དམ་ཅན་ཆོས་སྲུང་རྣམས་ལ་ཕྲིན་བཅོལ་བྱ་ཚུལ།

Previous Text Back to Volume Page Next Text

Wylie title	dam can chos srung rnams la phrin bcol
Location	'jigs gling bka' 'bum Volume 8, Text 36, Pages 779-780 (Folios 1a1 to 1b6)
Author	འཇིགས་མེད་གླིང་པ་
Less details More details
Citation	'jigs med gling pa. Dam can chos srung rnams la phrin bcol. In Kun mkhyen rig 'dzin 'jigs med gling pa'i gsung 'bum, Vol. 8: 779-780. New Delhi: Shechen Publications, 2025.
Genre	Exhortations to Act - phrin bcol
Deity	dam can

[edit]

༄༅། །དམ་ཅན་ཆོས་སྲུང་རྣམས་ལ་ཕྲིན་བཅོལ་བྱ་ཚུལ་བཞུགས། ཀྱེ་ཐུབ་པའི་བསྟན་པ་རིན་ཆེན་འབར་བའི་སྣོད། །དགྲ་བཅོམ་ཚུལ་ཁྲིམས་རྗེས་སུ་བྱེད་པ་ཡི། །བསླབ་གསུམ་ཡོངས་འདུ་ས་བརྟོལ་ལྗོན་པའི་ཤིང་། །ནུབ་པ་མེད་པར་འཕེལ་བའི་རྒྱལ་མཚན་ཚུགས། །ད་དུས་སྙིགས་མ་ལྔ་ཡི་གཟིར་བ་འདིས། །ཀུན་རྟོག་དྲང་དོན་ལམ་གྱིས་གདུལ་དཀའ་ཚེ། །ངེས་དོན་བྱང་ཆུབ་སེམས་དཔའི་སྡེ་སྣོད་ཆེའི། །ཡོན་ཏན་བྱང་ཆུབ་སེམས་གཉིས་རྒྱས་པར་མཛོད། །ཁྱད་པར་མིག་འཕྲུལ་ལྟ་བུར་འགྲོ་བའི་ལམ། །རྡོ་རྗེའི་ཐེག་པ་རྒྱ་མཚོའི་སྨིན་གྲོལ་དང་། །འཕགས་ལམ་ངེས་གསང་ཐེག་པ་མཆོག་གི་རྩེ། །ཀུན་ནས་ཀུན་ཏུ་དར་བའི་ཕྲིན་ལས་མཛོད། །རྒྱལ་བའི་གདུལ་བྱའི་ཁམས་དབང་བསམ་པ་དང་། །རྗེས་སུ་མཐུན་པར་གསུངས་པའི་བསྟན་པ་ལ། །ཕྱོགས་ལྷུང་ཕྲག་དོག་གདོན་གྱིས་ཀུན་དཀྲིས་ཅན། །སྨོན་ལམ་ལོག་པའི་དམ་སྲིའི་སྙིང་ཁྲག་འཐུང་། །གང་གི་དབང་ཕྱུག་ལུས་ཅན་ཐམས་ཅད་ཀྱིས། །ཁུར་དུ་ལྕི་བ་སྦྲུལ་གདུག་ལྟ་བུའི་སེམས། །བསྟན་འགྲོའི་ཕན་བདེ་བཤིག་ལ་ཆས་པ་དེར། །སྲུང་སྐྱོབ་མཛད་ན་ཁྱེད་ཀྱི་གཡར་དམ་འདྲལ། །ལོག་པར་ལྟ་བ་འཛིན་དང་ཀླ་ཀློའི་སྡེ། །དཀོན་མཆོག་དབུ་འཕང་སྨད་པའི་རྒྱལ་ཕྲན་གྱི། །ཆབ་སྲིད་སྐར་མདའ་ས་ལ་ལྷུང་བ་ལྟར། །བྱས་པའི་མོད་ལ་དོན་སྙིང་ལྐོགས་མར་ཕྱུང་། །མཆོད་བསྟོད་དྲེགས་པའི་དཀྱིལ་འཁོར་མ་མཐོང་ཞིང་། །སངས་རྒྱས་གཉིས་པའི་དམ་ཚིག་ལ་འགོངས་པའི། །ནག་ཕྱོགས་གློ་བུར་ལྷགས་པའི་འདྲེ་རྒོད་དང་། །རྒྱ་འདྲེ་བརླང་པོར་སྤྱོད་པའི་དུས་མཐའ་བསྟུངས། །མང་དུ་ཐོས་པ་ལུང་གི་ཡོན་ཏན་དང་། །རྟོགས་པས་བདག་རྒྱུད་གྲོལ་བའི་སྐྱེས་བུ་རྣམས། །བསྟན་པའི་རྩ་ལག་གཅིག་ཏུ་གནས་པའི་ཕྱིར། །སྐུ་ཚེ་མཛད་ཕྲིན་ཡར་ཟླའི་མཆེད་པོ་མཛོད། །ཁྱིམ་ན་གནས་ཀྱང་ཡང་དག་བལྟ་ལ་དད། །དཀོན་མཆོག་གསུམ་ལ་བླ་མར་བྱེད་པ་རྣམས། །ཐེག་པ་ཆེན་པོའི་གདུལ་བྱ་ཉིད་ཀྱི་ཕྱིར། །གཡེལ་བ་མེད་པའི་མེལ་ཚེ་བསྲུང་སྐྱོབས་མཛོད། །ཆོས་དང་སྲིད་ཀྱི་གཞི་ལ་ཕུན་ཚོགས་སྤེལ། །བྱེས་སུ་ལམ་འཕྲང་ཆོམ་རྐུན་འཚེ་བ་སྲུངས། །བསམ་དོན་ཡིད་བཞིན་འགྲུབ་པའི་ཕྲིན་ལས་ཀྱང་། །ཚོགས་གཉིས་འབྲས་བུར་སྨིན་པའི་བཀྲ་ཤིས་སྩོལ།། །།དགེའོ།། དགེའོ།། དགེའོ།།