JKW-KABUM-10-THA-001-009

From Khyentse Lineage - A Tsadra Foundation Project

‎‎

གཉན་སྒྲོལ་ཡན་ལག་དྲུག་པའི་བསྙེན་སྒྲུབ་ལས་གསུམ་གྱི་རྣམ་བཞག་ཨུཏྤལ་ཆུན་པོ།
Wylie title gnyan sgrol yan lag drug pa'i bsnyen sgrub las gsum gyi rnam bzhag ut+pal chun po JKW-KABUM-10-THA-001.pdf
Location mkhyen brtse'i bka' 'bum
Volume 10, sde tshan 1, Text 9, Pages 103-109 (Folios 52a2 to 55a4)
Author འཇམ་དབྱངས་མཁྱེན་བརྩེའི་དབང་པོ་
Less details More details
Associated People གཉན་ལོ་ཙཱ་བ་ (gnyan lo tsA ba)
Citation 'jam dbyangs mkhyen brtse'i dbang po. gnyan sgrol yan lag drug pa'i bsnyen sgrub las gsum gyi rnam bzhag ut+pal chun po. In 'jam dbyangs mkhyen brtse'i dbang po'i bka' 'bum, Vol. 10: 103-109. Khams sde dge rdzong sar dgon: Rdzong sar blo gros phun tshogs, 2020.
Genre Activity Manual - las byang  ·  Recitation Manual - bsnyen yig  ·  Sadhanas - Evocation Ritual - sgrub thabs  ·  Activity Practices - las tshogs
Cycle གཉན་སྒྲོལ་ཡན་ལག་དྲུག་པ་ (gnyan sgrol yan lag drug pa)
Deity sgrol ma, sgrol ljang
Colophon

།ཞེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཡིག་ཆ་སྔ་མའི་དོན་གྱི་བཅུད་ཕྱུང་སྟེ་བྲིས་པའི་དགེ་བས་འགྲོ་ཀུན་ཕྱི་ནང་གི་བར་དུ་གཅོད་པ་ཐམས་ཅད་ཞི་ཞིང་འདོད་རྒུའི་དངོས་གྲུབ་ཡིད་བཞིན་དུ་འགྲུབ་པའི་རྒྱུར་གྱུར་ཅིག།

zhes pa'ang bya bral ba 'jam dbyangs mkhyen brtse'i dbang pos yig cha snga ma'i don gyi bcud phyung ste bris pa'i dge bas 'gro kun phyi nang gi bar du gcod pa thams cad zhi zhing 'dod rgu'i dngos grub yid bzhin du 'grub pa'i rgyur gyur cig

[edit]
༄༅། །གཉན་སྒྲོལ་ཡན་ལག་དྲུག་པའི་བསྙེན་སྒྲུབ་ལས་གསུམ་གྱི་རྣམ་པར་གཞག་པ་ཨུཏྤལ་ཆུན་པོ་ཞེས་བྱ་བ་བཞུགས་སོ། །ན་མོ་གུ་རུ་ཨཱརྻཱ་ཏཱ་རཱ་ཡཻ། འདིར་རྣལ་འབྱོར་མ་རྒྱུད་སྒྲོལ་མ་མངོན་པར་འབྱུང་བ་ལ་བརྟེན་ནས་སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱིས་ལེགས་པར་བཀྲལ་ཞིང་། གངས་ཅན་གྱི་ལྗོངས་འདིར་གཉན་ལོ་ཙཱ་བ་དར་མ་གྲགས་ཀྱིས་སྤྱན་དྲངས་ཏེ། རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པའི་འཕགས་མ་སྒྲོལ་མའི་ལུང་བླང་བ་དང་། བསྙེན་པ་དང་། སྒྲུབ་པ་དང་། གཏོར་མའི་ཆོ་ག་དང་། སྲུང་བའི་འཁོར་ལོ་དང་། ཆོམ་རྐུན་འཆིང་བ་སྟེ་ཡན་ལག་དྲུག་དང་ལྡན་པའི་གདམས་པ་ཟབ་མོ་ཉམས་སུ་བླང་བའི་ཚུལ་ལ་གཉིས། སྔོན་དུ་ལུང་བླང་བ་དང་། ཉམས་ལེན་དངོས་སོ། །དང་པོ་ནི། ངོར་ཆེན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་སྒྲུབ་ཐབས་རྗེས་གནང་དང་བཅས་པ་དང་། དེ་ཉིད་འཇམ་མགོན་ཀུན་དགའ་བློ་གྲོས་ཀྱིས་བཀླག་ཆོག་ཏུ་བསྡེབས་པ་དག་གི་དགོངས་དོན་ལྟར་བླ་མ་ལས་ནོད་དེ་དམ་ཚིག་དང་སྡོམ་པ་རྣམ་པར་དག་པས་རྒྱུད་སྦྱང་བར་བྱའོ། །གཉིས་པ་ལ་གསུམ། བསྙེན་པ། སྒྲུབ་པ། ལས་སྦྱོར་རོ། །དང་པོ་ནི། གནས་དབེན་པར་ཕྱག་དར་བྱས་ཏེ། སྒྲོལ་མའི་སྐུ་རྟེན་བཤམས་པའི་མདུན་ལ་སོགས་པ་གང་བདེར་ཟླུམ་གཏོར་གཅིག་དང་། ཉེར་སྤྱོད་སྤྱི་ལྟར་བཤམ། རང་ཉིད་ཁ་ལྷོ་ཕྱོགས་སུ་ལྟ་བ་འགྲིགས་ན་རབ། མ་འགྲིགས་ན་མོས་པ་བྱས་པའི་མདུན་དུ་རྡོ་རྗེ་དྲིལ་བུ་མེ་ཏོག་སོགས་མཁོ་བའི་ཡོ་བྱད་རྣམས་དང་། དང་པོར་འཇུག་པའི་སྔོན་འགྲོར་ཆ་གསུམ་གྱི་གཏོར་མ་བཅས་བཤམས་ལ། ཆ་གསུམ་སྤྱི་ལྟར་གཏང་། སྒོ་རྩར་མཚམས་ཐོ་བརྟན་པར་གཟུགས། མཆོད་པ་བྱིན་རླབས་སྔོན་དུ་འགྲོ་བས། སྐྱབས་འགྲོ་ནས་བཟུང་རྗེ་དཀོན་མཆོག་ལྷུན་གྲུབ་དང་། འཇམ་མགོན་ཀུན་དགའ་བློ་གྲོས་ཀྱིས་མཛད་པའི་སྒྲུབ་ཐབས་གང་རིགས་ལྟར་ཉམས་སུ་བླང་། ཐུན་གྱི་དངོས་གཞིར་སྙིང་པོ་ཡི་གེ་བཅུ་པ་ཁོ་ན་དང་། ཐུན་མཐར་གཟུངས་རིང་ཡང་ཅུང་ཟད་བཟླ། དམིགས་པ་ནི་གཙོ་བོར་སྔགས་ཕྲེང་ལ་ཡིད་གཏད་དེ་ཀློག་པའི་ཚུལ་དུ་བཟླ་ཞིང་། དེ་ལ་གསལ་སྣང་ཁྱད་པར་ཅན་ཐོབ་པ་ན། ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པའི་སྣ་ལ་མཆོད་པའི་བྱེ་བྲག་བསམ་གྱིས་མི་ཁྱབ་པར་སྤྲུལ་ཏེ་འཕགས་པ་རྣམས་ལ་མཉེས་པའི་མཆོད་པ་ཕུལ། སེམས་ཅན་ཐམས་ཅད་ལ་ཕོག་པས་འཇིགས་པ་ཆེན་པོ་བརྒྱད་དང་བཅུ་དྲུག་ལས་བསྐྱབས་ཏེ་སྡིག་སྒྲིབ་ཐམས་ཅད་སྦྱངས་ནས་རྗེ་བཙུན་མའི་གོ་འཕང་ལ་བཀོད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་བྱིན་རླབས་ནུས་མཐུ་དང་ཁྱད་པར་སངས་རྒྱས་ཐམས་ཅད་ཀྱི་ཕྲིན་ལས་རྒྱས་པའི་དངོས་གྲུབ་ཐམས་ཅད་འོད་ཟེར་ལྗང་གུའི་རྣམ་པར་ཚུར་བསྡུས་ནས་རང་ལ་ཐིམ་པར་བསམ་པའི་སྤྲོ་བསྡུའི་དམིགས་པ་དང་། རང་རྗེ་བཙུན་མའི་སྐུ་སྣང་སྟོང་ཟུང་འཇུག་དང་། སྔགས་ཀྱི་སྒྲ་གྲགས་སྟོང་ཟུང་འཇུག་དང་། དྲན་རྟོག་ཐམས་ཅད་རིག་ཙམ་རང་གི་ངོ་བོས་སྟོང་པའི་ཟུང་འཇུག་བརྗོད་བྲལ་ཏེ་རྗེ་བཙུན་མའི་སྐུ་གསུང་ཐུགས་ཀྱི་གསང་བ་གསུམ་ལས་ནམ་ཡང་མ་ཡེངས་པའི་ངང་ནས་སྔགས་བཟླ་བ་ནི་གལ་ཆེའོ། །ཐུན་བསྡུ་བ་ན་འདོད་དོན་གསོལ་གདབ་གང་རིགས་བྱ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ་པར་བསམ་མོ། །གཏོར་མ་འབུལ་བ་ནི། གཏོར་མ་ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཅེས་དང་། འབྲུ་གསུམ་ལན་གསུམ་བརྗོད་པས་བྱིན་གྱིས་བརླབ། ལྷོ་ཕྱོགས་པོ་ཏ་ལ་ནས་སྒྲོལ་མ་འཁོར་དང་བཅས་པ་བདག་ལ་ཐུགས་རྗེས་དགོངས་བཞིན་དུ་བཞུགས་པས་གཏོར་མ་གསོལ་བར་བསམས་ལ་ནམ་མཁའ་མཛོད་ཀྱི་ཕྱག་རྒྱ་དང་། ན་མཿསརྦྦ་བུདྡྷ་བོ་དྷི་ས་ཏྭཱ་ནཱི། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཧེ་ཧེ་བྷ་ག་ཝ་ཏེ་མ་ཧཱ་ས་ཏྭཱ་སརྦྦ་བུདྡྷཱཿཨ་ཝ་ལོ་ཀི་ཏེ། མཱ་བི་ལམྦ་མཱ་བི་ལམྦ། ཨོཾ་དཾ་བ་ལིཾ་གྲྀཧྞཱ་པ་ཡ། གྲྀཧྞཱ་པ་ཡ། ཧཱུྃ་ཧཱུྃ། སརྦྦ་བི་སཉྩ་རེ་སྭཱ་ཧཱ། ཞེས་ལན་གསུམ་གྱིས་ཕུལ་ནས། ཨཱརྱཱ་ཏཱ་རེ་ས་པ་རི་ཝཱ་ར་ཨརྒྷཾ་ནས་ཤཔྡའི་བར་གྱིས་མཆོད། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་བསྟོད་ལ། རྗེ་བཙུན་མ་འཕགས་མ་སྒྲོལ་མས་བདག་དང་སེམས་ཅན་ཐམས་ཅད་འཇིགས་པ་ཆེན་པོ་བརྒྱད་དང་བཅུ་དྲུག་ལས་བསྐྱབ་ཏུ་གསོལ། འཁོར་བ་དང་ངན་སོང་གི་སྡུག་བསྔལ་ལས་བསྒྲལ་དུ་གསོལ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། དགེ་བ་འདི་ཡིས་མྱུར་དུ་བདག་སོགས་ཀྱིས་བསྔོ་བ་སྨོན་ལམ་བྱ། སྤྲོ་ན་ཐུན་མཚམས་སུ་རང་རྗེ་བཙུན་མའི་ང་རྒྱལ་གྱིས་གནས་པས། རྗེ་བཙུན་མ་མདུན་གྱི་ནམ་མཁར་བཞུགས་པའི་སོགས་ནས་ཕྱག་འཚལ་ཉེར་གཅིག་གིས་བསྟོད་དེ་རང་ལ་ཐིམ་པའི་བར་དཀྱུས་ལྟར་བྱ། དེ་ལྟ་བུའི་ཚུལ་གྱིས་ཐུན་བཞིའམ་གསུམ་དུ་བཅད། སྔ་ཐུན་ནམ་ཕྱི་ཐུན་གྱི་མཇུག་ཏུ་གཏོར་མ་དབུལ། བསྙེན་པའི་ཚད་ཡི་གེ་བཅུ་པ་འབུམ་ཕྲག་བཅུ་གསུམ་བཟླ་བ་ནི་ལས་རུང་དང་། འབུམ་ཕྲག་བརྒྱད་ཅུ་བཟླས་པས་སྒྲོལ་མའི་སྔགས་རྒྱུད་རྣམས་ལས་གསུངས་པའི་ལས་རབ་འབྱམས་བསྒྲུབ་པ་ལ་ཐོག་པ་མེད་པར་འགྱུར་བ་ཡིན་ལ། ཁ་སྐོང་གི་སྦྱིན་སྲེག་བྱེད་པར་སྤྲོ་ན་གསང་བ་སྤྱིའི་ཆོ་ག་ལ་འདི་ཉིད་ཀྱི་ལྷ་སྔགས་སྦྱར་བས་འགྲུབ་པར་འགྱུར་ཞིང་། གཞན་མཚམས་ཀྱི་སྤང་བླང་དང་གྲོལ་ཚུལ་སོགས་བསྙེན་ཐབས་སྤྱི་ལྟར་ཤེས་པར་བྱའོ། ། གཉིས་པ་སྒྲུབ་པར་བྱ་བར་འདོད་ན། བསྙེན་པ་མཐར་ཕྱིན་པ་དེས། མཎྜལ་ལ་བརྟེན་ཏེ་དབང་དུ་བྱ་བ་ནི། གནས་དབེན་པར་ཟངས་ལ་སོགས་པའི་མཎྜལ་ལ་འབྲས་དམར་པོའམ་སྨུག་རྩིས་ཁ་བསྒྱུར་བའི་ཚོམ་བུ་བཀོད་ལ། ཉེར་སྤྱོད་དང་མདུན་དུ་གཏོར་མ་དམར་པོ་གཅིག་བཅས་བཤམས་ལ་མཆོད་པ་བྱིན་གྱིས་བརླབ། ཚོགས་གཉིས་བསགས་པ་ཡན་ཆད་གོང་བཞིན་སྔོན་དུ་སོང་ནས། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཏཱྃ་ཡིག་དམར་པོ་ལས་ཨུཏྤལ་དམར་པོ་ཏཱྃ་གྱིས་མཚན་པ། དེ་ལས་འོད་ཟེར་འཕྲོས་འདུས་གཅིག་ཏུ་གྱུར་པ་ལས། རྗེ་བཙུན་མ་སྒྲོལ་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། ཕྱག་གཡས་ལྕགས་ཀྱུ་དང་གཡོན་ཨུཏྤལ་དམར་པོ་འཛིན་པ། ཞལ་འཛུམ་པ་དང་སྒེག་ཅིང་ཆགས་པའི་ཉམས་དང་ལྡན་པ་དབུ་སྐྲ་ལི་བ་གཡོན་ཕྱོགས་སུ་བརྫེས་ཤིང་གཡོན་ངོས་ནས་ཅུང་ཟད་འཕྱང་བ། ལོ་བཅུ་དྲུག་ལོན་པ་ལྟ་བུའི་ཆ་ལུགས་ཅན། དར་སྲབ་མོའི་སྟོད་གཡོགས་ཀྱིས་ནུ་མ་བཀབ་ཅིང་། དར་སྣ་ཚོགས་ཀྱི་ཤམ་ཐབས་གསོལ་བ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། ཞབས་གཡས་ཅུང་ཟད་བརྐྱང་བ་གཡོན་བསྐུམ་པའི་སྟབས་ཀྱིས་བཞུགས་པ། དེའི་ཐུགས་ཀར་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་དུ་ཏཱྃ་ཡིག་དམར་པོ་སོགས་ནས་དེ་ལ་དབང་བསྐུར་བ་དང་། ཡེ་ཤེས་པ་གཞུག་པ་དང་། གནས་ལྔ་བྱིན་གྱིས་བརླབ་པ་རྣམས་སྔར་བཞིན་བྱས་ལ། དེ་ནས་རང་གི་སྙིང་གར་ཏཱྃ་ཡིག་དམར་པོ་ལས་རྗེ་བཙུན་མ་རང་འདྲ་བ་དཔག་ཏུ་མེད་པ་སྤྲོས་ཏེ། རྒྱལ་པོ་ལ་སོགས་པ་གང་ལ་བྱ་བ་དེའི་སྙིང་གར་ལྕགས་ཀྱུས་ཕུག །མགྲིན་པར་ཨུཏྤལའི་ཞགས་པས་བཅིངས་ཏེ་མདུན་གྱི་མཎྜལ་གྱི་སྟེང་དུ་བདག་ལ་གུས་པའི་ཚུལ་གྱིས་བཀུག་པར་བསམ་མོ། །ཡང་སྙིང་གའི་ཏཱྃ་གྱི་འོད་དམར་པོ་དེས་ལུས་ལ་ཕོག་པས་དམར་ལམ་སོང་བར་བསམ་ཞིང་། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཆེ་གེ་མོ་ཝ་ཤ་མ་ན་ཡེ། ཞེས་བཟླའོ། །ཐུན་འཇོག་ཀར་བསྒྲུབ་བྱ་བདག་ལ་བསྟིམས་ལ། གཏོར་མ་གཏོང་བ་སོགས་གོང་བཞིན་བྱའོ། །དེ་ལྟ་བུ་ཐུན་བཞིའི་ངེས་པས་ཞག་བཅོ་ལྔ་ནས་འགྲུབ་པར་གསུངས་སོ། །གསུམ་པ་ལས་སྦྱོར་ལ། སྲུང་བའི་འཁོར་ལོ་དང་། ཆོམ་རྐུན་འཆིང་བའི་མན་ངག་གཉིས་ཏེ་རྗེ་བཙུན་རིན་པོ་ཆེས་མཛད་པའི་རྩ་བའི་ཡི་གེ་ལས་རྟོགས་པར་བྱའོ། །ཞེས་པའང་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཡིག་ཆ་སྔ་མའི་དོན་གྱི་བཅུད་ཕྱུང་སྟེ་བྲིས་པའི་དགེ་བས་འགྲོ་ཀུན་ཕྱི་ནང་གི་བར་དུ་གཅོད་པ་ཐམས་ཅད་ཞི་ཞིང་འདོད་རྒུའི་དངོས་གྲུབ་ཡིད་བཞིན་དུ་འགྲུབ་པའི་རྒྱུར་གྱུར་ཅིག། ། ༈
[edit]

gnyan sgrol yan lag drug pa'i bsnyen sgrub las gsum gyi rnam bzhag ut+pal chun po/_ @#/_/gnyan sgrol yan lag drug pa'i bsnyen sgrub las gsum gyi rnam par gzhag pa ut+pal chun po zhes bya ba bzhugs so/__/na mo gu ru Ar+YA tA rA yai/__'dir rnal 'byor ma rgyud sgrol ma mngon par 'byung ba la brten nas slob dpon chen po 'phags pa klu sgrub kyis legs par bkral zhing /__gangs can gyi ljongs 'dir gnyan lo tsA ba dar ma grags kyis spyan drangs te/__rje btsun sa skya pa yab sras la bka' babs pa'i 'phags ma sgrol ma'i lung blang ba dang /__bsnyen pa dang /__sgrub pa dang /__gtor ma'i cho ga dang /__srung ba'i 'khor lo dang /__chom rkun 'ching ba ste yan lag drug dang ldan pa'i gdams pa zab mo nyams su blang ba'i tshul la gnyis/__sngon du lung blang ba dang /__nyams len dngos so/__/dang po ni/__ngor chen thams cad mkhyen pa dkon mchog lhun grub kyi sgrub thabs rjes gnang dang bcas pa dang /__de nyid 'jam mgon kun dga' blo gros kyis bklag chog tu bsdebs pa dag gi dgongs don ltar bla ma las nod de dam tshig dang sdom pa rnam par dag pas rgyud sbyang bar bya'o/__/gnyis pa la gsum/__bsnyen pa/__sgrub pa/__las sbyor ro/__/dang po ni/__gnas dben par phyag dar byas te/__sgrol ma'i sku rten bshams pa'i mdun la sogs pa gang bder zlum gtor gcig dang /__nyer spyod spyi ltar bsham/__rang nyid kha lho phyogs su lta ba 'grigs na rab/__ma 'grigs na mos pa byas pa'i mdun du rdo rje dril bu me tog sogs mkho ba'i yo byad rnams dang /__dang por 'jug pa'i sngon 'gror cha gsum gyi gtor ma bcas bshams la/__cha gsum spyi ltar gtang /__sgo rtsar mtshams tho brtan par gzugs/__mchod pa byin rlabs sngon du 'gro bas/__skyabs 'gro nas bzung rje dkon mchog lhun grub dang /__'jam mgon kun dga' blo gros kyis mdzad pa'i sgrub thabs gang rigs ltar nyams su blang /__thun gyi dngos gzhir snying po yi ge bcu pa kho na dang /__thun mthar gzungs ring yang cung zad bzla/__dmigs pa ni gtso bor sngags phreng la yid gtad de klog pa'i tshul du bzla zhing /__de la gsal snang khyad par can thob pa na/__thugs ka'i sngags phreng las 'od zer 'phros pa'i sna la mchod pa'i bye brag bsam gyis mi khyab par sprul te 'phags pa rnams la mnyes pa'i mchod pa phul/__sems can thams cad la phog pas 'jigs pa chen po brgyad dang bcu drug las bskyabs te sdig sgrib thams cad sbyangs nas rje btsun ma'i go 'phang la bkod/__sangs rgyas dang byang chub sems dpa' thams cad kyi thugs rje byin rlabs nus mthu dang khyad par sangs rgyas thams cad kyi phrin las rgyas pa'i dngos grub thams cad 'od zer ljang gu'i rnam par tshur bsdus nas rang la thim par bsam pa'i spro bsdu'i dmigs pa dang /__rang rje btsun ma'i sku snang stong zung 'jug dang /__sngags kyi sgra grags stong zung 'jug dang /__dran rtog thams cad rig tsam rang gi ngo bos stong pa'i zung 'jug brjod bral te rje btsun ma'i sku gsung thugs kyi gsang ba gsum las nam yang ma yengs pa'i ngang nas sngags bzla ba ni gal che'o/__/thun bsdu ba na 'dod don gsol gdab gang rigs bya/__rang gi snying ga nas 'od zer 'phros pas gdan 'od zer gyi rnam par gyur te rang la thim par bsam mo/__/gtor ma 'bul ba ni/__gtor ma a mr-i tas bsang /__swa b+hA was sbyangs/__stong pa'i ngang las rin po che las grub pa'i snod yangs shing rgya che ba'i nang du/__oM zhu ba las byung ba'i gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__ces dang /__'bru gsum lan gsum brjod pas byin gyis brlab/__lho phyogs po ta la nas sgrol ma 'khor dang bcas pa bdag la thugs rjes dgongs bzhin du bzhugs pas gtor ma gsol bar bsams la nam mkha' mdzod kyi phyag rgya dang /__na maHsar+b+ba bud+d+ha bo d+hi sa twA nI/__a pra ti ha ta shA sa nA nAM/__he he b+ha ga wa te ma hA sa twA sar+b+ba bud+d+hAHa wa lo ki te/__mA bi lam+ba mA bi lam+ba/__oM daM ba liM gr-ih+NA pa ya/__gr-ih+NA pa ya/__hU~M hU~M/__sar+b+ba bi sany+tsa re swA hA/__zhes lan gsum gyis phul nas/__Ar+yA tA re sa pa ri wA ra ar+g+haM nas shap+da'i bar gyis mchod/__lha dang lha min cod pan gyis/__/zhabs kyi pad+mo la btud de/__/phongs pa kun las sgrol mdzad ma/__/sgrol ma yum la phyag 'tshal lo/__/zhes bstod la/__rje btsun ma 'phags ma sgrol mas bdag dang sems can thams cad 'jigs pa chen po brgyad dang bcu drug las bskyab tu gsol/__'khor ba dang ngan song gi sdug bsngal las bsgral du gsol/__'jig rten dang 'jig rten las 'das pa'i dngos grub ma lus pa stsal du gsol/__zhes gsol ba gdab/__dge ba 'di yis myur du bdag sogs kyis bsngo ba smon lam bya/__spro na thun mtshams su rang rje btsun ma'i nga rgyal gyis gnas pas/__rje btsun ma mdun gyi nam mkhar bzhugs pa'i sogs nas phyag 'tshal nyer gcig gis bstod de rang la thim pa'i bar dkyus ltar bya/__de lta bu'i tshul gyis thun bzhi'am gsum du bcad/__snga thun nam phyi thun gyi mjug tu gtor ma dbul/__bsnyen pa'i tshad yi ge bcu pa 'bum phrag bcu gsum bzla ba ni las rung dang /__'bum phrag brgyad cu bzlas pas sgrol ma'i sngags rgyud rnams las gsungs pa'i las rab 'byams bsgrub pa la thog pa med par 'gyur ba yin la/__kha skong gi sbyin sreg byed par spro na gsang ba spyi'i cho ga la 'di nyid kyi lha sngags sbyar bas 'grub par 'gyur zhing /__gzhan mtshams kyi spang blang dang grol tshul sogs bsnyen thabs spyi ltar shes par bya'o/_/_gnyis pa sgrub par bya bar 'dod na/__bsnyen pa mthar phyin pa des/__maN+Dal la brten te dbang du bya ba ni/__gnas dben par zangs la sogs pa'i maN+Dal la 'bras dmar po'am smug rtsis kha bsgyur ba'i tshom bu bkod la/__nyer spyod dang mdun du gtor ma dmar po gcig bcas bshams la mchod pa byin gyis brlab/__tshogs gnyis bsags pa yan chad gong bzhin sngon du song nas/__stong pa'i ngang las pa~M las pad+ma dang a las zla ba'i dkyil 'khor gyi steng du/__tA~M yig dmar po las ut+pal dmar po tA~M gyis mtshan pa/__de las 'od zer 'phros 'dus gcig tu gyur pa las/__rje btsun ma sgrol ma sku mdog dmar mo zhal gcig phyag gnyis ma/__phyag g.yas lcags kyu dang g.yon ut+pal dmar po 'dzin pa/__zhal 'dzum pa dang sgeg cing chags pa'i nyams dang ldan pa dbu skra li ba g.yon phyogs su brdzes shing g.yon ngos nas cung zad 'phyang ba/__lo bcu drug lon pa lta bu'i cha lugs can/__dar srab mo'i stod g.yogs kyis nu ma bkab cing /__dar sna tshogs kyi sham thabs gsol ba/__rin po che'i rgyan thams cad kyis brgyan pa/__zhabs g.yas cung zad brkyang ba g.yon bskum pa'i stabs kyis bzhugs pa/__de'i thugs kar pa~M las pad+ma dang a las zla ba'i dkyil 'khor du tA~M yig dmar po sogs nas de la dbang bskur ba dang /__ye shes pa gzhug pa dang /__gnas lnga byin gyis brlab pa rnams sngar bzhin byas la/__de nas rang gi snying gar tA~M yig dmar po las rje btsun ma rang 'dra ba dpag tu med pa spros te/__rgyal po la sogs pa gang la bya ba de'i snying gar lcags kyus phug__/mgrin par ut+pala'i zhags pas bcings te mdun gyi maN+Dal gyi steng du bdag la gus pa'i tshul gyis bkug par bsam mo/__/yang snying ga'i tA~M gyi 'od dmar po des lus la phog pas dmar lam song bar bsam zhing /__oM tA re tut+tA re tu re swA hA che ge mo wa sha ma na ye/__zhes bzla'o/__/thun 'jog kar bsgrub bya bdag la bstims la/__gtor ma gtong ba sogs gong bzhin bya'o/__/de lta bu thun bzhi'i nges pas zhag bco lnga nas 'grub par gsungs so/__/gsum pa las sbyor la/__srung ba'i 'khor lo dang /__chom rkun 'ching ba'i man ngag gnyis te rje btsun rin po ches mdzad pa'i rtsa ba'i yi ge las rtogs par bya'o/__/zhes pa'ang bya bral ba 'jam dbyangs mkhyen brtse'i dbang pos yig cha snga ma'i don gyi bcud phyung ste bris pa'i dge bas 'gro kun phyi nang gi bar du gcod pa thams cad zhi zhing 'dod rgu'i dngos grub yid bzhin du 'grub pa'i rgyur gyur cig/___/_!_

Footnotes[edit]

Other Information[edit]