Treasure colophon: de ltar bla ma yi dam gyi:__rnam par sgom pa'i thabs chen po:__thugs sgrub kun gyi mthar thug pa:__bskyed rdzogs dmar byang snying po 'di:__'phags pa dgyes pa'i ri yi sul:__mA ra ti ka'i brag phug tu:__bdag nyid pad+ma badz+ra dang :__tshe lam grogs mchog man+d+ha ras:__'chi med rig 'dzin bsgrubs pa'i tshe:__chos sku kun bzang rdo rje 'chang :__longs sku dpal ldan bde ba'i mchog:__sprul sku lhan skyes rnal 'byor mas:__rang byung gsang ba'i dkyil 'khor du:__dbang bskur byin brlabs gdams pa gtad:__he ru ka dang dbyer med gyur:__de nas gangs can yul dbus su:__mnga' bdag rgyal pos gsol btab ngor:__gdams zab rgyas 'bring gsum du dbye:__rgyas pa srin sbar brag tu sbas:__chos rgyal chen po'i sprul pas 'don:__'bring po ru mtshams byang du sbas:__lo tsA chen po'i skye bas 'don:__snying po'i bcud 'dril rmad byung ba:__da lta mnga' bdag yab sras dang :__bai ro mchog dbyangs bdud 'joms rtsal:__thugs kyi gzungs mar bcas la gdams:__rang rang nyams blangs drod tshad phyung :__brda ris e yis mtshan pa'i yul:__gangs bar rdo rje phug mo che'i:__pha bong dbang phyug mtshan rtags can:__der ni bse yi spar bu ru:__chos dang bstan srung dam rdzas bcas:__mi 'jig phyag rgyas bsdams la sbos:__drug cu kha ral snyigs ma'i dus:__stod smad hor gyi 'khrugs long g.yo:__bod khams rnal du mi gnas tshe:__rgyal ba mchog dbyangs sprul pa ni:__ston pa pad+ma'i ming gis rnyed:__gzhan don cung zad 'byung yang srid:__brda ris yang gter rgyas btab na:__cher snyigs sum cu kha ral dus:__mnga' bdag skye mtha' pad+ma'i ming :__'gro 'dul sgyu ma'i skyes bu la:__ye shes mkha' 'gro'i brdas mtshon te:__dgongs brgyud mngon sum byin brlabs mthus:__tshig brgyud yi ge'i ris su bris:__don brgyud snod ldan 'dus pa la:__smin grol byin rlabs chig rdzogs ston:__las can 'ga' tsam don du 'gyur:__'brel tshad don ldan e ma ho:__sa ma ya:__rgya rgya rgya:__gter rgya:__sbas rgya:__zab rgya:__gsang rgya:__gtad rgya:__man+t+ra gu h+ya sa ma ya:
