མཚོ་རྒྱལ་སྙན་བརྒྱུད་ཕུར་པ་མེ་ཡི་སྤུ་གྲིའི་བཀའ་གཏེར་སྲུང་མའི་མཆོད་བྱང་ཕྲིན་ལས་ཐོགས་མེད༔

From Khyentse Lineage - A Tsadra Foundation Project
DKR-KABUM-10-THA-011
Wylie title mtsho rgyal snyan brgyud phur pa me yi spu gri'i bka' gter srung ma'i mchod byang phrin las thogs med DKR-KABUM-10-THA-011.pdf
Location dil mgo mkhyen brtse bka' 'bum
Volume 10, Text 11, Pages 46-48 (Folios 1a to 3a3)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön རྒྱ་རོང་མཁའ་འགྲོ་བདེ་ཆེན་དབང་མོ་ (rgya rong mkha' 'gro bde chen dbang mo)
Associated People ཡེ་ཤེས་མཚོ་རྒྱལ་ (ye shes mtsho rgyal)
Citation Khyentse, Dilgo. Mtsho rgyal snyan brgyud phur pa me yi spu gri'i bka' gter srung ma'i mchod byang phrin las thogs med. In Skyabs rje dil mgo mkhyen brtse rin po che'i bka' 'bum, Vol. 10: 46-48. Delhi: Shechen Publications, 1994.
Genre Protector Rituals - gsol mchod
Cycle མཚོ་རྒྱལ་སྙན་བརྒྱུད་ཕུར་པ་མེ་ཡི་སྤུ་གྲི་ (mtsho rgyal snyan brgyud phur pa me yi spu gri)
Deity rdo rje phur pa
Colophon

ཅེས་ཁྱུང་སྟག་རྡོ་རྗེ་ཡང་རྫོང་ནས་སྤྱན་དྲངས་པའི་ཕྲ་མེན་གཟའ་སྒྲོམ་གྱི་ནང་གི་ཤོག་སེར་ལས་ཌཱ་ཀི་དྷརྨ་ཙནྡྲས་གཏན་ལ་ཕབ་པའི་ཟབ་གཏེར་ཡང་དག་པའོ།།

ces khyung stag rdo rje yang rdzong nas spyan drangs pa'i phra men gza' sgrom gyi nang gi shog ser las DA ki d+harma tsan+d+ras gtan la phab pa'i zab gter yang dag pa'o//

[edit]
ཝྃ༔ མཚོ་རྒྱལ་སྙན་བརྒྱུད་ཕུར་པ་མེ་ཡི་སྤུ་གྲིའི་བཀའ་གཏེར་སྲུང་མའི་མཆོད་བྱང་ཕྲིན་ལས་ཐོགས་མེད་བཞུགས༔

ཝྃ༔ དཔལ་ཆེན་ཕུར་པའི་ལྷ་ལ་འདུད༔ ཨེ་མ་ཡང་ཟབ་མན་ངག་མཆོག༔ པདྨ་དབང་གི་ཕོ་ཉ་ལ༔ སྲིད་གསུམ་འདི་ལྷག་བཙལ་ཀྱང་མེད༔ ཉམས་སུ་ལོངས་ཤིག་ས་མ་ཡ༔ དཔལ་ལྡན་སྔགས་སྲུང་སྒྲུབ་ཐབས་ནི༔ གསེར་སྐྱེམས་རིན་ཆེན་སྣ་ཚོགས་བཤམས༔ ཧཱུྃ༔ ཕྱི་སྣོད་དུར་ཁྲོད་ཁྲག་ཞག་དམར་ནག་ཀློང༔ རབ་འཇིགས་གཏུམ་དྲག་དུག་མཚོའི་གཞལ་ཡས་ནས༔ སྔགས་ཀྱི་བདག་མོ་ཨེ་ཀ་ཙ་ཏི་མ༔ སྐུ་མདོག་མཐིང་ནག་ཆར་སྤྲིན་ལྟ་བུར་གཏིབས༔ ཕྱག་གཡས་མི་ལྤགས་རྒྱལ་མཚན་དབྱིངས་སུ་ཕྱར༔ གཡོན་པས་ཙིཏྟ་དམར་པོ་ཞལ་དུ་གསོལ༔ ཞབས་གཉིས་བརྐྱང་བསྐུམ་གྱད་ཀྱི་དོར་སྟབས་འགྱིང༔ རུས་པའི་རྒྱན་སྤྲས་སྟག་ཤམ་ཞིང་ལྤགས་གསོལ༔ རལ་གཅིག་སྤྱན་གཅིག་ཚེམས་གཅིག་དྲག་ཏུ་ཁྲོས༔ ནུ་གཅིག་དྲག་ཤུལ་ཁྲོས་པའི་གཏུམ་མོ་ཆེ༔ འཁོར་དུ་སྲིད་པའི་མ་མོ་འབུམ་གྱིས་བསྐོར༔ མན་ངག་ཆོས་ཀྱི་བསྟན་པ་སྲུང་མཛད་མ༔ རྣལ་འབྱོར་སྒྲུབ་པ་པོ་ལ་དངོས་གྲུབ་སྩོལ༔ ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད༔ མ་གཡེལ་མ་འགྱང་དམ་ལས་མ་འདའ་བར༔ ཅི་བཅོལ་ཕྲིན་ལས་མྱུར་དུ་འགྲུབ་པར་མཛོད༔ མི་དམིགས་ངང་ལ་མཉམ་པར་བཞག༔ སྤྲོས་བྲལ་ཀ་དག་གཤིས་སུ་ཨཱ༔ ས་མ་ཡ༔ ཧྲཱིཿཛཿ དགུང་སྔོན་དབྱིངས་དང་ཆོས་འཁོར་གནས༔ གར་བཞུགས་དུར་ཁྲོད་གཞལ་ཡས་ནས༔ གཟའ་བདུད་ཆེན་པོ་གདོང་དམར་དང༔ སྡེ་བརྒྱད་དམག་དཔོན་གདོང་མོ་བཞི༔ དྲང་སྲོང་བརྒྱད་དང་རྒྱུ་སྐར་ཚོགས༔ དྲེགས་པ་སྡེ་བརྒྱད་ལས་མཁན་བཅས༔ མ་ཐོགས་མྱུར་དུ་གཤེགས་སུ་གསོལ༔ དམ་རྫས་རྒྱན་གྱི་གཏོར་མ་བཞེས༔ གང་བཅོལ་ཕྲིན་ལས་ཐོགས་མེད་སྒྲུབས༔ དགྲ་བགེགས་མ་ལུས་མྱུར་དུ་སྒྲོལ༔ ཕྱི་ནང་གསང་བའི་བར་ཆད་ཟློག༔ བཅོལ་བའི་ཕྲིན་ལས་འགྲུབ་པར་མཛོད༔ དམ་ལས་མ་འདའ་ས་མ་ཡ༔ ཨེ་མ་སྐལ་ལྡན་ལས་ཅན་ཀུན༔ སྲིད་པའི་གཟའ་སྒྲུབ་འཁོར་ལོ་འདི༔ འབད་པས་རྟག་ཏུ་བརྩོན་གྱུར་ན༔ མ་འོངས་གདུག་པ་ཅན་གྱི་གཤེད༔ དྲག་པོ་མངོན་སྤྱོད་ལས་ཀུན་འགྲུབ༔ ལོག་འདྲེན་ཚར་གཅོད་བདུད་དཔུང་འཇོམས༔ རྫས་དང་མན་ངག་ལྡན་པ་ཡིས༔ ཞག་བདུན་བསྒྲུབས་ན་ངེས་པར་འགྲུབ༔ དམ་ཚིག་ཅན་གྱི་གྲོགས་སུ་བསྔགས༔ འདི་ཉིད་མྱུར་དུ་སྒྲུབ་པས་ན༔ ལུས་དང་གྲིབ་བཞིན་དབྱེར་མེད་འགྲོགས༔ འཁུ་ལྡོག་གདུག་རྩུབ་བཀའ་ཡང་གཉན༔ འདི་ཡི་མན་ངག་མ་ཤེས་ན༔ ནམ་ཡང་གར་ཐོད་མི་བྱ་ཞིང༔ དུས་ལ་བབ་ཚེ་བསྐུལ་བར་བྱ༔ ས་མ་ཡ༔ རྒྱ་རྒྱ་རྒྱ༔ དམ་ཅན་གསོལ་བསྡུས་ནི༔ ཧཱུྃ༔ རང་ཉིད་ཕྱག་ན་རྡོ་རྗེའི་སྐུར་གསལ་ཞིང༔ ཐུགས་སྤྲུལ་སྟོབས་ལྡན་དྲེགས་པའི་ཚོགས༔ བསྟན་སྲུང་ཆེན་པོ་རྡོ་རྗེ་ལེགས༔ མ་ལུས་འཁོར་དང་བཅས་པ་རྣམས༔ མཐུན་རྫས་སྤྱན་གཟིགས་སྣ་ཚོགས་དང༔ སྨན་དང་རཀྟ་རྣམ་ལྔ་ཡིས༔ ཐུགས་དམ་བསྐང་ཞིང་མངའ་གསོལ་ལོ༔ མི་འབྲལ་རྟག་ཏུ་སྲུང་སྐྱོབ་མཛོད༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་ཁྱུང་སྟག་རྡོ་རྗེ་ཡང་རྫོང་ནས་སྤྱན་དྲངས་པའི་ཕྲ་མེན་གཟའ་སྒྲོམ་གྱི་ནང་གི་ཤོག་སེར་ལས་ཌཱ་ཀི་དྷརྨ་ཙནྡྲས་གཏན་ལ་ཕབ་པའི་ཟབ་གཏེར་ཡང་དག་པའོ།། །།

Footnotes

Other Information