JKW-KABAB-08-NYA-008

Previous Text Back to Volume PageNext Text

ཟབ་ལམ་བླ་མའི་ཐུགས་སྒྲུབ་ཡིད་བཞིན་ནོར་བུ་སྐུ་གསུམ་འོད་ཀྱི་སྙིང་པོའི་ཕྲིན་ལས་གཏེར་གཞུང་ལས་ཁོལ་དུ་ཕྱུང་བ།

Wylie title	zab lam bla ma'i thugs sgrub yid bzhin nor bu sku gsum 'od kyi snying po'i phrin las gter gzhung las khol du phyung ba
Location	mkhyen brtse'i bka' babs Volume 8, Text 8, Pages 193-211 (Folios 1a to 10a6)
Author	ཕུན་ཚོགས་རྣམ་རྒྱལ་
Less details More details
Tertön	དྲི་མེད་ཀུན་དགའ་, འཇམ་དབྱངས་མཁྱེན་བརྩེའི་དབང་པོ་ (dri med kun dga', 'jam dbyangs mkhyen brtse'i dbang po)
Citation	Phun tshogs rnam rgyal. zab lam bla ma'i thugs sgrub yid bzhin nor bu sku gsum 'od kyi snying po'i phrin las gter gzhung las khol du phyung ba. In Rdzong sar 'jam dbyangs mkhyen brtse'i dbang po'i bka' babs, Vol. 8: 193-211. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Revelations - gter ma  ·  Sadhanas - Evocation Ritual - sgrub thabs
Cycle	ཟབ་ལམ་བླ་མའི་ཐུགས་སྒྲུབ་ཡིད་བཞིན་ནོར་བུ་ (zab lam bla ma'i thugs sgrub yid bzhin nor bu)
Karchag page	JKW-KABAB-Volume-08-NYA-Karchag
Colophon	ཞེས་པའང་ལས་དང་པོ་པས་དཔེ་ཆ་ཚོལ་བདེའི་ཆེད་ཕུན་ཚོགས་རྣམ་རྒྱལ་པས་གཏེར་གཞུང་ལས་ཁོལ་ཕྱུང་བགྱིས་པའོ།།
	zhes pa'ang las dang po pas dpe cha tshol bde'i ched phun tshogs rnam rgyal pas gter gzhung las khol phyung bgyis pa'o

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །ཟབ་ལམ་བླ་མའི་ཐུགས་སྒྲུབ་ཡིད་བཞིན་ནོར་བུ་སྐུ་གསུམ་འོད་ཀྱི་སྙིང་པོའི་ཕྲིན་ལས་གཏེར་གཞུང་ལས་ཁོལ་དུ་ཕྱུང་བ་བཞུགས་སོ།། །མ་འོངས་ང་ཡི་རྗེས་འཇུག་དད་ལྡན་རྣམས༔ པདྨ་བདག་དང་དབྱེར་མེད་སྒྲུབ་འདོད་ན༔ བླ་མ་ལ་གུས་དབང་ཐོབ་དམ་ཚིག་ཅན༔ ངེས་འབྱུང་ཤུགས་བསྐྱེད་ཚེ་འདིའི་གདོས་ཐག་བཅད༔ དབེན་པའི་གནས་སུ་དཀའ་ཐུབ་སྒྲུབ་སྡེ་ཚུགས༔ འདུ་འཛིའི་འབྲེལ་བ་ཐམས་ཅད་རྒྱང་བསྲིངས་ལ༔ སྐུ་གསུང་ཐུགས་རྟེན་སྤྱན་གཟིགས་གང་འབྱོར་དགྲམ༔ བླ་མའི་གཏོར་ཆེན་རིན་ཆེན་འབར་བ་དང་༔ སྨན་རཀ་ཉེར་སྤྱོད་ཚོགས་ཀྱི་འཁོར་ལོ་བཤམ༔ བདེ་བའི་སྟན་འདུག་ཉམས་ལེན་གནད་དུ་བསྣུན༔ ས་མ་ཡ༔ དེ་ལ་སྔོན་དངོས་རྗེས་གསུམ་ལས་དང་པོ་སྔོན་འགྲོ་ལ་མཚམས་བཅད། ཚོགས་བསག །བྱིན་དབབ་གསུམ་ལས། དང་པོ་ཕྱི་མཚམས་བཅད་པ་ནི། ཨོཾ་ཧྲཱིཿབཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ྄ཿ རང་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་པའི་མེ་ལྟར་འབར་བར་གྱུར་པར་བསམས་ལ། གཏོར་མ་རྟ་སྔགས་ཀྱིས་བསང༌། སྭ་བྷཱ་ཝས་སྦྱང༌། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧོཿས་བརླབ། ཧཱུྃ༔ བདག་ཉིད་ལྷ་ཡི་ཐུགས་ཀ་ནས༔ དཀར་སེར་དམར་ལྗང་ཧཱུྃ་ཆེན་བཞི༔ འཕྲོ་འདུས་འོད་དུ་ཞུ་བ་ལས༔ ཡེ་ཤེས་རྒྱལ་པོ་བཞི་རུ་གྱུར༔ ཨོཾ་ཛྙཱ་ན་རཱ་ཛ་ས་མ་ཡེ་སྭཱ་ཧཱ༔ ཧཱུྃ༔ རི་རྒྱལ་ལྷུན་པོའི་ཤར་ཕྱོགས་སུ༔ ཕོ་བྲང་ཆེན་པོ་སྤོས་ངད་ལྡན༔ ཟབ་ཅིང་རྒྱ་ཆེ་གཟིགས་པ་པོ༔ རྒྱལ་པོ་ཆེན་པོ་ཡུལ་འཁོར་སྲུང་༔ སྐུ་མདོག་དཀར་པོ་པི་ཝཾ་བསྣམས༔ བཙུན་མོ་སྲས་དང་བློན་པོར་བཅས༔ འཁོར་ནི་དྲི་ཟ་འབུམ་གྱིས་བསྐོར༔ སྡེ་བོ་ཆེ་ལ་སྟོབས་པོ་ཆེ༔ མཆོད་གཏོར་འདི་བཞེས་ཤར་ཕྱོགས་ཀྱི༔ གདོན་རྣམས་བཟློག་ཅིང་ཕྱི་མཚམས་སྲུངས༔ ཧཱུྃ༔ རི་རྒྱལ་ལྷུན་པོའི་ལྷོ་ཕྱོགས་སུ༔ ཕོ་བྲང་ཆེན་པོ་བཻཌཱུརྻ༔ ཟབ་ཅིང་རྒྱ་ཆེ༴ རྒྱལ་པོ་ཆེན་པོ་འཕགས་སྐྱེས་པོ༔ སྐུ་མདོག་སེར་པོ་རལ་གྲི་འཛིན༔ བཙུན་མོ་སྲས༴ འཁོར་ནི་གྲུལ་བུམ་འབུམ་གྱིས་བསྐོར༔ སྡེ་བོ་ཆེ་ལ༴ མཆོད་གཏོར་འདི་བཞེས་ལྷོ་ཕྱོགས་ཀྱི༔ གདོན་རྣམས་བཟློག་ཅིང་ཕྱི་མཚམས་སྲུངས༔ ཧཱུྃ༔ རི་རྒྱལ་ལྷུན་པོའི་ནུབ་ཕྱོགས་སུ༔ ཕོ་བྲང་ཆེན་པོ་རྒྱ་མཚོའི་དཔལ༔ ཟབ་ཅིང་རྒྱ་ཆེ༴ རྒྱལ་པོ་ཆེན་པོ་སྤྱན་མི་བཟང་༔ སྐུ་མདོག་དམར་པོ་སྦྲུལ་ཞགས་འཛིན༔ བཙུན་མོ་སྲས༴ འཁོར་ནི་ཀླུ་དབང་འབུམ་གྱིས་བསྐོར༔ སྡེ་བོ་ཆེ༴ མཆོད་གཏོར་འདི་བཞེས་ནུབ་ཕྱོགས་ཀྱི༔ གདོན་རྣམས་བཟློག་ཅིང་ཕྱི་མཚམས་སྲུང་༔ ཧཱུྃ༔ རི་རྒྱལ་ལྷུན་པོའི་བྱང་ཕྱོགས་སུ༔ ཕོ་བྲང་ཆེན་པོ་ལྕང་ལོ་ཅན༔ ཟབ་ཅིང་རྒྱ་ཆེ་གཟིགས་པ་པོ༔ རྒྱལ་པོ་ཆེན་པོ་རྣམ་ཐོས་སྲས༔ སྐུ་མདོག་ལྗང་གུ་རྒྱལ་མཚན་འཛིན༔ བཙུན་མོ་སྲས་དང་བློན་པོར་བཅས༔ འཁོར་ནི་གནོད་སྦྱིན་འབུམ་གྱིས་བསྐོར༔ སྡེ་བོ་ཆེ་ལ་སྟོབས་པོ་ཆེ༔ མཆོད་གཏོར་འདི་བཞེས་བྱང་ཕྱོགས་ཀྱི༔ གདོན་རྣམས་བཟློག་ཅིང་ཕྱི་མཚམས་སྲུང་༔ ཧཱུྃ༔ རྒྱལ་པོ་ཆེན་པོ་སྡེ་བཞི་པོ༔ དོན་ལ་སངས་རྒྱས་ཡིན་མོད་ཀྱང་༔ གསང་སྔགས་བསྟན་པ་སྲུང་བའི་ཕྱིར༔ བར་ཆད་འདུལ་བར་མཛད་དུ་གསོལ༔ ཨོཾ་དྷྲྀཥྟ་རཱཥྟཱ་ཡ་སྭཱ་ཧཱ༔ ཨོཾ་བཻ་རཱུ་ཌྷ་ཀཱ་ཡ་སྭཱ་ཧཱ༔ ཨོཾ་བི་རུ་པཱཀྵ་ཡ་སྭཱ་ཧཱ༔ ཨོཾ་བཻ་ཤྲ་མ་ཎཱ་ཡ་སྭཱ་ཧཱ༔ ཨི་དཾ་བ་ལིནྟ་ཁཱ་ཧི༔ འཁོར་དང་བཅས་པ་ལ་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་ཕུལ་བས༔ བདག་ཅག་དཔོན་སློབ་འཁོར་དང་བཅས་པ་རྣམས་བྱང་ཆུབ་སྙིང་པོ་མ་ཐོབ་ཀྱི་བར་དུ༔ རྐྱེན་ཕྱི་ཡི་བར་ཆད་ནང་དུ་མི་གཏོང་ཞིང་༔ ནང་གི་དངོས་གྲུབ་ཕྱིར་མི་འཆོར་བའི་ཕྲིན་ལས་མཛད་དུ་གསོལ༔ ནང་མཚམས་དབང་ཆེན་ལྷར་བསྒོམས་ལཿ ཧཱུྃ་ཧྲཱིཿ ང་ནི་མཉམ་ཉིད་ངང་གིས་ཁྲོས་པ་ལས༔ ཐུགས་རྗེའི་རང་རྩལ་རྟ་མཆོག་དཔལ་གྱི་སྐུའི༔ རྡོ་རྗེའི་འདུ་འཕྲོ་ཁྲོ་བོའི་སྤྲིན་ཕུང་གིས༔ ལོག་འདྲེན་བགེགས་ཀྱི་སྦྱོར་བ་མཚམས་བཅད་དོ༔ ཨོཾ་ཧྲཱིཿཔདྨ་ཀྲོ་དྷ་ཧེ་རུ་ཀ་ཧཱུྃ་ཧཱུྃ་ཧཱུྃ་སརྦ་བིགྷཱན་ཨུཙྪཱ་ཊ་ཡ་ཕཊ༔ ཧཱུྃ་ཧཱུྃ་ཧཱུྃཿ གསང་བ་དོན་གྱི་མཚམས་བཅད་ནི༔ ཧཱུྃ༔ ཕྱི་ནང་བར་ཆད་རྣམ་པར་རྟོག་པ་སྟེ༔ རྟོག་པའི་རང་བཞིན་གདོད་ནས་སྟོང་པ་ཉིད༔ འོད་གསལ་རྡོ་རྗེའི་སྲུང་མཚམས་ལྷུན་གྱིས་གྲུབ༔ གཟུང་འཛིན་བགེགས་ཚོགས་འཇུག་པའི་སྐབས་མེད་དོ༔ བཛྲ་ཛྙཱ་ན་ཤུདྡྷེ་ཨཱ༔ གཉིས་པ་ཚོགས་བསགས་ལས་རིམ་ལ༔ དང་པོ་སྐྱབས་སུ་འགྲོ་བ་ནི༔ ན་མོ༔ བདག་དང་མཁའ་མཉམ་སེམས་ཀུན༔ དུས་འདི་ནས་བཟུང་བྱང་ཆུབ་བར༔ བླ་མ་སྐུ་གསུམ་འདུས་པའི་ལྷར༔ རྩེ་གཅིག་གུས་པས་སྐྱབས་སུ་མཆི༔ སྨོན་འཇུག་སེམས་མཆོག་བསྐྱེད་པ་ནི༔ ཧོཿ མ་གྱུར་འགྲོ་བ་ཐམས་ཅད་ཀུན༔ སངས་རྒྱས་གོ་འཕང་ཐོབ་བྱའི་ཕྱིར༔ སྐུ་གསུམ་བླ་མའི་དཀྱིལ་འཁོར་དུ༔ རིག་འཛིན་བསྒྲུབ་པར་སེམས་བསྐྱེད་དོ༔ ཡན་ལག་བཅུ་ཡིས་བསགས་སྦྱང་ནི༔ ཧོཿ བླ་མ་སྐུ་གསུམ་ལྷ་ཚོགས་རྣམས༔ ཡེ་ཤེས་དབྱིངས་ནས་གནས་འདིར་གཤེགས༔ ཉི་ཟླ་པད་སྟེང་དགྱེས་པར་བཞུགས༔ སྒོ་གསུམ་གུས་པས་ཕྱག་འཚལ་ལོ༔ ལུས་དང་ལོངས་སྤྱོད་མཆོད་སྤྲིན་འབུལ༔ ཐོག་མེད་འཁོར་བའི་སྡིག་ལྟུང་བཤགས༔ བསོད་ནམས་ཀུན་ལ་རྗེས་ཡི་རང་༔ མྱ་ངན་མི་འདའ་རྟག་བཞུགས་ནས༔ ཆོས་ཀྱི་འཁོར་ལོ་བསྐོར་བར་གསོལ༔ དགེ་ཚོགས་འདུས་མ་བྱས་པར་བསྔོ༔ འོད་གསལ་སྙིང་པོའི་དོན་རྟོགས་ཤོག༔ གསུམ་པ་བྱིན་ཆེན་དབབ་པ་ནི༔ སྤོས་རོལ་དང་བཅས་གདུང་ཤུགས་བསྐྱེད༔ ཧཱུྃ་ཧྲཱི༔ ནམ་མཁའི་མཐའ་དང་མཉམ་པའི་ཞིང་ཁམས་ནས༔ སྐུ་གསུམ་བླ་མའི་ལྷ་ཚོགས་ཐུགས་དམ་ཅན༔ མོས་ཤིང་གདུང་བས་རྩེ་གཅིག་རྒྱུད་བསྐུལ་ན༔ གློག་ལྟར་མྱུར་བའི་ཐུགས་རྗེས་གནས་འདིར་གཤེགས༔ རྣལ་འབྱོར་རྒྱུད་ལ་བདེ་ཆེན་གཟི་བྱིན་སྐྱེད༔ སྒྲུབ་པའི་གནས་མཆོག་འོག་མིན་ཞིང་དུ་སྒྱུར༔ སྒྲུབ་རྫས་མཆོད་ཚོགས་ཡེ་ཤེས་དབྱིངས་ཀྱི་རྒྱན༔ ཀུན་བཟང་རྣམ་འཕྲུལ་ཆེན་པོར་བྱིན་ཕོབ་ཅིག༔ ཨོཾ་ཨཱཿཧཱུྃ་བཛྲ་གུ་རུ་དྷརྨ་ཀཱ་ཡ༔ སཾ་བྷོ་ཀ་ཡ༔ ནིརྨ་ཀཱ་ཡ༔ ཛྙཱ་ན་ཨཱ་བེ་ཤ་ཡ་ཨ་ཨཱ༔ ཨོཾ་བཛྲ་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བི་དྱ་ཤཔྡ་མ་ཧཱ་པཱུ་ཛ་ཨཱཿཧཱུྃ༔ ཨོཾ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ༔ ཨོཾ་མ་ཧཱ་རཀྟ་ཧཱུྃ་ཧྲཱིཿཋ༔ ཨོཾ་མ་ཧཱ་བ་ལིཾ་ཏ་ཧཱུྃ་ཧྲཱིཿཋ༔ བཛྲ་ས་མནྟ་བྷ་དྲ་པཱུ་ཛ་མེ་གྷ་སྥ་ར་ཎ་ཁཱཾ༔ སྒྲུབ་པ་པོ་ཡི་རྒྱུད་འགྱུར་ཅིང་༔ གནས་དང་ཡོ་བྱད་བྱིན་འོད་ཆགས༔ དེ་ཚེ་ཡེ་ཤེས་ཕེབས་པའི་རྟགས༔ མོས་གུས་བསྐྱེད་ཅིང་དགོངས་པ་བསྐྱང་༔ དངོས་གཞིའི་ཕྲིན་ལས་རིམ་པ་ལཿ ལྷ་བསྐྱེད་ཛབ྄་བཟླས་ཐུན་མཚམས་བྱ༔ དང་པོ་སྣང་སྲིད་གཞིར་བཞེངས་ཀྱི༔ བླ་མའི་དཀྱིལ་འཁོར་བཀོད་པ་ནི༔ ཧཱུྃ་ཧྲཱིཿ ཆོས་སྐུ་མི་འགྱུར་སྟོང་ཉིད་རྡོ་རྗེའི་ངང་༔ ལོངས་སྤྱོད་ཡོངས་རྫོགས་དམིགས་མེད་སྙིང་རྗེའི་སྤྲིན༔ རྒྱུ་ཡི་ས་བོན་ཧཱུྃ་ཡིག་མཐིང་གསལ་མདངས༔ ནམ་མཁའི་དབྱིངས་སུ་སྐར་ཆེན་བཞིན་དུ་ཤར༔ དེ་ལས་འོད་འཕྲོས་སྣོད་བཅུད་དངོས་ཀུན་སྦྱངས༔ སྟོང་པའི་ངང་ལས་འབྱུང་བ་རིམ་བརྩེགས་དང་༔ རི་རབ་པདྨ་སྣ་ཚོགས་རྡོ་རྗེའི་སྟེང་༔ མི་ཕྱེད་སྲུང་བའི་འཁོར་ལོ་གསལ་ཞིང་བརྟན༔ དེ་དབུས་བྷྲཱུྃ་ལས་རིན་ཆེན་ཕོ་བྲང་ཆེ༔ གྲུ་བཞི་སྒོ་བཞི་རྟ་བབས་རྒྱན་བཀོད་རྫོགས༔ ཡེ་ཤེས་སྒྱུ་མའི་བཀོད་པ་བསམ་ཡས་པར༔ རཏྣ་ཟུར་བརྒྱད་འདབ་བཞིའི་པདྨའི་དབུས༔ ཆུ་སྐྱེས་གེ་སར་ཉི་ཟླའི་དཀྱིལ་འཁོར་སྟེང་༔ རིག་རྩལ་ཧཱུྃ་བབས་རྡོ་རྗེ་ཧཱུྃ་གིས་མཚན༔ འོད་ཟེར་འཕྲོ་འདུས་སྟོབས་བཅུའི་གཟི་བྱིན་འབར༔ མཐིང་གསལ་ཐིག་ལེ་ཡོངས་གྱུར་སྐད་ཅིག་གིས༔ ཀུན་བཟང་ཆོས་སྐུ་བླ་མ་རྡོ་རྗེ་འཆང་༔ ནམ་མཁའི་མདངས་ཅན་ཁྲོ་འཛུམ་བརྗིད་པའི་སྐུ༔ རྡོ་རྗེ་དྲིལ་འཛིན་རང་འོད་ཡུམ་ལ་འཁྱུད༔ དར་དང་རིན་ཆེན་རུས་པའི་ཕྱག་རྒྱས་སྤྲས༔ ཞབས་གཉིས་རྡོ་རྗེ་པདྨའི་སྐྱིལ་ཀྲུང་གིས༔ ཡེ་ཤེས་འོད་ལྔ་འཕྲོ་བའི་ཀློང་དཀྱིལ་དུ༔ རིགས་རྣམས་ཀུན་གྱི་ཁྱབ་བདག་ཆེན་པོར་བཞེངས༔ ཧཱུྃ་ཧྲཱིཿ དབུས་དང་མདུན་སོགས་ཕྱོགས་བཞིའི་འདབ་མ་ལ༔ བདེ་ཆེན་ལོངས་སྤྱོད་ཡོངས་རྫོགས་ཐོད་ཕྲེང་རྩལ༔ དཀར་མཐིང་སེར་དམར་ལྗང་གུའི་མདངས་འོད་འཚེར༔ ཕྱག་གཡས་སོ་སོའི་རིགས་ཀྱི་ཕྱག་མཚན་གདེངས༔ གཡོན་པས་ཤེས་རབ་དྲིལ་བུ་དཀུ་ལ་བརྟེན༔ གསང་གོས་ཕོད་ཀ་པདྨའི་སྙན་ཞུ་གསོལ༔ དར་དཔྱངས་རིན་ཆེན་རུས་རྒྱན་རབ་ཏུ་བརྗིད༔ ཞི་ཆགས་ཁྲོ་ཞིང་འཛུམ་པའི་ངང་ཚུལ་ཅན༔ རང་འདྲའི་ཡུམ་རྣམ་གཉིས་མེད་དགྱེས་པས་འཁྱུད༔ པདྨ་ཉི་ཟླའི་གདན་ལ་སྐྱིལ་ཀྲུང་བཞུགས༔ སོ་སོའི་ཐུགས་ཀར་ཚེ་བདག་རིགས་མཆོག་ལྔ༔ ཡབ་ཡུམ་མཉམ་སྦྱོར་འོད་སྐུར་ལམ་མེར་གསལ༔ ཧཱུྃ་ཧྲཱིཿ དེ་ཡི་ཕྱི་རིམ་རིན་ཆེན་ཟུར་བརྒྱད་ལ༔ པད་ཉི་ཟླ་སྟེང་འོད་ལྔའི་གུར་ཁང་དབུས༔ སྤྲུལ་པའི་སྐུར་སྣང་རྡོ་རྗེའི་མཚན་མཆོག་བརྒྱད༔ ཤར་དུ་ཀུན་འདུས་གུ་རུ་པདྨ་འབྱུང་༔ མཐིང་མདོག་རྡོ་རྗེ་དྲིལ་འཛིན་ཡུམ་དང་འཁྱུད༔ ལྷོ་རུ་སྐུ་ཡི་གུ་རུ་སཾ་བྷ་བ༔ དཀར་གསལ་པད་ཕོར་སྐྱབས་སྦྱིན་རབ་བྱུང་ཆས༔ ནུབ་ཏུ་གསུང་གི་གུ་རུ་པདྨའི་རྒྱལ༔ དམར་སྨུག་ཌཱ་རུ་མེ་ལོང་འཁོར་ལོས་སྒྱུར༔ བྱང་དུ་ཐུགས་ཀྱི་གུ་རུ་སེང་གེའི་སྒྲ༔ མཐིང་ནག་རྡོ་རྗེ་སྡིགས་མཛུབ་ཁྲོ་ཆས་རྫོགས༔ ཤར་ལྷོར་ཡོན་ཏན་གུ་རུ་ཤཱཀྱ་སེང་༔ གསེར་མདོག་ས་གནོན་མཉམ་བཞག་སྤྲུལ་སྐུའི་ཚུལ༔ ལྷོ་ནུབ་ཕྲིན་ལས་གུ་རུ་ཉི་མ་འོད༔ སེར་གསལ་ཁ་ཊཱྃ་ཉི་ཟེར་རྣལ་འབྱོར་སྤྱོད༔ ནུབ་བྱང་རིག་རྩལ་གུ་རུ་བློ་ལྡན་མཆོག༔ དཀར་དམར་ཌཱ་རུ་པད་ཕོར་དར་ཕོད་གསོལ༔ བྱང་ཤར་སྟོབས་ཀྱི་གུ་རུ་གྲོ་བོ་ལོད༔ དམར་ནག་རྡོ་རྗེ་ཕུར་འཛིན་འཆོལ་བའི་ཆས༔ ཀུན་ཀྱང་ཞི་ཆགས་འབར་བའི་ཉམས་འགྱུར་རྫོགས༔ རང་འདྲའི་སྤྲུལ་པ་ཉི་ཟེར་རྡུལ་ལྟར་འཕྲོ༔ སོ་སོའི་ཐུགས་ཀར་མཆོག་གི་རིག་འཛིན་བརྒྱད༔ མཐིང་མདོག་བདེ་སྟོང་ཌཱ་རུ་ཐོད་ཆང་བསྣམས༔ རིན་ཆེན་རུས་བརྒྱན་དར་ཕོད་བརྗིད་པར་གསོལ༔ ཡེ་ཤེས་འོད་ཟེར་འཕྲོ་བའི་ཀློང་ན་གསལ༔ ཧཱུྃ་ཧྲཱི༔ ཕྱི་རོལ་སྒོ་བཞིར་པད་ཉི་བམ་རོའི་སྟེང་༔ རྡོ་རྗེ་རིན་ཆེན་པདྨ་ལས་ཀྱི་རིགས༔ དཔའ་བོ་མཁའ་འགྲོ་ཡབ་ཡུམ་མཉམ་པར་སྦྱོར༔ མཐིང་སེར་དམར་ལྗང་གྲི་གུག་ཐོད་ཁྲག་བསྣམས༔ ཞི་རྒྱས་དབང་དྲག་འབར་བའི་ཉམས་འགྱུར་ཅན༔ རིན་ཆེན་རུས་རྒྱན་དར་དཔྱང་སྟག་ཤམ་གསོལ༔ ཞབས་གཉིས་འདོར་སྟབས་འོད་ཕུང་ཀློང་ན་རོལ༔ གཞན་ཡང་བདག་སྐྱོབ་ལྷ་དང་རིག་འཛིན་ཚོགས༔ སྣང་སྟོང་ཟུང་འཇུག་ཆུ་ཟླ་འཇའ་ཚོན་ལྟར༔ བྱིན་རླབས་དངོས་གྲུབ་ཕྲིན་ལས་དབང་སྒྱུར་བའི༔ སྣང་སྲྀད་གཞིར་བཞེངས་དཀྱིལ་འཁོར་ཆེན་པོར་གསལ༔ རྡོ་རྗེ་གསུམ་གྱི་ཕྱག་རྒྱས་བྱིན་བརླབས་ཤིང་༔ རང་བྱུང་དབང་ཐོབ་རིགས་ལྔའི་ཅོད་པན་རྫོགས༔ བདེ་ཆེན་རོལ་པ་ལྕགས་ཀྱུའི་འོད་ཟེར་གྱིས༔ མཁའ་ཁྱབ་ཡེ་ཤེས་དཀྱིལ་འཁོར་སྤྱན་དྲངས་ཐིམ༔ གདུང་ཤུགས་དྲག་པོས་སྤྱན་འདྲེན་པ་ནི། ཧཱུྃ་ཧྲཱི༔ ཀ་དག་སྔོན་གྱི་བསྐལ་པ་དང་པོ་ལ༔ ལྷུན་གྲུབ་རིག་པ་ཡེ་ཤེས་སྤྲིན་བཀོད་དེ༔ སྐུ་གསུམ་དབྱེར་མེད་ཆོ་འཕྲུལ་ཅིར་ཡང་སྟོན༔ ཁྱབ་བདག་པདྨ་ཐོད་ཕྲེང་སྐུར་བཞེངས་ཤིག༔ ཧཱུྃ་ཧྲཱི༔ འོག་མིན་ཆོས་དབྱིངས་སྤྲོས་བྲལ་ཕོ་བྲང་ནས༔ ཆོས་སྐུ་ཀུན་ཏུ་འཆང་བ་གཤེགས་སུ་གསོལ༔ སྟུག་པོ་བཀོད་སོགས་དག་པའི་ཞིང་མཆོག་ནས༔ ལོངས་སྐུ་ཐོད་ཕྲེང་རིགས་ལྔ་གཤེགས་སུ་གསོལ༔ མི་མཇེད་འཛམ་གླིང་བྱེ་བ་ཕྲག་བརྒྱ་ནས༔ སྤྲུལ་པའི་གུ་རུ་མཚན་བརྒྱད་གཤེགས་སུ་གསོལ༔ གནས་ཡུལ་དུར་ཁྲོད་དྲག་པོའི་ཕོ་བྲང་ནས༔ འབུམ་ཕྲག་དཔའ་བོ་མཁའ་འགྲོ་གཤེགས་སུ་གསོལ༔ གཞན་ཡང་ཕྱོགས་བཅུའི་ཞིང་ཁམས་རབ་འབྱམས་ནས༔ རྩ་གསུམ་ཆོས་སྲུང་རྒྱ་མཚོ་གཤེགས་སུ་གསོལ༔ སྒྲུབ་པའི་གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་རྣལ་འབྱོར་རྒྱུད་ལ་དབང་བཞི་སྐུར༔ བགེགས་དང་ལོག་འདྲེན་བདུད་བཞིའི་བར་ཆད་སོལ༔ མཆོག་དང་ཐུན་མོང་དངོས་གྲུབ་མ་ལུས་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷརྨ་ཀཱ་ཡ༔ སཾ་བྷོ་ཀཱ་ཡ༔ ནིརྨ་ཀཱ་ཡ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་ཛཿསིདྡྷི་ཕ་ལ་ཧཱུྃ་ཨཱཿ དགྱེས་ཤིང་བརྟན་པར་བཞུགས་སུ་གསོལ༔ ཧཱུྃ་ཧྲཱི༔ སྐུ་གསུམ་བླ་མའི་དཀྱིལ་འཁོར་ལྷ་ཚོགས་རྣམས༔ ཐུགས་རྗེའི་དབང་གིས་གནས་འདིར་བྱོན་པ་ལེགས༔ རིན་ཆེན་མཛེས་ཁྲི་པདྨ་ཉི་ཟླའི་སྟེང་༔ དགྱེས་པར་བཞུགས་ནས་དབང་དང་དངོས་གྲུབ་སྩོལ༔ ཛཿཧཱུྃ་བྃ་ཧོ༔ ས་མ་ཡ་ཏིཥྛ་ལྷན༔ ཕྱག་མཆོད་བསྟོད་པས་བྱིན་རླབས་བསྐུལ༔ ཧཱུྃ་ཧྲཱིཿ སྐྱེ་འགག་འགྱུར་མེད་ཆོས་སྐུའི་སྙིང་པོ་ལས༔ སྐུ་གསུང་ཐུགས་ཡོན་ཕྲིན་ལས་ལོངས་སྤྱོད་རྫོགས༔ ཡིད་བཞིན་དངོས་གྲུབ་ཆར་འབེབས་སྤྲུལ་པའི་སྐུ༔ རིག་འཛིན་བླ་མའི་ཚོགས་ལ་ཕྱག་འཚལ་ལོ༔ ཨ་ཏི་པུ་ཧོ༔ པྲ་ཏཱིཙྪ་ཧོ༔ ཧཱུྃ་ཧྲཱི༔ བླ་མ་སྐུ་གསུམ་དཀྱིལ་འཁོར་ལྷ་ཚོགས་ལ༔ དངོས་སུ་འབྱོར་བཤམས་ཡིད་ཀྱིས་རྣམ་སྤྲུལ་པའི༔ ལྷ་རྫས་ལས་གྲུབ་ཉེར་སྤྱོད་འདོད་ཡོན་སོགས༔ ཀུན་བཟང་རྣམ་འཕྲུལ་ཕྱི་ཡི་མཆོད་པར་འབུལ༔ རང་བྱུང་ལྷུན་གྲུབ་དབང་པོའི་མེ་ཏོག་སོགས༔ དྲག་པོའི་ལོངས་སྤྱོད་ནང་གི་མཆོད་པར་འབུལ༔ བདེ་སྟོང་མཉམ་སྦྱོར་རྟོག་ཚོགས་དབྱིངས་སུ་བསྒྲལ༔ གཉིས་མེད་རིག་པ་གསང་བའི་མཆོད་པར་འབུལ༔ སྐུ་ལྔ་ཡེ་ཤེས་ལྔ་རྫོགས་གྲུབ་པའི་རྫས༔ རྩ་བརྒྱད་སྟོང་སྦྱར་སྨན་གྱི་མཆོད་པར་འབུལ༔ སྣང་སྲིད་དམར་གྱི་རྒྱ་མཚོ་ཆེན་པོར་བསྐྱིལ༔ ཆགས་བྲལ་བདེ་ཆེན་རཀྟའི་མཆོད་པར་འབུལ༔ སྣོད་བཅུད་འབྱོར་ཚོགས་བཟའ་བཅའ་བཏུང་བའི་རིགས༔ འདོད་འབྱུང་དཔལ་གྱི་གཏོར་མའི་མཆོད་པར་འབུལ༔ ཟག་མེད་བདེ་ཆེན་བསྐྱེད་ཕྱིར་བཞེས་ནས་ཀྱང་༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་དྷརྨ་ཀཱ་ཡ༔ སཾ་བྷོ་ཀཱ་ཡཿནིརྨ་ཀཱ་ཡ་མཎྜ་ལ་ས་པཱ་རི་བཱ་ར་ཨརྒྷཾ་པཱའ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བི་དྱ་ཤཔྡ་པཉྩ་ཀཱ་མ་གུ་ཎ་མ་ཧཱ་པཱུ་ཛ་ཛྙཱ་ན་སུ་ཁ་ཧོ༔ ཨོཾ་སརྦ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཧཱུྃ་ཧྲཱིཿ མ་བཅོས་སྤྲོས་བྲལ་འོད་གསལ་འདུས་མ་བྱས༔ དུས་གསུམ་བདེ་གཤེགས་ཐམས་ཅད་འབྱུང་བའི་གནས༔ སྐུ་དང་ཡེ་ཤེས་ཕྲིན་ལས་བསམ་མི་ཁྱབ༔ པདྨ་ཆོས་ཀྱི་སྐུ་ལ་ཕྱག་འཚལ་བསྟོད༔ ཁ་སྦྱཽར་ཡན་ལག་བདུན་ལྡན་བདེ་ཆེན་དབྱིངས༔ ཕུང་པོ་གནས་འགྱུར་ཉོན་མོངས་རང་སར་གྲོལ༔ མི་ཟད་བཀོད་པ་རྒྱན་གྱི་འཁོར་ལོར་ཤར༔ རིགས་ལྔ་ལོངས་སྤྱོད་རྫོགས་ལ་ཕྱག་འཚལ་བསྟོད༔ མི་མཇེད་ཛམ་གླིང་བྱེ་བ་ཕྲག་བརྒྱ་རུ༔ པད་སྡོང་ལས་འཁྲུངས་རྒྱལ་སྲས་རིག་པ་འཛིན༔ གང་འདུལ་སྒྱུ་འཕྲུལ་དྲྭ་བའི་གར་མཛད་པ༔ སྤྲུལ་པའི་མཚན་མཆོག་བརྒྱད་ལ་ཕྱག་འཚལ་བསྟོད༔ གནས་ཡུལ་དུར་ཁྲོད་རབ་འཇིགས་ཞིང་རྣམས་སུ༔ བདེ་སྟོང་རོལ་པའི་རྟགས་ཀྱི་ཕྱག་རྒྱ་འཆང་༔ འབུམ་ཕྲག་ཡངས་པའི་མཁའ་འགྲོའི་སྤྲིན་ཕུང་འཕྲོ༔ དཔའ་བོ་མཁའ་འགྲོའི་ཚོགས་ལ་ཕྱག་འཚལ་བསྟོད༔ གཞན་ཡང་བདག་སྐྱོབ་ལྷ་དང་རིག་པ་འཛིན༔ རྩ་གསུམ་ཆོས་སྲུང་རྒྱ་མཚོའི་སྐུར་སྟོན་པ༔ ཡེ་ཤེས་དམ་ཚིག་ཐུགས་རྗེས་མངོན་བཞུགས་པའི༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ ཅེས་བསྟོད་ལྷ་སྐུའི་གསལ་སྣང་ལ༔ ཡིད་མིག་རླུང་གསུམ་རྩེ་གཅིག་གཏད༔ བྱིང་རྒོད་རྙོག་མས་མ་བསླད་པའི༔ ཏིང་འཛིན་གྱད་དུ་འགྱུར་ལ་བསླབ༔ གཉིས་པ་ཛབ྄་གྱི་དགོངས་པ་ལ༔ ཐོག་མར་རྩ་བའི་བསྙེན་པ་ནི༔ དཀྱིལ་འཁོར་གཙོ་བོའི་ཐུགས་ཀར་པད་ཟླའི་སྟེང༔ ཡེ་ཤེས་སེམས་དཔའ་ཁྱབ་བདག་ཀུན་ཏུ་བཟང་༔ མཐིང་གསལ་མཉམ་བཞག་བཟང་མོ་ཡུམ་དང་འཁྲིལ༔ དེའི་ཐུགས་ཀར་རིན་ཆེན་ཟུར་བརྒྱད་དབུས༔ རྡོ་རྗེ་རྩེ་ལྔའི་ལྟེ་བར་ཧཱུྃ་ཡིག་མཐར༔ རང་བྱུང་རིག་པ་སྔགས་ཀྱི་ཕྲེང་བས་བསྐོར༔ བཟླས་པས་འོད་ཟེར་མཁའ་ཁྱབ་ཀུན་ཏུ་འཕྲོས༔ སྐུ་གསུམ་བླ་མའི་བྱིན་རླབས་ནུས་སྟོབས་ཀུན༔ ཚུར་འདུས་བདག་ཐིམ་ཐུགས་ཡིད་དབྱེར་མེད་འདྲེས༔ ཁྱབ་བདལ་གཉུག་མ་འོད་གསལ་ངང་ནས་བཟླ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ འབུམ་ཕྲག་བཅུ་གཉིས་རྩེ་གཅིག་བཟླས༔ དུས་གསུམ་བླ་མས་བྱིན་གྱིས་རློབ༔ རིག་སྟོང་དོན་གྱི་རང་ཞལ་མཐོང་༔ པདྨ་བདག་དང་སྐལ་བ་མཉམ༔ ཁྱད་པར་སྒྲུབ་པའི་ཛབ྄་དགོངས་ནི༔ ཐོད་ཕྲེང་རིགས་ལྔའི་ཡེ་ཤེས་སེམས་དཔའ་ཡི༔ ཐུགས་ཀར་ཉི་ཟླ་ཁ་སྦྱོར་ས་བོན་མཐར༔ སྔགས་ཕྲེང་འཁོར་བའི་ཟེར་གྱིས་སྣང་སྲིད་ཁྱབ༔ རྒྱལ་བ་མཉེས་མཆོད་འགྲོ་བའི་ལས་སྒྲིབ་སྦྱངས༔ དྲེགས་ཚོགས་དབང་བསྡུས་ཐ་མལ་སྣོད་དང་བཅུད༔ ལྷ་སྔགས་ཆོས་སྐུ་དག་པ་རབ་འབྱམས་ངང་༔ ཚུར་འདུས་བདག་ཐིམ་བདེ་ཆེན་རིག་རྩལ་རྒྱས༔ ཡེ་ཤེས་ལྔ་ལྡན་རྡོ་རྗེའི་སྲོག་འགྲུབ་འགྱུར༔ ཨོཾ་ཨཱཿཧཱུྃ་བུདྡྷ་བཛྲ་རཏྣ་པདྨ་ཀརྨ་ཐོད་ཕྲེང་རྩལ་བཛྲ་ས་མ་ཡ་ཛཿཛཿ ཨཱ་ཡུརྫྙཱ་ན་སརྦ་སིདྡྷི་ཕ་ལ་ཧཱུྃ་ཨཱ༔ འབུམ་ཕྲག་ལྔ་བཟླས་རིགས་ལྔ་ཡི༔ ཚེ་དང་ཡེ་ཤེས་དངོས་གྲུབ་འཐོབ༔ སླར་ཡང་རང་གི་ཐུགས་ནས་འོད་འཕྲོས་པས༔ སྤྲུལ་པའི་གུ་རུ་མཚན་བརྒྱད་ཐུགས་རྒྱུད་བསྐུལ༔ ལྷ་སྔགས་ཕྱག་མཚན་འོད་ཟེར་སྤྲོ་ཞིང་བསྡུས༔ གང་འདུལ་དངོས་སྒྲུབ་རབ་འབྱམས་དབང་དུ་གྱུར༔ ཨོཾ་ཨཱཿཧཱུྃབཛྲ་མ་ཧཱ་གུ་རུ་སརྦ་སིདྡྷི་ཧཱུྃ༔ འབུམ་ཕྲག་བཞི་ཡིས་གང་འདོད་ཀྱི༔ དངོས་གྲུབ་ཡེ་ཤེས་རང་དབང་ཐོབ༔ ཐུན་མོང་ལས་ཀྱི་བཟླས་པ་ནི༔ སྐུ་གསུམ་བླ་མའི་ཡེ་ཤེས་འོད་ཟེར་གྱིས༔ རིགས་བཞི་དཔའ་བོ་མཁའ་འགྲོའི་ཐུགས་རྒྱུད་བསྐུལ༔ འབུམ་ཕྲག་ཡངས་པའི་ཕོ་ཉའི་འཕྲོ་འདུ་ཡིས༔ ཞི་རྒྱས་དབང་དྲག་ཕྲིན་ལས་ལྷུན་གྲུབ་གྱུར༔ ར་ཙ་ཧྲི་ཡ་ཧ་རི་ནི་ས་ཤཱནྟིཾ་པུཥྟིཾ་པ་ཤཾ་མཱ་ར་ཡ་རྦད༔ ཁྲི་ཕྲག་བཞི་ཡིས་ལས་ཀུན་བྱེད༔ གསུམ་པ་ཐུན་མཚམས་འཇུག་པ་ནི༔ མཆོད་ཅིང་བསྟོད་ལ་ཐུགས་དམ་བསྐུལ༔ ཧཱུྃ་ཧྲཱིཿ སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས༔ དུས་གསུམ་རྒྱལ་བ་རྣམས་ཀྱི་གདུང་འཚོབ་པར༔ རིག་འཛིན་དངོས་གྲུབ་སྩོལ་བར་ཞལ་བཞེས་པའི༔ སྐུ་གསུམ་བླ་མའི་ལྷ་ཚོགས་དུས་ལ་བབ༔ ཧཱུྃ་ཧྲཱིཿ འོད་གསལ་སྤྲོས་པ་བྲལ་བའི་ཕོ་བྲང་ནས༔ ཆོས་སྐུའི་བླ་མ་པདྨ་རྡོ་རྗེ་འཆང་༔ དམ་པ་ཁྱེད་ཀྱི་རྗེས་སུ་བདག་སྒྲུབ་ན༔ རང་བྱུང་དོན་གྱི་དངོས་གྲུབ་སྩལ་དུ་གསོལ༔ འོག་མིན་སྟུག་པོ་བཀོད་པའི་ཞིང་ཁམས་ནས༔ ལོངས་སྤྱོད་ཡོངས་རྫོགས་རིགས་ལྔ་ཐོད་ཕྲེང་རྩལ༔ དམ་པ་ཁྱེད་ཀྱི་རྗེས་སུ་བདག་སྒྲུབ་ན༔ ཚེ་དང་ཡེ་ཤེས་མཆོག་གི་དངོས་གྲུབ་སྩོལ༔ མི་མཇེད་ཛམ་གླིང་བྱེ་བ་ཕྲག་བརྒྱ་ནས༔ སྤྲུལ་པའི་སྐུར་སྣང་གུ་རུ་མཚན་མཆོག་བརྒྱད༔ དམ་པ་ཁྱེད་ཀྱི་རྗེས་སུ་བདག་སྒྲུབ་ན༔ འགྲོ་འདུལ་ཕྲིན་ལས་དངོས་གྲུབ་སྩལ་དུ་གསོལ༔ གནས་ཡུལ་དུར་ཁྲོད་བདེ་ཆེན་ཕོ་བྲང་ནས༔ བདེ་སྟོང་ཕོ་ཉ་དཔའ་བོ་མཁའ་འགྲོའི་ཚོགས༔ དམ་པ་ཁྱེད་ཀྱི་རྗེས་སུ་བདག་སྒྲུབ་ན༔ ཞི་རྒྱས་དབང་དྲག་ལས་ཀྱི་དངོས་གྲུབ་སྩོལ༔ སྐུ་གསུམ་རིགས་འདུས་དཀྱིལ་འཁོར་ལྷ་ཚོགས་རྣམས༔ དང་པོར་བསྙེན་ཅིང་བར་དུ་རྩེ་གཅིག་བསྒྲུབས༔ དེང་འདིར་ཐུགས་དམ་བསྐུལ་བའི་དུས་ལགས་ན༔ བྱིན་རླབས་དངོས་གྲུབ་ཆར་ཆེན་དབབ་ཏུ་གསོལ༔ ཕྱི་ནང་གསང་བའི་ལམ་གྱི་བར་ཆད་སོལ༔ བགེགས་དང་ལོག་འདྲེན་འབྱུང་པོ་རྡུལ་དུ་རློག༔ ཚེ་བསོད་དཔལ་འབྱོར་བདེ་ཆེན་ཡེ་ཤེས་སྐྱེད༔ སྒྲུབ་པའི་ལས་ཀྱི་འབྲས་བུ་མཆིས་པར་མཛོད༔ ཨོཾ་ཨཱཿཧཱུྃ་བཛྲ་གུ་རུ་དྷརྨ་ཀཱ་ཡ༔ སམྦྷོ་ཀཱ་ཡ༔ ནིརྨ་ཀཱ་ཡ་དྷཱ་ཀ་དྷཱ་ཀི་ནཱི་སརྦ་མཎྜལ་ཨེ་ཨཱ་རལླི་ཧྲཱིཾ་ཧྲཱིཾ་ཕེཾ་ཕེཾ་ཀཱ་ཡ་ཝཱ་ཀ་ཙིཏྟ་ཛྙཱ་ན་སིདྡྷི་ས་མ་ཡ་ཧོ༔ ཞེས་བསྐུལ་མོས་གུས་རྩེ་གཅིག་བསྐྱེད༔ བྱིན་རླབས་ཉམས་འུར་རྟོགས་པ་སྐྱེ༔ དེ་ཚེ་དཀྱིལ་འཁོར་ལྷ་ཚོགས་དང་༔ དགོངས་པ་དབྱེར་མེད་ལྟ་གདེང་བསྐྱེད༔ ཉམས་མྱོང་ལམ་དུ་བསླང་ཤེས་ན༔ དངོས་གྲུབ་སྐད་ཅིག་འགྲུབ་པར་འགྱུར༔ གསུམ་པ་རྗེས་ཀྱི་ཕྲིན་ལས་རིམ་པ་ལ། ཚོགས་མཆོད་བྱ་ཞིང་གཏོར་མ་བསྐྱང་༔ སྤྱོད་ལམ་ཡེ་ཤེས་རོལ་པར་འཇུག༔ དང་པོ་ཚོགས་ཀྱི་མཆོད་པ་ནི༔ རྡོ་རྗེའི་དམ་ཚིག་རྫས་བཤམས་ལ༔ བདུད་རྩི་བསང་སྦྱང་བྱིན་གྱིས་བརླབ༔ རྃ་ཡྃ་ཁྃ༔ དམ་ཚིག་རྫས་ལ་ཉེས་པའི་སྐྱོན་བྲལ་ཡང་༔ དངོས་འཛིན་རྣམ་རྟོག་བག་ཆགས་སྦྱང་བའི་ཕྱིར༔ ཡེ་ཤེས་མེ་རླུང་ཆུ་ཡིས་བསྲེགས་གཏོར་བཀྲུས༔ སྣོད་བཅུད་འདོད་ཡོན་བདེ་ཆེན་རྒྱན་དུ་ཤར༔ ཨོཾ་ཧཱུྃ་ཏྲཱྃ་ཧྲཱི་ཨཱཿཔཉྩ་ཀཱ་མ་གུ་ཎ་ཛྙཱ་ན་ཨ་མྲྀ་ཏ་ཨོཾ་ཨཱཿཧཱུྃ༔ ཚོགས་ཞིང་སྤྱན་འདྲེན་ནི། ཧཱུྃ་ཧྲཱི༔ བཞེངས་ཤིག་སྐུ་གསུམ་བླ་མའི་དཀྱིལ་འཁོར་ལྷ༔ དཔའ་བོ་མཁའ་འགྲོ་རྒྱ་མཚོའི་ཚོགས་དང་བཅས༔ ལོངས་སྤྱོད་ཚོགས་ཀྱི་འདུ་བར་སྤྱན་འདྲེན་ན༔ ཐུགས་རྗེའི་དབང་གིས་འདིར་གཤེགས་བྱིན་གྱིས་རློབས༔ བཛྲ་ས་མ་ཡ་ཛཿཛཿ ཚོགས་ཕུད་འབུལ་བ་ནི། ཧཱུྃ་ཧྲཱིཿ བཟའ་བཅའ་བཏུང་བ་རྡོ་རྗེའི་དམ་ཚིག་རྫས༔ འདོན་ཡོན་བདེ་ཆེན་ཡེ་ཤེས་རོལ་པའི་རྒྱན༔ སྐུ་གསུམ་བླ་མའི་ལྷ་ཚོགས་མཉེས་ཕྱིར་འབུལ༔ མཆོད་བཞེས་དམ་སྐོང་བྱིན་རླབས་དངོས་གྲུབ་སྩོལ༔ མ་ཧཱ་ག་ཎ་ཙཀྲ་པཱུ་ཛ་ཧོཿ བཤགས་པ་ནི། ཧོཿ བདག་ཅག་བྱང་ཆུབ་མཆོག་ཏུ་སེམས་བསྐྱེད་ནས༔ གྲུབ་པའི་རིག་འཛིན་བསྒྲུབ་པར་དམ་བཅས་ཀྱང་༔ སྐུ་གསུང་ཐུགས་ཀྱི་དམ་ལས་འགལ་བ་ཀུན༔ ཞལ་ཟས་ཚོགས་ཀྱི་མཆོད་པས་བསྐང་ཞིང་བཤགས༔ བཛྲ་ས་མ་ཡ་བི་ཤུདྡྷེ་ཨ་ཨཱཿ བསྒྲལ་བ་ནི། ཧཱུྃ་ཧྲཱིཿ ཐུགས་རྗེ་ཁྲོས་པ་དཔལ་གྱི་ཕོ་ཉ་ཡིས༔ འདུ་བར་འོས་མིན་དགྲ་བགེགས་འབྱུང་པོའི་ཚོགས༔ བཀུག་ཅིང་བསྟིམས་ནས་ཡེ་ཤེས་མཚོན་གྱིས་བསྒྲལ༔ ཤ་ཁྲག་ཚོགས་ཀྱི་ལོངས་སྤྱོད་ཆེན་པོར་བཞེས༔ སརྦ་ཤ་ཏྲཱུན་བིགྷྣཱན་ཛཿཧཱུྃ་བྃ་ཧོཿམཱ་ར་ཡ་རྦད༔ བྷིནྡྷ་ཡ་བྷིནྡྷ་ཡ་ཁ་ཁ་ཁཱ་ཧི་ཁཱ་ཧི༔ དེ་ལྟར་ཕྱི་ཡི་དཀྱིལ་འཁོར་པ༔ ཚོགས་ཀྱི་མཆོད་པས་དགྱེས་པར་བསྐང་༔ ནང་དུ་ཕུང་ཁམས་སྐྱེ་མཆེད་ལྷ༔ དམ་ཚིག་བདུད་རྩི་མྱང་བས་ཚིམས༔ གསང་བ་བདེ་སྟོང་ཉམས་སྦར་ཅིང་༔ དེ་ཉིད་རིག་པའི་ངང་དུ་བཞག༔ ཚོགས་གཉིས་མིག་འཕྲུལ་ལྟ་བུར་རྫོགས༔ ཡང་དག་ཡེ་ཤེས་མངོན་དུ་འགྱུར༔ ལྷག་མས་ཞིང་སྐྱོང་ཕོ་ཉ་མཆོད༔ ཨེ་ཨཱ་རལླི་སརྦ་དྷཱ་ཀ་དྷཱ་ཀི་ནཱི་ཧྲཱིཾ་ཧྲཱིཾ༔ ཧཱུྃ་ཧྲཱིཿ སྐུ་གསུམ་བླ་མའི་བཀའ་ཉན་དམ་ཚིག་ཅན༔ ལྷག་ལ་དབང་བའི་མཁའ་འགྲོ་གིང་ལངྐ༔ འདིར་གཤེགས་འདོད་ཡོན་བདུད་རྩིའི་གཏོར་མ་བཞེས༔ འཁོར་སྲུང་རྐྱེན་ཟློག་སྒྲུབ་པའི་བར་ཆད་སོལ༔ མ་མ་དྷཱ་ཀ་དྷཱ་ཀི་ནི་ཨུཙྪིཥྟ་བ་ལིཾ་ཏ་ཁཱ་ཧི༔ གཉིས་པ་གཏོར་མ་བསྐྱང་བ་ནི༔ གཏོར་མར་ཤ་ཁྲག་སྨན་ཕུད་བྲན་ལ། ཧཱུྃ་ཧྲཱིཿ ཆོས་སྐུའི་དབྱིངས་སུ་ཡེ་ཤེས་འདུ་འབྲལ་མེད༔ ལོངས་སྤྱོད་རྫོགས་སྐུ་རིགས་ལྔའི་སྤྲིན་བཀོད་དེ༔ འགྲོ་འདུལ་སྤྲུལ་པའི་རིག་འཛིན་རྒྱ་མཚོ་ཡིས༔ རྒྱུད་ལུང་མན་ངག་ཆོས་འཁོར་བསྐོར་བའི་ཚེ༔ བཀའ་ཡི་དམ་ནོས་རྡོ་རྗེའི་ཡལ་གམ་ཅན༔ ཕོ་རྒྱུད་མོ་རྒྱུད་གཉིས་མེད་ཆོས་སྲུང་ཚོགས༔ ཡེ་ཤེས་ལས་དང་འཇིག་རྟེན་ཚུལ་སྟོན་ཅིང་༔ ལེགས་ཉེས་སྟངས་འཛིན་དམ་ཚིག་རྗེས་གཅོད་རྣམས༔ སྔོན་ཚེ་ཞལ་བཞེས་དམ་བཅས་མ་གཡེལ་བར༔ ཤ་ཁྲག་བདུད་རྩིའི་གཏོར་མ་འདི་བཞེས་ལ༔ སྡང་བའི་དགྲ་ཐུལ་གནོད་པའི་བར་ཆད་ཆོམས༔ ཚེ་སྲིངས་དཔལ་སྐྱེད་བཤད་སྒྲུབ་བསྟན་པ་སྤེལ༔ ཞི་རྒྱས་དབང་དྲག་མངོན་སྤྱོད་ལ་སོགས་པའི༔ རབ་འབྱམས་ཕྲིན་ལས་མྱུར་དུ་འགྲུབ་པར་མཛོད༔ སརྦ་དྷརྨ་པཱ་ལ་ཨི་དམ་བ་ལིཾ་ཏ་གྲིཧྞ་ཁ་ཁ་ཁཱ་ཧི་ཁཱ་ཧི༔ བཤལ་ཆུས་བོད་སྐྱོང་བརྟན་མ་གསོལ༔ ཧཱུྃ་ཧྲཱི༔ དགུང་སྔོན་སྟེང་དང་གཡའ་རི་གངས་རྩེ་སོགས༔ བོད་ཁམས་མཐའ་དབུས་ཁྱབ་པའི་བརྟན་སྐྱོང་ཚོགས༔ དཔལ་གྱི་ཞལ་ཆབ་གཏོར་མའི་བཤལ་ཆུ་བཞེས༔ གངས་ཅན་བདེ་སྐྱིད་རྒྱས་པའི་ཕྲིན་ལས་མཛོད༔ པདྨ་དྷཱ་ཀཱི་ནཱི་མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧིཿ ལས་མཐའ་དཔལ་གྱི་རྟ་བྲོས་བསྡུ༔ ཧཱུྃ་ཧྲཱི༔ བླ་མ་སྐུ་གསུམ་རིགས་འདུས་དཀྱིལ་འཁོར་འདིར༔ སྒྲུབ་ལ་བར་ཆད་དམ་སྲི་གདུག་པའི་ཚོགས༔ ཨེ་དབྱིངས་རྡོ་རྗེ་ལྷུན་པོའི་འོག་ཏུ་མནན༔ དབང་ཆེན་རོལ་པའི་བྲོ་ཡིས་རྒྱས་གདབ་བོ༔ སརྦ་བིགྷྣཱན་སྟྭཾ་བྷ་ཡ་ནན༔ ཤྲཱི་པདྨ་ཧེ་རུ་ཀ་ཧི་ཧི་ཧི་ཧཱུྃ༔ གཏང་རག་གི་མཆོད་བསྟོད་བྱས་ལ། གསུམ་པ་སྤྱོད་ལམ་ཡེ་ཤེས་རོལ་པར་འཇུག་པ་ནི། ཧཱུྃ་ཧཱུྃ་ཧཱུྃ༔ སྣང་སྲིད་སྣོད་བཅུད་འོད་གསལ་དབྱིངས་སུ་ཐིམ༔ དོན་དམ་བླ་མ་ཆོས་སྐུ་མངོན་ཏུ་གྱུར༔ སླར་ཡང་གཟུགས་སྐུ་སྒྱུ་མའི་ཕྱག་རྒྱ་ཡིས༔ སྟོང་ཉིད་སྙིང་རྗེས་འགྲོ་བའི་དོན་བྱའོ༔ ཨ་ཨ་ཨཿ ཛྙཱ་ན་ཀཱ་ཡ་ཨོཾ་ཨཱཿཧཱུྃ༔ སྨོན་ལམ་ནི། བདག་གིས་བླ་མ་སྐུ་གསུམ་བསྒྲུབས་ལ་སོགས༔ དགེ་ཚོགས་མཁའ་ཁྱབ་འགྲོ་བའི་ཆེད་དུ་བསྔོ༔ ཀུན་ཀྱང་བྱང་ཆུབ་སྙིང་པོ་མངོན་འགྱུར་ནས༔ རང་གཞན་དོན་ཀུན་ཡིད་བཞིན་འགྲུབ་པར་ཤོག༔ བཀྲ་ཤིས་ནི། ཧཱུྃ་ཧྲཱིཿ སྐུ་གསུམ་བརྒྱུད་ལྡན་བླ་མའི་བཀྲ་ཤིས་ཤོག༔ རབ་འབྱམས་ཡི་དམ་ཞི་ཁྲོའི་བཀྲ་ཤིས་ཤོག༔ གནས་ཡུལ་དཔའ་བོ་མཁའ་འགྲོའི་བཀྲ་ཤིས་ཤོག༔ དངོས་གྲུབ་དཔལ་ལ་སྤྱོད་པའི་བཀྲ་ཤིས་ཤོག༔ ཅེས་བརྗོད་ཐུན་མཚམས་ཐམས་ཅད་དུ༔ ཡེ་ཤེས་སྙིང་རྗེ་ཆེན་པོའི་ངང་༔ རང་གཞན་ཕན་པའི་དོན་སྤྱོད་ཅིང་༔ ཐ་མལ་སྣང་ཞེན་ཀུན་སྦྱང་བྱ༔ ས་མ་ཡ༔ དེ་ལྟར་སྦྱོར་དངོས་རྗེས་གསུམ་ཚང་བ་ཡི༔ རིགས་འདུས་ཕྲིན་ལས་འདི་ལ་སུས་སྤྱོད་པ༔ འདི་ཕྱི་བར་དོ་གནས་སྐབས་ཐམས་ཅད་དུ༔ རང་བྱུང་པདྨ་བདག་དང་འབྲལ་བ་མེད༔ ཁྱད་པར་དུས་ཀྱི་རྒྱལ་པོ་ཚེས་བཅུ་ལ༔ འབྱོར་ཚོགས་ཅི་ཡོད་ཚོགས་དང་གཏོར་མར་སྤུངས༔ དམ་ཚིག་དག་པ་འདུས་པའི་གྲོགས་དང་བཅས༔ གདུང་ཤུགས་དྲག་པོས་ཚུལ་བཞིན་ཉམས་བླངས་ན༔ རྔ་ཡབ་གླིང་སོགས་སྤྲུལ་པའི་ཞིང་ཁམས་ནས༔ ཨོ་རྒྱན་ང་ཉིད་ཐེ་ཚོམ་མེད་པར་འབྱོན༔ བར་ཆད་སེལ་ཞིང་བསམ་པ་ཆོས་བཞིན་འགྲུབ༔ ཡུལ་ཕྱོགས་ཀུན་ཀྱང་བཀྲ་ཤིས་བདེ་ལེགས་འབྱུང་༔ ཞེས་པའང་ལས་དང་པོ་པས་དཔེ་ཆ་ཚོལ་བདེའི་ཆེད་ཕུན་ཚོགས་རྣམ་རྒྱལ་པས་གཏེར་གཞུང་ལས་ཁོལ་ཕྱུང་བགྱིས་པའོ།།

[edit]

@#/__/zab lam bla ma'i thugs sgrub yid bzhin nor bu sku gsum 'od kyi snying po'i phrin las gter gzhung las khol du phyung ba bzhugs so//__/ma 'ongs nga yi rjes 'jug dad ldan rnams:__pad+ma bdag dang dbyer med sgrub 'dod na:__bla ma la gus dbang thob dam tshig can:__nges 'byung shugs bskyed tshe 'di'i gdos thag bcad:__dben pa'i gnas su dka' thub sgrub sde tshugs:__'du 'dzi'i 'brel ba thams cad rgyang bsrings la:__sku gsung thugs rten spyan gzigs gang 'byor dgram:__bla ma'i gtor chen rin chen 'bar ba dang :__sman raka nyer spyod tshogs kyi 'khor lo bsham:__bde ba'i stan 'dug nyams len gnad du bsnun:__sa ma ya:__de la sngon dngos rjes gsum las dang po sngon 'gro la mtshams bcad/__tshogs bsag__/byin dbab gsum las/__dang po phyi mtshams bcad pa ni/__oM hrIHbadz+ra kro d+ha ha ya grI wa hu lu hu lu hU~M phaTa?H__rang nyid skad cig gis rta mchog he ru ka khro gtum bzod par dka' ba'i gzi brjid bskal pa'i me ltar 'bar bar gyur par bsams la/__gtor ma rta sngags kyis bsang*/__swa b+hA was sbyang*/__stong pa'i ngang las b+h+rU~M las rin po che'i snod yangs shing rgya che ba'i nang du gtor ma kha dog dri ro nus pa phun sum tshogs par gyur/__oM AHhU~M hoHsa brlab/__hU~M:__bdag nyid lha yi thugs ka nas:__dkar ser dmar ljang hU~M chen bzhi:__'phro 'dus 'od du zhu ba las:__ye shes rgyal po bzhi ru gyur:__oM dz+nyA na rA dza sa ma ye swA hA:__hU~M:__ri rgyal lhun po'i shar phyogs su:__pho brang chen po spos ngad ldan:__zab cing rgya che gzigs pa po:__rgyal po chen po yul 'khor srung :__sku mdog dkar po pi waM bsnams:__btsun mo sras dang blon por bcas:__'khor ni dri za 'bum gyis bskor:__sde bo che la stobs po che:__mchod gtor 'di bzhes shar phyogs kyi:__gdon rnams bzlog cing phyi mtshams srungs:__hU~M:__ri rgyal lhun po'i lho phyogs su:__pho brang chen po baiDUr+Ya:__zab cing rgya che=__rgyal po chen po 'phags skyes po:__sku mdog ser po ral gri 'dzin:__btsun mo sras=__'khor ni grul bum 'bum gyis bskor:__sde bo che la=__mchod gtor 'di bzhes lho phyogs kyi:__gdon rnams bzlog cing phyi mtshams srungs:__hU~M:__ri rgyal lhun po'i nub phyogs su:__pho brang chen po rgya mtsho'i dpal:__zab cing rgya che=__rgyal po chen po spyan mi bzang :__sku mdog dmar po sbrul zhags 'dzin:__btsun mo sras=__'khor ni klu dbang 'bum gyis bskor:__sde bo che=__mchod gtor 'di bzhes nub phyogs kyi:__gdon rnams bzlog cing phyi mtshams srung :__hU~M:__ri rgyal lhun po'i byang phyogs su:__pho brang chen po lcang lo can:__zab cing rgya che gzigs pa po:__rgyal po chen po rnam thos sras:__sku mdog ljang gu rgyal mtshan 'dzin:__btsun mo sras dang blon por bcas:__'khor ni gnod sbyin 'bum gyis bskor:__sde bo che la stobs po che:__mchod gtor 'di bzhes byang phyogs kyi:__gdon rnams bzlog cing phyi mtshams srung :__hU~M:__rgyal po chen po sde bzhi po:__don la sangs rgyas yin mod kyang :__gsang sngags bstan pa srung ba'i phyir:__bar chad 'dul bar mdzad du gsol:__oM d+hr-iSh+ta rASh+tA ya swA hA:__oM bai rU D+ha kA ya swA hA:__oM bi ru pAk+Sha ya swA hA:__oM bai shra ma NA ya swA hA:__i daM ba lin+ta khA hi:__'khor dang bcas pa la mchod sbyin gyi gtor ma rgya chen po 'di phul bas:__bdag cag dpon slob 'khor dang bcas pa rnams byang chub snying po ma thob kyi bar du:__rkyen phyi yi bar chad nang du mi gtong zhing :__nang gi dngos grub phyir mi 'chor ba'i phrin las mdzad du gsol:__nang mtshams dbang chen lhar bsgoms laH__hU~M hrIH__nga ni mnyam nyid ngang gis khros pa las:__thugs rje'i rang rtsal rta mchog dpal gyi sku'i:__rdo rje'i 'du 'phro khro bo'i sprin phung gis:__log 'dren bgegs kyi sbyor ba mtshams bcad do:__oM hrIHpad+ma kro d+ha he ru ka hU~M hU~M hU~M sarba big+hAn uts+tshA Ta ya phaT:__hU~M hU~M hU~MH__gsang ba don gyi mtshams bcad ni:__hU~M:__phyi nang bar chad rnam par rtog pa ste:__rtog pa'i rang bzhin gdod nas stong pa nyid:__'od gsal rdo rje'i srung mtshams lhun gyis grub:__gzung 'dzin bgegs tshogs 'jug pa'i skabs med do:__badz+ra dz+nyA na shud+d+he A:__gnyis pa tshogs bsags las rim la:__dang po skyabs su 'gro ba ni:__na mo:__bdag dang mkha' mnyam sems kun:__dus 'di nas bzung byang chub bar:__bla ma sku gsum 'dus pa'i lhar:__rtse gcig gus pas skyabs su mchi:__smon 'jug sems mchog bskyed pa ni:__hoH__ma gyur 'gro ba thams cad kun:__sangs rgyas go 'phang thob bya'i phyir:__sku gsum bla ma'i dkyil 'khor du:__rig 'dzin bsgrub par sems bskyed do:__yan lag bcu yis bsags sbyang ni:__hoH__bla ma sku gsum lha tshogs rnams:__ye shes dbyings nas gnas 'dir gshegs:__nyi zla pad steng dgyes par bzhugs:__sgo gsum gus pas phyag 'tshal lo:__lus dang longs spyod mchod sprin 'bul:__thog med 'khor ba'i sdig ltung bshags:__bsod nams kun la rjes yi rang :__mya ngan mi 'da' rtag bzhugs nas:__chos kyi 'khor lo bskor bar gsol:__dge tshogs 'dus ma byas par bsngo:__'od gsal snying po'i don rtogs shog:__gsum pa byin chen dbab pa ni:__spos rol dang bcas gdung shugs bskyed:__hU~M hrI:__nam mkha'i mtha' dang mnyam pa'i zhing khams nas:__sku gsum bla ma'i lha tshogs thugs dam can:__mos shing gdung bas rtse gcig rgyud bskul na:__glog ltar myur ba'i thugs rjes gnas 'dir gshegs:__rnal 'byor rgyud la bde chen gzi byin skyed:__sgrub pa'i gnas mchog 'og min zhing du sgyur:__sgrub rdzas mchod tshogs ye shes dbyings kyi rgyan:__kun bzang rnam 'phrul chen por byin phob cig:__oM AHhU~M badz+ra gu ru d+harma kA ya:__saM b+ho ka ya:__nirma kA ya:__dz+nyA na A be sha ya a A:__oM badz+ra ar+g+haM pA d+yaM puSh+pe d+hU pe A lo ke gan+d+he nai bi d+ya shap+da ma hA pU dza AHhU~M:__oM sarba pany+tsa a mr-i ta hU~M hrIHTha:__oM ma hA rak+ta hU~M hrIHTha:__oM ma hA ba liM ta hU~M hrIHTha:__badz+ra sa man+ta b+ha dra pU dza me g+ha s+pha ra Na khAM:__sgrub pa po yi rgyud 'gyur cing :__gnas dang yo byad byin 'od chags:__de tshe ye shes phebs pa'i rtags:__mos gus bskyed cing dgongs pa bskyang :__dngos gzhi'i phrin las rim pa laH__lha bskyed dzaba? bzlas thun mtshams bya:__dang po snang srid gzhir bzhengs kyi:__bla ma'i dkyil 'khor bkod pa ni:__hU~M hrIH__chos sku mi 'gyur stong nyid rdo rje'i ngang :__longs spyod yongs rdzogs dmigs med snying rje'i sprin:__rgyu yi sa bon hU~M yig mthing gsal mdangs:__nam mkha'i dbyings su skar chen bzhin du shar:__de las 'od 'phros snod bcud dngos kun sbyangs:__stong pa'i ngang las 'byung ba rim brtsegs dang :__ri rab pad+ma sna tshogs rdo rje'i steng :__mi phyed srung ba'i 'khor lo gsal zhing brtan:__de dbus b+h+rU~M las rin chen pho brang che:__gru bzhi sgo bzhi rta babs rgyan bkod rdzogs:__ye shes sgyu ma'i bkod pa bsam yas par:__rat+na zur brgyad 'dab bzhi'i pad+ma'i dbus:__chu skyes ge sar nyi zla'i dkyil 'khor steng :__rig rtsal hU~M babs rdo rje hU~M gis mtshan:__'od zer 'phro 'dus stobs bcu'i gzi byin 'bar:__mthing gsal thig le yongs gyur skad cig gis:__kun bzang chos sku bla ma rdo rje 'chang :__nam mkha'i mdangs can khro 'dzum brjid pa'i sku:__rdo rje dril 'dzin rang 'od yum la 'khyud:__dar dang rin chen rus pa'i phyag rgyas spras:__zhabs gnyis rdo rje pad+ma'i skyil krung gis:__ye shes 'od lnga 'phro ba'i klong dkyil du:__rigs rnams kun gyi khyab bdag chen por bzhengs:__hU~M hrIH__dbus dang mdun sogs phyogs bzhi'i 'dab ma la:__bde chen longs spyod yongs rdzogs thod phreng rtsal:__dkar mthing ser dmar ljang gu'i mdangs 'od 'tsher:__phyag g.yas so so'i rigs kyi phyag mtshan gdengs:__g.yon pas shes rab dril bu dku la brten:__gsang gos phod ka pad+ma'i snyan zhu gsol:__dar dpyangs rin chen rus rgyan rab tu brjid:__zhi chags khro zhing 'dzum pa'i ngang tshul can:__rang 'dra'i yum rnam gnyis med dgyes pas 'khyud:__pad+ma nyi zla'i gdan la skyil krung bzhugs:__so so'i thugs kar tshe bdag rigs mchog lnga:__yab yum mnyam sbyor 'od skur lam mer gsal:__hU~M hrIH__de yi phyi rim rin chen zur brgyad la:__pad nyi zla steng 'od lnga'i gur khang dbus:__sprul pa'i skur snang rdo rje'i mtshan mchog brgyad:__shar du kun 'dus gu ru pad+ma 'byung :__mthing mdog rdo rje dril 'dzin yum dang 'khyud:__lho ru sku yi gu ru saM b+ha ba:__dkar gsal pad phor skyabs sbyin rab byung chas:__nub tu gsung gi gu ru pad+ma'i rgyal:__dmar smug DA ru me long 'khor los sgyur:__byang du thugs kyi gu ru seng ge'i sgra:__mthing nag rdo rje sdigs mdzub khro chas rdzogs:__shar lhor yon tan gu ru shAkya seng :__gser mdog sa gnon mnyam bzhag sprul sku'i tshul:__lho nub phrin las gu ru nyi ma 'od:__ser gsal kha TA~M nyi zer rnal 'byor spyod:__nub byang rig rtsal gu ru blo ldan mchog:__dkar dmar DA ru pad phor dar phod gsol:__byang shar stobs kyi gu ru gro bo lod:__dmar nag rdo rje phur 'dzin 'chol ba'i chas:__kun kyang zhi chags 'bar ba'i nyams 'gyur rdzogs:__rang 'dra'i sprul pa nyi zer rdul ltar 'phro:__so so'i thugs kar mchog gi rig 'dzin brgyad:__mthing mdog bde stong DA ru thod chang bsnams:__rin chen rus brgyan dar phod brjid par gsol:__ye shes 'od zer 'phro ba'i klong na gsal:__hU~M hrI:__phyi rol sgo bzhir pad nyi bam ro'i steng :__rdo rje rin chen pad+ma las kyi rigs:__dpa' bo mkha' 'gro yab yum mnyam par sbyor:__mthing ser dmar ljang gri gug thod khrag bsnams:__zhi rgyas dbang drag 'bar ba'i nyams 'gyur can:__rin chen rus rgyan dar dpyang stag sham gsol:__zhabs gnyis 'dor stabs 'od phung klong na rol:__gzhan yang bdag skyob lha dang rig 'dzin tshogs:__snang stong zung 'jug chu zla 'ja' tshon ltar:__byin rlabs dngos grub phrin las dbang sgyur ba'i:__snang sr-id gzhir bzhengs dkyil 'khor chen por gsal:__rdo rje gsum gyi phyag rgyas byin brlabs shing :__rang byung dbang thob rigs lnga'i cod pan rdzogs:__bde chen rol pa lcags kyu'i 'od zer gyis:__mkha' khyab ye shes dkyil 'khor spyan drangs thim:__gdung shugs drag pos spyan 'dren pa ni/__hU~M hrI:__ka dag sngon gyi bskal pa dang po la:__lhun grub rig pa ye shes sprin bkod de:__sku gsum dbyer med cho 'phrul cir yang ston:__khyab bdag pad+ma thod phreng skur bzhengs shig:__hU~M hrI:__'og min chos dbyings spros bral pho brang nas:__chos sku kun tu 'chang ba gshegs su gsol:__stug po bkod sogs dag pa'i zhing mchog nas:__longs sku thod phreng rigs lnga gshegs su gsol:__mi mjed 'dzam gling bye ba phrag brgya nas:__sprul pa'i gu ru mtshan brgyad gshegs su gsol:__gnas yul dur khrod drag po'i pho brang nas:__'bum phrag dpa' bo mkha' 'gro gshegs su gsol:__gzhan yang phyogs bcu'i zhing khams rab 'byams nas:__rtsa gsum chos srung rgya mtsho gshegs su gsol:__sgrub pa'i gnas mchog 'di ru byin phob la:__sgrub mchog rnal 'byor rgyud la dbang bzhi skur:__bgegs dang log 'dren bdud bzhi'i bar chad sol:__mchog dang thun mong dngos grub ma lus stsol:__oM AHhU~M badz+ra gu ru d+harma kA ya:__saM b+ho kA ya:__nirma kA ya pad+ma thod phreng rtsal badz+ra sa ma ya dza dzaHsid+d+hi pha la hU~M AH__dgyes shing brtan par bzhugs su gsol:__hU~M hrI:__sku gsum bla ma'i dkyil 'khor lha tshogs rnams:__thugs rje'i dbang gis gnas 'dir byon pa legs:__rin chen mdzes khri pad+ma nyi zla'i steng :__dgyes par bzhugs nas dbang dang dngos grub stsol:__dzaHhU~M ba~M ho:__sa ma ya tiSh+Tha lhan:__phyag mchod bstod pas byin rlabs bskul:__hU~M hrIH__skye 'gag 'gyur med chos sku'i snying po las:__sku gsung thugs yon phrin las longs spyod rdzogs:__yid bzhin dngos grub char 'bebs sprul pa'i sku:__rig 'dzin bla ma'i tshogs la phyag 'tshal lo:__a ti pu ho:__pra tIts+tsha ho:__hU~M hrI:__bla ma sku gsum dkyil 'khor lha tshogs la:__dngos su 'byor bshams yid kyis rnam sprul pa'i:__lha rdzas las grub nyer spyod 'dod yon sogs:__kun bzang rnam 'phrul phyi yi mchod par 'bul:__rang byung lhun grub dbang po'i me tog sogs:__drag po'i longs spyod nang gi mchod par 'bul:__bde stong mnyam sbyor rtog tshogs dbyings su bsgral:__gnyis med rig pa gsang ba'i mchod par 'bul:__sku lnga ye shes lnga rdzogs grub pa'i rdzas:__rtsa brgyad stong sbyar sman gyi mchod par 'bul:__snang srid dmar gyi rgya mtsho chen por bskyil:__chags bral bde chen rak+ta'i mchod par 'bul:__snod bcud 'byor tshogs bza' bca' btung ba'i rigs:__'dod 'byung dpal gyi gtor ma'i mchod par 'bul:__zag med bde chen bskyed phyir bzhes nas kyang :__mchog dang thun mong dngos grub stsal du gsol:__oM AHhU~M badz+ra gu ru d+harma kA ya:__saM b+ho kA yaHnirma kA ya maN+Da la sa pA ri bA ra ar+g+haM pA' d+yaM puSh+pe d+hU pe A lo ke gan+d+he nai bi d+ya shap+da pany+tsa kA ma gu Na ma hA pU dza dz+nyA na su kha ho:__oM sarba pany+tsa a mr-i ta khA hi:__ma hA rak+ta khA hi:__ma hA ba liM ta kha kha khA hi khA hi:__hU~M hrIH__ma bcos spros bral 'od gsal 'dus ma byas:__dus gsum bde gshegs thams cad 'byung ba'i gnas:__sku dang ye shes phrin las bsam mi khyab:__pad+ma chos kyi sku la phyag 'tshal bstod:__kha sbyaur yan lag bdun ldan bde chen dbyings:__phung po gnas 'gyur nyon mongs rang sar grol:__mi zad bkod pa rgyan gyi 'khor lor shar:__rigs lnga longs spyod rdzogs la phyag 'tshal bstod:__mi mjed dzam gling bye ba phrag brgya ru:__pad sdong las 'khrungs rgyal sras rig pa 'dzin:__gang 'dul sgyu 'phrul drwa ba'i gar mdzad pa:__sprul pa'i mtshan mchog brgyad la phyag 'tshal bstod:__gnas yul dur khrod rab 'jigs zhing rnams su:__bde stong rol pa'i rtags kyi phyag rgya 'chang :__'bum phrag yangs pa'i mkha' 'gro'i sprin phung 'phro:__dpa' bo mkha' 'gro'i tshogs la phyag 'tshal bstod:__gzhan yang bdag skyob lha dang rig pa 'dzin:__rtsa gsum chos srung rgya mtsho'i skur ston pa:__ye shes dam tshig thugs rjes mngon bzhugs pa'i:__dkyil 'khor yongs rdzogs lha la phyag 'tshal bstod:__ces bstod lha sku'i gsal snang la:__yid mig rlung gsum rtse gcig gtad:__bying rgod rnyog mas ma bslad pa'i:__ting 'dzin gyad du 'gyur la bslab:__gnyis pa dzaba? gyi dgongs pa la:__thog mar rtsa ba'i bsnyen pa ni:__dkyil 'khor gtso bo'i thugs kar pad zla'i steng:__ye shes sems dpa' khyab bdag kun tu bzang :__mthing gsal mnyam bzhag bzang mo yum dang 'khril:__de'i thugs kar rin chen zur brgyad dbus:__rdo rje rtse lnga'i lte bar hU~M yig mthar:__rang byung rig pa sngags kyi phreng bas bskor:__bzlas pas 'od zer mkha' khyab kun tu 'phros:__sku gsum bla ma'i byin rlabs nus stobs kun:__tshur 'dus bdag thim thugs yid dbyer med 'dres:__khyab bdal gnyug ma 'od gsal ngang nas bzla:__oM AHhU~M badz+ra gu ru pad+ma sid+d+hi hU~M:__'bum phrag bcu gnyis rtse gcig bzlas:__dus gsum bla mas byin gyis rlob:__rig stong don gyi rang zhal mthong :__pad+ma bdag dang skal ba mnyam:__khyad par sgrub pa'i dzaba? dgongs ni:__thod phreng rigs lnga'i ye shes sems dpa' yi:__thugs kar nyi zla kha sbyor sa bon mthar:__sngags phreng 'khor ba'i zer gyis snang srid khyab:__rgyal ba mnyes mchod 'gro ba'i las sgrib sbyangs:__dregs tshogs dbang bsdus tha mal snod dang bcud:__lha sngags chos sku dag pa rab 'byams ngang :__tshur 'dus bdag thim bde chen rig rtsal rgyas:__ye shes lnga ldan rdo rje'i srog 'grub 'gyur:__oM AHhU~M bud+d+ha badz+ra rat+na pad+ma karma thod phreng rtsal badz+ra sa ma ya dzaHdzaH__A yur+dz+nyA na sarba sid+d+hi pha la hU~M A:__'bum phrag lnga bzlas rigs lnga yi:__tshe dang ye shes dngos grub 'thob:__slar yang rang gi thugs nas 'od 'phros pas:__sprul pa'i gu ru mtshan brgyad thugs rgyud bskul:__lha sngags phyag mtshan 'od zer spro zhing bsdus:__gang 'dul dngos sgrub rab 'byams dbang du gyur:__oM AHhU~Mbadz+ra ma hA gu ru sarba sid+d+hi hU~M:__'bum phrag bzhi yis gang 'dod kyi:__dngos grub ye shes rang dbang thob:__thun mong las kyi bzlas pa ni:__sku gsum bla ma'i ye shes 'od zer gyis:__rigs bzhi dpa' bo mkha' 'gro'i thugs rgyud bskul:__'bum phrag yangs pa'i pho nya'i 'phro 'du yis:__zhi rgyas dbang drag phrin las lhun grub gyur:__ra tsa hri ya ha ri ni sa shAn+tiM puSh+tiM pa shaM mA ra ya rbad:__khri phrag bzhi yis las kun byed:__gsum pa thun mtshams 'jug pa ni:__mchod cing bstod la thugs dam bskul:__hU~M hrIH__smon 'jug byang chub mchog tu sems bskyed nas:__dus gsum rgyal ba rnams kyi gdung 'tshob par:__rig 'dzin dngos grub stsol bar zhal bzhes pa'i:__sku gsum bla ma'i lha tshogs dus la bab:__hU~M hrIH__'od gsal spros pa bral ba'i pho brang nas:__chos sku'i bla ma pad+ma rdo rje 'chang :__dam pa khyed kyi rjes su bdag sgrub na:__rang byung don gyi dngos grub stsal du gsol:__'og min stug po bkod pa'i zhing khams nas:__longs spyod yongs rdzogs rigs lnga thod phreng rtsal:__dam pa khyed kyi rjes su bdag sgrub na:__tshe dang ye shes mchog gi dngos grub stsol:__mi mjed dzam gling bye ba phrag brgya nas:__sprul pa'i skur snang gu ru mtshan mchog brgyad:__dam pa khyed kyi rjes su bdag sgrub na:__'gro 'dul phrin las dngos grub stsal du gsol:__gnas yul dur khrod bde chen pho brang nas:__bde stong pho nya dpa' bo mkha' 'gro'i tshogs:__dam pa khyed kyi rjes su bdag sgrub na:__zhi rgyas dbang drag las kyi dngos grub stsol:__sku gsum rigs 'dus dkyil 'khor lha tshogs rnams:__dang por bsnyen cing bar du rtse gcig bsgrubs:__deng 'dir thugs dam bskul ba'i dus lags na:__byin rlabs dngos grub char chen dbab tu gsol:__phyi nang gsang ba'i lam gyi bar chad sol:__bgegs dang log 'dren 'byung po rdul du rlog:__tshe bsod dpal 'byor bde chen ye shes skyed:__sgrub pa'i las kyi 'bras bu mchis par mdzod:__oM AHhU~M badz+ra gu ru d+harma kA ya:__sam+b+ho kA ya:__nirma kA ya d+hA ka d+hA ki nI sarba maN+Dal e A ral+li hrIM hrIM pheM pheM kA ya wA ka tsit+ta dz+nyA na sid+d+hi sa ma ya ho:__zhes bskul mos gus rtse gcig bskyed:__byin rlabs nyams 'ur rtogs pa skye:__de tshe dkyil 'khor lha tshogs dang :__dgongs pa dbyer med lta gdeng bskyed:__nyams myong lam du bslang shes na:__dngos grub skad cig 'grub par 'gyur:__gsum pa rjes kyi phrin las rim pa la/__tshogs mchod bya zhing gtor ma bskyang :__spyod lam ye shes rol par 'jug:__dang po tshogs kyi mchod pa ni:__rdo rje'i dam tshig rdzas bshams la:__bdud rtsi bsang sbyang byin gyis brlab:__ra~M ya~M kha~M:__dam tshig rdzas la nyes pa'i skyon bral yang :__dngos 'dzin rnam rtog bag chags sbyang ba'i phyir:__ye shes me rlung chu yis bsregs gtor bkrus:__snod bcud 'dod yon bde chen rgyan du shar:__oM hU~M trA~M hrI AHpany+tsa kA ma gu Na dz+nyA na a mr-i ta oM AHhU~M:__tshogs zhing spyan 'dren ni/__hU~M hrI:__bzhengs shig sku gsum bla ma'i dkyil 'khor lha:__dpa' bo mkha' 'gro rgya mtsho'i tshogs dang bcas:__longs spyod tshogs kyi 'du bar spyan 'dren na:__thugs rje'i dbang gis 'dir gshegs byin gyis rlobs:__badz+ra sa ma ya dzaHdzaH__tshogs phud 'bul ba ni/__hU~M hrIH__bza' bca' btung ba rdo rje'i dam tshig rdzas:__'don yon bde chen ye shes rol pa'i rgyan:__sku gsum bla ma'i lha tshogs mnyes phyir 'bul:__mchod bzhes dam skong byin rlabs dngos grub stsol:__ma hA ga Na tsakra pU dza hoH__bshags pa ni/__hoH__bdag cag byang chub mchog tu sems bskyed nas:__grub pa'i rig 'dzin bsgrub par dam bcas kyang :__sku gsung thugs kyi dam las 'gal ba kun:__zhal zas tshogs kyi mchod pas bskang zhing bshags:__badz+ra sa ma ya bi shud+d+he a AH__bsgral ba ni/__hU~M hrIH__thugs rje khros pa dpal gyi pho nya yis:__'du bar 'os min dgra bgegs 'byung po'i tshogs:__bkug cing bstims nas ye shes mtshon gyis bsgral:__sha khrag tshogs kyi longs spyod chen por bzhes:__sarba sha trUn big+h+nAn dzaHhU~M ba~M hoHmA ra ya rbad:__b+hin+d+ha ya b+hin+d+ha ya kha kha khA hi khA hi:__de ltar phyi yi dkyil 'khor pa:__tshogs kyi mchod pas dgyes par bskang :__nang du phung khams skye mched lha:__dam tshig bdud rtsi myang bas tshims:__gsang ba bde stong nyams sbar cing :__de nyid rig pa'i ngang du bzhag:__tshogs gnyis mig 'phrul lta bur rdzogs:__yang dag ye shes mngon du 'gyur:__lhag mas zhing skyong pho nya mchod:__e A ral+li sarba d+hA ka d+hA ki nI hrIM hrIM:__hU~M hrIH__sku gsum bla ma'i bka' nyan dam tshig can:__lhag la dbang ba'i mkha' 'gro ging lang+ka:__'dir gshegs 'dod yon bdud rtsi'i gtor ma bzhes:__'khor srung rkyen zlog sgrub pa'i bar chad sol:__ma ma d+hA ka d+hA ki ni uts+tshiSh+ta ba liM ta khA hi:__gnyis pa gtor ma bskyang ba ni:__gtor mar sha khrag sman phud bran la/__hU~M hrIH__chos sku'i dbyings su ye shes 'du 'bral med:__longs spyod rdzogs sku rigs lnga'i sprin bkod de:__'gro 'dul sprul pa'i rig 'dzin rgya mtsho yis:__rgyud lung man ngag chos 'khor bskor ba'i tshe:__bka' yi dam nos rdo rje'i yal gam can:__pho rgyud mo rgyud gnyis med chos srung tshogs:__ye shes las dang 'jig rten tshul ston cing :__legs nyes stangs 'dzin dam tshig rjes gcod rnams:__sngon tshe zhal bzhes dam bcas ma g.yel bar:__sha khrag bdud rtsi'i gtor ma 'di bzhes la:__sdang ba'i dgra thul gnod pa'i bar chad choms:__tshe srings dpal skyed bshad sgrub bstan pa spel:__zhi rgyas dbang drag mngon spyod la sogs pa'i:__rab 'byams phrin las myur du 'grub par mdzod:__sarba d+harma pA la i dam ba liM ta grih+Na kha kha khA hi khA hi:__bshal chus bod skyong brtan ma gsol:__hU~M hrI:__dgung sngon steng dang g.ya' ri gangs rtse sogs:__bod khams mtha' dbus khyab pa'i brtan skyong tshogs:__dpal gyi zhal chab gtor ma'i bshal chu bzhes:__gangs can bde skyid rgyas pa'i phrin las mdzod:__pad+ma d+hA kI nI ma ma hrIM hrIM ba liM ta khA hiH__las mtha' dpal gyi rta bros bsdu:__hU~M hrI:__bla ma sku gsum rigs 'dus dkyil 'khor 'dir:__sgrub la bar chad dam sri gdug pa'i tshogs:__e dbyings rdo rje lhun po'i 'og tu mnan:__dbang chen rol pa'i bro yis rgyas gdab bo:__sarba big+h+nAn s+t+waM b+ha ya nan:__shrI pad+ma he ru ka hi hi hi hU~M:__gtang rag gi mchod bstod byas la/__gsum pa spyod lam ye shes rol par 'jug pa ni/___hU~M hU~M hU~M:__snang srid snod bcud 'od gsal dbyings su thim:__don dam bla ma chos sku mngon tu gyur:__slar yang gzugs sku sgyu ma'i phyag rgya yis:__stong nyid snying rjes 'gro ba'i don bya'o:__a a aH__dz+nyA na kA ya oM AHhU~M:__smon lam ni/__bdag gis bla ma sku gsum bsgrubs la sogs:__dge tshogs mkha' khyab 'gro ba'i ched du bsngo:__kun kyang byang chub snying po mngon 'gyur nas:__rang gzhan don kun yid bzhin 'grub par shog:__bkra shis ni/__hU~M hrIH__sku gsum brgyud ldan bla ma'i bkra shis shog:__rab 'byams yi dam zhi khro'i bkra shis shog:__gnas yul dpa' bo mkha' 'gro'i bkra shis shog:__dngos grub dpal la spyod pa'i bkra shis shog:__ces brjod thun mtshams thams cad du:__ye shes snying rje chen po'i ngang :__rang gzhan phan pa'i don spyod cing :__tha mal snang zhen kun sbyang bya:__sa ma ya:__de ltar sbyor dngos rjes gsum tshang ba yi:__rigs 'dus phrin las 'di la sus spyod pa:__'di phyi bar do gnas skabs thams cad du:__rang byung pad+ma bdag dang 'bral ba med:__khyad par dus kyi rgyal po tshes bcu la:__'byor tshogs ci yod tshogs dang gtor mar spungs:__dam tshig dag pa 'dus pa'i grogs dang bcas:__gdung shugs drag pos tshul bzhin nyams blangs na:__rnga yab gling sogs sprul pa'i zhing khams nas:__o rgyan nga nyid the tshom med par 'byon:__bar chad sel zhing bsam pa chos bzhin 'grub:__yul phyogs kun kyang bkra shis bde legs 'byung :__zhes pa'ang las dang po pas dpe cha tshol bde'i ched phun tshogs rnam rgyal pas gter gzhung las khol phyung bgyis pa'o//