JKW-KABAB-10-THA-014

From Khyentse Lineage - A Tsadra Foundation Project

‎‎

ཐུགས་རྗེ་ཆེན་པོ་འགྲོ་འདུལ་ལས། བུམ་པའི་གཟུངས་ཁྲུས་ཆོ་ག།
Wylie title thugs rje chen po 'gro 'dul las bum pa'i gzungs khrus cho ga JKW-KABAB-10-THA-014.pdf
Location mkhyen brtse'i bka' babs
Volume 10, Text 14, Pages 375-390 (Folios 1a to 8b1)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön ཉང་རལ་ཉི་མ་འོད་ཟེར་, འཇམ་དབྱངས་མཁྱེན་བརྩེའི་དབང་པོ་ (nyang ral nyi ma 'od zer, 'jam dbyangs mkhyen brtse'i dbang po)
Citation 'jam dbyangs mkhyen brtse'i dbang po. thugs rje chen po 'gro 'dul las bum pa'i gzungs khrus cho ga. In Rdzong sar 'jam dbyangs mkhyen brtse'i dbang po'i bka' babs, Vol. 10: 375-390. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Revelations - gter ma  ·  Cleansing Ritual - khrus chog
Cycle ཉང་གཏེར་ཐུགས་རྗེ་ཆེན་པོ་འགྲོ་འདུལ་ (nyang gter thugs rje chen po 'gro 'dul)
Deity thugs rje chen po
Karchag page JKW-KABAB-Volume-10-THA-Karchag
RTZ In the Rinchen Terdzö: https://rtz.tsadra.org/index.php/Terdzo-ZHA-039
Colophon
  • Treasure colophon: སློབ་དཔོན་པདྨ་འབྱུང་གནས་ཀྱིས༔ ནད་དང་གདོན་དང་༔ ཉམས་གྲིབ་བསལ་བའི་དོན་དུ་མཛད་པ༔ ཐུགས་རྗེ་ཆེན་པོའི་བུམ་ཁྲུས་ཀྱི་ཆོ་གའོ༔ ཨྠིྀ རྫོགས་སོ༔ དགེའོ།།
  • Treasure colophon: slob dpon pad+ma 'byung gnas kyis:__nad dang gdon dang :__nyams grib bsal ba'i don du mdzad pa:__thugs rje chen po'i bum khrus kyi cho ga'o:_a+thi+-i__rdzogs so:__dge'o/
[edit]
༄༅། །ཐུགས་རྗེ་ཆེན་པོ་འགྲོ་འདུལ་ལས༔ བུམ་པའི་གཟུངས་ཁྲུས་ཆོ་ག་བཞུགས་སོ༔

༄༅། ༡༢༣༤༥༦༧༨༔ སྤྱན་རས་གཟིགས་དབང་ཕྱུག་ཐུགས་རྗེ་ཅན་འགྲོ་བའི་མགོན་ལ་ཕྱག་འཚལ་ལོ༔ འགྲོ་བའི་ནད་གདོན་ཉམས་གྲིབ་དང་༔ མི་གཙང་བྱད་དུ་བཅུག་པ་ལས༔ ཐར་བར་བྱ་ཕྱིར་བུམ་ཁྲུས་བསྟན༔ ཐུགས་རྗེ་ཆེན་པོའི་རྣལ་འབྱོར་པས༔ དབེན་ཅིང་ཉམས་དགའ་གཙང་བའི་སར༔ ཚེས་གྲངས་གཟའ་སྐར་བཟང་པོ་ལ༔ མཎྜལ་ལེགས་བྱས་རྣམ་ལྔས་བྱུག༔ མེ་ཏོག་ཚོམ་བུ་དགྲམ་པར་བྱ༔ གསེར་དངུལ་ཟངས་ཀྱི་བུམ་པའམ༔ མ་འབྱོར་རྫ་ཡི་བུམ་པ་རུ༔ སྨན་ལྔ་འབྲུ་ལྔ་སྤཽས་ལྔ་དང་༔ རིན་ཆེན་ལྔ་དང་ཆུ་གཙང་བླུག༔ ཆུ་ཤེལ་མིག་མེད་སྙིང་པོར་གཅེས༔ མགུལ་ཆིངས་ཁ་རྒྱན་ཤུག་པའམ༔ འབྲས་བུ་ཅན་གྱི་ཤིང་ལ་བྱ༔ རིགས་ལྔའི་ཕྱག་མཚན་བྲིས་པ་དང་༔ བཀྲ་ཤིས་རྫས་བརྒྱད་རིན་ཆེན་བརྒྱད༔ རྨ་བྱའི་སྒྲོ་ལ་སོགས་པ་གཟུགས༔ མཆོད་པ་རྣམ་ལྔའམ་བདུན་བཤམ་མོ༔ ཡན་ལག་བདུན་པས་ཚོགས་བསགས་ལ༔ རང་ཉིད་རྟ་མགྲིན་སྐུར་བསྒོམས་ལ༔ བུམ་པ་གུ་གུལ་དུད་པས་བདུག༔ བགེགས་བསྐྲད་བྱས་ལ་བུམ་པར་གཟུག༔ དེ་ནས་བུམ་པའི་ཆོ་ག་ནི༔ དང་པོ་དམ་ཚིག་ལྷ་བསྐྱེད་པ༔ ཡེ་ཤེས་ཚོགས་ནི་སྟོང་པར་བསྒོམ༔ ཟླ་བའི་སྟེང་དུ་ཧྲཱིཿདཀར་བསམ༔ ཧྲཱིཿལས་འོད་འཕྲོས་འགྲོ་དོན་བྱས༔ དེ་ལས་ཐུགས་རྗེ་ཆེན་པོའི་སྐུ༔ ཞལ་གཅིག་ཕྱག་གཉིས་སྐུ་མདོག་དཀར༔ ཕྱག་གཉིས་མཉམ་བཞག་བུམ་པ་བསྣམས༔ ཟླ་བའི་གདན་ལ་མཉམ་པར་བཞུགས༔ རིན་ཆེན་རྒྱན་གྱིས་བརྒྱན་པར་བསྒོམ༔ ཐུགས་ཀར་ཟླ་བའི་ད་ལའི་སྟེང་༔ ཧྲཱིཿལས་ཡི་གེ་དྲུག་བསྐོར་བསྒོམ༔ དེ་ནས་བུམ་པ་བྱིན་བརླབ་པ༔ བྷྲཱུྃ་ལས་རིན་ཆེན་གཞལ་ཡས་ཁང་༔ བཅུད་ནི་བདུད་རྩིའི་རྒྱ་མཚོའི་ནང་༔ པདྨ་པ་ཏྲ་ཟླ་བར་བཅས༔ ཐུགས་ཀའི་ཧྲཱིཿལས་ཧྲཱིཿའཕྲོས་པས༔ དེ་ལ་ཐུགས་རྗེ་ཆེན་པོར་གྱུར༔ སྐུ་མདོག་ཕྱག་མཚན་གོང་དང་མཚུངས༔ དེ་ཡི་མདུན་གྱི་པདྨའི་སྟེང་༔ ལས་ཀྱི་ཁྲོ་བོ་བདུད་རྩི་འཁྱིལ༔ ཞལ་གཅིག་ཕྱག་གཉིས་སྐུ་མདོག་ལྗང་༔ ཅུང་ཟད་མཆེ་གཙིགས་ཞི་མ་ཁྲོ༔ ཕྱག་གཉིས་ཐལ་མོ་གཟེད་པ་པོ༔ དེ་སྟེང་བདུད་རྩིའི་བུམ་པ་བསྣམས༔ དག་པར་བྱེད་པའི་ལྷ་རུ་བསྒོམ༔ དེ་ནས་ཐུགས་རྗེ་ཆེན་པོ་ཡི༔ ཐུགས་ཀའི་ཧྲཱི་ལས་འོད་ཟེར་འཕྲོས༔ ཡེ་ཤེས་ཐུགས་རྗེ་ཆེན་པོ་དང་༔ ཡེ་ཤེས་བདུད་རྩི་འཁྱིལ་པ་གཉིས༔ རང་བཞིན་གནས་ནས་སྤྱན་དྲངས་ལ༔ སྐུ་གསུང་ཐུགས་སུ་བྱིན་བརླབས་ལ༔ མཆོད་དང་བསྟོད་པ་ཚུལ་བཞིན་བྱ༔ དེ་ནས་བཟླས་པ་བྱ་བ་ནི། ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ༔ ན་མཿཙཎྜ་བཛྲ་ཀྲོ་དྷཱ་ཡ༔ ཧུ་ལུ་ཧུ་ལུ༔ ཏིཥྛ་ཏིཥྛ༔ བྷནྡྷ་བྷནྡྷ༔ ཧ་ན་ཧ་ན༔ ཨ་མྲྀ་ཏེ་ཧཱུྃ་ཕཊ༔ ཅེས་སྔགས་བཟླས་པས༔ གཟུངས་ཐག་ལག་ཏུ་བཟུང་ནས་ནི༔ སྔགས་ཀྱི་འོད་ཟེར་འཁྲིལ་ནས་ནི༔ བུམ་པའི་ཞི་ཁྲོ་གཉིས་ལ་འཕྲོས༔ ཐུགས་དམ་རྒྱུད་བསྐུལ་ཕྲིན་ལས་མཛད༔ ཕྱིར་འཕྲོས་བདེ་བར་གཤེགས་པ་ལས༔ སྐུ་གསུང་ཐུགས་ཀྱི་བཅུད་བསྡུས་ནས༔ ཚུར་འདུས་བུམ་པའི་ལྷ་ལ་ཐིམ༔ ཕྱག་གི་བུམ་པ་གང་ནས་སུ༔ བུམ་པའི་ནང་ནི་གང་བར་བསམ༔ དུས་ཀྱི་བསྙེན་པ་བདུན་ལ་སོགས༔ གྲངས་ཀྱི་བསྙེན་པ་འབུམ་ཚོ་གཅིག༔ མཚན་རྟགས་ཁོལ་དང་ལུད་དང་དྲོད་རྙེད་པའོ༔ དེ་ནས་བསྟོད་ཅིང་གསོལ་བཏབ་ལ༔ བུམ་པས་དབང་ནི་བསྐུར་བར་བྱ༔ བཀྲ་ཤིས་རྫས་བརྒྱད་དབང་དང་ནི༔ རྒྱལ་སྲིད་རིན་ཆེན་སྣ་བདུན་དབང་༔ ཁྲུས་བྱ་ནད་དང་སྒྲིབ་པ་བཀྲུ༔ དེ་ནས་བུམ་པའི་ལྷ་དང་ནི༔ ཡེ་ཤེས་སེམས་དཔའ་གཤེགས་སུ་གསོལ༔ དམ་ཚིག་སེམས་དཔའ་ཆུ་རུ་ཞུ༔ རང་ཉིད་ལྷ་ལ་བསྡུ་གཤེགས་བྱའོ༔ དམིགས་པ་མེད་པར་རྒྱས་གདབ་བོ༔ འདི་བརྩམས་པ་ཡི་དགེ་བ་གང་ཡིན་པས༔ འགྲོ་བའི་ནད་གདོན་སེལ་གྱུར་ནས༔ བྱང་ཆུབ་ལམ་ལ་རབ་ཞུགས་ནས༔ ཐུགས་རྗེ་ཆེན་པོའི་ཞལ་མཐོང་ནས༔ ཆོས་སྐུའི་དོན་ནི་རྟོགས་པར་ཤོག༔ སློབ་དཔོན་པདྨ་འབྱུང་གནས་ཀྱིས་མཛད་པ༔ ཐུགས་རྗེ་ཆེན་པོའི་བུམ་སྒྲུབ་རྫོགས་སོ༔ ༡༢༣༤༥༦༧༨༩༡༠༡༡༡༢༔ ཐུགས་རྗེའི་བདག་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ༔ འགྲོ་བ་ནད་དང་༔ གདོན་དང་༔ མི་གཙང་བ་ལ་སོགས་པ་ཕོག་པ་ལ༔ དེ་ལ་ཐུགས་རྗེ་ཆེན་པོའི་བུམ་ཁྲུས་ཏེ༔ དེ་ལ་སྦྱོར་བ་དང་༔ དངོས་གཞི་དང་༔ མཇུག་གོ༔ དེ་ལ་དང་པོ་སྦྱོར་བ་ནི༔ ཐུགས་རྗེ་ཆེན་པོའི་སྒྲུབ་པ་བུམ་སྒྲུབ་ཉམས་སུ་ལེན་པའི་རྟེན་གྱི་གང་ཟག་གིས༔ དབེན་ཅིང་ཉམས་དགའ་བའི་ས་རུ༔ ཚེས་གྲངས་དང་གཟའ་སྐར་བཟང་པོ་ལ༔ མཎྜལ་ལེགས་པར་བྱས་ལ༔ མེ་ཏོག་གི་ཚོམ་བུ་དགྲམ་མོ༔ དེའི་སྟེང་དུ་བཞག་པའི་རྫས་ལ༔ བུམ་པ་རིན་པོ་ཆེའམ་རྫའི་བུམ་པ་བྲེ་གང་ཡན་ཆད་ཤོང་བར༔ སྨན་ལྔ༔ འབྲུ་ལྔ༔ སྤོས་ལྔ༔ རིན་པོ་ཆེ་ལྔ༔ ཆུ་གཙང་མ་དང་འོ་མ་བླུག༔ རིན་པོ་ཆེ་ལྔ་བརྡར་ལ་མགུལ་ཆིངས་དང་༔ ཁ་རྒྱན་བཙུགས་ལ༔ ནང་དུ་ཆུ་ཤེལ་མེད་ཐབས་མེད༔ རིགས་ལྔའི་ཕྱག་མཚན་དང་༔ བཀྲ་ཤིས་རྫས་བརྒྱད་ལ་སོགས་པ་གཟུགས༔ མཆོད་པ་རྣམ་པ་ལྔའམ་བདུན་ལ་སོགས་པ་བཤམས་ལ༔ ཡན་ལག་བདུན་པས་ཚོགས་བསག་གོ༔ དེ་ནས་རང་དཔལ་རྟ་མགྲིན་དུ་བསྒོམས་ལ༔ བུམ་པ་གུ་གུལ་གྱིས་བདུགས་ལ༔ བགེགས་བསྐྲད་དོ༔ གཉིས་པ་དངོས་གཞི་ལ། དམ་ཚིག་གི་ལྷ་བསྐྱེད་པ་ནི༔ དང་པོ་ཡེ་ཤེས་ཀྱི་ཚོགས་བསགས༔ ཨོཾ་སྭ་བྷཱ་བ་བི་ཤུདྡྷཿསརྦ་དྷརྨཱ༔ཤུདྡྷོ྅ཧཾ༔ ཞེས་པས། ཆོས་ཐམས་ཅད་སྟོང་པ་ཉིད་དུ་བསྒོམ༔ དེའི་ངང་ལས་ཨ་ལས་ཟླ་བའི་དལ་བསམས་ལ། དེའི་སྟེང་དུ་སེམས་ཉིད་ཧྲཱིཿདཀར་པོ་གཅིག་ཏུ་བསམ༔ ཧྲཱིཿདེ་ལས་འོད་འཕྲོས་འགྲོ་དོན་བྱས༔ འོད་དུ་ཞུ་བ་ལས་པདྨ་དཀར་པོར་གྱུར༔ དེའི་འོད་འཕྲོས་འདུས་པ་ལས་ཐུགས་རྗེ་ཆེན་པོ་སྐུ་མདོག་དཀར་པོ༔ ཞལ་གཅིག་ཕྱག་གཉིས་པ༔ མཉམ་བཞག་ཁ་ན་བདུད་རྩིའི་བུམ་པ་བསྣམས་པ༔ ཞབས་གདན་ཟླ་བ་ལ་མཉམ་པའི་སྐྱིལ་ཀྲུང་གིས་བཞུགས་པ༔ རིན་པོ་ཆེའི་རྒྱན་གྱིས་བརྒྱན་པ་གཅིག་གསལ་བར་བསྒོམ་མོ༔ ཐུགས་ཀར་ཟླ་བའི་སྟེང་དུ་ཧྲཱིཿདཀར་པོ་ལས༔ ཡི་གེ་དྲུག་པས་བསྐོར་བར་བསྒོམ་མོ༔ དེ་ནས་བུམ་པ་བྱིན་གྱིས་བརླབ་ཅིང་ལྷ་བསྒོམ་པ་ནི། བུམ་པ་བྷྲཱུྃ་ལས་རིན་པོ་ཆེའི་བུམ་པ༔ ནང་ཡིད་བཞིན་གྱི་ནོར་བུ་རིན་པོ་ཆེ་ལས་གྲུབ་པའི་གཞལ་ཡས་ཁང་དུ་བསམ་མོ༔ བཅུད་བདུད་རྩིའི་རྒྱ་མཚོར་བསམ༔ དེ་ཡི་དབུས་སུ་པདྨའི་པ་ཏྲའི་སྡོང་པོའི་དབུས་སུ༔ ཟླ་བའི་དལ་བསམ༔ དེ་ནས་བདག་གི་ཐུགས་ཀ་ནས་ཧྲཱིཿའཕྲོས་པས༔ ཐུགས་རྗེ་ཆེན་པོར་བསྒོམ༔ མདུན་དུ་པདྨའི་སྟེང་དུ་ལས་ཀྱི་ཁྲོ་བོ་བདུད་རྩི་འཁྱིལ་བ༔ སྐུ་མདོག་ལྗང་སྔོན་ཞལ་གཅིག་ཕྱག་གཉིས་ཞི་མ་ཁྲོ་མཆེ་བ་ཅུང་ཟད་ཡོད་པ༔ ཕྱག་གཉིས་ཐལ་མོ་ཟེད་པའི་སྟེང་ན་བུམ་པ་བདུད་རྩིས་བཀང་བ་བསྣམས་པ་གཅིག་བསྒོམ་མོ༔ དེ་ནས་ཐུགས་ཀའི་ཧྲཱི༔ལས་འོད་ཟེར་འཕྲོས་པས༔ ཡེ་ཤེས་ཀྱི་ཐུགས་རྗེ་ཆེན་པོ་དང་༔ ཡེ་ཤེས་ཀྱི་ཁྲོ་བོ་བདུད་རྩི་འཁྱིལ་བ་སྤྱན་དྲངས་ལ། ཨོཾ་ཨཱཿཧཱུྃ་གསུམ་གྱིས་བྱིན་གྱིས་བརླབ༔ མཆོད་པ་དང་བསྟོད་པ་བྱའོ༔ སྤྱན་དྲངས་པ༔ ཧཱུྃ༔ ཆོས་དབྱིངས་རྣམ་དག་སྐྱེ་བ་མེད་པ་ལས༔ སྐྱེ་བའི་ཆོ་འཕྲུལ་ཞི་ཁྲོའི་སྐུར་སྤྲུལ་པ༔ ཐུགས་རྗེ་ཆེན་པོ་ཁྲོ་བོ་བདུད་རྩི་འཁྱིལ༔ འགྲོ་བའི་དོན་དུ་མཆོད་ཀྱིས་གཤེགས་སུ་གསོལ༔ ཨེ་ཧྱེ་ཧི་བྷ་ག་བཱན་ས་མ་ཡ་ཧོ༔ སཱ་མ་ས་སྟྭཾ༔ ཕྱག་བྱ་བ་ནི། འགྲོ་བའི་དོན་དུ་གཟུགས་ཀྱི་སྐུར་སྟོན་ནས༔ ཞི་ཁྲོའི་ཐབས་ཀྱིས་སེམས་ཅན་འདྲེན་མཛད་པ༔ འགྲོ་མགོན་ཐུགས་རྗེ་ཆེན་པོ་བདུད་རྩི་འཁྱིལ༔ ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿ བཞུགས་སུ་གསོལ་བ་ནི༔ བདེ་གཤེགས་འགྲོ་བའི་མགོན་པོ་ཐུགས་རྗེ་ཆེ༔ དུག་གསུམ་ནད་སེལ་ཁྲོ་བོ་བདུད་རྩི་འཁྱིལ༔ འགྲོ་བ་སེམས་ཅན་ཀུན་གྱི་དོན་གྱི་ཕྱིར༔ པདྨའི་གདན་ལ་བརྟན་པར་བཞུགས་སུ་གསོལ༔ པདྨ་མ་དྷ་ལ་ཧཱུྃ༔ མཆོད་པ་འབུལ་བ༔ རིན་ཆེན་དུང་ཕོར་པདྨའི་སྣོད༔ གཙང་ཞིང་དག་པའི་ཡོན་ཆབ་འདི༔ བདེ་གཤེགས་ཞི་ཁྲོ་རྣམས་ལ་འབུལ༔ འགྲོ་བའི་དོན་དུ་ཐུགས་རྗེས་བཞེས༔ ཨཱ་ཧ་ར་པཱུ་ཙ་ཧཱུྃ༔ དག་ཅིང་གཙང་མའི་སྣོད་མཆོག་ཏུ༔ བདུད་རྩི་དྲི་ཆུས་བཀང་ནས་ནི༔ བདེ་གཤེགས་ཞི་ཁྲོ་རྣམ་གཉིས་ཀྱི༔ ཕྱག་དང་ཞལ་གཉིས་བསིལ་གྱུར་ཅིག༔ པྲ་ཝ་སཏྐ་ར་པྲ་ཏི་པཱུ་ཙ་ཧཱུྃ༔ པདྨ་མེ་ཏོག་དབྱིབས་ལེགས་དང་༔ ཐང་སྐྱེས་ཤིང་སྐྱེས་ཆུ་སྐྱེས་རྣམས༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ པུཥྤེ་པཱུ་ཙ་ཧཱུྃ༔ དྲི་དང་སྤོས་དང་བདུག་པ་དང་༔ དྲི་ཡི་དམ་པ་མཆོག་གྱུར་པ༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ དྷཱུ་པེ་པཱུ་ཙ་ཧཱུྃ༔ མ་རིག་མུན་པ་སེལ་མཛད་ཅིང་༔ འཇིག་རྟེན་སྣང་གསལ་མར་མེ་འདི༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ ཨཱ་ལོ་ཀེ་པཱུ་ཙ་ཧཱུྃ༔ མཆོག་ཏུ་སྦྱར་བའི་དྲི་ཆབ་འདི༔ ཙནྡན་སྨན་དང་དྲི་སྦྱར་བ༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ གནྡྷེ་པཱུ་ཙ་ཧཱུྃ༔ སྣ་ཚོགས་འབྲུ་དང་རིན་ཆེན་སྦྱར༔ མཆོག་ཏུ་སྦྱར་བའི་ཞལ་ཟས་འདི༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ ནཻ་བིདྱ་པཱུ་ཙ་ཧཱུྃ༔ སྟོང་གསུམ་འཇིག་རྟེན་ཁམས་རྣམས་ན༔ དུང་དང་དྲིལ་བུ་ཆ་ལང་སྒྲ༔ བདེ་གཤེགས་ཞི་ཁྲོ་གཉིས་ལ་འབུལ༔ འགྲོ་བའི་དོན་དུ་བཞེས་སུ་གསོལ༔ ཤཔྡ་པཱུ་ཙ་ཧཱུྃ༔ སྔོན་གྱི་དུས་ནས་ད་ལྟའི་བར༔ སྡིག་པ་མི་དགེ་ཐམས་ཅད་བཤགས༔ འཕགས་པ་མཆོད་དང་འགྲོ་དོན་བྱས༔ དགེ་བ་བགྱིད་ལ་རྗེས་ཡི་རང་༔ འགྲོ་བའི་སྡུག་བསྔལ་བསལ་བའི་ཕྱིར༔ ཆོས་ཀྱི་འཁོར་ལོ་བླ་མེད་བསྐོར་བར་བསྐུལ༔ བདེ་གཤེགས་བསྟན་པ་མངོན་འབྱུང་ཕྱིར༔ མྱ་ངན་མི་འདའ་བཞུགས་སུ་གསོལ༔ རྒྱལ་སྲས་བླ་མ་དཀོན་མཆོག་ལ༔ སྒོ་གསུམ་དང་བས་སྐྱབས་སུ་མཆི༔ མཆོད་སྦྱིན་དགེ་བཅུའི་ལས་རྣམས་དང་༔ སྒོ་གསུམ་བླ་མེད་བྱང་ཆུབ་བསྔོ༔ ཞེས་མཆོད་པ་བྱའོ༔ དེ་ནས་བཟླས་པ་བྱ་བ༔ ཨོཾ་ཨཱཿཧཱུྃ་ཧྲཱི༔ ཨོཾ་མ་ཎི་པདྨེ་ཧཱུྃ༔ ན་མཤྩཎྜ་བཛྲ་ཀྲོ་དྷཱ་ཡ༔ ཧུ་ལུ་ཧུ་ལུ༔ ཏིཥྛ་ཏིཥྛ༔ བྷནྡྷ་བྷནྡྷ༔ ཧ་ན་ཧ་ན་ཨ་མྲྀ་ཏེ་ཧཱུྃ་ཕཊ༔ ཅེས་བཟླས་པས། སྔགས་ཀྱི་འོད་ཟེར་གཟུངས་ཐག་ལ་འཁྲིལ་ནས༔ བུམ་པའི་ཐུགས་རྗེ་ཆེན་པོ་ཞི་ཁྲོ་གཉིས་ལ་ཕོག༔ ཐུགས་དམ་གྱི་རྒྱུད་བསྐུལ༔ ཕྱིར་བདེ་བར་གཤེགས་པ་ལ་འཕྲོས༔ ཐུགས་ཡེ་ཤེས་ཀྱི་བཅུད་བསྡུས༔ ཚུར་འདུས་བུམ་པའི་ལྷ་ལ་ཐིམ་པས༔ ཕྱག་གི་བདུད་རྩིའི་བུམ་པ་གང་ནས་ལུད་པས༔ བུམ་པའི་གཞལ་ཡས་ཁང་གང་བར་བསམ་མོ༔ དེ་ཡང་དུས་ཀྱི་བསྙེན་པ་ཞག་གསུམ་དང་༔ བདུན་ནམ༔ བཅུ་བཞི་འམ༔ ཉི་ཤུ་རྩ་གཅིག་ལ་སོགས༔ གྲངས་ཀྱི་བསྙེན་པ་འབུམ་ཚོ་གཅིག༔ བསྙེན་པའི་རྟགས་ཆུ་ཁོལ་བ་དང་༔ དྲོད་རྙེད་པ་དང་༔ རླངས་པ་འབྱུང་བ་ལ་སོགས་པའོ༔ མཇུག་ཏུ་ཁྲུས་བྱ་ཞིང་དབང་བསྐུར་བ་ལ༔ དང་པོ་བསྟོད་པ་བྱ་བ་ནི༔ སྐྱེ་མེད་དབྱིངས་ལས་འགྲོ་བའི་དོན་སླད་དུ༔ མ་འགགས་ཐུགས་རྗེས་འགྲོ་དྲུག་ཐབས་ཀྱིས་འདུལ༔ སྙིང་རྗེས་ཀུན་ལ་གཟིགས་པའི་ཐུགས་རྗེ་ཆེ༔ མགོན་པོ་སྤྱན་རས་གཟིགས་ལ་ཕྱག་འཚལ་བསྟོད༔ སྐལ་ལྡན་འདི་ལ་དབང་བསྐུར་བྱིན་གྱིས་རློབས༔ ཆོས་ཉིད་བདུད་རྩི་མཆོག་ཏུ་དབང་བསྒྱུར་ཅིང་༔ དུག་ལྔ་དུག་གསུམ་སྨན་དུ་བསྒྱུར་མཛད་པ༔ འགྲོ་བ་ཀུན་གྱི་སྡུག་བསྔལ་སེལ་མཛད་པའི༔ ཁྲོ་བོ་བདུད་རྩི་འཁྱིལ་ལ་ཕྱག་འཚལ་བསྟོད༔ སྐལ་ལྡན་འདི་ལ་དབང་བསྐུར་བྱིན་གྱིས་རློབས༔ ཞེས་གསོལ་བ་བཏབ་ལ༔ དེ་ནས་བུམ་པས་དབང་བསྐུར་བ༔ སློབ་མའམ་ཡོན་བདག་གི་སྤྱི་བོར་བུམ་པ་བཞག་ལ༔ བུམ་པས་དབང་བསྐུར་དག་བྱེད་ཀ་ལ་ཤ༔ སྤྱི་བོར་བཞག་པས་པདྨ་རཱ་ག་འདྲ༔ དག་ཅིང་དྲི་མེད་རས་ཀྱི་མགུལ་ཆིངས་བཅིངས༔ འབྲས་བུ་ཆགས་པའི་ཤིང་གིས་ཁ་བརྒྱན་ཅིང་༔ ཡོན་ཏན་ལེགས་མཛེས་གདུང་བའི་བསིལ་མངར་ཆུ༔ མེ་ཏོག་ལེགས་མཛད་དྲི་ལྡན་སྤོས་ཀྱི་ཆུ༔ སྨན་ལྔ་འབྲུ་ལྔ་སྤོས་ལྔ་རིན་ཆེན་ལྔ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཚན་བཟང་པོ་སུམ་ཅུ་རྩ་གཉིས་དང་ལྡན་པར་གྱུར་ཅིག༔ ཁ་རྒྱན་གྱིས་དབང་བསྐུར་བས༔ དཔེ་བྱད་བཟང་པོ་བརྒྱད་ཅུ་དང་ལྡན་པར་གྱུར་ཅིག༔ གཟུངས་ཐག་གི་དབང་བསྐུར་བས༔ ཐུགས་རྗེའི་ལུ་གུ་རྒྱུད་དང་ལྡན་པར་གྱུར་ཅིག༔ རིན་པོ་ཆེ་སྣ་ལྔས་དབང་བསྐུར་བས༔ དགོས་འདོད་རེ་བ་ཡིད་བཞིན་དུ་སྐོང་བར་གྱུར་ཅིག༔ སྨན་ལྔས་དབང་བསྐུར་བས༔ རླུང་མཁྲིས་བད་ཀན་གྱི་ནད་ཀྱི་སྡུག་བསྔལ་ལས་ཐར་བར་གྱུར་ཅིག༔ སྤོས་ལྔས་དབང་བསྐུར་བས༔ ཚུལ་ཁྲིམས་ཀྱི་མཆོག་དང་ལྡན་ནས༔ འཕགས་པའི་ཞལ་ཟས་དང་ལྡན་པར་གྱུར་ཅིག༔ སྙིང་པོ་ལྔས་དབང་བསྐུར་བས༔ སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་ལྡན་པར་གྱུར་ཅིག༔ ཇི་ལྟར་བུམ་པ་ནང་སྟོང་པ་ལྟར༔ ཉོན་མོངས་པའི་ལས་དང་ཤེས་བྱའི་སྒྲིབ་པ་ཐམས་ཅད་བྱང་བར་གྱུར་ཅིག༔ ཇི་ལྟར་བུམ་པ་གང་ཞིང་རྒྱས་པ་ལྟར༔ ཚེ་དང་དབང་དང་ལོངས་སྤྱོད་ལ་སོགས་རྒྱས་པར་གྱུར་ཅིག༔ ཀ་ལ་ཤ་པཉྩ་རཏྣ་ཨ་བྷི་ཥིཉྩ་ཨཱཿ ཅེས་བུམ་པས་དབང་བསྐུར་ཅིང་ཁྲུས་བྱའོ། ནད་པ་ཡིན་ན་སྙིང་པོ་བཟླས་ཤིང་ཁྲུས་བྱས་པས༔ ནད་དང་གདོན་དང་བར་གཅོད་ཐམས་ཅད་དག་ནས་མི་གནས་པར་བསམ་མོ༔ ཚེ་དང་དཔལ་དང་བསོད་ནམས་དང་ལྡན་པར་བསམ་མོ༔ དེ་ནས་བཀྲ་ཤིས་ཀྱི་རྫས་བརྒྱད་ཀྱིས་དབང་བསྐུར་བ༔ རིན་ཆེན་གསེར་གདུགས་བཀྲ་ཤིས་རིན་ཆེན་རྫས༔ བདེ་གཤེགས་སྐུ་ལ་མཚན་དང་དཔེ་ཤར་བ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་ཆོས་ཀྱི་སྤྲིན་གྱི་བཀྲ་ཤིས་ཤོག༔ རིན་ཆེན་རྒྱལ་མཚན་བཀྲ་ཤིས་རིན་ཆེན་རྫས༔ བདེ་གཤེགས་སྐུ་ལ་མཚན་དང་དཔེ་ཤར་བ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་བདུད་ལས་རྒྱལ་བའི་བཀྲ་ཤིས་ཤོག༔ རིན་ཆེན་གསེར་ཉ་བཀྲ་ཤིས་རིན་ཆེན་རྫས༔ བདེ་གཤེགས་སྤྱན་ལ་མཚན་དང་དཔེ་ཤར་བ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་སྤྱན་ལྔ་ལྡན་པའི་བཀྲ་ཤིས་ཤོག༔ རིན་ཆེན་འབུད་དུང་བཀྲ་ཤིས་རིན་ཆེན་རྫས༔ བདེ་གཤེགས་གསུང་ལ་མཚན་དང་དཔེ་བྱད་ཤར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་ཆོས་སྒྲ་གསུང་གི་བཀྲ་ཤིས་ཤོག༔ རིན་ཆེན་བུམ་པ་བཀྲ་ཤིས་རིན་ཆེན་རྫས༔ བདེ་གཤེགས་མགུལ་ལ་མཚན་དང་དཔེ་བྱད་ཤར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་འཆི་མེད་ཚེ་ཡི་བཀྲ་ཤིས་ཤོག༔ རིན་ཆེན་དཔལ་བེའུ་བཀྲ་ཤིས་རིན་ཆེན་རྫས༔ བདེ་གཤེགས་ཐུགས་ལ་མཚན་དང་དཔེ་བྱད་ཤར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་མི་འགྱུར་ཐུགས་ཀྱི་བཀྲ་ཤིས་ཤོག༔ རིན་ཆེན་པདྨ་བཀྲ་ཤིས་རིན་ཆེན་རྫས༔ བདེ་གཤེགས་ལྗགས་ལ་མཚན་དང་དཔེ་ཤར་བ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་ཡོན་ཏན་ཀུན་ལྡན་བཀྲ་ཤིས་ཤོག༔ རིན་ཆེན་འཁོར་ལོ་བཀྲ་ཤིས་རིན་ཆེན་རྫས༔ བདེ་གཤེགས་ཞབས་ལ་མཚན་དང་དཔེ་བྱད་ཤར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྲོ་ཀུན་འཁོར་བ་རྒྱུན་གཅོད་བཀྲ་ཤིས་ཤོག༔ ཅེས་པ་བཀྲ་ཤིས་རྫས་བརྒྱད་བྲིས་ལ་ལག་ཏུ་གཏད་དོ༔ དེ་ནས་འཁོར་ལོས་སྒྱུར་བའི་རྒྱལ་པོའི་དབང་བསྐུར་བ༔ རྒྱལ་པོ་རིན་ཆེན་སྟོང་གསུམ་འཁོར་ལོས་བསྒྱུར༔ མཚན་དང་དཔེ་བྱད་ལྡན་པའི་སྐུ་མངའ་བ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཆོས་འཁོར་ལོས་བསྒྱུར་རྒྱལ་དབང་ཐོབ་ཤོག༔ བཙུན་མོ་རིན་ཆེན་འདོད་འབྱུང་བྱང་ཆུབ་སེམས༔ རྒྱལ་པོའི་སྐུ་ལ་མཉེས་མཛད་ཡུམ་ལྔར་ལྡན༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཐབས་དང་ཤེས་རབ་འབྲེལ་བའི་དབང་ཐོབ་ཤོག༔ བློན་པོ་རིན་ཆེན་བློ་ལྡན་བསྙེན་གནས་དགའ༔ རྒྱལ་པོ་ཆེན་པོའི་གྲོས་ཀྱི་ཆབ་སྲིད་འཛིན༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ བསམ་གཏན་བློ་དང་ལྡན་པའི་དབང་ཐོབ་ཤོག༔ དམག་དཔོན་རིན་ཆེན་རྩུབ་འགྱུར་རྡོ་རྗེ་འཆང་༔ ཚུལ་དགུ་ལྡན་པས་ཕ་རོལ་དཔུང་རྣམས་འཇོམས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ བདུད་ཀྱི་དཔུང་རྣམས་འཇོམས་པའི་དབང་ཐོབ་ཤོག༔ འཁོར་ལོ་རིན་ཆེན་གསེར་གྱི་རྩིབས་སྟོང་ལྡན༔ རྒྱལ་པོ་ཆེན་པོ་གར་འགྲོ་ཁ་ལོ་བསྒྱུར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྲིད་པའི་འཁོར་ལོ་རྒྱུན་གཅོད་དབང་ཐོབ་ཤོག༔ ནོར་བུ་རིན་ཆེན་མཆོད་པས་དགོས་འདོད་འབྱུང་༔ རྒྱལ་པོ་ཆེན་པོའི་བསོད་ནམས་དབང་ཐང་རྫོགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ བཀྲེས་སྐོམ་རྒྱུན་ཆད་ཕུན་སུམ་ཚོགས་དབང་ཐོབ་ཤོག༔ རྟ་མཆོག་རིན་ཆེན་རྩལ་ལྡན་སྤྲིན་ཤུགས་ཅན༔ རྒྱལ་པོ་ཆེན་པོའི་རྫུ་འཕྲུལ་རྟ་ཡི་ཆིབས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སངས་རྒྱས་ས་ལ་ཕྱིན་པའི་དབང་ཐོབ་ཤོག༔ གླང་པོ་རིན་ཆེན་རྩལ་དང་སྟོབས་བཅུར་ལྡན༔ རྒྱལ་པོ་ཆེན་པོའི་དམག་གི་དཔུང་འདེགས་པའི༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཐམས་ཅད་མཁྱེན་པར་འགྲོ་བའི་དབང་ཐོབ་ཤོག༔ ཅེས་རིན་ཆེན་བརྒྱད་ཀྱི་གཟུགས་བྲིས་ལ་གཏད་དོ༔ དེ་ལྟར་དབང་བསྐུར་ནས་ཁྲུས་བྱས་ཏེ་སྒྲིབ་པ་སྦྱང་ན་སྔགས་ཀྱི་ཤམ་བུར་ཆེ་གེ་མོའི་ཉོན་མོངས་པའི་སྒྲིབ་པ་དང་༔ ལས་ཀྱི་སྒྲིབ་པ་དང་༔ རྣམ་པར་སྨིན་པའི་སྒྲིབ་པ་དང་༔ ཤེས་བྱའི་སྒྲིབ་པ་དང་༔ སྒྲིབ་པ་ཐམས་ཅད་དག་ཅིང་མི་གནས་པར་གྱུར་ཅིག༔ ཅེས་ཚིག་ཏུ་བརྗོད་པས་སྒྲིབ་པ་ཐམས་ཅད་དཀར་སངས་ལ་དག་པར་བསམ་མོ༔ ནད་པ་ཡིན་ན། རླུང་མཁྲིས་བད་ཀན་འདུས་པའི་ནད་ཐམས་ཅད་དག་པར་གྱུར་ཅིག༔ གདོན་དང་བར་གཅོད་ཐམས་ཅད་ཞི་བར་གྱུར་ཅིག༔ ལུས་ཀྱི་ན་ཚ་སེམས་ཀྱི་སྡུག་བསྔལ་ཐམས་ཅད་དག་པར་གྱུར་ཅིག༔ ཞི་བར་གྱུར་ཅིག༔ སྟོང་པར་གྱུར་ཅིག༔ ཅེས་བརྗོད་ཅིང་བཀྲུའོ༔ མི་གཙང་བས་ཟིན་ན༔ ཉམས་པ་ཅན་གྱི་གྲིབ་ཕོག་པ༔ མི་གཙང་བའི་འགོ་མཚན་ཕོག་པ༔ ནད་དང་རིགས་དང་མཛེའི་རླངས་པ་ཕོག་པ༔ མི་གཙང་བས་ལྷ་དང་སྲུང་མ་གྱེར་བ༔ ཆོས་སྐྱོང་སྲུང་མ་མི་དགྱེས་པ༔ དག་པར་གྱུར་ཅིག༔ ཞི་བར་གྱུར་ཅིག༔ སྟོང་པར་གྱུར་ཅིག༔ ཅེས་བརྗོད་ལ་ཁྲུས་བྱའོ༔ མཇུག་ནི་དོན་ནི༔ བུམ་པའི་ཡེ་ཤེས་པ་གཤེགས༔ དམ་ཚིག་སེམས་དཔའ་ཆུ་ལྷག་མར་ཞུ༔ རང་ལྷར་བསྒོམས་ལ༔ མི་དམིགས་པར་རྒྱས་གདབ་བོ༔ སློབ་དཔོན་པདྨ་འབྱུང་གནས་ཀྱིས༔ ནད་དང་གདོན་དང་༔ ཉམས་གྲིབ་བསལ་བའི་དོན་དུ་མཛད་པ༔ ཐུགས་རྗེ་ཆེན་པོའི་བུམ་ཁྲུས་ཀྱི་ཆོ་གའོ༔ ཨྠིྀ རྫོགས་སོ༔ དགེའོ།། །།

[edit]

@#/__/thugs rje chen po 'gro 'dul las:__bum pa'i gzungs khrus cho ga bzhugs so:__@#/__12345678:__spyan ras gzigs dbang phyug thugs rje can 'gro ba'i mgon la phyag 'tshal lo:__'gro ba'i nad gdon nyams grib dang :__mi gtsang byad du bcug pa las:__thar bar bya phyir bum khrus bstan:__thugs rje chen po'i rnal 'byor pas:__dben cing nyams dga' gtsang ba'i sar:__tshes grangs gza' skar bzang po la:__maN+Dal legs byas rnam lngas byug:__me tog tshom bu dgram par bya:__gser dngul zangs kyi bum pa'am:__ma 'byor rdza yi bum pa ru:__sman lnga 'bru lnga spaus lnga dang :__rin chen lnga dang chu gtsang blug:__chu shel mig med snying por gces:__mgul chings kha rgyan shug pa'am:__'bras bu can gyi shing la bya:__rigs lnga'i phyag mtshan bris pa dang :__bkra shis rdzas brgyad rin chen brgyad:__rma bya'i sgro la sogs pa gzugs:__mchod pa rnam lnga'am bdun bsham mo:__yan lag bdun pas tshogs bsags la:__rang nyid rta mgrin skur bsgoms la:__bum pa gu gul dud pas bdug:__bgegs bskrad byas la bum par gzug:__de nas bum pa'i cho ga ni:__dang po dam tshig lha bskyed pa:__ye shes tshogs ni stong par bsgom:__zla ba'i steng du hrIHdkar bsam:__hrIHlas 'od 'phros 'gro don byas:__de las thugs rje chen po'i sku:__zhal gcig phyag gnyis sku mdog dkar:__phyag gnyis mnyam bzhag bum pa bsnams:__zla ba'i gdan la mnyam par bzhugs:__rin chen rgyan gyis brgyan par bsgom:__thugs kar zla ba'i da la'i steng :__hrIHlas yi ge drug bskor bsgom:__de nas bum pa byin brlab pa:__b+h+rU~M las rin chen gzhal yas khang :__bcud ni bdud rtsi'i rgya mtsho'i nang :__pad+ma pa tra zla bar bcas:__thugs ka'i hrIHlas hrIH'phros pas:__de la thugs rje chen por gyur:__sku mdog phyag mtshan gong dang mtshungs:__de yi mdun gyi pad+ma'i steng :__las kyi khro bo bdud rtsi 'khyil:__zhal gcig phyag gnyis sku mdog ljang :__cung zad mche gtsigs zhi ma khro:__phyag gnyis thal mo gzed pa po:__de steng bdud rtsi'i bum pa bsnams:__dag par byed pa'i lha ru bsgom:__de nas thugs rje chen po yi:__thugs ka'i hrI las 'od zer 'phros:__ye shes thugs rje chen po dang :__ye shes bdud rtsi 'khyil pa gnyis:__rang bzhin gnas nas spyan drangs la:__sku gsung thugs su byin brlabs la:__mchod dang bstod pa tshul bzhin bya:__de nas bzlas pa bya ba ni/__oM AHhU~M hrIH__oM ma Ni pad+me hU~M:__na maHtsaN+Da badz+ra kro d+hA ya:__hu lu hu lu:__tiSh+Tha tiSh+Tha:__b+han+d+ha b+han+d+ha:__ha na ha na:__a mr-i te hU~M phaT:__ces sngags bzlas pas:__gzungs thag lag tu bzung nas ni:__sngags kyi 'od zer 'khril nas ni:__bum pa'i zhi khro gnyis la 'phros:__thugs dam rgyud bskul phrin las mdzad:__phyir 'phros bde bar gshegs pa las:__sku gsung thugs kyi bcud bsdus nas:__tshur 'dus bum pa'i lha la thim:__phyag gi bum pa gang nas su:__bum pa'i nang ni gang bar bsam:__dus kyi bsnyen pa bdun la sogs:__grangs kyi bsnyen pa 'bum tsho gcig:__mtshan rtags khol dang lud dang drod rnyed pa'o:__de nas bstod cing gsol btab la:__bum pas dbang ni bskur bar bya:__bkra shis rdzas brgyad dbang dang ni:__rgyal srid rin chen sna bdun dbang :__khrus bya nad dang sgrib pa bkru:__de nas bum pa'i lha dang ni:__ye shes sems dpa' gshegs su gsol:__dam tshig sems dpa' chu ru zhu:__rang nyid lha la bsdu gshegs bya'o:__dmigs pa med par rgyas gdab bo:__'di brtsams pa yi dge ba gang yin pas:__'gro ba'i nad gdon sel gyur nas:__byang chub lam la rab zhugs nas:__thugs rje chen po'i zhal mthong nas:__chos sku'i don ni rtogs par shog:__slob dpon pad+ma 'byung gnas kyis mdzad pa:__thugs rje chen po'i bum sgrub rdzogs so:__123456789101112:__thugs rje'i bdag po 'phags pa spyan ras gzigs dbang phyug la phyag 'tshal lo:__'gro ba nad dang :__gdon dang :__mi gtsang ba la sogs pa phog pa la:__de la thugs rje chen po'i bum khrus te:__de la sbyor ba dang :__dngos gzhi dang :__mjug go:__de la dang po sbyor ba ni:__thugs rje chen po'i sgrub pa bum sgrub nyams su len pa'i rten gyi gang zag gis:__dben cing nyams dga' ba'i sa ru:__tshes grangs dang gza' skar bzang po la:__maN+Dal legs par byas la:__me tog gi tshom bu dgram mo:__de'i steng du bzhag pa'i rdzas la:__bum pa rin po che'am rdza'i bum pa bre gang yan chad shong bar:__sman lnga:__'bru lnga:__spos lnga:__rin po che lnga:__chu gtsang ma dang 'o ma blug:__rin po che lnga brdar la mgul chings dang :__kha rgyan btsugs la:__nang du chu shel med thabs med:__rigs lnga'i phyag mtshan dang :__bkra shis rdzas brgyad la sogs pa gzugs:__mchod pa rnam pa lnga'am bdun la sogs pa bshams la:__yan lag bdun pas tshogs bsag go:__de nas rang dpal rta mgrin du bsgoms la:__bum pa gu gul gyis bdugs la:__bgegs bskrad do:__gnyis pa dngos gzhi la/__dam tshig gi lha bskyed pa ni:__dang po ye shes kyi tshogs bsags:__oM swa b+hA ba bi shud+d+haHsarba d+harmA:shud+d+ho\u0f85haM:__zhes pas/__chos thams cad stong pa nyid du bsgom:__de'i ngang las a las zla ba'i dal bsams la/__de'i steng du sems nyid hrIHdkar po gcig tu bsam:__hrIHde las 'od 'phros 'gro don byas:__'od du zhu ba las pad+ma dkar por gyur:__de'i 'od 'phros 'dus pa las thugs rje chen po sku mdog dkar po:__zhal gcig phyag gnyis pa:__mnyam bzhag kha na bdud rtsi'i bum pa bsnams pa:__zhabs gdan zla ba la mnyam pa'i skyil krung gis bzhugs pa:__rin po che'i rgyan gyis brgyan pa gcig gsal bar bsgom mo:__thugs kar zla ba'i steng du hrIHdkar po las:__yi ge drug pas bskor bar bsgom mo:__de nas bum pa byin gyis brlab cing lha bsgom pa ni/__bum pa b+h+rU~M las rin po che'i bum pa:__nang yid bzhin gyi nor bu rin po che las grub pa'i gzhal yas khang du bsam mo:__bcud bdud rtsi'i rgya mtshor bsam:__de yi dbus su pad+ma'i pa tra'i sdong po'i dbus su:__zla ba'i dal bsam:__de nas bdag gi thugs ka nas hrIH'phros pas:__thugs rje chen por bsgom:__mdun du pad+ma'i steng du las kyi khro bo bdud rtsi 'khyil ba:__sku mdog ljang sngon zhal gcig phyag gnyis zhi ma khro mche ba cung zad yod pa:__phyag gnyis thal mo zed pa'i steng na bum pa bdud rtsis bkang ba bsnams pa gcig bsgom mo:__de nas thugs ka'i hrI:las 'od zer 'phros pas:__ye shes kyi thugs rje chen po dang :__ye shes kyi khro bo bdud rtsi 'khyil ba spyan drangs la/__oM AHhU~M gsum gyis byin gyis brlab:__mchod pa dang bstod pa bya'o:__spyan drangs pa:__hU~M:__chos dbyings rnam dag skye ba med pa las:__skye ba'i cho 'phrul zhi khro'i skur sprul pa:__thugs rje chen po khro bo bdud rtsi 'khyil:__'gro ba'i don du mchod kyis gshegs su gsol:__e h+ye hi b+ha ga bAn sa ma ya ho:__sA ma sa s+t+waM:__phyag bya ba ni/__'gro ba'i don du gzugs kyi skur ston nas:__zhi khro'i thabs kyis sems can 'dren mdzad pa:__'gro mgon thugs rje chen po bdud rtsi 'khyil:__zhi khro sprul pa'i sku la phyag 'tshal lo:__na mo pu ru sha ya hoH__bzhugs su gsol ba ni:__bde gshegs 'gro ba'i mgon po thugs rje che:__dug gsum nad sel khro bo bdud rtsi 'khyil:__'gro ba sems can kun gyi don gyi phyir:__pad+ma'i gdan la brtan par bzhugs su gsol:__pad+ma ma d+ha la hU~M:__mchod pa 'bul ba:__rin chen dung phor pad+ma'i snod:__gtsang zhing dag pa'i yon chab 'di:__bde gshegs zhi khro rnams la 'bul:__'gro ba'i don du thugs rjes bzhes:__A ha ra pU tsa hU~M:__dag cing gtsang ma'i snod mchog tu:__bdud rtsi dri chus bkang nas ni:__bde gshegs zhi khro rnam gnyis kyi:__phyag dang zhal gnyis bsil gyur cig:__pra wa sat+ka ra pra ti pU tsa hU~M:__pad+ma me tog dbyibs legs dang :__thang skyes shing skyes chu skyes rnams:__bde gshegs zhi khro gnyis la 'bul:__'gro ba'i don du bzhes su gsol:__puSh+pe pU tsa hU~M:__dri dang spos dang bdug pa dang :__dri yi dam pa mchog gyur pa:__bde gshegs zhi khro gnyis la 'bul:__'gro ba'i don du bzhes su gsol:__d+hU pe pU tsa hU~M:__ma rig mun pa sel mdzad cing :__'jig rten snang gsal mar me 'di:__bde gshegs zhi khro gnyis la 'bul:__'gro ba'i don du bzhes su gsol:__A lo ke pU tsa hU~M:__mchog tu sbyar ba'i dri chab 'di:__tsan+dan sman dang dri sbyar ba:__bde gshegs zhi khro gnyis la 'bul:__'gro ba'i don du bzhes su gsol:__gan+d+he pU tsa hU~M:__sna tshogs 'bru dang rin chen sbyar:__mchog tu sbyar ba'i zhal zas 'di:__bde gshegs zhi khro gnyis la 'bul:__'gro ba'i don du bzhes su gsol:__nai bid+ya pU tsa hU~M:__stong gsum 'jig rten khams rnams na:__dung dang dril bu cha lang sgra:__bde gshegs zhi khro gnyis la 'bul:__'gro ba'i don du bzhes su gsol:__shap+da pU tsa hU~M:__sngon gyi dus nas da lta'i bar:__sdig pa mi dge thams cad bshags:__'phags pa mchod dang 'gro don byas:__dge ba bgyid la rjes yi rang :__'gro ba'i sdug bsngal bsal ba'i phyir:__chos kyi 'khor lo bla med bskor bar bskul:__bde gshegs bstan pa mngon 'byung phyir:__mya ngan mi 'da' bzhugs su gsol:__rgyal sras bla ma dkon mchog la:__sgo gsum dang bas skyabs su mchi:__mchod sbyin dge bcu'i las rnams dang :__sgo gsum bla med byang chub bsngo:__zhes mchod pa bya'o:__de nas bzlas pa bya ba:__oM AHhU~M hrI:__oM ma Ni pad+me hU~M:__na mash+tsaN+Da badz+ra kro d+hA ya:__hu lu hu lu:__tiSh+Tha tiSh+Tha:__b+han+d+ha b+han+d+ha:__ha na ha na a mr-i te hU~M phaT:__ces bzlas pas/__sngags kyi 'od zer gzungs thag la 'khril nas:__bum pa'i thugs rje chen po zhi khro gnyis la phog:__thugs dam gyi rgyud bskul:__phyir bde bar gshegs pa la 'phros:__thugs ye shes kyi bcud bsdus:__tshur 'dus bum pa'i lha la thim pas:__phyag gi bdud rtsi'i bum pa gang nas lud pas:__bum pa'i gzhal yas khang gang bar bsam mo:__de yang dus kyi bsnyen pa zhag gsum dang :__bdun nam:__bcu bzhi 'am:__nyi shu rtsa gcig la sogs:__grangs kyi bsnyen pa 'bum tsho gcig:__bsnyen pa'i rtags chu khol ba dang :__drod rnyed pa dang :__rlangs pa 'byung ba la sogs pa'o:__mjug tu khrus bya zhing dbang bskur ba la:__dang po bstod pa bya ba ni:__skye med dbyings las 'gro ba'i don slad du:__ma 'gags thugs rjes 'gro drug thabs kyis 'dul:__snying rjes kun la gzigs pa'i thugs rje che:__mgon po spyan ras gzigs la phyag 'tshal bstod:__skal ldan 'di la dbang bskur byin gyis rlobs:__chos nyid bdud rtsi mchog tu dbang bsgyur cing :__dug lnga dug gsum sman du bsgyur mdzad pa:__'gro ba kun gyi sdug bsngal sel mdzad pa'i:__khro bo bdud rtsi 'khyil la phyag 'tshal bstod:__skal ldan 'di la dbang bskur byin gyis rlobs:__zhes gsol ba btab la:__de nas bum pas dbang bskur ba:__slob ma'am yon bdag gi spyi bor bum pa bzhag la:__bum pas dbang bskur dag byed ka la sha:__spyi bor bzhag pas pad+ma rA ga 'dra:__dag cing dri med ras kyi mgul chings bcings:__'bras bu chags pa'i shing gis kha brgyan cing :__yon tan legs mdzes gdung ba'i bsil mngar chu:__me tog legs mdzad dri ldan spos kyi chu:__sman lnga 'bru lnga spos lnga rin chen lnga:__skal ldan rigs kyi bu la dbang bskur bas:__mtshan bzang po sum cu rtsa gnyis dang ldan par gyur cig:__kha rgyan gyis dbang bskur bas:__dpe byad bzang po brgyad cu dang ldan par gyur cig:__gzungs thag gi dbang bskur bas:__thugs rje'i lu gu rgyud dang ldan par gyur cig:__rin po che sna lngas dbang bskur bas:__dgos 'dod re ba yid bzhin du skong bar gyur cig:__sman lngas dbang bskur bas:__rlung mkhris bad kan gyi nad kyi sdug bsngal las thar bar gyur cig:__spos lngas dbang bskur bas:__tshul khrims kyi mchog dang ldan nas:__'phags pa'i zhal zas dang ldan par gyur cig:__snying po lngas dbang bskur bas:__sku gsung thugs yon tan phrin las lnga dang ldan par gyur cig:__ji ltar bum pa nang stong pa ltar:__nyon mongs pa'i las dang shes bya'i sgrib pa thams cad byang bar gyur cig:__ji ltar bum pa gang zhing rgyas pa ltar:__tshe dang dbang dang longs spyod la sogs rgyas par gyur cig:__ka la sha pany+tsa rat+na a b+hi Shiny+tsa AH__ces bum pas dbang bskur cing khrus bya'o/__nad pa yin na snying po bzlas shing khrus byas pas:__nad dang gdon dang bar gcod thams cad dag nas mi gnas par bsam mo:__tshe dang dpal dang bsod nams dang ldan par bsam mo:__de nas bkra shis kyi rdzas brgyad kyis dbang bskur ba:__rin chen gser gdugs bkra shis rin chen rdzas:__bde gshegs sku la mtshan dang dpe shar ba:__skal ldan rigs kyi bu la dbang bskur bas:__'gro kun chos kyi sprin gyi bkra shis shog:__rin chen rgyal mtshan bkra shis rin chen rdzas:__bde gshegs sku la mtshan dang dpe shar ba:__skal ldan rigs kyi bu la dbang bskur bas:__'gro kun bdud las rgyal ba'i bkra shis shog:__rin chen gser nya bkra shis rin chen rdzas:__bde gshegs spyan la mtshan dang dpe shar ba:__skal ldan rigs kyi bu la dbang bskur bas:__'gro kun spyan lnga ldan pa'i bkra shis shog:__rin chen 'bud dung bkra shis rin chen rdzas:__bde gshegs gsung la mtshan dang dpe byad shar:__skal ldan rigs kyi bu la dbang bskur bas:__'gro kun chos sgra gsung gi bkra shis shog:__rin chen bum pa bkra shis rin chen rdzas:__bde gshegs mgul la mtshan dang dpe byad shar:__skal ldan rigs kyi bu la dbang bskur bas:__'gro kun 'chi med tshe yi bkra shis shog:__rin chen dpal be'u bkra shis rin chen rdzas:__bde gshegs thugs la mtshan dang dpe byad shar:__skal ldan rigs kyi bu la dbang bskur bas:__'gro kun mi 'gyur thugs kyi bkra shis shog:__rin chen pad+ma bkra shis rin chen rdzas:__bde gshegs ljags la mtshan dang dpe shar ba:__skal ldan rigs kyi bu la dbang bskur bas:__'gro kun yon tan kun ldan bkra shis shog:__rin chen 'khor lo bkra shis rin chen rdzas:__bde gshegs zhabs la mtshan dang dpe byad shar:__skal ldan rigs kyi bu la dbang bskur bas:__'gro kun 'khor ba rgyun gcod bkra shis shog:__ces pa bkra shis rdzas brgyad bris la lag tu gtad do:__de nas 'khor los sgyur ba'i rgyal po'i dbang bskur ba:__rgyal po rin chen stong gsum 'khor los bsgyur:__mtshan dang dpe byad ldan pa'i sku mnga' ba:__skal ldan rigs kyi bu la dbang bskur bas:__chos 'khor los bsgyur rgyal dbang thob shog:__btsun mo rin chen 'dod 'byung byang chub sems:__rgyal po'i sku la mnyes mdzad yum lngar ldan:__skal ldan rigs kyi bu la dbang bskur bas:__thabs dang shes rab 'brel ba'i dbang thob shog:__blon po rin chen blo ldan bsnyen gnas dga':__rgyal po chen po'i gros kyi chab srid 'dzin:__skal ldan rigs kyi bu la dbang bskur bas:__bsam gtan blo dang ldan pa'i dbang thob shog:__dmag dpon rin chen rtsub 'gyur rdo rje 'chang :__tshul dgu ldan pas pha rol dpung rnams 'joms:__skal ldan rigs kyi bu la dbang bskur bas:__bdud kyi dpung rnams 'joms pa'i dbang thob shog:__'khor lo rin chen gser gyi rtsibs stong ldan:__rgyal po chen po gar 'gro kha lo bsgyur:__skal ldan rigs kyi bu la dbang bskur bas:__srid pa'i 'khor lo rgyun gcod dbang thob shog:__nor bu rin chen mchod pas dgos 'dod 'byung :__rgyal po chen po'i bsod nams dbang thang rdzogs:__skal ldan rigs kyi bu la dbang bskur bas:__bkres skom rgyun chad phun sum tshogs dbang thob shog:__rta mchog rin chen rtsal ldan sprin shugs can:__rgyal po chen po'i rdzu 'phrul rta yi chibs:__skal ldan rigs kyi bu la dbang bskur bas:__sangs rgyas sa la phyin pa'i dbang thob shog:__glang po rin chen rtsal dang stobs bcur ldan:__rgyal po chen po'i dmag gi dpung 'degs pa'i:__skal ldan rigs kyi bu la dbang bskur bas:__thams cad mkhyen par 'gro ba'i dbang thob shog:__ces rin chen brgyad kyi gzugs bris la gtad do:__de ltar dbang bskur nas khrus byas te sgrib pa sbyang na sngags kyi sham bur che ge mo'i nyon mongs pa'i sgrib pa dang :__las kyi sgrib pa dang :__rnam par smin pa'i sgrib pa dang :__shes bya'i sgrib pa dang :__sgrib pa thams cad dag cing mi gnas par gyur cig:__ces tshig tu brjod pas sgrib pa thams cad dkar sangs la dag par bsam mo:__nad pa yin na/__rlung mkhris bad kan 'dus pa'i nad thams cad dag par gyur cig:__gdon dang bar gcod thams cad zhi bar gyur cig:__lus kyi na tsha sems kyi sdug bsngal thams cad dag par gyur cig:__zhi bar gyur cig:__stong par gyur cig:__ces brjod cing bkru'o:__mi gtsang bas zin na:__nyams pa can gyi grib phog pa:__mi gtsang ba'i 'go mtshan phog pa:__nad dang rigs dang mdze'i rlangs pa phog pa:__mi gtsang bas lha dang srung ma gyer ba:__chos skyong srung ma mi dgyes pa:__dag par gyur cig:__zhi bar gyur cig:__stong par gyur cig:__ces brjod la khrus bya'o:__mjug ni don ni:__bum pa'i ye shes pa gshegs:__dam tshig sems dpa' chu lhag mar zhu:__rang lhar bsgoms la:__mi dmigs par rgyas gdab bo:__slob dpon pad+ma 'byung gnas kyis:__nad dang gdon dang :__nyams grib bsal ba'i don du mdzad pa:__thugs rje chen po'i bum khrus kyi cho ga'o:_a+thi+-i__rdzogs so:__dge'o//__//

Footnotes

Other Information