JKW-KABUM-13-PA-022-006

🚧 This website is under continued development. We appreciate your patience!

Previous Text Back to Volume PageLast text in section.

Wylie title
Location	mkhyen brtse'i bka' 'bum Volume 13, sde tshan 22, Text 6, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 13: 323-371. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang

1 Texts in this Section (sde tshan or chos tshan)

6 458-462	ཚེ་སྒྲུབ་ཟབ་མོ་མདའ་འཕེལ་མའི་སྐབས་སུ་ཉེ་བར་མཁོ་བའི་ཟིན་བྲིས་བདུད་རྩིའི་སྙེ་མ། tshe sgrub zab mo mda' 'phel ma'i skabs su nye bar mkho ba'i zin bris bdud rtsi'i snye ma Longevity Rituals - tshe sgrub   ·   Notes - zin bris   ·   Longevity Empowerment - tshe dbang	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཚེ་སྒྲུབ་ཟབ་མོ་མདའ་འཕེལ་མའི་སྐབས་སུ་ཉེ་བར་མཁོ་བའི་ཟིན་བྲིས་བདུད་རྩིའི་སྙེ་མ། ༄༅། །ཚེ་སྒྲུབ་ཟབ་མོ་མདའ་འཕེལ་མའི་སྐབས་སུ་ཉེ་བར་མཁོ་བའི་ཟིན་བྲིས་བདུད་རྩིའི་སྙེ་མ་བཞུགས་སོ། །ན་མོ་གུ་རུ་བྷྱཿ འདིར་རྣལ་འབྱོར་གྱི་དབང་ཕྱུག་ཆེན་པོ་རས་ཆེན་དཔལ་འབྱོར་བཟང་པོའི་ཐུན་མོང་མ་ཡིན་པའི་ཟབ་ཁྱད་ཅན་གྱི་གསེར་ཆོས་རྣམ་པ་གསུམ་གྱི་ཡ་གྱལ། གནས་སྐབས་སུ་ཚེའི་བར་ཆད་ཐམས་ཅད་ཞི་ཞིང་རིང་པོར་འཚོ་བ་དང་། མཐར་ཐུག་འཆི་མེད་ཡེ་ཤེས་ཀྱི་སྐུ་སྒྲུབ་པའི་ཐབས་ཁྱད་པར་ཅན་ཚེ་དཔག་མེད་ལྷ་བཅུ་བདུན་མ་ལྟས་དང་ཆོ་འཕྲུལ་དངོས་སུ་སྟོན་པའི་ཚེ་དབང་ཟབ་མོ་མདའ་འཕེལ་མ་ཞེས་ཡོངས་སུ་གྲགས་པ་འདི་ལ་སྨིན་གྲོལ་ཡན་ལག་དང་བཅས་པ་ལས་དང་པོ་སྨིན་བྱེད་དབང་ནི། རྡོ་རྗེ་སློབ་དཔོན་བསྙེན་པ་ལས་སུ་རུང་ཞིང་ཏིང་ངེ་འཛིན་ལ་བརྟན་པ་རྗེས་སུ་མཐུན་པ་ཐོབ་པས་རས་ཆེན་རྡོ་རྗེ་འཆང་རང་ཉིད་ཀྱི་ཕྱག་བཞེས་འཁྲུལ་མེད་ཞྭ་ལུ་མཁན་ཆེན་བསོད་ནམས་མཆོག་གྲུབ་ཀྱིས་མཛད་པའི་དབང་ཆོག་འཆི་མེད་འབྱུང་བ་སོར་བཞག་ལྟར་མཛད་ན་ཤིན་ཏུ་ལེགས་ཀྱང་། བསྙེན་པ་མ་ཐེམས་པ་དང་། ལས་དང་པོ་པའི་སློབ་དཔོན་དག་གིས་དབང་བསྐུར་བའི་ཚེ་དམིགས་པ་གསལ་བ་སོགས་ཀྱི་ཆེད་ཐོག་མར་སློབ་དཔོན་རང་ཉིད་ཀྱིས་སྒྲུབ་མཆོད་བདག་འཇུག་སྔོན་དུ་འགྲོ་བས། སློབ་མ་ལ་དབང་བསྐུར་བ་སོགས་ཐུབ་བསྟན་མཁན་ཆེན་བཟང་པོ་རྒྱལ་མཚན་གྱི་དབང་ཆོག་འཆི་མེད་དཔལ་སྟེར་བཞིན་ལ། བཀྲ་ཤིས་རྫས་བརྒྱད་ཀྱི་དབང་གི་མཇུག་ཏུ། ཚེ་གཏོར་གྱི་དབང་བསྐུར་བ་ཞྭ་ལུ་མཁན་ཆེན་གྱིས་མཛད་པ་ལྟར་སྦྱར་ན་རྒྱས་པའི་ཡན་ལག་ཏུ་འགྱུར་རོ། །གྲོལ་བྱེད་ཀྱི་ལམ་ལ་བསྐྱེད་རྫོགས་གཉིས་ལས། དང་པོ་གཙོ་བོར་བསྐྱེད་བཟླས་ཀྱི་སྒོ་ནས་ཚེ་སྲིང་བའི་བསྟེན་པ་བྱེད་ཚུལ་ནི། བཀྲ་ཤིས་ཤིང་བྱིན་ཆགས་པའི་དབེན་གནས་སུ་དཀྱིལ་འཁོར་དང་མཆོད་པའི་ཡོ་བྱད་རྣམས་ཚུལ་བཞིན་དུ་བཤམ། ར་བ་བཞི་གང་ཡང་རུང་བའི་ཡར་ངོའི་གཟའ་སྐར་སྦྱོར་བྱེད་ཤིས་པའི་ཉི་ཤར་ནས་བརྩམས་ཏེ་ཐུན་བཞིའི་རིམ་པས་བདག་མདུན་དབྱེར་མེད་ཀྱི་བསྐྱེད་བཟླས་དང་། ཐུན་སོ་སོའི་མཐར་དབང་བླང་བ་སོགས་བྱས་ན་གཞུང་དང་མཐུན་ཞིང་བསྙེན་སྒྲུབ་སྦྲགས་མར་འགྱུར་བས་ཤིན་ཏུ་ལེགས། གལ་ཏེ་སྤྲོས་པས་མ་འཆུན་ན་བདག་བསྐྱེད་རྐྱང་པ་ལ་བརྟེན་ནས་བསྙེན་པ་རྫོགས་པར་བཏང་། གྲོལ་ཁར་དཀྱིལ་འཁོར་བཤམས་ནས་དངོས་གྲུབ་ཀྱི་སླད་དུ་དབང་བླང་བ་སོགས་བྱ། གོང་ལྟར་ཡང་སྔགས་འབུམ་ཕྲག་བཞི་ཁ་སྐོང་དང་བཅས་པ་བཟླ། བཟླས་དམིགས་གཞུང་དུ་གསལ། སྔགས་ཀྱི་དོན། ཨོཾ་ཨཱཿཧཱུྃ་ནི་རྡོ་རྗེ་གསུམ་གྱི་ས་བོན། བཛྲ་རཏྣ་ཨཱ་ཡུཥེ། རྡོ་རྗེ་རིན་པོ་ཆེའི་ཚེའི་ཆེད་དུ། ཧཱུྃ་བྷྲཱུྃ་སེམས་བརྟན་པར་གྱུར་ཅིག །ཚེ་བྷྲཱུྃ། ཚེ་བརྟན་པར་གྱུར་ཅིག །གཡུ་བྷྲཱུྃ། བླ་བརྟན་པར་གྱུར་ཅིག །ནྲྀ་བྷྲཱུྃ། སྲོག་བརྟན་པར་གྱུར་ཅིག །བནྡྷ་བྷྲཱུྃ། ཐིག་ལེ་བརྟན་པར་གྱུར་ཅིག །ཨཱ་ཡུརྫྙཱ་ན་བྷྲཱུྃ། ཚེ་དང་ཡེ་ཤེས་བརྟན་པར་གྱུར་ཅིག །ཨོཾ་སྔགས་ཀྱི་མགོ་འདྲེན། ཨ་མཱ་ར་ཎི། འཆི་བ་མེད་པ། ཛཱི་བནྟི་སིདྡྷི་ཕ་ལ། འཚོ་བའི་རྒྱུན་གྱི་དངོས་གྲུབ་བཟང་པོ། ཧཱུྃ། སྡུས་ཤིག །ཅེས་པ་སྟེ། མི་ཤིགས་དྭངས་མ་གསུམ་ལྡན་རྡོ་རྗེ་རིན་པོ་ཆེའི་ཚེ་སྒྲུབ་པའི་སླད་དུ། ཚེ་བརྟེན་པ་དང་། རྟེན་དང་། རྣམ་ཤེས་དང་། དེ་རྣམས་འབྲལ་བའི་ཚོགས་པ་དག་བརྟན་པར་བྱ་བ་དང་། དེ་ལ་བརྟེན་ནས་ཚེ་དང་ཡེ་ཤེས་ཀྱི་དངོས་གྲུབ་བརྟན་ཅིང་ནུས་ལྡན་བྱ་བ་སྟེ། འདི་ལས་བརྩམས་ཏེ་དོན་མང་དུ་སྤྲོས་པས་ཆོག་མོད། རེ་ཞིག་བཞག་གོ །བསྙེན་པའི་ཁ་སྐོང་གི་སྦྱིན་སྲེག་དམིགས་བསལ་མ་བྱས་ཀྱང་རུང་། སྤྲོ་ན་རྡོ་རྗེ་ཐེག་པ་སྔ་འགྱུར་གྱི་གསང་བ་སྤྱིའི་ལུགས་བཞིན་བྱ། ཚོགས་ཀྱི་མཆོད་པ་སོགས་ཀྱང་དེ་དང་འདྲའོ། །གཉིས་པ་རྫོགས་རིམ་ནི། འདི་ཉིད་ཀྱི་གཞུང་རང་དུ་བུམ་ཅན་གྱི་རླུང་སྦྱོར་དང་། རྗེས་གཞིག་གི་བྱིང་པས་འོད་གསལ་ལ་འཇུག་པའི་ཚུལ་ཙམ་འབྱུང་བ་ནི་བསྐྱེད་རིམ་གྱི་སྐབས་སུའང་བསྒོམ་པར་བྱ་བ་ཡིན་ལ། རྒྱས་པར་དོན་དུ་གཉེར་ན་གཏུམ་མོ་ཞག་བདུན་མ་ཞལ་ཤེས་དང་བཅས་པ་དང་། ཁྱད་པར་འཆི་མེད་རླུང་སྦྱོར་སོགས་བརྒྱུད་ལྡན་དམ་པའི་ཞལ་ལས་བླང་བར་བྱའོ། །ཡན་ལག་གཞན་ནི། ཚེ་གེགས་སེལ་བ་དང་། རིང་འཚོའི་རྟེན་འབྲེལ་སྤེལ་བ་སོགས་ཀྱི་ཆེད་དུ་ལས་ཚོགས་རབ་འབྱམས་སྒྲུབ་པའི་ཚུལ་ཐ་དད་པ་དག་ཀྱང་བསྙེན་པ་ལས་སུ་རུང་བའི་རྣལ་འབྱོར་པས་བསྒྲུབ་ཏུ་རུང་ཞིང་། ཁྱད་པར་མེ་ཏོག་དང་རྡེའུ་བཅུད་ལེན། རླུང་དང་རིག་པའི་བཅུད་ལེན་སོགས་བཀའ་བརྒྱུད་འདི་ཉིད་ལས་འོངས་པ་དག་ཚུལ་བཞིན་ཏུ་བསྟེན་ན་འཆི་མེད་གྲུབ་པའི་རིག་འཛིན་གྱི་དབང་པོར་འགྱུར་བ་ནི་ངེས་པའོ། །གོང་དུ་བཤད་པའི་བདག་བསྐྱེད་རྐྱང་བ་ལ་བརྟེན་ནས་བསྙེན་པ་བྱ་བའི་ཚུལ་གྱི་ངག་འདོན་ནི། སྐྱབས་སེམས་ཚད་མེད་བཞི་བསྒོམ་པ་དཀྱུས་ལྟར་དང་། ཨོཾ་སྭ་བྷཱ་བ་སོགས་ཀྱིས་སྟོང་པར་སྦྱང་། སྐད་ཅིག་ཙམ་གྱིས་རྡོ་རྗེ་ཆེན་པོའི་ནང་། །གནས་ཡུལ་ཐམས་ཅད་ཕོ་བྲང་གཞལ་ཡས་ཁང་། །འདབ་བརྒྱད་གྲུ་བཞི་སྒོ་བཞི་ལྕགས་རིར་བཅས། །ཞེས་སོགས་དཀྱུས་ལྟར་ལ། བདག་མདུན་ཐ་མི་དད་པ་ལ་ཡེ་ཤེས་དགུག་བསྟིམ་སོགས་ཀྱི་ཚེ། བདག་ཉིད་ཁོ་ན་བྱས་པས་འཐུས་ཤིང་། བཟླས་པའི་མཇུག་ཏུ་རྫོགས་རིམ་བསྒོམ། སླར་ཡང་ཆུ་ལས་ཉ་འཕར་བའི་ཚུལ་དུ་ཐུན་མཚམས་ཀྱི་ལྷར་ལྡང་། གནས་གསུམ་བསྲུང་། བསྔོ་སྨོན་ཤིས་བརྗོད་སོགས་བྱས་པས་དོན་འགྲུབ་པ་ཉིད་དོ། ཞེས་པའང་བྱ་བྲལ་བ་མཉྫུ་གྷོ་ཥས་ཟིན་བྲིས་སུ་བཏབ་པ་ཨཱ་ཡུརྫྙཱ་ན་བརྡྷནྟུ་སརྦ་ཛ་ག་ཏཾ།

[edit]

tshe sgrub zab mo mda' 'phel ma'i skabs su nye bar mkho ba'i zin bris bdud rtsi'i snye ma/ @#/_/tshe sgrub zab mo mda' 'phel ma'i skabs su nye bar mkho ba'i zin bris bdud rtsi'i snye ma bzhugs so/__/na mo gu ru b+h+yaH__'dir rnal 'byor gyi dbang phyug chen po ras chen dpal 'byor bzang po'i thun mong ma yin pa'i zab khyad can gyi gser chos rnam pa gsum gyi ya gyal/__gnas skabs su tshe'i bar chad thams cad zhi zhing ring por 'tsho ba dang /__mthar thug 'chi med ye shes kyi sku sgrub pa'i thabs khyad par can tshe dpag med lha bcu bdun ma ltas dang cho 'phrul dngos su ston pa'i tshe dbang zab mo mda' 'phel ma zhes yongs su grags pa 'di la smin grol yan lag dang bcas pa las dang po smin byed dbang ni/__rdo rje slob dpon bsnyen pa las su rung zhing ting nge 'dzin la brtan pa rjes su mthun pa thob pas ras chen rdo rje 'chang rang nyid kyi phyag bzhes 'khrul med zhwa lu mkhan chen bsod nams mchog grub kyis mdzad pa'i dbang chog 'chi med 'byung ba sor bzhag ltar mdzad na shin tu legs kyang /__bsnyen pa ma thems pa dang /__las dang po pa'i slob dpon dag gis dbang bskur ba'i tshe dmigs pa gsal ba sogs kyi ched thog mar slob dpon rang nyid kyis sgrub mchod bdag 'jug sngon du 'gro bas/__slob ma la dbang bskur ba sogs thub bstan mkhan chen bzang po rgyal mtshan gyi dbang chog 'chi med dpal ster bzhin la/__bkra shis rdzas brgyad kyi dbang gi mjug tu/__tshe gtor gyi dbang bskur ba zhwa lu mkhan chen gyis mdzad pa ltar sbyar na rgyas pa'i yan lag tu 'gyur ro/__/grol byed kyi lam la bskyed rdzogs gnyis las/__dang po gtso bor bskyed bzlas kyi sgo nas tshe sring ba'i bsten pa byed tshul ni/__bkra shis shing byin chags pa'i dben gnas su dkyil 'khor dang mchod pa'i yo byad rnams tshul bzhin du bsham/__ra ba bzhi gang yang rung ba'i yar ngo'i gza' skar sbyor byed shis pa'i nyi shar nas brtsams te thun bzhi'i rim pas bdag mdun dbyer med kyi bskyed bzlas dang /__thun so so'i mthar dbang blang ba sogs byas na gzhung dang mthun zhing bsnyen sgrub sbrags mar 'gyur bas shin tu legs/__gal te spros pas ma 'chun na bdag bskyed rkyang pa la brten nas bsnyen pa rdzogs par btang /__grol khar dkyil 'khor bshams nas dngos grub kyi slad du dbang blang ba sogs bya/__gong ltar yang sngags 'bum phrag bzhi kha skong dang bcas pa bzla/__bzlas dmigs gzhung du gsal/__sngags kyi don/__oM AHhU~M ni rdo rje gsum gyi sa bon/__badz+ra rat+na A yuShe/___rdo rje rin po che'i tshe'i ched du/__hU~M b+h+rU~M sems brtan par gyur cig__/tshe b+h+rU~M/__tshe brtan par gyur cig__/g.yu b+h+rU~M/__bla brtan par gyur cig__/nr-i b+h+rU~M/__srog brtan par gyur cig__/ban+d+ha b+h+rU~M/__thig le brtan par gyur cig__/A yur+dz+nyA na b+h+rU~M/__tshe dang ye shes brtan par gyur cig__/oM sngags kyi mgo 'dren/__a mA ra Ni/__'chi ba med pa/__dzI ban+ti sid+d+hi pha la/__'tsho ba'i rgyun gyi dngos grub bzang po/__hU~M/__sdus shig__/ces pa ste/__mi shigs dwangs ma gsum ldan rdo rje rin po che'i tshe sgrub pa'i slad du/__tshe brten pa dang /__rten dang /__rnam shes dang /__de rnams 'bral ba'i tshogs pa dag brtan par bya ba dang /__de la brten nas tshe dang ye shes kyi dngos grub brtan cing nus ldan bya ba ste/__'di las brtsams te don mang du spros pas chog mod/__re zhig bzhag go__/bsnyen pa'i kha skong gi sbyin sreg dmigs bsal ma byas kyang rung /__spro na rdo rje theg pa snga 'gyur gyi gsang ba spyi'i lugs bzhin bya/__tshogs kyi mchod pa sogs kyang de dang 'dra'o/__/gnyis pa rdzogs rim ni/__'di nyid kyi gzhung rang du bum can gyi rlung sbyor dang /__rjes gzhig gi bying pas 'od gsal la 'jug pa'i tshul tsam 'byung ba ni bskyed rim gyi skabs su'ang bsgom par bya ba yin la/__rgyas par don du gnyer na gtum mo zhag bdun ma zhal shes dang bcas pa dang /__khyad par 'chi med rlung sbyor sogs brgyud ldan dam pa'i zhal las blang bar bya'o/__/yan lag gzhan ni/__tshe gegs sel ba dang /__ring 'tsho'i rten 'brel spel ba sogs kyi ched du las tshogs rab 'byams sgrub pa'i tshul tha dad pa dag kyang bsnyen pa las su rung ba'i rnal 'byor pas bsgrub tu rung zhing /__khyad par me tog dang rde'u bcud len/__rlung dang rig pa'i bcud len sogs bka' brgyud 'di nyid las 'ongs pa dag tshul bzhin tu bsten na 'chi med grub pa'i rig 'dzin gyi dbang por 'gyur ba ni nges pa'o/__/gong du bshad pa'i bdag bskyed rkyang ba la brten nas bsnyen pa bya ba'i tshul gyi ngag 'don ni/__skyabs sems tshad med bzhi bsgom pa dkyus ltar dang /__oM swa b+hA ba sogs kyis stong par sbyang /__skad cig tsam gyis rdo rje chen po'i nang /__/gnas yul thams cad pho brang gzhal yas khang /__/'dab brgyad gru bzhi sgo bzhi lcags rir bcas/__/zhes sogs dkyus ltar la/__bdag mdun tha mi dad pa la ye shes dgug bstim sogs kyi tshe/__bdag nyid kho na byas pas 'thus shing /__bzlas pa'i mjug tu rdzogs rim bsgom/__slar yang chu las nya 'phar ba'i tshul du thun mtshams kyi lhar ldang /__gnas gsum bsrung /__bsngo smon shis brjod sogs byas pas don 'grub pa nyid do/__zhes pa'ang bya bral ba many+dzu g+ho Shas zin bris su btab pa A yur+dz+nyA na bar+d+han+tu sarba dza ga taM/