JKCL-KABUM-04-NGA-024

Previous Text Back to Volume PageNext Text

ཀུན་མཁྱེན་བུ་སྟོན་རིན་པོ་ཆེའི་བླ་མའི་རྣལ་འབྱོར་མཆོག་དངོས་གྲུབ་པ།

Wylie title	kun mkhyen bu ston rin po che'i bla ma'i rnal 'byor mchog dngos grub pa
Location	chos kyi blo gros bka' 'bum Volume 4, Text 24, Pages 129-137 (Folios 1a1 to 5a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	བུ་སྟོན་རིན་ཆེན་གྲུབ་ (bu ston rin chen grub)
Citation	'jam dbyangs mkhyen brtse chos kyi blo gros. kun mkhyen bu ston rin po che'i bla ma'i rnal 'byor mchog dngos grub pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 129-137. Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor
Colophon	།ཅེས་པའང་རང་ཉིད་དད་ཅིང་མོས་པ་དང་རྨི་ལམ་གྱི་སྣང་བ་ཅུང་ཟད་ལ་བརྟེན་འཇམ་དབྱངས་ཆོས་ཀྱི་བློ་གྲོས་པས་ལྕགས་འབྲུག་ཐ་སྐར་ཟླ་བའི་ཚེས་བརྒྱད་ལ་ས་བོན་ཙམ་བྲིས་ཏེ། སླར་རྗེ་བཙུན་ས་སྐྱ་པ་ཆེན་པོའི་སྐུ་མཆོད་ཉིད་གསལ་བར་བཀོད་པ་སྔ་རྗེས་ཐམས་ཅད་དུ་རྟེན་འབྲེལ་མཆོག་ཏུ་དགེ་བ་དང་བཅས་གྲུབ་པར་བགྱིས་པ་སིདྡྷི་རསྟུ། མངྒ་ལཾ།།
	/ces pa'ang rang nyid dad cing mos pa dang rmi lam gyi snang ba cung zad la brten 'jam dbyangs chos kyi blo gros pas lcags 'brug tha skar zla ba'i tshes brgyad la sa bon tsam bris te/__slar rje btsun sa skya pa chen po'i sku mchod nyid gsal bar bkod pa snga rjes thams cad du rten 'brel mchog tu dge ba dang bcas grub par bgyis pa sid+d+hi rastu/__mang+ga laM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །ཀུན་མཁྱེན་བུ་སྟོན་རིན་པོ་ཆེའི་བླ་མའི་རྣལ་འབྱོར་མཆོག་དངོས་གྲུབ་པ་ཞེས་བྱ་བ་བཞུགས་སོ། ། ན་མཿསརྦ་ཛྙཱ་རཏྣ་སིདྡྷི་ཡ། ཀུན་མཁྱེན་ཐུབ་པའི་བསྟན་པ་ལ། །རྒྱལ་བ་གཉིས་པའི་ཕྲིན་ལས་ཅན། །ཐམས་ཅད་མཁྱེན་གཟིགས་བུ་སྟོན་རྗེར། །བཏུད་ནས་ཟབ་ལམ་ཉམས་ལེན་དབྱེ། །དེ་ལ་འདིར་དབང་ཐོབ་ཅིང་དམ་ཚིག་རྣམ་པར་དག་པས་ངེས་འབྱུང་གི་བློ་དང་། བྱང་ཆུབ་ཀྱི་སེམས་ལ་རྒྱུད་སྦྱོང་བ་སོགས་སྔོན་དུ་སོང་བས་ཉེ་ལམ་ཟབ་མོ་འདིར་འཇུག་སྟེ། དེ་ལའང་དོན་གསུམ། །དང་པོ་སྔོན་འགྲོ་སྐྱབས་སེམས་ནི། བདག་སོགས་མཁའ་མཉམ་སེམས་ཅན་རྣམས། །དེང་བཟུང་བྱང་ཆུབ་མ་ཐོབ་བར། །དཀོན་མཆོག་གསུམ་ལ་སྐྱབས་སུ་མཆི། །བྱང་ཆུབ་སེམས་གཉིས་བསྐྱེད་པར་བགྱི། །ཞེས་ལན་གསུམ་སོགས་ཅི་ནུས་བྱ། དངོས་གཞི་ལ། ཚོགས་ཞིང་གསལ་བཏབ་པ་ནི། ཨོཾ་མ་ཧཱ་ཤནྱ་ཏཱ༴ སོགས་ཀྱིས་སྟོང་པར་སྦྱངས། སྣོད་བཅུད་ཐམས་ཅད་སྟོང་པར་གྱུར། །སྟོང་པའི་ངང་ལས་དག་པའི་ཞིང་། །ཡིད་འཕྲོག་བཀོད་པ་ཕུན་ཚོགས་དབུས། །རང་ལུས་སྟོང་གསལ་འོད་ཀྱི་སྐུ། །རྡོ་རྗེ་སེམས་དཔར་གསལ་བ་ཡི། །མདུན་མཁར་སེང་ཁྲི་པད་ཟླའི་སྟེང་། །བླ་མ་བུ་སྟོན་ཆོས་ཀྱི་རྗེ། །དཀར་དམར་ཞི་འཛུམ་ཕྱག་མཉམ་བཞག །འཆི་མེད་ཚེ་ཡི་བུམ་པ་བཟང་། །ཁ་རྒྱན་དཔག་བསམ་རྒྱས་པའི་རྩེར། །ཚེ་དཔག་མེད་མགོན་ངོ་བོ་ཧྲཱིཿ། དཀར་གསལ་གཟི་བརྗིད་བཀྲག་མདངས་འཚེར། །གཡས་གཡོན་ཨུཏྤལ་རྒྱས་པའི་སྟེང་། །ཐབས་ཤེས་རྡོ་རྗེ་དྲིལ་བུས་མཚན། །དབུ་ལ་པཎ་ཞྭ་དམར་སེར་དང་། །ཆོས་གོས་གསུམ་གསོལ་སྐྱིལ་ཀྲུང་བཞུགས། །ཐུགས་དབུས་འཁོར་ལོ་སྡོམ་པ་ནི། །ཆོས་དབྱིངས་མི་འགྱུར་སྐུ་མདོག་སྔོ། །ཞལ་བཞི་ཕྱག་ནི་བཅུ་གཉིས་པ། །དབུས་སྔོ་གཡོན་ལྗང་རྒྱབ་དམར་ཞིང་། །གཡས་སེར་དང་པོའི་ཕྱག་གཉིས་ཀྱིས། །རྡོ་རྗེ་དྲིལ་འཛིན་ཕག་མོར་འཁྱུད། །འོག་གཉིས་གླང་ལྤགས་བརྒྱངས་ཏེ་འཛིན། །ལྷག་མ་གཡས་ཀྱིས་ཌཱ་རུ་དང་། །དགྲ་སྟྭ་གྲི་གུག་མདུང་རྩེ་གསུམ། །གཡོན་ན་ཁ་ཊྭཱྃ་ཐོད་པ་དང་། །རྡོ་རྗེའི་ཞགས་པ་ཚངས་མགོ་བསྣམས། །ཧེ་རུ་ཀ་ཡི་ཆས་ཀྱིས་བརྒྱན། །པད་ཉི་འཇིགས་དུས་གདན་གྱི་སྟེང་། །གཡས་བརྐྱང་གཡོན་བསྐུམ་གར་སྟབས་འགྱིང་། །དེ་ཡི་ཐུགས་ཀར་འོད་ལྔའི་ཀློང་། །པདྨ་ཉི་ཟླའི་གདན་གྱི་སྟེང་། །རྡོ་རྗེ་འཆང་ཆེན་གསང་བ་འདུས། །མཐིང་ནག་ཞལ་གསུམ་ཕྱག་དྲུག་པ། །རྩ་ཞལ་ནག་པོ་ཁྲོས་པའི་ཉམས། །གཡས་དཀར་ཞི་ལ་གཡོན་དམར་ཆགས། །ཕྱག་དྲུག་གཡས་ཀྱིས་རྩེ་དགུ་དང་། །འཁོར་ལོ་པདྨ་གཡོན་དྲིལ་བུ། །རིན་ཆེན་རལ་གྲི་འཛིན་པ་ཡི། །དང་པོ་གཉིས་ནི་ཐུགས་ཀར་བསྣོལ། །རང་འདྲའི་རེག་བྱ་རྡོ་རྗེར་འཁྲིལ། །དར་དང་རིན་ཆེན་རྒྱན་གྱིས་སྤྲས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །རྗེས་ཆགས་མཚན་དཔེའི་གཟི་བརྗིད་འབར། །ཨ་ཧཾ་སྔགས་ཀྱི་སྒྲ་ཆེན་སྒྲོགས། །སྐྱབས་ཀུན་འདུས་པའི་བདག་ཉིད་ཀྱི། །གནས་གསུམ་འབྲུ་གསུམ་མཚན་པ་ལས། །འོད་འཕྲོས་འོག་མིན་དགའ་ལྡན་ནས། །ཡེ་ཤེས་སྤྱན་དྲངས་དབྱེར་མེད་ཐིམ། །ཚོགས་བསགས་པ་ནི་གུར་ནས་འབྱུང་བའི་རྒྱུན་བཤགས་དང་། སྤྲོ་ན་མཎྜལ་འབུལ། དེ་ནས་མོས་གུས་རྩེ་གཅིག་པས་གསོལ་བ་འདེབས་པ་ནི། ཇི་ལྟ་ཇི་སྙེད་ཤེས་བྱ་ཐམས་ཅད་མཁྱེན། །དམིགས་མེད་ཐུགས་རྗེས་འགྲོ་ལ་བུ་ལྟར་དགོངས། །སྲིད་ཞིའི་དགེ་ལེགས་སྟོན་ནུས་རིན་ཆེན་གྲུབ། །འཇམ་དབྱངས་ཆོས་ཀྱི་རྗེ་ལ་གསོལ་བ་འདེབས། །ཐམས་ཅད་མཁྱེན་པའི་ཆོས་ཀྱི་རྒྱལ་ཐབས་ལ། །དབང་མཛད་ཡོན་ཏན་རིན་ཆེན་རྣམ་བདུན་གྱིས། །རབ་མཛེས་གྲུབ་པའི་འཁོར་ལོས་བསྒྱུར་བ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡོངས་རྫོགས་བསྟན་པའི་རྒྱལ་མཚན་མཛེས་པའི་ཏོག །དྲི་མེད་ལུང་རྟོགས་ཆར་ཆེན་རིན་པོ་ཆེ། །རང་དང་གཞན་གྱི་དོན་ཆེན་ལྷུན་གྱིས་གྲུབ། །བུ་སྟོན་ཆོས་རྗེའི་ཞབས་ལ་གསོལ་བ་འདེབས། །བསྐལ་བཟང་སྒྲོན་མེ་བདུན་པ་རབ་གསལ་ཞབས། །ཤཱཀྱའི་བསྟན་ལ་བཟང་པོ་སྤྱོད་པའི་ཚུལ། །བསམ་གྱིས་མི་ཁྱབ་སྤྱོད་ཡུལ་མཁའ་ལྟར་ཟབ། །ས་བཅུའི་དབང་ཕྱུག་རྒྱལ་བའི་མྱུ་གུར་འདུད། །སྨྲ་བའི་སེང་གེའི་མཁྱེན་རབ་སྙིང་ལ་ཞུགས། །ཀུན་ཏུ་བཟང་པོའི་སྨོན་ལམ་རྣམ་པར་སྦྱངས། །སྲས་བཅས་རྒྱལ་བའི་ཕྲིན་ལས་འཛིན་མཛད་པ། །འཇམ་དབྱངས་བླ་མའི་ཞབས་ལ་གསོལ་བ་འདེབས། །ཆོས་སྐུ་རྡོ་རྗེ་འཆང་ཆེན་གསང་བ་འདུས། །ལོངས་སྐུ་དཔལ་ཆེན་འཁོར་ལོ་སྡོམ་པ་དང་། །སྤྲུལ་སྐུ་ཐུབ་དབང་གཉིས་པ་རིན་ཆེན་གྲུབ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །མཁྱེན་ནོ་མཁྱེན་ནོ་ཆོས་རྗེ་ལོ་ཙཱ་མཁྱེན། །རྟག་ཏུ་བདག་ལ་བྱིན་གྱིས་བརླབ་ནས་ཀྱང་། །གཟུངས་སྤོབས་བློ་གྲོས་སྒོ་བརྒྱ་འབྱེད་པ་དང་། །མཁྱེན་གཉིས་ཡེ་ཤེས་སྣང་བ་སྩལ་དུ་གསོལ། །ཞེས་པ་ཡོངས་སུ་རྫོགས་པའམ། ཤྭ་ལོ་ཀ་གང་རུང་གཅིག་གྲངས་མང་དུ་གསོགས། ཐུགས་རྒྱུད་བསྐུལ་ཞིང་བྱིན་བསྡུ་བའི་ཕྱིར་བླ་མ་ཡི་དམ་དབྱེར་མེད་པའི་མཚན་སྔགས་ནི། སྐུ་དང་སྔགས་ཕྲེང་ཕྱག་མཚན་དང་། །འོད་ཟེར་དཔག་མེད་ཆར་ལྟར་བབས། །རང་ལ་ཐིམ་པས་གསང་གསུམ་གྱི། །བྱིན་རླབས་རྒྱུད་ལ་ཞུགས་པར་མོས། ཨོཾ་ཨཱཿམ་ཧཱ་གུ་རུ་རཏྣ་སིདྡྷི་ཤྲཱི་ཧེ་རུ་ཀ་ཙཀྲ་པཾ་བྷ་ར་བཛྲ་དྷཱ་ར་གུ་ཧྱ་ས་མཱ་ཛཿསརྦ་སིདྡྷི་ཧཱུྃ་སྭཱ་ཧཱ། ཞེས་པའང་ཅི་ནུས་བཟླ། ཚེ་སྒྲུབ་དམིགས་ཟླས་བྱ་བར་སྤྲོ་ན། རང་གི་སེམས་གསེར་གྱི་རྡོ་རྗེ་རྩེ་ལྔ་པར་གསལ་བ་དང་། སྤྱི་བོའི་བླ་མའི་ཚེ་བུམ་གྱི་རྩེར་ཚེ་དཔག་མེད་ཀྱི་ངོ་བོ་ཧྲཱིཿདཀར་པོ་གསལ་བ་ལ་མོས་གུས་དྲག་པོས། ཨོཾ་བཛྲ་ཨཱ་ཡུ་ཥེ་ས་ར་ཧ་ཤུདྡྷེ་ཧཱུྃ་ཕཊ། ལན་གསུམ་བརྗོད། ཚེ་བུམ་སྟེང་གི་ཧྲཱིཿཡིག་ལས། །འོད་འཕྲོས་སྣོད་བཅུད་དྭངས་མ་བསྡུས། །འཆི་མེད་བདུད་རྩིའི་རྒྱུན་དཀར་པོ། །ནང་གྱིས་བྱོན་ནས་བུམ་པར་ཐིམ། །དེ་ལས་བདུད་རྩི་ཁོལ་ཞིང་ལུད། །རང་གི་སྤྱི་བོའི་གཙུག་ནས་ཞུགས། །ལུས་གང་ཚེ་སྲོག་ཉམས་པ་གསོས། །དྭངས་མ་རང་སེམས་རྡོ་རྗེར་ཐིམ། །འཆི་མེད་དངོས་གྲུབ་ཐོབ་པར་གྱུར། །ཅེས་བརྗོད་ལ། ཨོཾ་བཛྲ་ཨཱ་ཡུ་ཥེ་ཧཱུྃ་བྷྲཱྃ་ནྲྀ་ཛཿ ཞེས་བརྒྱ་སྟོང་ལ་སོགས་པ་བཟླ། སྣ་བུག་གཉིས་ཀ་ནས་རླུང་དེ་ཇེ་ཆེ་དང་། །ཡང་ཇེ་ཆུང་དུ་བསལ་བས་ནད་གདོན་སྡིག་སྒྲིབ་ཐམས་ཅད་ནག་བུན་གྱིས་ཕྱིར་དོན་ནས་འཇའ་བཞིན་ཡལ། ཚུར་རླུང་ཁུག་སྣ་བུག་གཡོན་ནས་བདུན་གཡས་ནས་བདུན་དྲངས་ཏེ། དམིགས་པ་ཕྱོགས་བཅུའི་སངས་རྒྱས་བྱང་སེམས་ལྷ་མིའི་དབང་པོ་རྣམས་ཀྱི་ཚེ་བསོད་ཐམས་ཅད་འོད་དཀར་པོའི་རྣམ་པར་འཕྲོས་པ། རང་སེམས་གསེར་གྱི་རྡོ་རྗེ་རྩེ་ལྔ་པར་གསལ་བ་ལ་བསྟིམ་པར་མོས་ལ་རླུང་ཁུག་བདུན་མནན། ཡང་སྙིང་དེ་ཉིད་ཡིད་བཟླས་བྱའོ། །རྗེས་དབང་བླང་བ་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ། །ལུང་རྟོགས་དམ་ཆོས་ཀྱི་འབྱུང་གནས། །འཕགས་ཚོགས་དགེ་འདུན་གྱི་མངའ་བདག །མཁྱེན་རབ་དང་ཐུགས་རྗེ་ཚད་མེད་པའི་གཏེར་ཆེན། །ཆོས་རྗེ་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་མཁྱེན་ནོ། །འོག་མིན་མཁའ་སྤྱོད་ཞིང་དང་། །དགའ་ལྡན་ལྷ་བརྒྱའི་དབུས་ནས། །རྟག་ཏུ་ཐུགས་རྗེས་གཟིགས་ཤིག །ཡོངས་རྫོགས་བསྟན་པའི་མངའ་བདག །བུ་སྟོན་རིན་པོ་ཆེ་མཁྱེན་ནོ། །གསོལ་བ་སྙིང་ནས་འདེབས་ན། །བདག་གི་ལུས་ངག་ཡིད་གསུམ་བྱིན་གྱིས་བརླབ་ཏུ་གསོལ། །དུས་ད་ལྟ་ཉིད་དུ་བྱིན་གྱིས་རློབས་ཤིག །བླ་མ་ཁྱེད་དང་མཉམ་པར་བྱིན་གྱིས་བརླབ་ཏུ་གསོལ། །ཞེས་པའི་རྒྱང་འབོད་གསོལ་འདེབས་ཀྱང་བྱ། དུས་གསུམ་སངས་རྒྱས་ཐམས་ཅད་འདུས་པའི་དངོས། །མཁྱེན་རབ་དབང་ཕྱུག་འཇམ་དབྱངས་བླ་མ་ལ། །གསོལ་བ་སྙིང་ནས་འདེབས་སོ་ཐུགས་རྗེས་དགོངས། །རྡོ་རྗེའི་ཡེ་ཤེས་འབེབ་པའི་དབང་བསྐུར་སྩོལ། །བླ་མའི་གནས་གསུམ་འབྲུ་གསུམ་ལས། །འོད་ཟེར་དཀར་དམར་མཐིང་གསུམ་ནི། །ཡི་གེའི་དབྱིབས་དང་བདུད་རྩིའི་རྒྱུན། །རང་གི་ལུས་ངག་ཡིད་གསུམ་སྒོར། །རིམ་དང་གཅིག་ཅར་ཐིམ་པ་ཡིས། །དབང་བཞི་ཐོབ་ཅིང་སྒྲིབ་བཞི་དག །ལམ་བཞི་བསྒོམ་པའི་སྣོད་རུང་སྒྲུབ། །སྐུ་བཞིའི་ས་བོན་ཐེབས་པར་གྱུར། །ཅེས་བརྗོད་ལ་དབང་དོན་གྱི་ཡེ་ཤེས་སྐྱོང་། བླ་མ་དགྱེས་པས་ཚངས་བུག་ཚེ་སྒྲུབ་དང་འབྲེལ་ན། རང་སེམས་རྡོ་རྗེའི་ཁོང་གསེང་གི། ལྟེ་བར་པད་དཀར་ཟེའུ་འབྲུའི་སྟེང་། ཞེས་བསྒྱུར། མཆན། བརྒྱུད། །སྙིང་དབུས་པད་དཀར་ཟེའུ་འབྲུའི་སྟེང་། །དགྱེས་བཞིན་བཞུགས་པར་རང་སེམས་དང་། །དབྱེར་མེད་བློ་འདས་ངང་དུ་བཞག །ཅེས་བརྗོད་ལ། གསང་བ་འདུས་པའི་ཐུགས་ཀར་ཧཱུྃ་ཡིག་མཐིང་ག་འོད་ཟེར་ལྔ་ལྡན་ཤིན་ཏུ་ཕྲ་བ་ལ་རླུང་རིག་བསྲེས་ཏེ་རིག་པ་གསལ་སྟོང་འཛིན་མེད་ཀྱི་ལྟ་བའི་ངང་ལ་ཡུན་རིང་དུ་མཉམ་པར་བཞག་གོ། ཐུན་ལས་ལྡང་བ་ན། སྐྱེ་བ་ཀུན་ཏུ༴ །གང་ཚེ་མགོན་ཁྱོད་བྱང་ཆུབ་བརྙེས་པའི་ཚེ། །འཁོར་གྱི་འདུས་པ་དང་པོར་སྐྱེས་ནས་ཀྱང་། །ཆོས་མིག་རྡུལ་བྲལ་རྫོགས་སངས་རྒྱས་ཉིད་དུ། །ལུང་བསྟན་སྐལ་བཟང་བདག་གིས་ཐོབ་གྱུར་ཅིག །དགེ་བ་འདི་ཡིས་མྱུར་དུ་བདག །གཞོན་ནུ་ནོར་བཟང་ཇི་བཞིན་དུ། །ཡོན་ཏན་རྒྱ་མཚོ་ལྟ་བུ་ཡི། །བླ་མ་མཉེས་པར་བྱེད་པར་ཤོག །ཅེས་སོགས་ཀྱི་སྨོན་ལམ་དང་། ཐུན་མཚམས་ཐམས་ཅད་དུ་བླ་མའི་ལམ་ཁྱེར་ལ་འབད་པར་བྱའོ། །འདི་དགེས་མ་གྱུར་འགྲོ་བ་ཀུན། །བླ་མ་མཆོག་གིས་རྗེས་བཟུང་ནས། །ས་བཅུ་ལམ་ལྔ་རབ་བགྲོད་དེ། །ཐམས་ཅད་མཁྱེན་གཟིགས་མྱུར་ཐོབ་ཤོག །ཅེས་པའང་རང་ཉིད་དད་ཅིང་མོས་པ་དང་རྨི་ལམ་གྱི་སྣང་བ་ཅུང་ཟད་ལ་བརྟེན་འཇམ་དབྱངས་ཆོས་ཀྱི་བློ་གྲོས་པས་ལྕགས་འབྲུག་ཐ་སྐར་ཟླ་བའི་ཚེས་བརྒྱད་ལ་ས་བོན་ཙམ་བྲིས་ཏེ། སླར་རྗེ་བཙུན་ས་སྐྱ་པ་ཆེན་པོའི་སྐུ་མཆོད་ཉིད་གསལ་བར་བཀོད་པ་སྔ་རྗེས་ཐམས་ཅད་དུ་རྟེན་འབྲེལ་མཆོག་ཏུ་དགེ་བ་དང་བཅས་གྲུབ་པར་བགྱིས་པ་སིདྡྷི་རསྟུ། མངྒ་ལཾ།། །།

[edit]

@#/__/kun mkhyen bu ston rin po che'i bla ma'i rnal 'byor mchog dngos grub pa zhes bya ba bzhugs so/__/ na maHsarba dz+nyA rat+na sid+d+hi ya/__kun mkhyen thub pa'i bstan pa la/__/rgyal ba gnyis pa'i phrin las can/__/thams cad mkhyen gzigs bu ston rjer/__/btud nas zab lam nyams len dbye/__/de la 'dir dbang thob cing dam tshig rnam par dag pas nges 'byung gi blo dang /__byang chub kyi sems la rgyud sbyong ba sogs sngon du song bas nye lam zab mo 'dir 'jug ste/__de la'ang don gsum/__/dang po sngon 'gro skyabs sems ni/__bdag sogs mkha' mnyam sems can rnams/__/deng bzung byang chub ma thob bar/__/dkon mchog gsum la skyabs su mchi/__/byang chub sems gnyis bskyed par bgyi/__/zhes lan gsum sogs ci nus bya/__dngos gzhi la/__tshogs zhing gsal btab pa ni/__oM ma hA shan+ya tA=__sogs kyis stong par sbyangs/__snod bcud thams cad stong par gyur/__/stong pa'i ngang las dag pa'i zhing /__/yid 'phrog bkod pa phun tshogs dbus/__/rang lus stong gsal 'od kyi sku/__/rdo rje sems dpar gsal ba yi/__/mdun mkhar seng khri pad zla'i steng /__/bla ma bu ston chos kyi rje/__/dkar dmar zhi 'dzum phyag mnyam bzhag__/'chi med tshe yi bum pa bzang /__/kha rgyan dpag bsam rgyas pa'i rtser/__/tshe dpag med mgon ngo bo hrIH/__dkar gsal gzi brjid bkrag mdangs 'tsher/__/g.yas g.yon ut+pal rgyas pa'i steng /__/thabs shes rdo rje dril bus mtshan/__/dbu la paN zhwa dmar ser dang /__/chos gos gsum gsol skyil krung bzhugs/__/thugs dbus 'khor lo sdom pa ni/__/chos dbyings mi 'gyur sku mdog sngo/__/zhal bzhi phyag ni bcu gnyis pa/__/dbus sngo g.yon ljang rgyab dmar zhing /__/g.yas ser dang po'i phyag gnyis kyis/__/rdo rje dril 'dzin phag mor 'khyud/__/'og gnyis glang lpags brgyangs te 'dzin/__/lhag ma g.yas kyis DA ru dang /__/dgra s+t+wa gri gug mdung rtse gsum/__/g.yon na kha T+wA~M thod pa dang /__/rdo rje'i zhags pa tshangs mgo bsnams/__/he ru ka yi chas kyis brgyan/__/pad nyi 'jigs dus gdan gyi steng /__/g.yas brkyang g.yon bskum gar stabs 'gying /__/de yi thugs kar 'od lnga'i klong /__/pad+ma nyi zla'i gdan gyi steng /__/rdo rje 'chang chen gsang ba 'dus/__/mthing nag zhal gsum phyag drug pa/__/rtsa zhal nag po khros pa'i nyams/__/g.yas dkar zhi la g.yon dmar chags/__/phyag drug g.yas kyis rtse dgu dang /__/'khor lo pad+ma g.yon dril bu/__/rin chen ral gri 'dzin pa yi/__/dang po gnyis ni thugs kar bsnol/__/rang 'dra'i reg bya rdo rjer 'khril/__/dar dang rin chen rgyan gyis spras/__/zhabs gnyis rdo rje'i skyil krung bzhugs/__/rjes chags mtshan dpe'i gzi brjid 'bar/__/a haM sngags kyi sgra chen sgrogs/__/skyabs kun 'dus pa'i bdag nyid kyi/__/gnas gsum 'bru gsum mtshan pa las/__/'od 'phros 'og min dga' ldan nas/__/ye shes spyan drangs dbyer med thim/__/tshogs bsags pa ni gur nas 'byung ba'i rgyun bshags dang /__spro na maN+Dal 'bul/__de nas mos gus rtse gcig pas gsol ba 'debs pa ni/__ji lta ji snyed shes bya thams cad mkhyen/__/dmigs med thugs rjes 'gro la bu ltar dgongs/__/srid zhi'i dge legs ston nus rin chen grub/__/'jam dbyangs chos kyi rje la gsol ba 'debs/__/thams cad mkhyen pa'i chos kyi rgyal thabs la/__/dbang mdzad yon tan rin chen rnam bdun gyis/__/rab mdzes grub pa'i 'khor los bsgyur ba la/__/gsol ba 'debs so bdag rgyud byin gyis rlobs/__/yongs rdzogs bstan pa'i rgyal mtshan mdzes pa'i tog__/dri med lung rtogs char chen rin po che/__/rang dang gzhan gyi don chen lhun gyis grub/__/bu ston chos rje'i zhabs la gsol ba 'debs/__/bskal bzang sgron me bdun pa rab gsal zhabs/__/shAkya'i bstan la bzang po spyod pa'i tshul/__/bsam gyis mi khyab spyod yul mkha' ltar zab/__/sa bcu'i dbang phyug rgyal ba'i myu gur 'dud/__/smra ba'i seng ge'i mkhyen rab snying la zhugs/__/kun tu bzang po'i smon lam rnam par sbyangs/__/sras bcas rgyal ba'i phrin las 'dzin mdzad pa/__/'jam dbyangs bla ma'i zhabs la gsol ba 'debs/__/chos sku rdo rje 'chang chen gsang ba 'dus/__/longs sku dpal chen 'khor lo sdom pa dang /__/sprul sku thub dbang gnyis pa rin chen grub/__/gsol ba 'debs so thugs rje'i spyan gyis gzigs/__/mkhyen no mkhyen no chos rje lo tsA mkhyen/__/rtag tu bdag la byin gyis brlab nas kyang /__/gzungs spobs blo gros sgo brgya 'byed pa dang /__/mkhyen gnyis ye shes snang ba stsal du gsol/__/zhes pa yongs su rdzogs pa'am/__shwa lo ka gang rung gcig grangs mang du gsogs/__thugs rgyud bskul zhing byin bsdu ba'i phyir bla ma yi dam dbyer med pa'i mtshan sngags ni/__sku dang sngags phreng phyag mtshan dang /__/'od zer dpag med char ltar babs/__/rang la thim pas gsang gsum gyi/__/byin rlabs rgyud la zhugs par mos/__oM AHma hA gu ru rat+na sid+d+hi shrI he ru ka tsakra paM b+ha ra badz+ra d+hA ra gu h+ya sa mA dzaHsarba sid+d+hi hU~M swA hA/__zhes pa'ang ci nus bzla/__tshe sgrub dmigs zlas bya bar spro na/__rang gi sems gser gyi rdo rje rtse lnga par gsal ba dang /__spyi bo'i bla ma'i tshe bum gyi rtser tshe dpag med kyi ngo bo hrIHdkar po gsal ba la mos gus drag pos/__oM badz+ra A yu She sa ra ha shud+d+he hU~M phaT/__lan gsum brjod/__tshe bum steng gi hrIHyig las/__/'od 'phros snod bcud dwangs ma bsdus/__/'chi med bdud rtsi'i rgyun dkar po/__/nang gyis byon nas bum par thim/__/de las bdud rtsi khol zhing lud/__/rang gi spyi bo'i gtsug nas zhugs/__/lus gang tshe srog nyams pa gsos/__/dwangs ma rang sems rdo rjer thim/__/'chi med dngos grub thob par gyur/__/ces brjod la/__oM badz+ra A yu She hU~M b+h+rA~M nr-i dzaHzhes brgya stong la sogs pa bzla/__sna bug gnyis ka nas rlung de je che dang /__/yang je chung du bsal bas nad gdon sdig sgrib thams cad nag bun gyis phyir don nas 'ja' bzhin yal/__tshur rlung khug sna bug g.yon nas bdun g.yas nas bdun drangs te/__dmigs pa phyogs bcu'i sangs rgyas byang sems lha mi'i dbang po rnams kyi tshe bsod thams cad 'od dkar po'i rnam par 'phros pa/__rang sems gser gyi rdo rje rtse lnga par gsal ba la bstim par mos la rlung khug bdun mnan/__yang snying de nyid yid bzlas bya'o/__/rjes dbang blang ba ni/__dus gsum sangs rgyas thams cad kyi ngo bo/__/lung rtogs dam chos kyi 'byung gnas/__/'phags tshogs dge 'dun gyi mnga' bdag__/mkhyen rab dang thugs rje tshad med pa'i gter chen/__/chos rje thams cad mkhyen pa bu ston rin chen grub mkhyen no/__/'og min mkha' spyod zhing dang /__/dga' ldan lha brgya'i dbus nas/__/rtag tu thugs rjes gzigs shig__/yongs rdzogs bstan pa'i mnga' bdag__/bu ston rin po che mkhyen no/__/gsol ba snying nas 'debs na/__/bdag gi lus ngag yid gsum byin gyis brlab tu gsol/__/dus da lta nyid du byin gyis rlobs shig__/bla ma khyed dang mnyam par byin gyis brlab tu gsol/__/zhes pa'i rgyang 'bod gsol 'debs kyang bya/__dus gsum sangs rgyas thams cad 'dus pa'i dngos/__/mkhyen rab dbang phyug 'jam dbyangs bla ma la/__/gsol ba snying nas 'debs so thugs rjes dgongs/__/rdo rje'i ye shes 'beb pa'i dbang bskur stsol/__/bla ma'i gnas gsum 'bru gsum las/__/'od zer dkar dmar mthing gsum ni/__/yi ge'i dbyibs dang bdud rtsi'i rgyun/__/rang gi lus ngag yid gsum sgor/__/rim dang gcig car thim pa yis/__/dbang bzhi thob cing sgrib bzhi dag__/lam bzhi bsgom pa'i snod rung sgrub/__/sku bzhi'i sa bon thebs par gyur/__/ces brjod la dbang don gyi ye shes skyong /__bla ma dgyes pas tshangs bug tshe sgrub dang 'brel na/__rang sems rdo rje'i khong gseng gi/__lte bar pad dkar ze'u 'bru'i steng /__zhes bsgyur/__mchan/__brgyud/__/snying dbus pad dkar ze'u 'bru'i steng /__/dgyes bzhin bzhugs par rang sems dang /__/dbyer med blo 'das ngang du bzhag__/ces brjod la/__gsang ba 'dus pa'i thugs kar hU~M yig mthing ga 'od zer lnga ldan shin tu phra ba la rlung rig bsres te rig pa gsal stong 'dzin med kyi lta ba'i ngang la yun ring du mnyam par bzhag go/__thun las ldang ba na/__skye ba kun tu=__/gang tshe mgon khyod byang chub brnyes pa'i tshe/__/'khor gyi 'dus pa dang por skyes nas kyang /__/chos mig rdul bral rdzogs sangs rgyas nyid du/__/lung bstan skal bzang bdag gis thob gyur cig__/dge ba 'di yis myur du bdag__/gzhon nu nor bzang ji bzhin du/__/yon tan rgya mtsho lta bu yi/__/bla ma mnyes par byed par shog__/ces sogs kyi smon lam dang /__thun mtshams thams cad du bla ma'i lam khyer la 'bad par bya'o/__/'di dges ma gyur 'gro ba kun/__/bla ma mchog gis rjes bzung nas/__/sa bcu lam lnga rab bgrod de/__/thams cad mkhyen gzigs myur thob shog__/ces pa'ang rang nyid dad cing mos pa dang rmi lam gyi snang ba cung zad la brten 'jam dbyangs chos kyi blo gros pas lcags 'brug tha skar zla ba'i tshes brgyad la sa bon tsam bris te/__slar rje btsun sa skya pa chen po'i sku mchod nyid gsal bar bkod pa snga rjes thams cad du rten 'brel mchog tu dge ba dang bcas grub par bgyis pa sid+d+hi rastu/__mang+ga laM//____//