JKW-KABUM-10-THA-001-004

From Khyentse Lineage - A Tsadra Foundation Project

‎‎

རྨི་ལམ་ལུང་བསྟན་སྒྲོལ་མའི་སྒོམ་ལུང་དང་མན་ངག་ཉུང་ངུ་ཟླ་བའི་མེ་ལོང་།
Wylie title rmi lam lung bstan sgrol ma'i sgom lung dang man ngag nyung ngu zla ba'i me long JKW-KABUM-10-THA-001.pdf
Location mkhyen brtse'i bka' 'bum
Volume 10, sde tshan 1, Text 4, Pages 31-43 (Folios 16a3 to 22a5)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. rmi lam lung bstan sgrol ma'i sgom lung dang man ngag nyung ngu zla ba'i me long. In 'jam dbyangs mkhyen brtse'i dbang po'i bka' 'bum, Vol. 10: 31-43. Khams sde dge rdzong sar dgon: Rdzong sar blo gros phun tshogs, 2020.
Genre Meditation Texts - mnyam gzhag / ting nge ‘dzin  ·  Pith Instructions - man ngag
Deity sgrol ma
Colophon

།ཅེས་པའང་ཡིག་རྙིང་གསལ་བྱེད་ཞལ་ཤེས་དང་བཅས་པའི་ཚོགས་རྣམས་ཕྱོགས་གཅིག་ཏུ་བསྡེབས་ཏེ། ལག་ཏུ་བླང་བདེ་བར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།སརྦ་དཱ་མངྒལཾ་སུ་ཤྲེ་ཡནྟུ།།

ces pa'ang yig rnying gsal byed zhal shes dang bcas pa'i tshogs rnams phyogs gcig tu bsdebs te/__lag tu blang bde bar bya bral ba 'jam dbyangs mkhyen brtse'i dbang pos bris pa dge legs su gyur cig/__//sarba dA mang+galaM su shre yan+tu/

[edit]
༄༅། །རྨི་ལམ་ལུང་སྟོན་སྒྲོལ་མའི་སྒོམ་ལུང་དང་མན་ངག་གི་གསལ་བྱེད་ཉུང་ངུ་ཟླ་བའི་མེ་ལོང་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། རྨི་ལམ་ལུང་སྟོན་སྒྲོལ་མའི་སྒོམ་ལུང་འབོགས་པའི་སྐབས། མདུན་དུ་མཎྜལ་ཚོམ་བུ་གཅིག་པ་མཆོད་པ་དང་བཅས་པ་བཤམ། །འགྲོ་རྣམས་བསྒྲལ་འདོད་སོགས་དང་། ཤེས་རབ་སྙིང་བརྩེ་སོགས་སྐྱབས་སེམས་དང་། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་སྔོན་དུ་འགྲོ་བས། ཨོཾ་ཨ་མྲྀ་ཏ་སོགས་བགེགས་བསལ་བ་ནས་བཟུང་བཟླས་པའི་བར་གོང་ལྟར་བྱ། དེ་ནས་སློབ་མ་ཁྲུས་བྱས་མདུན་དུ་འཁོད་པ་ལ། ཆོས་བཤད་ཅི་རིགས་དང་། འདིར་ཡང་དག་པར་རྫོགས་པའི་སངས་རྒྱས་ཀྱིས་སྣ་ཚོགས་པའི་ལས་གྲུབ་པའི་རྒྱུད་ལས་གསུངས་ཤིང་། སློབ་དཔོན་ཟླ་བའི་བཤེས་གཉེན་གྱིས་ལེགས་པར་བཀྲལ་བ་ཁྲོ་ཕུ་ལོ་ཙཱ་བ་བྱམས་པའི་དཔལ་ལ་བཀའ་བབས་པའི་རྨི་ལམ་ལུང་སྟོན་སྒྲོལ་མའི་སྒོམ་ལུང་བགྱི་བ་ལ། སློབ་དཔོན་གྱི་བྱ་བ་གྲུབ་ནས། ཁྱེད་རང་གི་ངོ་སྐལ་དུ་གྱུར་པ་ལ་ཐོག་མར་མཎྜལ་འབུལ་འཚལ། གསོལ་བ་འདེབས་པ་འདིའི་རྗེས་ཟློས་མཛོད། སློབ་དཔོན་གྱིས་བདག་ལ་རིག་སྔགས་དམ་པ་སྩལ་དུ་གསོལ། རྒྱུད་དག་པར་བྱ་བའི་སླད་དུ་སྐྱབས་འགྲོ་སེམས་བསྐྱེད་དང་བདུན་རྣམ་དག་འདི་གསུང་བར་ཞུ། འགྲོ་རྣམས་བསྒྲལ་འདོད་སོགས་གོང་ལྟར། ཨོཾ་ཨ་མྲྀ་ཏ་སོགས་ནས། ཕཊ་སྭཱ་ཧཱ་ཞེས་པས་བགེགས་བསལ་ནས། དེ་ནས་ཁྱེད་རང་རྣམས་མ་ཡེངས་པར་ལྷའི་རྣལ་འབྱོར་འདི་བཞིན་དུ་བསྒོམ་འཚལ། ནམ་མཁའ་སྔོན་པོའི་དབུས་སུ་སོགས་ནས། ཚོགས་འཕྲོ་བར་གྱུར་ཅེས་པའི་བར་གོང་ལྟར་ལ། རང་ཉིད་ཅེས་པར་ཁྱེད་རང་རྣམས་ཞེས་བསྒྱུར། ཨོཾ་བཛྲ་ཨརྒྷཾ་སོགས་ཀྱིས་མཆོད། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། སློབ་དཔོན་ལྷར་གསལ་བའི་ཐུགས་ཀར་ཟླ་བ་ལ་སྔགས་ཀྱི་ཕྲེང་བ། མོས་གུས་མཛད་པས་སྔགས་ཕྲེང་གཉིས་པ་ཆད། ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་འཁོད་པར་མོས་ལ་སྔགས་འདིའི་རྗེས་ཟློས་ལན་གསུམ་མཛོད། རྗེས་ཟློས་གྲུབ་ནས། སློབ་མས་མེ་ཏོག་འཐོར་ཞིང་། །བཅོམ་ལྡན་བདག་ལ་སོགས་དང་། སློབ་དཔོན་གྱིས་བཅོམ་ལྡན་འདི་ལ་སོགས་སྤྱི་ལྟར་བརྗོད། དེས་རྨི་ལམ་ལུང་སྟོན་སྒྲོལ་མའི་སྒོམ་བཟླས་ཀྱི་ལུང་ལེགས་པར་ཕུལ་གྲུབ་པ་ཡིན་པས་གཏང་རག་ཏུ་མཎྜལ་དང་། དགེ་བ་བསྔོ། མདུན་གྱི་མཎྜལ་གྱི་དབུས་ན་བཞུགས་པའི་ལྷ་ལ་མཆོད་བསྟོད། ནོངས་བཤགས། རྟེན་ཡོད་ན་བརྟན་བཞུགས། མེད་ན་གཤེགས་གསོལ། བསྔོ་སྨོན་བཀྲ་ཤིས་སོགས་སྤྱི་ལྟར་བྱའོ། །མན་ངག་གི་ངེས་པ་ལ་གཉིས། བསྙེན་པ་དང་། ལས་སྦྱོར་རོ། །དང་པོ་ནི། གནས་དབེན་པར་ཁྲུས་དང་གཙང་སྦྲ་དང་བཅས་མཚམས་དམ་པར་བཅད། རང་གི་མདུན་དུ་འདིའི་བྲིས་འབུར་གྱི་སྐུ་གང་རུང་དང་། སྒྲུབ་པ་དང་། མཆོད་པའི་མཎྜལ། དཀར་གསུམ་མངར་གསུམ་གྱི་གཏོར་མ་ཉེར་སྤྱོད་དང་བཅས་པ་བཤམ། སྐྱབས་སེམས་ཡན་ལག་བདུན་པ་ནས་བཟུང་བདག་མདུན་གྱི་རྣལ་འབྱོར་གོང་བཞིན་ལ། །བདག་བསྐྱེད་ཀྱི་བཛྲ་ས་མཱ་ཛཿ ཞེས་པའི་རྗེས། ཨོཾ་བཛྲ་ཨརྒྷཾ་སོགས་ཀྱིས་མཆོད། ཛཿཧཱུྃ་བྃ་ཧོཿས་བསྟིམ་པ་མན་འདྲ། ཤེལ་དཀར་གྱི་ཕྲེང་བ་བཟུང་ནས་བཟླས་པ་ཅི་ནུས་བྱ། ཐུན་ལས་ལྡང་བ་ན། མཎྜལ་ཚོམ་བུ་བདུན་མའམ་སོ་བདུན་ལ་སོགས་ཅི་ནུས་ཕུལ། གཏོར་མ་སྤྱི་ལྟར་བྱིན་གྱིས་བརླབས་ལ། ཨོཾ་ཨཱཪྻ་ཏཱ་རཱ་ས་པ་རི་ཝཱ་ར་ཨ་ཀ་རོ་སོགས་ཀྱིས་ཕུལ། ཨརྒྷཾ་སོགས་ཀྱིས་མཆོད། སྤྲིན་བྲལ་མཁའ་དཀྱིལ་ཟླ་རྒྱས་གཟུགས། །རབ་དཀར་བསིལ་བའི་འོད་ལྡན་མ། །མ་ལུས་རྨི་ལྟས་གསལ་མཛད་པའི། །འཕགས་མ་སྒྲོལ་མར་ཕྱག་འཚལ་ལོ། །ཞེས་བསྟོད། མཆོད་སྦྱིན་གཏོར་མ་འདི་བཞེས་སོགས་ཀྱིས་འདོད་དོན་གསོལ། ནོངས་བཤགས། བརྟན་བཞུགས། བསྔོ་སྨོན་བཀྲ་ཤིས་སྤྱི་ལྟར་བྱ། དེ་ལྟ་བུའི་རིམ་པས་ཐུན་བཞི་སོགས་སུ་བཅད་ལ་རྩ་སྔགས་ཡི་གེ་བརྒྱད་པ་འབུམ་ཕྲག་ཉི་ཤུ་རྩ་བཞི་བཟླའོ། །གཉིས་པ་ལ་གཉིས། སྦྱོར་བ་དང་། དངོས་གཞིའོ། དང་པོ་ནི། དེ་ལྟར་བསྙེན་པ་ལེགས་པར་གྲུབ་ནས། ཚེས་གྲངས་གཟའ་སྐར་ལེགས་པའི་སྔ་དྲོ། བུ་མོ་གཞོན་ནུ་གྲོང་པའི་ཆོས་ཀྱིས་མ་གོས་པ་བདུན་བོས་ལ། དཀར་གསུམ་གྱི་བཏུང་བ་དང་། བཟའ་བཅས་ཚིམ་པར་བྱ། དར་དཀར་པོ་དང་མགྲོན་བུ་བཅས་བྱིན་ལ་རང་གནས་སུ་གཏོང་། གཉིས་པ་ནི། གནས་ཁང་བྱི་དོར་བྱ་ཞིང་མཚམས་དམ་པར་བཅད། གོས་གཙང་མ་གོན་ཞིང་ཁྲུས་དང་གཙང་སྦྲ་ལ་གནས་པས་རང་གི་སྔས་མགོར་སྒྲུབ་པའི་མཎྜལ་དང་། གཏོར་མ། མཆོད་པ། ཁྱད་པར་གུ་གུལ་དཀར་པོའི་བདུག་སྤོས་རྒྱུན་མི་འཆད་པ་དང་། མར་མེ་གསལ་བ་འབུལ། རང་གི་མདུན་དུ་བ་བྱུང་ལྔ་དང་འཇིམ་པ་གཙང་མ་བསྲེས་པའི་རིལ་བུ་སྲན་མ་ཙམ་དགོས་འདང་རིན་པོ་ཆེའི་སྣོད་དུ་བླུག །སྲོད་ཀྱི་དུས་སུ་བབ་པ་ན་བདག་མདུན་གོང་བཞིན་བསྒོམས་ནས་བཟླས་པ་ཅི་རིགས་རྗེས་མཎྜལ་དང་གཏོར་མ་དབུལ། ལས་སྔགས་ཀྱིས་བཏབ་པའི་འཇིམ་པའི་རིལ་བུ་ཉི་ཤུ་རྩ་གཅིག་ལས་སྔགས་བཟླ་བཞིན་ཕྱོགས་བཅུར་གཏོར་བས་གནས་དང་ཡོ་བྱད་ལ་བར་ཆད་ཀྱི་བགེགས་བསལ། ཡང་རིལ་བུ་ཉེར་གཅིག་རིན་པོ་ཆེའི་ཕུང་པོར་བསམས་ལ་མཆོད་པའི་སྤྲིན་གྱི་སྔགས་བཟླ་བཞིན་དུ་མཎྜལ་གྱི་སྟེང་དུ་ཕུལ་ལ་གསོལ་བ་གདབ། རིལ་བུ་ཉེར་གཅིག་རང་གིས་ཟ་བས་རྣལ་འབྱོར་གྱི་བགེགས་བསྲུང་། དེ་ནས་ཨོཾ་སྭཔྣ་ཏཱ་རེ་ཨོཾ་ཀྱེ་རྨི་ལམ་སྒྲོལ་མ། སྭཔྣ་ཨ་ཝ་ལོ་ཀི་ནཱི་རྨི་ལམ་ཀུན་ཏུ་གཟིགས་མ་ཏྲཻ་ལོ་ཀྱཱ་ནི་དཪྴ་ནཱི། འཇིག་རྟེན་གསུམ་གཟིགས་མ་ཏྲཻ་ལོ་ཀྱ་བི་ཛ་ར་ཎཱི་འཇིག་རྟེན་གསུམ་གྱི་རྡུལ་དང་བྲལ་མས། བྷཱུ་ཏཾ་བྷ་བཾ་བྷ་བིཥྱཾ་བྱུང་དང་འབྱུང་བ་འབྱུང་འགྱུར། ཤུ་བྷཱ་ཤུ་བྷཾ་ཏཾ་མི་དགེ་བ་དང་མི་དགེ་བ་དེ་དག སདྱ་ཀཱ་ཐཱ་ཡ་སྭཱ་ཧཱ། བདེན་པ་ཇི་ལྟ་བའི་གཞི་ཚུགས། ཞེས་པའི་སྔགས་ཀྱིས་གསོལ་བ་ལན་བརྒྱ་རྩ་སོགས་བཏབ་པས་མདུན་གྱི་འཕགས་མའི་ཐུགས་ཀ་ནས་འོད་ཟེར་དཀར་པོ་ཟླ་བ་ཤར་བ་ལྟར་འཕྲོས། རང་གི་སྙིང་གར་ཐིམ་པས་མ་རིག་པའི་མུན་པ་བསལ། ཕྱག་གཡས་མཆོག་སྦྱིན་ལས་བདུད་རྩིའི་རྒྱུན་བབས། རང་གི་སྤྱི་བོ་ནས་ཞུགས། སྙིང་གི་དབུས་དང་ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་པ་དག་ཅིང་། ལུས་དྲི་མ་མེད་པའི་ཤེལ་ལྟར་གྱུར་པར་བསམས་ལ་མདུན་གྱི་ལྷ་མོ་ལ་དད་ཅིང་གུས་པས་རྩེ་གཅིག་ཏུ་སེམས་གཏད་དེ་སེང་གེའི་ཉལ་སྟབས་ཀྱིས་ཉལ་ལ་རྩ་སྔགས་ཡི་གེ་བརྒྱད་པ་བཟླ་བཞིན་དུ་གཉིད་ལོག་པས། རྨི་ལམ་དུ་དངོས་སམ་བརྡ་ཐབས་ཀྱི་སྒོ་ནས་གང་འདོད་པའི་དོན་གསལ་བར་ལུང་སྟོན་པར་འགྱུར་ལ། གཉིད་སང་མ་ཐག་མདུན་གྱི་ལྷ་མོ་ལ་མཆོད་བསྟོད། ནོངས་བཤགས་སོགས་ཆོ་གའི་འཕྲོས་རྣམས་གོང་བཞིན་དུ་བྱའོ། །དེའང་རབ་ཞག་གཅིག་ནས་བཟུང་། །ཐ་མའང་ཞག་བདུན་གྱི་ཁོངས་སུ་རྨི་ལྟས་གསལ་བོར་མཐོང་བར་གསུངས་སོ། །ཞེས་པའང་མཉྫཱུ་གྷོ་ཥས་རྒྱ་གཞུང་དང་ཟིན་བྲིས་ཀྱི་དགོངས་པ་ལྟར་ཉུང་གསལ་སྙིང་པོར་དྲིལ་ཏེ་སྦྱར་བ་དགེ །ཨོཾ་བུདྡྷ་ཙུ་རུ་མ་ཙུ་རུ་ཀེ་སྭཱ་ཧཱ། ཤཱཀྱ་ཐུབ་པ་ལུགས་མའམ། ཐང་ཀའམ། སྡེར་ཚོའི་མདུན་དུ་མཎྜལ་བྱ། པཱུ་ཛ་དབུལ་ཞིང་མོས་གུས་བྱས་ཏེ་བཟླས་པ་འབུམ་ཕྲག་གསུམ་བསྐྱལ་ནས། ཉའམ། གནམ་སྟོང་ངམ། དུས་ཁྱད་པར་ཅན་ལ་ཤཱཀྱ་ཐུབ་པའི་ཞལ་ཤར་དུ་བསྟན། དེའི་མདུན་ནམ་རྩར་མཎྜལ་བྱ། བཟླས་པ་ནུས་ཚད་གཅིག་བྱས་ཏེ་ཉལ་ཁར་བདག་སྐྱེ་བ་སྔ་མ་གར་སྐྱེས། ད་གང་དུ་སྐྱེ་བསྟན་དུ་གསོལ་ཞེས་བྱ་བ་ལ་སོགས་པས་གསོལ་བ་བཏབ་ནས་མགོ་བྱང་དུ་བསྟན། ཁ་ནུབ་ཏུ་བསྟན། རྐང་པ་ལྷོར་བསྟན་ཏེ་སེང་གེའི་ཉལ་སྟབས་ཀྱིས་ཉལ་ན་གར་སྐྱེ་རྨི་ལམ་དུ་སྟོན་ཏོ། །དེ་མ་བྱུང་ན་ནུབ་གསུམ་དུ་བསྐྱར་རོ། །ཤཱཀྱ་རཀྵི་ཏ་ལས་བརྒྱུད་པའོ། །ཞེས་དཔལ་སྟག་ལུང་ཐང་པ་ཆེན་པོ་བཀྲ་ཤིས་དཔལ་གྱིས་བསྒྲིགས་པའི་མན་ངག་སྣ་ཚོགས་ཕན་བདེའི་དཔག་བསམ་ལས་བྱུང་བའོ། །གཉིས་པ་ནི། རྟེན་གྱི་གང་ཟག་སོ་སོར་ཐར་པ་ཚངས་སྤྱོད་དགེ་བསྙེན་ཡན་ཆད་ཀྱི་སྡོམ་པ་ལ་གནས་ཤིང་ཉེས་ལྟུང་མེད་པ། བྱང་ཆུབ་ཀྱི་སེམས་ཅུང་ཟད་འབྱོངས་པ། དབང་ཐོབ་ཅིང་དམ་ཚིག་དང་སྡོམ་པར་ལྡན་པ། ཁྱད་པར་ཐུབ་པའི་དབང་པོའི་བསྒོམ་བཟླས་ལ་བརྩོན་ཅིང་བསྙེན་པ་སྔོན་དུ་སོང་བ་ཞིག་གིས་ཉམས་སུ་བླང་བར་བྱ་སྟེ། དེ་ལ་གཉིས། བསྙེན་པ་དང་། ལས་སྦྱོར་རོ། །དང་པོ་ནི། གནས་ཤིན་ཏུ་དབེན་ཞིང་གཙང་ལ་སྡོམ་པ་དང་དམ་ཚིག་ཉམས་པ་སོགས་ཀྱི་སྐྱེ་བོའི་རྒྱུ་འགྲུལ་ཙམ་ཡང་མེད་པའི་སར། བསམ་གཏན་གྱི་ཁང་བུར་ཕྱག་དར་བྱ། སྤོས་ཆུས་ཆག་ཆག་གདབ། རང་ཉིད་ཁ་ནུབ་ཏུ་ཕྱོགས་པའི་མདུན་དུ་སྟེགས་མཐོ་བར་སངས་རྒྱས་ཀྱི་རིང་བསྲེལ་བཞུགས་ངེས་པའི་མཆོད་རྟེན་ནམ་སྐུ་གཟུགས་མཚན་ཉིད་དང་ལྡན་པ་རབ་གནས་མ་ཉམས་པ་ཞིག་ཞལ་ཤར་དུ་ཕྱོགས་པས་བཞུགས་སུ་གསོལ། དེའི་མདུན་དུ་མར་དཀར་གྱི་མར་མེ་རྒྱུན་མི་འཆད་པ་གཙོ་བོར་གྱུར་པའི་མཆོད་པ་ཅི་འབྱོར་གཙང་ཞིང་བཀོད་མཛེས་སུ་བསྟར། ཙནྡན་དཀར་པོའི་བདུག་སྤོས་བཏུལ། རབ་ཁྲུས་བྱ། གོས་གསར་པ་གྱོན། ཀུ་ཤ་བཀྲམ་པའི་སྟན་ལ་འཁོད་དེ་མཚམས་དམ་པར་བཅད་ཐེག་པ་ཆེན་པོའི་གསོ་སྦྱོང་བླང་། ས་གཞི་བྱིན་རླབས་སོགས་གནས་བརྟན་ནམ་སྨན་བླའི་མདོ་ཆོག་ལས་འབྱུང་བ་ལྟར་རམ་བསྡུ་ན། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་ཁོར་ཡུག་གི་ས་གཞི་འདི་དག་བདེ་བ་ཅན་གྱི་ཞིང་གི་བཀོད་པ་ལྟ་བུ་ཕུན་སུམ་ཚོགས་པའི་རྒྱན་ཐམས་ཅད་ཀྱིས་རྣམ་པར་བརྒྱན་པས་མཛེས་ཤིང་ཡིད་དུ་འོང་བ་བསམ་གྱིས་མི་ཁྱབ་པར་གྱུར། ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻཌཱུ་ཪྻའི། །རང་བཞིན་འཇམ་པོར་གནས་གྱུར་ཅིག །ཕུན་སུམ་ཚོགས་པའི་ཞིང་འདི་དག་ཏུ་ལྷ་དང་མིའི་ཡོ་བྱད་དམ་པ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་སོགས་པ་རྣམ་པར་དག་ཅིང་ཡིད་དུ་འོང་བའི་མཆོད་པའི་སྤྲིན་རྒྱ་མཚོ་བསམ་གྱིས་མི་ཁྱབ་པས་ནམ་མཁའི་ཁམས་ཐམས་ཅད་གང་བར་གྱུར། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་དང་སྤྲོ་ན་མཆོད་པའི་སྤྲིན་གྱི་གཟུངས་ཀྱང་བརྗོད། སྐྱབས་སེམས་རྒྱས་པར་བྱ་བའམ། སངས་རྒྱས་ཆོས་ཚོགས་ཚར་གྲངས་བསག་ཅིང་བློ་རྒྱུད་དང་འགྲེ་ངེས་པར་བྱ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། དེ་ནས་སྤོས་བཏུལ་ཐལ་མོ་སྦྱར་ལ་འདུན་པ་རྩེ་གཅིག་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་སམ་སྤྲོ་ན་ཚིགས་བཅད་ཚང་བས་སྤྱན་དྲངས་ཏེ། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པའི་ཚོགས་རྣམས་སངས་རྒྱས་ཀྱི་རྫུ་འཕྲུལ་ཆེན་པོས་གཤེགས་ཏེ་མདུན་གྱི་རྟེན་དང་དབྱེར་མེད་དུ་བཞུགས་པ་ནི། སེང་གེས་བཏེག་པའི་རིན་པོ་ཆེའི་ཁྲི་པདྨ་དང་ཟླ་བའི་གདན་བཀོད་པ་ཕུལ་དུ་བྱུང་བའི་དབུས་སུ་སྟོན་པ་བཅོམ་ལྡན་འདས་སྐུ་མདོག་གསེར་བཙོ་མ་ལྟར་འབར་བ། ཞལ་གཅིག་ཕྱག་གཉིས་གཡས་ས་གནོན་དང་གཡོན་མཉམ་གཞག་གི་ཕྱག་རྒྱ་མཛད་པ། ན་བཟའ་ཆོས་གོས་རྣམ་གསུམ་ངུར་སྨིག་ཏུ་གསོལ་བ་སྐུ་མཚན་དང་དཔེ་བྱད་འབར་བ། གསུང་དབྱངས་ཡན་ལག་དྲུག་ཅུ་དང་ལྡན་པ། ཐུགས་ཏིང་ངེ་འཛིན་སྒོ་དུ་མ་ལ་སྙོམས་པར་འཇུག་ཅིང་ལྡང་བ། འཁོར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་དགྲ་བཅོམ་པའི་ཚོགས་ཀྱིས་བསྐོར་ཏེ་འོད་ཀྱི་ཕུང་པོའི་ཀློང་ན་མངོན་སུམ་བཞིན་དུ་བཞུགས་པར་གྱུར་ཅེས་བརྗོད་ཅིང་གསལ་གདབ། ཡན་ལག་བདུན་པའི་ཆོ་ག་རྒྱས་པ་གཞན་ནས་འབྱུང་བ་ལྟར་རམ། བཟང་སྤྱོད་ནས་འབྱུང་བའི་ཚིགས་སུ་བཅད་པ་ཙམ་གྱིས་ཀྱང་རུང་སྟེ་ཕྱག་མང་དུ་བཙལ། སྤྱོད་འཇུག་ལྟར་སེམས་བསྐྱེད་ཀྱི་སྡོམ་པ་བླང་། དེ་ནས་སྐུ་གཟུགས་ཀྱི་ཐུགས་ཀར་ཙནྡན་དཀར་པོའི་ཆབ་གཙང་མས་དྲིའི་ཐིག་ལེ་གསུམ་བཀོད་ལ་སྨྲ་བ་བཅད་དེ། ཨོཾ་བུདྡྷ་ཙུ་རུ་མ་ཙུ་རུ་ཀེ་སྭཱ་ཧཱ། ཞེས་པའི་སྔགས་ཡི་གེ་བཅུ་གཅིག་པ་ཁོ་ན་བཟླ། བརྒྱ་ཕྲག་གམ་སྟོང་ཕྲག་རེའི་མཚམས་སུ། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པས་བདག་གང་ནས་སྐྱེས་པར་གྱུར་པ་དང་། གང་དུ་སྐྱེ་བར་འགྱུར་བ་རྨི་ལམ་དུ་གསལ་བར་ལུང་བསྟན་དུ་གསོལ་ཞེས་ལན་གསུམ་ལ་སོགས་པ་ངག་གམ་ཡིད་ཀྱིས་གསོལ་བ་གདབ་ཅིང་མེ་ཏོག་འཐོར་བ་རེ་བྱ། དེའི་ཚེ་དམིགས་པ་ནི། སངས་རྒྱས་འཁོར་དང་བཅས་པས་རྗེས་སུ་དགོངས་ཏེ་ཐུགས་ཀ་དང་སྨིན་མཚམས་ནས་འོད་ཟེར་འཕྲོས། རང་གི་སྤྱི་བོ་ནས་ཞུགས་ལུས་ཀྱི་ནང་ཐམས་ཅད་གང་པས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་སྦྱངས། ལུས་དག་པའི་ཤེལ་ལྟར་བྱས། སེམས་དུག་གསུམ་གྱི་དྲི་མ་དང་བྲལ་ཏེ་ལུང་བསྟན་པའི་སྣོད་དུ་གྱུར་པར་བསམ། ཐུན་འཇོག་པ་ན་སླར་ཡང་ཡན་ལག་བདུན་པ་ཕུལ་ཏེ་གསོལ་བ་གདབ། ཐུན་མཚམས་སུའང་རྣམ་གཡེང་གི་བྱ་བ་དང་། རྣམ་པར་རྟོག་པ་མང་པོ་སྤངས་ཏེ་ལྟུང་བ་བཤགས་པ་སོགས་དང་བཅས་ཏེ་ཕྱག་མང་དུ་བཙལ། དེ་ལྟ་བུའི་རིམ་པས་འབུམ་ཕྲག་བཞི་བཟླ་བར་བྱའོ། །གཉིས་པ་ནི། བསྙེན་པ་གྲུབ་ནས་ཆོ་ག་གཞན་སྔར་བཞིན་ལ། ཉལ་ཁར་རུ་རྟའི་ཕྱེ་མ་ལ། ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧ་ནི་སྭཱ་ཧཱ། ཨོཾ་དནྟ་ལི་སྭཱ་ཧཱ། ཞེས་བཟླས་པས་བདུགས་ལ་ལག་གཡོན་པའི་སོར་མོ་རྣམས་ལའང་སྔགས་ཉི་ཤུ་རྩ་གཅིག་བཟླས་པས་བཏབ་སྟེ། སྐུ་དང་འདོམ་གང་ལས་མི་རིང་བའི་སར་མགོ་བྱང་། ཁ་ནུབ། རྐང་པ་ལྷོར་བསྟན། གློ་གཡས་པ་འོག་ཏུ་ཕབ་སྟེ་སེང་གེའི་ཉལ་སྟབས་དང་། དགེ་བའི་སེམས་ཀྱིས་སྣང་བའི་འདུ་ཤེས་དང་བཅས་ཏེ་ཉལ་བས་ཞག་གསུམ་མམ་བདུན་གྱི་ཐོ་རངས་ཚུན་ཆད་དུ་ལུང་སྟོན་པའི་རྨི་ལམ་རྣམས་འབྱུང་བར་འགྱུར་རོ། །དེས་མ་གྲུབ་ན་བསྙེན་པ་དང་ལས་སྦྱོར་ཇི་སྐད་བཤད་པ་བཞིན་ལན་གསུམ་དུ་བྱས་པས་མཚམས་མེད་ལྔ་བྱས་པ་མ་གཏོགས་མི་འགྲུབ་པ་མི་སྲིད་པར་གསུངས་སོ། །གསུམ་པ་ནི། ཐོ་རངས་ཀྱི་དུས་སུ་སངས་རྒྱས་ཀྱིས་དངོས་སུ་གསུངས་པའམ། དགེ་སློང་ལ་སོགས་པའི་གཟུགས་གཞན་གྱིས་བཤད་པའམ། གང་ནས་སྐྱེས་པ་དང་། གང་དུ་སྐྱེ་བར་འགྱུར་བའི་ཡུལ་ལམ། གཟུགས་སམ། མིང་ལ་སོགས་པས་མཚོན་པའམ། རྨི་ལམ་དུ་སྔོན་དང་། མ་འོངས་པའི་སྐྱེ་བ་རྗེས་སུ་དྲན་པ་སོགས་གསལ་པོར་བྱུང་ན་ནམ་དུའང་བསླུ་བ་མེད་ཅིང་ངེས་པ་ཡིན་ལ། བརྡ་རྟགས་ཀྱི་སྒོ་ནས་བྱུང་ན་དཔྱད་ཤེས་པར་བྱ། ངན་སོང་དུ་སྐྱེ་བའི་མཚན་མ་བྱུང་ན་སྡིག་ལྟུང་ལ་བཤགས་སྡོམ་དང་བཅས་སླར་ཡང་བརྟགས་པས་མཐོ་རིས་སུ་སྐྱེ་བའི་མཚན་མ་འབྱུང་བ་དང་། མཐོ་རིས་སུ་སྐྱེ་བའི་མཚན་མ་བྱུང་ན་བསག་སྦྱོང་སྤྱི་དང་། ཁྱད་པར་དག་པའི་ཞིང་སྦྱོང་བའི་ཏིང་ངེ་འཛིན་ལ་གོམས་པ་ལྷུར་ལེན་པ་དང་། རྟེན་བྱིན་ཅན་གྱི་མདུན་དུ་སྨོན་ལམ་རྒྱ་ཆེར་གདབ་ཅིང་། བླ་མ་དང་དགེ་འདུན་གྱི་སྡེ་ལའང་མཐུན་འགྱུར་ཞུ་བ་སོགས་ཡིད་ཆེས་པར་བགྱིས་ཏེ་ཕྱིས་བརྟགས་པས་དག་པའི་ཞིང་དུ་སྐྱེ་བའི་མཚན་མ་འབྱུང་བ་སོགས་རིག་པས་དཔྱད་ལ་ཤེས་པར་བྱ་ཞིང་། གཞན་ཡང་རང་གཞན་གྱི་ལེགས་ཉེས་བདེ་སྡུག་ཀྱང་རྨི་ལམ་གྱི་སྐབས་སུ་ལུང་བསྟན་པའི་བརྡ་རྟགས་ཅི་རིགས་པ་འབྱུང་སྲིད་པས། རྨི་ལམ་བརྟག་པའི་ཐབས་དང་གཏམ་རྒྱུད་སོགས་ལས་ཇི་ལྟར་འབྱུང་བ་བཞིན་ཞིབ་མོར་གཏན་ལ་འབེབས་པ་དང་། བླང་དོར་གྱི་གནས་ཚུལ་བཞིན་དུ་བགྱིས་ན་ཕན་བདེའི་དགེ་ལེགས་ཀྱི་འབྲས་བུ་འབྱིན་པར་གདོན་མི་ཟའོ། །དྲི་བྲལ་ནོར་བུའི་མེ་ལོང་གིས། །རྣམ་མང་གཟུགས་བརྒྱ་མཚོན་པ་ལྟར། །རྨི་ལམ་མཚན་མས་ལུང་བསྟན་ཚུལ། །འདིས་ཀྱང་གཞན་ལ་ཕན་པར་ཤོག །ཅེས་པའང་ཡིག་རྙིང་གསལ་བྱེད་ཞལ་ཤེས་དང་བཅས་པའི་ཚོགས་རྣམས་ཕྱོགས་གཅིག་ཏུ་བསྡེབས་ཏེ། ལག་ཏུ་བླང་བདེ་བར་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། །།སརྦ་དཱ་མངྒལཾ་སུ་ཤྲེ་ཡནྟུ།། །། ༈
[edit]

rmi lam lung bstan sgrol ma'i sgom lung dang man ngag nyung ngu zla ba'i me long / @#/_/rmi lam lung ston sgrol ma'i sgom lung dang man ngag gi gsal byed nyung ngu zla ba'i me long zhes bya ba bzhugs so/__/oM swa sti sid+d+haM/__rmi lam lung ston sgrol ma'i sgom lung 'bogs pa'i skabs/__mdun du maN+Dal tshom bu gcig pa mchod pa dang bcas pa bsham/__/'gro rnams bsgral 'dod sogs dang /__shes rab snying brtse sogs skyabs sems dang /__dkon mchog gsum la bdag skyabs mchi sogs yan lag bdun pa sngon du 'gro bas/__oM a mr-i ta sogs bgegs bsal ba nas bzung bzlas pa'i bar gong ltar bya/__de nas slob ma khrus byas mdun du 'khod pa la/__chos bshad ci rigs dang /__'dir yang dag par rdzogs pa'i sangs rgyas kyis sna tshogs pa'i las grub pa'i rgyud las gsungs shing /__slob dpon zla ba'i bshes gnyen gyis legs par bkral ba khro phu lo tsA ba byams pa'i dpal la bka' babs pa'i rmi lam lung ston sgrol ma'i sgom lung bgyi ba la/__slob dpon gyi bya ba grub nas/__khyed rang gi ngo skal du gyur pa la thog mar maN+Dal 'bul 'tshal/__gsol ba 'debs pa 'di'i rjes zlos mdzod/__slob dpon gyis bdag la rig sngags dam pa stsal du gsol/__rgyud dag par bya ba'i slad du skyabs 'gro sems bskyed dang bdun rnam dag 'di gsung bar zhu/__'gro rnams bsgral 'dod sogs gong ltar/__oM a mr-i ta sogs nas/__phaT swA hA zhes pas bgegs bsal nas/__de nas khyed rang rnams ma yengs par lha'i rnal 'byor 'di bzhin du bsgom 'tshal/__nam mkha' sngon po'i dbus su sogs nas/__tshogs 'phro bar gyur ces pa'i bar gong ltar la/__rang nyid ces par khyed rang rnams zhes bsgyur/__oM badz+ra ar+g+haM sogs kyis mchod/__ye shes sems dpa' badz+ra sa mA dzaH__dzaHhU~M ba~M hoH__gnyis su med par thim/__dpral bar oM/__mgrin par AH__thugs kar hU~M/__slob dpon lhar gsal ba'i thugs kar zla ba la sngags kyi phreng ba/__mos gus mdzad pas sngags phreng gnyis pa chad/__zhal nas thon/__khyed rang rnams lhar gsal ba'i zhal du zhugs/__thugs kar zla ba'i steng du 'khod par mos la sngags 'di'i rjes zlos lan gsum mdzod/__rjes zlos grub nas/__slob mas me tog 'thor zhing /__/bcom ldan bdag la sogs dang /__slob dpon gyis bcom ldan 'di la sogs spyi ltar brjod/__des rmi lam lung ston sgrol ma'i sgom bzlas kyi lung legs par phul grub pa yin pas gtang rag tu maN+Dal dang /__dge ba bsngo/__mdun gyi maN+Dal gyi dbus na bzhugs pa'i lha la mchod bstod/__nongs bshags/__rten yod na brtan bzhugs/__med na gshegs gsol/__bsngo smon bkra shis sogs spyi ltar bya'o/__/man ngag gi nges pa la gnyis/__bsnyen pa dang /__las sbyor ro/__/dang po ni/__gnas dben par khrus dang gtsang sbra dang bcas mtshams dam par bcad/__rang gi mdun du 'di'i bris 'bur gyi sku gang rung dang /__sgrub pa dang /__mchod pa'i maN+Dal/__dkar gsum mngar gsum gyi gtor ma nyer spyod dang bcas pa bsham/__skyabs sems yan lag bdun pa nas bzung bdag mdun gyi rnal 'byor gong bzhin la/__/bdag bskyed kyi badz+ra sa mA dzaH__zhes pa'i rjes/__oM badz+ra ar+g+haM sogs kyis mchod/__dzaHhU~M ba~M hoHsa bstim pa man 'dra/__shel dkar gyi phreng ba bzung nas bzlas pa ci nus bya/__thun las ldang ba na/__maN+Dal tshom bu bdun ma'am so bdun la sogs ci nus phul/__gtor ma spyi ltar byin gyis brlabs la/__oM AR+Ya tA rA sa pa ri wA ra a ka ro sogs kyis phul/__ar+g+haM sogs kyis mchod/__sprin bral mkha' dkyil zla rgyas gzugs/__/rab dkar bsil ba'i 'od ldan ma/__/ma lus rmi ltas gsal mdzad pa'i/__/'phags ma sgrol mar phyag 'tshal lo/__/zhes bstod/__mchod sbyin gtor ma 'di bzhes sogs kyis 'dod don gsol/__nongs bshags/__brtan bzhugs/__bsngo smon bkra shis spyi ltar bya/__de lta bu'i rim pas thun bzhi sogs su bcad la rtsa sngags yi ge brgyad pa 'bum phrag nyi shu rtsa bzhi bzla'o/__/gnyis pa la gnyis/__sbyor ba dang /__dngos gzhi'o/__dang po ni/__de ltar bsnyen pa legs par grub nas/__tshes grangs gza' skar legs pa'i snga dro/__bu mo gzhon nu grong pa'i chos kyis ma gos pa bdun bos la/__dkar gsum gyi btung ba dang /__bza' bcas tshim par bya/__dar dkar po dang mgron bu bcas byin la rang gnas su gtong /__gnyis pa ni/__gnas khang byi dor bya zhing mtshams dam par bcad/__gos gtsang ma gon zhing khrus dang gtsang sbra la gnas pas rang gi sngas mgor sgrub pa'i maN+Dal dang /__gtor ma/__mchod pa/__khyad par gu gul dkar po'i bdug spos rgyun mi 'chad pa dang /__mar me gsal ba 'bul/__rang gi mdun du ba byung lnga dang 'jim pa gtsang ma bsres pa'i ril bu sran ma tsam dgos 'dang rin po che'i snod du blug__/srod kyi dus su bab pa na bdag mdun gong bzhin bsgoms nas bzlas pa ci rigs rjes maN+Dal dang gtor ma dbul/__las sngags kyis btab pa'i 'jim pa'i ril bu nyi shu rtsa gcig las sngags bzla bzhin phyogs bcur gtor bas gnas dang yo byad la bar chad kyi bgegs bsal/__yang ril bu nyer gcig rin po che'i phung por bsams la mchod pa'i sprin gyi sngags bzla bzhin du maN+Dal gyi steng du phul la gsol ba gdab/__ril bu nyer gcig rang gis za bas rnal 'byor gyi bgegs bsrung /__de nas oM swap+na tA re oM kye rmi lam sgrol ma/__swap+na a wa lo ki nI rmi lam kun tu gzigs ma trai lo kyA ni daR+sha nI/__'jig rten gsum gzigs ma trai lo kya bi dza ra NI 'jig rten gsum gyi rdul dang bral mas/__b+hU taM b+ha baM b+ha biSh+yaM byung dang 'byung ba 'byung 'gyur/__shu b+hA shu b+haM taM mi dge ba dang mi dge ba de dag__sad+ya kA thA ya swA hA/__bden pa ji lta ba'i gzhi tshugs/__zhes pa'i sngags kyis gsol ba lan brgya rtsa sogs btab pas mdun gyi 'phags ma'i thugs ka nas 'od zer dkar po zla ba shar ba ltar 'phros/__rang gi snying gar thim pas ma rig pa'i mun pa bsal/__phyag g.yas mchog sbyin las bdud rtsi'i rgyun babs/__rang gi spyi bo nas zhugs/__snying gi dbus dang lus kyi nang thams cad gang /__nad gdon sdig sgrib bag chags dang bcas pa dag cing /__lus dri ma med pa'i shel ltar gyur par bsams la mdun gyi lha mo la dad cing gus pas rtse gcig tu sems gtad de seng ge'i nyal stabs kyis nyal la rtsa sngags yi ge brgyad pa bzla bzhin du gnyid log pas/__rmi lam du dngos sam brda thabs kyi sgo nas gang 'dod pa'i don gsal bar lung ston par 'gyur la/__gnyid sang ma thag mdun gyi lha mo la mchod bstod/__nongs bshags sogs cho ga'i 'phros rnams gong bzhin du bya'o/__/de'ang rab zhag gcig nas bzung /__/tha ma'ang zhag bdun gyi khongs su rmi ltas gsal bor mthong bar gsungs so/__/zhes pa'ang many+dzU g+ho Shas rgya gzhung dang zin bris kyi dgongs pa ltar nyung gsal snying por dril te sbyar ba dge__/oM bud+d+ha tsu ru ma tsu ru ke swA hA/__shAkya thub pa lugs ma'am/__thang ka'am/__sder tsho'i mdun du maN+Dal bya/__pU dza dbul zhing mos gus byas te bzlas pa 'bum phrag gsum bskyal nas/__nya'am/__gnam stong ngam/__dus khyad par can la shAkya thub pa'i zhal shar du bstan/__de'i mdun nam rtsar maN+Dal bya/__bzlas pa nus tshad gcig byas te nyal khar bdag skye ba snga ma gar skyes/__da gang du skye bstan du gsol zhes bya ba la sogs pas gsol ba btab nas mgo byang du bstan/__kha nub tu bstan/__rkang pa lhor bstan te seng ge'i nyal stabs kyis nyal na gar skye rmi lam du ston to/__/de ma byung na nub gsum du bskyar ro/__/shAkya rak+Shi ta las brgyud pa'o/__/zhes dpal stag lung thang pa chen po bkra shis dpal gyis bsgrigs pa'i man ngag sna tshogs phan bde'i dpag bsam las byung ba'o/__/gnyis pa ni/__rten gyi gang zag so sor thar pa tshangs spyod dge bsnyen yan chad kyi sdom pa la gnas shing nyes ltung med pa/__byang chub kyi sems cung zad 'byongs pa/__dbang thob cing dam tshig dang sdom par ldan pa/__khyad par thub pa'i dbang po'i bsgom bzlas la brtson cing bsnyen pa sngon du song ba zhig gis nyams su blang bar bya ste/__de la gnyis/__bsnyen pa dang /__las sbyor ro/__/dang po ni/__gnas shin tu dben zhing gtsang la sdom pa dang dam tshig nyams pa sogs kyi skye bo'i rgyu 'grul tsam yang med pa'i sar/__bsam gtan gyi khang bur phyag dar bya/__spos chus chag chag gdab/__rang nyid kha nub tu phyogs pa'i mdun du stegs mtho bar sangs rgyas kyi ring bsrel bzhugs nges pa'i mchod rten nam sku gzugs mtshan nyid dang ldan pa rab gnas ma nyams pa zhig zhal shar du phyogs pas bzhugs su gsol/__de'i mdun du mar dkar gyi mar me rgyun mi 'chad pa gtso bor gyur pa'i mchod pa ci 'byor gtsang zhing bkod mdzes su bstar/__tsan+dan dkar po'i bdug spos btul/__rab khrus bya/__gos gsar pa gyon/__ku sha bkram pa'i stan la 'khod de mtshams dam par bcad theg pa chen po'i gso sbyong blang /__sa gzhi byin rlabs sogs gnas brtan nam sman bla'i mdo chog las 'byung ba ltar ram bsdu na/__dkon mchog gsum gyi bden pa dang /__sangs rgyas dang byang chub sems dpa' thams cad kyi byin gyis brlabs dang /__tshogs gnyis yongs su rdzogs pa'i mnga' thang chen po dang /__chos kyi dbyings rnam par dag cing bsam gyis mi khyab pa'i stobs kyis/__deng 'dir khor yug gi sa gzhi 'di dag bde ba can gyi zhing gi bkod pa lta bu phun sum tshogs pa'i rgyan thams cad kyis rnam par brgyan pas mdzes shing yid du 'ong ba bsam gyis mi khyab par gyur/__thams cad du yang sa gzhi dag__/gseg ma la sogs med pa dang /__/lag mthil ltar mnyam baiDU R+Ya'i/__/rang bzhin 'jam por gnas gyur cig__/phun sum tshogs pa'i zhing 'di dag tu lha dang mi'i yo byad dam pa gzugs dang /__sgra dang /__dri dang /__ro dang /__reg bya la sogs pa rnam par dag cing yid du 'ong ba'i mchod pa'i sprin rgya mtsho bsam gyis mi khyab pas nam mkha'i khams thams cad gang bar gyur/__de las gzhan yang mchod pa'i tshogs/__/rol mo dbyangs snyan yid 'ong ldan/__/sems can sdug bsngal sim byed pa'i/__/sprin rnams so sor gnas gyur cig__/ces dang spro na mchod pa'i sprin gyi gzungs kyang brjod/__skyabs sems rgyas par bya ba'am/__sangs rgyas chos tshogs tshar grangs bsag cing blo rgyud dang 'gre nges par bya/__sems can thams cad bde ba dang sogs tshad med bzhi bsgom/__de nas spos btul thal mo sbyar la 'dun pa rtse gcig pas/__ma lus sems can kun gyi mgon gyur cing /__/bdud sde dpung bcas mi bzad 'joms mdzad lha/__/dngos rnams ma lus ji bzhin mkhyen gyur pa'i/__/bcom ldan 'khor bcas gnas 'dir gshegs su gsol/__/zhes sam spro na tshigs bcad tshang bas spyan drangs te/__bcom ldan 'das dpal rgyal ba shAkya thub pa sangs rgyas dang byang chub sems dpa' nyan thos kyi dge 'dun dang bcas pa'i tshogs rnams sangs rgyas kyi rdzu 'phrul chen pos gshegs te mdun gyi rten dang dbyer med du bzhugs pa ni/__seng ges bteg pa'i rin po che'i khri pad+ma dang zla ba'i gdan bkod pa phul du byung ba'i dbus su ston pa bcom ldan 'das sku mdog gser btso ma ltar 'bar ba/__zhal gcig phyag gnyis g.yas sa gnon dang g.yon mnyam gzhag gi phyag rgya mdzad pa/__na bza' chos gos rnam gsum ngur smig tu gsol ba sku mtshan dang dpe byad 'bar ba/__gsung dbyangs yan lag drug cu dang ldan pa/__thugs ting nge 'dzin sgo du ma la snyoms par 'jug cing ldang ba/__'khor sangs rgyas dang byang chub sems dpa' nyan thos dgra bcom pa'i tshogs kyis bskor te 'od kyi phung po'i klong na mngon sum bzhin du bzhugs par gyur ces brjod cing gsal gdab/__yan lag bdun pa'i cho ga rgyas pa gzhan nas 'byung ba ltar ram/__bzang spyod nas 'byung ba'i tshigs su bcad pa tsam gyis kyang rung ste phyag mang du btsal/__spyod 'jug ltar sems bskyed kyi sdom pa blang /__de nas sku gzugs kyi thugs kar tsan+dan dkar po'i chab gtsang mas dri'i thig le gsum bkod la smra ba bcad de/__oM bud+d+ha tsu ru ma tsu ru ke swA hA/__zhes pa'i sngags yi ge bcu gcig pa kho na bzla/__brgya phrag gam stong phrag re'i mtshams su/__bcom ldan 'das dpal rgyal ba shAkya thub pas bdag gang nas skyes par gyur pa dang /__gang du skye bar 'gyur ba rmi lam du gsal bar lung bstan du gsol zhes lan gsum la sogs pa ngag gam yid kyis gsol ba gdab cing me tog 'thor ba re bya/__de'i tshe dmigs pa ni/__sangs rgyas 'khor dang bcas pas rjes su dgongs te thugs ka dang smin mtshams nas 'od zer 'phros/__rang gi spyi bo nas zhugs lus kyi nang thams cad gang pas tshe 'khor ba thog ma med pa nas bsags pa'i sdig sgrib bag chags dang bcas pa sbyangs/__lus dag pa'i shel ltar byas/__sems dug gsum gyi dri ma dang bral te lung bstan pa'i snod du gyur par bsam/__thun 'jog pa na slar yang yan lag bdun pa phul te gsol ba gdab/__thun mtshams su'ang rnam g.yeng gi bya ba dang /__rnam par rtog pa mang po spangs te ltung ba bshags pa sogs dang bcas te phyag mang du btsal/__de lta bu'i rim pas 'bum phrag bzhi bzla bar bya'o/__/gnyis pa ni/__bsnyen pa grub nas cho ga gzhan sngar bzhin la/__nyal khar ru rta'i phye ma la/__oM mu tsi li swA hA/__oM mo ha ni swA hA/__oM dan+ta li swA hA/__zhes bzlas pas bdugs la lag g.yon pa'i sor mo rnams la'ang sngags nyi shu rtsa gcig bzlas pas btab ste/__sku dang 'dom gang las mi ring ba'i sar mgo byang /__kha nub/__rkang pa lhor bstan/__glo g.yas pa 'og tu phab ste seng ge'i nyal stabs dang /__dge ba'i sems kyis snang ba'i 'du shes dang bcas te nyal bas zhag gsum mam bdun gyi tho rangs tshun chad du lung ston pa'i rmi lam rnams 'byung bar 'gyur ro/__/des ma grub na bsnyen pa dang las sbyor ji skad bshad pa bzhin lan gsum du byas pas mtshams med lnga byas pa ma gtogs mi 'grub pa mi srid par gsungs so/__/gsum pa ni/__tho rangs kyi dus su sangs rgyas kyis dngos su gsungs pa'am/__dge slong la sogs pa'i gzugs gzhan gyis bshad pa'am/__gang nas skyes pa dang /__gang du skye bar 'gyur ba'i yul lam/__gzugs sam/__ming la sogs pas mtshon pa'am/__rmi lam du sngon dang /__ma 'ongs pa'i skye ba rjes su dran pa sogs gsal por byung na nam du'ang bslu ba med cing nges pa yin la/__brda rtags kyi sgo nas byung na dpyad shes par bya/__ngan song du skye ba'i mtshan ma byung na sdig ltung la bshags sdom dang bcas slar yang brtags pas mtho ris su skye ba'i mtshan ma 'byung ba dang /__mtho ris su skye ba'i mtshan ma byung na bsag sbyong spyi dang /__khyad par dag pa'i zhing sbyong ba'i ting nge 'dzin la goms pa lhur len pa dang /__rten byin can gyi mdun du smon lam rgya cher gdab cing /__bla ma dang dge 'dun gyi sde la'ang mthun 'gyur zhu ba sogs yid ches par bgyis te phyis brtags pas dag pa'i zhing du skye ba'i mtshan ma 'byung ba sogs rig pas dpyad la shes par bya zhing /__gzhan yang rang gzhan gyi legs nyes bde sdug kyang rmi lam gyi skabs su lung bstan pa'i brda rtags ci rigs pa 'byung srid pas/__rmi lam brtag pa'i thabs dang gtam rgyud sogs las ji ltar 'byung ba bzhin zhib mor gtan la 'bebs pa dang /__blang dor gyi gnas tshul bzhin du bgyis na phan bde'i dge legs kyi 'bras bu 'byin par gdon mi za'o/__/dri bral nor bu'i me long gis/__/rnam mang gzugs brgya mtshon pa ltar/__/rmi lam mtshan mas lung bstan tshul/__/'dis kyang gzhan la phan par shog__/ces pa'ang yig rnying gsal byed zhal shes dang bcas pa'i tshogs rnams phyogs gcig tu bsdebs te/__lag tu blang bde bar bya bral ba 'jam dbyangs mkhyen brtse'i dbang pos bris pa dge legs su gyur cig/__//sarba dA mang+galaM su shre yan+tu//___//__!

Footnotes

Other Information