DKR-KABUM-09-TA-013

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i thugs sgrub bar chad kun sel las/ rig 'dzin rdzu 'phrul mthu chen sgrub thabs
Location	dil mgo mkhyen brtse bka' 'bum Volume 9, Text 13, Pages 67-68 (Folios 1a1 to 2a6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. Bla ma'i thugs sgrub bar chad kun sel las rig 'dzin rdzu 'phrul mthu chen sgrub thabs. In Skyabs rje dil mgo mkhyen brtse rin po che'i bka' 'bum, Vol. 9: 67-68. Delhi: Shechen Publications, 1994.
Genre	Daily Practice - rgyun khyer  ·  Sadhanas - Evocation Ritual - sgrub thabs
Cycle	བླ་མའི་ཐུགས་སྒྲུབ་བར་ཆད་ཀུན་སེལ་ (bla ma'i thugs sgrub bar chad kun sel)
Deity	rdzu 'phrul mthu chen
Colophon	།ཞེས་པའང་མངྒ་ལས་སོ། །དགེའོ།།
	/zhes pa'ang mang+ga las so/_/dge'o//

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་ལས། རིག་འཛིན་རྫུ་འཕྲུལ་མཐུ་ཆེན་སྒྲུབ་ཐབས་བཞུགས་སོ། །ན་མོ་གུ་རུ་ཀྲོ་དྷ་ཡ། རིག་འཛིན་རྫུ་འཕྲུལ་མཐུ་ཆེན་གྱི་བསྐྱེད་བཟླས་ཉམས་སུ་ལེན་པར་འདོད་པས། ཐོག་མར་སྐྱབས་སེམས་ནི། ན་མོཿ རིགས་ཀུན་ཁྱབ་བདག་བླ་མ་རྗེ༔ དངོས་གྲུབ་འབྱུང་གནས་ཡི་དམ་ལྷ༔ བར་ཆད་ཀུན་སེལ་མཁའ་འགྲོ་མ༔ རྩ་བ་གསུམ་ལ་སྐྱབས་སུ་མཆི༔ ལན་གསུམ། ཧཱུྃ༔ ཞི་བའི་ཐབས་ཀྱིས་མི་འདུལ་བའི༔ དམ་སྲི་གདུག་པ་ཚར་གཅོད་ཕྱིར༔ ཡེ་ཤེས་ཧཱུྃ་ལྔའི་སྐུར་སྣང་བ༔ འཆོལ་བའི་ཁྲོ་རྒྱལ་བསྒོམ་པར་བྱ༔ ལན་གསུམ་དངོས་གཞི་བསྐྱེད་བཟླས་ནི། ཧཱུྃ་ཧཱུྃ་ཧཱུྃ༔ ཀ་དག་དེ་བཞིན་ཉིད་ཀྱི་དབྱིངས༔ ལྷུན་གྲུབ་ཀུན་སྣང་སྙིང་རྗེའི་སྤྲིན༔ ཟུང་འཇུག་ཧཱུྃ་གི་ཡི་གེར་ཤར༔ དེ་ལས་རྡོ་རྗེའི་སྒྲ་བསྒྲགས་པས༔ གདུག་པ་ཅན་རྣམས་བསྔངས་ཤིང་འདར༔ སྣོད་བཅུད་ཐམས་ཅད་ཤིག་ཤིག་བརྡེག༔ སྣང་སྲིད་དངོས་འཛིན་དབྱིངས་སུ་སྦྱངས༔ ཁམས་གསུམ་ཨེ་ཡི་དབྱིངས་ཉིད་དུ༔ བདག་ཉིད་པདྨ་ཐོད་ཕྲེང་རྩལ༔ འཆོལ་བའི་ཁྲོ་རྒྱལ་ཆེན་པོའི་སྐུ༔ མཐུ་དང་རྫུ་འཕྲུལ་སྟོབས་པོ་ཆེ༔ དཔལ་ཆེན་རྡོ་རྗེ་གྲོ་བོ་ལོད༔ དམར་སྨུག་ཞལ་གཅིག་ཕྱག་གཉིས་པ༔ ཁྲོ་གཉེར་སྤྱན་གསུམ་མཆེ་བ་གཙིགས༔ སྨར་སྨིན་འབར་ཞིང་ཨཾ་བརྩིགས་བསྡམས༔ རབ་བྱུང་ཆ་ལུགས་རུས་རྒྱན་འཕྱང༔ མི་མགོའི་ཕྲེང་བ་ག་ཤལ་བྱས༔ ཕྱག་གཡས་རྡོ་རྗེ་ནམ་མཁར་གསོར༔ གཡོན་པས་ཕུར་པ་བགེགས་ལ་གཟིར༔ ཞབས་ཟུང་གྱད་ཀྱི་དོར་སྟབས་ཀྱིས༔ པད་ཉིད་དྲེགས་པ་གཏུམ་པོ་དང༔ སྟག་ཆེན་གྲུས་མའི་སྟེང་དུ་འགྱིང༔ སྐུ་ལས་བསྐལ་པའི་མེ་ཆེན་འབར༔ རབ་འབྱམས་ཁྲོ་བོའི་ཚྭ་ཚྭ་འཕྲོ༔ གསུང་གིས་དྲག་སྔགས་ཧཱུྃ་སྒྲ་སྒྲོགས༔ དྲེགས་པ་སྡེ་བརྒྱད་ལས་ལ་བཀོལ༔ ཐུགས་ནི་ཀ་དག་གཏིང་གསལ་ངང༔ མ་བཅོས་རིག་པ་ཟང་ཐལ་ཤར༔ ཡོན་ཏན་ཕྲིན་ལས་བསམ་མི་ཁྱབ༔ མི་ཟད་རྒྱན་གྱི་འཁོར་ལོར་རྫོགས༔ རང་ལུས་གདོད་ནས་དམ་ཚིག་པར༔ རང་སེམས་གཉུག་མ་ཡེ་ཤེས་ལྷ༔ འདུ་འབྲལ་མེད་པར་རོ་གཅིག་པའི༔ ཐུགས་ཀར་པདྨ་ཉི་མའི་སྟེང༔ གནམ་ལྕགས་རྡོ་རྗེའི་ལྟེ་བར་ཧཱུྃ༔ དེ་མཐར་སྔགས་ཀྱི་ཕྲེང་བས་བསྐོར༔ འོད་གསལ་ཧཱུྃ་ལྔའི་སྣང་གླུ་ཡིས༔ ཕྱོགས་དུས་རྒྱལ་བ་སྲས་བཅས་མཆོད༔ སྡེ་བརྒྱད་འབྱུང་པོ་ལས་ལ་གཟིར༔ སྲིད་གསུམ་བརྟན་གཡོའི་སྣང་ཆ་ཀུན༔ ཐམས་ཅད་མ་བཅོས་རྩ་བའི་ལྷ༔ འཆོལ་བའི་ཁྲོ་རྒྱལ་ཆེན་པོར་བཞེངས༔ སྒྲ་གྲགས་ཧཱུྃ་གི་རང་སྒྲ་དང༔ དྲན་རྟོག་ཀ་དག་སྤྲོས་བྲལ་དབྱིངས༔ རིག་པ་ཡེ་ཤེས་ཐིག་ལེར་འཁྱིལ༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ བསྙེན་པའི་སྲོག་ཡིག་འབྲུ་གཅིག་པ༔ བར་མེད་ལྔ་སྦྲེལ་རྟག་ཏུ་བཟླ༔ དེ་ནས་སྒྲུབ་པའི་གསང་སྔགས་ནི༔ རིག་འཛིན་རྫུ་འཕྲུལ་མཐུ་ཆེན་ཐུགས་ཀ་རུ༔ ཉི་སྟེང་ཧཱུྃ་མཐར་སྔགས་ཀྱི་ཕྲེང་བས་བསྐོར༔ འོད་ཟེར་མེ་ཕུང་འབར་བ་ཕྱོགས་བཅུར་འཕྲོས༔ ཧཱུྃ་གི་སྒྲ་དབྱངས་སྲིད་གསུམ་ཁྱབ་པར་བསྒྲགས༔ དམ་སྲི་འབྱུང་པོའི་ཚོགས་ཀུན་ཐལ་བར་བརླགས༔ བར་ཆད་བདུད་ཚོགས་ཀ་དག་དབྱིངས་སུ་བསྒྲལ༔ ཚུར་འདུས་བདག་ཐིམ་རིག་རྩལ་རྒྱས་པར་བསམ༔ ཨོཾ་ཨཱཿཧཱུྃ་བཛྲ་གུ་རུ་རྡོ་རྗེ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ༔ འབུམ་ཕྲག་བདུན་གྱིས་དངོས་གྲུབ་ཐོབ༔ དབྱངས་གསལ་རྟེན་སྙིང་མཐར། ཧཱུྃ་ཧཱུྃ་ཧཱུྃ༔ ཕཊ྄་ཕཊ྄་ཕཊ྄༔ ཀྱིས་བསྡུ་ལྡང་བྱ། དགེ་བ་འདི་ཡི་མྱུར་དུ་བདག །འཆོལ་བའི་ཁྲོ་རྒྱལ་འགྲུབ་གྱུར་ནས། །སོགས་ཀྱི་བསྔོ་བ་དང༌། ཤིས་པ་བརྗོད་པས་དགེ་ལེགས་སུ་བྱའོ། །ཞེས་པའང་མངྒ་ལས་སོ། །དགེའོ།། །།

[edit]

@#/__/bla ma'i thugs sgrub bar chad kun sel las/_rig 'dzin rdzu 'phrul mthu chen sgrub thabs bzhugs so/_/na mo gu ru kro d+ha ya/_rig 'dzin rdzu 'phrul mthu chen gyi bskyed bzlas nyams su len par 'dod pas/_thog mar skyabs sems ni/_na moH_rigs kun khyab bdag bla ma rje:_dngos grub 'byung gnas yi dam lha:_bar chad kun sel mkha' 'gro ma:_rtsa ba gsum la skyabs su mchi:_lan gsum/_hU~M:_zhi ba'i thabs kyis mi 'dul ba'i:_dam sri gdug pa tshar gcod phyir:_ye shes hU~M lnga'i skur snang ba:_'chol ba'i khro rgyal bsgom par bya:_lan gsum dngos gzhi bskyed bzlas ni/_hU~M hU~M hU~M:_ka dag de bzhin nyid kyi dbyings:_lhun grub kun snang snying rje'i sprin:_zung 'jug hU~M gi yi ger shar:_de las rdo rje'i sgra bsgrags pas:_gdug pa can rnams bsngangs shing 'dar:_snod bcud thams cad shig shig brdeg:_snang srid dngos 'dzin dbyings su sbyangs:_khams gsum e yi dbyings nyid du:_bdag nyid pad+ma thod phreng rtsal:_'chol ba'i khro rgyal chen po'i sku:_mthu dang rdzu 'phrul stobs po che:_dpal chen rdo rje gro bo lod:_dmar smug zhal gcig phyag gnyis pa:_khro gnyer spyan gsum mche ba gtsigs:_smar smin 'bar zhing aM brtsigs bsdams:_rab byung cha lugs rus rgyan 'phyang:_mi mgo'i phreng ba ga shal byas:_phyag g.yas rdo rje nam mkhar gsor:_g.yon pas phur pa bgegs la gzir:_zhabs zung gyad kyi dor stabs kyis:_pad nyid dregs pa gtum po dang:_stag chen grus ma'i steng du 'gying:_sku las bskal pa'i me chen 'bar:_rab 'byams khro bo'i tshwa tshwa 'phro:_gsung gis drag sngags hU~M sgra sgrogs:_dregs pa sde brgyad las la bkol:_thugs ni ka dag gting gsal ngang:_ma bcos rig pa zang thal shar:_yon tan phrin las bsam mi khyab:_mi zad rgyan gyi 'khor lor rdzogs:_rang lus gdod nas dam tshig par:_rang sems gnyug ma ye shes lha:_'du 'bral med par ro gcig pa'i:_thugs kar pad+ma nyi ma'i steng:_gnam lcags rdo rje'i lte bar hU~M:_de mthar sngags kyi phreng bas bskor:_'od gsal hU~M lnga'i snang glu yis:_phyogs dus rgyal ba sras bcas mchod:_sde brgyad 'byung po las la gzir:_srid gsum brtan g.yo'i snang cha kun:_thams cad ma bcos rtsa ba'i lha:_'chol ba'i khro rgyal chen por bzhengs:_sgra grags hU~M gi rang sgra dang:_dran rtog ka dag spros bral dbyings:_rig pa ye shes thig ler 'khyil:_hU~M hU~M hU~M hU~M hU~M:_bsnyen pa'i srog yig 'bru gcig pa:_bar med lnga sbrel rtag tu bzla:_de nas sgrub pa'i gsang sngags ni:_rig 'dzin rdzu 'phrul mthu chen thugs ka ru:_nyi steng hU~M mthar sngags kyi phreng bas bskor:_'od zer me phung 'bar ba phyogs bcur 'phros:_hU~M gi sgra dbyangs srid gsum khyab par bsgrags:_dam sri 'byung po'i tshogs kun thal bar brlags:_bar chad bdud tshogs ka dag dbyings su bsgral:_tshur 'dus bdag thim rig rtsal rgyas par bsam:_oM AHhU~M badz+ra gu ru rdo rje gro bo lod lo ka sarba sid+d+hi hU~M:_'bum phrag bdun gyis dngos grub thob:_dbyangs gsal rten snying mthar/_hU~M hU~M hU~M:_phaTa? phaTa? phaTa?:_kyis bsdu ldang bya/_dge ba 'di yi myur du bdag_/'chol ba'i khro rgyal 'grub gyur nas/_/sogs kyi bsngo ba dang*/_shis pa brjod pas dge legs su bya'o/_/zhes pa'ang mang+ga las so/_/dge'o//__//