JKW-KABAB-08-NYA-002

🚧 This website is under continued development. We appreciate your patience!

Previous Text Back to Volume PageNext Text

བླ་མ་བསྟན་གཉིས་སྐོར་གསུམ་གྱི་སྙིང་པོ་ཟབ་ཏིག་མཐོང་བ་རང་གྲོལ་གྱི་སྤྲོས་མེད་སྒྲུབ་པའི་ཕྲིན་ལས།

Wylie title	bla ma bstan gnyis skor gsum gyi snying po zab tig mthong ba rang grol gyi spros med sgrub pa'i phrin las
Location	mkhyen brtse'i bka' babs Volume 8, Text 2, Pages 83-94 (Folios 1a to 6b5)
Author	འཇམ་མགོན་ཀོང་སྤྲུལ་
Less details More details
Tertön	རྒྱ་ལོ་ཙཱ་བ་རྡོ་རྗེ་བཟང་པོ་, འཇམ་དབྱངས་མཁྱེན་བརྩེའི་དབང་པོ་ (rgya lo tsA ba rdo rje bzang po, 'jam dbyangs mkhyen brtse'i dbang po)
Citation	'jam mgon kong sprul. bla ma bstan gnyis skor gsum gyi snying po zab tig mthong ba rang grol gyi spros med sgrub pa'i phrin las. In Rdzong sar 'jam dbyangs mkhyen brtse'i dbang po'i bka' babs, Vol. 8: 83-94. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Revelations - gter ma  ·  Sadhanas - Evocation Ritual - sgrub thabs
Cycle	བླ་མ་བསྟན་གཉིས་སྐོར་གསུམ་ (bla ma bstan gnyis skor gsum)
Karchag page	JKW-KABAB-Volume-08-NYA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHA-011
Colophon	།ཅེས་པའང་རིགས་ཀུན་ཁྱབ་བདག་གཏེར་ཆེན་བླ་མ་རིན་པོ་ཆེས་བཀའ་ལུང་གིས་རྗེས་སུ་གནང་བ་ལྟར་ཟབ་ཆོས་འདི་དག་གི་སྣོད་ལྡན་པདྨ་གར་དབང་བློ་གྲོས་མཐའ་ཡས་ཀྱིས་གཏེར་གཞུང་ཉིད་ལས་ཁྱེར་བདེའི་ཟུར་བཀོལ་དུ་བསྡེབས་པ་དགེ་ལེགས་འཕེལ།།
	ces pa'ang rigs kun khyab bdag gter chen bla ma rin po ches bka' lung gis rjes su gnang ba ltar zab chos 'di dag gi snod ldan pad+ma gar dbang blo gros mtha' yas kyis gter gzhung nyid las khyer bde'i zur bkol du bsdebs pa dge legs 'phel

Tibetan Text

Wylie

[edit]

༄༅། །བླ་མ་བསྟན་གཉིས་སྐོར་གསུམ་གྱི་སྙིང་པོ་ཟབ་ཏིག་མཐོང་བ་རང་གྲོལ་གྱི་སྤྲོས་མེད་སྒྲུབ་པའི་ཕྲིན་ལས་བཞུགས་སོ།། ཁྱབ་བདག་པདྨ་ཀུན་ཏུ་འཆང༌། །འགྲོ་ངོར་རིག་པ་འཛིན་པའི་ཚུལ། །བསྟན་གང་དད་བརྒྱའི་སྙིང་དབུས་སུ། །བཀོད་ནས་སྒྲུབ་ཕྲིན་རྣམ་གསལ་བྱ། བླ་མ་སྐུ་གསུམ་བདེ་གཤེགས་འདུས་པའི་རྣལ་འབྱོར་ཉམས་སུ་ལེན་པར་འདོད་པས། གཞུང་ལས། ལུས་ཀྱི་དཀྱིལ་འཁོར་ལ་བརྟེན་ནས༔ རང་ཉིད་ནུས་དང་ལྡན་པར་བསྙེན༔ ཅེས་གསུངས་པའི་དོན་ཐོག་མར་སྤྲོས་མེད་ལུས་དཀྱིལ་ཟབ་མོ་ལ་བརྟེན་ནས་རང་དོན་བསྙེན་པའི་རིམ་པ་བྱ་དགོས་པས་རྟེན་དང་མཆོད་གཏོར་སྤྱི་མཐུན་བཤམ། ཕྲིན་ལས་དངོས་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལའང་གསུམ་ལས་ཐོག་མར་སྐྱབས་སུ་འགྲོ་ཞིང་སེམས་བསྐྱེད་པ་ནི། ན་མོ༔ རིག་པ་རང་ཤར་སྐུ་གསུམ་ལྷ་ཚོགས་ལ༔ གཉིས་མེད་ཁྱབ་གདལ་ངང་ནས་སྐྱབས་སུ་མཆི༔ གཟུང་འཛིན་འཁྲུལ་པའི་འགྲོ་རྣམས་བསྒྲལ་བའི་ཕྱིར༔ ཟབ་གསང་སྙིང་པོ་བསྒྲུབ་པར་སེམས་བསྐྱེད་དོ༔ ལན་གསུམ། གཉིས་པ་བགེགས་བསྐྲད་ཅིང་མཚམས་བཅད་པ་ནི། རང་ཉིད་སྐད་ཅིག་གིས་རྡོ་རྗེ་ཧེ་རུ་ཀ་མཐིང་ནག་རྡོ་རྗེ་དང་དུང་ཁྲག་བསྣམས་པ་ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན་གྱི་སྐུ་གྱུར། བགེགས་གཏོར་ཡོད་ན་བྱིན་རླབས་དང་མགྲོན་འགུགས་པ་སྔགས་བསྔོས་རྣམས་སྤྱི་མཐུན་བྱ། རྒྱུན་གྱི་ཉམས་ལེན་ལ་མི་དགོས། གང་ལྟར། ཧཱུྃ༔ མཉམ་ཉིད་ངང་གིས་ཁྲོས་པའི་ཏིང་འཛིན་གྱིས༔ གཉིས་སྣང་བགེགས་ཚོགས་རྒྱ་མཚོའི་ཕ་མཐར་བསྐྲད༔ ཡེ་ཤེས་མཚོན་ཆ་མེ་དཔུང་ཁྲོ་ཚོགས་བཅས༔ གཞོམ་མེད་རྡོ་རྗེའི་སྲུང་འཁོར་ལྷུན་གྱིས་གྲུབ༔ ཧཱུྃ་ཧཱུྃ་ཧཱུྃ༔ བཛྲ་ཛྭ་ལ་ཀྲོ་དྷ་རཀྵ་ཧཱུྃ་བྷྲཱུྃཿ གསུམ་པ་བདག་གནས་མཆོད་རྫས་བྱིན་གྱིས་བརླབ་པ་ནི། ཧཱུྃ་ཧྲཱིཿ བླ་མ་སྐུ་གསུམ་བདེ་གཤེགས་རིག་འཛིན་ཚོགས༔ དབྱིངས་ནས་བརྩེར་དགོངས་ཡེ་ཤེས་བྱིན་ཆེན་ཕོབ༔ སྣོད་བཅུད་བཀོད་པ་ལྷུན་རྫོགས་འདོད་ཡོན་སྤྲིན༔ མཆོད་པའི་ཕྱག་རྒྱ་ཆེན་པོར་བྱིན་གྱིས་རློབས༔ ཨོཾ་ཨཱཿཧཱུྃ་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ཛྙཱ་ན་ཨཱ་བེ་ཤ་ཡ་ཨ་ཨཱ༔ ཧྲཱིཾ་ཧྲཱིཾ་ཕེཾ་ཕེཾ༔ ཞེས་པས་བྱིན་དབབ། ཨོཾ་སརྦ་མ་ཧཱ་པཱུའུ་ཛ་མུ་དྲ་ས་མ་ཡེ་ཨཱཿཧཱུྃ༔ བཛྲ་སྥ་ར་ཎ་ཁཾ༔ ཞེས་པས་མཆོད་རྫས་བརླབ་བོ། །གཉིས་པ་དངོས་གཞི་ལ་གསུམ། བསྐྱེད་བཟླས་དག་པ་དྲན་པའོ། །དང་པོ་ལ་དམ་ཚིག་པ་བསྐྱེད་པ་ནི། ཨཱཿ དེ་བཞིན་ཉིད་དབྱིངས་སྟོང་གསལ་ཆོས་ཀྱི་སྐུ༔ ཀུན་སྣང་ཡེ་ཤེས་ལོངས་སྤྱོད་རྫོགས་པའི་སྦྲིན༔ ཟུང་འཇུག་སྤྲུལ་སྐུ་རྒྱུ་ཡི་འོད་ཟེར་གྱིས༔ གཟུང་འཛིན་དངོས་ཀུན་སྟོང་པ་ཆེན་པོའི་ངང་༔ ཡུལ་སྣང་ཐམས་ཅད་འོག་མིན་གསང་བའི་ཞིང་༔ རྡོ་རྗེའི་སྲུང་འཁོར་དུར་ཁྲོད་བཀོད་པའི་དབུས༔ རང་བྱུང་ལྷུན་གྲུབ་ལུས་ཀྱི་གཞལ་མེད་ཁང་༔ ཡེ་ཤེས་ཡོན་ཏན་རབ་རྫོགས་གཟི་བྱིན་འབར༔ ལྟེ་བར་ཆུ་སྐྱེས་ཉི་ཟླའི་གདན་གྱི་སྟེང་༔ ཡིད་ཆོས་རྣམ་དག་པདྨ་ཀུན་ཏུ་འཆང་༔ བདེ་བའི་བདག་ཉིད་ནམ་མཁའ་དྭངས་པའི་མདངས༔ ཞལ་གཅིག་ཕྱག་གཉིས་ཁྲོ་འཛུམ་སྤྱན་གསུམ་གཡོ༔ ཐབས་ཤེས་ཟུང་འཇུག་རྡོར་དྲིལ་ཐུགས་ཀར་བསྣོལ༔ གཉིས་མེད་སྦྱོར་ཡུམ་སྟོང་ཆེན་དབྱིངས་ཕྱུག་ན༔ དཀར་གསལ་རྡོ་རྗེ་དྲིལ་འཛིན་ཡབ་དང་འཁྱུད༔ གཉིས་ཀ་དར་དང་རིན་ཆེན་རུས་པས་བརྒྱན༔ ཡེ་ཤེས་འོད་ཟེར་བསམ་ཡས་འཕྲོ་འདུའི་ཀློང་༔ རྡོ་རྗེ་པདྨའི་སྐྱིལ་ཀྲུང་རོལ་པ་ཡིས༔ ལྷན་སྐྱེས་བདེ་ཆེན་མཆོག་གི་གཟི་བྱིན་འབར༔ དཀྱིལ་འཁོར་ཀུན་གྱི་བདག་ཉིད་ཆེན་པོར་གསལ༔ ཧཱུྃ༔ རིགས་ཀུན་ཁྱབ་བདག་ཆེན་པོའི་སྐུ་ཡི་དབྱིངས༔ རྩ་གསུམ་འཁོར་ལོ་ལྔ་ལྡན་གྲོང་ཁྱེར་དབུས༔ ཕུང་པོ་འབྱུང་བ་རྣམ་དག་ཐོད་ཕྲེང་ལྔ༔ ཁ་སྦྱོར་བདེ་བའི་ལོངས་སྤྱོད་ཆེན་པོར་རྫོགས༔ རྣམ་ཤེས་རྒྱུ་བའི་དབང་པོའི་ཐིག་ལེ་རུ༔ ཚོགས་བརྒྱད་གཟུང་འཛིན་གནས་སུ་དག་པའི་རྩལ༔ སྤྲུལ་པའི་སྐུར་སྣང་མཚན་མཆོག་རྣམ་པ་བརྒྱད༔ རིགས་ཀྱི་ཡུམ་བཅས་གཟི་བྱིན་ལམ་མེར་བཞུགས༔ ལྔ་ལྡན་འཁོར་ལོའི་ཕྱོགས་མཚམས་སྟེང་འོག་བཅུར༔ རྟོག་ཚོགས་རང་གྲོལ་ཐུབ་དབང་པདྨ་འབྱུང་༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ བདེ་གཤེགས་རིག་འཛིན་ཚོམ་བུའི་འཁོར་གྱིས་བསྐོར༔ ཁམས་གསུམ་དག་པ་ལུས་ཀྱི་གནས་དྲུག་ཏུ༔ ཉོན་མོངས་རྣམ་དག་འགྲོ་འདུལ་གུ་རུ་དྲུག༔ ཡན་ལག་ཚིགས་མཚམས་ལུས་ཀྱི་ཆོས་བཞི་དང་༔ ལྟ་བ་དག་པ་ཁྲོ་ཆེན་ཡུམ་དང་བཅས༔ གཞན་ཡང་སྟེང་འོག་བར་མཚམས་ཐམས་ཅད་དུ༔ སྣང་སྲིད་རྣམ་དག་རྩ་གསུམ་རབ་འབྱམས་ལྷ༔ སྐུ་མདོག་ཕྱག་མཚན་རྣམ་འགྱུར་ཅིར་ཡང་སྟོན༔ མདངས་གསལ་མ་འགགས་འོད་སྐུར་ལམ་མེར་གསལ༔ ཧཱུྃ༔ དེ་ལྟར་གསལ་བའི་ཕྱི་ནང་ལྷ་ཚོགས་ཀྱི༔ གནས་གསུམ་མི་ཕྱེད་རྡོ་རྗེའི་སྐུ་གསུང་ཐུགས༔ ཡི་གེ་གསུམ་མཚན་འབར་བའི་འོད་ཟེར་གྱིས༔ མཁའ་ཁྱབ་ཡེ་ཤེས་འཁོར་ལོ་སྤྱན་དྲངས་གྱུར༔ ཡེ་ཤེས་པ་གཞུག་པ་ནི། ཧཱུྃ་ཧྲཱིཿ དོན་དམ་དབྱིངས་ལ་གཤེགས་བཞུགས་མ་དམིགས་ཀྱང་༔ ཀུན་འབྱུང་གཉིས་སྣང་དྲི་མ་སྦྱང་བའི་ཕྱིར༔ སྐུ་གསུམ་བླ་མའི་དཀྱིལ་འཁོར་དབྱིངས་ནས་བཞེངས༔ ཐུགས་རྗེའི་དབང་གིས་འདིར་གཤེགས་དགྱེས་པར་བཞུགས༔ ཨོཾ་ཨཱཿཧཱུྃ་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨེ་ཧྱེ་ཧི༔ བཛྲ་ས་མཱ་ཛ༔ ཛཿཧཱུྃ་བྃ་ཧོ༔ ས་མ་ཡ་ཏིཥྛནྟུ༔ དབང་བསྐུར་ཅིང་རྒྱས་གདབ་པ་ནི། སླར་ཡང་དབང་ལྷ་རིགས་ལྔ་སྤྱན་དྲངས་ནས༔ ཡབ་ཡུམ་སྙོམས་ཞུགས་བདེ་བའི་རྒྱུན་ཆེན་པོས༔ རྡོ་རྗེའི་དབང་བསྐུར་སྒྲིབ་གཉིས་བག་ཆགས་དག༔ ཡེ་ཤེས་ལྔ་ལྡན་རིགས་ལྔའི་ཕྱག་རྒྱར་རྫོགས༔ ཧཱུྃ་ཨོཾ་ཏྲཱྃ་ཧྲཱིཿཨཱཿཨ་བྷི་ཥིཉྩ་མི༔ སུ་ར་ཏཱ་སྟྭཾ་ཨ་ཧཾ༔ ཕྱག་འཚལ་བ་ནི། ན་མོ༔ སྐྱེ་འགག་འགྱུར་མེད་ཆོས་སྐུ་ཀུན་ཏུ་འཆང་༔ ཕྲིན་ལས་ཡོངས་རྫོགས་ལོངས་སྐུ་ཐོད་ཕྲེང་རྩལ༔ རང་བྱུང་རིག་རྩལ་སྤྲུལ་པའི་མཚན་མཆོག་བརྒྱད༔ སྐུ་གསུམ་བླ་མའི་ཚོགས་ལ་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏཱིཙྪ་ཨ་ལ་ལ་ཧོཿ མཆོད་པ་འབུལ་བ་ནི། ཨོཾ་ཨཱཿཧཱུྃ༔ ཉེར་སྤྱོད་ཀུན་བཟང་འདོད་ཡོན་ཕྱག་རྒྱ་གར༔ བདེ་ཆེན་ཏིང་འཛིན་རྨད་བྱུང་བསྟོད་པའི་དབྱངས༔ སྐུ་གསུམ་བླ་མའི་དཀྱིལ་འཁོར་ལྷ་ལ་འབུལ༔ མཆོད་བཞེས་དམ་སྐོངས་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་མ་ཧཱ་པཱུ་ཛ་པྲ་ཏཱིཙྪ་ཧོ༔ པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ བསྟོད་པ་ནི། ཧཱུྃ་ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུ༔ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ༔ པད་སྡོང་ལས་འཁྲུངས་བླ་མ་སྤྲུལ་པའི་སྐུ༔ སྐུ་གསུམ་ཡོངས་རྫོགས་ལྷ་ལ་ཕྱག་འཚལ་བསྟོད༔ གཉིས་པ་བཟླས་པ་ལ་བསྙེན་སྒྲུབ་ཡན་ལག་རྣམ་བཞི་གཅིག་ཏུ་དྲིལ་བའི་འཛབ་དགོངས་ནི། རྡོ་རྗེ་ཐོད་ཕྲེང་ཐུགས་ཀར་ཉི་ཟླའི་དབུས༔ ཧཱུྃ་མཐར་གསང་བའི་སྔགས་ཀྱི་ཕྲེང་བས་བསྐོར༔ རྩེ་གཅིག་སེམས་བཟུང་མཉམ་པར་བཞག་པ་ལས༔ མི་གཡོ་ཏིང་འཛིན་དགོངས་པ་མངོན་དུ་གྱུར༔ དེ་ལས་སྔགས་ཕྲེང་ལུ་གུ་རྒྱུད་དུ་བྱུང་༔ གནས་ལྔའི་ཐོད་ཕྲེང་ཡབ་ཡུམ་ཞལ་དུ་ཞུགས༔ གསང་བ་ནས་བརྒྱུད་མགལ་མེ་ལྟ་བུར་འཁོར༔ བདེ་སྟོང་ཉམས་འབར་ཡེ་ཤེས་གཟི་བྱིན་རྒྱས༔ སྤྲུལ་པའི་མཚན་མཆོག་བརྒྱད་ཀྱི་ཐུགས་དམ་བསྐུལ༔ སོ་སོའི་སྐུ་ལས་རིགས་ཀྱི་འོད་ཟེར་འཕྲོས༔ འཁོར་འདས་ཀུན་ཁྱབ་མཛད་པ་ལྷུན་གྲིས་གྲུབ༔ ཚུར་འདུས་བདག་ཐིམ་བྱིན་རླབས་ནུས་སྟོབས་འབར༔ སླར་ཡང་བདེ་གཤེགས་རིག་འཛིན་གུ་རུ་དྲུག༔ སྒོ་སྐྱོང་རྩ་གསུམ་རབ་འབྱམས་འོད་ཟེར་གྱིས༔ སྣང་གྲགས་རྟོག་ཚོགས་ལྷ་སྔགས་ཡེ་ཤེས་ངང་༔ མཆོག་ཐུན་ཕྲིན་ལས་ལྷུན་གྱིས་གྲུབ་པར་གྱུར༔ ཅེས་པའི་དམིགས་པ་རྩེ་གཅིག་ཏུ་བཟུང་ལ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་བླ་སྒྲུབ་ཐུན་གྱི་ཡང་སྙིང་རྡོ་རྗེའི་ཡི་གེ་འབྲུ་བཅུ་གཉིས་པ་བཟླས་པའི་སྐྱོན་དང་བྲལ་བར་བཟླ་སྟེ། ཚད་ནི་འབུམ་ཕྲག་བཅུ་གཉིས་སུ་གསུངས་སོ། །ཞར་བྱུང་ཚེ་སྒྲུབ་སྦྱོར་བར་འདོད་ན། ཆོས་ཀྱི་འཁོར་ལོར་རྡོ་རྗེ་ཐོད་ཕྲེང་གི༔ ཐུགས་ཀར་པདྨ་ཉི་མ་ཟླ་བའི་སྟེང་༔ རིག་པ་མི་འགྱུར་ཡེ་ཤེས་ཚེ་དཔག་མེད༔ དམར་གསལ་མཉམ་གཞག་བདུད་རྩིའི་ཚེ་བུམ་བསྣམས༔ རང་འོད་ཡུམ་འཁྱུད་ལོངས་སྤྱོད་རྫོགས་པའི་སྐུ༔ པདྨ་རཱ་གའི་འོད་ཟེར་བྱེ་བ་འགྱེད༔ དེ་ཡི་ཐུགས་དབུས་ཉི་ཟླ་ཁ་སྦྱོར་སྦུབས༔ ཧྲཱིཿམཐར་ཚེ་ཡི་རིག་པས་བསྐོར་བ་ལས༔ ལྷ་མོ་མགྱོགས་མ་ཉི་ཟེར་རྡུལ་ལྟར་འཕྲོས༔ འཁོར་འདས་ཐམས་ཅད་མེར་མེར་ཤིག་ཤིག་གཡོས༔ བླ་ཚེ་འཕྲོག་པའི་འབྱུང་པོ་ཟིལ་གྱིས་མནན༔ སྣོད་བཅུད་དྭངས་མ་རང་དབང་མེད་པར་འཕྲོག༔ རྩ་གསུམ་རབ་འབྱམས་བདེ་ཆེན་ཐུགས་རྒྱུད་བསྐུལ༔ འོད་ཟེར་བདུད་རྩིའི་རྣམ་པར་ཆར་ལྟར་བབས༔ བདག་དང་སྒྲུབ་པའི་རྫས་ལ་ཐིམ་པ་ཡིས༔ བླ་སྲོག་སོར་ཆུད་འབྱུང་ལྔའི་ནུས་སྟོབས་འཕེལ༔ རྡོ་རྗེ་སེམས་དཔའི་ཚེ་དང་ལང་ཚོ་འབར༔ ཡེ་ཤེས་མཆོག་གི་དངོས་གྲུབ་ཐོབ་པར་གྱུར༔ ཅེས་པའི་ཏིང་ངེ་འཛིན་གསལ་བཏབ་ལ། ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུརྫྙཱ་ན་སརྦ་སིདྡྷི་ཧཱུྃ༔ ཞེས་བཟླ་སྟེ་ཚད་ནི་འབུམ་ཕྲག་གསུམ་མོ། །བཟླས་པའི་མཇུག་ཏུ་ཁ་སྐོང་དང་བརྟན་བྱེད་ཀྱི་སྔགས་བཟླ། མཆོད་བསྟོད་འབུལ་ལོ། ཚེ་སྒྲུབ་དང་འབྲེལ་ན་ཚེ་འགུགས་པ་ནི། གདུང་ཤུགས་བསྐྱེད་ཅིང་ཚེ་མདའ་གཡབ་ལ། ཧཱུྃ་ཧྲཱིཿ བཞེངས་ཤིག་བླ་མ་བདེ་གཤེགས་རབ་འབྱམས་ཚོགས༔ ཆོས་ཀྱི་དབྱིངས་ལས་ཡེ་ཤེས་གཟི་བྱིན་སྐྱེད༔ སྤྲུལ་པའི་ཕོ་ཉ་མགྱོགས་མ་ལས་ལ་བསྐུལ༔ ཐུགས་རྗེའི་འོད་ཟེར་ཕྱོགས་བཅུ་ཀུན་ཏུ་སྤྲོས༔ སྲིད་གསུམ་གདོན་བགེགས་འབྱུང་པོའི་ཚོགས་རྣམས་ཀྱིས༔ བརྐུས་དང་འཕྲོག་དང་བཞོམས་པའི་ཚེ་ཁུག་ཅིག༔ ཕྱི་ནང་བན་བོན་སྔགས་ཀྱི་སྦྱོར་བ་ཡིས༔ བྱད་དང་གཏད་དུ་བཅུག་པའི་ཚེ་ཁུག་ཅིག༔ བརྟན་གཡོ་སྣོད་བཅུད་འབྱུང་བ་རྣམ་པ་ལྔའི༔ དྭངས་མ་སྟོབས་སུ་གྱུར་པའི་ཚེ་ཁུག་ཅིག༔ ཕྱོགས་བཅུའི་རྩ་གསུམ་རྒྱལ་བ་རབ་འབྱམས་ཀྱི༔ མཁྱེན་བརྩེ་ནུས་པའི་ཡེ་ཤེས་ཚེ་ཁུག་ཅིག༔ ཚེ་ཁུག་གཡང་སྐྱོབས་སྲོག་གི་ཀ་བ་ཚུགས༔ འཆི་མེད་རིག་འཛིན་མཆོག་གི་དངོས་གྲུབ་སྩོལ༔ ཅེས་དབྱངས་ཀྱིས་བསྐུལ་ཞིང་རོལ་མོ་འཁྲོལ། རྒྱས་གདབ་པ་ནི། ཨཿསྣོད་ཀྱི་དྭངས་མ་ཕུང་པོའི་རྟེན་ལ་འདུས༔ བཅུད་ཀྱི་ཚེ་བསོད་ཡེ་ཤེས་དབྱིངས་སུ་བསྟིམསཿ མི་འགྱུར་མི་ཤིགས་གཞོམ་དུ་མེད་པ་ཡི༔ རྡོ་རྗེའི་སྐུ་གསུང་ཐུགས་སུ་རྒྱས་གདབ་བོ༔ བཛྲ་ཀཱ་ཝཱ་ཙི་རཀྵ་ཨ་ཨཱཿ ཞེས་བརྗོད་ཅིང་དོན་བསམ། གསུམ་པ་དག་པ་དྲན་ཅིང་ང་རྒྱལ་བཟུང་བ་ནི། ཕྱི་ལྟར་བླ་མ་སྐུུ་གསུམ་དཀྱིལ་འཁོར་ལྷ༔ ནང་དུ་རྡོ་རྗེ་ལུས་ཀྱི་འཁོར་ལོར་ཤར༔ གསང་བ་རྟོག་ཚོགས་རང་གྲོལ་གཉུག་མའི་གཤིས༔ དབྱིངས་རིག་དབྱེར་མེད་ཐིག་ལེ་ཆེན་པོར་རྫོགས༔ ཨོཾ་བཛྲ་ཀཱ་ཡ་ཛྙཱ་ན་དྷཱ་ཏུ་ཨ་ཨ༔ ཞེས་བརྗོད་ཅིང་དོན་གསལ་བཏབ་ལ་མཉམ་པར་བཞག་གོ །གསུམ་པ་རྗེས་རིམ་ལ་གཉིས། ཐུན་མཚམས་ཚོགས་མཆོད་དང༌། རྗེས་ཆོག་དངོས་སོ། །དང་པོ་ནི། སྐབས་སུ་ཚོགས་མཆོད་འབུལ་བར་སྤྲོ་ན་ཐབས་ཤེས་ཀྱི་རྫས་འདུ་བྱས་ལ། བྱིན་བརླབ་པ་ནི། རྃ་ཡྃ་ཁྃ༔ ཚོགས་རྫས་གཟུང་འཛིན་མཚན་མའི་རྟོག་པ་ཀུན༔ ཡེ་ཤེས་མེ་རླུང་ཆུ་ཡིས་བསྲེགས་གཏོར་བཀྲུས༔ རྡོ་རྗེའི་ཡི་གེ་དྲུག་གིས་བྱིན་བརླབས་པས༔ འདོད་ཡོན་རྨད་བྱུང་བདུད་རྩིའི་བཅུད་དུ་བསྐྱིལ༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ། ཚོགས་ཞིང་སྤྱན་འདྲེན་པ་ནི། ཧཱུྃ་ཧྲཱི༔ སྣང་སྲིད་དག་པ་དབྱིངས་ཀྱི་ཞིང་ཁམས་ནས༔ རིག་པ་ཡེ་ཤེས་སྐུ་གསུམ་དཀྱིལ་འཁོར་ལྷ༔ ལོངས་སྤྱོད་ཚོགས་ཀྱི་འདུ་བར་སྤྱན་འདྲེན་ན༔ ཟུང་འཇུག་སྒྱུ་མའི་རོལ་པས་གནས་འདིར་གཤེགས༔ བཛྲ་ས་མ་ཡ་ཛ་ཛཿ ཚོགས་ཕུད་ཀྱིས་མཆོད་ཅིང་བཤགས་པ་ནི། ཨོཾ་ཨཱཿཧཱུྃཿ ཡེ་ཤེས་བདུད་རྩི་འདོད་ཡོན་མཆོད་པའི་སྤྲིན༔ སྐུ་གསུམ་བླ་མའི་དཀྱིལ་འཁོར་ལྷ་ལ་འབུལ༔ ཐུགས་དམ་དགྱེས་བསྐང་དམ་ཚིག་ཉམས་ཆགས་བཤགས༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་གུ་རུ་སརྦ་ཏ་ཐཱ་ག་ཏ་མཎྜ་ལ་ས་པ་རི་ཝཱ་ར་ག་ཎ་ཙཀྲ་པཱུ་ཛ་ཧོ༔ བར་པ་ལོངས་སྤྱད་པ་ནི། ཧོཿ བདག་ལུས་རང་བྱུང་གཞལ་མེད་ཁང་༔ ཤ་ཁྲག་དྲོད་དབུགས་ཡེ་ཤེས་རྒྱན༔ ཕུང་ཁམས་སྐྱེ་མཆེད་སྐུ་གསུམ་ལྷ༔ རྟོག་ཚོགས་རང་གྲོལ་ཕྱག་རྒྱར་རྫོགས༔ བཟའ་བཅའ་བཏུང་བའི་དམ་ཚིག་རྫས༔ ཡེ་ཤེས་བྱང་ཆུབ་སེམས་ཀྱི་རྒྱུན༔ མཆོད་པའི་ཕྱག་རྒྱ་ཆེན་པོ་ཡིས༔ མི་འགྱུར་བདེ་ཆེན་བསྐྱེད་དུ་གསོལ༔ མ་ཧཱ་སུ་ཁ་ག་ཎ་ཙཀྲ་ཨ་ལ་ལ་ཧོ༔ ཞེས་ནང་གི་སྦྱིན་སྲེག་གི་ཚུལ་དུ་རོལ། ཐ་མ་ལྷག་མ་བསྔོ་བ་ནི། ཨོཾ་ཨཱཿཧཱུྃ་ཧ་ཧོ་ཧྲཱིཿ ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་གྱུར༔ ཨེ་ཨཱ་རལླི་ཧྲཱིཾ་ཕེཾ༔ ཧཱུྃ་ཧྲཱི༔ རིག་འཛིན་རོལ་པའི་བཀའ་ཉན་ལྷག་སྡུད་ཚོགས༔ འདོད་ཡོན་རྒྱན་གྱི་འཁོར་ལོའི་ཕམ་ཕབས་བཞེས༔ རྣལ་འབྱོར་ལམ་གྱི་བར་ཆད་ཞི་བ་དང་༔ ཡེ་ཤེས་རིག་རྩལ་རྒྱས་པའི་ཕྲིན་ལས་མཛོད༔ ཨོཾ་ཨུཙྪིཥྟ་བ་ལིཾ་ཏ་ཁཱ་ཧི༔ ཞེས་པས་ལྷག་གཏོར་ཕྱིར་བསྐྱལ་ལ། སྨོན་ལམ་སྤྱི་མཐུན་གདབ། གཉིས་པ་རྗེས་ཆོག་དངོས་ལ། གཏང་རག་གི་མཆོད་བསྟོད་ཕུལ། དངོས་གྲུབ་བླང་བ་ནི། ཧཱུྃ་ཧྲཱི༔ སྐུ་གསུམ་བླ་མ་བདེ་གཤེགས་རབ་འབྱམས་ལྷ༔ རང་བྱུང་ཐུགས་རྗེ་ཆེན་པོའི་རྩལ་སྐྱེད་ལ༔ སྣང་གྲགས་རྟོག་ཚོགས་རྡོ་རྗེའི་གསང་གསུམ་དང་༔ དབྱེར་མེད་མཆོག་དང་ཐུན་མོང་དངོས་གྲུབ་སྩོལ༔ ཀཱ་ཡ་ཝཱ་ཀ་ཙིཏྟ་སིདྡྷི་ཕ་ལ་ཧཱུྃ༔ ནོངས་པ་བཤགས་པ་ནི། ཡིག་བཅུ་ལན་གསུམ་བརྗོད་ལ། མ་རྙེད་ཡོངས་སུ་སོགས་ཀྱང་སྤྲོ་ན་བྱ། ཚོགས་མགྲོན་བརྟན་བཞུགས་སྤྱི་དང་མཐུན། འོད་གསལ་འཇུག་ལྡང་ནི། ཧཱུྃ་ཧྲཱིཿ ལུས་དཀྱྀལ་ལྷ་རྣམས་མཁའ་ལ་སྤྲིན་དེངས་ལྟར༔ རིག་པ་མི་འགྱུར་སྐུ་གསུམ་ཀློང་དུ་ཐིམ༔ རྗེས་ཐོབ་སྣང་སྟོང་ཟུང་འཇུག་སྒྱུ་མའི་སྐུ༔ བདེ་ཆེན་ཕྱག་རྒྱའི་དམ་ཚིག་མཆོག་ཏུ་བཞེངས༔ ཧཱུྃ་ཧཱུྃ་ཧཱུྃཿ བཛྲ་ཀཱ་ཝཱ་ཙི་ཛྙ་ན་ས་མ་ཡ་ཧོ༔ བསྔོ་སྨོན་ནི། ཧོ༔ ཟབ་མོ་ནང་གི་རྣལ་འབྱོར་ལ་བརྟེན་ནས༔ སྐུ་གསུམ་བླ་མ་བསྒྲུབས་པའི་དགེ་ཚོགས་ཀྱིས༔ འགྲོ་ཀུན་ཁྱབ་བདག་པདྨ་ཐོད་ཕྲེང་དང་༔ དབྱེར་མེད་བྱང་ཆུབ་གོ་འཕང་མྱུར་ཐོབ་ཤོག༔ ཤིས་བརྗོད་ནི། ཧཱུྃ་ཧྲཱིཿ བཀྲ་ཤིས་གང་ཞིང་འོད་གསལ་ཆོས་སྐུའི་དབྱིངས༔ ཡེ་ཤེས་གཟུགས་སྐུའི་རྣམ་རོལ་ཅིར་ཡང་སྟོན༔ བླ་མ་བདེ་གཤེགས་རྩ་གསུམ་རབ་འབྱམས་ཀྱིས༔ བྱིན་རླབས་དངོས་གྲུབ་ཆར་འབེབས་བཀྲ་ཤིས་ཤོག༔ ཅེས་བརྗོད་ཅིང་མེ་ཏོག་འཐོར་ལ་དགེ་ལེགས་སུ་བྱའོ། །དེ་ལྟ་བུའི་ཟབ་མོའི་རྣལ་འབྱོར་ཐུན་བཞིའི་རིམ་པས་རྩེ་གཅིག་ཏུ་འབད་ཅིང་གསལ་བརྟན་དག་པ་དྲན་པའི་ཚུལ་རྣམྶ་གཏེར་གཞུང་ཉིད་དུ་གསལ་བར་གསུངས་པ་ལྟར་ཉམས་སུ་བླངས་པས་རླུང་སེམས་ལྷའི་ཕྱག་རྒྱར་སྨིན་ཏེ་རིག་པ་འཛིན་པའི་གོ་འཕང་མྱུར་དུ་འཐོབ་པར་འགྱུར་རོ། །མཐོང་བ་ཙམ་གྱིས་རང་གྲོལ་བའི། །སྙིང་པོའི་རྣལ་འབྱོར་མཐའ་རུ་ཕྱིན། །རིག་པ་འཛིན་པའི་ས་ཐོབ་ནས། །འགྲོ་ཀུན་ཕན་བདེས་འཚོ་བྱེད་ཤོག །ཅེས་པའང་རིགས་ཀུན་ཁྱབ་བདག་གཏེར་ཆེན་བླ་མ་རིན་པོ་ཆེས་བཀའ་ལུང་གིས་རྗེས་སུ་གནང་བ་ལྟར་ཟབ་ཆོས་འདི་དག་གི་སྣོད་ལྡན་པདྨ་གར་དབང་བློ་གྲོས་མཐའ་ཡས་ཀྱིས་གཏེར་གཞུང་ཉིད་ལས་ཁྱེར་བདེའི་ཟུར་བཀོལ་དུ་བསྡེབས་པ་དགེ་ལེགས་འཕེལ།། །།

[edit]

(!)__bla ma bstan gnyis skor gsum gyi snying po zab tig mthong ba rang grol gyi spros med sgrub pa'i phrin las bzhugs so//__khyab bdag pad+ma kun tu 'chang*/__/'gro ngor rig pa 'dzin pa'i tshul/__/bstan gang dad brgya'i snying dbus su/__/bkod nas sgrub phrin rnam gsal bya/__bla ma sku gsum bde gshegs 'dus pa'i rnal 'byor nyams su len par 'dod pas/__gzhung las/__lus kyi dkyil 'khor la brten nas:__rang nyid nus dang ldan par bsnyen:__ces gsungs pa'i don thog mar spros med lus dkyil zab mo la brten nas rang don bsnyen pa'i rim pa bya dgos pas rten dang mchod gtor spyi mthun bsham/__phrin las dngos la gsum/__sngon 'gro/__dngos gzhi/__rjes so/__/dang po la'ang gsum las thog mar skyabs su 'gro zhing sems bskyed pa ni/___na mo:__rig pa rang shar sku gsum lha tshogs la:__gnyis med khyab gdal ngang nas skyabs su mchi:__gzung 'dzin 'khrul pa'i 'gro rnams bsgral ba'i phyir:__zab gsang snying po bsgrub par sems bskyed do:__lan gsum/__gnyis pa bgegs bskrad cing mtshams bcad pa ni/__rang nyid skad cig gis rdo rje he ru ka mthing nag rdo rje dang dung khrag bsnams pa khro gtum bzod par dka' ba'i gzi brjid can gyi sku gyur/__bgegs gtor yod na byin rlabs dang mgron 'gugs pa sngags bsngos rnams spyi mthun bya/__rgyun gyi nyams len la mi dgos/__gang ltar/__hU~M:__mnyam nyid ngang gis khros pa'i ting 'dzin gyis:__gnyis snang bgegs tshogs rgya mtsho'i pha mthar bskrad:__ye shes mtshon cha me dpung khro tshogs bcas:__gzhom med rdo rje'i srung 'khor lhun gyis grub:__hU~M hU~M hU~M:__badz+ra dz+wa la kro d+ha rak+Sha hU~M b+h+rU~MH__gsum pa bdag gnas mchod rdzas byin gyis brlab pa ni/__hU~M hrIH__bla ma sku gsum bde gshegs rig 'dzin tshogs:__dbyings nas brtser dgongs ye shes byin chen phob:__snod bcud bkod pa lhun rdzogs 'dod yon sprin:__mchod pa'i phyag rgya chen por byin gyis rlobs:__oM AHhU~M gu ru sarba ta thA ga ta sa pa ri wA dz+nyA na A be sha ya a A:__hrIM hrIM pheM pheM:__zhes pas byin dbab/__oM sarba ma hA pU'u dza mu dra sa ma ye AHhU~M:__badz+ra s+pha ra Na khaM:__zhes pas mchod rdzas brlab bo/__/gnyis pa dngos gzhi la gsum/__bskyed bzlas dag pa dran pa'o/__/dang po la dam tshig pa bskyed pa ni/__AH__de bzhin nyid dbyings stong gsal chos kyi sku:__kun snang ye shes longs spyod rdzogs pa'i sbrin:__zung 'jug sprul sku rgyu yi 'od zer gyis:__gzung 'dzin dngos kun stong pa chen po'i ngang :__yul snang thams cad 'og min gsang ba'i zhing :__rdo rje'i srung 'khor dur khrod bkod pa'i dbus:__rang byung lhun grub lus kyi gzhal med khang :__ye shes yon tan rab rdzogs gzi byin 'bar:__lte bar chu skyes nyi zla'i gdan gyi steng :__yid chos rnam dag pad+ma kun tu 'chang :__bde ba'i bdag nyid nam mkha' dwangs pa'i mdangs:__zhal gcig phyag gnyis khro 'dzum spyan gsum g.yo:__thabs shes zung 'jug rdor dril thugs kar bsnol:___gnyis med sbyor yum stong chen dbyings phyug na:__dkar gsal rdo rje dril 'dzin yab dang 'khyud:__gnyis ka dar dang rin chen rus pas brgyan:__ye shes 'od zer bsam yas 'phro 'du'i klong :__rdo rje pad+ma'i skyil krung rol pa yis:__lhan skyes bde chen mchog gi gzi byin 'bar:__dkyil 'khor kun gyi bdag nyid chen por gsal:__hU~M:__rigs kun khyab bdag chen po'i sku yi dbyings:__rtsa gsum 'khor lo lnga ldan grong khyer dbus:__phung po 'byung ba rnam dag thod phreng lnga:__kha sbyor bde ba'i longs spyod chen por rdzogs:__rnam shes rgyu ba'i dbang po'i thig le ru:__tshogs brgyad gzung 'dzin gnas su dag pa'i rtsal:__sprul pa'i skur snang mtshan mchog rnam pa brgyad:__rigs kyi yum bcas gzi byin lam mer bzhugs:__lnga ldan 'khor lo'i phyogs mtshams steng 'og bcur:__rtog tshogs rang grol thub dbang pad+ma 'byung :__sku gsung thugs dang yon tan phrin las kyi:__bde gshegs rig 'dzin tshom bu'i 'khor gyis bskor:__khams gsum dag pa lus kyi gnas drug tu:__nyon mongs rnam dag 'gro 'dul gu ru drug:__yan lag tshigs mtshams lus kyi chos bzhi dang :__lta ba dag pa khro chen yum dang bcas:__gzhan yang steng 'og bar mtshams thams cad du:__snang srid rnam dag rtsa gsum rab 'byams lha:__sku mdog phyag mtshan rnam 'gyur cir yang ston:__mdangs gsal ma 'gags 'od skur lam mer gsal:__hU~M:__de ltar gsal ba'i phyi nang lha tshogs kyi:__gnas gsum mi phyed rdo rje'i sku gsung thugs:__yi ge gsum mtshan 'bar ba'i 'od zer gyis:__mkha' khyab ye shes 'khor lo spyan drangs gyur:__ye shes pa gzhug pa ni/__hU~M hrIH__don dam dbyings la gshegs bzhugs ma dmigs kyang :__kun 'byung gnyis snang dri ma sbyang ba'i phyir:__sku gsum bla ma'i dkyil 'khor dbyings nas bzhengs:__thugs rje'i dbang gis 'dir gshegs dgyes par bzhugs:__oM AHhU~M gu ru sarba ta thA ga ta sa pa ri wA ra e h+ye hi:__badz+ra sa mA dza:__dzaHhU~M ba~M ho:__sa ma ya tiSh+Than+tu:__dbang bskur cing rgyas gdab pa ni/__slar yang dbang lha rigs lnga spyan drangs nas:__yab yum snyoms zhugs bde ba'i rgyun chen pos:__rdo rje'i dbang bskur sgrib gnyis bag chags dag:__ye shes lnga ldan rigs lnga'i phyag rgyar rdzogs:__hU~M oM trA~M hrIHAHa b+hi Shiny+tsa mi:__su ra tA s+t+waM a haM:__phyag 'tshal ba ni/__na mo:__skye 'gag 'gyur med chos sku kun tu 'chang :__phrin las yongs rdzogs longs sku thod phreng rtsal:__rang byung rig rtsal sprul pa'i mtshan mchog brgyad:__sku gsum bla ma'i tshogs la phyag 'tshal lo:__a ti pU ho:__pra tIts+tsha a la la hoH__mchod pa 'bul ba ni/__oM AHhU~M:__nyer spyod kun bzang 'dod yon phyag rgya gar:__bde chen ting 'dzin rmad byung bstod pa'i dbyangs:__sku gsum bla ma'i dkyil 'khor lha la 'bul:__mchod bzhes dam skongs dbang dang dngos grub stsol:__oM AHhU~M gu ru sarba ta thA ga ta sa pa ri wA ra ma hA pU dza pra tIts+tsha ho:__pany+tsa a mr-i ta rak+ta ba liM ta khA hi:__bstod pa ni/__hU~M hrIH__ma bcos spros bral bla ma chos kyi sku:__bde chen longs spyod bla ma chos kyi rje:__pad sdong las 'khrungs bla ma sprul pa'i sku:__sku gsum yongs rdzogs lha la phyag 'tshal bstod:__gnyis pa bzlas pa la bsnyen sgrub yan lag rnam bzhi gcig tu dril ba'i 'dzab dgongs ni/__rdo rje thod phreng thugs kar nyi zla'i dbus:__hU~M mthar gsang ba'i sngags kyi phreng bas bskor:__rtse gcig sems bzung mnyam par bzhag pa las:__mi g.yo ting 'dzin dgongs pa mngon du gyur:__de las sngags phreng lu gu rgyud du byung :__gnas lnga'i thod phreng yab yum zhal du zhugs:__gsang ba nas brgyud mgal me lta bur 'khor:__bde stong nyams 'bar ye shes gzi byin rgyas:__sprul pa'i mtshan mchog brgyad kyi thugs dam bskul:__so so'i sku las rigs kyi 'od zer 'phros:__'khor 'das kun khyab mdzad pa lhun gris grub:__tshur 'dus bdag thim byin rlabs nus stobs 'bar:__slar yang bde gshegs rig 'dzin gu ru drug:__sgo skyong rtsa gsum rab 'byams 'od zer gyis:__snang grags rtog tshogs lha sngags ye shes ngang :__mchog thun phrin las lhun gyis grub par gyur:__ces pa'i dmigs pa rtse gcig tu bzung la/__oM AHhU~M badz+ra gu ru pad+ma sid+d+hi hU~M:__zhes bla sgrub thun gyi yang snying rdo rje'i yi ge 'bru bcu gnyis pa bzlas pa'i skyon dang bral bar bzla ste/__tshad ni 'bum phrag bcu gnyis su gsungs so/__/zhar byung tshe sgrub sbyor bar 'dod na/__chos kyi 'khor lor rdo rje thod phreng gi:__thugs kar pad+ma nyi ma zla ba'i steng :__rig pa mi 'gyur ye shes tshe dpag med:__dmar gsal mnyam gzhag bdud rtsi'i tshe bum bsnams:__rang 'od yum 'khyud longs spyod rdzogs pa'i sku:__pad+ma rA ga'i 'od zer bye ba 'gyed:__de yi thugs dbus nyi zla kha sbyor sbubs:__hrIHmthar tshe yi rig pas bskor ba las:__lha mo mgyogs ma nyi zer rdul ltar 'phros:__'khor 'das thams cad mer mer shig shig g.yos:__bla tshe 'phrog pa'i 'byung po zil gyis mnan:__snod bcud dwangs ma rang dbang med par 'phrog:__rtsa gsum rab 'byams bde chen thugs rgyud bskul:__'od zer bdud rtsi'i rnam par char ltar babs:__bdag dang sgrub pa'i rdzas la thim pa yis:__bla srog sor chud 'byung lnga'i nus stobs 'phel:__rdo rje sems dpa'i tshe dang lang tsho 'bar:__ye shes mchog gi dngos grub thob par gyur:__ces pa'i ting nge 'dzin gsal btab la/__oM AHhU~M badz+ra gu ru pad+ma A yur+dz+nyA na sarba sid+d+hi hU~M:__zhes bzla ste tshad ni 'bum phrag gsum mo/__/bzlas pa'i mjug tu kha skong dang brtan byed kyi sngags bzla/__mchod bstod 'bul lo/__tshe sgrub dang 'brel na tshe 'gugs pa ni/__gdung shugs bskyed cing tshe mda' g.yab la/__hU~M hrIH__bzhengs shig bla ma bde gshegs rab 'byams tshogs:__chos kyi dbyings las ye shes gzi byin skyed:__sprul pa'i pho nya mgyogs ma las la bskul:__thugs rje'i 'od zer phyogs bcu kun tu spros:__srid gsum gdon bgegs 'byung po'i tshogs rnams kyis:__brkus dang 'phrog dang bzhoms pa'i tshe khug cig:__phyi nang ban bon sngags kyi sbyor ba yis:__byad dang gtad du bcug pa'i tshe khug cig:__brtan g.yo snod bcud 'byung ba rnam pa lnga'i:__dwangs ma stobs su gyur pa'i tshe khug cig:__phyogs bcu'i rtsa gsum rgyal ba rab 'byams kyi:__mkhyen brtse nus pa'i ye shes tshe khug cig:__tshe khug g.yang skyobs srog gi ka ba tshugs:__'chi med rig 'dzin mchog gi dngos grub stsol:__ces dbyangs kyis bskul zhing rol mo 'khrol/__rgyas gdab pa ni/__aHsnod kyi dwangs ma phung po'i rten la 'dus:__bcud kyi tshe bsod ye shes dbyings su bstimasaH__mi 'gyur mi shigs gzhom du med pa yi:__rdo rje'i sku gsung thugs su rgyas gdab bo:__badz+ra kA wA tsi rak+Sha a AH__zhes brjod cing don bsam/__gsum pa dag pa dran cing nga rgyal bzung ba ni/__phyi ltar bla ma sku+u gsum dkyil 'khor lha:__nang du rdo rje lus kyi 'khor lor shar:__gsang ba rtog tshogs rang grol gnyug ma'i gshis:__dbyings rig dbyer med thig le chen por rdzogs:__oM badz+ra kA ya dz+nyA na d+hA tu a a:__zhes brjod cing don gsal btab la mnyam par bzhag go__/gsum pa rjes rim la gnyis/__thun mtshams tshogs mchod dang*/__rjes chog dngos so/__/dang po ni/__skabs su tshogs mchod 'bul bar spro na thabs shes kyi rdzas 'du byas la/__byin brlab pa ni/__ra~M ya~M kha~M:__tshogs rdzas gzung 'dzin mtshan ma'i rtog pa kun:__ye shes me rlung chu yis bsregs gtor bkrus:__rdo rje'i yi ge drug gis byin brlabs pas:__'dod yon rmad byung bdud rtsi'i bcud du bskyil:__oM AHhU~M ha ho hrIH__lan gsum/__tshogs zhing spyan 'dren pa ni/__hU~M hrI:__snang srid dag pa dbyings kyi zhing khams nas:__rig pa ye shes sku gsum dkyil 'khor lha:__longs spyod tshogs kyi 'du bar spyan 'dren na:__zung 'jug sgyu ma'i rol pas gnas 'dir gshegs:__badz+ra sa ma ya dza dzaH__tshogs phud kyis mchod cing bshags pa ni/__oM AHhU~MH__ye shes bdud rtsi 'dod yon mchod pa'i sprin:__sku gsum bla ma'i dkyil 'khor lha la 'bul:__thugs dam dgyes bskang dam tshig nyams chags bshags:__mchog dang thun mong dngos grub stsal du gsol:__oM AHhU~M gu ru sarba ta thA ga ta maN+Da la sa pa ri wA ra ga Na tsakra pU dza ho:__bar pa longs spyad pa ni/__hoH__bdag lus rang byung gzhal med khang :__sha khrag drod dbugs ye shes rgyan:__phung khams skye mched sku gsum lha:__rtog tshogs rang grol phyag rgyar rdzogs:__bza' bca' btung ba'i dam tshig rdzas:__ye shes byang chub sems kyi rgyun:__mchod pa'i phyag rgya chen po yis:__mi 'gyur bde chen bskyed du gsol:__ma hA su kha ga Na tsakra a la la ho:__zhes nang gi sbyin sreg gi tshul du rol/___tha ma lhag ma bsngo ba ni/__oM AHhU~M ha ho hrIH__lhag ma'i dam tshig 'dod yon gyi phung po zad mi shes pas nam mkha' gang bar gyur:__e A ral+li hrIM pheM:__hU~M hrI:__rig 'dzin rol pa'i bka' nyan lhag sdud tshogs:__'dod yon rgyan gyi 'khor lo'i pham phabs bzhes:__rnal 'byor lam gyi bar chad zhi ba dang :__ye shes rig rtsal rgyas pa'i phrin las mdzod:__oM uts+tshiSh+ta ba liM ta khA hi:__zhes pas lhag gtor phyir bskyal la/__smon lam spyi mthun gdab/__gnyis pa rjes chog dngos la/__gtang rag gi mchod bstod phul/__dngos grub blang ba ni/__hU~M hrI:__sku gsum bla ma bde gshegs rab 'byams lha:__rang byung thugs rje chen po'i rtsal skyed la:__snang grags rtog tshogs rdo rje'i gsang gsum dang :__dbyer med mchog dang thun mong dngos grub stsol:__kA ya wA ka tsit+ta sid+d+hi pha la hU~M:__nongs pa bshags pa ni/__yig bcu lan gsum brjod la/__ma rnyed yongs su sogs kyang spro na bya/__tshogs mgron brtan bzhugs spyi dang mthun/__'od gsal 'jug ldang ni/__hU~M hrIH__lus dky-il lha rnams mkha' la sprin dengs ltar:__rig pa mi 'gyur sku gsum klong du thim:__rjes thob snang stong zung 'jug sgyu ma'i sku:__bde chen phyag rgya'i dam tshig mchog tu bzhengs:__hU~M hU~M hU~MH__badz+ra kA wA tsi dz+nya na sa ma ya ho:__bsngo smon ni/__ho:__zab mo nang gi rnal 'byor la brten nas:__sku gsum bla ma bsgrubs pa'i dge tshogs kyis:__'gro kun khyab bdag pad+ma thod phreng dang :__dbyer med byang chub go 'phang myur thob shog:__shis brjod ni/__hU~M hrIH__bkra shis gang zhing 'od gsal chos sku'i dbyings:__ye shes gzugs sku'i rnam rol cir yang ston:__bla ma bde gshegs rtsa gsum rab 'byams kyis:__byin rlabs dngos grub char 'bebs bkra shis shog:__ces brjod cing me tog 'thor la dge legs su bya'o/__/de lta bu'i zab mo'i rnal 'byor thun bzhi'i rim pas rtse gcig tu 'bad cing gsal brtan dag pa dran pa'i tshul rnam+sa gter gzhung nyid du gsal bar gsungs pa ltar nyams su blangs pas rlung sems lha'i phyag rgyar smin te rig pa 'dzin pa'i go 'phang myur du 'thob par 'gyur ro/__/mthong ba tsam gyis rang grol ba'i/__/snying po'i rnal 'byor mtha' ru phyin/__/rig pa 'dzin pa'i sa thob nas/__/'gro kun phan bdes 'tsho byed shog__/ces pa'ang rigs kun khyab bdag gter chen bla ma rin po ches bka' lung gis rjes su gnang ba ltar zab chos 'di dag gi snod ldan pad+ma gar dbang blo gros mtha' yas kyis gter gzhung nyid las khyer bde'i zur bkol du bsdebs pa dge legs 'phel//__//