུས་དྲག་མེ་ཟླུམ་འཁྱིལ་དུ་གྱུར་པའི་ནང་དུ་གུ་རུ་དྲག་དམར་དཔའ་གཅིག་སྤྱི་འགྲེ་ཟུར་ཞལ་གཡོན་གཟིགས་ཅན། གཙོ་བོ་སྐུ་ཚད་མཐོ་གང་དྲག་ཙམ་ལ་མཚོན་ན་གུར་དྲག་སོར་གང་ཙམ་པ་ཤིན་ཏུ་བཀོད་ལེགས། ཐང་ག་ཆེ་ན་གུར་དྲག་དེ་ལས་དྲག་པོ་རིགས་བཞི། ཤིན་ཏུ་ཆུང་ངུ་མེ་ཕུང་ཀློང་དུ་ཕྲ་ཐབས་སུ་འཕྲོ་བ་བྲིས་ན་ལེགས་ཀྱང༌། ཐང་ཆུང་ལ་བྲི་རྒྱུ་མང་པོ་དེ་རིགས་མི་ལེགས་པས་གཙོ་རྐྱང་ཁོ་ནས་ཆོག །ཕྱག་གཡོན་ལྟེ་བའི་ཐད་དུ་མཉམ་གཞག་མཛད་པའི་སྟེང་བྷནྡྷ་དུམ་བུ་གསུམ་པ་ནོར་བུའི་གང་བའི་དབུས་སུ་འཆི་མེད་ཚེ་བུམ་གསེར་མདོག་རིན་པོ་ཆེའི་རྒྱན་ལྡན་ནོར་བུས་ཁ་བརྒྱན་པ་ལས་མཇའ་མཚོན་སྣ་ལྔ་རྩ་བ་ཕྲ་བ་རྩེ་མོ་སྦོམ་པ་ཞིག་ཤར་གྱིས་འཕྲོས་པའི་རྩེར་ལྷ་མོ་མགྱོགས་མ་ལྔ་ཚོམ་མཐིང༌། དཀར། སེར། དམར། ལྗང༌། གཡས་ཐམས་ཅད་མདའ་དར་གཡོབ་པ། གཡོན་རང་མདོག་གི་ཚེ་བུམ། ཞབས་གར་སྟབས་བདེ་ཉམས་འཁྱུག་པ། དར་དང་རིན་པོ་ཆེའི་རྒྱན་སོགས་སྤྱི་ལྟར། ལྔ་ཀ་བསྡམས་པས་གུར་དྲག་གི་སྐུ་ཚད་ཙམ། དེའང་གུར་དྲག་དང༌། འགྱོགས་མ་གཉིས་ཀ་འཇའ་གུར་གྱི་རྒྱབ། སྙན་གཡས་གཡོན་གྱི་ཐད་ཙམ་དུ་ཡོད་པ། མཐོ་དམན་མེད་པའི་ཆ་སྙོམས་དང་གྲ་འགྲིག་ཞིག་གལ་ཆེ། གྲུ་མོ་གཡོན་དུ་ཁ་ཊྭཱྃ་རྩེ་གསུམ་སྤྱི་ལྟར། ཞབས་སག་ལྷམ་གསོལ་ཞིང་གཡས་བརྐྱང་རྒྱལ་པོ་རོལ་སྟབས། ཕྱི་རོལ་དུ་གཞི་འོད་ཟླུམ་མཐིང་ག་ལ་གསེར་གྱི་ཟེར་ཐག་དང་མཐའ་སྐོར་དུ་འཇའ་གོར་ཁ་དོག་ལྔ་ལྡན་ཤིན་ཏུ་མཛེས་པའི་རྒྱབ་ཏུ་ཤིང་ལོ་མེ་ཏོག་གང་མཛེས་ཀྱིས་བསྐོར་བ། གདན་སེང་གེས་བཏེགས་པའི་རིན་པོ་ཆེའི་ཁྲི། སྣ་ཚོགས་པདྨ། ཟླ་བ། ཉི་མ་སྟེ་བཞི་བརྩེགས་སོ། །སྤྱི་བོར་འཇའ་སྤྲིན་གྱི་དབུས་སུ་ཆོས་སུ་སྐུ་སྣང་བ་མཐའ་ཡས་དམར་པོ། ཕྱག་མཉམ་གཞག་བེཌཱུརྻའི་ལྷུང་བཟེད་བདུད་རྩིས་གང་བ། སྤྲུལ་སྐུ་ཆ་ལུགས་སོགས་སྤྱི་འགྲེ། གདན་པད་ཟླ། ཨོ་རྒྱན་གྱི་སྤྱི་བོ་དང་བར་དུ་འཇའ་འོད་ཀྱིས་སྦྲེལ་བ། དེའི་གཡས་སུ་ཅུང་དམའ་བར་སྤྱན་རས་གཟིགས་སེམས་ཉིད་ངལ་བསོ་གཡས་མཆོག་སྦྱིན། གཡོན་སྐྱབས་སྦྱིན་པད་དཀར། དར་དང་རིན་པོ་ཆེའི་རྒྱན། རི་དྭགས་པགས་པས་ནུ་གཡོན་བཀབ་པ་སོགས་སྤྱི་ལྟར། ཞབས་ཕྱེད་སྐྱིལ། གདན་པད་ཟླའོ། གཡོན་དུ་ཡི་དམ་ཡོངས་འདུས་རྟ་མགྲིན་དམར་སྨུག །གཡས་མཐེབ་སྲིན་སྦྱར་ཞིང་སོར་མོ་ལྷག་མ་གསུམ་བསྒྲེངས་པའི་དབང་སྡུད་ཀྱི་ཕྱག་རྒྱས་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀ །དུར་ཁྲོད་ཀྱི་ཆས་བརྒྱད་དང༌། རུས་པའི་རྒྱན་ཁྲོ་ཉམས་སྤྱི་ལྟར། གཤོག་པ་སོགས་དཔའ་ཆས་མི་དགོས། ཡུམ་མཁའ་འགྲོ་ཀུན་འདུས་རྡོ་རྗེ་ཕག་མོ་གྲི་ཐོད་འཛིན་པས་ཡབ་ལ་འཁྱུད་ཅིང༌། རིན་ཆེན་དང་རུས་རྒྱན་གཟིགས་ཤམ་ཅན། ཡབ་ཀྱི་སྤྱི་བོར་རྟ་གདོང་ལྗང་གུ། རྔོག་མ་དམར་པོ། ཞུར་དཀར་པོ། ཕྲུམ་ཕྲུམ་སེར་པོ་ནམ་མཁར་ཞལ་གདངས་ནས་འཚེར་བ། ཡུམ་གྱི་སྤྱི་བོར་ཕག་གདོང༌། ཡབ་ཡུམ་ཞལ་དངོས་སུ་སྦྱོར་བ། ཞབས་གཡོན་བརྐྱངས་པའི་དོར་སྟབས། གདན་པདྨ། ཉི་མ། བདུད་བཞི་སྟེ་གཡས་སུ་ལྷའི་བུའི་བདུད་དཀར་པོ་ཞི་ཉམས། ཉོན་མོངས་མདུད་དམར་པོ་ཆགས་ཉམས། གཡོན་དུ་ཕུང་བདུད་ལྗང་གུ་སྒེག་ཉམས། འཆི་བདུད་ནག་པོ་ཁྲོ་ཉམས་ཅན་རྣམས་མགོ་གཡོན་དུ་བསྟན་ནས་བསྒྱེལ་བ། ཕྱི་རོལ་དུ་མེ་རི་པ་ཏྲའི་རྣམ་པ། སྤྱིར་རྟ་མགྲིན་འདི་རྙིང་མའི་གཤིན་རྗེ་ཁྲོས་པ་ལྟ་བུའི་ཧ་ཅང་ཁྲོ་ཉམས་མི་ཆེ་བ། གསར་མའི་དྲང་སྲོང་ཁྲོས་པ་ལས་ཅུང་ཁྲོ་ཉམས་ཚེ་ཙམ་དང༌། སྐུ་ལུས་ཀྱང་འགྱིང་ཞིང་སྒེག་ཉམས་ལས་སྦོམ་ཐུང་ལྟ་བུ་མི་བྲི། ཐུགས་རྗེ་ཆེན་པོའི་འོག་ཏུ་གཏེར་སྟོན་སངས་རྒྱས་བླ་མ་སྐུ་ཤ་རྒྱས་ཤིང་བརྗིད་ཆགས་པ། སྤྱན་ཟླུམ་ཧྲིག་གེ་བ། ཞལ་ཚོམ་ཅུང་ཟད་ཡོད་པ། དབུ་སྐྲ་ཟླུམ་འཁྱིལ། ནང་དུ་གསང་གོས་དཀར་པོ། དེ་སྟེང་གོས་རྒྱ་ཁ། དེ་སྟེང་སྟོད་ལེ་སེར་པོ་བྲང་གཞུང་དུ་ཐོར་གཅུགས་སྦྲེལ་བའི་རྒྱ་གོས་ལྟ་བུ། དེ་སྟེང་སྐུ་གཟན་དམར་པོ་ཞིག་དཀྲིས་པ། རྒྱབ་ཏུ་བེར་དམར་སྨུག་ལྷུབ་གྱོན། དབུ་ཞྭ་པདྨ་སཾ་ཞུ་རྣ་ཐུང་རྒྱབ་ཡོད་པ་གསེར་སྐུད་ཅན། ཕྱག་གཡས་ཆོས་མཆད། གཡོན་མཉམ་གཞག་སྟེང་གཏེར་གྱི་སྒྲོམ་བུ་གདན་རིན་པོ་ཆེའི་ཁྲི་ཆུང་དང་དར་འབོལ། རྟ་མགྲིན་འོག་ཏུ་རྩ་བའི་བླ་མ། སློབ་དཔོན་རིན་པོ་ཆེའི་འོག་ཏུ། མགོན་པོ་ཕོ་རྒྱུད་ཀྱི་གཙོ་བོ་རྒྱུད་མགོན་ལེགས་ལྡན་སྐུ་མདོག་མཐིང་ནག་སྦོམ་ཞིང་ཐུང་བ། ཁྲོ་གཉེར་སྤྱན་གསུམ་དབུ་སྐྲ་སྨར་སྨིན་ཁམ་ནག །གཡས་གྲི་གུག་དང༌། གཡོན་ཐོད་ཁྲག་ཐུགས་ཀར་སྟེང་འོག །མཆན་གཡས་ཙནྡན་གྱི་བིང་ཆེན་སྒོ་གཉིས་པ་རྩེ་མོར་ནོར་བུས་མཚན། དར་ནག་གི་འཇོམ་བེར་བརྩེག་མ། གསེར་སྐེད། ཐོད་སྐམ་དབུ་རྒྱན་རློན་པའི་དོ་ཤལ་དང༌། སྦྲུལ་རྒྱན་དང་མི་ལྤགས་སོགས་དུར་ཁྲོད་ཆས། ཞབས་སག་ལྷམ་ཡུ་རིང་གསོལ་ནས་གཡོན་བརྐྱང་པའི་དོར་སྟབས། གདན་པད་ཉི་དགྲ་བགེགས་མི་རོ་རྟ་རོ། སྤྱི་བོར་བྱ་ཁྱུང༌། དཔུང་མགོ་གཉིས་ནས་སེངྒེ། རྩིབ་ལོགས་གཉིས་ནས་འཕར་དྲེད། ཞབས་ལས་སྟག་རྣམས་འཕྲོ་བ། མེ་ཕུང་འབར་བའི་དབུས་ན་བཞུགས་པ་སོགས་སྤྱི་ལྟར། ལེགས་ལྡན་གྱི་གཡས་ཅུང་ཟད་དམའ་བར་གཉིས་མེད་རྒྱུད་ཀྱི་གཙོ་བོ་མ་ནིང་མཐིང་ནག་ཁྲོ་གཏུམ། གཡས་རུ་མཚོན་འཕྱར། གཡོན་སྙིང་དང་ཞབས་པ་འཛིན། སྤྱན་གསུམ་དམར་ཟླུམ་སོགས་ཁྲོ་ཉམས་སྤྱི་འགྲོ། སྤྲུལ་ནག་གི་རལ་པ་ཐུར་དུ་འཕྱང་བ། ཐོད་པ་སྐམ་པོའི་དབུ་རྒྱན་དང༌། རློན་པའི་དོ་ཤལ། སྙིང་ཕྲེང་དང༌། སྦྲུལ་ཆུན། དར་ནག་གི་འཇོལ་བེར་བརྩེགས་མ། གསེར་སྐེད་དང་མི་ལྤགས་ཀྱི་སྐེ་རགས་ཙནྡན་གྱི་བིང་ཆེན་སྒོ་གསུམ་པ་རྐེད་པར་བཙུགས་པ། དར་སྣ་ཚོགས་ཀྱི་ཅོད་པན་དང་ལྷབ་ལྷུབ། ཞབས་གཡོན་བརྐྱང་དོར་སྟབས། གདན་པད་ཉི་མི་རོ། གཡོན་ཅུང་ཟད་དམའ་བར་སྲིད་པ་མོ་རྒྱུད་ཀྱི་གཙོ་མོ་ཨེ་ཀ་ཛ་ཊི་སྐུ་མདོག་སྨུག་ནག །དཔྲལ་བར་སྤྱན་དམར་ཟླུམ། ཞལ་ནས་ཚེམས་གཅིག་རལ་པ་ཁམ་ནག་ཐུར་དུ་གྲོལ་བའི་དབུས་ནས་ལྕགས་རལ་ནག་པོ་ཉག་གཅིག་གྱེན་དུ་ལངས་པ། ཐུགས་ཀར་འོ་མ་འཛག་བཞིན་པའི་ནུ་མ་གཅིག་འཕྱང་བ། གཡས་ཞིང་དབྱུག་ཀླད་ལ་འཕྱར། གཡོན་དགྲ་སྙིང་བཟུང་ཞིང་ལྕགས་སྤྱང་ཁ་ཕ་གྱུས་པ་ཁྲ་ཐབས་སུ་འགྱེད་པ། ཐོད་སྐམ་ཅོད་པན་དང༌། ཐོད་སྐམ་གྱི་དོ་ཤལ། མི་ལྤགས་འཇའ་སྤྲིན་གྱི་སྟོད་གཡོགས། སྟག་ཤམ། རུས་པའི་རྒྱན་ལྔ། ཞབས་གཡོན་བརྐྱང་པའི་གར་སྟབས། གདན་པད་ཉི། མི་རོ། མ་ནིང་གཡས་ཅུང་ཟད་དམའ་བར་གནོད་སྦྱིན་ནོར་ལྷའི་གཙོ་བོ་རྣམས་སྲས་སྐུ་མདོག་སེར་པོ། གཡས་རྒྱལ་མཚན་གཡོན་ནེའུ་ལེ་ནོར་བུ་སྐྱུགས་པ། རིན་པོ་ཆེའི་ཐོར་ཚུགས་དང་དབུ་རྒྱན། དར་གྱི་ན་བཟའ་ཁ་དོག་སྣ་ཚོགས་ལྷབ་ལྷུབ། ཕྲག་གོང་གཡས་སུ་ཉི་མ། གཡོན་དུ་ཟླ་བ། མདུན་དུ་ནོར་སྤུངས། ཞབས་གཡོན་བརྐྱངས་པའི་རོལ་སྟབས་ཀྱིས་སེང་གེ་དཀར་མོ་ཉལ་ཐབས་ཀྱིས་སྟེང་ན་བཞུགས་པ་སོགས་སྤྱི་ལྟར་དང༌། གདན་སྣ་ཚོགས། པདྨ། ཉི་མ། རྣམ་སྲས་ཀྱི་ཐད་ཨེ་ཀ་ཛ་ཊི་གཡོན་དུ་གཏེར་བདག་གཞི་བདག་གི་གཙོ་མོ་བཀྲ་ཤིས་ཚེ་རིང་མ་དཀར་གསལ་ཞི་འཛུམ། གཡས་གསེར་གྱི་རྡོ་རྗེ་འཕྱར། གཡོན་གསེར་གྱི་ཚེ་བུམ་ནོར་བུའི་ཁ་རྒྱན་ཅན་ཐུགས་ཀར། ནང་གོས་ལྗང་གུ། སྐུ་རགས་སྔོན་པོ། ཕྱི་གོས་དཀར་པོ་གསེར་རིས་ཅན། སེང་གེ་དཀར་མོ་ལ་ཆིབས་པ། གདན་པདྨ། ཟླ་བའོ། ༈ །ལེགས་ལྡན་གྱི་མདུན་དུ་འཇའ་གུར་གྱི་དབུས་སུ་མཆོད་པའི་བྱེ་བྲག་གཙོ་བོ་ཐམས་ཅད་པའི་ནང་དུ་གཏོར་མ་རིན་ཆེན་འབར་མ་དཔེ་བྲིས་ཡོངས་གྲགས་ལྟར་དང༌། དེའི་གཡས་སུ་སྨན་ཕུད་སྣོད་ཞི་ཐོད། གཡོན་དུ་རཀྟའི་དྲག་ཐོད། གཏོར་མའི་མདུན་དུ་རིན་པོ་ཆེའི་པད་གཞོང་དུ་ཚོགས་གཏོར་ལ་ཚོགས་རྫས་ཤིང་ཏོག །ལ་བུག་ཉ་ཤ །ཁུར་བ། ཐུད་སོགས་ཀྱིས་བརྒྱན་པ། དེའི་གཡས་སུ་རིན་པོ་ཆེའི་ཕུད་ཀོང་གསེར་སྐྱེམས་བཅས། གཡོན་དུ་ཚོགས་ཆང་བདུད་རྩིའི་ཐོད་པ་བཅས། དེའི་མདུན་དང་གཡས་གཡོན་གང་བདེར་མཆོད་ཡོན་རིན་པོ་ཆེའི་པད་ཕོར་ཀོང་བུ་ཡུ་རིང་གི་རྣམ་པའི་ནང་དུ་མཆོད་ཡོན་དཀར་པོས་ཁེངས་པ། ཞབས་བསིལ་དངུལ་གྱི་བྱ་མ་བུམ། གཞན་མེ་བུམ་སོགས་ནས་རོལ་མོའི་བར་སྤྱི་ལྟར་དང༌། འདོད་ཡོན་ལྔ་རྣམས་བཀོད་མཛེས། དེ་ལས་རྒྱས་ན་བཀྲ་ཤིས་རྫས་རྟགས་སོགས་བྲིས་ཀྱང་ཆོག་གོ ༈ །བསྡུ་ན་སློབ་དཔོན། རིགས་བདག །ཐུགས་རྗེ་ཆེན་པོ་ཞི་དྲག །གུར་དྲག་དང་མགྱོགས་མ། ལེགས་ལྡན། རྣམ་སྲས། ཚེ་རིང་མ་ཙམ་གྱིས་མཐུས་སོ།། མངྒ་ལཾ།།

[edit]

@#/__/rtsa gsum dril sgrub zhal thang 'bring po'i bkod yig bzhugs so//__!__/zhal thang 'bring po'i bkod yig ni/__oM swa sti sid+d+haM/__rtsa gsum dril sgrub kyi zhal thang bkod pa 'bring po kun go gcig chod kyi bkod yig la/__dbus su bla ma kun 'dus pad+ma 'byung gnas snang srid zil gnon sku mdog dkar la dmar mdangs chags pa/___zhal ras zhi zhing sgeg la spyan lta stangs hrig ge ba hur bag lta bu'i khro nyams dang*/__zhal 'dzum zhing cung khro nyams/__na bza' nang du gsang gos dkar po/__de steng phod ka mthing nag gser ris can/__de steng chos gos dmar po/__de steng snam sbyar dmar ser le'u la gser kyi me gor rtsing zhad yod pa/__de steng gos ber dmar smug gser gyi 'brug ris sogs ci mdzes/__dbu zhwa she'u'i snyan zhu zhes sha ba chung ngu'i pags pas nang gi kha dril byas pa rgod ldem me long rma bya'i sgro phod dar snas brgyan pa sogs spyi ltar/__phyag g.yas sdigs mdzub dang bcas gser rdor rtse lnga pa nam mkhar 'phyar ba'i rwa rtse las me lce phra mo glog gi zegs ma lta bu'i rtse mo je sbom du song ba/__'ja' gur gyi phyir sleb dus drag me zlum 'khyil du gyur pa'i nang du gu ru drag dmar dpa' gcig spyi 'gre zur zhal g.yon gzigs can/__gtso bo sku tshad mtho gang drag tsam la mtshon na gur drag sor gang tsam pa shin tu bkod legs/__thang ga che na gur drag de las drag po rigs bzhi/__shin tu chung ngu me phung klong du phra thabs su 'phro ba bris na legs kyang*/__thang chung la bri rgyu mang po de rigs mi legs pas gtso rkyang kho nas chog__/phyag g.yon lte ba'i thad du mnyam gzhag mdzad pa'i steng b+han+d+ha dum bu gsum pa nor bu'i gang ba'i dbus su 'chi med tshe bum gser mdog rin po che'i rgyan ldan nor bus kha brgyan pa las mja' mtshon sna lnga rtsa ba phra ba rtse mo sbom pa zhig shar gyis 'phros pa'i rtser lha mo mgyogs ma lnga tshom mthing*/__dkar/__ser/__dmar/__ljang*/__g.yas thams cad mda' dar g.yob pa/__g.yon rang mdog gi tshe bum/__zhabs gar stabs bde nyams 'khyug pa/__dar dang rin po che'i rgyan sogs spyi ltar/__lnga ka bsdams pas gur drag gi sku tshad tsam/__de'ang gur drag dang*/__'gyogs ma gnyis ka 'ja' gur gyi rgyab/__snyan g.yas g.yon gyi thad tsam du yod pa/__mtho dman med pa'i cha snyoms dang gra 'grig zhig gal che/__gru mo g.yon du kha T+wA~M rtse gsum spyi ltar/__zhabs sag lham gsol zhing g.yas brkyang rgyal po rol stabs/__phyi rol du gzhi 'od zlum mthing ga la gser gyi zer thag dang mtha' skor du 'ja' gor kha dog lnga ldan shin tu mdzes pa'i rgyab tu shing lo me tog gang mdzes kyis bskor ba/__gdan seng ges btegs pa'i rin po che'i khri/__sna tshogs pad+ma/__zla ba/__nyi ma ste bzhi brtsegs so/__/spyi bor 'ja' sprin gyi dbus su chos su sku snang ba mtha' yas dmar po/__phyag mnyam gzhag beDUr+Ya'i lhung bzed bdud rtsis gang ba/__sprul sku cha lugs sogs spyi 'gre/__gdan pad zla/__o rgyan gyi spyi bo dang bar du 'ja' 'od kyis sbrel ba/__de'i g.yas su cung dma' bar spyan ras gzigs sems nyid ngal bso g.yas mchog sbyin/__g.yon skyabs sbyin pad dkar/__dar dang rin po che'i rgyan/__ri dwags pags pas nu g.yon bkab pa sogs spyi ltar/__zhabs phyed skyil/__gdan pad zla'o/__g.yon du yi dam yongs 'dus rta mgrin dmar smug__/g.yas mtheb srin sbyar zhing sor mo lhag ma gsum bsgrengs pa'i dbang sdud kyi phyag rgyas gri gug 'phyar zhing*/__g.yon thod khrag thugs ka__/dur khrod kyi chas brgyad dang*/__rus pa'i rgyan khro nyams spyi ltar/__gshog pa sogs dpa' chas mi dgos/__yum mkha' 'gro kun 'dus rdo rje phag mo gri thod 'dzin pas yab la 'khyud cing*/__rin chen dang rus rgyan gzigs sham can/__yab kyi spyi bor rta gdong ljang gu/__rngog ma dmar po/__zhur dkar po/__phrum phrum ser po nam mkhar zhal gdangs nas 'tsher ba/__yum gyi spyi bor phag gdong*/__yab yum zhal dngos su sbyor ba/__zhabs g.yon brkyangs pa'i dor stabs/__gdan pad+ma/__nyi ma/__bdud bzhi ste g.yas su lha'i bu'i bdud dkar po zhi nyams/__nyon mongs mdud dmar po chags nyams/__g.yon du phung bdud ljang gu sgeg nyams/__'chi bdud nag po khro nyams can rnams mgo g.yon du bstan nas bsgyel ba/__phyi rol du me ri pa tra'i rnam pa/__spyir rta mgrin 'di rnying ma'i gshin rje khros pa lta bu'i ha cang khro nyams mi che ba/__gsar ma'i drang srong khros pa las cung khro nyams tshe tsam dang*/__sku lus kyang 'gying zhing sgeg nyams las sbom thung lta bu mi bri/__thugs rje chen po'i 'og tu gter ston sangs rgyas bla ma sku sha rgyas shing brjid chags pa/__spyan zlum hrig ge ba/__zhal tshom cung zad yod pa/__dbu skra zlum 'khyil/__nang du gsang gos dkar po/__de steng gos rgya kha/__de steng stod le ser po brang gzhung du thor gcugs sbrel ba'i rgya gos lta bu/__de steng sku gzan dmar po zhig dkris pa/__rgyab tu ber dmar smug lhub gyon/__dbu zhwa pad+ma saM zhu rna thung rgyab yod pa gser skud can/__phyag g.yas chos mchad/__g.yon mnyam gzhag steng gter gyi sgrom bu gdan rin po che'i khri chung dang dar 'bol/__rta mgrin 'og tu rtsa ba'i bla ma/__slob dpon rin po che'i 'og tu/__mgon po pho rgyud kyi gtso bo rgyud mgon legs ldan sku mdog mthing nag sbom zhing thung ba/__khro gnyer spyan gsum dbu skra smar smin kham nag__/g.yas gri gug dang*/__g.yon thod khrag thugs kar steng 'og__/mchan g.yas tsan+dan gyi bing chen sgo gnyis pa rtse mor nor bus mtshan/__dar nag gi 'jom ber brtseg ma/__gser sked/__thod skam dbu rgyan rlon pa'i do shal dang*/__sbrul rgyan dang mi lpags sogs dur khrod chas/__zhabs sag lham yu ring gsol nas g.yon brkyang pa'i dor stabs/__gdan pad nyi dgra bgegs mi ro rta ro/__spyi bor bya khyung*/__dpung mgo gnyis nas seng+ge/__rtsib logs gnyis nas 'phar dred/__zhabs las stag rnams 'phro ba/__me phung 'bar ba'i dbus na bzhugs pa sogs spyi ltar/__legs ldan gyi g.yas cung zad dma' bar gnyis med rgyud kyi gtso bo ma ning mthing nag khro gtum/__g.yas ru mtshon 'phyar/__g.yon snying dang zhabs pa 'dzin/__spyan gsum dmar zlum sogs khro nyams spyi 'gro/__sprul nag gi ral pa thur du 'phyang ba/__thod pa skam po'i dbu rgyan dang*/__rlon pa'i do shal/__snying phreng dang*/__sbrul chun/__dar nag gi 'jol ber brtsegs ma/__gser sked dang mi lpags kyi ske rags tsan+dan gyi bing chen sgo gsum pa rked par btsugs pa/__dar sna tshogs kyi cod pan dang lhab lhub/__zhabs g.yon brkyang dor stabs/__gdan pad nyi mi ro/__g.yon cung zad dma' bar srid pa mo rgyud kyi gtso mo e ka dza Ti sku mdog smug nag__/dpral bar spyan dmar zlum/__zhal nas tshems gcig ral pa kham nag thur du grol ba'i dbus nas lcags ral nag po nyag gcig gyen du langs pa/__thugs kar 'o ma 'dzag bzhin pa'i nu ma gcig 'phyang ba/__g.yas zhing dbyug klad la 'phyar/__g.yon dgra snying bzung zhing lcags spyang kha pha gyus pa khra thabs su 'gyed pa/__thod skam cod pan dang*/__thod skam gyi do shal/__mi lpags 'ja' sprin gyi stod g.yogs/__stag sham/__rus pa'i rgyan lnga/__zhabs g.yon brkyang pa'i gar stabs/__gdan pad nyi/__mi ro/__ma ning g.yas cung zad dma' bar gnod sbyin nor lha'i gtso bo rnams sras sku mdog ser po/__g.yas rgyal mtshan g.yon ne'u le nor bu skyugs pa/__rin po che'i thor tshugs dang dbu rgyan/__dar gyi na bza' kha dog sna tshogs lhab lhub/__phrag gong g.yas su nyi ma/__g.yon du zla ba/__mdun du nor spungs/__zhabs g.yon brkyangs pa'i rol stabs kyis seng ge dkar mo nyal thabs kyis steng na bzhugs pa sogs spyi ltar dang*/__gdan sna tshogs/__pad+ma/__nyi ma/__rnam sras kyi thad e ka dza Ti g.yon du gter bdag gzhi bdag gi gtso mo bkra shis tshe ring ma dkar gsal zhi 'dzum/__g.yas gser gyi rdo rje 'phyar/__g.yon gser gyi tshe bum nor bu'i kha rgyan can thugs kar/__nang gos ljang gu/__sku rags sngon po/__phyi gos dkar po gser ris can/__seng ge dkar mo la chibs pa/__gdan pad+ma/__zla ba'o/__!__/legs ldan gyi mdun du 'ja' gur gyi dbus su mchod pa'i bye brag gtso bo thams cad pa'i nang du gtor ma rin chen 'bar ma dpe bris yongs grags ltar dang*/__de'i g.yas su sman phud snod zhi thod/__g.yon du rak+ta'i drag thod/__gtor ma'i mdun du rin po che'i pad gzhong du tshogs gtor la tshogs rdzas shing tog__/la bug nya sha__/khur ba/__thud sogs kyis brgyan pa/__de'i g.yas su rin po che'i phud kong gser skyems bcas/__g.yon du tshogs chang bdud rtsi'i thod pa bcas/__de'i mdun dang g.yas g.yon gang bder mchod yon rin po che'i pad phor kong bu yu ring gi rnam pa'i nang du mchod yon dkar pos khengs pa/__zhabs bsil dngul gyi bya ma bum/__gzhan me bum sogs nas rol mo'i bar spyi ltar dang*/__'dod yon lnga rnams bkod mdzes/__de las rgyas na bkra shis rdzas rtags sogs bris kyang chog go__!__/bsdu na slob dpon/__rigs bdag__/thugs rje chen po zhi drag__/gur drag dang mgyogs ma/__legs ldan/__rnam sras/__tshe ring ma tsam gyis mthus so//__mang+ga laM//