བདེ་གཤེགས་སྒྲུབ་པ་བཀའ་བརྒྱད་ཉང་ལུགས་ཀྱི་གཏོར་བཟློག་སྐོར་གྱི་དྲིས་ལན་གཤིན་རྗེའི་གད་རྒྱངས།

Previous Text Back to Volume Page Next Text

Wylie title	bde gshegs sgrub pa bka' brgyad nyang lugs kyi gtor bzlog skor gyi dris lan gshin rje'i gad rgyangs
Location	'jigs gling bka' 'bum Volume 8, Text 16, Pages 485-495 (Folios 1a1 to 6a5)
Author	འཇིགས་མེད་གླིང་པ་
Less details More details
Citation	'jigs med gling pa. Bde gshegs sgrub pa bka' brgyad nyang lugs kyi gtor bzlog skor gyi dris lan gshin rje'i gad rgyangs. In Kun mkhyen rig 'dzin 'jigs med gling pa'i gsung 'bum, Vol. 8: 485-495. New Delhi: Shechen Publications, 2025.
Genre	Averting or Dispelling Rites- zlog pa · Replies to Questions - dris lan · Torma-offering Rituals - gtor chog
Deity	bka' brgyad
Colophon	ཞེས་པའང་མཁྱེན་བརྩེའི་འོད་ཟེར་གྱིས་སོ།།
Colophon	zhes pa'ang mkhyen brtse'i 'od zer gyis so//

[edit]

༄༅། །བདེ་གཤེགས་སྒྲུབ་པ་བཀའ་བརྒྱད་ཉང་ལུགས་ཀྱི་གཏོར་བཟློག་སྐོར་གྱི་དྲིས་ལན་གཤིན་རྗེའི་གད་རྒྱངས་བཞུགས། །

༄༅། །བཀའ་བརྒྱད་ཀྱི་གཏོར་བཟློག་སྐོར་ལ་དྲི་བ་ཅུང་ཟད་མཛད་པའི་ལན། མ་ཊཾ་ལ་ལྷ་བསྐྱེད་པའི་འདུན་པ་ཇི་ལྟར་བྱ། གསུངས་པ་སྤྱིར་བཀའ་བརྒྱད་ཙམ་ལ་གཏེར་ཁ་བསམ་གྱིས་མི་ཁྱབ་མོད་ཀྱི། གཙོ་བོར་གྱུར་པ་ནི་གོང་འོག་གཉིས་ཁོ་ན་ཡིན། དེ་ཡང་རང་ལུགས་ལ་ནི་གོང་མའི་བདེ་གཤེགས་འདུས་པ་ཞེས་དུར་ཁྲོད་བསིལ་ཚལ་དུ་སློབ་དཔོན་ཆེན་པོར་རིན་པོ་ཆེ་སྣ་ཚོགས་ཀྱི་སྒྲོམ་བུ་ཕྱག་ཏུ་འབྱོར་པའི་ནང་ནས་དཀྱིལ་འཁོར་དགུ་ཚོམ་བུ་གཅིག་ཏུ་སྒྲུབ་ཐབས་བྱུང་བ་བོད་དུ་མངའ་བདག་རྒྱལ་པོ་ལ་གཙོ་བོར་གསུངས་པ་དེ་ཡིན་དེ་ལ་དང་པོ་ནས་ཤོམ་གྱི་སྐབས་དཀྱིལ་འཁོར་རྒྱས་འབྲིང་གཉིས་སུ་ཡོད་པའི་བསྡུས་པ་ནི་སྒོ་མེད་མ་ཊཾ་ལ་གསུངས་ཏེ་བདེ་འདུས་ཀྱི་གཟེར་ཁའི་མན་ངག་གཏེར་བྱོན་རྩ་བར།བསྡུས་པར་བྱེད་ན། མ་ཊཾ་ཆེན་པོ་ཞིག་གི་ཁོག་པར། འཁོར་ལོ་རྩིབས་བརྒྱད་མཐིང་ག་ལ༔ ཟླ་གམ་དམར་པོ་གསུམ་དང་ལྡན་པ༔ མུ་ཁྱུད་དཀར་པོ་ཐོད་པའི་ཕྲེང་བས་བསྐོར་བའི༔ དབུས་དང་རྩིབས་རྣམས་ལ་ཧཱུྃ་རེ་རེ་བཀོད༔ ཅེས་པས་ཞིབ་འགྲེལ་ཟོར་ལས་གནམ་ལྕགས་ཐོག་མདའ་དང་། དཔེ་རིས་བལྟས་ཆོག་མ་སོགས། ཆོས་ཀྱི་གྲགས་པས་མཛད། འོན་ཀྱང་དམིགས་པའི་བྱ་ཐབས་གུད་དུ་མ་བྱུང་བ་སྒྲུབ་ཆེན་གྱིས་ཁོག་འབུབས་པའི་དབང་དུ་མཛད་ཀྱང་། སྤྱིར་མ་ཊཾ་ཡོད་པ་འདི་སྔོན་དཔལ་ཆེན་པོས་རཱུ་ཏྲ་དུམ་བུ་བརྒྱད་དུ་མཛད་དེ་ཕྱོགས་མཚམས་བརྒྱད་དུ་གཏོར་བས་དུར་ཁྲོད་ཆེན་པོ་བརྒྱད་ཆགས་པའི་ཚུལ་ནི། ཆོས་དབང་གི་གསང་རྫོགས་བྱིན་འབེབས་ལས། རཱུ་ཏྲའི་སྙིང་དང་སྟོབས་བཟང་རོ། །ཤར་ཕྱོགས་དུར་ཁྲོད་བསིལ་བ་ཚལ། །ཞེས་སོགས་གསུངས་པ་ལྟར་དང་། ཁོག་པ་རང་བྱུང་ཡེ་ཤེས་ཀྱི་གཞལ་མེད་ཁང་དུ་བྱིན་གྱིས་བརླབས་པ་བཞིན། འདིར་ཡང་རཱུ་ཏྲའི་ཁོག་པ་དཀྱིལ་འཁོར་གྱི་རང་བཞིན་དུ་མོས་དགོས། དེ་ཡང་ཨ་འཐས་དུད་འགྲོའི་ཁོག་པ་ལྟར་གསལ་རྒྱུ་མིན་ཏེ་ལས་བྱང་ནས་ཇི་ལྟར་བཤད་པའི་དཀྱིལ་འཁོར་སྒོ་རྫོགས་ཁོ་ན་གསལ་དགོས་ཏེ། འོ་ན་རྡུལ་ཚོན་ལ་སྒོ་རྫོགས་མེད་པར་ཇི་ལྟར་འཐད་སྙམ་ན། དེ་ཕྱི་མཚན་མ་རྫས་ཀྱི་དཀྱིལ་འཁོར་བསྐྱེད་གཞིའི་རྟེན་ཡིན་ཏེ། དོན་དུ་དམིགས་པའི་བྱེད་ལས་ཀྱིས་དཀྱིལ་འཁོར་ཚུལ་ལྡན་འདོན་ཆ་དང་མཐུན་པར་སྒོམ་དགོས་ལ། དེ་ལྟར་མ་ཡིན་ན་འབྲུ་ཚོམ་ལ་བརྟེན་པ་རྣམས་ཀྱང་དཀྱིལ་འཁོར་དུ་སྒོམ་མི་རུང་བའི་སྐྱོན་ཡོད་དོ། །གཉིས་པ་དེ་ལ་གཏོར་མ་བཀོད་ནས་དམིགས་པ་ཇི་ལྟར་བྱེད་དགོས་གསུངས་པ་སྤྱིར་གཏོར་བཟློག་འདི་རིགས་ལ་གཏོར་མ་ཡང་ཐོག་མ་ཉིད་ནས་འགོད་དགོས་པ་མ་གཏོགས་བློས་བྱས་ཀྱི་ལག་ལེན་གློ་བུར་བ་ལ་གཞུང་གི་ཁུངས་འདྲེན་རྒྱུས་དབེན་པ་དང་། གལ་ཏེ་ནམ་དུས་ཀྱིས་ཞིག་དོགས་སོགས་ཡིན་ན་རྟེན་གཞལ་ཡས་ལ་བརྟེན་པའི་ས་བོན་བཀོད་པ་བཞིན་ལྷ་མངོན་རྟོགས་དང་མཐུན་པ་བསྒོམས་པ་ཁོ་ནས་ཆོག་ལ། རྗེས་སོར་བུམ་པ་འཛུགས་པ་སོགས་སྣ་ཚོགས་ཤིག་བྱ་གི་འདུག་པ་གཏོར་བཟློག་གི་གཞུང་མན་ངག་བརྒྱུད་པའི་ཕྱག་ལེན་སོགས་གང་ནས་ཀྱང་མ་བཤད་ལ། དབང་སྒྲུབ་ལྟ་བུའི་ཞྭ་དཔེ་ལྷྭམ་འགེབས་ཡིན་ཤས་ཆེ་ཡང་མཚུངས་པའི་སྐབས་མེད་དེ། ཅིའི་ཕྱིར་ན་དེ་དག་གི་ཚེ་ནི་ཐུན་མཐར་བུམ་པའི་ལྷ་འོད་ཞུ་བྱས་ཏེ་བདག་དོན་དུ་དངོས་གྲུབ་ཞུ་བ་དང་། གཞན་དོན་དུ་སློབ་མ་སྨིན་པར་བྱ་བའི་སྟབས་ཡིན་པ་མ་རྟོགས། དྲག་ལས་ལ་ཞི་བའི་དཔེ་སྦྱར་འོད་ཞུ་སོགས་མེད་པའི་བུམ་ཆུས་གཏོར་མའི་ཁུ་བ་བྱེད་བའི་མཁས་ཁྱད་བླུན་པོའི་བྱ་ལས་སོ། །བདེ་འདུས་ཀྱི་ཉམས་ལེན་གྱི་མཐིལ་གཟེར་ཁའི་མན་ངག་ལས། སྤྱི་དོན་གཉིས་པ་ལག་ཏུ་བླང་བའི་རིམ་པ་ལ་གཉིས༔ ཐུན་མོང་ཕྲིན་ལས་ཀྱི་གཞུང་བསྲང་བ་དང༔ ཁྱད་པར་དུ་བཟློག་པའི་ཕྲིན་ལས་སོ༔ ཞེས་པའི་ས་བཅད་ཀྱི་རྩིས་མགོ་བསྡུས་ནས། གཏོར་མ་ལ་ནི་སྤྱིར་བཏང་དུ་ཤེས་པ་སུམ་ལྡན་ཞེས་སུ་བཞེད་ཀྱང་། བདེ་འདུས་རང་ལུགས་ལ་ཤེས་པ་བཞི་ལྡན་གྱིས་ལྡོག་པ་ཤེས་དགོས་ཏེ། མན་ངག་གཅེས་པའི་ལྡེ་མིག་ཏུ། ལག་ལེན་ཤེས་པ་བཞིར་བསྟན་ཏེ༔ བ་ལིཾ་གཏོར་མ་ཆེན་པོ་ཉིད༔ མཆོད་པར་ཤེས་དང་ལྷར་ཤེས་དང༔ དམག་དཔུང་ཤེས་དང་ཟོར་ཤེས་བྱཿ ཞེས་གསུངས་པ་ལྟར་དང་པོ་ལས་བྱང་སྐབས་མཆོད་པར་ཤེས་དགོས་ཏེ། དེ་ཉིད་ལས། དང་པོ་ཕྲིན་ལས་གཞུང་སྲོང་དུས༔ བ་ལིཾ་མཆོད་པར་ཤེས་པར་བྱ༔ ཞེས་གསུངས། དེ་ནས་བཟློག་གཞུང་གྱེར་བའི་ཚེ༔ ལྷར་མོས་དགོས་ཏེ།གཉིས་པ་བཟློག་གཞུང་གྱེར་བའི་ཚེ༔ གཏོར་མ་ལྷ་དགུར་ཤེས་པ་གཅེས༔ ཞེས་གསུངས། དེ་ཡང་ཞིབ་ཏུ་ནི། གཏོར་སྣོད་བྷྲཱུྃ་ལས་གཞལ་ཡས་ཁང༔ དཔལ་དགུ་ཧཱུྃ་ལས་གཙོ་བོ་དགུ༔ མཐེབ་ཀྱུ་འཁོར་ཚོགས་གསལ་བར་བསྐྱེད༔ ཅེས་གསུངས་པ་ལྟར་དང་དེ་ནས་ཆད་མདོའི་སྐབས་ལ་སོགས་གཏོར་མ་རྒྱག་ཁར་དམག་དཔུང་དུ་ཤེས་དགོས་ཏེ། གསུམ་པ་དམག་དཔུང་ཤེས་པ་ནི༔ གཏོར་མ་བཀའ་བརྒྱད་སྲུང་མ་དང༔ དཔལ་མགོན་བདུན་ཅུ་རྩ་གཉིས་སོགས༔ ལྷ་དམག་བྱེ་བ་དུང་ཕྱུར་རྣམས༔ བདག་གི་བཀའ་ཉན་ལས་བྱེད་ཅིང༔ དགྲ་ཡུལ་དམག་གིས་གང་བར་བསྒོམ༔ ཞེས་གསུངས། དེ་ནས་འཕངས་པ་རང་གི་ཚེ་ན་གཏོར་མའི་ཡེ་ཤེས་པ་རྣམས་རང་ལ་བསྡུ། གཏོར་མ་དམ་ཚིག་པ་མཚོན་ཆ། མེ་དཔུང་། དུག་རླངས། ཁོ་ཆུ་ལ་སོགས་ཏེ་འཇིགས་སུ་རུང་བའི་རྣམ་པ་ཅན་འབའ་ཞིག་ཏུ་སྒོམ། མེ་དཔུང་གི་དབུས་སུ་ཞིང་བཅུ་ཚང་བའི་བསྟན་དགྲ་སྡེ་རིས་ཡུལ་འཁོར་དང་བཅས་པ་ཁྲ་ལམ་གྱིས་གསལ་བཏབ་ནས་འཕངས་དགོས་ཏེ། སྔ་མའི་འཕྲོར། བཞི་པ་ཟོར་དུ་ཤེས་པ་ནི། གཏོར་མའི་ལྷ་རྣམས་བདག་ལ་བསྡུ༔ གཏོར་ཟོར་འཕངས་པ་ལས་བསྐུལ་ལ༔ ཕྱོགས་བརྒྱད་བ་ལིཾ་དགྲ་ལ་བརྡེག༔ ཟོར་རྫས་མཚོན་ཆར་བསྒྱུར་བྱས་ལ༔ ཕྱིར་འཕངས་དགྲ་འདྲེ་བརླག་པར་བསམ༔ ཞེས་གསུངས་པ་རྣམས་མན་ངག་གི་གནད་དམ་པ་ཡིན། གཏོར་དྲིལ་བྱེད་པའི་སྐབས་གཏོར་མ་དཔགས་དགོས། དེའི་ཚུལ་ཤིན་ཏུ་ཞིབ་པ་ཆོས་ཀྱི་གྲགས་པས་གསུངས་མོད། ས་བོན་ཧཱུྃ་ཡིག་གཏོད་ཕྱོགས་ལ། །བསྲུང་བཟློག་གསད་པའི་ཁྱད་པར་ཡོད། །བསྲུང་དང་དཀྱིལ་འཁོར་མཐའ་དག་ལ། །ཡིག་མགོ་ཕྱིར་སྟོན་གཙོ་བོ་ལ། །འཁོར་རྣམས་རང་ཞལ་བསྟན་ནས་ཡོད། །ཡིག་མགོ་ནང་ལ་བསྟན་པ་ན། །འཁོར་ཞལ་ཕྱི་ལ་ཕྱོགས་པ་སྟེ། །བཟློག་གསད་ལ་སོགས་འཁོར་ལོ་དང་། །དམིགས་བསལ་མན་ངག་ཡོད་པ་ལ། །ཡིག་མགོ་ནང་བསྟན་ངེས་པར་དགོས། །སྟོང་ཚིགས་ཀྱི་མཆོད་པ་ཞེས་པའི་སྒྲ་བཤད་བཟླས་པ་གང་ཡིན་སྟོང་ཕྲག་རེ་སོང་བའི་མཚམས་སུ་མཆོད་པ་འདི་ཚར་རེ་བྱ་དགོས་པ་ཡིན་ཡང་ཁྲོ་རོལ་ལྟ་བུའི་བཟློག་གཞུང་དང་འབྲེལ་སྐབས་བཟླས་པ་ལྷ་རེ་རེ་ནས་སྟོང་ཕྲག་གྲངས་ལངས་འདྲེན་ལོང་མེད་པས་སྟོང་ཚིགས་ཀྱི་ཐ་སྙད་དེར་ཟད་ལ། རང་ལུགས་སྔ་མོའི་ཕྱག་རྒྱུན་བཟླས་པ་རིང་ཐུང་ཇི་ལྟར་ཡང་ལྷ་འཕོ་མཚམས་སྟོང་ཚིགས་ཀྱི་མཆོད་པར་གྲགས་པ་དེ་ཁ་ངེས་པར་དགོས། བཟློག་གཞུང་གཏོང་མཚམས་ད་ལྟའི་འདི་མིན། བཟློག་གཞུང་མ་གཏང་གོང་ལ་ཚོགས་མཆོད་བྱས་པའི་ཚོགས་ཐ་མའི་བསྒྲལ་བསྟབ་ཀྱི་རྗེས་དེ་ནས་བཟློག་གཞུང་གི་མགོ་འཛུགས་དགོས་པ་བཟློག་པ་སྤྱིའི་མན་ངག་ཀྱང་ཡིན། ཆོས་ཀྱི་གྲགས་པའི་ཟོར་ལས་གནམ་ལྕགས་ཐོག་མདའ་ལ་ལྟོས། ཡང་ཚོགས་ཀྱི་རྗེས་འབྲེལ་དུ་བཟློག་གཞུང་གྱེར་བའི་ཕྱག་ལེན་རྣམ་དག་གིས་རྗེས་སུ་འབྲང་ཚེ། ཚོགས་རང་གི་བསྒྲལ་བསྟབས་ཀྱི་གོང་དེར་གསེར་སྐྱེམས་གཟུ་དཔང་གཏོང་དགོས་སམ་མི་དགོས་ལན། སྤྱིར་ལུགས་གཞན་དུ་ཟོར་ལས་ཁོ་ན་ལ་བསྒྲལ་བསྟབ་རྒྱས་པར་ཡོད་པའི་དབང་གིས་ཚོགས་ཐ་མའི་བསྒྲལ་བསྟབ་མི་བྱེད་པར་དེ་ཁས་གོ་གཅོད་པའི་ལུགས་ཡོད་པར་སྣང་ཡང་། རང་ལུགས་ལ་དེ་ལྟར་མི་བྱེད་དེ། ཆོས་ཀྱི་གྲགས་པས། ལ་ལ་དག་བསྒྲལ་ལས་བྱེད་དུས་ཚོགས་ཐའི་བསྒྲལ་མཆོད་མི་བྱེད་པ་སྐད་ཟེར་ཡང་གོ་བ་མེད་པའི་མཁས་འདོད་དུ་ཟད་པས་ཚོགས་མཆོད་གསུམ་ག་རྒྱས་པར་བྱའོ། །ཞེས་གསུངས་པས་ཚོགས་ཐོག་མཐའ་བར་གསུམ་ལས་བྱང་ཁོ་ན་བཞིན་བྱ་བ་ལས་འདོན་འཇུག་ཡེ་མི་དགོས། སྐབས་འདིར་སྡེ་བདུན་གྱི་གསོལ་ཁ་དང་། བཀའ་བརྒྱད་ཀྱི་མདངས་སྐོང་། བམ་སྐོང་། ཕུད་སྐོང་། སོགས་བྱ་དགོས་པ་ཡིན། དེའི་དོན་ཧྲིལ་གྱིས་དྲིལ་ན། རྡོ་རྗེ་ལྟ་བུའི་ཏིང་འཛིན་གྱི༔ ཞེས་པ་ནས། རྔམས་པའི་སྟོབས་ཀྱིས་དགྱེས་པར་བཞེས་སུ་གསོལ། ཞེས་པའི་བར་ལས་བྱང་བཞིན་བྱས་ལ། ཉིན་དང་པོ་ཡིན་ན། བཟློག་གཞུང་གི་མགོ་ནས་གཏོང་། དེ་མིན་རྗེས་མ་ཚོར་ལྷ་སོ་སོའི་མགོ་འཛུགས་ཀྱིས་སྔོན་དུ་འགྲོ་དགོས་པས་གསེར་གཟུ་ནས་རིམ་པར་སྔར་ལུགས་བཞིན་གཏོང་། ཕྱི་དྲོ་བསྐང་གསོའི་མཇུག་ཏུ་ཚོགས་མཆོད་སྒྲ་ཇི་བཞིན་པ་མ་གྲུབ་ཀྱང་སྐྱོན་ཡོད་པ་མེད་དེ། སྤྱིར་བཏང་དུ་ལྷག་མ་ནས་བཟུང་རྗེས་ཆོག་རྣམས་བྱས་པ་ཁོ་ནས་ཡོང་། བཟློག་གཞུང་ཚུགས་པ་ནས་བཟུང་ལས་སྦྱོར་ལ་ཞུགས་པ་ཡིན་གཤིས་བཟླས་པའི་མཇུག་ཏུ་དམིགས་གནད་དང་ལྡན་པའི་སྒོ་ནས་དྲག་སྔགས་སོ་ལྔ་པ་གྲངས་མང་བ་བཟླ་དགོས་པ་ཡིན། ཡང་མངོན་སྤྱོད་ཀྱི་མཇུག་བསྡུའི་སྐོར་ལ། སྤྱིར་དྲག་ལས་ཐམས་ཅད་ལ་མཐའ་སྡུད་རྣམ་པ་གསུམ་ཡིན་ཏེ། སྙིང་གཟེར་ནག་པོ་ལས། ཆ་གསུམ་དག་ཏུ་བསྒོ་བ་ནི༔ མནན་བསྲེག་འཕངས་པའི་ལས་གསུམ་ཡིན༔ ཞེས་པས་ཤེས་ལ། དེ་ལ་ད་ལམ་འཕྲོས་དོན་འདིའི་དབང་དུ་བགྱིས་ན། དེ་ཉིད་ལས། རླུང་ལ་བསྐུར་བ་ཟོར་ཡིན་ཏེ༔ ཞེས་གསུངས་པའི་ཟོར་དེ་ཉིད་དུས་ནམ་ཞིག་འཕེན་པའི་ཚེ། སྔོན་དུ་གཏོར་ཐེབས་དཔྱིས་ཕྱིན་པར་བརྩི་བར་གལ་ཆེ་ཡང་། སྒྲ་གཅན་རྐྱང་པ་ཙམ་ལ་བརྟེན་པ་ད་དུས་གྲགས་ཆེ་མོད། ཞིབ་པའི་དུས་སུ་སྐར་རྩིས་ལ་བརྟེན་ནས་གཟའ་ལྔའི་མཆེ་གདོང་དུ་སོལ་འཁྱུད་གསུམ་ལ་སོགས་པའི་བརྟག་དཔྱད་དང་གནམ་གྱི་སྒྲ་གཅན་གྱི་གདོང་ཐེབས། ནག་རྩིས་ལ་བརྟེན་ནས་རྡོ་རྗེ་སློབ་དཔོན་གྱི་ལོ་འགྲོས་འབྱུང་ཁམས་རྣམས་ཀྱི་དར་གུད། དམིགས་བྱ་ལ་གྱིམ་ཤང་གནད་དུ་འཕྲོད་པ་སྡེ་བརྒྱད་དང་ས་བདག་གི་བཟློག་ཐེབས། སའི་སྒྲ་གཅན། དབྱངས་འཆར་ལ་བརྟེན་ནས་རྟེན་འབྲེལ་གྱི་དཔྱད་པ་དང་། དབྱངས་དུས་གཉིས་སོ་སོའི་བིཥྚི། རྣལ་འབྱོར་མ། དུས་མཚན་མ། ཐུན་ཕྱེད་གཉིས། ཡུད་ཙམ་ལ་འཆར་བའི་དུས་སྦྱོར་གྱི་ཏཱ་རྐལ། དུས་ཚོད་ཀྱི་སྒྲ་གཅན་ལ་སོགས་པས་མཚོན་ཏེ་ཕྱོགས་མཐུན་ཞིབ་རྩིས་སུ་བྱ་བ་མདོར་ན་དཔུང་ཆེན་འདེགས་པའི་གཡུལ་རྒྱལ་ཇི་བཞིན་བརྩི་དགོས། དེས་ན་བསྟན་དོན་གྱི་རིགས་ལ་འདིའི་གནད་ཤེས་པར་བྱ། གཞན་དུ་ནི་དགོས་པ་ཡང་ཆུང་ལ་རཀྴའི་ཕྲེང་བ་ཐོགས་ཚད་ཀྱི་སྤྱོད་ཡུལ་དུ་མ་གྱུར་པས་དེ་ཙམ་གྱིས་མཐའ་བསྡུས། ཟོར་འཕངས་པ་དངོས་གཞིའི་ཚེ་དང་། དེའི་རྗེས་འབྲེལ་དུ་གཏོར་རྟགས་ལ་རྣམ་པ་གསུམ་ཡོད་དེ། སྙིང་གཟེར་ལས། གནམ་ཟློག་སྐར་མདའ་དག་ལ་བརྟག༔ བར་ཟློག་རྫི་བས་ཤེས་པར་བྱ༔ ས་ཟློག་གཏོར་ཁྲག་སྣོད་ལ་བརྟག༔ ཅེས་པས་གནམ་ས་བར་གསུམ་གྱི་བརྟག་གཞི་བསྟན་ལ། དེ་ལྟར་བརྟགས་པའི་རྗེས་འབྲེལ་དུ་ལ་ཉེ་དངོས་ལ་དཔྱད་པ་ནི། དེ་ཉིད་ལས། ཕར་སོང་ཚུར་བསྟན་ལོགས་བསྟན་གསུམ༔ ཐེབས་དང་ལོག་དང་འབྱམས་པ་ཡིན༔ ཞེས་པས་གོ་བར་ནུས། སྣང་སྲིད་གཡོ་འཁྲུག་ནུས་པ་པད་འབྱུང་དང་། །མཐུ་མཁན་སངས་རྒྱས་ཡེ་ཤེས་ཅིས་མ་ཡིན། །ལག་ལེན་ཤེས་པ་སོ་ཟུར་གནུབས་གསུམ་གྱི། །སྔགས་འཆང་བརྒྱུད་པར་བཅས་ལས་གཞན་དུ་མིན། །ཞེས་པའང་མཁྱེན་བརྩེའི་འོད་ཟེར་གྱིས་སོ།། །།