JKW-KABUM-13-PA-022-005

From Khyentse Lineage - A Tsadra Foundation Project

ཚེ་སྒྲུབ་ཟབ་མོ་མདའ་འཕེལ་མའི་ཚེ་དབང་བསྐུར་ཚུལ་འཆི་མེད་ཚེའི་དཔལ་སྟེར།
Wylie title tshe sgrub zab mo mda' 'phel ma'i tshe dbang bskur tshul 'chi med tshe'i dpal ster JKW-KABUM-13-PA-022.pdf
Location mkhyen brtse'i bka' 'bum
Volume 13, sde tshan 22, Text 5, Pages 432-458 (Folios 21b3 to 34b4)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön རས་ཆེན་དཔལ་འབྱོར་བཟང་པོ་ (ras chen dpal 'byor bzang po)
Associated People པདྨ་འབྱུང་གནས་ (pad+ma 'byung gnas)
Citation 'jam dbyangs mkhyen brtse'i dbang po. tshe sgrub zab mo mda' 'phel ma'i tshe dbang bskur tshul 'chi med tshe'i dpal ster. In 'jam dbyangs mkhyen brtse'i dbang po'i bka' 'bum, Vol. 13: 432-458. Khams sde dge rdzong sar dgon: Rdzong sar blo gros phun tshogs, 2020.
Genre Longevity Empowerment - tshe dbang
Cycle ཚེ་སྒྲུབ་ཟབ་མོ་མདའ་འཕེལ་མ་ (tshe sgrub zab mo mda' 'phel ma)
Deity tshe dpag med
RTZ In the Rinchen Terdzö: https://rtz.tsadra.org/index.php/Terdzo-DZA-023
Colophon

།དེ་ལྟར་སློབ་དཔོན་པདྨ་འབྱུང་གནས་ཀྱིས། །གྲུབ་དབང་རས་ཆེན་དཔལ་འབྱོར་བཟང་པོ་ལ། །དངོས་སུ་གནང་བའི་ཚེ་དབང་སྐུར་བའི་ཚུལ། །དོན་གཉེར་ནོར་བུ་བཟང་པོས་བསྐུལ་བའི་ངོར། །ཐམས་ཅད་མཁྱེན་པ་སྔགས་འཆང་ཨཱ་ནནྡའི། །ཚེ་དབང་འཆི་མེད་ལྷུན་གྲུབ་སོར་བཞག་ནས། །མཆན་བུའི་གསལ་བྱེད་འགའ་ཡང་དཀྱུས་ཉིད་དུ། །བྲིས་ནས་ཤིན་ཏུ་གོ་བདེ་དོན་གསལ་འདི། །ཤཱཀྱའི་དགེ་སློང་བཟང་པོ་རྒྱལ་མཚན་གྱིས། །དངུལ་མདའ་ལྷུན་གྲུབ་སྟེང་གི་དགོན་པ་རུ། །ལྕགས་སྦྲུལ་དབྱུག་ཟླར་སྦྱར་བའི་ཡི་གེ་པ། །སངས་རྒྱས་དོན་གྲུབ་ཉིད་ཀྱིས་གུས་པས་བགྱིས། །བདག་བློ་རྨོངས་ཕྱིར་འདི་ལ་ནོངས་མཆིས་ན། །བླ་མ་ལྷར་བཅས་སྤྱན་སྔར་མཐོལ་ཞིང་བཤགས། །ལེགས་པའི་དངོས་པོ་གང་ཞིག་ཐོབ་པ་དེས། །ཚེ་དཔག་མེད་པའི་ཞལ་མཆོག་མཐོང་པར་ཤོག །འདིས་སེམས་ཅན་དཔག་ཏུ་མེད་པ་ལ་ཕན་ཐོགས་པར་གྱུར་ཅིག །སརྦ་དཱ་མངྒ་ལཾ།

de ltar slob dpon pad+ma 'byung gnas kyis/__/grub dbang ras chen dpal 'byor bzang po la/__/dngos su gnang ba'i tshe dbang skur ba'i tshul/__/don gnyer nor bu bzang pos bskul ba'i ngor/__/thams cad mkhyen pa sngags 'chang A nan+da'i/__/tshe dbang 'chi med lhun grub sor bzhag nas/__/mchan bu'i gsal byed 'ga' yang dkyus nyid du/__/bris nas shin tu go bde don gsal 'di/__/shAkya'i dge slong bzang po rgyal mtshan gyis/__/dngul mda' lhun grub steng gi dgon pa ru/__/lcags sbrul dbyug zlar sbyar ba'i yi ge pa/__/sangs rgyas don grub nyid kyis gus pas bgyis/__/bdag blo rmongs phyir 'di la nongs mchis na/__/bla ma lhar bcas spyan sngar mthol zhing bshags/__/legs pa'i dngos po gang zhig thob pa des/__/tshe dpag med pa'i zhal mchog mthong par shog__/'dis sems can dpag tu med pa la phan thogs par gyur cig__/sarba dA mang+ga laM/

":Property:textsubnumber|textsubnumber" can not be assigned to a declared number type with value 1.

[edit]
༄༅། །ཚེ་སྒྲུབ་ཟབ་མོ་མདའ་འཕེལ་མའི་ཚེ་དབང་བསྐུར་ཚུལ་འཆི་མེད་ཚེའི་དཔལ་སྟེར་ཅེས་བྱ་བ་བཞུགས་སོ། །ན་མོ་གུ་རུ་བཛྲ་ཨཱ་ཙརྱ་ས་པ་རི་ཝཱ་རཱ་ཡ། རྣམ་འདྲེན་རྒྱལ་བ་ཚེ་དཔག་མེད་པ་དང་། །དབྱེར་མེད་སློབ་དཔོན་པདྨ་འབྱུང་གནས་ལ། །གུས་པས་བཏུད་ནས་ཚེ་སྒྲུབ་ཉེ་བརྒྱུད་ཀྱི། ཚེ་དབང་བསྐུར་ཚུལ་བཀླག་ཆོག་ཚུལ་དུ་བྲི། །དེ་ལ་འདིར་སློབ་དཔོན་པདྨ་འབྱུང་གནས་ཀྱིས་རས་ཆེན་དཔལ་འབྱོར་བཟང་པོ་ལ་དངོས་སུ་གནང་བའི་ཚེ་དབང་ཉེ་བརྒྱུད་ཀྱི་ཕྱག་ལེན་ནི། ལྷ་བཅུ་བདུན་གྱི་དཀྱིལ་འཁོར་རྡུལ་ཚོན་མའམ། རས་བྲིས་སམ། དེ་མ་འབྱོར་ན་ཚོམ་བུ་ཙམ་ལ་བརྟེན་པའི་ཕྱག་ལེན་ཀྱང་སྣང་བས། མཎྜལ་དྲི་བཟང་གི་ཐིག་ལེ་བྱས་པར་ཚོམ་བུ་ལྷ་གྲངས་དང་མཐུན་པར་བཀོད་ལ་སྟེགས་ཇི་ལྟར་རིགས་པའི་སྟེང་དུ་བཞག །དེའི་སྟེང་དུ་མཉྫིའི་ཁར་བུམ་པ་དྲི་བཟང་གི་ཆུས་གང་བ་ཁ་རྒྱན་དང་བཅས་པ་བཤམ། རྡོར་གཟུངས་མི་དགོས། དེའི་གཡས་སུ་ཚེ་རིལ་དང་ཚེ་ཆང་། གཡོན་དུ་ཚེ་མདའ་གཙང་མ་སྔར་ལོངས་མ་སྤྱད་པ་སྤོས་ཀྱིས་བདུག་པ་ལ་དར་དམར་དང་གཡུ་བཏགས་པ་བཤམ། དེའི་མཐར་ཆུ་གཉིས་སྔོན་དུ་འགྲོ་བའི་ཉེར་སྤྱོད་ཀྱིས་བསྐོར། མདུན་ངོས་སུ་ཟླུམ་གཏོར་དམར་པོ་གཅིག །ཉེ་ལོགས་ཇི་ལྟར་རིགས་པར་རིན་ཆེན་སྣ་བདུན་དང་། བཀྲ་ཤིས་རྫས་བརྒྱད་བཤམ། དེ་ནས་སློབ་དཔོན་རང་ཉིད་སྟན་ལ་འཁོད་ནས། མཆོད་པ་རྣམས། ཨོཾ་བཛྲ་ཨ་མྲྀ་ཏས་བསང་། སྭཱ་བྷཱ་བས་སྦྱང་། སྟོང་པའི་ངང་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཅེས་དང་སོ་སོའི་ཕྱག་རྒྱ་དང་བཅས་པས། ཨོཾ་བཛྲ་ཨརྒྷཾ་སྭཱ་ཧཱ། ཨོཾ་བཛྲ་པཱ་དྱཾ་སྭཱ་ཧཱ། ཞེས་སོགས་ཀྱི་མཐར། དྷརྨ་ར་ཎི་ཏ་དང་རོལ་མོ་བྱས་ཏེ་བྱིན་དབབ། དེ་ནས། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སོགས་ནས། འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་སྐྱབས་འགྲོ་ཉེར་གཅིག་སོགས་བྱ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཚེ་དཔག་མེད་ཀྱི་བསྒོམ་བཟླས་ཉམས་སུ་བླང་བར་བགྱིའོ། །ལན་གསུམ། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། རང་ཉིད་དང་མདུན་གྱི་ཚོམ་བུ་བུམ་པ་གསུམ་ཀ་ལ་དམིགས་ཏེ། ཨོཾ་སྭ་བྷཱ་བ་སོགས་ཀྱིས་སྟོང་པར་སྦྱང་། སྟོང་པའི་ངང་ལས་གསུམ་ཀ་ཐ་མི་དད་པར་བསྒྲུབ་པ་ནི། སྐད་ཅིག་ཙམ་གྱིས་རྡོ་རྗེ་ཆེན་པོའི་ནང་། ལྟེ་བ་ཡངས་ཤིང་རྒྱ་ཆེ་བའི། །མཎྜལ་བུམ་པ་ཕོ་བྲང་གཞལ་ཡས་ཁང་། །འདབ་བརྒྱད་གྲུ་བཞི་སྒོ་བཞི་ལྕགས་རིར་བཅས། །སྣ་ཚོགས་པདྨ་ཉི་མ་ཟླ་བའི་གདན། དེ་ཡི་སྟེང་དུ་རང་བྱུང་ཨཱཿགཅིག་བསམ། །དེ་ལས་འོད་འཕྲོས་འཁོར་འདས་བཅུད་བསྡུས་ནས། །ཚུར་འདུས་ཨཱཿལས་རང་ཉིད་ཚེ་དཔག་མེད། །ཞལ་གཅིག་ཕྱག་གཉིས་སྐུ་མདོག་དམར་ལ་དྭངས། །གསེར་དངུལ་རིན་ཆེན་མུ་ཏིག་ཕྲེང་བས་བརྒྱན། །སྣ་ཚོགས་དར་གྱི་ན་བཟའ་ཤམ་ཐབས་གསོལ། །ཕྱག་གཉིས་མཉམ་བཞག་བདུད་རྩིའི་བུམ་པ་བསྣམས། །དེ་ཉིད་པང་ན་གཉིས་མེད་གསང་བའི་ཡུམ། །ཞལ་གཅིག་ཕྱག་གཉིས་དམར་མོ་བུམ་པ་འཛིན། །རྒྱན་དང་ཆ་ལུགས་གཙོ་བོ་ཡབ་དང་མཚུངས། །དེ་ཡི་ཤར་སོགས་པད་ཉི་ཟླ་སྟེང་དུ། །རྡོ་རྗེ་མཁའ་འགྲོ་རིན་ཆེན་མཁའ་འགྲོ་དང་། །པདྨ་མཁའ་འགྲོ་ལས་ཀྱི་མཁའ་འགྲོ་རྣམས། །མཐིང་གི་བུམ་པ་གསེར་གྱི་བུམ་པ་དང་། །པདྨ་རཱ་ག་ཨིནྡྲ་ནཱི་ལ་ཡི། །བུམ་པ་རིམ་བཞིན་ཚེ་ཡིས་གང་བ་འཛིན། །མཚམས་བཞིའི་འདབ་མར་སྒེག་ཕྲེང་གླུ་གར་རྣམས། །སྔོ་སེར་དམར་ལྗང་མཛེས་ལྡན་བུམ་པ་བསྣམས། །ནང་དུ་ཞལ་གཟིགས་གཙོ་བོའི་ཞལ་ལ་བལྟ། །གྲུ་ཆད་བཞི་ལ་མཆོད་པའི་ལྷ་མོ་བཞི། །མེ་ཏོག་བདུག་པ་སྣང་གསལ་མཆོད་ཡོན་བསྣམས། །དཀར་སེར་དམར་ལྗང་གར་སྟབས་ཚུལ་གྱིས་བཞུགས། །སྒོ་བཞིར་ལྕགས་ཀྱུ་ཞགས་པ་ལྕགས་སྒྲོག་དྲིལ། །དཀར་སེར་དམར་ལྗང་སྒེག་པའི་ཚུལ་དུ་བཞུགས། །དེ་ལྟར་ལྷ་རྣམས་སྣང་སྟོང་རང་བཞིན་མེད། །གསལ་སྟོང་འཇའ་ཚོན་ལྟ་བུར་གསལ་བར་གྱུར། །གཙོ་བོ་ཡབ་ཡུམ་གཉིས་མེད་ཐུགས་ཀ་རུ། །པདྨ་སྙིང་གི་ཟེའུ་འབྲུ་ལྟ་བུའི་སྟེང་། །ཚེ་ཡི་ངོ་བོ་དཀར་ལ་འཚེར་བ་ལ། །ཡི་གེ་ཨཱཿནི་དཀར་པོས་མཚན་པར་གྱུར། །དེ་ལ་ཚེ་ཡི་སྙིང་པོ་འོད་དང་ལྡན། །མེ་ཏོག་ཕྲེང་བ་ལྟ་བུས་བསྐོར་བར་བཞུགས། །ཞེས་བརྗོད་ཅིང་བསམ། རླུང་རོ་ལན་གསུམ་ཕྱི་ལ་སངས་ཀྱིས་བུས། །དུག་གསུམ་རྟོག་པ་མ་ལུས་སངས་ཀྱིས་དག །སྟེང་འོག་རླུང་གཉིས་སྙིང་གར་ཁ་སྦྱར་བཟུང་། །ཞེས་བརྗོད། དེ་ནས་རང་གི་དུག་གསུམ་གྱི་རྣམ་རྟོག་ཁ་དོག་སྔོན་པོ་དང་དམར་པོ་དང་ནག་པོའི་རིམ་པས་ཕྱིར་ཐོན་པར་བསམས་ལ། སྣ་བུག་གཡས་དང་། གཡོན་དང་དབུས་གསུམ་ནས་རླུང་ལན་རེ་ཕྱིར་སངས་ཀྱིས་འབུད། དེ་ལྟར་ལན་གསུམ་འབུད་རྗེས་བུམ་པ་ཅན་སྙིང་གར་ཐེང་གཅིག་བཟུང་ལ། ངག་ཏུ། རང་གི་སྙིང་གའི་རྣམ་ཤེས་པདྨ་འདབ་མ་བརྒྱད་པའི་རྣམ་པར་ཁ་བྱེ་བའི་ཟེའུ་འབྲུའི་སྟེང་གི་ཨཱཿལས་འོད་ཟེར་ཕྱོགས་བཅུར་འཕྲོས་པས་རང་གི་མདུན་གྱི་ནམ་མཁར་མ་ཧཱ་གུ་རུ་ཚེ་དཔག་མེད་ཀྱི་ཡེ་ཤེས་པ་ཐམས་ཅད་བྱོན་པར་གྱུར། སྙིང་གའི་རྣམ་ཤེས་པདྨ་ཁ་ཕྱེ་ནས། །ཨཱཿལས་འོད་ཟེར་ཕྱོགས་བཅུར་འཕྲོས་པ་ཡིས། །མདུན་གྱི་ནམ་མཁར་རང་འདྲའི་ཡེ་ཤེས་པ། །མ་ཧཱ་གུ་རུ་ཚེ་དཔག་མེད་པ་ཡི། །རིགས་ཀྱི་ལྷ་ཚོགས་ཐམས་ཅད་བྱོན་པར་གྱུར། །ཅེས་བརྗོད་ཅིང་བསམ། དེ་ལ་ཡན་ལག་བདུན་པ་འབུལ་བ་ནི། མ་ཧཱ་གུ་རུ་ཨོ་རྒྱན་པདྨ་དང་། །བཅོམ་ལྡན་མགོན་པོ་ཚེ་དཔག་མེད་པ་ཡི། །རིགས་ཀྱི་ལྷ་ཚོགས་འཁོར་བཅས་ཐམས་ཅད་ལ། །ཀུན་ནས་བདག་གིས་གུས་པས་ཕྱག་འཚལ་ལོ། །དངོས་སུ་བཤམས་དང་ཡིད་ཀྱིས་རྣམ་སྤྲུལ་པའི། །ཕྱི་ནང་གསང་བའི་མཆོད་སྤྲིན་རྒྱ་མཚོ་རྣམས། །ཀུན་ཏུ་བཟང་པོའི་མཆོད་སྤྲིན་རྒྱ་མཚོ་ལྟར། །བདག་གིས་མ་ལུས་ཀུན་ལ་དབུལ་བར་བགྱི། །འཁོར་བ་ཐོག་མ་མེད་པའི་དུས་ཉིད་ནས། །ད་ལྟའི་དུས་ཀྱི་ལུས་ངག་ཡིད་གསུམ་གྱིས། །ཕྲ་རག་སྦོམ་གསུམ་སྡིག་པ་ཅི་བགྱིས་པ། །བདག་ཉིད་གནོང་ཞིང་འགྱོད་པའི་སྒོ་ནས་བཤགས། །དུས་གསུམ་རྒྱལ་བའི་ཡོན་ཏན་དཔག་མེད་དང་། །སེམས་ཅན་ཀུན་གྱི་དད་དང་བརྩོན་འགྲུས་ཀྱི། །བསོད་ནམས་ཡེ་ཤེས་ཚོགས་གཉིས་མཐར་ཐུག་པའི། །དགེ་བ་ཀུན་ལའང་བདག་ནི་རྗེས་ཡི་རང་། །དུས་གསུམ་འགྱུར་མེད་རྡོ་རྗེ་ཚེ་ཡི་ལྷ། །ཀུན་ལ་ཁྱབ་པ་བྱམས་ཆེན་ཐུགས་རྗེའི་དཔལ། །བྱིན་རླབས་ཆེན་པོའི་སྐུ་གསུམ་ཕྲིན་ལས་ཀྱིས། །ཆོས་ཀྱི་འཁོར་ལོ་བསྐོར་བར་བདག་གིས་བསྐུལ། །སྐུ་གསུམ་ཕྲིན་ལས་རྒྱུན་ཆད་མེད་པ་རུ། །ཇི་སྲིད་འཁོར་བའི་རྒྱ་མཚོ་མ་སྟོང་བར། །མཁའ་མཉམ་སེམས་ཅན་ཀུན་གྱི་དོན་གྱི་ཕྱིར། །མྱ་ངན་མི་འདའ་བཞུགས་པར་གསོལ་བ་འདེབས། །བཅོམ་ལྡན་ཁྱོད་ལ་ཕྱག་འཚལ་མཆོད་སོགས་པའི། །འགྲོ་ཀུན་དགེ་བའི་རྩ་བའི་ཇི་སྙེད་པ། །རྣམ་མཁྱེན་ཀུན་མཁྱེན་གོ་འཕང་ཐོབ་བྱའི་ཕྱིར། །བླ་མེད་བྱང་ཆུབ་ཆེན་པོར་བསྔོ་བར་བགྱི། །ཞེས་པ་ལན་གསུམ་མམ་གཅིག་བརྗོད་ལ། དེ་ནས་གསོལ་བ་གདབ་པ་ནི། ནམ་མཁར་བྱོན་པ་རྣམས་ལ་དམིགས་ནས། བཅོམ་ལྡན་མགོན་པོ་ཚེ་དཔག་མེད་པ་ཡི། །རིགས་ཀྱི་ལྷ་ཚོགས་འཁོར་བཅས་ཐམས་ཅད་ཀྱིས། །སྒྲུབ་མཆོག་བདག་ལ་དབང་དང་བྱིན་རླབས་པའི། །རྡོ་རྗེ་ཚེ་མཆོག་དངོས་གྲུབ་སྩལ་དུ་གསོལ། །ཞེས་ལན་གསུམ་གསོལ་བ་བཏབ་པས། གུ་རུའི་བུམ་པ་ནས་ཚེ་དཔག་མེད་ཀྱི་བུམ་པར་བདུད་རྩི་བབས་པ་དེ་ཉིད་བདག་གི་ཚངས་པའི་བུ་ག་ནས་མར་བབས་ཏེ། ཚེ་དཔག་མེད་རིགས་ལྔ་བདག་མདུན་ཐ་མི་དད་ཀྱི་སྤྱི་གཙུག་ཏུ་བྱོན་པས་དབང་བསྐུར་བར་བསམ་ཞིང་། དམ་ཚིག་སེམས་དཔའ་སོ་སོའི་ལྷ་ཚོགས་ལ། །ཡེ་ཤེས་སེམས་དཔའ་དགུག་གཞུག་གཉིས་མེད་བསྟིམ། །གཉིས་མེད་དགྱེས་པ་ལྷ་ཡི་སྤྱི་གཙུག་ཏུ། །མ་ཧཱ་གུ་རུ་རིགས་ཀྱི་བདག་པོར་གྱུར། །ཅེས་པས་དམ་ཡེ་དབྱེར་མེད་དུ་གྱུར་པར་བསམ། དེ་ལྟར་བདག་མདུན་ཐ་མི་དད་ཀྱི་ལྷ་ཚོགས་ཀུན་གསལ་བར་བསྒོམས་པའི་གཙོ་བོའི་ཐུགས་ཀའི་ཨཱཿཡིག་གི་འོད་ཟེར་ལས་སྙིང་པོའི་སྔགས་ཀྱི་འཁོར་ལོའི་རང་སྒྲ་སྒྲོགས་བཞིན་པ་བྱུང་བ་ལས། དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཀུན་གྱི་ཐུགས་རྗེ་དང་བྱིན་རླབས་དང་། ཁམས་གསུམ་གྱི་སེམས་ཅན་མ་ལུས་པའི་ཚེ་དང་བསོད་ནམས་དཔལ་དང་འབྱོར་བ་རྣམས་བསྡུས་ནས་རང་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པར་བསམ་ཞིང་། དེ་ལྟར་ལྷ་ཚོགས་གསལ་བར་བསྒོམ་པ་ཡི། །གཙོ་བོའི་ཐུགས་ཀའི་ཨ་ཡི་འོད་ཟེར་ལས། །སྙིང་པོའི་སྔགས་འཁོར་རང་སྒྲ་བྱུང་བ་ལས། །ཡབ་ཡུམ་ཞལ་ནས་སྙིང་པོའི་སྔགས་འདི་བཟླས། །ཚེ་གཟུངས་ཚར་གསུམ་བརྗོད། དེ་ནས་ལྷ་དང་སྔགས་ལས་འོད་ཟེར་འཕྲོས། །དུས་གསུམ་སངས་རྒྱས་ཀུན་གྱི་ཐུགས་བཅུད་དང་། ཁམས་གསུམ་སེམས་ཅན་ཀུན་གྱི་ཚེ་དཔལ་རྣམས། །བསྡུས་ནས་ཚུར་འདུས་རང་ལ་ཐིམ་པ་ཡིས། །འཆི་མེད་ཡེ་ཤེས་ཚེ་ཡི་ངོ་བོར་གྱུར། །ཅེས་བརྗོད་ཅིང་བསམ། ཨོཾ་ཨཱཿཧཱུྃ་བཛྲ་རཏྣ་ཨཱ་ཡུ་ཥེ་ཧཱུྃ་བྷྲཱུྃ། ཚེ་བྷཱུྃ། གཡུ་བྷྲཱུྃ། ནྲྀ་བྷྲཱུྃ། བྷིནྡྷཱུ་བྷྲཱུྃ། ཨཱ་ཡུརྫྙཱ་ན་བྷྲཱུྃ། ཨོཾ་ཨ་མཱར་ཎི་ཛཱི་བནྟི་སིདྡྷི་ཕ་ལ་ཧཱུྃ། ཞེས་པའི་སྔགས་ཅི་ནུས་བཟླ། དེ་ནས་རྫོགས་རིམ་བསྒོམ་པ་ནི། སྣོད་བཅུད་སྲུང་འཁོར་གཞལ་ཡས་ཁང་འཁོར་གྱི་ལྷ་རྣམས་དང་བཅས་པ་རང་གཙོ་བོ་ཡབ་ཡུམ་ལ་ཐིམ། ཡབ་ཐུགས་ཀའི་ཨཱཿལ་ཐིམ། ཨཱཿཡང་ནམ་མཁའ་ལ་དུ་བ་ཡལ་བ་བཞིན་ཆོས་སྐུ་སྐྱེ་བ་མེད་པ་མ་བཅོས་སྤྲོས་བྲལ་འོད་གསལ་ཆེན་པོར་ཐིམ། ཞེས་བརྗོད་ཅིང་དེའི་ངང་ལ་ཅུང་ཟད་མཉམ་པར་བཞག །སླར་ཡང་ཆུ་ལས་ཉ་འཕར་བའི་ཚུལ་གྱིས་རང་ཉིད་ཚེ་དཔག་མེད་གཙོ་འཁོར་བཅས་པ་མངོན་སུམ་ལྟ་བུར་གསལ་བར་གྱུར། དེ་ལྟར་རང་ཉིད་བདག་མདུན་དབྱེར་མེད་པའི་ཐུགས་ཀའི་ཨཱཿལས་འོད་ཟེར་འཕྲོས་པས། མདུན་གྱི་ནམ་མཁར་མ་ཧཱ་གུ་རུ་ཚེ་དཔག་མེད་ཀྱི་ཡེ་ཤེས་པའི་ལྷ་ཚོགས་ཐམས་ཅད་བྱོན་པར་གྱུར། ཅེས་བརྗོད་ཅིང་བསམས་ལ། ཚེ་མདའ་སློབ་དཔོན་རང་ཉིད་ཀྱིས་མཐོ་ཚད་བཟུང་ཞིང་། གོང་གི་ཚེ་གཟུངས་ཅི་མང་བཟླས་ལ་མདའ་ལ་ཕུ་བཏབ་ཅིང་ཚེ་འགུགས་པ་ནི། མདར་དར་བཟུང་ལ་གཡོབ་བཞིན་པ་དང་བཅས་པས། བཅོམ་ལྡན་མགོན་པོ་ཚེ་དཔག་མེད། ཤར་ཕྱོགས་དྲི་ཟའི་ལག་ནས་ཚེ་ཁུག་ཅིག །ཁུག་ཅིག་ཁུག་ཅིག་ཚེ་ཁུག་ཅིག །སྩོལ་ཅིག་སྩོལ་ཅིག་ཚེ་སྩོལ་ཅིག །ཡེ་ཤེས་ཚེ་ཡི་དངོས་གྲུབ་སྩོལ། །བཅོམ་ལྡན་མགོན་པོ༴ ཤར་ལྷོ་མེ་ལྷའི་ལག་ནས༴ ཤམ་བུ་གོང་དང་འདྲ། བཅོམ་ལྡན༴ ལྷོ་ཕྱོགས་གཤིན་རྗེའི་ལག་ནས༴ སོགས༴ བཅོམ་ལྡན༴ ལྷོ་ནུབ་སྲིན་པོའི༴ སོགས༴ བཅོམ་ལྡན༴ ནུབ་ཕྱོགས་ཆུ་ལྷའི༴ སོགས༴ བཅོམ་ལྡན༴ ནུབ་བྱང་རླུང་ལྷའི༴ སོགས༴ བཅོམ་ལྡན༴ བྱང་ཕྱོགས་གནོད་སྦྱིན༴ སོགས༴ བཅོམ་ལྡན༴ བྱང་ཤར་དབང་ལྡན༴ སོགས༴ །དབང་པོ་བརྒྱ་བྱིན་ལག་ནས༴ སོགས༴ ལྷ་མོ་བརྟན་མའི༴ སོགས༴ ཨོ་རྒྱན་པདྨའི་ལག༴ སོགས༴ མནྡཱ་ར་བའི་ལག༴ སོགས་འགྲེའོ། །ཤར་རྡོ་རྗེ་རིགས་ཀྱི་མཁའ་འགྲོ་མ། །སྐུ་མདོག་སྔོན་མོ་མདངས་དང་ལྡན། །ཕྱག་ན་ཚེ་ཡི་བུམ་པ་བསྣམས། །འཁོར་དུ་སྔོན་མོ་འབུམ་གྱིས་བསྐོར། །བཅུ་དྲུག་ལོན་པའི་ན་ཚོད་ཅན། །རྡོ་རྗེ་རིགས་ཀྱི་ཚེ་ཁུག་ཅིག །ལྷོ་རིན་ཆེན་རིགས་ཀྱི་མཁའ༴ སྐུ་མདོག་སེར་མོ༴ ཕྱག་ན༴ འཁོར་དུ་སེར་མོ༴ བཅུ་དྲུག༴ རིན་ཆེན་རིགས༴ ནུབ་པདྨ་རིགས་ཀྱི་མཁའ་འགྲོ་མ། སྐུ་མདོག་དམར་མོ༴ ཕྱག་ན༴ འཁོར་དུ་དམར་མོ༴ བཅུ་དྲུག༴ པདྨ་རིགས་ཀྱི༴ བྱང་ལས་ཀྱི་རིགས་ཀྱི༴ སྐུ་མདོག་ལྗང་ཁུ༴ ཕྱག་ན༴ འཁོར་དུ་ལྗང་མོ༴ བཅུ་དྲུག༴ ལས་ཀྱི་རིགས་ཀྱི༴ དགོས་འདོད་འབྱུང་བའི་ཚེ་ཁུག་ཅིག །སྐྱོན་གྱིས་མ་གོས་ཚེ་ཁུག་ཅིག །མི་འགྱུར་བརྟན་པའི་ཚེ་ཁུག་ཅིག །ལས་ཀུན་འགྲུབ་པའི་ཚེ་ཁུག་ཅིག །ཅེས་བརྗོད་ཅིང་འདིར་ཡང་གཟུངས་མང་དུ་བཟླས་ལ་ཚེ་མདའ་ལ་ཕུ་བཏབ་ཅིང་། རང་གིས་མཐོ་ཚད་གཞལ་བས་སོར་གཅིག་སོགས་འཕེལ་ན་བཟང་ངོ་། །ཡང་ན་གོང་དུ་དཀྱིལ་འཁོར་མ་བསྡུས་པར་འགྲུབ་འཕྲལ་སེམས་མ་བཅོས་པ་སྤྲོས་བྲལ་འོད་གསལ་ཆེན་པོའི་ངང་ཅུང་ཟད་མཉམ་པར་བཞག་པ་ཙམ་བྱས་ལ། དེ་ནས་ཚེ་གཟུངས་མང་དུ་བཟླས་ཤིང་མདའ་ལ་ཕུ་བཏབ་པ་ཚེ་འགུགས་ལ་འཇུག་པ་ནས་འདིའི་བར་བྱ་བའི་ཚུལ་ཀྱང་གསུངས་པས་རང་གི་བློ་ལ་གང་མོས་བྱས་པས་ཆོག །བདག་བསྐྱེད་རྐྱང་པ་སྐབས་སུ་ཡིན་ན། རང་གི་ཐུགས་ཀའི་ཨཱ་ཡིག་ལས་འོད་ཟེར་འཕྲོས་པས་དཀྱིལ་འཁོར་བསྡུས་ཏེ་རང་གཙོ་བོའི་ང་རྒྱལ་གྱིས་དགེ་བ་བསྔོ་ནས་སྤྱོད་ལམ་ལ་འཇུག་པར་བྱའོ། །དེ་ནས་དབང་བླང་བ་དངོས་ནི། འཇའ་ལུས་བུམ་པའི་དབང་བསྐུར་སྩལ་དུ་གསོལ། །ཡེ་ཤེས་རླུང་གི་གསང་དབང་བསྐུར་དུ་གསོལ། །བདེ་ཆེན་ཐིག་ལེའི་ཤེར་དབང་བསྐུར་དུ་གསོལ། །མངོན་སུམ་རིག་པའི་རྩལ་དབང་བསྐུར་དུ་གསོལ། །ཞེས་ལན་གསུམ་གྱིས་གསོལ་བ་བཏབ་པས། ཚེ་དཔག་མེད་རིགས་ལྔ་རྣམས་རིམ་པ་བཞིན་རང་གི་སྤྱི་གཙུག་ཏུ་བྱོན་ནས་དབང་བསྐུར་བར་གྱུར། །ཅེས་བརྗོད་ཅིང་བསམས་ལ། བུམ་པ་སྤྱི་བོར་བཞག་སྟེ། ང་ནི་སངས་རྒྱས་ཚེ་དཔག་མེད། །སངས་རྒྱས་ཀུན་དང་མགྲིན་གཅིག་ཏུ། །ལུས་ལ་སངས་རྒྱས་ཚེ་དབང་བསྐུར། །བུ་ཁྱོད་འཆི་བདག་ལས་གྲོལ་ཏེ། །བསྐལ་པ་སྟོང་དུ་ཚེ་འཕེལ་ཞིང་། །སྲོག་གཅོད་སྡིག་པ་དག་གྱུར་ཅིག །ཨོཾ་བུདྡྷ་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་ཡེ་ཤེས་ཀྱི་ཆུས་ལུས་ཀྱི་ནང་ཐམས་ཅད་གང་། གཏི་མུག་ལས་གྱུར་པའི་སྲོག་བཅད་པའི་སྡིག་སྒྲིབ་དག །རྣམ་སྣང་གི་ཚེའི་དངོས་གྲུབ་ཐོབ་པར་གྱུར། དེ་བཞིན་དུ་བུམ་པ་དཔྲལ་བར་བཞག་སྟེ། ང་ནི་མི་བསྐྱོད་ཚེ་དཔག་མེད། །ཅེས་སོགས་འདོན་པ་བསྒྱུར་ལ། ཨོཾ་བཛྲ་ཨབྷི༴ ཞེས་གསུང་ཞིང་སོགས་ནས། ཞེ་སྡང་ལས་གྱུར་པའི་སྲོག་བཅད་པའི་སྡིག་སྒྲིབ་དག །མི་བསྐྱོད་པའི་ཚེའི་དངོས་གྲུབ་ཐོབ། བུམ་པ་རྣ་ལྟག་གཡས་དང་། ང་ནི་རིན་འབྱུང་ཚེ་དཔག་མེད། །སོགས། ཨོཾ་རཏྣ་ཨ་བྷི༴ ང་རྒྱལ་དང་སེར་སྣ་ལས་གྱུར་པའི་སྲོག་བཅད་པའི༴ རིན་འབྱུང་གི་ཚེའི༴ བུམ་པ་ལྟག་པ་དང་། ང་ནི་པདྨ་ཚེ་དཔག༴ སོགས། ཨོཾ་པདྨ་ཨ་བྷི༴ འདོད་ཆགས་ལས་གྱུར་པའི་སྲོག༴ འོད་དཔག་མེད་ཀྱི་ཚེ༴ བུམ་པ་རྣ་ལྟག་གཡོན་དང་། ང་ནི་དོན་ཡོད་ཚེ་དཔག་མེད། །སོགས། ཨོཾ་ཀརྨ་ཨ་བྷི་ཥིཉྩ་ཧཱུྃ། ཕྲག་དོག་ལས་གྱུར་པའི་སྲོག་བཅད་པའི་སྡིག་སྒྲིབ་དག །དོན་ཡོད་གྲུབ་པའི་ཚེའི་དངོས་གྲུབ་ཐོབ། ཅེས་རིགས་ལྔས་དབང་བསྐུར། དེ་ནས་སྤྱི་བོར་ཚེ་དཔག་མེད་ཚོན་གང་བ་གཅིག་གསལ་བཏབ་ནས། དེ་ལས་འོད་འཕྲོས་དུས་གསུམ་སངས་རྒྱས་ཐམས་ཅད་ཀྱི་ཚེ་དང་ཡེ་ཤེས་ཐམས་ཅད་ཧཱུྃ་ཡིག་དཀར་དམར་གྱི་རྣམ་པ་སྤྱན་དྲངས་ཏེ་དེ་ཉིད་ལ་ཐིམ། དེ་ཉིད་ཀྱང་འོད་དུ་ཞུ་ནས་སྤྱི་བོ་ཚངས་བུག་ནས་མར་ཞུགས། སྙིང་གར་རིགས་ལྔ་ཚེ་དཔག་མེད་ཀྱི་སྐུར་གྱུར། དེ་རྣམས་འོད་དུ་ཞུ་ནས་ཐམས་ཅད་ལ་ཁྱབ་པས་འཆི་མེད་ཚེའི་ངོ་བོར་གྱུར་པར་བསམས་ལ་སྤྱི་བོར་རྡོ་རྗེ་བཞག་སྟེ། ང་ནི་ཡེ་ཤེས་ཚེ་དཔག་མེད། །ཀུན་ཏུ་བརྙས་པ་སྤང་བར་བྱ། །འཆི་བདག་ཆེན་པོ་ང་ཡིས་བཅོམ། །བུ་ཁྱོད་ཚེ་ཡི་རིག་འཛིན་བརྙེས། །ཨོཾ་ཨཱཿཧཱུྃ་ཨ་མཱ་ར་ཎི་ཛཱི་བནྟི་སིདྡྷི་ཕ་ལ་ཧཱུྃ། དེ་ནས་མཐའ་རྟེན། རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་ཀྱི་དབང་ཚེ་དཔག་མེད་ལྷ་དགུ་བཞིན་ལ། དེ་ཡན་ཆད་བདག་མདུན་ཐ་མི་དད་ཀྱི་ངང་དུ་བྱེད་པ་ཡིན། འདི་གཉིས་དབང་ཚིག་བསྡུས་པས་ལེན་ན། རྟེན་འབྲེལ་ཕུན་ཚོགས་རྫས་བརྒྱད་རིན་ཆེན་བདུན། །སྣང་སྲིད་ལོངས་སྤྱོད་མཆོད་སྤྲིན་དབང་བསྐུར་རོ། །ཨོཾ་མ་ཧཱ་སརྦ་རཏྣ་ཨ་བྷི་ཥིཉྩ་ཧཱུྃ། ཞེས་བརྗོད་པས་བླངས་ཀྱང་རུང་བར་གསུངས་སོ། །དེ་ནས་རང་ཉིད་ཚེ་དཔག་མེད་དུ་གསལ་བ་མདུན་བསྐྱེད་ཀྱི་ཐུགས་ཀ་ནས་ཕྱེ་ལ། གཏོར་མ་ཆབ་ཀྱིས་བྲན་ལ། ཨོཾ་ཨཱཿཧཱུྃ་ལན་གསུམ་གྱི་བྱིན་གྱིས་བརླབ། ཨོཾ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་བཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་ལྔས་མདུན་བསྐྱེད་ལ་ཕུལ། མཚན་སྔགས་སྔོན་འགྲོའི་ཨརྒྷཾ་ནས། ཤབྡའི་བར་གྱིས་མཆོད། འཇིག་རྟེན་འདྲེན་པའི་གཙོ་བོ་སོགས་ཀྱིས་བསྟོད། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་འཆི་མེད་ཚེའི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ། དེ་ནས་སློབ་མ་བོས་ལ་མདུན་དུ་འཁོད་པ་ལ། མཎྜལ་བཀྱེ་བསྡུ་ཚར་རྗེས་སློབ་དཔོན་གྱིས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཚེ་དབང་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བསམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ཐེག་པ་ཆེན་པོའི་གཞུང་ལུགས་དྲི་མ་མེད་པ་རྣམས་ལས་ཇི་ལྟར་འབྱུང་བ་བཞིན་གསལ་བཏབ་ནས་གསན་པ་གནང་བར་ཞུ། དེ་ཡང་འོ་སྐོལ་གྱི་སྟོན་པ་ཚད་མེད་པའི་ཐུགས་རྗེ་ཆེན་པོ་དང་ལྡན་པ་སངས་རྒྱས་བཅོམ་ལྡན་འདས་འདི་ཉིད་ཀྱིས་གདུལ་བྱ་རྣམས་ཀྱི་བློ་ཡི་རིམ་པ་དང་འཚམས་པར་དམ་པའི་ཆོས་ཀྱི་ཕུང་པོ་བསམ་གྱིས་མི་ཁྱབ་པ་ཞིག་གསུངས་པ་དེ་ཉིད་ཕྱོགས་རིས་སུ་བསྡུ་ན་ཐེག་པ་ཆེ་ཆུང་གཉིས་སུ་འདུས་པ་ལས་འདིར་ཐེག་པ་ཆེན་པོ་ཡིན། དེ་ལ་ཡང་རྒྱུ་ཕ་རོལ་ཏུ་ཕྱིན་པའི་ཐེག་པ་དང་འབྲས་བུ་གསང་སྔགས་ཀྱི་ཐེག་པ་གཉིས་ཡོད་པ་ལས་འདིར་རྒྱུ་ཕ་རོལ་ཏུ་ཕྱིན་པའི་ཐེག་པ་ལས་ཀྱང་ཁྱད་ཆོས་དུ་མའི་སྒོ་ནས་ཁྱད་པར་དུ་འཕགས་པ་འབྲས་བུ་གསང་སྔགས་ཀྱི་ཐེག་པ་ཡིན། དེ་ལའང་སྔ་འགྱུར་རྙིང་མ་དང་ཕྱི་འགྱུར་གསར་མ་གཉིས་སུ་ཡོད་པ་ལས། འདིར་སྔ་འགྱུར་རྙིང་མ་ཡིན། དེ་ལ་ཡང་བཀའ་མ་དང་། གཏེར་མ་དང་། ཞལ་གཟིགས་ཀྱི་ཆོས་དང་གསུམ་ཡོད་པ་ལས། འདིར་ཞལ་གཟིགས་ནས་བརྒྱུད་པའི་ཆོས་ཡིན། །དེ་ཡང་བོད་ཁམས་སེམས་ཅན་རྣམས་ཀྱི་མགོན་དང་སྐྱོབ་དང་དཔུང་གཉེན་གཅིག་པུར་གྱུར་པ་ནི། ཨོ་རྒྱན་གྱི་སློབ་དཔོན་པདྨ་འབྱུང་གནས་ཉིད་ཡིན་ལ། དེ་ཉིད་ཀྱིས་སྐལ་ལྡན་གྱི་སློབ་མ་རས་ཆེན་དཔལ་འབྱོར་བཟང་པོ་ལ་དངོས་སུ་གནང་བའི་ཚེ་དབང་ཟབ་མོ་ཉེ་རྒྱུད་ཁྱད་པར་དུ་འཕགས་པ་འདི་ཡིན། འདིའི་ལོ་རྒྱུས་ནི། བོ་དོང་ཕྱོགས་ལས་རྣམ་རྒྱལ་གྱི་ཉེ་གནས་རས་ཆེན་དཔལ་འབྱོར་བཟང་པོས་ཙཱ་རི་ཟིལ་ཆེན་ཕུག་དང་། གནས་ཆེན་ཟ་ཕུ་ལ་སོགས་པ་རྣམས་སུ་སྒྲུབ་པ་ལོ་འགའ་མཛད་པ་ལ། གསང་སྔགས་ཕྱི་ནང་གི་ཡི་དམ་གྱི་ལྷ་མང་པོས་ཞལ་གཟིགས། ཁྱད་པར་འཇའ་ལུས་རྡོ་རྗེའི་སྐུ་བརྙེས་པ་སློབ་དཔོན་ཆེན་པོ་པདྨ་འབྱུང་གནས་ཀྱིས་རང་ཞལ་སྒྲིབ་མེད་དུ་བསྟན་ནས་ཚེ་དབང་ཁྱད་པར་ཅན་འདི་གནང་ཞིང་། དེ་ནས་རིམ་པར་བརྒྱུད་དེ་ད་ལྟའི་བར་བར་མ་ཆད་པ་ལས་བྱུང་བའི་ཚེ་དབང་ཟབ་མོ་བསྐུལ་བ་ལ་སློབ་དཔོན་གྱི་བྱ་བ་དང་སློབ་མའི་བྱ་བ་གཉིས་ལས། དང་པོ་སློབ་དཔོན་གྱིས་བགྱི་བར་འོས་པ་རྣམས་སྔོན་དུ་ལེགས་པར་གྲུབ་ཟིན་པས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་སློབ་མའི་བྱ་བ་ལ། ཐོག་མར་ད་ལྟར་གྱི་སློབ་དཔོན་འདི་ཉིད་མགོན་པོ་ཚེ་དཔག་ཏུ་མེད་པ་ཡབ་ཡུམ་དུ་གསལ་བ་ལ་ཚེ་དབང་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བ་ཞུ། དེ་ལྟར་མཎྜལ་ཕུལ་ནས། སློབ་དཔོན་ལ་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། ཀུན་མཁྱེན་ཡེ་ཤེས་སོགས་ནས་གནང་བར་མཛོད། ཅེས་པས་གསོལ་བ་བཏབ་ནས། རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་ཏུ་མཛད་པར་ཞུ། གནས་ཁང་འདི་ཉིད་ཡེ་ཤེས་ཀྱི་རང་སྣང་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། ཚེ་དཔག་མེད་ལྷ་བཅུ་བདུན་མའི་ལྷ་ཚོགས་ལ་རྩ་བའི་བླ་མ་དང་དབྱེར་མེད་པའི་མ་ཧཱ་གུ་རུ་སྟེ་ཨོ་རྒྱན་པདྨའི་རིགས་བདག་དང་བཅས་པའི་མཐའ་སྐོར་དུ་ཕྱོགས་བཅུའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་དང་། མཚམས་རྣམས་དང་འོག་གི་ཆ་ལ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་ཐམས་ཅད་ཀྱིས་རང་རེ་རྣམས་ལ་དབང་བསྐུར་བར་བྱེད་པ་ལ་བར་དུ་གཅོད་པའི་གདོན་བགེགས་རྣམས་ཚར་གཅོད་པའི་ཕྱིར་ཧཱུྃ་ཕཊ་ཀྱི་སྒྲ་སྒྲོགས་པ་སྤྲིན་གྱི་ཕུང་པོ་གཏིབས་པ་ལྟར་གསལ་བཏབ་ལ། དེ་རྣམས་ཀྱི་སྤྱན་སྔར་རང་དང་མཐའ་ཡས་པའི་སེམས་ཅན་ཐམས་ཅད་འཁོད་ནས་ཚེ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། དཀོན་མཆོག་གསུམ་ལ་སོགས་ནས་འགྲུབ་པར་ཤོག །ཅེས་དང་། སླར་ཡང་འདི་རང་ནས་བཤད་པའི་ཡན་ལག་བདུན་པ་འདིའི་རྗེས་ཟློས་ཀྱང་ལན་གསུམ་གྱི་བར་དུ་མཛད་པར་ཞུ། མ་ཧཱ་གུ་རུ་ཨོ་རྒྱན་པདྨ་དང་། །ནས། བླ་མེད་བྱང་ཆུབ་ཆེན་པོར་བསྔོ་བར་བགྱི། །ཞེས་པས་རྒྱུད་དག་པར་བྱས་ནས། དེ་ནས་དབང་བསྐུར་བ་ལ་ཡང་དཔོན་སློབ་ཀུན་གྱིས་ཐུན་མོང་དུ་དཀྱིལ་འཁོར་སྒྲུབ་པ་དང་། །གསལ་འདེབས་པའི་དམིགས་པ་འདི་བཞིན་མཛད་ཅིང་རྗེས་ཟློས་ཀྱང་མཛད་པར་ཞུ། སྐད་ཅིག་ཙམ་གྱིས་རྡོ་རྗེ་ཆེན་པོའི་ནང་། ཞེས་པ་ནས། མེ་ཏོག་ཕྲེང་བ་ལྟ་བུས་བསྐོར་བར་བཞུགས། །ཞེས་པས་དཀྱིལ་འཁོར་གསལ་བཏབ་ཅིང་། དུག་གསུམ་གྱི་རྣམ་རྟོག་ཕྱིར་འབུད་པ་དང་། རླུང་ཁ་སྦྱོར་དུ་འཛིན་པའི་སླད་དུ་འདིའི་རྗེས་ཟློས་མཛོད། རླུང་རོ་ལན་གསུམ་ཕྱིར་ལ་སོགས་ནས་ཁ་སྦྱར་བཟུང་། ཞེས་དང་། དེ་ནས་ཁྱེད་རང་རྣམས་ཀྱིས་དམིགས་པ་འདི་བཞིན་མཛད་པར་ཞུ། སྣ་གཡས་ནས་རླུང་ཕྱིར་བུས་པས་ཉོན་མོངས་པ་ཞེ་སྡང་གི་རྟོག་པ་སྔོ་བུན་བུན་ཕྱིར་ཐོན་པའི་མོས་པ་བྱས་ནས་སྣ་གཡས་ནས་རླུང་ལན་གཅིག་འབུད་པར་ཞུ། བྱས་ལ་དཔོན་སློབ་ཐམས་ཅད་ཀྱིས་རླུང་ལན་གཅིག་འབུད། ཡང་སྣ་གཡོན་ནས་རླུང་ཕྱིར་བུས་པས་ཉོན་མོངས་པ་འདོད་ཆགས་ཀྱི་རྟོག་པ་ཐམས་ཅད་དམར་བུན་བུན་ཕྱིར་ཐོན་པའི་མོས་པ་བྱས་པས། སྣ་གཡོན་ནས་རླུང་ལན་གཅིག་འབུད་པར་ཞུ། ཐམས་ཅད་ཀྱིས་འབུད། ཡང་དབུས་ནས་རླུང་ཕྱིར་བུས་པས། ཉོན་མོངས་པ་གཏི་མུག་གི་རྟོག་པ་ཐམས་ཅད་ཕྱིར་ནག་བུན་བུན་ཐོན་པའི་མོས་པ་བྱས་ནས་དབུས་ནས་ལན་གཅིག་འབུད་པར་ཞུ། བྱས་ལ་ཐམས་ཅད་ཀྱིས་འབུད། དེ་ནས་འོག་རླུང་བསྐུམས་ཏེ། སྟེང་རླུང་མནན་ནས་སྙིང་གར་རླུང་བུམ་པ་ཅན་འཛིན་པར་ཞུ། བྱས་ལ་ཐམས་ཅད་ཀྱིས་རླུང་ཁ་སྦྱར་འཛིན། དེ་ནས་རང་གི་སྙིང་གའི་རྣམ་ཤེས་པདྨ་འདབ་མ་བརྒྱད་པའི་རྣམ་པ་ཁ་བྱེ་བའི་ཟེའུ་འབྲུའི་སྟེང་གི་ཨཱཿལས་འོད་ཟེར་ཕྱོགས་བཅུར་འཕྲོས་པས་མདུན་གྱི་ནམ་མཁར་མ་ཧཱ་གུ་རུ་ཨོ་རྒྱན་པདྨ་རིགས་བདག་ཏུ་བཞུགས་པའི་པདྨའི་རིགས་ཀྱི་ལྷ་ཚེ་དཔག་མེད་ལྷ་བཅུ་བདུན་ལ་ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཡེ་ཤེས་ཀྱི་སྤྱན་དང་ལྡན་པ་རྣམས་སྤྲིན་གྱི་ཕུང་པོ་འཐིབས་པ་ལྟར་བྱོན་པར་བསམས་ནས་འདིའི་རྗེས་ཟློས་མཛོད། སྙིང་གའི་རྣམ་ཤེས་སོགས་ནས་བྱོན་པར་གྱུར། །ཅེས་བརྗོད། དེ་ནས་ནམ་མཁར་བྱོན་པའི་ལྷ་ཚོགས་རྣམས་ལ་དམིགས་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་མཛད་བར་ཞུ། བཅོམ་ལྡན་མགོན་པོ་སོགས་ནས། དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས་གུ་རུའི་བུམ་པ་ནས་ཚེ་དཔག་མེད་ཀྱི་བུམ་པར་བདུད་རྩི་བབས། དེ་ཉིད་ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་མར་བབས་ཏེ་སྙིང་གར་ཐིམ་པས་འཆི་མེད་ཚེའི་དངོས་གྲུབ་ཐོབ་ཅིང་། ཡེ་ཤེས་སེམས་དཔའ་ནམ་མཁར་སྤྱན་དྲངས་པ་རྣམས་དམ་ཚིག་གི་དཀྱིལ་འཁོར་ལ་གཉིས་སུ་མེད་པར་ཐིམ་པའི་མོས་པ་མཛད་ནས་འདིའི་རྗེས་ཟློས་མཛོད། དམ་ཚིག་སེམས་དཔའི་སོ་སོའི་ལྷ་ཚོགས་སོགས་ནས། བདག་པོར་གྱུར་ཞེས་དང་། དེ་ལྟར་དམ་ཡེ་དབྱེར་མེད་པའི་གཙོ་བོའི་སྤྱི་གཙུག་ཏུ་མ་ཧཱ་གུ་རུ་རིགས་བདག་གི་ཚུལ་དུ་བཞུགས་པའི་གཙོ་བོའི་ཐུགས་ཀའི་ཨཱཿཡིག་གི་འོད་ཟེར་ལས་སྙིང་པོའི་སྔགས་ཀྱི་འཁོར་ལོ་རང་སྒྲ་སྒྲོགས་བཞིན་པར་བྱུང་བ་ལས། དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཀུན་གྱི་ཐུགས་རྗེ་དང་བྱིན་རླབས་དང་ཁམས་གསུམ་སེམས་ཅན་མ་ལུས་པའི་ཚེ་དང་བསོད་ནམས་དཔལ་དང་འབྱོར་པ་རྣམས་བསྡུས་ནས་རང་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པའི་མོས་པ་མཛད་ནས་འདིའི་རྗེས་ཟློས་མཛོད། དེ་ལྟར་ལྷ་ཚོགས་གསལ་བར་བསྒོམས་པ་ཡི། །སོགས་ནས། ཡབ་ཡུམ་ཞལ་ནས་སྙིང་པོ་སྔགས་འདི་བཟླས། ཨོཾ་ཨཱཿཧཱུྃ་བཛྲ་རཏྣ་ཨཱ་ཡུ་ཥེ་ཧཱུྃ་བྷྲཱུྃ། ཚེ་བྷྲཱུྃ། གཡུ་བྷྲཱྃ། ནྲྀ་བྷྲཱུྃ། བནྡྷ་བྷྲཱུྃ། ཨཱ་ཡུརྫྙཱ་ན་བྷྲཱུྃ། ཨོཾ་ཨ་མ་ར་ཎི་ཛཱི་བནྟི་སིདྡྷི་ཕ་ལ་ཧཱུྃ། དེ་ལྟར་ལྷ་དང་སྔགས་ལས་འོད་ཟེར་འཕྲོས། །སོགས་ནས། འཆི་མེད་ཡེ་ཤེས་ཚེ་ཡི་ངོ་བོར་གྱུར། །ཞེས་རྗེས་ཟློས་ལན་ཅིག་བྱེད་དུ་གཞུག །དེ་ནས་སློབ་དཔོན་གྱིས་བཟླས་པ་བྱ་བ་ནི། ཨོཾ་ཨཱཿཧཱུྃ་བཛྲ་རཏྣ་སོགས་ཚེ་གཟུངས་ཇི་ལྟར་རིགས་པ་བཟླ། དེ་ནས་རྫོགས་རིམ་བསྒོམ་པ་ནི། ཁྱེད་རང་རྣམས་སེམས་མ་བཅོས་པ་སྤྲོས་བྲལ་འོད་གསལ་ཆེན་པོའི་ངང་ལ་ཅུང་ཟད་མཉམ་པར་འཇོག་པར་ཞུ། ཞེས་བརྡ་སྤྲད་ལ། དཔོན་སློབ་ཀུན་གྱིས་ཅུང་ཟད་མཉམ་པར་བཞག །ཡང་སློབ་དཔོན་ཀྱིས་ཚེ་གཟུངས་ཚར་ལྔ་ཙམ་བཟླས་ལ། ཚེ་མདའི་སྟོང་ནས་མདེའུ་བར་ལ་སློབ་དཔོན་གྱིས་ཕུ་བཏབ། ཚེ་གཟུངས་འདོན་བཞིན་པས་སློབ་མ་ལའང་དེ་བཞིན་བྱེད་དུ་བཅུག །དེ་ནས་སློབ་མ་རྣམས་རིམ་བཞིན་སྨྱུག་མའི་རྩ་བ་ནས་ལྟོང་གི་བར་ལ་ལག་པའི་མཐོ་འདེབས་ལ་སོ་སོའི་མཐོ་ཚད་ཇི་ཙམ་བྱུང་བ་དེ་དོན་ལ་འཛིན་དུ་བཅུག །དེ་ནས་སློབ་དཔོན་གྱིས་མདའ་དར་བཟུང་ལ་གཡོབ་བཞིན་པ་དང་བཅས། བཅོམ་ལྡན་མགོན་པོ་ཚེ་དཔག་མེད། །ཤར་ཕྱོགས་དྲི་ཟའི་ལག་ནས་ཞེས་པ་ནས་ལས་ཀུན་འགྲུབ་པའི་ཚེ་ཁུག་ཅིག །ཅེས་པའི་བར་གོང་བཞིན་བརྗོད་ལ་ཚེ་ཁུག་ཅིག་ཅེས་པའི་ཚེ་མདའ་དར་གཡོབ། དེ་ནས་སློབ་དཔོན་གྱིས་ཚེ་སྒྲུབ་ཀྱི་སྔགས་དེ་ཅི་རིགས་བཟླས་རྗེས་ཚེ་མདའ་ལ་སྔགས་ཆུ་རྡེག་ཅིང་། དེ་ནས་སློབ་མ་རྣམས་ལ། སྔ་མ་བཞིན་མདའ་ལ་མཐོ་ཚད་གཞལ་དུ་བཅུག་ལ། སོར་གཅིག་དང་གཉིས་ལ་སོགས་པ་ཆད་ན་ཅུང་ཟད་ངན་པ་ཡིན་པས་ཚེ་དབང་ཞུ་བ། ཚེ་སྒྲུབ་བྱ་བ། གསོད་པར་ངེས་པའི་སེམས་ཅན་གྱི་ཚེ་སྐྱབས་པ་སཱཙྪ་གདབ་པ་ལ་སོགས་པ་ཚེ་འཕེལ་བའི་ཐབས་ལ་འབད་པར་བྱའོ། །སོར་གཅིག་དང་གཉིས་ལ་སོགས་པ་འཕེལ་ན་མདའ་འཕེལ་བ་བཞིན་དུ་ཚེ་འཕེལ་བ་ཡིན་པས་བཟང་བ་ཡིན་ནོ། །ཞེས་བརྗོད། དེ་ནས་དབང་གི་དངོས་གཞི་ལ་ཐོག་མར་གསོལ་བ་འདེབས་པ་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། འཇའ་ལུས་བུམ་པའི་སོགས་ནས། རྩལ་དབང་བསྐུར་དུ་གསོལ། །ཞེས་གསོལ་བ་བཏབ་ནས། ཚེ་དཔག་མེད་རིགས་ལྔ་རྣམས་རིམ་པ་བཞིན་བྱོན་ནས་དབང་བསྐུར་བའི་མོས་པ་བྱ་དགོས་པ་ལས། ཁྱེད་རང་རྣམས་དམིགས་པ་འདི་བཞིན་མཛོད། བླ་མ་དང་མདུན་བསྐྱེད་ཀྱི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་ཀ་ནས་བྱེ་བ་གྱུར་པའི་སྐུར་བྱེད་ནམ་མཁའི་དཀྱིལ་འཁོར་རྣམས་ཚེ་དཔག་མེད་དཀར་པོ་ཕྱག་ན་ཚེའི་བུམ་པ་ཐོགས་པ་བསམ་གྱིས་མི་ཁྱབ་པ་ནམ་མཁའ་གང་བར་བྱོན་ནས། དེ་རྣམས་དང་སློབ་དཔོན་ལྷན་ཅིག་པས་བུམ་པ་བདུད་རྩིས་གང་བ་ཁྱེད་རང་རྣམས་ཀྱི་སྤྱི་བོར་བཞག་ནས་དབང་བསྐུར་བའི་མོས་པ་མཛོད། ང་ནི་རྣམ་སྣང་ཚེ་དཔག་མེད། །སངས་རྒྱས་ཀུན་དང་ལྷན་ཅིག་ཏུ། །ལུས་ལ་རྣམ་སྣང་ཚེ་དབང་བསྐུར། །བུ་ཁྱོད་འཆི་བདག་ལས་གྲོལ་ཏེ། །བསྐལ་བ་སྟོང་དུ་ཚེ་འཕེལ་ཞིང་། །སྲོག་གཅོད་སྒྲིབ་པ་དག་གྱུར་ཅིག །ཨོཾ་བུདྡྷ་ཨ་བྷི་ཥིཉྩ་ཧཱུྃ། ཞེས་བརྗོད་ཅིང་བུམ་པའི་ཆུ་སྦྱིན། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་ལུས་ཀྱི་ཆ་ཤས་ཐམས་ཅད་འཆི་མེད་ཡེ་ཤེས་ཀྱི་བདུད་རྩིས་གང་བས་དྲི་མ་ཐམས་ཅད་དག །ཁྱད་པར་དུ་སྐྱེ་བ་སྔ་མ་རྣམས་སུ་ཉོན་མོངས་པ་གཏི་མུག་གིས་ཀུན་ནས་བསླངས་ཏེ་སེམས་ཅན་གྱི་སྲོག་བཅད་པ་ལ་བརྟེན་ནས་ཚེ་ཐུང་བར་གྱུར་པའི་ལས་སྒྲིབ་ཅི་བསགས་པ་ཐམས་ཅད་དག་ནས་རྣམ་སྣང་ཚེ་དཔག་མེད་ཀྱི་ཚེ་ཡི་དངོས་གྲུབ་ཐོབ་བྱུང་སྙམ་པའི་མོས་པ་མཛོད། འདི་མན་གྱི་རིགས་གཞན་བཞི་ལ་སྐུ་མདོག་བསྒྱུར་བ་མ་གཏོགས་སྔ་མའི་རིགས་འགྲེས་གྱིས་ཤེས་པར་འགྱུར་པས། སླར་ཡང་དམིགས་པ་འདི་བཞིན་མཛོད། བླ་མ་དང་མདུན་བསྐྱེད་ཀྱི་སོགས་ནས་འདི་རྣམས་དང་སློབ་དཔོན་ལྷན་ཅིག་པས་བུམ་པ་དཔྲལ་བར་བཞག་ནས་དབང་བསྐུར་བའི་མོས་པ་མཛོད། ང་ནི་མི་བསྐྱོད་ཚེ་དཔག་མེད། །ཅེས་སོགས་ནས། ཨོཾ་བཛྲ་ཨ་བྷི་ཥིཉྩ་ཧཱུྃ། བུམ་ཆུ་བླུད་པ་སོགས་རིགས་འགྲེ། ཞེ་སྡང་གིས་ཀུན་ནས་བསླངས་ཏེ་སྲོག་བཅད་པ་ལ་སོགས་དང་། མི་བསྐྱོད་པའི་ཚེའི་དངོས་གྲུབ་ཐོབ་སོགས། སླར་ཡང་དམིགས་པ་འདི་བཞིན་མཛོད། བླ་མ་དང་སོགས་ནས་དེ་རྣམས་དང་སློབ་དཔོན་ལྷན་ཅིག་པས་བུམ་པ་རྣ་ལྟག་གཡས་སུ་བཞག་ནས་དབང་བསྐུར་བའི་མོས་པ་མཛོད། ང་ནི་རིན་འབྱུང་སོགས། ཨོཾ་རཏྣ་སོགས། ཁྱད་པར་སྐྱེ་བ་སྔ་མ་རྣམས་སུ་ང་རྒྱལ་དང་སེར་སྣས་ཀུན་ནས་བསླངས་ཏེ་གཞན་གྱི་སྲོག་བཅད་པ་ལ་བརྟེན་ནས་སོགས༴ རིན་ཆེན་འབྱུང་ལྡན་ཚེ་ཡི་དངོས་གྲུབ་ཐོབ། སླར་ཡང་དམིགས་པ་འདི་བཞིན་མཛོད། བླ་མ་དང་སོགས་ནས་དེ་རྣམས་དང་སློབ་དཔོན་ལྷན་ཅིག་པས་བུམ་པ་ལྟག་པར་བཞག་ནས་དབང་བསྐུར་བའི་མོས་པ་མཛོད། ང་ནི་པདྨ་ཚེ་དཔག་མེད་སོགས་འདོད་ཆགས་ཀྱིས་ཀུན་ནས་བསླངས་ཏེ་གཞན་གྱི་སྲོག་བཅད་པ་ལ་བརྟེན་ནས་སོགས༴ འོད་དཔག་མེད་ཀྱི་ཚེ་ཡི་དངོས་གྲུབ་ཐོབ། སླར་ཡང་དམིགས་པ་འདི་བཞིན་མཛོད། བླ་མ་དང་སོགས་ནས་དེ་རྣམས་དང་སློབ་དཔོན་ལྷན་ཅིག་པས་བུམ་པ་བདུད་རྩིས་གང་བ་རྣ་ལྟག་གཡོན་དུ་བཞག་ནས་དབང་བསྐུར་བའི་མོས་པ་མཛོད། ང་ནི་དོན་ཡོད་ཚེ་དཔག་མེད་སོགས་ནས། ཨོཾ་ཀརྨ་ཨ་བྷི་ཥིཉྩ་ཧཱུྃ། བུམ་ཆུ་སྦྱིན། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་བས་ལུས་ཀྱི་ཆ་ཤས་ཐམས་ཅད་འཆི་མེད་ཡེ་ཤེས་ཀྱི་བདུད་རྩིས་གང་། དྲི་མ་ཐམས་ཅད་དག །ཁྱད་པར་དུ་སྐྱེ་བ་སྔ་མ་རྣམས་སུ་ཉོན་མོངས་པ་ཕྲག་དོག་གིས་ཀུན་ནས་བསླངས་ཏེ་སེམས་ཅན་གྱི་སྲོག་བཅད་པ་ལ་བརྟེན་ནས་སྐུ་ཚེ་ཐུང་བར་གྱུར་པའི་ལས་སྒྲིབ་ཅི་བསགས་པ་ཐམས་ཅད་དག །དོན་ཡོད་གྲུབ་པའི་ཚེ་ཡི་དངོས་གྲུབ་ཐོབ་པའི་མོས་པ་མཛོད། ཅེས་རིགས་ལྔའི་དབང་བསྐུར། དེ་ནས་ཁྱེད་རང་རྣམས་ཀྱི་སྤྱི་བོར་ཚེ་དཔག་མེད་ཚོན་གང་བ་གཅིག་གསལ་བཏབ་ནས། དེ་ལ་གུས་འདུད་བྱས་པས། དེའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས། དུས་གསུམ་གྱི་སངས་རྒྱས་ཐམས་ཅད་ཀྱི་ཚེ་དང་ཡེ་ཤེས་ཐམས་ཅད་ཧཱུྃ་ཡིག་དཀར་དམར་གྱི་རྣམ་པར་སྤྱན་དྲངས། དེ་ཉིད་ལ་ཐིམ། དེ་ཉིད་ཀྱང་འོད་དུ་ཞུ་ནས། སྤྱི་བོའི་ཚངས་བུག་ནས་མར་ཞུགས། རང་རང་གི་སྙིང་གའི་ནང་དུ་དབུས་སུ་རྣམ་སྣང་ཚེ་དཔག་མེད། ཤར་དུ་མི་བསྐྱོད་ཚེ་དཔག་མེད། ལྷོར་རིན་འབྱུང་ཚེ་དཔག་མེད། ནུབ་ཏུ་པདྨ་ཚེ་དཔག་མེད། བྱང་དུ་དོན་ཡོད་ཚེ་དཔག་མེད་རྣམས་ཀྱི་སྐུར་གྱུར་པ། སླར་ཡང་ཚེ་དཔག་མེད་དེ་རྣམས་འོད་དུ་ཞུ་ནས་ལུས་ཐམས་ཅད་ཁྱབ། འཆི་མེད་ཚེའི་རྡོ་རྗེའི་ངོ་བོར་གྱུར་པའི་ཚེ་ཆུ་དེ་ཉིད་གྱེན་དུ་ཕྱུར་བས་ཁྱོད་རང་རྣམས་ཀྱི་སྨིན་མཚམས་ཡན་ཆད་གང་བས་བུམ་དབང་ཐོབ། མགྲིན་པ་ཡན་ཆད་གང་བས་གསང་དབང་ཐོབ། སྙིང་ག་ཡན་ཆད་གང་བས་ཤེར་དབང་ཐོབ། གསང་གནས་སམ་རྐང་མཐིལ་ཡན་ཆད་གང་བས་ཚིག་དབང་རིན་པོ་ཆེ་བཞི་པ་དང་། རིག་པའི་རྩལ་དབང་ཐོབ་ནས་ཁྱེད་རང་རྣམས་ཡེ་ཤེས་ཚེ་དཔག་མེད་ཀྱི་ངོ་བོར་གྱུར་པའི་མོས་པ་མཛོད། དེ་ཉིད་བརྟན་པའི་སླད་དུ་སློབ་དཔོན་གྱིས་ཁྱེད་རང་རྣམས་ཀྱི་སྤྱི་བོར་རྡོ་རྗེ་བཞག་སྟེ་བརྟན་པར་བྱས་པའི་མོས་པ་མཛོད། ང་ནི་ཡེ་ཤེས་ཚེ་དཔག་མེད་སོགས་ནས་ཚེ་ཡི་རིག་འཛིན་བརྙེས། །དེས་དབང་གི་དངོས་གཞི་གྲུབ་ནས། མཐའ་རྟེན་ལ་འབྱོར་པ་ཐོབ་ཅིང་བཀྲ་ཤིས་པར་བྱ་བའི་སླད་དུ་རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་ཀྱི་དབང་བསྐུར་བ་ལ་ཐོག་མར་འཁོར་ལོ་རིན་པོ་ཆེ་ལག་ཏུ་ཐོགས་ཏེ་དབང་བསྐུར་བའི་མོས་པ་མཛོད། ལྷ་རྫས་ལས་གྲུབ་སོགས་ནས། རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་རྣམས་ཚེ་དབང་ལྷ་དགུ་མ་ལྟར་བྱ། དེ་ནས། ཨོཾ་ཨཱཿཧཱུྃ་ཨ་མཱ་ར་ཎི་ཛཱི་བནྟི་སིདྡྷི་ཕ་ལ་ཧཱུྃ། ཞེས་ཡང་ཡང་བརྗོད་འདིར་ཚེ་གཏོར་གྱི་དབང་བསྐུར་མཆན་ཅིང་། སློབ་དཔོན་གྱིས་སློབ་མ་རྣམས་ལ་ཚེ་རིལ་དང་ཚེ་ཆང་སྟེར། དེ་རྣམས་ཀྱི་སྒོ་ནས་དབང་གི་དངོས་གཞི་མཐའ་རྟེན་དང་བཅས་པ་ལེགས་པར་གྲུབ་ནས། དེ་དག་གི་གནས་སྐབས་སུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་དུ་བགྱིད་སྙམ་པས་འདིའི་རྗེས་ཟློས་ལན་གསུམ་གྱི་བར་དུ་མཛད་པར་ཞུ། གཙོ་བོས་ཇི་ལྟར་སོགས་དང་། གཏང་རག་གི་མཎྜལ། དེང་ནས་བརྩམས་ཏེ་སོགས་གཞན་ནས་འབྱུང་བ་ལྟར་བྱ། དེ་རྣམས་ཀྱི་སྒོ་ནས་སློབ་དཔོན་ཆེན་པོ་པདྨ་འབྱུང་གནས་ཀྱིས་རས་ཆེན་དཔལ་འབྱོར་བཟང་པོ་ལ་དངོས་སུ་གནང་བའི་ཚེ་སྒྲུབ་ཟབ་མོ་མདའ་འཕེལ་མའི་དབང་བསྐུར་བ་ལེགས་པར་གསན་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་བཏང་ངོ་། །དེ་ནས་སློབ་དཔོན་གྱིས་མདུན་བསྐྱེད་པ་མཆོད་བསྟོད་དང་འདོད་པའི་དོན་ལ་གསོལ་བ་བཏབ། ཡིག་བརྒྱས་ལྷག་ཆད་ཁ་བསྐང་། ནོངས་པ་བཟོད་པར་གསོལ། རས་བྲིས་ཡིན་ན་རྟེན་བཞུགས་དང་། ཚོམ་བུ་ཡིན་ན། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱིས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་བསྡུས་ལ་གནས་གསུམ་བསྲུང་། དགེ་བ་བསྔོས་ལ་བཀྲ་ཤིས་ཀྱི་ཕྲེང་བས་མཐའ་བརྟན་པར་བྱའོ། །དེ་ལྟར་སློབ་དཔོན་པདྨ་འབྱུང་གནས་ཀྱིས། །གྲུབ་དབང་རས་ཆེན་དཔལ་འབྱོར་བཟང་པོ་ལ། །དངོས་སུ་གནང་བའི་ཚེ་དབང་སྐུར་བའི་ཚུལ། །དོན་གཉེར་ནོར་བུ་བཟང་པོས་བསྐུལ་བའི་ངོར། །ཐམས་ཅད་མཁྱེན་པ་སྔགས་འཆང་ཨཱ་ནནྡའི། །ཚེ་དབང་འཆི་མེད་ལྷུན་གྲུབ་སོར་བཞག་ནས། །མཆན་བུའི་གསལ་བྱེད་འགའ་ཡང་དཀྱུས་ཉིད་དུ། །བྲིས་ནས་ཤིན་ཏུ་གོ་བདེ་དོན་གསལ་འདི། །ཤཱཀྱའི་དགེ་སློང་བཟང་པོ་རྒྱལ་མཚན་གྱིས། །དངུལ་མདའ་ལྷུན་གྲུབ་སྟེང་གི་དགོན་པ་རུ། །ལྕགས་སྦྲུལ་དབྱུག་ཟླར་སྦྱར་བའི་ཡི་གེ་པ། །སངས་རྒྱས་དོན་གྲུབ་ཉིད་ཀྱིས་གུས་པས་བགྱིས། །བདག་བློ་རྨོངས་ཕྱིར་འདི་ལ་ནོངས་མཆིས་ན། །བླ་མ་ལྷར་བཅས་སྤྱན་སྔར་མཐོལ་ཞིང་བཤགས། །ལེགས་པའི་དངོས་པོ་གང་ཞིག་ཐོབ་པ་དེས། །ཚེ་དཔག་མེད་པའི་ཞལ་མཆོག་མཐོང་པར་ཤོག །འདིས་སེམས་ཅན་དཔག་ཏུ་མེད་པ་ལ་ཕན་ཐོགས་པར་གྱུར་ཅིག །སརྦ་དཱ་མངྒ་ལཾ། ། ༈
[edit]

tshe sgrub zab mo mda' 'phel ma'i tshe dbang bskur tshul 'chi med tshe'i dpal ster/ @#/_/tshe sgrub zab mo mda' 'phel ma'i tshe dbang bskur tshul 'chi med tshe'i dpal ster ces bya ba bzhugs so/__/na mo gu ru badz+ra A tsar+ya sa pa ri wA rA ya/__rnam 'dren rgyal ba tshe dpag med pa dang /__/dbyer med slob dpon pad+ma 'byung gnas la/__/gus pas btud nas tshe sgrub nye brgyud kyi/__tshe dbang bskur tshul bklag chog tshul du bri/__/de la 'dir slob dpon pad+ma 'byung gnas kyis ras chen dpal 'byor bzang po la dngos su gnang ba'i tshe dbang nye brgyud kyi phyag len ni/__lha bcu bdun gyi dkyil 'khor rdul tshon ma'am/__ras bris sam/__de ma 'byor na tshom bu tsam la brten pa'i phyag len kyang snang bas/__maN+Dal dri bzang gi thig le byas par tshom bu lha grangs dang mthun par bkod la stegs ji ltar rigs pa'i steng du bzhag__/de'i steng du many+dzi'i khar bum pa dri bzang gi chus gang ba kha rgyan dang bcas pa bsham/__rdor gzungs mi dgos/__de'i g.yas su tshe ril dang tshe chang /__g.yon du tshe mda' gtsang ma sngar longs ma spyad pa spos kyis bdug pa la dar dmar dang g.yu btags pa bsham/__de'i mthar chu gnyis sngon du 'gro ba'i nyer spyod kyis bskor/__mdun ngos su zlum gtor dmar po gcig__/nye logs ji ltar rigs par rin chen sna bdun dang /__bkra shis rdzas brgyad bsham/__de nas slob dpon rang nyid stan la 'khod nas/__mchod pa rnams/__oM badz+ra a mr-i tas bsang /__swA b+hA bas sbyang /__stong pa'i ngang oM las byung ba'i rin po che las grub pa'i snod yangs shing rgya che ba rnams kyi nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri mchog__/zhal zas/__rol mo rnams dwangs shing thogs pa med pa nam mkha'i mtha' klas par gyur/__ces dang so so'i phyag rgya dang bcas pas/__oM badz+ra ar+g+haM swA hA/__oM badz+ra pA d+yaM swA hA/__zhes sogs kyi mthar/__d+harma ra Ni ta dang rol mo byas te byin dbab/__de nas/__bdag dang 'gro ba nam mkha'i mtha' dang mnyam pa'i sems can thams cad sogs nas/__'phags pa'i dge 'dun rnams la skyabs su mchi'o/__/zhes skyabs 'gro nyer gcig sogs bya/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du tshe dpag med kyi bsgom bzlas nyams su blang bar bgyi'o/__/lan gsum/__sems can thams cad bde ba dang sogs tshad med bzhi bsgom/__rang nyid dang mdun gyi tshom bu bum pa gsum ka la dmigs te/__oM swa b+hA ba sogs kyis stong par sbyang /__stong pa'i ngang las gsum ka tha mi dad par bsgrub pa ni/__skad cig tsam gyis rdo rje chen po'i nang /__lte ba yangs shing rgya che ba'i/__/maN+Dal bum pa pho brang gzhal yas khang /__/'dab brgyad gru bzhi sgo bzhi lcags rir bcas/__/sna tshogs pad+ma nyi ma zla ba'i gdan/__de yi steng du rang byung AHgcig bsam/__/de las 'od 'phros 'khor 'das bcud bsdus nas/__/tshur 'dus AHlas rang nyid tshe dpag med/__/zhal gcig phyag gnyis sku mdog dmar la dwangs/__/gser dngul rin chen mu tig phreng bas brgyan/__/sna tshogs dar gyi na bza' sham thabs gsol/__/phyag gnyis mnyam bzhag bdud rtsi'i bum pa bsnams/__/de nyid pang na gnyis med gsang ba'i yum/__/zhal gcig phyag gnyis dmar mo bum pa 'dzin/__/rgyan dang cha lugs gtso bo yab dang mtshungs/__/de yi shar sogs pad nyi zla steng du/__/rdo rje mkha' 'gro rin chen mkha' 'gro dang /__/pad+ma mkha' 'gro las kyi mkha' 'gro rnams/__/mthing gi bum pa gser gyi bum pa dang /__/pad+ma rA ga in+d+ra nI la yi/__/bum pa rim bzhin tshe yis gang ba 'dzin/__/mtshams bzhi'i 'dab mar sgeg phreng glu gar rnams/__/sngo ser dmar ljang mdzes ldan bum pa bsnams/__/nang du zhal gzigs gtso bo'i zhal la blta/__/gru chad bzhi la mchod pa'i lha mo bzhi/__/me tog bdug pa snang gsal mchod yon bsnams/__/dkar ser dmar ljang gar stabs tshul gyis bzhugs/__/sgo bzhir lcags kyu zhags pa lcags sgrog dril/__/dkar ser dmar ljang sgeg pa'i tshul du bzhugs/__/de ltar lha rnams snang stong rang bzhin med/__/gsal stong 'ja' tshon lta bur gsal bar gyur/__/gtso bo yab yum gnyis med thugs ka ru/__/pad+ma snying gi ze'u 'bru lta bu'i steng /__/tshe yi ngo bo dkar la 'tsher ba la/__/yi ge AHni dkar pos mtshan par gyur/__/de la tshe yi snying po 'od dang ldan/__/me tog phreng ba lta bus bskor bar bzhugs/__/zhes brjod cing bsam/__rlung ro lan gsum phyi la sangs kyis bus/__/dug gsum rtog pa ma lus sangs kyis dag__/steng 'og rlung gnyis snying gar kha sbyar bzung /__/zhes brjod/__de nas rang gi dug gsum gyi rnam rtog kha dog sngon po dang dmar po dang nag po'i rim pas phyir thon par bsams la/__sna bug g.yas dang /__g.yon dang dbus gsum nas rlung lan re phyir sangs kyis 'bud/__de ltar lan gsum 'bud rjes bum pa can snying gar theng gcig bzung la/__ngag tu/__rang gi snying ga'i rnam shes pad+ma 'dab ma brgyad pa'i rnam par kha bye ba'i ze'u 'bru'i steng gi AHlas 'od zer phyogs bcur 'phros pas rang gi mdun gyi nam mkhar ma hA gu ru tshe dpag med kyi ye shes pa thams cad byon par gyur/__snying ga'i rnam shes pad+ma kha phye nas/__/AHlas 'od zer phyogs bcur 'phros pa yis/__/mdun gyi nam mkhar rang 'dra'i ye shes pa/__/ma hA gu ru tshe dpag med pa yi/__/rigs kyi lha tshogs thams cad byon par gyur/__/ces brjod cing bsam/__de la yan lag bdun pa 'bul ba ni/__ma hA gu ru o rgyan pad+ma dang /__/bcom ldan mgon po tshe dpag med pa yi/__/rigs kyi lha tshogs 'khor bcas thams cad la/__/kun nas bdag gis gus pas phyag 'tshal lo/__/dngos su bshams dang yid kyis rnam sprul pa'i/__/phyi nang gsang ba'i mchod sprin rgya mtsho rnams/__/kun tu bzang po'i mchod sprin rgya mtsho ltar/__/bdag gis ma lus kun la dbul bar bgyi/__/'khor ba thog ma med pa'i dus nyid nas/__/da lta'i dus kyi lus ngag yid gsum gyis/__/phra rag sbom gsum sdig pa ci bgyis pa/__/bdag nyid gnong zhing 'gyod pa'i sgo nas bshags/__/dus gsum rgyal ba'i yon tan dpag med dang /__/sems can kun gyi dad dang brtson 'grus kyi/__/bsod nams ye shes tshogs gnyis mthar thug pa'i/__/dge ba kun la'ang bdag ni rjes yi rang /__/dus gsum 'gyur med rdo rje tshe yi lha/__/kun la khyab pa byams chen thugs rje'i dpal/__/byin rlabs chen po'i sku gsum phrin las kyis/__/chos kyi 'khor lo bskor bar bdag gis bskul/__/sku gsum phrin las rgyun chad med pa ru/__/ji srid 'khor ba'i rgya mtsho ma stong bar/__/mkha' mnyam sems can kun gyi don gyi phyir/__/mya ngan mi 'da' bzhugs par gsol ba 'debs/__/bcom ldan khyod la phyag 'tshal mchod sogs pa'i/__/'gro kun dge ba'i rtsa ba'i ji snyed pa/__/rnam mkhyen kun mkhyen go 'phang thob bya'i phyir/__/bla med byang chub chen por bsngo bar bgyi/__/zhes pa lan gsum mam gcig brjod la/__de nas gsol ba gdab pa ni/__nam mkhar byon pa rnams la dmigs nas/__bcom ldan mgon po tshe dpag med pa yi/__/rigs kyi lha tshogs 'khor bcas thams cad kyis/__/sgrub mchog bdag la dbang dang byin rlabs pa'i/__/rdo rje tshe mchog dngos grub stsal du gsol/__/zhes lan gsum gsol ba btab pas/__gu ru'i bum pa nas tshe dpag med kyi bum par bdud rtsi babs pa de nyid bdag gi tshangs pa'i bu ga nas mar babs te/__tshe dpag med rigs lnga bdag mdun tha mi dad kyi spyi gtsug tu byon pas dbang bskur bar bsam zhing /__dam tshig sems dpa' so so'i lha tshogs la/__/ye shes sems dpa' dgug gzhug gnyis med bstim/__/gnyis med dgyes pa lha yi spyi gtsug tu/__/ma hA gu ru rigs kyi bdag por gyur/__/ces pas dam ye dbyer med du gyur par bsam/__de ltar bdag mdun tha mi dad kyi lha tshogs kun gsal bar bsgoms pa'i gtso bo'i thugs ka'i AHyig gi 'od zer las snying po'i sngags kyi 'khor lo'i rang sgra sgrogs bzhin pa byung ba las/__dus gsum gyi sangs rgyas dang byang chub sems dpa' kun gyi thugs rje dang byin rlabs dang /__khams gsum gyi sems can ma lus pa'i tshe dang bsod nams dpal dang 'byor ba rnams bsdus nas rang la thim pas 'chi med tshe'i dngos grub thob par bsam zhing /__de ltar lha tshogs gsal bar bsgom pa yi/__/gtso bo'i thugs ka'i a yi 'od zer las/__/snying po'i sngags 'khor rang sgra byung ba las/__/yab yum zhal nas snying po'i sngags 'di bzlas/__/tshe gzungs tshar gsum brjod/__de nas lha dang sngags las 'od zer 'phros/__/dus gsum sangs rgyas kun gyi thugs bcud dang /__khams gsum sems can kun gyi tshe dpal rnams/__/bsdus nas tshur 'dus rang la thim pa yis/__/'chi med ye shes tshe yi ngo bor gyur/__/ces brjod cing bsam/__oM AHhU~M badz+ra rat+na A yu She hU~M b+h+rU~M/__tshe b+hU~M/__g.yu b+h+rU~M/__nr-i b+h+rU~M/__b+hin+d+hU b+h+rU~M/__A yur+dz+nyA na b+h+rU~M/__oM a mAr Ni dzI ban+ti sid+d+hi pha la hU~M/__zhes pa'i sngags ci nus bzla/__de nas rdzogs rim bsgom pa ni/__snod bcud srung 'khor gzhal yas khang 'khor gyi lha rnams dang bcas pa rang gtso bo yab yum la thim/__yab thugs ka'i AHla thim/__AHyang nam mkha' la du ba yal ba bzhin chos sku skye ba med pa ma bcos spros bral 'od gsal chen por thim/__zhes brjod cing de'i ngang la cung zad mnyam par bzhag__/slar yang chu las nya 'phar ba'i tshul gyis rang nyid tshe dpag med gtso 'khor bcas pa mngon sum lta bur gsal bar gyur/__de ltar rang nyid bdag mdun dbyer med pa'i thugs ka'i AHlas 'od zer 'phros pas/__mdun gyi nam mkhar ma hA gu ru tshe dpag med kyi ye shes pa'i lha tshogs thams cad byon par gyur/__ces brjod cing bsams la/__tshe mda' slob dpon rang nyid kyis mtho tshad bzung zhing /__gong gi tshe gzungs ci mang bzlas la mda' la phu btab cing tshe 'gugs pa ni/__mdar dar bzung la g.yob bzhin pa dang bcas pas/__bcom ldan mgon po tshe dpag med/__shar phyogs dri za'i lag nas tshe khug cig__/khug cig khug cig tshe khug cig__/stsol cig stsol cig tshe stsol cig__/ye shes tshe yi dngos grub stsol/__/bcom ldan mgon po=__shar lho me lha'i lag nas=__sham bu gong dang 'dra/__bcom ldan=__lho phyogs gshin rje'i lag nas=__sogs=__bcom ldan=__lho nub srin po'i=__sogs=__bcom ldan=__nub phyogs chu lha'i=__sogs=__bcom ldan=__nub byang rlung lha'i=__sogs=__bcom ldan=__byang phyogs gnod sbyin=__sogs=__bcom ldan=__byang shar dbang ldan=__sogs=_/dbang po brgya byin lag nas=__sogs=__lha mo brtan ma'i=__sogs=__o rgyan pad+ma'i lag=__sogs=__man+dA ra ba'i lag=__sogs 'gre'o/__/shar rdo rje rigs kyi mkha' 'gro ma/__/sku mdog sngon mo mdangs dang ldan/__/phyag na tshe yi bum pa bsnams/__/'khor du sngon mo 'bum gyis bskor/__/bcu drug lon pa'i na tshod can/__/rdo rje rigs kyi tshe khug cig__/lho rin chen rigs kyi mkha'=__sku mdog ser mo=__phyag na=__'khor du ser mo=__bcu drug=__rin chen rigs=__nub pad+ma rigs kyi mkha' 'gro ma/__sku mdog dmar mo=__phyag na=__'khor du dmar mo=__bcu drug=__pad+ma rigs kyi=__byang las kyi rigs kyi=__sku mdog ljang khu=__phyag na=__'khor du ljang mo=__bcu drug=__las kyi rigs kyi=__dgos 'dod 'byung ba'i tshe khug cig__/skyon gyis ma gos tshe khug cig__/mi 'gyur brtan pa'i tshe khug cig__/las kun 'grub pa'i tshe khug cig__/ces brjod cing 'dir yang gzungs mang du bzlas la tshe mda' la phu btab cing /__rang gis mtho tshad gzhal bas sor gcig sogs 'phel na bzang ngo /__/yang na gong du dkyil 'khor ma bsdus par 'grub 'phral sems ma bcos pa spros bral 'od gsal chen po'i ngang cung zad mnyam par bzhag pa tsam byas la/__de nas tshe gzungs mang du bzlas shing mda' la phu btab pa tshe 'gugs la 'jug pa nas 'di'i bar bya ba'i tshul kyang gsungs pas rang gi blo la gang mos byas pas chog__/bdag bskyed rkyang pa skabs su yin na/__rang gi thugs ka'i A yig las 'od zer 'phros pas dkyil 'khor bsdus te rang gtso bo'i nga rgyal gyis dge ba bsngo nas spyod lam la 'jug par bya'o/__/de nas dbang blang ba dngos ni/__'ja' lus bum pa'i dbang bskur stsal du gsol/__/ye shes rlung gi gsang dbang bskur du gsol/__/bde chen thig le'i sher dbang bskur du gsol/__/mngon sum rig pa'i rtsal dbang bskur du gsol/__/zhes lan gsum gyis gsol ba btab pas/__tshe dpag med rigs lnga rnams rim pa bzhin rang gi spyi gtsug tu byon nas dbang bskur bar gyur/__/ces brjod cing bsams la/__bum pa spyi bor bzhag ste/__nga ni sangs rgyas tshe dpag med/__/sangs rgyas kun dang mgrin gcig tu/__/lus la sangs rgyas tshe dbang bskur/__/bu khyod 'chi bdag las grol te/__/bskal pa stong du tshe 'phel zhing /__/srog gcod sdig pa dag gyur cig__/oM bud+d+ha a b+hi Shiny+tsa hU~M/__zhes gsung zhing bum pa'i chus spyi bo nas dbang bskur bas ye shes kyi chus lus kyi nang thams cad gang /__gti mug las gyur pa'i srog bcad pa'i sdig sgrib dag__/rnam snang gi tshe'i dngos grub thob par gyur/__de bzhin du bum pa dpral bar bzhag ste/__nga ni mi bskyod tshe dpag med/__/ces sogs 'don pa bsgyur la/__oM badz+ra ab+hi=__zhes gsung zhing sogs nas/__zhe sdang las gyur pa'i srog bcad pa'i sdig sgrib dag__/mi bskyod pa'i tshe'i dngos grub thob/__bum pa rna ltag g.yas dang /__nga ni rin 'byung tshe dpag med/__/sogs/__oM rat+na a b+hi=__nga rgyal dang ser sna las gyur pa'i srog bcad pa'i=__rin 'byung gi tshe'i=__bum pa ltag pa dang /__nga ni pad+ma tshe dpag=__sogs/__oM pad+ma a b+hi=__'dod chags las gyur pa'i srog=__'od dpag med kyi tshe=__bum pa rna ltag g.yon dang /__nga ni don yod tshe dpag med/__/sogs/__oM karma a b+hi Shiny+tsa hU~M/__phrag dog las gyur pa'i srog bcad pa'i sdig sgrib dag__/don yod grub pa'i tshe'i dngos grub thob/__ces rigs lngas dbang bskur/__de nas spyi bor tshe dpag med tshon gang ba gcig gsal btab nas/__de las 'od 'phros dus gsum sangs rgyas thams cad kyi tshe dang ye shes thams cad hU~M yig dkar dmar gyi rnam pa spyan drangs te de nyid la thim/__de nyid kyang 'od du zhu nas spyi bo tshangs bug nas mar zhugs/__snying gar rigs lnga tshe dpag med kyi skur gyur/__de rnams 'od du zhu nas thams cad la khyab pas 'chi med tshe'i ngo bor gyur par bsams la spyi bor rdo rje bzhag ste/__nga ni ye shes tshe dpag med/__/kun tu brnyas pa spang bar bya/__/'chi bdag chen po nga yis bcom/__/bu khyod tshe yi rig 'dzin brnyes/__/oM AHhU~M a mA ra Ni dzI ban+ti sid+d+hi pha la hU~M/__de nas mtha' rten/__rgyal srid sna bdun dang bkra shis rdzas brgyad kyi dbang tshe dpag med lha dgu bzhin la/__de yan chad bdag mdun tha mi dad kyi ngang du byed pa yin/__'di gnyis dbang tshig bsdus pas len na/__rten 'brel phun tshogs rdzas brgyad rin chen bdun/__/snang srid longs spyod mchod sprin dbang bskur ro/__/oM ma hA sarba rat+na a b+hi Shiny+tsa hU~M/__zhes brjod pas blangs kyang rung bar gsungs so/__/de nas rang nyid tshe dpag med du gsal ba mdun bskyed kyi thugs ka nas phye la/__gtor ma chab kyis bran la/__oM AHhU~M lan gsum gyi byin gyis brlab/__oM a pa ri mi ta A yur+dz+nyA na sa pa ri bA ra i daM ba liM ta kha kha khA hi khA hi/__lan gsum mam lngas mdun bskyed la phul/__mtshan sngags sngon 'gro'i ar+g+haM nas/__shab+da'i bar gyis mchod/__'jig rten 'dren pa'i gtso bo sogs kyis bstod/__bcom ldan 'das bdag dang sems can thams cad la 'chi med tshe'i dngos grub ma lus pa stsal du gsol/__zhes gsol ba btab/__de nas slob ma bos la mdun du 'khod pa la/__maN+Dal bkye bsdu tshar rjes slob dpon gyis/__'o nam mkha' dang mnyam pa'i sems can thams cad kyi don du bla na med pa yang dag par rdzogs pa'i sangs rgyas kyi go 'phang rin po che thob par bya/__de'i ched du tshe dbang zab mo gsan la don tshul bzhin du nyams su blang bar bgyi'o snyam pa bsam pa byang chub kyi mchog tu thugs bskyed pa dang /__chos gsan pa'i kun tu spyod pa rnams kyang theg pa chen po'i gzhung lugs dri ma med pa rnams las ji ltar 'byung ba bzhin gsal btab nas gsan pa gnang bar zhu/__de yang 'o skol gyi ston pa tshad med pa'i thugs rje chen po dang ldan pa sangs rgyas bcom ldan 'das 'di nyid kyis gdul bya rnams kyi blo yi rim pa dang 'tshams par dam pa'i chos kyi phung po bsam gyis mi khyab pa zhig gsungs pa de nyid phyogs ris su bsdu na theg pa che chung gnyis su 'dus pa las 'dir theg pa chen po yin/__de la yang rgyu pha rol tu phyin pa'i theg pa dang 'bras bu gsang sngags kyi theg pa gnyis yod pa las 'dir rgyu pha rol tu phyin pa'i theg pa las kyang khyad chos du ma'i sgo nas khyad par du 'phags pa 'bras bu gsang sngags kyi theg pa yin/__de la'ang snga 'gyur rnying ma dang phyi 'gyur gsar ma gnyis su yod pa las/__'dir snga 'gyur rnying ma yin/__de la yang bka' ma dang /__gter ma dang /__zhal gzigs kyi chos dang gsum yod pa las/__'dir zhal gzigs nas brgyud pa'i chos yin/__/de yang bod khams sems can rnams kyi mgon dang skyob dang dpung gnyen gcig pur gyur pa ni/__o rgyan gyi slob dpon pad+ma 'byung gnas nyid yin la/__de nyid kyis skal ldan gyi slob ma ras chen dpal 'byor bzang po la dngos su gnang ba'i tshe dbang zab mo nye rgyud khyad par du 'phags pa 'di yin/__'di'i lo rgyus ni/__bo dong phyogs las rnam rgyal gyi nye gnas ras chen dpal 'byor bzang pos tsA ri zil chen phug dang /__gnas chen za phu la sogs pa rnams su sgrub pa lo 'ga' mdzad pa la/__gsang sngags phyi nang gi yi dam gyi lha mang pos zhal gzigs/__khyad par 'ja' lus rdo rje'i sku brnyes pa slob dpon chen po pad+ma 'byung gnas kyis rang zhal sgrib med du bstan nas tshe dbang khyad par can 'di gnang zhing /__de nas rim par brgyud de da lta'i bar bar ma chad pa las byung ba'i tshe dbang zab mo bskul ba la slob dpon gyi bya ba dang slob ma'i bya ba gnyis las/__dang po slob dpon gyis bgyi bar 'os pa rnams sngon du legs par grub zin pas/__da khyed rang rnams kyi ngo skal du gyur pa slob ma'i bya ba la/__thog mar da ltar gyi slob dpon 'di nyid mgon po tshe dpag tu med pa yab yum du gsal ba la tshe dbang zab mo zhu ba'i yon du dmigs te maN+Dal zhig 'bul ba zhu/__de ltar maN+Dal phul nas/__slob dpon la gsol ba 'debs pa 'di'i rjes zlos lan gsum gyi bar du mdzad par zhu/__kun mkhyen ye shes sogs nas gnang bar mdzod/__ces pas gsol ba btab nas/__rgyud dag par bya ba'i slad du dmigs pa 'di bzhin tu mdzad par zhu/__gnas khang 'di nyid ye shes kyi rang snang las grub pa'i thar pa chen po'i gzhal yas khang gru bzhi sgo bzhi rgyan rta babs mtshan nyid thams cad yongs su rdzogs pa'i nang du/__tshe dpag med lha bcu bdun ma'i lha tshogs la rtsa ba'i bla ma dang dbyer med pa'i ma hA gu ru ste o rgyan pad+ma'i rigs bdag dang bcas pa'i mtha' skor du phyogs bcu'i bla ma yi dam sangs rgyas byang chub sems dpa'i tshogs dang bcas pa thams cad dang /__mtshams rnams dang 'og gi cha la dpa' bo mkha' 'gro chos skyong srung ma'i tshogs dang bcas pa thams cad kyis rang re rnams la dbang bskur bar byed pa la bar du gcod pa'i gdon bgegs rnams tshar gcod pa'i phyir hU~M phaT kyi sgra sgrogs pa sprin gyi phung po gtibs pa ltar gsal btab la/__de rnams kyi spyan sngar rang dang mtha' yas pa'i sems can thams cad 'khod nas tshe thog ma med pa nas bsags pa'i sdig pa bshags pa la sogs pa'i yan lag bdun pa bgyi snyam pas 'di'i rjes zlos lan gsum gyi bar du mdzad par zhu/__dkon mchog gsum la sogs nas 'grub par shog__/ces dang /__slar yang 'di rang nas bshad pa'i yan lag bdun pa 'di'i rjes zlos kyang lan gsum gyi bar du mdzad par zhu/__ma hA gu ru o rgyan pad+ma dang /__/nas/__bla med byang chub chen por bsngo bar bgyi/__/zhes pas rgyud dag par byas nas/__de nas dbang bskur ba la yang dpon slob kun gyis thun mong du dkyil 'khor sgrub pa dang /__/gsal 'debs pa'i dmigs pa 'di bzhin mdzad cing rjes zlos kyang mdzad par zhu/__skad cig tsam gyis rdo rje chen po'i nang /__zhes pa nas/__me tog phreng ba lta bus bskor bar bzhugs/__/zhes pas dkyil 'khor gsal btab cing /__dug gsum gyi rnam rtog phyir 'bud pa dang /__rlung kha sbyor du 'dzin pa'i slad du 'di'i rjes zlos mdzod/__rlung ro lan gsum phyir la sogs nas kha sbyar bzung /__zhes dang /__de nas khyed rang rnams kyis dmigs pa 'di bzhin mdzad par zhu/__sna g.yas nas rlung phyir bus pas nyon mongs pa zhe sdang gi rtog pa sngo bun bun phyir thon pa'i mos pa byas nas sna g.yas nas rlung lan gcig 'bud par zhu/__byas la dpon slob thams cad kyis rlung lan gcig 'bud/__yang sna g.yon nas rlung phyir bus pas nyon mongs pa 'dod chags kyi rtog pa thams cad dmar bun bun phyir thon pa'i mos pa byas pas/__sna g.yon nas rlung lan gcig 'bud par zhu/__thams cad kyis 'bud/__yang dbus nas rlung phyir bus pas/__nyon mongs pa gti mug gi rtog pa thams cad phyir nag bun bun thon pa'i mos pa byas nas dbus nas lan gcig 'bud par zhu/__byas la thams cad kyis 'bud/__de nas 'og rlung bskums te/__steng rlung mnan nas snying gar rlung bum pa can 'dzin par zhu/__byas la thams cad kyis rlung kha sbyar 'dzin/__de nas rang gi snying ga'i rnam shes pad+ma 'dab ma brgyad pa'i rnam pa kha bye ba'i ze'u 'bru'i steng gi AHlas 'od zer phyogs bcur 'phros pas mdun gyi nam mkhar ma hA gu ru o rgyan pad+ma rigs bdag tu bzhugs pa'i pad+ma'i rigs kyi lha tshe dpag med lha bcu bdun la phyogs bcu'i bla ma yi dam sangs rgyas byang sems dpa' bo mkha' 'gro ye shes kyi spyan dang ldan pa rnams sprin gyi phung po 'thibs pa ltar byon par bsams nas 'di'i rjes zlos mdzod/__snying ga'i rnam shes sogs nas byon par gyur/__/ces brjod/__de nas nam mkhar byon pa'i lha tshogs rnams la dmigs nas gsol ba 'debs pa 'di'i rjes zlos lan gsum gyi bar du mdzad bar zhu/__bcom ldan mgon po sogs nas/__dngos grub stsal du gsol/__/zhes gsol ba btab pas gu ru'i bum pa nas tshe dpag med kyi bum par bdud rtsi babs/__de nyid khyed rang rnams kyi spyi bo tshangs pa'i bu ga nas mar babs te snying gar thim pas 'chi med tshe'i dngos grub thob cing /__ye shes sems dpa' nam mkhar spyan drangs pa rnams dam tshig gi dkyil 'khor la gnyis su med par thim pa'i mos pa mdzad nas 'di'i rjes zlos mdzod/__dam tshig sems dpa'i so so'i lha tshogs sogs nas/__bdag por gyur zhes dang /__de ltar dam ye dbyer med pa'i gtso bo'i spyi gtsug tu ma hA gu ru rigs bdag gi tshul du bzhugs pa'i gtso bo'i thugs ka'i AHyig gi 'od zer las snying po'i sngags kyi 'khor lo rang sgra sgrogs bzhin par byung ba las/__dus gsum gyi sangs rgyas dang byang chub sems dpa' kun gyi thugs rje dang byin rlabs dang khams gsum sems can ma lus pa'i tshe dang bsod nams dpal dang 'byor pa rnams bsdus nas rang la thim pas 'chi med tshe'i dngos grub thob pa'i mos pa mdzad nas 'di'i rjes zlos mdzod/__de ltar lha tshogs gsal bar bsgoms pa yi/__/sogs nas/__yab yum zhal nas snying po sngags 'di bzlas/__oM AHhU~M badz+ra rat+na A yu She hU~M b+h+rU~M/__tshe b+h+rU~M/__g.yu b+h+rA~M/__nr-i b+h+rU~M/__ban+d+ha b+h+rU~M/__A yur+dz+nyA na b+h+rU~M/__oM a ma ra Ni dzI ban+ti sid+d+hi pha la hU~M/__de ltar lha dang sngags las 'od zer 'phros/__/sogs nas/__'chi med ye shes tshe yi ngo bor gyur/__/zhes rjes zlos lan cig byed du gzhug__/de nas slob dpon gyis bzlas pa bya ba ni/__oM AHhU~M badz+ra rat+na sogs tshe gzungs ji ltar rigs pa bzla/__de nas rdzogs rim bsgom pa ni/__khyed rang rnams sems ma bcos pa spros bral 'od gsal chen po'i ngang la cung zad mnyam par 'jog par zhu/__zhes brda sprad la/__dpon slob kun gyis cung zad mnyam par bzhag__/yang slob dpon kyis tshe gzungs tshar lnga tsam bzlas la/__tshe mda'i stong nas mde'u bar la slob dpon gyis phu btab/__tshe gzungs 'don bzhin pas slob ma la'ang de bzhin byed du bcug__/de nas slob ma rnams rim bzhin smyug ma'i rtsa ba nas ltong gi bar la lag pa'i mtho 'debs la so so'i mtho tshad ji tsam byung ba de don la 'dzin du bcug__/de nas slob dpon gyis mda' dar bzung la g.yob bzhin pa dang bcas/__bcom ldan mgon po tshe dpag med/__/shar phyogs dri za'i lag nas zhes pa nas las kun 'grub pa'i tshe khug cig__/ces pa'i bar gong bzhin brjod la tshe khug cig ces pa'i tshe mda' dar g.yob/__de nas slob dpon gyis tshe sgrub kyi sngags de ci rigs bzlas rjes tshe mda' la sngags chu rdeg cing /__de nas slob ma rnams la/__snga ma bzhin mda' la mtho tshad gzhal du bcug la/__sor gcig dang gnyis la sogs pa chad na cung zad ngan pa yin pas tshe dbang zhu ba/__tshe sgrub bya ba/__gsod par nges pa'i sems can gyi tshe skyabs pa sAts+tsha gdab pa la sogs pa tshe 'phel ba'i thabs la 'bad par bya'o/__/sor gcig dang gnyis la sogs pa 'phel na mda' 'phel ba bzhin du tshe 'phel ba yin pas bzang ba yin no/__/zhes brjod/__de nas dbang gi dngos gzhi la thog mar gsol ba 'debs pa 'di'i rjes zlos lan gsum gyi bar du mdzad par zhu/__'ja' lus bum pa'i sogs nas/__rtsal dbang bskur du gsol/__/zhes gsol ba btab nas/__tshe dpag med rigs lnga rnams rim pa bzhin byon nas dbang bskur ba'i mos pa bya dgos pa las/__khyed rang rnams dmigs pa 'di bzhin mdzod/__bla ma dang mdun bskyed kyi dkyil 'khor gyi lha tshogs rnams kyi thugs ka nas bye ba gyur pa'i skur byed nam mkha'i dkyil 'khor rnams tshe dpag med dkar po phyag na tshe'i bum pa thogs pa bsam gyis mi khyab pa nam mkha' gang bar byon nas/__de rnams dang slob dpon lhan cig pas bum pa bdud rtsis gang ba khyed rang rnams kyi spyi bor bzhag nas dbang bskur ba'i mos pa mdzod/__nga ni rnam snang tshe dpag med/__/sangs rgyas kun dang lhan cig tu/__/lus la rnam snang tshe dbang bskur/__/bu khyod 'chi bdag las grol te/__/bskal ba stong du tshe 'phel zhing /__/srog gcod sgrib pa dag gyur cig__/oM bud+d+ha a b+hi Shiny+tsa hU~M/__zhes brjod cing bum pa'i chu sbyin/__zhes gsung zhing bum pa'i chus spyi bo nas dbang bskur bas lus kyi cha shas thams cad 'chi med ye shes kyi bdud rtsis gang bas dri ma thams cad dag__/khyad par du skye ba snga ma rnams su nyon mongs pa gti mug gis kun nas bslangs te sems can gyi srog bcad pa la brten nas tshe thung bar gyur pa'i las sgrib ci bsags pa thams cad dag nas rnam snang tshe dpag med kyi tshe yi dngos grub thob byung snyam pa'i mos pa mdzod/__'di man gyi rigs gzhan bzhi la sku mdog bsgyur ba ma gtogs snga ma'i rigs 'gres gyis shes par 'gyur pas/__slar yang dmigs pa 'di bzhin mdzod/__bla ma dang mdun bskyed kyi sogs nas 'di rnams dang slob dpon lhan cig pas bum pa dpral bar bzhag nas dbang bskur ba'i mos pa mdzod/__nga ni mi bskyod tshe dpag med/__/ces sogs nas/__oM badz+ra a b+hi Shiny+tsa hU~M/__bum chu blud pa sogs rigs 'gre/__zhe sdang gis kun nas bslangs te srog bcad pa la sogs dang /__mi bskyod pa'i tshe'i dngos grub thob sogs/__slar yang dmigs pa 'di bzhin mdzod/__bla ma dang sogs nas de rnams dang slob dpon lhan cig pas bum pa rna ltag g.yas su bzhag nas dbang bskur ba'i mos pa mdzod/__nga ni rin 'byung sogs/__oM rat+na sogs/__khyad par skye ba snga ma rnams su nga rgyal dang ser snas kun nas bslangs te gzhan gyi srog bcad pa la brten nas sogs=__rin chen 'byung ldan tshe yi dngos grub thob/__slar yang dmigs pa 'di bzhin mdzod/__bla ma dang sogs nas de rnams dang slob dpon lhan cig pas bum pa ltag par bzhag nas dbang bskur ba'i mos pa mdzod/__nga ni pad+ma tshe dpag med sogs 'dod chags kyis kun nas bslangs te gzhan gyi srog bcad pa la brten nas sogs=__'od dpag med kyi tshe yi dngos grub thob/__slar yang dmigs pa 'di bzhin mdzod/__bla ma dang sogs nas de rnams dang slob dpon lhan cig pas bum pa bdud rtsis gang ba rna ltag g.yon du bzhag nas dbang bskur ba'i mos pa mdzod/__nga ni don yod tshe dpag med sogs nas/__oM karma a b+hi Shiny+tsa hU~M/__bum chu sbyin/__zhes gsung zhing bum pa'i chus spyi bo nas dbang bskur bas lus kyi cha shas thams cad 'chi med ye shes kyi bdud rtsis gang /__dri ma thams cad dag__/khyad par du skye ba snga ma rnams su nyon mongs pa phrag dog gis kun nas bslangs te sems can gyi srog bcad pa la brten nas sku tshe thung bar gyur pa'i las sgrib ci bsags pa thams cad dag__/don yod grub pa'i tshe yi dngos grub thob pa'i mos pa mdzod/__ces rigs lnga'i dbang bskur/__de nas khyed rang rnams kyi spyi bor tshe dpag med tshon gang ba gcig gsal btab nas/__de la gus 'dud byas pas/__de'i thugs ka nas 'od zer dpag tu med pa 'phros pas/__dus gsum gyi sangs rgyas thams cad kyi tshe dang ye shes thams cad hU~M yig dkar dmar gyi rnam par spyan drangs/__de nyid la thim/__de nyid kyang 'od du zhu nas/__spyi bo'i tshangs bug nas mar zhugs/__rang rang gi snying ga'i nang du dbus su rnam snang tshe dpag med/__shar du mi bskyod tshe dpag med/__lhor rin 'byung tshe dpag med/__nub tu pad+ma tshe dpag med/__byang du don yod tshe dpag med rnams kyi skur gyur pa/__slar yang tshe dpag med de rnams 'od du zhu nas lus thams cad khyab/__'chi med tshe'i rdo rje'i ngo bor gyur pa'i tshe chu de nyid gyen du phyur bas khyod rang rnams kyi smin mtshams yan chad gang bas bum dbang thob/__mgrin pa yan chad gang bas gsang dbang thob/__snying ga yan chad gang bas sher dbang thob/__gsang gnas sam rkang mthil yan chad gang bas tshig dbang rin po che bzhi pa dang /__rig pa'i rtsal dbang thob nas khyed rang rnams ye shes tshe dpag med kyi ngo bor gyur pa'i mos pa mdzod/__de nyid brtan pa'i slad du slob dpon gyis khyed rang rnams kyi spyi bor rdo rje bzhag ste brtan par byas pa'i mos pa mdzod/__nga ni ye shes tshe dpag med sogs nas tshe yi rig 'dzin brnyes/__/des dbang gi dngos gzhi grub nas/__mtha' rten la 'byor pa thob cing bkra shis par bya ba'i slad du rgyal srid sna bdun dang bkra shis rdzas brgyad kyi dbang bskur ba la thog mar 'khor lo rin po che lag tu thogs te dbang bskur ba'i mos pa mdzod/__lha rdzas las grub sogs nas/__rgyal srid sna bdun dang bkra shis rdzas brgyad rnams tshe dbang lha dgu ma ltar bya/__de nas/__oM AHhU~M a mA ra Ni dzI ban+ti sid+d+hi pha la hU~M/__zhes yang yang brjod 'dir tshe gtor gyi dbang bskur mchan cing /__slob dpon gyis slob ma rnams la tshe ril dang tshe chang ster/__de rnams kyi sgo nas dbang gi dngos gzhi mtha' rten dang bcas pa legs par grub nas/__de dag gi gnas skabs su thob cing khas blangs pa'i dam tshig dang sdom pa la srung sdom tshul bzhin du bgyid snyam pas 'di'i rjes zlos lan gsum gyi bar du mdzad par zhu/__gtso bos ji ltar sogs dang /__gtang rag gi maN+Dal/__deng nas brtsams te sogs gzhan nas 'byung ba ltar bya/__de rnams kyi sgo nas slob dpon chen po pad+ma 'byung gnas kyis ras chen dpal 'byor bzang po la dngos su gnang ba'i tshe sgrub zab mo mda' 'phel ma'i dbang bskur ba legs par gsan pa yin pas rang gzhan gyi don rgya chen po mdzad par zhu/__bsod nams 'di yis sogs brjod la slob ma rnams rang gnas su btang ngo /__/de nas slob dpon gyis mdun bskyed pa mchod bstod dang 'dod pa'i don la gsol ba btab/__yig brgyas lhag chad kha bskang /__nongs pa bzod par gsol/__ras bris yin na rten bzhugs dang /__tshom bu yin na/__oM khyed kyis sems can don kun mdzad/__/sogs kyis tshom bu'i ye shes pa gshegs/__dam tshig pa rang la bsdus la gnas gsum bsrung /__dge ba bsngos la bkra shis kyi phreng bas mtha' brtan par bya'o/__/de ltar slob dpon pad+ma 'byung gnas kyis/__/grub dbang ras chen dpal 'byor bzang po la/__/dngos su gnang ba'i tshe dbang skur ba'i tshul/__/don gnyer nor bu bzang pos bskul ba'i ngor/__/thams cad mkhyen pa sngags 'chang A nan+da'i/__/tshe dbang 'chi med lhun grub sor bzhag nas/__/mchan bu'i gsal byed 'ga' yang dkyus nyid du/__/bris nas shin tu go bde don gsal 'di/__/shAkya'i dge slong bzang po rgyal mtshan gyis/__/dngul mda' lhun grub steng gi dgon pa ru/__/lcags sbrul dbyug zlar sbyar ba'i yi ge pa/__/sangs rgyas don grub nyid kyis gus pas bgyis/__/bdag blo rmongs phyir 'di la nongs mchis na/__/bla ma lhar bcas spyan sngar mthol zhing bshags/__/legs pa'i dngos po gang zhig thob pa des/__/tshe dpag med pa'i zhal mchog mthong par shog__/'dis sems can dpag tu med pa la phan thogs par gyur cig__/sarba dA mang+ga laM/___/_!_

Footnotes

Other Information