དམ་ཅན་རྒྱ་མཚོའི་སྐོང་བཤགས།

Previous Text Back to Volume Page Next Text

Wylie title	dam can rgya mtsho'i skong bshags
Location	'jigs gling bka' 'bum Volume 8, Text 35, Pages 775-778 (Folios 1a1 to 2b5)
Author	འཇིགས་མེད་གླིང་པ་
Less details More details
Citation	'jigs med gling pa. Dam can rgya mtsho'i skong bshags. In Kun mkhyen rig 'dzin 'jigs med gling pa'i gsung 'bum, Vol. 8: 775-778. New Delhi: Shechen Publications, 2025.
Genre	Confessions - bshags pa · Mending Rituals - bskang chog
Deity	dam can

[edit]

༄༅། །དམ་ཅན་རྒྱ་མཚོའི་སྐོང་བཤགས་བཞུགས།

༄༅། །ཨོཾ། ཡེ་ཤེས་ལས་གྲུབ་མངོན་ཤེས་མཐུ་རྩལ་ཅན། །ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་། །བཀའ་བཞིན་རྗེས་སུ་སྒྲུབ་པའི་གྲོགས་མཛད་པའི། །དམ་ཅན་རྒྱ་མཚོའི་ཚོགས་རྣམས་དགོངས་སུ་གསོལ། །བདག་ནི་རྣལ་འབྱོར་སྔགས་འཆང་སྒྲུབ་པ་པོས། །གསང་སྔགས་རྡོ་རྗེ་མཆོག་ཏུ་དམ་བླངས་ཏེ། །སྐུ་གསུང་ཐུགས་སུ་བསྒྲུབ་པར་དམ་བཅས་ཀྱང་། །མ་རིག་དབང་གི་དེ་ལྟར་རྔོ་མ་ཐོགས། །འགལ་འཁྲུལ་ཉམས་ཆག་ཐམས་ཅད་མཐོལ་ལོ་བཤགས། །ལུས་དང་ངག་ཡིད་ཉོན་མོངས་དབང་གྱུར་པས། །མི་དགེ་སྡིག་རྣམས་བགྱིས་དང་བགྱིད་སྩལ་བ། །གཞན་གྱིས་བགྱིས་ལ་རྗེས་སུ་ཡི་རང་བ། །ཐམས་ཅད་མ་ལུས་དུས་འདིར་མཐོལ་ལོ་བཤགས། །ཆོས་སྐུ་མཁའ་མཉམ་སྤྲོས་དང་བྲལ་བ་ལ། །རྣམ་རྟོག་མཚན་མས་ང་དང་བདག་ཏུ་བཟུང་། །ལྟ་སྒོམ་མ་གསལ་ཏིང་འཛིན་དོན་ལ་གཡེལ། །ཆོས་ཉིད་དོན་དང་འགལ་བ་མཐོལ་ལོ་བཤགས། །ཉིན་མཚན་ཀུན་ཏུ་བསྒྲུབ་པར་དམ་བཅས་ཀྱང་། །སྒོམ་པ་ཡུན་ཐུང་བཟླས་གྲངས་ཉུང་བ་དང་། །བསྙེན་སྒྲུབ་གཡེལ་ཞིང་ཆོ་ག་ལྷག་ཆད་གྱུར། །མཆོད་གཏོར་བཤམས་ཉེས་སྦྱོར་སྒྲོལ་ལས་མཐའ་ལོག །གསང་སྒོ་འཆོལ་ཞིང་བཀའ་ལས་འདས་པའི་སྐྱོན། །འགལ་འཁྲུལ་ཉམས་ཆག་ཐམས་ཅད་མཐོལ་ལོ་བཤགས། །ཉམས་དང་འགྲོགས་ཤིང་ཉམས་པ་བསྐངས་པ་དང་། །ཉམས་ལ་ཆོས་བཤད་ཉམས་དང་ཚོགས་འདྲེས་དང་། །ཉམས་ལ་མི་འཛེམ་ཉམས་ཆག་ཞིག་རལ་གྱུར། །ཉམས་སྒྲིབ་སྐྱོན་རྣམས་ཐམས་ཅད་མཐོལ་ལོ་བཤགས། །ཡུན་རིང་དུས་ནས་བསྙེན་ཅིང་བསྒྲུབས་པའི་ལྷ། །དམ་ཅན་སྲུང་མའི་ཐུགས་དང་འགལ་གྱུར་པ། །དུས་སུ་མ་མཆོད་བསྙེན་སྒྲུབ་མ་ཚང་དང་། །ལས་མཐའ་མ་ལོངས་མངོན་སྤྱོད་ལས་ལ་བསྐུལ། །གཙང་སྦྲ་ཉམས་ཤིང་ལྟ་སྒོམ་མ་དག་དང་། །བརྩེ་གདུང་རྒྱུན་ཆད་མཆོད་པས་མ་བསྐངས་དང་། །སྐོང་བ་མ་རྫོགས་ཆོ་ག་ལྷག་ཆད་གྱུར། །ཉམས་ཆག་ཉེས་ལྟུང་བག་མེད་འགལ་འཁྲུལ་ཀུན། །མཐོལ་ལོ་བཤགས་སོ་བྱང་ཞིང་དག་པར་མཛོད། །ལྷ་མཆོག་རྣམས་དང་ཇི་སྲིད་གནས་ཀྱི་བར། །བདག་དང་མི་འབྲལ་སེམས་ཀྱིས་བསྒོམ་པར་མཛོད། །ཐུགས་རྗེས་དགོངས་ལ་དཀྱིལ་འཁོར་གཉན་པོ་བཟུང་། །བདག་ལ་བྱིན་རླབས་དབང་དང་དངོས་གྲུབ་སྩོལ། །ཡེ་ཤེས་མཐོང་བྱེད་མ་རིག་མུན་པ་སེལ། །མཉམ་ཉིད་རྫོགས་པའི་དོན་རྣམས་སོ་སོར་ཕྱེད། །ཡོན་ཏན་ལྷུན་གྲུབ་དབྱིངས་སུ་བདག་བཀོད་ལ། །མཁའ་བཞིན་མི་རྟོག་ཆོས་སྐུར་གྲུབ་པ་དང་། །ཉི་བཞིན་འོད་གསལ་ལོངས་སྤྱོད་རྫོགས་པའི་གཙོ། །ཟེར་བཞིན་སྤྲུལ་པས་འགྲོ་དོན་ལྷུན་གྲུབ་ཅིང་། །ནམ་མཁའི་མཐའ་ཀླས་གྱུར་པའི་འགྲོ་བ་ཀུན། །ཕྲིན་ལས་རྣམ་བཞི་དབྱིངས་སུ་གྲོལ་བར་ཤོག། །།ཅེས་ཡི་གེ་བརྒྱ་པ་བརྗོད་དོ།། །།