JKW-KABAB-10-THA-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 10, Text 6, Pages (Folios to )
Author	[[ |འཇམ་དབྱངས་མཁྱེན་བརྩེའི་དབང་པོ་]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་, རྒྱ་མ་མི་འགྱུར་ལས་འཕྲོ་གླིང་པ་ (rgya ma mi 'gyur las 'phro gling pa, 'jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 10: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Root Treasure - gter gzhung  ·  Sadhanas - Evocation Ritual - sgrub thabs
Cycle	ཡང་ཟབ་རྩ་གསུམ་སྙིང་པོའི་སྐོར་ (yang zab rtsa gsum snying po'i skor)
Deity	pad+ma gtum po
Karchag page	JKW-KABAB-Volume-10-THA-Karchag
RTZ	In the Rinchen Terdzö: https://rtz.tsadra.org/index.php/Terdzo-NA-034

Tibetan Text

Wylie

[edit]

༄༅། ཡབ་ཟབ་རྩ་གསུམ་སྙིང་པོའི་སྐོར་ལས་བླ་མ་དྲག་པོ་པདྨ་གཏུམ་པོའི་སྒྲུབ་ཐབས་དབང་ཆོག་དང་བཅས་པ་དྲེགས་པ་ཀུན་འཇོམས་ཞེས་བྱ་བ་བཞུགས་སོ།།༄༅། །ན་མོ་གུ་རུ་པདྨ་ཙཎྜཱ་ཡ། ཡེ་ཤེས་རབ་ཁྲོས་གར་དགུའི་གཟིས། །ས་གསུམ་དྲེགས་ཚོགས་ཐལ་བར་བརླག །པདྨ་གཏུམ་པོས་བདག་བྱིན་རློབ། །སྨིན་བྱེད་ཟབ་མོའི་ལག་ལེན་དགོད། ཁྲག་འཐུང་པདྨ་གཏུམ་པོའི་སྨིན་བྱེད་བསྒྲུབ་པ་ལ་སྦྱོར་བ་སྟེགས་བུའི་སྟེང་དུ་མཎྜལ་ལ་ཚོམ་བུ་དམར་པོ་གཅིག་དགོད། དེ་སྟེང་ཁྲིའུའི་ཁར་བུམ་པ་སོ་ལྔའི་བཅུད་ལྡན་མགུལ་ཆིངས་དམར་ནག་ཁ་རྒྱན་གསེབ་ཏུ་སྐུ་ཙག་གིས་བརྒྱན་པ་དང༌། མདུན་དུ་དཔལ་གཏོར། གཡས་སུ་མེ་ལོང་ལ་བསྙེན་སྔགས་མཚལ་གྱིས་བྲིས་པ། གཡོན་དུ་རྡོ་རྗེ། རྒྱབ་ཏུ་ལྕགས་ཀྱུ་ཕུར་པ་རྣམས་བཀོད། སྨན་རག་མཆོད་པས་བསྐོར། བསྒྲལ་དབང་བྱེད་ན་ལིངྒ་གདབ་ཕུར་ཟོར་གཏོར་སོགས་ཀྱང་བསྡོགས། གཞན་ཡང་ཉེར་མཁོ་རྣམས་ཚོགས་པར་བྱས་ལ། སྐྱབས་ཡུལ་རྣམས་མངོན་སུམ་ལྟ་བུར་བཞུགས་པའི་མོས་པས། ན་མོ༔ མཁའ་མཉམ་འགྲོ་རྣམས་བསྒྲལ་བའི་ཕྱིར༔ བླ་མ་དཀོན་མཆོག་རྩ་གསུམ་ལ༔ བྱང་ཆུབ་སྙིང་པོར་མཆིས་ཀྱི་བར༔ རྩེ་གཅིག་གུས་པས་སྐྱབས་སུ་མཆི༔ ལན་གསུམ། སེམས་བསྐྱེད་ནི། ཧོ༔ མར་གྱུར་རིགས་དྲུག་སེམས་ཅན་ལ༔ བྱམས་དང་སྙིང་རྗེ་ཆེན་པོའི་བློས༔ བྱང་ཆུབ་མཆོག་ལ་འགོད་པའི་སླད༔ ཟབ་མོའི་ལམ་ལ་འཇུག་པར་བགྱི༔ ལན་གསུམ། ཚོགས་བསགས་ནི། ཧོ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ཞིང་བཤགས༔ གསང་སྔགས་བསྒྲུབ་ལ་རྗེས་ཡི་རངས༔ སྨིན་གྲོལ་གསང་སྔགས་ཆོས་འཁོར་བསྐོར༔ མྱ་ངན་མི་འདའ་བཞུགས་གསོལ་བདེབས༔ སྙིང་པོ་སེམས་ཅན་དོན་དུ་བསྔོ༔ ཡང་དག་རྡོ་རྗེའི་དོན་རྟོགས་ཤོག༔ ལན་གསུམ། གནས་ཡོ་བྱིན་གྱིས་བརླབ་པ་ནི། རྃ་ཡྃ་ཁྃ༔ གཟུང་འཛིན་ཆོས་ཀུན་རྣམ་དག་དབྱིངས༔ ཡེ་ཤེས་རོལ་པའི་ཞིང་ཁམས་ཆེར༔ ཕྱི་ནང་གསང་བ་རྨད་བྱུང་བའི༔ མཆོད་པའི་སྤྲིན་ཕུང་མཁའ་ཁྱབ་གྱུར༔ བཛྲ་སྥ་ར་ཎ་ཁཾ༔ ཨོཾ་བཛྲ་ཨརྒྷྃ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤབྡ་ཨཱཿཧཱུྃ༔ མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཨོཾ་ཨཱཿཧཱུྃ་ཧྲཱི་ཋཱ༔ ལན་གསུམ། དངོས་གཞི་བདག་མདུན་ཆིག་རྫོགས་སུ་སྒྲུབ་པ་ནི། ཧཱུྃ༔ སྟོང་གསལ་ངང་ལས་སྣོད་བཅུད་ཀུན༔ རབ་འཇིགས་དྲག་པོའི་ཞིང་ཁམས་དབུས༔ པདྨ་ཉི་མ་བདུད་བཞིའི་སྟེང་༔ རང་རིག་ཆུ་ལས་ཉ་འཕར་ལྟར༔ སྐད་ཅིག་དྲན་རྫོགས་ཐོད་ཕྲེང་རྩལ༔ གསང་བདག་པདྨ་གཏུམ་པོའི་སྐུ༔ མཐིང་དམར་ལྕགས་བསྲེགས་ལྟ་བུའི་མདོག༔ རབ་ཁྲཽས་གར་དགུའི་ཉམས་དང་ལྡན༔ ཕྱག་གཡས་རྡོ་རྗེ་ལྕགས་ཀྱུ་ཡིས༔ སྡེ་བརྒྱད་འབྱུང་པོའི་སྲོག་ནས་འདྲེན༔ གཡོན་པས་སྡིག་མཛུབ་ཕུར་བུ་འདྲིལ༔ མ་རུངས་ལོགས་འདྲེན་སྲོག་རྩ་གཅོད༔ རྩེ་ལས་སྤྲུལ་པའི་ལྕགས་སྡིག་འཕྲོ༔ དམ་སྲི་འགོང་པོ་ཧབ་ཧབ་ཟ༔ སྤྱི་གཙུག་རྟ་གདོང་རྔམས་བཞད་འཚེར༔ སྲིད་གསུམ་གཡོ་ཞིང་དབང་དུ་སྡུད༔ སྐུ་སྨད་གནམ་ལྕགས་ཕུར་པའི་དབལ༔ བར་ཆད་བདུད་བཞིའི་སྙིང་ལ་གཟིར༔ དུར་ཁྲོད་ཆས་བརྒྱད་རབ་ཏུ་བརྗིད༔ མཁའ་འགྲོ་ཆོས་སྐྱོང་ལས་ལ་གཟུད༔ གཤོག་རྩེར་ཁྱུང་ཆེན་ཁྲ་ཐབས་ལྡིང་༔ ས་བདག་ཀླུ་སྲིན་ཐལ་བར་རློག༔ བ་སྤུའི་ཁུང་བུ་ཐམས་ཅད་ཀུན༔ རབ་འབྱམས་ཁྲོ་བོའི་ཕྱག་རྒྱས་གཏམས༔ གནས་གསུམ་ཡི་གེ་གསུམ་གྱིས་མཚན༔ ཐུགས་ཀའི་ཧཱུྃ་འོད་ལྕགས་ཀྱུ་ཡིས༔ ཡེ་ཤེས་འཁོར་བཅས་སྤྱན་དྲངས་བསམ། སྤྱན་འདྲེན་ནི་སྤོས་རོལ་དབྱངས་དང་བཅས་པས། ཧཱུྃ༔ ལྷོ་ནུབ་རཀྴའི་ཕོ་བྲང་ནས༔ མ་ཧཱ་གུ་རུ་ཐོད་ཕྲེང་རྩལ༔ པདྨ་གཏུམ་པོའི་སྐུར་བཞེངས་ལ༔ གནས་འདིར་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛཿཛཿ བཞུགས་གསོལ་ཕྱག་མཆོད་བསྟོད་པ་སོགས་ནི། དམ་ཡེ་དབྱེར་མེད་བརྟན་པར་བཞུགས༔ སྒོ་གསུམ་གུས་པའི་དད་ཕྱག་འཚལ༔ ཕྱི་ནང་གསང་མཆོད་སྨན་གཏོར་རཀ༔ མཆོད་པའི་ཕྱག་རྒྱ་ཆེན་པོར་བཞེས༔ སརྦ་པཱུ་ཛ་ས་མ་ཡ་ཧོ༔ པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ ཧཱུྃ༔ སངས་རྒྱས་ཀུན་འདུས་ཐོད་ཕྲེང་རྩལ༔ དྲེགས་པ་འདུལ་ཕྱིར་ཁྲོ་བོའི་ཚུལ༔ པདྨ་གཏུམ་པོ་ཧེ་རུ་ཀར༔ གུས་པས་བསྟོད་དོ་དངོས་གྲུབ་སྩོལ༔ དེ་ནས་བཟླས་པའི་རྣལ་འབྱོར་ལ་དབང་བསྐུར་ལྟ་བུ་མདུན་དཀྱིལ་སྒྲུབ་སྐབས་སྤྲོ་ན་འཛབ་ཁང་དབྱེ། ཐུགས་ཀར་རྡོ་རྗེའི་ལྟེ་བར་ཧཱུྃ༔ སྔགས་མཚན་འབར་བའི་འོད་ཟེར་གྱིས༔ རྩ་གསུམ་མཆོད་ཅིང་བྱིན་ནུས་བསྡུས༔ འགྲོ་དྲུག་སྒྲིབ་སྦྱངས་ལྷ་རུ་བསྒྱུར༔ དྲེགས་པ་སྡེ་བརྒྱད་ཟིལ་གྱིས་མནན༔ དམ་ལ་མི་གནས་གདུག་པ་ཀུན༔ ཡེ་ཤེས་མེ་ཡིས་གཞོབ་བཞིན་བསྲེགས༔ རྗེས་ཤུལ་ལྷག་མ་མེད་པར་བསམ༔ ཨོཾ་ཨཱཿཧཱུྃ་ཧྲཱིཿམ་ཧཱ་གུ་རུ་པདྨ་ཙཎྜ་བཛྲ་ཀཱི་ལི་ཀཱི་ལ་ཡ་ཁྲོཾ་ག་རུ་ཌ་རུ་བྷ་ཤ་སརྦ་དུཥྟཱན་ཧཱུྃ་ཕཊ༔ ཅེས་བསྙེན་སྒྲུབ་ལས་སྦྱོར་ཆིག་དྲིལ་གྱི་བཟླས་པ་ཅི་ནུས་བྱ། བུམ་བཟླས་ཟུར་དུ་སྤྲོ་ན་སྤྱི་ལྟར་བྱས་ལ་མཆོད་བསྟོད་དབང་ལེན་ནམ་རིག་མེ་དོར། ཨོཾ་ཧ་ཡ་གྲྀ་ཝ་ཧཱུྃ་ཕཊ་ཀྱིས་ལས་བུམ་གྱི་ཆུ་ནུས་ལྡན་དུ་སྒྲུབ། དབང་དང་མ་འབྲེལ་ན་འོག་གི་བསྡུ་ལྡང་ལ་འཇུག་པས་ཆོག་ཅིང༌། དབང་བསྐུར་ན་སློབ་མ་རྣམས་ཁྲུས་བྱ། བགེགས་བསྐྲད་ཅིང་སྲུང་འཁོར་གསལ་བཏབ། མཚམས་སྦྱོར་གྱི་ཁྱད་པར། དེ་འང་ཇི་སྐད་དུ། བྱང་ཆུབ་སྒྲུབ་ལ་བར་གཅོད་པའི༔ སྲོག་བདག་གཟའ་ཀླུ་རྒྱལ་འགོང་བཙན༔ བདུད་བཞིའི་འཇིགས་པ་ཐམས་ཅད་ཀྱི༔ གཉེན་པོ་གཅིག་ཏུ་དྲིལ་བའི་ལྷ༔ པདྨ་གཏུམ་པོའི་སྒྲུབ་ཐབས་འདི༔ ཨོ་རྒྱན་བླ་མའི་ཐུགས་ཁྲག་སྟེ༔ མ་འོངས་བོད་ཁམས་སྡུག་བསྔལ་དུས༔ ལས་འཕྲོ་ཅན་གྱི་དཔལ་དུ་ཤོག༔ ཅེས་གསུངས་པ་ལྟར། སྙིགས་མའི་དུས་ཀྱི་ཡང་མཐའ་སྐྱེ་དགུའི་རྒྱུད་མ་རུངས་པའི་ཉོན་མོངས་རང་གཟུགས་ཕྱི་རོལ་དུ་ཤར་བ་འབྱུང་པོ་གདུག་པ་ཅན་གྱི་རྣམ་པར་འཚེ་བས་ལུས་ཅན་མཐའ་དག་ནད་གདོན་གློ་བུར་གྱི་ཟུག་རྔུ་འཕྲལ་དང་ཡུན་ཏུ་སྡུག་བསྔལ་ཁོ་ནས་མནར་བ་ལ་ཆེད་དུ་དགོངས་ཏེ། སངས་རྒྱས་སྤྲུལ་པའི་སྐུ་སློབ་དཔོན་རྡོ་རྗེ་ཐོད་ཕྲེང་རྩལ་ཉིད་གང་འདུལ་སྒྱུ་འཕྲུལ་རྣམ་པར་རོལ་པའི་ཕྱག་རྒྱ་དང་སྔགས་ཀྱི་གསང་བ་མཐའ་ཡས་པ་བསྟན་པ་རྣམས་ལས་སྙིང་པོའི་ཡང་བཅུད་ཆེ་མཆོག་དྲག་པོ་པདྨ་གཏུམ་པོའི་གདམས་ཟབ་འདི་ཉིད། འཇའ་ལུས་མཁའ་འགྲོ་ཉེར་ལྔ་ལས་ཤེལ་དཀར་མགོན་སྐྱིད་ཀྱི་སྤྲུལ་བསྒྱུར་མི་འགྱུར་ལས་འཕྲོ་གླིང་པའི་ཟབ་གཏེར་འདུས་པ་སྐོར་བཞིའི་ལྡེབས་སུ་བྱོན་ཅིང༌། ཐམས་ཅད་མཁྱེན་གཟིགས་བཀའ་བབས་བདུན་ལྡན་པདྨ་འོད་གསལ་མདོ་སྔགས་གླིང་པ་ལ་གུ་རུ་རིན་པོ་ཆེ་དང་གཏེར་སྟོན་རྣམ་དབྱེར་མེད་པའི་ཡེ་ཤེས་ཀྱི་སྐུས་སྨིན་གྲོལ་ཉེ་བརྒྱུད་དུ་སྩལ། བདག་ཅག་ལ་སྨིན་བྱེད་ཀྱིས་རྗེས་སུ་བཟུང་བའི་ཚེ། མེ་ལོང་ལ་བྲིས་པའི་སྔགས་བྱང་གི་གཟུགས་བརྙན་བསུབ་ཏུ་མེད་པའི་རང་བྱོན་ངོ་མཚར་ཅན་དུ་ཤར་བས་མཚོན། བྱིན་རླབས་གཟི་བརྗིད་ལྷག་པར་འབར་བ་སྟེ། གཞུང་ལས། དབང་འདི་ལན་གཅིག་ཐོབ་པས་ཀྱང་༔ པདྨ་གཏུམ་པོས་བྱིན་བརླབས་ནས༔ བར་ཆད་ཀུན་གྱིས་ཉེ་མི་ནུས༔ མཐར་ཐུག་དངོས་གྲུབ་རྣམ་གཉིས་འགྲུབ༔ ཅེས་བསྔགས་པ་དོན་དང་ལྡན་པའི་སྨིན་བྱེད་ཟབ་མོ་བསྒྲུབ་པ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །ཐལ་མོ་མེ་ཏོག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས་མཛོད། དཔལ་ལྡན་བླ་མ་རྡོ་རྗེ་འཆང་༔ པདྨ་གཏུམ་པོ་བདག་ལ་དགོངས༔ ཁྲོ་རྒྱལ་ཆེན་པོའི་དཀྱིལ་འཁོར་དུ༔ བྱིན་རླབས་དབང་མཆོག་སྩལ་དུ་གསོལ༔ ལན་གསུམ། བླ་མ་དང་གཉིས་སུ་མེད་པའི་ཁྲག་འཐུང་པདྨ་གཏུམ་པོ་ལ་རྩ་གསུམ་རྒྱལ་བ་རབ་འབྱམས་སྤྲིན་གཏིབས་པ་ལྟར་བསྐོར་ནས་བཞུགས་པའི་སྤྱན་སྔར་རྒྱུད་དག་པའི་ཕྱིར་རྒྱུན་བཤགས་ཡན་ལག་བརྒྱད་པ་ཚུལ་བཞིན་བྱ་བའི་བློས་ཚིག་དོན་ཟུང་དུ་འབྲེལ་བའི་བསྒོམ་དོན་གསལ་ཐོབ་ལ་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ། །སོགས་ལན་གསུམ། དེ་ནས་དབང་གི་གཞི་འགོད་ཅིང་ཡེ་ཤེས་པ་དབབ་པ་ཡིན་པས་གཞན་དུ་མ་ཡེངས་པར་དམིགས་པ་འདི་ལྟར་དུ་སྒོམས། ཧཱུྃ༔ སྟོང་གསལ་ངང་ལས་སྣོད་བཅུད་ཀུན༔ རབ་འཇིགས་དྲག་པོའི་ཞིང་ཁམས་དབུས༔ པདྨ་ཉི་མ་བདུད་བཞིའི་སྟེང་༔ རང་རིག་ཆུ་ལས་ཉ་འཕར་ལྟར༔ སྐད་ཅིག་དྲན་རྫོགས་ཐོད་ཕྲེང་རྩལ༔ གསང་བདག་པདྨ་གཏུམ་པོའི་སྐུ༔ མཐིང་དམར་ལྕགས་བསྲེགས་ལྟ་བུའི་མདོག༔ རབ་ཁྲཽས་གར་དགུའི་ཉམས་དང་ལྡན༔ ཕྱག་གཡས་རྡོ་རྗེ་ལྕགས་ཀྱུ་ཡིས༔ སྡེ་བརྒྱད་འབྱུང་པོའི་སྲོག་ནས་འདྲེན༔ གཡོན་པས་སྡིག་མཛུབ་ཕུར་བུ་འདྲིལ༔ མ་རུངས་ལོགས་འདྲེན་སྲོག་རྩ་གཅོད༔ རྩེ་ལས་སྤྲུལ་པའི་ལྕགས་སྡིག་འཕྲོ༔ དམ་སྲི་འགོང་པོ་ཧབ་ཧབ་ཟ༔ སྤྱི་གཙུག་རྟ་གདོང་རྔམས་བཞད་འཚེར༔ སྲིད་གསུམ་གཡོ་ཞིང་དབང་དུ་སྡུད༔ སྐུ་སྨད་གནམ་ལྕགས་ཕུར་པའི་དབལ༔ བར་ཆད་བདུད་བཞིའི་སྙིང་ལ་གཟིར༔ དུར་ཁྲོད་ཆས་བརྒྱད་རབ་ཏུ་བརྗིད༔ མཁའ་འགྲོ་ཆོས་སྐྱོང་ལས་ལ་གཟུད༔ གཤོག་རྩེར་ཁྱུང་ཆེན་ཁྲ་ཐབས་ལྡིང་༔ ས་བདག་ཀླུ་སྲིན་ཐལ་བར་རློག༔ བ་སྤུའི་ཁུང་བུ་ཐམས་ཅད་ཀུན༔ རབ་འབྱམས་ཁྲོ་བོའི་ཕྱག་རྒྱས་གཏམས༔ གནས་གསུམ་ཡི་གེ་གསུམ་གྱིས་མཚན་པའི་སྐུར་གྱུར་པ་ལ་ཡེ་ཤེས་པ་བསམ་གྱིས་མི་ཁྱབ་པ་སྤྱན་དྲངས་ནས་སིབ་སིབ་ཐིམ་པའི་མོས་པ་མཛོད། སྤོས་རོལ་དབྱངས་དང་བཅས་པས། ཧཱུྃ༔ ལྷོ་ནུབ་རཀྴའི་ཕོ་བྲང་ནས༔ མ་ཧཱ་གུ་རུ་ཐོད་ཕྲེང་རྩལ༔ པདྨ་གཏུམ་པོའི་སྐུར་བཞེངས་ལ༔ གནས་འདིར་སྤྱན་འདྲེན་གཤེགས་སུ་གསོལ༔ ཨོཾ་ཨཱཿཧཱུྃ་ཧྲཱིཿམ་ཧཱ་གུ་རུ་པདྨ་ཙཎྜ་བཛྲ་ཀཱི་ལི་ཀཱི་ལ་ཡ་ཁྲོཾ་ག་རུ་ཌ་རུ་བྷ་ཤ་སརྦ་དུཥྟཱན་ཧཱུྃ་ཕཊ༔ བཛྲ་ཨཱ་བེ་ཤ་ཡ་ཨ་ཨཱ༔ བཏགས་པ་བརྗོད་ལ་ཡེ་ཤེས་པ་དབབ་ཅིང་བསྟིམ། རྡོ་རྗེ་མེ་ཏོག་མགོར་བཞག །ཏིཥྛ་བཛྲས་བརྟན་པར་བྱ། དབང་དངོས་ལ་སྐུ་གསུམ་ཐུགས་ཡོན་ཏན་ཕྲིན་ལས་ལྔ་ཡོད་པ་ལས། དང་པོ་སྐུའི་དབང་གི་སླད་དུ། རྣམ་རྒྱལ་བུམ་པ་ཁྲག་འཐུང་པདྨ་གཏུམ་པོའི་རྟེན་དང་བརྟེན་པ་ཡོངས་སུ་རྫོགས་པ་ཁྱེད་རང་གི་སྤྱི་བོར་བཞག་པས་རྡོ་རྗེ་བདུད་རྩིའི་རྒྱུན་གྱིས་དབང་བསྐུར། ཡེ་ཤེས་ཀྱི་སྐུ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན། དཔྲལ་བར་ཐིམ་པས་གཟི་བརྗིད་རབ་འབར་དྲག་པོའི་སྐུ་དང་དབྱེར་མེད་དུ་གྱུར་པར་མོས་ཤིག །བུམ་པ་སྤྱི་བོར་བཞག་ལ། ཧཱུྃ༔ ཁྲག་འཐུང་པདྨ་གཏུམ་པོ་ཡི༔ སྐུ་ནི་སྣང་ལ་རང་བཞིན་བྲལ༔ སྐལ་ལྡན་བུ་ལ་དབང་བསྐུར་བས༔ བསྐྱེད་པ་ལྷ་ཡི་དབང་ཐོབ་ཤོག༔ ཀཱ་ཡ་ཨ་བྷི་ཥིཉྩ་ཧཱུྃ༔ གཉིས་པ་གསུང་གི་དབང་གི་སླད་དུ། གཏུམ་པོའི་མགྲིན་པ་ནས་འབར་བའི་སྔགས་ཀྱི་ཕྲེང་བ་འཕྲོས། མགྲིན་པར་ཐིམ་པས་མཐུ་ནུས་སྟོབས་ལྡན་དྲག་པོའི་གསུང་དང་དབྱེར་མེད་དུ་གྱུར་པར་མོས་ཤིག །སྔགས་བྱང་མགྲིན་པར་བཞག་ལ། ཧཱུྃ༔ ཁྲག་འཐུང་པདྨ་གཏུམ་པོ་ཡི༔ གསུང་ནི་མ་འགགས་རང་བྱུང་དབྱངས༔ སྐལ་ལྡན་བུ་ལ་དབང་བསྐུར་བས༔ བཟླས་པ་སྔགས་ཀྱི་དབང་ཐོབ་ཤོག༔ ཝཱ་ཀ་ཨ་བྷི་ཥིཉྩ་ཧཱུྃ༔ གསུམ་པ་ཐུགས་ཀྱི་དབང་གི་སླད་དུ༔ གཏུམ་པོའི་ཐུགས་ཀ་ནས་ཡེ་ཤེས་རྡོ་རྗེ་འབར་བའི་རྣམ་པ་བྱོན༔ སྙིང་གར་ཐིམ་པས་འཁྲུལ་རྟོག་རྩད་གཅོད་དྲག་པོའི་ཐུགས་དང་དབྱེར་མེད་དུ་གྱུར་པར་མོས་ཤིག །རྡོ་རྗེ་སྙིང་གར་བཞག་ལ། ཧཱུྃ༔ ཁྲག་འཐུང་པདྨ་གཏུམ་པོ་ཡི༔ ཐུགས་ནི་སྟོང་ཉིད་རྡོ་རྗེའི་དབྱིངས༔ སྐལ་ལྡན་བུ་ལ་དབང་བསྐུར་བས༔ ཏིང་འཛིན་དགོངས་པའི་དབང་ཐོབ་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ བཞི་པ་ཡོན་ཏན་གྱི་དབང་གི་སླད་དུ༔ དཔལ་གྱི་གཏོར་མ་ཁྲག་འཐུང་པདྨ་གཏུམ་པོ་དངོས་སུ་གསལ་བས་བྱིན་གྱིས་བརླབས་པས་གང་འདུལ་རེ་སྐོང་དྲག་པོའི་ཡོན་ཏན་དང་དབྱེར་མེད་དུ་གྱུར་པར་མོས་ཤིག །དཔལ་གཏོར་ལྟེ་བར་བཞག་ལ། ཧཱུྃ༔ ཁྲག་འཐུང་པདྨ་གཏུམ་པོ་ཡི༔ ཡོན་ཏན་རེ་སྐོང་ཡིད་བཞིན་གཏེར༔ སྐལ་ལྡན་བུ་ལ་དབང་བསྐུར་བས༔ གང་འདུལ་འགྲོ་བ་སྒྲོལ་བར་ཤོག༔ གུ་ཎ་ཨ་བྷི་ཥིཉྩ་ཧཱུྃ༔ ལྔ་པ་ཕྲིན་ལས་ཀྱི་དབང་གི་སླད་དུ༔ འགུགས་སྒྲོལ་གྱི་ཕྱག་འཚན་ལག་གཡས་གཡོན་ཏུ་གཏད་པས་ཐོགས་མེད་རྩལ་ལྡན་དྲག་པོའི་ཕྲིན་ལས་དང་དབྱེར་མེད་དུ་གྱུར་པར་མོས་ཤིག །ལྕགས་ཀྱུ་གཡས་དང་ཕུར་པ་གཡོན་ཏུ་གཏད་ལ། ཧཱུྃ༔ ཁྲག་འཐུང་པདྨ་གཏུམ་པོ་ཡི༔ ཕྲིན་ལས་དགྲ་བགེགས་དགུག་ཅིང་སྒྲོལ༔ སྐལ་ལྡན་བུ་ལ་དབང་བསྐུར་བས༔ མངོན་སྤྱོད་སྟོབས་ཀྱི་དབང་ཐོབ་ཤོག །ཀརྨ་ཨ་བྷི་ཥིཉྩ་ཧཱུྃ༔ དེ་ནས་བྲུབ་ཁུང་དུ་ལིངྒ་བཀོད་པ་ལ་དགུག་གཞུག་བྱ་བ་ནི། ན་མོཿ རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། གསང་སྔགས་དང་རིགས་སྔགས་དང༌། གཟུངས་སྔགས་དང༌། སྙིང་པོ་དང༌། ཕྱག་རྒྱ་དང༌། ཏིང་ངེ་འཛིན་གྱི་བདེན་པ་དང༌། ཆོས་ཉིད་གདོད་ནས་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང༌། ཁྱད་པར་ཆེ་མཆོག་པདྨ་དྲག་པོའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང༌། བདེན་པ་ཆེན་པོའི་བྱིན་རླབས་ཀྱིས་མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག ཨོཾ་ཨཱཿཧཱུྃ་ཧྲཱིཿམ་ཧཱ་གུ་རུ་པདྨ་ཙཎྜ་བཛྲ་ཀཱི་ལི་ཀཱི་ལ་ཡ་ཁྲོཾ་ག་རུ་ཌ་རུ་བྷ་ཤ་སརྦ་དུཥྟཱན་ཧཱུྃ་ཕཊ༔ དགྲ་བགེགས་ཨཱ་ཀརྵ་ཡ་ཛཿ ཛཿཧཱུྃ་བྃ་ཧོཿ ཞེས་ལན་གསུམ་གྱིས་བཀུག། དེ་ནས་ཁྱེད་རང་རྣམས་ལ་སྔར་བྱིན་པའི་ལས་ཀྱི་ཕུར་བུ་དེ་ཉིད་འདྲིལ་བཞིན་དུ་ལིངྒ་དགྲ་བགེགས་དངོས་སུ་གསལ་བ་ལ་ཚེ་ལུང་ཁྲུས་ཀྱི་དགོངས་པ་དང་ལྡན་པས་བསྒྲལ་བའི་ལས་མཛད་པར་ཞུ། ཧཱུཾ༔ པདྨ་དྲག་པོའི་གསོད་བྱེད་ཕོ་ཉ་ཆེ༔ ཤིན་ཏུ་མི་བཟད་ཡཀྴ་ཧེ་རུ་ཀ༔ ཕྱག་གཡས་རྣོ་དབལ་གདུག་པའི་ཕུར་བུ་འདྲིལ༔ གཡོན་པས་འཆོར་མེད་ལྕགས་ཀྱུ་རྣོན་པོ་གདེངས༔ དགྲ་བགེགས་གནོད་བྱེད་གདུག་ཅིང་གཏུམ་པོའི་ཚོགས༔ ལྕགས་ཀྱུས་ཟུང་ལ་ཕུར་བུས་སྙིང་གར་ཐོབ༔ ཚེ་བསོད་དྭངས་མ་སྒྲུབ་མཆོག་རྣམས་ལ་སྟིམས༔ རྣམ་ཤེས་རྡོ་རྗེ་སེམས་དཔའི་སྲས་སུ་དྲོངས༔ གཟུགས་ཕུང་རྡུལ་ཕྲན་བཞིན་དུ་དུམ་བུར་གཏུབས༔ མངོན་སྤྱོད་སྟོབས་ཀྱི་ཕྲིན་ལས་ཡོངས་རྫོགས་མཛོད༔ བཛྲ་ཡཀྴ་ཀཱི་ལི་ཀཱི་ལ་ཡ་སརྦ་དུཥྟཱན་ཨཱ་ཡུར་པུཎྱེ་ཛཿབྷྲཱུྃ༔ ནྲྀ་ཏྲི་བིནྡུ་ཨ་ཕཊ༔ བྷིནྡྷ་བྷིནྡྷ་མཱ་ར་ཡ་རྦད༔ ཅེས་བསྒྲལ་དུ་བཅུག་སླར་ཡང་ཐུན་གྱིས་བརྡེག་བསད་གྲིས་བཏུབས་ལ་ཧོམ་གཟར་དུ་བླུག་ཅིང་བསྟབ་པ་ནི། ཧཱུྃ༔ པདྨ་དྲག་པོའི་ལྷ་ཚོགས་ཞལ་ཕྱེས་ཤིག༔ དགྲ་བགེགས་འབྱུང་པོ་བསྒྲལ་བའི་ཤ་ཁྲག་རུས༔ བདེ་ཆེན་རྡོ་རྗེའི་ལོངས་སྤྱོད་ཆེན་པོར་བཞེས༔ དུག་གསུམ་རྩད་ནས་གཅོད་པའི་ཕྲིན་ལས་མཛོད༔ སརྦ་ཤཏྲཱུན་བིགྷྣཱན་མ་ཧཱ་མཱཾ་ས་རཀྟ་ཀིཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ ལིང་རོ་ཐུན་གཏོར་དུ་བསྟབས་ལ། ཧཱུྃ༔ བཅོམ་ལྡན་དཔལ་ཆེན་པདྨ་གཏུམ་པོ་ཆེ༔ དབྱིངས་ནས་བརྩེར་དགོངས་འདིར་གཤེགས་བྱིན་གྱིས་རློབས༔ དགྲ་བགེགས་བསྒྲལ་བའི་ཤ་ཁྲག་གཏོར་མ་དང་༔ སྨན་རཀ་ཕུད་ཀྱི་འདོད་ཡོན་མཆོད་པར་བཞེས༔ རྡོ་རྗེའི་གོ་ཆས་འགལ་རྐྱེན་བར་ཆད་སྲུང་༔ མི་མཐུན་ཞི་ཞིང་མཐུན་རྐྱེན་ལེགས་ཚོགས་སྤེལ༔ ཁམས་གསུམ་དབང་སྡུས་ལོག་ལྟ་ཆམ་ལ་ཕོག༔ རྣལ་འབྱོར་བྱང་ཆུབ་སྒྲུབ་ལ་འཚེ་བ་ཡི༔ གདུག་པའི་དགྲ་བགེགས་སྲོག་རྩ་དམར་པོ་ཆོད༔ སྡེ་བརྒྱད་ཆོ་འཕྲུལ་འབྱུང་བཞིའི་གཡོ་འཁྲུགས་དང་༔ ནད་མཚོན་མུ་གེ་བྱད་ཕུར་རྦོད་གཏོང་ཟློག༔ མངོན་སྤྱོད་སྟོབས་ཀྱི་ཕྲིན་ལས་ཡོངས་རྫོགས་མཛོད༔ ཨཿཡཿམཿདུཿརུཿཙཿཤཿནཿས་མ་ཡ་བྷྱོ་བྷྱོ་ཟློག་ཟློག༔ ཐལ་བརྡབ་གཏོར་མ་དགྲ་ཕྱོགས་འཕང་༔ ཅེས་བརྗོད་ལ་གཏོར་མ་དགྲ་ཕྱོགས་སུ་འཕེན་ཏུ་གཞུག །མེ་ཏོག་འཐོར་ལ། ཨོཾ། རིག་འཛིན་རྩལ་འཆང་རྩ་བརྒྱུད་བླ་མ་དང་༔ སྒྱུ་འཕྲུལ་དྲྭ་བའི་སྐུར་སྣང་ཡི་དམ་ལྷ༔ རྣལ་འབྱོར་གྲོགས་མཛད་གནས་གསུམ་མཁའ་འགྲོ་ཡིས༔ དངོས་གྲུབ་དཔལ་འབྱོར་རྒྱས་པའི་བཀྲ་ཤིས་ཤོག༔ ཅེས་ཤིས་པར་བརྗོད། དེ་ལྟར་དབང་ཐོབ་ནས་དམ་ཚིག་བསྲུང་སྡོམ་གྱི་ཐ་ཚིག་བསྒྲག་པ་ཡིན་ཏེ། དེ་རིང་ཕྱིན་ཆད་བུ་ཁྱོད་ཀྱིས༔ བྱང་ཆུབ་མཆོག་ཏུ་སེམས་བསྐྱེད་ལ༔ བླ་མ་གཙུག་གི་རྒྱན་དུ་ཟུངས༔ ལྷ་བསྒོམ་སྔགས་བཟླས་རྒྱུན་མ་བཅད༔ རང་གཞན་དོན་ཀུན་རྟག་ཏུ་སྒྲུབས༔ ཇི་ལྟར་བསྒོས་པ་རྣམས་ཚུལ་བཞིན་རྗེས་སུ་བསྒྲུབ་པའི་བློས་འདིའི་རྗེས་ཟློས༔ གཙོ་བོས་ཇི་ལྟར་སོགས་དབང་གི་རྗེས་རིམ་དང༌། གཏང་རག་མཆོད་བསྟོད་ནི། ཕྱི་ནང་གསང་མཆོད་སྨན་གཏོར་རཀ༔ མཆོད་པའི་ཕྱག་རྒྱ་ཆེན་པོར་བཞེས༔ སརྦ་པཱུ་ཛ་ས་མ་ཡ་ཧོ༔ པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ ཧཱུྃ༔ སངས་རྒྱས་ཀུན་འདུས་ཐོད་ཕྲེང་རྩལ༔ དྲེགས་པ་འདུལ་ཕྱིར་ཁྲོ་བོའི་ཚུལ༔ པདྨ་གཏུམ་པོ་ཧེ་རུ་ཀར༔ གུས་པས་བསྟོད་དོ་དངོས་གྲུབ་སྩོལ༔ ཡི་གེ་བརྒྱ་པས་ནོངས་པ་བཤགས། ཉེར་བསྡུ་ནི། ཨ༔ འགག་མེད་རིག་རྩལ་རོལ་པའི་དཀྱིལ་འཁོར་པ༔ རིམ་གྱིས་བདག་ཐིམ་འོད་གསལ་ངང་དུ་བཞག༔ སླར་ཡང་ཆུ་ལས་རླབས་ཀྱི་ཕྲེང་བ་ལྟར༔ དབྱིངས་རིག་རང་ཤར་ཕྱག་རྒྱའི་ལྷ་སྐུར་ཤར༔ སྨོན་ལམ་གདབ་པ་ནི། ཧོ༔ གཉིས་མེད་བྱང་ཆུབ་སེམས་ཀྱི་དཀྱིལ་འཁོར་དུ༔ དུས་གསུམ་བསགས་པའི་དགེ་ཚོགས་ཅི་མཆིས་པ༔ མཁའ་ཁྱབ་འགྲོ་བའི་དོན་དུ་བསྔོས་པའི་མཐུས༔ བདག་གཞན་མི་གནས་ཡེ་ཤེས་མྱུར་ཐོབ་ཤོག༔ ཤིས་བརྗོད་ནི། ཤིན་ཏུ་ཞི་བ་ཆོས་སྐུའི་དབྱིངས་ཉིད་ལས༔ རིག་པ་རང་ཤར་བདེ་ཆེན་ལོངས་སྤྱོད་རྫོགས༔ གང་འདུལ་འགྲོ་བའི་དོན་མཛད་སྤྲུལ་པའི་སྐུར༔ དབྱེར་མེད་མངོན་པར་བྱང་ཆུབ་བཀྲ་ཤིས་ཤོག༔ ཅེས་སོགས་བསྔོ་སྨོན་གྱིས་མཐའ་བརྒྱན་པར་བྱའོ། །འདིས་ཀྱང་ཟབ་ཅིང་དཀོན་པའི་ཆོས། །གདུལ་བྱ་མུ་མཐའ་ཡས་པར་འཕེལ། །ཀུན་ཀྱང་པདྨ་གཏུམ་པོ་དང༌། །དབྱེར་མེད་ཆེ་བཙན་ཟླ་བྲལ་ཤོག །ཅེས་འཇམ་མགོན་བློ་གྲོས་མཐའ་ཡས་ཀྱིས་སྤེལ་བའི་དབང་ཆོག་ལ་ལས་བྱང་དཀྱུས་སུ་གསར་བསྒྲིག་བཅས་ཕུན་ཚོགས་རྣམ་རྒྱལ་པས་བསྡེབས་པ་དགེ་ལེགས་འཕེལ།། །།

[edit]

@#/__yab zab rtsa gsum snying po'i skor las bla ma drag po pad+ma gtum po'i sgrub thabs dbang chog dang bcas pa dregs pa kun 'joms zhes bya ba bzhugs so//@#/__/na mo gu ru pad+ma tsaN+DA ya/__ye shes rab khros gar dgu'i gzis/__/sa gsum dregs tshogs thal bar brlag__/pad+ma gtum pos bdag byin rlob/__/smin byed zab mo'i lag len dgod/__khrag 'thung pad+ma gtum po'i smin byed bsgrub pa la sbyor ba stegs bu'i steng du maN+Dal la tshom bu dmar po gcig dgod/__de steng khri'u'i khar bum pa so lnga'i bcud ldan mgul chings dmar nag kha rgyan gseb tu sku tsag gis brgyan pa dang*/__mdun du dpal gtor/__g.yas su me long la bsnyen sngags mtshal gyis bris pa/__g.yon du rdo rje/__rgyab tu lcags kyu phur pa rnams bkod/__sman rag mchod pas bskor/__bsgral dbang byed na ling+ga gdab phur zor gtor sogs kyang bsdogs/__gzhan yang nyer mkho rnams tshogs par byas la/__skyabs yul rnams mngon sum lta bur bzhugs pa'i mos pas/__na mo:__mkha' mnyam 'gro rnams bsgral ba'i phyir:__bla ma dkon mchog rtsa gsum la:__byang chub snying por mchis kyi bar:__rtse gcig gus pas skyabs su mchi:__lan gsum/__sems bskyed ni/__ho:__mar gyur rigs drug sems can la:__byams dang snying rje chen po'i blos:__byang chub mchog la 'god pa'i slad:__zab mo'i lam la 'jug par bgyi:__lan gsum/__tshogs bsags ni/__ho:__bla ma yi dam mkha' 'gro gshegs:__nyi zla pad+ma'i gdan la bzhugs:__lus ngag yid gsum gus phyag 'tshal:__phyi nang gsang ba'i mchod pa 'bul:__nyams chags sdig sgrib mthol zhing bshags:__gsang sngags bsgrub la rjes yi rangs:__smin grol gsang sngags chos 'khor bskor:__mya ngan mi 'da' bzhugs gsol bdebs:__snying po sems can don du bsngo:__yang dag rdo rje'i don rtogs shog:__lan gsum/__gnas yo byin gyis brlab pa ni/__ra~M ya~M kha~M:__gzung 'dzin chos kun rnam dag dbyings:__ye shes rol pa'i zhing khams cher:__phyi nang gsang ba rmad byung ba'i:__mchod pa'i sprin phung mkha' khyab gyur:__badz+ra s+pha ra Na khaM:__oM badz+ra ar+g+ha~M pA d+yaM puSh+pe d+hU pe A lo ke gan+d+he nai bid+yA shab+da AHhU~M:__ma hA pany+tsa a mr-i ta rak+ta ba liM ta oM AHhU~M hrI ThA:__lan gsum/__dngos gzhi bdag mdun chig rdzogs su sgrub pa ni/__hU~M:__stong gsal ngang las snod bcud kun:__rab 'jigs drag po'i zhing khams dbus:__pad+ma nyi ma bdud bzhi'i steng :__rang rig chu las nya 'phar ltar:__skad cig dran rdzogs thod phreng rtsal:__gsang bdag pad+ma gtum po'i sku:__mthing dmar lcags bsregs lta bu'i mdog:__rab khraus gar dgu'i nyams dang ldan:__phyag g.yas rdo rje lcags kyu yis:__sde brgyad 'byung po'i srog nas 'dren:__g.yon pas sdig mdzub phur bu 'dril:__ma rungs logs 'dren srog rtsa gcod:__rtse las sprul pa'i lcags sdig 'phro:__dam sri 'gong po hab hab za:__spyi gtsug rta gdong rngams bzhad 'tsher:__srid gsum g.yo zhing dbang du sdud:__sku smad gnam lcags phur pa'i dbal:__bar chad bdud bzhi'i snying la gzir:__dur khrod chas brgyad rab tu brjid:__mkha' 'gro chos skyong las la gzud:__gshog rtser khyung chen khra thabs lding :__sa bdag klu srin thal bar rlog:__ba spu'i khung bu thams cad kun:__rab 'byams khro bo'i phyag rgyas gtams:__gnas gsum yi ge gsum gyis mtshan:__thugs ka'i hU~M 'od lcags kyu yis:__ye shes 'khor bcas spyan drangs bsam/__spyan 'dren ni spos rol dbyangs dang bcas pas/__hU~M:__lho nub rak+sha'i pho brang nas:__ma hA gu ru thod phreng rtsal:__pad+ma gtum po'i skur bzhengs la:__gnas 'dir spyan 'dren gshegs su gsol:__badz+ra sa ma ya dzaHdzaH__bzhugs gsol phyag mchod bstod pa sogs ni/__dam ye dbyer med brtan par bzhugs:__sgo gsum gus pa'i dad phyag 'tshal:__phyi nang gsang mchod sman gtor raka:__mchod pa'i phyag rgya chen por bzhes:__sarba pU dza sa ma ya ho:__pany+tsa a mr-i ta rak+ta ba liM ta khA hi:__hU~M:__sangs rgyas kun 'dus thod phreng rtsal:__dregs pa 'dul phyir khro bo'i tshul:__pad+ma gtum po he ru kar:__gus pas bstod do dngos grub stsol:__de nas bzlas pa'i rnal 'byor la dbang bskur lta bu mdun dkyil sgrub skabs spro na 'dzab khang dbye/__thugs kar rdo rje'i lte bar hU~M:__sngags mtshan 'bar ba'i 'od zer gyis:__rtsa gsum mchod cing byin nus bsdus:__'gro drug sgrib sbyangs lha ru bsgyur:__dregs pa sde brgyad zil gyis mnan:__dam la mi gnas gdug pa kun:__ye shes me yis gzhob bzhin bsregs:__rjes shul lhag ma med par bsam:__oM AHhU~M hrIHma hA gu ru pad+ma tsaN+Da badz+ra kI li kI la ya khroM ga ru Da ru b+ha sha sarba duSh+tAn hU~M phaT:__ces bsnyen sgrub las sbyor chig dril gyi bzlas pa ci nus bya/__bum bzlas zur du spro na spyi ltar byas la mchod bstod dbang len nam rig me dor/__oM ha ya gr-i wa hU~M phaT kyis las bum gyi chu nus ldan du sgrub/__dbang dang ma 'brel na 'og gi bsdu ldang la 'jug pas chog cing*/__dbang bskur na slob ma rnams khrus bya/__bgegs bskrad cing srung 'khor gsal btab/__mtshams sbyor gyi khyad par/__de 'ang ji skad du/__byang chub sgrub la bar gcod pa'i:__srog bdag gza' klu rgyal 'gong btsan:__bdud bzhi'i 'jigs pa thams cad kyi:__gnyen po gcig tu dril ba'i lha:__pad+ma gtum po'i sgrub thabs 'di:__o rgyan bla ma'i thugs khrag ste:__ma 'ongs bod khams sdug bsngal dus:__las 'phro can gyi dpal du shog:__ces gsungs pa ltar/__snyigs ma'i dus kyi yang mtha' skye dgu'i rgyud ma rungs pa'i nyon mongs rang gzugs phyi rol du shar ba 'byung po gdug pa can gyi rnam par 'tshe bas lus can mtha' dag nad gdon glo bur gyi zug rngu 'phral dang yun tu sdug bsngal kho nas mnar ba la ched du dgongs te/__sangs rgyas sprul pa'i sku slob dpon rdo rje thod phreng rtsal nyid gang 'dul sgyu 'phrul rnam par rol pa'i phyag rgya dang sngags kyi gsang ba mtha' yas pa bstan pa rnams las snying po'i yang bcud che mchog drag po pad+ma gtum po'i gdams zab 'di nyid/__'ja' lus mkha' 'gro nyer lnga las shel dkar mgon skyid kyi sprul bsgyur mi 'gyur las 'phro gling pa'i zab gter 'dus pa skor bzhi'i ldebs su byon cing*/__thams cad mkhyen gzigs bka' babs bdun ldan pad+ma 'od gsal mdo sngags gling pa la gu ru rin po che dang gter ston rnam dbyer med pa'i ye shes kyi skus smin grol nye brgyud du stsal/__bdag cag la smin byed kyis rjes su bzung ba'i tshe/__me long la bris pa'i sngags byang gi gzugs brnyan bsub tu med pa'i rang byon ngo mtshar can du shar bas mtshon/__byin rlabs gzi brjid lhag par 'bar ba ste/__gzhung las/__dbang 'di lan gcig thob pas kyang :__pad+ma gtum pos byin brlabs nas:__bar chad kun gyis nye mi nus:__mthar thug dngos grub rnam gnyis 'grub:__ces bsngags pa don dang ldan pa'i smin byed zab mo bsgrub pa la sogs kyis mtshams sbyar nas maN+Dal 'bul du gzhug__/thal mo me tog dang bcas te gsol ba 'debs pa 'di'i rjes zlos mdzod/__dpal ldan bla ma rdo rje 'chang :__pad+ma gtum po bdag la dgongs:__khro rgyal chen po'i dkyil 'khor du:__byin rlabs dbang mchog stsal du gsol:__lan gsum/__bla ma dang gnyis su med pa'i khrag 'thung pad+ma gtum po la rtsa gsum rgyal ba rab 'byams sprin gtibs pa ltar bskor nas bzhugs pa'i spyan sngar rgyud dag pa'i phyir rgyun bshags yan lag brgyad pa tshul bzhin bya ba'i blos tshig don zung du 'brel ba'i bsgom don gsal thob la 'di'i rjes zlos/__rdo rje slob dpon sangs rgyas dpal/__/sogs lan gsum/__de nas dbang gi gzhi 'god cing ye shes pa dbab pa yin pas gzhan du ma yengs par dmigs pa 'di ltar du sgoms/__hU~M:__stong gsal ngang las snod bcud kun:__rab 'jigs drag po'i zhing khams dbus:__pad+ma nyi ma bdud bzhi'i steng :__rang rig chu las nya 'phar ltar:__skad cig dran rdzogs thod phreng rtsal:__gsang bdag pad+ma gtum po'i sku:__mthing dmar lcags bsregs lta bu'i mdog:__rab khraus gar dgu'i nyams dang ldan:__phyag g.yas rdo rje lcags kyu yis:__sde brgyad 'byung po'i srog nas 'dren:__g.yon pas sdig mdzub phur bu 'dril:__ma rungs logs 'dren srog rtsa gcod:__rtse las sprul pa'i lcags sdig 'phro:__dam sri 'gong po hab hab za:__spyi gtsug rta gdong rngams bzhad 'tsher:__srid gsum g.yo zhing dbang du sdud:__sku smad gnam lcags phur pa'i dbal:__bar chad bdud bzhi'i snying la gzir:__dur khrod chas brgyad rab tu brjid:__mkha' 'gro chos skyong las la gzud:__gshog rtser khyung chen khra thabs lding :__sa bdag klu srin thal bar rlog:__ba spu'i khung bu thams cad kun:__rab 'byams khro bo'i phyag rgyas gtams:__gnas gsum yi ge gsum gyis mtshan pa'i skur gyur pa la ye shes pa bsam gyis mi khyab pa spyan drangs nas sib sib thim pa'i mos pa mdzod/__spos rol dbyangs dang bcas pas/__hU~M:__lho nub rak+sha'i pho brang nas:__ma hA gu ru thod phreng rtsal:__pad+ma gtum po'i skur bzhengs la:__gnas 'dir spyan 'dren gshegs su gsol:__oM AHhU~M hrIHma hA gu ru pad+ma tsaN+Da badz+ra kI li kI la ya khroM ga ru Da ru b+ha sha sarba duSh+tAn hU~M phaT:__badz+ra A be sha ya a A:__btags pa brjod la ye shes pa dbab cing bstim/__rdo rje me tog mgor bzhag__/tiSh+Tha badz+ras brtan par bya/__dbang dngos la sku gsum thugs yon tan phrin las lnga yod pa las/__dang po sku'i dbang gi slad du/__rnam rgyal bum pa khrag 'thung pad+ma gtum po'i rten dang brten pa yongs su rdzogs pa khyed rang gi spyi bor bzhag pas rdo rje bdud rtsi'i rgyun gyis dbang bskur/__ye shes kyi sku mar me gcig las gnyis mched kyi tshul du byon/__dpral bar thim pas gzi brjid rab 'bar drag po'i sku dang dbyer med du gyur par mos shig__/bum pa spyi bor bzhag la/__hU~M:__khrag 'thung pad+ma gtum po yi:__sku ni snang la rang bzhin bral:__skal ldan bu la dbang bskur bas:__bskyed pa lha yi dbang thob shog:__kA ya a b+hi Shiny+tsa hU~M:__gnyis pa gsung gi dbang gi slad du/__gtum po'i mgrin pa nas 'bar ba'i sngags kyi phreng ba 'phros/__mgrin par thim pas mthu nus stobs ldan drag po'i gsung dang dbyer med du gyur par mos shig__/sngags byang mgrin par bzhag la/__hU~M:__khrag 'thung pad+ma gtum po yi:__gsung ni ma 'gags rang byung dbyangs:__skal ldan bu la dbang bskur bas:__bzlas pa sngags kyi dbang thob shog:__wA ka a b+hi Shiny+tsa hU~M:__gsum pa thugs kyi dbang gi slad du:__gtum po'i thugs ka nas ye shes rdo rje 'bar ba'i rnam pa byon:____snying gar thim pas 'khrul rtog rtsad gcod drag po'i thugs dang dbyer med du gyur par mos shig__/rdo rje snying gar bzhag la/__hU~M:__khrag 'thung pad+ma gtum po yi:__thugs ni stong nyid rdo rje'i dbyings:__skal ldan bu la dbang bskur bas:__ting 'dzin dgongs pa'i dbang thob shog:__tsit+ta a b+hi Shiny+tsa hU~M:__bzhi pa yon tan gyi dbang gi slad du:__dpal gyi gtor ma khrag 'thung pad+ma gtum po dngos su gsal bas byin gyis brlabs pas gang 'dul re skong drag po'i yon tan dang dbyer med du gyur par mos shig__/dpal gtor lte bar bzhag la/__hU~M:__khrag 'thung pad+ma gtum po yi:__yon tan re skong yid bzhin gter:__skal ldan bu la dbang bskur bas:__gang 'dul 'gro ba sgrol bar shog:__gu Na a b+hi Shiny+tsa hU~M:__lnga pa phrin las kyi dbang gi slad du:__'gugs sgrol gyi phyag 'tshan lag g.yas g.yon tu gtad pas thogs med rtsal ldan drag po'i phrin las dang dbyer med du gyur par mos shig__/lcags kyu g.yas dang phur pa g.yon tu gtad la/__hU~M:__khrag 'thung pad+ma gtum po yi:__phrin las dgra bgegs dgug cing sgrol:__skal ldan bu la dbang bskur bas:__mngon spyod stobs kyi dbang thob shog__/karma a b+hi Shiny+tsa hU~M:__de nas brub khung du ling+ga bkod pa la dgug gzhug bya ba ni/__na moH__rig 'dzin rtsa brgyud kyi dpal ldan bla ma dam pa rnams kyi bka' bden pa dang*/__sangs rgyas kyi bka' bden pa dang*/__chos kyi bka' bden pa dang*/__dge 'dun gyi bka' bden pa dang*/__gsang sngags dang rigs sngags dang*/__gzungs sngags dang*/__snying po dang*/__phyag rgya dang*/__ting nge 'dzin gyi bden pa dang*/__chos nyid gdod nas dag cing chos can rgyu 'bras bslu ba med pa'i bden pa dang*/__khyad par che mchog pad+ma drag po'i dkyil 'khor gyi lha tshogs bka' sdod dam can rgya mtsho'i tshogs dang bcas pa rnams kyi bden pa dang*/__bden pa chen po'i byin rlabs kyis ma rungs pa'i sems can bsgral ba'i zhing du gyur pa thams cad mtshan ma rdzas kyi rten 'di la mchis par gyur cig__oM AHhU~M hrIHma hA gu ru pad+ma tsaN+Da badz+ra kI li kI la ya khroM ga ru Da ru b+ha sha sarba duSh+tAn hU~M phaT:__dgra bgegs A kar+Sha ya dzaH__dzaHhU~M ba~M hoH__zhes lan gsum gyis bkug/__de nas khyed rang rnams la sngar byin pa'i las kyi phur bu de nyid 'dril bzhin du ling+ga dgra bgegs dngos su gsal ba la tshe lung khrus kyi dgongs pa dang ldan pas bsgral ba'i las mdzad par zhu/__hUM:__pad+ma drag po'i gsod byed pho nya che:__shin tu mi bzad yak+sha he ru ka:__phyag g.yas rno dbal gdug pa'i phur bu 'dril:__g.yon pas 'chor med lcags kyu rnon po gdengs:__dgra bgegs gnod byed gdug cing gtum po'i tshogs:__lcags kyus zung la phur bus snying gar thob:__tshe bsod dwangs ma sgrub mchog rnams la stims:__rnam shes rdo rje sems dpa'i sras su drongs:__gzugs phung rdul phran bzhin du dum bur gtubs:__mngon spyod stobs kyi phrin las yongs rdzogs mdzod:__badz+ra yak+sha kI li kI la ya sarba duSh+tAn A yur puN+ye dzaHb+h+rU~M:___nr-i tri bin+du a phaT:__b+hin+d+ha b+hin+d+ha mA ra ya rbad:__ces bsgral du bcug slar yang thun gyis brdeg bsad gris btubs la hom gzar du blug cing bstab pa ni/__hU~M:__pad+ma drag po'i lha tshogs zhal phyes shig:__dgra bgegs 'byung po bsgral ba'i sha khrag rus:__bde chen rdo rje'i longs spyod chen por bzhes:__dug gsum rtsad nas gcod pa'i phrin las mdzod:__sarba shatrUn big+h+nAn ma hA mAM sa rak+ta kiM ni ri ti kha kha khA hi khA hi:__ling ro thun gtor du bstabs la/__hU~M:__bcom ldan dpal chen pad+ma gtum po che:__dbyings nas brtser dgongs 'dir gshegs byin gyis rlobs:__dgra bgegs bsgral ba'i sha khrag gtor ma dang :__sman raka phud kyi 'dod yon mchod par bzhes:__rdo rje'i go chas 'gal rkyen bar chad srung :__mi mthun zhi zhing mthun rkyen legs tshogs spel:__khams gsum dbang sdus log lta cham la phog:__rnal 'byor byang chub sgrub la 'tshe ba yi:__gdug pa'i dgra bgegs srog rtsa dmar po chod:__sde brgyad cho 'phrul 'byung bzhi'i g.yo 'khrugs dang :__nad mtshon mu ge byad phur rbod gtong zlog:__mngon spyod stobs kyi phrin las yongs rdzogs mdzod:__aHyaHmaHduHruHtsaHshaHnaHsa ma ya b+h+yo b+h+yo zlog zlog:__thal brdab gtor ma dgra phyogs 'phang :__ces brjod la gtor ma dgra phyogs su 'phen tu gzhug__/me tog 'thor la/_oM/__rig 'dzin rtsal 'chang rtsa brgyud bla ma dang :__sgyu 'phrul drwa ba'i skur snang yi dam lha:__rnal 'byor grogs mdzad gnas gsum mkha' 'gro yis:__dngos grub dpal 'byor rgyas pa'i bkra shis shog:__ces shis par brjod/__de ltar dbang thob nas dam tshig bsrung sdom gyi tha tshig bsgrag pa yin te/__de ring phyin chad bu khyod kyis:__byang chub mchog tu sems bskyed la:__bla ma gtsug gi rgyan du zungs:__lha bsgom sngags bzlas rgyun ma bcad:__rang gzhan don kun rtag tu sgrubs:__ji ltar bsgos pa rnams tshul bzhin rjes su bsgrub pa'i blos 'di'i rjes zlos:__gtso bos ji ltar sogs dbang gi rjes rim dang*/__gtang rag mchod bstod ni/__phyi nang gsang mchod sman gtor raka:__mchod pa'i phyag rgya chen por bzhes:__sarba pU dza sa ma ya ho:__pany+tsa a mr-i ta rak+ta ba liM ta khA hi:__hU~M:__sangs rgyas kun 'dus thod phreng rtsal:__dregs pa 'dul phyir khro bo'i tshul:__pad+ma gtum po he ru kar:__gus pas bstod do dngos grub stsol:__yi ge brgya pas nongs pa bshags/_nyer bsdu ni/__a:__'gag med rig rtsal rol pa'i dkyil 'khor pa:__rim gyis bdag thim 'od gsal ngang du bzhag:__slar yang chu las rlabs kyi phreng ba ltar:__dbyings rig rang shar phyag rgya'i lha skur shar:__smon lam gdab pa ni/__ho:__gnyis med byang chub sems kyi dkyil 'khor du:__dus gsum bsags pa'i dge tshogs ci mchis pa:__mkha' khyab 'gro ba'i don du bsngos pa'i mthus:__bdag gzhan mi gnas ye shes myur thob shog:__shis brjod ni/__shin tu zhi ba chos sku'i dbyings nyid las:__rig pa rang shar bde chen longs spyod rdzogs:__gang 'dul 'gro ba'i don mdzad sprul pa'i skur:__dbyer med mngon par byang chub bkra shis shog:__ces sogs bsngo smon gyis mtha' brgyan par bya'o/__/'dis kyang zab cing dkon pa'i chos/__/gdul bya mu mtha' yas par 'phel/__/kun kyang pad+ma gtum po dang*/__/dbyer med che btsan zla bral shog__/ces 'jam mgon blo gros mtha' yas kyis spel ba'i dbang chog la las byang dkyus su gsar bsgrig bcas phun tshogs rnam rgyal pas bsdebs pa dge legs 'phel//__//