DKR-KABUM-21-ZHA-021

From Khyentse Lineage - A Tsadra Foundation Project

སྙན་བརྒྱུད་སྙིང་གི་གསང་མཛོད་ལས། །ཡུམ་ཀ་མཁའ་འགྲོ་གདུགས་སེང་སྦྲགས་མའི་སྒྲུབ་ཐབས་བྱད་གདོན་དཔུང་འཇོམས་རྡོ་རྗེའི་མཁར་རྫོང་།
Wylie title snyan brgyud snying gi gsang mdzod las/ /yum ka mkha' 'gro gdugs seng sbrags ma'i sgrub thabs byad gdon dpung 'joms rdo rje'i mkhar rdzong DKR-KABUM-21-ZHA-021.pdf
Location dil mgo mkhyen brtse bka' 'bum
Volume 21, Text 21, Pages 190-200 (Folios 1a to 11b6)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People གཉགས་ཛྙཱ་ན་ཀུ་མཱ་ར་ (gnyags dz+nyA na ku mA ra)
Citation Khyentse, Dilgo. Snyan brgyud snying gi gsang mdzod las yum ka mkha' 'gro gdugs seng sbrags ma'i sgrub thabs byad gdon dpung 'joms rdo rje'i mkhar rdzong. In Skyabs rje dil mgo mkhyen brtse rin po che'i bka' 'bum, Vol. 21: 190-200. Delhi: Shechen Publications, 1994.
Genre Sadhanas - Evocation Ritual - sgrub thabs
Cycle སྙན་བརྒྱུད་སྙིང་གི་གསང་མཛོད་ (snyan brgyud snying gi gsang mdzod)
Deity rje mo siM ha'i zhal
Colophon

།ཅེས་པའང་ལས་དང་སྐལ་པ་བཟང་པོའི་བཙས་སུ་རྙེད་པའི་དབྱིག་མཆོག་འདོད་དགུའི་དཔྱིད་དུ་ཐོབ་པ་རང་གིར་བགྱི་བའི་སླད་རིག་སྔགས་འཆང་བ་ཀློང་ཆེན་ནམ་མཁའ་འོད་གསལ་རང་བྱུང་སྤྲུལ་པའི་རྡོ་རྗེ་པདྨ་མདོ་སྔགས་གླིང་པས་རྒྱལ་བ་ཤིང་རྟ་ལོའི་སྨིན་ཟླའི་དམར་ཕྱོགས་ཀྱི་རྒྱལ་བ་གསུམ་པར་ཡོན་ཏན་གསུང་གི་གནས་མཆོག །བདེ་ཆེན་པདྨ་ཤེལ་ཕུག་གི་ཀེའུ་ཚང་དུ་གཏེར་གཞུང་ཁྲིགས་སུ་བསྡེབས་པའི་ཡི་གེ་པ་ནི་རང་གི་ཚ་བོ་བཙུན་པ་བཀྲ་ཤིས་རྣམ་རྒྱལ་གྱིས་བགྱིས་པ་འདིས་ཀྱང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ནས་དཔལ་ཧེ་རུ་ཀའི་གོ་འཕང་དཀའ་བ་མེད་པ་མངོན་དུ་བྱེད་པའི་རྒྱུར་གྱུར་ཅིག །མངྒ་ལཾ།། །།

/ces pa'ang las dang skal pa bzang po'i btsas su rnyed pa'i dbyig mchog 'dod dgu'i dpyid du thob pa rang gir bgyi ba'i slad rig sngags 'chang ba klong chen nam mkha' 'od gsal rang byung sprul pa'i rdo rje pad+ma mdo sngags gling pas rgyal ba shing rta lo'i smin zla'i dmar phyogs kyi rgyal ba gsum par yon tan gsung gi gnas mchog_/bde chen pad+ma shel phug gi ke'u tshang du gter gzhung khrigs su bsdebs pa'i yi ge pa ni rang gi tsha bo btsun pa bkra shis rnam rgyal gyis bgyis pa 'dis kyang mi mthun pa'i phyogs thams cad las rnam par rgyal nas dpal he ru ka'i go 'phang dka' ba med pa mngon du byed pa'i rgyur gyur cig__/mang+ga laM//_//

":Property:textsubnumber|textsubnumber" can not be assigned to a declared number type with value 1.

[edit]
༄༅། །སྙན་བརྒྱུད་སྙིང་གི་གསང་མཛོད་ལས། །ཡུམ་ཀ་མཁའ་འགྲོ་གདུགས་སེང་སྦྲགས་མའི་སྒྲུབ་ཐབས་བྱད་གདོན་དཔུང་འཇོམས་རྡོ་རྗེའི་མཁར་རྫོང་ཞེས་བྱ་བ་བཞུགས་སོ། །གཉགས་ལུགས་རྡོ་རྗེ་ཕུར་པའི་ཆ་ལག་གོ། །།

༄༅། །ན་མོ་གུ་རུ་ཛྙཱ་ན་ཀྲོ་དྷཱི་ཡེ། །རྣམ་ཀུན་མཆོག་ལྡན་སྟོང་ཆེན་ཀུན་གསལ་ངོགས། །སྙིང་རྗེ་འཇིགས་དུས་སྤྲིན་གྱི་ལང་ཚོ་ནི། །ཡིད་སྲུབ་དཔུང་འཇོམས་དྲག་ཤུལ་གནམ་ལྕགས་ཆར། །ཐོགས་མེད་འབེབས་མཛད་འཕྲོག་བྱེད་ཞལ་ལ་འདུད། །བདེ་ཆེན་ཡེ་ཤེས་ཕྱག་རྒྱ་ཡི། །སྙིང་པོར་འཇུག་པའི་སྒྲུབ་ཐབས་ཀྱི། །ལས་རིམ་ཁྲིགས་བསྡེབས་རྡོ་རྗེའི་མཁར། །བར་ཆད་སྲུང་བའི་རྫོང་དུ་བསྟན། །འདི་ཉམས་སུ་ལེན་པའི་ཚུལ་ལ་སྔོན་དངོས་རྗེས་གསུམ་གྱི། དང་པོ་ལའང༌། སྦྱོར་བ་སྐྱབས་སེམས་ཚོགས་བསགས་སྦྱངས། །བགེགས་བསྐྲད་སྲུང་འཁོར་བྱིན་འབེབས་བརླབ། །ཅེས་པ་ལྟར་བརྒྱད་ལས། དང་པོ་ནི། གནས་ཁང་རྒྱན་དང་བྱི་དོར་བྱས་པའི་གུང་དུ་གཞུང་མཐུན་གྱི་སྐུ་བཀྲམ་པའི་སྤྱན་སྔར་གཏོར་མ་ཆོས་འབྱུང་བསྣོལ་མའི་སྟེང་མཁའ་འགྲོའི་གསང་གཏོར་རྒྱན་སྤྲོས་ཅན། བཀའ་སྲུང་གཏོར་མ། ཆད་བརྟན། སྨན་རཀ །ཚོགས་མཆོད། མདུན་དུ་མཆོད་པ་རྣམ་བདུན་ཕྲེང་ཚར། དཀར་བགེགས་སོགས་འོག་ཏུ་དགོས་པའི་རིགས་འདུ་བྱ། གཉིས་པ་ནི། སྒྲུབ་པ་པོ་རྣམས་སྟན་ལ་འཁོད་དེ་ཚིག་བདུན་གསོལ་འདེབས་སྔོན་འགྲོས་བརྒྱུད་འདེབས་བཏང༌། རང་གི་སྙིང་ག་ནས་བདེ་བ་ཆེན་པོའི་ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས་པས་ཕྱོགས་དུས་སྐྱབས་ཡུལ་རྒྱ་མཚོ་མདུན་གྱི་ནམ་མཁར་བཛྲ་ས་མཱ་ཛཿས་ཚོགས་ཞིང་སད་པར་བྱས་ཏེ། ན་མོ༔ བདག་སོགས་འགྲོ་ཀུན་དེང་ནས་བཟུང༔ བྱང་ཆུབ་སྙིང་པོར་མཆིས་ཀྱི་བར༔ སྐྱབས་ཀྱི་དམ་པ་དཀོན་མཆོག་གསུམ༔ མི་ཕྱེད་དད་པས་སྐྱབས་སུ་མཆི༔ ལན་གསུམ། གསུམ་པ་ནི། མཁའ་མཉམ་སེམས་ཅན་ཐམས་ཅད་ཀུན༔ སྲིད་པའི་རྩ་བ་བདུད་བཞི་བཅོམ༔ བར་ཆད་གདོན་བགེགས་བསྒྲལ་བའི་ཕྱིར༔ ཡེ་ཤེས་མཁའ་འགྲོ་སྒྲུབ་པར་བགྱི༔ ལན་གསུམ། བཞི་པ་ནི། ཧོ༔ རྡོ་རྗེ་སློབ་དཔོན་སངས་རྒྱས་དཔལ༔ དུས་གསུམ་བཞུགས་ལ་ཕྱག་འཚལ་ལོ༔ མཆོག་གསུམ་བསྟེན་པའི་ཞིང་གྱུར་ལ༔ གཉིས་མེད་ཡིད་ཀྱིས་སྐྱབས་སུ་མཆི༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ དག་པའི་མཆོད་པ་བཞེས་སུ་གསོལ༔ དངོས་གྲུབ་ཆུ་བོ་གཅོད་པའི་བགེགས༔ ཉེས་བྱས་མ་ལུས་བཤགས་པར་བགྱི༔ ཕྱོགས་བཅུ་འཁོར་གསུམ་དག་པའི་ཆོས༔ མ་ཆགས་སྤྱོད་ལ་རྗེས་ལ་ཡི་རང༔ དག་པའི་མཐའ་བཞི་དྲི་མ་མེད༔ རྫོགས་པའི་བྱང་ཆུབ་སེམས་བསྐྱེད་དོ༔ བདེ་གཤེགས་བྱང་ཆུབ་སེམས་དཔལ་ལ༔ དག་པ་གསུམ་གྱི་ལུས་འབུལ་ལོ༔ ཚེ་རབས་བགྲང་བའི་ལས་རྣམས་ཀུན༔ བསྡུས་ཏེ་བྱང་ཆུབ་ཆེན་པོར་བསྔོ༔ ལན་གསུམ་མཐར། བཛྲ་མུཿས་ཚོགས་ཞིང་རྣམས་འོད་གསལ་གྱི་དབྱིངས་སུ་ཐིམ། ལྔ་པ་ནི། རང་ཉིད་སྐད་ཅིག་གིས་ལས་ཀྱི་དྷཱ་ཀི་ནི་ལྗང་ནག་གྲི་ཐོད་འཛིན་པའི་སྐུར་གྱུར། བགེགས་གཏོར་དངོས་སུ་བཤམས་པ་ལ་ནི། རྃ་ཡྃ་ཁྃ། ཨོཾ་ཨཱཿཧཱུྃཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས། སརྦ་བྷཱུ་ཏ་ཨཱ་ཀརྵ་ཡ་ཛཿས་མགྲོན་བཀུག ཨོཾ་སརྦ་བིགྷྣཱན་བ་ལིཾ་ཏ་ཁཱ་ཧི༔ ལན་གསུམ་གྱི་གཏོར་མ་བསྔོས་ཏེ། ཧཱུྃ༔ གསང་བ་བླ་མེད་ལམ་སྒྲུབ་པའི༔ རྡོ་རྗེའི་དཀྱིལ་འཁོར་གཉན་པོ་འདིར༔ ༔འདུ་བའི་ལྷ་ནི་མ་གཏོགས་པ༔ དམ་མེད་བདུད་རིགས་ནག་པོའི་ཕྱོགས༔ ལྟ་ཞིང་ཉན་པའི་དབང་མེད་པས༔ བྱིན་པའི་གཏོར་མ་འདི་ཁྱེར་ལ༔ རང་རང་གནས་སུ་བདེ་བར་དེངས༔ གལ་ཏེ་མི་འགྲོ་འདུག་གྱུར་ན༔ ང་ནི་འཇིགས་བྱེད་རྡོ་རྗེ་ཅན༔ བཀའ་ལས་འདའ་བའི་སྡིག་ཅན་རྣམས༔ རྡོ་རྗེ་ཡེ་ཤེས་མཚོན་ཆེན་པོས༔ ཕྱེ་མར་འཐག་པར་གདོན་མི་ཟ༔ ཧཱུྃ་བཞིའི་སྔགས་དང་བཅས་པས་བསྐྲད། དྲུག་པ་ནི། ཧྲཱིཿ སྣང་སྲིད་ཡེ་ཤེས་ལྷ་ཡི་དལ༔ སྣང་གྲགས་རིག་པ་སྐུ་གསུང་ཐུགས༔ གཉིས་སུ་མེད་པའི་དཀྱིལ་འཁོར་ཏེ༔ ཀུན་ཀྱང་འབར་བའི་ཕྱག་རྒྱར་ཤར༔ བགེགས་དང་བར་ཆད་མིང་ཡང་མེད༔ མི་ཤིགས་རྡོ་རྗེ་འཁོར་ལོ་དང༔ རིན་ཆེན་པདྨ་རྒྱ་གྲམ་གྱི༔ གུར་ཁང་འབར་བས་ཕྱོགས་མཚམས་གཏམས༔ མཚམས་ཀྱི་དཀྱིལ་འཁོར་ལྷུན་གྱིས་གྲུབ༔ ཛྙཱ་ན་བཛྲ་ཙཀྲ་རཏྣ་པདྨ་ཁངྒ་རཀྵ་རཀྵ་བྷྲཱུཾ་བྷྲཱུཾ་བྷྲཱུཾ༔ བདུན་པ་ནི། ཧཱུྃ་ཧཱུྃ༔ བརྡལ་བ་ཆེན་པོ་ཆོས་སྐུ་ཡུམ་གྱི་མཁར༔ འགག་མེད་འོད་གསལ་ལོངས་སྐུའི་གཟི་བྱིན་འབར༔ སྤྲུལ་པའི་རྣམ་རོལ་རྩ་གསུམ་རབ་འབྱམས་ལྷ༔ འདིར་དགོངས་འདིར་གཤེགས་བྱིན་གྱིས་བརླབ་ཏུ་གསོལ༔ བདེ་ཆེན་སྐུ་ཡི་གར་སྟབས་ཁྱུགས་སེ་ཁྱུག༔ རྡོ་རྗེའི་གླུ་དབྱངས་སྔགས་སྒྲ་འུ་རུ་རུ༔ མཁྱེན་བརྩེ་དགོངས་པའི་ཡེ་ཤེས་ལམས་སེ་ལམ༔ ངོ་མཚར་རྟགས་དང་མཚན་མ་མྱུར་དུ་སྟོན༔ དུར་ཁྲོད་གནས་མཆོག་འོག་མིན་གསང་ཆེན་ཞིང༔ རྣལ་འབྱོར་ཕོ་མོ་ཧེ་རུ་ཀ་ཡི་གདུང༔ ཕྱི་ནང་གསང་བའི་མཆོད་ཚོགས་མ་ལུས་ཀུན༔ བདེ་ཆེན་ལོངས་སྤྱོད་ཆེན་པོར་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནི་བྃ་ཧ་རི་ནི་ས་སརྦ་ས་མ་ཡ་ཛྙཱ་ན་ཨ་བེ་ཤ་ཡ་ཨ་ཨཿ ཨེ་ཨ་རལླི་ཧྲིཾ་ཧྲིཾ་ཕེཾ་ཕེཾ༔ ཧཱུྃ་ཧཱུྃ་ཧཱུྃ༔ ཛཿཧཱུྃ་བྃ་ཧོཿ བརྒྱད་པ་ནི། ཧཱུྃ༔ གནས་ཁང་དུར་ཁྲོད་ཆེན་པོའི་གཞལ་མེད་ཁང༔ ཡེ་ཤེས་བཀོད་པ་འབྱམས་ཀླས་འོད་འབར་དབུས༔ ཉེར་སྤྱོད་འདོད་ཡོན་དྲག་པོའི་ལོངས་སྤྱོད་ཀུན༔ བདེ་སྟོང་མཆོད་པའི་ཕྱག་རྒྱ་ཆེན་པོར་ཤར༔ ཨོཾ་བཛྲ་ཨརྒྷཾ་པདྱཾ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱཱ་ཤབྡ་པཉྩ་ཀཱ་མ་གུ་ཎ་དྷརྨ་དྷཱ་ཏུ་སརྦ་པཱུ་ཛ་ཨཱཿཧཱུྃ༔ ཞེས་ཕྱི་མཆོད་དང༌། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡེ་སྭཱ་ཧཱ༔ ཨོཾ་ཨཱཿཧཱུྃ་མ་ཧཱ་རཀྟ་ས་མནྟ་མཎྜ་ལ་ཧཱུྃ་ཕཊ྄༔ ཅེས་སྔགས་རྣམས་སོ་སོར་ལན་གསུམ་རེས་ནང་མཆོད་ཀྱི་དམ་རྫས་རྣམས་བྱིན་གྱིས་བརླབ་པར་བྱའོ། །གཉིས་པ་དངོས་གཞིའི་ཕྲིན་ལས་ལ། ལྷ་བསྐྱེད་སྤྱན་དྲངས་བསྟིམ་ཕྱག་བྱ། །མཆོད་བསྟོད་བཟླས་པའི་ལས་རིམ་དྲུག །ཅེས་པ་ལྟར་ལས་དང་པོ་ནི། ཨཿ བདག་མེད་རྡོ་རྗེ་བཙུན་མོའི་མཁའ་ཀློང་ལས༔ རང་བྱུང་སྙིང་རྗེའི་ཆོ་འཕྲུལ་ཉི་ལྟར་ཤར༔ ཟུང་འཇུག་དྭངས་མའི་ཐིག་ལེ་ཡི་གེ་ཨེ༔ ནམ་མཁའི་མདོག་གིས་འཁོར་འདས་དངོས་འཛིན་སྦྱངས༔ འོད་ཀྱི་ཆོ་འཕྲུལ་ཁྲག་འཐུང་རོལ་པའི་ཞིང༔ དུར་ཁྲོད་ཆེན་པོ་འཇིགས་ཤིང་སྐྱི་གཡའི་དབུས༔ རྡོ་རྗེའི་སྲུང་འཁོར་ཟླུམ་མཐིང་གཅིག་ཏུ་འདྲིལ༔ འབར་བའི་རྩིབས་བཅུ་རལ་གྲིའི་རྩེ་ལྟར་གཟིང༔ ཡེ་ཤེས་རླུང་གིས་བར་མེད་འཁོར་བ་ལས༔ རྡོ་རྗེའི་མཚོན་ཆའི་ཆར་པ་ཐོར་ཐོར་འཕྲོ༔ བསྐལ་པའི་མེ་དང་དུས་ཀྱི་རླུང་འཐབ་ཅིང༔ ཆོས་ཉིད་རྒྱ་མཚོ་རྡོ་རྗེའི་མདའ་ཡི་དྲྭ༔ གོ་མཚམས་མེད་པས་བར་ཆད་བྱད་མ་འཇོམས༔ དེ་ཡི་ལྟེ་བར་དྲག་པོའི་གཞལ་མེད་ཁང༔ མི་མགོའི་རྩིགས་པ་ཤར་བུ་མདའ་ཡབ་ཅན༔ སྒོ་དང་རྟ་བབ་བང་རིམ་བཞིས་མཛེས་ཤིང༔ ཞིང་གི་རྒྱལ་མཚན་ལ་སོགས་རྔམ་བརྗིད་སྤྲས༔ དབུས་སུ་ལྕགས་ཀྱི་ཆོས་འབྱུང་བསྣོལ་མའི་ནང༔ འདབ་བརྒྱད་པདྨའི་ལྟེ་བར་བྱད་མ་བསྣོལ༔ དེ་སྟེང་ས་བོན་བབ་པ་ཡོངས་གྱུར་ལས༔ གནས་གསུམ་མཁའ་འགྲོའི་རྗེ་མོ་སིཾ་ཧའི་ཞལ༔ དབུ་དགུ་བཅོ་བརྒྱད་ཕྱག་དང་ལྡན་པ་ནི༔ དུས་ཀྱི་མུན་པ་འཁྲིགས་པའི་ཁ་དོག་ཅན༔ འབར་བའི་ཞལ་གསུམ་སེང་གེ་དཀར་དམར་ནག༔ དེ་སྟེང་ཞལ་གསུམ་སྟག་གཟིག་དོམ་གྱི་གདོང༔ དེ་སྟེང་ཞལ་ནི་ཕག་ཞལ་ངུར་སྒྲ་སྒྲོགས༔ ཀུན་ཀྱང་མཆེ་གཙིགས་ལྗགས་སྐྱོད་ཕེཾ་སྒྲ་སྒྲོགས༔ གནས་གསུམ་མ་མོ་མཁའ་འགྲོ་ལས་ལ་བསྐུལ༔ ཐོད་སྐམ་དབུ་རྒྱན་རལ་པ་གཟེངས་ཞིང་བརྫེས༔ རྩ་བའི་ཕྱག་གཉིས་གྲི་ཐོད་ཐུགས་ཀར་འཛིན༔ གཡས་བརྒྱད་རྡོ་རྗེ་ཙིཏྟ་མདུང་ཐུང་གྲི༔ གསལ་ཤིང་མདའ་དང་བེ་ཅོན་དབྱུག་ཐོ་གདེང༔ གཡོན་བརྒྱད་དྲིལ་བུ་བྱད་མའི་མགོ་ཞགས་པ༔ མེ་ཧོམ་ལྕགས་སྒྲོག་གཞུ་དང་འཁོར་ལོ་སྟེ༔ སྲིད་པ་སྤྱི་འདེགས་ཞབས་བཞི་གར་སྟབས་ཅན༔ སྐུ་ལ་དུར་ཁྲོད་དཔལ་གྱི་ཆས་རྫོགས་པའི༔ པང་དུ་ཁྲོ་རྒྱལ་རྡོ་རྗེ་གཙུག་ཏོར་ཆེ༔ དབུ་དགུ་མཐིང་དཀར་དམར་དང་ལྗང་དམར་སེར༔ ནག་མཐིང་སྨུག་པོ་ཕྱག་བརྒྱད་དང་པོ་གཉིས༔ རྡོ་རྗེ་དུང་ཁྲག་ཡུམ་དང་གཉིས་མེད་སྦྱོར༔ ལྷག་མ་གཡས་གཡོན་འབར་བའི་རལ་གྲི་གདེང༔ འཇིགས་རྔམ་མི་བཟད་ཞབས་ཀྱིས་འཁྲིལ་ཏེ་སྦྱོར༔ བདེ་བའི་སེམས་སྤྲིན་ལས་བྱུང་ཕྱོགས་མཚམས་སུ༔ རིགས་བཞིའི་སེང་གདོང་གཙུག་ཏོར་གདུགས་འཛིན་པ༔ དཀར་སེར་དམར་ལྗང་ཤིན་ཏུ་ཁྲོས་པའི་སྐུ༔ སེང་གདོང་རིགས་བཞིས་རང་རྟགས་གྲི་ཐོད་དང༔ ཕྱིར་བཟློག་ཆེན་མོ་གདུགས་དང་རལ་གྲི་ཅན༔ འབར་བའི་ཆས་ཅན་རང་རིག་ཡབ་དང་སྦྱོར༔ འཇིགས་པའི་སྐུ་ཡིས་སྲིད་གསུམ་ཟིལ་གྱིས་གནོན༔ བཞད་པའི་ང་རོས་ཁམས་གསུམ་བྱད་མ་འཇོམས༔ རྔམས་པའི་ཡེ་ཤེས་གདུག་ཅན་དགྲ་ལ་བརྣག༔ ཡོན་ཏན་མི་ཟད་བཅོམ་ལྡན་འདས་མ་སྟེ༔ ཕྲིན་ལས་ཕྲ་མེན་རོལ་པའི་ཚོགས་སུ་བསྟན༔ གསེར་ཁྱམས་གནས་ཡུལ་མ་མོ་མཁའ་འགྲོ་དང༔ ཁྲག་ཁྱམས་སྒོ་བཞིར་དབང་ཕྱུག་ཉི་ཤུ་བརྒྱད༔ ཕྱི་རོལ་པདྨར་མཁའ་འགྲོ་སོ་གཉིས་དང༔ དུར་ཁྲོད་བརྒྱད་དང་གིང་དང་ལངྐའི་ཚོགས༔ མ་འདྲེས་གསལ་རྫོགས་སྣང་སྟོང་སྒྱུ་མའི་སྐུ༔ མཁའ་ཁྱབ་ནམ་མཁའི་སྐུ་ཅན་འཇའ་ལྟར་ཤར༔ མི་ཤིགས་རྡོ་རྗེ་གསུམ་གྱི་ཡེ་ཤེས་ལ༔ བདེ་གཤེགས་ཀུན་གྱི་གསང་གསུམ་ཕྱག་རྒྱས་གདབ༔ དུག་ལྔ་གནས་དག་རིགས་ཀྱི་ཡུམ་ཆེན་ལྔས༔ དབང་བསྐུར་རིགས་ཀྱི་བདག་པོས་མཚན་པར་གྱུར༔ ཨོཾ་ཨཱཿཧཱུྃ༔ ཧཱུྃ་ཨོཾ་ཏྲཱྃ་ཧྲཱིཿཨཿ གཉིས་པ་ནི། ཧཱུྃ་ཧྲཱིཿ དབྱིངས་ལས་རང་བྱུང་ཡེ་ཤེས་མཁའ་འགྲོའི་སྤྲིན༔ འགག་མེད་རོལ་པ་ཕྲ་མེན་ཁྲག་འཐུང་གཟུགས༔ འབུམ་ཕྲག་ཡངས་པ་ཆེན་པོའི་འཁོར་ལོའི་བདག༔ ཆོས་དབྱིངས་བདེ་བ་ཆེན་པོའི་ཀློང་ནས་གཤེགས༔ གནས་འདིར་བྱིན་ཕོབ་དབང་དང་དངོས་གྲུབ་སྩོལ༔ ལོག་འདྲེན་བདུད་དང་བར་ཆད་དབྱིངས་སུ་སྒྲོལ༔ མཆོག་ཐུན་དངོས་གྲུབ་ཐོགས་མེད་འགྲུབ་པ་ཡི༔ ཧེ་རུ་ཀ་དཔལ་གོ་འཕང་མཆོག་སྩོལ་ཅིག༔ ཨོཾ་ཛྙཱ་ན་ཌཱ་ཀི་ནི་སརྦ་ས་མ་ཡ་ཛཿཛཿ གསུམ་པ་ནི། ཧཱུྃ་ཧྲཱིཿ གདོད་ནས་གྲུབ་པའི་དམ་ཚིག་འཁོར་ལོ་ལ༔ ལྷུན་གྱིས་རྫོགས་པའི་ཡེ་ཤེས་བརྟན་པར་བཞུགས༔ རང་སྣང་བདེ་བ་ཆེན་པོའི་ལྷ་ཚོགས་ལ༔ གཉིས་མེད་མཉམ་པའི་བརྡ་ཡིས་ཕྱག་བགྱིའོ༔ ཏིཥྛ་ལྷན༔ ན་མོ་ན་མ་མི༔ བཞི་པ་ནི། ཧཱུྃ་ཧྲཱིཿ སྣང་ཞིང་སྲིད་པ་ཀུན་ཏུ་བཟང་པོའི་ཞིང༔ ཚོགས་དྲུག་ཡུལ་དབང་གཉིས་མེད་རྡོ་རྗེའི་རྒྱན༔ རོལ་པ་ཆེན་པོའི་དམ་ཚིག་བླང་དོར་བྲལ༔ རྟག་ཏུ་བདེ་ཆེན་དགྱེས་པས་བཞེས་སུ་གསོལ༔ ཨོཾ་བཛྲ་རཱུ་པ་ཤབྡ་གནྡྷེ་རཱ་ས་སྤརྴེ་དྷརྨ་དྷཱ་ཏུ་པཉྩ་ཨ་མྲྀ་ཏ་རཀྟ་བ་ལིཾ་ཏ་མ་ཧཱ་སུ་ཁ་ཨ་ཏི་པཱུ་ཛ་ས་མ་ཡ་ཁཱ་ཧི༔ ལྔ་པ་ནི། ཧཱུྃ་ཧྲཱིཿ དོན་གྱི་མཁའ་འགྲོ་ཆོས་ཉིད་བཟང་མོའི་ཞལ༔ ཀུན་ཁྱབ་ཐིག་ལེའི་ཆོས་ཀུན་དྲྭ་བ་སྡོམ༔ སྨྲ་བསམ་བརྗོད་མེད་ཆོས་སྐུ་དེ་བཞིན་ཉིད༔ རྟག་ཏུ་འདུ་འབྲལ་མེད་ལ་ཕྱག་འཚལ་བསྟོད༔ རྟགས་ཀྱི་མཁའ་འགྲོ་བདེ་ཆེན་དགྱེས་པ་ཆེ༔ ཟག་པ་ཟད་པ་འཕོ་མེད་རྡོ་རྗེའི་རིགས༔ བཅུ་དྲུག་དགའ་བས་གང་བའི་རོ་ལ་རོལ༔ ཁ་སྦྱོར་བདེ་བ་ཆེན་པོའི་གསུང་ལ་བསྟོད༔ བརྡ་ཡི་མཁའ་འགྲོ་ཕྲ་མེན་མཐུ་མོ་ཆེ༔ གཞན་གྱིས་མི་ཐུབ་རིགས་སྔགས་ལྷ་མོའི་གཟུགས༔ འབུམ་ཕྲག་ཡངས་པ་ཆེན་པོའི་སྤྲིན་འཕྲོ་བ༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ དྲུག་པ་ནི། བསྙེན་སྒྲུབ་ལས་སྦྱོར་བཟླས་པ་གསུམ། ཞེས་པའི་དང་པོ་ལ་བསྙེན་པ་ནི། གཙོ་མོའི་ཐུགས་ཀར་གནམ་ལྕགས་རྡོ་རྗེའི་ལྟེར༔ ཉི་མ་ལ་གནས་ཨེ་མཐར་སྔགས་ཀྱིས་བསྐོར༔ འོད་ཟེར་སྤྲོ་བསྡུས་འཕགས་མཆོད་འགྲོ་སྒྲིབ་སྦྱངས༔ གཉུག་མའི་སྒོ་གསུམ་རྡོ་རྗེའི་ཕྱག་རྒྱར་ཤར༔ ལྷ་བདག་མི་ཕྱེད་དགོངས་པ་གཅིག་ཏུ་འདྲེས༔ ཨོཾ་བཛྲ་སིཾ་ཧ་མུ་ཁ་ཧཱུྃ་ཧ་ཧེ་ཕཊ྄༔ ཞེས་པ་འབྲུ་འབུམ་བཟླ། གཉིས་པ་ཉེ་བསྙེན་ནི། གཙོ་མོའི་ཐུགས་ཀའི་ས་བོན་ལས་བྱུང་སྔགས༔ ཞལ་དང་སྦྱོར་མཚམས་ནས་བྱུང་རིགས་བཞི་ཡི༔ སིཾ་ཧ་མུ་ཁའི་ཐུགས་དམ་རྒྱུད་བསྐུལ་བས༔ རང་འོད་སྤྲོ་བསྡུས་སྣང་སྲིད་དངོས་འཛིན་སྦྱངས༔ ཀུན་ཀྱང་ལྷ་སྔགས་ཡེ་ཤེས་རོལ་མོར་སད༔ ཆོས་ཉིད་ལྷ་དང་སྒྲ་སྔགས་འོད་ཟེར་ནི༔ ཉི་མ་འབུམ་གྱི་གཟི་བརྗིད་ལྟར་འབར་བས༔ བྱད་ཕུར་བར་ཆད་དགྲ་འདྲེ་དབྱིངས་སུ་བསྒྲལ༔ བདེ་ཆེན་ཕྱོགས་ལས་རྣམ་རྒྱལ་དཔལ་ཐོབ་ཤོག༔ ཨཿཀཿསཿམཿརཿཙཿཤཿདཿརཿསཿམཿརཿཡཿཕཊ྄༔ །ཅེས་འབུམ་ཕྲག་བཞི་བཟླ། གཉིས་པ་ལ་སྒྲུབ་པ་དང་སྒྲུབ་ཆེན་གཉིས་ལས། དང་པོ་ནི། སེང་གདོང་རིགས་ལྔ་སྦྱོར་བའི་འོད་ཟེར་གྱིས༔ རིགས་བཞིའི་ཕྱིར་བཟློག་ཡབ་ཡུམ་བསྐུལ་བ་ཡི༔ བདེ་བའི་འོད་ཟེར་སྲིད་ཞི་ཀུན་ལ་ཁྱབ༔ རང་དབང་མེད་པར་དཔལ་ཆེན་རོལ་པ་ཆེ༔ ཁྲག་འཐུང་དགྱེས་པའི་ཞིང་གི་མཆོག་ཏུ་ཤར༔ འབར་བའི་སྐུ་དང་དྲག་པོའི་སྔགས་ཀྱི་སྒྲ༔ ཡེ་ཤེས་མཚོན་ཆ་འོད་ཟེར་མེ་རིའི་ཚོགས༔ འབར་ཞིང་འཕྲོ་བས་གཉིས་འཛིན་བྱད་གདོན་ཞི༔ ཡེ་ཤེས་ནུས་སྟོབས་རབ་རྒྱས་རླུང་དང་སེམས༔ དབང་བསྡུས་ཕྱི་ནང་བདུད་བཞི་བསྒྲལ་བ་ཡི༔ མཆོག་གི་ཕྲིན་ལས་ལྷུན་གྱིས་གྲུབ་པར་གྱུར༔ ཨོཾ་སི་ཏ་ཏ་པ་ཏྲེ༔ ཨ་ན་ལེ༔ ཨ་ན་ལེ༔ བི་ཥ་དེ་བི་ཥ་དེ༔ བཻ་ར་བཻ་ར༔ བཛྲ་དྷཱ་ར་ནི༔ བཛྲ་པཱ་ནི་བྷནྡྷ་བྷནྡྷ་ཧཱུྃ་ཧཱུྃ་ཧཱུྃ་ཕཊ྄་སྭཱ་ཧཱ༔ ཞེས་འབུམ་ཕྲག་གཅིག་བཟླ། གཉིས་པ་སྒྲུབ་ཆེན་ནི། བདེ་སྟོང་རོལ་པའི་འོད་ཀྱིས་གནས་ཡུལ་མ༔ དབང་ཕྱུག་ཉེར་བརྒྱད་མཁའ་འགྲོ་གིང་ལང་སོགས༔ འབུམ་ཕྲག་ཡངས་པའི་རྒྱུད་བསྐུལ་འོད་ཟེར་གྱིས༔ རབ་འབྱམས་ཕྲིན་ལས་ཐོགས་མེད་སྒྲུབ་པར་གྱུར༔ ཨོཾ་ཨེ་ཨ་རལླི་ཕེཾ༔ ཌཱ་ཀི་ནི་ས་མ་ཡ་བྷྱོ༔ མ་མ་རུ་ལུ་སརྦ་ཀརྨ་ཀུ་རུ་ཧོཿ ཁྲི་གཅིག་བཟླ། གསུམ་པ་ལས་སྦྱོར་ནི། གཙོ་འཁོར་ཀུན་གྱིས་རིགས་བཞིའི་སྒོ་མ་རྣམས༔ བསྐུལ་བས་སྐུ་ཡི་སྤྲོ་བསྡུས་འཁོར་འདས་ཁྱབ༔ ནད་གདོན་ཀུན་ཞི་ཚེ་བསོད་དཔལ་འབྱོར་རྒྱས༔ ཁམས་གསུམ་དབང་བསྡུས་དགྲ་བགེགས་ཚར་གཅོད་གྱུར༔ ཨོཾ་བྷི་ཏི་ལོ་ཀ་ཌཱ་ཀི་ནི་ས་མ་ཡ་བྷྱོ༔ ཤནྟིཾ་ཀུ་རུ་སྭཱ་ཧཱ༔ པུཥྚིཾ་ཀུ་རུ་ཨོཾ༔ ཝཱ་ཤཾ་ཀུ་རུ་ཧྲཱིཿཛཿ མཱ་ར་ཡ་ཕཊ྄༔ ཅེས་ལས་བཞིའི་སྤེལ་ཚིག་སོ་སོར་སྦྱར་བ་སྟོང་ཙམ་བཟླ་བ་ནི་གྲངས་བསྙེན་གྱི་དབང་དུ་བྱས་ཏེ། དུས་དང་མཚན་མའི་བསྙེན་ཚད་ནི་སྤྱི་ལྟར་རོ། །ཐུན་མཐར་དབྱངས་གསལ་རྟེན་སྙིང་རྣམས་བཟླས་པས་ལྷག་ཆད་སྐོང་ཞིང་བྱིན་རླབས་བརྟན་པར་བྱ། གཏང་རག་གི་མཆོད་བསྟོད་མདོར་བསྡུས་དང༌། ཡི་བརྒྱ་བཟླ། གསུམ་པ་རྗེས་ལ། ཚོགས་མཆོད་བསྐུལ་དང་ཆད་བརྟན་འབུལ། །རྟ་བྲོ་དབང་ལེན་བཤགས་བསྡུ་ལྡང༌། །དགེ་བསྔོ་ཤིས་བརྗོད་བཅས་ཏེ་བཅུ། །ཞེས་པའི་དང་པོ་ལའང༌། བྱིན་བརླབ་སྤྱན་འདྲེན་མཆོད་བསྐང་བཤགས། །བསྒྲལ་བསྟབ་རོལ་དང་ལྷག་མ་བདུན། །ཞེས་པ་ལྟར་ལས་དང་པོ་ནི། བཀའ་གཏེར་སྲུང་མའི་གསོལ་ཕྲིན་བཏང་དགོས་གང་ཡོད་སྤྱི་ལྟར་སྦྱར། སྤྲོ་ན་བརྗོད་མེད་དོན་བཤགས་སྔོན་དུ་འགྲོ་བ་དང་བཅས་ཏེ། ཐབས་ཤེས་ཚོགས་ཀྱི་ཡོ་བྱད་ལ་བསང་ཆུ་དང་བདུད་རྩིས་བྲན། རྃ་ཡྃ་ཁྃ༔ རང་བྱུང་བདེ་ཆེན་ཀ་པཱ་ལར༔ དམ་རྫས་ཤ་ལྔ་བདུད་རྩི་ལྔ༔ ཡེ་ཤེས་ལྔ་ལྡན་བཅུད་དུ་འཁྱིལ༔ འདོད་ཡོན་སྤྲིན་ཕུང་འཕྲོ་བར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ གཉིས་པ་སྤྱན་འདྲེན་ནི། ཧཱུྃ༔ འོག་མིན་ཞིང་དང་ཉེར་བཞིའི་ཡུལ༔ དུར་ཁྲོད་བརྒྱད་སོགས་གནས་མཆོག་ནས༔ རབ་འབྱམས་མཁའ་འགྲོའི་དཀྱིལ་འཁོར་ལྷ༔ ཚོགས་ཀྱི་འདུ་བར་སྤྱན་འདྲེན་གཤེགས༔ སརྦ་དྷ་ཀ་དྷཱ་ཀི་ནཱི་ས་པ་རི་ཝ་ར་བཛྲ་ས་མ་ཡ་ཛཿ ཨེ་ཨ་རལླི་ཧྲིཾ་ཧྲིཾ་ཕེཾ་ཕེཾ༔ གསུམ་པ་ཚོགས་ཕུད་མཆོད་པ་ནི། ཨོཾ་ཨཱཿཧཱུྃ༔ གཟུགས་སྒྲ་དྲི་རོ་རེག་ལྡན་པའི༔ བདེ་བ་ཆེན་པོའི་ལོངས་སྤྱོད་ཀྱིས༔ ཡེ་ཤེས་མཁའ་འགྲོའི་ལྷ་ཚོགས་མཆོད༔ དགྱེས་བཞེས་དམ་སྐོང་དངོས་གྲུབ་སྩོལ༔ མ་ཧཱ་ག་ཎ་ཙཀྲ་པཱུ་ཛ་ཁཱ་ཧི༔ བཞི་པ་ནི། ཧཱུྃ་ཧྲཱིཿ མཆོག་ཏུ་མི་འགྱུར་བདེ་ཆེན་ཡེ་ཤེས་མདངས། །ཟག་མེད་རྒྱལ་བའི་འབྱོར་པ་རྒྱ་མཚོའི་སྤྲིན། །ཅིར་ཡང་འཆར་བས་རྡོ་རྗེའི་སྐུ་གསུང་ཐུགས། །རྟག་ཏུ་དགྱེས་པའི་དམ་རྫས་གདོད་ནས་ཤར། །ཞེས་དང་ནམ་མཁའ་མཛོད་ཀྱི་སྔགས་ཀྱི་བྱིན་གྱིས་བརླབས་ཏེ། བཛྲ་སྥ་ར་ཎ་ཁཾ། ཧཱུྃ་ཧྲཱིཿ འཁོར་འདས་ཆོས་ཀུན་ཨ་ཝ་དྷཱུ་ཏིའི་ཀློང༌། །རྣམ་ཐར་གསུམ་གྱི་དབྱིངས་སུ་དག་པའི་གདངས། །གནམ་ཞལ་ཁྲོས་པ་སིཾ་ཧ་ཙཎྜ་ལིས། །གཟུང་འཛིན་དངོས་ཀུན་ཟོས་པས་སྒེག་པའི་གཟུགས། །བདེ་ཆེན་གཟི་འོད་འཁྲུགས་པའི་ཟེར་ཐིག་གི །བཅུ་དྲུག་དགའ་བ་ཆེན་པོའི་མཆོད་པའི་རྫས། །ཞུ་བདེའི་ཉམས་བརྒྱ་འདྲེན་པའི་འདོད་ཡོན་སྤྲིན། །ཡེ་ཤེས་རླུང་གི་བྱེད་པས་འཕྲོ་བ་ཡི། འཁྲུལ་སྣང་རྟོག་པ་ཟིལ་གྱིས་གནོན་པའི་མཐུ། །རྡོ་རྗེ་ཉི་མའི་འོད་སྣང་འབུམ་འཕྲོ་བ། །ཕྱི་ལྟར་དབང་ཤེས་དག་པའི་འདོད་ཡོན་ལྔ། །ནང་དུ་རྩ་རླུང་ཐིག་ལེའི་སྨན་རཀ་གཏོར། །གསང་བ་ལྷན་སྐྱེས་ཡེ་ཤེས་སྦྱོར་སྒྲོལ་གྱི། །རོལ་མོར་འཆར་བས་གསང་མཆོག་དགྱེས་པ་ཆེ། །དབྱིངས་ཀྱི་རང་མདངས་རིག་པ་སྐུ་རུ་སྨིན། །བྱིན་རླབས་ཚད་མེད་བརྒྱུད་གསུམ་བླ་མའི་ཚོགས། །ཡོངས་གྲུབ་མཉམ་པའི་ལྟ་བས་ཐུགས་དམ་བསྐང༌། །དགོངས་རྒྱུད་རྟོགས་པའི་ཡེ་ཤེས་བཙན་ཐབས་སྤོར། །འོད་གསལ་ཕྱག་རྒྱ་ཞི་ཁྲོ་སྒྱུ་འཕྲུལ་དྲྭ། །མ་འགག་འཆར་བས་དངོས་གྲུབ་ཆར་དུ་འབེབས། །ཡི་དམ་རྒྱུད་སྡེ་རྒྱ་མཚོའི་ཐུགས་དམ་བསྐང༌། །མཆོག་དང་ཐུན་མོང་ལས་བཞི་འགྲུབ་པར་མཛོད། །ཁྱད་པར་རྣམ་ཀུན་མཆོག་ལྡན་དབྱིངས་ཀྱི་ཡུམ། །འཁོར་འདས་སྐྱེད་དང་སྡུད་པའི་བདག་ཉིད་ཆེ། །དབྱིངས་ཕྱུག་སིཾ་ཧ་མུ་ཁའི་ཐུགས་དམ་བསྐང༌། །བདུད་བཞིའི་གཡུལ་ལས་རྣམ་པར་རྒྱལ་བར་མཛོད། །སྐུ་གསུང་ཐུགས་ཀྱི་ཡེ་ཤེས་འབར་བའི་གར། །རིགས་ཀྱི་འཁོར་བསྒྱུར་བཅོམ་ལྡན་འདས་མ་ལྔ། །ཕྱིར་ཟློག་ཕོ་ཉ་བཞི་ཡི་ཐུགས་དམ་བསྐང༌། །བྱད་གདོན་བར་ཆད་གདུག་པའི་ཚོགས་ཆོམས་ཤིག །བདེ་བའི་བདག་ཉིད་སྣ་ཚོགས་གཟུགས་ཅན་མ། །རབ་འབྱམས་ལས་ཀྱི་ཚོགས་དང་བཀའ་ཡི་འབངས། །དབང་ཕྱུག་གིང་དང་ལངྐའི་ཐུགས་དམ་བསྐང༌། །ཚར་གཅོད་རྗེས་འཛིན་ལས་ཀུན་གྲུབ་པར་མཛོད། །འབར་བའི་ཕྲིན་ལས་གང་འདུལ་དེར་སྣང་སྟོན། །དམ་ཚིག་དབང་གིས་སྒྲུབ་ལ་བུ་ལྟར་བརྩེ། །བསྟན་སྲུང་དམ་ཅན་རྒྱ་མཚོའི་ཐུགས་དམ་བསྐང༌། །འདོད་དགུའི་ཕྲིན་ལས་ཐོགས་མེད་འགྲུབ་པར་མཛོད། །གཟོད་ནས་འགྱུར་མེད་མཆོག་ཏུ་བདེ་བ་ཆེའི། །དགྱེས་པའི་དབྱིངས་ལས་གཞར་ཡང་མི་འདའ་བའི། །ཡུལ་ཤེས་རོ་མཉམ་ཆེན་པོའི་དམ་ཚིག་གིས། །དཀྱིལ་འཁོར་འཁོར་ལོ་དགྱེས་པ་བསྐྱེད་གྱུར་ཅིག །ཐ་མལ་ཞེན་པའི་བདག་རྟོག་ལོག་པའི་དྲིས། །ཡང་དག་དོན་ལ་སྒྲིབ་པའི་ནོངས་པ་ཀུན། །གཉིས་མེད་ཀློང་ཡངས་ཆེན་པོར་བཟོད་བཞེས་ལ། །ཐུན་མོང་མཆོག་གི་དངོས་གྲུབ་བསྩལ་དུ་གསོལ། །འགལ་རྐྱེན་བར་ཆད་སྐྱེ་མེད་དབྱིངས་སུ་ཞི། །མཆོག་ཐུན་དངོས་གྲུབ་འགག་མེད་རོལ་པར་ཤར། །ཚར་གཅོད་རྗེས་འཛིན་ཕྲིན་ལས་རྨད་པོ་ཆེས། །བྱང་ཆུབ་སྒྲུབ་ལ་དཀའ་བ་མེད་པར་མཛོད། །གློ་བུར་རྦོད་གཏོང་བྱད་ཕུར་རང་སར་དག །འཁྲུལ་སྣང་སྡུག་བསྔལ་རྒྱུ་འབྲས་མཁའ་རུ་སྡུད། །ཡེ་ཤེས་འབར་བའི་ཕྱག་རྒྱས་བྱིན་བརླབས་ཏེ། །ཕྱོགས་ལས་རྣམ་རྒྱལ་ཧེ་རུ་ཀ་འགྲུབ་མཛོད། །ཅེས་དང༌། ཧོཿ བདག་གིས་ཚེ་རབས་ཐོགས་མེད་ནས༔ བསགས་པའི་སྡིག་ལྟུང་ཉམས་ཆག་ཀུན༔ ཚོགས་ཀྱི་མཆོད་པས་བསྐང་ཞིང་བཤགས༔ དག་ཅིང་ཚངས་པར་མཛད་དུ་གསོལ༔ བཛྲ་ས་མ་ཡ་ཤུདྡྷེ་ཨ༔ ཡིག་བརྒྱ་བཟླ། ལྔ་པ་ནི། ཨེ་ཡཾ་ཛྭ་ལ་རཾ། སརྦ་ཤ་ཏྲཱུཾ་བིགྷྣཱན་ཨཾ་ཀུ་ཤ་ཛཿ ཛཿཧཱུྃ་བྃ་ཧོཿ ཕྱི་ནང་བར་ཆད་དགྲ་དང་བགེགས༔ མཚན་མ་ཚོགས་ཀྱི་རྫས་ལ་བསྟིམ༔ རྣམ་ཤེས་འོད་གསལ་དབྱིངས་སུ་སྤོར༔ ཤ་ཁྲག་ཚོགས་ཀྱི་འཁོར་ལོར་བཞེས༔ སརྦ་ཤ་ཏྲཱུཾ་བིགྷྣཱན་མཱ་ར་ཡ་ཁ་ཁ་ཁཱ་ཧི་ཁཱ་ཧི༔ དྲུག་པ་ནི། དེ་ལྟར་མཆོད་པའི་རྗེས་རྣལ་འབྱོར་པ་རྣམས་ལ་ཐབས་ཤེས་ཀྱི་རྫས་བསྣོལ་མར་སྟོབ་སྟེ་ནང་གི་ཚོགས་ལ་རོལ། བདུན་པ་ལྷག་མ་རྣམས་བསྡུས་ཏེ། ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཞེས་པས་བྱིན་གྱིས་བརླབས། ཕེཾ་ཕེཾ༔ ལྷག་ལ་དབང་བའི་མཁའ་འགྲོ་གིང༔ ཕོ་ཉ་མགྱོགས་མ་གནས་ཉུལ་ཚོགས༔ དཔལ་གྱི་ཕམ་ཕབས་འདི་ལོངས་ལ༔ མི་མཐུན་ཀུན་སོལ་ཕྲིན་ལས་སྒྲུབས༔ ཨོཾ་ཨུ་ཙྪིཥྚ་བ་ལིཾ་ཏ་ཁཱ་ཧི༔ ཞེས་དང་བཤལ་ཆུས་མཆོད། སྨོན་ལམ་གདབ་པ་ནི། ཧོཿ བདག་ཅག་རྡོ་རྗེའི་རྣལ་འབྱོར་མཆེད་ལྕམ་གྱིས༔ གསང་མཆོག་མཁའ་འགྲོ་འདུ་བའི་གྲོང་ཁྱེར་དུ༔ ལོངས་སྤྱོད་ཆེན་པོས་མཆོད་ཅིང་བསྐངས་པའི་མཐུས༔ བདག་གཞན་དཀྱིལ་འཁོར་གཅིག་ཏུ་འགྲུབ་པར་ཤོག༔ གཉིས་པ་ནི། ཧཱུྃ༔ དབྱིངས་ལ་རྟོག་པ་མི་མངའ་ཡང༔ རང་བྱུང་ཐུགས་རྗེའི་རྩལ་ཤུགས་བསྐྱེད༔ མཁྱེན་བརྩེ་ནུས་སྟོབས་རྨད་བྱུང་བའི༔ རྡོ་རྗེའི་ཐུགས་དམ་དུས་ལ་བབ༔ འཁྲུལ་སྣང་ཡེ་ཤེས་དབྱིངས་སུ་སྦྱོར༔ མཆོག་གི་ཕྲིན་ལས་འགྲུབ་པར་མཛོད༔ གསུམ་པ་ནི། ཧཱུྃ༔ དཔལ་ཆེན་འབར་བའི་སྟོན་འཁོར་གྱིས༔ རྡོ་རྗེའི་རྒྱུད་ཀྱི་རང་སྒྲ་ནི༔ སྲིད་ཞི་ཁྱབ་པར་བསྒྲགས་པའི་ཚེ༔ ཞལ་བཞེས་དམ་ཅན་སྲུང་མ་ཀུན༔ སྔོན་གྱི་གཡར་དམ་མ་བསྙེལ་བར༔ བཅོལ་བའི་ཕྲིན་ལས་འགྲུབ་པར་མཛོད༔ སརྦ་ཀརྨ་ཀུ་རུ་ཧོཿ བཞི་པ་ནི། ཧཱུྃ༔ ལུགས་ལྡོག་བརྟན་མ་མཁའ་འགྲོ་རྣམས༔ བདེན་དོན་དགའ་བཞིའི་བཤལ་ཆུ་བཞེས༔ ལུགས་འབྱུང་ཡིད་བྱེད་ཀླ་ཀློ་སྒྲོལ༔ རྡོ་རྗེའི་གནས་ཡུལ་བདེ་བར་མཛོད༔ མ་མ་པཱུ་ཛ་ཧོཿ ལྔ་པ་ནི། ཧཱུྃ༔ གློ་བུར་ལྟར་སྣང་དམ་སྲིའི་ཚོགས༔ ཨེ་དབྱིངས་རྣམ་ཐར་གསུམ་ཀློང་མནན༔ རིག་པ་རྡོ་རྗེས་རྒྱས་བཏབ་པས༔ འཁྲུལ་པ་གཞིར་དག་ཕྲིན་ལས་མཛོད༔ ས་མ་ཡ་སྟྭཾ་བྷ་ཡ་ནན༔ དྲུག་པ་ནི། ཧཱུྃ༔ བདེ་ཆེན་དབྱིངས་ཀྱི་ཕོ་བྲང་ནས༔ ཡེ་ཤེས་མཁའ་འགྲོའི་ལྷ་ཚོགས་ཀྱིས༔ མཐུ་རྩལ་ནུས་པའི་རྟགས་ཕྱུངས་ལ༔ མཆོག་ཐུན་ཕྲིན་ལས་དངོས་གྲུབ་སྩོལ༔ ཨོཾ་སིཾ་ཧ་མུ་ཁ་ཛྙཱ་ན་ཌཱ་ཀི་ནི་ས་པ་རི་ཝ་ར་ཀཱ་ཡ་ཝཱཀ་ཙིཏྟ་ཛྙཱ་ན་སརྦ་སིདྡྷི་ཧཱུྃ་ཧཱུྃ༔ བདུན་པ་ནི། མ་རྙེད་ཡོངས་སུ་སོགས་དང༌། ཡིག་བརྒྱ་མང་དུ་བཟླ། བརྒྱད་པ་ནི། མདུན་བསྐྱེད་ཚོགས་མཆོད་སྐབས་བརྟན་བཞུགས་སྤྱི་ལྟར་དང༌། བདག་ཉིད་ལྷའི་འཁོར་ལོའི་གསལ་སྣང༌། ཨཿ སྣོད་བཅུད་ལྷར་སྣང་རང་ལ་ཐིམ༔ རང་སྣང་འོད་གསལ་དབྱིངས་ཀྱི་ངང༔ རིག་པ་ཛྙཱ་ན་དྷཱ་ཀི་ནིའི༔ གསང་བ་གསུམ་གྱི་རོལ་པར་ཤར༔ ཨོཾ་ཨཱཿཧཱུྃ༔ དགུ་པ་ནི། བརྟན་གཡོའི་དངོས་ཀུན་བདེ་ཆེན་ལྷ་སྐུར་དག༔ ལྡང་འཇུག་རླུང་རྣམས་སྐྱེ་མེད་སྔགས་སུ་རྫོགས༔ དྲན་རྟོག་འོད་གསལ་ཐིག་ལེ་ཆེན་པོར་སྨིན༔ རྡོ་རྗེ་བཙུན་མོའི་གོ་འཕང་མྱུར་ཐོབ་ཤོག༔ བཅུ་པ་ནི། ཧྲཱིཿ གདོད་ནས་རྣམ་དག་རང་བཞིན་གཅིག་པ་ལ༔ ཡེ་ཤེས་དབྱིངས་ཀྱི་དཀྱིལ་འཁོར་མངོན་དུ་གསལ༔ མ་བསྐྱེད་ལྷུན་གྱིས་གྲུབ་པའི་མཁའ་འགྲོ་མ༔ ཆོས་སྐུ་རྡོ་རྗེ་ཕག་མོའི་བཀྲ་ཤིས་ཤོག༔ རང་བྱུང་མ་འགག་ཅིར་ཡང་སྣང་བ་ལ༔ སྣ་ཚོགས་རོལ་པའི་མཁའ་འགྲོ་འདུ་ཞིང་འཕྲོ༔ གར་གྱི་དབང་ཕྱུག་མཚན་དང་དཔེ་བྱད་འབར༔ ལོངས་སྐུ་དབྱིངས་ཕྱུག་སྡེ་ལྔའི་བཀྲ་ཤིས་ཤོག༔ ཞི་རྒྱས་དབང་དང་དྲག་ཤུལ་ཕོ་བྲང་ནས༔ ལས་རྣམས་མ་ལུས་སྒྲུབ་བྱེད་མྱུར་མགྱོགས་ཅན༔ དཀར་སེར་དམར་ལྗང་རབ་ཏུ་འཁྲུགས་བྱེད་མ༔ སྤྲུལ་སྐུ་མཁའ་འགྲོ་སྡེ་ལྔའི་བཀྲ་ཤིས་ཤོག༔ ཁྱབ་བརྡལ་ཉག་གཅིག་དོན་གྱི་ཕོ་བྲང་ནས༔ ཐུགས་རྗེའི་རྩལ་འཕྲོ་འཁོར་བའི་སེམས་ཅན་རྣམས༔ ཐབས་ཀྱི་ཆོ་འཕྲུལ་འགྱེད་ཅིང་སྒྲོལ་བྱེད་མ༔ ཡེ་ཤེས་མཁའ་འགྲོ་རྣམས་ཀྱི་བཀྲ་ཤིས་ཤོག༔ ཀུན་རྫོབ་སྒྱུ་མ་སྣང་སྲིད་ཕོ་བྲང་ནས༔ ལེགས་ཉེས་སྟངས་འཛིན་བཀའ་ཡི་བྱ་ར་བ༔ ཤན་འབྱེད་ལས་ཀྱི་དྲོད་འཛིན་གཉེར་མོ་ཆེ༔ ལས་བྱེད་འཇིག་རྟེན་མཁའ་འགྲོའི་བཀྲ་ཤིས་ཤོག༔ དམ་ཅན་རྒྱ་མཚོའི་ཚོགས་ཀྱི་བཀྲ་ཤིས་ཤོག༔ ཕོ་ཉ་ལས་མཁན་རྣམས་ཀྱི་བཀྲ་ཤིས་ཤོག༔ དྲེགས་པ་སྡེ་བརྒྱད་རྣམས་ཀྱི་བཀྲ་ཤིས་ཤོག༔ སྣང་སྲིད་ལྷ་འདྲེ་རྣམས་ཀྱི་བཀྲ་ཤིས་ཤོག༔ ནད་གདོན་སྡིག་སྒྲིབ་ཞི་བའི་བཀྲ་ཤིས་ཤོག༔ ཚེ་བསོད་ལོངས་སྤྱོད་རྒྱས་པའི་བཀྲ་ཤིས་ཤོག༔ སྣང་སྲིད་དབང་དུ་འདུ་བའི་བཀྲ་ཤིས་ཤོག༔ བར་ཆད་དགྲ་བགེགས་འདུལ་བའི་བཀྲ་ཤིས་ཤོག༔ ཅི་བསམ་ལྷུན་གྱིས་འགྲུབ་པའི་བཀྲ་ཤིས་ཤོག༔ ཅེས་བརྗོད་པས་དགེ་ལེགས་སུ་བྱའོ། །ཕྱོགས་དུས་འདྲེན་པའི་མཁྱེན་བརྩེའི་ཆུ་གཏེར་ལས། །རིགས་སྔགས་ལྷ་མོའི་བདུད་རྩིའི་མེ་ཏོག་གིས། །དངོས་གྲུབ་སྙེ་མ་གཡུར་དུ་ཟ་བའི་དཔལ། །བྱིན་བཞིན་ཕན་བདེའི་བཙས་སུ་ལེགས་པར་བསྡེབས། །རབ་དགེ་དྲི་མེད་དྲང་སྲོང་དམོད་པ་ཡིས། །མཐུ་སྟོབས་ཚངས་པའི་རལ་ཀླུང་འདིར་དྲངས་པས། །ཕལ་རྒོལ་གཡུལ་རྒྱལ་གྲགས་སྙན་རླབས་ཕྲེང་གིས། །ཐུབ་བསྟན་ཡངས་པའི་འཛིན་མ་མཛེས་བྱེད་ཤོག །ཅེས་པའང་ལས་དང་སྐལ་པ་བཟང་པོའི་བཙས་སུ་རྙེད་པའི་དབྱིག་མཆོག་འདོད་དགུའི་དཔྱིད་དུ་ཐོབ་པ་རང་གིར་བགྱི་བའི་སླད་རིག་སྔགས་འཆང་བ་ཀློང་ཆེན་ནམ་མཁའ་འོད་གསལ་རང་བྱུང་སྤྲུལ་པའི་རྡོ་རྗེ་པདྨ་མདོ་སྔགས་གླིང་པས་རྒྱལ་བ་ཤིང་རྟ་ལོའི་སྨིན་ཟླའི་དམར་ཕྱོགས་ཀྱི་རྒྱལ་བ་གསུམ་པར་ཡོན་ཏན་གསུང་གི་གནས་མཆོག །བདེ་ཆེན་པདྨ་ཤེལ་ཕུག་གི་ཀེའུ་ཚང་དུ་གཏེར་གཞུང་ཁྲིགས་སུ་བསྡེབས་པའི་ཡི་གེ་པ་ནི་རང་གི་ཚ་བོ་བཙུན་པ་བཀྲ་ཤིས་རྣམ་རྒྱལ་གྱིས་བགྱིས་པ་འདིས་ཀྱང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ནས་དཔལ་ཧེ་རུ་ཀའི་གོ་འཕང་དཀའ་བ་མེད་པ་མངོན་དུ་བྱེད་པའི་རྒྱུར་གྱུར་ཅིག །མངྒ་ལཾ།། །།
[edit]

@#/____/snyan brgyud snying gi gsang mdzod las/_/yum ka mkha' 'gro gdugs seng sbrags ma'i sgrub thabs byad gdon dpung 'joms rdo rje'i mkhar rdzong zhes bya ba bzhugs so/_/gnyags lugs rdo rje phur pa'i cha lag go/_// @#/__/na mo gu ru dz+nyA na kro d+hI ye/_/rnam kun mchog ldan stong chen kun gsal ngogs/_/snying rje 'jigs dus sprin gyi lang tsho ni/_/yid srub dpung 'joms drag shul gnam lcags char/_/thogs med 'bebs mdzad 'phrog byed zhal la 'dud/_/bde chen ye shes phyag rgya yi/_/snying por 'jug pa'i sgrub thabs kyi/_/las rim khrigs bsdebs rdo rje'i mkhar/_/bar chad srung ba'i rdzong du bstan/_/'di nyams su len pa'i tshul la sngon dngos rjes gsum gyi/_dang po la'ang*/_sbyor ba skyabs sems tshogs bsags sbyangs/_/bgegs bskrad srung 'khor byin 'bebs brlab/_/ces pa ltar brgyad las/_dang po ni/_gnas khang rgyan dang byi dor byas pa'i gung du gzhung mthun gyi sku bkram pa'i spyan sngar gtor ma chos 'byung bsnol ma'i steng mkha' 'gro'i gsang gtor rgyan spros can/_bka' srung gtor ma/_chad brtan/_sman raka_/tshogs mchod/_mdun du mchod pa rnam bdun phreng tshar/_dkar bgegs sogs 'og tu dgos pa'i rigs 'du bya/_gnyis pa ni/_sgrub pa po rnams stan la 'khod de tshig bdun gsol 'debs sngon 'gros brgyud 'debs btang*/_rang gi snying ga nas bde ba chen po'i ye shes kyi 'od zer mkha' khyab tu 'phros pas phyogs dus skyabs yul rgya mtsho mdun gyi nam mkhar badz+ra sa mA dzaHsa tshogs zhing sad par byas te/_na mo:_bdag sogs 'gro kun deng nas bzung:_byang chub snying por mchis kyi bar:_skyabs kyi dam pa dkon mchog gsum:_mi phyed dad pas skyabs su mchi:_lan gsum/_gsum pa ni/_mkha' mnyam sems can thams cad kun:_srid pa'i rtsa ba bdud bzhi bcom:_bar chad gdon bgegs bsgral ba'i phyir:_ye shes mkha' 'gro sgrub par bgyi:_lan gsum/_bzhi pa ni/_ho:_rdo rje slob dpon sangs rgyas dpal:_dus gsum bzhugs la phyag 'tshal lo:_mchog gsum bsten pa'i zhing gyur la:_gnyis med yid kyis skyabs su mchi:_dngos 'byor yid kyis rnam sprul pa'i:_dag pa'i mchod pa bzhes su gsol:_dngos grub chu bo gcod pa'i bgegs:_nyes byas ma lus bshags par bgyi:_phyogs bcu 'khor gsum dag pa'i chos:_ma chags spyod la rjes la yi rang:_dag pa'i mtha' bzhi dri ma med:_rdzogs pa'i byang chub sems bskyed do:_bde gshegs byang chub sems dpal la:_dag pa gsum gyi lus 'bul lo:_tshe rabs bgrang ba'i las rnams kun:_bsdus te byang chub chen por bsngo:_lan gsum mthar/_badz+ra muHsa tshogs zhing rnams 'od gsal gyi dbyings su thim/_lnga pa ni/_rang nyid skad cig gis las kyi d+hA ki ni ljang nag gri thod 'dzin pa'i skur gyur/_bgegs gtor dngos su bshams pa la ni/_ra~M ya~M kha~M/_oM AHhU~Mha ho hrIH_lan gsum gyis byin gyis brlabs/_sarba b+hU ta A kar+Sha ya dzaHsa mgron bkug_oM sarba big+h+nAn ba liM ta khA hi:_lan gsum gyi gtor ma bsngos te/_hU~M:_gsang ba bla med lam sgrub pa'i:_rdo rje'i dkyil 'khor gnyan po 'dir:_:'du ba'i lha ni ma gtogs pa:_dam med bdud rigs nag po'i phyogs:_lta zhing nyan pa'i dbang med pas:_byin pa'i gtor ma 'di khyer la:_rang rang gnas su bde bar dengs:_gal te mi 'gro 'dug gyur na:_nga ni 'jigs byed rdo rje can:_bka' las 'da' ba'i sdig can rnams:_rdo rje ye shes mtshon chen pos:_phye mar 'thag par gdon mi za:_hU~M bzhi'i sngags dang bcas pas bskrad/_drug pa ni/_hrIH_snang srid ye shes lha yi dal:_snang grags rig pa sku gsung thugs:_gnyis su med pa'i dkyil 'khor te:_kun kyang 'bar ba'i phyag rgyar shar:_bgegs dang bar chad ming yang med:_mi shigs rdo rje 'khor lo dang:_rin chen pad+ma rgya gram gyi:_gur khang 'bar bas phyogs mtshams gtams:_mtshams kyi dkyil 'khor lhun gyis grub:_dz+nyA na badz+ra tsakra rat+na pad+ma khang+ga rak+Sha rak+Sha b+h+rUM b+h+rUM b+h+rUM:_bdun pa ni/_hU~M hU~M:_brdal ba chen po chos sku yum gyi mkhar:_'gag med 'od gsal longs sku'i gzi byin 'bar:_sprul pa'i rnam rol rtsa gsum rab 'byams lha:_'dir dgongs 'dir gshegs byin gyis brlab tu gsol:_bde chen sku yi gar stabs khyugs se khyug:_rdo rje'i glu dbyangs sngags sgra 'u ru ru:_mkhyen brtse dgongs pa'i ye shes lams se lam:_ngo mtshar rtags dang mtshan ma myur du ston:_dur khrod gnas mchog 'og min gsang chen zhing:_rnal 'byor pho mo he ru ka yi gdung:_phyi nang gsang ba'i mchod tshogs ma lus kun:_bde chen longs spyod chen por byin gyis rlobs:_oM AHhU~M badz+ra gu ru d+he wa d+hA ki ni ba~M ha ri ni sa sarba sa ma ya dz+nyA na a be sha ya a aH_e a ral+li hriM hriM pheM pheM:_hU~M hU~M hU~M:_dzaHhU~M ba~M hoH_brgyad pa ni/_hU~M:_gnas khang dur khrod chen po'i gzhal med khang:_ye shes bkod pa 'byams klas 'od 'bar dbus:_nyer spyod 'dod yon drag po'i longs spyod kun:_bde stong mchod pa'i phyag rgya chen por shar:_oM badz+ra ar+g+haM pad+yaM puSh+pe d+hU pe A lo ke g+han+d+he nai wi d+yA shab+da pany+tsa kA ma gu Na d+harma d+hA tu sarba pU dza AHhU~M:_zhes phyi mchod dang*/_oM AHhU~M sarba pany+tsa a mr-i ta hU~M hrIHThA:_oM AHhU~M ma hA ba liM ta te dz+wa ba liM ta ba la ba te gu h+ya sa ma ye swA hA:_oM AHhU~M ma hA rak+ta sa man+ta maN+Da la hU~M phaTa?:_ces sngags rnams so sor lan gsum res nang mchod kyi dam rdzas rnams byin gyis brlab par bya'o/__/gnyis pa dngos gzhi'i phrin las la/_lha bskyed spyan drangs bstim phyag bya/_/mchod bstod bzlas pa'i las rim drug_/ces pa ltar las dang po ni/_aH_bdag med rdo rje btsun mo'i mkha' klong las:_rang byung snying rje'i cho 'phrul nyi ltar shar:_zung 'jug dwangs ma'i thig le yi ge e:_nam mkha'i mdog gis 'khor 'das dngos 'dzin sbyangs:_'od kyi cho 'phrul khrag 'thung rol pa'i zhing:_dur khrod chen po 'jigs shing skyi g.ya'i dbus:_rdo rje'i srung 'khor zlum mthing gcig tu 'dril:_'bar ba'i rtsibs bcu ral gri'i rtse ltar gzing:_ye shes rlung gis bar med 'khor ba las:_rdo rje'i mtshon cha'i char pa thor thor 'phro:_bskal pa'i me dang dus kyi rlung 'thab cing:_chos nyid rgya mtsho rdo rje'i mda' yi drwa:_go mtshams med pas bar chad byad ma 'joms:_de yi lte bar drag po'i gzhal med khang:_mi mgo'i rtsigs pa shar bu mda' yab can:_sgo dang rta bab bang rim bzhis mdzes shing:_zhing gi rgyal mtshan la sogs rngam brjid spras:_dbus su lcags kyi chos 'byung bsnol ma'i nang:_'dab brgyad pad+ma'i lte bar byad ma bsnol:_de steng sa bon bab pa yongs gyur las:_gnas gsum mkha' 'gro'i rje mo siM ha'i zhal:_dbu dgu bco brgyad phyag dang ldan pa ni:_dus kyi mun pa 'khrigs pa'i kha dog can:_'bar ba'i zhal gsum seng ge dkar dmar nag:_de steng zhal gsum stag gzig dom gyi gdong:_de steng zhal ni phag zhal ngur sgra sgrogs:_kun kyang mche gtsigs ljags skyod pheM sgra sgrogs:_gnas gsum ma mo mkha' 'gro las la bskul:_thod skam dbu rgyan ral pa gzengs zhing brdzes:_rtsa ba'i phyag gnyis gri thod thugs kar 'dzin:_g.yas brgyad rdo rje tsit+ta mdung thung gri:_gsal shing mda' dang be con dbyug tho gdeng:_g.yon brgyad dril bu byad ma'i mgo zhags pa:_me hom lcags sgrog gzhu dang 'khor lo ste:_srid pa spyi 'degs zhabs bzhi gar stabs can:_sku la dur khrod dpal gyi chas rdzogs pa'i:_pang du khro rgyal rdo rje gtsug tor che:_dbu dgu mthing dkar dmar dang ljang dmar ser:_nag mthing smug po phyag brgyad dang po gnyis:_rdo rje dung khrag yum dang gnyis med sbyor:_lhag ma g.yas g.yon 'bar ba'i ral gri gdeng:_'jigs rngam mi bzad zhabs kyis 'khril te sbyor:_bde ba'i sems sprin las byung phyogs mtshams su:_rigs bzhi'i seng gdong gtsug tor gdugs 'dzin pa:_dkar ser dmar ljang shin tu khros pa'i sku:_seng gdong rigs bzhis rang rtags gri thod dang:_phyir bzlog chen mo gdugs dang ral gri can:_'bar ba'i chas can rang rig yab dang sbyor:_'jigs pa'i sku yis srid gsum zil gyis gnon:_bzhad pa'i nga ros khams gsum byad ma 'joms:_rngams pa'i ye shes gdug can dgra la brnag:_yon tan mi zad bcom ldan 'das ma ste:_phrin las phra men rol pa'i tshogs su bstan:_gser khyams gnas yul ma mo mkha' 'gro dang:_khrag khyams sgo bzhir dbang phyug nyi shu brgyad:_phyi rol pad+mar mkha' 'gro so gnyis dang:_dur khrod brgyad dang ging dang lang+ka'i tshogs:_ma 'dres gsal rdzogs snang stong sgyu ma'i sku:_mkha' khyab nam mkha'i sku can 'ja' ltar shar:_mi shigs rdo rje gsum gyi ye shes la:_bde gshegs kun gyi gsang gsum phyag rgyas gdab:_dug lnga gnas dag rigs kyi yum chen lngas:_dbang bskur rigs kyi bdag pos mtshan par gyur:_oM AHhU~M:_hU~M oM trA~M hrIHaH_gnyis pa ni/_hU~M hrIH_dbyings las rang byung ye shes mkha' 'gro'i sprin:_'gag med rol pa phra men khrag 'thung gzugs:_'bum phrag yangs pa chen po'i 'khor lo'i bdag:_chos dbyings bde ba chen po'i klong nas gshegs:_gnas 'dir byin phob dbang dang dngos grub stsol:_log 'dren bdud dang bar chad dbyings su sgrol:_mchog thun dngos grub thogs med 'grub pa yi:_he ru ka dpal go 'phang mchog stsol cig:_oM dz+nyA na DA ki ni sarba sa ma ya dzaHdzaH_gsum pa ni/_hU~M hrIH_gdod nas grub pa'i dam tshig 'khor lo la:_lhun gyis rdzogs pa'i ye shes brtan par bzhugs:_rang snang bde ba chen po'i lha tshogs la:_gnyis med mnyam pa'i brda yis phyag bgyi'o:_tiSh+Tha lhan:_na mo na ma mi:_bzhi pa ni/_hU~M hrIH_snang zhing srid pa kun tu bzang po'i zhing:_tshogs drug yul dbang gnyis med rdo rje'i rgyan:_rol pa chen po'i dam tshig blang dor bral:_rtag tu bde chen dgyes pas bzhes su gsol:_oM badz+ra rU pa shab+da gan+d+he rA sa spar+she d+harma d+hA tu pany+tsa a mr-i ta rak+ta ba liM ta ma hA su kha a ti pU dza sa ma ya khA hi:_lnga pa ni/_hU~M hrIH_don gyi mkha' 'gro chos nyid bzang mo'i zhal:_kun khyab thig le'i chos kun drwa ba sdom:_smra bsam brjod med chos sku de bzhin nyid:_rtag tu 'du 'bral med la phyag 'tshal bstod:_rtags kyi mkha' 'gro bde chen dgyes pa che:_zag pa zad pa 'pho med rdo rje'i rigs:_bcu drug dga' bas gang ba'i ro la rol:_kha sbyor bde ba chen po'i gsung la bstod:_brda yi mkha' 'gro phra men mthu mo che:_gzhan gyis mi thub rigs sngags lha mo'i gzugs:_'bum phrag yangs pa chen po'i sprin 'phro ba:_ma lus 'khor dang bcas la phyag 'tshal bstod:_drug pa ni/_bsnyen sgrub las sbyor bzlas pa gsum/_zhes pa'i dang po la bsnyen pa ni/_gtso mo'i thugs kar gnam lcags rdo rje'i lter:_nyi ma la gnas e mthar sngags kyis bskor:_'od zer spro bsdus 'phags mchod 'gro sgrib sbyangs:_gnyug ma'i sgo gsum rdo rje'i phyag rgyar shar:_lha bdag mi phyed dgongs pa gcig tu 'dres:_oM badz+ra siM ha mu kha hU~M ha he phaTa?:_zhes pa 'bru 'bum bzla/_gnyis pa nye bsnyen ni/_gtso mo'i thugs ka'i sa bon las byung sngags:_zhal dang sbyor mtshams nas byung rigs bzhi yi:_siM ha mu kha'i thugs dam rgyud bskul bas:_rang 'od spro bsdus snang srid dngos 'dzin sbyangs:_kun kyang lha sngags ye shes rol mor sad:_chos nyid lha dang sgra sngags 'od zer ni:_nyi ma 'bum gyi gzi brjid ltar 'bar bas:_byad phur bar chad dgra 'dre dbyings su bsgral:_bde chen phyogs las rnam rgyal dpal thob shog:_aHkaHsaHmaHraHtsaHshaHdaHraHsaHmaHraHyaHphaTa?:_/ces 'bum phrag bzhi bzla/_gnyis pa la sgrub pa dang sgrub chen gnyis las/_dang po ni/_seng gdong rigs lnga sbyor ba'i 'od zer gyis:_rigs bzhi'i phyir bzlog yab yum bskul ba yi:_bde ba'i 'od zer srid zhi kun la khyab:_rang dbang med par dpal chen rol pa che:_khrag 'thung dgyes pa'i zhing gi mchog tu shar:_'bar ba'i sku dang drag po'i sngags kyi sgra:_ye shes mtshon cha 'od zer me ri'i tshogs:_'bar zhing 'phro bas gnyis 'dzin byad gdon zhi:_ye shes nus stobs rab rgyas rlung dang sems:_dbang bsdus phyi nang bdud bzhi bsgral ba yi:_mchog gi phrin las lhun gyis grub par gyur:_oM si ta ta pa tre:_a na le:_a na le:_bi Sha de bi Sha de:_bai ra bai ra:_badz+ra d+hA ra ni:_badz+ra pA ni b+han+d+ha b+han+d+ha hU~M hU~M hU~M phaTa? swA hA:_zhes 'bum phrag gcig bzla/_gnyis pa sgrub chen ni/_bde stong rol pa'i 'od kyis gnas yul ma:_dbang phyug nyer brgyad mkha' 'gro ging lang sogs:_'bum phrag yangs pa'i rgyud bskul 'od zer gyis:_rab 'byams phrin las thogs med sgrub par gyur:_oM e a ral+li pheM:_DA ki ni sa ma ya b+h+yo:_ma ma ru lu sarba karma ku ru hoH_khri gcig bzla/_gsum pa las sbyor ni/_gtso 'khor kun gyis rigs bzhi'i sgo ma rnams:_bskul bas sku yi spro bsdus 'khor 'das khyab:_nad gdon kun zhi tshe bsod dpal 'byor rgyas:_khams gsum dbang bsdus dgra bgegs tshar gcod gyur:_oM b+hi ti lo ka DA ki ni sa ma ya b+h+yo:_shan+tiM ku ru swA hA:_puSh+TiM ku ru oM:_wA shaM ku ru hrIHdzaH_mA ra ya phaTa?:_ces las bzhi'i spel tshig so sor sbyar ba stong tsam bzla ba ni grangs bsnyen gyi dbang du byas te/_dus dang mtshan ma'i bsnyen tshad ni spyi ltar ro/__/thun mthar dbyangs gsal rten snying rnams bzlas pas lhag chad skong zhing byin rlabs brtan par bya/_gtang rag gi mchod bstod mdor bsdus dang*/_yi brgya bzla/_gsum pa rjes la/_tshogs mchod bskul dang chad brtan 'bul/_/rta bro dbang len bshags bsdu ldang*/_/dge bsngo shis brjod bcas te bcu/_/zhes pa'i dang po la'ang*/_byin brlab spyan 'dren mchod bskang bshags/_/bsgral bstab rol dang lhag ma bdun/_/zhes pa ltar las dang po ni/_bka' gter srung ma'i gsol phrin btang dgos gang yod spyi ltar sbyar/_spro na brjod med don bshags sngon du 'gro ba dang bcas te/_thabs shes tshogs kyi yo byad la bsang chu dang bdud rtsis bran/_ra~M ya~M kha~M:_rang byung bde chen ka pA lar:_dam rdzas sha lnga bdud rtsi lnga:_ye shes lnga ldan bcud du 'khyil:_'dod yon sprin phung 'phro bar gyur:_oM AHhU~M ha ho hrIH_gnyis pa spyan 'dren ni/_hU~M:_'og min zhing dang nyer bzhi'i yul:_dur khrod brgyad sogs gnas mchog nas:_rab 'byams mkha' 'gro'i dkyil 'khor lha:_tshogs kyi 'du bar spyan 'dren gshegs:_sarba d+ha ka d+hA ki nI sa pa ri wa ra badz+ra sa ma ya dzaH_e a ral+li hriM hriM pheM pheM:_gsum pa tshogs phud mchod pa ni/_oM AHhU~M:_gzugs sgra dri ro reg ldan pa'i:_bde ba chen po'i longs spyod kyis:_ye shes mkha' 'gro'i lha tshogs mchod:_dgyes bzhes dam skong dngos grub stsol:_ma hA ga Na tsakra pU dza khA hi:_bzhi pa ni/_hU~M hrIH_mchog tu mi 'gyur bde chen ye shes mdangs/_/zag med rgyal ba'i 'byor pa rgya mtsho'i sprin/_/cir yang 'char bas rdo rje'i sku gsung thugs/_/rtag tu dgyes pa'i dam rdzas gdod nas shar/_/zhes dang nam mkha' mdzod kyi sngags kyi byin gyis brlabs te/_badz+ra s+pha ra Na khaM/_hU~M hrIH_'khor 'das chos kun a wa d+hU ti'i klong*/_/rnam thar gsum gyi dbyings su dag pa'i gdangs/_/gnam zhal khros pa siM ha tsaN+Da lis/_/gzung 'dzin dngos kun zos pas sgeg pa'i gzugs/_/bde chen gzi 'od 'khrugs pa'i zer thig gi_/bcu drug dga' ba chen po'i mchod pa'i rdzas/_/zhu bde'i nyams brgya 'dren pa'i 'dod yon sprin/_/ye shes rlung gi byed pas 'phro ba yi/_'khrul snang rtog pa zil gyis gnon pa'i mthu/_/rdo rje nyi ma'i 'od snang 'bum 'phro ba/_/phyi ltar dbang shes dag pa'i 'dod yon lnga/_/nang du rtsa rlung thig le'i sman raka gtor/_/gsang ba lhan skyes ye shes sbyor sgrol gyi/_/rol mor 'char bas gsang mchog dgyes pa che/_/dbyings kyi rang mdangs rig pa sku ru smin/_/byin rlabs tshad med brgyud gsum bla ma'i tshogs/_/yongs grub mnyam pa'i lta bas thugs dam bskang*/_/dgongs rgyud rtogs pa'i ye shes btsan thabs spor/_/'od gsal phyag rgya zhi khro sgyu 'phrul drwa/_/ma 'gag 'char bas dngos grub char du 'bebs/_/yi dam rgyud sde rgya mtsho'i thugs dam bskang*/_/mchog dang thun mong las bzhi 'grub par mdzod/_/khyad par rnam kun mchog ldan dbyings kyi yum/_/'khor 'das skyed dang sdud pa'i bdag nyid che/_/dbyings phyug siM ha mu kha'i thugs dam bskang*/_/bdud bzhi'i g.yul las rnam par rgyal bar mdzod/_/sku gsung thugs kyi ye shes 'bar ba'i gar/_/rigs kyi 'khor bsgyur bcom ldan 'das ma lnga/_/phyir zlog pho nya bzhi yi thugs dam bskang*/_/byad gdon bar chad gdug pa'i tshogs choms shig_/bde ba'i bdag nyid sna tshogs gzugs can ma/_/rab 'byams las kyi tshogs dang bka' yi 'bangs/_/dbang phyug ging dang lang+ka'i thugs dam bskang*/_/tshar gcod rjes 'dzin las kun grub par mdzod/_/'bar ba'i phrin las gang 'dul der snang ston/_/dam tshig dbang gis sgrub la bu ltar brtse/_/bstan srung dam can rgya mtsho'i thugs dam bskang*/_/'dod dgu'i phrin las thogs med 'grub par mdzod/_/gzod nas 'gyur med mchog tu bde ba che'i/_/dgyes pa'i dbyings las gzhar yang mi 'da' ba'i/_/yul shes ro mnyam chen po'i dam tshig gis/_/dkyil 'khor 'khor lo dgyes pa bskyed gyur cig_/tha mal zhen pa'i bdag rtog log pa'i dris/_/yang dag don la sgrib pa'i nongs pa kun/_/gnyis med klong yangs chen por bzod bzhes la/_/thun mong mchog gi dngos grub bstsal du gsol/_/'gal rkyen bar chad skye med dbyings su zhi/_/mchog thun dngos grub 'gag med rol par shar/_/tshar gcod rjes 'dzin phrin las rmad po ches/_/byang chub sgrub la dka' ba med par mdzod/_/glo bur rbod gtong byad phur rang sar dag_/'khrul snang sdug bsngal rgyu 'bras mkha' ru sdud/_/ye shes 'bar ba'i phyag rgyas byin brlabs te/_/phyogs las rnam rgyal he ru ka 'grub mdzod/_/ces dang*/_hoH_bdag gis tshe rabs thogs med nas:_bsags pa'i sdig ltung nyams chag kun:_tshogs kyi mchod pas bskang zhing bshags:_dag cing tshangs par mdzad du gsol:_badz+ra sa ma ya shud+d+he a:_yig brgya bzla/_lnga pa ni/_e yaM dz+wa la raM/_sarba sha trUM big+h+nAn aM ku sha dzaH_dzaHhU~M ba~M hoH_phyi nang bar chad dgra dang bgegs:_mtshan ma tshogs kyi rdzas la bstim:_rnam shes 'od gsal dbyings su spor:_sha khrag tshogs kyi 'khor lor bzhes:_sarba sha trUM big+h+nAn mA ra ya kha kha khA hi khA hi:_drug pa ni/_de ltar mchod pa'i rjes rnal 'byor pa rnams la thabs shes kyi rdzas bsnol mar stob ste nang gi tshogs la rol/_bdun pa lhag ma rnams bsdus te/_oM AHhU~M pany+tsa a mr-i ta hU~M hrIHThA:_zhes pas byin gyis brlabs/_pheM pheM:_lhag la dbang ba'i mkha' 'gro ging:_pho nya mgyogs ma gnas nyul tshogs:_dpal gyi pham phabs 'di longs la:_mi mthun kun sol phrin las sgrubs:_oM u ts+tshiSh+Ta ba liM ta khA hi:_zhes dang bshal chus mchod/_smon lam gdab pa ni/_hoH_bdag cag rdo rje'i rnal 'byor mched lcam gyis:_gsang mchog mkha' 'gro 'du ba'i grong khyer du:_longs spyod chen pos mchod cing bskangs pa'i mthus:_bdag gzhan dkyil 'khor gcig tu 'grub par shog:_gnyis pa ni/_hU~M:_dbyings la rtog pa mi mnga' yang:_rang byung thugs rje'i rtsal shugs bskyed:_mkhyen brtse nus stobs rmad byung ba'i:_rdo rje'i thugs dam dus la bab:_'khrul snang ye shes dbyings su sbyor:_mchog gi phrin las 'grub par mdzod:_gsum pa ni/_hU~M:_dpal chen 'bar ba'i ston 'khor gyis:_rdo rje'i rgyud kyi rang sgra ni:_srid zhi khyab par bsgrags pa'i tshe:_zhal bzhes dam can srung ma kun:_sngon gyi g.yar dam ma bsnyel bar:_bcol ba'i phrin las 'grub par mdzod:_sarba karma ku ru hoH_bzhi pa ni/_hU~M:_lugs ldog brtan ma mkha' 'gro rnams:_bden don dga' bzhi'i bshal chu bzhes:_lugs 'byung yid byed kla klo sgrol:_rdo rje'i gnas yul bde bar mdzod:_ma ma pU dza hoH_lnga pa ni/_hU~M:_glo bur ltar snang dam sri'i tshogs:_e dbyings rnam thar gsum klong mnan:_rig pa rdo rjes rgyas btab pas:_'khrul pa gzhir dag phrin las mdzod:_sa ma ya s+t+waM b+ha ya nan:_drug pa ni/_hU~M:_bde chen dbyings kyi pho brang nas:_ye shes mkha' 'gro'i lha tshogs kyis:_mthu rtsal nus pa'i rtags phyungs la:_mchog thun phrin las dngos grub stsol:_oM siM ha mu kha dz+nyA na DA ki ni sa pa ri wa ra kA ya wAka tsit+ta dz+nyA na sarba sid+d+hi hU~M hU~M:_bdun pa ni/_ma rnyed yongs su sogs dang*/_yig brgya mang du bzla/_brgyad pa ni/_mdun bskyed tshogs mchod skabs brtan bzhugs spyi ltar dang*/_bdag nyid lha'i 'khor lo'i gsal snang*/_aH_snod bcud lhar snang rang la thim:_rang snang 'od gsal dbyings kyi ngang:_rig pa dz+nyA na d+hA ki ni'i:_gsang ba gsum gyi rol par shar:_oM AHhU~M:_dgu pa ni/_brtan g.yo'i dngos kun bde chen lha skur dag:_ldang 'jug rlung rnams skye med sngags su rdzogs:_dran rtog 'od gsal thig le chen por smin:_rdo rje btsun mo'i go 'phang myur thob shog:_bcu pa ni/_hrIH_gdod nas rnam dag rang bzhin gcig pa la:_ye shes dbyings kyi dkyil 'khor mngon du gsal:_ma bskyed lhun gyis grub pa'i mkha' 'gro ma:_chos sku rdo rje phag mo'i bkra shis shog:_rang byung ma 'gag cir yang snang ba la:_sna tshogs rol pa'i mkha' 'gro 'du zhing 'phro:_gar gyi dbang phyug mtshan dang dpe byad 'bar:_longs sku dbyings phyug sde lnga'i bkra shis shog:_zhi rgyas dbang dang drag shul pho brang nas:_las rnams ma lus sgrub byed myur mgyogs can:_dkar ser dmar ljang rab tu 'khrugs byed ma:_sprul sku mkha' 'gro sde lnga'i bkra shis shog:_khyab brdal nyag gcig don gyi pho brang nas:_thugs rje'i rtsal 'phro 'khor ba'i sems can rnams:_thabs kyi cho 'phrul 'gyed cing sgrol byed ma:_ye shes mkha' 'gro rnams kyi bkra shis shog:_kun rdzob sgyu ma snang srid pho brang nas:_legs nyes stangs 'dzin bka' yi bya ra ba:_shan 'byed las kyi drod 'dzin gnyer mo che:_las byed 'jig rten mkha' 'gro'i bkra shis shog:_dam can rgya mtsho'i tshogs kyi bkra shis shog:_pho nya las mkhan rnams kyi bkra shis shog:_dregs pa sde brgyad rnams kyi bkra shis shog:_snang srid lha 'dre rnams kyi bkra shis shog:_nad gdon sdig sgrib zhi ba'i bkra shis shog:_tshe bsod longs spyod rgyas pa'i bkra shis shog:_snang srid dbang du 'du ba'i bkra shis shog:_bar chad dgra bgegs 'dul ba'i bkra shis shog:_ci bsam lhun gyis 'grub pa'i bkra shis shog:_ces brjod pas dge legs su bya'o/__/phyogs dus 'dren pa'i mkhyen brtse'i chu gter las/_/rigs sngags lha mo'i bdud rtsi'i me tog gis/_/dngos grub snye ma g.yur du za ba'i dpal/_/byin bzhin phan bde'i btsas su legs par bsdebs/_/rab dge dri med drang srong dmod pa yis/_/mthu stobs tshangs pa'i ral klung 'dir drangs pas/_/phal rgol g.yul rgyal grags snyan rlabs phreng gis/_/thub bstan yangs pa'i 'dzin ma mdzes byed shog_/ces pa'ang las dang skal pa bzang po'i btsas su rnyed pa'i dbyig mchog 'dod dgu'i dpyid du thob pa rang gir bgyi ba'i slad rig sngags 'chang ba klong chen nam mkha' 'od gsal rang byung sprul pa'i rdo rje pad+ma mdo sngags gling pas rgyal ba shing rta lo'i smin zla'i dmar phyogs kyi rgyal ba gsum par yon tan gsung gi gnas mchog_/bde chen pad+ma shel phug gi ke'u tshang du gter gzhung khrigs su bsdebs pa'i yi ge pa ni rang gi tsha bo btsun pa bkra shis rnam rgyal gyis bgyis pa 'dis kyang mi mthun pa'i phyogs thams cad las rnam par rgyal nas dpal he ru ka'i go 'phang dka' ba med pa mngon du byed pa'i rgyur gyur cig__/mang+ga laM//_//

Footnotes

Other Information