JKCL-KABUM-06-CHA-005

🚧 This website is under continued development. We appreciate your patience!

Previous Text"CHA" is not a number. Back to Volume Page"CHA" is not a number.Next Text "CHA" is not a number.

Wylie title
Location	chos kyi blo gros bka' 'bum Volume , Text 5, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"CHA" is not a number.

1 Texts in this Section (sde tshan or chos tshan)

19-29	འཇམ་དཔལ་དྲག་པོ་ཕ་རོལ་རྒོལ་འཇོམས་ཀྱི་བསྙེན་ཟིན་བདུད་དཔུང་ཚར་གཅོད། 'jam dpal drag po pha rol rgol 'joms kyi bsnyen zin bdud dpung tshar gcod Notes - zin bris   ·   Recitation Manual - bsnyen yig	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"CHA" is not a number.

Tibetan Text

Wylie

[edit]

༄༅། །འཇམ་དཔལ་དྲག་པོ་ཕ་རོལ་རྒོལ་འཇོམས་ཀྱི་བསྙེན་ཟིན་བདུད་དཔུང་ཚར་གཅོད་ཅེས་བྱ་བ་བཞུགས་སོ། ། ཨོཾ་སྭསྟི། བདུད་ཀྱི་དགྲ་སྟེ་དུས་ཀྱི་གཤེད་ཆེན་པོ། །ཁམས་གསུམ་ཟ་བྱེད་འཇམ་དཔལ་ཁྲོ་བོའི་རྒྱལ། །སངས་རྒྱས་ཀུན་གྱི་ཡེ་ཤེས་གཅིག་བསྡུས་ལྷར། །གུས་པས་བཏུད་ནས་བསྙེན་པའི་རེག་ཟིན་སྤེལ། གང་ཞིག་སྲིད་པའི་དུཿཁ་རྣམ་པར་འཇོམས་ཤིང་ཐར་པ་དང་ཐམས་ཅད་མཁྱེན་པའི་ས་ལ་གཞོལ་བར་འདོད་པས་འཇམ་དཔལ་ཡེ་ཤེས་ཀྱི་སྐུ་ཉིན་མོར་བྱེད་པའི་མཚན་དཔེའི་སྐུ་བསྒོམ་པ་དང་། རིག་སྔགས་བཟླས་པ་ལ་བརྩོན་པར་བྱེད་ན་སྙིགས་མའི་དུས་འདིར་འགྲུབ་སླ་ཞིང་། དེའང་གདུལ་དཀའི་འགྲོ་བ་རྣམས་ཞི་བའི་སྟོབས་ཀྱི་མི་ཐུལ་བས་ཚར་བཅད་དྲག་པོས་རྗེས་སུ་བཟུང་བའི་ཕྱིར་འཇམ་དཔལ་ཁྲོ་བོའི་རྣལ་འབྱོར་ལ་བརྩོན་པས་བྱང་ཆུབ་སྒྲུབ་པའི་བར་ཆད་ཞི་ཞིང་། ཁམས་གསུམ་ལས་རྣམ་པར་རྒྱལ་བའི་དངོས་གྲུབ་ཆེན་པོ་ཐོབ་པར་བྱེད་པའི་ཐབས་མཆོག་བླ་མའི་ཐུགས་སྒྲུབ་བར་ཆད་ཀུན་སེལ་གྱི་ཆོས་སྡེ་རིག་འཛིན་སྨྲ་བའི་སེང་གེ་ཞི་དྲག་གཉིས་ཀྱི་ཡ་གྱལ་དྲག་པོ་ཕ་རོལ་རྒོལ་འཇོམས་ཀྱི་བསྙེན་སྒྲུབ་བྱ་བར་འདོད་པས་སྨྲ་སེང་ཞི་སྒྲུབ་ཀྱི་བསྙེན་པ་སྔོན་དུ་ངེས་པར་འགྲོ་དགོས། འདི་ལ་འཇུག་པའི་སྣ་སེལ་དུ། བསང་དང་། མདོ་འདོན་པ། སཱ་ཙྪ་བཏབ་པ། གཏོར་མ་བསྔོ་བ་སོགས་ཚོགས་བསགས་ཅི་འགྲུབ་བྱ། ཟླ་བ་གང་ཡང་རུང་བའི་མར་ངོ་དྲག་པོའི་ལས་ལ་བསྔགས་པའི་བདུད་ཉི་སོགས་གཟའ་སྐར་འཕྲོད་སྦྱོར་རྩུབ་པར་གནས་ཁང་བྱི་དོར་བྱས་པའི་གོང་དུ་སྐུ་གསུང་ཐུགས་ཀྱི་རྟེན་རྣམས་བཀྲམ། སྟེགས་ཀྱི་ཁར་འབྲུ་ནག་གི་ཕྱེ་མས་སྦྲུས་པའི་འཇམ་དཔལ་ཁྲོ་བོའི་གཏོར་མ་ཟུར་གསུམ་བཅད་ཁ་མདུན་བསྟན་བཞི་བརྩེགས་ཀྱི་སྟེང་གཏོར་མ་བྲ་གཟུགས་མ་ཁྲམ་རིས་རྩི་དམར་པོ་ཅན་ལ་དྲག་རྒྱན་མེ་རི་དར་གདུགས་སོགས་མཛེས་པར་སྤྲས་པ་དང་། ལས་གཤིན་གྱི་གཏོར་མ་དམར་གཏོར་དཔུང་རང་རྩེ་བཅད་ལྷ་གྲངས་དང་མཉམ་པའི་དམར་གཏོར་རམ་མཐེབ་ཀྱུས་བསྐོར། དམ་ཅན་སྤྱིའི་གཏོར་སྤུངས། ཆད་ཐོ། བརྟན་མ་རྒྱུན་བཞག །དེ་དག་གི་གཡས་སུ་སྨན་དང་། གཡོན་དུ་རཀྟ། མདུན་དུ་ཞི་དྲག་གི་མཆོད་པ་སྦྲེངས་ཚར་གཡས་གཡོན་ནས་མགོ་ལེན་ཚུལ་གོ་ལྡོག་ཏུ་བཤམས་པ་དང་། ཕྱི་རོལ་དུ་གཏོར་མ་ཆ་གསུམ། གསེར་སྐྱེམས། རྒྱལ་ཐོའི་མཆོད་གཏོར། བགེགས་གཏོར་དང་ཚོགས་འདོན་མིན་སྐབས་དང་བསྟུན། ཐུན་ཐམས་ཅད་ཀྱི་མཐར་བཏང་རྒྱུ་གཏོར་ཆུང་ཁྲག་གི་སྦགས་པ་སོགས་ཀྱང་འདུ་བྱ། རང་གི་གདན་འོག་ཏུ་ཀུ་ཤ་དང་། ས་དཀར་གྱི་གཡུང་དྲུང་རིས་བཀོད། ཕྱི་དྲོའི་ཆར་རང་སྡོད་ས་དེར་མ་ཡིན་པའི་ལོགས་ཞིག་ཏུ་འཁོད་ནས། སྔགས་དྲུག་ཕྱག་དྲུག་གི་བྱིན་གྱིས་བརླབས། སྡེ་བརྒྱད་གསེར་སྐྱེམས་གཏོང་། དེ་ནས་གཏོར་མ་ཆ་གསུམ་གྱི་ཕྱི་རྒྱུད་ལ་གཏོར་བསྔོ། ཐོ་བཀོད་པའི་མདུན་མཆོད་གཏོར་ཕུལ། ཕྱི་མཚམས་གཅོད། ནང་དུ་ལོག་ནས། ཨོཾ་ཡ་མཱནྟ་ཀ་ཧཱུྃ་ཕཊཿརང་ཉིད་གཤིན་རྗེ་གཤེད་མཐིང་ནག་བེ་ཅོན་དང་བསྡིགས་མཛུབ་མཛད་པའི་སྐུར་གྱུར། བགེགས་གཏོར། རྃ་ཡྃ་ཁྃ། ཨོཾ་ཨཱཿ ཧཱུྃ། ལན་གསུམ་དང་། ཧ་ཧོ་ཧྲིཿས་བྱིན་གྱིས་བརླབས། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ག་ཏ་བྷྱོ་སོགས་ཀྱིས་བསྔོས་ལ་ལས་གཞུང་གི་བཀའ་བསྒོས་མཐར་བགེགས་གཏོར་དོར། གུ་གུལ་གྱི་རྟེན་རྫས་གནས་ཁང་ལ་བདུག །དྲག་སྔགས་ཡུངས་ཐུན་གྱིས་བསྐྲད། སྲུང་འཁོར་བསྒོམ། འདི་སྐབས་མཚམས་འོག་འཇུག་དགོས་རྣམས་སྲུང་གུར་དུ་ཚུད་པར་བསམ། སྲུང་འཁོར་མི་བསྡུ་བར་ཐུན་ཐམས་ཅད་ཀྱི་མགོར་གསལ་འདེབས་རེ་བྱས་ན་བར་ཆད་བསྲུང་བ་ལ་མཆོག་ཏུ་འགྱུར། ཡེ་དྷར་དང་། སུ་པྲ་ཏིཥྛ་སོགས་ཀྱིས་བརྟན་བཞུགས་བྱ། དེ་ནས་རང་མལ་དུ་སྡོད་ལ་རླུང་རོ་བསལ། ངེས་འབྱུང་གིས་བློ་བཅོས་རང་འདོད་ཀྱི་འཁྲི་བ་མེད་པའི་སེམས་བསྐྱེད་ཡུན་རིང་དུ་བསྒོམ། མཚམས་འདི་མ་གྲུབ་བར་རྐྱེན་གང་གིས་ཀྱང་འཕྲོག་པ་མེད་པའི་ཞེ་དམ་དྲག་པོ་ཡང་གལ་ཆེ། དེ་ནས་ཚིག་བདུན་གསོལ་འདེབས་དང་། ལེ་བདུན་གྱི་འཇམ་དཔལ་ཡ་མཱནྟ་ཀའི་དགོངས་པ་ཡི༔ སོགས་གསོལ་འདེབས་དང་། བརྒྱུད་འདེབས། སྐྱབས་སེམས། བཤགས་པ་ནས་བརྩམས་བསྟོད་པའི་བར་དང་། མཆོད་པ་བྱིན་བརླབ་ཀྱི་སྨན་རཀ་གཏོར་གསུམ་སྔགས་རྣམས་ཐུན་མགོ་མའི་སྐབས་འདིར་ལན་བདུན་རེ་ཙམ་དང་། ཕྱིན་ཆད་གསུམ་རེས་ཆོག །བཟླས་པའི་མགོར་དུང་ཆེན་གྱི་ཕྲེང་བའམ། འཇམ་དཔལ་ལ་བསྔགས་པའི་རུ་རཀྴའི་ཕྲེང་བ་གྲངས་ལྡན་བཟུང་ནས། ཕྲེང་བ་བྱིན་བརླབ་ནི། ལག་གཡོན་པར་ཕྲེང་བ་མདོ་འཛིན་སྟེང་དུ་ཡོད་པ་བྱས་ཏེ། ཡ་མཱནྟ་ཀས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཕྲེང་བ་འཇམ་དཔལ་ཕ་རོལ་རྒོལ་འཇོམས་མཐིང་ནག་ཞལ་གསུམ་ཕྱག་དྲུག་གི་གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་ལྕགས་ཀྱུ་གཏུན་ཤིང་དགྲ་སྟྭ། ཡུམ་གཏུམ་མོ་དུག་ཧྲུལ་མ་དམར་ནག་བེ་ཅོན་བྷན་ཁྲག་འཛིན་ཅིང་དུར་ཁྲོད་རོལ་པའི་ཆས་ཀྱིས་བརྒྱན་ཞིང་གཤིན་རྗེ་བྱེ་བའི་འཁོར་གྱིས་བསྐོར་བར་གྱུར། ཡེ་ཤེས་པ་བཛྲ་ས་མཱ་ཛཿཛཿཧཱུྃ་བྃ་ཧོཿབསྟིམ། བཛྲ་པུཥྤེ་སོགས་ཉེར་སྤྱོད་ཀྱིས་མཆོད། ཧཱུྃ༔ ཕ་རོལ་རྒོལ་འཇོམས་རིག་པ་འཛིན༔ སོགས་ཤྭ་ལོ་ཀ་གཅིག་གིས་བསྟོད། ཡ་མ་སོ་གཉིས་དང་དབྱངས་གསལ་རྟེན་སྙིང་ཅི་རིགས་དང་། ཨོཾ་རུ་ཙི་ར་མ་ཎི་པྲ་ཝ་རྟ་ན་ཡ་རཏྣ་མ་ཎི་དྷཱ་ར་ཛྙཱ་ན་དེ་ཝ་ཨ་བྷི་ཥིཉྩ་ཧཱུྃ་སྭཱ་ཧཱ། ཞེས་བརྒྱ་རྩ་བརྒྱད་བཟླས་པས་སྔགས་དང་མེ་ཏོག་ལས་འོད་ཟེར་འཕྲོས་བགྲང་ཕྲེང་ལྷར་གསལ་བ་ལ་ཐིམ། ལྷ་འོད་དུ་ཞུ་ནས་ཕྲེང་བར་གྱུར་པར་བསམ་ལ་ཤིས་པ་བརྗོད་ཅིང་མེ་ཏོག་གཏོར་རོ། །ཕྲེང་བ་འགོམ་ཡུག་སོགས་མ་ཤོར་ན་ཐུན་ཕྱི་མ་རྣམས་ལ་བྱིན་རླབས་སྔགས་ཁ་ཤས་རེ་བཟླས་པས་ཆོག །ཕཊ་ཛཿཞེས་ཛཔi་ཁང་དབྱེ་ནས་རང་འདྲའི་དཀྱིལ་འཁོར་གཉིས་པ་སྤྲོས་ཏེ་མདུན་གྱི་ནམ་མཁར་བཞུགས་པར་བསམ་ལ། ཛཔi་དགོངས་བདག་མདུན་གཉིས་ཀར་གསལ་བཏབ་འོད་ཟེར་སྤྲོ་བསྡུས་དམིགས་པ་དང་བཅས། ཡ་མ་སོ་གཉིས་བཟླ། ཐུན་མཐར་དབྱངས་གསལ་ཡིག་བརྒྱ་ཡེ་དྷར་རྣམས་ལན་གསུམ་རེས་སྔགས་ཀྱི་ལྷག་ཆད་སྐོངས། སྟོང་ཚིག་མཆོད་བསྟོད་བྱ། ཛཔi་ལྷ་རང་ལ་བསྟིམ། དམར་གཏོར་རཀྟས་བྲན་ལ་དམིགས་རྟེན་དུ་བྱས་ཏེ་གཏོར་འགུགས། ན་མོ། རྩ་བརྒྱུད་བླ་མ་སོགས་ནས་བསད་བསྒྲལ་བསྟབ་པ་དང་། ཉི་མ་བཞི་པའི་སྔགས་ཞེས་པ་ཡ་མ་སོ་གཉིས་མཐར་གཏོར་སྔགས་བཏགས་པ་ལན་གསུམ་མམ་བདུན་དུ་འབུལ། ཨོཾ༔ མཁྱེན་རབ་མངའ་བདག་སོགས་ཀྱི་ཕྲིན་བཅོལ། གཏོར་མ་གོང་གཏོར་དུ་ཕུལ་བའམ་ཕྱི་རོལ་དུ་མཆོད། དམོད་པའི་ཐལ་བརྡེབ་གཞུང་བཞིན་བྱ། དེ་ནས་བཀའ་གཏེར་སྲུང་མ་སྤྱི་དང་། ལས་གཤིན་གཏོར་འབུལ། ཚོགས་འདོན་ན་ལྷག་མ་བསྔོ་བའི་བར་བཏང་། ལྷག་མ་སྒྲུབ་པ་མ་གྲོལ་བར་ཕྱིར་མི་བཏང་སྒྲུབ་ཁང་གི་ལྷོ་ནུབ་ཏུ་བསོགས། དེའང་བསྒྲལ་བ་བསྡུས་པ་བྱ་སྟེ་ཚོགས་བཤགས་གྲུབ་ནས། ན་མོ་རིག་འཛིན་སོགས་ཀྱི་འགུགས་པ་ཚར་གཅིག །ཧཱུྃ༔ བདག་ཉིད་བཅོམ་ལྡན་དཔལ་ཆེན་པོ༔ ཁྲག་འཐུང་འཇམ་དཔལ་གཤིན་རྗེའི་གཤེད༔ རྡོ་རྗེ་ཁྲོས་པའི་ཏིང་འཛིན་གྱིས༔ དགྲ་བགེགས་ལྔ་ཕུང་རྡུལ་དུ་རློགཿརྩ་སྔགས་མཐར། ཨ་ནྲྀ་སུ་ཏྲི་པྲེ་དུ་ནྲྀ་ཏྲི་ཤ་ཏྲཱུན་བིགྷྣཱན་མཱ་ར་ཡ་ཕཊ༔ ནྲྀ་བྷྲཱུྃ་ཧཱུྃ་ཛཿཨེ་སྥ་ར་ཎ་ཕཊཿཅེས་བསྒྲལ། ལིང་རོ་བདུད་རྩིས་བྲན་ཏེ། ཧཱུྃཿའཇམ་དཔལ་ཁྲག་འཐུང་ལྷ་ཚོགས་ཞལ་ཕྱེས་ཤིག །དགྲ་བགེགས་དུག་ལྔ་བསྒྲལ་བའི་ཤ་ཁྲག་རུས༔ ཡེ་ཤེས་བདུད་རྩིར་བྱིན་གྱིས་བརླབས་ཏེ་འབུལ༔ རྔམ་བརྗིད་དགྱེས་པའི་ཚུལ་གྱིས་བཞེས་སུ་གསོལ༔ སརྦ་ཤ་ཏྲུན་བིགྷྣཱན་མཱ་ར་ཡ་མ་ཧཱ་མཱཾ་ས་རཀྟ་ཙིཏྟ་བ་སུ་ཏ་ཀིཾ་ནི་རི་ཏི་ཁ་ཁ་ཁཱ་ཧི་ཁཱ་ཧིཿནམ་མཁའ་མཛོད་སྔགས་ལན་གསུམ་གྱི་སྐོང་རྫས་བརླབ། སྐོང་བ་ཉེས་པའི་གཡུལ་རྒྱལ་འདོན། ཚོགས་ལ་རོལ་ཞིང་ཕུད་ལྷག་བསྲེས་ལ། ཨོཾ་ཨཱཿ ཧཱུྃ༔ གིས་ཞལ་ཆབ་བྲན། བྷྱོ༔ དཔལ་གྱི་བཀའ་ཉན་སོགས་ལས་གཞུང་ལྟར་ལྷག་མ་བསྔོ། ཧེ་རུ་ཀ་དཔལ་དཀྱིལ་འཁོར་དུ། །སོགས་སྨོན་ལམ་བཏབ། གཏོར་འབུལ་ཡོད་ན་གཏོར་སྐྱོངས་བྱ། ཚོགས་འདོན་པ་ཡིན་ན་ཚོགས་མགྲོན་ལ་མཆོད་བསྟོད་ནོངས་བཤགས་བརྟན་བཞུགས་དང་། གང་ལྟར་བསྡུ་ལྡང་བསྔོ་སྨོན་ཤིས་བརྗོད་བྱ། སང་ཐོར་ཐུན་ལ་ངག་བྱིན་བརླབ་སོགས་དང་། ལས་བྱང་རྒྱས་པའམ་བསྡུས་པ་རྗེ་མཁྱེན་བརྩེའི་གསུང་གནམ་ལྕགས་འཁོར་ལོ་གཉིས་གང་རུང་འདོན། སྤྱིར་ཐུན་བཞི་ལ་ཐུན་གང་རུང་གཅིག་ལ་ཕྲིན་ལས་རྒྱས་པ་དང་། གཞན་གསུམ་ལས་བྱང་བསྡུས་པ་བཏང་ན་རྒྱས་བསྡུས་འཚམས་ཤིང་། དེ་ལྟར་ཐུན་བཞི་ཀའི་མཇུག་ཏུ་གཏོར་འབུལ་དམོད་བཅོལ་རྣམས་འདོན་དགོས་ཤིང་། མི་ཁ་བཟློག་པ་རྒྱུན་དུ་མ་བྱས་ཀྱང་རུང་། བསྙེན་པའི་དམ་ཚིག་གསང་བ་སྤྱི་འགྲོའི་བསྙེན་ཡིག་ལྟར་ལ། ཐུན་སྒང་ངག་བཅད་དམ་པ་དང་། སྔགས་སྒྲ་དག་ཅིང་ཆད་ལྷག་མེད། གླལ་དང་། ལུ་བ། སྦྲིད་པ། གཉིད་སོགས་སྤངས་ལ། དེ་རྣམས་བྱུང་ན་ཕྲེང་རྡོག་ཁ་ཡར་གྲངས་སུ་མི་བརྩི་བ་དང་། བརྫུན་དང་། སྒོག་ཙོང་། ལྕེ་ཤ་བཟའ་བ། དམ་ཚིག་མི་གཙང་བའི་ལག་ནས་བྱུང་བའི་ཟས་གོས་སོགས་སྤངས། མལ་སྟན་སྤྲུགས་པ། སྐྲ་སེན་བྲེག་པ། ཁ་ལག་བཀྲུ་བ། མཚོན་རྩེ་ཁར་གཞུག་པ། རང་གི་མལ་དུ་གཞན་སྡོད་པ། ཁྱི་དང་བུད་མེད་སྒྲུབ་ཁང་དུ་ཞུགས་པ། མཚམས་འོག་ཏུ་མེད་པའི་མི་གསར་པ། དངོས་རྫས་གསར་པ་ཞག་རེ་ཙམ་ཕྱི་རོལ་དུ་མི་འཇོག་པ་ནང་དུ་ཁྱེར་བ་སོགས་འཛེམ། སེམས་ལྷ་སྔགས་ཏིང་ངེ་འཛིན་ལ་མི་གཏོད་པར་རྣམ་རྟོག་རྒྱ་འབྱམས་སུ་གཡེངས་བ་ནི། སེམས་གཞན་གཡེངས་པའི་བཟླས་པས་ནི། །བསྐལ་པར་བཟླས་ཀྱང་འབྲས་མི་འབྱིན། །ཞེས་གསུངས་པས་ནེ་ཚོས་མ་ཎི་འདོན་པ་ལྟར་འགྱུར་ཞིང་སྔགས་ཀྱི་འབྲས་བུ་མི་འབྱིན་པ་དང་། ཉོན་མོངས་དུག་ལྔ་དྲག་པོ་སྐྱེས་པ་དང་། ཆོས་དང་བླ་མ་ལ་ཡིད་མི་ཆེས་ཤིང་ཐེ་ཚོམ་ཟ་བ། སྒྲུབ་པ་མཐར་མི་ཕྱིན་པ་གཞན་དུ་འགྲོ་བ་སོགས་ཕྱི་ནང་གསང་བའི་མཚམས་རལ་བའི་རྒྱུ་རྣམས་སྤངས་ནས་དད་མོས་རྩེ་གཅིག་པས་བསྙེན་སྒྲུབ་ལ་འབད་པ་གལ་ཆེ་སྟེ། ཇི་སྐད་དུ། ཏིང་འཛིན་མེ་དང་འདྲ་བ་ལ། བཟླས་བརྗོད་རླུང་དང་འདྲ་བས་བསྐུལ། །ཞེས་གསུངས་སོ། །འཇམ་དཔལ་དྲག་པོ་འདི་ལྷ་སྔགས་ཅུང་ཟད་རྩུབ་པས་ཞི་བསྙེན་གྲངས་ཇི་ཙམ་མང་ན་དེ་ཙམ་གྱིས་དྲག་བསྙེན་འཇམ་ལ་གེགས་ཆུང་བ་དང་། བསྟན་པ་དང་སེམས་ཅན་གྱི་དོན་དུ་སེམས་བསྐྱེད་པ་ལས་རང་འདོད་ཀྱི་བསམ་སྦྱོར་ངན་པས་ཀུན་ནས་བསླང་སྟེ་དྲག་པོའི་བསྙེན་སྒྲུབ་བྱེད་ན་བར་ཆད་ཆེ་ཞིང་ཕྱི་མར་ངན་སོང་གི་རྒྱུ་བྱེད་པས་ཀུན་སློང་རྣམ་པར་དག་པ་གལ་ཆེ་བའང་འཕྲོས་དོན་དུ་སྨྲས་པའོ། །དེ་ལྟར་བསྙེན་སྒྲུབ་ལས་གསུམ་ཆིག་དྲིལ་ཡ་མ་སོ་གཉིས་རབ་འབྲུ་འབུམ། འབྲིང་འབུམ་ཕྲག་བཅུ་དྲུག །ཐ་མ་ལས་རུང་ཙམ་ལ་འབུམ་ཕྲག་བཞི་ཁ་སྐོངས་དང་བཅས་པ་བཟླ་ཟིན་ནས། ལས་སྦྱོར་བཟློག་པ་ཞག་བདུན་གསུམ་ལྔ་གང་རིགས་བྱས་ན་ལེགས་པས་དེ་ཡི་བཤོམ་དང་ཆོ་ག་རྣམས་ལས་བྱང་རྡོ་རྗེ་ཕ་ལམ་དུ་གསལ་བ་དང་། བཟློག་པ་འཕང་བ་སོགས་གྲུབ་ནས་དངོས་གྲུབ་བླངས་བ་ལ། སང་བླངས་རྒྱུའི་དོ་དགོང་ནས་མཆོད་གཏོར་རྣམས་ཁ་གསོ་སྟེགས་ཀྱི་ཁར་དངོས་གྲུབ་ཀྱི་འབྲང་རྒྱས་དར་གདུགས་ཀྱིས་བརྒྱན་པ་དང་། ཐོད་པ་བདུད་རྩིས་གཏམས་པ་ཟས་སྣ་ཚོགས་ཚད་བཤམས། སང་སྔ་བར་བསྐྱིད་བཟླས་གཏོར་བསྔོ། ཚོགས་མཆོད་དང་ལྷག་མ་བཙོན་འཛིན་དུ་བྱས་པ་དང་བཅས་ཕྱི་རོལ་དུ་མཆོད། ཆོས་སྐྱོང་གཏོར་འབུལ་དང་། ཆད་བརྟན། རྟ་བྲོ་བཅས་གྲུབ་ནས་དངོས་གྲུབ་ཀྱི་རྫས། ཨོཾ་སུཾ་བྷ་ནི་སོགས་གུལ་ཡུངས་བཅས་ཀྱིས་བགེགས་བསྐྲད། ཡེ་ཤེས་སྐུ་མཆོག་གི་བཤགས་པ་བྱ། ལས་བྱང་གི་བྱིན་འབེབས་དང་། དཀྱིལ་འཁོར་གྱི་ལྷ་ཚོགས་རྣམས་ཀྱི་སྐུ་ལས་འོད་ཟེར་འཕྲོས་པས་བདུད་དང་དམ་སྲི་དགྲ་བགེགས་བྱད་ཕུར་རྦོད་གཏོང་ཐམས་ཅད་ཚར་བཅད་དམིགས་མེད་ཀྱི་དབྱིངས་སུ་བསྟིམ། སྣོད་བཅུད་ཐམས་ཅད་འཇམ་དཔལ་ཞི་ཁྲོའི་དཀྱིལ་འཁོར་དུ་གྱུར། བདེ་གཤེགས་རྩ་གསུམ་ཞི་ཁྲོ་རབ་འབྱམས་ཀྱི་བྱིན་བརླབ་ནུས་མཐུ་ཐམས་ཅད་དང་། འཁོར་འདས་ཀྱི་མཁྱེན་བརྩེ་བློ་གྲོས་ཚེ་བསོད་དཔལ་འབྱོར་གྱི་དྭངས་བཅུད་ཐམས་ཅད་བསྡུས་ཏེ་བདག་དང་དངོས་གྲུབ་ཀྱི་རྫས་ལ་ཐིམ་པར་བསམ་ལ། རྩ་སྔགས་ལ། ཀཱ་ཡ་ཝཱ་ཀ་ཙིཏྟ་ཛྙཱ་ན་ཀརྨ་སརྦ་སིདྡྷི་ཕ་ལ་ཧཱུྃ༔ ཞེས་བཏགས་པ་སྟོང་རྩ་བཟླ། སྐྱ་རེངས་ཤར་བ་དང་བསྟུན། ཧཱུྃ་ཧྲཱིཿསྙིང་པོ་བྱང་ཆུབ་སེམས་ཀྱི་སོགས་ཀྱིས་དངོས་གྲུབ་བསྐུལ། རྟེན་གཏོར་གནས་གསུམ་དུ་བཞག །དངོས་གྲུབ་ཀྱི་རྫས་ལ་རང་ཉིད་དང་སྒྲུབ་གྲོགས་དམ་ཚིག་ལྡན་པར་སྦྱིན་པ་ལས་ཕྱི་མི་དང་། བྱ་ཁྱི་སོགས་ལ་མི་སྦྱིན་པར་བདག་གིར་སྤྱོད་དོ། །སླར་ཡང་མཆོད་པ་ཁ་གསོས་ལ་མཆོད་བསྟོད་རྒྱས་པར་བྱ། དམ་ཚིག་གི་བྲིས་སྐུ་སོགས་ཡོད་ན་རྟེན་བཞུགས་དང་། མེད་ན། ཁྱེད་ཀྱི་སེམས་ཅན་སོགས་ཀྱིས་ཡེ་ཤེས་པ་གཤེགས། དམ་ཚིག་པ་རང་ལ་ཐིམ། བསྡུ་ལྡང་བསྔོ་སྨོན་ཤིས་བརྗོད་རྒྱས་པར་བྱ། རྒྱལ་ཐོ་མདུན་མཆོད་གཏོར་བཤམས་ནས་ཐོ་འགྲོལ། ཉིན་ཁ་ཤས་ལ་ལས་བྱང་རྒྱས་བསྡུས་གང་རེད་ཚར་རེ་དང་། ལྷག་ཆད་སྐོང་ཕྱིར་ཡིག་བརྒྱ་ཅི་ནུས་བརྗོད། རིམ་གྱིས་གྲོགས་དམ་ལྡན་རེ་ཟུང་དང་འཕྲད་པ་སོགས་བསྙེན་སྒྲུབ་སྤྱི་ལྟར་ཤེས་པར་བྱ་ཞིང་། ལས་སྦྱོར་གཏོར་བཟློག་འདི་དངོས་གྲུབ་སྔོན་དུ་བླངས་ནས་རྗེས་ལ་བྱས་ཀྱང་ཆོག་གོ །དེ་ལྟར་བརྩོན་པའི་དགོས་པའང་། གཞུང་ལས། སྙིགས་མའི་འགྲོ་བ་ལས་ངན་ཅིང་༔ རྨུ་རྒོད་ཕྲག་དོག་ཆེ་བའི་རྒྱུས༔ བྱད་ཕུར་ལྡང་ཞིང་མི་ཁ་འཁྲུགས༔ གློ་བུར་ཚེ་ལ་བར་གཅོད་པའི༔ རྣམ་མང་གེགས་ཀྱིས་འཚེ་བ་ན༔ བླ་མ་འཇམ་དཔལ་སྨྲ་བའི་སེང་༔ དྲག་པོའི་རྣལ་འབྱོར་འདི་ཀ་བསྒོམ༔ ཞེས་སྙིགས་དུས་ཚེ་ཐུང་ནད་མང་གློ་བུར་གྱི་རྐྱེན་ངན་སྣ་ཚོགས་ལྡང་བའི་སྐབས་འདིར་འཇོམས་བྱེད་རྡོ་རྗེའི་རིག་སྔགས་ཀྱི་གོ་ཆ་བླ་ན་མེད་པ་འདི་ཉིད་ལ་བརྩོན་པར་བྱ་ཞིང་། བསྙེན་སྒྲུབ་ཐེམ་པས་གཏེར་གཞུང་གི་དངོས་བསྟན་ལས་ཀྱི་ཚོགས་རབ་འབྱམས་རྣམས་སྒྲུབ་ན་རང་གཞན་ལ་ཕན་བདེ་བླ་ན་མེད་པ་སྦྱིན་པའི་གསོས་སུ་གྱུར་པའོ། །རབ་འབར་རྡོ་རྗེའི་མེ་འོད་འཕྲོ་བ་ཡི། །མ་རུངས་བདུད་དང་གཤིན་རྗེ་འཇོམས་མཛད་ལྷ། །ཁྲོ་བོའི་རྒྱལ་པོ་གཤིན་རྗེ་གཤེད་ཆེན་གྱི། །བསྙེན་ཟིན་བློ་དམན་འཇུག་བདེའི་གསོས་སུ་སྤེལ། །དེ་ལས་ཐོབ་པའི་དགེ་ཚོགས་རིན་ཆེན་རྡུལ། །ལྷུན་པོར་སྤུངས་འདི་བསྟན་དང་འགྲོ་ལ་བསྔོ། །ཀུན་ཀྱང་བདེ་དགའི་དཔལ་གྱིས་འབྱོར་པ་དང་། །བསྟན་པ་རིན་ཆེན་གསལ་བའི་རྒྱུར་གྱུར་ཅིག །ཅེས་པའང་གདོང་སྣ་མཆོག་སྤྲུལ་རིན་པོ་ཆེའི་གསུང་བསྐུལ་ངོར་༧ཆོས་ཀྱི་བློ་གྲོས་པས་ཟིན་ཐུན་དུ་བཏབ་པ་སིདྡྷི་རསྟུ། མངྒ་ལཾ།། །།

[edit]

@#/__/'jam dpal drag po pha rol rgol 'joms kyi bsnyen zin bdud dpung tshar gcod ces bya ba bzhugs so/__/ oM swasti/__bdud kyi dgra ste dus kyi gshed chen po/__/khams gsum za byed 'jam dpal khro bo'i rgyal/__/sangs rgyas kun gyi ye shes gcig bsdus lhar/__/gus pas btud nas bsnyen pa'i reg zin spel/__gang zhig srid pa'i duHkha rnam par 'joms shing thar pa dang thams cad mkhyen pa'i sa la gzhol bar 'dod pas 'jam dpal ye shes kyi sku nyin mor byed pa'i mtshan dpe'i sku bsgom pa dang /__rig sngags bzlas pa la brtson par byed na snyigs ma'i dus 'dir 'grub sla zhing /__de'ang gdul dka'i 'gro ba rnams zhi ba'i stobs kyi mi thul bas tshar bcad drag pos rjes su bzung ba'i phyir 'jam dpal khro bo'i rnal 'byor la brtson pas byang chub sgrub pa'i bar chad zhi zhing /__khams gsum las rnam par rgyal ba'i dngos grub chen po thob par byed pa'i thabs mchog bla ma'i thugs sgrub bar chad kun sel gyi chos sde rig 'dzin smra ba'i seng ge zhi drag gnyis kyi ya gyal drag po pha rol rgol 'joms kyi bsnyen sgrub bya bar 'dod pas smra seng zhi sgrub kyi bsnyen pa sngon du nges par 'gro dgos/__'di la 'jug pa'i sna sel du/__bsang dang /__mdo 'don pa/__sA ts+tsha btab pa/__gtor ma bsngo ba sogs tshogs bsags ci 'grub bya/__zla ba gang yang rung ba'i mar ngo drag po'i las la bsngags pa'i bdud nyi sogs gza' skar 'phrod sbyor rtsub par gnas khang byi dor byas pa'i gong du sku gsung thugs kyi rten rnams bkram/__stegs kyi khar 'bru nag gi phye mas sbrus pa'i 'jam dpal khro bo'i gtor ma zur gsum bcad kha mdun bstan bzhi brtsegs kyi steng gtor ma bra gzugs ma khram ris rtsi dmar po can la drag rgyan me ri dar gdugs sogs mdzes par spras pa dang /__las gshin gyi gtor ma dmar gtor dpung rang rtse bcad lha grangs dang mnyam pa'i dmar gtor ram mtheb kyus bskor/__dam can spyi'i gtor spungs/__chad tho/__brtan ma rgyun bzhag__/de dag gi g.yas su sman dang /__g.yon du rak+ta/__mdun du zhi drag gi mchod pa sbrengs tshar g.yas g.yon nas mgo len tshul go ldog tu bshams pa dang /__phyi rol du gtor ma cha gsum/__gser skyems/__rgyal tho'i mchod gtor/__bgegs gtor dang tshogs 'don min skabs dang bstun/__thun thams cad kyi mthar btang rgyu gtor chung khrag gi sbags pa sogs kyang 'du bya/__rang gi gdan 'og tu ku sha dang /__sa dkar gyi g.yung drung ris bkod/__phyi dro'i char rang sdod sa der ma yin pa'i logs zhig tu 'khod nas/__sngags drug phyag drug gi byin gyis brlabs/__sde brgyad gser skyems gtong /__de nas gtor ma cha gsum gyi phyi rgyud la gtor bsngo/__tho bkod pa'i mdun mchod gtor phul/__phyi mtshams gcod/__nang du log nas/__oM ya mAn+ta ka hU~M phaTaHrang nyid gshin rje gshed mthing nag be con dang bsdigs mdzub mdzad pa'i skur gyur/__bgegs gtor/__ra~M ya~M kha~M/__oM AH_hU~M/__lan gsum dang /__ha ho hriHsa byin gyis brlabs/__oM sarba big+h+nAn na maHsarba ta thA ga ta b+h+yo sogs kyis bsngos la las gzhung gi bka' bsgos mthar bgegs gtor dor/__gu gul gyi rten rdzas gnas khang la bdug__/drag sngags yungs thun gyis bskrad/__srung 'khor bsgom/__'di skabs mtshams 'og 'jug dgos rnams srung gur du tshud par bsam/__srung 'khor mi bsdu bar thun thams cad kyi mgor gsal 'debs re byas na bar chad bsrung ba la mchog tu 'gyur/__ye d+har dang /__su pra tiSh+Tha sogs kyis brtan bzhugs bya/__de nas rang mal du sdod la rlung ro bsal/__nges 'byung gis blo bcos rang 'dod kyi 'khri ba med pa'i sems bskyed yun ring du bsgom/__mtshams 'di ma grub bar rkyen gang gis kyang 'phrog pa med pa'i zhe dam drag po yang gal che/__de nas tshig bdun gsol 'debs dang /__le bdun gyi 'jam dpal ya mAn+ta ka'i dgongs pa yi:__sogs gsol 'debs dang /__brgyud 'debs/__skyabs sems/__bshags pa nas brtsams bstod pa'i bar dang /__mchod pa byin brlab kyi sman raka gtor gsum sngags rnams thun mgo ma'i skabs 'dir lan bdun re tsam dang /__phyin chad gsum res chog__/bzlas pa'i mgor dung chen gyi phreng ba'am/__'jam dpal la bsngags pa'i ru rak+sha'i phreng ba grangs ldan bzung nas/__phreng ba byin brlab ni/__lag g.yon par phreng ba mdo 'dzin steng du yod pa byas te/__ya mAn+ta kas bsang /__swa b+hA was sbyangs/__stong pa'i ngang las phreng ba 'jam dpal pha rol rgol 'joms mthing nag zhal gsum phyag drug gi g.yas gsum rdo rje 'khor lo ral gri/__g.yon gsum lcags kyu gtun shing dgra s+t+wa/__yum gtum mo dug hrul ma dmar nag be con b+han khrag 'dzin cing dur khrod rol pa'i chas kyis brgyan zhing gshin rje bye ba'i 'khor gyis bskor bar gyur/__ye shes pa badz+ra sa mA dzaHdzaHhU~M ba~M hoHbstim/__badz+ra puSh+pe sogs nyer spyod kyis mchod/__hU~M:__pha rol rgol 'joms rig pa 'dzin:__sogs shwa lo ka gcig gis bstod/__ya ma so gnyis dang dbyangs gsal rten snying ci rigs dang /__oM ru tsi ra ma Ni pra wa rta na ya rat+na ma Ni d+hA ra dz+nyA na de wa a b+hi Shiny+tsa hU~M swA hA/__zhes brgya rtsa brgyad bzlas pas sngags dang me tog las 'od zer 'phros bgrang phreng lhar gsal ba la thim/__lha 'od du zhu nas phreng bar gyur par bsam la shis pa brjod cing me tog gtor ro/__/phreng ba 'gom yug sogs ma shor na thun phyi ma rnams la byin rlabs sngags kha shas re bzlas pas chog__/phaT dzaHzhes dzapa[i] khang dbye nas rang 'dra'i dkyil 'khor gnyis pa spros te mdun gyi nam mkhar bzhugs par bsam la/__dzapa[i] dgongs bdag mdun gnyis kar gsal btab 'od zer spro bsdus dmigs pa dang bcas/__ya ma so gnyis bzla/__thun mthar dbyangs gsal yig brgya ye d+har rnams lan gsum res sngags kyi lhag chad skongs/__stong tshig mchod bstod bya/__dzapa[i] lha rang la bstim/__dmar gtor rak+tas bran la dmigs rten du byas te gtor 'gugs/__na mo/__rtsa brgyud bla ma sogs nas bsad bsgral bstab pa dang /__nyi ma bzhi pa'i sngags zhes pa ya ma so gnyis mthar gtor sngags btags pa lan gsum mam bdun du 'bul/__oM:__mkhyen rab mnga' bdag sogs kyi phrin bcol/__gtor ma gong gtor du phul ba'am phyi rol du mchod/__dmod pa'i thal brdeb gzhung bzhin bya/__de nas bka' gter srung ma spyi dang /__las gshin gtor 'bul/__tshogs 'don na lhag ma bsngo ba'i bar btang /__lhag ma sgrub pa ma grol bar phyir mi btang sgrub khang gi lho nub tu bsogs/__de'ang bsgral ba bsdus pa bya ste tshogs bshags grub nas/__na mo rig 'dzin sogs kyi 'gugs pa tshar gcig__/hU~M:__bdag nyid bcom ldan dpal chen po:__khrag 'thung 'jam dpal gshin rje'i gshed:__rdo rje khros pa'i ting 'dzin gyis:__dgra bgegs lnga phung rdul du rlogaHrtsa sngags mthar/__a nr-i su tri pre du nr-i tri sha trUn big+h+nAn mA ra ya phaT:__nr-i b+h+rU~M hU~M dzaHe s+pha ra Na phaTaHces bsgral/__ling ro bdud rtsis bran te/__hU~MH'jam dpal khrag 'thung lha tshogs zhal phyes shig__/dgra bgegs dug lnga bsgral ba'i sha khrag rus:__ye shes bdud rtsir byin gyis brlabs te 'bul:__rngam brjid dgyes pa'i tshul gyis bzhes su gsol:__sarba sha trun big+h+nAn mA ra ya ma hA mAM sa rak+ta tsit+ta ba su ta kiM ni ri ti kha kha khA hi khA hiHnam mkha' mdzod sngags lan gsum gyi skong rdzas brlab/__skong ba nyes pa'i g.yul rgyal 'don/__tshogs la rol zhing phud lhag bsres la/__oM AH_hU~M:__gis zhal chab bran/__b+h+yo:__dpal gyi bka' nyan sogs las gzhung ltar lhag ma bsngo/__he ru ka dpal dkyil 'khor du/__/sogs smon lam btab/__gtor 'bul yod na gtor skyongs bya/__tshogs 'don pa yin na tshogs mgron la mchod bstod nongs bshags brtan bzhugs dang /__gang ltar bsdu ldang bsngo smon shis brjod bya/__sang thor thun la ngag byin brlab sogs dang /__las byang rgyas pa'am bsdus pa rje mkhyen brtse'i gsung gnam lcags 'khor lo gnyis gang rung 'don/__spyir thun bzhi la thun gang rung gcig la phrin las rgyas pa dang /__gzhan gsum las byang bsdus pa btang na rgyas bsdus 'tshams shing /__de ltar thun bzhi ka'i mjug tu gtor 'bul dmod bcol rnams 'don dgos shing /__mi kha bzlog pa rgyun du ma byas kyang rung /__bsnyen pa'i dam tshig gsang ba spyi 'gro'i bsnyen yig ltar la/__thun sgang ngag bcad dam pa dang /__sngags sgra dag cing chad lhag med/__glal dang /__lu ba/__sbrid pa/__gnyid sogs spangs la/__de rnams byung na phreng rdog kha yar grangs su mi brtsi ba dang /__brdzun dang /__sgog tsong /__lce sha bza' ba/__dam tshig mi gtsang ba'i lag nas byung ba'i zas gos sogs spangs/__mal stan sprugs pa/__skra sen breg pa/__kha lag bkru ba/__mtshon rtse khar gzhug pa/__rang gi mal du gzhan sdod pa/__khyi dang bud med sgrub khang du zhugs pa/__mtshams 'og tu med pa'i mi gsar pa/__dngos rdzas gsar pa zhag re tsam phyi rol du mi 'jog pa nang du khyer ba sogs 'dzem/__sems lha sngags ting nge 'dzin la mi gtod par rnam rtog rgya 'byams su g.yengs ba ni/__sems gzhan g.yengs pa'i bzlas pas ni/__/bskal par bzlas kyang 'bras mi 'byin/__/zhes gsungs pas ne tshos ma Ni 'don pa ltar 'gyur zhing sngags kyi 'bras bu mi 'byin pa dang /__nyon mongs dug lnga drag po skyes pa dang /__chos dang bla ma la yid mi ches shing the tshom za ba/__sgrub pa mthar mi phyin pa gzhan du 'gro ba sogs phyi nang gsang ba'i mtshams ral ba'i rgyu rnams spangs nas dad mos rtse gcig pas bsnyen sgrub la 'bad pa gal che ste/__ji skad du/__ting 'dzin me dang 'dra ba la/__bzlas brjod rlung dang 'dra bas bskul/__/zhes gsungs so/__/'jam dpal drag po 'di lha sngags cung zad rtsub pas zhi bsnyen grangs ji tsam mang na de tsam gyis drag bsnyen 'jam la gegs chung ba dang /__bstan pa dang sems can gyi don du sems bskyed pa las rang 'dod kyi bsam sbyor ngan pas kun nas bslang ste drag po'i bsnyen sgrub byed na bar chad che zhing phyi mar ngan song gi rgyu byed pas kun slong rnam par dag pa gal che ba'ang 'phros don du smras pa'o/__/de ltar bsnyen sgrub las gsum chig dril ya ma so gnyis rab 'bru 'bum/__'bring 'bum phrag bcu drug__/tha ma las rung tsam la 'bum phrag bzhi kha skongs dang bcas pa bzla zin nas/__las sbyor bzlog pa zhag bdun gsum lnga gang rigs byas na legs pas de yi bshom dang cho ga rnams las byang rdo rje pha lam du gsal ba dang /__bzlog pa 'phang ba sogs grub nas dngos grub blangs ba la/__sang blangs rgyu'i do dgong nas mchod gtor rnams kha gso stegs kyi khar dngos grub kyi 'brang rgyas dar gdugs kyis brgyan pa dang /__thod pa bdud rtsis gtams pa zas sna tshogs tshad bshams/__sang snga bar bskyid bzlas gtor bsngo/__tshogs mchod dang lhag ma btson 'dzin du byas pa dang bcas phyi rol du mchod/__chos skyong gtor 'bul dang /__chad brtan/__rta bro bcas grub nas dngos grub kyi rdzas/__oM suM b+ha ni sogs gul yungs bcas kyis bgegs bskrad/__ye shes sku mchog gi bshags pa bya/__las byang gi byin 'bebs dang /__dkyil 'khor gyi lha tshogs rnams kyi sku las 'od zer 'phros pas bdud dang dam sri dgra bgegs byad phur rbod gtong thams cad tshar bcad dmigs med kyi dbyings su bstim/__snod bcud thams cad 'jam dpal zhi khro'i dkyil 'khor du gyur/__bde gshegs rtsa gsum zhi khro rab 'byams kyi byin brlab nus mthu thams cad dang /__'khor 'das kyi mkhyen brtse blo gros tshe bsod dpal 'byor gyi dwangs bcud thams cad bsdus te bdag dang dngos grub kyi rdzas la thim par bsam la/__rtsa sngags la/__kA ya wA ka tsit+ta dz+nyA na karma sarba sid+d+hi pha la hU~M:__zhes btags pa stong rtsa bzla/__skya rengs shar ba dang bstun/__hU~M hrIHsnying po byang chub sems kyi sogs kyis dngos grub bskul/__rten gtor gnas gsum du bzhag__/dngos grub kyi rdzas la rang nyid dang sgrub grogs dam tshig ldan par sbyin pa las phyi mi dang /__bya khyi sogs la mi sbyin par bdag gir spyod do/__/slar yang mchod pa kha gsos la mchod bstod rgyas par bya/__dam tshig gi bris sku sogs yod na rten bzhugs dang /__med na/__khyed kyi sems can sogs kyis ye shes pa gshegs/__dam tshig pa rang la thim/__bsdu ldang bsngo smon shis brjod rgyas par bya/__rgyal tho mdun mchod gtor bshams nas tho 'grol/__nyin kha shas la las byang rgyas bsdus gang red tshar re dang /__lhag chad skong phyir yig brgya ci nus brjod/__rim gyis grogs dam ldan re zung dang 'phrad pa sogs bsnyen sgrub spyi ltar shes par bya zhing /__las sbyor gtor bzlog 'di dngos grub sngon du blangs nas rjes la byas kyang chog go__/de ltar brtson pa'i dgos pa'ang /__gzhung las/__snyigs ma'i 'gro ba las ngan cing :__rmu rgod phrag dog che ba'i rgyus:__byad phur ldang zhing mi kha 'khrugs:__glo bur tshe la bar gcod pa'i:__rnam mang gegs kyis 'tshe ba na:__bla ma 'jam dpal smra ba'i seng :__drag po'i rnal 'byor 'di ka bsgom:__zhes snyigs dus tshe thung nad mang glo bur gyi rkyen ngan sna tshogs ldang ba'i skabs 'dir 'joms byed rdo rje'i rig sngags kyi go cha bla na med pa 'di nyid la brtson par bya zhing /__bsnyen sgrub them pas gter gzhung gi dngos bstan las kyi tshogs rab 'byams rnams sgrub na rang gzhan la phan bde bla na med pa sbyin pa'i gsos su gyur pa'o/__/rab 'bar rdo rje'i me 'od 'phro ba yi/__/ma rungs bdud dang gshin rje 'joms mdzad lha/__/khro bo'i rgyal po gshin rje gshed chen gyi/__/bsnyen zin blo dman 'jug bde'i gsos su spel/__/de las thob pa'i dge tshogs rin chen rdul/__/lhun por spungs 'di bstan dang 'gro la bsngo/__/kun kyang bde dga'i dpal gyis 'byor pa dang /__/bstan pa rin chen gsal ba'i rgyur gyur cig__/ces pa'ang gdong sna mchog sprul rin po che'i gsung bskul ngor 7chos kyi blo gros pas zin thun du btab pa sid+d+hi rastu/__mang+ga laM//___//