DKR-KABUM-20-WA-005

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 20, Text 5, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	གཉགས་ཛྙཱ་ན་ཀུ་མཱ་ར་ (gnyags dz+nyA na ku mA ra)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 20: . Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	སྙན་བརྒྱུད་སྙིང་གི་གསང་མཛོད་ (snyan brgyud snying gi gsang mdzod)
Deity	rdo rje sems dpa'

Tibetan Text

Wylie

[edit]

༄༅། །སྙན་བརྒྱུད་སྙིང་གི་གསང་མཛོད་ལས། ཡི་དམ་ཞི་བ་རྡོ་རྗེ་སེམས་དཔའི་ཕྱི་ནང་གསང་བ་ཡང་གསང་བཀའ་སྲུང་དང་བཅས་པའི་དབང་གི་རིམ་པ་དཀྱུས་གཅིག་ཏུ་བཀོད་པ་རྡོ་རྗེའི་ཡེ་ཤེས་མཆོག་སྦྱིན་ཞེས་བྱ་བ་བཞུགས་སོ།།

༄༅། །རྨད་བྱུང་རྡོ་རྗེ་བཞི་ཡི་ཡེ་ཤེས་ཆར། །སྐལ་བཟང་རིགས་བཞིའི་ས་བོན་ལ་རེག་པས། །རྣམ་བཞིའི་རིག་འཛིན་བདེ་མྱུར་འབྲས་སྨིན་ནས། །སྐུ་བཞིའི་མཆོག་སྦྱིན་སེམས་དཔའ་རྒྱལ་གྱུར་ཅིག །རྡོ་རྗེ་ཐེག་པའི་ལམ་གྱི་སྙིང༌། །རིག་འཛིན་གྲུབ་པའི་གཤེགས་ཤུལ་ཆེ། །རིམ་པ་དབང་གི་ཐབས་ཟབ་མོ། །འཇུག་བདེའི་ཁྲིགས་སུ་བསྡེབ་ལ་སྤྲོ། །གཉགས་ལུགས་རྡོ་རྗེ་ཕུར་པའི་ཡི་དམ་ཞི་བའི་སྒྲུབ་ཐབས་རྡོ་རྗེ་སེམས་དཔའ་ཡེ་ཤེས་གསང་ཐིག་གི་དབང་བསྐུར་འབོག་ཚུལ་ལ་ལྔ་ལས། དང་པོ་ཕྱི་སྒྲུབ་ཀྱི་དབང་གི་རིམ་པ་ལ་མདུན་དུ་སྟེགས་གཙང་མར་རྡུལ་ཚོན་ནམ་རས་བྲིས་ཀྱི་པདྨ་འདབ་བརྒྱད་ཀྱི་དབུས་སུ་རྣམ་རྒྱལ་བུམ་པ་ཉེར་ལྔའི་བཅུད་ལྡན་ཁ་རྒྱན་གཟུངས་རྡོར་དང་བཅས་པ། གཡས་སུ་ནོར་བུའི་ཅོད་པན། གཡོན་དུ་སྟོད་གཡོགས་སྨད་གཡོགས་དར་དཔྱངས་དང་བཅས་པ་དངོས་སམ་རི་མོར་བྲིས་པ། རྫས་རྟགས་རྒྱལ་སྲིད་ཀྱི་ཙཀླི། དེ་རྣམས་ལ་ཉེར་སྤྱོད་བདུན་གཡས་སུ་བསྐོར་བཤམས་བྱས་པ་དང༌། སློབ་དཔོན་གྱི་མདུན་དུ་བསང་ཆུ་རྡོར་དྲིལ་སོགས་འདུ་བྱས་ལ། སྒྲུབ་ཐབས་དཀྱུས་ལྟར་སྐྱབས་སེམས་ནས་བརྩམས་ཡིག་བརྒྱའི་བཟླས་པའི་བར་བྱ། བུམ་བཟླས་ནི། ཧཱུྃ༔ རྣམ་རྒྱལ་བུམ་ནང་བདུད་རྩིའི་སྟེང༔ ཡི་གེ་བརྒྱ་པའི་སྔགས་ཕྲེང་གསལ༔ དེ་ལས་བདུད་རྩིའི་རྒྱུན་བབས་པས༔ བུམ་པ་ཡོངས་སུ་གང་བར་གྱུར༔ ཞེས་གསལ་བཏབ། གཟུངས་ཐག་བླང་ལ་བུམ་བཟླས་བྱས་མཐར། སྔགས་ཕྲེང་འོད་ཞུ་བདུད་རྩིར་གྱུར༔ ཞེས་དམིགས། བསང་ཆུ་རྡོ་རྗེའི་སྔགས་ཀྱི་རང་བཞིན་དུ་གྱུར༔ ཨོཾ་ཨ་མྲྀ་ཏེ་ཧཱུྃ་ཕཊ྄༔ ཅི་ནུས་བཟླས་མཐར། སྒྲུབ་ཐབས་གཞུང་གི ཨོཾ༔ བླ་མ་དཔལ་ལྡན་སོགས་ནས། སྡིག་ལྟུང་དག་པའི་གནང་བ་བསྩལ༔ ཅེས་པའི་བར་དང༌། ཡིག་བརྒྱ་ཚར་གཅིག་བཟླ། སྤྱི་བོར་བཞུགས་པའི་བླ་མ་རྡོ་རྗེ་སེམས་དཔའི་གནས་གསུམ་ལས་འོད་ཟེར་དཀར་དམར་མཐིང་གསུམ་རིམ་དང་གཅིག་ཅར་དུ་བྱུང་བ་རང་གི་གནས་གསུམ་དུ་རིམ་དང་གཅིག་ཅར་དུ་ཐིམ། དབང་དང་བྱིན་རླབས་དངོས་གྲུབ་ཐམས་ཅད་ཐོབ། སྒོ་གསུམ་སྐུ་གསུང་ཐུགས་རྡོ་རྗེ་བདེ་བ་ཆེན་པོའི་ངོ་བོར་གཉིས་སུ་མེད་པར་བྱིན་གྱིས་བརླབ་པར་གྱུར། ཅེས་དབང་ལེན་བྱ། དེ་ནས་སྨིན་པར་འོས་པའི་སློབ་མ་མདུན་དུ་བོས་ལ། དྲི་བཟང་གི་ཆབ་ཀྱིས་ཁ་བཤལ་བ་དང་གཙང་མའི་སྟན་ལ་འཁོད་དེ། ནམ་མཁའ་དང་མཉམ་པའི་སེམས་ཅན་ཐམས་ཅད་རིགས་ཀུན་ཁྱབ་བདག་བཅོམ་ལྡན་འདས་དཔལ་རྡོ་རྗེ་སེམས་དཔའི་གོ་འཕང་ལ་དགོད་པར་བྱ། དེའི་ཆེད་དུ་བྱིན་རླབས་དབང་བསྐུར་ཟབ་མོ་གསན་ལ་ཉམས་སུ་ལེན་པར་བགྱིའོ་སྙམ་པའི་ཐུགས་བསྐྱེད་པ་གསལ་བཏབ་ནས་གསན་འཚལ། དེའང་སྔགས་དང༌། རྒྱུད་དང༌། དཀྱིལ་འཁོར་མ་ལུས་པའི་འབྱུང་གནས། རིགས་ཐམས་ཅད་ཀྱི་ཁྱབ་བདག་བཅོམ་ལྡན་འདས་དཔལ་རྡོ་རྗེ་སེམས་དཔའ་ནི་མཚན་ཐོས་པ་ཙམ་གྱིས་རྒྱུ་ཉམས་ཆག་སྡིག་ལྟུང༌། འབྲས་བུ་འཁོར་བ་དང་ངན་སོང་ཐམས་ཅད་དོང་ནས་སྤྲུགས་པར་འགྱུར་བ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་རྒྱུད་ལས། འདི་ན་མཚམས་མེད་པ་བྱས་པ་དང༌། དེ་བཞིན་གཤེགས་པ་ཐམས་ཅད་བསླུས་པ་དང༌། དམ་པའི་ཆོས་ལ་སྨོད་པ་དང༌། ཉེས་པ་ཐམས་ཅད་བྱས་པ་ཡང༌། །དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་མཆོག་ནི་སྒྲུབ་པ་པོས། །རྡོ་རྗེ་སེམས་དཔའ་དྲན་གྱུར་པས། །ཚེ་འདི་ཉིད་ལ་ཇི་ལྟར་འདོད་པའི་དངོས་གྲུབ་ཐམས་ཅད་དམ། དངོས་གྲུབ་དམ་པའམ། རྡོ་རྗེ་སེམས་དཔའི་དངོས་གྲུབ་བམ། དེ་བཞིན་གཤེགས་པའི་དངོས་གྲུབ་ཀྱི་བར་དུ་འཐོབ་བོ། །ཞེས་འབྱུང་ངོ༌། །དེའི་སྒྲུབ་ཐབས་ཀྱང་དམ་པ་རིགས་བརྒྱ། དེ་ཉིད་རིགས་ལྔ། དཔའ་བོ་གཅིག་པ་སོགས་དཀྱིལ་འཁོར་དང་ཚོམ་བུ་གཙོ་རྐྱང་རྒྱས་བསྡུས་ཀྱི་བྱེ་བྲག་དང༌། རྒྱུད་སྡེ་བཞི་དང་འབྲེལ་བའི་སྒྲུབ་ཚུལ་གྱི་རྣམ་བཞག་དང༌། བཀའ་གཏེར་དག་སྣང་གི་རིམ་པ་མཐའ་ཀླས་པ་ལས། སྐབས་སུ་བབ་པ་འདི་ནི་པཎ་གྲུབ་ལྔ་བརྒྱའི་གཙུག་རྒྱན་སློབ་དཔོན་བི་མ་མི་ཏྲ་དང༌། དཔལ་ཨོ་རྒྱན་ཆོས་ཀྱི་རྒྱལ་པོའི་བཀའ་སྲོལ་ཟུང་འཇུག་གསང་སྔགས་ཆུ་བོ་བཞིའི་བཀའ་བབ་གཉགས་ལོ་ཆེན་པོ་ཛྙཱ་ན་ཀུ་མཱ་ར་ལ་བཀའ་བབ་པའི་རྡོ་རྗེ་ཕུར་པའི་སྒྲུབ་སྡེའི་ཡི་དམ་ཞི་བ་རྡོ་རྗེ་སེམས་དཔའི་སྒྲུབ་ཐབས་ཡེ་ཤེས་གསང་ཐིག་གི་ཆོས་སྡེ་སྟེ། འདི་ལའང་ཕྱི་ནང་གསང་བ་ཡང་གསང་དང་བཅས་པའི་སྒྲུབ་ཐབས་དང༌། དེ་རྣམས་དང་འབྲེལ་བའི་སྨིན་བྱེད་དབང་གི་རིམ་པའང་བཞི་དང་བཀའ་སྲུང་གི་རྗེས་གནང་བཅས་ལྔ་ཡོད་པ་ལས། ཐོག་མར་ཕྱི་སྒྲུབ་རྡོ་རྗེ་སེམས་དཔའ་བླ་མའི་རྣལ་འབྱོར་དང་ཟུང་དུ་འཇུག་པའི་བསགས་སྦྱོང་སྙིང་པོར་གྱུར་པའི་སྒྲུབ་ཐབས་དང་འབྲེལ་བའི་དབང་བསྐུར་བསྒྲུབ་པ་ལ་ཐོག་མར་མཎྜལ་ཕུལ། བླ་མ་དང་རྡོ་རྗེ་སེམས་དཔའ་དབྱེར་མེད་པ་ལ་མི་ཕྱེད་གུས་པས་ཐལ་མོ་མེ་ཏོག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །རྒྱུད་དག་པར་བྱ་བའི་ཕྱིར་བླ་མ་རྡོ་རྗེ་སེམས་དཔའ་དཀོན་མཆོག་རྩ་གསུམ་རྒྱ་མཚོའི་འཁོར་དང་བཅས་པ་མདུན་གྱི་ནམ་མཁར་མངོན་སུམ་བཞིན་དུ་བཞུགས་པའི་སྤྱན་སྔར་སྐྱབས་སེམས་བསགས་སྦྱོང་གི་དམིགས་རྣམ་དང་མ་བྲལ་བས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ། སྤྱི་བོར་བཞུགས་པའི་བླ་མ་རྡོ་རྗེ་སེམས་དཔའི་ཐུགས་ཀ་ནས་རིག་པའི་ལྷ་མོས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ཏེ་ཁྲུས་མཛད་པས་ལུས་ངག་ཡིད་གསུམ་གྱི་སྡིག་སྒྲིབ་བག་ཆགས་ནད་གདོན་ཐམས་ཅད་བྱང་ཞིང་དག །བླ་མ་རྡོ་རྗེ་སེམས་དཔའི་བྱིན་རླབས་མ་ལུས་པ་རྒྱུད་ལ་ཞུགས་པའི་མོས་པ་མཛོད། ཨོཾ༔ བཀྲ་ཤིས་དགེ་བའི་བུམ་པ་རུ༔ ཡེ་ཤེས་བདུད་རྩི་ཆེན་པོས་གཏམས༔ སྐལ་ལྡན་སློབ་མར་ཁྲུས་བགྱིས་པས༔ དྲི་མ་ཐམས་ཅད་དག་པར་མཛོད༔ ཡིག་བརྒྱའི་མཐར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ༔ ཞེས་བུམ་པས་དབང་བསྐུར་ཞིང་ཁྲུས་བྱ། བུམ་ཆུ་སྦྱིན། དེ་ལྟར་དབང་བསྐུར་བས་ལུས་ཐ་མལ་གྱི་སྣང་ཞེན་སྦྱངས་ཏེ་ཁྱེད་རང་རྣམས་སྐད་ཅིག་གི་བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཞི་ཞིང་འཛུམ་ལ་སྒེག་པའི་ཉམས་ཅན་ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་གཏོད་ཅིང༌། གཡོན་པས་དྲིལ་བུ་དཀུ་ལ་བརྟེན་པ་ཞབས་གཉིས་སེམས་དཔའི་སྐྱིལ་ཀྲུང་གིས་པདྨ་དང་ཟླ་བའི་གདན་ལ་འགྱིང་བ། སྐུ་ལ་དར་གྱི་ཆས་གོས་ལྔ་དང་རིན་པོ་ཆེའི་རྒྱན་ཆས་བཅུ་གསུམ་གྱིས་མཛེས་པར་སྤྲས་པ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ཡེ་ཤེས་རྣམ་པ་ཐམས་ཅད་པ་དང་གཉིས་སུ་མེད་པའི་དཀྱིལ་འཁོར་རབ་འབྱམས་སྤྲོ་བསྡུའི་བྱེད་པོ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་སྐུ་རུ་རྣམ་པར་དག་པར་མོས་མཛོད། གཉིས་པ་གསུང་བཟླས་པའི་ལུང་སྦྱིན་པ་ནི། སློབ་མ་རྣམས་ཀྱིས་མེ་ཏོག་གི་ཕྲེང་བ་རེ་ལྷག་པའི་ལྷ་ལ་ཕུལ་བའི་མོས་པས་མེ་ཏོག་འཐོར་བཞིན་དུ་འདིའི་རྗེས་ཟློས། བཅོམ་ལྡན་བདག་གིས་གཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཞེས་ལན་གསུམ་བྱའོ། །སྤྱི་བོའི་རྡོ་རྗེ་སེམས་དཔའི་ཐུགས་ཀར་ཟླ་བའི་སྟེང་དུ་ཧཱུྃ་ལ་ཡི་གེ་བརྒྱ་པའི་སྔགས་ཕྲེང་མུ་ཏིག་གི་རྡོག་མ་ལྟ་བུ་ལས་སྔགས་ཕྲེང་གཉིས་པ་བྱུང་ཞལ་ནས་ཐོན་ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་ཟླ་བ་ལ་གནས་པའི་ཧཱུྃ་མཐར་སྔགས་ཕྲེང་གཡས་བསྐོར་དུ་འཁོད་པས་གསུང་གི་བྱིན་རླབས་ཞུགས་པར་མོས་ལ་ཡི་གེ་བརྒྱ་པའི་སྔགས་འདིའི་རྗེས་ཟློས་ལན་གསུམ་མཛོད། ཨོཾ་བཛྲ་སཏྭ་ས་མ་ཡ༔ མ་ནུ་པ་ལ་ཡ༔ བཛྲ་སཏྭ་ཏྭེ་ནོ་པ༔ ཏིཥྛ་དྲྀ་ཌྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སུ་པོཥྱོ་མེ་བྷ་ཝ༔ སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲི་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝན་སརྦ་ཏ་ཐཱ་ག་ཏ་བཛྲ་མ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱ༔ ཨ་སུ་ནྲྀ་ཏྲི་པྲེ་དུཿསརྦ་པཱ་པཾ་ཀླེ་ཤ་ད་ཧ་ན་བྷསྨིཾ་ཀུ་རུ་སྭཱ་ཧཱཿལན་གསུམ། དེ་ཉིད་བརྟན་པར་བྱ་བའི་ཕྱིར་སྔགས་ཀྱི་ཕྲེང་བས་དབང་བསྐུར་བར་མོས་མཛོད། སྔགས་བྱང་ཐོགས་ལ། ཟབ་ཅིང་གསང་བ་རྡོ་རྗེའི་སྒྲ། །རྨད་བྱུང་སྔགས་ཀྱི་འཕྲུལ་ཆེན་པོས། །དོན་གཉིས་ཡིད་བཞིན་བྱེད་ནུས་པའི། །རྡོ་རྗེའི་སྔགས་ཀྱིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཝཱཀ་ཨ་བྷི་ཥིཉྩ་ཧཱུྃ། འཁོར་འདས་ཀྱི་སྒྲ་སྐད་ཐམས་ཅད་གྲགས་སྟོང་གཞོམ་མེད་གསུང་གི་འཁོར་ལོར་དག་པའི་དབང་ཐོབ་པའོ། །གསུམ་པ་ཐུགས་ཡེ་ཤེས་ཀྱི་དབང་ལ། ལྷ་སྔགས་ཀྱི་སྣང་ཆ་ཐམས་ཅད་འཛིན་མེད་ཁྱབ་བརྡལ་སྤྲོས་པ་དང་བྲལ་བའི་དབྱིངས་ཀྱི་ངང་དུ་མཉམ་པར་ཞོག་ཅིག །མེ་ལོང་བསྟན་ལ། ཧཱུྃ། ཆོས་ཀུན་དེ་ཉིད་ཀློང་ཡངས་ལས། །མ་འགག་ཐབས་ཀྱི་སྣང་བ་ཤར། །ཟུང་འཇུག་སྒྱུ་མའི་བརྡ་འདི་ཡིས། །སྤྲོས་བྲལ་ཐུགས་ཀྱི་དབང་ཐོབ་ཤོག །ཨོཾ་སརྦ་ཏ་ཐཱ་ག་ཏ་ཙིཏྟ་ཨ་བྷི་ཥིཉྩ་ཧཱུྃ། འཁོར་འདས་ཀྱི་རྟོགས་ཚོགས་ཐམས་ཅད་རིག་སྟོང་སྤྲོས་བྲལ་གཉིས་སུ་མེད་པའི་ཡེ་ཤེས་ཐུགས་ཀྱི་འཁོར་ལོར་དག་པའི་དབང་ཐོབ་པའོ། །དེ་ལྟར་ཕྱི་མཚན་མའི་དཀྱིལ་འཁོར་དུ་ཕན་པ་དང་ནུས་པའི་བུམ་པའི་དབང་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་སྒོམ་པ་ལ་དབང༌། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའོ། །གསུམ་པ་གསང་བ་ཟབ་མོའི་དབང་ལ་གསུམ་ལས། དང་པོ་གསང་བའི་དབང་གི་སླད་དུ། བླ་མ་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱི་ཐིག་ལེ་ལྕེ་ཐོག་ཏུ་བཞག་པར་མོས་མཛོད། ཧཱུྃ༔ བདེ་སྟོང་རོལ་པའི་བྱང་ཆུབ་སེམས༔ འདི་ནི་སངས་རྒྱས་ཐམས་ཅད་ཀྱི༔ གཉིས་མེད་མཉམ་པའི་ཡེ་ཤེས་རྒྱུན༔ གཙང་དམེ་མེད་པར་རོལ་བར་གྱིས༔ ཨ་ཧོ་མ་ཧཱ་སུ་ཁ་ཧོཿ ཞེས་བདུད་རྩི་མྱངས་པས་རྩ་ཐམས་ཅད་བདུད་རྩིས་གང༌། དུག་གསུམ་གྱི་རྣམ་རྟོག་འགགས། བདེ་བའི་ཡེ་ཤེས་སྐྱེས་པར་བསམ། དེ་ལྟར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་དྲི་མ་སྦྱངས། ལམ་རྩ་རླུང་སྒོམ་པ་ལ་དབང༌། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའོ། །གཉིས་པ་ཤེས་རབ་ཡེ་ཤེས་ཀྱི་དབང་གི་སླད་དུ། དཀྱིལ་འཁོར་པའི་ཐུགས་ཀ་ནས་རིག་མ་གཟུགས་དང་ལང་ཚོས་བརྒྱན་པ་བྱོན་ནས་རང་ལ་འཁྱུད་པར་མོས་ཤིག ཧཱུྃ༔ ཡེ་ཤེས་རྣམ་པ་ཐམས་ཅད་པ༔ དཔེ་ཡི་ཐབས་ཀྱིས་མངོན་བྱེད་པའི༔ བཅུ་དྲུག་དགའ་སྦྱིན་སྒྱུ་མ་ཆེ༔ སྒྱུ་མའི་རོལ་པས་སྤྱོད་ཅིག་བུ༔ ཨོཾ་ཨཱཿཧཱུྃ་པདྨ་བྷཉྫ་མོཀྵ་ཧོཿ ཞེས་རིག་ཙཀ་གཏད། དེ་དང་སྙོམས་པར་ཞུགས་པས་དགའ་བ་བཞིའི་ཡེ་ཤེས་ཉམས་སུ་མྱོང་བར་མོས་ལ་སྔགས་འདིའི་རྗེས་ཟློས་དང་བཅས་ཏེ་འཁྱུད་རྒྱ་བྱ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ལྟར་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་སྦྱངས། ལམ་ཐིག་ལེ་སྒོམ་པ་ལ་དབང༌། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་པའོ། །གསུམ་པ་དབང་བཞི་པའི་སླད་དུ་ཤེལ་དང་མེ་ལོང་གི་བརྡས་མཚོན་པའི་རང་བྱུང་གི་ཡེ་ཤེས་རིག་སྟོང་ཟུང་འཇུག་དེ་ཁོ་ན་ཉིད་ཀྱི་ངང་ལ་བློ་བཞག་ནས། ཤེལ་དང་མེ་ལོང་འཕྱར་ལ། ཧཱུྃ༔ སྟོང་གསལ་རིག་པ་ཡེ་ཤེས་སེམས༔ ཀུན་ཁྱབ་རྡོ་རྗེའི་ཁམས་ཆེན་པོ༔ རང་རིག་ཐིག་ལེ་གཉིས་མེད་པས༔ ཆོས་དབྱིངས་གནས་ལུགས་རྟོགས་པར་གྱིས༔ དྷརྨ་དྷཱ་ཏུ་ཨ་ཨ་ཨཿ དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་སྒོམ་པ་ལ་དབང༌། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའོ། །སླར་ཡང་བླ་མ་དང་དཀྱིལ་འཁོར་ལྷ་ཚོགས་ཕྱོགས་བཅུའི་རྒྱལ་བ་སྲས་དང་བཅས་པས་ཤིས་པ་བརྗོད་པའི་བདེན་ཚིག་གི་གླུ་དང་མེ་ཏོག་གི་ཆར་སིལ་མ་བསྙིལ་བས་དགེ་ལེགས་རྟག་བརྟན་གྱི་སྣང་བ་དམ་པས་ཕྱོགས་དུས་ཀུན་ཏུ་ཁྱབ་པར་མོས་མཛོད། ཧཱུྃ༔ རིག་འཛིན་བླ་མས་བྱིན་བརླབས་ནས༔ དགོངས་བརྒྱུད་རྟོགས་པའི་བཀྲ་ཤིས་ཤོག༔ ཡི་དམ་ལྷ་ཡིས་རྗེས་བཟུང་སྟེ༔ དངོས་གྲུབ་དབང་ཐོབ་བཀྲ་ཤིས་ཤོག༔ མཁའ་འགྲོ་ཆོས་སྐྱོང་ཕྲིན་ལས་ཀྱིས༔ ས་ལམ་མཐར་ཕྱིན་བཀྲ་ཤིས་ཤོག༔ འདོད་རྒུ་ལྷུན་གྱིས་གྲུབ་པ་ཡི༔ དགེ་ལེགས་རྟག་བརྟན་བཀྲ་ཤིས་ཤོག༔ དེ་དག་གིས་རྡོར་སེམས་རིགས་ལྔ་ཀུན་འདུས་ཀྱི་དཀྱིལ་འཁོར་དུ་དབང་བཞི་ཆིག་རྫོགས་སུ་གྲུབ་པ་ཡིན་པས། དེ་དག་གི་དམ་ཚིག་གནང་བཀག་གི་རིམ་པ་ལས་མི་འདའ་བར་བསྲུང་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང་གཏང་རག་གི་མཎྜལ་ལུས་འབུལ། དགེ་བསྔོ་བཅས་བྱས་ལ་སློབ་མ་གྲོལ། སློབ་དཔོན་གྱིས་ཚོགས་ལ་རོལ་ཞིང་ཕྲིན་ལས་གཞུང་གི་ལྷག་མ་ནས་བརྩམས་རྗེས་ཀྱི་ལས་རིམ་རྣམས་མཐའ་རྒྱས་སུ་བྱའོ། །ལྔ་པ་བཀའ་སྲུང་སྔགས་ཀྱི་སྲུང་མའི་རྗེས་གནང་བྱ་ཚུལ་ནི། རྡུལ་ཚོན་གྱི་ཆོས་འབྱུང་མཐིང་ག་མེ་རིས་བསྐོར་བའམ། མ་འབྱོར་ན་མཎྜལ་ལ་འབྲུ་ནག་གི་ཚོམ་བུ་གཅིག་བཀོད་པའི་སྟེང༌། མཉྫིར་ལྕགས་སམ་བྷནྡྷའི་སྣོད་དུ་དམར་གཏོར་གྲུ་གསུམ་རྒྱན་སྤྲོས་ཅན་གྱི་རྩེར་སྐུ་ཙཀ་དང་དར་གདུགས་ཀྱིས་སྤྲས་པར་ཤ་ཁྲག་མཐུན་རྫས་ཀྱིས་བརྒྱན་པ་དང༌། འབུལ་གཏོར། ཉེར་སྤྱོད། སྨན་རཀ་སོགས་ཀྱང་བཤམས། དབང་སྔ་མ་རྣམས་དང་མ་འབྲེལ་ན། བདག་གི་རྣལ་འབྱོར་མདོར་བསྡུས་སྔོན་དུ་འགྲོ་བས། སྲུང་མའི་ཕྲིན་ལས་དང་བཟླས་པ་ཅུང་ཟད་བྱས་ལ། མཆོད་བསྟོད་མདོར་བསྡུས་གྲུབ་རྗེས་གནང་བ་ཞུ། སློབ་མ་ཁྲུས་བྱ། བགེགས་བསྐྲད། སྲུང་འཁོར་བསྒོམས་ནས། དེ་ཡང་བླ་ན་མེད་པའི་བྱང་ཆུབ་བསྒྲུབ་པ་ལ་འགལ་རྐྱེན་སྲུང་བ་དང༌། མཐུན་རྐྱེན་སྒྲུབ་པའི་གྲོགས་རྡོ་རྗེ་ཐེག་པའི་ལུགས་ཀྱི་ཐུན་མོང་མ་ཡིན་པའི་དམ་ཅན་སྲུང་མ་ཁྱད་པར་ཅན་བརྟེན་པ་གལ་ཆེ། དེ་ལའང་ཡེ་ཤེས་དང༌། ལས་དང༌། འཇིག་རྟེན་གྱི་ཚུལ་འཛིན་པའི་ཆོས་སྐྱོང་རྒྱུད་གསུམ་དུ་གཏོགས་པ་དུ་མ་ཞིག་བཞུགས་པ་ལས་སྐབས་སུ་བབས་པ་འདི་ནི། གཞུང་ལས། འདི་ནི་དབྱིངས་ཀྱི་རྗེ་མོ་སྟེ༔ ཐུགས་རྗེ་རིག་རྩལ་མ་མོའི་གཙོ༔ ཨ་ཏིའི་བསྟན་སྲུང་རྒྱལ་མོ་སྟེ༔ ཉམས་རྟོགས་ས་ལམ་གྲོགས་སུ་བྱེད༔ བསྒྲུབ་པས་འདོད་པའི་ལས་སྒྲུབ་མ༔ རྣོ་མྱུར་ཟབ་ཁྱད་གཞན་ལས་འཕགས༔ ཀུན་མཐུན་ཀུན་ལས་ཁྱད་པར་ཆོས༔ ངོ་མཚར་གསང་བའི་སྲུང་མ་ཡི༔ མཆོད་བྱང་སྙིང་པོའི་ཡང་ཏིག་འདི༔ འོད་ཀྱི་ལུས་ཅན་བི་མ་ལས༔ སྔགས་སྲུང་ཁྲོས་མའི་རྒྱུད་ལས་བཏུས༔ ཟབ་ཆོས་མཆོག་གི་སྲུང་མ་རུ༔ གཏད་རྒྱས་བཏབ་བཞིན་སྣང་གྱུར་ཅིག༔ ཀུན་ལ་མ་སྤེལ་ཟབ་རྒྱ་ཐཾ༔ ཞེས་གསུངས་པ་ལྟར་ཆོས་དབྱིངས་སྟོང་པ་ཆེན་པོའི་ཀློང་ན་འཁོར་འདས་ཐམས་ཅད་ཀྱི་བསྐྱེད་གཞི་དཔལ་ཀུན་ཏུ་བཟང་མོ་བདེ་ཆེན་ཧེ་རུ་ཀཿདཔལ་གྱི་གསང་བའི་ཡུམ་གཅིག་གནམ་ཞལ་དབྱིངས་ཀྱི་དབང་ཕྱུག་མ། འཁོར་འདས་ཐམས་ཅད་མཁའ་ཀློང་དབྱིངས་གསུམ་དུ་འབྱེད་སྡུད་ཀྱི་བྱེད་པོ་མ་མོ་ཨེ་ཀ་ཛཱ་ཊི། སྟེང་ཕྱོགས་ལྷ་ཡི་ཡུལ་ན་དུས་གསུམ་རྒྱལ་བའི་བསྟན་པ་སྲུང་བའི་ལྷ་མོ་འདོད་ཁམས་དབང་ཕྱུག་མ་སོགས་མཚན་དང་སྐུ་ཡི་བཀོད་པ་བསམ་ལས་འདས་ཤིང༌། དེང་འདིར་དཔལ་རྡོ་རྗེ་སེམས་དཔའ་ཡེ་ཤེས་གསང་ཐིག་གི་བཀའ་ཡི་སྲུང་མར་བྱོན་པའི་སྔགས་སྲུང་ཨེ་ཀ་ཛཱ་ཊིའི་རྗེས་གནང་འབུལ་བའི་སྐབས་སུ་བབ་པས་དེ་ཉིད་ཞུ་བའི་དོན་དུ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། དོན་དམ་དབྱིངས་ནས་མ་གཡོས་ཀྱང༔ འགྲོ་བ་འདུལ་ཕྱིར་སྤྲུལ་པའི་སྐུ༔ དཔལ་ལྡན་སྔགས་ཀྱི་སྲུང་མ་ཡི༔ རྗེས་སུ་གནང་བ་བསྩལ་དུ་གསོལ༔ ལན་གསུམ། རྒྱུད་སྦྱང་བའི་སླད་དུ་རྒྱུན་བཤགས་ཡན་ལག་བརྒྱད་པ་འདིའི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། །སོགས་ལན་གསུམ། དེ་ནས་ཁྱེད་རང་རྣམས་གཉེན་པོ་སྟོབས་ཀྱི་ལྷ་དཔལ་ཆེན་པོའི་སྐུ་འདི་ལྟར་སྒོམས་མཛོད། ཨོཾ་མ་ཧཱ་ཤཱུ་ནྱ་ཏཱ་སོགས། སྟོང་པའི་ངང་ལས་པདྨ་དང་ཉི་མ་དྲེགས་པ་ཁྱོ་ཤུག་བསྣོལ་བའི་གདན་གྱི་སྟེང་དུ་ཧཱུྃ་ཡིག་མཐིང་ནག་ཡོངས་སུ་གྱུར་པ་ལས་ཁྱེད་རང་རྣམས་དཔལ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཉི་མ་འབུམ་གྱི་གཟི་བརྗིད་ཅན་ཞལ་གཅིག་ཕྱག་གཉིས་པ་ཁྲོ་གཏུམ་མི་བཟད་པའི་གཟུགས་ཅན། རྡོ་རྗེ་དང་དུང་ཁྲག་འཛིན་པ། རང་སྣང་གི་ཡུམ་དང་བཅས་པ་དཔལ་དང་དུར་ཁྲོད་དྲག་པོའི་ཆས་ཀྱིས་བརྒྱན་ཏེ། ཞབས་གཉིས་གྱད་ཆེན་པོའི་སྟབས་སུ་ཡེ་ཤེས་ཀྱི་མེ་དཔུང་འབར་བའི་ཀློང་ན་བཞུགས་པའི་གནས་གསུམ་གྱི་ཡི་གེ་ལས་བྱུང་བའི་འོད་ཟེར་གྱིས་དཔལ་ཆེན་པོའི་ཡེ་ཤེས་ཀྱི་འཁོར་ལོ་སྤྲིན་ཆར་དྲག་ཏུ་འབབ་པ་བཞིན་སྤྱན་དྲངས་ནས་སྒོ་གསུམ་ལ་སིབ་སིབ་ཐིམ་པར་མོས་མཛོད། རུ་ལུའི་མཐར། ཛྙཱ་ན་ཨ་བེ་ཤ་ཡ་བཏགས་པས་བྱིན་དབབ། ཏིཥྛ་བཛྲས་བརྟན་པར་བྱ། རྗེས་གནང་དངོས་ལ། དང་པོ་སྐུ་ཡི་རྗེས་སུ་གནང་བའི་སླད་དུ། མདུན་གྱི་གཏོར་མ་འདི་ཉིད་འདི་ལྟར་གསལ་ཐོབ་མཛོད། ཨེཿ ཆོས་དབྱིངས་མཐིང་ནག་སོགས་ནས་བསྟོད་པའི་བར་བཏང་ལ། གཏོར་མ་ཡེ་ཤེས་ཀྱི་མ་མོ་འཁོར་དང་བཅས་པར་གསལ་བའི་སྐུ་ལས་འོད་ཟེར་མེ་ལྕེའི་ཕྲེང་བ་ལྟ་བུ་དཔག་ཏུ་མེད་པ་བྱུང༌། ཁྱེད་རང་རྣམས་ཀྱི་དཔྲལ་བར་ཐིམ་པས་སྐུའི་བྱིན་རླབས་དང་དངོས་གྲུབ་ཐོགས་མེད་དུ་འགྲུབ་པར་མོས་མཛོད། གཏོར་མ་དཔྲལ་བར་བཞག་ལ། ཨོཾ་མ་མ་ཏྲག་རཀྴ་ཨེ་ཀ་ཛཱ་ཊི་བྷྱོ་ཧཱུྃ་ཛ་ཛཿ ཀཱ་ཡ་སརྦ་ཀརྨ་ཀུ་རུ་ཧོཿ སྤོས་རོལ་དང་བཅས་བྱིན་དབབ། གཉིས་པ་གསུང་གི་རྗེས་སུ་གནང་བའི་སླད་དུ། མདུན་བསྐྱེད་མ་མོའི་ཐུགས་ཀར་ཉི་མ་ལ་གནས་པའི་ཏྲཀ་ཡིག་གི་མཐར་གནས་པའི་སྔགས་ཕྲེང་ལས་ཡིག་འབྲུ་མེ་ཡི་ཟེགས་མ་ཅན་བར་མ་ཆད་དུ་དམར་ནར་གྱིས་བྱུང༌། ཞལ་ནས་ཐོན། བདག་ཉིད་ལྷར་གསལ་བའི་ལྟེ་བ་ནས་ཞུགས། གསུང་གི་བྱིན་རླབས་དང་དངོས་གྲུབ་ཐོགས་མེད་དུ་འགྲུབ་པར་མོས་མཛོད། གཏོར་མ་མགྲིན་པར་བཞག་ལ། ཨོཾ་མ་མ་ཏྲཀ་རཀྴ་ཨེ་ཀ་ཛཱ་ཊི་ཧཱུྃ་བྷྱོ་ཛ་ཛཿ ཝཱཀ་སརྦ་ཀརྨ་ཀུ་རུ་ཧོཿ སྤོས་རོལ་དང་བཅས་བྱིན་དབབ། གསུམ་པ་ཐུགས་ཀྱི་རྗེས་གནང་གི་སླད་དུ། མདུན་བསྐྱེད་མ་མོའི་ཐུགས་ཀ་ནས་ཏྲག་ཡིག་སྨུག་ནག་དང་ཙིཏྟ་འཕྲོས། རང་གི་སྙིང་གར་ཐིམ་པས་ཐུགས་ཀྱི་བྱིན་རླབས་དང་དངོས་གྲུབ་ཐོགས་མེད་དུ་འགྲུབ་པར་མོས་མཛོད། གཏོར་མ་སྙིང་གར་བཞག་ལ། ཨོཾ་མ་མ་ཏྲཀ་རཀྴ་ཨེ་ཀ་ཛཱ་ཊི་ཧཱུྃ་བྷྱོ་ཛ་ཛཿ ཙིཏྟ་སརྦ་ཀརྨ་ཀུ་རུ་ཧོཿ སྤོས་རོལ་དང་བཅས་བྱིན་དབབ། གཙོ་འཁོར་ཡོངས་རྫོགས་ཀྱི་བཀའ་གཏད་པའི་ཕྱིར། སློབ་དཔོན་དཔལ་ཆེན་པོའི་ང་རྒྱལ་ལ་གནས་པས་གཏོར་མ་མ་མོ་འཁོར་བཅས་གསལ་བ་ལ་ཐ་ཚིག་གཉན་པོ་བསྒྲགས་པས་མ་མོ་འཁོར་བཅས་དམ་ལ་འདུས་ཏེ། ཇི་ལྟར་འདོད་པའི་ཕྲིན་ལས་རབ་འབྱམས་ཐོགས་མེད་དུ་བསྒྲུབ་པར་མོས་མཛོད། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོར་སེམས་རིགས་ལྔ། སྤྲུལ་སྐུ་དགའ་རབ་རྡོ་རྗེ། སློབ་དཔོན་འཇམ་དཔལ་བཤེས་གཉེན། རིག་འཛིན་ཤྲཱི་སིངྷ། མཁས་པ་ཛྙཱ་ན་སུ་ཏྲ། པཎ་ཆེན་བི་མ་མི་ཏྲ། སློབ་དཔོན་རྡོ་རྗེ་ཧཱུྃ་མཛད། གུ་རུ་རྡོ་རྗེ་ཐོད་ཕྲེང་རྩལ། མངའ་བདག་ཁྲི་སྲོང་ལྡེའུ་བཙན། དགེ་སློང་ནམ་མཁའི་སྙིང་པོ། ལོ་ཆེན་བཻ་རོ་ཙ་ན། གཉགས་ཆེན་ཡེ་ཤེས་གཞོན་ནུ། མཁའ་འགྲོ་ཡེ་ཤེས་མཚོ་རྒྱལ། གཏེར་ཆེན་པདྨ་འོད་གསལ་མདོ་སྔགས་གླིང་པ། བཀའ་བབ་ཀློང་ཆེན་ནམ་མཁའ་འོད་གསལ། འཇམ་མགོན་ཆོས་ཀྱི་བློ་གྲོས་ལ་སོགས་པ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ཚིག་ལས་མ་འདའ་བར་དཔལ་ཡེ་ཤེས་ཀྱི་མ་མོ་སྨུག་ནག་ཁྲོས་མའི་རྒྱལ་མོ་སྔགས་སྲུང་ཨེ་ཀ་ཛཱ་ཊི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྤྲུལ་པའི་མ་མོ། ཡེ་ཤེས་ལས་དང་འཇིག་རྟེན་གྱི་མཁའ་འགྲོ་མ་འབུམ་ཕྲག་ཡངས་པའི་ཚོགས་དང་བཅས་པ་རྣམས་ལ་གཉེར་དུ་གཏད་པའི་རྡོ་རྗེའི་སློབ་མ་འདི་རྣམས་ལ་དུས་དེང་ནས་བྱང་ཆུབ་སྙིང་པོའི་བར་དུ་མི་འབྲལ་བར་ཉིན་གྱི་བྱ་ར། མཚན་གྱི་མེལ་ཚེས་རྟག་ཏུ་སྐྱོངས་ལ་འགལ་རྐྱེན་ཐམས་ཅད་སོལ། མཐུན་རྐྱེན་ཐམས་ཅད་སྤེལ། རྟེན་འབྲེལ་ལེགས་དགུར་སྒྲིགས། ཉམས་དང་རྟོགས་པ་སྤེལ། དངོས་གྲུབ་དང་ཕྲིན་ལས་སྒྲུབས། སངས་རྒྱས་ཀྱི་བསྟན་པ་སྲུངས། བསྟན་འཛིན་གྱི་སྐྱེས་བུ་སྤེལ། མདོར་ན་རང་གཞན་གྱི་དོན་གཉིས་འདོད་དགུའི་ཕྲིན་ལས་རབ་འབྱམས་ཡིད་བཞིན་དུ་འགྲུབ་པར་མཛོད་ཅིག །ས་མ་ཡ་རཀྵནྟུ་ཞེས་བརྗོད། བརྒྱུད་འཛིན་དང་དམ་ཚིག་ཐུབ་པ་ཡིན་ན་གཏོར་མ་བདུད་རྩིས་བཤལ་ལ་སྦྱིན། སྤྱི་ཙམ་དུ་གཏོར་མས་བཀའ་བསྒོས་པས་འཐུས། རྗེས་ཤིས་བརྗོད་དང༌། དམ་ཚིག་ཁས་བླང༌། གཏང་རག་ཡོན་འབུལ། དགེ་བསྔོ་སོགས་སྤྱི་ལྟར་བྱའོ། །བསྒྲུབ་བྱ་རྨད་བྱུང་ཁྱབ་བདག་རྡོ་རྗེ་སེམས། །ཕྱི་ནང་གསང་སོགས་སྒྲུབ་ཚུལ་སྙིང་པོའི་ལམ། །མཁས་གྲུབ་གོང་མའི་གསུང་གི་སྣང་བ་ལ། །བརྟེན་ནས་འཇུག་བདེའི་སྨིན་བྱེད་བཀླག་ཆོག་བཀྲལ། །བཀའ་གཏེར་གསེར་ཞུན་ལྟ་བུའི་ཟབ་ཆོས་ཀྱང༌། །ད་ནི་དབྱིངས་ཀྱི་ཐིག་ལེར་མནལ་ཉེ་ན། །བདག་ལྟའི་ངལ་བ་དོན་དུ་འགྱུར་དཀའ་ཡང༌། །བླ་མའི་བཀའ་དང་ལས་སྐལ་མཆོག་ལྡན་པའི། །དམ་པ་དུ་མས་གསུང་གི་དབྱུག་གུ་ཡིས། །ཡང་ཡང་བསྐུལ་ཕྱིར་བསམ་སྦྱོར་དག་ཁུལ་གྱིས། །བྲིས་འདིས་བསྟན་འགྲོའི་དགེ་མཚན་རྒྱས་པར་ཤོག །ཅེས་པའང་དཀྱིལ་འཁོར་རྒྱ་མཚོའི་ཁྱབ་བདག་དཔལ་ལྡན་རྡོ་རྗེ་སེམས་དངོས་འཇམ་མགོན་ཆོས་ཀྱི་རྒྱལ་པོ་པདྨ་ཡེ་ཤེས་རྡོ་རྗེས་གཏེར་གཞུང་དབང་གི་རྩ་བ་ཞལ་གསལ་མེད་སྟབས་འདི་ལྟར་བྲིས་ཞེས་དབང་ཆིངས་རྩ་ཐོ་བཅས་བཀའ་ཡི་གནང་བ་བསྩལ་ན་ཡང༌། སྙིགས་མའི་རྒུད་པ་སྣ་ཚོགས་ཀྱིས་ཡིད་གདུང་བས་གཡས་ཆུང་དུ་སོང་སྐབས་དད་བརྩོན་མོས་གུས་ཆེན་པོས་ཚུལ་འདིའི་བསྙེན་སྒྲུབ་ཉམས་བཞེས་རྒྱ་ཆེར་གནང་བ་སྙིང་པོའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེས་བསྐུལ་མ་སྔ་ཕྱིར་ནན་ཏན་དུ་བྱུང་བ་དང་བླ་མ་རཏྣ་རསྨི་ཡབ་སྲས། འཁྲུལ་ཞིག་རིན་པོ་ཆེ་འགྱུར་མེད་མདོ་སྔགས་བསྟན་འཛིན་སོགས་དམ་པ་དུ་མས་གསུང་བསྐུལ་བཟློག་ཏུ་མ་བཏུབ་པར་མདོ་ཁམས་ཤར་གྱི་དཱ་རི་དྲ་འགྱུར་མེད་ཐེག་མཆོག་བསྟན་པའི་རྒྱལ་མཚན་མདོ་སྔགས་གླིང་པར་སྒྲོ་བཏགས་ཀྱི་མིང་གིས་སྙན་པའི་ཟོག་པོ་དེས་རྟ་ཟླའི་དམར་ཕྱོགས་ཀྱི་ཚེས་ཉེར་གཅིག་འཇམ་མགོན་བླ་མའི་དུས་ཀྱི་མཆོད་པའི་ཚུལ་དུ་ཁ་བཞི་ལྷོ་ཡི་སྨན་ལྗོངས་ཀྱི་ལྟེ་བ་བདེ་ཆེན་ཆོས་གླིང་སུམ་རྩེན་ལྷ་ཡི་དགའ་ཚལ་དུ་གྲུབ་པར་བགྱིས་པ་འདིས་ཀྱང་གྲོང་ཁྱེར་གསུམ་གྱི་ཡིད་ཅན་ཐམས་ཅད་ཁྱབ་བདག་རྡོ་རྗེ་སེམས་དཔའི་གོ་འཕང་མངོན་དུ་བྱེད་པའི་རྒྱུར་གྱུར་ཅིག །མངྒ་ལཾ། དགེའོ།། །། ཆོས་ཀྱི་བདག་པོའི་བཀའ་བཞིན་པད་བཀོད་སྒམ་སྤྲུལ་པས་ཞུ་དག་གི་སྲི་ཞུ་བྱས་པའོ།། །།

[edit]

@#/__/snyan brgyud snying gi gsang mdzod las/_yi dam zhi ba rdo rje sems dpa'i phyi nang gsang ba yang gsang bka' srung dang bcas pa'i dbang gi rim pa dkyus gcig tu bkod pa rdo rje'i ye shes mchog sbyin zhes bya ba bzhugs so//

@#/__/rmad byung rdo rje bzhi yi ye shes char/_/skal bzang rigs bzhi'i sa bon la reg pas/_/rnam bzhi'i rig 'dzin bde myur 'bras smin nas/_/sku bzhi'i mchog sbyin sems dpa' rgyal gyur cig_/rdo rje theg pa'i lam gyi snying*/_/rig 'dzin grub pa'i gshegs shul che/_/rim pa dbang gi thabs zab mo/_/'jug bde'i khrigs su bsdeb la spro/_/gnyags lugs rdo rje phur pa'i yi dam zhi ba'i sgrub thabs rdo rje sems dpa' ye shes gsang thig gi dbang bskur 'bog tshul la lnga las/_dang po phyi sgrub kyi dbang gi rim pa la mdun du stegs gtsang mar rdul tshon nam ras bris kyi pad+ma 'dab brgyad kyi dbus su rnam rgyal bum pa nyer lnga'i bcud ldan kha rgyan gzungs rdor dang bcas pa/_g.yas su nor bu'i cod pan/_g.yon du stod g.yogs smad g.yogs dar dpyangs dang bcas pa dngos sam ri mor bris pa/_rdzas rtags rgyal srid kyi tsakli/_de rnams la nyer spyod bdun g.yas su bskor bshams byas pa dang*/_slob dpon gyi mdun du bsang chu rdor dril sogs 'du byas la/_sgrub thabs dkyus ltar skyabs sems nas brtsams yig brgya'i bzlas pa'i bar bya/_bum bzlas ni/_hU~M:_rnam rgyal bum nang bdud rtsi'i steng:_yi ge brgya pa'i sngags phreng gsal:_de las bdud rtsi'i rgyun babs pas:_bum pa yongs su gang bar gyur:_zhes gsal btab/_gzungs thag blang la bum bzlas byas mthar/_sngags phreng 'od zhu bdud rtsir gyur:_zhes dmigs/_bsang chu rdo rje'i sngags kyi rang bzhin du gyur:_oM a mr-i te hU~M phaTa?:_ci nus bzlas mthar/_sgrub thabs gzhung gi_oM:_bla ma dpal ldan sogs nas/_sdig ltung dag pa'i gnang ba bstsal:_ces pa'i bar dang*/_yig brgya tshar gcig bzla/_spyi bor bzhugs pa'i bla ma rdo rje sems dpa'i gnas gsum las 'od zer dkar dmar mthing gsum rim dang gcig car du byung ba rang gi gnas gsum du rim dang gcig car du thim/_dbang dang byin rlabs dngos grub thams cad thob/_sgo gsum sku gsung thugs rdo rje bde ba chen po'i ngo bor gnyis su med par byin gyis brlab par gyur/_ces dbang len bya/_de nas smin par 'os pa'i slob ma mdun du bos la/_dri bzang gi chab kyis kha bshal ba dang gtsang ma'i stan la 'khod de/_nam mkha' dang mnyam pa'i sems can thams cad rigs kun khyab bdag bcom ldan 'das dpal rdo rje sems dpa'i go 'phang la dgod par bya/_de'i ched du byin rlabs dbang bskur zab mo gsan la nyams su len par bgyi'o snyam pa'i thugs bskyed pa gsal btab nas gsan 'tshal/_de'ang sngags dang*/_rgyud dang*/_dkyil 'khor ma lus pa'i 'byung gnas/_rigs thams cad kyi khyab bdag bcom ldan 'das dpal rdo rje sems dpa' ni mtshan thos pa tsam gyis rgyu nyams chag sdig ltung*/_'bras bu 'khor ba dang ngan song thams cad dong nas sprugs par 'gyur ba yin te/_de bzhin gshegs pa thams cad kyi de kho na nyid bsdus pa'i rgyud las/_'di na mtshams med pa byas pa dang*/_de bzhin gshegs pa thams cad bslus pa dang*/_dam pa'i chos la smod pa dang*/_nyes pa thams cad byas pa yang*/_/de bzhin gshegs pa thams cad kyi/_/phyag rgya mchog ni sgrub pa pos/_/rdo rje sems dpa' dran gyur pas/_/tshe 'di nyid la ji ltar 'dod pa'i dngos grub thams cad dam/_dngos grub dam pa'am/_rdo rje sems dpa'i dngos grub bam/_de bzhin gshegs pa'i dngos grub kyi bar du 'thob bo/_/zhes 'byung ngo*/_/de'i sgrub thabs kyang dam pa rigs brgya/_de nyid rigs lnga/_dpa' bo gcig pa sogs dkyil 'khor dang tshom bu gtso rkyang rgyas bsdus kyi bye brag dang*/_rgyud sde bzhi dang 'brel ba'i sgrub tshul gyi rnam bzhag dang*/_bka' gter dag snang gi rim pa mtha' klas pa las/_skabs su bab pa 'di ni paN grub lnga brgya'i gtsug rgyan slob dpon bi ma mi tra dang*/_dpal o rgyan chos kyi rgyal po'i bka' srol zung 'jug gsang sngags chu bo bzhi'i bka' bab gnyags lo chen po dz+nyA na ku mA ra la bka' bab pa'i rdo rje phur pa'i sgrub sde'i yi dam zhi ba rdo rje sems dpa'i sgrub thabs ye shes gsang thig gi chos sde ste/_'di la'ang phyi nang gsang ba yang gsang dang bcas pa'i sgrub thabs dang*/_de rnams dang 'brel ba'i smin byed dbang gi rim pa'ang bzhi dang bka' srung gi rjes gnang bcas lnga yod pa las/_thog mar phyi sgrub rdo rje sems dpa' bla ma'i rnal 'byor dang zung du 'jug pa'i bsags sbyong snying por gyur pa'i sgrub thabs dang 'brel ba'i dbang bskur bsgrub pa la thog mar maN+Dal phul/_bla ma dang rdo rje sems dpa' dbyer med pa la mi phyed gus pas thal mo me tog dang bcas te gsol ba 'debs pa 'di'i rjes zlos lan gsum mdzod/_kun mkhyen ye shes phung po can/_/srid pa'i 'khor lo rnam sbyong ba/_/de ring bshad pa'i rin chen gter/_/gtso bos bdag la bka' drin stsol/_/rgyud dag par bya ba'i phyir bla ma rdo rje sems dpa' dkon mchog rtsa gsum rgya mtsho'i 'khor dang bcas pa mdun gyi nam mkhar mngon sum bzhin du bzhugs pa'i spyan sngar skyabs sems bsags sbyong gi dmigs rnam dang ma bral bas 'di'i rjes zlos lan gsum mdzod/_dkon mchog gsum la bdag skyabs mchi sogs lan gsum/_spyi bor bzhugs pa'i bla ma rdo rje sems dpa'i thugs ka nas rig pa'i lha mos rin po che'i bum pa ye shes kyi bdud rtsis gang ba thogs te khrus mdzad pas lus ngag yid gsum gyi sdig sgrib bag chags nad gdon thams cad byang zhing dag_/bla ma rdo rje sems dpa'i byin rlabs ma lus pa rgyud la zhugs pa'i mos pa mdzod/_oM:_bkra shis dge ba'i bum pa ru:_ye shes bdud rtsi chen pos gtams:_skal ldan slob mar khrus bgyis pas:_dri ma thams cad dag par mdzod:_yig brgya'i mthar/_oM sarba ta thA ga ta a b+hi She ka te sa ma ya shrI ye hU~M:_zhes bum pas dbang bskur zhing khrus bya/_bum chu sbyin/_de ltar dbang bskur bas lus tha mal gyi snang zhen sbyangs te khyed rang rnams skad cig gi bla ma rdo rje sems dpa' sku mdog dkar po zhal gcig zhi zhing 'dzum la sgeg pa'i nyams can phyag g.yas rdo rje rtse lnga pa thugs kar gtod cing*/_g.yon pas dril bu dku la brten pa zhabs gnyis sems dpa'i skyil krung gis pad+ma dang zla ba'i gdan la 'gying ba/_sku la dar gyi chas gos lnga dang rin po che'i rgyan chas bcu gsum gyis mdzes par spras pa sangs rgyas thams cad kyi sku gsung thugs kyi ye shes rnam pa thams cad pa dang gnyis su med pa'i dkyil 'khor rab 'byams spro bsdu'i byed po bde stong gnyis su med pa'i ye shes kyi sku ru rnam par dag par mos mdzod/__gnyis pa gsung bzlas pa'i lung sbyin pa ni/_slob ma rnams kyis me tog gi phreng ba re lhag pa'i lha la phul ba'i mos pas me tog 'thor bzhin du 'di'i rjes zlos/_bcom ldan bdag gis gzung lags kyis/_/bdag la 'go bar mdzad du gsol/_/sngags kyi dngos grub bstsal du gsol/_/brtul zhugs brtan par mdzad du gsol/_/zhes lan gsum bya'o/_/spyi bo'i rdo rje sems dpa'i thugs kar zla ba'i steng du hU~M la yi ge brgya pa'i sngags phreng mu tig gi rdog ma lta bu las sngags phreng gnyis pa byung zhal nas thon khyed rang rnams kyi zhal du zhugs/_snying gar zla ba la gnas pa'i hU~M mthar sngags phreng g.yas bskor du 'khod pas gsung gi byin rlabs zhugs par mos la yi ge brgya pa'i sngags 'di'i rjes zlos lan gsum mdzod/_oM badz+ra satwa sa ma ya:_ma nu pa la ya:_badz+ra satwa twe no pa:_tiSh+Tha dr-i D+ho me b+ha wa:_su toSh+yo me b+ha wa:_a nu rak+to me b+ha wa:_su poSh+yo me b+ha wa:_sarba sid+d+hi m+me pra yats+tsha:_sarba karma su tsa me:_tsit+taM shri yaM ku ru hU~M:_ha ha ha ha ho:_b+ha ga wan sarba ta thA ga ta badz+ra ma me muny+tsa badz+rI b+ha wa ma hA sa ma ya satwa A:_a su nr-i tri pre duHsarba pA paM kle sha da ha na b+hasmiM ku ru swA hAHlan gsum/_de nyid brtan par bya ba'i phyir sngags kyi phreng bas dbang bskur bar mos mdzod/_sngags byang thogs la/_zab cing gsang ba rdo rje'i sgra/_/rmad byung sngags kyi 'phrul chen pos/_/don gnyis yid bzhin byed nus pa'i/_/rdo rje'i sngags kyis dbang bskur ro/_/oM sarba ta thA ga ta wAka a b+hi Shiny+tsa hU~M/_'khor 'das kyi sgra skad thams cad grags stong gzhom med gsung gi 'khor lor dag pa'i dbang thob pa'o/_/gsum pa thugs ye shes kyi dbang la/_lha sngags kyi snang cha thams cad 'dzin med khyab brdal spros pa dang bral ba'i dbyings kyi ngang du mnyam par zhog cig_/me long bstan la/_hU~M/_chos kun de nyid klong yangs las/_/ma 'gag thabs kyi snang ba shar/_/zung 'jug sgyu ma'i brda 'di yis/_/spros bral thugs kyi dbang thob shog_/oM sarba ta thA ga ta tsit+ta a b+hi Shiny+tsa hU~M/_'khor 'das kyi rtogs tshogs thams cad rig stong spros bral gnyis su med pa'i ye shes thugs kyi 'khor lor dag pa'i dbang thob pa'o/_/de ltar phyi mtshan ma'i dkyil 'khor du phan pa dang nus pa'i bum pa'i dbang thob/_lus kyi dri ma sbyangs/_lam bskyed rim sgom pa la dbang*/_'bras bu sprul sku thob pa'i skal ba can du byas pa'o/_/gsum pa gsang ba zab mo'i dbang la gsum las/_dang po gsang ba'i dbang gi slad du/_bla ma yab yum snyoms par zhugs pa'i byang chub sems kyi thig le lce thog tu bzhag par mos mdzod/_hU~M:_bde stong rol pa'i byang chub sems:_'di ni sangs rgyas thams cad kyi:_gnyis med mnyam pa'i ye shes rgyun:_gtsang dme med par rol bar gyis:_a ho ma hA su kha hoH_zhes bdud rtsi myangs pas rtsa thams cad bdud rtsis gang*/_dug gsum gyi rnam rtog 'gags/_bde ba'i ye shes skyes par bsam/_de ltar kun rdzob byang chub sems kyi dkyil 'khor du gsang ba'i dbang thob/_ngag gi dri ma sbyangs/_lam rtsa rlung sgom pa la dbang*/_'bras bu longs sku thob pa'i skal ba can du byas pa'o/_/gnyis pa shes rab ye shes kyi dbang gi slad du/_dkyil 'khor pa'i thugs ka nas rig ma gzugs dang lang tshos brgyan pa byon nas rang la 'khyud par mos shig__hU~M:_ye shes rnam pa thams cad pa:_dpe yi thabs kyis mngon byed pa'i:_bcu drug dga' sbyin sgyu ma che:_sgyu ma'i rol pas spyod cig bu:_oM AHhU~M pad+ma b+hany+dza mok+Sha hoH_zhes rig tsaka gtad/_de dang snyoms par zhugs pas dga' ba bzhi'i ye shes nyams su myong bar mos la sngags 'di'i rjes zlos dang bcas te 'khyud rgya bya/_oM sarba ta thA ga ta ma hA a nu rA ga Na dz+nyA na badz+ra swa b+hA wa At+ma ko\u0f85 haM/_de ltar b+ha ga'i dkyil 'khor du shes rab ye shes kyi dbang thob/_yid kyi dri ma sbyangs/_lam thig le sgom pa la dbang*/_'bras bu chos sku thob pa'i skal ba can du byas pa'o/_/gsum pa dbang bzhi pa'i slad du shel dang me long gi brdas mtshon pa'i rang byung gi ye shes rig stong zung 'jug de kho na nyid kyi ngang la blo bzhag nas/_shel dang me long 'phyar la/_hU~M:_stong gsal rig pa ye shes sems:_kun khyab rdo rje'i khams chen po:_rang rig thig le gnyis med pas:_chos dbyings gnas lugs rtogs par gyis:_d+harma d+hA tu a a aH_de ltar don dam byang chub sems kyi dkyil 'khor du dbang bzhi pa thob/_ye shes kyi dri ma sbyangs/_lam rdzogs pa chen po sgom pa la dbang*/_'bras bu ngo bo nyid sku thob pa'i skal ba can du byas pa'o/_/slar yang bla ma dang dkyil 'khor lha tshogs phyogs bcu'i rgyal ba sras dang bcas pas shis pa brjod pa'i bden tshig gi glu dang me tog gi char sil ma bsnyil bas dge legs rtag brtan gyi snang ba dam pas phyogs dus kun tu khyab par mos mdzod/_hU~M:_rig 'dzin bla mas byin brlabs nas:_dgongs brgyud rtogs pa'i bkra shis shog:_yi dam lha yis rjes bzung ste:_dngos grub dbang thob bkra shis shog:_mkha' 'gro chos skyong phrin las kyis:_sa lam mthar phyin bkra shis shog:_'dod rgu lhun gyis grub pa yi:_dge legs rtag brtan bkra shis shog:_de dag gis rdor sems rigs lnga kun 'dus kyi dkyil 'khor du dbang bzhi chig rdzogs su grub pa yin pas/_de dag gi dam tshig gnang bkag gi rim pa las mi 'da' bar bsrung snyam pas 'di'i rjes zlos mdzod/_gtso bos ji ltar sogs dang gtang rag gi maN+Dal lus 'bul/_dge bsngo bcas byas la slob ma grol/_slob dpon gyis tshogs la rol zhing phrin las gzhung gi lhag ma nas brtsams rjes kyi las rim rnams mtha' rgyas su bya'o/__/lnga pa bka' srung sngags kyi srung ma'i rjes gnang bya tshul ni/_rdul tshon gyi chos 'byung mthing ga me ris bskor ba'am/_ma 'byor na maN+Dal la 'bru nag gi tshom bu gcig bkod pa'i steng*/_many+dzir lcags sam b+han+d+ha'i snod du dmar gtor gru gsum rgyan spros can gyi rtser sku tsaka dang dar gdugs kyis spras par sha khrag mthun rdzas kyis brgyan pa dang*/_'bul gtor/_nyer spyod/_sman raka sogs kyang bshams/_dbang snga ma rnams dang ma 'brel na/_bdag gi rnal 'byor mdor bsdus sngon du 'gro bas/_srung ma'i phrin las dang bzlas pa cung zad byas la/_mchod bstod mdor bsdus grub rjes gnang ba zhu/_slob ma khrus bya/_bgegs bskrad/_srung 'khor bsgoms nas/_de yang bla na med pa'i byang chub bsgrub pa la 'gal rkyen srung ba dang*/_mthun rkyen sgrub pa'i grogs rdo rje theg pa'i lugs kyi thun mong ma yin pa'i dam can srung ma khyad par can brten pa gal che/_de la'ang ye shes dang*/_las dang*/_'jig rten gyi tshul 'dzin pa'i chos skyong rgyud gsum du gtogs pa du ma zhig bzhugs pa las skabs su babs pa 'di ni/_gzhung las/_'di ni dbyings kyi rje mo ste:_thugs rje rig rtsal ma mo'i gtso:_a ti'i bstan srung rgyal mo ste:_nyams rtogs sa lam grogs su byed:_bsgrub pas 'dod pa'i las sgrub ma:_rno myur zab khyad gzhan las 'phags:_kun mthun kun las khyad par chos:_ngo mtshar gsang ba'i srung ma yi:_mchod byang snying po'i yang tig 'di:_'od kyi lus can bi ma las:_sngags srung khros ma'i rgyud las btus:_zab chos mchog gi srung ma ru:_gtad rgyas btab bzhin snang gyur cig:_kun la ma spel zab rgya thaM:_zhes gsungs pa ltar chos dbyings stong pa chen po'i klong na 'khor 'das thams cad kyi bskyed gzhi dpal kun tu bzang mo bde chen he ru kaHdpal gyi gsang ba'i yum gcig gnam zhal dbyings kyi dbang phyug ma/_'khor 'das thams cad mkha' klong dbyings gsum du 'byed sdud kyi byed po ma mo e ka dzA Ti/_steng phyogs lha yi yul na dus gsum rgyal ba'i bstan pa srung ba'i lha mo 'dod khams dbang phyug ma sogs mtshan dang sku yi bkod pa bsam las 'das shing*/_deng 'dir dpal rdo rje sems dpa' ye shes gsang thig gi bka' yi srung mar byon pa'i sngags srung e ka dzA Ti'i rjes gnang 'bul ba'i skabs su bab pas de nyid zhu ba'i don du maN+Dal phul/_gsol ba gdab pa 'di'i rjes zlos mdzod/_don dam dbyings nas ma g.yos kyang:_'gro ba 'dul phyir sprul pa'i sku:_dpal ldan sngags kyi srung ma yi:_rjes su gnang ba bstsal du gsol:_lan gsum/_rgyud sbyang ba'i slad du rgyun bshags yan lag brgyad pa 'di'i rjes zlos mdzod/_rdo rje slob dpon sangs rgyas dpal/_/sogs lan gsum/_de nas khyed rang rnams gnyen po stobs kyi lha dpal chen po'i sku 'di ltar sgoms mdzod/_oM ma hA shU n+ya tA sogs/_stong pa'i ngang las pad+ma dang nyi ma dregs pa khyo shug bsnol ba'i gdan gyi steng du hU~M yig mthing nag yongs su gyur pa las khyed rang rnams dpal chen po badz+ra he ru ka sku mdog mthing nag nyi ma 'bum gyi gzi brjid can zhal gcig phyag gnyis pa khro gtum mi bzad pa'i gzugs can/_rdo rje dang dung khrag 'dzin pa/_rang snang gi yum dang bcas pa dpal dang dur khrod drag po'i chas kyis brgyan te/_zhabs gnyis gyad chen po'i stabs su ye shes kyi me dpung 'bar ba'i klong na bzhugs pa'i gnas gsum gyi yi ge las byung ba'i 'od zer gyis dpal chen po'i ye shes kyi 'khor lo sprin char drag tu 'bab pa bzhin spyan drangs nas sgo gsum la sib sib thim par mos mdzod/_ru lu'i mthar/_dz+nyA na a be sha ya btags pas byin dbab/_tiSh+Tha badz+ras brtan par bya/_rjes gnang dngos la/_dang po sku yi rjes su gnang ba'i slad du/_mdun gyi gtor ma 'di nyid 'di ltar gsal thob mdzod/_eH_chos dbyings mthing nag sogs nas bstod pa'i bar btang la/_gtor ma ye shes kyi ma mo 'khor dang bcas par gsal ba'i sku las 'od zer me lce'i phreng ba lta bu dpag tu med pa byung*/_khyed rang rnams kyi dpral bar thim pas sku'i byin rlabs dang dngos grub thogs med du 'grub par mos mdzod/_gtor ma dpral bar bzhag la/_oM ma ma trag rak+sha e ka dzA Ti b+h+yo hU~M dza dzaH_kA ya sarba karma ku ru hoH_spos rol dang bcas byin dbab/_gnyis pa gsung gi rjes su gnang ba'i slad du/_mdun bskyed ma mo'i thugs kar nyi ma la gnas pa'i traka yig gi mthar gnas pa'i sngags phreng las yig 'bru me yi zegs ma can bar ma chad du dmar nar gyis byung*/_zhal nas thon/_bdag nyid lhar gsal ba'i lte ba nas zhugs/_gsung gi byin rlabs dang dngos grub thogs med du 'grub par mos mdzod/_gtor ma mgrin par bzhag la/_oM ma ma traka rak+sha e ka dzA Ti hU~M b+h+yo dza dzaH_wAka sarba karma ku ru hoH_spos rol dang bcas byin dbab/_gsum pa thugs kyi rjes gnang gi slad du/_mdun bskyed ma mo'i thugs ka nas trag yig smug nag dang tsit+ta 'phros/_rang gi snying gar thim pas thugs kyi byin rlabs dang dngos grub thogs med du 'grub par mos mdzod/_gtor ma snying gar bzhag la/_oM ma ma traka rak+sha e ka dzA Ti hU~M b+h+yo dza dzaH_tsit+ta sarba karma ku ru hoH_spos rol dang bcas byin dbab/_gtso 'khor yongs rdzogs kyi bka' gtad pa'i phyir/_slob dpon dpal chen po'i nga rgyal la gnas pas gtor ma ma mo 'khor bcas gsal ba la tha tshig gnyan po bsgrags pas ma mo 'khor bcas dam la 'dus te/_ji ltar 'dod pa'i phrin las rab 'byams thogs med du bsgrub par mos mdzod/_chos sku kun tu bzang po/_longs sku rdor sems rigs lnga/_sprul sku dga' rab rdo rje/_slob dpon 'jam dpal bshes gnyen/_rig 'dzin shrI sing+ha/_mkhas pa dz+nyA na su tra/_paN chen bi ma mi tra/_slob dpon rdo rje hU~M mdzad/_gu ru rdo rje thod phreng rtsal/_mnga' bdag khri srong lde'u btsan/_dge slong nam mkha'i snying po/_lo chen bai ro tsa na/_gnyags chen ye shes gzhon nu/_mkha' 'gro ye shes mtsho rgyal/_gter chen pad+ma 'od gsal mdo sngags gling pa/_bka' bab klong chen nam mkha' 'od gsal/_'jam mgon chos kyi blo gros la sogs pa rtsa ba dang brgyud par bcas pa'i dpal ldan bla ma dam pa rnams kyi bka' dang dam tshig las ma 'da' bar dpal ye shes kyi ma mo smug nag khros ma'i rgyal mo sngags srung e ka dzA Ti sku gsung thugs yon tan phrin las kyi sprul pa'i ma mo/_ye shes las dang 'jig rten gyi mkha' 'gro ma 'bum phrag yangs pa'i tshogs dang bcas pa rnams la gnyer du gtad pa'i rdo rje'i slob ma 'di rnams la dus deng nas byang chub snying po'i bar du mi 'bral bar nyin gyi bya ra/_mtshan gyi mel tshes rtag tu skyongs la 'gal rkyen thams cad sol/_mthun rkyen thams cad spel/_rten 'brel legs dgur sgrigs/_nyams dang rtogs pa spel/_dngos grub dang phrin las sgrubs/_sangs rgyas kyi bstan pa srungs/_bstan 'dzin gyi skyes bu spel/_mdor na rang gzhan gyi don gnyis 'dod dgu'i phrin las rab 'byams yid bzhin du 'grub par mdzod cig_/sa ma ya rak+Shan+tu zhes brjod/_brgyud 'dzin dang dam tshig thub pa yin na gtor ma bdud rtsis bshal la sbyin/_spyi tsam du gtor mas bka' bsgos pas 'thus/_rjes shis brjod dang*/_dam tshig khas blang*/_gtang rag yon 'bul/_dge bsngo sogs spyi ltar bya'o/_/bsgrub bya rmad byung khyab bdag rdo rje sems/_/phyi nang gsang sogs sgrub tshul snying po'i lam/_/mkhas grub gong ma'i gsung gi snang ba la/_/brten nas 'jug bde'i smin byed bklag chog bkral/_/bka' gter gser zhun lta bu'i zab chos kyang*/_/da ni dbyings kyi thig ler mnal nye na/_/bdag lta'i ngal ba don du 'gyur dka' yang*/_/bla ma'i bka' dang las skal mchog ldan pa'i/_/dam pa du mas gsung gi dbyug gu yis/_/yang yang bskul phyir bsam sbyor dag khul gyis/_/bris 'dis bstan 'gro'i dge mtshan rgyas par shog_/ces pa'ang dkyil 'khor rgya mtsho'i khyab bdag dpal ldan rdo rje sems dngos 'jam mgon chos kyi rgyal po pad+ma ye shes rdo rjes gter gzhung dbang gi rtsa ba zhal gsal med stabs 'di ltar bris zhes dbang chings rtsa tho bcas bka' yi gnang ba bstsal na yang*/_snyigs ma'i rgud pa sna tshogs kyis yid gdung bas g.yas chung du song skabs dad brtson mos gus chen pos tshul 'di'i bsnyen sgrub nyams bzhes rgya cher gnang ba snying po'i rnal 'byor pa klong chen ye shes rdo rjes bskul ma snga phyir nan tan du byung ba dang bla ma rat+na rasmi yab sras/_'khrul zhig rin po che 'gyur med mdo sngags bstan 'dzin sogs dam pa du mas gsung bskul bzlog tu ma btub par mdo khams shar gyi dA ri dra 'gyur med theg mchog bstan pa'i rgyal mtshan mdo sngags gling par sgro btags kyi ming gis snyan pa'i zog po des rta zla'i dmar phyogs kyi tshes nyer gcig 'jam mgon bla ma'i dus kyi mchod pa'i tshul du kha bzhi lho yi sman ljongs kyi lte ba bde chen chos gling sum rtsen lha yi dga' tshal du grub par bgyis pa 'dis kyang grong khyer gsum gyi yid can thams cad khyab bdag rdo rje sems dpa'i go 'phang mngon du byed pa'i rgyur gyur cig_/mang+ga laM/_dge'o//__//_chos kyi bdag po'i bka' bzhin pad bkod sgam sprul pas zhu dag gi sri zhu byas pa'o//_//