བླ་མ་བསྟན་གཉིས་སྐོར་གསུམ་གྱི་སྙིང་པོའི་དོན་དབང་བཀླགས་ཆོག་ཏུ་བཀོད་པ་བདུད་རྩིའི་ཐིགས་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma bstan gnyis skor gsum gyi snying po'i don dbang bklags chog tu bkod pa bdud rtsi'i thigs pa
Location	mkhyen brtse'i bka' babs Volume 8, Text 3, Pages 95-113 (Folios 1a to 10a1)
Author	འཇམ་མགོན་ཀོང་སྤྲུལ་
Less details More details
Tertön	རྒྱ་ལོ་ཙཱ་བ་རྡོ་རྗེ་བཟང་པོ་, འཇམ་དབྱངས་མཁྱེན་བརྩེའི་དབང་པོ་ (rgya lo tsA ba rdo rje bzang po, 'jam dbyangs mkhyen brtse'i dbang po)
Citation	'jam mgon kong sprul. bla ma bstan gnyis skor gsum gyi snying po'i don dbang bklags chog tu bkod pa bdud rtsi'i thigs pa. In Rdzong sar 'jam dbyangs mkhyen brtse'i dbang po'i bka' babs, Vol. 8: 95-113. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Empowerment Ritual - dbang chog - dbang skur
Cycle	བླ་མ་བསྟན་གཉིས་སྐོར་གསུམ་ (bla ma bstan gnyis skor gsum)
Karchag page	JKW-KABAB-Volume-08-NYA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHA-012
Colophon	།ཅེས་པ་འདིའང་ཁྱབ་བདག་གཏེར་ཆེན་བླ་མ་རིན་པོ་ཆེས་རྗེས་སུ་གནང་བ་ལྟར་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་རྗེ་ཉིད་ཀྱི་ཕྱག་བཞེས་ནོར་བ་མེད་པར་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་ཁྲིགས་བཀོད་བྱས་པ་དགེ་ལེགས་འཕེལ། ཕུན་ཚོགས་རྣམ་རྒྱལ་པས་ནག་མགྲོས་སུ་བཀོད།
	ces pa 'di'ang khyab bdag gter chen bla ma rin po ches rjes su gnang ba ltar pad+ma gar dbang phrin las 'gro 'dul rtsal gyis rje nyid kyi phyag bzhes nor ba med par dpal spungs yang khrod tsA 'dra rin chen brag gi sgrub gnas su khrigs bkod byas pa dge legs 'phel/__phun tshogs rnam rgyal pas nag mgros su bkod

Tibetan Text

Wylie

[edit]

༄༅། །བླ་མ་བསྟན་གཉིས་སྐོར་གསུམ་གྱི་སྙིང་པོའི་དོན་དབང་བཀླགས་ཆོག་ཏུ་བཀོད་པ་བདུད་རྩིའི་ཐིགས་པ་ཞེས་བྱ་བ་བཞུགས་སོ།།

སྐུ་གསུམ་བསྟན་པ་གཉིས་ལྡན་གྱི། །བདེ་གཤེགས་ཀུན་འདུས་བླ་མ་ལྷར། །གུས་ཕྱག་འཚལ་ནས་དོན་བསྡུས་པའི། །སྨིན་བྱེད་བལྟས་ཆོག་ཉིད་དུ་དགོད། དེ་ལ་གསུམ། སྦྱོར་དངོས་རྗེས་སོ། །དང་པོ་སྦྱོར་བ་ཡོ་བྱད་ཀྱི་བཤམ་ནི། སྟེགས་བུའི་སྟེང་རས་བྲིས་ཀྱི་དཀྱིལ་འཁོར་བཀྲམ། མ་འཛོམ་ན་མཎྜལ་ཆེ་ཞིང་ལེགས་པར་འབྲུ་དཀར་གྱི་ཚོམ་བུ་དབུས་སུ་ཆེ་བ་གཅིག །དེ་རྒྱབ་ལྔ། བརྒྱད། བཅུ་རྣམས་རིམ་པར་བཀོད། དེ་རྒྱབ་ཕྱོགས་བཞི་དང་གཡས་གཡོན་བཅས་དྲུག །དེ་རྒྱབ་ཕྱོགས་བཞིར་བཞི་དགོད་དོ། །དཀྱིལ་འཁོར་དབུས་སུ་མཉྫིའི་ཁར་རྣམ་བུམ་བཅུད་ལྡན་ཁ་རྒྱན་དང་མགུལ་ཆིངས་སྔོན་པོས་སྤྲས་པ། གཡས་གཡོན་ཏུ་གསང་ཐོད་བདུད་རྩི། རིག་ཙཀ །ཤེལ་རྡོ། མདུན་རྒྱབ་གང་བདེར་ཚེ་འབྲང༌། ཚེ་རིལ་ཚེ་ཆང་རྣམས་དང༌། ཆུ་གཉིས་ཉེར་སྤྱོད། སྨན་རཀ་གཏོར་གསུམ་སྤྱི་ལྟར་བཤམ། ཚེ་མདའ། དབང་ཕྲེང༌། ལས་བུམ། ལས་བྱང་ལ་མཁོ་བའི་གཏོར་མ་ཚོགས་ཀྱི་ཡོ་བྱད་རྣམས་ཀྱང་འདུ་བྱའོ། །གཉིས་པ་དངོས་གཞིའི་ཐོག་མར་དབང་དོན་སྒྲུབ་མཆོད་བྱ་བ་ནི། ཕྲིན་ལས་རྒྱས་པར་གྲུབ་ན་ལེགས་ཀྱང་སྐབས་འདིར་ཕྲིན་ལས་སྙིང་པོ་བསྡུས་པ་ཙམ་གྱིས་ཀྱང་འཐུས་པས་སྤྲོས་མེད་སྒྲུབ་པའི་ཕྲིན་ལས་ལྟར། སྔོན་འགྲོ་སྐྱབས་སེམས་ནས་མཆོད་པ་བྱིན་རླབས་བར་བཏང༌། དངོས་གཞི་ཕྱི་དཀྱིལ་དང་མཐུན་པར་སྐད་ཅིག་དྲན་རྫོགས་ཙམ་གྱིས་གསལ་འདེབས་པའི་དབང་དུ་བྱས་ཏེ། ཨ༔ དེ་བཞིན་ཉིད་དབྱིངས་སོགས་ནས། དུར་ཁྲོད་བཀོད་པའི་དབུས༔ རང་བྱུང་ལྷུན་གྲུབ་སྤྲུལ་པའི་གཞལ་མེད་ཁང་༔ ཡེ་ཤེས་ཡོན་ཏན་རབ་རྫོགས་གཟི་བྱིན་འབར༔ དེ་དབུས་པདྨ་འདབ་བཞི་རིན་ཆེན་བརྒྱད༔ མུ་ཁྱུད་ལྔ་ལྡན་ཁྱམས་དང་བཅས་པ་རྣམས༔ སོ་སོའི་རིགས་ཀྱི་ཁ་དོག་འོད་དུ་འབར༔ ལྟེ་བར་སེང་གེས་བཏེགས་པའི་རིན་ཆེན་ཁྲི༔ རྡོ་རྗེ་པདྨ་ཉི་མའི་གདན་གྱི་སྟེང་༔ སོགས་ནས། བདག་ཉིད་ཆེན་པོར་གསལ༔ བར་དཀྱུས་ལྟར། ཧཱུྃ། མདུན་དང་ཕྱོགས་བཞི་སེང་གླང་རྟ་མཆོག་དང༌། །རྨ་བྱ་ཤང་ཤང་གིས་བཏེགས་རིན་ཆེན་ཁྲི། །སྣ་ཚོགས་པདྨ་ཉི་ཟླའི་གདན་སྟེང་དུ། །ལོངས་སྐུ་ཐོད་ཕྲེང་རིགས་ལྔ་ཡུམ་དང་བཅས། །བདེ་སྟོང་མཉམ་སྦྱོར་གཟི་བརྗིད་དཔལ་དུ་འབར། །དེ་ཡི་ཕྱི་རིམ་རཏྣ་ཟུར་བརྒྱད་ལ། །སྤྲུལ་པའི་གུ་རུ་མཚན་བརྒྱད་ཡུམ་དང་བཅས། །དེ་ཕྱིར་སྐུ་གསུང་ཐུགས་ཡོན་ཕྲིན་ལས་ཀྱི། །མུ་ཁྱུད་ལྔ་ལྡན་སོ་སོའི་ཕྱོགས་བཅུའི་ཆར། །པད་འདབ་ཉི་ཤུའི་ལྟེ་བར་སེང་ཁྲི་དང༌། །པད་ཟླའི་གདན་ལ་བདེ་བར་གཤེགས་པ་དང༌། །རིག་འཛིན་ཚོགས་རྣམས་ཡེ་ཤེས་འོད་ཀློང་བཞུགས། །ཕྱོགས་བཅུའི་པདྨ་འདབ་སྟོང་རྒྱས་པའི་དབུས། །སྟོན་མཆོག་བསྐལ་བཟང་རྫོགས་པའི་སངས་རྒྱས་སྟོང༌། །དེ་མདུན་སྔགས་ཀྱི་སྟོན་པ་པདྨ་འབྱུང༌། །ཉི་དང་ཟེར་བཞིན་སྤྲུལ་པའི་སྤྲིན་ཕུང་འཕྲོ། །བར་ཁྱམས་ཤར་ནུབ་གཡས་གཡོན་ལྷོ་བྱང་བཅས། །པད་ཟླའི་སྟེང་ན་འགྲོ་འདུལ་གུ་རུ་དྲུག །སྒོ་བཞིར་ཁྲོ་ཆེན་སྒོ་བ་ཡབ་ཡུམ་རྣམས། །སྐུ་མདོག་ཕྱག་འཚན་ཉམས་འགྱུར་ཡོངས་སུ་རྫོགས། གཞན་ཡང་སྟེང་འོག་བར་མཚམས་སོགས་ཕྲིན་ལས་དཀྱུས་ལྟར་ལྷ་བསྐྱེད་ཡེ་ཤེས་པ་གཞུག་ཅིང་དབང་བསྐུར་རྒྱས་གདབ། ཕྱག་མཆོད་བསྟོད་པའི་བར་གྲུབ་ནས། ཨོཾ་གུ་རུ་སརྦ་ཏ་ཐཱ་ག་ཏ་མཎྜ་ལ་ཕཊ་ཛཿ ཞེས་པས་མདུན་རྟེན་གྱི་གོ་སར་ཛབ྄་ཁང་དབྱེ། ཧཱུྃ་ཧྲཱི༔ བླ་མ་སྐུ་གསུམ་ལྷ་ཚོགས་དབྱིངས་ནས་བཞེངས༔ དགྱེས་པའི་གར་སྒྱུར་སྔགས་ཀྱི་རང་སྒྲ་སྒྲོགས༔ ཏིང་འཛིན་དགོངས་བརྒྱུད་དག་པས་བྱིན་རློབས་ལ༔ ཡེ་ཤེས་རོལ་པའི་ཕྲིན་ལས་མཛད་དུ་གསོལ༔ ཅེས་བསྐུལ། ཛབ྄་དམིགས་ནི། དཀྱིལ་འཁོར་གཙོ་བོའི་ཐུགས་ཀར་ཉི་ཟླའི་དབུས༔ ཧཱུྃ་མཐར་སོགས་ནས། ལུ་གུ་རྒྱུད་དུ་བྱུང་༔ ཐོད་ཕྲེང་རིགས་ལྔ་ཡབ་ཡུམ་ཞལ་དུ་ཞུགས༔ སོགས་ནས། ལྷུན་གྱིས་གྲུབ་པར་གྱུར༔ ཅེས་གསལ་བཏབ་ལ་བཟླས་པ་ཅི་འགྲུབ་བྱ། བུམ་པ་རང་བྱུང་གི་གཞལ་ཡས་ཁང་གི་ནང་དུ་ལྷ་རྣམས་དྭངས་བའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་སོགས་གཟུངས་ཐག་བླངས་ལ་རྣམ་བུམ་ལ་དམིགས་པའི་བཟླས་པ་བྱ། གཙོ་བོའི་ཐུགས་ཀར་པད་ཉི་ཟླ་བའི་སྟེང་༔ རིག་པ་མི་འགྱུར་སོགས་ཀྱིས་ཏིང་ངེ་འཛིན་གསལ་བཏབ་ལ་ཚེ་བསྙེན་ཅི་འགྲུབ་བཟླས། མཐར་ཁ་སྐོང་སྔགས་བཟླ། མཆོད་བསྟོད་འབུལ། ཚེ་མདའ་གཡབ་ལ་ཚེ་འགུགས་བཏང༌། ལས་བུམ་དུ་རྟ་མགྲིན་ནམ་འཁྱིལ་པ་གང་རུང་བསྐྱེད་བཟླས་བྱ། རིག་པའི་མེ་ཏོག་དོར་ནས་གནང་བ་ཞུ། དཀྱིལ་འཁོར་ཡོལ་བས་བསྒྲིབ། དེ་ནས་དབང་ལ་ཕྱི་རོལ་དུ་ཁྲུས་བྱ། བགེགས་གཏོར་བཏང་ཞིང་བཀའ་བསྒོ་མཚམས་གཅོད་ལས་བྱང་ལྟར་བྱ། སེམས་བསྐྱེད་གསལ་བཏབ་ལ་ཆོས་བཤད་ཉུང་འདུས་དང༌། དེ་ལ་འདིར་སྐབས་སུ་བབས་པའི་འཆད་བྱ། ཕྱོགས་དུས་རྒྱལ་བ་སྲས་དང་བཅས་པའི་གསང་གསུམ་ཡོན་ཏན་ཕྲིན་ལས་མ་ལུས་པ་འདུས་པའི་བདག་ཉིད་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་དེ་ཉིད་ལྷོ་ནུབ་སྲིན་པོའི་ཁ་གནོན་ལ་ཕེབ་པར་ཉེ་བའི་ཚེ། གཡོ་རུ་ཁྲག་འབྲུག་གི་གཙུག་ལག་ཁང་དུ་རྗེ་འབངས་འདུས་པ་ཕྱི་མ་རྣམས་ལ་བཀའ་འདུས་ཆོས་ཀྱི་རྒྱ་མཚོའི་ཆོས་འཁོར་བསྐོར་བའི་སྐབས་སུ། ལྷ་ལྕམ་མནྡཱ་ར་བས་མ་འོངས་པའི་གདུལ་བྱ་ལ་དགོངས་ཏེ་གསོལ་བ་བཏབ་པའི་ངོར། བཀའ་འདུས་སྙིང་པོའི་ཡང་བཅུད་ལམ་ཟབ་བླ་མའི་སྒྲུབ་ཐབས་ཟབ་པ་དང་རྒྱ་ཆེ་བ་ཐམས་ཅད་ཀྱི་དགོངས་པའི་གནད་དྲིལ་བ། ཚིག་ཉུང་ལ་དོན་འདུས་པ། ཉམས་ལེན་བདེ་ལ་བྱིན་རླབས་ཆེ་བ། བླ་མ་སྐུ་གསུམ་བདེ་གཤེགས་འདུས་པའི་ཟབ་ཏིག་མཐོང་བ་རང་གྲོལ་གྱི་གདམས་པ་འདི་ཉིད་བསྩལ་ཏེ་བཀའ་གནང་བའི་དོན་བཞིན། ཡེ་ཤེས་ཀྱི་མཁའ་འགྲོ་མས་བལ་བོད་ཀྱི་ས་མཚམས་པཱུརྞ་རྫ་རིའི་ཤར་ཕྱོགས་ཕ་ཝཾ་དགའ་བ་འཁྱིལ་འདྲར་གཏེར་དུ་སྤས་པ་ཕྱིས་རྒྱལ་སྲས་ལྷ་རྗེའི་སྐྱེ་བ་གཉིས་པ་རྒྱ་ལོ་ཙཱ་བ་རྡོ་རྗེ་བཟང་པོའི་སྐལ་བར་གྱུར་ཀྱང་རྟེན་འབྲེལ་དང་དགོངས་པའི་དབང་གིས་འདབས་གཏེར་དུ་བཞུགས་པ། དེང་སང་འདུལ་བའི་དུས་སུ་སོན་པས་རྒྱལ་སྲས་མཆོག་གྲུབ་རྒྱལ་པོ་གཏེར་སྟོན་རྐྱང་པའི་སྐྱེ་བ་བཅུ་གསུམ་པར་བྱོན་པ། མཁས་གྲུབ་གཏེར་སྟོན་ཐམས་ཅད་ཀྱི་རྒྱལ་པོ་པདྨ་འོད་གསལ་མདོ་སྔགས་གླིང་པ་ལ་གཏེར་སྲུང་མཁའ་འགྲོས་ཤོག་སེར་ཕུལ་ཞིང་ཨོ་རྒྱན་ཡབ་ཡུམ་གྱིས་བྱིན་གྱིས་བརླབས་པ་ལ་བརྟེན་ནས་ལེགས་པར་གཏན་ལ་ཕབ་པའི་ཟབ་ཆོས་ཁྱད་པར་ཅན་འདི་ལ་སྨིན་བྱེད་རྒྱས་བསྡུས་གཉིས་སུ་བཞུགས་པ་ལས་སྐབས་འདིར་སྙིང་པོ་དོན་གྱི་དབང་བསྐུར་བསྡུས་པ་ཉིད་བསྒྲུབ་པ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །མཚམས་སྦྱོར་དང་སྔགས་སྤྱི་ལྟར་གྱིས་མིག་དར་མེ་ཏོག་སྦྱིན། སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པ་ལ་དད་གུས་དྲག་པོས་ཐལ་སྦྱར་མེ་ཏོག་བཅས་གསོལ་བ་འདེབས་པ་འདིའི་རྗེས་ཟློས། དཀྱིལ་འཁོར་གཙོ་བོ་ཀུན་ཏུ་འཆང་༔ ཁྱབ་བདག་རྡོ་རྗེ་སློབ་དཔོན་གྱིས༔ བདག་ཅག་ཡོངས་སུ་སྨིན་པའི་ཕྱིར༔ འཇུག་ཅིང་དབང་བསྐུར་སྩལ་དུ་གསོལ༔ ལན་གསུམ། སྐྱབས་གནས་རབ་འབྱམས་རྒྱ་མཚོ་གཅིག་བསྡུས་བླ་མ་རྡོ་རྗེ་འཆང་སྐུ་གསུམ་བདེ་གཤེགས་འདུས་པའི་དཀྱིལ་འཁོར་ལ་དེང་ནས་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་བའི་བློ་རྩེ་གཅིག་པས་འདིའི་རྗེས་ཟློས། ན་མོ༔ བླ་མ་དཔལ་ལྡན་རྡོ་རྗེ་འཆང་༔ སྐུ་གསུམ་འདུས་པའི་བདག་ཉིད་ལ༔ བདག་དང་མཐའ་ཡས་སེམས་ཅན་ཀུན༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ། ནམ་མཁས་ཁྱབ་པའི་ཕ་མ་སེམས་ཅན་ཐམས་ཅད་བླ་མ་རྡོ་རྗེ་འཆང་གི་གོ་འཕང་ལ་འགོད་པར་བྱ་བའི་སླད་དུ་ཟབ་མོ་བླ་མའི་དཀྱིལ་འཁོར་དུ་རྒྱུད་སྨིན་པར་བྱས་ལ་བསྒྲུབ་པའི་ཉམས་ལེན་མཐར་དབྱུང་བར་བགྱིའོ་སྙམ་དུ་སེམས་བསྐྱེད་པ་འདིའི་རྗེས་ཟློས། མཁའ་མཉམ་འགྲོ་བ་ཀུན་དོན་དུ༔ སྐུ་གསུམ་བླ་མ་བསྒྲུབ་ནས་ནི༔ མཆོག་དང་ཐུན་མོང་ཕྲིན་ལས་ཀྱི༔ གཞན་དོན་བྱེད་པར་སེམས་བསྐྱེད་དོ༔ ལན་གསུམ། རྒྱུད་རྣམ་པར་དག་པར་བྱ་བའི་སླད་དུ་ཚོགས་ཀྱི་ཞིང་ཁྱད་པར་ཅན་དེ་དག་གི་སྤྱན་སྔར་ཡན་ལག་བདུན་དང་ལྡན་པའི་བསགས་སྦྱངས་སྤེལ་གསུམ་ཚུལ་བཞིན་བྱ་བའི་འདུན་པས་སྒོམ་དོན་སོ་སོར་གསལ་ཐོབ་ལ་འདིའི་རྗེས་ཟློས། ཕྱོགས་དུས་ཞིང་ཁམས་རབ་འབྱམས་ཀྱི༔ བླ་མ་སྐུ་གསུམ་ལྷ་ཚོགས་ལ༔ རྩེ་གཅིག་གུས་པས་ཕྱག་འཚལ་ལོ༔ དངོས་འབྱོར་ཡིད་སྤྲུལ་མཆོད་པར་འབུལ༔ སྡིག་སྒྲིབ་ཉེས་ལྟུང་མཐོལ་ཞིང་བཤགས༔ འཁོར་འདས་དགེ་ལ་རྗེས་ཡི་རངས༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ ཕུང་པོ་ཁམས་དང་སྐྱེ་མཆེད་དང་༔ གཟུང་དང་འཛིན་པ་ལས་འདས་པའི༔ རང་བཞིན་འོད་གསལ་བྱང་ཆུབ་སེམས༔ དམ་པ་བདག་གིས་བསྐྱེད་པར་བགྱི༔ དགེ་བ་འདི་དང་དགེ་བ་གཞན༔ མ་ལུས་བློ་ཡིས་ཡོངས་བསྡོམས་ནས༔ བླ་མེད་ཆོས་དབྱིངས་སྙིང་པོར་བསྔོ༔ ཡང་དག་ཡེ་ཤེས་མཆོག་ཐོབ་ཤོག༔ གསུམ། སྐུ་གསུང་ཐུགས་རྡོ་རྗེའི་དམ་ཚིག་རྩ་བ་དང་ཡན་ལག་གིས་བསྡུས་པ་རྣམས་ཚུལ་བཞིན་དུ་བསྲུང་བར་བགྱིའོ་སྙམ་པས་དམ་བཅའ་བ་འདིའི་རྗེས་ཟློས། ཨོཾ༔ དང་པོ་བྱང་ཆུབ་མཆོག་ཏུ་སེམས་བསྐྱེད་ཅིང་༔ རིག་འཛིན་བླ་མས་སྒྲུབ་པར་དམ་བཅས་ལྟར༔ དེ་ནས་བཟུང་སྟེ་བླ་མེད་སྙིང་པོའི་བར༔ སྐུ་གསུང་ཐུགས་ཀྱི་རྡོ་རྗེ་མི་གཏོང་བཟུང་༔ ཀཱ་ཡ་ཝཱ་ཀ་ཙིཏྟ་བཛྲ་ས་མ་ཡ་སྟྭཾ༔ དཀྱིལ་འཁོར་གྱི་སྒོ་བཞི་ཤག་གིས་ཕྱེས་པར་མོས། ས་མ་ཡ་པྲ་བེ་ཤ་ཡ་ཕཊ༔ ཡོལ་བའི་ནང་དུ་བཅུག་པར་མོས། ཛཿཧཱུྃ་བྃ་ཧོཿ ཞེས་ཡོལ་བ་བསལ། ལྷ་ཚོགས་རྣམས་ཀྱི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་བར་མོས་ཏེ་ཐལ་མོ་གནས་གསུམ་སྦྱར་ཏེ་འདིའི་རྗེས་ཟློས། ཨོཾ་ན་མ་སྟེ་ཧཱུྃ། ན་མ་མི་ཧཱུྃ། ན་མོ་ན་མ་ཧཱུྃ་སྭཱ་ཧཱ༔ ལན་གསུམ། དེ་ནས་དཀྱིལ་འཁོར་གྱི་ཤར་སྒོར་དབང་སྟེགས་ལ་འཁོད་པར་མོས་ཤིག །དབང་གི་གཞི་དགོད་ཅིང་ཡེ་ཤེས་པ་དབབ་པའི་སླད་དུ་སྒོ་གསུམ་གྱི་གནད་ལེགས་པར་གཅུན་ལ་དམིགས་པ་འདི་རྩེ་གཅིག་ཏུ་མཛོད་ཅིག །ཨོཾ་མ་ཧཱ་ཤཱུནྱ་ཏ་སོགས། གཟུང་འཛིན་གྱིས་བསྡུས་པའི་ཆོས་ཐམས་ཅད་འོད་གསལ་སྟོང་པ་ཉིད་དུ་གྱུར། དེའི་ངང་ལས་ཁྱེད་རང་རྣམས་གང་དུ་གནས་པའི་གོ་སར་པདྨ་ཉི་ཟླའི་གདན་གྱི་སྟེང་དུ། རང་གི་རིག་པའི་ངོ་བོ་པདྨ་ཀུན་ཏུ་འཆང་ཆེན་པོ་ནམ་མཁའ་དྭངས་པའི་མདངས་ཅན། ཞལ་གཅིག་ཁྲོ་འཛུམ་སྤྱན་གསུམ་དང་ལྡན་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཐབས་སུ་འཛིན་པས་ཡུམ་དབྱིངས་ཕྱུག་མ་དཀར་མོ་རྡོར་དྲིལ་བསྣམས་པ་ལ་འཁྱུད་པ། ཡབ་ཡུམ་གཉིས་ཀ་དར་དང་རིན་ཆེན་རུས་པའི་རྒྱན་གྱིས་བརྒྱན་ཅིང་ཞབས་རྡོ་རྗེ་པདྨའི་སྐྱིལ་མོ་ཀྲུང་གིས་བཞུགས་ཤིང་ཡེ་ཤེས་གྱི་འོད་ཟེར་དཔག་ཏུ་མེད་པ་འཕྲོ་བར་གསལ་བའི་གནས་གསུམ་དུ་རྡོ་རྗེ་གསུམ་གྱི་ངོ་བོ་ཨོཾ་ཨཱཿཧཱུྃ་དཀར་དམར་མཐིང་གསུམ་གྱིས་མཚན་པ་དང༌། སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་ཀྱང་འོད་ཟེར་མཁའ་ཁྱབ་ཏུ་འཕྲོས་པ་ལ་རྩ་གསུམ་རྒྱལ་བའི་དཀྱིལ་འཁོར་པ་ཐམས་ཅད་བསྒོམ་པ་དང་འདྲ་བའི་ཡེ་ཤེས་པ་དཔག་ཏུ་མེད་པ་ཆར་བབས་པ་ལྟར་བྱོན་ནས་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབས་པར་མོས་ཤིག །འབེབས་པའི་རྫས་བདུག །དབྱངས་རོལ་གྱིས་བསྐུལ་ཏེ། ཧཱུྃ་ཧྲཱིཿ དོན་དམ་དབྱིངས་ལ་གཤེགས་བཞུགས་མ་དམིགས་ཀྱང་༔ ཀུན་འབྱུང་གཉིས་སྣང་དྲི་མ་སྦྱང་བའི་ཕྱིར༔ སྐུ་གསུམ་བླ་མའི་དཀྱིལ་འཁོར་དབྱིངས་ནས་བཞེངས༔ ཐུགས་རྗེའི་དབང་གིས་འདིར་གཤེགས་བྱིན་གྱིས་རློབས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བཛྲ་ཛྙཱ་ན་ཨཱ་བེ་ཤ་ཡ་ཨ་ཨཱཿ བཏགས་པ་མང་དུ་བརྗོད་ལ་དབབ། ཡེ་ཤེས་པའི་བྱིན་རླབས་ཀྱི་རྒྱུན་སྒོ་གསུམ་ལ་བརྟན་པར་བྱས་པར་མོས། ཏིཥྛ་བཛྲ། ཞེས་རྡོ་རྗེ་མགོར་བཞག །སྔར་བྱིན་པའི་མེ་ཏོག་ཚེ་རབས་ནས་འབྲེལ་བའི་རིགས་ཀྱི་ལྷ་ལ་ཕུལ་བའི་མོས་པས་སྔགས་འདིའི་རྗེས་ཟློས་དང་བཅས་ཏེ་འདོར་མཛོད། པྲ་ཏཱིཙྪ་བཛྲ་ཧོཿ ཞེས་འགྲིམ་དཀྱིལ་དུ་འདོར་གཞུག །མེ་ཏོག་རིགས་ཐམས་ཅད་ཀྱི་ཁྱབ་བདག་གཙོ་བོ་ཡབ་ཡུམ་ལ་ཕོག་པ་དེ་ཉིད་སླར་ཡང་དབང་རྟགས་ཀྱི་ཚུལ་དུ་སྤྱི་བོར་བཅིངས་པར་མོས་ཤིག པྲ་ཏི་གྲྀཧྣ་ཨི་མཾ་ས་ཏྭ་མ་ཧཱ་བ་ལ། ཞེས་ཅོད་པན་སྤྱི་བོར་བཞག །མ་རིག་པའི་སྒྲིབ་གཡོགས་མིག་དར་དང་ལྷན་ཅིག་བསལ་བར་མོས། ཨོཾ་ཨཱཿཧཱུྃ། ཞེས་གདོང་བསལ། བླ་མ་རྡོ་རྗེ་འཆང་སྐུ་གསུམ་བདེ་གཤེགས་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཐོང་བར་མོས་ལ་དད་པ་དང་སྤྲོ་བ་སྐྱེད་ཅིག །དེ་དག་གིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་པ་ལགས། ཞུགས་ནས་མངོན་པར་དབང་བསྐུར་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། གསུམ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་གདན་གསུམ་ཚང་བའི་དབང་གི་ལྷ་ནམ་མཁའ་གང་བར་སྤྱན་དྲངས་པ་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་ཁྱེད་རང་རྣམས་ལ་དབང་བསྐུར་བས་དྲི་མ་བག་ཆགས་དང་བཅས་པ་གཏོར་ཞིང་སྐུ་དང་ཡེ་ཤེས་ཀྱི་ཆོས་རྒྱུད་ལ་བླུགས་པའི་མོས་པ་མཛོད། རྣམ་བུམ་གྱིས་དབང་བསྐུར་ལ། ཨོཾ༔ སྣོད་བཅུད་རྣམ་པར་དག་པའི་བུམ་པ་རུ༔ སྐུ་གསུམ་བླ་མའི་དཀྱིལ་འཁོར་མ་འདྲེས་ཤར༔ འོད་ཞུ་ཡེ་ཤེས་བདུད་རྩིས་དབང་བསྐུར་བས༔ ཐ་མལ་སྣང་ཞེན་ལྷ་སྐུར་དག་པར་ཤོག༔ ཨོཾ་ཧཱུྃ་ཏྲཱྃ་ཧྲཱིཿཨཱཿ བཛྲ་ཨ་མྲྀ་ཏ་ཀ་ལ་ཤ་ཨ་བྷི་ཥིཉྩ་ཨོཾ༔ བུམ་ཆུ་སྦྱིན། དེ་ལྟར་ཕྱི་མཚན་མའི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་ཀྱི་དྲི་མ་སྦྱང༌། བསྐྱེད་རིམ་དབྱིབས་ཀྱི་རྣལ་འབྱོར་བསྒོམ་པ་ལ་དབང༌། འབྲས་བུ་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་སྐལ་བ་ཅན་དུ་བྱས་པའོ། །སློབ་དཔོན་དཀྱིལ་འཁོར་གྱི་གཙོ་བོ་པདྨ་ཀུན་ཏུ་འཆང་ཡབ་ཡུམ་མཉམ་པར་སྦྱོར་བའི་བདེ་བའི་སྒྲ་དང་དགའ་བའི་འོད་ཟེར་གྱིས་རྒྱལ་བ་སྲས་དང་བཅས་པ་སྤྱན་དྲངས་ཏེ་ཐིམ། ཐུགས་ཀར་བྱང་ཆུབ་ཀྱི་སེམས་སུ་ཞུ། ཡུམ་གྱི་མཁར་བབས་པ་དང་ཐོད་པའི་བདུད་རྩི་དང་རོ་གཅིག་ཏུ་སྦྱར་བ་ཁྱེད་རང་ལ་བྱིན་པས་རྩ་ཁམས་ཐམས་ཅད་ཁྱབ། གསལ་སྟོང་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེས་པར་མོས་ཤིག །ཐོད་པའི་བདུད་རྩི་སྦྱིན་ལ། ཨཱཿ ཆོས་དབྱིངས་ཡུམ་གྱི་བྷནྡྷ་ཡངས་པ་རུ༔ རིག་པ་བྱང་སེམས་སྙོམས་འཇུག་བདུད་རྩི་བསྐྱིལ༔ ཟག་མེད་བདེ་བའི་རྒྱུན་གྱིས་དབང་བསྐུར་བས༔ རྩ་རླུང་ཐིག་ལེ་སྔགས་སུ་རྫོགས་པར་ཤོག༔ མ་ཧཱ་སུ་ཁ་བོ་དྷི་ཙིཏྟ་ཛྙཱ་ན་ཨ་བྷི་ཥྀཉྩ་ཨཱཿ དེའི་རྗེས་འབྲེལ་དུ་བཟླས་པའི་ལུང་སྦྱིན་པ་ཡིན་པས་དམིགས་པ་འདི་ལྟར་མཛོད། སློབ་དཔོན་དང་ཁྱེད་རང་གཉིས་ཀ་ལྷར་གསལ་བའི་ཐུགས་ཀར་ཉི་ཟླའི་སྟེང་དུ་ཧཱུྃ་ཡིག་སྔོན་པོ་རེ་གསལ་ཐོབ། སློབ་དཔོན་གྱི་ཐུགས་ཀའི་ཧཱུྃ་མཐར་སྔགས་ཀྱི་ཕྲེང་བས་བསྐོར་བ་ལས་སྔགས་ཕྲེང་གཉིས་པ་འཕྲོས། ཞལ་ནས་ཐོན་ཁྱེད་རང་རྣམས་ཀྱི་ཞལ་ནས་ཞུགས་ཏེ་སྙིང་གའི་ཧཱུྃ་ཡིག་མཐར་འཁོད། བཟླས་པའི་རྐྱེན་གྱིས་འོད་ཟེར་འཕྲོས་རྒྱལ་བ་མཆོད་ཅིང་སེམས་ཅན་གྱི་དོན་བྱས། སླར་འདུས་ཏེ་ཐིམ་པས་བྱིན་རླབས་དངོས་གྲུབ་མ་ལུས་པ་ཐོབ་པར་བསམ་ལ་རྗེས་ཟློས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ལན་གསུམ། ཕྲེང་བ་མགྲིན་པར་བཞག་ལ། བླ་མ་སྐུ་གསུམ་བདེ་གཤེགས་འདུས་པའི་གསུང་གསང་སྔགས་ཀྱི་བྱིན་རླབས་མ་ལུས་པ་འཇུག་ཅིང་བརྟན་པར་གྱུར་ཅིག །དེ་ལྟར་ནང་ལུས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ། ངག་སྲོག་རྩོལ་གྱི་དྲི་མ་སྦྱང༌། རང་ལུས་ཐབས་ལྡན་བསྒོམ་པ་ལ་དབང༌། འབྲས་བུ་གསུང་རྡོ་རྗེ་ལོངས་སྐུ་འགྲུབ་པའི་སྐལ་བ་ཅན་དུ་བྱས་པའོ། །གཟུགས་དང་ལང་ཚོའི་མཛེས་པ་ཕུལ་དུ་བྱུང་ཞིང་མཚན་ཉིད་ཚང་བའི་ལས་རྒྱ་དབྱིངས་ཕྱུག་མའི་ངོ་བོར་བརླབས་ཏེ་བྱིན་པར་མོས་ཤིག །རིག་ཙཀ་གཏད་ལ། ཧཱུྃ༔ ལས་ཀྱི་ཕྱག་རྒྱའི་རེག་བྱ་ལ་བརྟེན་ནས༔ དམ་ཚིག་ཕྱག་རྒྱ་འབར་བའི་ཡེ་ཤེས་མེས༔ ཆོས་ཀྱི་ཕྱག་རྒྱའི་བདེ་བ་དྲངས་པ་ལས༔ འོད་གསལ་ཕྱག་རྒྱ་ཆེན་པོར་སྨིན་པར་ཤོག༔ ཀརྨ་མུ་དྲ་མ་ཧཱ་ཛྙཱ་ན་ཨ་བྷི་ཥིཉྩ་ཧཱུྃ༔ རིག་མ་དེ་དང་འདུ་ཤེས་སུམ་ལྡན་གྱིས་སྙོམས་པར་ཞུགས་པས་ཡས་བབ་རྒྱུ་དང་མས་བརྟན་འབྲས་བུའི་དགའ་བ་བཞི་རིམ་གྱིས་ཉམས་སུ་མྱོང་བའི་མཐར་ལྷན་ཅིག་སྐྱེས་པའི་བདེ་ཆེན་གྱི་ཡེ་ཤེས་མངོན་ཏུ་གྱུར་པར་མོས་ཤིག །དེ་ལྟར་གསང་བ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཐིག་ལེའི་དྲི་མ་སྦྱང༌། གཞན་ལུས་ཕོ་ཉའི་ལམ་བསྒོམ་པ་ལ་དབང༌། འབྲས་བུ་ཐུགས་རྡོ་རྗེ་ཆོས་སྐུ་འགྲུབ་པའི་སྐལ་བ་ཅན་དུ་བྱས་པའོ། །ཤེལ་རྡོ་ཐོགས་ལ། དབྱིངས་ཀ་དག་གི་ངོ་བོ་ཤེལ་ལྟར་དྭངས་པ་ལ། རིགས་གདངས་ལྷུན་གྲུབ་ཀྱི་རང་བཞིན་འཇའ་ཚོན་ལྟར་ཤར་བ། དེ་གཉིས་གདོད་ནས་དབྱེར་མེད་ཟུང་དུ་འཇུག་པའི་ཐུགས་རྗེའི་རང་རྩལ་མ་འགགས་ཅིར་ཡང་སྣང་བ་རང་རིག་སྐུ་གསུམ་གྱི་རང་བཞིན་ཏུ་རྫོགས་པར་ངོ་ཤེས་པར་མཛོད་ལ་འོད་གསལ་གཉུག་མའི་ངང་དུ་མཉམ་པར་འཇོག་པར་ཞུ། ཧོཿ དབྱིངས་ཀྱི་ངོ་བོ་སྟོང་པ་ཤེལ་ལྟར་དག༔ རིག་པའི་རང་མདངས་འཇའ་ཚོན་བཞིན་དུ་གསལ༔ དབྱིངས་རིག་ཟུག་འཇུག་བརྡ་ཡི་དབང་བསྐུར་བས༔ དོན་གྱི་ལྷན་སྐྱེས་ཡེ་ཤེས་མངོན་གྱུར་ཤོག༔ དྷརྨཱ་དྷཱ་ཏུ་མ་ཧཱ་ཛྙཱ་ན་ཨ་བྷི་ཥིཉྩ་ཨ་ཨ་ཨ༔ ཞེས་དར་གཅིག་མཉམ་པར་བཞག །དེ་ལྟར་རང་བྱུང་ཡེ་ཤེས་ཀྱི་དཀྱིལ་འཁོར་དུ་བཞི་པའི་དབང་བསྐུར་བ་ཐོབ། ལྷན་སྐྱེས་བག་ཆགས་ཀྱི་དྲི་མ་སྦྱང༌། ཀ་དག་དང་ལྷུན་གྲུབ་ཀྱི་ལམ་སྒོམ་པ་ལ་དབང༌། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པའོ། །དེས་དབང་དངོས་གཞི་གྲུབ་པ་ལགས། མཐའ་རྟེན་བཀྲ་ཤིས་འཆི་མེད་ཚེའི་དབང་བསྐུར་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། རིགས་བདག་འཆི་མེད་པདྨ་འབྱུང་༔ ཀུན་ཏུ་འཆང་བ་དགོངས་སུ་གསོལ༔ རྡོ་རྗེ་སེམས་དཔའི་ལང་ཚོ་དང་༔ ཡེ་ཤེས་ཚེ་ཡི་དབང་མཆོག་སྩོལ༔ ལན་གསུམ། དེ་ལ་ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ་དམིགས་པ་འདི་ལྟར་མཛོད། བདག་མདུན་དཀྱིལ་འཁོར་པ་རྣམས་དང་ཁྱེད་རང་རྣམས་ཀྱང་བླ་མ་རྡོ་རྗེ་འཆང་གི་སྐུར་གསལ་བའི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་དཔག་ཏུ་མེད་པ་འཕྲོས། རྩ་གསུམ་རྒྱལ་བ་རབ་འབྱམས་ཀྱི་བྱིན་རླབས་ནུས་སྟོབས། འཆི་མེད་ཚེ་ལ་དབང་བའི་རིག་འཛིན་རྣམས་ཀྱི་ཚེའི་དངོས་གྲུབ། ལྷ་ཀླུ་མིའི་དབང་པོ་རྣམས་ཀྱི་ཚེ་བསོད་དཔལ་འབྱོར། འཁོར་འདས་བརྟན་གཡོའི་བཅུད་དང་དྭངས་མ། རང་རང་གི་བླ་ཚེ་ཆད་ཉམས་ཡར་བ། འབྱུང་པོ་སྡེ་བརྒྱད་མཐུ་བོ་ཆེས་བརྐུས་འཕྲོག་གཞོམ་པ་ཐམས་ཅད་འོད་ཟེར་ཐིག་ལེའི་རྣམ་པར་འུབ་ཀྱིས་བསྡུས་ཏེ་བ་སྤུའི་བུ་ག་ནས་ཞུགས། སྙིང་གའི་མི་ཤིགས་པའི་ཐིག་ལེ་ལ་ཐིམ་པར་མོས་ཤིག །མདའ་དར་གཡབ་ལ་དབྱངས་བཅས། ཧཱུྃ་ཧྲཱིཿ བཞེངས་ཤིག་བླ་མ་བདེ་གཤེགས་རབ་འབྱམས་ཚོགས༔ ཆོས་ཀྱི་དབྱིངས་ལས་ཡེ་ཤེས་གཟི་བྱིན་སྐྱེད༔ སྤྲུལ་པའི་ཕོ་ཉ་མགྱོགས་མ་ལས་ལ་བསྐུལ༔ ཐུགས་རྗེའི་འོད་ཟེར་ཕྱོགས་བཅུ་ཀུན་ཏུ་སྤྲོས༔ སྲིད་གསུམ་གདོན་བགེགས་འབྱུང་པོའི་ཚོགས་རྣམས་ཀྱིས༔ བརྐུས་དང་འཕྲོག་དང་བཞོམས་པའི་ཚེ་ཁུག་ཅིག༔ ཕྱི་ནང་བན་བོན་སྔགས་ཀྱི་སྦྱོར་བ་ཡིས༔ བྱད་དང་གཏད་དུ་བཅུག་པའི་ཚེ་ཁུག་ཅིག༔ བརྟན་གཡོ་སྣོད་བཅུད་འབྱུང་བ་རྣམ་པ་ལྔའི༔ དྭངས་མ་སྟོབས་སུ་གྱུར་པའི་ཚེ་ཁུག་ཅིག༔ ཕྱོགས་བཅུའི་རྩ་གསུམ་རྒྱལ་བ་རབ་འབྱམས་ཀྱི༔ མཁྱེན་བརྩེ་ནུས་པའི་ཡེ་ཤེས་ཚེ་ཁུག་ཅིག༔ ཚེ་ཁུག་གཡང་སྐྱོབས་སྲོག་གི་ཀ་བ་ཚུགས༔ འཆི་མེད་རིག་འཛིན་མཆོག་གི་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུརྫྙཱ་ན་སརྦ་སིདྡྷི་ཧཱུྃ༔ ཅེས་བརྗོད། ཚེ་འབྲང་ཟླ་གམ་དམར་པོ་དབང་གི་དབུས་སུ་ཚེ་བདག་པདྨ་ཀུན་ཏུ་འཆང་འཁོར་དང་བཅས་པ་མཉམ་པར་སྦྱོར་བའི་བྱང་སེམས་བདུད་རྩིའི་རྒྱུན་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་སྐྱེ་འཆིའི་སྒྲིབ་པ་བག་ཆགས་དང་བཅས་པ་དག །སྐུ་འགྱུར་བ་མེད་པ་རྡོ་རྗེ་ཚེའི་དབང་མཆོག་དམ་པ་ཐོབ་པར་མོས་ཤིག །ཚེ་འབྲང་མགོ་བོར་བཞག། ཨོཾ༔ ཟླ་གམ་དམར་གསལ་འོད་ཀྱི་བུམ་པ་རུ༔ ཀུན་ཏུ་འཆང་ཆེན་མི་འགྱུར་ཚེ་ཡི་བདག༔ རིག་འཛིན་མཁའ་འགྲོའི་ཚོགས་བཅས་དགྱེས་རོལ་པས༔ འཕོ་མེད་རྟག་པ་ཚེ་ཡི་དབང་བསྐུར་རོ༔ ཀཱ་ཡ་ཨཱ་ཡུརྫྙཱ་ན་ཨ་བྷི་ཥིཉྩ་ཨོཾ༔ བདེ་ཆེན་དབྱིངས་ཀྱི་བྷནྡྷའི་སྣོད་དུ་འཁོར་འདས་བརྟན་གཡོའི་དྭངས་བཅུད་འཆི་མེད་ཡེ་ཤེས་ཆེན་པོའི་བདུད་རྩིར་བསྐྱིལ་བ་འདི་ཉིད་མྱང་བས་རྩ་ཁམས་བདེ་བས་ཁྱབ། གསུངས་འགགས་པ་མེད་པ་རྡོ་རྗེ་ཚེའི་དབང་མཆོག་དམ་པ་ཐོབ་པར་མོས་ཤིག །ཚེ་ཆང་སྦྱིན་ལ། ཨཱཿ མཁའ་དབྱིངས་བྷནྡྷ་བདེ་ཆེན་ཕྱག་རྒྱ་རུ༔ འཁོར་འདས་དྭངས་བཅུད་ཡེ་ཤེས་བདུད་རྩིར་བསྐྱིལ༔ རྩ་ཁམས་བདེ་དྲོད་འབར་བའི་རྫས་མཆོག་གིས༔ འགག་མེད་རྡོ་རྗེ་ཚེ་ཡི་དབང་བསྐུར་རོ༔ ཝཱ་ཀ་ཨ་ཡུརྫྙཱ་ན་ཨ་བྷི་ཥིཉྩ་ཨཱཿ སྲིད་དང་ཞི་བའི་སྙིང་པོ་སྲོག་གི་བཅུད་ཐམས་ཅད་མི་ཤིགས་ཐིག་ལེའི་རང་བཞིན་གཅིག་ཏུ་འདྲིལ་བ་འཆི་མེད་རིལ་བུ་མགྲིན་པ་ནས་བརྒྱུད། སྙིང་དབུས་དྭངས་སྲོག་གི་ཐིག་ལེར་ཐིམ་པས། ཐུགས་འཕོ་འགྱུར་མེད་པ་རྡོ་རྗེ་ཚེའི་དབང་མཆོག་དམ་པ་ཐོམ་པར་མོས་ཤིག །ཚེ་རིལ་སྦྱིན་ལ། ཧཱུྃ༔ མི་ཤིགས་སྙིང་པོ་རང་བྱུང་ཐིག་ལེ་ནི༔ སྲིད་དང་ཞི་བའི་སྲོག་བཅུད་གཅིག་ཏུ་འདྲིལ༔ མྱོང་གྲོལ་བདེ་ཆེན་དམ་ཚིག་རྫས་མཆོག་གིས༔ འོད་གསལ་གཉུག་མ་ཚེ་ཡི་དབང་བསྐུར་རོ༔ ཙིཏྟ་ཨཱ་ཡུརྫྙ་ན་ཨབྷི་ཥིཉྩ་ཧཱུྃ༔ དེ་ལྟར་དབང་བསྐུར་བས་ལུས་ཀྱི་ནང་བདུད་རྩིའི་བཅུད་ཀྱིས་གང་བའི་དྭངས་མ་ཐམས་ཅད་སྙིང་གར་ཉི་ཟླའི་གྭ་འུའི་དབུས་སུ་སྲོག་རྟེན་ཧྲཱིཿཡིག་དམར་པོ་ལ་ཐིམ་པས་བཀྲག་མདངས་འོད་དུ་འབར། གྭའུ་ཁ་བསྒྲིགས། ལུས་ཐམས་ཅད་རྡོ་རྗེའི་གོ་ཁྲབ་ཀྱིས་གཏམ། འཆི་མེད་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས། བར་དུ་གཅོད་པ་གང་གིས་ཀྱང་གླགས་མི་རྙེད་པར་མོས་ཤིག །མདའ་དར་གྱིས་གནས་གསུམ་དུ་རྒྱས་གདབ་ལ། ཨཱཿ སྣོད་ཀྱི་དྭངས་མ་ཕུང་པོའི་རྟེན་ལ་འདུས༔ བཅུད་ཀྱི་ཚེ་བསོད་ཡེ་ཤེས་དབྱིངས་སུ་བསྟིམ༔ མི་འགྱུར་མི་ཤིགས་གཞོམ་དུ་མེད་པ་ཡི༔ རྡོ་རྗེའི་སྐུ་གསུང་ཐུགས་སུ་རྒྱས་གདབ་བོ༔ བཛྲ་ཀཱ་ཝ་ཙི་རཀྵ་ཨ་ཨཱཿ ཞེས་དང་རྟེན་སྙིང་བརྗོད། མེ་ཏོག་འཐོར་ལ། ཧཱུྃ་ཧྲཱིཿ བཀྲ་ཤིས་གང་ཞིང་འོད་གསལ་ཆོས་སྐུའི་དབྱིངས༔ ཡེ་ཤེས་གཟུགས་སྐུའི་རྣམ་རོལ་ཅིར་ཡང་སྟོན༔ བླ་མ་བདེ་གཤེགས་རྩ་གསུམ་རབ་འབྱམས་ཀྱིས༔ བྱིན་རླབས་དངོས་གྲུབ་ཆར་འབེབས་བཀྲ་ཤིས་ཤོག༔ དེ་དག་གིས་སྤྲུལ་པའི་གཏེར་སྟོན་རྒྱ་ལོ་ཙཱའི་ཡང་གཏེར་བླ་མ་བསྟན་གཉིས་སྐོར་གསུམ་གྱི་དོན་དབང་མཐའ་རྟེན་བཅས་ལེགས་པར་གྲུབ་པ་ཡིན་པས་སོགས་ཀྱིས་མཚམས་སྦྱར་ལ་དམ་ཚིག་ཁས་ལེན། གཏང་རག་མཎྜལ། ལུས་འབུལ། དགེ་བསྔོ་བྱ། གསུམ་པ་རྗེས་སློབ་དཔོན་གྱིས་ཆོས་གཏེར་སྲུང་མའི་གཏོར་འབུལ་དང༌། ཚོགས་བྱིན་རླབས་ནས་ལྷག་མ་བཀྲ་ཤིས་བར་ལས་བྱང་ལྟར་མཐར་ཆགས་སུ་བཏང་ངོ༌། །བླ་མའི་དཀྱིལ་འཁོར་རྒྱས་པ་ཆེ། །ངོ་མཚར་ལམ་འདིར་ཡིད་ཅན་ཀུན། །ཞུགས་ནས་སྐུ་གསུམ་བདེ་བླག་བརྙེས། །བསྟན་གཉིས་བཀོད་པ་སྤྲོ་ནུས་ཤོག །ཅེས་པ་འདིའང་ཁྱབ་བདག་གཏེར་ཆེན་བླ་མ་རིན་པོ་ཆེས་རྗེས་སུ་གནང་བ་ལྟར་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་རྗེ་ཉིད་ཀྱི་ཕྱག་བཞེས་ནོར་བ་མེད་པར་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་ཁྲིགས་བཀོད་བྱས་པ་དགེ་ལེགས་འཕེལ། ཕུན་ཚོགས་རྣམ་རྒྱལ་པས་ནག་མགྲོས་སུ་བཀོད།། །།

[edit]

@#/__/bla ma bstan gnyis skor gsum gyi snying po'i don dbang bklags chog tu bkod pa bdud rtsi'i thigs pa zhes bya ba bzhugs so// sku gsum bstan pa gnyis ldan gyi/__/bde gshegs kun 'dus bla ma lhar/__/gus phyag 'tshal nas don bsdus pa'i/__/smin byed bltas chog nyid du dgod/__de la gsum/__sbyor dngos rjes so/__/dang po sbyor ba yo byad kyi bsham ni/__stegs bu'i steng ras bris kyi dkyil 'khor bkram/__ma 'dzom na maN+Dal che zhing legs par 'bru dkar gyi tshom bu dbus su che ba gcig__/de rgyab lnga/__brgyad/__bcu rnams rim par bkod/__de rgyab phyogs bzhi dang g.yas g.yon bcas drug__/de rgyab phyogs bzhir bzhi dgod do/__/dkyil 'khor dbus su many+dzi'i khar rnam bum bcud ldan kha rgyan dang mgul chings sngon pos spras pa/__g.yas g.yon tu gsang thod bdud rtsi/__rig tsaka__/shel rdo/__mdun rgyab gang bder tshe 'brang*/__tshe ril tshe chang rnams dang*/__chu gnyis nyer spyod/__sman raka gtor gsum spyi ltar bsham/__tshe mda'/__dbang phreng*/__las bum/__las byang la mkho ba'i gtor ma tshogs kyi yo byad rnams kyang 'du bya'o/__/gnyis pa dngos gzhi'i thog mar dbang don sgrub mchod bya ba ni/__phrin las rgyas par grub na legs kyang skabs 'dir phrin las snying po bsdus pa tsam gyis kyang 'thus pas spros med sgrub pa'i phrin las ltar/__sngon 'gro skyabs sems nas mchod pa byin rlabs bar btang*/__dngos gzhi phyi dkyil dang mthun par skad cig dran rdzogs tsam gyis gsal 'debs pa'i dbang du byas te/__a:__de bzhin nyid dbyings sogs nas/__dur khrod bkod pa'i dbus:__rang byung lhun grub sprul pa'i gzhal med khang :__ye shes yon tan rab rdzogs gzi byin 'bar:__de dbus pad+ma 'dab bzhi rin chen brgyad:__mu khyud lnga ldan khyams dang bcas pa rnams:__so so'i rigs kyi kha dog 'od du 'bar:__lte bar seng ges btegs pa'i rin chen khri:__rdo rje pad+ma nyi ma'i gdan gyi steng :__sogs nas/__bdag nyid chen por gsal:__bar dkyus ltar/__hU~M/__mdun dang phyogs bzhi seng glang rta mchog dang*/__/rma bya shang shang gis btegs rin chen khri/__/sna tshogs pad+ma nyi zla'i gdan steng du/__/longs sku thod phreng rigs lnga yum dang bcas/__/bde stong mnyam sbyor gzi brjid dpal du 'bar/__/de yi phyi rim rat+na zur brgyad la/__/sprul pa'i gu ru mtshan brgyad yum dang bcas/__/de phyir sku gsung thugs yon phrin las kyi/__/mu khyud lnga ldan so so'i phyogs bcu'i char/__/pad 'dab nyi shu'i lte bar seng khri dang*/__/pad zla'i gdan la bde bar gshegs pa dang*/__/rig 'dzin tshogs rnams ye shes 'od klong bzhugs/__/phyogs bcu'i pad+ma 'dab stong rgyas pa'i dbus/__/ston mchog bskal bzang rdzogs pa'i sangs rgyas stong*/__/de mdun sngags kyi ston pa pad+ma 'byung*/__/nyi dang zer bzhin sprul pa'i sprin phung 'phro/__/bar khyams shar nub g.yas g.yon lho byang bcas/__/pad zla'i steng na 'gro 'dul gu ru drug__/sgo bzhir khro chen sgo ba yab yum rnams/__/sku mdog phyag 'tshan nyams 'gyur yongs su rdzogs/__gzhan yang steng 'og bar mtshams sogs phrin las dkyus ltar lha bskyed ye shes pa gzhug cing dbang bskur rgyas gdab/__phyag mchod bstod pa'i bar grub nas/__oM gu ru sarba ta thA ga ta maN+Da la phaT dzaH__zhes pas mdun rten gyi go sar dzaba? khang dbye/___hU~M hrI:__bla ma sku gsum lha tshogs dbyings nas bzhengs:__dgyes pa'i gar sgyur sngags kyi rang sgra sgrogs:__ting 'dzin dgongs brgyud dag pas byin rlobs la:__ye shes rol pa'i phrin las mdzad du gsol:__ces bskul/__dzaba? dmigs ni/__dkyil 'khor gtso bo'i thugs kar nyi zla'i dbus:__hU~M mthar sogs nas/__lu gu rgyud du byung :__thod phreng rigs lnga yab yum zhal du zhugs:__sogs nas/__lhun gyis grub par gyur:__ces gsal btab la bzlas pa ci 'grub bya/__bum pa rang byung gi gzhal yas khang gi nang du lha rnams dwangs ba'i mtsho la gza' skar shar ba bzhin skad cig gis gsal bar gyur/__rang srog sngags kyi sogs gzungs thag blangs la rnam bum la dmigs pa'i bzlas pa bya/__gtso bo'i thugs kar pad nyi zla ba'i steng :__rig pa mi 'gyur sogs kyis ting nge 'dzin gsal btab la tshe bsnyen ci 'grub bzlas/__mthar kha skong sngags bzla/__mchod bstod 'bul/__tshe mda' g.yab la tshe 'gugs btang*/__las bum du rta mgrin nam 'khyil pa gang rung bskyed bzlas bya/__rig pa'i me tog dor nas gnang ba zhu/__dkyil 'khor yol bas bsgrib/__de nas dbang la phyi rol du khrus bya/__bgegs gtor btang zhing bka' bsgo mtshams gcod las byang ltar bya/__sems bskyed gsal btab la chos bshad nyung 'dus dang*/__de la 'dir skabs su babs pa'i 'chad bya/__phyogs dus rgyal ba sras dang bcas pa'i gsang gsum yon tan phrin las ma lus pa 'dus pa'i bdag nyid o rgyan gyi slob dpon chen po pad+ma 'byung gnas de nyid lho nub srin po'i kha gnon la pheb par nye ba'i tshe/__g.yo ru khrag 'brug gi gtsug lag khang du rje 'bangs 'dus pa phyi ma rnams la bka' 'dus chos kyi rgya mtsho'i chos 'khor bskor ba'i skabs su/__lha lcam man+dA ra bas ma 'ongs pa'i gdul bya la dgongs te gsol ba btab pa'i ngor/__bka' 'dus snying po'i yang bcud lam zab bla ma'i sgrub thabs zab pa dang rgya che ba thams cad kyi dgongs pa'i gnad dril ba/__tshig nyung la don 'dus pa/__nyams len bde la byin rlabs che ba/__bla ma sku gsum bde gshegs 'dus pa'i zab tig mthong ba rang grol gyi gdams pa 'di nyid bstsal te bka' gnang ba'i don bzhin/__ye shes kyi mkha' 'gro mas bal bod kyi sa mtshams pUr+Na rdza ri'i shar phyogs pha waM dga' ba 'khyil 'drar gter du spas pa phyis rgyal sras lha rje'i skye ba gnyis pa rgya lo tsA ba rdo rje bzang po'i skal bar gyur kyang rten 'brel dang dgongs pa'i dbang gis 'dabs gter du bzhugs pa/__deng sang 'dul ba'i dus su son pas rgyal sras mchog grub rgyal po gter ston rkyang pa'i skye ba bcu gsum par byon pa/__mkhas grub gter ston thams cad kyi rgyal po pad+ma 'od gsal mdo sngags gling pa la gter srung mkha' 'gros shog ser phul zhing o rgyan yab yum gyis byin gyis brlabs pa la brten nas legs par gtan la phab pa'i zab chos khyad par can 'di la smin byed rgyas bsdus gnyis su bzhugs pa las skabs 'dir snying po don gyi dbang bskur bsdus pa nyid bsgrub pa la sogs kyis mtshams sbyar nas maN+Dal 'bul du gzhug__/mtshams sbyor dang sngags spyi ltar gyis mig dar me tog sbyin/__slob dpon dang dkyil 'khor gyi gtso bo dbyer ma mchis pa la dad gus drag pos thal sbyar me tog bcas gsol ba 'debs pa 'di'i rjes zlos/__dkyil 'khor gtso bo kun tu 'chang :__khyab bdag rdo rje slob dpon gyis:__bdag cag yongs su smin pa'i phyir:__'jug cing dbang bskur stsal du gsol:__lan gsum/__skyabs gnas rab 'byams rgya mtsho gcig bsdus bla ma rdo rje 'chang sku gsum bde gshegs 'dus pa'i dkyil 'khor la deng nas byang chub ma thob kyi bar du skyabs su 'gro ba'i blo rtse gcig pas 'di'i rjes zlos/__na mo:__bla ma dpal ldan rdo rje 'chang :__sku gsum 'dus pa'i bdag nyid la:__bdag dang mtha' yas sems can kun:__byang chub bar du skyabs su mchi:__lan gsum/__nam mkhas khyab pa'i pha ma sems can thams cad bla ma rdo rje 'chang gi go 'phang la 'god par bya ba'i slad du zab mo bla ma'i dkyil 'khor du rgyud smin par byas la bsgrub pa'i nyams len mthar dbyung bar bgyi'o snyam du sems bskyed pa 'di'i rjes zlos/__mkha' mnyam 'gro ba kun don du:__sku gsum bla ma bsgrub nas ni:__mchog dang thun mong phrin las kyi:__gzhan don byed par sems bskyed do:__lan gsum/__rgyud rnam par dag par bya ba'i slad du tshogs kyi zhing khyad par can de dag gi spyan sngar yan lag bdun dang ldan pa'i bsags sbyangs spel gsum tshul bzhin bya ba'i 'dun pas sgom don so sor gsal thob la 'di'i rjes zlos/__phyogs dus zhing khams rab 'byams kyi:__bla ma sku gsum lha tshogs la:__rtse gcig gus pas phyag 'tshal lo:__dngos 'byor yid sprul mchod par 'bul:__sdig sgrib nyes ltung mthol zhing bshags:__'khor 'das dge la rjes yi rangs:__chos kyi 'khor lo bskor bar bskul:__mya ngan mi 'da' bzhugs gsol 'debs:__phung po khams dang skye mched dang :__gzung dang 'dzin pa las 'das pa'i:__rang bzhin 'od gsal byang chub sems:__dam pa bdag gis bskyed par bgyi:__dge ba 'di dang dge ba gzhan:__ma lus blo yis yongs bsdoms nas:__bla med chos dbyings snying por bsngo:__yang dag ye shes mchog thob shog:__gsum/__sku gsung thugs rdo rje'i dam tshig rtsa ba dang yan lag gis bsdus pa rnams tshul bzhin du bsrung bar bgyi'o snyam pas dam bca' ba 'di'i rjes zlos/__oM:__dang po byang chub mchog tu sems bskyed cing :__rig 'dzin bla mas sgrub par dam bcas ltar:__de nas bzung ste bla med snying po'i bar:__sku gsung thugs kyi rdo rje mi gtong bzung :__kA ya wA ka tsit+ta badz+ra sa ma ya s+t+waM:__dkyil 'khor gyi sgo bzhi shag gis phyes par mos/__sa ma ya pra be sha ya phaT:__yol ba'i nang du bcug par mos/__dzaHhU~M ba~M hoH__zhes yol ba bsal/__lha tshogs rnams kyi zhabs la sgo gsum gus pa chen pos phyag 'tshal bar mos te thal mo gnas gsum sbyar te 'di'i rjes zlos/__oM na ma ste hU~M/__na ma mi hU~M/__na mo na ma hU~M swA hA:__lan gsum/__de nas dkyil 'khor gyi shar sgor dbang stegs la 'khod par mos shig__/dbang gi gzhi dgod cing ye shes pa dbab pa'i slad du sgo gsum gyi gnad legs par gcun la dmigs pa 'di rtse gcig tu mdzod cig__/oM ma hA shUn+ya ta sogs/__gzung 'dzin gyis bsdus pa'i chos thams cad 'od gsal stong pa nyid du gyur/__de'i ngang las khyed rang rnams gang du gnas pa'i go sar pad+ma nyi zla'i gdan gyi steng du/__rang gi rig pa'i ngo bo pad+ma kun tu 'chang chen po nam mkha' dwangs pa'i mdangs can/__zhal gcig khro 'dzum spyan gsum dang ldan pa/__phyag gnyis kyis rdo rje dang dril bu thugs kar bsnol thabs su 'dzin pas yum dbyings phyug ma dkar mo rdor dril bsnams pa la 'khyud pa/__yab yum gnyis ka dar dang rin chen rus pa'i rgyan gyis brgyan cing zhabs rdo rje pad+ma'i skyil mo krung gis bzhugs shing ye shes gyi 'od zer dpag tu med pa 'phro bar gsal ba'i gnas gsum du rdo rje gsum gyi ngo bo oM AHhU~M dkar dmar mthing gsum gyis mtshan pa dang*/__slob dpon dang mdun bskyed kyi thugs ka nas kyang 'od zer mkha' khyab tu 'phros pa la rtsa gsum rgyal ba'i dkyil 'khor pa thams cad bsgom pa dang 'dra ba'i ye shes pa dpag tu med pa char babs pa ltar byon nas khyed rang rnams la thim pas rgyud byin gyis brlabs par mos shig__/'bebs pa'i rdzas bdug__/dbyangs rol gyis bskul te/__hU~M hrIH__don dam dbyings la gshegs bzhugs ma dmigs kyang :__kun 'byung gnyis snang dri ma sbyang ba'i phyir:__sku gsum bla ma'i dkyil 'khor dbyings nas bzhengs:__thugs rje'i dbang gis 'dir gshegs byin gyis rlobs/__oM AHhU~M badz+ra gu ru pad+ma sid+d+hi hU~M:__badz+ra dz+nyA na A be sha ya a AH__btags pa mang du brjod la dbab/__ye shes pa'i byin rlabs kyi rgyun sgo gsum la brtan par byas par mos/__tiSh+Tha badz+ra/__zhes rdo rje mgor bzhag__/sngar byin pa'i me tog tshe rabs nas 'brel ba'i rigs kyi lha la phul ba'i mos pas sngags 'di'i rjes zlos dang bcas te 'dor mdzod/__pra tIts+tsha badz+ra hoH__zhes 'grim dkyil du 'dor gzhug__/me tog rigs thams cad kyi khyab bdag gtso bo yab yum la phog pa de nyid slar yang dbang rtags kyi tshul du spyi bor bcings par mos shig__pra ti gr-ih+na i maM sa twa ma hA ba la/__zhes cod pan spyi bor bzhag__/ma rig pa'i sgrib g.yogs mig dar dang lhan cig bsal bar mos/__oM AHhU~M/__zhes gdong bsal/__bla ma rdo rje 'chang sku gsum bde gshegs 'dus pa'i dkyil 'khor rten dang brten par bcas pa thams cad mngon sum bzhin du mthong bar mos la dad pa dang spro ba skyed cig__/de dag gis dkyil 'khor du 'jug pa'i chos rnams grub pa lags/__zhugs nas mngon par dbang bskur zhu ba'i yon du maN+Dal phul/__gsol ba 'debs pa 'di'i rjes zlos/__byang chub rdo rje sangs rgyas la/__/mchod chen ji ltar stsal ba ltar/__/bdag kyang bskyabs pa'i don gyi phyir/__/nam mkha'i rdo rje deng bdag stsol/__gsum/__slob dpon gyi thugs ka nas 'od zer 'phros gdan gsum tshang ba'i dbang gi lha nam mkha' gang bar spyan drangs pa rnams kyis bkra shis pa'i rnam pa du ma dang ldan pas rin po che'i bum pa bdud rtsi'i chu rgyun gyis gang bas khyed rang rnams la dbang bskur bas dri ma bag chags dang bcas pa gtor zhing sku dang ye shes kyi chos rgyud la blugs pa'i mos pa mdzod/__rnam bum gyis dbang bskur la/__oM:__snod bcud rnam par dag pa'i bum pa ru:__sku gsum bla ma'i dkyil 'khor ma 'dres shar:__'od zhu ye shes bdud rtsis dbang bskur bas:__tha mal snang zhen lha skur dag par shog:__oM hU~M trA~M hrIHAH__badz+ra a mr-i ta ka la sha a b+hi Shiny+tsa oM:__bum chu sbyin/__de ltar phyi mtshan ma'i dkyil 'khor du bum pa'i dbang bskur ba thob/__lus kyi dri ma sbyang*/__bskyed rim dbyibs kyi rnal 'byor bsgom pa la dbang*/__'bras bu sku rdo rje sprul pa'i sku 'grub pa'i skal ba can du byas pa'o/__/slob dpon dkyil 'khor gyi gtso bo pad+ma kun tu 'chang yab yum mnyam par sbyor ba'i bde ba'i sgra dang dga' ba'i 'od zer gyis rgyal ba sras dang bcas pa spyan drangs te thim/__thugs kar byang chub kyi sems su zhu/__yum gyi mkhar babs pa dang thod pa'i bdud rtsi dang ro gcig tu sbyar ba khyed rang la byin pas rtsa khams thams cad khyab/__gsal stong rnam par mi rtog pa'i ye shes rgyud la skyes par mos shig__/thod pa'i bdud rtsi sbyin la/__AH__chos dbyings yum gyi b+han+d+ha yangs pa ru:__rig pa byang sems snyoms 'jug bdud rtsi bskyil:__zag med bde ba'i rgyun gyis dbang bskur bas:__rtsa rlung thig le sngags su rdzogs par shog:__ma hA su kha bo d+hi tsit+ta dz+nyA na a b+hi Sh-iny+tsa AH__de'i rjes 'brel du bzlas pa'i lung sbyin pa yin pas dmigs pa 'di ltar mdzod/__slob dpon dang khyed rang gnyis ka lhar gsal ba'i thugs kar nyi zla'i steng du hU~M yig sngon po re gsal thob/__slob dpon gyi thugs ka'i hU~M mthar sngags kyi phreng bas bskor ba las sngags phreng gnyis pa 'phros/__zhal nas thon khyed rang rnams kyi zhal nas zhugs te snying ga'i hU~M yig mthar 'khod/__bzlas pa'i rkyen gyis 'od zer 'phros rgyal ba mchod cing sems can gyi don byas/__slar 'dus te thim pas byin rlabs dngos grub ma lus pa thob par bsam la rjes zlos/__oM AHhU~M badz+ra gu ru pad+ma sid+d+hi hU~M:__lan gsum/__phreng ba mgrin par bzhag la/__bla ma sku gsum bde gshegs 'dus pa'i gsung gsang sngags kyi byin rlabs ma lus pa 'jug cing brtan par gyur cig__/de ltar nang lus kyi dkyil 'khor du gsang ba'i dbang bskur ba thob/__ngag srog rtsol gyi dri ma sbyang*/__rang lus thabs ldan bsgom pa la dbang*/__'bras bu gsung rdo rje longs sku 'grub pa'i skal ba can du byas pa'o/__/gzugs dang lang tsho'i mdzes pa phul du byung zhing mtshan nyid tshang ba'i las rgya dbyings phyug ma'i ngo bor brlabs te byin par mos shig__/rig tsaka gtad la/__hU~M:__las kyi phyag rgya'i reg bya la brten nas:__dam tshig phyag rgya 'bar ba'i ye shes mes:__chos kyi phyag rgya'i bde ba drangs pa las:__'od gsal phyag rgya chen por smin par shog:__karma mu dra ma hA dz+nyA na a b+hi Shiny+tsa hU~M:__rig ma de dang 'du shes sum ldan gyis snyoms par zhugs pas yas bab rgyu dang mas brtan 'bras bu'i dga' ba bzhi rim gyis nyams su myong ba'i mthar lhan cig skyes pa'i bde chen gyi ye shes mngon tu gyur par mos shig__/de ltar gsang ba b+ha ga'i dkyil 'khor du shes rab ye shes kyi dbang bskur ba thob/__yid thig le'i dri ma sbyang*/__gzhan lus pho nya'i lam bsgom pa la dbang*/__'bras bu thugs rdo rje chos sku 'grub pa'i skal ba can du byas pa'o/__/shel rdo thogs la/__dbyings ka dag gi ngo bo shel ltar dwangs pa la/__rigs gdangs lhun grub kyi rang bzhin 'ja' tshon ltar shar ba/__de gnyis gdod nas dbyer med zung du 'jug pa'i thugs rje'i rang rtsal ma 'gags cir yang snang ba rang rig sku gsum gyi rang bzhin tu rdzogs par ngo shes par mdzod la 'od gsal gnyug ma'i ngang du mnyam par 'jog par zhu/__hoH__dbyings kyi ngo bo stong pa shel ltar dag:__rig pa'i rang mdangs 'ja' tshon bzhin du gsal:__dbyings rig zug 'jug brda yi dbang bskur bas:__don gyi lhan skyes ye shes mngon gyur shog:__d+harmA d+hA tu ma hA dz+nyA na a b+hi Shiny+tsa a a a:__zhes dar gcig mnyam par bzhag__/de ltar rang byung ye shes kyi dkyil 'khor du bzhi pa'i dbang bskur ba thob/__lhan skyes bag chags kyi dri ma sbyang*/___ka dag dang lhun grub kyi lam sgom pa la dbang*/__'bras bu ye shes rdo rje ngo bo nyid kyi sku 'grub pa'i skal ba can du byas pa'o/__/des dbang dngos gzhi grub pa lags/__mtha' rten bkra shis 'chi med tshe'i dbang bskur zhu ba'i yon du maN+Dal phul/__gsol ba 'debs pa 'di'i rjes zlos/__rigs bdag 'chi med pad+ma 'byung :__kun tu 'chang ba dgongs su gsol:__rdo rje sems dpa'i lang tsho dang :__ye shes tshe yi dbang mchog stsol:__lan gsum/__de la thog mar tshe 'gugs shing bcud bsdu ba'i slad du dmigs pa 'di ltar mdzod/__bdag mdun dkyil 'khor pa rnams dang khyed rang rnams kyang bla ma rdo rje 'chang gi skur gsal ba'i thugs ka nas 'od zer lcags kyu'i dbyibs can dpag tu med pa 'phros/__rtsa gsum rgyal ba rab 'byams kyi byin rlabs nus stobs/__'chi med tshe la dbang ba'i rig 'dzin rnams kyi tshe'i dngos grub/__lha klu mi'i dbang po rnams kyi tshe bsod dpal 'byor/__'khor 'das brtan g.yo'i bcud dang dwangs ma/__rang rang gi bla tshe chad nyams yar ba/__'byung po sde brgyad mthu bo ches brkus 'phrog gzhom pa thams cad 'od zer thig le'i rnam par 'ub kyis bsdus te ba spu'i bu ga nas zhugs/__snying ga'i mi shigs pa'i thig le la thim par mos shig__/mda' dar g.yab la dbyangs bcas/__hU~M hrIH__bzhengs shig bla ma bde gshegs rab 'byams tshogs:__chos kyi dbyings las ye shes gzi byin skyed:__sprul pa'i pho nya mgyogs ma las la bskul:__thugs rje'i 'od zer phyogs bcu kun tu spros:__srid gsum gdon bgegs 'byung po'i tshogs rnams kyis:__brkus dang 'phrog dang bzhoms pa'i tshe khug cig:__phyi nang ban bon sngags kyi sbyor ba yis:__byad dang gtad du bcug pa'i tshe khug cig:__brtan g.yo snod bcud 'byung ba rnam pa lnga'i:__dwangs ma stobs su gyur pa'i tshe khug cig:__phyogs bcu'i rtsa gsum rgyal ba rab 'byams kyi:__mkhyen brtse nus pa'i ye shes tshe khug cig:__tshe khug g.yang skyobs srog gi ka ba tshugs:__'chi med rig 'dzin mchog gi dngos grub stsol:__oM AHhU~M badz+ra gu ru pad+ma A yur+dz+nyA na sarba sid+d+hi hU~M:__ces brjod/__tshe 'brang zla gam dmar po dbang gi dbus su tshe bdag pad+ma kun tu 'chang 'khor dang bcas pa mnyam par sbyor ba'i byang sems bdud rtsi'i rgyun khyed rang rnams kyi spyi bo nas zhugs/__lus kyi nang thams cad gang bas skye 'chi'i sgrib pa bag chags dang bcas pa dag__/sku 'gyur ba med pa rdo rje tshe'i dbang mchog dam pa thob par mos shig__/tshe 'brang mgo bor bzhag/__oM:__zla gam dmar gsal 'od kyi bum pa ru:__kun tu 'chang chen mi 'gyur tshe yi bdag:__rig 'dzin mkha' 'gro'i tshogs bcas dgyes rol pas:__'pho med rtag pa tshe yi dbang bskur ro:__kA ya A yur+dz+nyA na a b+hi Shiny+tsa oM:__bde chen dbyings kyi b+han+d+ha'i snod du 'khor 'das brtan g.yo'i dwangs bcud 'chi med ye shes chen po'i bdud rtsir bskyil ba 'di nyid myang bas rtsa khams bde bas khyab/__gsungs 'gags pa med pa rdo rje tshe'i dbang mchog dam pa thob par mos shig__/tshe chang sbyin la/__AH__mkha' dbyings b+han+d+ha bde chen phyag rgya ru:__'khor 'das dwangs bcud ye shes bdud rtsir bskyil:__rtsa khams bde drod 'bar ba'i rdzas mchog gis:__'gag med rdo rje tshe yi dbang bskur ro:__wA ka a yur+dz+nyA na a b+hi Shiny+tsa AH__srid dang zhi ba'i snying po srog gi bcud thams cad mi shigs thig le'i rang bzhin gcig tu 'dril ba 'chi med ril bu mgrin pa nas brgyud/__snying dbus dwangs srog gi thig ler thim pas/__thugs 'pho 'gyur med pa rdo rje tshe'i dbang mchog dam pa thom par mos shig__/tshe ril sbyin la/__hU~M:__mi shigs snying po rang byung thig le ni:__srid dang zhi ba'i srog bcud gcig tu 'dril:__myong grol bde chen dam tshig rdzas mchog gis:__'od gsal gnyug ma tshe yi dbang bskur ro:__tsit+ta A yur+dz+nya na ab+hi Shiny+tsa hU~M:__de ltar dbang bskur bas lus kyi nang bdud rtsi'i bcud kyis gang ba'i dwangs ma thams cad snying gar nyi zla'i gwa 'u'i dbus su srog rten hrIHyig dmar po la thim pas bkrag mdangs 'od du 'bar/__gwa'u kha bsgrigs/__lus thams cad rdo rje'i go khrab kyis gtam/__'chi med tshe la dbang ba'i rig pa 'dzin pa'i dngos grub brnyes/__bar du gcod pa gang gis kyang glags mi rnyed par mos shig__/mda' dar gyis gnas gsum du rgyas gdab la/__AH__snod kyi dwangs ma phung po'i rten la 'dus:__bcud kyi tshe bsod ye shes dbyings su bstim:__mi 'gyur mi shigs gzhom du med pa yi:__rdo rje'i sku gsung thugs su rgyas gdab bo:__badz+ra kA wa tsi rak+Sha a AH__zhes dang rten snying brjod/__me tog 'thor la/__hU~M hrIH__bkra shis gang zhing 'od gsal chos sku'i dbyings:__ye shes gzugs sku'i rnam rol cir yang ston:__bla ma bde gshegs rtsa gsum rab 'byams kyis:__byin rlabs dngos grub char 'bebs bkra shis shog:__de dag gis sprul pa'i gter ston rgya lo tsA'i yang gter bla ma bstan gnyis skor gsum gyi don dbang mtha' rten bcas legs par grub pa yin pas sogs kyis mtshams sbyar la dam tshig khas len/__gtang rag maN+Dal/_lus 'bul/__dge bsngo bya/__gsum pa rjes slob dpon gyis chos gter srung ma'i gtor 'bul dang*/__tshogs byin rlabs nas lhag ma bkra shis bar las byang ltar mthar chags su btang ngo*/__/bla ma'i dkyil 'khor rgyas pa che/__/ngo mtshar lam 'dir yid can kun/__/zhugs nas sku gsum bde blag brnyes/__/bstan gnyis bkod pa spro nus shog__/ces pa 'di'ang khyab bdag gter chen bla ma rin po ches rjes su gnang ba ltar pad+ma gar dbang phrin las 'gro 'dul rtsal gyis rje nyid kyi phyag bzhes nor ba med par dpal spungs yang khrod tsA 'dra rin chen brag gi sgrub gnas su khrigs bkod byas pa dge legs 'phel/__phun tshogs rnam rgyal pas nag mgros su bkod//__//_