JKW-KABAB-06-CHA-034

🚧 This website is under continued development. We appreciate your patience!

Previous Text Back to Volume PageNext Text

མཁའ་འགྲོ་གསང་བ་ཀུན་འདུས་ལས། རྡོ་རྗེ་ཕག་མོའི་གཏོར་དབང༌།

Wylie title	mkha' 'gro gsang ba kun 'dus las rdo rje phag mo'i gtor dbang
Location	mkhyen brtse'i bka' babs Volume 6, Text 34, Pages 443-446 (Folios 1a1 to 2b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཇོ་མོ་སྨན་མོ་, འཇམ་དབྱངས་མཁྱེན་བརྩེའི་དབང་པོ་ (jo mo sman mo, 'jam dbyangs mkhyen brtse'i dbang po)
Associated People	ཡེ་ཤེས་མཚོ་རྒྱལ་ (ye shes mtsho rgyal)
Citation	'jam dbyangs mkhyen brtse'i dbang po. mkha' 'gro gsang ba kun 'dus las rdo rje phag mo'i gtor dbang. In Rdzong sar 'jam dbyangs mkhyen brtse'i dbang po'i bka' babs, Vol. 6: 443-446. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Torma Empowerments - gtor dbang
Cycle	མཁའ་འགྲོ་གསང་བ་ཀུན་འདུས་ (mkha' 'gro gsang ba kun 'dus)
Deity	rdo rje phag mo
Karchag page	JKW-KABAB-Volume-06-CHA-Karchag
RTZ	In the Rinchen Terdzö: https://rtz.tsadra.org/index.php/Terdzo-NGI-070
Colophon	Treasure colophon: མཁའ་འགྲོ་མ་གསང་བ་ཀུན་འདུས་ཀྱི་བྱིན་རླབས་གཏོར་མའི་དབང་བསྐུར་ཨོ་རྒྱན་གྱི་མཁན་པོ་པདྨ་ཐོད་ཕྲེང་རྩལ་གྱིས་གཟུངས་མ་མཁར་ཆེན་མཚོ་རྒྱལ་ལ་རྗེས་སུ་གདམས་ཤིང་གཏད་པ་སྩཽགས་སྩཽགས་སྩཽགས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གུ་ཧྱ༔ ས་མ་ཡ༔ Scribe colophon: ཡེ་ཤེས་མཁའ་འགྲོ་ཇོ་མོ་སྨན་མོའི་ཟབ་ཆོས་སྤྲུལ་པའི་གཏེར་ཆེན་པདྨ་འོད་གསལ་མདོ་སྔགས་གླིང་པ་ལ་ཡང་གཏེར་དུ་བཀའ་བབས་ཏེ་གཏན་ལ་ཕབ་པའི་ཡི་གེ་པ་ནི་སྐལ་ལྡན་པདྨ་གར་དབང་བློ་གྲོས་མཐའ་ཡས་ཀྱིས་གུས་པས་བགྱིས་པ་དགེ་ལེགས་འཕེལ།།
	Treasure colophon: mkha' 'gro ma gsang ba kun 'dus kyi byin rlabs gtor ma'i dbang bskur o rgyan gyi mkhan po pad+ma thod phreng rtsal gyis gzungs ma mkhar chen mtsho rgyal la rjes su gdams shing gtad pa stsaugs stsaugs stsaugs:__sa ma ya:__rgya rgya rgya:___gter rgya:___sbas rgya:__zab rgya:__gu h+ya:__sa ma ya:__ Scribe colophon: ye shes mkha' 'gro jo mo sman mo'i zab chos sprul pa'i gter chen pad+ma 'od gsal mdo sngags gling pa la yang gter du bka' babs te gtan la phab pa'i yi ge pa ni skal ldan pad+ma gar dbang blo gros mtha' yas kyis gus pas bgyis pa dge legs 'phel

Tibetan Text

Wylie

[edit]

༄༅། མཁའ་འགྲོ་གསང་བ་ཀུན་འདུས་ལས༔ རྡོ་རྗེ་ཕག་མོའི་གཏོར་དབང་བཞུགས༔ རྡོ་རྗེ་ཕག་མོ་ལ་ཕྱག་འཚལ་ལོ༔ མཁའ་འགྲོ་མ་གསང་བ་ཀུན་འདུས་ཀྱི་གཏོར་མ་ལ་བརྟེན་ནས་བྱིན་རླབས་དོན་གྱི་དབང་བཞི་བསྐུར་བར་འདོད་ན༔ དུར་ཁྲོད་ལ་སོགས་པའི་གནས་སུ་མཁའ་འགྲོ་འདུ་བའི་དུས་གཉན་གྱི་ཚེ་འབྲུ་སྣའི་ཕྱེ་མ་དང་༔ རིན་ཆེན་སྨན་སྣ་ལ་ཕུག་སོགས་མཁའ་འགྲོ་འདུ་བའི་རྫས་བཏབ༔ བདུད་རྩི་ཆེན་པོས་བྲན༔ མ་ད་ན་བཟང་པོས་བརྫིས་པའི་ཟན་ལས་གཏོར་མ་རི་རབ་བང་རིམ་བཞི་པའི་སྟེང་དུ་མཁའ་འགྲོ་མའི་དཔལ་གཏོར་ཕྲ་ལ་བརྗིད་ཅིང་ཕག་མགོས་མཚན་པ་པད་འདབ་བཞིས་བསྐོར་བ༔ ཕྱོགས་བཞིར་རིགས་བཞིའི་མཁའ་འགྲོ་མའི་དཔལ་གཏོར་ཆུང་ངུ་རེ༔ བང་རིམ་འོག་མ་གསུམ་ལ་ཕྱོགས་མཚམས་བརྒྱད་དུ་འཁོར་ལོ་གསུམ་གྱི་དཔའ་བོ་དཔའ་མོ་ཟུང་འཇུག་གི་གཏོར་ཆུང་ཉེར་བཞི༔ རྩ་བར་ལས་དང་དམ་ཚིག་གི་མཁའ་འགྲོ་མའི་གཏོར་ཆུང་བརྒྱད༔ བར་མཚམས་རྣམས་སུ་ཐེབ་ཀྱུ་གང་མང་དང་༔ ཤ་ཁྲག་འབྲུ་སྨན་སྒོག་བཙོང་ལ་དུ་ལ་ཕུག་མྱོས་བྱེད་སོགས་ཀྱིས་བསྐོར༔ དཀར་གྱིས་ཐིག་གདབ༔ དམར་གྱི་གུར་ཕུབ༔ དར་གདུགས་དང་བྲིས་སྐུས་བརྒྱན་པ་དཀྱིལ་འཁོར་གྱི་དབུས་སུ་བཤམ༔ གཞན་ཡང་སྨན་རག་གཏོར་ཚོགས་ཉེར་སྤྱོད་སོགས་མཆོད་པའི་ཡོ་བྱད་ཀྱིས་བརྒྱན༔ ཕྲིན་ལས་ཀྱི་གཞུང་བསྲངས་ལ་སྒོམ་བཟླས་ནུས་ལྡན་དུ་བསྒྲུབ༔ ཚོགས་དང་གཏོར་མས་མཆོད༔ དེ་ནས་རྒྱུད་དག་པའི་སློབ་མ་ཁྲུས་ནས་དབྱུང་༔ བགེགས་བསྐྲད་ཅིང་མཚམས་གཅད༔ མཎྜལ་ཕུལ་ལ་གསོལ་བ་གདབ་པ་ནི༔ ཧེ་རུ་ཀ་དང་དབྱེར་མེད་པའི༔ སློབ་དཔོན་ཆེན་པོ་བདག་ལ་དགོངས༔ དཔལ་ལྡན་རྡོ་རྗེ་ཁྲོས་མ་ཡི༔ བྱིན་རླབས་དབང་བསྐུར་སྩལ་དུ་གསོལ༔ སྐྱབས་སེམས་དང་སྡོམ་པ་འབོགས༔ སློབ་མ་དམ་ཚིག་པ་རྡོ་རྗེ་ཁྲོས་མའི་སྐུར་བསྐྱེད་པ་ལ་ཡེ་ཤེས་དབབ་ཅིང་བརྟན་པར་བྱས་ནས༔ གཏོར་མ་ཐོགས་ལ༔ གཏོར་སྣོད་དུར་ཁྲོད་རོལ་པའི་གཞལ་མེད་ཁང་ཆེན་པོར་གཏོར་མའི་ངོ་བོ་རྡོ་རྗེ་ཁྲོས་མ་ནག་མོའི་དཀྱིལ་འཁོར་གྱི་ལྷ་ཚོགས་མངོན་སུམ་བཞིན་དུ་གསལ་བ་སློབ་མའི་མདུན་གྱི་ནམ་མཁར་བྱོན་པ་ལ་མོས་གུས་བྱས་པས་ཐུགས་ཀ་ནས་སྤྲུལ་པའི་དཀྱིལ་འཁོར་པ་རྣམས་ཀྱིས་བྱང་ཆུབ་སེམས་ཀྱི་བདུད་རྩིའི་ཆུ་རྒྱུན་གྱིས་སྤྱི་བོ་ནས་དབང་བསྐུར༔ ལུས་ཀྱི་ནང་གང་༔ ནད་གདོན་སྡིག་སྒྲིབ་ཐམས་ཅད་དག༔ བུམ་པའི་དབང་གི་ཡེ་ཤེས་རྒྱུད་ལ་སྐྱེས་པར་མོས་ལ༔ གཏོར་མ་སྤྱི་བོར་བཞག༔ ཨོཾ༔ གཏོར་མའི་རྣམ་པ་ཡེ་ཤེས་མཁའ་འགྲོ་མའི༔ དཀྱིལ་འཁོར་ལྷ་ལས་ནམ་མཁའ་གང་བར་འཕྲོས༔ བྱང་ཆུབ་སེམས་ཀྱི་བདུད་རྩིས་དབང་བསྐུར་བས༔ སྣང་སྟོང་བུམ་པའི་དབང་མཆོག་ཐོབ་པར་ཤོག༔ ཨོཾ་བྃ་བཛྲ་བྷ་རཱ་ཧེ་ཀྲོ་དྷཱི་ཀཱ་ལི་ཧ་རི་ནི་ས་ཨཱ་བེ་ཤ་ཡ་སརྦ་དྷཱ་ཀི་ནཱི་ཀ་ལཱ་ཤ་ཨ་བྷི་ཥིཉྩ་ཨོཾ༔ གཏོར་མའི་ལྷ་ཚོགས་རྣམས་རིགས་ཀྱི་ཡབ་ཧེ་རུ་ཀ་དང་མཉམ་པར་སྦྱོར་བའི་མཁའ་གསང་ནས་བདུད་རྩི་དཀར་དམར་གྱི་རྒྱུན་དཔག་ཏུ་མེད་པ་བབས༔ སློབ་མའི་མགྲིན་པ་ནས་ཞུགས༔ རྩ་ཁམས་ཐམས་ཅད་ལ་ཁྱབ་པས་གསང་བའི་དབང་གི་ཡེ་ཤེས་རྒྱུད་ལ་སྐྱེས་པར་མོས༔ བདུད་རྩི་ཆེན་པོའི་རྒྱུན་གཏོར་མ་ལ་བྲན་པའི་ཞམ་ཆུ་སྦྱིན་ཞིང་༔ གཏོར་མ་མགྲིན་པར་བཞག༔ ཨཱཿ གཏོར་མའི་རིག་རྩལ་དཀྱིལ་འཁོར་ལྷ་ཚོགས་རྣམས༔ སྙོམས་པར་ཞུགས་པའི་དཀར་དམར་བདུད་རྩིའི་རྒྱུན༔ རྩ་ཁམས་ཡི་གེའི་འཁོར་ལོར་ཐིམ་པ་ཡིས༔ གསལ་སྟོང་གསང་བའི་དབང་མཆོག་ཐོབ་པར་ཤོག༔ བོ་དྷི་ཙིཏྟ་ཨ་བྷི་ཥིཉྩ་ཨཱཿ རྗེས་འབྲེལ་བཟླས་ལུང་ཡང་བྱ༔ གཏོར་མའི་ལྷ་ཚོགས་རྣམས་ཀྱི་ཐུགས་ཀ་ནས་བདེ་བའི་ཐིག་ལེ་དྲོད་ཀྱི་རང་བཞིན་ཅན་བྱུང་༔ སློབ་མའི་ཁ་ནས་ཞུགས༔ གནས་བཞིའི་ཐིག་ལེ་ལ་ཐིམ་པས་དགའ་བ་བཞིའི་རང་བཞིན་ཅན་གྱི་དབང་གསུམ་པའི་ཡེ་ཤེས་རྒྱུད་ལ་སྐྱེས་པར་བསམ༔ གཏོར་མའི་མཐར་བསྐོར་ནས་དངོས་གྲུབ་ཀྱི་རྫས་སྦྱིན་ཞིང་སྙིང་གར་བཞག༔ ཧཱུྃ༔ གཏོར་མའི་རང་བཞིན་དཀྱིལ་འཁོར་ལྷ་ཚོགས་ཀྱི༔ ཟག་མེད་དགའ་བ་བཞི་ལྡན་ཐིག་ལེའི་གཟུགས༔ སློབ་མའི་གནས་བཞིར་དབྱེར་མེད་ཐིམ་པ་ཡིས༔ བདེ་སྟོང་ཤེས་རབ་དབང་མཆོག་ཐོབ་པར་ཤོག༔ པྲ་ཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ མཐར་གཏོར་མའི་ལྷ་ཚོགས་ཐམས་ཅད་འོད་དུ་ཞུ༔ སློབ་མ་ལ་ཐིམ༔ ལྷ་ཚོགས་རྣམས་ཀྱི་སྐུ་གསུང་ཐུགས་དང་དབྱེར་མེད་པར་བྱིན་གྱིས་བརླབས༔ དབང་བཞི་པའི་ཡེ་ཤེས་རྒྱུད་ལ་སྐྱེས་པར་བསམས་ལ་གཏོར་མ་སྤྱི་བོར་བཞག༔ ཧྲཱི༔ གཏོར་མའི་ངོ་བོ་གདོད་ནས་སྐྱེ་བ་མེད༔ ཤིན་ཏུ་རྣམ་དག་ཡེ་ཤེས་མཁའ་འགྲོ་མའི༔ གསང་གསུམ་བྱིན་རླབས་ནུས་པ་རྒྱུད་ལ་སྨིན༔ རིག་སྟོང་དོན་གྱི་དབང་མཆོག་ཐོབ་པར་ཤོག༔ དྷརྨ་དྷཱ་ཏུ་ཨ་བྷི་ཥིཉྩ་ཧྲཱིཿ ཞེས་བརྗོད་ཅིང་ཐུགས་ཡིད་བསྲེས་ལ་མཉམ་པར་བཞག༔ དེ་ལྟར་ན་རྡོ་རྗེ་མཁའ་འགྲོ་མ་གཏོར་མའི་དབང་བསྐུར་བ་ལ་བརྟེན་ནས་སྒོ་གསུམ་ཆ་མཉམ་དང་བཅས་པའི་སྡིག་སྒྲིབ་བག་ཆགས་དང་བཅས་པ་དག༔ སྐུ་གསུང་ཐུགས་ཡེ་ཤེས་ཀྱི་བྱིན་རླབས་རྒྱུད་ལ་ཞུགས༔ ལུས་སྣང་སྟོང་༔ རླུང་གསལ་སྟོང་༔ ཐིག་ལེ་བདེ་སྟོང་༔ སེམས་རིག་སྟོང་དུ་ངོ་སྤྲད་པ་ཡིན་པས་ཉམས་སུ་ལོངས་ཤིག༔ སྐུ་བཞི་དབྱེར་མེད་རྗེ་བཙུན་རྡོ་རྗེ་ཕག་མོའི་གོ་འཕང་ཐོབ་པར་འགྱུར་བ་ཡིན་ནོ༔ ཞེས་རྟོག་པ་བསྐྱེད་པས་དབུགས་དབྱུང་༔ བཀྲ་ཤིས་ཀྱི་མེ་ཏོག་འཐོར་བས་མངའ་གསོལ༔ རྗེས་དམ་ཚིག་ཁས་བླངས་པ་སོགས་ཇི་ལྟར་རིགས་པར་བྱའོ༔ དེས་ནི་དབང་བཞི་ཆིག་རྫོགས་སུ་ཐོབ༔ མཁའ་འགྲོ་མའི་བྱིན་རླབས་ཞུགས༔ ཉམས་དང་རྟོགས་པའི་ཡེ་ཤེས་རྩོལ་མེད་དུ་སྐྱེ་བར་འགྱུར་རོ༔ ས་མ་ཡ༔ མཁའ་འགྲོ་མ་གསང་བ་ཀུན་འདུས་ཀྱི་བྱིན་རླབས་གཏོར་མའི་དབང་བསྐུར་ཨོ་རྒྱན་གྱི་མཁན་པོ་པདྨ་ཐོད་ཕྲེང་རྩལ་གྱིས་གཟུངས་མ་མཁར་ཆེན་མཚོ་རྒྱལ་ལ་རྗེས་སུ་གདམས་ཤིང་གཏད་པ་སྩཽགས་སྩཽགས་སྩཽགས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གུ་ཧྱ༔ ས་མ་ཡ༔ ཡེ་ཤེས་མཁའ་འགྲོ་ཇོ་མོ་སྨན་མོའི་ཟབ་ཆོས་སྤྲུལ་པའི་གཏེར་ཆེན་པདྨ་འོད་གསལ་མདོ་སྔགས་གླིང་པ་ལ་ཡང་གཏེར་དུ་བཀའ་བབས་ཏེ་གཏན་ལ་ཕབ་པའི་ཡི་གེ་པ་ནི་སྐལ་ལྡན་པདྨ་གར་དབང་བློ་གྲོས་མཐའ་ཡས་ཀྱིས་གུས་པས་བགྱིས་པ་དགེ་ལེགས་འཕེལ།། །།

[edit]

@#/___mkha' 'gro gsang ba kun 'dus las:__rdo rje phag mo'i gtor dbang bzhugs:___rdo rje phag mo la phyag 'tshal lo:__mkha' 'gro ma gsang ba kun 'dus kyi gtor ma la brten nas byin rlabs don gyi dbang bzhi bskur bar 'dod na:__dur khrod la sogs pa'i gnas su mkha' 'gro 'du ba'i dus gnyan gyi tshe 'bru sna'i phye ma dang :__rin chen sman sna la phug sogs mkha' 'gro 'du ba'i rdzas btab:__bdud rtsi chen pos bran:__ma da na bzang pos brdzis pa'i zan las gtor ma ri rab bang rim bzhi pa'i steng du mkha' 'gro ma'i dpal gtor phra la brjid cing phag mgos mtshan pa pad 'dab bzhis bskor ba:__phyogs bzhir rigs bzhi'i mkha' 'gro ma'i dpal gtor chung ngu re:__bang rim 'og ma gsum la phyogs mtshams brgyad du 'khor lo gsum gyi dpa' bo dpa' mo zung 'jug gi gtor chung nyer bzhi:__rtsa bar las dang dam tshig gi mkha' 'gro ma'i gtor chung brgyad:__bar mtshams rnams su theb kyu gang mang dang :__sha khrag 'bru sman sgog btsong la du la phug myos byed sogs kyis bskor:__dkar gyis thig gdab:__dmar gyi gur phub:__dar gdugs dang bris skus brgyan pa dkyil 'khor gyi dbus su bsham:___gzhan yang sman rag gtor tshogs nyer spyod sogs mchod pa'i yo byad kyis brgyan:__phrin las kyi gzhung bsrangs la sgom bzlas nus ldan du bsgrub:__tshogs dang gtor mas mchod:__de nas rgyud dag pa'i slob ma khrus nas dbyung :__bgegs bskrad cing mtshams gcad:__maN+Dal phul la gsol ba gdab pa ni:__he ru ka dang dbyer med pa'i:__slob dpon chen po bdag la dgongs:__dpal ldan rdo rje khros ma yi:__byin rlabs dbang bskur stsal du gsol:__skyabs sems dang sdom pa 'bogs:__slob ma dam tshig pa rdo rje khros ma'i skur bskyed pa la ye shes dbab cing brtan par byas nas:__gtor ma thogs la:__gtor snod dur khrod rol pa'i gzhal med khang chen por gtor ma'i ngo bo rdo rje khros ma nag mo'i dkyil 'khor gyi lha tshogs mngon sum bzhin du gsal ba slob ma'i mdun gyi nam mkhar byon pa la mos gus byas pas thugs ka nas sprul pa'i dkyil 'khor pa rnams kyis byang chub sems kyi bdud rtsi'i chu rgyun gyis spyi bo nas dbang bskur:__lus kyi nang gang :__nad gdon sdig sgrib thams cad dag:__bum pa'i dbang gi ye shes rgyud la skyes par mos la:__gtor ma spyi bor bzhag:__oM:__gtor ma'i rnam pa ye shes mkha' 'gro ma'i:__dkyil 'khor lha las nam mkha' gang bar 'phros:__byang chub sems kyi bdud rtsis dbang bskur bas:__snang stong bum pa'i dbang mchog thob par shog:__oM ba~M badz+ra b+ha rA he kro d+hI kA li ha ri ni sa A be sha ya sarba d+hA ki nI ka lA sha a b+hi Shiny+tsa oM:__gtor ma'i lha tshogs rnams rigs kyi yab he ru ka dang mnyam par sbyor ba'i mkha' gsang nas bdud rtsi dkar dmar gyi rgyun dpag tu med pa babs:__slob ma'i mgrin pa nas zhugs:__rtsa khams thams cad la khyab pas gsang ba'i dbang gi ye shes rgyud la skyes par mos:__bdud rtsi chen po'i rgyun gtor ma la bran pa'i zham chu sbyin zhing :__gtor ma mgrin par bzhag:__AH__gtor ma'i rig rtsal dkyil 'khor lha tshogs rnams:__snyoms par zhugs pa'i dkar dmar bdud rtsi'i rgyun:__rtsa khams yi ge'i 'khor lor thim pa yis:__gsal stong gsang ba'i dbang mchog thob par shog:__bo d+hi tsit+ta a b+hi Shiny+tsa AH__rjes 'brel bzlas lung yang bya:__gtor ma'i lha tshogs rnams kyi thugs ka nas bde ba'i thig le drod kyi rang bzhin can byung :__slob ma'i kha nas zhugs:___gnas bzhi'i thig le la thim pas dga' ba bzhi'i rang bzhin can gyi dbang gsum pa'i ye shes rgyud la skyes par bsam:__gtor ma'i mthar bskor nas dngos grub kyi rdzas sbyin zhing snying gar bzhag:__hU~M:__gtor ma'i rang bzhin dkyil 'khor lha tshogs kyi:__zag med dga' ba bzhi ldan thig le'i gzugs:__slob ma'i gnas bzhir dbyer med thim pa yis:__bde stong shes rab dbang mchog thob par shog:__pra dz+nyA dz+nyA na a b+hi Shiny+tsa hU~M:__mthar gtor ma'i lha tshogs thams cad 'od du zhu:__slob ma la thim:__lha tshogs rnams kyi sku gsung thugs dang dbyer med par byin gyis brlabs:__dbang bzhi pa'i ye shes rgyud la skyes par bsams la gtor ma spyi bor bzhag:__hrI:__gtor ma'i ngo bo gdod nas skye ba med:__shin tu rnam dag ye shes mkha' 'gro ma'i:__gsang gsum byin rlabs nus pa rgyud la smin:__rig stong don gyi dbang mchog thob par shog:__d+harma d+hA tu a b+hi Shiny+tsa hrIH__zhes brjod cing thugs yid bsres la mnyam par bzhag:__de ltar na rdo rje mkha' 'gro ma gtor ma'i dbang bskur ba la brten nas sgo gsum cha mnyam dang bcas pa'i sdig sgrib bag chags dang bcas pa dag:__sku gsung thugs ye shes kyi byin rlabs rgyud la zhugs:__lus snang stong :__rlung gsal stong :__thig le bde stong :__sems rig stong du ngo sprad pa yin pas nyams su longs shig:__sku bzhi dbyer med rje btsun rdo rje phag mo'i go 'phang thob par 'gyur ba yin no:__zhes rtog pa bskyed pas dbugs dbyung :__bkra shis kyi me tog 'thor bas mnga' gsol:__rjes dam tshig khas blangs pa sogs ji ltar rigs par bya'o:__des ni dbang bzhi chig rdzogs su thob:__mkha' 'gro ma'i byin rlabs zhugs:__nyams dang rtogs pa'i ye shes rtsol med du skye bar 'gyur ro:___sa ma ya:__mkha' 'gro ma gsang ba kun 'dus kyi byin rlabs gtor ma'i dbang bskur o rgyan gyi mkhan po pad+ma thod phreng rtsal gyis gzungs ma mkhar chen mtsho rgyal la rjes su gdams shing gtad pa stsaugs stsaugs stsaugs:__sa ma ya:__rgya rgya rgya:___gter rgya:___sbas rgya:__zab rgya:__gu h+ya:__sa ma ya:__ye shes mkha' 'gro jo mo sman mo'i zab chos sprul pa'i gter chen pad+ma 'od gsal mdo sngags gling pa la yang gter du bka' babs te gtan la phab pa'i yi ge pa ni skal ldan pad+ma gar dbang blo gros mtha' yas kyis gus pas bgyis pa dge legs 'phel//___//