DKR-KABUM-18-TSHA-003

🚧 This website is under continued development. We appreciate your patience!

Previous Text Back to Volume PageNext Text

རྒྱལ་བ་ལྷ་བཙུན་ཆེན་པོར་བསྔགས་པ་ཟབ་དོན་རྡོ་རྗེའི་རྒྱུད་མང་།

Wylie title	rgyal ba lha btsun chen por bsngags pa zab don rdo rje'i rgyud mang
Location	dil mgo mkhyen brtse bka' 'bum Volume 18, Text 3, Pages 13-14 (Folios 1a1 to 2b4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	ལྷ་བཙུན་ནམ་མཁའ་འཇིགས་མེད་ (lha btsun nam mkha' 'jigs med)
Citation	Khyentse, Dilgo. Rgyal ba lha btsun chen por bsngags pa zab don rdo rje'i rgyud mang. In Skyabs rje dil mgo mkhyen brtse rin po che'i bka' 'bum, Vol. 18: 13-14. Delhi: Shechen Publications, 1994.
Genre	Verses of Praise - bstod pa
Cycle	རིག་འཛིན་ཌཱ་ཀིའི་སྲོག་ཏིག་རྡོ་རྗེ་སྙིང་པོ་དོན་གྱི་ཐོལ་གླུ་ (rig 'dzin da ki'i srog tig rdo rje snying po don gyi thol glu)
Colophon	།མངྒ་ལས་སོ།
	/mang+ga las so/

Tibetan Text

Wylie

[edit]

རྒྱལ་བ་ལྷ་བཙུན་ཆེན་པོར་བསྔགས་པ་ཟབ་དོན་རྡོ་རྗེའི་རྒྱུད་མང་ཞེས་བྱ་བ་བཞུགས། ཆོས་དབྱིངས་ནམ་མཁའ་ལྟ་བུའི་ཡེ་ཤེས་ཀྱི། །དགོངས་ཀློང་རྩལ་རྫོགས་སྒྲིབ་བྲལ་རྡོ་རྗེའི་མཚོན། །སྲིད་ཞིའི་འཇིགས་མེད་དཔའ་ཆེན་ཧེ་རུ་ཀས། །བདག་བློ་ཡེ་ཤེས་འཆར་བའི་ཕོ་ཉ་མཛོད། །ཚུལ་གནས་ཐོས་བསམ་སྒོམ་པའི་ཡོན་ཏན་གྱིས། །རྒྱལ་བསྟན་རིན་ཆེན་བང་མཛོད་ཁེངས་བྱས་ནས། །འཁྲུལ་མེད་རྒྱལ་བ་དགྱེས་པའི་རྣམ་ཐར་གྱིས། །གངས་ཅན་མཛེས་པར་མཛད་ལ་དྭངས་བས་བསྔགས། །ཁྱད་པར་ལྷན་སྐྱེས་ཡེ་ཤེས་ཉི་མའི་གཟི། །སྨིན་གྲོལ་ནུས་པས་འཁྲུལ་རྟོག་སྦུབས་བརྟོལ་ཏེ། །རྡོ་རྗེ་ཐེག་པའི་སྤང་རྟོགས་སྣང་བ་བརྒྱས། །ཕྱོགས་དུས་ཞིང་མཐར་བརྡལ་ལ་ཁྱེད་མཚུངས་སུ། །ཚོགས་བརྒྱད་རུ་ཏྲ་བསྒྲལ་བའི་དུར་ཁྲོད་དུ། །རྡོ་རྗེའི་བརྟུལ་ཞུགས་གྲུབ་པའི་ཟིལ་ཆེན་པོས། །འབུམ་ཕྲག་ཌཱ་ཀིའི་ཚོགས་དང་དགྱེས་རོལ་པ། །གངས་ཅན་གྲུབ་བརྒྱའི་དབུས་ན་ཁྱོད་གཅིག་བསྔགས། །འདིར་སྣང་སྒྱུ་མར་གཟིགས་པའི་རྣལ་འབྱོར་ཡང༌། །ཆོས་བརྒྱད་ཐོག་བརྫིས་བཏང་བའི་རོ་སྙོམས་ཀྱིས། །ངེས་མེད་གནས་ཡུལ་དུར་ཁྲོད་ཐམས་ཅད་དུ། །སྐྱིད་སྡུག་མཉམ་ཡངས་ཆེན་པོས་གཤེགས་ལ་བསྟོད། །རི་བྲག་གངས་ལྗོངས་ནགས་ཁྲོད་དབེན་པ་རུ། །སྣང་བཞིའི་གཟིགས་མོར་ཡེངས་པའི་ངང་ཚུལ་གྱིས། །གདོས་བཅས་འོད་དེངས་སྣོད་བཅུད་འོད་གསལ་ཆེ། །སྒྲོན་དྲུག་དཀྱིལ་འཁོར་རྫོགས་པའི་དཔའ་བོར་བསྟོད། །དང་པོའི་སངས་རྒྱས་ཀུན་མཁྱེན་བླ་མ་རྗེའི། །རྒྱལ་ཐབས་སྤྱི་བླུགས་དགོངས་བརྒྱུད་དབང་བསྐུར་བས། །ཆོས་ཟད་གདོད་མའི་གྲོལ་གཞིར་འུབ་ཆུབ་པའི། །ཁྱབ་བརྡལ་དགོངས་པ་མཉམ་རྗེས་གྲོལ་ལ་འདུད། །རྩ་ཁམས་འོད་དུ་དེངས་པའི་ཡེ་ཤེས་རླུང༌། །རྡོ་རྗེ་ནཱ་དའི་རྒྱུད་མང་ཐོལ་བྱུང་གིས། །འོད་གསལ་གདོད་མའི་གསེང་ལམ་མཛུབ་ཚུགས་སུ། །བསྟན་པའི་ཡེ་ཤེས་རོལ་མོ་འཁྲོལ་ལ་བསྟོད། །དུས་ཀྱི་ཐ་མ་གངས་ཅན་བསྟན་འགྲོའི་དཔལ། །ཉམས་ཚེ་རང་བྱུང་གདོད་ནས་གྲུབ་པའི་གནས། །སྦས་ལུང་རིན་ཆེན་གསང་བའི་སྒོ་ཕྱེ་ནས། །གདུལ་བྱ་དབུགས་དབྱུང་མཛད་ལ་གསོལ་བ་འདེབས། །སྣང་སེམས་སྒྱུ་མར་རྟོག་པའི་རྫུ་འཕྲུལ་དང༌། །ཁྱབ་བརྡལ་ཆོས་སྐུའི་དགོངས་པ་མཁའ་མཉམ་པས། །གྲོལ་བ་དྲུག་ལྡན་ཀུན་བཟང་གདོད་མའི་ལམ། །འཕགས་བོད་ཡུལ་གྲུར་བསྟན་ལ་མཚུངས་ཟླ་བྲལ། །པཎ་གྲུབ་ལྔ་བརྒྱའི་རྣམ་དཔྱོད་ལྷ་དབང་གཙུག །ཞབས་སེན་ནོར་བུའི་གཟི་འབར་བི་མ་ལ། །བསམ་བཞིན་བྱོན་པའི་གྲགས་པ་དོན་ལྡན་ལ། །ཡིད་ཆེས་བསྟོད་པའི་བཀུར་སྟིས་ཅིས་མི་བསྙེན། །ཀུན་རྟོག་རྦ་རླབས་རབ་འཁྲུགས་ཡིད་ཀྱི་རྫིང༌། །འཁྲུལ་སྣང་རྙོགས་པས་དྲི་ང་བྱས་པ་ལ། །དག་ཆེན་ཡེ་ཤེས་ཀེ་ཏ་ཀ་ཆེན་པོ། །རང་གྲོལ་དགོངས་པའི་དབང་མཆོག་ད་ལྟ་སྩོལ། །བློས་བྱས་ཡིད་དཔྱོད་འཆིང་བའི་ཞགས་པ་བརྒྱས། །གནས་ངན་སྡིག་ཏོའི་གཡང་སར་བཅིངས་པ་གང༌། །མགོན་ཁྱོད་དགོངས་རྒྱུད་རལ་གྲིས་མ་བཅད་ན། །སྡུག་བསྔལ་རྦ་ལ་གཡེངས་འདི་སུས་སྒྲོལ་ནུས། །དེ་ཕྱིར་དད་དང་གུས་པའི་ཆུ་བའི་རྩེར། །བསྟོད་པའི་མེ་ཏོག་ཕྲ་མོ་མཛེས་བྱས་པར། །ཡེ་ཤེས་ཉིན་བྱེད་གཟིགས་པའི་ཟེར་ལྷུང་བས། །ཆོས་ཉིད་དབྱིངས་ཀྱི་དགོངས་པ་མངོན་གྱུར་མཛོད། །བདག་བློའི་ཐོག་མེད་མུན་སྤྲུལ་སྟུག་པོ་ཡང༌། །མགོན་ཁྱོད་དགྱེས་པའི་སྐྱ་རེངས་ཀྱིས་བསལ་ནས། །ཐེག་མཆོག་ལྟ་སྒོམ་སྤྱོད་འབྲས་སྣང་བའི་ཚོགས། །མངོན་སུམ་སྤྱོད་པའི་སྐལ་པ་དགེ་གྱུར་ཅིག །ཚེ་རབས་ཀུན་ཏུ་ཚེ་འདིའི་འཆིང་གྲོལ་ཏེ། །རོ་སྙོམས་སྤྱོད་པ་མུ་ཏོའི་བརྟུལ་ཞུགས་ཀྱིས། །ངེས་དོན་བཤད་སྒྲུབ་བསྟན་པའི་བྱ་བ་ཡིས། །ཐེག་མཆོག་སྙིང་པོའི་གྲོང་དུ་འཇུག་གྱུར་ཅིག །མགོན་ཁྱོད་དགོངས་བརྒྱུད་སྙིང་གི་དབུས་སིམས་པས། །སྣང་སྤྱོད་སྒྱུ་མས་བསྟན་འགྲོའི་དོན་བྱེད་ཅིང༌། །ཀློང་ཆེན་ནམ་མཁའི་རྣལ་འབྱོར་འཇིགས་མེད་པའི། །རྣམ་ཐར་བདག་གིར་བྱེད་པའི་སྐལ་ལྡན་ཤོག །དེ་སྐད་ཁྱོད་ཀྱི་ཡེ་ཤེས་སྒྱུ་མ་ཡི། །རྡོ་རྗེའི་གསུང་གསང་མཐོང་བས་ཉེར་བསྐུལ་ཏེ། །ཚིགས་སུ་བཅད་པའི་བསྟོད་ཕྲེང་འདི་དག་ཀྱང༌། །འཁོས་ཆུང་མངྒ་ལ་ཡིས་བྲིས་ནས་སོང༌། །ཚུལ་དེ་ཚིག་གི་སྦྱོར་བ་ཆེས་ཕྲ་ཡང༌། །བཅོས་མིན་མོས་གུས་ཆུ་གཏེར་ཆེར་གཡོ་བའི། །ནུས་པས་ཁྱོད་ཐུགས་བསྐུལ་ཏེ་བྱིན་སྣང་གི །ཉིན་བྱེད་སྙིང་གི་པདྨོར་འཕོ་གྱུར་ཅིག །མངྒ་ལས་སོ།

[edit]

rgyal ba lha btsun chen por bsngags pa zab don rdo rje'i rgyud mang zhes bya ba bzhugs/_chos dbyings nam mkha' lta bu'i ye shes kyi/_/dgongs klong rtsal rdzogs sgrib bral rdo rje'i mtshon/_/srid zhi'i 'jigs med dpa' chen he ru kas/_/bdag blo ye shes 'char ba'i pho nya mdzod/_/tshul gnas thos bsam sgom pa'i yon tan gyis/_/rgyal bstan rin chen bang mdzod khengs byas nas/_/'khrul med rgyal ba dgyes pa'i rnam thar gyis/_/gangs can mdzes par mdzad la dwangs bas bsngags/_/khyad par lhan skyes ye shes nyi ma'i gzi/_/smin grol nus pas 'khrul rtog sbubs brtol te/_/rdo rje theg pa'i spang rtogs snang ba brgyas/_/phyogs dus zhing mthar brdal la khyed mtshungs su/_/tshogs brgyad ru tra bsgral ba'i dur khrod du/_/rdo rje'i brtul zhugs grub pa'i zil chen pos/_/'bum phrag DA ki'i tshogs dang dgyes rol pa/_/gangs can grub brgya'i dbus na khyod gcig bsngags/_/'dir snang sgyu mar gzigs pa'i rnal 'byor yang*/_/chos brgyad thog brdzis btang ba'i ro snyoms kyis/_/nges med gnas yul dur khrod thams cad du/_/skyid sdug mnyam yangs chen pos gshegs la bstod/_/ri brag gangs ljongs nags khrod dben pa ru/_/snang bzhi'i gzigs mor yengs pa'i ngang tshul gyis/_/gdos bcas 'od dengs snod bcud 'od gsal che/_/sgron drug dkyil 'khor rdzogs pa'i dpa' bor bstod/_/dang po'i sangs rgyas kun mkhyen bla ma rje'i/_/rgyal thabs spyi blugs dgongs brgyud dbang bskur bas/_/chos zad gdod ma'i grol gzhir 'ub chub pa'i/_/khyab brdal dgongs pa mnyam rjes grol la 'dud/_/rtsa khams 'od du dengs pa'i ye shes rlung*/_/rdo rje nA da'i rgyud mang thol byung gis/_/'od gsal gdod ma'i gseng lam mdzub tshugs su/_/bstan pa'i ye shes rol mo 'khrol la bstod/_/dus kyi tha ma gangs can bstan 'gro'i dpal/_/nyams tshe rang byung gdod nas grub pa'i gnas/_/sbas lung rin chen gsang ba'i sgo phye nas/_/gdul bya dbugs dbyung mdzad la gsol ba 'debs/_/snang sems sgyu mar rtog pa'i rdzu 'phrul dang*/_/khyab brdal chos sku'i dgongs pa mkha' mnyam pas/_/grol ba drug ldan kun bzang gdod ma'i lam/_/'phags bod yul grur bstan la mtshungs zla bral/_/paN grub lnga brgya'i rnam dpyod lha dbang gtsug_/zhabs sen nor bu'i gzi 'bar bi ma la/_/bsam bzhin byon pa'i grags pa don ldan la/_/yid ches bstod pa'i bkur stis cis mi bsnyen/_/kun rtog rba rlabs rab 'khrugs yid kyi rdzing*/_/'khrul snang rnyogs pas dri nga byas pa la/_/dag chen ye shes ke ta ka chen po/_/rang grol dgongs pa'i dbang mchog da lta stsol/_/blos byas yid dpyod 'ching ba'i zhags pa brgyas/_/gnas ngan sdig to'i g.yang sar bcings pa gang*/_/mgon khyod dgongs rgyud ral gris ma bcad na/_/sdug bsngal rba la g.yengs 'di sus sgrol nus/_/de phyir dad dang gus pa'i chu ba'i rtser/_/bstod pa'i me tog phra mo mdzes byas par/_/ye shes nyin byed gzigs pa'i zer lhung bas/_/chos nyid dbyings kyi dgongs pa mngon gyur mdzod/_/bdag blo'i thog med mun sprul stug po yang*/_/mgon khyod dgyes pa'i skya rengs kyis bsal nas/_/theg mchog lta sgom spyod 'bras snang ba'i tshogs/_/mngon sum spyod pa'i skal pa dge gyur cig_/tshe rabs kun tu tshe 'di'i 'ching grol te/_/ro snyoms spyod pa mu to'i brtul zhugs kyis/_/nges don bshad sgrub bstan pa'i bya ba yis/_/theg mchog snying po'i grong du 'jug gyur cig_/mgon khyod dgongs brgyud snying gi dbus sims pas/_/snang spyod sgyu mas bstan 'gro'i don byed cing*/_/klong chen nam mkha'i rnal 'byor 'jigs med pa'i/_/rnam thar bdag gir byed pa'i skal ldan shog_/de skad khyod kyi ye shes sgyu ma yi/_/rdo rje'i gsung gsang mthong bas nyer bskul te/_/tshigs su bcad pa'i bstod phreng 'di dag kyang*/_/'khos chung mang+ga la yis bris nas song*/_/tshul de tshig gi sbyor ba ches phra yang*/_/bcos min mos gus chu gter cher g.yo ba'i/_/nus pas khyod thugs bskul te byin snang gi_/nyin byed snying gi pad+mor 'pho gyur cig_/mang+ga las so/