བཀའ་སྲུང་ལས་གཤིན་གྱི་གཏོར་ཆོག།

🚧 This website is under continued development. We appreciate your patience!

Previous Text Back to Volume PageNext Text

Wylie title	bka' srung las gshin gyi gtor chog
Location	dil mgo mkhyen brtse bka' 'bum Volume 5, Text 17, Pages 108-110 (Folios 1a1 to 3a6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	Khyentse, Dilgo. Bka' srung las gshin gyi gtor chog. In Skyabs rje dil mgo mkhyen brtse rin po che'i bka' 'bum, Vol. 5: 108-110. Delhi: Shechen Publications, 1994.
Genre	Torma-offering Rituals - gtor chog
Cycle	དག་སྣང་བཀའ་བརྒྱད་རིག་འཛིན་ཞལ་ལུང་ (dag snang bka' brgyad rig 'dzin zhal lung)
Parent Cycle	དག་སྣང་རྒྱ་ཅན་ (dag snang rgya can)
Deity	bka' srung
Colophon	ཅེས་བསྐུལ་ལ་གཏོར་མ་དགྲ་ཕྱོགས་སུ་འཕང༌། སླར་ཡང་མཆོད་ཅིང་བསྟོད་ནས་ནོངས་པ་བཟོད་པར་གསོལ། དམ་ཚིག་ཡེ་ཤེས་གཉིས་མེད་རྟེན་ཡོད་ན་དེ་ལ་བསྟིམ། མེད་ན་ཡེ་ཤེས་པ་གཤེགས་ཤིང་དམ་ཚིག་པ་བདག་ལ་བསྡུ། དགེ་བ་བསྔོ་ཞིང་ཤིས་པ་བརྗོད་པས་མཐའ་རྒྱན་པར་བྱ་བ་རྣམས་ཡིན་ནོ། །འཆི་བདག་ལས་ཀྱི་གཤིན་རྗེའི་གཏོར་ཆོག་གི་རིམ་པའོ།།
	ces bskul la gtor ma dgra phyogs su 'phang*/_slar yang mchod cing bstod nas nongs pa bzod par gsol/_dam tshig ye shes gnyis med rten yod na de la bstim/_med na ye shes pa gshegs shing dam tshig pa bdag la bsdu/_dge ba bsngo zhing shis pa brjod pas mtha' rgyan par bya ba rnams yin no/__/'chi bdag las kyi gshin rje'i gtor chog gi rim pa'o//

Tibetan Text

Wylie

[edit]

༄༅། །བཀའ་སྲུང་ལས་གཤིན་གྱི་གཏོར་ཆོག་ནི། མཆོད་གཏོར་རྣམས་བསང་སྦྱང༌། སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་ཕུང་པོ། ཀླད་ཞག་གི་ལྦུ་འཕྲེང་འཁྲིགས་པ་དམ་ཚིག་ཏུ་མོས་པའི་འདོད་ཡོན་གྱི་རྣམ་པ་མ་ཚང་བ་མེད་པས་ནམ་མཁའ་དང་མཉམ་པར་གང་བ་ངོ་བོ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རང་བཞིན་ཅན་བསམ་གྱིས་མི་ཁྱབ་པས་ནམ་མཁའི་ཁམས་གང་བར་གྱུར། ཨོཾ་ཨཱཿཧཱུྃ་ཧོཿ ལན་གསུམ་གྱིས་བྱིན་གྱིས་བརླབས། རང་ཉིད་འཇམ་དཔལ་གཤིན་རྗེའི་གཤེད་དུ་གསལ་བའི་མདུན་དུ་གཤིན་རྗེའི་ཞིང་ཁམས་འཇིགས་སུ་རུང་བའི་དབུས་སུ་ཐོད་མཁར་སྲིད་པའི་རྩེ་མོར་སླེབས་པ། ཁྲག་ཞག་བབས་པའི་ནང་དུ་དབུས་སུ་འཁོར་ལོ་རྩིབས་བརྒྱད་པ་ལྟེ་བར་པད་ཉིའི་སྟེང་དུ་དགྲ་བོ་གན་རྐྱལ་ཁ་སྦུབ་ཏུ་བརྫིས་པས་མ་ཧེའི་སྟེང་དུ་ཡ་ལས་གཤིན་རྗེ་བྷེ་བ་ས་ཏྭ་ནག་པོ་ཤིན་ཏུ་ཁྲོས་ཤིང་སྤྱན་གསུམ་པ་ཞལ་གདངས་པ་ལས་མེ་འབར་ཞིང་ཁ་ནས་ཁྲག་འཛག་པ། མཆེ་བ་གཙིགས་ཤིང་ལྗགས་གློག་ལྟར་འཁྱུགས་པ་དབུ་སྐྲ་སྨིན་མ་སྨ་ར་དམར་སེར་འབར་བ། གཡས་བེ་ཅོན་འཕྱར་ཞིང་གཡོན་གནམ་ལྕགས་ཀྱི་འཁོར་ལོ་བསྐོར་བ། མི་ལྤགས་ཀྱི་སྟོད་གཡོག་དང་སྟག་ལྤགས་ཀྱི་ཤམ་ཐབས་ཅན། རུས་པའི་རྒྱན་དྲུག །རྒྱུ་མ། དུག་སྦྲུལ། ཁྲག་གི་ཐིག་ལེས་བརྒྱན་པ་ཞབས་གཉིས་མ་ཧེ་ལ་ཞོན་ནས་སྟོང་གསུམ་ཉུལ་བ། གཡོན་དུ་བྷྱོཿལས་ཡུམ་གཏུམ་མོ་དུག་ཧྲུལ་མ་ནག་མོ་ཤིན་ཏུ་ཁྲོས་ཤིང་གྲི་གུག་དང་ཐོད་ཁྲག་འཛིན་པ་ལས་ཀྱི་རླུང་དམར་ལ་ཞོན་པ། གཉིས་ཀའང་མེ་འབར་བའི་དབུས་ན་བཞུགས་པ། དེའི་ཕྱི་རོལ་དུ་གཤེད་ཆེན་སྡེ་བཞི་འཆི་བདག་བཅུ་གཉིས་དྲེགས་པའི་དམག་ཚོགས་ཀྱིས་བསྐོར་བ། དེ་ཐམས་ཅད་ཀྱི་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ། ཧཱུྃ་ལས་འོད་ཟེར་རྣོན་པོ་ལྕགས་ཀྱུ་ལྟ་བུ་འཕྲོས་པས། ལྷོ་ཕྱོགས་རིམ་པ་བདུན་གྱིས་འོག་ནས་འཆི་བདག་གཤིན་རྗེའི་རྒྱལ་པོ་འཁོར་དང་བཅས་པ་སྐད་ཅིག་གིས་ལྷགས་པར་གྱུར་བར་བསམ་ཞིང༌། སྤྱན་དྲངས་པ་ནི། ཧཱུྃ། ལྷོ་ཕྱོགས་གཤིན་རྗེའི་འཇིག་རྟེན་གྱི༔ འཇིགས་སུ་རུང་བ་མུན་པའི་ཀློང༔ དྲེགས་པ་ཀུན་གྱི་ཤན་ཁང་ནས༔ ལས་བྱེད་གཤིན་རྗེའི་འཁོར་དང་བཅས༔ བདག་གི་དད་པས་སྤྱན་འདྲེན་ན༔ སྔོན་གྱི་ཁས་བླངས་དམ་བཅའ་བཞིན༔ མ་ཐོགས་རིངས་པའི་ཚུལ་གྱིས་ནི༔ དགྲ་བགེགས་འདུལ་ཕྱིར་གཤེགས་སུ་གསོལ༔ ཨེ་ཡ་མ་རཱ་ཛ་ས་པ་རི་ཝ་ར་བཛྲ་ས་མཱ་ཛ་ཛཿཧཱུྃ་བྃ་ཧོཿ ཞེས་པས་སྤྱན་དྲངས་ལ། དམ་བཞག་ནི་རྡོ་རྗེ་སྤྱི་བོར་བཞག་དམ་ཆུ་ལྗགས་ལ་བྱིན་པར་མོས་ཏེ། ཧཱུྃ། སྔོན་ཚེ་འཇམ་དཔལ་གཤིན་རྗེ་ཡི༔ སྤྱན་སྔར་ཞལ་བཞེས་དམ་བཅས་ལྟར༔ བཅོལ་བའི་ལས་རྣམས་སྒྲུབ་པར་མཛོད༔ གལ་ཏེ་དམ་ལས་འདས་པ་ན༔ དུས་གསུམ་རྒྱལ་བའི་བཀའི་ཆད་པས༔ ཁྱོད་ཀྱང་ཉམས་པར་གདོན་མི་ཟ༔ ཨེ་ཡ་མ་རཱ་ཛ་ས་མ་ཡ་རཀྴ་ཧཱུྃ་ཞེས་དམ་ལ་བཞག །མཆོད་གཏོར་འབུལ་བ་ནི། ཧཱུྃ། ལས་མཛད་གཤིན་རྗེ་འཁོར་བཅས་ལ༔ གདུག་པའི་དགྲ་བགེགས་བསྒྲལ་བ་ཡི༔ དམར་ཆེན་ཁྲག་དང་དབང་པོ་ལྔ༔ ཚིལ་ཆེན་གསུར་དུད་ཞུན་ཆེན་མེ༔ མཁྲིས་ཆེན་བདུད་རྩི་སྨན་གྱི་བཅུད༔ ཤ་ཁྲག་དམར་གྱི་གཏོར་མ་སོགས༔ འདོད་ཡོན་ལོངས་སྤྱོད་བསམ་མི་ཁྱབ༔ བདག་ཅག་དད་པས་འབུལ་ལགས་ན༔ བསྟན་པ་བསྲུང་ཕྱིར་བཞེས་སུ་གསོལ༔ ཨོཾ་ཡ་མ་རཱ་ཛ་ས་པ་རི་ཝཱ་ར་ཨརྒྷཾ་ནས་ཤཔྟའི་བར་དང༌། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་པཱུ་ཛ་ཁཱ་ཧི། ཞེས་འབུལ། བསྟོད་པ་ནི། ཧཱུྃ། ཁྲག་འཐུང་གཤིན་རྗེ་གཤེད་པོ་ཡི༔ བཀའ་ཉན་འཇིགས་བྱེད་མ་རུང་པ༔ ཁམས་གསུམ་སྐྱེ་འགྲོའི་སྲོག་གི་བདག༔ རྫུ་འཕྲུལ་ཆེ་ཞིང་མཐུ་དང་ལྡན༔ བསྟན་པ་སྲུང་མཛད་དམ་ཚིག་ཅན༔ ཉམས་པ་སྒྲོལ་བའི་གཤེད་པོ་ཆེ༔ དགེ་སྡིག་ཤན་འབྱེད་དཔའ་བོ་མཛད༔ རྡོ་རྗེ་འཛིན་པའི་ཕོ་ཉ་བ༔ ལས་མཛད་ནག་པོ་ཁྱོད་ལ་བསྟོད༔ གཏུམ་དྲག་བཟོད་པར་དཀའ་བའི་གཟུགས༔ དབྱུག་པ་ཕྱར་ཞིང་ཐོད་ཁྲག་འཛིན༔ དུར་ཁྲོད་འཇིགས་པའི་ཆས་ཀྱིས་བརྒྱན༔ དྲག་ཤུལ་ཆེན་པོའི་གར་སྟབས་ཀྱིས༔ སྲིན་གྱི་མ་ཧེ་ཁྲོས་པ་བརྫིས༔ ཡུམ་ཆེན་གཏུམ་མོ་དུག་ཧྲུལ་མ༔ བཀའ་ཉན་ཕོ་བརྒྱད་མོ་བརྒྱད་སོགས༔ ལས་བྱེད་གཤིན་རྗེའི་ཚོགས་ཀྱིས་བསྐོར༔ ས་གསུམ་ཀུན་ལ་མངའ་མཛད་པའི༔ དྲག་ཤུལ་ཆེན་པོ་ཁྱོད་ལ་བསྟོད༔ བཟླས་པ་ནི། ལས་གཤིན་གྱི་ཐུགས་ཀར་ཉི་མ་ལ་གནས་པའི་ཡཿཡིག་གི་མཐར་སྲོག་སྔགས་ཀྱི་ཕྲེང་བས་བསྐོར་བ་བདག་གི་ཐུགས་ཀའི་འོད་ཀྱིས་བསྐུལ་བས་ཅི་འདོད་པའི་ལས་རབ་འབྱམས་ཐོགས་མེད་དུ་སྒྲུབ་པར་བསམ་ལ། ཨོཾ་ཡ་མ་རཱ་ཛ་ས་མ་ཡ་ཧཱུྃ་ཕཊ། ཅེས་བཟླས་པ་ཅི་ནུས་བྱས་ལ་དྲག་པོར་བསྐུལ་བ་ནི། ཀྱེཿ འཇམ་དཔལ་བཀའ་ཉན་དྲེགས་པའི་གཙོ༔ འཆི་བདག་ནག་པོ་གཤིན་རྗེ་གཤེད༔ ཡུམ་ནི་གཏུམ་མོ་འཇིགས་བྱེད་མ༔ བཀའ་ཉན་ཕོ་བརྒྱད་མོ་བརྒྱད་སོགས༔ སྣང་སྲིད་དྲེགས་པའི་ཚོགས་དང་བཅས༔ དུས་ལ་བབ་བོ་མཐུ་རྩལ་བསྐྱེད༔ ཁྱེད་ཀྱི་ནུས་པ་གློག་ལྟར་འཁྱུག༔ ཤུགས་ནི་ནམ་མཁའི་ཐོག་ལས་ཆེ༔ དྲག་རྩལ་རི་རབ་ཀླད་ལ་བསྐོར༔ རྫུ་འཕྲུལ་སྣ་ཚོགས་ཅིར་ཡང་བསྒྱུར༔ ཤ་ཁྲག་གཏོར་མ་འདི་བཞེས་ལ༔ ཁྱེད་ཀྱི་ཐུགས་དམ་དུས་ལ་བབས༔ སྡང་བའི་དགྲ་བོ་སོད་ལ་ཤོག༔ བདུད་བརྒྱུད་རྩད་ནས་ཆོད་ལ་ཤོག༔ ལེགས་པའི་བྱ་བ་གཤོལ་ལ་ཤོག༔ ཉེས་པའི་བྱ་བ་བསྐུལ་ལ་ཤོག༔ གནམ་གྱི་འཇུ་ཐག་ཆོད་ལ་ཤོག༔ ས་ཡི་རྟེན་ཕུར་ཕྱུངས་ལ་ཤོག༔ གདུག་པའི་དཔུང་ཚོགས་འཇོམས་པར་མཛོད༔ ཅེས་བསྐུལ་ལ་གཏོར་མ་དགྲ་ཕྱོགས་སུ་འཕང༌། སླར་ཡང་མཆོད་ཅིང་བསྟོད་ནས་ནོངས་པ་བཟོད་པར་གསོལ། དམ་ཚིག་ཡེ་ཤེས་གཉིས་མེད་རྟེན་ཡོད་ན་དེ་ལ་བསྟིམ། མེད་ན་ཡེ་ཤེས་པ་གཤེགས་ཤིང་དམ་ཚིག་པ་བདག་ལ་བསྡུ། དགེ་བ་བསྔོ་ཞིང་ཤིས་པ་བརྗོད་པས་མཐའ་རྒྱན་པར་བྱ་བ་རྣམས་ཡིན་ནོ། །འཆི་བདག་ལས་ཀྱི་གཤིན་རྗེའི་གཏོར་ཆོག་གི་རིམ་པའོ།། །།

[edit]

@#/__/bka' srung las gshin gyi gtor chog ni/_mchod gtor rnams bsang sbyang*/_stong pa'i ngang las gtor snod dmar gyi dung chen yangs shing rgya che ba'i nang du gtor rdzas dgra bgegs bsgral ba las byung ba'i sha yi ri bo/_khrag gi rgya mtsho/_rus pa'i phung po/_klad zhag gi lbu 'phreng 'khrigs pa dam tshig tu mos pa'i 'dod yon gyi rnam pa ma tshang ba med pas nam mkha' dang mnyam par gang ba ngo bo zag pa med pa'i ye shes kyi bdud rtsi'i rang bzhin can bsam gyis mi khyab pas nam mkha'i khams gang bar gyur/_oM AHhU~M hoH_lan gsum gyis byin gyis brlabs/_rang nyid 'jam dpal gshin rje'i gshed du gsal ba'i mdun du gshin rje'i zhing khams 'jigs su rung ba'i dbus su thod mkhar srid pa'i rtse mor slebs pa/_khrag zhag babs pa'i nang du dbus su 'khor lo rtsibs brgyad pa lte bar pad nyi'i steng du dgra bo gan rkyal kha sbub tu brdzis pas ma he'i steng du ya las gshin rje b+he ba sa twa nag po shin tu khros shing spyan gsum pa zhal gdangs pa las me 'bar zhing kha nas khrag 'dzag pa/_mche ba gtsigs shing ljags glog ltar 'khyugs pa dbu skra smin ma sma ra dmar ser 'bar ba/_g.yas be con 'phyar zhing g.yon gnam lcags kyi 'khor lo bskor ba/_mi lpags kyi stod g.yog dang stag lpags kyi sham thabs can/_rus pa'i rgyan drug_/rgyu ma/_dug sbrul/_khrag gi thig les brgyan pa zhabs gnyis ma he la zhon nas stong gsum nyul ba/_g.yon du b+h+yoHlas yum gtum mo dug hrul ma nag mo shin tu khros shing gri gug dang thod khrag 'dzin pa las kyi rlung dmar la zhon pa/_gnyis ka'ang me 'bar ba'i dbus na bzhugs pa/_de'i phyi rol du gshed chen sde bzhi 'chi bdag bcu gnyis dregs pa'i dmag tshogs kyis bskor ba/_de thams cad kyi spyi bor oM/_mgrin par AH_snying gar hU~M/_hU~M las 'od zer rnon po lcags kyu lta bu 'phros pas/_lho phyogs rim pa bdun gyis 'og nas 'chi bdag gshin rje'i rgyal po 'khor dang bcas pa skad cig gis lhags par gyur bar bsam zhing*/_spyan drangs pa ni/_hU~M/_lho phyogs gshin rje'i 'jig rten gyi:_'jigs su rung ba mun pa'i klong:_dregs pa kun gyi shan khang nas:_las byed gshin rje'i 'khor dang bcas:_bdag gi dad pas spyan 'dren na:_sngon gyi khas blangs dam bca' bzhin:_ma thogs rings pa'i tshul gyis ni:_dgra bgegs 'dul phyir gshegs su gsol:_e ya ma rA dza sa pa ri wa ra badz+ra sa mA dza dzaHhU~M ba~M hoH_zhes pas spyan drangs la/_dam bzhag ni rdo rje spyi bor bzhag dam chu ljags la byin par mos te/_hU~M/_sngon tshe 'jam dpal gshin rje yi:_spyan sngar zhal bzhes dam bcas ltar:_bcol ba'i las rnams sgrub par mdzod:_gal te dam las 'das pa na:_dus gsum rgyal ba'i bka'i chad pas:_khyod kyang nyams par gdon mi za:_e ya ma rA dza sa ma ya rak+sha hU~M zhes dam la bzhag_/mchod gtor 'bul ba ni/_hU~M/_las mdzad gshin rje 'khor bcas la:_gdug pa'i dgra bgegs bsgral ba yi:_dmar chen khrag dang dbang po lnga:_tshil chen gsur dud zhun chen me:_mkhris chen bdud rtsi sman gyi bcud:_sha khrag dmar gyi gtor ma sogs:_'dod yon longs spyod bsam mi khyab:_bdag cag dad pas 'bul lags na:_bstan pa bsrung phyir bzhes su gsol:_oM ya ma rA dza sa pa ri wA ra ar+g+haM nas shap+ta'i bar dang*/_ma hA pany+tsa a mr-i ta khA hi/_ma hA rak+ta pU dza khA hi/_zhes 'bul/_bstod pa ni/_hU~M/_khrag 'thung gshin rje gshed po yi:_bka' nyan 'jigs byed ma rung pa:_khams gsum skye 'gro'i srog gi bdag:_rdzu 'phrul che zhing mthu dang ldan:_bstan pa srung mdzad dam tshig can:_nyams pa sgrol ba'i gshed po che:_dge sdig shan 'byed dpa' bo mdzad:_rdo rje 'dzin pa'i pho nya ba:_las mdzad nag po khyod la bstod:_gtum drag bzod par dka' ba'i gzugs:_dbyug pa phyar zhing thod khrag 'dzin:_dur khrod 'jigs pa'i chas kyis brgyan:_drag shul chen po'i gar stabs kyis:_srin gyi ma he khros pa brdzis:_yum chen gtum mo dug hrul ma:_bka' nyan pho brgyad mo brgyad sogs:_las byed gshin rje'i tshogs kyis bskor:_sa gsum kun la mnga' mdzad pa'i:_drag shul chen po khyod la bstod:_bzlas pa ni/_las gshin gyi thugs kar nyi ma la gnas pa'i yaHyig gi mthar srog sngags kyi phreng bas bskor ba bdag gi thugs ka'i 'od kyis bskul bas ci 'dod pa'i las rab 'byams thogs med du sgrub par bsam la/_oM ya ma rA dza sa ma ya hU~M phaT/_ces bzlas pa ci nus byas la drag por bskul ba ni/_kyeH_'jam dpal bka' nyan dregs pa'i gtso:_'chi bdag nag po gshin rje gshed:_yum ni gtum mo 'jigs byed ma:_bka' nyan pho brgyad mo brgyad sogs:_snang srid dregs pa'i tshogs dang bcas:_dus la bab bo mthu rtsal bskyed:_khyed kyi nus pa glog ltar 'khyug:_shugs ni nam mkha'i thog las che:_drag rtsal ri rab klad la bskor:_rdzu 'phrul sna tshogs cir yang bsgyur:_sha khrag gtor ma 'di bzhes la:_khyed kyi thugs dam dus la babs:_sdang ba'i dgra bo sod la shog:_bdud brgyud rtsad nas chod la shog:_legs pa'i bya ba gshol la shog:_nyes pa'i bya ba bskul la shog:_gnam gyi 'ju thag chod la shog:_sa yi rten phur phyungs la shog:_gdug pa'i dpung tshogs 'joms par mdzod:_ces bskul la gtor ma dgra phyogs su 'phang*/_slar yang mchod cing bstod nas nongs pa bzod par gsol/_dam tshig ye shes gnyis med rten yod na de la bstim/_med na ye shes pa gshegs shing dam tshig pa bdag la bsdu/_dge ba bsngo zhing shis pa brjod pas mtha' rgyan par bya ba rnams yin no/__/'chi bdag las kyi gshin rje'i gtor chog gi rim pa'o//__//