གཤིན་རྗེ་ཡི་གེ་བཞི་པའི་སྲུང་བཟློག་མན་ངག་རྡོ་རྗེ་ཕ་ལམ།

From Khyentse Lineage - A Tsadra Foundation Project
JKW-KABUM-20-WA-005-003
Wylie title gshin rje yi ge bzhi pa'i srung bzlog man ngag rdo rje pha lam JKW-KABUM-20-WA-005.pdf
Location mkhyen brtse'i bka' 'bum
Volume 20, sde tshan 5, Text 3, Pages 554-559 (Folios 2b6 to 5a5)
Author འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s) རྭ་ལོ་ཙཱ་བ་རྡོ་རྗེ་གྲགས་ (rwa lo tsA ba rdo rje grags)
Citation 'jam dbyangs mkhyen brtse'i dbang po. gshin rje yi ge bzhi pa'i srung bzlog man ngag rdo rje pha lam. In 'jam dbyangs mkhyen brtse'i dbang po'i bka' 'bum, Vol. 20: 554-559. Khams sde dge rdzong sar dgon: Rdzong sar blo gros phun tshogs, 2020.
Genre Pith Instructions - man ngag  ·  Averting or Dispelling Rites- zlog pa  ·  Activity Practices - las tshogs
Deity 'jam dpal gshin rje
Colophon

།གཤིན་རྗེ་ཡི་གེ་བཞི་པའི་སྲུང་བཟློག་བསད་པའི་མན་ངག་ཞལ་ཤེས་དང་བཅས་པ་རྭ་ལོ་ཙཱ་བ་རྡོ་རྗེ་གྲགས་ཀྱིས་བལ་པོ་ཐུགས་རྗེ་ཆེན་པོ་ལ་གསེར་སྲང་བརྒྱ་འབུལ་བར་དམ་བཅས་ནས་གནང་བའི་གདམས་པ་ཆིག་བརྒྱུད་ཤིན་ཏུ་ཟབ་མོ་ཨྠིྀ། །གུ་ཧྱ།།

gshin rje yi ge bzhi pa'i srung bzlog bsad pa'i man ngag zhal shes dang bcas pa rwa lo tsA ba rdo rje grags kyis bal po thugs rje chen po la gser srang brgya 'bul bar dam bcas nas gnang ba'i gdams pa chig brgyud shin tu zab mo a+thi+-i/___/gu h+ya//

1 Texts in this Section (sde tshan or chos tshan)

[edit]
གཤིན་རྗེ་ཡི་གེ་བཞི་པའི་སྲུང་བཟློག་བསད་པའི་མན་ངག་རྡོ་རྗེ་ཕ་ལམ་བཞུགས་སོ། །ན་མོ་བཛྲ་བྷེ་ར་ཝཱ་ཡ། དཔལ་རྡོ་རྗེ་འཇིགས་བྱེད་ཀྱི་སྒོ་ནས་སྲུང་བ་དང་། བཟློག་བསད་ཀྱི་མན་ངག་ལ་གཉིས་ཏེ། དང་པོ་སྲུང་བ་ནི། ཐོ་རངས་གཉིད་སད་མ་ཐག་གཞན་དང་གཏམ་མ་འདྲེས་པའི་ཚེ་ཁ་ཤར་དུ་ཕྱོགས་ཏེ། སྐྱབས་སེམས་སྤྱི་ལྟར་རྗེས། ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུ་དྡྷོ་྅་ཧཾ། སྟོང་པའི་ངང་ལས་སྲེག་བྱེད་མེའི་དཀྱིལ་འཁོར་གྱི་དབུས་སུ་པདྨ་དང་ཉི་མའི་གདན་ལ། ཧཱུྃ་ཞེས་བརྗོད་པས། རང་སྐད་ཅིག་གིས་རྡོ་རྗེ་འཇིགས་བྱེད་དྲག་པོ་སྲུང་བྱེད་འབར་བ། སྐུ་མདོག་ནག་པོ་མུན་པའི་གོས་ཅན། བསྐལ་པའི་མེ་ལྟར་དྲག་པ། ཞལ་གཅིག་ཕྱག་གཉིས་པ། གཡས་གནམ་ལྕགས་ཀྱི་རལ་གྲི་འབར་བ་དང་། གཡོན་དྲག་པོའི་སྡིག་མཛུབ་མཛད་པ། ལྕགས་བསྲེགས་ཀྱི་རལ་པའི་གུར་ཁང་ལས་མཚོན་ཆའི་མེ་འོད་རབ་ཏུ་འཕྲོ་བ། ཞབས་གཉིས་བགྲད་པའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། སྐུ་རི་རབ་དང་མཉམ་པ་དྲག་ལ་རྔམ་པའི་ཆ་ལུགས་ཅན། ཐུགས་ཀར་སྣ་ཚོགས་རྡོ་རྗེའི་ལྟེ་བར་ཨེ། དེའི་ཁོང་སེང་གི་ནང་དུ་ཐིག་ལེ་ཁ་དོག་ལྔ་ལྡན། དེའི་ནང་དུ་ཉི་ཟླའི་གྭའུ་ཁ་སྦྱོར། དེའི་ནང་དུ་རང་གི་རྣམ་པར་ཤེས་པའི་ངོ་བོ་ཧཱུྃ་སྔོན་པོ། ཧཱུྃ་གི་ཐིག་ལེའི་ནང་དུ་བླ་མ་ཡི་དམ། ཁོག་པའི་ནང་དུ་མཁའ་འགྲོ་ཆོས་སྐྱོང་། གཡས་གཡོན་དུ་ཕ་མ། མདུན་དུ་འཁོར་གཡོག །རྒྱབ་ཏུ་ནོར་རྫས་ཡུལ་འཁོར་སོགས་བསྲུང་བྱ་ཐམས་ཅད་མངོན་སུམ་བཞིན་དུ་འཁོད་ཅིང་། བྱད་མའི་ལྷ་སྲུང་ནུས་མཐུ་དང་བཅས་པ་ཐམས་ཅད་བསྡུས་ཏེ། རལ་པའི་གུར་ཁང་གི་ཕྱི་རོལ་མཚོན་ཆའི་འཁོར་ལོ་ལ་ཐིམ་པས། འཁོར་ལོ་གཡས་སུ་ཤུགས་དྲག་ཏུ་འཁོར་བས་འགལ་རྐྱེན་བར་ཆད་ཐམས་ཅད་ཕྱོགས་སུ་ཉེ་མི་ནུས་ཤིང་། རང་གི་ལུས་ངག་ཡིད་གསུམ་རྡོ་རྗེའི་ནུས་པ་དང་ལྡན་པར་གྱུར། ཅེས་བརྗོད་ཅིང་བསམས་ལ། ཨེ་ས་བྷྱོ་སྲུང་། ཞེས་བརྒྱ་རྩ་བརྒྱད་བཟླས་པའི་མཆིལ་མས་རང་གི་གནས་གསུམ་དུ་ཐིག་ལེ་རེ་བྱའོ། །གཉིས་པ་བཟློག་བསད་ཟུང་དུ་འཇུག་པའི་མན་ངག་ནི། ཉི་མ་ནུབ་ཁ་མདུང་གང་ཙམ་གྱི་དུས་ཁ་ནུབ་ཏུ་ཕྱོགས་པས། སྐྱབས་སེམས་དང་། སྭ་བྷ་ཝ་སོགས། སྟོང་པའི་ངང་ལས་སྲེག་བྱེད་མེའི་དཀྱིལ་འཁོར་གྱི་དབུས་སུ་པདྨ་དང་ཉི་མའི་གདན་ལ་ཧཱུྃ་ཞེས་བརྗོད་པས། རང་སྐད་ཅིག་གིས་རྡོ་རྗེ་འཇིགས་བྱེད་ནག་པོ་ཟློག་བྱེད་འབར་བ། སྐུ་མདོག་ནག་པོ་མུན་པའི་གོས་ཅན། བསྐལ་པའི་མེ་ལྟར་དྲག་པ། ཞལ་གཅིག་ཕྱག་གཉིས་པ། ཕྱག་གཡོན་པའི་མཐེ་བོང་གསེར་ཀྱི་སྟྭ་རེ་རྣོ་ཞིང་མེ་འོད་འབར་བ། མཛུབ་མོ་དངུལ་གྱི་གཏན་པ་ཡངས་ཤིང་རྒྱ་ཆེ་བ། ལྕགས་བསྲེགས་ཀྱི་རལ་པའི་གུར་ཁང་། སོགས་ནས། བསྲུང་བྱ་ཐམས་ཅད་མངོན་སུམ་བཞིན་དུ་འཁོད། ཅེས་པའི་བར་སྲུང་བའི་སྐབས་ལྟར་བརྗོད། རང་གི་མདུན་དུ་ཨེ་ལས་ཆོས་ཀྱི་འབྱུང་གནས་གྲུ་གསུམ་མཐིང་ནག་འབར་བ་ཡངས་ཤིང་རྒྱ་ཆེ་བའི་ནང་དུ། འཆི་བདག་ལས་ཀྱི་གཤིན་རྗེ་འཇིགས་པའི་ཆ་བྱད་ཅན་ཁ་རབ་ཏུ་གདངས་པ། ལྟོ་བ་ན་སྲིད་པ་གསུམ་གྱི་གྲོང་ཁྱེར་དང་། མཚོན་ཆའི་འཁོར་ལོ་ལས་ཀྱི་མེ་རབ་ཏུ་འབར་བ་དང་བཅས་པར་གྱུར་ཅེས་བརྗོད་ཅིང་བསམ། དེ་ནས་རང་གི་ཐུགས་ཀ་ནས་ཕོ་ཉ་ཁྲོ་བོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས། དགྲ་བགེགས་ཐམས་ཅད་ལྕགས་ཀྱུས་སྙིང་ཁ་ནས་བཟུང་། མགྲིན་པ་ནས་ཞགས་པས་བཅིངས། ཡན་ལག་ལྕགས་སྒྲོག་གིས་བསྡམས། མཚོན་ཆ་སྣ་ཚོགས་ཀྱིས་བསྡིགས་ནས་རང་དབང་མེད་པར་བཀུག་སྟེ། དངུལ་གྱི་གཏན་པའི་སྟེང་དུ་བཞག་པ་ཉིད། གསེར་གྱི་སྟྭ་རེས་མགོ་ལུས་དུམ་བུར་གཏུབས་ཤིང་། གཤིན་རྗེའི་ཞལ་དུ་བསྟིམ་པ་ཆོས་སྒྲ་དང་བཅས་ཏེ་གསོལ། ལྟོབ་ནས་ལས་ཀྱི་མེ་རླུང་འབར་བས་ཐལ་བར་བྱས་པ་གྱུར་པར་བསམས་ལ། ཕྲེང་བ་ཕྱིར་ཕུལ་ཞིང་། དབུགས་ཐོག་གཅིག་ལ། ཨེ་ས་བྷྱོ་བཟློག །ཅེས་དྲུག་ཅུ་རྩ་བཞི་སོགས་དྲག་ཏུ་བཟླ། རྗེས་སུ་ཐལ་མོ་སྦྱར་ལ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་དང་། བཅོམ་ལྡན་དཔལ་རྡོ་རྗེ་འཇིགས་བྱེད་འཆི་བདག་ལས་ཀྱི་གཤིན་རྗེའི་ཚོགས་དང་བཅས་པ་རྣམས་ཀྱི་བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་སྡང་བའི་སེམས་དང་ལྡན་པ། གདུག་པའི་སེམས་དང་ལྡན་པ། དྲག་ཤུལ་གྱི་སེམས་དང་ལྡན་པ། བསམ་པ་ངན་པ། སྦྱོར་བ་རྩུབ་པར་བྱེད་པའི་དགྲ་བགེགས་བྱད་མ་འཁོར་ དང་བཅས་པའི་ལུས་བཅིང་བར་བགྱིའོ། །ངག་བཅིང་བར་བགྱིའོ། །ཡིད་བཅིང་བར་བགྱིའོ། །མཐུ་བརླག་པར་གྱུར་ཅིག །སྟོབས་བརླག་པར་གྱུར་ཅིག །རྫུ་འཕྲུལ་བརླག་པར་གྱུར་ཅིག །དེས་བཟླས་པའི་སྔགས་ཀྱིས་དེ་ཉིད་བརླག་པར་གྱུར་ཅིག །དེས་བསྒྲུབ་པའི་ལྷ་འདྲེས་དེ་ཉིད་ཀྱི་ཤ་ཟ་བར་གྱུར་ཅིག །ཅེས་བརྗོད་ཅིང་ཐལ་མོ་བརྡབ། མཆིལ་མ་ཕྱིར་དོར། ཏིང་ངེ་འཛིན་ནི། གནམ་ལྕགས་ཀྱི་རལ་པའི་གུར་ཁང་ནས། གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་གཡོན་དུ་དྲག་ཏུ་འཁོར། དེ་ལས་མཚོན་ཆ་སྣ་ཚོགས་དང་། ལས་ཀྱི་མེ་རླུང་རབ་ཏུ་གཡོས་པས་གནོད་བྱེད་ཐམས་ཅད་ཀྱི་ལུས་བྱ་སྒྲོ་མེས་བསྲེགས་པ་བཞིན་དུ་ཐལ་བ་བྱས། རྣམ་ཤེས་འོད་གསལ་གྱི་དབྱིངས་སུ་ཐིམ་པར་བསམས་ལ། ཁྲོ་བོ་འབར་བའི་ཚོགས་རྣམས་ཀྱིས། །དགྲ་བགེགས་རྣམས་ནི་ཐམས་ཅད་ཀྱི། །ལུས་ངག་ཐལ་བའི་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྒྲོལ། །ཅེས་བརྗོད་ཅིང་སྤྲོས་བྲལ་གྱི་ངང་དུ་བཞག །དགེ་བ་འདི་ཡིས་མྱུར་དུ་བདག །རྡོ་རྗེ་འཇིགས་བྱེད་འགྲུབ་གྱུར་ནས། །གཟུང་འཛིན་དགྲ་བགེགས་ཇི་སྙེད་ཀུན། །འོད་གསལ་ཀློང་དུ་སྒྲོལ་བར་ཤོག །ཅེས་སོགས་བསྔོ་སྨོན་བྱ། འདི་དུས་སྤྱི་དང་། ཁྱད་པར་ཉི་ཤུ་དགུ་སོགས་དྲག་པོའི་དུས་ལ་འབད། རྨི་ལམ་སོགས་ཤིན་ཏུ་རྩུབ་ན། ལག་གཡས་ཀྱི་མཐིལ་དུ་ཤ་དམར་དུམ་བུ་ཞིག་བཞག་ལ། བདེན་སྟོབས་བརྗོད་པ་དང་བཅས་པས་བྱད་མ་དགུག་གཞུག་གི་དམིགས་པས་དངོས་སུ་གསལ་ལ། ལག་གཡོན་པའི་མཐེབ་འཛུབ་ཀྱིས་བླངས་ཏེ། ཨེ་ས་བྷྱོ་རྦད། ཅེས་བཟླ་བ་དང་ལྷན་ཅིག་དམིགས་པ་སྔར་བཞིན་གྱིས་བསད་པའི་ཤ་ཁྲག་ཚོགས་སུ་རོལ་བས། དྭངས་མ་ཕུང་ཁམས་ལྷར་གསལ་བ་ཚིམ། སྙིགས་མ་ལྟེ་འོག་གཏུམ་མོའི་མེའི་ཁྲོད་དུ་ཆོས་སྲུང་ལས་གཤིན་འཁོར་བཅས་གསལ་བའི་ཞལ་དུ་སོང་བས་རྔམས་པའི་བཞད་སྒྲ་དང་བཅས་ལྷག་མེད་དུ་གསོལ་བར་བསམས་ལ་འཛིན་མེད་ཀྱི་ངང་དུ་བཞག་གོ། །གཤིན་རྗེ་ཡི་གེ་བཞི་པའི་སྲུང་བཟློག་བསད་པའི་མན་ངག་ཞལ་ཤེས་དང་བཅས་པ་རྭ་ལོ་ཙཱ་བ་རྡོ་རྗེ་གྲགས་ཀྱིས་བལ་པོ་ཐུགས་རྗེ་ཆེན་པོ་ལ་གསེར་སྲང་བརྒྱ་འབུལ་བར་དམ་བཅས་ནས་གནང་བའི་གདམས་པ་ཆིག་བརྒྱུད་ཤིན་ཏུ་ཟབ་མོ་ཨྠིྀ། །གུ་ཧྱ།། །། ༈

Footnotes

Other Information