འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རྒྱུད་ཀྱི་བཀླག་ཐབས་ཡེ་ཤེས་གྲུབ་སྟེར།

🚧 This website is under continued development. We appreciate your patience!

Previous Text Back to Volume PageNext Text

Wylie title	'phags pa 'jam dpal gyi mtshan yang dag par brjod pa'i rgyud kyi bklag thabs ye shes grub ster
Location	mkhyen brtse'i bka' 'bum Volume 10, sde tshan 4, Text 21, Pages 309-315 (Folios 64a1 to 67a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	རྗེ་བཙུན་གྲགས་པ་རྒྱལ་མཚན་, ས་སྐྱ་པཎྜི་ཏ་ (rje btsun grags pa rgyal mtshan, sa skya paN+Di ta)
Citation	'jam dbyangs mkhyen brtse'i dbang po. 'phags pa 'jam dpal gyi mtshan yang dag par brjod pa'i rgyud kyi bklag thabs ye shes grub ster. In 'jam dbyangs mkhyen brtse'i dbang po'i bka' 'bum, Vol. 10: 309-315. Khams sde dge rdzong sar dgon: Rdzong sar blo gros phun tshogs, 2020.
Genre	Liturgy - ngag 'don  ·  Spiritual Instructions - gdams ngag  ·  Tantras - rgyud
Deity	'jam dpal dbyangs
Lotsawa House Link	https://www.lotsawahouse.org/tibetan-masters/jamyang-khyentse-wangpo/wisdoms-bestowal
Colophon	།ཞེས་པའང་རང་གཞན་ལ་ཉེ་བར་མཁོ་བའི་ཕྱིར་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་གསུང་རབ་ལ་གཞི་བྱས། འཇམ་མགོན་ས་སྐྱ་པཎྜི་ཏའི་གསུང་སྒྲོས་ཟིན་བྲིས་སོགས་ལས་ཀྱང་ཅུང་ཟད་བསྣན་ཏེ་ཤིན་ཏུ་གསལ་བར་བཀོད་པ་དགེ་ལེགས་སུ་གྱུར་ཅིག
	zhes pa'ang rang gzhan la nye bar mkho ba'i phyir mang du thos pa'i bya bral ba 'jam dbyangs mkhyen brtse'i dbang pos rje btsun rin po che grags pa rgyal mtshan gyi gsung rab la gzhi byas/__'jam mgon sa skya paN+Di ta'i gsung sgros zin bris sogs las kyang cung zad bsnan te shin tu gsal bar bkod pa dge legs su gyur cig

1 Texts in this Section (sde tshan or chos tshan)

21 309-315	འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རྒྱུད་ཀྱི་བཀླག་ཐབས་ཡེ་ཤེས་གྲུབ་སྟེར། 'phags pa 'jam dpal gyi mtshan yang dag par brjod pa'i rgyud kyi bklag thabs ye shes grub ster Tantras - rgyud   ·   Liturgy - ngag 'don   ·   Spiritual Instructions - gdams ngag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རྒྱུད་ཀྱི་བཀླག་ཐབས་ཡེ་ཤེས་གྲུབ་སྟེར་ཞེས་བྱ་བ་བཞུགས་སོ། །ན་མོ་གུ་རུ་ཛྙཱ་ན་ཀཱ་ཡཱ་ཡ། འདིར་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་འདོན་པའི་གདམས་ངག་ལ་རྣམ་པ་བཞིར་གསུངས་པ་ལས། ཟབ་མོའི་རྣལ་འབྱོར་ལ་གཞོལ་བར་མི་ནུས་པའི་ལས་དང་པོ་པའམ། རྣལ་འབྱོར་ཟབ་མོ་ལ་འཇུག་པས་ཀྱང་ཐུན་མཚམས་རྣམས་སུ་ཆེ་བའི་ཡོན་ཏན་ལ་བསྔགས་པའི་ཚུལ་གྱིས་གདོན་པར་འདོད་པས་དད་པ་དང་། ངེས་འབྱུང་དང་། བྱང་ཆུབ་ཀྱི་སེམས་གཉིས་ཡིད་ལ་བྱས་ཏེ། བླ་མ་སངས་རྒྱས་ཆོས་ཚོགས་ལ། །བྱང་ཆུབ་བར་དུ་སྐྱབས་སུ་མཆི། །གཞན་དོན་རྫོགས་བྱང་ཐོབ་བྱའི་ཕྱིར། །ཟབ་མོའི་རྒྱུད་སྡེ་བཀླག་པར་བགྱི། ལན་གསུམ་གྱིས་སྐྱབས་སེམས་བྱ། རང་མདུན་ནམ་མཁར་ཡིད་འཕྲོག་པའི། །མཆོད་སྤྲིན་རྒྱ་མཚོ་འཁྲིགས་པའི་དབུས། །པད་ཟླའི་གདན་ལ་སྐད་ཅིག་གིས། །རྗེ་བཙུན་འཕགས་པ་འཇམ་པའི་དབྱངས། །སྐུ་མདོག་གསེར་གྱི་ལྷུན་པོ་ནི། །མཚམས་སྤྲིན་གསར་པས་འཁྱུད་བཞིན་མཛེས། །ཞི་འཛུམ་བརྒྱད་གཉིས་ལང་ཚོའི་དཔལ། །ངོ་མཚར་མཚན་དཔེའི་ཕུང་པོར་འབར། །ཞལ་གཅིག་ཕྱག་བཞིའི་དང་པོ་གཉིས། །ཤེས་རབ་རལ་གྲི་གླེགས་བམ་དང་། །འོག་མས་ཐབས་ཤེས་མདའ་གཞུ་བསྣམས། །ཟླ་བའི་རྒྱབ་ཡོལ་ལ་བརྟེན་ནས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །སྣ་ཚོགས་དར་གྱི་ཤམ་ཐབས་དང་། །རིན་ཆེན་རྒྱན་གྱིས་རྣམ་པར་བརྒྱན། །ཟུར་ཕུད་ཨུཏྤལ་ལ་གནས་པའི། །མི་བསྐྱོད་རིགས་ཀྱི་བདག་པོར་བཅས། །མཁའ་ལམ་དབང་པོའི་གཞུ་ལྟ་བུ། །སྣང་སྟོང་ཟུང་འཇུག་ཡེ་ཤེས་སྐུ། །མངོན་སུམ་བཞིན་དུ་གསལ་བར་གྱུར། །ཨེ་མ་སངས་རྒྱས་བྱང་སེམས་དང་། །ཉན་ཐོས་རང་རྒྱལ་ཚངས་དབང་སོགས། །སྲིད་ཞིའི་ཉམས་འགྱུར་ཇི་སྙེད་ཀུན། །འཇམ་པའི་དཔལ་ལས་གཞན་མིན་ཕྱིར། །མཐའ་ཡས་ཤེས་བྱའི་རྗེས་སོང་བའི། །མཚན་དང་སྐུ་ཡི་བཀོད་པ་དང་། །ཡོན་ཏན་མཁའ་དང་སྙོམས་འཇུག་པར། །མི་ཕྱེད་མཆོག་ཏུ་གུས་པའི་བློས། །ངག་གི་ནོར་བུའི་ཏམྦུ་ར། །ཡེ་ཤེས་ལུས་ཅན་འཇམ་དཔལ་གྱི། །རྡོ་རྗེའི་མཚན་དོན་ཡང་དག་པར། །བརྗོད་པའི་གདངས་སུ་འཕོས་པ་ཡིས། །མཁྱེན་བརྩེ་ནུས་པའི་རྒྱུད་བསྐུལ་བས། །ཐུགས་རྗེའི་འོད་ཟེར་དཔག་ཡས་པ། །ས་གསུམ་ཁྱབ་པར་རབ་ཏུ་འཕྲོས། །བདག་དང་ཡིད་ཅན་ཐམས་ཅད་ཀྱི། །ཐོག་མེད་ནས་བསགས་སྡིག་ལྟུང་དང་། །སྒྲིབ་གཉིས་མུན་པ་ཀུན་བསལ་ནས། །ཇི་ལྟ་ཇི་སྙེད་ཤེས་བྱ་ལ། །བློ་མཆོག་པདྨོ་རྒྱས་བར་གྱུར། ཅེས་བརྗོད་ཅིང་བསམས་ལ་མོས་གུས་རྩེ་གཅིག་པས་མཚན་ཡང་དག་པར་བརྗོད་པ་ལན་གསུམ་སོགས་ཅི་ནུས་སུ་འདོན། སྤྲོ་ན། ཨོཾ་སརྦ་དྷརྨཱ་བྷ་བ་སོགས་ཀྱི་སྔགས་ཅི་རིགས་པར་བཟླ་ཞིང་ཕན་ཡོན་ཀྱང་འདོན་པར་གསུངས། གང་ལྟར་ཡང་མཐར། །དངོས་དང་ཡིད་ལས་བྱུང་བ་ཡི། །ཀུན་བཟང་མཆོད་པའི་སྤྲིན་རྒྱ་མཚོས། །སྲིད་པ་མཐར་བྱས་དེ་སྲིད་དུ། །འཇམ་དཔལ་གཞོན་ནུ་མཉེས་གྱུར་ཅིག །ཨོཾ་ཨཱཪྻ་མཉྫུ་ཤྲཱི་ཨརྒྷཾ་ནས། ཤབྡའི་བར་གྱིས་མཆོད། །སྲས་བཅས་སངས་རྒྱས་ཐམས་ཅད་ཀྱི། །ཡེ་ཤེས་ཕུང་པོ་གཅིག་བསྡུས་པ། །སྲིད་ཞི་ཀུན་གྱི་དཔལ་གྱུར་པའི། །འཇམ་པའི་དབྱངས་ལ་ཕྱག་འཚལ་ལོ། །མགོན་པོ་ཁྱོད་ཀྱི་རྡོ་རྗེའི་མཚན། །ཡང་དག་བརྗོད་པས་རབ་བསྔགས་བདག །དེང་ནས་བྱང་ཆུབ་སྙིང་པོའི་བར། །དགྱེས་བཞིན་རྗེས་སུ་བཟུང་བར་མཛོད། །གནས་སྐབས་ཚུལ་གནས་ཐོས་བསམ་དང་། །སྒོམ་པའི་བློ་གྲོས་རབ་རྒྱས་ཤིང་། །འཆད་རྩོད་རྩོམ་ལ་མཚུངས་མེད་པའི། །སྨྲ་བའི་ཉི་མར་བྱིན་གྱིས་རློབས། །མཐར་ཐུག་ཤེས་དང་ཤེས་བྱ་ཀུན། །མི་ཕྱེད་ཡེ་ཤེས་སྐུ་ཐོབ་ནས། །འགྲོ་རྣམས་འཇམ་དཔལ་གཞོན་ནུ་ཡི། །གོ་འཕང་མཆོག་ལ་འགོད་གྱུར་ཅིག །ཅེས་གསོལ་བ་གདབ། །གཟོད་ནས་སྤྲོས་བྲལ་འཇམ་པའི་དཔལ། །རྟེན་འབྱུང་སྒྱུ་མའི་ངང་ཚུལ་གྱིས། །སྣང་ཆར་ཤར་བའི་ཡེ་ཤེས་པ། །རང་བཞིན་ཆོས་ཀྱི་དབྱིངས་སུ་གཤེགས། །འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །ཅེས་སོགས་བསྔོ་སྨོན་ཅི་རིགས་པས་མཐའ་བརྒྱན་པར་བྱའོ། །ཡང་མཚན་བཅས་ཀྱི་རྣལ་འབྱོར་ལ་གཙོ་བོར་གཞོལ་བས་འཇམ་དཔལ་གྱི་རྣལ་འབྱོར་གྱི་འདོན་ན། སྐྱབས་སེམས་སྔོན་དུ་འགྲོ་བས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། །སྟོང་པའི་ངང་ལས་རང་ཉིད་ནི། །པད་ཟླའི་གདན་ལ་སྐད་ཅིག་གིས། ཞེས་པ་ནས། མངོན་སུམ་བཞིན་དུ་གསལ་བར་གྱུར། ཅེས་པའི་བར་གོང་བཞིན་ལ། །ཐུགས་ཀར་ཟླ་བའི་དཀྱིལ་འཁོར་སྟེང་། །སྐྱེ་མེད་དོན་མཚོན་ཨ་དཀར་པོ། །དེ་ལས་རྡོ་རྗེའི་ཚིག་གི་རྒྱུད། །རྟེན་འབྱུང་སྒྲ་བརྙན་ལྟ་བུའི་ཚུལ། །སྐྱེས་ཙམ་ཉིད་ནས་སྐྱེ་འགགས་སོགས། །སྤྲོས་པའི་མཚན་མ་མ་དམིགས་པ། །ཟབ་གསལ་གཉིས་མེད་ཡེ་ཤེས་སྐུ། །རྗེས་སུ་དྲན་པའི་ངང་ནས་བཀླག །ཅེས་གསལ་བཏབ་ནས་རྒྱུད་ཅི་ནུས་སུ་འདོན་མཐར། །འདི་བསྒྲུབས་པ་ལས་བྱུང་བ་ཡི། ཞེས་སོགས་བསྔོ་སྨོན་གྱི་རྒྱས་གདབ་སྟེ་ཐུན་མཚམས་ཀྱི་བྱ་བ་ལ་འཇུག་གོ །ཡང་ན་ཡི་དམ་ལྷའི་ང་རྒྱལ་གྱིས་འདོན་པ་ནི། རང་གི་རྒྱུན་གྱི་ཡི་དམ་གང་ལ་ཡང་སྦྱར་དུ་རུང་བས། དེའི་བདག་བསྐྱེད་གསལ་བཏབ་པའི་རྗེས། ཁྲོ་བོ་ཡིན་ན། ཐུགས་ཀར་ཉི་མའི་དཀྱིལ་འཁོར་སྟེང་། ཞེས་བསྒྱུར་བ་མ་གཏོགས་དམིགས་པ་སོགས་སྔར་བཞིན་ནོ། །ཡང་མཚན་མེད་ཀྱི་རྣལ་འབྱོར་ལ་གཙོ་བོར་གཞོལ་བས་བདག་མེད་པའི་ངང་ནས་འདོན་པ་ནི། སྐྱབས་སེམས་སྔོན་དུ་འགྲོ་བས། ཆོས་ཐམས་ཅད་རྨི་ལམ་དང་སྒྲ་བརྙན་དང་བྲག་ཅ་ལྟ་བུར་ཤེས་པར་བྱས་ལ་མ་ཡེངས་པའི་ངང་ནས་འདོན་ཅིང་དགེ་བ་བསྔོ་བ་སོགས་བྱའོ། །དེ་ཐམས་ཅད་ཀྱི་དོན་མདོར་བསྡུས་པའི་ཚུལ་གྱིས་འདོན་ན། སྐྱབས་འགྲོ་སེམས་བསྐྱེད་སྔོན་དུ་འགྲོ་བས། ཐོག་མར་འཇམ་དཔལ་གྱི་རྣལ་འབྱོར་གྱིས་འདོན་པའི་སྐབས་ལྟར་བདག་ཉིད་ལྷར་གསལ་གདབ། དེ་ནས་མདུན་དུ་ལྷ་གསལ་གདབ་པ་སོགས་ཆེ་བའི་ཡོན་ཏན་ལ་བསྔགས་པའི་ཚུལ་གྱིས་རྒྱུད་འདོན་པ་ལ་འཇུག །དེ་དག་གི་གནས་སྐབས་ཐམས་ཅད་དུ་ལུས་འཇའ་ཚོན། ངག་བྲག་ཅ། སེམས་སྤྲོས་བྲལ་ནམ་མཁའ་ལྟ་བུ་ཤེས་པར་བྱ། མཐར་མཆོད་བསྟོད་གསོལ་བ་གདབ་པ་སོགས་སྦྱར་རོ། །འདི་རྣམས་ཀྱི་ཁུངས་ནི་རྗེ་བཙུན་རིན་པོ་ཆེས་རྒྱུད་ཀྱི་ལུང་སྦྱོར་མཛད་པ་ལྟར་དང་། དེར་མ་ཟད་འཁོར་ལོ་བཞི་པའི་རྗེས་སུ་བསྔགས་པ་ལས། མཚན་གྱི་དོན་ཕན་ཚུན་རེ་རེ་ཞིང་ཡང་འཇམ་དཔལ་ཡེ་ཤེས་ཀྱི་སྐུ་མངོན་དུ་བྱས་ཏེ། རྩེ་གཅིག་པའི་ཡིད་ཀྱིས་སྒོམ་བདག་ཉིད་ལྷར་པར་བྱེད་པ་དང་། ཆེ་བའི་ཡོན་ཏན་ལ། ལྷག་པར་མོས་པ་དང་། དེ་ཁོ་ན་ཉིད་བདག་མེད་པའི། ཡིད་ལ་བྱེད་པ་དག་གིས་ཞེས་གསུངས་པས་ཀྱང་རིམ་བཞིན་དུ་བསྟན་པར་བཞེད་དོ། །དེ་ལྟར་དུས་གསུམ་དུ་བརྩོན་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་རློབ་པ་དང་། སྤོབས་པ་སྒྲུབ་པ་དང་། ཉན་ཐོས་དང་རང་སངས་རྒྱས་ཐམས་ཅད་ཀྱིས་དགོངས་པར་འགྱུར་བ་དང་། འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ཀྱིས་བསྲུང་ཞིང་བསྐྱབ་པ་དང་། ཚེ་རབས་ཀུན་ཏུ་མི་ཁོམ་པར་མི་སྐྱེ་ཞིང་འཇིགས་པ་ཐམས་ཅད་མི་འབྱུང་བ་དང་། ཕུན་སུམ་ཚོགས་པ་ཐམས་ཅད་ཀྱིས་འབྱོར་པར་འགྱུར་བ་དང་། གཟུངས་དང་། བློ་གྲོས་དང་། ཚུལ་ཁྲིམས་དང་། ཏིང་ངེ་འཛིན་ལ་སོགས་པ་ཡོན་ཏན་མཐའ་ཡས་པ་དང་ལྡན་ཅིང་མི་ཉམས་པ་དང་། གོང་ནས་གོང་དུ་འཕེལ་བ་ལ་བརྟེན་ནས་མྱུར་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་འགྱུར་བས་མཚོན་ཕན་ཡོན་བསམ་གྱིས་མི་ཁྱབ་པའི་ཚུལ་རྒྱ་ཆེར་ཕན་ཡོན་གྱི་རྗེས་སུ་བསྔགས་པའི་སྐབས་རྣམས་ལས་འབྱུང་བ་ལྟར་ཤེས་པར་བྱས་ནས་བློ་ལྡན་རྣམས་ཀྱིས་འདི་ཁོ་ན་ལ་གཅིག་ཏུ་བརྩོན་པར་བྱའོ། །ཞེས་པའང་རང་གཞན་ལ་ཉེ་བར་མཁོ་བའི་ཕྱིར་མང་དུ་ཐོས་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་གསུང་རབ་ལ་གཞི་བྱས། འཇམ་མགོན་ས་སྐྱ་པཎྜི་ཏའི་གསུང་སྒྲོས་ཟིན་བྲིས་སོགས་ལས་ཀྱང་ཅུང་ཟད་བསྣན་ཏེ་ཤིན་ཏུ་གསལ་བར་བཀོད་པ་དགེ་ལེགས་སུ་གྱུར་ཅིག ། ༈

[edit]

'phags pa 'jam dpal gyi mtshan yang dag par brjod pa'i rgyud kyi bklag thabs ye shes grub ster/ @#/_/'phags pa 'jam dpal gyi mtshan yang dag par brjod pa'i rgyud kyi bklag thabs ye shes grub ster zhes bya ba bzhugs so/__/na mo gu ru dz+nyA na kA yA ya/__'dir 'phags pa 'jam dpal gyi mtshan yang dag par brjod pa 'don pa'i gdams ngag la rnam pa bzhir gsungs pa las/__zab mo'i rnal 'byor la gzhol bar mi nus pa'i las dang po pa'am/__rnal 'byor zab mo la 'jug pas kyang thun mtshams rnams su che ba'i yon tan la bsngags pa'i tshul gyis gdon par 'dod pas dad pa dang /__nges 'byung dang /__byang chub kyi sems gnyis yid la byas te/__bla ma sangs rgyas chos tshogs la/__/byang chub bar du skyabs su mchi/__/gzhan don rdzogs byang thob bya'i phyir/__/zab mo'i rgyud sde bklag par bgyi/__lan gsum gyis skyabs sems bya/__rang mdun nam mkhar yid 'phrog pa'i/__/mchod sprin rgya mtsho 'khrigs pa'i dbus/__/pad zla'i gdan la skad cig gis/__/rje btsun 'phags pa 'jam pa'i dbyangs/__/sku mdog gser gyi lhun po ni/__/mtshams sprin gsar pas 'khyud bzhin mdzes/__/zhi 'dzum brgyad gnyis lang tsho'i dpal/__/ngo mtshar mtshan dpe'i phung por 'bar/__/zhal gcig phyag bzhi'i dang po gnyis/__/shes rab ral gri glegs bam dang /__/'og mas thabs shes mda' gzhu bsnams/__/zla ba'i rgyab yol la brten nas/__/zhabs gnyis rdo rje'i skyil krung bzhugs/__/sna tshogs dar gyi sham thabs dang /__/rin chen rgyan gyis rnam par brgyan/__/zur phud ut+pal la gnas pa'i/__/mi bskyod rigs kyi bdag por bcas/__/mkha' lam dbang po'i gzhu lta bu/__/snang stong zung 'jug ye shes sku/__/mngon sum bzhin du gsal bar gyur/__/e ma sangs rgyas byang sems dang /__/nyan thos rang rgyal tshangs dbang sogs/__/srid zhi'i nyams 'gyur ji snyed kun/__/'jam pa'i dpal las gzhan min phyir/__/mtha' yas shes bya'i rjes song ba'i/__/mtshan dang sku yi bkod pa dang /__/yon tan mkha' dang snyoms 'jug par/__/mi phyed mchog tu gus pa'i blos/__/ngag gi nor bu'i tam+bu ra/__/ye shes lus can 'jam dpal gyi/__/rdo rje'i mtshan don yang dag par/__/brjod pa'i gdangs su 'phos pa yis/__/mkhyen brtse nus pa'i rgyud bskul bas/__/thugs rje'i 'od zer dpag yas pa/__/sa gsum khyab par rab tu 'phros/__/bdag dang yid can thams cad kyi/__/thog med nas bsags sdig ltung dang /__/sgrib gnyis mun pa kun bsal nas/__/ji lta ji snyed shes bya la/__/blo mchog pad+mo rgyas bar gyur/__ces brjod cing bsams la mos gus rtse gcig pas mtshan yang dag par brjod pa lan gsum sogs ci nus su 'don/__spro na/__oM sarba d+harmA b+ha ba sogs kyi sngags ci rigs par bzla zhing phan yon kyang 'don par gsungs/_gang ltar yang mthar/__/dngos dang yid las byung ba yi/__/kun bzang mchod pa'i sprin rgya mtshos/__/srid pa mthar byas de srid du/__/'jam dpal gzhon nu mnyes gyur cig__/oM AR+Ya many+dzu shrI ar+g+haM nas/__shab+da'i bar gyis mchod/__/sras bcas sangs rgyas thams cad kyi/__/ye shes phung po gcig bsdus pa/__/srid zhi kun gyi dpal gyur pa'i/__/'jam pa'i dbyangs la phyag 'tshal lo/__/mgon po khyod kyi rdo rje'i mtshan/__/yang dag brjod pas rab bsngags bdag__/deng nas byang chub snying po'i bar/__/dgyes bzhin rjes su bzung bar mdzod/__/gnas skabs tshul gnas thos bsam dang /__/sgom pa'i blo gros rab rgyas shing /__/'chad rtsod rtsom la mtshungs med pa'i/__/smra ba'i nyi mar byin gyis rlobs/__/mthar thug shes dang shes bya kun/__/mi phyed ye shes sku thob nas/__/'gro rnams 'jam dpal gzhon nu yi/__/go 'phang mchog la 'god gyur cig__/ces gsol ba gdab/__/gzod nas spros bral 'jam pa'i dpal/__/rten 'byung sgyu ma'i ngang tshul gyis/__/snang char shar ba'i ye shes pa/__/rang bzhin chos kyi dbyings su gshegs/__/'di bsgrubs pa las byung ba yi/__/dge ba bdag gis gang thob pa/__/des ni skye bo thams cad kyis/__/bde gshegs shes rab thob par shog__/ces sogs bsngo smon ci rigs pas mtha' brgyan par bya'o/__/yang mtshan bcas kyi rnal 'byor la gtso bor gzhol bas 'jam dpal gyi rnal 'byor gyi 'don na/__skyabs sems sngon du 'gro bas/__oM swa b+hA wa shud+d+haHsarba d+harmAHswa b+hA wa shud+d+ho\u0f85haM/__/stong pa'i ngang las rang nyid ni/__/pad zla'i gdan la skad cig gis/__zhes pa nas/__mngon sum bzhin du gsal bar gyur/__ces pa'i bar gong bzhin la/__/thugs kar zla ba'i dkyil 'khor steng /__/skye med don mtshon a dkar po/__/de las rdo rje'i tshig gi rgyud/__/rten 'byung sgra brnyan lta bu'i tshul/__/skyes tsam nyid nas skye 'gags sogs/__/spros pa'i mtshan ma ma dmigs pa/__/zab gsal gnyis med ye shes sku/__/rjes su dran pa'i ngang nas bklag__/ces gsal btab nas rgyud ci nus su 'don mthar/__/'di bsgrubs pa las byung ba yi/__zhes sogs bsngo smon gyi rgyas gdab ste thun mtshams kyi bya ba la 'jug go__/yang na yi dam lha'i nga rgyal gyis 'don pa ni/__rang gi rgyun gyi yi dam gang la yang sbyar du rung bas/__de'i bdag bskyed gsal btab pa'i rjes/__khro bo yin na/__thugs kar nyi ma'i dkyil 'khor steng /__zhes bsgyur ba ma gtogs dmigs pa sogs sngar bzhin no/__/yang mtshan med kyi rnal 'byor la gtso bor gzhol bas bdag med pa'i ngang nas 'don pa ni/__skyabs sems sngon du 'gro bas/__chos thams cad rmi lam dang sgra brnyan dang brag ca lta bur shes par byas la ma yengs pa'i ngang nas 'don cing dge ba bsngo ba sogs bya'o/__/de thams cad kyi don mdor bsdus pa'i tshul gyis 'don na/__skyabs 'gro sems bskyed sngon du 'gro bas/__thog mar 'jam dpal gyi rnal 'byor gyis 'don pa'i skabs ltar bdag nyid lhar gsal gdab/__de nas mdun du lha gsal gdab pa sogs che ba'i yon tan la bsngags pa'i tshul gyis rgyud 'don pa la 'jug__/de dag gi gnas skabs thams cad du lus 'ja' tshon/__ngag brag ca/__sems spros bral nam mkha' lta bu shes par bya/__mthar mchod bstod gsol ba gdab pa sogs sbyar ro/__/'di rnams kyi khungs ni rje btsun rin po ches rgyud kyi lung sbyor mdzad pa ltar dang /__der ma zad 'khor lo bzhi pa'i rjes su bsngags pa las/__mtshan gyi don phan tshun re re zhing yang 'jam dpal ye shes kyi sku mngon du byas te/__rtse gcig pa'i yid kyis sgom bdag nyid lhar par byed pa dang /__che ba'i yon tan la/__lhag par mos pa dang /__de kho na nyid bdag med pa'i/__yid la byed pa dag gis zhes gsungs pas kyang rim bzhin du bstan par bzhed do/__/de ltar dus gsum du brtson pas sangs rgyas dang byang chub sems dpa' thams cad kyis byin gyis rlob pa dang /__spobs pa sgrub pa dang /__nyan thos dang rang sangs rgyas thams cad kyis dgongs par 'gyur ba dang /__'jig rten dang 'jig rten las 'das pa'i lha rnams kyis bsrung zhing bskyab pa dang /__tshe rabs kun tu mi khom par mi skye zhing 'jigs pa thams cad mi 'byung ba dang /__phun sum tshogs pa thams cad kyis 'byor par 'gyur ba dang /__gzungs dang /__blo gros dang /__tshul khrims dang /__ting nge 'dzin la sogs pa yon tan mtha' yas pa dang ldan cing mi nyams pa dang /__gong nas gong du 'phel ba la brten nas myur du rdzogs pa'i sangs rgyas kyi go 'phang rin po che thob par 'gyur bas mtshon phan yon bsam gyis mi khyab pa'i tshul rgya cher phan yon gyi rjes su bsngags pa'i skabs rnams las 'byung ba ltar shes par byas nas blo ldan rnams kyis 'di kho na la gcig tu brtson par bya'o/__/zhes pa'ang rang gzhan la nye bar mkho ba'i phyir mang du thos pa'i bya bral ba 'jam dbyangs mkhyen brtse'i dbang pos rje btsun rin po che grags pa rgyal mtshan gyi gsung rab la gzhi byas/__'jam mgon sa skya paN+Di ta'i gsung sgros zin bris sogs las kyang cung zad bsnan te shin tu gsal bar bkod pa dge legs su gyur cig____/_!_