ལོ་ཏོག་ལ་ཕན་པའི་གདམས་ངག་བདུད་རྩིའི་སྙིང་པོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	lo tog la phan pa'i gdams ngag bdud rtsi'i snying po
Location	mkhyen brtse'i bka' 'bum Volume 20, sde tshan 5, Text 4, Pages 559-572 (Folios 5a5 to 11b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lo tog la phan pa'i gdams ngag bdud rtsi'i snying po. In 'jam dbyangs mkhyen brtse'i dbang po'i bka' 'bum, Vol. 20: 559-572. Khams sde dge rdzong sar dgon: Rdzong sar blo gros phun tshogs, 2020.
Genre	Spiritual Instructions - gdams ngag  ·  Activity Practices - las tshogs
Colophon	།ཞེས་པའང་མཉྫུ་གྷོ་ཥས་བྲིས་པ་དགེ། མངྒ་ལཾ།།
	zhes pa'ang many+dzu g+ho Shas bris pa dge/___mang+ga laM//_

1 Texts in this Section (sde tshan or chos tshan)

4 559-572	ལོ་ཏོག་ལ་ཕན་པའི་གདམས་ངག་བདུད་རྩིའི་སྙིང་པོ། lo tog la phan pa'i gdams ngag bdud rtsi'i snying po Spiritual Instructions - gdams ngag   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ལོ་ཏོག་ལ་ཕན་པའི་གདམས་ངག་བདུད་རྩིའི་སྙིང་པོ་བཞུགས་སོ། །བླ་མ་དང་རིགས་གསུམ་མགོན་པོ་ལ་ཕྱག་འཚལ་ལོ། །འབྱུང་ཁམས་ཆུ་ནང་འཕྲད་སོགས་གཟའ་སྐར་འཕྲོད་སྦྱོར་ཤིས་པའི་ནམ་ལངས་ཀླུ་གནས་ངེས་པའི་མཚོ་འམ་ཆུ་མིག་ཏུ་ཕྱིན་ལ་ཁྲུས་དང་གཙང་སྒྲ་ཤིན་ཏུ་ཆེ་བར་བྱ། དེ་ནས་ཆར་འབེབས་པའི་སེམས་བསྐྱེད་བཟང་པོས་དངུལ་ལམ་རྫའི་བུམ་པ་གཙང་མར་ཀླུ་སྨན་དང་འོ་ཆབ་ཀྱིས་བཀང་བ་ཀླུ་ཤིང་གིས་ཁ་བརྒྱན་པའི་མདུན་དུ་མཆོད་གཏོར་བཤམས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །སོགས་སྐྱབས་སེམས་ལན་གསུམ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། སྭ་བྷཱ་ཝ་སོགས། སྟོང་པའི་ངང་ལས་རང་ཉིད་སྐད་ཅིག་གིས་འཕགས་པ་སྤྱན་རས་གཟིགས་དབང་ཕྱུག་གཡས་མཆོག་སྦྱིན་ལས་བདུད་རྩིའི་རྒྱུན་འབེབས་ཤིང་། གཡོན་སྐྱབས་སྦྱིན་གྱི་ཕྱག་རྒྱས་པདྨ་དཀར་པོ་བསྣམས་པ། གཡས་སུ་འཕགས་པ་འཇམ་དཔལ་གཡས་རལ་གྲི་འཕྱར་ཞིང་། གཡོན་གླེགས་བམ་ཐུགས་ཀར་བསྣམས་པ། གཡོན་དུ་ཕྱག་ན་རྡོ་རྗེ་གཡས་རྡོ་རྗེ་ཐུགས་ཀར་གཏོད་ཅིང་། གཡོན་དྲིལ་བུ་དཀུར་བརྟེན་པ། གསུམ་ཀའང་སྐུ་མདོག་དཀར་གསལ་ཞི་ཞིང་འཛུམ་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཞབས་གཉིས་མཉམ་པའི་སྟབས་ཀྱིས་པད་ཟླའི་གདན་ལ་བཞེངས་པ། སོ་སོའི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་ཐུགས་སྲོག་ས་བོན་ཧྲཱིཿདྷཱིཿཧཱུྃ་གསུམ་གྱིས་ཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་དཀར་པོ་བསམ་གྱིས་མི་ཁྱབ་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཀླུ་དང་ས་བདག་གཙོ་བོར་གྱུར་པའི་འབྱུང་པོའི་ཚོགས་ཐམས་ཅད་ལ་ཕོག་པས་གནོད་འཚེ་དང་གདུག་སེམས་ཞི་ནས་ཕན་པ་དང་བདེ་བ་བྱང་ཆུབ་ཀྱི་སེམས་དང་ལྡན་པར་གྱུར། ཨོཾ་མ་ཎི་པདྨེ་ཧཱུྃ། སྟོང་ཕྲག ཨོཾ་ཝཱ་ཤཱི་ཤྭ་རི་མཱུཾ། དང་། ཨོཾ་བཛྲ་པཱ་ཎི་ཧཱུྃ། སུམ་བརྒྱ་སོགས་བཟླས། འཕགས་པ་རིགས་གསུམ་མགོན་པོས་ཆར་ཆུ་དུས་སུ་རྒྱུན་མི་འཆད་པར་འབེབས་ཤིང་། སྨན་དང་། ནགས་ཚལ་དང་། ལོ་ཏོག་དང་། འབྲུའི་ཚོགས་ཕུན་སུམ་ཚོགས་པར་བྱིན་གྱིས་བརླབ་ཏུ་གསོལ། །ཅེས་གསོལ་བ་གདབ། དེ་ནས་མདུན་གྱི་བུམ་པ། ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བུམ་པ་ཀླུའི་ཕོ་བྲང་ཉམས་དགའ་ཞིང་ཡིད་དུ་འོང་བའི་ནང་དུ་བུམ་རྫས་དེ་ཉིད་ཡི་གེ་ཕུཿདཀར་པོ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། འཇིག་རྟེན་གྱི་ཁམས་ཐམས་ཅད་དུ་ཁྱབ་པས་དེ་དག་ན་གནས་པའི་ཀླུའི་རིགས་ཐམས་ཅད་ཀྱི་སྲོག་གི་སྙིང་པོ་བསྐུལ་ཏེ་ཕུཿལ་ཐིམ། དེ་ཡོངས་སུ་གྱུར་པ་ལས་ཀླུ་བདུད་དཀར་པོ་གངས་ཀྱི་རི་བོ་ལ་ཉི་མ་ཤར་བ་ལྟར་དཀར་ཞིང་གསལ་ལ་འོད་ཟེར་འཕྲོ་བ། ཞི་ཞིང་འཛུམ་ལ་གུས་པའི་རང་ཚུལ་ཅན། །ཞལ་གཅིག་ཕྱག་གཉིས་པ། སྦྲུལ་མགོ་དགུའི་གདེངས་ཀ་དང་ལྡན་ཅིང་། ཡིད་བཞིན་ནོར་བུའི་དབུ་རྒྱན་ཅན། ཕྱག་གཉིས་ཐུགས་ཀར་ཐལ་མོ་སྦྱར་བའི་བར་དུ་ནོར་བུ་རིན་པོ་ཆེ་འཛིན་པ། སྟོད་ལྷའི་རྣམ་པ་ལ་སྨད་སྦྲུལ་མཇུག་འཁྱིལ་བ། རང་འདྲ་བའི་འཁོར་བརྒྱ་ཕྲག་དང་། གཞན་ཡང་ཀླུ་དང་ས་བདག་གི་རིགས་བསམ་གྱིས་མི་ཁྱབ་པས་བསྐོར་ནས་བཞུགས་པ། རང་ཉིད་རིགས་གསུམ་མགོན་པོར་གསལ་བའི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་ཟེར་བདུད་རྩིའི་རང་བཞིན་ཟླ་བ་ལྟར་དཀར་ཞིང་བསིལ་བའི་རེག་བྱ་དང་ལྡན་པ་དཔག་ཏུ་མེད་པ་འཕྲོས། ཀླུ་དང་ས་བདག་འཁོར་བཅས་ལ་ཕོག་པས་ཐུགས་རྒྱུད་བསྐུལ། སྦྲུལ་མཇུག་རྣམས་ཀྱིས་རྒྱ་མཚོ་ཆི་ལི་ལི་དཀྲུགས་པས་རྦ་རླབས་དྲག་ཏུ་འཁྲུགས་ཤིང་། ས་གཞི་བར་སྣང་ནམ་མཁའི་ཁམས་ཐམས་ཅད་ན་བུན་དང་ཆར་སྤྲིན་ནག་ཐིབ་ཐིབ་དང་། གློག་དམར་འཁྱུག་ཅིང་འབྲུག་སྒྲ་སྒྲོག །དབང་པོའི་སྒོ་དང་བ་སྤུའི་བུ་ག་རྣམས་ནས་ཀྱང་བདུད་རྩིའི་རླངས་པ་ན་བུན་གྱི་ཚུལ་དུ་འཁྲིགས། དེ་ཐམས་ཅད་ལས་ཆར་གྱི་རྒྱུན་བསམ་གྱིས་མི་ཁྱབ་པ་འུར་འུར་དིར་དིར་དུ་འབབས་པས་རྩི་ཤིང་ནགས་ཚལ་ལོ་ཏོག་ལྗང་པ་ཐམས་ཅད་མཆོག་ཏུ་རྒྱས་པར་གྱུར། རིགས་གསུམ་མགོན་པོའི་སྙིང་པོའི་མཐར། ཨོཾ་ནཱ་ག་ལེ་ལེ་ཧཱུྃ། ནཱ་ག་ལེ་ལེ། དུམ་པ་ལེ་ལེ། ནཱ་ག་རཱ་ཛ་ཧཱུྃ་ཕཊ། ཅེས་བཏགས་པ་སྟོང་རྩ་དང་། དེའི་མཐར། བྷ་རི་ཤ་ཡ། པྲ་ཏ་ཡ། དྲག་ཏུ་ཕོབ། ནཱ་ག་རཱ་ཛ་ཕྲོམ་ཕྲོམ་ཧྲིལ་ཧྲིལ་ཤར་ཤར་ཕོབ། དྲག་ཏུ་ཕོབ། མྱུར་དུ་ཕོབ། ཅེས་སྦྱར་བ་བརྒྱ་ཕྲག་གསུམ་སོགས་བཟླ། དེའི་ཚེ་ཀླུ་རྣམས་ཀྱིས་སྔགས་འུར་དིར་གྱིས་སྒྲོག་པར་བསམ། ངག་བཅད་ཤིན་ཏུ་དམ་པར་བྱའོ། །དེ་ལྟར་བཟླས་པ་ཚར་བ་དང་ཀླུ་ལ་ཀླུ་གཏོར་ཅི་ནུས་སུ་བཏང་། མ་འབྱོར་པ་དང་སོགས་ཀྱིས་ནོངས་པ་བཤགས། ནཱ་ག་རཱ་ཛ་ས་པ་རི་ཝཱ་ར་གཙྪས་ཀླུ་དང་ས་བདག་རྣམས་རང་རང་གི་གནས་སུ་གཤེགས། བུམ་པའི་རྫས་རྣམས་ཀླུའི་ནད་གསོ་ཞིང་དགོས་འདོད་འབྱུང་བའི་བདུད་རྩིར་གྱུར་པར་བསམས་ལ། ཆུ་མིག་ནང་ཀླུ་རྟེན་སོགས་ལ་གཏོར་ཞིང་གནས་མིན་དུ་མ་ཟགས་པར་བྱའོ། །ཐུན་མཚམས་ཐམས་ཅད་དུ་རང་ངམ་གཞན་གྱིས་བསང་མཆོད་དང་། གསེར་སྐྱེམས་གཏོང་། ཀླུ་གཏོར་ཅི་མང་བྱ། ཀླུ་གཏེར་སྦ། སྤྲིན་ཆེན་དང་དཔང་སྐོང་སོགས་ཀློག །ཁྱད་པར་སྤྲིན་བསྡུ་བའི་དམིགས་བཟླས་ནི། རང་འཕགས་པ་སྤྱན་རས་གཟིགས་སུ་གསལ་བ་དེ་ཉིད་སྐད་ཅིག་གིས་གཡུ་འབྲུག་སྔོན་པོ་ཆེ་ཞིང་བརྗིད་པའི་རྣམ་པར་གྱུར་པ་ལས་དེ་ལྟ་བུའི་འབྲུག་ཆེ་ཆུང་བསམ་གྱིས་མི་ཁྱབ་པ་འཕྲོས། སྟེང་འོག་བར་མཚམས་མེད་པར་ཁྱབ་པའི་བ་སྤུའི་ཁུང་བུ་ལས་སྤྲིན་དང་ན་བུན་ཚོགས་འཐིབ་ཅིང་འབྲུག་སྒྲ་སྙན་པར་སྒྲོག །དབང་པོའི་སོ་རྣམས་ནས་གློག་འོད་འཁྱུག་ཅིང་འཁྲུགས་པ་ལས་ཆར་གྱི་རྒྱུན་དྲག་ཏུ་འབེབས་པར་བསམས་ལ། ཨོཾ་ས་བ་ས་བ་ཧཱུྃ་སོབ་སོབ་ཧཱུྃ། ཞེས་སྟོང་ཕྲག་སོགས་བཟླ། འབྲུག་བསྐུལ་བ་ནི་དམིགས་པ་དེ་དང་མ་བྲལ་བའི་ངང་། ཨོཾ་ཏྲ་ཞི་ཞི་བ། ཀྱི་ཆི་བར་ན་སོ་བི་ཤ །པ་ཙ་པ་ཙ་ཧཱུྃ་ཕཊ། སུམ་བརྒྱ་སོགས་བཟླ། གཞན་ཡང་ཡུལ་དེའི་སྐྱེ་བོ་ཕོ་མོ་སོགས་གང་ཡོད་ལ་རིགས་གསུམ་མགོན་པོའི་སྙིང་པོ་འུར་འདོན་དུ་བཅུག །སྐབས་སྐབས་སུ་གསོལ་འདེབས་ཀྱི་རིམ་པའང་གང་ཤེས་བྱའོ། །རླུང་གནོན་ནི། རང་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་རླུང་ལྷ་རླུང་བདག་དང་བཅས་པ་རང་དབང་མེད་པར་བཀུག་སྟེ། ཞབས་ཀྱི་གདན་ཁྲིའི་འོག་ཏུ་ཆོས་འབྱུང་གྲུ་གསུམ་ཡངས་ཤིང་རྒྱ་ཆེ་བ་གོ་སྐབས་མེད་པའི་ནང་དུ་ཚུད་ནས་ཐིབ་ཐིབ་ནོན་པར་བསམས་ལ། ཨོཾ་ཆར་ཡ་ཆུར་ཡ་བཱ་ཡུ་སྟྭཱཾ་བྷ་ཡ་ནན༔ ཅེས་སྟོང་ཕྲག་གཅིག་བཟླ། རླུང་ནོན་པའི་ཚེ་མི་དམིག་པ་བར་བསམ། ཡང་བར་སྣང་ནས་འབབས་ཀྱང་ས་གཞིར་ཆེར་མི་ཕན་པ་ལྟ་བུ་ནི་དམ་སྲི་འབྱུང་པོའི་བར་ཆད་ཡིན་པས་གླུད་གཏོར་ཅི་མང་བསྔོ། གཞན་ཡང་ཞི་དྲག་གི་ཐབས་ཇི་ལྟར་རིགས་པར་བྱའོ། །རྗེས་ཐོབ་ཐམས་ཅད་དུ་དགེ་བ་བསྔོ། སྨོན་ལམ་གདབ། བཀྲ་ཤིས་རྒྱ་ཆེར་བརྗོད། དེ་ལྟར་འབད་པས་ཞག་གསུམ་བདུན་ཚུན་ཆད་ཆར་གྱི་རྒྱུན་ཆེན་པོ་འབེབས་པར་འགྱུར་རོ། །ཆར་འབེབས་ཀྱི་གདམས་པ་ཟབ་མོ་སྙིང་པོར་དྲིལ་བ་བསྟན་ཟིན་ཏོ། ། ༈ སད་སྲུང་བ་ནི། གོང་དུ་བཤད་པའི་མན་ངག་མཐའ་དག་དང་། ཁྱད་པར་དུས་རྒྱུན་དུ་རིགས་གསུམ་མགོན་པོའི་བདག་བསྐྱེད་བཟླས་པ་དང་བཅས་པ་སྔོན་དུ་འགྲོ་བས། སྤྲིན་སྡུད་ཀྱི་དམིགས་བཟླས་ཁོ་ན་གཙོ་བོར་བྱ། ཐུན་མཚམས་རྣམས་སུ་གཏོར་མ་བརྒྱ་རྩ། བསང་གསུར་གཞི་བདག་གཏོར་མ་དང་། གསེར་སྐྱེམས་སོགས་ལ་འབད། དུས་བཟང་རྣམས་སུ་དཀོན་མཆོག་ལ་མཆོད་པ་དང་། སྦྱོང་བ་གསུམ་སྔོན་དུ་འགྲོ་བས་ཡུལ་ཁྲུས་སོགས་ལ་འབད་པས་སད་ཀྱི་འཇིགས་པ་ལས་གྲོལ་བར་འགྱུར་རོ། ། ༈ སེར་བ་སྲུང་བ་ནི། འཕྲལ་དུ་གདོང་བཟློག་དང་། ཡུན་དུ་སྲུང་བ་གཉིས་ལས། དང་པོ་ནི། སེར་སྤྲིན་བྱུང་བ་ན་དེའི་ཕྱོགས་སུ་ཁ་བལྟས་ཏེ། ཁྲོམ་ཞེས་བརྗོད་པས་རང་སྐད་ཅིག་གིས་ལས་ཀྱི་བྱ་ཁྱུང་འཇིགས་སུ་རུང་བ་སྟོང་གསུམ་ཁྱབ་པའི་སྐུ་ལས་མེ་འོད་ཕྱག་མཚན་ཕོ་ཉའི་ཚོགས་བསམ་གྱིས་མི་ཁྱབ་པ་འཕྲོས་པས་སེར་བ་སེར་བདག་དང་བཅས་པ་སྐད་ཅིག་གིས་རང་དབང་མེད་པར་རྒྱང་རིང་དུ་བསྐྲད་པར་བསམས་ལ། ཨོཾ་བཛྲ་པཱ་ཎི་ཧཱུྃ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕ྄ཊ། ཁྲོམ་བཛྲ་ག་རུ་ཊ་ཙ་ལེ་ཙ་ལེ་ཧཱུྃ་ཕ྄ཊ། ཁྲོཾ་ཧྲཱིཿཧཱུྃ་བྷྱོ་ཕཊ། བྷ་རི་ཤ་ཡ་ཟློག་ཟློག་སྒྱུར་སྒྱུར་ཕ྄ཊ། ཅེས་དང་། ཧཱུྃ་རིང་དྲག་ཏུ་བརྗོད་ཅིང་སྡིགས་མཛུབ་དང་སྡང་མིག་གིས་གཟིར། ཚབ་ཆེར་བྱུང་ན་འོག་ནས་བཤད་པའི་རྫས་སྣའི་དུད་པ་བཏང་། ཡུངས་ཀར་གྱི་ཐུན་དང་ཕུར་པས་གཟིར། ཨོཾ་ག་རུ་ཊ་ཧཾ་སེ་ཧཾ་སེ་ཙ་ལེ་ཙ་ལེ་སྭཱ་ཧཱ། ཨོཾ་ཧེ་ཧེ། ཏིཥྛ་ཏིཥྛ། བནྡྷ་བནྡྷ། དྷཱ་ར་ཡ་དྷཱ་ར་ཡ། ནི་རུནྡྷ་ནི་རུནྡྷ། སེར་བ་སེར་བདག་དང་བཅས་པ་ཨུརྞ་མ་ཎི་སྭཱ་ཧཱ། ཞེས་དྲག་ཏུ་བཟླའོ། །གཉིས་པ་ཡུན་དུ་སྲུང་བ་ལ། རྫས་ནི། གླ་རྩི་ནག་པོ། མུ་ཟི་ནག་པོ། ཤུ་དག་ནག་པོ། གུ་གུལ་ནག་པོ། ཨ་རུ་ར་ནག་པོ། བོང་ང་ནག་པོ། སྤྲུ་བ་ནག་པོ། ཤིང་ཀུན་ནག་པོ། སྒོག་གཅིག་མ། གྲུབ་ཐོབ་ཀྱི་དྲི་ཆེན། རྟ་ནག་པོའི་བོན། ཡུང་བ། ཐར་ནུ་སྟེ་རྫས་སྣ་བཅུ་གསུམ་རིལ་བུར་བྱ། སྐྱེར་པའི་ཕུར་པ་སོར་བརྒྱད་པ་ལ། ཁྲོཾ། ཧཱུྃ། ཧྲཱིཿ བྲི། ཤིང་བྱང་ལའང་སྔགས་དེ་དང་། གོང་གི་སྔགས་རྣམས་ཀྱི་མཐར། ཡུལ་ཕྱོགས་འདི་ལ་སེར་བ་སྲུངས་ཤིག་རཀྵ་རཀྵཿ ཞེས་བྲི། རྡོ་འཁོར་ལ། ལྟེ་བར། ཁྲོཾ། ཧཱུྃ། ཧྲཱིཿ མུ་ཁྱུད་དང་པོ་ལ་གོང་སྔགས་འདོད་གསོལ་དང་བཅས་པ། གཉིས་པ་ལ། ཨཿཡཿམཿདུཿརུཿཙཿཤཿནཿས་མ་ཡཿ ཡུལ་ཕྱོགས་འདི་ལ་སེར་བ་སྲུངས་ཤིག་རཀྵ་རཀྵཿ གསུམ་པ་ལ་ཨཱ་ལི། བཞི་པ་ལ་ཀཱ་ལི། ལྔ་པ་ལ་རྟེན་འབྲེལ་སྙིང་པོ་རྣམས་ཡི་གེ་དབུ་ཅན་ཚེགས་མེད་དུ་བྲི། དེ་ཐམས་ཅད་ལ་རྫས་སྣ་བཅུ་གསུམ་བྱུགས་ཤིང་ཆུས་མི་གནོད་པའི་པྲ་རྩི་བཏང་། རྫས་རྣམས་ཐུམ་བུར་བྱས་ཏེ་ཕུར་པ་ལ་འདོགས། དེ་ནས་དེ་རྣམས་མདུན་དུ་བཀོད་ལ། བདག་བསྐྱེད་ཡི་དམ་གང་བྱེད་སྔོན་དུ་འགྲོ་བས། རྫས་དང་། སྔགས་རྣམས་དབུས་སུ་ཕྱག་རྡོར། གཡས་སུ་བྱ་ཁྱུང་། གཡོན་དུ་རྟ་མགྲིན། མཐའ་བསྐོར་ཀུན་ཏུ་སྤྲུལ་པའི་ཁྲོ་བོ་བསམ་གྱིས་མི་ཁྱབ་པས་བསྐོར་བར་བསྐྱེད་ལ་ཡེ་ཤེས་པ་བསྟིམ། མཆོད་བསྟོད་བྱ། གོང་གི་སྔགས་རྣམས་བརྒྱ་རྩ་དང་། ཁྲོཾ། ཧཱུྃ། ཧྲཱིཿ ཞེས་པའི་སྲོག་སྔགས་སྟོང་ཕྲག་སོག་བཟླས་པའི་མེ་ཏོག་གིས་གཏོར། རབ་གནས་བརྟན་བཞུགས་བྱས། ལྷ་འོད་དུ་ཞུ་ནས་ཡིག་འབྲུའི་རྣམ་པར་བཞུགས་པར་བསྒོམ། དེ་ལྟར་བསྒྲུབ་པ་ཅི་ནུས་སུ་བྱས་ནས། དངོས་གཞིར་གཟའ་སྐར་བཟང་པོའི་ཉིན་ཡུལ་དེའི་ཕྱོགས་བཞི་དབུས་དང་ལྔར་ཐོ་མི་ཚད་ཙམ་བརྩིགས་པའི་སྟེང་དུ་ཤིང་བྱང་བཙུགས། དེའི་མདུན་དུ་རྡོ་འཁོར་བཞག་ཅིང་ཕུར་པའང་གཟིར། གསེར་སྐྱེམས་བསང་མཆོད་ཡུལ་ལྷ་གཞི་བདག་ལ་བཀའ་བསྒོ་ཕྲིན་བཅོལ་སྔོན་དུ་འགྲོ་བས་གོང་དུ་བཤད་པ་ལྟར་བསྐྱེད་བསྟིམ་བཟླས་པ་རབ་གནས་བརྟན་བཞུགས་ཤིས་བརྗོད་སོགས་རྒྱས་པར་བྱ། དེ་ནས་བཟུང་དུས་རྒྱུན་དུ་ཡི་དམ་གྱི་སྒོམ་བཟླས་དང་། ཆོས་སྐྱོང་ལ་བསྐང་བཤགས། བསང་གསེར་སྐྱེམས་སོགས་མ་ཆགས་པར་བྱས་པས་ངེས་པར་ཐུབ་བོ། །ཞར་བྱུང་ཐོག་སྲུང་ནི། རང་ལུས་སྐད་ཅིག་གིས་གནམ་ལྕགས་ཀྱི་རྡོ་རྗེ་རྩེ་དགུ་རྭ་གདེངས་པ་ལས་ཡེ་ཤེས་ཀྱི་མེ་འབར་བའི་སྟེང་གི་ནམ་མཁའ་ཐམས་ཅད་གསེར་གྱི་འཁོར་ལོ་རྩིབས་སྟོང་དང་ལྡན་པས་ཁེབས་པའི་དབུས་སུ་བཅོམ་ལྡན་འདས་ཤཱཀྱ་ཐུབ་པ་དང་། རྩིབས་རྣམས་ལ་བསྐལ་པ་བཟང་པོའི་སངས་རྒྱས་སྟོང་རྣམས་ཟག་པ་མེད་པའི་ཏིང་ངེ་འཛིན་ལ་སྙོམས་པར་ཞུགས་པ། འོག་གི་ཆ་ཐམས་ཅད་རྒྱ་མཚོ་ཆེན་པོ་སྔོ་ཞིང་མེར་བ། ཕྱོགས་མཚམས་ཐམས་ཅད་རྡོ་རྗེའི་རྭ་གུར་མེ་འབར་བས་གོ་སྐབས་མེད་པར་གཏམས་པར་བསམས་ལ། ནི་ནཱ་ག་ཛ་མུནྟི་ཨཿ ཞེས་ཡིད་ཀྱིས་བཟླས་པ་ལ་སེམས་མི་གཡོ་བར་བཟུང་བས་ངེས་པར་ཐུབ་བོ། །འདི་ལ། ནི་ར་ག་ཛ་མུནྟི་ཨ༔ ཞེས་པའང་སྣང་སྟེ་གང་བཟླས་ཀྱང་རུང་ངོ་། །གཞན་སྲུང་ན་མཐིང་ཤོག་ལ་གསེར་གྱི་ཆོས་འབྱུང་ཟུར་དྲུག་པའི་དབུས་སུ། གོང་གི་སྔགས་ཤམ་དུ། འཆད་པ་པོ་ལ་སྡེ་བརྒྱད་འཁྲུགས་པའི་ཆོ་འཕྲུལ་གནམ་ལྕགས་ཐོག་གི་འཇིགས་པ་དང་གནོད་པ་ཐམས་ཅད་རཀྵ་རཀྵཿ ཟུར་དྲུག་ལ་མདུན་དུ་རཀྵ། རྒྱབ་ཏུ་ཨོཾ། གྲ་བཞིར་ཤར་ལྷོ་ནས་གཡས་བསྐོར་དུ། ཧ། པྃ། ཏ། ཀྵཿ ཞེས་བྲིས་རང་སྔགས་དང་ཡེ་དྷརྨ་བརྒྱ་རྩས་རབ་གནས་བྱ་ཞིང་རིན་ཆེན་སྣ་ལྔ་དང་ལྷན་ཅིག་ཏུ་འཆང་ན་ངེས་པར་བསྲུང་ཞིང་། ཁང་པ་དང་གུར་སོགས་ལ་བཏགས་པས་ཀྱང་ཐུབ་བོ། ། ༈ ལོ་ཏོག་ལ་བཙའི་གནོད་པ་སྲུང་བ་ནི། སྐམ་བཙའ་ལ། ཆུ་སྣ་ཅི་མང་དང་། ཁྱད་པར་ཆར་ཆུ། གངས་ཆུ། ཆུ་བོ་ཆེན་པོའི་གཞུང་ཆུ། ར་དཀར་མོ་དང་། བ་དམར་མོ་འོ་མ་ལ་ཀླུ་སྨན་བསྲེས་ནས་གཙང་སྦྲ་དང་བཅས་པས་ངག་བཅད་ལ་སྔགས་འདི་བཏབ་བོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཨོཾ་ནཱ་ག་བུམ་པ་ཤིག །ཛཿཏྲི་ཆུ་མ། བྲབ་རྩད་ནས་དྲོངས། ནཱ་ག་ར་ཙ་ཁ་ཐཾ་ཞེས་ཁྲི་འབུམ་སོགས་ཅི་ནུས་བཟླས་པས་བསྒྲུབ། དེ་ནས་ཁྱེའུ་ལོ་བརྒྱད་པ་དང་། བུ་མོ་ལོ་བཅུ་གཉིས་མ་གཉིས་ཀྱིས་ཤིང་ལོས་ཞིང་རྣམས་ལ་སྔགས་ཆུ་གཏོར། རློན་བཙའ་ལ། གོང་གི་སྔགས་ཆུ་བྱེ་མ་དང་། རིན་པོ་ཆེ་སྣ་ལྔའི་ཕྱེ་མ་དང་བསྲེས་ནས་སྔགས་ཅི་མང་བཏབ་ལ་སྐྱེས་པ་ཁྱི་འབྲུག་གླང་ལུག་གི་ལོ་པས་གཏོར། དེ་གཉིས་ཀའང་ཞིང་ས་རྒྱ་ཆེ་བས་མཐར་ཆགས་སུ་གཏོར་མ་ཐུབ་ན། ཞིང་རེ་རེ་ནས་དབུས་དང་ཕྱོགས་བཞིར་གཏོར། དམིགས་པ་ནི། རང་ཐུགས་རྗེ་ཆེན་པོར་གསལ་བའི་ཕྱག་གཡས་མཆོག་སྦྱིན་ལས་བདུད་རྩིའི་ཆུ་རྒྱུན་དཔག་ཏུ་མེད་པ་བབས་པས་ལོ་ཡམས་ཀྱི་ནད་བཙའི་གནོད་པ་ཐམས་ཅད་ཤྭའུད་ཆེན་པོས་སྦུར་མ་དེད་པ་ལྟར་བཀྲུས་ནས་ས་རིམ་པ་དགུའི་འོག་ཏུ་སོང་བར་བསམས་ལ་ཡིག་དྲུག་འུར་འདོན་བྱ། སྔགས་ཀྱི་ཁྱད་པར་གཞན་ཡང་། ཨོཾ་མ་ཎི་པདྨེ་ཧཱུྃ་ཧྲཱིཿ སརྦ་ཁམ་ཡེར་ཁམ་ཡེར་བྱི་ལ་སྭཱ་ཧཱ། རྫས་གོང་བཞིན་ལ་བཏབ་ཀྱང་ཆོག་གོ། །དེས་མ་ཕན་ན་བཙའ་བདའ་བའི་མན་ངག་སོགས་གཞན་དུ་ཤེས་པར་བྱའོ། ། ༈ གཞན་ཡང་ལོ་ཏོག་ལ་འབྱུང་པོ་དང་ལན་ཆགས་ཀྱི་ཆོ་འཕྲུལ་འབུ་སྲིན་གྱི་འཚེ་བ་བྱུང་ན། ཐོག་མར་ལན་ཆགས་གཏོར་མ་མང་དུ་བཏང་། དེ་ནས་བྱེ་མ་གཙང་མ་དང་། གཙང་ཆབ་བུམ་པ་གང་ལ་ག་བུར་དྲི་ཐོན་བཏབ་པ་ལ་སྔགས་འདི་ཁྲི་ཕྲག་བཟླས་ནས་བསྒྲུབ་བོ། །རུང་ཐུགས་རྗེ་ཆེན་པོར་གསལ་བའི་ཐུགས་ཀ་ནས་སྔགས་ཀྱི་འོད་ཟེར་རྫས་ལ་ཐིམ་པས་ནུས་པ་མཆོག་ཏུ་གྱུར། ཨོཾ་མ་ཎི་པདྨེ་ཧཱུྃ་ཧྲཱིཿ ནཱ་ག་ཛ་ཛ། མ་ནུ་ཛ་ཛ། འབུ་སྲིན་ཛ་ཛ། ཞེས་དང་། བཛྲ་པ་ན་ཁཾ་ཐུམ་རིལ་རྦད་སྭཱ་ཧཱ། ཞེས་པའང་བཟླས། དེ་ནས་ཞིང་ལ་ས་བོན་མ་བཏབ་གོང་ནས་བ་དམར་གྱི་ལྕི་བ་དང་ཤིང་སྣའི་དུད་པ་བཏང་། དེ་རྗེས་ཁྱེའུ་ལོ་བརྒྱད་པ་གཅིག་གི་བྱེ་མ་དང་བུམ་ཆུ་གཏོར། སླར་ཡང་། རྣམ་འཇོམས་སོགས་ཀྱིས་བསྒྲུབས་པའི་བུམ་ཆུ་དང་། རྟེན་བྱིན་ཅན་ལ་ཁྲུས་གསོལ་བའི་ཆུ་དང་། ས་སྣ་ཆུ་སྣ་བྱིན་ཅན་ཡང་ཡང་གཏོར་བས་ཐུབ་བོ། །ཡང་ཆུ་སྣ་གསུམ་པ་སྔོ་སྲུབས་ཀ་མེ་ལ་བསྲེགས་པའི་ཐལ་བ་བཏབ་པ་ལ་སྔགས་རྗེས་མ་མང་དུ་བཟླས་པའང་ལུགས་གཅིག་གོ། ། ༈ ལོ་ཏོག་ལ་ཕྱི་བ་དང་རི་བོང་སོགས་ཀྱི་གནོད་པ་སྲུང་ན། ཉུངས་ཀར་དང་། རོ་བསྲེགས་པའི་ཐལ་བ་ལ། ཏེ་པ་ཏེ་པ་ཀྲིན་ཛ་ལེ་བྷྱོཿ ཞེས་པས་སྔགས་ཤིང་བྱེ་མ་དང་བསྲེས་ལ་ཞིང་གི་མཐའ་དབུས་ཁྱབ་པར་གཏོར་བས་ཐུབ་བོ། ། ༈ བྱེའུའི་གནོད་པ་སྲུང་ན། གྲོ་གའམ་ཤུག་པའི་བྱང་བུ་ལ་སྔགས་བྲི། གཙང་པོའི་བྱེ་མ་ལ་སྔགས་མང་དུ་བཏབ། བྱང་བུ་དང་བྱེ་མ་བྱི་དང་བུད་མེད་ཀྱིས་མ་མཐོང་བར་ནམ་ཐོ་རངས་ཁྱེར་ལ། བྱང་བུ་ཞིང་གི་དབུས་སུ་གཟུག །བྱེ་མ་གཏོར། སྔགས་ནི། ཨོཾ་ཀྱུ་མ་ལེ་ཀྱུ་མ་ལེ། འབྱུང་པོ་བྱིའུའི་མཆུ་ཁ་གཞན་ལ་སྒྱུར་ཅིག །ཡང་ན། ཨོཾ་ཏིང་ཤེ་ཏིང་ཤེ་ཕུར་ལོང་ཕུར་ལོང་གནོད་བྱིན་བྱིའུ་ཁ་ཆིངས་ཤིག །གཉིས་ཀའམ་གང་རུང་བྲི་བཟླས་བྱ། འབྲི་བའི་ཚེ་དབུ་ཅན་ཚེགས་མེད་དུ་བྲིའོ། ། ༈ ཁང་ཁྱིམ་དང་ལོ་ཏོག་ལ་བྱི་བའི་གནོད་པ་སྲུང་ན། ཡུངས་ཀར་ལ། ཨོཾ་ནཱ་ག་ཤ་པ་ནན། ཨོཾ་ར་ཤུ་ཙུ་རུ་ཙུ་རུ་སྭཱ་ཧཱ། ཞེས་མང་དུ་བཏབ་ནས་བྱི་ཁུང་ལ་གཏོར་བས་བྱི་བ་རྣམས་རིང་དུ་འབྲོས་པར་འགྱུར་རོ། ། ༈ ལོ་ལེགས་པའི་མན་ངག་ལུད་ཀྱི་སྦྱོར་བ་ནི། བདུད་རྩི་འོད་ལྡན། ཕུག་རོན་གྱི་བྲུན། སེ་རུལ། འབའ་ཆ། ཕབས་རྣམས་བུ་མོ་ལོ་བརྒྱད་མའི་དྲི་ཆུ་དང་སྦྱར་བ་ལ། ཨོཾ་ཨཱཿདྷཱ་རི་རཏྣ་ཛཾ་བྷ་མ་ཧཱ་སིདྡྷི་སྭཱ་ཧཱ། ཞེས་ཞག་གསུམ་དུ་བསྔགས་པས་ལུད་ལ་བྲན། ས་བོན་ལའང་མར་ནག་དང་སྦོལ་ནས་གོང་སྔགས་སྟོང་ཚོ་གཅིག་བཏབ་པས་བཙའ་སད་འབུ་གསུམ་སོགས་ཀྱི་གནོད་པ་ལས་སྲུང་ཞིང་། སྙེ་མ་ཆེ་བ་དང་། འབྲུ་སྣུམ་པ་སོགས་ལོ་ཏོག་ཕུན་སུམ་ཚོགས་པར་འབྱུང་བར་གསུངས་སོ། །དེ་ལྟར་བཀའ་གཏེར་དག་སྣང་གི་ཆོས་སྡེ་རྣམས་ནས་ལོ་ཏོག་ལ་ཕན་བྱེད་ཀྱི་མན་ངག་མཐའ་ཡས་པ་ཞིག་གསུངས་ཀྱང་། ཤིན་ཏུ་མདོར་བསྡུས་ལག་ཏུ་བླངས་བདེ་བ་ཕྲན་ཚེགས་འགའ་ཞིག་ཕྱོགས་གཅིག་ཏུ་བྲིས་པ་སྟེ། སེམས་བསྐྱེད་བཟང་པོ་དང་ལྡན་ཅིང་། ཡི་དམ་གྱི་བསྙེན་པ་མཐར་ཕྱིན་པ། ཏིང་ངེ་འཛིན་ལ་གསལ་སྣང་ཅུང་ཟད་ཐོབ་པའི་རྣལ་འབྱོར་པ་དག་ལ་འདི་ཙམ་གྱིས་ཀྱང་དོན་འགྲུབ་པར་འགྱུར་པ་ཉིད་དོ། །ཞེས་པའང་མཉྫུ་གྷོ་ཥས་བྲིས་པ་དགེ། མངྒ་ལཾ།། །། ༈

[edit]

lo tog la phan pa'i gdams ngag bdud rtsi'i snying po/__ lo tog la phan pa'i gdams ngag bdud rtsi'i snying po bzhugs so/___/bla ma dang rigs gsum mgon po la phyag 'tshal lo/___/'byung khams chu nang 'phrad sogs gza' skar 'phrod sbyor shis pa'i nam langs klu gnas nges pa'i mtsho 'am chu mig tu phyin la khrus dang gtsang sgra shin tu che bar bya/___de nas char 'bebs pa'i sems bskyed bzang pos dngul lam rdza'i bum pa gtsang mar klu sman dang 'o chab kyis bkang ba klu shing gis kha brgyan pa'i mdun du mchod gtor bshams/___sangs rgyas chos dang tshogs kyi mchog rnams la/___/sogs skyabs sems lan gsum/___sems can thams cad bde ba dang sogs tshad med bzhi bsgom/___swa b+hA wa sogs/___stong pa'i ngang las rang nyid skad cig gis 'phags pa spyan ras gzigs dbang phyug g.yas mchog sbyin las bdud rtsi'i rgyun 'bebs shing /___g.yon skyabs sbyin gyi phyag rgyas pad+ma dkar po bsnams pa/___g.yas su 'phags pa 'jam dpal g.yas ral gri 'phyar zhing /___g.yon glegs bam thugs kar bsnams pa/___g.yon du phyag na rdo rje g.yas rdo rje thugs kar gtod cing /___g.yon dril bu dkur brten pa/___gsum ka'ang sku mdog dkar gsal zhi zhing 'dzum pa/___dar dang rin po che'i rgyan thams cad kyis brgyan cing zhabs gnyis mnyam pa'i stabs kyis pad zla'i gdan la bzhengs pa/___so so'i thugs kar zla ba'i dkyil 'khor gyi dbus su thugs srog sa bon hrIHd+hIHhU~M gsum gyis thar sngags kyi phreng bas bskor ba las 'od zer dkar po bsam gyis mi khyab pa 'phros/___'phags pa mchod/___sems can gyi don byas/___klu dang sa bdag gtso bor gyur pa'i 'byung po'i tshogs thams cad la phog pas gnod 'tshe dang gdug sems zhi nas phan pa dang bde ba byang chub kyi sems dang ldan par gyur/___oM ma Ni pad+me hU~M/___stong phrag__oM wA shI shwa ri mUM/___dang /___oM badz+ra pA Ni hU~M/___sum brgya sogs bzlas/___'phags pa rigs gsum mgon pos char chu dus su rgyun mi 'chad par 'bebs shing /___sman dang /___nags tshal dang /___lo tog dang /___'bru'i tshogs phun sum tshogs par byin gyis brlab tu gsol/___/ces gsol ba gdab/___de nas mdun gyi bum pa/___a mr-i tas bsang /___swa b+hA was sbyang /___stong pa'i ngang las bum pa klu'i pho brang nyams dga' zhing yid du 'ong ba'i nang du bum rdzas de nyid yi ge phuHdkar po las 'od zer dkar po dpag tu med pa 'phros/___'jig rten gyi khams thams cad du khyab pas de dag na gnas pa'i klu'i rigs thams cad kyi srog gi snying po bskul te phuHla thim/___de yongs su gyur pa las klu bdud dkar po gangs kyi ri bo la nyi ma shar ba ltar dkar zhing gsal la 'od zer 'phro ba/___zhi zhing 'dzum la gus pa'i rang tshul can/___/zhal gcig phyag gnyis pa/___sbrul mgo dgu'i gdengs ka dang ldan cing /___yid bzhin nor bu'i dbu rgyan can/___phyag gnyis thugs kar thal mo sbyar ba'i bar du nor bu rin po che 'dzin pa/___stod lha'i rnam pa la smad sbrul mjug 'khyil ba/___rang 'dra ba'i 'khor brgya phrag dang /___gzhan yang klu dang sa bdag gi rigs bsam gyis mi khyab pas bskor nas bzhugs pa/___rang nyid rigs gsum mgon por gsal ba'i thugs ka'i sa bon sngags phreng dang bcas pa las 'od zer bdud rtsi'i rang bzhin zla ba ltar dkar zhing bsil ba'i reg bya dang ldan pa dpag tu med pa 'phros/___klu dang sa bdag 'khor bcas la phog pas thugs rgyud bskul/___sbrul mjug rnams kyis rgya mtsho chi li li dkrugs pas rba rlabs drag tu 'khrugs shing /___sa gzhi bar snang nam mkha'i khams thams cad na bun dang char sprin nag thib thib dang /___glog dmar 'khyug cing 'brug sgra sgrog__/dbang po'i sgo dang ba spu'i bu ga rnams nas kyang bdud rtsi'i rlangs pa na bun gyi tshul du 'khrigs/___de thams cad las char gyi rgyun bsam gyis mi khyab pa 'ur 'ur dir dir du 'babs pas rtsi shing nags tshal lo tog ljang pa thams cad mchog tu rgyas par gyur/___rigs gsum mgon po'i snying po'i mthar/___oM nA ga le le hU~M/___nA ga le le/___dum pa le le/___nA ga rA dza hU~M phaT/___ces btags pa stong rtsa dang /___de'i mthar/___b+ha ri sha ya/___pra ta ya/___drag tu phob/___nA ga rA dza phrom phrom hril hril shar shar phob/___drag tu phob/___myur du phob/___ces sbyar ba brgya phrag gsum sogs bzla/___de'i tshe klu rnams kyis sngags 'ur dir gyis sgrog par bsam/___ngag bcad shin tu dam par bya'o/___/de ltar bzlas pa tshar ba dang klu la klu gtor ci nus su btang /___ma 'byor pa dang sogs kyis nongs pa bshags/___nA ga rA dza sa pa ri wA ra gats+tshas klu dang sa bdag rnams rang rang gi gnas su gshegs/___bum pa'i rdzas rnams klu'i nad gso zhing dgos 'dod 'byung ba'i bdud rtsir gyur par bsams la/___chu mig nang klu rten sogs la gtor zhing gnas min du ma zags par bya'o/___/thun mtshams thams cad du rang ngam gzhan gyis bsang mchod dang /___gser skyems gtong /___klu gtor ci mang bya/___klu gter sba/___sprin chen dang dpang skong sogs klog__/khyad par sprin bsdu ba'i dmigs bzlas ni/___rang 'phags pa spyan ras gzigs su gsal ba de nyid skad cig gis g.yu 'brug sngon po che zhing brjid pa'i rnam par gyur pa las de lta bu'i 'brug che chung bsam gyis mi khyab pa 'phros/___steng 'og bar mtshams med par khyab pa'i ba spu'i khung bu las sprin dang na bun tshogs 'thib cing 'brug sgra snyan par sgrog__/dbang po'i so rnams nas glog 'od 'khyug cing 'khrugs pa las char gyi rgyun drag tu 'bebs par bsams la/___oM sa ba sa ba hU~M sob sob hU~M/___zhes stong phrag sogs bzla/___'brug bskul ba ni dmigs pa de dang ma bral ba'i ngang /___oM tra zhi zhi ba/___kyi chi bar na so bi sha__/pa tsa pa tsa hU~M phaT/___sum brgya sogs bzla/___gzhan yang yul de'i skye bo pho mo sogs gang yod la rigs gsum mgon po'i snying po 'ur 'don du bcug__/skabs skabs su gsol 'debs kyi rim pa'ang gang shes bya'o/___/rlung gnon ni/___rang gi thugs ka nas 'od zer lcags kyu lta bu 'phros pas rlung lha rlung bdag dang bcas pa rang dbang med par bkug ste/___zhabs kyi gdan khri'i 'og tu chos 'byung gru gsum yangs shing rgya che ba go skabs med pa'i nang du tshud nas thib thib non par bsams la/___oM char ya chur ya bA yu s+t+wAM b+ha ya nan:____ces stong phrag gcig bzla/___rlung non pa'i tshe mi dmig pa bar bsam/___yang bar snang nas 'babs kyang sa gzhir cher mi phan pa lta bu ni dam sri 'byung po'i bar chad yin pas glud gtor ci mang bsngo/___gzhan yang zhi drag gi thabs ji ltar rigs par bya'o/___/rjes thob thams cad du dge ba bsngo/___smon lam gdab/___bkra shis rgya cher brjod/___de ltar 'bad pas zhag gsum bdun tshun chad char gyi rgyun chen po 'bebs par 'gyur ro/___/char 'bebs kyi gdams pa zab mo snying por dril ba bstan zin to/____/_!___sad srung ba ni/___gong du bshad pa'i man ngag mtha' dag dang /___khyad par dus rgyun du rigs gsum mgon po'i bdag bskyed bzlas pa dang bcas pa sngon du 'gro bas/___sprin sdud kyi dmigs bzlas kho na gtso bor bya/___thun mtshams rnams su gtor ma brgya rtsa/___bsang gsur gzhi bdag gtor ma dang /___gser skyems sogs la 'bad/___dus bzang rnams su dkon mchog la mchod pa dang /___sbyong ba gsum sngon du 'gro bas yul khrus sogs la 'bad pas sad kyi 'jigs pa las grol bar 'gyur ro/____/_!___ser ba srung ba ni/___'phral du gdong bzlog dang /___yun du srung ba gnyis las/___dang po ni/___ser sprin byung ba na de'i phyogs su kha bltas te/___khrom zhes brjod pas rang skad cig gis las kyi bya khyung 'jigs su rung ba stong gsum khyab pa'i sku las me 'od phyag mtshan pho nya'i tshogs bsam gyis mi khyab pa 'phros pas ser ba ser bdag dang bcas pa skad cig gis rang dbang med par rgyang ring du bskrad par bsams la/___oM badz+ra pA Ni hU~M/___oM badz+ra tsaN+Da ma hA ro Sha Na hU~M pha?T/___khrom badz+ra ga ru Ta tsa le tsa le hU~M pha?T/___khroM hrIHhU~M b+h+yo phaT/___b+ha ri sha ya zlog zlog sgyur sgyur pha?T/___ces dang /___hU~M ring drag tu brjod cing sdigs mdzub dang sdang mig gis gzir/___tshab cher byung na 'og nas bshad pa'i rdzas sna'i dud pa btang /___yungs kar gyi thun dang phur pas gzir/___oM ga ru Ta haM se haM se tsa le tsa le swA hA/___oM he he/___tiSh+Tha tiSh+Tha/___ban+d+ha ban+d+ha/___d+hA ra ya d+hA ra ya/___ni run+d+ha ni run+d+ha/___ser ba ser bdag dang bcas pa ur+Na ma Ni swA hA/___zhes drag tu bzla'o/___/gnyis pa yun du srung ba la/___rdzas ni/___gla rtsi nag po/___mu zi nag po/___shu dag nag po/___gu gul nag po/___a ru ra nag po/___bong nga nag po/___spru ba nag po/___shing kun nag po/___sgog gcig ma/___grub thob kyi dri chen/___rta nag po'i bon/___yung ba/___thar nu ste rdzas sna bcu gsum ril bur bya/___skyer pa'i phur pa sor brgyad pa la/___khroM/___hU~M/___hrIH__bri/___shing byang la'ang sngags de dang /___gong gi sngags rnams kyi mthar/___yul phyogs 'di la ser ba srungs shig rak+Sha rak+ShaH__zhes bri/___rdo 'khor la/___lte bar/___khroM/___hU~M/___hrIH__mu khyud dang po la gong sngags 'dod gsol dang bcas pa/___gnyis pa la/___aHyaHmaHduHruHtsaHshaHnaHsa ma yaH__yul phyogs 'di la ser ba srungs shig rak+Sha rak+ShaH__gsum pa la A li/___bzhi pa la kA li/___lnga pa la rten 'brel snying po rnams yi ge dbu can tshegs med du bri/___de thams cad la rdzas sna bcu gsum byugs shing chus mi gnod pa'i pra rtsi btang /___rdzas rnams thum bur byas te phur pa la 'dogs/___de nas de rnams mdun du bkod la/___bdag bskyed yi dam gang byed sngon du 'gro bas/___rdzas dang /___sngags rnams dbus su phyag rdor/___g.yas su bya khyung /___g.yon du rta mgrin/___mtha' bskor kun tu sprul pa'i khro bo bsam gyis mi khyab pas bskor bar bskyed la ye shes pa bstim/___mchod bstod bya/___gong gi sngags rnams brgya rtsa dang /___khroM/___hU~M/___hrIH__zhes pa'i srog sngags stong phrag sog bzlas pa'i me tog gis gtor/___rab gnas brtan bzhugs byas/___lha 'od du zhu nas yig 'bru'i rnam par bzhugs par bsgom/___de ltar bsgrub pa ci nus su byas nas/___dngos gzhir gza' skar bzang po'i nyin yul de'i phyogs bzhi dbus dang lngar tho mi tshad tsam brtsigs pa'i steng du shing byang btsugs/___de'i mdun du rdo 'khor bzhag cing phur pa'ang gzir/___gser skyems bsang mchod yul lha gzhi bdag la bka' bsgo phrin bcol sngon du 'gro bas gong du bshad pa ltar bskyed bstim bzlas pa rab gnas brtan bzhugs shis brjod sogs rgyas par bya/___de nas bzung dus rgyun du yi dam gyi sgom bzlas dang /___chos skyong la bskang bshags/___bsang gser skyems sogs ma chags par byas pas nges par thub bo/___/zhar byung thog srung ni/___rang lus skad cig gis gnam lcags kyi rdo rje rtse dgu rwa gdengs pa las ye shes kyi me 'bar ba'i steng gi nam mkha' thams cad gser gyi 'khor lo rtsibs stong dang ldan pas khebs pa'i dbus su bcom ldan 'das shAkya thub pa dang /___rtsibs rnams la bskal pa bzang po'i sangs rgyas stong rnams zag pa med pa'i ting nge 'dzin la snyoms par zhugs pa/___'og gi cha thams cad rgya mtsho chen po sngo zhing mer ba/___phyogs mtshams thams cad rdo rje'i rwa gur me 'bar bas go skabs med par gtams par bsams la/___ni nA ga dza mun+ti aH__zhes yid kyis bzlas pa la sems mi g.yo bar bzung bas nges par thub bo/____/'di la/____ni ra ga dza mun+ti a:_____zhes pa'ang snang ste gang bzlas kyang rung ngo /___/gzhan srung na mthing shog la gser gyi chos 'byung zur drug pa'i dbus su/___gong gi sngags sham du/___'chad pa po la sde brgyad 'khrugs pa'i cho 'phrul gnam lcags thog gi 'jigs pa dang gnod pa thams cad rak+Sha rak+ShaH__zur drug la mdun du rak+Sha/___rgyab tu oM/___gra bzhir shar lho nas g.yas bskor du/___ha/___pa~M/___ta/___k+ShaH__zhes bris rang sngags dang ye d+harma brgya rtsas rab gnas bya zhing rin chen sna lnga dang lhan cig tu 'chang na nges par bsrung zhing /___khang pa dang gur sogs la btags pas kyang thub bo/____/_!___lo tog la btsa'i gnod pa srung ba ni/___skam btsa' la/___chu sna ci mang dang /___khyad par char chu/___gangs chu/___chu bo chen po'i gzhung chu/___ra dkar mo dang /___ba dmar mo 'o ma la klu sman bsres nas gtsang sbra dang bcas pas ngag bcad la sngags 'di btab bo/___/oM AHhU~M badz+ra gu ru pad+ma sid+d+hi hU~M/___oM nA ga bum pa shig__/dzaHtri chu ma/___brab rtsad nas drongs/___nA ga ra tsa kha thaM zhes khri 'bum sogs ci nus bzlas pas bsgrub/___de nas khye'u lo brgyad pa dang /___bu mo lo bcu gnyis ma gnyis kyis shing los zhing rnams la sngags chu gtor/___rlon btsa' la/___gong gi sngags chu bye ma dang /___rin po che sna lnga'i phye ma dang bsres nas sngags ci mang btab la skyes pa khyi 'brug glang lug gi lo pas gtor/___de gnyis ka'ang zhing sa rgya che bas mthar chags su gtor ma thub na/___zhing re re nas dbus dang phyogs bzhir gtor/___dmigs pa ni/___rang thugs rje chen por gsal ba'i phyag g.yas mchog sbyin las bdud rtsi'i chu rgyun dpag tu med pa babs pas lo yams kyi nad btsa'i gnod pa thams cad shwa'ud chen pos sbur ma ded pa ltar bkrus nas sa rim pa dgu'i 'og tu song bar bsams la yig drug 'ur 'don bya/___sngags kyi khyad par gzhan yang /___oM ma Ni pad+me hU~M hrIH__sarba kham yer kham yer byi la swA hA/___rdzas gong bzhin la btab kyang chog go/___/des ma phan na btsa' bda' ba'i man ngag sogs gzhan du shes par bya'o/____/_!___gzhan yang lo tog la 'byung po dang lan chags kyi cho 'phrul 'bu srin gyi 'tshe ba byung na/___thog mar lan chags gtor ma mang du btang /___de nas bye ma gtsang ma dang /___gtsang chab bum pa gang la ga bur dri thon btab pa la sngags 'di khri phrag bzlas nas bsgrub bo/___/rung thugs rje chen por gsal ba'i thugs ka nas sngags kyi 'od zer rdzas la thim pas nus pa mchog tu gyur/___oM ma Ni pad+me hU~M hrIH__nA ga dza dza/___ma nu dza dza/___'bu srin dza dza/___zhes dang /___badz+ra pa na khaM thum ril rbad swA hA/___zhes pa'ang bzlas/___de nas zhing la sa bon ma btab gong nas ba dmar gyi lci ba dang shing sna'i dud pa btang /___de rjes khye'u lo brgyad pa gcig gi bye ma dang bum chu gtor/___slar yang /____rnam 'joms sogs kyis bsgrubs pa'i bum chu dang /___rten byin can la khrus gsol ba'i chu dang /___sa sna chu sna byin can yang yang gtor bas thub bo/___/yang chu sna gsum pa sngo srubs ka me la bsregs pa'i thal ba btab pa la sngags rjes ma mang du bzlas pa'ang lugs gcig go/____/_!____lo tog la phyi ba dang ri bong sogs kyi gnod pa srung na/___nyungs kar dang /___ro bsregs pa'i thal ba la/___te pa te pa krin dza le b+h+yoH__zhes pas sngags shing bye ma dang bsres la zhing gi mtha' dbus khyab par gtor bas thub bo/____/_!___bye'u'i gnod pa srung na/___gro ga'am shug pa'i byang bu la sngags bri/___gtsang po'i bye ma la sngags mang du btab/___byang bu dang bye ma byi dang bud med kyis ma mthong bar nam tho rangs khyer la/___byang bu zhing gi dbus su gzug__/bye ma gtor/___sngags ni/___oM kyu ma le kyu ma le/___'byung po byi'u'i mchu kha gzhan la sgyur cig__/yang na/___oM ting she ting she phur long phur long gnod byin byi'u kha chings shig__/gnyis ka'am gang rung bri bzlas bya/___'bri ba'i tshe dbu can tshegs med du bri'o/____/_!___khang khyim dang lo tog la byi ba'i gnod pa srung na/___yungs kar la/___oM nA ga sha pa nan/___oM ra shu tsu ru tsu ru swA hA/___zhes mang du btab nas byi khung la gtor bas byi ba rnams ring du 'bros par 'gyur ro/____/_!___lo legs pa'i man ngag lud kyi sbyor ba ni/___bdud rtsi 'od ldan/___phug ron gyi brun/___se rul/___'ba' cha/___phabs rnams bu mo lo brgyad ma'i dri chu dang sbyar ba la/___oM AHd+hA ri rat+na dzaM b+ha ma hA sid+d+hi swA hA/___zhes zhag gsum du bsngags pas lud la bran/___sa bon la'ang mar nag dang sbol nas gong sngags stong tsho gcig btab pas btsa' sad 'bu gsum sogs kyi gnod pa las srung zhing /___snye ma che ba dang /___'bru snum pa sogs lo tog phun sum tshogs par 'byung bar gsungs so/___/de ltar bka' gter dag snang gi chos sde rnams nas lo tog la phan byed kyi man ngag mtha' yas pa zhig gsungs kyang /___shin tu mdor bsdus lag tu blangs bde ba phran tshegs 'ga' zhig phyogs gcig tu bris pa ste/___sems bskyed bzang po dang ldan cing /___yi dam gyi bsnyen pa mthar phyin pa/___ting nge 'dzin la gsal snang cung zad thob pa'i rnal 'byor pa dag la 'di tsam gyis kyang don 'grub par 'gyur pa nyid do/___/zhes pa'ang many+dzu g+ho Shas bris pa dge/___mang+ga laM//__//_!