རྩ་གསུམ་འཇམ་དཔལ་སྙིང་ཐིག་ལས༔ རྡོ་རྗེའི་དབང་གི་ཆོ་ག༔

🚧 This website is under continued development. We appreciate your patience!

Previous Text Back to Volume PageNext Text

Wylie title	rtsa gsum 'jam dpal snying thig las rdo rje'i dbang gi cho ga
Location	dil mgo mkhyen brtse bka' 'bum Volume 18, Text 19, Pages 116-120 (Folios 1a to 5b5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)
Citation	Khyentse, Dilgo. Rtsa gsum 'jam dpal snying thig las rdo rje'i dbang gi cho ga. In Skyabs rje dil mgo mkhyen brtse rin po che'i bka' 'bum, Vol. 18: 116-120. Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	རྩ་གསུམ་འཇམ་དཔལ་སྙིང་ཐིག་ (rtsa gsum 'jam dpal snying thig)
Recension Link	Other Versions on this site: རྩ་གསུམ་འཇམ་དཔལ་སྙིང་ཐིག་ལས༔ རྡོ་རྗེའི་དབང་གི་ཆོ་ག༔
Colophon	ཅེས་ལས་བྱང་རྩ་བ་འདི་ཉིད་ཐམས་ཅད་མཁྱེན་གཟིགས་མཉྫུ་གྷོ་ཥའི་འཇམ་དཔལ་བཤེས་གཉེན་ཐུགས་ཏིག་ཆ་ཤས་ཙམ་གཏན་ལ་ཕབ་པའི་ཕྱག་དཔེ་ནམ་གཟིགས་ལས་བྱང་འདི་ཐུགས་ལ་ཤར་བའི་གསུང་འཕྲོས་ཕེབས་གསལ་སྐོར། མཆོད་དཔོན་བླ་མ་འཇམ་དཔལ་བློ་གྲོས་མཆོག་ལྡན་ནས་གསོལ་བ་བཏབ་པ་བཞིན་འཇམ་མགོན་ཆོས་ཀྱི་བློ་གྲོས་རིན་པོ་ཆེས་གཏན་ལ་ཕབ་པའི་དགོངས་གཏེར་ཡང་དག་པའོ། །དགེའོ། །མངྒ་ལཾ།།
	ces las byang rtsa ba 'di nyid thams cad mkhyen gzigs many+dzu g+ho Sha'i 'jam dpal bshes gnyen thugs tig cha shas tsam gtan la phab pa'i phyag dpe nam gzigs las byang 'di thugs la shar ba'i gsung 'phros phebs gsal skor/_mchod dpon bla ma 'jam dpal blo gros mchog ldan nas gsol ba btab pa bzhin 'jam mgon chos kyi blo gros rin po ches gtan la phab pa'i dgongs gter yang dag pa'o/__/dge'o/__/mang+ga laM//

Tibetan Text

Wylie

[edit]

༁ྃ༔ རྩ་གསུམ་འཇམ་དཔལ་སྙིང་ཐིག་ལས༔ རྡོ་རྗེའི་དབང་གི་ཆོ་ག་བཞུགས༔

འཇམ་དཔལ་ཡེ་ཤེས་སྒྲོན་མར་འདུད༔ གདོད་ནས་བཞུགས་པའི་ཡེ་ཤེས་སེམས༔ སྲིད་ཞི་ལས་འདས་སྲིད་ཞིའི་བདག༔ ཡེ་ཤེས་གཉིས་མེད་ཚུལ་འཆང་བ༔ གཞོན་ནུའི་ལུས་ཅན་ཉིད་དུ་བཞུགས༔ མ་རྟོགས་འཁྲུལ་པའི་ཡིད་ཅན་རྣམས༔ རྒྱུན་རིང་འཁོར་བ་ཡ་རེ་ང༔ གཟུང་འཛིན་གཉིས་སུ་སྣང་བས་འཁྲུལ༔ རང་ངོ་ཤེས་ལ་ད་ལྟ་ཡང༔ ཡེ་ཤེས་དབྱིངས་སུ་འདུ་བྲལ་མེད༔ འཕེལ་འགྲིབ་བྲི་གང་བྲལ་བར་བཞུགས༔ རྡོ་རྗེ་ཐེག་པའི་གསང་བ་འདི༔ ཐབས་མང་དཀའ་བ་མེད་པ་དང༔ དབང་པོའི་ཐབས་ཀྱི་ཁྱད་པར་གྱིས༔ གཏོར་དང་བླུག་པའི་ཆོ་ག་ཡིས༔ ང་བདག་འཛིན་ན་མངོན་སུམ་མཐོང༔ ལམ་ཀུན་རྩ་བ་དབང་ཉིད་ཏེ༔ དབང་ནི་རང་སེམས་ཉིད་ལ་རྫོགས༔ ཀུན་རྫོབ་བརྡ་ཡི་ནུས་པ་ལ༔ བརྟེན་པས་དོན་གྱི་དབང་བཀའ་ཐོབ༔ མངོན་དུ་གྱུར་ན་རྒྱུད་དང་ལུང༔ མན་ངག་མ་ལུས་གཅིག་ཏུ་དྲིལ༔ དེ་ཕྱིར་ཐོག་མར་དབང་ཉིད་གཅེས༔ བསྒྲུབ་གཞི་གཉུག་མའི་ཡེ་ཤེས་འདི༔ སྐུ་གསུང་ཐུགས་དང་ཡེ་ཤེས་ཀྱི༔ དཀྱིལ་འཁོར་ཉིད་དུ་ལྷུན་གྱིས་གྲུབ༔ སྒྲུབ་བྱེད་དབང་ནི་བུམ་པ་དང༔ གསང་བ་ཤེར་ཡེ་བཞི་པ་སྟེ༔ ཕྱི་ནང་གསང་བ་དེ་ཁོ་ནའི༔ ཚུལ་དུ་ངེས་པར་ཡང་དག་གནས༔ སྒྲུབ་པོ་རྡོ་རྗེ་སློབ་དཔོན་གྱི༔ དཀྱིལ་འཁོར་ཀུན་གྱི་ཁྱབ་བདག་ཆེ༔ སྒྲུབ་ནི་དབྱེར་མེད་ཧེ་རུ་ཀ༔ དྲུག་པ་རྡོ་རྗེ་འཆང་དུ་བཞེངས༔ ཐབས་རྣམས་ཚོགས་པའི་རྟེན་འབྱུང་གི༔ ནུས་པས་ཕྱིར་ཡང་རུང་བས་ན༔ རང་བཞིན་ཡོན་ཏན་བརྒྱད་ལྡན་པས༔ རིམ་པ་དབང་གི་ཆོ་ག་ཡི༔ རྡོ་རྗེ་སློབ་མ་རྗེས་འཛིན་བྱ༔ ས་མ་ཡ༔ དེ་ལ་དང་པོ་སའི་ཆོ་ག༔ ཡན་ལག་བཅས་པ་ལས་རུང་ཚེ༔ ལྷ་དང་བུམ་པ་སློབ་མ་རྣམས༔ ལྷག་པར་གནས་པས་ཉེ་བར་བསྙེན༔ དངོས་གཞི་བཀྲ་ཤིས་སྟེགས་ཡངས་པར༔ རྡུལ་ཚོན་ཆོ་གས་སྒྲུབ་པ་ཡི༔ དཀྱིལ་འཁོར་ཚད་དང་ལྡན་པར་བཞེངས༔ སྐུ་གསུང་ཐུགས་ཀྱི་རྟེན་རྣམས་དང༔ བུམ་པ་བྷནྡྷ་བདུད་རྩིས་གཏམས༔ མེ་ལོང་ལི་ཁྲིའི་རྡུལ་ལྡན་པར༔ རྡོ་རྗེ་སེམས་དཔའི་མན་ཤེལ་འགོད༔ མཆོད་པ་རྒྱན་གྱིས་མཛེས་པར་བྲེས༔ བདག་མདུན་ཆོ་གས་ཡང་དག་བསྒྲུབས༔ བསྐྱེད་དང་བཟླས་པས་ལས་རུང་བྱ༔ སྣོད་དུ་གྱུར་པའི་སློབ་མ་རྣམས༔ བྱུར་བསལ་བགེགས་ཀྱི་འཇུག་པ་བསྐྲད༔ ཕྱོགས་བཅིངས་དད་པས་འཁོད་པ་ལ༔ བློ་བཅོས་ལོ་རྒྱུས་རྒྱས་པར་བཤད༔ མཎྜལ་ཕུལ་ལ་གསོལ་བ་གདབ༔ ཨེ་མ་ཡང་དག་དཀྱིལ་འཁོར་ཆེ༔ རྡོ་རྗེ་འཆང་བ་ཀུན་གྱི་རྗེ༔ དམིགས་མེད་བརྩེ་བས་ཉེར་དགོངས་ལ༔ བདག་ཅག་དཀྱིལ་འཁོར་འཇུག་པར་མཛོད༔ སྐྱབས་སེམས་བསག་སྦྱང་སྡོམ་པ་གཟུང༔ མིག་དར་འཆིང་ཞིང་མེ་ཏོག་གཏད༔ སློབ་མ་རང་གི་སྲས་སུ་བསྐྲུན༔ རྒྱས་གདབ་མིག་འབྱེད་མཐོང་བ་བསྟན༔ རིགས་ངེས་ཤེས་ཕྱིར་མེ་ཏོག་དོར༔ དབང་རྟགས་ཚུལ་དུ་སྤྱི་བོར་བཅིངས༔ མདུན་བསྐྱེད་འོད་ཀྱིས་ཡེ་ཤེས་བསྐུལ༔ མངོན་སུམ་བྱིན་རླབས་དམིགས་པ་གཟིར༔ བརྡ་དང་སྤོས་རོལ་དབྱངས་ཀྱིས་བསྐུལ༔ བརྟན་པར་བྱེད་པ་ནང་འཇུག་གོ༔ སླར་ཡང་གསོལ་བ་གདབ་པ་ནི༔ བྱང་ཆུབ་རྡོ་རྗེའི་དཀྱིལ་འཁོར་གཙོ༔ ཡེ་ཤེས་གཉིས་མེད་ཚུལ་འཆང་བ༔ གསང་བ་རྡོ་རྗེའི་ཡང་དག་དབང༔ བདག་ལ་ངེས་པར་བསྩལ་དུ་གསོལ༔ སློབ་དཔོན་ལྷ་ཡི་འོད་ཟེར་གྱིས༔ མཁའ་ཁྱབ་གདན་གསུམ་དབང་གི་ལྷ༔ མདུན་དུ་སྤྱན་དྲངས་མཆོད་ཅིང་བསྟོད༔ གསོལ་བ་གདབ་པས་ཉེར་བསྐུལ་ཏེ༔ ཐོག་མར་བུམ་དབང་སྦྱིན་པ་ནི༔ ཧཱུྃ༔ བཀྲ་ཤིས་རིན་ཆེན་བུམ་པ་ན༔ ཡེ་ཤེས་བདུད་རྩིའི་བཅུད་ཀྱིས་གཏམས༔ སྒྱུ་འཕྲུལ་དྲྭ་བའི་དབང་བསྐུར་ཕྱིར༔ རྡོ་རྗེའི་སྐུ་གསུང་ཐུགས་སུ་ཤོག༔ ཨོཾ་ཀ་ལ་ཤ་ཨ་བྷི་ཥིཉྩ་ཨོཾ་ཧཱུྃ་ཏྲཱྃ་ཧྲཱིཿཨ༔ བདུད་རྩི་སྦྱིན་ཞིང་འཐོར་འཐུང་བྱ༔ སྤྲོ་ན་རིག་པའི་དབང་ལྔ་བསྐུར༔ ལུས་གང་ཡེ་ཤེས་མངོན་དུ་གྱུར༔ སྣང་སྟོང་ལྷ་ཡི་ཕྱག་རྒྱར་སད༔ བརྟན་ཕྱིར་ནུས་པ་འཇུག་དབང་ནི༔ ཨོཾ༔ ཡེ་ཤེས་སྐུ་སྟེ་སྐུ་ཡི་མཆོག༔ གཞོན་ནུའི་ལུས་ཅན་མཉྫུ་ཤྲཱི༔ དཀྱིལ་འཁོར་ཀུན་གྱི་དབང་ཕྱུག་གིས༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་ཨ་ར་པ་ཙ་ན་དྷཱིཿ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ ཟག་པ་ཟད་པ་རྡོ་རྗེའི་རིགས༔ དཀྱིལ་འཁོར་ཀུན་བདག་ཆེ་བའི་མཆོག༔ རིགས་ཀྱི་བདག་པོ་ལྔ་རྣམས་ཀྱིས༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་ཧཱུྃ་ཏྲཱྃ་ཧྲཱིཿ་ཨ༔ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ སྐྱེ་མཆེད་དག་པ་གཟུང་འཛིན་འདས༔ གཉིས་སུ་མེད་ཀྱང་དུ་མར་སྣང༔ རྒྱལ་སྲས་སེམས་དཔའ་ལྕམ་དྲལ་ཏེ༔ ཡབ་ཡུམ་གཉིས་མེད་དབང་བསྐུར་རོ༔ ཨོཾ་བོ་དྷི་སཏྭ་ཀཱ་ཡ་ཨ་བྷི་ཥིཉྩ་ཨ༔ ཧཱུྃ༔ ཉོན་མོངས་དག་པའི་ཡེ་ཤེས་ཀྱིས༔ མ་ལུས་འགྲོ་བ་སྒྲོལ་བའི་ལྷ༔ རིག་པའི་སྐྱེས་བུ་ཆེན་པོ་ནི༔ ཐུབ་པ་དྲུག་གི་དབང་བསྐུར་རོ༔ མ་ཧཱ་མུ་ནེ་ཀཱ་ཡ་ཨ་བྷི་ཥིཉྩ་ཨ༔ ཧཱུྃ༔ ཚད་མེད་དག་པ་འགྲོ་བའི་མགོན༔ རང་བྱུང་ཁྲོ་རྒྱལ་དཀྱིལ་འཁོར་སྐྱེས༔ མཐར་བྱེད་སྒོ་བ་རྣམ་པ་བཞི༔ ཡབ་ཡུམ་གཉིས་མེད་དབང་བསྐུར་རོ༔ ཛཿཧཱུྃ་བཾ་ཧོཿ ཀཱ་ཡ་ཨ་བྷི་ཥིཉྩ་ཨ༔ རྡོ་རྗེའི་བཟླས་པའི་ལུང་སྦྱིན་ཞིང༔ སྔགས་ཀྱི་ཕྲེང་བ་མགྲིན་པར་བཞག༔ ཨཱཿ གསང་སྔགས་རྒྱལ་པོ་དྲུག་ལྡན་ཞིང༔ དངོས་གྲུབ་ཀུན་གྱི་གཞི་འཛིན་པ༔ བརྗོད་པ་ཀུན་གྱི་རྒྱུ་ཡི་མཆོག༔ ཡང་དག་རོལ་པའི་དབང་བསྐུར་རོ༔ ཝཱཀ་ཨ་བྷི་ཥིཉྩ་ཨཿ ཕྱག་མཚན་གཏད་ལ་དོན་ངོ་སྤྲད༔ ཧཱུྃ༔ ཡེ་ཤེས་སྐུ་སྟེ་རང་བྱུང་བ༔ འགྲོ་བའི་མར་མེ་ཡེ་ཤེས་སྒྲོན༔ གཉིས་མེད་རྡོ་རྗེ་བདེ་བ་ཆེའི༔ དཀྱིལ་འཁོར་འདི་ནི་རྟག་ཏུ་གནས༔ ཙིཏྟ་ཨ་བྷི་ཥིཉྩ་ཧཱུྃ༔ ཡོན་ཏན་རྒྱན་ཆས་ཡང་དག་གཏད༔ ཧོཿ ཕ་རོལ་ཕྱིན་བཅུས་དག་པའི་མཐའ༔ ཟག་མེད་དཀྱིལ་འཁོར་འབྱུང་བའི་གཞི༔ ཡོན་ཏན་ལྡན་པ་ཡོན་ཏན་ཤེས༔ རིན་ཆེན་ཀུན་བདག་དབང་མཆོག་ཕྱིར༔ རཏྣ་ཨཱ་ལངྐ་ར་གུ་ཎ་ཨ་བྷི་ཥིཉྩ་ཏྲཾ༔ ཕྲིན་ལས་སྣ་ཚོགས་རྡོ་རྗེ་གཏད༔ ཧོཿ སངས་རྒྱས་ཕྲིན་ལས་བྱེད་པའི་མགོན༔ འགྲོ་ལ་ཕན་པའི་བྱེད་པ་ཅན༔ ཚར་གཅོད་རྗེས་སུ་འཛིན་པ་ཡི༔ སྒྱུ་འཕྲུལ་འདི་ནི་ཁྱོད་ལ་སྦྱིན༔ བི་ཤྭ་ཀརྨ་ཨ་བྷི་ཥིཉྩ་ཨཱཿ གསང་བའི་དབང་ལ་དཀྱིལ་འཁོར་གཙོ༔ སྦྱོར་བའི་སྒྲ་དང་འོད་ཟེར་གྱིས༔ ཕྱོགས་བཅུའི་བུདྡྷ་བཀུག་ཅིང་བསྟིམ༔ ཞལ་ཞུགས་ཐུགས་ཀར་ཆགས་པས་ཞུ༔ མཁའ་གསང་ནས་སྤྲོས་ལྷག་པའི་སེམས༔ བུ་ཡིས་ལེན་ནམ་ཡང་ན་སྦྱིན༔ ཨཿ བདེ་ཆེན་རོལ་པའི་ཡེ་ཤེས་འདི༔ དཀར་དམར་བྱང་ཆུབ་སེམས་ཀྱི་གཟུགས༔ བཅུ་དྲུག་ཕྱེད་ཕྱེད་ཐིག་ལེ་འཆང༔ རྟོག་བྲལ་གསང་བའི་དབང་བསྐུར་རོ༔ ཨོཾ་བོ་དྷི་ཙིཏྟ་གུ་ཧྱ་ཨ་བྷི་ཥིཉྩ་མ་ཧཱ་སུ་ཁ་ཧོཿ མགྲིན་པར་རོ་རྣམས་འདུས་པའི་རྩར༔ བརྒྱུད་ཏེ་ལུས་གང་རྟོག་པ་བཅོམ༔ ཐབས་ཀྱི་བདེ་བས་དྲངས་པ་ཡི༔ ཡེ་ཤེས་ཉིད་ལ་ཡང་དག་བལྟ༔ ཤིན་ཏུ་གསང་བ་རྡོ་རྗེའི་ལུས༔ དོན་གྱི་ངེས་པའི་དབང་ཉིད་དོ༔ བློ་ལྡན་བརྟུལ་ཞུགས་རིགས་ཅན་ལ༔ མཚན་ལྡན་རིགས་ཀྱི་བུ་མོ་བཙལ༔ རྒྱུད་སྦྱངས་སྣོད་དུ་གྱུར་པ་དག༔ རྡོ་རྗེའི་གཟུང་མར་གཏད་ནས་སུ༔ ཧོཿ ཡང་དག་སངས་རྒྱས་ཀུན་གྱི་ལམ༔ སྣ་ཚོགས་གཟུགས་ཅན་དབྱིངས་ལས་བྱུང༔ ཁྱེར་ལ་རོལ་ཅིག་དཔའ་བོ་ཆེ༔ བདེ་ཆེན་བརྟུལ་ཞུགས་གྲུབ་པར་གྱིས༔ ཀརྨ་མུ་དྲ་ཛྙཱ་ན་མཎྜལ་ལ་ཨ་བྷི་ཥིཉྩ་ཨཿ འདུ་ཤེས་གསུམ་གྱིས་རོལ་པ་ལས༔ བྱུང་བའི་ཡས་བབ་མས་བརྟན་གྱི༔ རྒྱུ་འབྲས་དགའ་བ་ངོ་སྤྲད་བསམ༔ བཅུ་དྲུག་ཕྱེད་ཕྱེད་ཐིག་ལེ་འཆང༔ ཞུ་བས་དགའ་བ་སྐྱེས་པ་ན༔ བདེ་བས་མྱོས་ཚེ་སྟོང་པར་བལྟ༔ གཉིས་མེད་གཉིས་སུ་ལྷུན་གྲུབ་པས༔ ནམ་མཁའ་དེ་ཉིད་ངོ་སྤྲོད་གཅེས༔ ཐབས་ཀྱི་གསང་བ་བླ་མེད་པའི༔ ལམ་འདི་སངས་རྒྱས་ཀུན་གྱི་སྲོག༔ རྣམ་གྲོལ་ཞི་བའི་མཐར་ཐུག་པ༔ རང་ངོ་འཕྲོད་པ་ཤིན་ཏུ་གནད༔ བཞི་པ་ཡེ་ཤེས་དབང་བསྐུར་ནི༔ མི་ཕྱེད་ཅོད་པན་འཆང་བ་སྟེ༔ ཤེལ་དང་མེ་ལོང་བརྡ་ཡི་ཐབས༔ བདེ་བའི་རྗེས་སྐྱོང་གནད་ཀྱི་གསང༔ རྡོ་རྗེའི་ཚིག་གིས་མཚམས་སྦྱར་བས༔ ཡེ་ཤེས་སེམས་དཔའི་ཞལ་མཐོང་འགྱུར༔ ཨཿ ཀ་དག་མེ་ལོང་དྭངས་མའི་ངོགས༔ ལྷུན་གྲུབ་འོད་གསལ་ཟེར་དང་ལྡན༔ ཀུན་ཁྱབ་ཀུན་ལས་འདས་པ་ཡི༔ ཡེ་ཤེས་དམ་པས་ཁྱོད་སྨིན་བྱ༔ ཨེ་མ་སངས་རྒྱས་གདོད་ནས་དག༔ རྡོ་རྗེ་རིགས་ཏེ་དཀྱིལ་འཁོར་གཙོ༔ མཉམ་ཉིད་དབང་གི་བླ་མེད་པ༔ རང་ཉིད་དེ་ཉིད་ངང་ལྟོས་ཤིག༔ འཇམ་དཔལ་དཔལ་གྱུར་རྫོགས་པའི་སྐུ༔ ཕྱག་བྱར་འོས་པ་བླ་མའི་རབ༔ ངོ་བོ་ཉིད་དུ་ལྷུན་གྲུབ་པ༔ ལྟོས་ཤིག་ལྟོས་ཤིག་རིགས་ཀྱི་བུ༔ སྙིང་དབུས་ཡེ་ཤེས་གསང་བ་ཆེའི༔ ཤེས་རབ་རང་བྱུང་སྒྲོན་མེ་ནི༔ ཆོས་ཀུན་འབྱུང་གནས་དམ་པ་སྟེ༔ སྐུ་ལྔའི་བདག་ཉིད་ཤེས་པར་གྱིས༔ དབྱིངས་དང་རིག་པ་གཉིས་སུ་མེད༔ ངོ་བོ་བལྟས་པས་ས་ལེར་མཐོང༔ འོད་གསལ་བླ་ན་མེད་པའི་ལམ༔ རང་ངོ་འདི་ལ་ཡང་དག་རྫོགས༔ ལམ་འདི་དོན་གྱི་མཉྫུ་ཤྲཱི༔ ནམ་མཁའ་ཆེན་པོ་ཡོངས་སུ་དག༔ དེ་ཀོ་ངེས་པའི་རྡོ་རྗེ་འཆང༔ ཁྱོད་ཀྱི་སྙིང་ལ་ཡང་དག་གནས༔ དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཨ་ཨཿ ངོ་བོ་མ་བཅོས་ངང་ལ་བཞག༔ ཕཊ྄་ཀྱིས་རྟོག་པའི་འཕྲོ་འདུ་བཅད༔ ས་ལེ་ཧྲིག་གེའི་དོན་ངོས་བཟུང༔ སྙིང་པོའི་གནད་ཀྱི་ངོ་སྤྲོད་གདབ༔ དབང་ལྷ་སློབ་མ་ཉིད་ལ་བསྟིམ༔ དག་བྱ་དག་བྱེད་ངོ་འཕྲོད་པས༔ དབང་བསྐུར་བས་ཀྱང་ལམ་རྣམས་རྫོགས༔ རྡོ་རྗེ་གསང་བའི་སྣོད་དུ་འགྱུར༔ ཉན་འཆད་སྒོམ་དང་སློབ་མ་བསྡུ༔ ཆོས་ཀྱི་རྒྱལ་པོར་མངའ་དབང་བསྐུར༔ རྗེས་སུ་གཏང་རག་ལུས་འབུལ་ཞིང༔ དམ་ཚིག་ཁས་བླང་བསྔོ་སྨོན་བྱ༔ ཕྲིན་ལས་རིག་པས་མཐར་དབྱུང་བས༔ ཡང་དག་འབྲས་བུའི་སར་སྦྱོར་འགྱུར༔ ཡེ་ཤེས་ལུས་ཅན་འཇམ་དཔལ་གྱི༔ ལྷ་དང་སྔགས་ཀྱི་གསང་བ་ནི༔ དུས་གསུམ་རྒྱལ་བའི་ཐུགས་ལ་གནས༔ ངེས་པའི་མཐར་ཐུག་འདི་ཡིན་པས༔ ཟབ་ཅིང་རྒྱ་ཆེ་བླ་ན་མེད༔ བསམ་མི་ཁྱབ་པར་སྣང་བ་ལས༔ ཀུན་གྱི་མཐར་ཐུག་སྙིང་པོའི་ལམ༔ དེ་ཉིད་ངེས་པའི་དོན་སྟོན་པ༔ ཐུགས་ཀྱི་ཏི་ལ་ཀ་འདི་ཉིད༔ སློབ་དཔོན་འཇམ་དཔལ་བཤེས་གཉེན་ལ༔ ཡེ་ཤེས་སེམས་དཔའ་ཉིད་ཀྱིས་བསྩལ༔ དངོས་གྲུབ་འབད་མེད་ཐོབ་པར་འབྱུང༔ ཁྱབ་བརྡལ་སྤེལ་བ་ཤིན་ཏུ་ཕངས༔ འོན་ཀྱང་མཐའ་མའི་གདུལ་བྱ་རྣམས༔ ཡལ་བར་འདོར་བར་བློས་མ་བཟོད༔ སྨོན་པ་ཆེན་པོས་རྒྱས་བཏབ་པས༔ བདག་གི་ཡེ་ཤེས་སྒྱུ་མ་ནི༔ དུས་གསུམ་ཅིར་ཡང་སྣང་བ་ལས༔ སྙིགས་མའི་དུས་ཀྱི་སྐྱེས་བུ་ནི༔ འཇམ་དཔལ་ཆོས་ཀྱི་བཤེས་གཉེན་ཞེས༔ ཟབ་རྒྱས་ཆོས་ཀྱི་བཀའ་བབ་བདུན༔ ཐུབ་པའི་བསྟན་ལ་མཆོག་ཏུ་སྨན༔ དེ་ཡི་སྐལ་པར་གཏད་རྒྱས་གདབ༔ ཕྱི་ནང་རྟེན་འབྱུང་ལེགས་ཚོགས་ན༔ རིག་པའི་རྩལ་གྱི་ཆོ་འཕྲུལ་འདི༔ ཡི་གེ་སྤྲིན་གྱི་འཁོར་ལོར་སྣང༔ བཅས་བཅོས་མ་བྱེད་གཏན་ལ་ཕོབ༔ དད་བརྩོན་བརྟུལ་ཞུགས་ལྡན་ལ་སྦྱིན༔ ཚུལ་བཞིན་ཉམས་བླངས་དྲོད་ཐོབ་པས༔ དོན་གཉིས་རྒྱ་ཆེར་འགྲུབ་པར་འགྱུར༔ ས་མ་ཡ༔ རྒྱ་རྒྱ་རྒྱ༔ ྀཨཐི༔ གུ་ཧྱ༔ བརྡ་ཐིམ༔ ཅེས་ལས་བྱང་རྩ་བ་འདི་ཉིད་ཐམས་ཅད་མཁྱེན་གཟིགས་མཉྫུ་གྷོ་ཥའི་འཇམ་དཔལ་བཤེས་གཉེན་ཐུགས་ཏིག་ཆ་ཤས་ཙམ་གཏན་ལ་ཕབ་པའི་ཕྱག་དཔེ་ནམ་གཟིགས་ལས་བྱང་འདི་ཐུགས་ལ་ཤར་བའི་གསུང་འཕྲོས་ཕེབས་གསལ་སྐོར། མཆོད་དཔོན་བླ་མ་འཇམ་དཔལ་བློ་གྲོས་མཆོག་ལྡན་ནས་གསོལ་བ་བཏབ་པ་བཞིན་འཇམ་མགོན་ཆོས་ཀྱི་བློ་གྲོས་རིན་པོ་ཆེས་གཏན་ལ་ཕབ་པའི་དགོངས་གཏེར་ཡང་དག་པའོ། །དགེའོ། །མངྒ་ལཾ།། །།

[edit]

\u0f01\u0f83:_rtsa gsum 'jam dpal snying thig las:_rdo rje'i dbang gi cho ga bzhugs: 'jam dpal ye shes sgron mar 'dud:_gdod nas bzhugs pa'i ye shes sems:_srid zhi las 'das srid zhi'i bdag:_ye shes gnyis med tshul 'chang ba:_gzhon nu'i lus can nyid du bzhugs:_ma rtogs 'khrul pa'i yid can rnams:_rgyun ring 'khor ba ya re nga:_gzung 'dzin gnyis su snang bas 'khrul:_rang ngo shes la da lta yang:_ye shes dbyings su 'du bral med:_'phel 'grib bri gang bral bar bzhugs:_rdo rje theg pa'i gsang ba 'di:_thabs mang dka' ba med pa dang:_dbang po'i thabs kyi khyad par gyis:_gtor dang blug pa'i cho ga yis:_nga bdag 'dzin na mngon sum mthong:_lam kun rtsa ba dbang nyid te:_dbang ni rang sems nyid la rdzogs:_kun rdzob brda yi nus pa la:_brten pas don gyi dbang bka' thob:_mngon du gyur na rgyud dang lung:_man ngag ma lus gcig tu dril:_de phyir thog mar dbang nyid gces:_bsgrub gzhi gnyug ma'i ye shes 'di:_sku gsung thugs dang ye shes kyi:_dkyil 'khor nyid du lhun gyis grub:_sgrub byed dbang ni bum pa dang:_gsang ba sher ye bzhi pa ste:_phyi nang gsang ba de kho na'i:_tshul du nges par yang dag gnas:_sgrub po rdo rje slob dpon gyi:_dkyil 'khor kun gyi khyab bdag che:_sgrub ni dbyer med he ru ka:_drug pa rdo rje 'chang du bzhengs:_thabs rnams tshogs pa'i rten 'byung gi:_nus pas phyir yang rung bas na:_rang bzhin yon tan brgyad ldan pas:_rim pa dbang gi cho ga yi:_rdo rje slob ma rjes 'dzin bya:_sa ma ya:_de la dang po sa'i cho ga:_yan lag bcas pa las rung tshe:_lha dang bum pa slob ma rnams:_lhag par gnas pas nye bar bsnyen:_dngos gzhi bkra shis stegs yangs par:_rdul tshon cho gas sgrub pa yi:_dkyil 'khor tshad dang ldan par bzhengs:_sku gsung thugs kyi rten rnams dang:_bum pa b+han+d+ha bdud rtsis gtams:_me long li khri'i rdul ldan par:_rdo rje sems dpa'i man shel 'god:_mchod pa rgyan gyis mdzes par bres:_bdag mdun cho gas yang dag bsgrubs:_bskyed dang bzlas pas las rung bya:_snod du gyur pa'i slob ma rnams:_byur bsal bgegs kyi 'jug pa bskrad:_phyogs bcings dad pas 'khod pa la:_blo bcos lo rgyus rgyas par bshad:_maN+Dal phul la gsol ba gdab:_e ma yang dag dkyil 'khor che:_rdo rje 'chang ba kun gyi rje:_dmigs med brtse bas nyer dgongs la:_bdag cag dkyil 'khor 'jug par mdzod:_skyabs sems bsag sbyang sdom pa gzung:_mig dar 'ching zhing me tog gtad:_slob ma rang gi sras su bskrun:_rgyas gdab mig 'byed mthong ba bstan:_rigs nges shes phyir me tog dor:_dbang rtags tshul du spyi bor bcings:_mdun bskyed 'od kyis ye shes bskul:_mngon sum byin rlabs dmigs pa gzir:_brda dang spos rol dbyangs kyis bskul:_brtan par byed pa nang 'jug go:_slar yang gsol ba gdab pa ni:_byang chub rdo rje'i dkyil 'khor gtso:_ye shes gnyis med tshul 'chang ba:_gsang ba rdo rje'i yang dag dbang:_bdag la nges par bstsal du gsol:_slob dpon lha yi 'od zer gyis:_mkha' khyab gdan gsum dbang gi lha:_mdun du spyan drangs mchod cing bstod:_gsol ba gdab pas nyer bskul te:_thog mar bum dbang sbyin pa ni:_hU~M:_bkra shis rin chen bum pa na:_ye shes bdud rtsi'i bcud kyis gtams:_sgyu 'phrul drwa ba'i dbang bskur phyir:_rdo rje'i sku gsung thugs su shog:_oM ka la sha a b+hi Shiny+tsa oM hU~M trA~M hrIHa:_bdud rtsi sbyin zhing 'thor 'thung bya:_spro na rig pa'i dbang lnga bskur:_lus gang ye shes mngon du gyur:_snang stong lha yi phyag rgyar sad:_brtan phyir nus pa 'jug dbang ni:_oM:_ye shes sku ste sku yi mchog:_gzhon nu'i lus can many+dzu shrI:_dkyil 'khor kun gyi dbang phyug gis:_yab yum gnyis med dbang bskur ro:_oM a ra pa tsa na d+hIH_kA ya a b+hi Shiny+tsa oM:_hU~M:_zag pa zad pa rdo rje'i rigs:_dkyil 'khor kun bdag che ba'i mchog:_rigs kyi bdag po lnga rnams kyis:_yab yum gnyis med dbang bskur ro:_oM hU~M trA~M hrIH a:_kA ya a b+hi Shiny+tsa oM:_hU~M:_skye mched dag pa gzung 'dzin 'das:_gnyis su med kyang du mar snang:_rgyal sras sems dpa' lcam dral te:_yab yum gnyis med dbang bskur ro:_oM bo d+hi satwa kA ya a b+hi Shiny+tsa a:_hU~M:_nyon mongs dag pa'i ye shes kyis:_ma lus 'gro ba sgrol ba'i lha:_rig pa'i skyes bu chen po ni:_thub pa drug gi dbang bskur ro:_ma hA mu ne kA ya a b+hi Shiny+tsa a:_hU~M:_tshad med dag pa 'gro ba'i mgon:_rang byung khro rgyal dkyil 'khor skyes:_mthar byed sgo ba rnam pa bzhi:_yab yum gnyis med dbang bskur ro:_dzaHhU~M baM hoH_kA ya a b+hi Shiny+tsa a:_rdo rje'i bzlas pa'i lung sbyin zhing:_sngags kyi phreng ba mgrin par bzhag:_AH_gsang sngags rgyal po drug ldan zhing:_dngos grub kun gyi gzhi 'dzin pa:_brjod pa kun gyi rgyu yi mchog:_yang dag rol pa'i dbang bskur ro:_wAka a b+hi Shiny+tsa aH_phyag mtshan gtad la don ngo sprad:_hU~M:_ye shes sku ste rang byung ba:_'gro ba'i mar me ye shes sgron:_gnyis med rdo rje bde ba che'i:_dkyil 'khor 'di ni rtag tu gnas:_tsit+ta a b+hi Shiny+tsa hU~M:_yon tan rgyan chas yang dag gtad:_hoH_pha rol phyin bcus dag pa'i mtha':_zag med dkyil 'khor 'byung ba'i gzhi:_yon tan ldan pa yon tan shes:_rin chen kun bdag dbang mchog phyir:_rat+na A lang+ka ra gu Na a b+hi Shiny+tsa traM:_phrin las sna tshogs rdo rje gtad:_hoH_sangs rgyas phrin las byed pa'i mgon:_'gro la phan pa'i byed pa can:_tshar gcod rjes su 'dzin pa yi:_sgyu 'phrul 'di ni khyod la sbyin:_bi shwa karma a b+hi Shiny+tsa AH_gsang ba'i dbang la dkyil 'khor gtso:_sbyor ba'i sgra dang 'od zer gyis:_phyogs bcu'i bud+d+ha bkug cing bstim:_zhal zhugs thugs kar chags pas zhu:_mkha' gsang nas spros lhag pa'i sems:_bu yis len nam yang na sbyin:_aH_bde chen rol pa'i ye shes 'di:_dkar dmar byang chub sems kyi gzugs:_bcu drug phyed phyed thig le 'chang:_rtog bral gsang ba'i dbang bskur ro:_oM bo d+hi tsit+ta gu h+ya a b+hi Shiny+tsa ma hA su kha hoH_mgrin par ro rnams 'dus pa'i rtsar:_brgyud te lus gang rtog pa bcom:_thabs kyi bde bas drangs pa yi:_ye shes nyid la yang dag blta:_shin tu gsang ba rdo rje'i lus:_don gyi nges pa'i dbang nyid do:_blo ldan brtul zhugs rigs can la:_mtshan ldan rigs kyi bu mo btsal:_rgyud sbyangs snod du gyur pa dag:_rdo rje'i gzung mar gtad nas su:_hoH_yang dag sangs rgyas kun gyi lam:_sna tshogs gzugs can dbyings las byung:_khyer la rol cig dpa' bo che:_bde chen brtul zhugs grub par gyis:_karma mu dra dz+nyA na maN+Dal la a b+hi Shiny+tsa aH_'du shes gsum gyis rol pa las:_byung ba'i yas bab mas brtan gyi:_rgyu 'bras dga' ba ngo sprad bsam:_bcu drug phyed phyed thig le 'chang:_zhu bas dga' ba skyes pa na:_bde bas myos tshe stong par blta:_gnyis med gnyis su lhun grub pas:_nam mkha' de nyid ngo sprod gces:_thabs kyi gsang ba bla med pa'i:_lam 'di sangs rgyas kun gyi srog:_rnam grol zhi ba'i mthar thug pa:_rang ngo 'phrod pa shin tu gnad:_bzhi pa ye shes dbang bskur ni:_mi phyed cod pan 'chang ba ste:_shel dang me long brda yi thabs:_bde ba'i rjes skyong gnad kyi gsang:_rdo rje'i tshig gis mtshams sbyar bas:_ye shes sems dpa'i zhal mthong 'gyur:_aH_ka dag me long dwangs ma'i ngogs:_lhun grub 'od gsal zer dang ldan:_kun khyab kun las 'das pa yi:_ye shes dam pas khyod smin bya:_e ma sangs rgyas gdod nas dag:_rdo rje rigs te dkyil 'khor gtso:_mnyam nyid dbang gi bla med pa:_rang nyid de nyid ngang ltos shig:_'jam dpal dpal gyur rdzogs pa'i sku:_phyag byar 'os pa bla ma'i rab:_ngo bo nyid du lhun grub pa:_ltos shig ltos shig rigs kyi bu:_snying dbus ye shes gsang ba che'i:_shes rab rang byung sgron me ni:_chos kun 'byung gnas dam pa ste:_sku lnga'i bdag nyid shes par gyis:_dbyings dang rig pa gnyis su med:_ngo bo bltas pas sa ler mthong:_'od gsal bla na med pa'i lam:_rang ngo 'di la yang dag rdzogs:_lam 'di don gyi many+dzu shrI:_nam mkha' chen po yongs su dag:_de ko nges pa'i rdo rje 'chang:_khyod kyi snying la yang dag gnas:_d+harma d+hA tu dz+nyA na a b+hi Shiny+tsa a aH_ngo bo ma bcos ngang la bzhag:_phaTa? kyis rtog pa'i 'phro 'du bcad:_sa le hrig ge'i don ngos bzung:_snying po'i gnad kyi ngo sprod gdab:_dbang lha slob ma nyid la bstim:_dag bya dag byed ngo 'phrod pas:_dbang bskur bas kyang lam rnams rdzogs:_rdo rje gsang ba'i snod du 'gyur:_nyan 'chad sgom dang slob ma bsdu:_chos kyi rgyal por mnga' dbang bskur:_rjes su gtang rag lus 'bul zhing:_dam tshig khas blang bsngo smon bya:_phrin las rig pas mthar dbyung bas:_yang dag 'bras bu'i sar sbyor 'gyur:_ye shes lus can 'jam dpal gyi:_lha dang sngags kyi gsang ba ni:_dus gsum rgyal ba'i thugs la gnas:_nges pa'i mthar thug 'di yin pas:_zab cing rgya che bla na med:_bsam mi khyab par snang ba las:_kun gyi mthar thug snying po'i lam:_de nyid nges pa'i don ston pa:_thugs kyi ti la ka 'di nyid:_slob dpon 'jam dpal bshes gnyen la:_ye shes sems dpa' nyid kyis bstsal:_dngos grub 'bad med thob par 'byung:_khyab brdal spel ba shin tu phangs:_'on kyang mtha' ma'i gdul bya rnams:_yal bar 'dor bar blos ma bzod:_smon pa chen pos rgyas btab pas:_bdag gi ye shes sgyu ma ni:_dus gsum cir yang snang ba las:_snyigs ma'i dus kyi skyes bu ni:_'jam dpal chos kyi bshes gnyen zhes:_zab rgyas chos kyi bka' bab bdun:_thub pa'i bstan la mchog tu sman:_de yi skal par gtad rgyas gdab:_phyi nang rten 'byung legs tshogs na:_rig pa'i rtsal gyi cho 'phrul 'di:_yi ge sprin gyi 'khor lor snang:_bcas bcos ma byed gtan la phob:_dad brtson brtul zhugs ldan la sbyin:_tshul bzhin nyams blangs drod thob pas:_don gnyis rgya cher 'grub par 'gyur:_sa ma ya:_rgya rgya rgya:_\u0f80athi:_gu h+ya:_brda thim:_ces las byang rtsa ba 'di nyid thams cad mkhyen gzigs many+dzu g+ho Sha'i 'jam dpal bshes gnyen thugs tig cha shas tsam gtan la phab pa'i phyag dpe nam gzigs las byang 'di thugs la shar ba'i gsung 'phros phebs gsal skor/_mchod dpon bla ma 'jam dpal blo gros mchog ldan nas gsol ba btab pa bzhin 'jam mgon chos kyi blo gros rin po ches gtan la phab pa'i dgongs gter yang dag pa'o/__/dge'o/__/mang+ga laM//_//