JKW-KABAB-18-TSHA-017

From Khyentse Lineage - A Tsadra Foundation Project

‎‎

དག་སྣང་མི་ཏྲའི་ཚེ་དཀར་ནང་སྒྲུབ་ཀྱི་ཚེ་དབང༌།
Wylie title dag snang mi tra'i tshe dkar nang sgrub kyi tshe dbang JKW-KABAB-18-TSHA-017.pdf
Location mkhyen brtse'i bka' babs
Volume 18, Text 17, Pages 111-121 (Folios 1a to 6a4)
Author མི་ཉག་ཐུབ་བསྟན་ལེགས་བཤད་བཟང་པོ་
Less details More details
Tertön འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People མི་ཏྲ་ཛོ་ཀི་ (Mitrayogi)
Citation Mi nyag thub bstan legs bshad bzang po. dag snang mi tra'i tshe dkar nang sgrub kyi tshe dbang. In Rdzong sar 'jam dbyangs mkhyen brtse'i dbang po'i bka' babs, Vol. 18: 111-121. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Longevity Rituals - tshe sgrub  ·  Longevity Empowerment - tshe dbang
Cycle ཚེ་སྒྲུབ་ཡེ་ཤེས་སྙིང་པོ་ (tshe sgrub ye shes snying po)
Parent Cycle གྲུབ་ཆེན་མི་ཏྲའི་སྙིང་ཐིག་ (grub chen mi tra'i snying thig)
Deity tshe dkar
Karchag page JKW-KABAB-Volume-18-TSHA-Karchag
Colophon

།པདྨ་འོད་གསལ་མདོ་སྔགས་གླིང་པའི་དག་སྣང་གྲུབ་ཆེན་མི་ཏྲའི་སྙིང་ཐིག་གི་ཚེ་སྒྲུབ་ཡེ་ཤེས་སྙིང་པོའི་ནང་སྒྲུབ་ཀྱི་ལེའུ་ཚན་ནོ། །དགེའོ།

pad+ma 'od gsal mdo sngags gling pa'i dag snang grub chen mi tra'i snying thig gi tshe sgrub ye shes snying po'i nang sgrub kyi le'u tshan no/__/dge'o/

[edit]
༄༅། །དག་སྣང་མི་ཏྲའི་ཚེ་དཀར་ནང་སྒྲུབ་ཀྱི་ཚེ་དབང་བཞུགས།

༄༅། ཨོཾ་སྭ་སྟི། འཆི་མེད་ཚེ༵་དང་རྡོ་རྗེའི་སྲོག་སྒྲུབ༵་ཐབས། །བདེ་ཆེན་ཡེ༵་ཤེ༵ས་ངོ་མཚར་སྙིང༵་པོ༵འི་མཆོག །སྩོལ་མཛད་བླ་མ་ཚེ་ལྷར་གུས་བཏུད་དེ། །དེ་ཉིད་ནང༵་ལྟར་སྒྲུབ༵་པའི་སྨིན་བྱེད་དབྱེ། དེ་ལ་འདིར་པདྨ་འོད་གསལ་མདོ་སྔགས་གླིང་པའི་ཟབ་གཏེར་གྲུབ་ཆེན་མི་ཏྲའི་སྙིང་ཐིག་ལས་བྱུང་བའི་ཚེ་སྒྲུབ་ཡེ་ཤེས་སྙིང་པོའི་ནང་སྒྲུབ་དང་འབྲེལ་བར་བྱིན་རླབས་དབང་བསྐུར་བགྱི་བ་ལ་གསུམ་སྟེ། སྦྱོར་བ་ཡོ་བྱད་བཤམས་པ་དང༌། དངོས་གཞི་སྒྲུབ་པའི་ཐབས་དང༌། བྱིན་རླབས་དབང་གི་ཆོ་གའོ། དང་པོནི། སྟེགས་ཀྱི་ཁར་རྒྱས་པར་སྤྲོ་ན་གཞལ་ཡས་སྤྱི་ལྟར་གྱི་དབུས་སུ་ཟླ་གམ་སྒོ་གཅིག་དམར་པོ་ལྟེ་བར་ལྷ་མཚན་ཅན་ནམ་ཚོམ་བུ་ལྔ་བཀོད་པའི་དབུས་སུ་མཉྫི་ལ་བུམ་པ་སྐུ་ཙག་གིས་བརྒྱན་པ། མདུན་དུ་གཏོར་མ། གཡས་སུ་གསང་རྫས། རྒྱབ་ཏུ་རིག་ཙག །གཡོན་དུ་མེ་ལོང་ཤེལ་རྡོ་བཅས་ཀྱི་མཐའ་ཕྱི་ནང་གི་མཆོད་པས་བསྐོར་བ་དང༌། ཅི་བདེ་བར་ཚེ་རིལ། ཚེ་ཆང༌། ཚེ་མདའ་བཅས་དང༌། ལས་བུམ་ནས་བཟེད་ཌཱ་མ་རུ་རྡོར་དྲིལ་སོགས་འདུ་བྱའོ། གཉིས་པ་ནི། ལས་བྱང་གིས་བདག་མདུན་དབྱེར་མེད་དམ་ཐ་དད་གང་མོས་དང༌། བུམ་པ་གཉིས་སྤྱི་ལྟར་སྒྲུབ་ནས་སྤྲོ་ན་ཕྱི་སྒྲུབ་ལྟར་ཚེ་འགུག་དང་མཆོད་བསྟོད་ཏིང་ངེ་འཛིན་གྱི་དབང་ལེན་པ་བཀའ་གཏེར་སྲུང་གི་གཏོར་འབུལ་ཚོགས་འཁོར་བཅས་སྤྱི་ལྟར་བྱའོ། གསུམ་པ་ནི། སློབ་མ་རྣམས་ལ་ཁྲུས་བྱས་བགེགས་བསྐྲད་སྲུང་འཁོར་སྒོམ་ཀུན་སློང་བཅོས་པ་དང་ཆོས་བཤད་ཅི་རིགས་བྱས་མཐར། ཇི་སྐད་དུ། ཞེས་པ་ནས། ཚེ་སྒྲུབ་ཡེ་ཤེས་སྙིང་པོའི་ཞེས་པ་ཡན་ཕྱི་སྒྲུབ་ཀྱི་ཚེ་དབང་ལྟར་བརྗོད་ནས། ནང་སྒྲུབ་དང་འབྲེལ་བའི་སྨིན་བྱེད། ཟབ་མོའི་དབང་མཆོག་འདི་བསྐུར་བས༔ ཚེ་གཅིག་འཕོ་མེད་རྟག་པའི་སྐུར༔ མངོན་པར་བྱང་ཆུབ་སྐལ་ལྡན་གྱུར༔ ཞེས་བསྔགས་པའི་ཕན་ཡོན་ཅན་བསྐུར་བ་ལ་སློབ་དཔོན་གྱི་བྱ་བ་སོགས་རྒྱས་བསྡུས་ཅི་རིགས་པས་མཚམས་སྦྱར་ཏེ་མཎྜལ་འབུལ་དུ་འཇུག་གོ། །དེ་ནས་གསོལ་བ་འདེབས་པ་ནི། ཀུན་མཁྱེན་ཡེ་ཤེས་ཕུང་པོ་ཅན་སོགས་ལན་གསུམ། སྐྱབས་སེམས་རྒྱུན་བཤགས་ཀྱི་དམིགས་པ་སྤྱི་ལྟར་གསལ་བཏབ་ཏེ་རྒྱུན་བཤགས་གང་འོས་ཤིག་ལན་གསུམ། དེ་ནས་སྡོམ་པ་འཛིན་པ་ནི། སྲས་བཅས་སངས་རྒྱས་ཐམས་ཅད་དང༌། སོགས་ཀྱིས་བྱའོ། དེ་ནས་ཡེ་ཤེས་དབབ་པའི་སླད་དུ་ཁྱེད་རང་ལུས་གནད་ཅེས་པ་ནས་བསང་སྦྱང་ཡན་སྤྱི་ལྟར་བྱས་ནས། སྟོང་པའི་ངང་ལས་ཁྱེད་རང་གི་རིག་པའི་ངོ་བོ་ཧྲཱིཿཡིག་དམར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། དུས་མ་ཡིན་པའི་འཆི་བ་ལས་བསལ། ཚེ་དཔག་མེད་ཀྱི་གོ་འཕང་ལ་བཀོད། ཚུར་འདུས་ཡོངས་སུ་གྱུར་པ་ལས་ཁྱེད་རང་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་དམར་པོ། ཕྱག་མཉམ་བཞག་གིས་ཚེ་བུམ་བསྣམས་པའི་བར་དུ་འཆི་མེད་གསང་བའི་ཡུམ་མཆོག་དམར་གསལ་པདྨ་དང་ཚེ་བུམ་བསྣམས་པས་འཁྲིལ་བ། གཉིས་ཀའང་ཞི་འཛུམ་རྗེས་སུ་ཆགས་པའི་ཉམས་དང་བཅུ་དྲུག་ལོན་པའི་ངང་ཚུལ་ཅན། དར་དང་རིན་པོ་ཆེ་དང་རུས་པ་དང་ཨུཏྤལ་གསར་པའི་ཕྲེང་བས་བརྒྱན་པ། ཡབ་རྡོ་རྗེ་དང་ཡུམ་པདྨའི་སྐྱིལ་ཀྲུང་གིས་པདྨ་ཉི་ཟླའི་གདན་ལ་བཞུགས་པའི་སྐུ་ལ་རྩ་གསུམ་འཁོར་ལོ་ལྔ་དང་བཅས་པར་གསལ་བའི་གནས་ལྔར་ཚེ་དཔག་མེད་དཀར་དམར་མཐིང་སེར་ལྗང་གུ་ལྔ་རང་འདྲའི་ཡུམ་དང་འཁྲིལ་བའི་འཁོར་དུ་རྩ་འདབ་ཀྱི་གྲངས་དང་མཉམ་པའི་ཌཱ་ཀི་བདེ་བའི་གར་སྟབས་བསྒྱུར་ཅིང་བཞུགས་པ། དེའི་སྤྱི་བོར་བླ་མ་ཚེ་དཔག་མེད་རང་དང་འདྲ་བ་ཡབ་ཡུམ་སྙོམ་པར་ཞུགས་པའི་བདེ་བའི་སྒྲ་དང་འོད་ཟེར་གྱིས། ཁྱེད་རང་གི་བླ་ཚེ་ཆད་ཉམས་ཡར་བ་རྣམས་དང༌། འཁོར་འདས་ཀྱི་དྭངས་བཅུད་ཐམས་ཅད་རང་དབང་མེད་པར་འོད་ཟེར་དང་བདུད་རྩིའི་རྣམ་པར་བསྡུས། ཕྱག་གི་བུམ་པར་ཞུགས་ཤིང་ཁོལ་བ་ལས་བདུད་རྩིའི་རྒྱུན་ཆར་ལྟར་བབ། ཁྱེད་རང་གི་ཚང་པའི་སྒོ་ནས་ཞུགས། ལུས་ཀྱི་ནང་ཐམས་ཅད་གང་བས་ཉོན་མོངས་པ་དུག་ལྔ་ལ་བརྟེན་ནས་ཚེ་དཔལ་ཉམས་པའི་ལས་སྒྲིབ་ཐམས་ཅད་དག །སྐུ་ལྔ་ཡེ་ཤེས་ལྔ་དང་ལྡན་པའི་རྡོ་རྗེའི་ཚེ་དང་སྲོག་གྲུབ། སླར་ཡང་ཁྱེད་རང་དང་སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་རྩ་གསུམ་ལྷ་ཚོགས་ཐམས་ཅད་ཚེ་དཔག་ཏུ་མེད་པའི་རྣམ་པར་བྱོན་པ་དང༌། དཀྱིལ་འཁོར་པའི་ཐུགས་ཀ་ནས་ཀྱང་རང་འདྲ་དཔག་ཏུ་མེད་པ་བྱོན་ཏེ་ཁྱེད་རང་ལ་སིབ་སིབ་ཐིམ་པས་གཉིས་སུ་མེད་པར་གྱུར་པའི་མོས་པ་མཛོད། ཅེས་བརྗོད་ལ་སྤོས་རོལ་དང་བཅས་པས་བབ་དྲུག་གི་མཐར། ཨོཾ་པདྨ་མ་ཧཱ་སུ་ཁ་བཛྲ་ཨཱ་ཡུ་ཥེ་སྭཱ་ཧཱ༔ ཛྙཱ་ན་ཨ་ཝེ་ཤ་ཡ་ཨ་ཨཱཿ ཞེས་མང་དུ་བཟླ། དེ་ལྟར་ཡེ་ཤེས་ཕབ་པ་དེ་སྤྱི་བོར་རྡོ་རྗེ་རྒྱ་གྲམ་དུ་བཞག་ཏེ་བརྟན་པར་བྱས་པའི་མོས་པ་མཛོད། ཏིཥྛ་བཛྲ། དེ་ནས་དབང་དངོས་བཞིའི་དོན་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། འཆི་མེད་བདེ་ཆེན་ཡེ་ཤེས་སྐུ༔ ཚེ་དཔག་མེད་མགོན་བླ་མ་རྗེ༔ གསང་བ་ཟབ་མོའི་དབང་བསྐུར་གྱིས༔ སྨིན་ཅིང་གྲོལ་བར་མཛད་དུ་གསོལ༔ ཞེས་ཞུ་རྒྱུད་སྦྱང་སྡོམ་པ་སྦྱིན༔ གསང་བའི་ལྷར་བསྐྱེད་ཡེ་ཤེས་པ༔ བརྟན་པར་བྱས་རྗེས་བུམ་དབང་ནི༔ ཞེས་པ་རྣམས་སྔོན་དུ་སོང་ཟིན་པས་ཆོག །མཆན། ཨོཾ་བཀྲ་ཤིས་རྟག་པའི་བུམ་པ་རུ༔ འཆི་མེད་བདེ་ཆེན་བདུད་རྩིས་བཀང་༔ རིགས་ཀྱི་བུ་ལ་དབང་བསྐུར་བས༔ རྩ་ཁམས་ལྷ་སྐུར་དག་པར་ཤོག༔ བཛྲ་ཀཱ་ལ་ཤ་མ་ཧཱ་སུ་ཁ་ཨ་བྷི་ཥིཉྩ་ཨོཾ༔ སྤྲོ་ན་བུམ་དབང་གི་དག་པ་སྤྱི་ལྟར་བརྗོད་པ་སོགས་འོག་མ་ཀུན་ལ་འགྲེ། མཆན། བླ་མ་ཡབ་ཡུམ་སྙོམ་ཞུགས་པའི༔ བྱང་སེམས་འཆི་མེད་བདུད་རྩི་སྦྱིན༔ ཨཱཿ འཁོར་འདས་བརྟན་གཡོའི་དྭངས་བཅུད་ཀུན༔ ཞུ་བདེས་དྲངས་པའི་བྱང་ཆུབ་སེམས༔ རིགས་ཀྱི་བུ་ལ་སྦྱིན་པ་ཡིས༔ ལས་རླུང་དབུ་མར་ཐིམ་པར་ཤོག༔ མ་ཧཱ་སུ་ཁ་བྷོ་དྷི་ཙིཏྟ་ཨ་མྲྀ་ཏ་གུ་ཧྱ་ཨ་བྷི་ཥིཉྩ་ཨཿ མཚན་ལྡན་རིག་མ་བྱིན་རླབས་སྦྱིན༔ ཧཱུྃཿ བདེ་དང་སྟོང་པ་དབྱེར་མེད་པའི༔ འཆི་མེད་ཡེ་ཤེས་འབྱུང་བའི་གནས༔ རིགས་ཀྱི་བུ་ལ་སྦྱིན་པ་ཡིས༔ ལྷན་ཅིག་སྐྱེས་དགའ་མཐར་ཕྱིན་ཤོག༔ ཀརྨ་མུ་དྲཱ་མ་ཧཱ་སུ་ཁ་ཛྙཱ་ན་ཨ་བྷི་ཥིཉྩ་ཧཱུྃ༔ བརྡ་ཡིས་དོན་མཚོན་རང་ངོ་སྤྲད༔ ཧོཿ དབྱིངས་ཉིད་འདུས་མ་བྱས་པ་ལས༔ རིག་པ་མ་འགག་ཅིར་ཡང་ཤར༔ ཟུང་འཇུག་དོན་གྱི་དབང་བསྐུར་བས༔ འཆི་མེད་གཉུག་མ་མངོན་གྱུར་ཤོག༔ དྷཱ་ཏུ་ཛྙཱ་ན་མ་ཧཱ་སུ་ཁ་ཨ་ཨ་ཨཱཿ དེ་ནས། སོ་སོའི་ངོ་སྤྲོད་ཐེབ་པར་གདབ༔ ཞེས་གསུངས་པ་ལྟར་འདི་ལ་སྙན་གཏོད་མཛོད༔ མན་ངག་གུད་དུ་སྦས་པ་ནི༔ ནང་དང་གསང་བ་མཆོག་སྒྲུབ་ཏེ༔ རང་ཉིད་བཅོམ་ལྡན་ཚེ་དཔག་མེད༔ བརྟན་གཡོ་སྲིད་ཞིའི་དྭང་མའི་བཅུད༔ ཡེ་ཤེས་ཆེན་པོའི་ཕྱག་རྒྱའི་གར༔ པདྨ་རཱ་གའི་མདངས་འོད་ཅན༔ ཉི་མ་བྱེ་བའི་གཟི་བརྗིད་འབར༔ མཉམ་བཞག་ཚེ་ཡི་བུམ་པ་འཛིན༔ འོད་དང་འོད་ཟེར་རབ་འཕྲོ་བའི༔ བར་དུ་འཆི་མེད་གསང་བའི་ཡུམ༔ དམར་གསལ་པདྨ་ཚེ་བུམ་བསྣམས༔ གཉིས་ཀ་ཞི་འཛུམ་རྗེས་ཆགས་ཉམས༔ བཅུ་དྲུག་ལོན་པའི་ངང་ཚུལ་ཅན༔ དར་དང་རིན་ཆེན་རུས་པ་དང་༔ ཨུཏྤལ་གསར་པའི་ཕྲེང་བས་བརྒྱན༔ རྡོ་རྗེ་པདྨའི་སྐྱིལ་ཀྲུང་གིས༔ པདྨ་ཉི་ཟླའི་གདན་སྟེང་དུ༔ ཁ་སྦྱོར་བདེ་བས་དགྱེས་པར་རོལ༔ ཐུགས་ཀར་ཉི་ཟླ་ཁ་སྦྱོར་དབུས༔ ཧྲཱིཿདམར་རྡོ་རྗེའི་སྔགས་ཀྱིས་བསྐོར༔ འོད་སྣང་སྤྲོ་བསྡུས་ཕྱི་རོལ་དུ༔ པདྨ་འབར་བའི་གཞལ་མེད་ཁང་༔ ཟླ་གམ་སྲུང་བའི་གུར་གྱིས་གཏམ༔ སྤྱི་བོར་བླ་མ་ཚེ་དཔག་མེད༔ རང་འདྲ་ཡབ་ཡུམ་སྙོམ་ཞུགས་པའི༔ བདེ་བའི་སྒྲ་དང་འོད་ཟེར་གྱིས༔ བླ་ཚེ་ཉམ་པ་ཡར་བ་དང་༔ འཁོར་འདས་དྭང་བཅུད་དབང་མེད་བསྡུས༔ ཕྱག་གི་བུམ་པར་ཞུ་ཞིང་ཁོལ༔ བདུད་རྩིའི་ཆུ་རྒྱུན་ཆར་ལྟར་བབ༔ རང་གི་ཚངས་པའི་སྒོ་ནས་ཞུགས༔ རྩ་གསུམ་འཁོར་ལོ་ལྔ་ལྡན་ཁྱབ༔ ཉོན་མོངས་དུག་ལྔ་ལ་བརྟེན་ནས༔ ཚེ་དཔལ་ཉམས་པའི་ལས་སྒྲིབ་དག༔ སྐུ་ལྔ་ཡེ་ཤེས་ལྔ་ལྡན་པའི༔ རྡོ་རྗེའི་སྲོག་བཅུད་གྲུབ་པར་བསམ༔ ཨོཾ་པདྨ་མ་ཧཱ་སུ་ཁ་བཛྲ་ཨཱ་ཡུ་ཥེ་སྭཱ་ཧཱ༔ ངག་དང་ཡིད་ཀྱི་བཟླས་པ་དང་༔ ཁ་སྦྱོར་རླུང་བཟུང་བརྟན་པར་བྱ༔ དེ་ལྟ་བུ་ཡིས་ལམ་སྦྱངས་ནས༔ དངོས་གཞི་ཡབ་ཡུམ་གཉིས་ཀ་ཡི༔ རྩ་གསུམ་འཁོར་ལོ་ལྔ་ཡི་དབུས༔ ཚེ་བདག་རིགས་ལྔ་ཡབ་ཡུམ་གསལ༔ ཕྱི་དབྱིབས་ལྷ་སྐུ་སྙོམ་ཞུགས་པའི༔ འོད་ཀྱི་འཁོར་འདས་དྭང་བཅུད་བསྡུས༔ ཡུམ་གྱི་སྤྱི་གཙུག་ནས་ཞུགས་ཏེ༔ འཁོར་ལོ་ལྔ་ཡི་ལྷ་རྣམས་མཆོད༔ པདྨའི་ལམ་ནས་རིམ་པ་བཞིན༔ རྡོ་རྗེའི་སྦུབས་སུ་དྲངས་པ་ལས༔ ཡབ་ཀྱི་འཁོར་ལོའི་ལྷ་རྣམས་མཆོད༔ དེ་ཚེ་དགའ་བཞིས་དྲངས་པ་ཡི༔ འོད་གསལ་མངོན་དུ་བྱས་པ་ལས༔ འབྱུང་ལྔའི་དྭངས་མ་མི་ཤིགས་པའི༔ ཡེ་ཤེས་ལྔ་ཡི་སྲོག་འགྲུབ་བསམ༔ བར་རླུང་བཟུང་ཞིང་དབྱིངས་རིག་བསྲེ༔ ནང་ལྟར་རང་ལུས་ཐབས་ལྡན་གྱི༔ འཆི་མེད་སྒྲུབ་པའི་མན་ངག་གོ༔ ས་མ་ཡ༔ ༈ གསང་བ་གཞན་ལུས་བཅུད་ལེན་ནི༔ ཐིག་ལེ་འཛིན་འགྲེམ་དབང་ཐོབ་པས༔ ལེགས་པར་བརྟག་པའི་ཕྱག་རྒྱ་ནི༔ པདྨ་ཅན་གྱི་རིགས་ཅན་དགུག༔ རྒྱུད་སྦྱང་ཁམས་ཀྱི་ཟུང་སྤེལ་ཕྱིར༔ བཅུད་ལེན་བརྟེན་ཅིང་སྤྱོད་ལམ་གཟབ༔ དེ་ནས་རང་ཉིད་ཚེ་དཔག་མེད༔ ཕྱག་རྒྱ་གསང་བའི་ཡུམ་དུ་གསལ༔ འཁོར་ལོའི་གནས་ལྔར་ཚེ་དཔག་མེད༔ དཀར་དམར་མཐིང་སེར་ལྗང་གུའི་མདོག༔ རང་འདྲའི་ཡུམ་འཁྱུད་བདེ་བར་སྦྱོར༔ རྩ་འདབ་གྲངས་མཉམ་ཌཱ་ཀི་ནཱི༔ བདེ་བའི་གར་སྟབས་སྒྱུར་བར་བསྒོམ༔ གསལ་སྣང་མཆོག་ཏུ་བརྟན་པ་ན༔ རླུང་དུག་བསལ་ཞིང་བུམ་ཅན་འཆིང་༔ རྡོ་རྗེ་པདྨ་བྱིན་བརླབས་ཏེ༔ གཞན་དོན་འཆི་མེད་སྐུ་བསྒྲུབ་ཕྱིར༔ སྙོམ་འཇུག་བདེ་བའི་རང་སྒྲ་དང་༔ བདེ་བ་ཆེན་པོའི་གཟི་བྱིན་དང་༔ རླུང་སྦྱོར་རྔུབ་པའི་ལྕགས་ཀྱུ་ཡིས༔ འཁོར་དང་འདས་པའི་བརྟན་གཡོའི་ཁམས༔ རང་དབང་མེད་པར་མེར་མེར་གཡོས༔ བདེ་བའི་ངོ་བོ་འཆི་མེད་ཀྱི༔ རང་བཞིན་ལྔ་ལྡན་བདུད་རྩིའི་བཅུད༔ མཁའ་ཁྱབ་ཡུམ་གྱི་གཙུག་གཏོར་ནས༔ བརྒྱུད་དེ་གནས་ལྔའི་ཚེ་དཔག་མེད༔ ཡབ་ཡུམ་འཁོར་བཅས་ཞལ་དུ་ཞུགས༔ སྐུ་ཡི་ནང་གང་བདེ་ཆེན་བསྐྱེད༔ པདྨའི་ཟེའུ་འབྲུ་ཧྲཱིཿམཚན་པར༔ ཕོག་པས་སོལ་མེར་སྣུམ་བླུགས་བཞིན༔ བདེ་བའི་རང་སྒྲ་དང་བཅས་ཁོལ༔ དེ་ཉིད་རྡོ་རྗེའི་སྦུ་གུ་ནས༔ འོད་ཟེར་ལྕགས་ཀྱུས་བཀུག་པ་ལས༔ གསང་འཁོར་ནས་བརྩམ་སྤྱི་བོའི་བར༔ འཁོར་ལོ་ལྔ་ཡི་ལྷ་རྣམས་མཆོད༔ རྗེས་ཆགས་བདེ་བས་དྲངས་པ་ཡི༔ དགའ་མཆོག་ཁྱད་པར་ལྷན་སྐྱེས་དང་༔ ཡེ་ཤེས་འོད་གསལ་བདེ་ཆེན་འཕེལ༔ རྩ་ཁམས་ཐམས་ཅད་ཁྱབ་པ་ཡིས༔ གཟུང་འཛིན་རྩ་ཡི་མདུད་པ་གྲོལ༔ རླུང་གི་རྒྱུ་བ་ཐིག་ལེར་ཐིམ༔ ཐིག་ལེ་ཇི་སྙེད་གྲངས་ལྡན་པ༔ བདེ་བའི་ངོ་བོར་སོན་པ་ཡིས༔ སྟོང་པའི་ཡེ་ཤེས་རབ་ཏུ་དྲང་༔ མི་འགྱུར་སྐུ་དང་གཞོམ་མེད་གསུང་༔ འོད་གསལ་ཐུགས་ཀྱི་ཚེ་མཆོག་ཐོབ༔ ཡོན་ཏན་ཕྲིན་ལས་གཞལ་མེད་པ༔ ཚེ་བདག་རིགས་ལྔའི་ཡེ་ཤེས་དང་༔ དབྱེར་མེད་མངོན་པར་བྱང་ཆུབ་བསམ༔ སྐབས་སུ་ཡབ་ཡུམ་གཉིས་ཀ་ཡིས༔ གསང་སྔགས་ངག་དང་ཡིད་ཀྱིས་བཟླ༔ རླུང་གི་སྦྱོར་བས་རབ་ཏུ་བརྟན༔ རིག་པ་མ་བཅོས་གཉུག་མར་བཞག༔ གསང་བ་པདྨའི་བཅུད་སྡུད་ཀྱི༔ ཚེ་སྒྲུབ་ཟབ་མོའི་མན་ངག་གོ༔ ས་མ་ཡ༔ ༈ ཡང་གསང་ལྷ་སྔགས་བདེ་ཆེན་གྱི༔ རྣམ་པ་ཇི་ལྟར་ཤར་བ་ཀུན༔ ངོ་བོ་མ་བཅོས་གཉུག་མའི་བབ༔ རང་བྱུང་རིག་པ་སྐད་ཅིག་མ༔ རྡོ་རྗེ་ནམ་མཁའི་དཀྱིལ་ལྟ་བུ༔ ཆུ་བོའི་རྒྱུན་ནི་དལ་འབབ་ལྟར༔ ཡེངས་མེད་འཛིན་བྲལ་ལྷུག་པར་བཞག༔ སྐྱེ་འཆིའི་རྟོག་པ་རང་གྲོལ་ནས༔ དོན་གྱི་འཆི་མེད་འགྲུབ་པར་འགྱུར༔ ས་མ་ཡ༔ དེ་ལྟར་བསྒོམས་པའི་ཐུན་གྱི་མཐར༔ བདུད་རྩིའི་བཅུད་དང་དྭང་མ་ཀུན༔ སྙིང་དབུས་ཉི་ཟླའི་གའུ་རུ༔ མི་འགྱུར་ཐུགས་སྲོག་ཧྲཱི་ལ་བསྟིམ༔ སྟེང་འོག་དབུ་མའི་སྒོ་གཉིས་སུ༔ བྷྲཱུྃ་དང་ཧཱུྃ་ཡིག་ཐིག་ལེར་བཅས༔ གསལ་ཞིང་འཚེར་བས་རབ་ཏུ་བསྡམ༔ བུམ་ཅན་རླུང་གི་སྦྱོར་བས་བརྟན༔ རྡོ་རྗེ་ལྟ་བུའི་ངོ་བོ་ཉིད༔ འཇའ་ལུས་འཆི་བ་མེད་པའི་སྐུ༔ ཚེ་བདག་མགོན་པོ་དངོས་ཡིན་པའི༔ ང་རྒྱལ་བརྟན་པོ་ལ་བརྟེན་ནས༔ སྐྱེ་འཆིའི་རྟོག་པ་ཟིལ་གྱིས་མནན༔ འཆི་མེད་གཉུག་མའི་གདིང་འཆའོ༔ ཞེས་ཁྲིད་ཀྱི་ལུགས་ལྟར་དལ་བུར་བརྗོད། འཇུག་ཏུ་དམ་ཚིག་ཁས་ལེན་མཎྜལ་ཡོན་འབུལ་རྣམས་དང༌།སྒྲུབ་ཐབས་ཀྱི་མཇུག་ཆོག་རྣམས་སྤྱི་ལྟར་བྱའོ། ཐུབ༵་བསྟན༵་རིན་ཆེན་འབྱུང་གནས་ལས་འོང་བའི། །ལེ༵གས་བཤ༵ད་ཕྲིན་ཆོག་བཟ༵ང་པོ༵འི་ནོ༵ར་བུ༵་འདིར། །རྒྱལ་བསྟ༵ན་འཛི༵ན་སྐྱོང་སྤེལ་བའི་འོད་འཕྲོ་བཞིན། །གཞ༵ན་ཕ༵ན་འདོད་རྒུ་མཐ༵འ་ཡ༵ས་ཆར་འབེབས་ཤོག །པདྨ་འོད་གསལ་མདོ་སྔགས་གླིང་པའི་དག་སྣང་གྲུབ་ཆེན་མི་ཏྲའི་སྙིང་ཐིག་གི་ཚེ་སྒྲུབ་ཡེ་ཤེས་སྙིང་པོའི་ནང་སྒྲུབ་ཀྱི་ལེའུ་ཚན་ནོ། །དགེའོ།། །།

[edit]

@#/__/dag snang mi tra'i tshe dkar nang sgrub kyi tshe dbang bzhugs/_@#/__oM swa sti/__'chi med tshe~X dang rdo rje'i srog sgruba~X thabs/__/bde chen ye~X she~Xs ngo mtshar snyinga~X po~X'i mchog__/stsol mdzad bla ma tshe lhar gus btud de/__/de nyid nanga~X ltar sgruba~X pa'i smin byed dbye/__de la 'dir pad+ma 'od gsal mdo sngags gling pa'i zab gter grub chen mi tra'i snying thig las byung ba'i tshe sgrub ye shes snying po'i nang sgrub dang 'brel bar byin rlabs dbang bskur bgyi ba la gsum ste/__sbyor ba yo byad bshams pa dang*/__dngos gzhi sgrub pa'i thabs dang*/__byin rlabs dbang gi cho ga'o/__dang poni/__stegs kyi khar rgyas par spro na gzhal yas spyi ltar gyi dbus su zla gam sgo gcig dmar po lte bar lha mtshan can nam tshom bu lnga bkod pa'i dbus su many+dzi la bum pa sku tsag gis brgyan pa/__mdun du gtor ma/__g.yas su gsang rdzas/__rgyab tu rig tsag__/g.yon du me long shel rdo bcas kyi mtha' phyi nang gi mchod pas bskor ba dang*/__ci bde bar tshe ril/__tshe chang*/__tshe mda' bcas dang*/__las bum nas bzed DA ma ru rdor dril sogs 'du bya'o/__gnyis pa ni/__las byang gis bdag mdun dbyer med dam tha dad gang mos dang*/__bum pa gnyis spyi ltar sgrub nas spro na phyi sgrub ltar tshe 'gug dang mchod bstod ting nge 'dzin gyi dbang len pa bka' gter srung gi gtor 'bul tshogs 'khor bcas spyi ltar bya'o/__gsum pa ni/__slob ma rnams la khrus byas bgegs bskrad srung 'khor sgom kun slong bcos pa dang chos bshad ci rigs byas mthar/__ji skad du/__zhes pa nas/__tshe sgrub ye shes snying po'i zhes pa yan phyi sgrub kyi tshe dbang ltar brjod nas/__nang sgrub dang 'brel ba'i smin byed/__zab mo'i dbang mchog 'di bskur bas:__tshe gcig 'pho med rtag pa'i skur:__mngon par byang chub skal ldan gyur:__zhes bsngags pa'i phan yon can bskur ba la slob dpon gyi bya ba sogs rgyas bsdus ci rigs pas mtshams sbyar te maN+Dal 'bul du 'jug go/__/de nas gsol ba 'debs pa ni/__kun mkhyen ye shes phung po can sogs lan gsum/__skyabs sems rgyun bshags kyi dmigs pa spyi ltar gsal btab te rgyun bshags gang 'os shig lan gsum/__de nas sdom pa 'dzin pa ni/__sras bcas sangs rgyas thams cad dang*/__sogs kyis bya'o/__de nas ye shes dbab pa'i slad du khyed rang lus gnad ces pa nas bsang sbyang yan spyi ltar byas nas/__stong pa'i ngang las khyed rang gi rig pa'i ngo bo hrIHyig dmar po/__de las 'od zer 'phros/__'phags pa mchod/__sems can gyi don byas/__dus ma yin pa'i 'chi ba las bsal/__tshe dpag med kyi go 'phang la bkod/__tshur 'dus yongs su gyur pa las khyed rang bcom ldan 'das tshe dang ye shes dpag tu med pa sku mdog dmar po/__phyag mnyam bzhag gis tshe bum bsnams pa'i bar du 'chi med gsang ba'i yum mchog dmar gsal pad+ma dang tshe bum bsnams pas 'khril ba/__gnyis ka'ang zhi 'dzum rjes su chags pa'i nyams dang bcu drug lon pa'i ngang tshul can/__dar dang rin po che dang rus pa dang ut+pal gsar pa'i phreng bas brgyan pa/__yab rdo rje dang yum pad+ma'i skyil krung gis pad+ma nyi zla'i gdan la bzhugs pa'i sku la rtsa gsum 'khor lo lnga dang bcas par gsal ba'i gnas lngar tshe dpag med dkar dmar mthing ser ljang gu lnga rang 'dra'i yum dang 'khril ba'i 'khor du rtsa 'dab kyi grangs dang mnyam pa'i DA ki bde ba'i gar stabs bsgyur cing bzhugs pa/__de'i spyi bor bla ma tshe dpag med rang dang 'dra ba yab yum snyom par zhugs pa'i bde ba'i sgra dang 'od zer gyis/__khyed rang gi bla tshe chad nyams yar ba rnams dang*/__'khor 'das kyi dwangs bcud thams cad rang dbang med par 'od zer dang bdud rtsi'i rnam par bsdus/__phyag gi bum par zhugs shing khol ba las bdud rtsi'i rgyun char ltar bab/__khyed rang gi tshang pa'i sgo nas zhugs/__lus kyi nang thams cad gang bas nyon mongs pa dug lnga la brten nas tshe dpal nyams pa'i las sgrib thams cad dag__/sku lnga ye shes lnga dang ldan pa'i rdo rje'i tshe dang srog grub/__slar yang khyed rang dang slob dpon gyi thugs ka'i sa bon las 'od zer 'phros pas phyogs bcu'i sangs rgyas byang sems rtsa gsum lha tshogs thams cad tshe dpag tu med pa'i rnam par byon pa dang*/__dkyil 'khor pa'i thugs ka nas kyang rang 'dra dpag tu med pa byon te khyed rang la sib sib thim pas gnyis su med par gyur pa'i mos pa mdzod/__ces brjod la spos rol dang bcas pas bab drug gi mthar/__oM pad+ma ma hA su kha badz+ra A yu She swA hA:__dz+nyA na a we sha ya a AH__zhes mang du bzla/__de ltar ye shes phab pa de spyi bor rdo rje rgya gram du bzhag te brtan par byas pa'i mos pa mdzod/__tiSh+Tha badz+ra/__de nas dbang dngos bzhi'i don du gsol ba 'debs pa 'di'i rjes zlos lan gsum mdzod/__'chi med bde chen ye shes sku:__tshe dpag med mgon bla ma rje:__gsang ba zab mo'i dbang bskur gyis:__smin cing grol bar mdzad du gsol:__zhes zhu rgyud sbyang sdom pa sbyin:__gsang ba'i lhar bskyed ye shes pa:__brtan par byas rjes bum dbang ni:__zhes pa rnams sngon du song zin pas chog__/mchan/__oM bkra shis rtag pa'i bum pa ru:__'chi med bde chen bdud rtsis bkang :__rigs kyi bu la dbang bskur bas:__rtsa khams lha skur dag par shog:__badz+ra kA la sha ma hA su kha a b+hi Shiny+tsa oM:__spro na bum dbang gi dag pa spyi ltar brjod pa sogs 'og ma kun la 'gre/__mchan/__bla ma yab yum snyom zhugs pa'i:__byang sems 'chi med bdud rtsi sbyin:__AH__'khor 'das brtan g.yo'i dwangs bcud kun:__zhu bdes drangs pa'i byang chub sems:__rigs kyi bu la sbyin pa yis:__las rlung dbu mar thim par shog:__ma hA su kha b+ho d+hi tsit+ta a mr-i ta gu h+ya a b+hi Shiny+tsa aH__mtshan ldan rig ma byin rlabs sbyin:__hU~MH__bde dang stong pa dbyer med pa'i:__'chi med ye shes 'byung ba'i gnas:__rigs kyi bu la sbyin pa yis:__lhan cig skyes dga' mthar phyin shog:__karma mu drA ma hA su kha dz+nyA na a b+hi Shiny+tsa hU~M:__brda yis don mtshon rang ngo sprad:__hoH__dbyings nyid 'dus ma byas pa las:__rig pa ma 'gag cir yang shar:__zung 'jug don gyi dbang bskur bas:__'chi med gnyug ma mngon gyur shog:__d+hA tu dz+nyA na ma hA su kha a a AH__de nas/__so so'i ngo sprod theb par gdab:__zhes gsungs pa ltar 'di la snyan gtod mdzod:__man ngag gud du sbas pa ni:__nang dang gsang ba mchog sgrub te:__rang nyid bcom ldan tshe dpag med:__brtan g.yo srid zhi'i dwang ma'i bcud:__ye shes chen po'i phyag rgya'i gar:__pad+ma rA ga'i mdangs 'od can:__nyi ma bye ba'i gzi brjid 'bar:__mnyam bzhag tshe yi bum pa 'dzin:__'od dang 'od zer rab 'phro ba'i:__bar du 'chi med gsang ba'i yum:__dmar gsal pad+ma tshe bum bsnams:__gnyis ka zhi 'dzum rjes chags nyams:__bcu drug lon pa'i ngang tshul can:__dar dang rin chen rus pa dang :__ut+pal gsar pa'i phreng bas brgyan:__rdo rje pad+ma'i skyil krung gis:__pad+ma nyi zla'i gdan steng du:__kha sbyor bde bas dgyes par rol:__thugs kar nyi zla kha sbyor dbus:__hrIHdmar rdo rje'i sngags kyis bskor:__'od snang spro bsdus phyi rol du:__pad+ma 'bar ba'i gzhal med khang :__zla gam srung ba'i gur gyis gtam:__spyi bor bla ma tshe dpag med:__rang 'dra yab yum snyom zhugs pa'i:__bde ba'i sgra dang 'od zer gyis:__bla tshe nyam pa yar ba dang :__'khor 'das dwang bcud dbang med bsdus:__phyag gi bum par zhu zhing khol:__bdud rtsi'i chu rgyun char ltar bab:__rang gi tshangs pa'i sgo nas zhugs:__rtsa gsum 'khor lo lnga ldan khyab:__nyon mongs dug lnga la brten nas:__tshe dpal nyams pa'i las sgrib dag:__sku lnga ye shes lnga ldan pa'i:__rdo rje'i srog bcud grub par bsam:__oM pad+ma ma hA su kha badz+ra A yu She swA hA:__ngag dang yid kyi bzlas pa dang :__kha sbyor rlung bzung brtan par bya:__de lta bu yis lam sbyangs nas:__dngos gzhi yab yum gnyis ka yi:__rtsa gsum 'khor lo lnga yi dbus:__tshe bdag rigs lnga yab yum gsal:__phyi dbyibs lha sku snyom zhugs pa'i:__'od kyi 'khor 'das dwang bcud bsdus:__yum gyi spyi gtsug nas zhugs te:__'khor lo lnga yi lha rnams mchod:__pad+ma'i lam nas rim pa bzhin:__rdo rje'i sbubs su drangs pa las:__yab kyi 'khor lo'i lha rnams mchod:__de tshe dga' bzhis drangs pa yi:__'od gsal mngon du byas pa las:__'byung lnga'i dwangs ma mi shigs pa'i:__ye shes lnga yi srog 'grub bsam:__bar rlung bzung zhing dbyings rig bsre:__nang ltar rang lus thabs ldan gyi:__'chi med sgrub pa'i man ngag go:__sa ma ya:__!__gsang ba gzhan lus bcud len ni:__thig le 'dzin 'grem dbang thob pas:__legs par brtag pa'i phyag rgya ni:__pad+ma can gyi rigs can dgug:__rgyud sbyang khams kyi zung spel phyir:__bcud len brten cing spyod lam gzab:__de nas rang nyid tshe dpag med:__phyag rgya gsang ba'i yum du gsal:__'khor lo'i gnas lngar tshe dpag med:__dkar dmar mthing ser ljang gu'i mdog:__rang 'dra'i yum 'khyud bde bar sbyor:__rtsa 'dab grangs mnyam DA ki nI:__bde ba'i gar stabs sgyur bar bsgom:__gsal snang mchog tu brtan pa na:__rlung dug bsal zhing bum can 'ching :__rdo rje pad+ma byin brlabs te:__gzhan don 'chi med sku bsgrub phyir:__snyom 'jug bde ba'i rang sgra dang :__bde ba chen po'i gzi byin dang :__rlung sbyor rngub pa'i lcags kyu yis:__'khor dang 'das pa'i brtan g.yo'i khams:__rang dbang med par mer mer g.yos:__bde ba'i ngo bo 'chi med kyi:__rang bzhin lnga ldan bdud rtsi'i bcud:__mkha' khyab yum gyi gtsug gtor nas:__brgyud de gnas lnga'i tshe dpag med:__yab yum 'khor bcas zhal du zhugs:__sku yi nang gang bde chen bskyed:__pad+ma'i ze'u 'bru hrIHmtshan par:__phog pas sol mer snum blugs bzhin:__bde ba'i rang sgra dang bcas khol:__de nyid rdo rje'i sbu gu nas:__'od zer lcags kyus bkug pa las:__gsang 'khor nas brtsam spyi bo'i bar:__'khor lo lnga yi lha rnams mchod:__rjes chags bde bas drangs pa yi:__dga' mchog khyad par lhan skyes dang :__ye shes 'od gsal bde chen 'phel:__rtsa khams thams cad khyab pa yis:__gzung 'dzin rtsa yi mdud pa grol:__rlung gi rgyu ba thig ler thim:__thig le ji snyed grangs ldan pa:__bde ba'i ngo bor son pa yis:__stong pa'i ye shes rab tu drang :__mi 'gyur sku dang gzhom med gsung :__'od gsal thugs kyi tshe mchog thob:__yon tan phrin las gzhal med pa:__tshe bdag rigs lnga'i ye shes dang :__dbyer med mngon par byang chub bsam:__skabs su yab yum gnyis ka yis:__gsang sngags ngag dang yid kyis bzla:__rlung gi sbyor bas rab tu brtan:__rig pa ma bcos gnyug mar bzhag:__gsang ba pad+ma'i bcud sdud kyi:__tshe sgrub zab mo'i man ngag go:__sa ma ya:__!__yang gsang lha sngags bde chen gyi:__rnam pa ji ltar shar ba kun:__ngo bo ma bcos gnyug ma'i bab:__rang byung rig pa skad cig ma:__rdo rje nam mkha'i dkyil lta bu:__chu bo'i rgyun ni dal 'bab ltar:__yengs med 'dzin bral lhug par bzhag:__skye 'chi'i rtog pa rang grol nas:__don gyi 'chi med 'grub par 'gyur:__sa ma ya:__de ltar bsgoms pa'i thun gyi mthar:__bdud rtsi'i bcud dang dwang ma kun:__snying dbus nyi zla'i ga'u ru:__mi 'gyur thugs srog hrI la bstim:__steng 'og dbu ma'i sgo gnyis su:__b+h+rU~M dang hU~M yig thig ler bcas:__gsal zhing 'tsher bas rab tu bsdam:__bum can rlung gi sbyor bas brtan:__rdo rje lta bu'i ngo bo nyid:__'ja' lus 'chi ba med pa'i sku:__tshe bdag mgon po dngos yin pa'i:__nga rgyal brtan po la brten nas:__skye 'chi'i rtog pa zil gyis mnan:__'chi med gnyug ma'i gding 'cha'o:__zhes khrid kyi lugs ltar dal bur brjod/__'jug tu dam tshig khas len maN+Dal yon 'bul rnams dang*/sgrub thabs kyi mjug chog rnams spyi ltar bya'o/__thuba~X bstana~X rin chen 'byung gnas las 'ong ba'i/__/le~Xgs bsha~Xd phrin chog bza~Xng po~X'i no~Xr bu~X 'dir/__/rgyal bsta~Xn 'dzi~Xn skyong spel ba'i 'od 'phro bzhin/__/gzha~Xn pha~Xn 'dod rgu mtha~X' ya~Xs char 'bebs shog__/pad+ma 'od gsal mdo sngags gling pa'i dag snang grub chen mi tra'i snying thig gi tshe sgrub ye shes snying po'i nang sgrub kyi le'u tshan no/__/dge'o//__//

Footnotes

Other Information