འཇམ་དཔལ་རྒྱུད་ལུགས་ཀྱི་སྒྲུབ་ཆེན་སྐབས་ཀྱི་སྟོང་ཐུན་ཉེར་མཁོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	'jam dpal rgyud lugs kyi sgrub chen skabs kyi stong thun nyer mkho
Location	chos kyi blo gros bka' 'bum Volume 5, Text 3, Pages 97-118 (Folios 1a to 11b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. 'jam dpal rgyud lugs kyi sgrub chen skabs kyi stong thun nyer mkho. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 97-118. Bir, H.P.: Khyentse Labrang, 2012.
Genre	Activity Manual - las byang  ·  Ritual and Liturgical Texts - cho ga phyag len  ·  Sadhanas - Evocation Ritual - sgrub thabs
Deity	'jam dpal dbyangs
Colophon	།ཅེས་པའི་སྟོང་ཐུན་འདི་ཡང་ཀཿཐོག་རྒྱུད་སྡེ་ལྷ་ཁང་དུ་སྒྲུབ་མཆོད་ལ་ཉེ་བར་མཁོ་བས་མཁན་པོ་བསོད་ནམས་ནས་གསུངས་བསྐུལ་བཞིན་ཆོས་ཀྱི་བློ་གྲོས་པས་བྲིས་པའོ།
	/ces pa'i stong thun 'di yang kaH thog rgyud sde lha khang du sgrub mchod la nye bar mkho bas mkhan po bsod nams nas gsungs bskul bzhin chos kyi blo gros pas bris pa'o/

1 Texts in this Section (sde tshan or chos tshan)

97-118	འཇམ་དཔལ་རྒྱུད་ལུགས་ཀྱི་སྒྲུབ་ཆེན་སྐབས་ཀྱི་སྟོང་ཐུན་ཉེར་མཁོ། 'jam dpal rgyud lugs kyi sgrub chen skabs kyi stong thun nyer mkho Sadhanas - Evocation Ritual - sgrub thabs   ·   Activity Manual - las byang   ·   Ritual and Liturgical Texts - cho ga phyag len	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །འཇམ་དཔལ་རྒྱུད་ལུགས་ཀྱི་སྒྲུབ་ཆེན་སྐབས་ཀྱི་སྟོང་ཐུན་ཉེར་མཁོ་བཞུགས་སོ། ། མངའ་གསོལ་སྐབས། འོད་ལམ་འཕགས་པ་འཇམ་དཔལ་ཡེ་ཤེས་སེམས་དཔའ་དཀྱིལ་འཁོར་ཆེན་པོར་ཚོམ་བུ་ཚོགས་ཀྱི་སྒྲུབ་པའི་དགའ་སྟོན་ཆེན་པོ་ཉམས་སུ་མྱོང་བ་འདི་ཡང་ཕུན་སུམ་ཚོགས་པ་ལྔ་ཡི་རང་བཞིན་དང་ལྡན་པ་སྟེ། ཇི་སྐད་དུ། དང་པོ་ཕུན་སུམ་ཚོགས་ལྡན་ཏེ། །ཚད་ཕྱིན་རབ་འབྱམས་སློབ་དཔོན་གྱིས། །སྣོད་དང་ལྡན་པའི་འཁོར་བསྡུས་ནས། །གཞུང་དང་མཐུན་པའི་གནས་དག་ཏུ། །ས་ཆོག་རྫོགས་བྱས་གནས་ཁང་ལྡན། །དགྱེས་པ་ཚང་བའི་ཡོ་བྱད་རྫོགས། །དུས་ཆ་བཞི་ཡི་དང་པོ་ལ། །ཉི་ཟླ་གཟའ་སྐར་ཚེས་གྲངས་བརྟག །ཞེས་ཕུན་སུམ་ཚོགས་པ་ལྔ་དང་ལྡན་པ་སྟེ། དེ་ཡང་ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བ་ནམ་མཁའ་ལྟ་བུའི་དེ་བཞིན་ཉིད་ཤིན་ཏུ་རྣམ་པར་དག་པ་གཟོད་མ་ནས་འོད་གསལ་བ་སྐུ་དང་ཡེ་ཤེས་ཡོན་ཏན་ཐམས་ཅད་ལྷུན་གྱིས་གྲུབ་པའི་བདག་ཉིད་བརྟན་གཡོ་ཀུན་ཁྱབ་འཇམ་དཔལ་ཡེ་ཤེས་སེམས་དཔའ་ཐོག་མ་དང་ཐ་མ་མེད་ཅིང་སྐྱེ་འཆིའི་མཚན་མ་ལས་རིང་དུ་འདས་པ་སྟེ། ཕལ་པོ་ཆེ་ལས། སྲིད་དང་ཞི་ལས་རྣམ་གྲོལ་ཞིང་། །ཡོན་ཏན་རྒྱ་མཚོ་གཉིས་སུ་མེད། །སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་གསུངས་པ་ལྟར། ཐོག་མའི་སངས་རྒྱས་མགོན་པོ་འཇམ་པའི་དབྱངས། དེ་ཉིད་ནི་འདས་པ་དང་། ད་ལྟ་བ། མ་འོངས་པའི་སངས་རྒྱས་གཤེགས་ཤིང་བཞུགས་པ་ཐམས་ཅད་བསྐྱེད་པས་ན་རྒྱལ་བ་ཐམས་ཅད་ཀྱི་ཡབ་ཏུ་གྱུར་པ་སྟེ། རྨད་བྱུང་རྒྱལ་པོའི་རྒྱུད་ལས། ཐོག་མ་ཀུན་གྱིས་སྔོན་རོལ་དུ། །རང་སྣང་གཞི་ལ་མཐར་ཕྱིན་ཏེ། །སྔར་སངས་སྔ་ནས་རྒྱས་པའི་ཕྱིར། །ཐོག་མའི་ཀུན་ཏུ་བཟང་པོ་ནི། །འཁོར་འདས་ཀུན་གྱིས་སྟོན་པར་ཤར། །ཅེས་འབྱུང་བ་ལྟར་སྐུ་གསུམ་གྱི་ཞིང་ཁམས་ཚད་མེད་པའི་སྤྲིན་ཆེན་རྣམ་པར་བཀོད་དེ། དེ་རྣམས་སུ་གདུལ་བྱ་དང་འདུལ་བྱེད་ཀྱི་སྟོན་པ་བསམ་ལས་འདས་པས་སངས་རྒྱས་དང་བྱང་སེམས། སློབ་པ་དང་མི་སློབ་པ་དང་། ཉན་ཐོས་དང་རང་རྒྱལ་བ། ལྷ་དང་བཅས་པའི་འཇིག་རྟེན་གྱི་ཁམས་རྒྱ་མཚོར་སྐུ་ཡི་སྣང་བ་ངེས་པ་དང་མ་ངེས་པའི་རྣམ་པར་རོལ་པའི་སྒྱུ་འཕྲུལ་མཐའ་ཡས་པ་དང་། གསུང་གིས་ཀྱང་སྒྲ་ཚིག་རང་མཚན་ལས་འདས་པའི་ཆོས་ཀྱི་སྒྲ་དབྱངས་ཇི་སྙེད་གདུལ་བྱའི་བློ་ཡི་རིམ་པ་དང་མཚུངས་པར་སྔ་ཕྱི་རེས་འཇོག་མ་ཡིན་པར་དུས་གཅིག་ཆར་དུ་རང་རང་གི་སྒྲ་སྐད་དུ་སྣང་བ་དང་། ཐུགས་ནི་ཡེ་ཤེས་ཆེན་པོ་རྒྱ་མཚོ་དང་། ནམ་མཁའ་ལྟར་ཟབ་ཅིང་རྒྱ་ཆེ་བ་ལ་གཡོ་བ་མ་མཆིས་ཀྱང་། སྔོན་གྱི་སྨོན་ལམ་གྱི་ཆོ་འཕྲུལ་ཆེན་པོ་རང་སྣང་བའི་རྩལ་ལས་མཁྱེན་བརྩེ་ནུས་པའི་ཡེ་ཤེས་ཀྱི་འཇུག་པ་སྐད་ཅིག་རེར་ཡང་སེམས་ཅན་རྒྱ་མཚོ་སྨིན་པ་དང་། ཡོངས་སུ་གྲོལ་བ་བྱེད་པ་སྟེ་མདོར་ན་དེ་བཞིན་གཤེགས་པ་འཇམ་དཔལ་གྱི་སྐུ་ཡི་བ་སྤུའི་ཁུང་བུ་རེར་ཡང་ཞིང་བསམ་གྱིས་མི་ཁྱབ་པའི་རྒྱན་གྱིས་བརྒྱན་པའི་ལོངས་སྤྱོད་རྫོགས་པ་ཆེན་པོའི་བདག་ཉིད་དུ་བཞུགས་པ་སྟེ། དཀོན་མཆོག་བརྩེགས་པ་ལས། ནམ་མཁའ་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡི་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱི་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གི་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཅེས་དང་། སྡོང་པོ་བཀོད་པའི་མདོ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིངས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་གསུངས་པ་ལྟར་སྐུ་གསུང་ཐུགས་ཡོན་ཏན་མི་ཟད་པ་རྒྱན་གྱི་འཁོར་ལོའི་ཡོན་ཏན་ཐམས་ཅད་ཡོངས་སུ་རྫོགས་ཤིང་སྒྲིབ་གསུམ་ལས་རྣམ་པར་གྲོལ་བ་དྲི་མ་མེད་པའི་སྐུ་པདྨ་ལྟར་དག་ཅིང་གཙང་བ་དེ་བཞིན་གཤེགས་པ་ཐམས་ཅད་དང་སྤྱོད་ཡུལ་རོ་གཅིག་ཏུ་མཉམ་པ་སྐུ་གསུམ་དབྱེར་མི་ཕྱེད་པའི་བདག་ཉིད་ཆེན་པོ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་བླ་མར་གྱུར་པ་འཇམ་དཔལ་སྨྲ་བའི་སེང་གེ། ཕས་ཀྱི་རྒོལ་བ་ཐམས་ཅད་ཀྱིས་ཀུན་ཏུ་ཚུགས་པ་མེད་ཅིང་། གསང་བ་གསུམ་གྱི་གཟི་བརྗིད་ཀྱི་འོད་ཟེར་བྱེ་བ་འབུམ་གྱིས་ཕྲེང་བས་མཛེས་ཤིང་བལྟ་ན་སྡུག་པ། འཁོར་གྱིས་དཀྱིལ་འཁོར་ཐམས་ཅད་ཟིལ་གྱིས་གནོན་པ། ཐབས་ལ་མཁས་པའི་ཕྲིན་ལས་ཀྱི་མཐུ་དཔག་ཏུ་མེད་པར་རྒྱལ་བ་རྣམས་ཀྱིས་འགྲན་དུ་མི་བཟོད་ཅིང་། དཀྱིལ་འཁོར་རབ་འབྱམས་ཀྱི་སྤྲོ་བསྡུའི་བདག་པོ་ཁྱབ་བདག་འཇམ་དཔལ་རྡོ་རྗེ་ཉིད་རིགས་བརྒྱའི་སྒྱུ་འཕྲུལ་དྲ་བ་ཆེན་པོ་དཀྱིལ་འཁོར་གཅིག་ཏུ་བསྡུས་པ་གསང་ཆེན་རིགས་གཅིག་ཏུ་སྒྲུབ་པའི་ཐབས་ཚུལ་ངོ་མཚར་རྨད་དུ་བྱུང་བ་སྟེ། དེ་ཡང་གནས་ཕུན་སུམ་ཚོགས་པ་བསྐལ་པ་བཟང་པོའི་སངས་རྒྱས་སྟོང་རྩ་གང་དུ་མངོན་པར་བྱང་ཆུབ་པའི་གནས་རི་རབ་ལྷུན་པོའི་ལྷོ་ཕྱོགས་ཛཾ་བུའི་དཔལ་དང་ལྡན་པའི་ཞིང་གི་བྱང་ཕྱོགས་ཁ་བ་ཅན་ཞེས་པའི་ནང་གསེས་སྙིང་རྗེའི་གཏེར་ཆེན་ལྷ་མཆོག་གངས་རིའི་མདངས་ལྡན་གྱིས་ཕྱག་མཚན་དུ་བཞེས་པའི་ཡུལ་དབུས་ལྷ་ལྡན་གྲུ་འཛིན་གྱི་ཉིན་བྱེད་དབང་པོ་འཆར་བའི་ཤར་ཕྱོགས་དྭངས་བསིལ་གྱི་རི་བོ་རྩེ་མོ་ལྔ་པ་ཞེས་ལྷ་དང་དྲང་སྲོང་གྲུབ་པའི་ཚོགས་ཀྱིས་བསྟེན་པ་བློ་གཏེར་རྡོ་རྗེ་རྣོན་པོའི་ཡེ་ཤེས་ཀྱི་སྐུ་ཡི་ཆ་ཤས་གཅིག་ནི་གནས་དེ་ན་རྟག་ཏུ་དགྱེས་ཤིང་རོལ་པ་གང་གི་སྐུ་ཡི་འོད་ཟེར་དམར་སེར་ལི་ཁྲིའི་རྡུལ་བརྩེགས་ཀྱི་ཕུང་པོ་དང་། དེའི་ཐོད་ནས་སྣང་བྱེད་བདག་པོ་འཆར་ཁའི་མདངས་དང་འགྲོགས་ཏེ་ནུབ་ཕྱོགས་བདེ་ལྡན་བོད་དང་བོད་ཆེན་ལྗོངས་སུ་རྟག་ཏུ་ཁྱབ་པའི་ཐུགས་རྗེས་འཚོ་བ་ལས་མི་རྣམས་དགེ་བཅུར་སྤྱོད་ཅིང་རང་བཞིན་བཟང་བ་ཅན་དུ་གནས་པའི་བོད་ཆེན་ས་ཡི་ཐིག་ལེ་རིག་གསུམ་སྤྲུལ་པའི་ཞིང་ཁམས་འཕགས་པ་འཇམ་དཔལ་ཉིད་མི་ཡི་ཤ་ཚུགས་སུ་སྣང་བ་བདེ་གཤེགས་སྤོབས་པ་མཐའ་ཡས་དགྱེས་པའི་གྲུབ་རི་གཉིས་པ་འོག་མིན་ཀཿཐོག་རྡོ་རྗེ་གདན་ཞེས་གཙུག་ལག་གི་གཞུང་ནས་བསྟན་པའི་ས་ཡི་དཔྱད་མ་ཚང་བ་མེད་པ་སྟེ། སྒྱུ་འཕྲུལ་ལས་རིམ་ལས། ཟུར་བརྒྱད་ལ་སོགས་རྩེ་མང་དང་། །ཆུ་བོ་ཤིན་ཏུ་མང་པོ་ཡང་། །མཉམ་ཞིང་ཡིད་འོང་ཁ་ཡི་ཆུ། །ཉི་མ་ཤིན་ཏུ་གནས་པ་ནི། །ནམ་མཁའི་མཚན་ཉིད་ཤེས་པར་བྱ། །མཐོ་དང་མདུད་ས་ནུབ་བྱང་ཡིན། །ཤར་ལྷོ་གཞོལ་ཞིང་འཇམ་པ་ལ། །ཐོ་སྒྲོ་གྲོག་མདོ་ཆུ་སྣ་ཚོགས། །དལ་དབང་སྒྲ་ཡི་མཚམས་བརྟག་བྱ། །ལྷུན་སྡུག་རི་བོ་ནགས་ཚལ་ལྡན། །རབ་ཏུ་འཇམ་ཞིང་སྣུམ་བག་ཅན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཀྱིས་ནི་རླུང་ཉུང་ཞིང་། །མེ་ཏོག་ཤིང་ཚལ་བྱ་རྐང་བརྟག །ལོ་རྒྱུས་ཤེས་པའང་མཆོག་ཏུ་གསུངས། །བདག་ཉིད་བརྟགས་ཤིང་ཉམས་དགའ་དང་། །བསམ་གཏན་དགྲ་ལས་རིགས་གྱུར་པ། །རང་ཁྱིམ་ལ་སོགས་དེ་བཞིན་ཏེ། །ནན་ཏན་ནུས་མཐུ་ལྡན་ཕྱིར་ཡིན། །ཞེས་པ་ལྟར་མཚན་ཉིད་ཐམས་ཅད་ཡོངས་སུ་ཚང་བ་ལགས། ནམ་ཞིག་སྒྲུབ་པའི་དུས་ཀྱི་ཁྱད་པར་ལ། རྒྱས་པ་ལས། དུས་ནི་ཡར་ངོའི་བརྒྱད་ལ་བརྩམས། །ཤིན་ཏུ་སྐར་མ་རྒྱལ་ལ་བརྩམས། །བྱང་ཆུབ་སྤྱོད་པ་ཆེར་སྤྱོད་པས། །གསུང་མཆོག་དངོས་གྲུབ་ཐོབ་བྱའི་ཕྱིར། །གཟའ་སྐར་ཤེས་པའང་བླང་བར་བྱ། །ཞེས་གསུངས་པ་ལྟར་རྟ་བདུན་དབང་པོ་ཁྱུ་མཆོག་གི་ཁྱིམ་དུ་བསྐྱོད་ཅིང་རྒྱུ་སྐར་གྱི་ལྷ་མོ་ས་གས་ཉ་བའི་ཟླ་བ། བདག་ཅག་གི་སྟོན་པ་ཉིད་སྐུ་བལྟམ་པ་དང་མངོན་པར་བྱང་ཆུབ་པ་དང་། ཡོངས་སུ་མྱ་ངན་ལས་འདས་ཏེ་རྒྱལ་བའི་དུས་ཆེན་གསུམ་འཛོམ་དང་ཁྱད་པར་འཇམ་དཔལ་དབྱངས་ཉིད་སྙིགས་མ་རྩོད་པ་རྒྱས་པའི་དུས་སུ་ལྟ་བ་ངན་པའི་ཚང་ཚིང་སེལ་བར་བྱེད་པ་ལ་བསམ་བཞིན་བྱོན་པ་ཀུན་མཁྱེན་མི་ཕམ་ཕྱོགས་ལས་རྣམ་པར་རྒྱལ་བའི་རྒྱ་མཚོ་ཞེས་མཚན་གྱི་སྙན་པ་ཕྱོགས་བཅུར་རྒྱས་པ་དེ་ཉིད་འཇམ་དཔལ་ཡེ་ཤེས་སེམས་དཔའི་ཐུགས་ཀློངས་སུ་ཐིམ་པའི་དམར་ཕྱོགས་ཀྱི་དུས་དང་ཚེས་བཟང་པོར་རྗེས་དྲན་གྱི་མཆོད་པ་སྟེ། སྡོམ་འབྱུང་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་དང་། གསང་འདུས་ལས། ཕྱོགས་བཅུའི་སངས་རྒྱས་ཐམས་ཅད་བས། །བླ་མའི་བ་སྤུ་ཁུང་གཅིག་མཆོག །ཞེས་སོགས་བསོད་ནམས་ཚད་མེད་པའི་འཇུག་ངོགས་དམ་པར་གྱུར་པའོ། །སྟོན་པ་ཕུན་སུམ་ཚོགས་པ་ནི། གསལ་བཀྲ་ལས། སྤྱི་དང་འདྲེན་པ་དམ་ཚིག་དང་། །ཉམས་ཆག་སྐོང་དང་ཤེས་རྒྱུད་གྲོལ། །མན་ངག་ལུང་གི་སློབ་དཔོན་རྣམས། །ཞེས་པ་ལྟར་ཀུན་གྱིས་དམ་པར་བསྐུར་ཞིང་བཀའ་དྲིན་ཐོབ་པ་སྤྱི་ཡི་བླ་མ་ཆོས་སྒོར་འདྲེན་པའི་སློབ་དཔོན། ཤེས་རྒྱུད་གྲོལ་བ། མན་ངག་སྟོན་ཅིང་ལུང་འབོག་པ། ཉམས་ཆགས་སྐོང་བའི་བླ་མ། དམ་ཚིག་དབང་གི་སློབ་དཔོན་ཏེ། དེ་ཡང་དབང་བསྐུར་བའི་སློབ་དཔོན་ནི། ཇི་སྐད་དུ། མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལ་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་པ་ལྟར་གྱི་མཚན་ཉིད་དང་ལྡན་པའི་རྡོ་རྗེ་རྒྱལ་པོ་ཉིད་དགོངས་པ་ཆོས་ཉིད་ལས་མི་གཡོ་བཞིན་དུ་ཐུགས་རྗེའི་ཕྲིན་ལས་ཚད་མེད་པས་གང་འདུལ་འགྲོ་བའི་དོན་སྒྲུབ་པ་ལ་ཐོགས་པ་མི་མངའ་ཞིང་མཁྱེན་བརྩེ་ནུས་པའི་ཡོན་ཏན་བསམ་གྱིས་མི་ཁྱབ་པའི་བདག་ཉིད་དུ་བཞུགས་པའོ། །འཁོར་ཕུན་སུམ་ཚོགས་པ་ཡང་དད་པ་དང་བརྩོན་འགྲུས་ལྡན་ཞིང་ཤེས་རབ་དང་དབང་པོ་གསལ་བ་མཁས་ཤིང་ཡིད་གཞུངས་པ། སྙིང་རྗེ་ཆེ་བ། ཕྱི་སོ་ཐར་གྱི་ངུར་སྨྲིག་གི་རྒྱལ་མཚན་བརྟེན་པ། ནང་དུ་གཞན་ཕན་བྱང་ཆུབ་སེམས་ཀྱི་བདུད་རྩིས་གཏམས་པ། གསང་བ་ཟབ་མོའི་དབང་ཐོབ་ཅིང་བསྐྱེད་རྫོགས་ཀྱི་དོན་ལ་གནས་ཤིང་སྡོམ་པ་དང་དམ་ཚིག་ལ་བརྩོན་པ་སྒྲུབ་པའི་མན་ངག་ལ་མཁས་པ། དབང་ཐོབ་པའི་རྡོ་རྗེ་སློབ་དཔོན་ལ་གུས་པ་དང་ལྡན་ཞིང་བསྙེན་བཀུར་ལ་བརྩོན་པ་སྟེ། ཇི་སྐད་དུ། དད་དང་སྙིང་རྗེས་སེམས་རབ་དུལ། །སྔགས་ཀྱི་ལམ་མཆོག་དོན་གཉེར་བ། །ཞེས་འབྱུང་བ་ལྟར་གྱི་མཚན་ཉིད་དང་ལྡན་པའི་འདུས་པ་རྒྱ་མཚོའི་ཚོགས་རྡོ་རྗེའི་རིག་པ་འཛིན་པ་ཤ་སྟག་གི་ཡོངས་སུ་བསྐོར་བ་ལགས། སྒྲུབ་པར་བྱ་བའི་ཆོས་ཀྱི་རིམ་པ་ཕུན་སུམ་ཚོགས་པ་དང་། ཐེག་པ་ཐམས་ཅད་ཀྱི་རྩེ་རྒྱལ། ལུང་ཐམས་ཅད་ཀྱི་སྤྱི་འགྲེལ། བསྟན་པ་ཐམས་ཅད་ཀྱི་ཉིང་ཁུ། རིག་འཛིན་གྲུབ་ཐོབ་རྣམས་ཀྱི་དགོངས་པའི་ཞེ་ཕུག །ཡེ་ཤེས་ཀྱི་ཌཱ་ཀི་མ་རྣམས་ཀྱི་སྙིང་ཁྲག །འཇམ་དཔལ་རྫོགས་པ་ཆེན་པོ་མཚན་ཡང་དག་པར་བརྗོད་པའི་རྒྱུད་ཀྱི་བསྟན་དོན། མ་ཧཱ་གུ་རུ་པདྨ་འབྱུང་གནས་ཀྱིས་ཐུགས་ཀྱི་ཉིང་ཁུ། ཚེ་གཅིག་ལ་འཕོ་ཆེན་རྡོ་རྗེའི་སྐུ་བརྙེས་པར་བྱེད་པ་ཉམས་ལེན་བྱིན་རླབས་ཀྱི་དྲོད་ཚད་མ་ཉམས་ཤིང་ཌཱ་ཀིའི་ཞལ་རླངས་དང་ལྡན་པ་ཉིད་རིག་འཛིན་བརྒྱུད་པའི་ཕྱག་བཞེས་ཀྱིས་བརྒྱན་ཏེ་སྤྲོས་བཅས་དང་འབྲེལ་བ་ཚོམ་བུ་ཚོགས་སུ་སྒྲུབ་པའི་ཡོ་བྱད་ཀྱང་། དགྲ་བཟློག་གི་མཚོན་ཆ། ནད་སེལ་གྱི་སྨན། འཚོ་བ་ཡོ་བྱད་མཐའ་གཉིས་སུ་མ་ལྷུང་བ། དངོས་གྲུབ་ཀྱི་རྫས་ཚང་ཞིང་ཉམས་པ་མེད་པ། དམ་ཚིག་གི་རྫས་ཚང་ཤིང་བརྟེན་དུ་ཡོད་པ། དངོས་གྲུབ་སྒྲུབ་པའི་རྟེན་སྐོངས་མཆོད་པའི་ཡོ་བྱད་སོགས་མ་ཚང་བ་མེད་པས་སྒྲུབ་པའི་ལས་རིམ་ཀྱང་དང་པོར་ས་ཡི་ཆོ་ག་དང་། ནུབ་གཉིས་པ་སྟ་གོན་གྱི་རིམ་པ་རྣམས་སྔོན་དུ་ལེགས་པར་གྲུབ་ནས་རྒྱན་བཀྲམ་ནས་སྒྲུབ་པ་པོ་གནས་སུ་བཀོད་པ་སྐབས་སུ་བབ་པ་སྟེ། དེ་ཡང་དཀྱིལ་འཁོར་གྱི་བདག་པོ་སངས་རྒྱས་ཀྱི་གདུང་འཚོབ། སྟོན་པ་རྡོ་རྗེ་རྒྱལ་པོ་དང་ཕྲིན་ལས་རྣམ་བཞིར་དབང་འབྱོར་དམ་ཆོས་ཆར་འབེབས་རྡོ་རྗེ་རྒྱལ་ཚབ། ཡབ་ཀྱི་དགྱེས་བསྐྱེད་རྡོ་རྗེ་ཡུམ་ཆེན། ཕྲིན་ལས་གཞུང་སྲོང་རྡོ་རྗེ་ཀརྨ། བར་ཆད་འདུལ་བའི་རྡོ་རྗེ་མཚམས་པ། དྲོད་ཚད་འཛིན་པའི་རྡོ་རྗེ་སྤྱན་པ། བགེགས་སྤྲད་པའི་རྡོ་རྗེ་གིང་ཆེན། དུས་ཚོད་འཛིན་པ་རྡོ་རྗེ་དུས་མཚམས། གཡོ་བསྐོལ་གྱི་ལས་ལ་མཁས་པའི་རྡོ་རྗེ་ཕྱག་ཚང་། དམ་ཚིག་ཆེ་ཞིང་བརྩེ་གདུང་ཆེ་བའི་རྡོ་རྗེ་བྱན་པོ། གཙང་སྦྲ་ཆེ་ཞིང་རྟག་ཏུ་བཀའ་སྒྲུབ་རྡོ་རྗེ་རྡུལ་ཕྱག་པ་རྣམས་རང་རང་གི་ལྟ་དགོངས་ཏིང་ངེ་འཛིན་དང་ལས་དེ་དང་དེ་སྒྲུབ་པ་ལ་གཞོལ་བའི་ཐུགས་ཀྱི་འདུན་པ་རྩེ་གཅིག་པས་ཚིག་འདི་རྣམས་ཀྱི་རྗེས་ཟློས་མཛད་པར་ཞུ། །། །༈མ་ཊཾ་བསྒྲལ་ཆོག་སྐབས་ལ། འོ་ད་ལམ་སྔོན་བྱུང་གི་སྟོན་པའི་རྣམ་ཐར་རྗེས་འཇུག་ཉམས་ལེན་གྱི་ཚུལ་དུ་མ་ཊཾ་བསྒྲལ་བའི་ཆོ་ག་བགྱི་བ་ལ། དགོངས་འདུས་ལས། ཤིན་ཏུ་གདུག་ཅིང་གཏུམ་པོ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ལས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་པ་ལྟར་ཆོས་ཉིད་ཞི་བའི་ངང་ལས་སྙིང་རྗེ་ངང་གི་ཁྲོས་པས་གདུལ་བྱ་གདུག་པ་ཅན་འདུལ་བ་སྟེ། དེ་ཡང་སྔོན་བསྐལ་པ་ཀུན་དགའ་ཞེས་བྱ་བར་གསང་སྔགས་ཀྱི་ལྟ་སྤྱོད་ལས་ལོག་པར་གོལ་བའི་རུ་ཏྲ་ཐར་པ་ནག་པོ་འཇིག་རྟེན་དུ་བྱུང་བ་སྔོན་གྱི་སྨོན་ལམ་དྲག་པོ་དང་གསང་སྔགས་སྤྱད་ཉེས་པའི་མཐུ་བཙན་པོས་སྟོབས་དང་ལྡན་པར་གྱུར་ཏེ་གཟུགས་ཁམས་མན་ཆད་དབང་དུ་བསྡུས་པ་ན་གསང་བའི་བདག་པོ་དཔལ་ཆེན་པོ་སྤྲུལ་ཏེ་བཏུལ་ཞིང་ཁོག་པ་གཞལ་ཡས་ཁང་དུ་བྱིན་གྱིས་རླབས། ཡན་ལག་དང་དོན་ཁྲོལ་རྣམས་དུར་ཁྲོད་བརྒྱད་དུ་བཀོད་པར་མཛད་པ་དང་། ཡང་འཇམ་དཔལ་ཉིད་ཁྲོ་བོ་ཐམས་ཅད་ཀྱི་རྗེ་བཙུན་གཤིན་རྗེ་གཤེད་པོའི་སྐུར་བསྟན་ནས་ལྷོ་ཕྱོགས་ས་འོག་རིམ་དགུའི་ཐོད་པ་ལྕགས་ཀྱི་གྲོང་ཁྱེར་ན་གནས་པའི་གཤིན་རྗེའི་ཚོགས་འཁོར་དང་བཅས་པ་བཏུལ་བ་དང་དེ་དག་ཀྱང་བསྟན་པ་སྲུང་བར་བསྐོས་ཤིང་འཁོར་རྣམས་བྲན་དང་འབང་སུ་བཀོལ། ཆས་རྣམས་ཧེ་རུ་ཀ་ཆེན་པོས་རྒྱལ་བྱེད་དཔའ་རྟགས་ཀྱི་ཚུལ་དུ་བཞེས་པ་དང་མཐུན་པར་དེང་འདིར་སྒྲུབ་པ་པོ་རྣམས་ཀྱིས་ཀྱང་གསང་བ་མཆོག་གི་གཞལ་མེད་ཁང་ཆེན་པོར་གདོད་ནས་གྲུབ་པ་ལ་སླར་ཡང་བྱིན་གྱིས་རླབས་ཤིང་སྒྲུབ་པའི་གཞི་བཀོད་པ་ལ་དགོངས་པ་མི་འགྱུར་བའི་གཟེར་དང་། ཡི་དམ་ལྷ་ཡི་ང་རྒྱལ་བརྟན་པོས་མ་ཏྲཾ་བསྒྲལ་བའི་ལས་རིམ་ལ་འཇུག་པར་ཞུ། །། །༈ཆས་ཀྱི་མངའ་གསོལ་སྐབས། འོ་ད་ལམ་སྒྲུབ་པ་པོ་རྣམས་ཡེ་ནས་རང་བཞིན་རྣམ་པར་དག་པ་ལྷ་ཡི་དཀྱིལ་འཁོར་སྟེ། བདེ་མཆོག་ལས། འགྲོ་བ་འདི་དག་རང་བཞིན་གྱིས་གྲུབ་པའི་དཀྱིལ་འཁོར་གཉིས་མེད་པའོ། །ཞེས་དང་། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཞེས་པ་ལྟར། གདོད་ནས་རང་བཞིན་ལྷུན་གྲུབ་ཏུ་གནས་པ་དེ་ཉིད་མངོན་དུ་བྱེད་པའི་ཏིང་ངེ་འཛིན་གྱིས་མ་དག་པའི་སྣང་བ་ཐམས་ཅད་ཡེ་ཤེས་ཀྱི་འཁོར་ལོ་སྡོམ་པ་ནི་གསང་སྔགས་ཀྱི་ལམ་གྱི་སྲོག་ཏུ་གྱུར་པ་སྟེ། དེ་དང་མཐུན་པའི་ལྷ་ཡི་རྣམ་པ་དང་། མོས་པ་ལམ་བྱེད་ཀྱི་ཚུལ་དུ་རྒྱན་དང་ཆས་གོས་ཀྱི་མངའ་གསོལ་བ་ལ། ངོ་ཚ་དང་ཁྲེལ་ཡོད་ཀྱི་རྟགས་སུ་སྟོད་གཡོགས། སྨད་གཡོགས། ནང་གི་དེ་ཉིད་བསྒྲོད་པས་ས་ཡི་རྩེ་མོར་སོན་པའི་རྟགས་སུ་གཙུག་ཏོར་ནོར་བུའི་ཏོག་ཅན་དང་། ཚོགས་བརྒྱད་གནས་སུ་དག་པའི་བརྡར་རིན་པོ་ཆེའི་རྒྱན་བརྒྱད་དང་། ཕ་རོལ་ཕྱིན་དྲུག་རྫོགས་པའི་རྟགས་སུ་རུས་པའི་རྒྱན་དྲུག །ཡེ་ཤེས་ལྔ་མཚོན་པའི་རྡོ་རྗེ་རྩེ་ལྔ། ཉོན་མོངས་དུག་གསུམ་འཇོམས་པའི་ཁ་ཊྭཱྃ། བདེ་བ་ཆེན་པོ་མཚོན་པའི་རྟགས་ཐོད་པ་བདུད་རྩིས་བཀང་བ། མི་ཤེས་འཇོམས་པའི་རལ་གྲི། ཤེས་བྱ་རབ་འབྱམས་མཁྱེན་པའི་རྟགས་སུ་གླེགས་བམ། ཐབས་ཤེས་མཚོན་པའི་མདའ་གཞུ། མི་འཇིགས་པ་མཚོན་པའི་སེང་ཁྲི། འཁོར་བའི་ཉེས་པས་མ་གོས་པའི་རྟགས་གདན་པདྨ། ཁམས་དཀར་དམར་དག་པའི་རྟགས་ཉི་ཟླ། འོད་དང་གཟི་བརྗིད་སྲེད་མེད་ཀྱི་བུས་ཀྱང་མི་ཕིགས་པའི་གོ་ཆ་སྲ་བའི་གོས་དང་གསུང་ཡི་གེའི་འཁོར་ལོ་འགྱུར་ཞིང་ཆོས་ཐམས་ཅད་གཞོམ་མེད་རྡོ་རྗེ་ནཱ་དའི་རང་སྒྲ་ཤར་བའི་རྟགས་ཨཀྵ་ལྔ་བཅུ། སྐྱེ་འཆི་བསྒྲེས་རྒུད་སྤངས་པའི་རྟགས་ཚེ་ཡི་བུམ་པ་རྣམས་ཀྱི་མངའ་གསོལ་བས་མཚན་དང་དཔེ་བྱད་ཀྱི་དཔལ་འབར་བ། འཇམ་དཔལ་ཡེ་ཤེས་སེམས་དཔའི་ངོ་བོར་གྱུར་པའི་ཐུགས་མོས་དང་བཅས་རྗེས་ཟློས་གནང་བར་ཞུ། །། །༈མར་མེའི་སྨོན་ལམ་སྐབས། འོ་ད་ལམ་ཕུན་སུམ་ཚོགས་པ་ལྔ་ཡི་སྒྲུབ་པའི་གཞི་བཟུང་། བསྙེན་སྒྲུབ་ཡན་ལག་བཞི་ཡི་ཁོག་ཕུབ། མཐའ་རྒྱས་དངོས་གྲུབ་བླངས་ཤིང་རྗེས་ཀྱི་བྱ་བ་རྣམས་ལེགས་པར་གྲུབ་ནས་ལེགས་བྱས་དགེ་ཚོགས་རྣམས་བླ་ན་མེད་པའི་བྱང་ཆུབ་ཏུ་བསྔོ་ཞིང་སྟོན་པ་རྡོ་རྗེ་རྒྱལ་པོའི་ཞབས་དྲུང་དུ། བདག་གཞན་དཀྱིལ་འཁོར་འདིར་འཚོགས་པ་ཐམས་ཅད་རྡོ་རྗེའི་རིགས་གཅིག་ཏུ་བྱས་ཏེ་ཚོམ་བུ་གཅིག་ཏུ་འཚོགས་ཤིང་མི་འབྲལ་བའི་ཕྱིར་མར་མེའི་སྨོན་ལམ་གདབ་པ་སྐབས་སུ་བབ་པ་ཡིན། དེ་ཡང་སྒྲུབ་པ་ཟབ་མོ་འདི་ནི་འཕགས་པ་འཇམ་དཔལ་གྱི་རྒྱུད་ལེའུ་ཁྲི་དྲུག་སྟོང་པ་ལས་ཟུར་དུ་བཀོལ་བ་བསྟོད་པ་གླུ་བླངས་ཀྱི་ལེའུ་ཞེས་ཀྱང་གྲགས། དོན་དམ་པའི་མཚན་ཡང་དག་པར་བརྗོད་པ་འདི་ནི་བསྟན་པ་ཐམས་ཅད་ལ་ཁྱབ་ཅིང་རྡོ་རྗེ་འཛིན་པའི་ཡེ་ཤེས་ཀྱི་སྐུ་མངོན་སུམ་དུ་བྱེད་པ། ཁྱད་པར་དུ་གཉིས་མེད་ཨ་ཏི་ཡོ་གའི་རྒྱུད་ཀྱི་སྦས་པ་ཁ་འབྱེད་པར་བྱེད་པས་འདི་འདྲ་འཇིག་རྟེན་གསུམ་ན་རྙེད་པར་དཀའ་ཞིང་མཚན་ཙམ་ཐོས་པར་དཀའ་བའི་རྒྱུད་ཀྱི་རྒྱལ་པོ་ཆེན་པོ་ལ་འཕགས་ཡུལ་དུ་སློབ་དཔོན་སྒེག་པའི་རྡོ་རྗེ། སངས་རྒྱས་ཡེ་ཤེས་ཞབས། རིགས་ལྡན་འཇམ་དཔལ་གྲགས་པ་རྣམས་ཀྱིས་རྒྱུད་འགྲེལ་སྒྲུབ་ཐབས་རྒྱ་ཆེར་བཀྲལ་བ་ལས། ཁྱད་པར་འཕགས་པ་སློབ་དཔོན་དགའ་རབ་རྡོ་རྗེ། པཎ་ཆེན་དྲི་མེད་བཤེས་གཉེན། ཨོ་རྒྱན་པདྨ་འབྱུང་གནས་རྣམས་ཀྱིས་རྫོགས་པ་ཆེན་པོ་ལྟར་བཀྲལ་ཞིང་རྒྱུད་སྒྲུབ་ཐབས་སུ་བསྡེབས་པར་མཛད་པ་སྟེ། དེ་ཡང་གདོད་མའི་དབྱིངས་སུ་རང་རིག་ཡེ་ཤེས་ནས་སངས་རྒྱས་པ་འཇམ་དཔལ་ཀུན་ཏུ་བཟང་པོ་ཉིད་རང་གདངས་འཇམ་དཔལ་རིགས་ལྔའི་རྣམ་པར་བཞེངས་པའི་བྱིན་རླབས་དགོངས་པའི་ཆུ་བོ་རིག་འཛིན་དགའ་རབ་རྡོ་རྗེ་ལ་སོགས་སྤྲུལ་པའི་སྐུ་མཆོག་རྣམས་ལ་བརྡའ་ཙམ་གྱི་བརྒྱུད་པ་ལས། འདིར་ནི་སློབ་དཔོན་ཆེན་པོ་འཇམ་དཔལ་བཤེས་གཉེན་ཞེས་འཇམ་དཔལ་དབྱངས་ཀྱི་ཡེ་ཤེས་ཀྱི་སྐུས་དངོས་སུ་རྗེས་སུ་བཟུང་བའི་རིག་འཛིན་ཆེན་པོ་དེས་སློབ་དཔོན་སྒེག་པའི་རྡོ་རྗེ་དང་ཤྲཱི་སེང་གེ་གཉིས་ལ་བཤད་སྒྲུབ་ཀྱི་བཀའ་སྲོལ་འབྱེད་པའི་ཚུལ་དུ་གཏད་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཤིང་རིག་འཛིན་ཤྲཱི་སེང་ཧས། སྤྲུལ་སྐུ་པདྨ་འབྱུང་གནས། པཎ་ཆེན་བི་མ་མི་ཏྲ། ལོ་ཆེན་བཻ་རོ་ཙཱ་ན་གསུམ་ལ་གནང་བ་ལས། བི་མ་ལས་སྙིང་པོའི་བཅུད་དྲིལ་གནས་བརྟན་ལྡང་མ་ལྷུན་རྒྱལ་དང་། རྒྱལ་སྲས་རྡོ་རྗེ་གླིང་པའི་གཏེར་བྱོན་ཀྱང་ཡོད་ལ་བོད་ཡུལ་འདིར་དཀྱིལ་འཁོར་གྱི་གཙོ་བོ་འཇམ་དཔལ་དབྱངས་ཉིད་ཀྱི་ཡེ་ཤེས་སྒྱུ་འཕྲུལ་དྲ་བའི་སྣང་ཆ་རིག་འཛིན་གྱི་རྒྱལ་པོ་ཤར་བ་དཔལ་ལྡན་སངས་རྒྱས་པདྨ་སྐྱེས་ཞེས་བྱ་བ་འཇམ་དབྱངས་བློ་ལྡན་མཆོག་སྲེད་ཉིད་ཀྱིས་གནུབས་ཆེན་སངས་རྒྱས་ཡེ་ཤེས་ལ་སོགས་པའི་རྗེ་འབངས་གྲུབ་པའི་ཚོགས་རྣམས་ལ་འཇམ་དཔལ་ཞི་ཁྲོའི་ཆོས་སྐོར་ཟབ་ཅིང་རྒྱ་ཆེ་བ་མང་དུ་སྤེལ་བར་མཛད་པའི་ཕྱི་མའི་དུས་ན་སྤྲུལ་པའི་གཏེར་སྟོན་ཆེན་པོ་རྣམས་ཀྱིས་རིམ་བཞིན་གཏེར་ནས་གདན་དྲངས་པའི་ཆོས་བཀའ་མང་དུ་མཆིས་པ་ལས་མཆོག་ཏུ་གྱུར་པ་འདི་ནི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཆོས་རྒྱལ་ཁྲི་སྲོང་ལྡེའུ་བཙན་དང་མཚན་ལྡན་གྱི་ཡུམ་ཤེལ་བཟའ་སྒྲོན་ཅིག་གཉིས་གདུལ་བྱའི་ཡུལ་དུ་གཟིགས་ནས་འཇམ་དཔལ་རྒྱུད་ཀྱི་རྒྱལ་པོ་འདི་ཉིད་ལ་བཤད་ཐབས་གསུམ་དུ་མཛད། དེ་ཡང་བཀའ་ཡི་འགྲེལ་པ་ལ་བརྟེན་ནས་རྒྱ་ཆེ་བ་སྤྱི་ལྟར་བཤད། རྒྱུད་ལ་བརྟེན་ནས་ཡང་འགྲེལ་མཛད། དེ་དག་ཀྱང་གང་ཟག་དབང་པོའི་རིམ་པ་གསུམ་གྱི་དཀྲི་ཚུལ་དུ་སྙིང་པོར་བསྡུས་ཏེ་གནང་བ། བརྩད་པོས། སྤ་གྲོ་རྩལ་གྱི་བྲག་ཕུག་གི་ཉི་མ་རིས་སུ་ཟླ་བ་གཅིག་གི་ཐུགས་དམ་གྱིས་རྒྱུད་གྲོལ། ཇོ་མོས་སྟག་ཚང་དཔལ་ཕུག་ཏུ་ལོ་བདུན་ཡེ་ཤེས་ཀྱི་སྐུ་ལ་ཐིག་ལེ་སྦྱང་པས་འཕོ་བ་ཆེན་པོའི་སྐུ་བརྙེས་ནས་པདྨ་འོད་ཀྱི་ཕོ་བྲང་དུ་གུ་རུའི་དྲུང་དུ་ཕེབས་གདམས་པའི་བླ་དཔེ་རྣམས་མ་འོངས་པའི་དོན་དུ་རྒྱུད་ཡང་སྙིང་ངོ་སྤྲོད། བཏགས་གྲོལ་སོགས་འཁོར་གྱི་གཤིན་རྗེ་གཤེད་དམར་པོའི་ཐུགས་ཀ་དང་ཡོངས་སུ་ཚང་བ་དཔལ་ཕུག་རྡོ་བ་གཡུ་ཕྲ་ཅན་གཉིས་སུ་གུ་རུ་རིན་པོ་ཆེས་གཏེར་དུ་སྦས་པས་རིམ་བཞིན་མངའ་བདག་གི་སྐྱེ་བ་བཅོ་ལྔ་པ་གུ་རུ་ཆོས་ཀྱི་དབང་ཕྱུག་དང་མཚན་ལྡན་ཤེལ་གཟའི་རྣམ་འཕྲུལ་གསར་བ་བོན་སྟོན་པ་ཕྱོགས་མེད་གཉིས་ཀྱིས་གཏེར་ནས་གདན་དྲང་བའི་འཇམ་དཔལ་རྫོགས་པ་ཆེན་པོའི་ཆོས་བཀའ་དེ་ཉིད་དང་། གཞན་ཡང་ལྷ་སྲས་ཀྱི་སྐྱེ་མཐའ་གཏེར་སྟོན་ཆེན་པོ་སངས་རྒྱས་གླིང་པའི་གཏེར་ནས་གདན་དྲངས་པའི་འཇམ་དཔལ་ཟབ་རྒྱ་ཅན་གྱི་སྐོར་སོགས་བརྒྱུད་པའི་བཀའ་སྲོལ་ཇི་སྙེད་ཅིག་འདུས་པ་ལགས། དེ་ལྟར་བཀའ་གཏེར་གཉིས་ལྡན་སྒྲུབ་པ་ཟབ་མོ་འདི་ལ་གང་སྒྲུབ་པ་ཏིང་ངེ་འཛིན་གྱིས་ཡན་ལག་ཆོས་ཐམས་ཅད་འཇམ་དཔལ་གྱི་དཀྱིལ་འཁོར་དུ་བསྒྲུབ་པས་ལོངས་སྤྱོད་པར་བྱ་བའི་ཡུལ་དང་སྤྱོད་བྱེད་བདག་ཉིད་ལྷར་ཤར་བས་སྔགས་དང་ཕྱག་རྒྱ་ཏིང་ངེ་འཛིན་རྣམས་མ་འཁྲུལ་བ་དང་། ཇི་ལྟར་སྒྲུབ་པ་མཐུན་པའི་ཡན་ལག །སྒྲུབ་གནས་མཚན་ཉིད་ཚང་ཞིང་ཉེར་མཁོའི་ཡོ་བྱད་ཚང་བ། སྒྲུབ་པའི་གྲོགས་སུ་འགྱུར་བའི་རྟེན་དང་དམ་རྫས་སོགས་མཐུན་རྐྱེན་མ་ཚང་བ་མེད་པ་དང་། གང་གི་སྒྲུབ་པའི་བློ་གཞན་རྐྱེན་གྱིས་མི་འཕྲོགས་ཤིང་དམ་བཅའ་བརྟན་པོས་ལེ་ལོ་དང་སྒྱིད་ལུགས་སོགས་ཀྱིས་ཞུམ་པའི་སེམས་འདོར་ཞིང་ཐེ་ཚོམ་དང་ཡིད་གཉིས་མེད་པའི་ངེས་པའི་ཤེས་པ་གཏིང་ཚུགས་པར་སྐྱེ་བ་དང་། སྒྲུབ་པའི་དུས་ཀྱི་ཡན་ལག་སྒྱུ་འཕྲུལ་རྩ་རྒྱུད་ལས། ཞག་ནི་སུམ་ཅུ་ཕྲག་དྲུག་གམ། བཅུ་གཉིས་བཅུ་བཞི་བཅུ་དྲུག་གི། དབང་བསྒྱུར་རིགས་ཀྱི་དམ་པ་འགྲུབ། །ཞེས་གསུངས་པ་ལྟར། མོས་བསྒོམ་གྱི་དབང་དུ་བྱས་ནས་བདུན་ཕྲག་གཅིག་ཏུ་རིག་འཛིན་བརྒྱུད་པའི་ཕྱག་བཞེས་ལས་འབྱུང་བ་ལྟར་སྦྱོར་དངོས་རྗེས་གསུམ་ཚང་བར་སྒྲུབ་པས་གྲུབ་པའི་འབྲས་བུ་ནི། གསང་སྙིང་ལས། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུ་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལ་དོན་ཕྱུང་བའང་། །མཐུན་པའི་ཡེ་ཤེས་རང་སྣང་བའོ། །ཞེས་དང་། ལེ་ལོ་སྒྱིད་སྙོམ་མེད་པ་ཡི། །ཐེ་ཚོམ་མེད་པར་བསྒྲུབ་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་ཐོབ། །ཞེས་གསུངས་པ་ལྟར་ཕ་རོལ་ཕྱིན་དྲུག་རྫོགས་པ་དང་ལམ་གྱི་རིམ་པ་རྣམས་བསྒྲོད་ནས་མཐར་འབྲས་ཡེ་ཤེས་བླ་མའི་ས་ཐོབ་པ་དང་། གནས་སྐབས་སུའང་ཚོགས་སྒྲུབ་བྱས་པའི་ཕན་ཡོན་ཀྱང་། ས་ལ་འཛུལ་ཞིང་རི་བྲག་ལ་ཐོགས་མེད་དུ་འགྲོ་བ་དང་། ལྷ་ཀླུ་ལྷ་མ་ཡིན་སོགས་དབང་དུ་འདུས། ནམ་མཁའ་ལ་བྱ་བཞིན་བགྲོད། ངག་གི་དབྱངས་སྙན་པ་དང་། ཚིག་བཙན་ཞིང་ནུས་པ་དང་ལྡན་པར་འགྱུར་བ་དང་། རྒས་སྲ་ཞིང་སྟོབས་དང་ལྡན་པ། འགྲོ་བ་ཐམས་ཅད་ཀྱི་ཡིད་དུ་འོང་བ། རང་ལུས་འདོད་རྒུར་བསྒྱུར་བ། རང་གཞན་གྱི་གནོད་པ་ཞི་ཞིང་ཕྲིན་ལས་རབ་འབྱམས་ལ་རང་དབང་འབྱོར་པ་སོགས་ཕན་ཡོན་ཆེན་པོ་དང་ལྡན་ཞིང་། སྤྱིར་སངས་རྒྱས་གང་གཱའི་ཀླུང་གི་མཚན་བསྐལ་པ་མང་པོ་བརྗོད་པ་ལས་རྗེ་བཙུན་འཇམ་དཔལ་དབྱངས་ཀྱི་མཚན་ཙམ་བརྗོད་པ་ཕན་ཡོན་ཆེ་ཞིང་། སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོ། གསུང་སྨྲ་བའི་དབང་ཕྱུག །ཐུགས་ཡེ་ཤེས་སེམས་དཔའ་སྟེ། མདོར་ན་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་གཅིག་ཏུ་གྱུར་པ་ཉིད། སྔོན་འདས་པའི་དུས་བདེ་གཤེགས་ཀླུ་ཡི་རིག་མཆོག །ད་ལྟ་བྱང་ཕྱོགས་ཀྱི་འཇིག་རྟེན་གྱི་ཁམས་ན་མོས་པ་རབ་དགའི་རྒྱལ་པོ། མ་འོངས་པ་ན་རྡུལ་བྲལ་ཡང་དག་བསགས་ཀྱི་ཞིང་ཁམས་སུ་མགོན་པོ་ཀུན་ཏུ་གཟིགས་སོགས་སངས་རྒྱས་དང་། བྱང་ཆུབ་སེམས་དཔའ་སོགས་མཚན་དང་སྐུ་ཡི་རྣམ་འགྱུར་མཐའ་ཡས་པ་ཉིད། བླ་མེད་རྡོ་རྗེ་ཐེག་པའི་ཉེ་ལམ་གྱིས་སྒྲུབ་པས་སངས་རྒྱས་བྱང་སེམས་ཇི་སྙེད་ཅིག་སྐད་གཅིག་གིས་སྒྲུབ་པར་འགྱུར་བ་དང་། སྤོབས་པའི་གཏེར་ཆེན་པོ་བརྒྱད་གྲོལ་ཞིང་། ཤེས་བྱ་ཐམས་ཅད་ལ་ཆགས་ཐོགས་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། འགྱུར་བ་མེད་པའི་སྐུ་མཆོག་མྱུར་དུ་ཐོབ་པའི་ས་བོན་ཐེབས་པ་ལ་དགའ་སྤྲོ་རྒྱ་ཆེན་པོ་བསྐྱེད་ནས། སྣང་གསལ་གྱི་མར་མེ་དྲི་མ་མེད་པ་འོད་གསལ་བའི་བརྡ་འདིས། དོན་རང་བྱུང་གི་ཡེ་ཤེས་མཚོན་པར་བྱེད་ཅིང་། དེ་ཡང་རྟེན་ལུས་ཀྱི་ཀོང་བུ་རྩ་རླུང་ཐིག་ལེའི་ཞུན་མར་ལ་ལམ་བསྐྱེད་རྫོགས་ཀྱི་སྡོང་བུ་བཙུགས་པས། དབྱིབས་སྔགས་ཆོས་གསུམ། ཡེ་ཤེས་ཕྱག་རྒྱའི་སྒྲོན་མེ་སྦར་བ་དང་། རྟེན་ཨ་བ་དྷུ་ཏིའི་ཀོང་བུར། ཁམས་དཀར་དམར་རླུང་དང་བཅས་པའི་ཞུན་མར་ལ། གཏུམ་མོ་ཨ་ཐུང་གི་སྡོང་བུ་བཙུགས་པས་ལྷན་སྐྱེས་ཡེ་ཤེས་ཀྱི་སྒྲོན་མེ་སྦར་བ་དང་། རྟེན་ཀུན་གཞི་ཀློང་ཆེན་ཡངས་པའི་ཀོང་བུར། བྱང་ཆུབ་སེམས་ཀྱི་ཞུན་མར་ལ་རིག་པ་ཡེ་ཤེས་ཀྱི་སྡོང་བུ་བཙུགས་པས་སྣང་བ་བཞིའི་སྒྲོན་མེ་སྦར་བས་སྲིད་གསུམ་གྱི་མ་རིག་པ་ཐམས་ཅད་འཇོམས་ནས་ཡེ་ཤེས་འོད་གསལ་གྱི་སྣང་བ་འབྱམས་ཀླས་པ་མཐའ་དང་མུ་མེད་པར་ཤར་བ་དང་། གལ་ཏེ་ཚེ་འདིར་མ་གྲོལ་ན་བར་དོ་ཆོས་ཉིད་ཀྱི་སྒྲོན་མེའི་འོད་ལ་ངོ་ཤེས་རྩལ་རྫོགས་བརྟན་པ་ཐོབ་ནས་གྲོལ་བ་དང་། སྲིད་པ་བར་དོར་འཕྱན་ན་ཡང་དཔལ་མགོན་རྩ་བའི་བླ་མའི་ཐུགས་རྗེའི་སྒྲོན་མེ་འོད་ཀྱི་སྣང་བས་གོ་ཕྱེས་ནས་ཐར་པའི་བཤུལ་ལམ་བསྙེགས་ཏེ་རང་བཞིན་སྤྲུལ་པའི་ཞིང་དུ་འཚང་རྒྱ་བར་འགྱུར་བའི་དགོས་ཆེན་སོགས་ཕན་ཡོན་མཐའ་ཀླས་པ་དང་། འཇམ་དཔལ་གྱི་རྒྱུད་ལས། ཤེས་རབ་ཡེ་ཤེས་མེ་བོ་ཆེ། །འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །ཅེས་པ་ལྟར་གཞི་ལམ་འབྲས་གསུམ་ཐམས་ཅད་སྣང་གསལ་མར་མེ་འདི་ཡི་མཚོན་པར་བྱེད་ཅིང་མར་མེ་གཅིག་ལ་བལྟས་པའི་རྡོ་རྗེ་མཆེད་ལྕམ་རྣམས། ས་མཆོག་འོད་གསལ་རྡོ་རྗེ་རྩེ་མོར་མངོན་བྱང་ཆུབ་ཀྱི་བར་དུ་མི་འབྲལ་བར་འགྲོགས་ཤིང་སྟོན་འཁོར་དགོངས་པ་དབྱེར་མེད་པའི་ཐུགས་འདུན་དང་བཅས་ཏེ་མར་མེའི་སྨོན་ལམ་གྱི་རྗེས་ཟློས་གསུང་བར་ཞུ། །ཅེས་པའི་སྟོང་ཐུན་འདི་ཡང་ཀཿཐོག་རྒྱུད་སྡེ་ལྷ་ཁང་དུ་སྒྲུབ་མཆོད་ལ་ཉེ་བར་མཁོ་བས་མཁན་པོ་བསོད་ནམས་ནས་གསུངས་བསྐུལ་བཞིན་ཆོས་ཀྱི་བློ་གྲོས་པས་བྲིས་པའོ། །། །

[edit]

@#/__/'jam dpal rgyud lugs kyi sgrub chen skabs kyi stong thun nyer mkho bzhugs so/__/ mnga' gsol skabs/__'od lam 'phags pa 'jam dpal ye shes sems dpa' dkyil 'khor chen por tshom bu tshogs kyi sgrub pa'i dga' ston chen po nyams su myong ba 'di yang phun sum tshogs pa lnga yi rang bzhin dang ldan pa ste/__ji skad du/__dang po phun sum tshogs ldan te/__/tshad phyin rab 'byams slob dpon gyis/__/snod dang ldan pa'i 'khor bsdus nas/__/gzhung dang mthun pa'i gnas dag tu/__/sa chog rdzogs byas gnas khang ldan/__/dgyes pa tshang ba'i yo byad rdzogs/__/dus cha bzhi yi dang po la/__/nyi zla gza' skar tshes grangs brtag__/zhes phun sum tshogs pa lnga dang ldan pa ste/__de yang chos kyi sku spros pa thams cad dang bral ba nam mkha' lta bu'i de bzhin nyid shin tu rnam par dag pa gzod ma nas 'od gsal ba sku dang ye shes yon tan thams cad lhun gyis grub pa'i bdag nyid brtan g.yo kun khyab 'jam dpal ye shes sems dpa' thog ma dang tha ma med cing skye 'chi'i mtshan ma las ring du 'das pa ste/__phal po che las/__srid dang zhi las rnam grol zhing /__/yon tan rgya mtsho gnyis su med/__/spros pa kun las rab 'das pa'i/__/bcom ldan 'das ni mkha' rab zhi/__/zhes gsungs pa ltar/__thog ma'i sangs rgyas mgon po 'jam pa'i dbyangs/__de nyid ni 'das pa dang /__da lta ba/__ma 'ongs pa'i sangs rgyas gshegs shing bzhugs pa thams cad bskyed pas na rgyal ba thams cad kyi yab tu gyur pa ste/__rmad byung rgyal po'i rgyud las/__thog ma kun gyis sngon rol du/__/rang snang gzhi la mthar phyin te/__/sngar sangs snga nas rgyas pa'i phyir/__/thog ma'i kun tu bzang po ni/__/'khor 'das kun gyis ston par shar/__/ces 'byung ba ltar sku gsum gyi zhing khams tshad med pa'i sprin chen rnam par bkod de/__de rnams su gdul bya dang 'dul byed kyi ston pa bsam las 'das pas sangs rgyas dang byang sems/__slob pa dang mi slob pa dang /__nyan thos dang rang rgyal ba/__lha dang bcas pa'i 'jig rten gyi khams rgya mtshor sku yi snang ba nges pa dang ma nges pa'i rnam par rol pa'i sgyu 'phrul mtha' yas pa dang /__gsung gis kyang sgra tshig rang mtshan las 'das pa'i chos kyi sgra dbyangs ji snyed gdul bya'i blo yi rim pa dang mtshungs par snga phyi res 'jog ma yin par dus gcig char du rang rang gi sgra skad du snang ba dang /__thugs ni ye shes chen po rgya mtsho dang /__nam mkha' ltar zab cing rgya che ba la g.yo ba ma mchis kyang /__sngon gyi smon lam gyi cho 'phrul chen po rang snang ba'i rtsal las mkhyen brtse nus pa'i ye shes kyi 'jug pa skad cig rer yang sems can rgya mtsho smin pa dang /__yongs su grol ba byed pa ste mdor na de bzhin gshegs pa 'jam dpal gyi sku yi ba spu'i khung bu rer yang zhing bsam gyis mi khyab pa'i rgyan gyis brgyan pa'i longs spyod rdzogs pa chen po'i bdag nyid du bzhugs pa ste/__dkon mchog brtsegs pa las/__nam mkha' ji snyed khyab gyur pa/__/sku yis kyang ni de snyed khyab/__/sku yi ji snyed khyab gyur pa/__/'od kyis kyang ni de snyed khyab/__/'od kyi ji snyed khyab gyur pa/__/gsung gis kyang ni de snyed khyab/__/gsung gi ji snyed khyab gyur pa/__/thugs kyis kyang ni de snyed khyab/__/ces dang /__sdong po bkod pa'i mdo las/__spu yi rtse mo gcig la yang /__/zhing rnams bye ba bsam mi khyab/__/sna tshogs dbyings kyang tha dad de/__/de dag 'dres par gyur pa med/__/ces gsungs pa ltar sku gsung thugs yon tan mi zad pa rgyan gyi 'khor lo'i yon tan thams cad yongs su rdzogs shing sgrib gsum las rnam par grol ba dri ma med pa'i sku pad+ma ltar dag cing gtsang ba de bzhin gshegs pa thams cad dang spyod yul ro gcig tu mnyam pa sku gsum dbyer mi phyed pa'i bdag nyid chen po 'jig rten dang 'jig rten las 'das pa thams cad kyi bla mar gyur pa 'jam dpal smra ba'i seng ge/__phas kyi rgol ba thams cad kyis kun tu tshugs pa med cing /__gsang ba gsum gyi gzi brjid kyi 'od zer bye ba 'bum gyis phreng bas mdzes shing blta na sdug pa/__'khor gyis dkyil 'khor thams cad zil gyis gnon pa/__thabs la mkhas pa'i phrin las kyi mthu dpag tu med par rgyal ba rnams kyis 'gran du mi bzod cing /__dkyil 'khor rab 'byams kyi spro bsdu'i bdag po khyab bdag 'jam dpal rdo rje nyid rigs brgya'i sgyu 'phrul dra ba chen po dkyil 'khor gcig tu bsdus pa gsang chen rigs gcig tu sgrub pa'i thabs tshul ngo mtshar rmad du byung ba ste/__de yang gnas phun sum tshogs pa bskal pa bzang po'i sangs rgyas stong rtsa gang du mngon par byang chub pa'i gnas ri rab lhun po'i lho phyogs dzaM bu'i dpal dang ldan pa'i zhing gi byang phyogs kha ba can zhes pa'i nang gses snying rje'i gter chen lha mchog gangs ri'i mdangs ldan gyis phyag mtshan du bzhes pa'i yul dbus lha ldan gru 'dzin gyi nyin byed dbang po 'char ba'i shar phyogs dwangs bsil gyi ri bo rtse mo lnga pa zhes lha dang drang srong grub pa'i tshogs kyis bsten pa blo gter rdo rje rnon po'i ye shes kyi sku yi cha shas gcig ni gnas de na rtag tu dgyes shing rol pa gang gi sku yi 'od zer dmar ser li khri'i rdul brtsegs kyi phung po dang /__de'i thod nas snang byed bdag po 'char kha'i mdangs dang 'grogs te nub phyogs bde ldan bod dang bod chen ljongs su rtag tu khyab pa'i thugs rjes 'tsho ba las mi rnams dge bcur spyod cing rang bzhin bzang ba can du gnas pa'i bod chen sa yi thig le rig gsum sprul pa'i zhing khams 'phags pa 'jam dpal nyid mi yi sha tshugs su snang ba bde gshegs spobs pa mtha' yas dgyes pa'i grub ri gnyis pa 'og min kaHthog rdo rje gdan zhes gtsug lag gi gzhung nas bstan pa'i sa yi dpyad ma tshang ba med pa ste/__sgyu 'phrul las rim las/__zur brgyad la sogs rtse mang dang /__/chu bo shin tu mang po yang /__/mnyam zhing yid 'ong kha yi chu/__/nyi ma shin tu gnas pa ni/__/nam mkha'i mtshan nyid shes par bya/__/mtho dang mdud sa nub byang yin/__/shar lho gzhol zhing 'jam pa la/__/tho sgro grog mdo chu sna tshogs/__/dal dbang sgra yi mtshams brtag bya/__/lhun sdug ri bo nags tshal ldan/__/rab tu 'jam zhing snum bag can/__/chu bo dbang gi phyogs yin te/__/cung zad kyis ni rlung nyung zhing /__/me tog shing tshal bya rkang brtag__/lo rgyus shes pa'ang mchog tu gsungs/__/bdag nyid brtags shing nyams dga' dang /__/bsam gtan dgra las rigs gyur pa/__/rang khyim la sogs de bzhin te/__/nan tan nus mthu ldan phyir yin/__/zhes pa ltar mtshan nyid thams cad yongs su tshang ba lags/__nam zhig sgrub pa'i dus kyi khyad par la/__rgyas pa las/__dus ni yar ngo'i brgyad la brtsams/__/shin tu skar ma rgyal la brtsams/__/byang chub spyod pa cher spyod pas/__/gsung mchog dngos grub thob bya'i phyir/__/gza' skar shes pa'ang blang bar bya/__/zhes gsungs pa ltar rta bdun dbang po khyu mchog gi khyim du bskyod cing rgyu skar gyi lha mo sa gas nya ba'i zla ba/__bdag cag gi ston pa nyid sku bltam pa dang mngon par byang chub pa dang /__yongs su mya ngan las 'das te rgyal ba'i dus chen gsum 'dzom dang khyad par 'jam dpal dbyangs nyid snyigs ma rtsod pa rgyas pa'i dus su lta ba ngan pa'i tshang tshing sel bar byed pa la bsam bzhin byon pa kun mkhyen mi pham phyogs las rnam par rgyal ba'i rgya mtsho zhes mtshan gyi snyan pa phyogs bcur rgyas pa de nyid 'jam dpal ye shes sems dpa'i thugs klongs su thim pa'i dmar phyogs kyi dus dang tshes bzang por rjes dran gyi mchod pa ste/__sdom 'byung las/__mchod pa thams cad yongs spangs nas/__/bla ma mchod pa yang dag brtsams/__/de mnyes pas ni kun mkhyen gyi/__/ye shes mchog ni thob par 'gyur/__/zhes dang /__gsang 'dus las/__phyogs bcu'i sangs rgyas thams cad bas/__/bla ma'i ba spu khung gcig mchog__/zhes sogs bsod nams tshad med pa'i 'jug ngogs dam par gyur pa'o/__/ston pa phun sum tshogs pa ni/__gsal bkra las/__spyi dang 'dren pa dam tshig dang /__/nyams chag skong dang shes rgyud grol/__/man ngag lung gi slob dpon rnams/__/zhes pa ltar kun gyis dam par bskur zhing bka' drin thob pa spyi yi bla ma chos sgor 'dren pa'i slob dpon/__shes rgyud grol ba/__man ngag ston cing lung 'bog pa/__nyams chags skong ba'i bla ma/__dam tshig dbang gi slob dpon te/__de yang dbang bskur ba'i slob dpon ni/__ji skad du/__mkhas shing bya ba bral ba dang /__/chos nyid don la tshad phebs dang /__/'dod pa'i don la rmongs pa med/__/gsang sngags bla ma'i mtshan nyid do/__/zhes pa ltar gyi mtshan nyid dang ldan pa'i rdo rje rgyal po nyid dgongs pa chos nyid las mi g.yo bzhin du thugs rje'i phrin las tshad med pas gang 'dul 'gro ba'i don sgrub pa la thogs pa mi mnga' zhing mkhyen brtse nus pa'i yon tan bsam gyis mi khyab pa'i bdag nyid du bzhugs pa'o/__/'khor phun sum tshogs pa yang dad pa dang brtson 'grus ldan zhing shes rab dang dbang po gsal ba mkhas shing yid gzhungs pa/__snying rje che ba/__phyi so thar gyi ngur smrig gi rgyal mtshan brten pa/__nang du gzhan phan byang chub sems kyi bdud rtsis gtams pa/__gsang ba zab mo'i dbang thob cing bskyed rdzogs kyi don la gnas shing sdom pa dang dam tshig la brtson pa sgrub pa'i man ngag la mkhas pa/__dbang thob pa'i rdo rje slob dpon la gus pa dang ldan zhing bsnyen bkur la brtson pa ste/__ji skad du/__dad dang snying rjes sems rab dul/__/sngags kyi lam mchog don gnyer ba/__/zhes 'byung ba ltar gyi mtshan nyid dang ldan pa'i 'dus pa rgya mtsho'i tshogs rdo rje'i rig pa 'dzin pa sha stag gi yongs su bskor ba lags/__sgrub par bya ba'i chos kyi rim pa phun sum tshogs pa dang /__theg pa thams cad kyi rtse rgyal/__lung thams cad kyi spyi 'grel/__bstan pa thams cad kyi nying khu/__rig 'dzin grub thob rnams kyi dgongs pa'i zhe phug__/ye shes kyi DA ki ma rnams kyi snying khrag__/'jam dpal rdzogs pa chen po mtshan yang dag par brjod pa'i rgyud kyi bstan don/__ma hA gu ru pad+ma 'byung gnas kyis thugs kyi nying khu/__tshe gcig la 'pho chen rdo rje'i sku brnyes par byed pa nyams len byin rlabs kyi drod tshad ma nyams shing DA ki'i zhal rlangs dang ldan pa nyid rig 'dzin brgyud pa'i phyag bzhes kyis brgyan te spros bcas dang 'brel ba tshom bu tshogs su sgrub pa'i yo byad kyang /__dgra bzlog gi mtshon cha/__nad sel gyi sman/__'tsho ba yo byad mtha' gnyis su ma lhung ba/__dngos grub kyi rdzas tshang zhing nyams pa med pa/__dam tshig gi rdzas tshang shing brten du yod pa/__dngos grub sgrub pa'i rten skongs mchod pa'i yo byad sogs ma tshang ba med pas sgrub pa'i las rim kyang dang por sa yi cho ga dang /__nub gnyis pa sta gon gyi rim pa rnams sngon du legs par grub nas rgyan bkram nas sgrub pa po gnas su bkod pa skabs su bab pa ste/__de yang dkyil 'khor gyi bdag po sangs rgyas kyi gdung 'tshob/__ston pa rdo rje rgyal po dang phrin las rnam bzhir dbang 'byor dam chos char 'bebs rdo rje rgyal tshab/__yab kyi dgyes bskyed rdo rje yum chen/__phrin las gzhung srong rdo rje karma/__bar chad 'dul ba'i rdo rje mtshams pa/__drod tshad 'dzin pa'i rdo rje spyan pa/__bgegs sprad pa'i rdo rje ging chen/__dus tshod 'dzin pa rdo rje dus mtshams/__g.yo bskol gyi las la mkhas pa'i rdo rje phyag tshang /__dam tshig che zhing brtse gdung che ba'i rdo rje byan po/__gtsang sbra che zhing rtag tu bka' sgrub rdo rje rdul phyag pa rnams rang rang gi lta dgongs ting nge 'dzin dang las de dang de sgrub pa la gzhol ba'i thugs kyi 'dun pa rtse gcig pas tshig 'di rnams kyi rjes zlos mdzad par zhu/__//__/!ma TaM bsgral chog skabs la/__'o da lam sngon byung gi ston pa'i rnam thar rjes 'jug nyams len gyi tshul du ma TaM bsgral ba'i cho ga bgyi ba la/__dgongs 'dus las/__shin tu gdug cing gtum po la/__/zhi bas phan par mi 'gyur te/__/shes rab thabs kyi phyag rgya las/__/khro bor de bzhin gshegs kun mdzad/__/ces pa ltar chos nyid zhi ba'i ngang las snying rje ngang gi khros pas gdul bya gdug pa can 'dul ba ste/__de yang sngon bskal pa kun dga' zhes bya bar gsang sngags kyi lta spyod las log par gol ba'i ru tra thar pa nag po 'jig rten du byung ba sngon gyi smon lam drag po dang gsang sngags spyad nyes pa'i mthu btsan pos stobs dang ldan par gyur te gzugs khams man chad dbang du bsdus pa na gsang ba'i bdag po dpal chen po sprul te btul zhing khog pa gzhal yas khang du byin gyis rlabs/__yan lag dang don khrol rnams dur khrod brgyad du bkod par mdzad pa dang /__yang 'jam dpal nyid khro bo thams cad kyi rje btsun gshin rje gshed po'i skur bstan nas lho phyogs sa 'og rim dgu'i thod pa lcags kyi grong khyer na gnas pa'i gshin rje'i tshogs 'khor dang bcas pa btul ba dang de dag kyang bstan pa srung bar bskos shing 'khor rnams bran dang 'bang su bkol/__chas rnams he ru ka chen pos rgyal byed dpa' rtags kyi tshul du bzhes pa dang mthun par deng 'dir sgrub pa po rnams kyis kyang gsang ba mchog gi gzhal med khang chen por gdod nas grub pa la slar yang byin gyis rlabs shing sgrub pa'i gzhi bkod pa la dgongs pa mi 'gyur ba'i gzer dang /__yi dam lha yi nga rgyal brtan pos ma traM bsgral ba'i las rim la 'jug par zhu/__//__/!chas kyi mnga' gsol skabs/__'o da lam sgrub pa po rnams ye nas rang bzhin rnam par dag pa lha yi dkyil 'khor ste/__bde mchog las/__'gro ba 'di dag rang bzhin gyis grub pa'i dkyil 'khor gnyis med pa'o/__/zhes dang /__gsang snying las/__rdo rje phung po'i yan lag ni/__/rdzogs pa'i sangs rgyas lnga ru grags/__/skye mched khams rnams mang po kun/__/byang chub sems dpa'i dkyil 'khor nyid/__/zhes pa ltar/__gdod nas rang bzhin lhun grub tu gnas pa de nyid mngon du byed pa'i ting nge 'dzin gyis ma dag pa'i snang ba thams cad ye shes kyi 'khor lo sdom pa ni gsang sngags kyi lam gyi srog tu gyur pa ste/__de dang mthun pa'i lha yi rnam pa dang /__mos pa lam byed kyi tshul du rgyan dang chas gos kyi mnga' gsol ba la/__ngo tsha dang khrel yod kyi rtags su stod g.yogs/__smad g.yogs/__nang gi de nyid bsgrod pas sa yi rtse mor son pa'i rtags su gtsug tor nor bu'i tog can dang /__tshogs brgyad gnas su dag pa'i brdar rin po che'i rgyan brgyad dang /__pha rol phyin drug rdzogs pa'i rtags su rus pa'i rgyan drug__/ye shes lnga mtshon pa'i rdo rje rtse lnga/__nyon mongs dug gsum 'joms pa'i kha T+wA~M/__bde ba chen po mtshon pa'i rtags thod pa bdud rtsis bkang ba/__mi shes 'joms pa'i ral gri/__shes bya rab 'byams mkhyen pa'i rtags su glegs bam/__thabs shes mtshon pa'i mda' gzhu/__mi 'jigs pa mtshon pa'i seng khri/__'khor ba'i nyes pas ma gos pa'i rtags gdan pad+ma/__khams dkar dmar dag pa'i rtags nyi zla/__'od dang gzi brjid sred med kyi bus kyang mi phigs pa'i go cha sra ba'i gos dang gsung yi ge'i 'khor lo 'gyur zhing chos thams cad gzhom med rdo rje nA da'i rang sgra shar ba'i rtags ak+Sha lnga bcu/__skye 'chi bsgres rgud spangs pa'i rtags tshe yi bum pa rnams kyi mnga' gsol bas mtshan dang dpe byad kyi dpal 'bar ba/__'jam dpal ye shes sems dpa'i ngo bor gyur pa'i thugs mos dang bcas rjes zlos gnang bar zhu/__//__/!mar me'i smon lam skabs/__'o da lam phun sum tshogs pa lnga yi sgrub pa'i gzhi bzung /__bsnyen sgrub yan lag bzhi yi khog phub/__mtha' rgyas dngos grub blangs shing rjes kyi bya ba rnams legs par grub nas legs byas dge tshogs rnams bla na med pa'i byang chub tu bsngo zhing ston pa rdo rje rgyal po'i zhabs drung du/__bdag gzhan dkyil 'khor 'dir 'tshogs pa thams cad rdo rje'i rigs gcig tu byas te tshom bu gcig tu 'tshogs shing mi 'bral ba'i phyir mar me'i smon lam gdab pa skabs su bab pa yin/__de yang sgrub pa zab mo 'di ni 'phags pa 'jam dpal gyi rgyud le'u khri drug stong pa las zur du bkol ba bstod pa glu blangs kyi le'u zhes kyang grags/__don dam pa'i mtshan yang dag par brjod pa 'di ni bstan pa thams cad la khyab cing rdo rje 'dzin pa'i ye shes kyi sku mngon sum du byed pa/__khyad par du gnyis med a ti yo ga'i rgyud kyi sbas pa kha 'byed par byed pas 'di 'dra 'jig rten gsum na rnyed par dka' zhing mtshan tsam thos par dka' ba'i rgyud kyi rgyal po chen po la 'phags yul du slob dpon sgeg pa'i rdo rje/__sangs rgyas ye shes zhabs/__rigs ldan 'jam dpal grags pa rnams kyis rgyud 'grel sgrub thabs rgya cher bkral ba las/__khyad par 'phags pa slob dpon dga' rab rdo rje/__paN chen dri med bshes gnyen/__o rgyan pad+ma 'byung gnas rnams kyis rdzogs pa chen po ltar bkral zhing rgyud sgrub thabs su bsdebs par mdzad pa ste/__de yang gdod ma'i dbyings su rang rig ye shes nas sangs rgyas pa 'jam dpal kun tu bzang po nyid rang gdangs 'jam dpal rigs lnga'i rnam par bzhengs pa'i byin rlabs dgongs pa'i chu bo rig 'dzin dga' rab rdo rje la sogs sprul pa'i sku mchog rnams la brda' tsam gyi brgyud pa las/__'dir ni slob dpon chen po 'jam dpal bshes gnyen zhes 'jam dpal dbyangs kyi ye shes kyi skus dngos su rjes su bzung ba'i rig 'dzin chen po des slob dpon sgeg pa'i rdo rje dang shrI seng ge gnyis la bshad sgrub kyi bka' srol 'byed pa'i tshul du gtad pas phyag rgya chen po mchog gi dngos grub brnyes shing rig 'dzin shrI seng has/__sprul sku pad+ma 'byung gnas/__paN chen bi ma mi tra/__lo chen bai ro tsA na gsum la gnang ba las/__bi ma las snying po'i bcud dril gnas brtan ldang ma lhun rgyal dang /__rgyal sras rdo rje gling pa'i gter byon kyang yod la bod yul 'dir dkyil 'khor gyi gtso bo 'jam dpal dbyangs nyid kyi ye shes sgyu 'phrul dra ba'i snang cha rig 'dzin gyi rgyal po shar ba dpal ldan sangs rgyas pad+ma skyes zhes bya ba 'jam dbyangs blo ldan mchog sred nyid kyis gnubs chen sangs rgyas ye shes la sogs pa'i rje 'bangs grub pa'i tshogs rnams la 'jam dpal zhi khro'i chos skor zab cing rgya che ba mang du spel bar mdzad pa'i phyi ma'i dus na sprul pa'i gter ston chen po rnams kyis rim bzhin gter nas gdan drangs pa'i chos bka' mang du mchis pa las mchog tu gyur pa 'di ni slob dpon chen po pad+ma 'byung gnas kyis chos rgyal khri srong lde'u btsan dang mtshan ldan gyi yum shel bza' sgron cig gnyis gdul bya'i yul du gzigs nas 'jam dpal rgyud kyi rgyal po 'di nyid la bshad thabs gsum du mdzad/__de yang bka' yi 'grel pa la brten nas rgya che ba spyi ltar bshad/__rgyud la brten nas yang 'grel mdzad/__de dag kyang gang zag dbang po'i rim pa gsum gyi dkri tshul du snying por bsdus te gnang ba/__brtsad pos/__spa gro rtsal gyi brag phug gi nyi ma ris su zla ba gcig gi thugs dam gyis rgyud grol/__jo mos stag tshang dpal phug tu lo bdun ye shes kyi sku la thig le sbyang pas 'pho ba chen po'i sku brnyes nas pad+ma 'od kyi pho brang du gu ru'i drung du phebs gdams pa'i bla dpe rnams ma 'ongs pa'i don du rgyud yang snying ngo sprod/__btags grol sogs 'khor gyi gshin rje gshed dmar po'i thugs ka dang yongs su tshang ba dpal phug rdo ba g.yu phra can gnyis su gu ru rin po ches gter du sbas pas rim bzhin mnga' bdag gi skye ba bco lnga pa gu ru chos kyi dbang phyug dang mtshan ldan shel gza'i rnam 'phrul gsar ba bon ston pa phyogs med gnyis kyis gter nas gdan drang ba'i 'jam dpal rdzogs pa chen po'i chos bka' de nyid dang /__gzhan yang lha sras kyi skye mtha' gter ston chen po sangs rgyas gling pa'i gter nas gdan drangs pa'i 'jam dpal zab rgya can gyi skor sogs brgyud pa'i bka' srol ji snyed cig 'dus pa lags/__de ltar bka' gter gnyis ldan sgrub pa zab mo 'di la gang sgrub pa ting nge 'dzin gyis yan lag chos thams cad 'jam dpal gyi dkyil 'khor du bsgrub pas longs spyod par bya ba'i yul dang spyod byed bdag nyid lhar shar bas sngags dang phyag rgya ting nge 'dzin rnams ma 'khrul ba dang /__ji ltar sgrub pa mthun pa'i yan lag__/sgrub gnas mtshan nyid tshang zhing nyer mkho'i yo byad tshang ba/__sgrub pa'i grogs su 'gyur ba'i rten dang dam rdzas sogs mthun rkyen ma tshang ba med pa dang /__gang gi sgrub pa'i blo gzhan rkyen gyis mi 'phrogs shing dam bca' brtan pos le lo dang sgyid lugs sogs kyis zhum pa'i sems 'dor zhing the tshom dang yid gnyis med pa'i nges pa'i shes pa gting tshugs par skye ba dang /__sgrub pa'i dus kyi yan lag sgyu 'phrul rtsa rgyud las/__zhag ni sum cu phrag drug gam/__bcu gnyis bcu bzhi bcu drug gi/__dbang bsgyur rigs kyi dam pa 'grub/__/zhes gsungs pa ltar/__mos bsgom gyi dbang du byas nas bdun phrag gcig tu rig 'dzin brgyud pa'i phyag bzhes las 'byung ba ltar sbyor dngos rjes gsum tshang bar sgrub pas grub pa'i 'bras bu ni/__gsang snying las/__de tshe bcu drug tshun chad kyis/__/sku lnga lhun gyis rdzogs pa ni/__/ye shes thig le nyid snang ba/__/bsam gyis mi khyab mtha' yas mchog__/phyogs bcu dus bzhi mngon rdzogs pa'i/__/zhing khams rnam dag bsam yas dang /__/rgya dang bral ba'i gzhal yas khang /__/'khor lo'i rgyan dang rol mo'i tshogs/__/dkyil 'khor ma lus bsam yas kun/__/mthong nas nye bar mnyes pa dang /__/rgya chen gsung la don phyung ba'ang /__/mthun pa'i ye shes rang snang ba'o/__/zhes dang /__le lo sgyid snyom med pa yi/__/the tshom med par bsgrub byas na/__/dkyil 'khor thams cad 'grub par 'gyur/__/rdo rje gsang mchog dam pa thob/__/zhes gsungs pa ltar pha rol phyin drug rdzogs pa dang lam gyi rim pa rnams bsgrod nas mthar 'bras ye shes bla ma'i sa thob pa dang /__gnas skabs su'ang tshogs sgrub byas pa'i phan yon kyang /__sa la 'dzul zhing ri brag la thogs med du 'gro ba dang /__lha klu lha ma yin sogs dbang du 'dus/__nam mkha' la bya bzhin bgrod/__ngag gi dbyangs snyan pa dang /__tshig btsan zhing nus pa dang ldan par 'gyur ba dang /__rgas sra zhing stobs dang ldan pa/__'gro ba thams cad kyi yid du 'ong ba/__rang lus 'dod rgur bsgyur ba/__rang gzhan gyi gnod pa zhi zhing phrin las rab 'byams la rang dbang 'byor pa sogs phan yon chen po dang ldan zhing /__spyir sangs rgyas gang gA'i klung gi mtshan bskal pa mang po brjod pa las rje btsun 'jam dpal dbyangs kyi mtshan tsam brjod pa phan yon che zhing /__sangs rgyas thams cad kyi sku rdo rje'i ngo bo/__gsung smra ba'i dbang phyug__/thugs ye shes sems dpa' ste/__mdor na de bzhin gshegs pa thams cad kyi ye shes kyi sku gcig tu gyur pa nyid/__sngon 'das pa'i dus bde gshegs klu yi rig mchog__/da lta byang phyogs kyi 'jig rten gyi khams na mos pa rab dga'i rgyal po/__ma 'ongs pa na rdul bral yang dag bsags kyi zhing khams su mgon po kun tu gzigs sogs sangs rgyas dang /__byang chub sems dpa' sogs mtshan dang sku yi rnam 'gyur mtha' yas pa nyid/__bla med rdo rje theg pa'i nye lam gyis sgrub pas sangs rgyas byang sems ji snyed cig skad gcig gis sgrub par 'gyur ba dang /__spobs pa'i gter chen po brgyad grol zhing /__shes bya thams cad la chags thogs med pa'i shes rab/__mi brjed pa'i gzungs/__mngon par shes pa drug__/rgyun gyi ting nge 'dzin/__rdo rje lta bu'i tshe/__g.yung drung lta bu'i lus/__'gyur ba med pa'i sku mchog myur du thob pa'i sa bon thebs pa la dga' spro rgya chen po bskyed nas/__snang gsal gyi mar me dri ma med pa 'od gsal ba'i brda 'dis/__don rang byung gi ye shes mtshon par byed cing /__de yang rten lus kyi kong bu rtsa rlung thig le'i zhun mar la lam bskyed rdzogs kyi sdong bu btsugs pas/__dbyibs sngags chos gsum/__ye shes phyag rgya'i sgron me sbar ba dang /__rten a ba d+hu ti'i kong bur/__khams dkar dmar rlung dang bcas pa'i zhun mar la/__gtum mo a thung gi sdong bu btsugs pas lhan skyes ye shes kyi sgron me sbar ba dang /__rten kun gzhi klong chen yangs pa'i kong bur/__byang chub sems kyi zhun mar la rig pa ye shes kyi sdong bu btsugs pas snang ba bzhi'i sgron me sbar bas srid gsum gyi ma rig pa thams cad 'joms nas ye shes 'od gsal gyi snang ba 'byams klas pa mtha' dang mu med par shar ba dang /__gal te tshe 'dir ma grol na bar do chos nyid kyi sgron me'i 'od la ngo shes rtsal rdzogs brtan pa thob nas grol ba dang /__srid pa bar dor 'phyan na yang dpal mgon rtsa ba'i bla ma'i thugs rje'i sgron me 'od kyi snang bas go phyes nas thar pa'i bshul lam bsnyegs te rang bzhin sprul pa'i zhing du 'tshang rgya bar 'gyur ba'i dgos chen sogs phan yon mtha' klas pa dang /__'jam dpal gyi rgyud las/__shes rab ye shes me bo che/__/'od chen rnam par snang bar byed/__/ye shes snang ba lam me ba/__/'gro ba'i mar me ye shes sgron/__/ces pa ltar gzhi lam 'bras gsum thams cad snang gsal mar me 'di yi mtshon par byed cing mar me gcig la bltas pa'i rdo rje mched lcam rnams/__sa mchog 'od gsal rdo rje rtse mor mngon byang chub kyi bar du mi 'bral bar 'grogs shing ston 'khor dgongs pa dbyer med pa'i thugs 'dun dang bcas te mar me'i smon lam gyi rjes zlos gsung bar zhu/__/ces pa'i stong thun 'di yang kaHthog rgyud sde lha khang du sgrub mchod la nye bar mkho bas mkhan po bsod nams nas gsungs bskul bzhin chos kyi blo gros pas bris pa'o/__//__/