JKCL-KABUM-05-CA-023

Previous Text"CA" is not a number. Back to Volume Page"CA" is not a number.Next Text "CA" is not a number.

Wylie title
Location	chos kyi blo gros bka' 'bum Volume , Text 23, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"CA" is not a number.

1 Texts in this Section (sde tshan or chos tshan)

299-303	རྩ་གསུམ་ཚེ་དཀར་གྱི་བསྐང་བ་འཆི་མེད་བདེ་ཆེན་བཅུད་འབེབས། rtsa gsum tshe dkar gyi bskang ba 'chi med bde chen bcud 'bebs Mending Rituals - bskang chog	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"CA" is not a number.

Tibetan Text

Wylie

[edit]

རྩ་གསུམ་ཚེ་དཀར་གྱི་བསྐང་བ་འཆི་མེད་བདེ་ཆེན་བཅུད་འབེབས་བཞུགས། ཚོགས་དང་མཆོད་གཏོར་སྤྱན་གཟིགས་དང་། །ཕྱི་ནང་མཆོད་རྫས་རྒྱ་ཆེར་བཤམས། །སྙན་པའི་དབྱངས་དང་རོལ་མོ་བཅས། །དཀྱིལ་འཁོར་ལྷ་ཚོགས་ཐུགས་དམ་བསྐང་། །ཧཱུྃ་ཧྲཱིཿམཁའ་སྤྱོད་དག་པ་འཇའ་འོད་འཁྲིགས་པའི་ཀློང་། །ཚེ་དཔག་མེད་དང་ཡུམ་མཆོག་ཙནྡྷཱ་ལི། །ནཱ་གཱ་རྫུ་ན་པདྨ་སཾ་བྷ་ཝ། །མནྡཱ་ར་བ་བདེ་ཆེན་རྒྱལ་མོ་དང་། །མངའ་བདག་ཚངས་ཆེན་ལྷ་སྲས་རོལ་པ་རྩལ། །བདུད་འཇོམས་རྡོ་རྗེ་མཆོག་གྱུར་བདེ་ཆེན་གླིང་། །རྡོ་རྗེ་གཟི་བརྗིད་པདྨ་གར་དབང་སོགས། །ཚེ་བདག་བརྒྱུད་པའི་བླ་མ་ཐམས་ཅད་བཞུགས། །མི་མངོན་དབྱིངས་ནས་ཐུགས་རྗེ་གློག་ལྟར་མྱུར། །འདིར་གཤེགས་མོས་པའི་བུ་ལ་བྱིན་གྱིས་རློབས། །འདིར་ཚོགས་སྐལ་ལྡན་རྣམས་ལ་དངོས་གྲུབ་སྩོལ། །མི་ཤིགས་རྡོ་རྗེའི་སྲོག་མཆོག་འགྲུབ་པར་མཛོད། །ཧཱུྃ་ཧྲཱིཿའོད་གསལ་དག་པ་བདེ་ཆེན་ཕོ་བྲང་དབུས། །རིན་ཆེན་སེང་ཁྲི་པདྨ་ཟླ་བའི་སྟེང་། །ཚེ་བདག་བཅོམ་ལྡན་རྒྱལ་བ་རིགས་ལྔ་དང་། །སྒྱུ་འཕྲུལ་ཞི་བ་ཚེ་ལྷའི་ཚོམ་བུར་བཅས། །འགུགས་བྱེད་ལྷ་མོ་མགྱོགས་མ་རྣམ་པ་བཞི། །བཀྲ་ཤིས་རྟགས་ཀྱི་ཚེ་ཡི་ལྷ་མོ་སོགས། །དཀྱིལ་འཁོར་བསམ་ཡས་རབ་འབྱམས་རྒྱ་མཚོ་ལ། །བདེ་སྟོང་མཁའ་ཁྱབ་རྡོ་རྗེའི་མཆོད་སྤྲིན་གྱིས། །ཀུན་བཟང་ཡངས་པ་ཆེན་པོའི་ཀློང་དུ་བསྐང་། །ཧཱུྃ་ཧྲཱིཿཐུགས་དམ་བསྐང་བའི་ཕྱི་ནང་མཆོད་རྫས་ནི། །དངོས་སུ་འབྱོར་དང་ཡིད་ལས་བྱུང་བ་ཡི། །ཀུན་བཟང་མཆོད་སྤྲིན་མཁའ་དབྱིངས་རྒྱས་པར་བསྐང་། །རྩ་གསུམ་ཚེ་ཡི་ལྷ་ཚོགས་ཐུགས་དམ་བསྐང་། །སྡིག་ལྟུང་དམ་ཚིག་ཉམས་ཆག་མཐོལ་ལོ་བཤགས། །འཆི་མེད་རྡོ་རྗེའི་གསང་གསུམ་འགྲུབ་པར་མཛོད། །ཧཱུྃ་ཧྲཱིཿདཀྱིལ་འཁོར་རབ་འབྱམས་ལྷ་ཚོགས་ཐམས་ཅད་ལ། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞ་ཟས་རོལ་མོ་ལྷ་མིའི་ལོངས་སྤྱོད་མཆོག །སོ་སོའི་བཞེད་རྒུར་འཆར་བའི་མཆོད་སྤྲིན་གྱིས། །རྩ་གསུམ༴། སྡིག་ལྟུང་༴། འཆི་མེད༴། གཟུགས་སྒྲ་དྲི་རོ་རེག་བྱའི་ལྷ་མོའི་ཚོགས། །ལག་ན་འདོད་ཡོན་ཐོགས་པ་དཔག་མེད་ཀྱིས། །དཀྱིལ་འཁོར་ལྷ་ཚོགས་ཟག་མེད་དབང་པོའི་ཡུལ། །དགྱེས་པར་བསྐྱེད་པའི་འདོད་ཡོན་བསམ་མི་ཁྱབ། །རྩ་གསུམ་སོགས་འགྲེ། ཕྱི་ནང་གསང་གསུམ་རྡོ་རྗེའི་མཎྜ་ལར། །འཁོར་འདས་སྣང་སྲིད་སྣོད་བཅུད་དཔལ་འབྱོར་གྱི། །སྐུ་གསུམ་ཞིང་ཁམས་རྒྱས་པར་ཡོངས་བཀང་ནས། །མོས་པའི་བློ་དང་ཏིང་འཛིན་སྟོབས་ཀྱིས་འབུལ། །རྩ་གསུམ༴། བཀྲ་ཤིས་རྟགས་རྫས་རྒྱལ་སྲིད་རྣམ་པ་བདུན། །ཉེ་བའི་རིན་ཆེན་བདུན་དང་གཞལ་མེད་ཁང་། །བདེ་ཆེན་ཞིང་གི་བཀོད་པ་དཔག་མེད་ཀྱིས། །རྩ་གསུམ༴རྩ་བརྒྱད་སྟོང་ལ་སྦྱར་བའི་སྨན་ཕུད་དང་། །སྣོད་བཅུད་ཡོངས་རྫོགས་བ་ལིང་གཏོར་མ་བཤམ། །རྒྱུ་དྲུག་འཁོར་བ་བསྒྲལ་བའི་རཀྟ་ཡིས། །རྩ་གསུམ༴། ཀུན་གཞི་གསང་བ་ཆེན་པོའི་ཀོང་བུ་རུ། །ཆོས་དབྱིངས་བྱང་ཆུབ་སེམས་ཀྱི་མར་ཁུས་གཏམས། །ཤེས་རབ་རང་བྱུང་སྒྲོན་མའི་སྡོང་བུ་ལ། །འོད་གསལ་ཐིག་ལེ་ཆེན་པོའི་མར་མེ་སྦར། །རྩ་གསུམ༴། ཨཱཿལས་བྷནྡྷ་སྟོང་གསུམ་ཁྱོན་མཉམ་ནང་། །ཤ་ལྔ་བདུད་རྩི་ལྷུན་པོར་སྤུངས་པ་ལས། །ཟག་མེད་ཡེ་ཤེས་བདུད་རྩིའི་འདོད་ཡོན་འཕྲོ། །རྨད་བྱུང་ག་ཎ་ཙཀྲའི་མཆོད་པ་འདིས། །རྩ་གསུམ༴། དགའ་བཞིའི་ཉམས་འགྱུར་རྫོགས་པའི་ལྷ་མོ་ཡིས། །དྲི་དང་ཕྲེང་ཐོགས་འཇོ་སྒེག་ལང་ཚོ་ངོམ། །བཅུ་དྲུག་བདེ་བའི་གར་བསྒྱུར་མཆོད་སྤྲིན་གྱིས། །རྩ་གསུམ༴། པད་ཅན་དུང་དང་རི་དྭགས་གླང་སྣ་ཅན། །ཡིད་འཕྲོག་ལྷ་མོ་ཨུཏྤལ་དྲི་བསུང་འཐུལ། །ཟག་མེད་མཉམ་སྦྱོར་འཁྲིལ་ཆགས་དགྱེས་མཆོད་ཀྱིས། །རྩ་གསུམ༴། ཀུན་ནས་ཀུན་དུ་དགའ་བའི་གར་བསྒྱུར་ཤིང་། །སྙན་པའི་གླུ་ལེན་ལྷ་རྫས་རོལ་མོ་འཁྲོལ། །དཀྱིལ་འཁོར་ལྷ་ཚོགས་ཡོན་ཏན་སྒྲོགས་པ་ཡི། །བསྟོད་དབྱངས་རྒྱ་མཚོའི་སྤྲིན་གྱི་བླ་བྲེ་བྲེས། །རྩ་གསུམ༴། གང་དག་ཞི་བས་གདུལ་བར་དཀའ་བ་རྣམས། །དྲག་པོའི་སྟོབས་ཀྱི་ས་གསུམ་གདུག་ཅན་བསྒྲལ། །མཁའ་དབྱིངས་གཏུན་བུར་ཐབས་ཀྱི་རྡོ་རྗེས་བརྡུང་། །ཡེ་ཤེས་རིག་པའི་མཚོན་ཆས་དུམ་བུར་གཏུབ། །དབང་ཆེན་ཁྲོ་བོ་རོལ་པའི་ཞལ་དུ་སྟོབས། །སྐྱེ་ཤི་རྩད་བཅད་དུག་ལྔའི་རྣམ་རྟོག་བཟློག །ག་ཎ་སྒྲོལ་བའི་དགྱེས་མཆོད་དམ་པ་འདིས། །རྩ་གསུམ་ཚེ་ཡི་ལྷ་ཚོགས་ཐུགས་དམ་བསྐང་། །སྡིག་ལྟུང་དམ་ཚིག་ཉམས་ཆགས་མཐོལ་ལོ་བཤགས། །འཆི་མེད་རྡོ་རྗེའི་གསང་གསུམ་འགྲུབ་པར་མཛོད། །ཧཱུྃ་ཧྲཱིཿདཀྱིལ་འཁོར་ཆེན་པོའི་བཀའ་ཉན་བསྟན་པ་སྲུངས། །རྡོ་རྗེའི་ཆོས་སྲུངས་ནོར་ལྷ་གཏེར་བདག་དང་། །གནས་དང་གཞི་བདག་དཀར་ཕྱོགས་སྐྱོང་རྣམས་ལ། །མཐུན་པའི་དམ་རྫས་འདོད་ཡོན་མཆོད་སྤྲིན་གྱིས། །ཐུགས་དམ་གཉན་པོ་ཆོས་ཀྱི་དབྱིངས་སུ་བསྐང་། །དམ་ཚིག་ཉམས་ཆགས་ཐམས་ཅད་མཐོལ་ལོ་བཤགས། །ཐུགས་དང་འགལ་བ་ཐམས་ཅད་བཟོད་པར་གསོལ། །རྡོ་རྗེའི་ཚེ་མཆོག་སྒྲུབ་པའི་གྲོགས་མཛོད་ཅིག །ཧཱུྃ་ཧྲཱིཿབཅོམ་ལྡན་བདེ་གཤེགས་རྣམ་སྣང་ཚེ་དཔག་མེད། །རྡོ་རྗེ་རིན་ཆེན་པདྨ་ལས་རབ་ཀྱི། །ཚེ་ལྷ་བཅོམ་ལྡན་རྒྱལ་བ་རིགས་ལྔ་དང་། །ལྷ་མོ་མགྱོགས་མ་འཁོར་དང་བཅས་པ་ཡི། །འབྱུང་ལྔའི་བཅུད་བསྡུས་ཁམས་ལྔ་ཉམས་པ་གསོལ། །དུག་ལྔ་གནས་དག་ཡེ་ཤེས་ལྔ་མངོན་གྱུར། །སྐུ་གསུང་ཐུགས་ཡོན་ཕྲིན་ལས་རིགས་མཆོག་གི། ཚེ་ཡི་དངོས་གྲུབ་དམ་པ་སྩལ་དུ་གསོལ། །ཚེ་ཡི་དངོས་གྲུབ་དམ་པ་སྩལ་ནས་ཀྱང་། །རིགས་ལྔ་ཚེ་དཔག་མེད་དང་དབྱེར་མེད་ཅིང་། །གཞོམ་བྲལ་མི་ཤིགས་རྡོ་རྗེའི་སྐུ་ཐོབ་ཤོག །ཧཱུྃ་ཧྲཱིཿདེ་ལྟར་བསྐང་ཞིང་བཤགས་པའི་བྱིན་རླབས་ཀྱིས། །བདག་གཞན་ཚེ་ཐུང་རྒྱུ་འབྲས་ཀུན་ཞི་ཞིང་། །འཆི་བདག་གཤེད་པོའི་བདུད་ལས་རྣམ་པར་རྒྱལ། །འཆི་མེད་ཚེ་ཡི་བུམ་བཟང་རབ་ཏུ་བརྟན། །བཀྲ་ཤིས་བྱིན་རླབས་བདུད་རྩིའི་ཆུ་རྒྱུན་གྱིས། །སྒོ་གསུམ་འཆི་མེད་རྡོ་རྗེའི་སྐུ་གསུང་ཐུགས། །དཀའ་བ་མེད་པར་དེང་འདིར་འགྲུབ་པ་དང་། །འགྲོ་རྣམས་འཆི་མེད་ས་ལ་འགོད་པར་ཤོག །ཚེ་དབང་རིག་འཛིན་བླ་མའི་བྱིན་རླབས་དང་། །ཡི་དམ་བཅོམ་ལྡན་རིགས་ལྔ་ཚེ་དཔག་མེད། །དྷཱ་ཀི་དབྱིངས་ཕྱུག་མནྡཱ་ར་བ་ཡི། །བྱིན་རླབས་བཀྲ་ཤིས་དགེ་ལེགས་དཔལ་འབར་ཤོག །དེ་ལྟར་བསྐང་བཤགས་མཆོད་སྤྲིན་འདི། །བཀྲ་ཤིས་འཆི་མེད་གྲུབ་པ་ཡི། །དགའ་ཚལ་རྒྱས་པའི་གཞལ་མེད་ཁང་། །འཆི་མེད་རྡོ་རྗེ་གཟི་བརྗིད་ཀྱི། །བྱིན་རླབས་ཆ་ཙམ་ཐོབ་པ་ལས། །བཀྲ་ཤིས་དགེ་མཚན་རྒྱས་པའི་དུས། །འཆི་མེད་ལྷ་ཚོགས་སྒྲུབ་པའི་སྐབས། །གང་ཤར་ཡུད་ཙམ་བྲིས་པའི་དགེས། །པདྨས་ཁེབས་པའི་ཞིང་ཁམས་སུ། །འཆི་མེད་རྡོ་རྗེའི་ས་ཐོབ་ཤོག །།།

[edit]

rtsa gsum tshe dkar gyi bskang ba 'chi med bde chen bcud 'bebs bzhugs/__tshogs dang mchod gtor spyan gzigs dang /__/phyi nang mchod rdzas rgya cher bshams/__/snyan pa'i dbyangs dang rol mo bcas/__/dkyil 'khor lha tshogs thugs dam bskang /__/hU~M hrIHmkha' spyod dag pa 'ja' 'od 'khrigs pa'i klong /__/tshe dpag med dang yum mchog tsan+d+hA li/__/nA gA rdzu na pad+ma saM b+ha wa/__/man+dA ra ba bde chen rgyal mo dang /__/mnga' bdag tshangs chen lha sras rol pa rtsal/__/bdud 'joms rdo rje mchog gyur bde chen gling /__/rdo rje gzi brjid pad+ma gar dbang sogs/__/tshe bdag brgyud pa'i bla ma thams cad bzhugs/__/mi mngon dbyings nas thugs rje glog ltar myur/__/'dir gshegs mos pa'i bu la byin gyis rlobs/__/'dir tshogs skal ldan rnams la dngos grub stsol/__/mi shigs rdo rje'i srog mchog 'grub par mdzod/__/hU~M hrIH'od gsal dag pa bde chen pho brang dbus/__/rin chen seng khri pad+ma zla ba'i steng /__/tshe bdag bcom ldan rgyal ba rigs lnga dang /__/sgyu 'phrul zhi ba tshe lha'i tshom bur bcas/__/'gugs byed lha mo mgyogs ma rnam pa bzhi/__/bkra shis rtags kyi tshe yi lha mo sogs/__/dkyil 'khor bsam yas rab 'byams rgya mtsho la/__/bde stong mkha' khyab rdo rje'i mchod sprin gyis/__/kun bzang yangs pa chen po'i klong du bskang /__/hU~M hrIHthugs dam bskang ba'i phyi nang mchod rdzas ni/__/dngos su 'byor dang yid las byung ba yi/__/kun bzang mchod sprin mkha' dbyings rgyas par bskang /__/rtsa gsum tshe yi lha tshogs thugs dam bskang /__/sdig ltung dam tshig nyams chag mthol lo bshags/__/'chi med rdo rje'i gsang gsum 'grub par mdzod/__/hU~M hrIHdkyil 'khor rab 'byams lha tshogs thams cad la/__/mchod yon me tog bdug spos mar me dri/__/zha zas rol mo lha mi'i longs spyod mchog__/so so'i bzhed rgur 'char ba'i mchod sprin gyis/__/rtsa gsum=/__sdig ltung =/__'chi med=/__gzugs sgra dri ro reg bya'i lha mo'i tshogs/__/lag na 'dod yon thogs pa dpag med kyis/__/dkyil 'khor lha tshogs zag med dbang po'i yul/__/dgyes par bskyed pa'i 'dod yon bsam mi khyab/__/rtsa gsum sogs 'gre/__phyi nang gsang gsum rdo rje'i maN+Da lar/__/'khor 'das snang srid snod bcud dpal 'byor gyi/__/sku gsum zhing khams rgyas par yongs bkang nas/__/mos pa'i blo dang ting 'dzin stobs kyis 'bul/__/rtsa gsum=/__bkra shis rtags rdzas rgyal srid rnam pa bdun/__/nye ba'i rin chen bdun dang gzhal med khang /__/bde chen zhing gi bkod pa dpag med kyis/__/rtsa gsum=rtsa brgyad stong la sbyar ba'i sman phud dang /__/snod bcud yongs rdzogs ba ling gtor ma bsham/__/rgyu drug 'khor ba bsgral ba'i rak+ta yis/__/rtsa gsum=/__kun gzhi gsang ba chen po'i kong bu ru/__/chos dbyings byang chub sems kyi mar khus gtams/__/shes rab rang byung sgron ma'i sdong bu la/__/'od gsal thig le chen po'i mar me sbar/__/rtsa gsum=/__AHlas b+han+d+ha stong gsum khyon mnyam nang /__/sha lnga bdud rtsi lhun por spungs pa las/__/zag med ye shes bdud rtsi'i 'dod yon 'phro/__/rmad byung ga Na tsakra'i mchod pa 'dis/__/rtsa gsum=/__dga' bzhi'i nyams 'gyur rdzogs pa'i lha mo yis/__/dri dang phreng thogs 'jo sgeg lang tsho ngom/__/bcu drug bde ba'i gar bsgyur mchod sprin gyis/__/rtsa gsum=/__pad can dung dang ri dwags glang sna can/__/yid 'phrog lha mo ut+pal dri bsung 'thul/__/zag med mnyam sbyor 'khril chags dgyes mchod kyis/__/rtsa gsum=/__kun nas kun du dga' ba'i gar bsgyur shing /__/snyan pa'i glu len lha rdzas rol mo 'khrol/__/dkyil 'khor lha tshogs yon tan sgrogs pa yi/__/bstod dbyangs rgya mtsho'i sprin gyi bla bre bres/__/rtsa gsum=/__gang dag zhi bas gdul bar dka' ba rnams/__/drag po'i stobs kyi sa gsum gdug can bsgral/__/mkha' dbyings gtun bur thabs kyi rdo rjes brdung /__/ye shes rig pa'i mtshon chas dum bur gtub/__/dbang chen khro bo rol pa'i zhal du stobs/__/skye shi rtsad bcad dug lnga'i rnam rtog bzlog__/ga Na sgrol ba'i dgyes mchod dam pa 'dis/__/rtsa gsum tshe yi lha tshogs thugs dam bskang /__/sdig ltung dam tshig nyams chags mthol lo bshags/__/'chi med rdo rje'i gsang gsum 'grub par mdzod/__/hU~M hrIHdkyil 'khor chen po'i bka' nyan bstan pa srungs/__/rdo rje'i chos srungs nor lha gter bdag dang /__/gnas dang gzhi bdag dkar phyogs skyong rnams la/__/mthun pa'i dam rdzas 'dod yon mchod sprin gyis/__/thugs dam gnyan po chos kyi dbyings su bskang /__/dam tshig nyams chags thams cad mthol lo bshags/__/thugs dang 'gal ba thams cad bzod par gsol/__/rdo rje'i tshe mchog sgrub pa'i grogs mdzod cig__/hU~M hrIHbcom ldan bde gshegs rnam snang tshe dpag med/__/rdo rje rin chen pad+ma las rab kyi/__/tshe lha bcom ldan rgyal ba rigs lnga dang /__/lha mo mgyogs ma 'khor dang bcas pa yi/__/'byung lnga'i bcud bsdus khams lnga nyams pa gsol/__/dug lnga gnas dag ye shes lnga mngon gyur/__/sku gsung thugs yon phrin las rigs mchog gi/__tshe yi dngos grub dam pa stsal du gsol/__/tshe yi dngos grub dam pa stsal nas kyang /__/rigs lnga tshe dpag med dang dbyer med cing /__/gzhom bral mi shigs rdo rje'i sku thob shog__/hU~M hrIHde ltar bskang zhing bshags pa'i byin rlabs kyis/__/bdag gzhan tshe thung rgyu 'bras kun zhi zhing /__/'chi bdag gshed po'i bdud las rnam par rgyal/__/'chi med tshe yi bum bzang rab tu brtan/__/bkra shis byin rlabs bdud rtsi'i chu rgyun gyis/__/sgo gsum 'chi med rdo rje'i sku gsung thugs/__/dka' ba med par deng 'dir 'grub pa dang /__/'gro rnams 'chi med sa la 'god par shog__/tshe dbang rig 'dzin bla ma'i byin rlabs dang /__/yi dam bcom ldan rigs lnga tshe dpag med/__/d+hA ki dbyings phyug man+dA ra ba yi/__/byin rlabs bkra shis dge legs dpal 'bar shog__/de ltar bskang bshags mchod sprin 'di/__/bkra shis 'chi med grub pa yi/__/dga' tshal rgyas pa'i gzhal med khang /__/'chi med rdo rje gzi brjid kyi/__/byin rlabs cha tsam thob pa las/__/bkra shis dge mtshan rgyas pa'i dus/__/'chi med lha tshogs sgrub pa'i skabs/__/gang shar yud tsam bris pa'i dges/__/pad+mas khebs pa'i zhing khams su/__/'chi med rdo rje'i sa thob shog__///__