JKW-KABUM-10-THA-001-005

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 10, sde tshan 1, Text 5, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 10: 1-. Khams sde dge rdzong sar dgon: Rdzong sar blo gros phun tshogs, 2020.
Genre
Deity	sgrol ma

1 Texts in this Section (sde tshan or chos tshan)

5 43-57	སྒྲོལ་མ་ཉིན་ཞི་མཚན་ཁྲོའི་རྗེས་གནང་ཕན་བདེའི་ཟླ་འོད། sgrol ma nyin zhi mtshan khro'i rjes gnang phan bde'i zla 'od Activity Manual - las byang   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs   ·   Pith Instructions - man ngag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྒྲོལ་མ་ཉིན་ཞི་མཚན་ཁྲོའི་རྗེས་གནང་ཕན་བདེའི་ཟླ་འོད། ༄༅། །རྗེ་བཙུན་སྒྲོལ་མ་ཉིན་ཞི་མཚན་ཁྲོའི་སྒྲུབ་རྗེས་མན་ངག་གི་གསལ་བྱེད་ཕན་བདེའི་ཟླ་འོད་ཅེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། དངོས་གྲུབ་མཆོག་སྩོལ་སྒྲོལ་མ་ཡུམ། །ཞི་དང་ཁྲོ་མོའི་རྣམ་རོལ་ཅན། །དབྱེར་མེད་བླ་མ་ལ་བཏུད་ནས། །སྒྲུབ་རྗེས་མན་ངག་ཅུང་ཟད་དབྱེ། འདི་ལ་གསུམ། སྒྲུབ་ཐབས་དང་། རྗེས་གནང་གི་གསལ་བྱེད། མན་ངག་གི་ངེས་པའོ། །དང་པོ་ནི། འདིའི་བསྙེན་སྒྲུབ་ཉམས་སུ་ལེན་པར་འདོད་པས། གནས་དབེན་པར་འདི་ཉིད་ཀྱི་བྲིས་སྐུ་ཡོད་ན་དགྲམ་པའི་སྤྱན་སྔར་མཆོད་གཏོར་བཤམ། མཚམས་དམ་པར་བཅད། སྒྲུབ་ཐབས་ཀྱི་ཡིག་ཆ་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱིས་མཛད་པའམ། རྗེ་ཀུན་སྙིང་གི་གསུང་སོགས་ཚད་ལྡན་གྱི་གཞུང་གང་ལ་བརྟེན་ཡང་རུང་མོད། འདིར་སྔ་མ་ལྟར་ཉམས་སུ་ལེན་པའི་དབང་དུ་བྱས་ན། ཐོ་རངས་ཀྱི་དུས་སུ་ལངས་ལ་ཨ་མྲྀ་ཏེ་བཟླས་པའི་ཆབ་ཀྱིས་ཁ་བཤལ་ཞིང་གདོང་ལ་སོགས་པ་དག་པར་བྱས་ཏེ་སྟན་བདེ་བར་འདུག །གཙང་སྦྲའི་ཀུན་སྤྱོད་ལ་གནས་པས་སྐྱབས་འགྲོ་སྤྱི་ལྟར་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེ་བཙུན་སྒྲོལ་མའི་རྣལ་འབྱོར་ཉམས་སུ་བླང་བར་བགྱིའོ་ལན་གསུམ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། ཨོཾ་སྭ་བྷཱ་ཝ་སོགས། སྟོང་པའི་ངང་ལས་རང་ཉིད་གནས་པའི་ས་ཕྱོགས་ཐམས་ཅད་དག་པའི་ཞིང་ཁམས་བདེ་བ་ཅན་གྱི་བཀོད་པ་ལྟར་མཛེས་ཤིང་ཡིད་དུ་འོང་བའི་དབུས། རང་གི་མདུན་གྱི་ཆར་པདྨའི་ནས། རྗེ་བཙུན་སྒྲོལ་མ་ལྗང་གུ་ཞི་བའི་སྐུ་ཞལ་གཅིག་ཕྱག་གཉིས་སོགས་ནས། དབུར་བརྒྱན་པ་ཞེས་པའི་བར་དཀྱུས་ནས་འབྱུང་བ་ལྟར་གསལ་བཏབ་ལ། བདག་ལ་ཤིན་ཏུ་དགྱེས་པའི་ཚུལ་གྱིས་ཞལ་གཟིགས་ཤིང་བཞུགས་པར་གྱུར། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་བི་དྱཻའི་བར་གྱིས་མཆོད། གུར་ནས་འབྱུང་བའི་རྒྱུན་བཤགས་ལན་གསུམ་བྱ། ཕྱག་འཚལ་ཉེར་གཅིག་ཚར་གཅིག་གིས་བསྟོད་ལ་གསོལ་བ་གདབ་པ་ནི་སྦྱོར་བའོ། །དངོས་གཞི་ལ། སླར་ཡང་ཕྱག་འཚལ་ཉེར་གཅིག་ཚར་གཅིག་གིས་བསྟོད་པས། མདུན་གྱི་རྗེ་བཙུན་མ་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ་པས། རང་སྐད་ཅིག་གིས་རྗེ་བཙུན་སྒྲོལ་མ་ནས། དབུར་བརྒྱན་པར་གྱུར། དེ་བརྟན་པར་བྱ་བའི་སླད་དུ་ཕྱག་འཚལ་ཉེར་གཅིག་ཚར་གསུམ་བརྗོད་ལ། ལྷ་སྐུ་སྒྱུ་མ་ལྟ་བུའི་གསལ་སྣང་ལ་ཡུན་རིང་དུ་སེམས་འཛིན། ཐུགས་རྒྱུད་སྐུལ་བའི་ཚུལ་དུ་ལྷ་སྐུ་ལ་སེམས་བཟུང་ནས་བསྟོད་པ་ཚར་བདུན་བཏོན་པ་སྟེ། དེ་ནི་གཞུང་ལས། གཉིས་གསུམ་བདུན་ཏུ་མངོན་པར་བརྗོད་ན་ཞེས་གསུངས་པའི་དོན་ནོ། །དེ་ནས་བཟླས་དམིགས་ནི། རང་གི་སྙིང་གར་པདྨ་དཀར་པོ་འདབ་མ་བརྒྱད་པའི་ལྟེ་བར་ཏཱྃ་ལྗང་གུ། དེའི་མཐའ་སྐོར་དུ་ཨོཾ་བདག་ལ་འཇིགས་པ་ཆེན་པོ་བརྒྱད་དང་བཅུ་དྲུག་སོགས་མི་མཐུན་པའི་ཕྱོགས་ཐམས་ཅད་སྲུངས་ཤིག་རཀྵ་རཀྵ་ཧཱ། འདབ་མ་བརྒྱད་ལ། ཏཱ། རེ། ཏུཏ། ཏཱ། རེ། ཏུ། རེ། སྭཱ་ཞེས་པའི་སྔགས་ཀྱི་ཡི་གེས་མཚན་པར་ཀློག་པའི་ཚུལ་གྱིས་སེམས་འཛིན། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་ཅི་ནུས་བཟླ། ཚེ་སྤེལ་བ་སོགས་ཀྱི་ཆེད་དུ་བྱེད་ན། གོང་གི་སྤེལ་ཚིག་གི་ཚབ་ཏུ། ཨོཾ་བདག་གི་ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པར་མཛོད་ཅིག་ཧཱ་ཞེས་སྦྱར་བ་ཙམ་ཁྱད་པར་རོ། །མཐར་གཏང་རག་གི་ཚུལ་དུ། རྗེ་བཙུན་འཕགས་མ་སྒྲོལ་མ་དང་སོགས་ཀྱིས་ཡན་ལག་བདུན་པ་དབུལ། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན་སོགས་ཀྱིས་གསོལ་བ་གདབ་པ་ནི་དངོས་གཞིའོ། །ཐུན་ལས་ལྡང་བར་འདོད་ན། མདུན་གྱི་སྤྱན་རས་གཟིགས་ལ་དམིགས་ཏེ། ཨོཾ་ཨཱཪྻ་ལོ་ཀེ་ཤྭ་ར་ཨརྒྷཾ་སོགས་ཀྱིས་མཆོད། སྐྱོན་གྱིས་མ་གོས་སོགས་ཀྱིས་བསྟོད། འཕགས་པ་ཐུགས་རྗེ་ཆེན་པོ་དང་ལྡན་པས་བདག་གི་རྒྱུད་བྱིན་གྱིས་བརླབ་ཏུ་གསོལ་ཞེས་གསོལ་བ་གདབ། ལྷ་མི་དམིགས་པར་བསམ་པའམ་རང་ལ་བསྟིམ། དགེ་བ་འདི་ཡིས་མྱུར་དུ་བདག །རྗེ་བཙུན་སྒྲོལ་མ་འགྲུབ་གྱུར་ནས། །སོགས་བསྔོ་སྨོན་བྱ་སྟེ་མཇུག་གི་རིམ་པའོ། །ཐུན་མཚམས་སུ་གཏོར་མ་གཏང་བར་འདོད་ན། ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཞུ་བ་ལས་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་གསུམ། མདུན་གྱི་ནམ་མཁར་སྐད་ཅིག་གིས་སྒྲོལ་མ་ལྗང་གུ་ནས། དབུར་བརྒྱན་པར་གྱུར། རང་གི་སྙིང་ག་ནས་འོད་ཟེར་འཕྲོས་པས་འཕགས་མ་སྒྲོལ་མ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿགཉིས་སུ་མེད་པར་ཐིམ། ལྗགས་རྡོ་རྗེའི་སྦུ་གུའི་འོད་ཟེར་གྱིས་གཏོར་མ་གསོལ་བས་མཉེས་བར་བསམས་ལ། ཡི་གེ་བཅུ་པ་ལན་གསུམ་བདུན་ཉེར་གཅིག་གང་རུང་གིས་དབུལ། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་བིདྱའི་བར་གྱིས་མཆོད། ཕྱག་འཚལ་ཉེར་གཅིག་གིས་བསྟོད། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། ནས། འཕེལ་ཞིང་རྒྱས་པར་མཛོད། །ཅེས་གསོལ་བ་གདབ། ཡིག་བརྒྱ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཤགས། བཛྲ་མུཿས་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། བསྔོ་སྨོན་ཤིས་བརྗོད་བྱ། སྤྱོད་ལམ་ཐམས་ཅད་དུའང་རྗེ་བཙུན་མའི་ང་རྒྱལ་གྱིས་ཚོགས་གཉིས་སྡུད་ཅིང་། ཁྱད་པར་མཎྜལ་བཞི་པའི་མཆོད་པ་སོགས་ཀྱང་ཇི་ལྟར་ནུས་པར་བསྒྲུབ་སྟེ་ཐུན་མཚམས་ཀྱི་བྱ་བའོ། །དེ་ལྟ་བུའི་རིམ་པས་ཉིན་མོ་ཐུན་གཉིས་སུ་རྣལ་འབྱོར་ལ་བརྩོན་པ་ནི་སྒྲོལ་མ་ཞི་བའི་རྣལ་འབྱོར་རོ། །མཚན་མོ་སྲོད་ཐུན་ནས་བརྩམས་ཏེ་ཆོ་གའི་ཆིངས་གཞན་གོང་དང་འདྲ་བས། སྒྲོལ་མ་ཞི་བའི་ཚབ་ཏུ་ཁྲོ་མོ་མངོན་རྟོགས་ནས་འབྱུང་བ་ལྟར་གསལ་བཏབ། བཟླས་པའི་སྐབས། རང་གི་སྙིང་གར་པདྨ་དཀར་པོ་འདབ་མ་བཅུ་གཉིས་པའི་ལྟེ་བར་ཏཱྃ་དཀར་པོ། དེའི་མཐར་ཨོཾ་སོགས་སྤེལ་ཚིག་གོང་ལྟར་དང་། འདབ་མ་བཅུ་གཉིས་ལ། ན། མས྄། ཏཱ། རེ། མ། ནོ། ཧ། ར། ཧཱུྃ། ཧ། ར། སྭཱ་ཞེས་པའི་སྔགས་ཀྱི་ཡི་གེས་མཚན་པར་བསམ་པ་ཁྱད་པར་དང་། གཏོར་མ་འབུལ་བ་དང་ཐུན་མཚམས་ཀྱི་བྱ་བ་གཞན་མ་གྲུབ་ཀྱང་རུང་ཞིང་། ཉལ་བའི་རྣལ་འབྱོར་སོགས་སྒྲོལ་མ་ཁྲོ་མོའི་ང་རྒྱལ་གྱིས་བྱའོ། །བསྙེན་པའི་ཚད་ནི། ཞི་ཁྲོ་གཉིས་ཀ་སོ་སོར་འབུམ་ཕྲག་བཅུའམ། ཡང་ན་ཞི་བའི་བསྙེན་པ་གཙོར་བྱས་ནས་ཡི་གེ་བཅུ་པ་འབུམ་ཕྲག་བཅུ་བཟླ་ཞིང་། ཁྲོ་མོའི་བསྙེན་པ་ཇི་ལྟར་རིགས་པ་བཟླས་པས་ཀྱང་རུང་ལ། གཏོར་མ་ཐུན་ཐམས་ཅད་ཀྱི་མཐར་འབུལ་མ་གྲུབ་ན། སྔ་ཐུན་གྱི་མཇུག་ཏུ་ཞི་བ་དང་། སྲོད་ཐུན་གྱི་མཇུག་ཏུ་ཁྲོ་མོར་འབུལ། དེ་ཡང་མ་གྲུབ་ན་སྔ་ཐུན་གྱི་མཇུག་ཏུ་གཏོར་མ་བྱིན་གྱིས་བརླབ། མདུན་གྱི་ནམ་མཁའི་གནས་སུ་སྤྱན་རས་གཟིགས། གཡས་སུ་སྒྲོལ་མ་ཞི་བ། གཡོན་དུ་ཁྲོ་མོ་རྣམས་སྐད་ཅིག་གིས་གསལ་བར་བསམས་ལ་ཡེ་ཤེས་པ་བསྟིམ། སྔགས་གཉིས་ཀ་སྦྲེལ་བས་ལན་བདུན་སོགས་འབུལ། མཆོད་བསྟོད་མན་གོང་ལྟར་བྱས་པས་འགྲུབ་བོ། །བསྙེན་པ་གྲུབ་ནས། བསྟོད་སྒྲུབ་དམིགས་བསལ་བྱེད་ན་ཐུན་གྱི་དངོས་གཞིར་བསྟོད་པ་གཙོ་བོར་བྱས་ཏེ་གྲངས་བཟུང་ལ་ཁྲི་འབུམ་སོགས་ཇི་ལྟར་རིགས་པ་འདོན། རྒྱུན་གྱི་རྣལ་འབྱོར་ལའང་བསྟོད་པ་ཉིད་གཙོ་བོར་བྱ་བར་གསུངས་སོ། །གཉིས་པ་རྗེས་གནང་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྟེགས་བུའི་དབུས་སུ་མཎྜ་ལར་ཚོམ་བུ་གསུམ་བཀོད། མདུན་དུ་མཆོད་གཏོར་བཤམ། མཆོད་པ་བསང་སྦྱང་། སྟོང་པའི་ངང་ལས་ཨོཾ་ལས་སོགས་སྤྱི་ལྟར་ལས། ལྷ་རྫས་ལས་གྲུབ་པའི་མེ་ཏོག་ནས། ཞལ་ཟས་རྣམས་དྭངས་ཤིང་སོགས་དང་། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་བིདྱའི་བར་གྱིས་བྱིན་བརླབ། སྐྱབས་སེམས་ནས་བརྩམས་ཏེ་སྒྲོལ་མ་ཞི་བའི་བཟླས་པའི་བར་གོང་ལྟར་གྲུབ་རྗེས། སླར་ཡང་མདུན་གྱི་ནམ་མཁར་བཞུགས་པའི་འཕགས་པ་སྤྱན་རས་གཟིགས་དབང་ཕྱུག་གི་ཐུགས་ཀར་པདྨའི་སྟེང་དུ་རྗེ་བཙུན་སྒྲོལ་མ་ཁྲོ་མོའི་སྐུ་སོགས་ནས་བཟླས་པའི་བར་བྱ། དེ་ནས་མདུན་གྱི་འཕགས་པ་རང་ལ་བསྟིམ། རང་སྐད་ཅིག་གིས་སྒྲོལ་མ་ཞི་བའི་སྐུར་བསམས་ལ། ཚོམ་བུ་བསང་སྦྱང་། སྟོང་པའི་ངང་ལས་མདུན་དུ་པདྨའི་སྡོང་པོ་ཆེན་པོ་ཞིག་གི་སྟེང་དུ་ནས། པདྨ་ཐུགས་ཀར་ཁ་བྱེ་བ། དེའི་གཡས་སུ་རྗེ་བཙུན་སྒྲོལ་མ་ལྗང་གུ་ནས་དབུར་བརྒྱན་པ། གཡོན་དུ་སྒྲོལ་མ་ཁྲོ་མོའི་སྐུ་ནས། དབུར་བརྒྱན་པ་ཞེས་པའི་བར་གྱིས་དམ་ཚིག་པ་གསལ་བཏབ། རང་གི་སྙིང་ག་ནས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿགཉིས་སུ་མེད་པར་ཐིམ། མཆོད་པ་བསང་སྦྱང་བྱིན་བརླབ། །ཨོཾ་བཛྲ་པུཥྤེ་སོགས་ཀྱིས་མཆོད། སྐྱོན་གྱིས་མ་གོས་སོགས་དང་། ཕྱག་འཚལ་ཉེར་གཅིག་གིས་བསྟོད་ཅིང་གསོལ་བ་གདབ། གཏོར་མ་བྱིན་བརླབས་ལ། །ཨོཾ་ཨཱཿཧྲཱི་ཧཱུྃ་དང་། སྔགས་གཉིས་ཀྱིས་ཕུལ། སྐྱོན་གྱིས་མ་གོས་དང་། ལྷ་དང་ལྷ་མིན་ཅོད་པན་གྱིས། སོགས་ཤློ་ཀ་གཅིག་གིས་བསྟོད། མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་བཅོལ། །མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱ་བ་ནི་སློབ་དཔོན་གྱི་བྱ་བའོ། །གཉིས་པ་ནི། སློབ་མ་རྣམས་ཁྲུས་བྱས་གྲལ་དུ་འཁོད་པར་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་བཏབ། དེ་ལ་སངས་རྒྱས་ཐམས་ཅད་ཀྱི་ཕྲིན་ལས་གཅིག་ཏུ་བསྡུས་པའི་རང་གཟུགས། བྱིན་རླབས་དང་དངོས་གྲུབ་རྒྱ་མཚོའི་འབྱུང་གནས། ཐུགས་རྗེའི་འཇུག་པ་གཞན་ལས་ཆེས་ལྷག་པར་མྱུར་པའི་རྗེ་བཙུན་འཕགས་མ་སྒྲོལ་མ་ལ་རྒྱུད་དང་མན་ངག་རྣམས་ནས་སྒྲུབ་པའི་ཐབས་བསམ་གྱིས་མི་ཁྱབ་པ་ཞིག་གསུང་པ་ཐམས་ཅད་ཀྱི་སྙིང་པོར་གྱུར་པ་སྒྲོལ་མ་ཞི་ཁྲོ་གཅིག་ཏུ་འདུས་པའི་སྒྲུབ་ཐབས། གྲུབ་པ་མཆོག་གི་དེད་དཔོན་རྗེ་བཙུན་ནཱ་རོ་པ་སོགས་ཀྱི་ཐུགས་དམ། དཔལ་ས་སྐྱ་པ་ཡབ་སྲས་ལ་བཀའ་བབས་པའི་གདམས་པ་ཟབ་མོ་དེ་ཉིད་ཀྱི་སྒོ་ནས་རྗེས་སུ་གནང་བ་བསྒྲུབ་པས། ཐོག་མར་མཎྜལ་ཕུལ། གསོལ་གདབ། རྒྱུན་བཤགས། ཐུན་མོང་མ་ཡིན་པའི་གསོལ་གདབ་རྣམས་སྒྲུབ་ཐབས་བརྒྱ་རྩ་ལྟར། དངོས་གཞི་རྗེས་གནང་གི་གཞི་འགོད་པའི་སླད་དུ་སློབ་དཔོན་གྱིས། ཨོཾ་སྭ་བྷཱ་བ་སོགས་ཞེས་བརྗོད་པས། ཁྱེད་རང་རྣམས་ཀྱི་ཕུང་པོ་ཁམས་དང་སྐྱེ་མཆེད་ཐམས་ཅད་མི་དམིགས་ཏེ་སྟོང་པར་གྱུར། སྟོང་པའི་ངང་ལས་ཁྱེད་རང་རྣམས་སྐད་ཅིག་གིས་རྗེ་བཙུན་སྒྲོལ་མ་སྐུ་མདོག་ལྗང་གུ་སོགས་ཀྱིས་ལྷར་བསྐྱེད་བསྟིམ་བརྒྱ་རྩ་ལྟར་བྱ། །སླར་ཡང་དམིགས་པ་འདི་བཞིན་དུ་མཛོད། སློབ་དཔོན་གྱིས། ཨོཾ་སྭ་བྷཱ་བ་སོགས་ཞེས་བརྗོད་པས། ཁྱེད་རང་རྣམས་སྟོང་པའི་ངང་ལས་སྐད་ཅིག་གིས་སྒྲོལ་མ་ཁྲོ་མོའི་སྐུ་སོགས་བསྐྱེད་བསྟིམ་བྱ། དེ་ལྟར་བྱས་པས་རྗེ་བཙུན་སྒྲོལ་མ་ཞི་ཁྲོའི་སྐུའི་བྱིན་རླབས་ཞུགས་སོགས། རྗེས་སུ་བཟླས་པའི་ལུང་གི་སླད་དུ་སློབ་དཔོན་དང་ཁྱེད་རང་རྣམས་རྗེ་བཙུན་སྒྲོལ་མ་ཞི་བའི་སྐུར་གསལ་བའི་ཐུགས་ཀར་པདྨ་དཀར་པོ་འདབ་མ་བརྒྱད་པ་ལ་གནས་པའི་ཏཱྃ་ཡིག་སྔགས་ཕྲེང་དང་བཅས་པ་ལས་སོགས་ནས། མེ་ཏོག་གཏོར་བའི་བར་བརྒྱ་རྩའི་དཀྱུས་ལྟར་ལ། སྔགས་ཡི་གེ་བཅུ་པའི་རྗེས་ཟློས་དང་། སླར་ཡང་སློབ་དཔོན་དང་ཁྱེད་རང་རྣམས་སྐད་ཅིག་གིས་རྗེ་བཙུན་སྒྲོལ་མ་ཁྲོ་མོའི་སྐུར་གསལ་བའི་ཐུགས་ཀར་པདྨ་དཀར་པོ་འདབ་མ་བཅུ་གཉིས་པར་གནས་པའི་ཧཱུྃ་ཡིག་སྔགས་ཕྲེང་དང་བཅས་པ་ལས་སོགས་དང་། སྔགས་ཡི་གེ་བཅུ་གཉིས་པའི་རྗེས་ཟློས་བྱ། དམ་བཅའ་བ་མན་ཆད་ལ་ལྷའི་མཚན་གྱིས། སྒྲོལ་མ་ཞི་ཁྲོ་ཞེས་སྦྱར་བ་མ་གཏོགས་རྒྱ་རྩ་ཇི་ལྟ་བ་བཞིན་བྱས་ལ་སློབ་མ་རྣམས་རང་གནས་སུ་གཏང་། སློབ་དཔོན་གྱིས་མཆོད་པ་བསང་སྦྱང་བྱིན་བརླབ། མདུན་བསྐྱེད་ལ་མཆོད་བསྟོད་གསོལ་གདབ། ཡིག་བརྒྱ་ལན་གསུམ་དང་། མ་འབྱོར་པ་སོགས་ཀྱི་མཐར། བཛྲ་མུཿས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། བསྔོ་སྨོན་ཤིས་བརྗོད་བྱའོ། །གསུམ་པ་མན་ངག་གི་ངེས་པ་ལ་ལྔ། དུག་ཞི་བ། སྲིད་སྤེལ་བ། ནོར་སྒྲུབ་པ། ལས་གཞན་ལ་སྦྱར་བ། གསོལ་བ་གདབ་པའི་ཚུལ་ལོ། །དང་པོ་ནི། རང་གཞན་གང་ཡང་རུང་བ་བརྟན་གཡོའི་དུག་གིས་ཟིན་པ་ལ་ཕན་གདགས་པར་འདོད་ན། བསྒྲུབ་བྱའི་སྤྱི་བོར་པདྨ་དཀར་པོ་འདབ་མ་བརྒྱད་པའི་ལྟེ་བར་ཏཱྃ་ལྗང་གུ། དེའི་མཐར། ཨོཾ་ཆེ་གེ་མོའི་དུག་ཐམས་ཅད་ཤཱིནྟཾ་ཀུ་རུ་སྭཱ་ཧཱ། འདབ་མ་བརྒྱད་ལ་ཏཱ་རེ་སོགས་ཡིག་འབྲུ་བརྒྱད་ཀྱིས་མཚན་པ། དེ་ལས་བདུད་རྩིའི་རྒྱུན་དཔག་ཏུ་མེད་པ་བྱུང་། ལུས་ཀྱི་ནང་གང་། ནད་གདོན་ཐམས་ཅད་དྲི་མའི་ལམ་ནས་ཁ་དོག་ནག་པོའི་རྣམ་པར་ཐོན་པས་ལུས་སེམས་ལ་བདེ་བས་ཁྱབ་པར་བསམས་ལ། །གཙོ་བོར་ཡི་གེ་བཅུ་པ་དང་། སྐབས་སུ་སྤེལ་ཚིག་དང་བཅས་པའང་བཟླ། མཐར་འཁོར་ལོ་བསྒྲུབ་བྱ་ལ་བསྟིམ། ཡང་ན་ཁྲོ་མོའི་འཁོར་ལོ་སྒོམ་བཟླས་བགྱིད་པས་ཀྱང་རུང་ངོ་། །གཉིས་པ་ནི། མདུན་དུ་སྟེགས་བུ་རས་དཀར་པོས་བཀབ་པའི་སྟེང་དུ་བུམ་པར་སྨན་ལྔ། འབྲུ་ལྔ། རིན་པོ་ཆེ་ལྔ་རྣམས་དྲི་བཟང་གི་ཆུ་དང་སྦྱར་བས་དགང་། ཁ་རྒྱན་དང་མགུལ་ཆིངས་བཅིང་། གཟུང་རྡོར་བཏགས་ལ་བཞག །འབྱོར་ན་དེའི་མགྲིན་པར་བྲིས་པའི་འཁོར་ལོར་གདག །བདག་བསྐྱེད་ཞི་ཁྲོ་གང་རུང་སྔོན་དུ་འགྲོ་བས། བུམ་པ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་། ཨ་ལས་ཟླ་བའི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། མཚན་ཉིད་ཐམས་ཅད་རྫོགས་པ། ནང་ཆུ་དང་བཅུད་སྣ་ཚོགས་ཀྱིས་གང་བའི་མགྲིན་པའི་ནང་དུ་པདྨ་དཀར་པོ་འདབ་མ་བརྒྱད་པའི་ལྟེ་བར་ཏཱྃ་ལྗང་གུ། དེའི་མཐར་ཨོཾ་ཆེ་གེ་མོའི་རིགས་བརྒྱུད་ཐམས་ཅད་རྒྱས་པར་མཛོད་ཅིག་ཧཱ། འདབ་མ་བརྒྱད་ལ་ཏཱ་རེ་ལ་སོགས་པའི་ཡིག་འབྲུ་བརྒྱད་ཀྱིས་མཚན་པ། རང་གི་ཐུགས་ཀ་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་། བུམ་ནང་གི་འཁོར་ལོ་ལ་ཐིམ། དེ་ལས་བདུད་རྩིའི་རྒྱུན་དཔག་ཏུ་མེད་པ་བབས་པས་བུམ་པ་གང་བར་བསམ། ཡང་ན་ཁྲོ་མོའི་འཁོར་ལོ་གསལ་གདབ་ཀྱང་རུང་། གང་ལྟར་ཡང་རྩ་སྔགས་ཅི་ནུས་དང་སྤེལ་ཚིག་ཅན་ཅུང་ཟད་བཟླ། ཐུན་བསྡུ་བ་ན་འཁོར་ལོ་འོད་དུ་ཞུ་ནས་བུམ་པའི་ཆུ་ལ་ཐིམ་པས་རིགས་བརྒྱུད་སྤེལ་བའི་ནུས་པ་དང་ལྡན་པར་བསམ། དེ་ལྟ་བུའི་བུམ་པའི་ཆུ་དེས་སྐར་མ་རྒྱལ་སོགས་དགེ་བའི་དུས་སུ་སྐྱེས་པའམ་བུད་མེད་དེ་ལ་བཀྲུ་བྱབས་སྲུང་གསུམ་རྒྱས་པར་སྦྱར་བའམ། བཀྲུ་ཞིང་ཁོང་དུ་གཏང་། འཁོར་ལོ་ཡོད་ན་སྐྱེས་པའི་དཔུང་པ་གཡས། བུད་མེད་ཀྱི་དཔུང་པ་གཡོན། གང་ཡང་རུང་བའི་མགུལ་དུ་གདགས། ཕྱག་འཚལ་ཉེར་གཅིག་ཡི་དམ་དུ་འཛིན་པར་བསྐུལ་བས་རིགས་བརྒྱུད་འཕེལ་ཞིང་དོན་ཐམས་ཅད་འགྲུབ་པར་འགྱུར་ཏེ། དཔལ་ས་སྐྱ་པའི་བླ་མ་བདག་ཉིད་ཆེན་པོ་བཟང་པོ་དཔལ་གྱིས་རྗེ་བཙུན་མ་ལ་བསྟོད་སྒྲུབ་ཀྱི་སྒོ་ནས་གསོལ་བ་བཏབ་པས་ཞལ་དངོས་སུ་བསྟན། སྐྱབས་སྦྱིན་གྱི་ཕྱག་རྒྱ་སྤྱི་བོར་བཞག་ཅིང་། བུ་འདོད་པས་ནི་བུ་ཐོབ་འགྱུར་ཞིང་། །སོགས་ཚིགས་སུ་བཅད་པས་དབུགས་དབྱུང་བ་ལྟར། སྲས་སྐུ་མཆེད་མང་དུ་འཁྲུངས་ཤིང་། ཕྲིན་ལས་རྒྱ་ཆེར་འཕེལ་བ་བཞིན་ནོ། །འཁོར་ལོ་ནི། གྲོ་གའམ་ཤོག་བུ་ལ་སྐྱེས་པ་སྲུང་བ་ལ་གུར་གུམ། བུད་མེད་སྲུང་བ་ལ་གི་ཝཾ་གིས་པདྨ་འདབ་བརྒྱད་ལྟེ་བ་མུ་ཁྱུད་དང་བཅས་པ་བྲིས་པའི་དབུས་དང་འདབ་མར་ཐུགས་ཀའི་འཁོར་ལོ་ཇི་ལྟ་བ་དང་། མུ་ཁྱུད་ནང་མ་ལ་ཨཱ་ལི་གཡོན་སྐོར། ཕྱི་མ་ལ་ཀཱ་ལི་གཡས་སྐོར། དེའི་ཕྱི་རོལ་ཏུ་རྡོ་ར་དང་མེ་རིས་བསྐོར་བ་བྲིས་ལ་མཎྜལ་གྱི་སྟེང་དུ་བཞག །མཆོད་གཏོར་བཤམ། བདག་གི་རྣལ་འབྱོར་སྔོན་དུ་འགྲོ་བས་འཁོར་ལོ་བསང་སྦྱང་། སྟོང་པའི་ངང་ལས་རྗེ་བཙུན་མའི་ཡེ་ཤེས་ཀྱི་རང་བཞིན་ཏཱྃ་ཡོངས་སུ་གྱུར་པ་ལས་སྔགས་ཀྱི་འཁོར་ལོ་བྲིས་པ་ཇི་ལྟ་བ་བཞིན་གསལ་བ་དང་། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་འཁོར་ལོ་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿས་དབྱེར་མེད་དུ་བསྟིམ། ཨོཾ་བཛྲ་པུཥྤེ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱི། །གཉིས་མེད་ཡེ་ཤེས་ལས་བྱུང་བ། །དངོས་གྲུབ་མཐའ་ཡས་སྩོལ་མཛད་པའི། །རིག་པའི་འཁོར་ལོར་ཕྱག་འཚལ་འདུད། །ཅེས་བསྟོད། རྗེ་བཙུན་མ་ལ་གཏོར་མ་སྒྲུབ་ཐབས་ལྟར་འབུལ་ཞིང་གསོལ་བ་བཏབ། རྟེན་འབྲེལ་སྙིང་པོ་བཟླས་པའི་མེ་ཏོག་འཐོར་ལ། ཕྱོགས་བཅུ་ན་སོགས་བརྟན་བཞུགས་སྤྱི་ལྟར་ལ། བྱེ་བྲག་ཏུ་སྲུང་བའི་འཁོར་ལོ་འདི་ཉིད་ལ་སྤྱན་དྲངས་པའི་ཡེ་ཤེས་ཀྱི་འཁོར་ལོ་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་འདི་འཆང་བ་ལ་རིགས་བརྒྱུད་འཕེལ་བའི་ལས་ཀྱི་དངོས་གྲུབ་མ་ལུས་པ་སྩལ་དུ་གསོལ། ཞེས་སོགས་འདོད་དོན་གསོལ་ཞིང་མེ་ཏོག་གི་ཆར་དབབ། ཤིས་བརྗོད་རྒྱས་པར་བྱའོ། །དེ་བཞིན་དུ་སྒྲོལ་མ་ཁྲོ་མོའི་འཁོར་ལོ་བྲི་བར་འདོད་ནའང་དབུས་སུ་པད་འདབ་བཅུ་གཉིས་པ་སོགས་བསྒོམ་པ་ལྟར་བྲི་བ་མ་གཏོགས་གཞན་གོང་ལྟར་རོ། །གསུམ་པ་ནི། སྤེལ་ཚིག །ཨོཾ་ཆེ་གེ་མོའི་དཔལ་འབྱོར་ལོངས་སྤྱོད་ཐམས་ཅད་རྒྱས་པར་གྱུར་ཅིག་ཧཱ། ཞེས་སྦྱར་བ་ཙམ་མ་གཏོགས་གཞན་བུམ་ཆོག་དང་འཁོར་ལོ་བཅས་སྲིད་སྤེལ་ཇི་ལྟ་བ་བཞིན་བྱས་པས་འགྲུབ་བོ། །བཞི་པ་ནི། གཞན་ཡང་རིམས་དྲག་པོ་དང་། ནད་དང་གདོན་དང་འབྱུང་པོའི་བར་ཆད་སོགས་སྲུང་བ་ལ་སྤེལ་ཚིག་ཁ་བསྒྱུར་ལ། འཁོར་ལོ་སྤྱི་བོར་བསྒོམ་པ་དང་། བུམ་ཆོག་བྱ་བ་དང་། བྲིས་པའི་འཁོར་ལོ་རྣམས་ཇི་ལྟར་རིགས་པའི་སྒོ་ནས་ཕན་གདགས་པར་བྱའོ། །ལྔ་པ་ནི། མཎྜལ་བཞི་པའི་སྒོ་ནས་གསོལ་བ་འདེབས་པའི་ཚུལ་ཏེ། ཇོ་བོ་ལུགས་ཀྱི་མན་ངག་དང་མཐུན་པར་སྣང་བས་གཞན་དུ་བཤད་པ་ལྟར་ཤེས་པར་བྱས་ལ་ཉམས་སུ་བླངས་པས་འདོད་པའི་དངོས་གྲུབ་སྟེར་བ་ནི་ངེས་པའོ། །རྗེ་བཙུན་སྒྲོལ༷་མ༷འི་སྒྲུབ༷་ཐ༷བས་དང་། །མ༷ན་ང༷ག་ཕ༷ན་བ༷དེའི་ཟླ༷་ཟེ༷ར་གྱིས། །ས་གསུམ་ཡིད་ཀྱི་མུན་བསལ་ནས། །གྲུབ་གཉིས་ཆུ་གཏེར་རྒྱས་གྱུར་ཅིག །ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ལྟར། བློ་དམན་རྣམས་ལ་འཇུག་པ་བདེ་བའི་སླད། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཤིན་ཏུ་གསལ་བར་ཕྱེ་བ་སརྦ་དཱ་སིདྡྷི་བརྡྷནྟུ།། །། ༈

[edit]

sgrol ma nyin zhi mtshan khro'i rjes gnang phan bde'i zla 'od/__ @#/_/rje btsun sgrol ma nyin zhi mtshan khro'i sgrub rjes man ngag gi gsal byed phan bde'i zla 'od ces bya ba bzhugs so/__/oM swa sti sid+d+haM/__dngos grub mchog stsol sgrol ma yum/__/zhi dang khro mo'i rnam rol can/__/dbyer med bla ma la btud nas/__/sgrub rjes man ngag cung zad dbye/__'di la gsum/__sgrub thabs dang /__rjes gnang gi gsal byed/__man ngag gi nges pa'o/__/dang po ni/__'di'i bsnyen sgrub nyams su len par 'dod pas/__gnas dben par 'di nyid kyi bris sku yod na dgram pa'i spyan sngar mchod gtor bsham/__mtshams dam par bcad/__sgrub thabs kyi yig cha rje btsun rdo rje 'chang grags pa rgyal mtshan gyis mdzad pa'am/__rje kun snying gi gsung sogs tshad ldan gyi gzhung gang la brten yang rung mod/__'dir snga ma ltar nyams su len pa'i dbang du byas na/__tho rangs kyi dus su langs la a mr-i te bzlas pa'i chab kyis kha bshal zhing gdong la sogs pa dag par byas te stan bde bar 'dug__/gtsang sbra'i kun spyod la gnas pas skyabs 'gro spyi ltar dang /__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du rje btsun sgrol ma'i rnal 'byor nyams su blang bar bgyi'o lan gsum/__sems can thams cad bde ba dang sogs tshad med bzhi bsgom/__oM swa b+hA wa sogs/__stong pa'i ngang las rang nyid gnas pa'i sa phyogs thams cad dag pa'i zhing khams bde ba can gyi bkod pa ltar mdzes shing yid du 'ong ba'i dbus/__rang gi mdun gyi char pad+ma'i nas/__rje btsun sgrol ma ljang gu zhi ba'i sku zhal gcig phyag gnyis sogs nas/__dbur brgyan pa zhes pa'i bar dkyus nas 'byung ba ltar gsal btab la/__bdag la shin tu dgyes pa'i tshul gyis zhal gzigs shing bzhugs par gyur/__oM badz+ra puSh+pe AHhU~M nas/__nai bi d+yai'i bar gyis mchod/__gur nas 'byung ba'i rgyun bshags lan gsum bya/__phyag 'tshal nyer gcig tshar gcig gis bstod la gsol ba gdab pa ni sbyor ba'o/__/dngos gzhi la/__slar yang phyag 'tshal nyer gcig tshar gcig gis bstod pas/__mdun gyi rje btsun ma dgyes pa chen pos 'od du zhu nas rang la thim pas/__rang skad cig gis rje btsun sgrol ma nas/__dbur brgyan par gyur/__de brtan par bya ba'i slad du phyag 'tshal nyer gcig tshar gsum brjod la/__lha sku sgyu ma lta bu'i gsal snang la yun ring du sems 'dzin/__thugs rgyud skul ba'i tshul du lha sku la sems bzung nas bstod pa tshar bdun bton pa ste/__de ni gzhung las/__gnyis gsum bdun tu mngon par brjod na zhes gsungs pa'i don no/__/de nas bzlas dmigs ni/__rang gi snying gar pad+ma dkar po 'dab ma brgyad pa'i lte bar tA~M ljang gu/__de'i mtha' skor du oM bdag la 'jigs pa chen po brgyad dang bcu drug sogs mi mthun pa'i phyogs thams cad srungs shig rak+Sha rak+Sha hA/__'dab ma brgyad la/__tA/__re/__tuta/__tA/__re/__tu/__re/__swA zhes pa'i sngags kyi yi ges mtshan par klog pa'i tshul gyis sems 'dzin/__oM tA re tut+tA re tu re swA hA/__zhes ci nus bzla/__tshe spel ba sogs kyi ched du byed na/__gong gi spel tshig gi tshab tu/__oM bdag gi tshe dang bsod nams ye shes thams cad rgyas par mdzod cig hA zhes sbyar ba tsam khyad par ro/__/mthar gtang rag gi tshul du/__rje btsun 'phags ma sgrol ma dang sogs kyis yan lag bdun pa dbul/__rje btsun bcom ldan 'das ma thugs rje can sogs kyis gsol ba gdab pa ni dngos gzhi'o/__/thun las ldang bar 'dod na/__mdun gyi spyan ras gzigs la dmigs te/__oM AR+Ya lo ke shwa ra ar+g+haM sogs kyis mchod/__skyon gyis ma gos sogs kyis bstod/__'phags pa thugs rje chen po dang ldan pas bdag gi rgyud byin gyis brlab tu gsol zhes gsol ba gdab/__lha mi dmigs par bsam pa'am rang la bstim/__dge ba 'di yis myur du bdag__/rje btsun sgrol ma 'grub gyur nas/__/sogs bsngo smon bya ste mjug gi rim pa'o/__/thun mtshams su gtor ma gtang bar 'dod na/__a mr-i tas bsang /__swa b+hA bas sbyang /__stong pa'i ngang las rin po che las grub pa'i snod yangs shing rgya che ba'i nang du oM zhu ba las gtor ma bdud rtsi'i rgya mtsho chen por gyur/__oM AHhU~M gsum/__mdun gyi nam mkhar skad cig gis sgrol ma ljang gu nas/__dbur brgyan par gyur/__rang gi snying ga nas 'od zer 'phros pas 'phags ma sgrol ma la sangs rgyas dang byang chub sems dpa'i tshogs bsam gyis mi khyab pas bskor ba oM badz+ra sa mA dzaH__dzaHhU~M ba~M hoHgnyis su med par thim/__ljags rdo rje'i sbu gu'i 'od zer gyis gtor ma gsol bas mnyes bar bsams la/__yi ge bcu pa lan gsum bdun nyer gcig gang rung gis dbul/__oM badz+ra puSh+pe AHhU~M nas/__nai bid+ya'i bar gyis mchod/__phyag 'tshal nyer gcig gis bstod/__rje btsun bcom ldan 'das ma thugs rje can/__nas/__'phel zhing rgyas par mdzod/__/ces gsol ba gdab/__yig brgya lan gsum dang /__ma 'byor pa dang sogs kyis nongs pa bshags/__badz+ra muHsa ye shes pa gshegs/__dam tshig pa rang la bstim/__bsngo smon shis brjod bya/__spyod lam thams cad du'ang rje btsun ma'i nga rgyal gyis tshogs gnyis sdud cing /__khyad par maN+Dal bzhi pa'i mchod pa sogs kyang ji ltar nus par bsgrub ste thun mtshams kyi bya ba'o/__/de lta bu'i rim pas nyin mo thun gnyis su rnal 'byor la brtson pa ni sgrol ma zhi ba'i rnal 'byor ro/__/mtshan mo srod thun nas brtsams te cho ga'i chings gzhan gong dang 'dra bas/__sgrol ma zhi ba'i tshab tu khro mo mngon rtogs nas 'byung ba ltar gsal btab/__bzlas pa'i skabs/__rang gi snying gar pad+ma dkar po 'dab ma bcu gnyis pa'i lte bar tA~M dkar po/__de'i mthar oM sogs spel tshig gong ltar dang /__'dab ma bcu gnyis la/__na/__masa?/__tA/__re/__ma/__no/__ha/__ra/__hU~M/__ha/__ra/__swA zhes pa'i sngags kyi yi ges mtshan par bsam pa khyad par dang /__gtor ma 'bul ba dang thun mtshams kyi bya ba gzhan ma grub kyang rung zhing /__nyal ba'i rnal 'byor sogs sgrol ma khro mo'i nga rgyal gyis bya'o/__/bsnyen pa'i tshad ni/__zhi khro gnyis ka so sor 'bum phrag bcu'am/__yang na zhi ba'i bsnyen pa gtsor byas nas yi ge bcu pa 'bum phrag bcu bzla zhing /__khro mo'i bsnyen pa ji ltar rigs pa bzlas pas kyang rung la/__gtor ma thun thams cad kyi mthar 'bul ma grub na/__snga thun gyi mjug tu zhi ba dang /__srod thun gyi mjug tu khro mor 'bul/__de yang ma grub na snga thun gyi mjug tu gtor ma byin gyis brlab/__mdun gyi nam mkha'i gnas su spyan ras gzigs/__g.yas su sgrol ma zhi ba/__g.yon du khro mo rnams skad cig gis gsal bar bsams la ye shes pa bstim/__sngags gnyis ka sbrel bas lan bdun sogs 'bul/__mchod bstod man gong ltar byas pas 'grub bo/__/bsnyen pa grub nas/__bstod sgrub dmigs bsal byed na thun gyi dngos gzhir bstod pa gtso bor byas te grangs bzung la khri 'bum sogs ji ltar rigs pa 'don/__rgyun gyi rnal 'byor la'ang bstod pa nyid gtso bor bya bar gsungs so/__/gnyis pa rjes gnang la gsum/__sbyor ba/__dngos gzhi/__rjes so/__/dang po ni/__stegs bu'i dbus su maN+Da lar tshom bu gsum bkod/__mdun du mchod gtor bsham/__mchod pa bsang sbyang /__stong pa'i ngang las oM las sogs spyi ltar las/__lha rdzas las grub pa'i me tog nas/__zhal zas rnams dwangs shing sogs dang /__oM badz+ra puSh+pe AHhU~M nas/__nai bid+ya'i bar gyis byin brlab/__skyabs sems nas brtsams te sgrol ma zhi ba'i bzlas pa'i bar gong ltar grub rjes/__slar yang mdun gyi nam mkhar bzhugs pa'i 'phags pa spyan ras gzigs dbang phyug gi thugs kar pad+ma'i steng du rje btsun sgrol ma khro mo'i sku sogs nas bzlas pa'i bar bya/__de nas mdun gyi 'phags pa rang la bstim/__rang skad cig gis sgrol ma zhi ba'i skur bsams la/__tshom bu bsang sbyang /__stong pa'i ngang las mdun du pad+ma'i sdong po chen po zhig gi steng du nas/__pad+ma thugs kar kha bye ba/__de'i g.yas su rje btsun sgrol ma ljang gu nas dbur brgyan pa/__g.yon du sgrol ma khro mo'i sku nas/__dbur brgyan pa zhes pa'i bar gyis dam tshig pa gsal btab/__rang gi snying ga nas 'od zer 'phros pas bsgoms pa dang 'dra ba'i ye shes sems dpa'i tshogs bsam gyis mi khyab pa oM badz+ra sa mA dzaHsa spyan drang /__dzaHhU~M ba~M hoHgnyis su med par thim/__mchod pa bsang sbyang byin brlab/__/oM badz+ra puSh+pe sogs kyis mchod/__skyon gyis ma gos sogs dang /__phyag 'tshal nyer gcig gis bstod cing gsol ba gdab/__gtor ma byin brlabs la/__/oM AHhrI hU~M dang /__sngags gnyis kyis phul/__skyon gyis ma gos dang /__lha dang lha min cod pan gyis/__sogs sh+lo ka gcig gis bstod/__mchod sbyin gtor ma 'di bzhes sogs kyis phrin las bcol/__/mdun bskyed la dmigs pa'i bzlas pa cung zad bya ba ni slob dpon gyi bya ba'o/__/gnyis pa ni/__slob ma rnams khrus byas gral du 'khod par me tog bkye bsdu grub rjes/__slob dpon gyis sems bskyed gsal btab/__de la sangs rgyas thams cad kyi phrin las gcig tu bsdus pa'i rang gzugs/__byin rlabs dang dngos grub rgya mtsho'i 'byung gnas/__thugs rje'i 'jug pa gzhan las ches lhag par myur pa'i rje btsun 'phags ma sgrol ma la rgyud dang man ngag rnams nas sgrub pa'i thabs bsam gyis mi khyab pa zhig gsung pa thams cad kyi snying por gyur pa sgrol ma zhi khro gcig tu 'dus pa'i sgrub thabs/__grub pa mchog gi ded dpon rje btsun nA ro pa sogs kyi thugs dam/__dpal sa skya pa yab sras la bka' babs pa'i gdams pa zab mo de nyid kyi sgo nas rjes su gnang ba bsgrub pas/__thog mar maN+Dal phul/__gsol gdab/__rgyun bshags/__thun mong ma yin pa'i gsol gdab rnams sgrub thabs brgya rtsa ltar/__dngos gzhi rjes gnang gi gzhi 'god pa'i slad du slob dpon gyis/__oM swa b+hA ba sogs zhes brjod pas/__khyed rang rnams kyi phung po khams dang skye mched thams cad mi dmigs te stong par gyur/__stong pa'i ngang las khyed rang rnams skad cig gis rje btsun sgrol ma sku mdog ljang gu sogs kyis lhar bskyed bstim brgya rtsa ltar bya/__/slar yang dmigs pa 'di bzhin du mdzod/__slob dpon gyis/__oM swa b+hA ba sogs zhes brjod pas/__khyed rang rnams stong pa'i ngang las skad cig gis sgrol ma khro mo'i sku sogs bskyed bstim bya/__de ltar byas pas rje btsun sgrol ma zhi khro'i sku'i byin rlabs zhugs sogs/__rjes su bzlas pa'i lung gi slad du slob dpon dang khyed rang rnams rje btsun sgrol ma zhi ba'i skur gsal ba'i thugs kar pad+ma dkar po 'dab ma brgyad pa la gnas pa'i tA~M yig sngags phreng dang bcas pa las sogs nas/__me tog gtor ba'i bar brgya rtsa'i dkyus ltar la/__sngags yi ge bcu pa'i rjes zlos dang /__slar yang slob dpon dang khyed rang rnams skad cig gis rje btsun sgrol ma khro mo'i skur gsal ba'i thugs kar pad+ma dkar po 'dab ma bcu gnyis par gnas pa'i hU~M yig sngags phreng dang bcas pa las sogs dang /__sngags yi ge bcu gnyis pa'i rjes zlos bya/__dam bca' ba man chad la lha'i mtshan gyis/__sgrol ma zhi khro zhes sbyar ba ma gtogs rgya rtsa ji lta ba bzhin byas la slob ma rnams rang gnas su gtang /__slob dpon gyis mchod pa bsang sbyang byin brlab/__mdun bskyed la mchod bstod gsol gdab/__yig brgya lan gsum dang /__ma 'byor pa sogs kyi mthar/__badz+ra muHsa tshom bu'i ye shes pa gshegs/__dam tshig pa rang la bstim/__bsngo smon shis brjod bya'o/__/gsum pa man ngag gi nges pa la lnga/__dug zhi ba/__srid spel ba/__nor sgrub pa/__las gzhan la sbyar ba/__gsol ba gdab pa'i tshul lo/__/dang po ni/__rang gzhan gang yang rung ba brtan g.yo'i dug gis zin pa la phan gdags par 'dod na/__bsgrub bya'i spyi bor pad+ma dkar po 'dab ma brgyad pa'i lte bar tA~M ljang gu/__de'i mthar/__oM che ge mo'i dug thams cad shIn+taM ku ru swA hA/__'dab ma brgyad la tA re sogs yig 'bru brgyad kyis mtshan pa/__de las bdud rtsi'i rgyun dpag tu med pa byung /__lus kyi nang gang /__nad gdon thams cad dri ma'i lam nas kha dog nag po'i rnam par thon pas lus sems la bde bas khyab par bsams la/__/gtso bor yi ge bcu pa dang /__skabs su spel tshig dang bcas pa'ang bzla/__mthar 'khor lo bsgrub bya la bstim/__yang na khro mo'i 'khor lo sgom bzlas bgyid pas kyang rung ngo /__/gnyis pa ni/__mdun du stegs bu ras dkar pos bkab pa'i steng du bum par sman lnga/__'bru lnga/__rin po che lnga rnams dri bzang gi chu dang sbyar bas dgang /__kha rgyan dang mgul chings bcing /__gzung rdor btags la bzhag_/'byor na de'i mgrin par bris pa'i 'khor lor gdag__/bdag bskyed zhi khro gang rung sngon du 'gro bas/__bum pa bsang sbyang /__stong pa'i ngang las pa~M las pad+ma dang /__a las zla ba'i steng du b+h+rU~M las rin po che'i bum pa yangs shing rgya che ba/__mtshan nyid thams cad rdzogs pa/__nang chu dang bcud sna tshogs kyis gang ba'i mgrin pa'i nang du pad+ma dkar po 'dab ma brgyad pa'i lte bar tA~M ljang gu/___de'i mthar oM che ge mo'i rigs brgyud thams cad rgyas par mdzod cig hA/__'dab ma brgyad la tA re la sogs pa'i yig 'bru brgyad kyis mtshan pa/__rang gi thugs ka nas sngags kyi phreng ba gzungs thag la brten te song /__bum nang gi 'khor lo la thim/__de las bdud rtsi'i rgyun dpag tu med pa babs pas bum pa gang bar bsam/__yang na khro mo'i 'khor lo gsal gdab kyang rung /__gang ltar yang rtsa sngags ci nus dang spel tshig can cung zad bzla/__thun bsdu ba na 'khor lo 'od du zhu nas bum pa'i chu la thim pas rigs brgyud spel ba'i nus pa dang ldan par bsam/__de lta bu'i bum pa'i chu des skar ma rgyal sogs dge ba'i dus su skyes pa'am bud med de la bkru byabs srung gsum rgyas par sbyar ba'am/__bkru zhing khong du gtang /__'khor lo yod na skyes pa'i dpung pa g.yas/__bud med kyi dpung pa g.yon/__gang yang rung ba'i mgul du gdags/__phyag 'tshal nyer gcig yi dam du 'dzin par bskul bas rigs brgyud 'phel zhing don thams cad 'grub par 'gyur te/__dpal sa skya pa'i bla ma bdag nyid chen po bzang po dpal gyis rje btsun ma la bstod sgrub kyi sgo nas gsol ba btab pas zhal dngos su bstan/__skyabs sbyin gyi phyag rgya spyi bor bzhag cing /__bu 'dod pas ni bu thob 'gyur zhing /__/sogs tshigs su bcad pas dbugs dbyung ba ltar/__sras sku mched mang du 'khrungs shing /__phrin las rgya cher 'phel ba bzhin no/__/'khor lo ni/__gro ga'am shog bu la skyes pa srung ba la gur gum/__bud med srung ba la gi waM gis pad+ma 'dab brgyad lte ba mu khyud dang bcas pa bris pa'i dbus dang 'dab mar thugs ka'i 'khor lo ji lta ba dang /__mu khyud nang ma la A li g.yon skor/__phyi ma la kA li g.yas skor/__de'i phyi rol tu rdo ra dang me ris bskor ba bris la maN+Dal gyi steng du bzhag__/mchod gtor bsham/__bdag gi rnal 'byor sngon du 'gro bas 'khor lo bsang sbyang /__stong pa'i ngang las rje btsun ma'i ye shes kyi rang bzhin tA~M yongs su gyur pa las sngags kyi 'khor lo bris pa ji lta ba bzhin gsal ba dang /__rang gi thugs ka'i sa bon las 'od zer 'phros pas de bzhin gshegs pa thams cad kyi thugs ka nas ye shes kyi 'khor lo oM badz+ra sa mA dzaHsa spyan drang /__dzaHhU~M ba~M hoHsa dbyer med du bstim/__oM badz+ra puSh+pe sogs kyis mchod/__de bzhin gshegs pa thams cad kyi/__/gnyis med ye shes las byung ba/__/dngos grub mtha' yas stsol mdzad pa'i/__/rig pa'i 'khor lor phyag 'tshal 'dud/__/ces bstod/__rje btsun ma la gtor ma sgrub thabs ltar 'bul zhing gsol ba btab/__rten 'brel snying po bzlas pa'i me tog 'thor la/__phyogs bcu na sogs brtan bzhugs spyi ltar la/__bye brag tu srung ba'i 'khor lo 'di nyid la spyan drangs pa'i ye shes kyi 'khor lo ji srid 'byung ba bzhi'i gnod pas ma zhig gi bar du brtan par bzhugs su gsol/__brtan par bzhugs nas kyang 'di 'chang ba la rigs brgyud 'phel ba'i las kyi dngos grub ma lus pa stsal du gsol/__zhes sogs 'dod don gsol zhing me tog gi char dbab/__shis brjod rgyas par bya'o/__/de bzhin du sgrol ma khro mo'i 'khor lo bri bar 'dod na'ang dbus su pad 'dab bcu gnyis pa sogs bsgom pa ltar bri ba ma gtogs gzhan gong ltar ro/__/gsum pa ni/__spel tshig__/oM che ge mo'i dpal 'byor longs spyod thams cad rgyas par gyur cig hA/__zhes sbyar ba tsam ma gtogs gzhan bum chog dang 'khor lo bcas srid spel ji lta ba bzhin byas pas 'grub bo/__/bzhi pa ni/__gzhan yang rims drag po dang /__nad dang gdon dang 'byung po'i bar chad sogs srung ba la spel tshig kha bsgyur la/__'khor lo spyi bor bsgom pa dang /__bum chog bya ba dang /__bris pa'i 'khor lo rnams ji ltar rigs pa'i sgo nas phan gdags par bya'o/__/lnga pa ni/__maN+Dal bzhi pa'i sgo nas gsol ba 'debs pa'i tshul te/__jo bo lugs kyi man ngag dang mthun par snang bas gzhan du bshad pa ltar shes par byas la nyams su blangs pas 'dod pa'i dngos grub ster ba ni nges pa'o/__/rje btsun sgrolaX maX'i sgrubaX thaXbs dang /__/maXn ngaXg phaXn baXde'i zlaX zeXr gyis/__/sa gsum yid kyi mun bsal nas/__/grub gnyis chu gter rgyas gyur cig__/ces pa'ang rje btsun rdo rje 'chang grags pa rgyal mtshan gyi gsung rab ltar/__blo dman rnams la 'jug pa bde ba'i slad/__bya bral ba 'jam dbyangs mkhyen brtse'i dbang pos shin tu gsal bar phye ba sarba dA sid+d+hi bar+d+han+tu//____//__!_