བསྟན་སྲུང་དམ་ཅན་རྒྱ་མཚོའི་རུ་མཚོན་མངའ་གསོལ།

Previous Text Back to Volume Page Next Text

Wylie title	bstan srung dam can rgya mtsho'i ru mtshon mnga' gsol
Location	'jigs gling bka' 'bum Volume 8, Text 34, Pages 769-774 (Folios 1a1 to 3b3)
Author	འཇིགས་མེད་གླིང་པ་
Less details More details
Citation	'jigs med gling pa. Bstan srung dam can rgya mtsho'i ru mtshon mnga' gsol. In Kun mkhyen rig 'dzin 'jigs med gling pa'i gsung 'bum, Vol. 8: 769-774. New Delhi: Shechen Publications, 2025.
Genre	Protector Rituals - gsol mchod
Deity	dam can
Colophon	།ཅེས་པའང་མདའ་དཔོན་པ་ལྷའི་ངོར་རྫོགས་ཆེན་པ་འཇིགས་མེད་གླིང་པས་སོ།།
Colophon	ces pa'ang mda' dpon pa lha'i ngor rdzogs chen pa 'jigs med gling pas so//

[edit]

༄༅། །བསྟན་སྲུང་དམ་ཅན་རྒྱ་མཚོའི་རུ་མཚོན་མངའ་གསོལ་བཞུགས།

༄༅། །སྐྱེ་མེད་རྡོ་རྗེ་དབྱིངས་ཀྱི་ཡུམ་ཆེན་མོ། །འགག་མེད་དཔལ་ལྡན་རང་བྱུང་རྒྱལ་མོ་དང༌། །དཔལ་མགོན་སྡེ་ལྔ་ལྕམ་དྲལ་བཀའ་སྡོད་བཅས། །ཡེ་ཤེས་དབྱིངས་སུ་དབུ་འཕང་བསྟོད་པར་བགྱི། །རྣམ་པ་ཀུན་གྱི་མཆོག་ལྡན་སྟོང་པའི་གཟུགས། །ཀུན་ཁྱབ་བདེ་ཆེན་བར་དུ་རོ་གཅིག་ཀྱང༌། །མ་རིག་འཛིན་པའི་ལས་རླུང་གིས་སྤྲུལ་པའི། །གཡར་དམ་གཉན་པོ་ཆོས་ཀྱི་དབྱིངས་སུ་བསྲེ། །འདས་པའི་རྣམ་པར་རྟོག་པ་ཡོད་དོ་ཅོག །སྔར་བཅོལ་ལེགས་པའི་གཏང་རག་གཉེན་པོར་སྤེལ། །མ་འོངས་རྣམ་པར་རྟོག་པ་གནས་བསྒྱུར་ནས། །ད་བཅོལ་ལེགས་པའི་ཞུ་བ་གཅིག་ཏུ་འབུལ། །ཆད་པའི་གཞུང་གཅིག་བདག་གིས་མི་སྲོང་རྒྱུ། །ཆད་ལས་དོན་འབྱུང་དོན་ལ་མ་གཡེལ་ཅིག །བཅོལ་བའི་ཕྲིན་ལས་ཁྱོད་ཀྱིས་མི་མཛད་རྒྱུ། །ཕྲིན་ལས་དོན་དུ་གཟུགས་སྐུར་བཞེངས་ལ་དགོངས། །དབུ་འཕང་གཉེན་པོ་དེ་རིང་མི་བསྟོད་རྒྱུ། །ཕྱོགས་ལས་རྣམ་རྒྱལ་བརྟུལ་ཞུགས་འཛིན་པའི་ཕྱིར། །ལྷུན་པོའི་སྤོ་དང་ཉི་ཟླའི་བཀྲག་མདངས་ཀྱང༌། །རྔོམ་བརྗིད་ཡོན་ཏན་འབར་བའི་དཔྱིད་དུ་སྤུངས། །སྙིགས་མ་ལྔ་ཡི་ཡང་མཐར་ལྷུང་བ་རྣམས། །ནད་མཚོན་དམག་འཁྲུག་མུ་གེས་མནར་བའི་ཚེ། །སྐྱབས་འོས་དཀོན་མཆོག་རིན་ཆེན་རྣམ་པ་གསུམ། །དམ་ཅན་ཆོས་སྲུང་རྒྱ་མཚོར་བཞེངས་ལ་འབོད། །ཞི་བ་ཕྱོགས་གཅིག་མྱ་ངན་མི་འདའ་བ། །སློབ་པ་ལམ་གྱི་དམ་བཅའི་མཐར་ཐུག་ཕྱིར། །སྟོང་ཉིད་དབྱིངས་ལས་སྙིང་རྗེའི་སྒྱུ་ཐབས་གར། །རྣམ་བཞིའི་ཕྲིན་ལས་རོལ་མོར་མངའ་གསོལ་ལོ། །རྟ་གདོང་མེ་ལྕེར་འབར་བའི་མུ་ཁྱུད་ནང༌། །ལས་དབང་བསོད་ནམས་ཀླུང་རྟ་དར་དྲགས་པའི། །དཔུང་ཚོགས་ཡན་ལག་བཞི་པའི་རྩེབས་རྣོན་གྱིས། །གཞན་སྡེའི་བརྟན་པ་འཕྲོག་པར་མངའ་གསོལ་ལོ། །ཀུན་འབྱུང་འཁོར་བའི་རྒྱུ་འབྲས་རྣམ་རྟོག་གི །གཞན་དབང་ཉིད་དུ་ཡོང་ཡེར་མ་གཟུང་ཡང༌། །གང་ལ་གསོལ་བ་བཏབ་ན་ཡིད་བཞིན་དོན། །འབད་མེད་འགྲུབ་པའི་ནོར་བུ་མངའ་གསོལ་ལོ། །རང་སྡེ་སྲུང་ལ་ཤིན་ཏུ་མཛངས་བཞིན་དུ། །གཞན་སྡེ་དབང་བྱེད་སྒྱུ་རྩལ་ལ་གོམས་པས། །ཐབས་ལ་མཁས་པའི་ཤེས་རབ་མིག་ཡངས་མས། །ཁམས་གསུམ་དབང་བྱེད་བཙུན་མོར་མངའ་གསོལ་ལོ། །འདུ་འཛིའི་གནས་ཀྱང་བསྡུ་བའི་དངོས་པོ་དང༌། །ཚངས་གནས་བཞི་ཡི་དོན་ལ་སྦྱོར་བྱེད་ཅིང༌། །འབྱོར་ཞིང་རྒྱས་ལ་སྲིད་སྡེ་སྲུང་མཁས་པའི། །ཁྱིམ་བདག་རིན་ཆེན་མཆོག་ཏུ་མངའ་གསོལ་ལོ། །རྟག་ཆད་དོན་ལ་སེམས་པའི་མུ་སྟེགས་དང༌། །འཚེ་བ་ཆོས་སུ་སྨྲ་བའི་ཀླ་ཀློའི་དཔུང༌། །ཐེག་ཆེན་ལུས་སྟོབས་རྒྱགས་པའི་སྣ་ཞགས་ཀྱི། །རལ་གྲིས་གཅོད་པའི་གླང་པོར་མངའ་གསོལ་ལོ། །བསྐུལ་སར་ཡུད་ཀྱིས་ཕྱིན་པའི་མགྱོགས་པའི་བང༌། །རྦད་སར་ཐོགས་རྡུག་མེད་པའི་རླུང་གི་ཤུགས། །ཕ་རོལ་རི་རབ་ཡིན་ཡང་རྫུ་འཕྲུལ་གྱིས། །རླག་བྱེད་རྟ་མཆོག་ཆེན་པོར་མངའ་གསོལ་ལོ། །ལེགས་ཉེས་སྟངས་འཛིན་བདག་པོ་ཁྱེད་རྣམས་ནི། །རྫུ་འཕྲུལ་རྐང་པ་བཞི་ལ་མཆོག་ཐོབ་ཅིང༌། །སྟོབས་བཅུ་མི་འཇིགས་རྣམ་བཞིའི་རྩལ་རྫོགས་པས། །དགྲ་སྡེ་འཇོམས་པའི་དམག་དཔོན་ཆེན་པོར་མཛོད། །ཁྱད་པར་རང་སྲིད་འབྱོར་བས་མི་ངོམས་པས། །གཞན་སྡེ་བཟའ་བའི་ལྷ་མིན་འཇུག་པ་ཅན། །བྱེད་པ་རྒྱུ་མཐུན་མཚོན་ཆའི་རྣོ་དཔལ་རྩེར། །རང་སྲོག་རང་གིས་འཕྲོག་པར་མངའ་གསོལ་ལོ། །གང་ལ་སྲུང་སྐྱོབ་བྱེད་པའི་ལྷ་སྲུང་དང༌། །མཛའ་གཅུགས་དམ་བཅའི་རི་མོ་ཉེར་བསུབས་པ། །བསྟན་འགྲོའི་ཕན་བདེ་བཤིག་པའི་མདུན་གྲོས་དཔུང༌། །ནང་དབྱེན་དམེ་འཁྲུག་སྦྱོར་བས་སྤ་བཀོངས་ཤིག །རིགས་གསུམ་མགོན་པོ་མེས་དབོན་རྣམ་གསུམ་གྱིས། །རྒྱལ་བསྟན་གངས་རིར་དྲངས་པ་ཆུད་གསན་ནས། །དགེ་བཅུའི་ཁྲིམས་ཀྱི་མུ་ཁྱུད་བཤིག་པ་རྣམས། །དོན་སྙིང་ལྐོག་མར་འབྱིན་པར་མངའ་གསོལ་ལོ། །འཇིག་རྟེན་ལས་ཀྱི་སྤྲུལ་པའི་གཞན་དབང་ལ། །ཕྱ་དང་དབང་ཕྱུག་རང་དབང་ཡིན་ཟེར་ན། །བདེན་པ་གཉིས་དང་དེ་ཡི་བསྟན་སྲུང་ལ། །བསྟེན་གོམས་བྱས་པའི་འབྲས་བུ་གཡེལ་ལམ་ཅི། །ཆོས་ཀྱི་སྐུ་ནི་དུས་གསུམ་སྐྱེ་འགག་མེད། །ལོངས་སྤྱོད་རྫོགས་ལས་རྣམ་སྤྲུལ་ཆོས་སྐྱོང་རྣམས། །དམ་ཅན་ཉིད་ཕྱིར་དམ་ཚིག་དང་བཞེས་ལ། །ལྔ་བདེའི་འགྲོ་འདི་སྲུང་སྐྱོབ་དུས་ལ་བབ། །མིག་འཕྲུལ་ལས་ཀྱང་མྱུར་བའི་འཇིག་རྟེན་གྱི། །རྒུད་པ་སྣ་ཚོགས་དམ་ཅན་ཆོས་སྲུང་མཐུས། །བསྲུང་ཞིང་ཁྱད་པར་བདག་ཅག་ཡོན་མཆོད་ལ། །ལུས་དང་གྲིབ་བཞིན་འགྲོགས་ནས་གྲོགས་དན་མཛོད། །གཞིས་སུ་འདུག་ན་རྫོགས་ལྡན་དགའ་སྟོན་སྤེལ། །བྱེས་སུ་གཅན་ཕྲང་ཆོམ་རྐུན་ཁ་ཆར་སྲུངས། །དགྲ་དང་འགྱེད་ན་དཔལ་རྟགས་རུ་མཚོན་འཕྱོར། །ཕྱོགས་ལས་རྣམ་རྒྱལ་བཀྲ་ཤིས་བདེ་ལེགས་མཛོད། །ཅེས་པའང་མདའ་དཔོན་པ་ལྷའི་ངོར་རྫོགས་ཆེན་པ་འཇིགས་མེད་གླིང་པས་སོ།། །།