JKCL-KABUM-05-CA-004

Previous Text Back to Volume PageNext Text

ཆོ་འཕྲུལ་ཟླ་བའི་སྒྲུབ་མཆོད་ལ་མཁོ་བའི་མར་མེའི་སྨོན་ལམ་གྱི་སྟོང་ཐུན་སྐལ་བཟང་རྣ་བའི་དགའ་སྟོན།

Wylie title	cho 'phrul zla ba'i sgrub mchod la mkho ba'i mar me'i smon lam gyi stong thun skal bzang rna ba'i dga' ston
Location	chos kyi blo gros bka' 'bum Volume 5, Text 4, Pages 119-140 (Folios 1a to 11b1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. cho 'phrul zla ba'i sgrub mchod la mkho ba'i mar me'i smon lam gyi stong thun skal bzang rna ba'i dga' ston. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 119-140. Bir, H.P.: Khyentse Labrang, 2012.
Genre	Prayers - smon lam
Colophon	འཇམ་དབྱངས་ཆོས་ཀྱི་བློ་གྲོས་པས་ཆུ་འབྲུག་གནམ་ལོ་གསར་ཚེས་ཀྱི་དཀར་ཕྱོགས་རྒྱལ་བ་དང་པོའི་ཚེས་ལ་ཐུབ་གསུང་བློ་གྲོས་མི་ཟད་པའི་མོད་རྣ་བའི་བདུད་རྩིར་སིམ་བཞིན་སོར་རྩེའི་ཟློས་གར་དུ་བསྒྱུར་བ་འདིས་ཀྱང་དོན་གཉིས་ཕུན་སུམ་ཚོགས་པའི་དཔལ་ལ་སྤྱོད་པའི་རྒྱུར་བྱིན་གྱིས་བརླབས་ཏུ་གསོལ། །སརྦ་དཱ་མངྒ་ལཾ། །།
	'jam dbyangs chos kyi blo gros pas chu 'brug gnam lo gsar tshes kyi dkar phyogs rgyal ba dang po'i tshes la thub gsung blo gros mi zad pa'i mod rna ba'i bdud rtsir sim bzhin sor rtse'i zlos gar du bsgyur ba 'dis kyang don gnyis phun sum tshogs pa'i dpal la spyod pa'i rgyur byin gyis brlabs tu gsol/__/sarba dA mang+ga laM/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །ཆོ་འཕྲུལ་ཟླ་བའི་སྒྲུབ་མཆོད་ལ་མཁོ་བའི་མར་མེའི་སྨོན་ལམ་གྱི་སྟོང་ཐུན་སྐལ་བཟང་རྣ་བའི་དགའ་སྟོན་ཞེས་བྱ་བ་བཞུགས་སོ། ། དེ་ཡང་འོ་སྐོལ་གྱི་སྟོན་པ་ཐུབ་པའི་དབང་པོ་དེ་ཉིད་མངོན་པར་རྫོགས་པར་སངས་རྒྱས་ནས་གདུལ་བྱ་སོ་སོའི་བློ་དང་འཚམས་པར་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་བསྟན་པ་དེ་ཐམས་ཅད་ཀྱང་བསྡུ་ན་ཐེག་པ་ཆེ་ཆུང་གཉིས་སུ་འདུ་སྟེ། །ཀུན་བྱེད་རྒྱལ་པོའི་རྒྱུད་ལས། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །ཞེས་གསུང་པ་ལྟར་རྒྱུ་མཚན་ཉིད་ཀྱི་ཐེག་པ་ནི་ཝཱ་རཱ་ཎ་སཱི་དང་། བྱ་རྒོད་ཕུང་པོའི་རི་དང་ཡངས་པ་ཅན་ལ་སོགས་པའི་གནས་རྣམས་སུ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ནས་མཐར་ཡངས་པ་ཅན་གྱི་གྲོང་ཁྱེར་དུ་མྱ་ངན་ལས་འདའ་བར་དགོངས་ཏེ། འཁོར་གྱི་ནང་ནས་རྫུ་འཕྲུལ་ཆེར་སྤྱོད་ལ། འཇིག་རྟེན་དྲུག་གི་ཕྱོགས་བཅུ་ན། ང་ཡི་སློབ་མ་གང་དག་འཁོད་པ་ཇི་སྙེད་ཡོད་པ་རྣམས་བསྡུས་ཤིག །ངེས་པར་བཞག་པར་བྱ་བ་དག་ཡོད་དོ། །ཞེས་གསུངས་པས་རྫུ་འཕྲུལ་ཅན་དེས། རྒྱལ་བའི་ཞིང་གྱུར་རིགས་དྲུག་གང་སུ་དག །འདའ་བར་ངེས་ཤིང་ཚོགས་པ་ཀུན་ཉོན་ཅིག །དེང་འདིར་རྒྱལ་བས་བདུད་རྩི་གསུམ་འཇོག་གིས། དུག་གསུམ་འཇོམ་པར་འདོད་པ་ཀུན་འདུས་ཤིག །ཞེས་བསྒྲགས་པས། དམ་པའི་རིགས་ཅན་དྲྭ་མ་ལྔ་ནང་དུ་ཡང་དག་འཇོག་པ་ལ་གནས་པས་མ་འདུས། དེ་ལས་གཞན་པའི་འཁོར་ཐམས་ཅད་སྟོན་པའི་སྤྱན་སྔར་ལྷག་པ་ལ། སྟོན་པ་ཉིད་ཀྱི་བཀའ་སྩལ་པ། ཀྱེ། གྲོགས་པོ་དག་ཤེས་པར་གྱིས་ཤིག །འདུས་བྱས་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་སྟོང་ཞིང་བདག་མེད་པའོ། །ཞེས་སོགས་ནས། ང་ཡོངས་སུ་མྱ་ངན་ལས་འདའ་བས་སུ་དག་ཐེ་ཚོམ་མ་ཆོད་པ་རྣམས་དྲི་བ་གྱིས་ཤིག །ཅེས་བཀའ་སྩལ་པ་དང་། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུཉྫ་ར་ཞེས་བྱ་བ་སྟན་ལས་ལངས་ཏེ། །ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་དང་མཐུན་འཇུག་རུ། །འདའ་བས་ཡོངས་སུ་འདུལ་བར་དགོངས། །ཞེས་པ་ལ་སོགས་པ་སྔོན་དུ་འགྲོ་བས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུང་ལགས་ན། །རྒྱུ་འབྲས་གཞན་ནས་མ་འཚོལ་བའི། །འབྲས་བུའི་ཐེག་པ་ཅིས་མི་གསུང་ཞེས་པའི་ལན་དུ། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོང་དུས་ན་འབྱུང་བར་འགྱུར། ཞེས་ལུང་བསྟན་པ་དང་། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡིས། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་སུ། །མི་ལས་སྐལ་ལྡན་རིགས་ཅན་རེ། །རྒྱལ་པོ་ཛཿཞེས་བྱ་བ་ལ། ལག་ན་རྡོ་རྗེས་སྣང་བར་འགྱུར། །ཞེས་གསུང་པ་དང་མཐུན་པར། སྟོན་པ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན། དམ་པའི་རིགས་ཅན་དྲྭ་མ་ལྔ་ནང་དུ་ཡང་དག་འཇོག་པ་ལས་ལངས་ནས་རང་རང་གི་མངོན་པར་ཤེས་པས་རི་མ་ལ་ཡར་གནམ་ལྕགས་ཡོད་པའི་རྩེར་སྒྱུ་འཕྲུལ་གྱི་བྱ་བས་འདུས་ནས། ཕྱོགས་བཅུའི་སངས་རྒྱས་ཐམས་ཅད་ཡིད་ལ་བྱས་ཏེ་གདུང་ཚིག་ཉི་ཤུ་རྩ་བརྒྱད་བཏོན་པས། སྟོན་པ་ཉིད་ཀྱིས་གསང་སྔགས་རྡོ་རྗེའི་ཐེག་པ་རྒྱུ་ཡི་ཐེག་པའི་སྐབས་སུ་ཡང་སྐལ་ལྡན་གྱི་གདུལ་བྱ་ལྷ་ཀླུ་མིའི་རིག་འཛིན་སོགས་ལ་དངོས་སུ་གསུངས་པ་ཡིན་ཀྱང་། འཇིག་རྟེན་ཡོངས་གྲགས་ལ་རྒྱུའི་ཐེག་པས་རྒྱུད་སྦྱང་ནས། གསང་སྔགས་ཟབ་མོའི་སྣོད་དུ་གྱུར་པའི་དུས་ལ་བབས་པ་ན་སྔར་འོག་མིན་དུ་གསུང་པ་ཉིད་སླར་ཡང་འདིར་བཟླས་ཏེ་གསུང་པར་དགོངས་ཏེ། ཇི་སྐད་དུ། སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་དག་བདག་གིས་ཀྱང་། །ཐོག་མ་ཐ་མ་མེད་པ་རུ། །བདག་གི་དམ་བཅའ་མི་འདོར་བས། །བསྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་རྨད་དུ་བྱུང་བའི་ཆོ་འཕྲུལ་གྱིས་རི་བོ་མ་ལ་ཡའི་རྩེར་གཤེགས་ཏེ། རིགས་ཅན་དྲྭ་མ་ལྔ་དང་རིག་འཛིན་འདུས་པ་ཕལ་མོ་ཆེའི་འཁོར་གྱི་དབུས་སུ་གསང་བདག་ལག་ན་རྡོ་རྗེའི་སྐུ་ཡི་རྣམ་པར་བསྟན་ནས། སྔོན་འོག་མིན་དང་། དགའ་ལྡན་དང་སུམ་ཅུ་རྩ་གསུམ་གྱི་གནས་རྣམས་སུ་གྲགས་པའི་གསང་བའི་ཐེག་པ་ཉིད་སྟོན་པར་མཛད་ཅིང་། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻཌཱུརྱ་ཞུན་མས་བྲིས་ཏེ་དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེའི་ཚེ་དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་ཏེ། ཇི་སྐད་དུ་སྐུ་གསུང་ཐུགས་རྟེན་ཐིམ་པ་དང་། རིན་ཆེན་གླེགས་བམ་བབས་པ་དང་། ཆོས་ཀྱི་བགྲོ་བ་བྱས་པ་དང་། ཀུན་ཀྱི་དམ་པར་བསྒྲགས་པ་དང་། མཆོད་པ་ཆེན་པོ་བྱས་པ་དང་། རིན་ཆེན་ཆར་རྒྱུན་བབས་པ་དང་། སངས་རྒྱས་ས་ལ་ལུང་བསྟན་པའོ། །ཞེས་པའི་རྨིས་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབས་ཏེ། ཀྲིའི་རྒྱུད་རྣམས་ཝཱ་ར་ཎ་སིར་བབས། ཨུ་པ་ཡའི་རྒྱུད་རྣམས་རི་བོ་བྱ་རྐང་ཅན་དང་། སིལ་བའི་ཚལ་ལ་སོགས་པར་བབས། ཡོ་གའི་རྒྱུད་རྣམས་དུར་ཁྲོད་མེ་རི་འབར་བའི་རྩེ་མོར་བབས། མ་ཧཱ་ཡོ་གའི་རྒྱུད་རྣམས་ས་ཧོ་རའི་ཡུལ་ཏུ་རྒྱལ་པོ་ཛཿཡི་ཁང་སྟེང་དུ་བབས། ཨ་ནུ་ཡོ་གའི་རྒྱུད་རྣམས་སིང་ག་ལའི་གླིང་གི་ནགས་ཚལ་དུ་གླེགས་བམ་དང་བཅས་ཏེ་བབས། ཨ་ཏི་ཡོ་གའི་རྒྱུད་རྣམས་ནི་ནུབ་ཕྱོགས་ཨོ་ཊི་ཡ་ནའི་ཡུལ་དུ་སློབ་དཔོན་ཆེན་པོ་དགའ་རབ་རྡོ་རྗེས་དཔལ་རྡོ་རྗེ་སེམས་དཔའ་ལ་དངོས་སུ་གསན་ནས་གླེགས་བམ་ལ་བཀོད་པར་མཛད་དོ། །སྒྲུབ་སྡེ་ནི། སྔོན་འོག་མིན་གསང་བ་མཆོག་གི་གནས་སུ། སྟོན་པ་ཀུན་བཟང་ཆེ་མཆོག་ཧེ་རུ་ཀས། ཆོས་ཉིད་ཀྱི་རང་སྒྲས་གསུང་པའི་རྒྱུད་རྣམས་གསང་བདག་རྡོ་རྗེ་ཆོས་ཀྱི་རང་ཉིད་ཚོམ་བུ་དགུའི་དཀྱིལ་འཁོར་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་ལ་བཀོད་དེ་དགོངས་འབྲེལ་དུ་ལུང་ལྔ་ཡང་མཛད་ནས་མཁའ་འགྲོ་མ་ལས་ཀྱི་དབང་མོ་ཆེ་ལ་གཏད། དེས་སྤྱི་དང་བྱེ་བྲག་གི་རྒྱུད་རྣམས་སོ་སོར་ཕྱེས་ནས་རིན་པོ་ཆེའི་སྒྲོམ་བུ་སོ་སོར་བཅུག་སྟེ་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པ་ནམ་ཞིག་གི་ཚེ་གྲུབ་པ་བརྙེས་པའི་སློབ་དཔོན་བརྒྱད་ཀྱིས་གཏེར་སྲུང་རྣམས་ལ་བཀའ་བསྒོས་པས། བཀའ་བྱེ་བྲག་གི་སྒྲོམ་བུ་བརྒྱད་པོ་བཀའ་བབས་ཀྱི་སློབ་དཔོན་བརྒྱད་ལ་གཏད། སྤྱི་རྒྱུད་ཀྱི་སྒྲོམ་བུ་རིན་པོ་ཆེ་སྣ་བརྒྱད་ལས་བྱས་པ་རྒྱ་མ་ཁྲོལ་བར་སླར་དེ་ཉིད་དུ་གཏེར་དུ་སྦས་ནས་ཕྱིས་ཀུན་འདུས་རིག་འཛིན་སློབ་དཔོན་ཆེན་པོ་པདྨ་སཾ་བྷ་ཝས་སྤྱན་དྲངས་ཏེ། རྗེ་འབངས་སྙིང་གི་བུ་དགུའམ་ཉི་ཤུ་རྩ་ལྔ་ལ་ལེགས་པར་གདམས་ཤིང་གཏད་པའོ། །དེ་ལ་རྒྱུད་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་ག་གསུམ་གྱི་ནང་ནས་ལྟ་བ་གནས་ལུགས་ཀྱི་དོན་གཙོ་བོར་སྟོན་པར་བྱེད་པ་ལུང་ཨ་ནུ་ཡོ་གའི་ཐེག་པ་ནི། ལུང་གི་མ་ཧཱའི་རྒྱུད་ཡེ་ཤེས་རྔམས་གློག་གི་འཁོར་བའི་རྒྱུད། ལུང་གི་ལུང་རྩ་བའི་རྒྱུད། ཀུན་འདུས་རིག་པའི་རྒྱུད། ལུང་གི་ཨ་ཏི་སེམས་ལུང་ཆེན་མོའི་མདོ་ལྟ་བུ་སྟེ། ཨ་ནུའི་ནང་གསེས་ཀྱི་བསྐྱེད་རྫོགས་གསུམ་དང་། དེ་ཐམས་ཅད་ཀྱི་སྤྱི་དོན་དགོངས་པ་འདུས་པའི་མདོ། ཆ་མཐུན་གྱི་རྒྱུད་རྣམ་པར་སྣང་མཛད་ཐིག་ལེ་དབང་གི་ཏནྟྲ་དང་། དབང་བསྐུར་རྒྱལ་པོའི་རྒྱུད་སོགས་ཀྱི་དགོངས་དོན་མ་ལུས་པ་གཅིག་ཏུ་དྲིལ་བ། སྟེང་ཁང་ཞི་བའི་དཀྱིལ་འཁོར་དང་། འོག་ཁང་ཁྲོ་བོའི་དཀྱིལ་འཁོར་ཏེ། འདུས་པ་མདོ་ཡི་དཀྱིལ་འཁོར་ཞལ་ཕྱེས་ནས་སྒྲུབ་པའི་ཚུལ་ནི། ཆོས་ཐམས་ཅད་དཀྱིལ་འཁོར་རྣམ་པ་གསུམ་དུ་དབྱེར་མེད་རང་བཞིན་མ་འདྲེས་ཡོངས་རྫོགས་སུ་རྟོགས་པའི་ལྟ་བས་ཁོག་དབུབ། རྟོགས་དོན་ལྟ་བའི་རྗེས་སུ་འཇུག་པའི་མཚན་མེད་ཀྱི་ཏིང་ངེ་འཛིན་གྱིས་ཉམས་སུ་བླངས་པས་ཐུན་མོང་གི་དངོས་གྲུབ། དབང་པོ་དྲུག་གི་མངོན་ཤེས་དང་། སྒྱུ་མ་རྡོ་རྗེ་ལ་སོགས་པའི་ལས་འགྲུབ་ཅིང་མཆོག་གི་དངོས་གྲུབ། མཐོང་ལམ་དབུགས་ཆེན་འབྱིན་པའི་རྣལ་འབྱོར། སྒོམ་ལམ་ལུང་ཆེན་ཐོབ་པའི་རྣལ་འབྱོར། མཐར་ལམ་རྩལ་ཆེན་རྫོགས་པའི་རྣལ་འབྱོར། མཐར་ཐུག་འབྲས་བུ་སྐུ་བཞིའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ཐོབ་པར་བྱེད་པ་སྟེ། དེ་ལྟར་ཡང་། ཨ་ནུའི་ཡོ་གའི་ཐེག་པ་ནི། བར་མ་ཆོད་པའི་རྩེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་གསུངས་པའི་ཕྱིར་རོ། །དེ་ནས་དཔལ་ན་རག་དོང་སྤྲུག་མཚམས་མེད་ལྔ་སྦྱོང་གི་དཀྱིལ་འཁོར་ནི། གླང་པོ་ཆེ་རབ་འབོག་གི་རྒྱུད་ལས་བཀོལ་བའི་ཀལྤ་དུམ་བུའི་རྒྱུད། དྲི་མེད་བཤགས་རྒྱུད་ལ་བརྟེན་པ་རིགས་སོ་སོར་ཕྱེ་བའི་དཀྱིལ་འཁོར་ཞི་ཁྲོ་ཁྲོམ་དཀྲུགས་སུ་གྲགས་པའི་དཀྱིལ་འཁོར་ཆེན་པོ་ཞལ་ཕྱེ་ནས། རྣལ་འབྱོར་པ་རྣམས་ཀྱི་ཉམས་ཆགས་དང་རྟོགས་སྒྲིབ་ཐམས་ཅད་སྦྱོངས་བར་བྱེད་པའི་ཐབས། ཕྱི་ཡོ་བྱད་ཚོགས་ཀྱི་བཤགས་པ། ནང་ཕུང་པོ་རྟེན་གྱི་བཤགས་པ། གསང་བ་བྱང་ཆུབ་སེམས་ཀྱི་བཤགས་པ། སྨྲེ་བཤགས་འགྱོད་ཚིག་གི་བཤགས་པ་སྟེ། དེ་ལྟར་བཤགས་པའི་ཐབས་རྨད་དུ་བྱུང་བའི་དཀྱིལ་འཁོར་ཆེན་པོ་འདི་ཉིད་སྒྲུབ་ཅིང་མཆོད་པའི་ཕན་ཡོན་ནི། ཀལྤ་དུམ་བུའི་རྒྱུད་ལས། གང་གི་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆགས་ཀུན་ཀྱང་བྱང་གྱུར་ཏེ། །མཚམས་མེད་ལྔ་ཡི་སྡིག་ཀྱང་བྱང་། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པའི་ཕྱིར་དང་། དཔལ་རྡོ་རྗེ་སེམས་དཔའ་ཐུགས་ཀྱི་སྒྲུབ་པ་མ་བསྒྱུར་རྣལ་མ་ཞི་བའི་དཀྱིལ་འཁོར་ཏེ། སྒྱུ་འཕྲུལ་དྲ་བ་གསང་བ་སྙིང་པོའི་ཕྱག་རྒྱ་གཅིག་པའི་སྒྲུབ་ཐབས་ལ། གངས་ཅན་གྱི་ལྗོངས་འདིར་གཏེར་སྟོན་ཐམས་ཅད་ལས་བཀའ་གཏེར་བསྟན་པའི་མེ་རོ་གཞིར་བཞེངས་སུ་སློང་བའི་ཐུགས་བསྐྱེད་ཁྱད་པར་དུ་འཕགས་པ། ཨོ་རྒྱན་གཏེར་བདག་གླིང་པའི་ཟབ་གཏེར་ཐམས་ཅད་ཀྱི་རྩ་བ་དཔལ་རྡོ་རྗེ་སེམས་དཔའ་རིགས་ཐམས་ཅད་ཀྱི་ཁྱབ་བདག །དཀྱིལ་འཁོར་ཐམས་ཅད་ཀྱི་འཕྲོ་གཞི། དངོས་གྲུབ་ཐམས་ཅད་ཀྱི་རྩ་བ། ཕྲིན་ལས་ཐམས་ཅད་ཀྱི་འབྱུང་ཁུང་ཆེན་པོ་ཡིན་པས་འབྲེལ་ཚད་དོན་དང་ལྡན་ཅིང་ཁྱད་པར་དུ་འཕགས་པ་དང་། དེ་ནས་སྒྱུ་འཕྲུལ་ཞི་ཁྲོའི་དཀྱིལ་འཁོར་ནི། རྒྱུད་མ་ཧཱ་ཡོ་གའི་ཐེག་པ་ཉིད་རྒྱལ་པོ་ཛཿའི་ཁང་སྟེང་དུ་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབས་ཤིང་། དེ་ཡང་། ཏནྟྲ་ཆེན་པོ་སྡེ་བཅོ་བརྒྱད་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་པའི་རྒྱུད་སྡེ་ཆེན་པོ་ལྔ། སྒྲུབ་པ་ལག་ལེན་དུ་འགྲོ་བའི་བསྟན་ཕ་རོལ་པའི་རྒྱུད་སྡེ་ལྔ། སྤྱོད་པ་ལག་ལེན་དུ་འགྲོ་བའི་རྒྱུད་སྡེ་ལ། མ་ཚང་བ་ཁ་སྐོང་བར་བྱེད་པའི་རྒྱུད་ཕྱི་མ་གཉིས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་སྡེ་ཆེན་པོ་གཅིག་དང་བཅོ་བརྒྱད་དོ། །དེ་དག་གི་ཕྱི་མོ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་ནི་རྡོ་རྗེ་སེམས་དཔའ་སྒྱུ་འཕྲུལ་དྲ་བ་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡིན་ལ། འདི་ལྟར་ཞི་ཁྲོ་སོ་སོར་སྒྲུབ་པའི་ཐབས་ཚུལ་མང་དུ་ཡོད་ཀྱང་། ཞི་བ་འབྲིང་པོ་བཞི་བཅུ་རྩ་གཉིས་དང་ཁྲོ་བོ་བསྡུས་པ་ལྔ་བཅུ་རྩ་བརྒྱད་ཀྱི་དཀྱིལ་འཁོར་གཉིས་ལས། ཞི་བ་ནི་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་མངོན་པར་བྱང་ཆུབ་པ་ལྔའི་སྒོ་ནས་གསལ་བཏབ་སྟེ་སྒྲུབ་པས་ཐུན་མོངས་གི་དངོས་གྲུབ། ཡོན་ཏན་འབྱུང་བའི་དངོས་གྲུབ་དྲུག་དང་། འབྱུང་བའི་དངོས་གྲུབ་ལྔ། ལས་ཕྲན་ཚེགས་ཀྱི་དངོས་གྲུབ་བརྒྱད་ལ་སོགས་པ་འགྲུབ་ཅིང་། མཆོག་གི་དངོས་གྲུབ་ནི། རྒྱལ་བ་བཞི་བཅུ་རྩ་གཉིས་ཀྱི་གོ་འཕང་ཚེ་གཅིག་གིས་འགྲུབ་པ་སྟེ། སྒྱུ་འཕྲུལ་རྩ་རྒྱུད་ལས། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲ་བའི་དཀྱིལ་འཁོར་མངོན་རྫོགས་པ། །ཕྱོགས་བཅུ་དུས་བཞི་རྫོགས་པ་ཡིས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་གསུངས་པའི་ཕྱིར་རོ། །ཁྲོ་བོའི་དཀྱིལ་འཁོར་བསྡུས་པ་ནི། ཡོ་ག་གསུམ་གྱི་སྒོ་ནས་བདག་ཉིད་རྒྱུའི་ཧེ་རུ་ཀར་བསྐྱེད། དེའི་ཐུགས་ཀ་ནས་ས་བོན་སྤྲོས་ཏེ་གཞི་དབང་ཆེན་གྱི་དཀྱིལ་འཁོར་ནས་གཞལ་ཡས་ཁང་གདན་དང་བཅས་པ་གསལ་བཏབ་ནས། བདག་ཉིད་ཡེ་ནས་སངས་རྒྱས་པ་ཡིན་པའི་ཕྱིར། བདག་གི་སྲས་སུ་དེ་བཞིན་གཤེགས་པ་བྱ་བ་བདག་སྲས་ཀྱི་ཆོ་ག་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར། དེ་བཞིན་གཤེགས་པའི་སྲས་སུ་བདག་བྱ་བ་གཞན་སྲས་ཀྱི་ཆོ་ག་གཉིས་ཀྱི་སྒོ་ནས་བདག་དོན་ཆོས་སྐུའི་ཏིང་ངེ་འཛིན་གྱི་སྣང་འཛིན་གྱི་ཞེན་པ་སྦྱོང་བ་དང་། གཞན་དོན་གཟུགས་སྐུའི་ཏིང་ངེ་འཛིན་ཀྱི་སྟོང་འཛིན་གྱི་ཞེན་པ་སྦྱོང་བ་ལ་སོགས་ཏེ་སེམས་ཉིད་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོའི་ངང་དུ་མཉམ་པར་བཞག་ནས་ལྷ་སྔགས་ཏིང་ངེ་འཛིན་གྱི་ཕྱག་རྒྱ་ལས་མི་འདའ་བར་བྱས་པས་ཕྱག་ཆེན་དང་ལྷུན་གྲུབ་རིག་འཛིན་གྱི་སར་བསྒྲོད་ནས་དཔལ་ཧེ་རུ་ཀའི་གོ་འཕང་ཐོབ་པར་བྱེད་པ་སྟེ། རྩ་རྒྱུད་ལས། གང་གི་གླང་ཆེན་མྱོས་པའི་སེམས། མཉམ་པར་བཞག་པས་བརྟུལ་ནས་སུ། །སྔགས་དང་ཕྱག་རྒྱ་རབ་བརྟན་ནས། །དངོས་གྲུབ་ཡ་མཚན་ཆེན་པོ་འགྱུར། །ཞེས་གསུང་པའི་ཕྱིར་རོ། །དེ་ནས་སྒྲུབ་སྡེའི་ནང་ཚན་དུ་གཏོགས་ཐུགས་རིགས་པ་རང་བྱུང་གི་ཡེ་ཤེས། ཡང་དག་ཟླ་གམ་དགུ་པ་མར་མེའི་དཀྱིལ་འཁོར་ལ་བརྟེན་ནས་ཐུགས་རྡོ་རྗེའི་སྒྲུབ་པ་ནི། ཇི་སྐད་དུ། ཡང་དག་སྒྲུབ་པ་གཅིག་པུ་ཉིད། །སངས་རྒྱས་བདེ་གཤེགས་ཀུན་འདུས་པ། །རྣལ་འབྱོར་ཟབ་མོ་སྐུ་གསུང་ཐུགས། །མཁའ་འགྲོ་སྒྱུ་མ་བདེ་བའི་མཆོག །ཅེས་གསུང་པ་ལྟར་ཆོས་ཐམས་ཅད་རང་བཞིན་ཡེ་ནས་དག་པའི་དབྱིངས་ཉིད་གློ་བུར་དྲི་མའི་སྦུབས་ལས་གྲོལ་བས་དབྱིངས་དང་ཡེ་ཤེས་གཉིས་སུ་མེད་པའི་ཟུང་འཇུག་སངས་རྒྱས་ཐམས་ཅད་ཀྱི་ཉམས་སུ་མྱོང་བྱའི་བདེ་བ་ཆེན་པོ་མཆོག་ཏུ་མི་འགྱུར་བ་སྐུ་གསུམ་གྱི་ངོ་བོར་རྫོགས་པ་དེ་ལས་དམིགས་པ་མེད་པའི་རྩལ་སྣང་ཡེ་ཤེས་སྒྱུ་མའི་རྣམ་པར་ཐམས་ཅད་པར་འཆར་བའི་ཕྱག་རྒྱ་ཆེན་པོ་མཆོག་གི་དངོས་གྲུབ་བསྒྲུབ་པའི་ཚུལ། རྒྱུ་ཡི་ཏིང་ངེ་འཛིན་ཧཱུྃ་ཡིག་འོད་དུ་ཞུ་བ་ལས་རྡོ་རྗེ་སེམས་དཔའ་གྱུར། དེ་ལས་བྷྲཱུྃ་ཆད་པ་གཞི་དབང་ཆེན་གྱི་གཞལ་ཡས་ཁང་གདན་དང་བཅས་པར་གྱུར། སླར་ཡང་ཧཱུྃ་ཡིག་གླུར་བླངས་པས་རྡོར་སེམས་འོད་དུ་ཞུ་ཧཱུྃ་ཡིག་ཏུ་གྱུར་པ་དེ་ལས་ཧཱུྃ་གི་སྒྲ་གདངས་མཁའ་ཁྱབ་ཏུ་སྤྲོ་བསྡུའི་སྦྱོར་བས་བཛྲ་ཧེ་རུ་ཀ་སྨུག་ནག་ཚོན་གང་བར་གྱུར་ཏེ། དབུས་ཀྱི་གདན་སྟེང་དུ་བཞུགས་པ་ལ་ནམ་མཁའ་གང་བའི་དེ་བཞིན་གཤེགས་པ་རྣམས་ཀྱིས་སེམས་ཅན་གྱི་དོན་ལ་བསྐུར་བས་ཕྲིན་ལས་ཕྱག་རྒྱའི་དཀྱིལ་འཁོར་གྱི་རྣམ་པར་བཞེངས་པ་ལ་ལྷ་སྔགས་ཏིང་ངེ་འཛིན་གྱི་བསྙེན་ཅིང་སྒྲུབ་པས་ཐུན་མོངས་གི་དངོས་གྲུབ་ཞི་རྒྱས་ལ་སོགས་པ་བཞི་དང་། རལ་གྲི་དང་གྲུབ་པ་བརྒྱད་ལ་སོགས་པ་འགྲུབ་ཅིང་མཆོག་གི་དངོས་གྲུབ་ཕུང་ལྔ་རིགས་ལྔའི་ངོ་བོ་གྱུར་ཏེ། འཆི་མེད་རྡོ་རྗེའི་སྐུ་འགྲུབ་ནས་དཔལ་ཆེན་ཧེ་རུ་ཀའི་གོ་འཕང་ཐོབ་པ་སྟེ། དེ་ལྟར་ཡང་། ཡང་དག་གསང་བའི་ཐུགས་མཆོག་ལ། །སྒྲུབ་པའི་རྣལ་འབྱོར་དབང་ཕྱུག་རྣམས། །མི་ཚེ་གཅིག་ལ་མངོན་སངས་རྒྱས། །ལུས་མ་བོར་བར་ལྷ་སྐུར་འགྱུར། །ཞེས་གསུངས་པའི་ཕྱིར་རོ། །སྒྲུབ་ཆེན་བཀའ་བརྒྱད་དཔལ་ཆེན་འདུས་པའི་དཀྱིལ་འཁོར་ནི། སྔོན་བྱུང་འོག་མིན་དུ་གསུང་པ་དཔལ་རྡོ་རྗེ་ཆོས་ཀྱིས་བསྡུས་ནས་བསྟན་པ་འདི་ལ་མཆོག་གི་དངོས་གྲུབ་བརྙེས་པའི་གྲུབ་པ་བརྒྱད་ཀྱིས་མཆོད་རྟེན་བདེ་བྱེད་བརྩེགས་པ་ནས་གཏེར་དུ་དྲངས་ཤིང་། སླར་ཀུན་འདུས་རིན་པོ་ཆེ་སྣ་ལྔའི་སྒྲོམ་བུ་སློབ་དཔོན་པདྨ་སཾ་བྷ་ཝ་ལ་བསྟན་པ་བཞིན་ཨོ་རྒྱན་གྱི་སློབ་དཔོན་ཆེན་པོ་འདི་ཉིད་སྒྲུབ་པ་བརྒྱད་ཀྱི་བསྟན་པའི་བདག་པོར་བཞུགས་པས། གངས་ཅན་གྱི་ལྗོངས་འདིར། བླ་མ་བརྒྱད། ཡི་དམ་བརྒྱད། མཁའ་འགྲོ་བརྒྱད་ཀྱི་སྐོར་མཐའ་ཡས་པ་ཞིག་གཏེར་དུ་སྦས་པ་ལས། འདིར་མཆོག་གྲུབ་པའི་གྲུབ་ཐོབ་རྩོད་པ་དང་བྲལ་བ་གྲུབ་རྟགས་ཕྱག་རྒྱས་ཚད་མས་གྲུབ་པ་རྫོགས་པ་ཆེན་པོའི་བསྟན་པའི་མངའ་བདག་ཀུན་མཁྱེན་རིག་འཛིན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བ་བླ་མ་བཀའ་བརྒྱད་དྲག་པོ་དཔལ་ཆེན་འདུས་པའི་དཀྱིལ་འཁོར་དུ། འཇམ་དཔལ་སྐུ་འཁོར་ལོ་བཞི་ལ་བརྟེན་ཏེ་སྒྲུབ་པ། པདྨ་གསུང་རྟ་སྐད་ཐང་གསུམ། ཡང་དག་ཐུགས་རུ་ལུ་འབྲུ་བརྒྱད། བདུད་རྩི་ཡོན་ཏན་སྣང་སྲིད་བདུད་རྩི། ཕུར་པ་ཕྲིན་ལས་ཐལ་འབྱིན་བཞི་སྟེ། འཇིག་རྟེན་ལས་འདས་པའི་སྒྲུབ་སྡེ་ལྔ། མ་མོ་རྦོད་གཏོང་རྩ་རླུང་ཐིག་ལེ། བླ་མ་རིག་འཛིན་བསྙེན་སྒྲུབ་རྣམ་བཞི། དམོད་པ་དྲག་སྔགས་སྲོག་གི་གཟེར་བཞི། འཇིག་རྟེན་མཆོད་བསྟོད་རྫོང་འཁྲང་སྲོག་གསུམ་རྣམས་ཀྱི་དགོངས་པ་སྟེ། དེ་ལྟ་བུའི་བྱིན་རླབས་ཁྱད་པར་ཅན་དང་ལྡན་པས་འཇིག་རྟེན་གྱི་ལས་ཐམས་ཅད་འགྲུབ། འཇིག་རྟེན་ལས་འདས་པའི་འབྲས་བུ་མི་གནས་པའི་ཡེ་ཤེས་ཁྱབ་བདག་ཧེ་རུ་ཀའི་གོ་འཕང་ལ་འགོད་པའི་སྒྲུབ་སྡེའི་སྒྲུབ་མཆོད་བོད་ཡུལ་འདིར་བྱོན་པའི་ལྷ་སྔགས་ལ་ངོ་མཚར་བ་བསྒྲུབ་པ་བརྒྱད་ཀྱི་སྙིང་པོ་འདུས་པ་བྱིན་རླབས་ཀྱི་ཚན་ཁ་རྨད་དུ་བྱུང་བའོ། །དེ་ནས་མ་ཧཱ་ཡོ་གའི་ཐེག་པ་ལས་ཏནྟྲ་ཆེན་པོ་སྡེ་བཅོ་བརྒྱད་ཀྱི་ནང་ཚན་རྣལ་འབྱོར་མ་རྒྱུད་ཐམས་ཅད་ཀྱི་རྩ་བ་དཔལ་སངས་རྒྱས་ཐམས་ཅད་མཉམ་པར་སྦྱོར་བའི་དཀྱིལ་འཁོར་ཆེན་པོ་སྒྲུབ་པའི་ཚུལ་ནི། ཇི་སྐད་དུ། སྦྱོར་བ་བཞི་ཡི་རིམ་པ་ཡིས། །དེ་ཡི་ལམ་ལ་རབ་ཏུ་སྦྱོར། །ཞེས་པས། བསྐྱེད་རིམ་སྦྱོར་བ་བཞི་ལྡན་གྱི་རྣལ་འབྱོར་དང་། རྫོགས་རིམ་རྩ་རླུང་ཐིག་ལེའི་རྣལ་འབྱོར་ཉམས་སུ་བླངས་པས་སློབ་པའི་རིག་འཛིན་རྣམ་པ་བདུན་གྱི་གོ་འཕང་ཐོབ་ནས་སྔགས་ཀྱི་སྤྱོད་པ་སྤྱད་པས་མི་སློབ་པའི་ས་ཀུནྟུ་འོད་དང་པདྨ་ཅན་དང་། འཁོར་ལོ་ཚོགས་ཆེན་གྱི་ས་དང་། རྡོ་རྗེ་འཆང་དང་། ཡེ་ཤེས་བླ་མའི་ས་དང་། བདེ་བ་ཆེན་པོའི་ས་རྣམས་ཐོབ་པར་འགྱུར་ཏེ། དེ་ལྟར་ཡང་། རིག་འཛིན་རྣམ་པ་བདུན་གྱི་ནི། །རང་གི་ཡེ་ཤེས་གནས་སྦྱོང་ཞིང་། །གསང་སྔགས་མཐུན་པའི་ཁྱད་པར་གྱིས། །མོས་པའི་བློ་དང་དོན་མཐུན་སྟོན། །རྣམ་གྲོལ་ཟག་མེད་སངས་རྒྱས་ལ། །མཐར་ཕྱིན་འདི་ཡིས་རྟོགས་པར་བྱེད། །ཀུནྟུ་འོད་དང་པདྨ་ཅན། །ཡི་གེ་འཁོར་ལོ་རྡོ་རྗེ་འཆང་། །ཡེ་ཤེས་བླ་མའི་ས་གནོན་ནས། །ཟག་མེད་རྟག་ཏུ་བདེ་བར་བཞུགས། །ཞེས་གསུངས་སོ། །སྒྲུབ་སྡེའི་ནང་ཚན་དུ་གཏོགས་པ་དཔལ་ཆེན་རྡོ་རྗེ་ཕུར་པ་ནི། སྟོན་པ་ཕུན་སུམ་ཚོགས་པ་དང་པོའི་སངས་རྒྱས་ཀུན་ཏུ་བཟང་པོ། དུས་ཕུན་སུམ་ཚོགས་པ་དུས་བཞི་མཉམ་པ་ཉིད་ཀྱི་དུས། གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཞིང་ཁམས་སུ། སྐྱེ་མེད་མཐའ་བྲལ་ཆེན་པོའི་དགོངས་པ་ལས་མ་གཡོས་བཞིན་དུ་འགགས་མེད་ཀྱི་ཆོ་འཕྲུལ་བདག་ཉིད་རྩ་བའི་དཀྱིལ་འཁོར་རྡོ་རྗེ་གཞོན་ནུ་ཡབ་ཡུམ་གྱི་སྐུར་བཞེངས་ཏེ་ཐབས་ཤེས་གཉིས་སུ་མེད་པར་སྦྱོར་བ་ལས། འཁོར་ཕུན་སུམ་ཚོགས་པ་ཕྱོགས་བཅུའི་ཁྲོ་བོ་ཁྲ་ཐབས་དང་ཕུར་པ་སྲས་ཀྱི་དཀྱིལ་འཁོར་མངོན་པར་སྤྲུལ་ནས། ཆོས་ཕུན་སུམ་ཚོགས་པ་བི་ཏོ་ཏ་མལ་འབུམ་སྡེ་ལ་སོགས་པ་ཕྲིན་ལས་ཕུར་པའི་རྒྱུད་མཐའ་དག་གསུང་པ་རྣམས། སྟོན་པ་ཉིད་དང་། རྡོ་རྗེ་སེམས་དཔའ་དང་། ཕྱག་ན་རྡོ་རྗེ་དང་། མཁའ་འགྲོ་མ་དང་། བྲམ་ཟེ་མིའི་ཐོད་པ་ཅན་ལ་སོགས་པས་ཡང་དག་པར་བསྡུས་ནས་རིམ་པར་བརྒྱུད་པའི་ཁྱད་པར་དུ་མའི་བཀའ། སློབ་དཔོན་ཆེན་པོས་བོད་གངས་ཅན་ལྗོང་འདིར་རྗེ་འབངས་རྣམས་ལ་གནང་བ་ལས། རྒྱལ་པོ་ལུགས་སུ་གྲགས་པ། སྣ་ནམ། ཤུད་བུ། འཆི་མ་ལུགས། ཇོ་མོ་ལུགས། མཁོན་དང་། རོང་ཟོམ་ལུགས་སོགས་དུ་མ་འཕེལ་བའི་ཕྱིར། དེས་ན། མཁོན། གནུབ། རོག །རོང་། སོ། ཟུར། འོ་བྲན་ལ་སོགས་པའི་རུས་ཆེན་རྣམས་ཀྱི་གདུང་རིགས་༡ལས་རྡོ་རྗེ་ཕུར་པའི་གྲུབ་པ་ཐོབ་པ་ནི་བོད་ཡུལ་འདིར་ཤིན་ཏུ་མང་ཞིང་། ཁྱད་པར་དུ་རོང་ཕུར་ནི་སྣ་ནམ་ལས་རིང་བརྒྱུད་དང་། རོང་བན་ཡོན་ཏན་རིན་ཆེན་གྱིས་སློབ་དཔོན་པདྨ་དངོས་ལ་གཏུག་ནས་གསན་ཏེ་མི་ཡུལ་དུ་ལོ་སུམ་བརྒྱ་བཞུགས་ནས་མཐར་སྐུ་ལུས་མ་སྤངས་པར་མཁའ་སྤྱོད་དུ་གཤེགས། དེའི་སྲས་རོང་བན་རིན་ཆེན་ཚུལ་ཁྲིམས་ཀྱང་ལོ་ཕྱེད་གཉིས་བརྒྱ་བཞུགས། དེའི་སྲས་རོང་ཟོམ་ལོ་བརྒྱ་དང་བཅུ་དགུ་བཞུགས་ནས་སྐུ་བགྲེས་རྒུད་མི་མངའ་བས། དེ་དག་ལ་སྲས་བརྒྱུད་ཕུར་པའི་གྲུབ་ཐོབ་ཟམ་མ་ཆད་པར་རིམ་པར་བརྒྱུད་པའི་བཀའ་སྲོལ་དེ་ཉིད་ཀྱི་དཀྱིལ་འཁོར་ཆེན་པོ་ཞལ་ཕྱེ་ནས་སྒྲུབ་པའི་ཚུལ་ནི། སྙན་རྒྱུད་མན་ངག་ལས། རྣལ་འབྱོར་མན་ངག་གདེང་ལྡན་པས། །བསྙེན་པས་ཉེ་བར་གྱུར་པ་དང་། །བསྒྲུབས་ནས་ལས་ལ་སྦྱར་བ་ཡིས། །འགྲུབ་གྱུར་འདི་ལ་ཐེ་ཚོམ་མེད། །ཞེས་དང་། སེམས་ཉིད་རྡོ་རྗེ་ཀཱི་ལ་ཡ། །ཡེ་ཤེས་རྩེ་མོས་ཐམས་ཅད་འདེབས། །དེ་ཡི་སྣོད་བཅུད་རྣམ་པར་དག །བྱེད་སྤྱོད་ཐམས་ཅད་ཚོགས་གཉིས་འགྱུར། །ཞེས་སོ། །བཀའ་མའི་གུ་དྲག་འོ་བྲན་བྲག་དམར་ཞེས་གྲགས་པ་ནི། གདུལ་བྱ་ཞི་བས་མི་ཐུལ་བ་རྣམས་འདུལ་བའི་ཕྱིར། བླ་མ་དྲག་པོའི་སྒྲུབ་ཐབས་ཨོ་རྒྱན་ཆེན་པོས། འོ་བྲན་དཔལ་གྱི་དབང་ཕྱུག་ལ་གནང་། དེས་སྲས་དཔལ་གྱི་དབང་ཕྱུག་སོགས་གདུང་བརྒྱུད་ཟམ་མ་ཆོད་པར་བརྒྱུད་པའི་འོ་བྲན་དྲག་པོའི་དཀྱིལ་འཁོར་གྱི་ལས་རིམ་དང་རྗེས་སུ་འབྲེལ་བར་ཨ་ནུ་ཡོ་གའི་སྤྱི་མདོ་དགོངས་འདུས་དང་། སྒྱུ་འཕྲུལ་དྲ་བ་བཤད་པའི་རྒྱུད་ཐལ་བ་དང་། བྱེ་བྲག་གི་དགོས་བརྒྱུད་མཚོན་ཆ་མངོན་པར་རོལ་པའི་རྒྱུད་རྣམས་ཀྱི་བསྟན་དོན། དཔལ་ཡེ་ཤེས་ཀྱི་མགོན་པོ་ལེགས་ལྡན་ཚོགས་ཀྱི་བདག་པོའི་སྒྲུབ་པའི་ཕྲིན་ལས་ཀྱི་རིམ་པ་དང་། དྲག་སྔགས་ཀྱི་བདག་པོ་གནུབ་ཆེན་ཡབ་སྲས་ཀྱི་ཐུགས་དམ་གཤིན་རྗེ་གཤེད་དམར་ནག་གཉིས་སུ་གྲགས་པའི་འཇམ་དཔལ་མེ་རུ་རྩེ་དམར་པོ་དང་། ཁ་ཐུན་ནག་པོ་གཉིས་ཀྱི་སྒྲུབ་པའི་དཀྱིལ་འཁོར་དང་། གཞན་ཡང་སློབ་དཔོན་སངས་རྒྱས་གསང་བའི་ལུགས་བདུད་རྩི་འཁྱིལ་པ་འཆི་མེད་ཚེ་ཡི་རྒྱུད་ལ་བརྟེན་པའི་ཚེ་སྒྲུབ་ལུང་ལུགས་སུ་གྲགས་པའི་དཀྱིལ་འཁོར་དང་། འདུས་པ་མདོ་ཡི་ཡན་ལག་གི་ཆོ་ག །གནས་བརྟན་ནི། སངས་རྒྱས་བཅོམ་ལྡན་འདས་ཀྱི་བསྟན་པ་དམ་པའི་ཆོས་སྐྱོང་ཞིང་། སྟོན་པ་ཐུགས་རྗེ་ཅན་ཉིད་ཀྱི་བཀའ་སྡོད་བཞི་བཞི་ཞེས་པ། འཕགས་པའི་གནས་བརྟན་བཅུ་དྲུག་པོ་འདི་ཉིད་རྣམ་པ་ཉན་ཐོས་ཀྱི་ཚུལ་བཟུང་ཡང་། ངོ་བོ་ས་ཐོབ་པའི་འཕགས་ཆེན་བྱང་ཆུབ་སེམས་དཔའ་གཞན་དོན་དུ་འཕགས་པ་དགྲ་བཅོམ་པའི་གཟུགས་ཀྱིས་རང་དོན་དུ་རྣམས་པར་ཐར་པ་བརྒྱད་ལ་མངའ་བརྙེས་ཀྱང་སྐུ་མྱ་ངན་ལས་མི་འདའ་བར་འཛམ་བུའི་གླིང་དང་། ལྷའི་གནས་ལ་སོགས་པར་སྐྱེས་བུ་རྣམས་ཀྱི་ཚེ་ལོ་ཡར་འཕེལ་བདུན་བརྒྱའི་དུས་བར་དུ་བཞུགས་ནས་གནས་སོ་སོར་སངས་རྒྱས་ཀྱི་བསྟན་པ་དར་ཞིང་འཁོར་རྣམ་བཞི་རྒྱས་པར་བྱིན་གྱིས་བརླབས་པ་དང་། དགེ་འདུན་རྣམས་ཀྱི་ཚུལ་ཁྲིམས་རྣམ་པར་དག་པ་དང་། འགྲོ་བ་ཐམས་ཅད་བསོད་ནམས་སྤེལ་བ་དང་། ཡོངས་སུ་སྦྱོང་བར་མཛད་པའི་ཕྱིར་འཁོར་དགྲ་བཅོམ་པ་རྣམས་དང་ཐབས་གཅིག་ཏུ་བཞུགས་ཤིང་། འཕགས་པའི་གནས་བརྟན་དེ་དག་ལ་གསོལ་བ་བཏབ་ན་བསྟན་པ་དར་བ་གསུངས་པས། དེ་མཆོད་པའི་ཆོ་ག་ལ་མདོ་ལུགས་བསྟན་པ་སྔ་དར་དང་ཕྱི་དར་གྱི་ལུགས་ཐ་དད་པ་ཇོ་བོ་རྗེ་ནས་སྣར་ཐང་བའི་ལུགས་སོགས་མང་དུ་བཞུགས་པ་ལས། འདི་ནི་སྔ་འགྱུར་བཀའ་མའི་འདུས་པ་ཆེན་པོ་མདོ་ཡི་ཡན་ལག་ཐེག་པ་དགུའི་དཀྱིལ་འཁོར་དང་རྗེས་སུ་འབྲེལ་བ་ཉན་ཐོས་ཀྱི་ཐེག་པའི་ཡན་ལག་འཕགས་པའི་གནས་བརྟན་མཆོད་པ་སྟེ་འཇིག་རྟེན་གྱི་ཁམས་སུ་ཕན་བདེ་སྤེལ་བའི་ཐབས་རྨད་དུ་བྱུང་བ་ཡིན་ནོ། །དེ་དང་རྗེས་སུ་འབྲེལ་བ་མདོའི་ཡན་ལག་གི་ཆོ་ག་མགྲོན་རྣམ་པ་བཞི་ལ་མཆོད་སྦྱིན་བྱ་བ་ཆ་གསུམ་རྡོ་རྗེ་སེམས་དཔའི་དཀྱིལ་འཁོར་གྱི་རིམ་པ་སྟེ། དེ་ལྟར་སྔ་འགྱུར་བསྟན་པ་རྒྱ་མཚོའི་རྒྱུད་ལུང་མན་ངག་གསུམ་གྱི་དགོངས་དོན། མན་ངག་ཟབ་དགུའི་སྙིང་པོ། མཆོག་ཐུན་གྱི་དངོས་གྲུབ་ཚེ་འདི་ཉིད་ལ་ཐོབ་པར་བྱེད་པའི་མྱུར་ལམ་དཀྱིལ་འཁོར་ཆེན་པོ་རྣམས་ཞལ་ཕྱེས་ནས་བསྙེན་སྒྲུབ་ཡན་ལག་བཞིའི་སྒོ་ནས་སྒྲུབ་པའི་དགེ་རྩ་བླ་ན་མེད་པའི་བྱང་ཆུབ་ཆེན་པོར་བསྔོ་ཞིང་མར་མེའི་སྨོན་ལམ་ཀྱི་རྒྱས་འདེབས་པ་ནི། ཡང་དག་གི་རྒྱུད་ལས། འབྲས་བུ་རང་བྱུང་ཡེ་ཤེས་མེ་ཤར་བས། །མཐའ་དབུས་མེད་པར་གསལ་བའི་འོད་འབར་འདི། །འཁོར་བའི་མུན་པ་གཞོམ་ཕྱིར་བཞེས་སུ་གསོལ། །ཞེས་གསུངས་པ་ལྟར་སེམས་ཅན་ཐམས་ཅད་ཀྱི་རྒྱུད་ལ་ཟག་མེད་རང་བྱུང་གི་ཡེ་ཤེས་ཀྱི་སྣང་བ་རང་ཆས་སུ་བཞུགས་པ་ཉིད། མར་མེའི་སྣང་བ་འདི་ལྟ་བུས་མཚོན། རྟེན་ཅིང་འབྲེལ་འབྱུང་གི་མཐུ་ལ་བརྟེན་ནས། ཡང་དག་པའི་སྣང་བ་འབྲས་བུ་རང་བྱུང་གི་ཡེ་ཤེས་ཀྱི་མེ་ཆེན་རབ་ཏུ་སྦར་བས་མ་རིག་འཁོར་བའི་མུན་ཁང་མཐའ་དག་ཅིག་ཆར་དུ་བཅོམ་ནས་ཕན་བདེའི་ཡེ་ཤེས་ཀྱི་སྣང་བ་མཐའ་དབུས་མེད་པར་ཁྱབ་པའི་ཐུགས་རྗེས་ལུས་ཅན་མཐའ་དག་དཔལ་ཀུན་ཏུ་བཟང་པོའི་གོ་འཕང་ད་ལྟ་ཉིད་དུ་ཐོབ་པའི་རེ་སྨོན་ཐུགས་ལ་ཞུགས་པའི་རྗེས་ཟློས་གནང་བ་ཞུ། ཞེས་བྱས་ལ་མཆེད་ལྕམ་ཐམས་ཅད་ལག་གཉིས་བསྣོལ་ལ་གཡོན་མར་མེའི་རྐང་བུ་བཟུང་སྲིན་མཛུབ་ལུ་གུ་རྒྱུད་ལ་སྦྲེལ་ནས། ཧཱུྃ། དུར་ཁྲོད་གསང་བ་མཆོག་གི་སོགས། སྙན་པའི་དབྱངས་དང་བཅས་རྗེས་ཟློས་བྱེད་དུ་གཞུགསྨིན་གླིང་མཁན་རིན་པོ་ཆེ་ཨོ་རྒྱན་ཆོས་གྲགས་ཀྱི་མཛད་པ་གཞིར་བྱས། རྗེ་བླ་མ་སི་ཏུ་ཆོས་ཀྱི་རྒྱ་མཚོའི་གསུང་འཐོར་བུ་རྣམས་ཕྱོགས་གཅིག་དུ་བསྡུས་ཏེ་བཀོད་པའོ། །ཞུགས་ནས་འདུས་པ་ཡོངས་ཀྱི་མགོན་དུ་བཞུགས་པ་རྡོ་རྗེ་སློབ་དཔོན་གྱི་ཞལ་ནས་གསུང་པ་ལ་ཀུན་གྱི་རྗེས་ཟློས་གནང་བ་ཞུ། འཇམ་དབྱངས་ཆོས་ཀྱི་བློ་གྲོས་པས་ཆུ་འབྲུག་གནམ་ལོ་གསར་ཚེས་ཀྱི་དཀར་ཕྱོགས་རྒྱལ་བ་དང་པོའི་ཚེས་ལ་ཐུབ་གསུང་བློ་གྲོས་མི་ཟད་པའི་མོད་རྣ་བའི་བདུད་རྩིར་སིམ་བཞིན་སོར་རྩེའི་ཟློས་གར་དུ་བསྒྱུར་བ་འདིས་ཀྱང་དོན་གཉིས་ཕུན་སུམ་ཚོགས་པའི་དཔལ་ལ་སྤྱོད་པའི་རྒྱུར་བྱིན་གྱིས་བརླབས་ཏུ་གསོལ། །སརྦ་དཱ་མངྒ་ལཾ། །། །

[edit]

@#/__/cho 'phrul zla ba'i sgrub mchod la mkho ba'i mar me'i smon lam gyi stong thun skal bzang rna ba'i dga' ston zhes bya ba bzhugs so/__/ de yang 'o skol gyi ston pa thub pa'i dbang po de nyid mngon par rdzogs par sangs rgyas nas gdul bya so so'i blo dang 'tshams par chos kyi bdud rtsi bsam gyis mi khyab pa zhig bstan pa de thams cad kyang bsdu na theg pa che chung gnyis su 'du ste/__/kun byed rgyal po'i rgyud las/__/mtshan nyid rgyu yi theg pa dang /__/'bras bu rdo rje'i theg pa'o/__/zhes gsung pa ltar rgyu mtshan nyid kyi theg pa ni wA rA Na sI dang /__bya rgod phung po'i ri dang yangs pa can la sogs pa'i gnas rnams su chos kyi 'khor lo rim pa gsum du bskor nas mthar yangs pa can gyi grong khyer du mya ngan las 'da' bar dgongs te/__'khor gyi nang nas rdzu 'phrul cher spyod la/__'jig rten drug gi phyogs bcu na/__nga yi slob ma gang dag 'khod pa ji snyed yod pa rnams bsdus shig__/nges par bzhag par bya ba dag yod do/__/zhes gsungs pas rdzu 'phrul can des/__rgyal ba'i zhing gyur rigs drug gang su dag__/'da' bar nges shing tshogs pa kun nyon cig__/deng 'dir rgyal bas bdud rtsi gsum 'jog gis/__dug gsum 'jom par 'dod pa kun 'dus shig__/zhes bsgrags pas/__dam pa'i rigs can drwa ma lnga nang du yang dag 'jog pa la gnas pas ma 'dus/__de las gzhan pa'i 'khor thams cad ston pa'i spyan sngar lhag pa la/__ston pa nyid kyi bka' stsal pa/__kye/__grogs po dag shes par gyis shig__/'dus byas thams cad ni mi rtag pa'o/__/chos thams cad ni stong zhing bdag med pa'o/__/zhes sogs nas/__nga yongs su mya ngan las 'da' bas su dag the tshom ma chod pa rnams dri ba gyis shig__/ces bka' stsal pa dang /__'khor gyi nang nas rig 'dzin gyi rgyal po kuny+dza ra zhes bya ba stan las langs te/__/khyod ni nam mkha'i rang bzhin te/__/'da' dang mi 'da' yongs mi mnga'/__/'jig rten pa dang mthun 'jug ru/__/'da' bas yongs su 'dul bar dgongs/__/zhes pa la sogs pa sngon du 'gro bas/__'dren pa'i theg pa gsum po dag__/bcom ldan nges par gsung lags na/__/rgyu 'bras gzhan nas ma 'tshol ba'i/__/'bras bu'i theg pa cis mi gsung zhes pa'i lan du/__rgyu la mos pa rgyu chos kyi/__/'khor lo rab tu bskor byas nas/__/rdo rje theg pa'i nye lam zhig__/ma 'ong dus na 'byung bar 'gyur/__zhes lung bstan pa dang /__nga ni 'di nas mi snang nas/__/lo ni brgya dang bcu gnyis na/__/lha gnas gsum du grags pa yis/__/bstan pa'i snying po dam pa zhig__/'dzam gling shar gyi phyogs mtshams su/__/mi las skal ldan rigs can re/__/rgyal po dzaHzhes bya ba la/__lag na rdo rjes snang bar 'gyur/__/zhes gsung pa dang mthun par/__ston pa mya ngan las 'das nas lo nyi shu rtsa brgyad 'das pa na/__dam pa'i rigs can drwa ma lnga nang du yang dag 'jog pa las langs nas rang rang gi mngon par shes pas ri ma la yar gnam lcags yod pa'i rtser sgyu 'phrul gyi bya bas 'dus nas/__phyogs bcu'i sangs rgyas thams cad yid la byas te gdung tshig nyi shu rtsa brgyad bton pas/__ston pa nyid kyis gsang sngags rdo rje'i theg pa rgyu yi theg pa'i skabs su yang skal ldan gyi gdul bya lha klu mi'i rig 'dzin sogs la dngos su gsungs pa yin kyang /__'jig rten yongs grags la rgyu'i theg pas rgyud sbyang nas/__gsang sngags zab mo'i snod du gyur pa'i dus la babs pa na sngar 'og min du gsung pa nyid slar yang 'dir bzlas te gsung par dgongs te/__ji skad du/__sems kyi dkyil 'khor me long bzhin/__/bstan pa de dag bdag gis kyang /__/thog ma tha ma med pa ru/__/bdag gi dam bca' mi 'dor bas/__/bskul ba'i dus ni gang byung ba/__/bdag kyang de bzhin cho 'phrul snang /__/zhes rmad du byung ba'i cho 'phrul gyis ri bo ma la ya'i rtser gshegs te/__rigs can drwa ma lnga dang rig 'dzin 'dus pa phal mo che'i 'khor gyi dbus su gsang bdag lag na rdo rje'i sku yi rnam par bstan nas/__sngon 'og min dang /__dga' ldan dang sum cu rtsa gsum gyi gnas rnams su grags pa'i gsang ba'i theg pa nyid ston par mdzad cing /__de rnams srin po blo gros thabs ldan gyis gser gyi glegs bam la baiDUr+ya zhun mas bris te dgongs pa'i rtsal bdun gyis nam mkha' la sbas so/__/de'i tshe de'i byin rlabs kyis sa ho ra'i rgyal po dzaHla rmi ltas ngo mtshar ba bdun rmis te/__ji skad du sku gsung thugs rten thim pa dang /__rin chen glegs bam babs pa dang /__chos kyi bgro ba byas pa dang /__kun kyi dam par bsgrags pa dang /__mchod pa chen po byas pa dang /__rin chen char rgyun babs pa dang /__sangs rgyas sa la lung bstan pa'o/__/zhes pa'i rmis ltas dang mthun par rgyud sde'i glegs bam rnams mi yul du dngos su babs te/__kri'i rgyud rnams wA ra Na sir babs/__u pa ya'i rgyud rnams ri bo bya rkang can dang /__sil ba'i tshal la sogs par babs/__yo ga'i rgyud rnams dur khrod me ri 'bar ba'i rtse mor babs/__ma hA yo ga'i rgyud rnams sa ho ra'i yul tu rgyal po dzaHyi khang steng du babs/__a nu yo ga'i rgyud rnams sing ga la'i gling gi nags tshal du glegs bam dang bcas te babs/__a ti yo ga'i rgyud rnams ni nub phyogs o Ti ya na'i yul du slob dpon chen po dga' rab rdo rjes dpal rdo rje sems dpa' la dngos su gsan nas glegs bam la bkod par mdzad do/__/sgrub sde ni/__sngon 'og min gsang ba mchog gi gnas su/__ston pa kun bzang che mchog he ru kas/__chos nyid kyi rang sgras gsung pa'i rgyud rnams gsang bdag rdo rje chos kyi rang nyid tshom bu dgu'i dkyil 'khor du snang bar mdzad nas thog mar ngag tu bsdus/__de nas glegs bam la bkod de dgongs 'brel du lung lnga yang mdzad nas mkha' 'gro ma las kyi dbang mo che la gtad/__des spyi dang bye brag gi rgyud rnams so sor phyes nas rin po che'i sgrom bu so sor bcug ste mchod rten bde byed brtsegs par gter du sbas pa nam zhig gi tshe grub pa brnyes pa'i slob dpon brgyad kyis gter srung rnams la bka' bsgos pas/__bka' bye brag gi sgrom bu brgyad po bka' babs kyi slob dpon brgyad la gtad/__spyi rgyud kyi sgrom bu rin po che sna brgyad las byas pa rgya ma khrol bar slar de nyid du gter du sbas nas phyis kun 'dus rig 'dzin slob dpon chen po pad+ma saM b+ha was spyan drangs te/__rje 'bangs snying gi bu dgu'am nyi shu rtsa lnga la legs par gdams shing gtad pa'o/__/de la rgyud ma hA yo ga__/lung a nu yo ga__/man ngag a ti yo ga gsum gyi nang nas lta ba gnas lugs kyi don gtso bor ston par byed pa lung a nu yo ga'i theg pa ni/__lung gi ma hA'i rgyud ye shes rngams glog gi 'khor ba'i rgyud/__lung gi lung rtsa ba'i rgyud/__kun 'dus rig pa'i rgyud/__lung gi a ti sems lung chen mo'i mdo lta bu ste/__a nu'i nang gses kyi bskyed rdzogs gsum dang /__de thams cad kyi spyi don dgongs pa 'dus pa'i mdo/__cha mthun gyi rgyud rnam par snang mdzad thig le dbang gi tan+t+ra dang /__dbang bskur rgyal po'i rgyud sogs kyi dgongs don ma lus pa gcig tu dril ba/__steng khang zhi ba'i dkyil 'khor dang /__'og khang khro bo'i dkyil 'khor te/__'dus pa mdo yi dkyil 'khor zhal phyes nas sgrub pa'i tshul ni/__chos thams cad dkyil 'khor rnam pa gsum du dbyer med rang bzhin ma 'dres yongs rdzogs su rtogs pa'i lta bas khog dbub/__rtogs don lta ba'i rjes su 'jug pa'i mtshan med kyi ting nge 'dzin gyis nyams su blangs pas thun mong gi dngos grub/__dbang po drug gi mngon shes dang /__sgyu ma rdo rje la sogs pa'i las 'grub cing mchog gi dngos grub/__mthong lam dbugs chen 'byin pa'i rnal 'byor/__sgom lam lung chen thob pa'i rnal 'byor/__mthar lam rtsal chen rdzogs pa'i rnal 'byor/__mthar thug 'bras bu sku bzhi'i bdag nyid dpal kun tu bzang po'i go 'phang thob par byed pa ste/__de ltar yang /__a nu'i yo ga'i theg pa ni/__bar ma chod pa'i rtse gcig gis/__/sangs rgyas sa la nges par 'gro/__/zhes gsungs pa'i phyir ro/__/de nas dpal na rag dong sprug mtshams med lnga sbyong gi dkyil 'khor ni/__glang po che rab 'bog gi rgyud las bkol ba'i kalpa dum bu'i rgyud/__dri med bshags rgyud la brten pa rigs so sor phye ba'i dkyil 'khor zhi khro khrom dkrugs su grags pa'i dkyil 'khor chen po zhal phye nas/__rnal 'byor pa rnams kyi nyams chags dang rtogs sgrib thams cad sbyongs bar byed pa'i thabs/__phyi yo byad tshogs kyi bshags pa/__nang phung po rten gyi bshags pa/__gsang ba byang chub sems kyi bshags pa/__smre bshags 'gyod tshig gi bshags pa ste/__de ltar bshags pa'i thabs rmad du byung ba'i dkyil 'khor chen po 'di nyid sgrub cing mchod pa'i phan yon ni/__kalpa dum bu'i rgyud las/__gang gi sgyu 'phrul zhi khro yi/__/dkyil 'khor lha la phyag 'tshal na/__/nyams chags kun kyang byang gyur te/__/mtshams med lnga yi sdig kyang byang /__/na rag gnas kyang dong sprugs te/__/rig 'dzin rgyal ba'i zhing du grags/__/zhes gsungs pa'i phyir dang /__dpal rdo rje sems dpa' thugs kyi sgrub pa ma bsgyur rnal ma zhi ba'i dkyil 'khor te/__sgyu 'phrul dra ba gsang ba snying po'i phyag rgya gcig pa'i sgrub thabs la/__gangs can gyi ljongs 'dir gter ston thams cad las bka' gter bstan pa'i me ro gzhir bzhengs su slong ba'i thugs bskyed khyad par du 'phags pa/__o rgyan gter bdag gling pa'i zab gter thams cad kyi rtsa ba dpal rdo rje sems dpa' rigs thams cad kyi khyab bdag__/dkyil 'khor thams cad kyi 'phro gzhi/__dngos grub thams cad kyi rtsa ba/__phrin las thams cad kyi 'byung khung chen po yin pas 'brel tshad don dang ldan cing khyad par du 'phags pa dang /__de nas sgyu 'phrul zhi khro'i dkyil 'khor ni/__rgyud ma hA yo ga'i theg pa nyid rgyal po dzaH'i khang steng du tan+t+ra chen po sde bco brgyad kyi glegs bam char du babs shing /__de yang /__tan+t+ra chen po sde bco brgyad ni/__sku gsung thugs yon tan phrin las lnga'i gzhi dang rtsa bar gyur pa'i rgyud sde chen po lnga/__sgrub pa lag len du 'gro ba'i bstan pha rol pa'i rgyud sde lnga/__spyod pa lag len du 'gro ba'i rgyud sde la/__ma tshang ba kha skong bar byed pa'i rgyud phyi ma gnyis/__de thams cad kyi bsdus don lta bu'i rgyud sde chen po gcig dang bco brgyad do/__/de dag gi phyi mo thams cad kyi bsdus don lta bu'i rgyud ni rdo rje sems dpa' sgyu 'phrul dra ba dpal gsang ba'i snying po de kho na nyid nges pa'i rgyud kyi rgyal po chen po 'di nyid yin la/__'di ltar zhi khro so sor sgrub pa'i thabs tshul mang du yod kyang /__zhi ba 'bring po bzhi bcu rtsa gnyis dang khro bo bsdus pa lnga bcu rtsa brgyad kyi dkyil 'khor gnyis las/__zhi ba ni gzhi rgyud rang bzhin lhun gyis grub pa'i dkyil 'khor mngon par byang chub pa lnga'i sgo nas gsal btab ste sgrub pas thun mongs gi dngos grub/__yon tan 'byung ba'i dngos grub drug dang /__'byung ba'i dngos grub lnga/__las phran tshegs kyi dngos grub brgyad la sogs pa 'grub cing /__mchog gi dngos grub ni/__rgyal ba bzhi bcu rtsa gnyis kyi go 'phang tshe gcig gis 'grub pa ste/__sgyu 'phrul rtsa rgyud las/__sgyu 'phrul dkyil 'khor bzhi bcu gnyis/__/dra ba'i dkyil 'khor mngon rdzogs pa/__/phyogs bcu dus bzhi rdzogs pa yis/__/dkyil 'khor thams cad 'grub par 'gyur/__/zhes gsungs pa'i phyir ro/__/khro bo'i dkyil 'khor bsdus pa ni/__yo ga gsum gyi sgo nas bdag nyid rgyu'i he ru kar bskyed/__de'i thugs ka nas sa bon spros te gzhi dbang chen gyi dkyil 'khor nas gzhal yas khang gdan dang bcas pa gsal btab nas/__bdag nyid ye nas sangs rgyas pa yin pa'i phyir/__bdag gi sras su de bzhin gshegs pa bya ba bdag sras kyi cho ga dang /__rigs mi nub cing lhun gyis grub par bya ba'i phyir/__de bzhin gshegs pa'i sras su bdag bya ba gzhan sras kyi cho ga gnyis kyi sgo nas bdag don chos sku'i ting nge 'dzin gyi snang 'dzin gyi zhen pa sbyong ba dang /__gzhan don gzugs sku'i ting nge 'dzin kyi stong 'dzin gyi zhen pa sbyong ba la sogs te sems nyid bden pa dbyer med lhag pa'i chos sku chen po'i ngang du mnyam par bzhag nas lha sngags ting nge 'dzin gyi phyag rgya las mi 'da' bar byas pas phyag chen dang lhun grub rig 'dzin gyi sar bsgrod nas dpal he ru ka'i go 'phang thob par byed pa ste/__rtsa rgyud las/__gang gi glang chen myos pa'i sems/__mnyam par bzhag pas brtul nas su/__/sngags dang phyag rgya rab brtan nas/__/dngos grub ya mtshan chen po 'gyur/__/zhes gsung pa'i phyir ro/__/de nas sgrub sde'i nang tshan du gtogs thugs rigs pa rang byung gi ye shes/__yang dag zla gam dgu pa mar me'i dkyil 'khor la brten nas thugs rdo rje'i sgrub pa ni/__ji skad du/__yang dag sgrub pa gcig pu nyid/__/sangs rgyas bde gshegs kun 'dus pa/__/rnal 'byor zab mo sku gsung thugs/__/mkha' 'gro sgyu ma bde ba'i mchog__/ces gsung pa ltar chos thams cad rang bzhin ye nas dag pa'i dbyings nyid glo bur dri ma'i sbubs las grol bas dbyings dang ye shes gnyis su med pa'i zung 'jug sangs rgyas thams cad kyi nyams su myong bya'i bde ba chen po mchog tu mi 'gyur ba sku gsum gyi ngo bor rdzogs pa de las dmigs pa med pa'i rtsal snang ye shes sgyu ma'i rnam par thams cad par 'char ba'i phyag rgya chen po mchog gi dngos grub bsgrub pa'i tshul/__rgyu yi ting nge 'dzin hU~M yig 'od du zhu ba las rdo rje sems dpa' gyur/__de las b+h+rU~M chad pa gzhi dbang chen gyi gzhal yas khang gdan dang bcas par gyur/__slar yang hU~M yig glur blangs pas rdor sems 'od du zhu hU~M yig tu gyur pa de las hU~M gi sgra gdangs mkha' khyab tu spro bsdu'i sbyor bas badz+ra he ru ka smug nag tshon gang bar gyur te/__dbus kyi gdan steng du bzhugs pa la nam mkha' gang ba'i de bzhin gshegs pa rnams kyis sems can gyi don la bskur bas phrin las phyag rgya'i dkyil 'khor gyi rnam par bzhengs pa la lha sngags ting nge 'dzin gyi bsnyen cing sgrub pas thun mongs gi dngos grub zhi rgyas la sogs pa bzhi dang /__ral gri dang grub pa brgyad la sogs pa 'grub cing mchog gi dngos grub phung lnga rigs lnga'i ngo bo gyur te/__'chi med rdo rje'i sku 'grub nas dpal chen he ru ka'i go 'phang thob pa ste/__de ltar yang /__yang dag gsang ba'i thugs mchog la/__/sgrub pa'i rnal 'byor dbang phyug rnams/__/mi tshe gcig la mngon sangs rgyas/__/lus ma bor bar lha skur 'gyur/__/zhes gsungs pa'i phyir ro/__/sgrub chen bka' brgyad dpal chen 'dus pa'i dkyil 'khor ni/__sngon byung 'og min du gsung pa dpal rdo rje chos kyis bsdus nas bstan pa 'di la mchog gi dngos grub brnyes pa'i grub pa brgyad kyis mchod rten bde byed brtsegs pa nas gter du drangs shing /__slar kun 'dus rin po che sna lnga'i sgrom bu slob dpon pad+ma saM b+ha wa la bstan pa bzhin o rgyan gyi slob dpon chen po 'di nyid sgrub pa brgyad kyi bstan pa'i bdag por bzhugs pas/__gangs can gyi ljongs 'dir/__bla ma brgyad/__yi dam brgyad/__mkha' 'gro brgyad kyi skor mtha' yas pa zhig gter du sbas pa las/__'dir mchog grub pa'i grub thob rtsod pa dang bral ba grub rtags phyag rgyas tshad mas grub pa rdzogs pa chen po'i bstan pa'i mnga' bdag kun mkhyen rig 'dzin 'jigs med gling pa'i dgongs gter nam mkha' mdzod kyi chos sde las byung ba bla ma bka' brgyad drag po dpal chen 'dus pa'i dkyil 'khor du/__'jam dpal sku 'khor lo bzhi la brten te sgrub pa/__pad+ma gsung rta skad thang gsum/__yang dag thugs ru lu 'bru brgyad/__bdud rtsi yon tan snang srid bdud rtsi/__phur pa phrin las thal 'byin bzhi ste/__'jig rten las 'das pa'i sgrub sde lnga/__ma mo rbod gtong rtsa rlung thig le/__bla ma rig 'dzin bsnyen sgrub rnam bzhi/__dmod pa drag sngags srog gi gzer bzhi/__'jig rten mchod bstod rdzong 'khrang srog gsum rnams kyi dgongs pa ste/__de lta bu'i byin rlabs khyad par can dang ldan pas 'jig rten gyi las thams cad 'grub/__'jig rten las 'das pa'i 'bras bu mi gnas pa'i ye shes khyab bdag he ru ka'i go 'phang la 'god pa'i sgrub sde'i sgrub mchod bod yul 'dir byon pa'i lha sngags la ngo mtshar ba bsgrub pa brgyad kyi snying po 'dus pa byin rlabs kyi tshan kha rmad du byung ba'o/__/de nas ma hA yo ga'i theg pa las tan+t+ra chen po sde bco brgyad kyi nang tshan rnal 'byor ma rgyud thams cad kyi rtsa ba dpal sangs rgyas thams cad mnyam par sbyor ba'i dkyil 'khor chen po sgrub pa'i tshul ni/__ji skad du/__sbyor ba bzhi yi rim pa yis/__/de yi lam la rab tu sbyor/__/zhes pas/__bskyed rim sbyor ba bzhi ldan gyi rnal 'byor dang /__rdzogs rim rtsa rlung thig le'i rnal 'byor nyams su blangs pas slob pa'i rig 'dzin rnam pa bdun gyi go 'phang thob nas sngags kyi spyod pa spyad pas mi slob pa'i sa kun+tu 'od dang pad+ma can dang /__'khor lo tshogs chen gyi sa dang /__rdo rje 'chang dang /__ye shes bla ma'i sa dang /__bde ba chen po'i sa rnams thob par 'gyur te/__de ltar yang /__rig 'dzin rnam pa bdun gyi ni/__/rang gi ye shes gnas sbyong zhing /__/gsang sngags mthun pa'i khyad par gyis/__/mos pa'i blo dang don mthun ston/__/rnam grol zag med sangs rgyas la/__/mthar phyin 'di yis rtogs par byed/__/kun+tu 'od dang pad+ma can/__/yi ge 'khor lo rdo rje 'chang /__/ye shes bla ma'i sa gnon nas/__/zag med rtag tu bde bar bzhugs/__/zhes gsungs so/__/sgrub sde'i nang tshan du gtogs pa dpal chen rdo rje phur pa ni/__ston pa phun sum tshogs pa dang po'i sangs rgyas kun tu bzang po/__dus phun sum tshogs pa dus bzhi mnyam pa nyid kyi dus/__gnas phun sum tshogs pa 'og min chos kyi dbyings kyi zhing khams su/__skye med mtha' bral chen po'i dgongs pa las ma g.yos bzhin du 'gags med kyi cho 'phrul bdag nyid rtsa ba'i dkyil 'khor rdo rje gzhon nu yab yum gyi skur bzhengs te thabs shes gnyis su med par sbyor ba las/__'khor phun sum tshogs pa phyogs bcu'i khro bo khra thabs dang phur pa sras kyi dkyil 'khor mngon par sprul nas/__chos phun sum tshogs pa bi to ta mal 'bum sde la sogs pa phrin las phur pa'i rgyud mtha' dag gsung pa rnams/__ston pa nyid dang /__rdo rje sems dpa' dang /__phyag na rdo rje dang /__mkha' 'gro ma dang /__bram ze mi'i thod pa can la sogs pas yang dag par bsdus nas rim par brgyud pa'i khyad par du ma'i bka'/__slob dpon chen pos bod gangs can ljong 'dir rje 'bangs rnams la gnang ba las/__rgyal po lugs su grags pa/__sna nam/__shud bu/__'chi ma lugs/__jo mo lugs/__mkhon dang /__rong zom lugs sogs du ma 'phel ba'i phyir/__des na/__mkhon/__gnub/__rog__/rong /__so/__zur/__'o bran la sogs pa'i rus chen rnams kyi gdung rigs 1las rdo rje phur pa'i grub pa thob pa ni bod yul 'dir shin tu mang zhing /__khyad par du rong phur ni sna nam las ring brgyud dang /__rong ban yon tan rin chen gyis slob dpon pad+ma dngos la gtug nas gsan te mi yul du lo sum brgya bzhugs nas mthar sku lus ma spangs par mkha' spyod du gshegs/__de'i sras rong ban rin chen tshul khrims kyang lo phyed gnyis brgya bzhugs/__de'i sras rong zom lo brgya dang bcu dgu bzhugs nas sku bgres rgud mi mnga' bas/__de dag la sras brgyud phur pa'i grub thob zam ma chad par rim par brgyud pa'i bka' srol de nyid kyi dkyil 'khor chen po zhal phye nas sgrub pa'i tshul ni/__snyan rgyud man ngag las/__rnal 'byor man ngag gdeng ldan pas/__/bsnyen pas nye bar gyur pa dang /__/bsgrubs nas las la sbyar ba yis/__/'grub gyur 'di la the tshom med/__/zhes dang /__sems nyid rdo rje kI la ya/__/ye shes rtse mos thams cad 'debs/__/de yi snod bcud rnam par dag__/byed spyod thams cad tshogs gnyis 'gyur/__/zhes so/__/bka' ma'i gu drag 'o bran brag dmar zhes grags pa ni/__gdul bya zhi bas mi thul ba rnams 'dul ba'i phyir/__bla ma drag po'i sgrub thabs o rgyan chen pos/__'o bran dpal gyi dbang phyug la gnang /__des sras dpal gyi dbang phyug sogs gdung brgyud zam ma chod par brgyud pa'i 'o bran drag po'i dkyil 'khor gyi las rim dang rjes su 'brel bar a nu yo ga'i spyi mdo dgongs 'dus dang /__sgyu 'phrul dra ba bshad pa'i rgyud thal ba dang /__bye brag gi dgos brgyud mtshon cha mngon par rol pa'i rgyud rnams kyi bstan don/__dpal ye shes kyi mgon po legs ldan tshogs kyi bdag po'i sgrub pa'i phrin las kyi rim pa dang /__drag sngags kyi bdag po gnub chen yab sras kyi thugs dam gshin rje gshed dmar nag gnyis su grags pa'i 'jam dpal me ru rtse dmar po dang /__kha thun nag po gnyis kyi sgrub pa'i dkyil 'khor dang /__gzhan yang slob dpon sangs rgyas gsang ba'i lugs bdud rtsi 'khyil pa 'chi med tshe yi rgyud la brten pa'i tshe sgrub lung lugs su grags pa'i dkyil 'khor dang /__'dus pa mdo yi yan lag gi cho ga__/gnas brtan ni/__sangs rgyas bcom ldan 'das kyi bstan pa dam pa'i chos skyong zhing /__ston pa thugs rje can nyid kyi bka' sdod bzhi bzhi zhes pa/__'phags pa'i gnas brtan bcu drug po 'di nyid rnam pa nyan thos kyi tshul bzung yang /__ngo bo sa thob pa'i 'phags chen byang chub sems dpa' gzhan don du 'phags pa dgra bcom pa'i gzugs kyis rang don du rnams par thar pa brgyad la mnga' brnyes kyang sku mya ngan las mi 'da' bar 'dzam bu'i gling dang /__lha'i gnas la sogs par skyes bu rnams kyi tshe lo yar 'phel bdun brgya'i dus bar du bzhugs nas gnas so sor sangs rgyas kyi bstan pa dar zhing 'khor rnam bzhi rgyas par byin gyis brlabs pa dang /__dge 'dun rnams kyi tshul khrims rnam par dag pa dang /__'gro ba thams cad bsod nams spel ba dang /__yongs su sbyong bar mdzad pa'i phyir 'khor dgra bcom pa rnams dang thabs gcig tu bzhugs shing /__'phags pa'i gnas brtan de dag la gsol ba btab na bstan pa dar ba gsungs pas/__de mchod pa'i cho ga la mdo lugs bstan pa snga dar dang phyi dar gyi lugs tha dad pa jo bo rje nas snar thang ba'i lugs sogs mang du bzhugs pa las/__'di ni snga 'gyur bka' ma'i 'dus pa chen po mdo yi yan lag theg pa dgu'i dkyil 'khor dang rjes su 'brel ba nyan thos kyi theg pa'i yan lag 'phags pa'i gnas brtan mchod pa ste 'jig rten gyi khams su phan bde spel ba'i thabs rmad du byung ba yin no/__/de dang rjes su 'brel ba mdo'i yan lag gi cho ga mgron rnam pa bzhi la mchod sbyin bya ba cha gsum rdo rje sems dpa'i dkyil 'khor gyi rim pa ste/__de ltar snga 'gyur bstan pa rgya mtsho'i rgyud lung man ngag gsum gyi dgongs don/__man ngag zab dgu'i snying po/__mchog thun gyi dngos grub tshe 'di nyid la thob par byed pa'i myur lam dkyil 'khor chen po rnams zhal phyes nas bsnyen sgrub yan lag bzhi'i sgo nas sgrub pa'i dge rtsa bla na med pa'i byang chub chen por bsngo zhing mar me'i smon lam kyi rgyas 'debs pa ni/__yang dag gi rgyud las/__'bras bu rang byung ye shes me shar bas/__/mtha' dbus med par gsal ba'i 'od 'bar 'di/__/'khor ba'i mun pa gzhom phyir bzhes su gsol/__/zhes gsungs pa ltar sems can thams cad kyi rgyud la zag med rang byung gi ye shes kyi snang ba rang chas su bzhugs pa nyid/__mar me'i snang ba 'di lta bus mtshon/__rten cing 'brel 'byung gi mthu la brten nas/__yang dag pa'i snang ba 'bras bu rang byung gi ye shes kyi me chen rab tu sbar bas ma rig 'khor ba'i mun khang mtha' dag cig char du bcom nas phan bde'i ye shes kyi snang ba mtha' dbus med par khyab pa'i thugs rjes lus can mtha' dag dpal kun tu bzang po'i go 'phang da lta nyid du thob pa'i re smon thugs la zhugs pa'i rjes zlos gnang ba zhu/__zhes byas la mched lcam thams cad lag gnyis bsnol la g.yon mar me'i rkang bu bzung srin mdzub lu gu rgyud la sbrel nas/__hU~M/__dur khrod gsang ba mchog gi sogs/__snyan pa'i dbyangs dang bcas rjes zlos byed du gzhugasmin gling mkhan rin po che o rgyan chos grags kyi mdzad pa gzhir byas/__rje bla ma si tu chos kyi rgya mtsho'i gsung 'thor bu rnams phyogs gcig du bsdus te bkod pa'o/__/zhugs nas 'dus pa yongs kyi mgon du bzhugs pa rdo rje slob dpon gyi zhal nas gsung pa la kun gyi rjes zlos gnang ba zhu/__'jam dbyangs chos kyi blo gros pas chu 'brug gnam lo gsar tshes kyi dkar phyogs rgyal ba dang po'i tshes la thub gsung blo gros mi zad pa'i mod rna ba'i bdud rtsir sim bzhin sor rtse'i zlos gar du bsgyur ba 'dis kyang don gnyis phun sum tshogs pa'i dpal la spyod pa'i rgyur byin gyis brlabs tu gsol/__/sarba dA mang+ga laM/__//__/