JKCL-KABUM-09-TA-006

🚧 This website is under continued development. We appreciate your patience!

Previous Text"TA" is not a number. Back to Volume Page"TA" is not a number.Next Text "TA" is not a number.

Wylie title
Location	chos kyi blo gros bka' 'bum Volume , Text 6, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"TA" is not a number.

1 Texts in this Section (sde tshan or chos tshan)

65-72	དེའང་བདག་ཅག་གི་སྟོན་མཆོག་ཐུགས་རྗེ་ཅན་འདི་དྲིན་ལན་བསབ་པའི་མདོར། de'ang bdag cag gi ston mchog thugs rje can 'di drin lan bsab pa'i mdor Replies to Questions - dris lan   ·   Collections of Scriptural Citations - lung btus	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"TA" is not a number.

Tibetan Text

Wylie

[edit]

དེའང་བདག་ཅག་གི་སྟོན་མཆོག་ཐུགས་རྗེ་ཅན་འདི་དྲིན་ལན་བསབ་པའི་མདོར། སྔོན་བསྐལ་པ་ཐོག་མ་མེད་པའི་དུས་ཀྱི་གོང་རོལ་ཞིག་ཏུ་སོ་སྐྱེ་འཆིང་བ་ཀུན་ལྡན་དུ་གྱུར་པའི་ཚེ། ལས་དབང་གི་མེ་ཡི་ཤིང་རྟ་ཞེས་བྱ་བའི་དམྱལ་བར་ལྟུང་བ་ན། གྲོགས་གཞན་ཞིག་དང་བསྡོངས་ཏེ། དམྱལ་སྲུང་ཨ་ཝ་གླང་མགོ་སྡོད་སའི་ཤིང་རྟ་འདྲེན་པའི་གྱད་དུ་གྱུར་པ་ན། གྲོགས་དེ་ཡི་ཤིང་རྟ་འདྲེན་མི་ནུས་པ་སྡུག་བསྔལ་བར་གྱུར་པ་ལ། གྱད་ཐེག་ཆེན་གྱི་རིགས་ཅན་ཡིན་པས་སྲུང་མ་ཨ་ཝ་ལ་འདི་ལ་སྙིང་རྗེ་ཅུང་སྐྱེད་ཅིག་བྱས་པས། དེ་ཁྲོས་ནས་ལྕགས་ཀྱི་མདུང་རྩེ་གསུམ་གྱད་ཀྱི་གཉན་སར་བསྣུན་པས་ཚེ་ཡི་དུས་བྱས། བསྐལ་པ་བརྒྱ་ཡི་སྡིག་པ་བྱང་ནས་དེ་ལས་ཐར་ཏེ་རིང་ཞིག་ནས་འཛམ་གླིང་ལྷོ་ཕྱོགས་ཀྱི་རྒྱུད་དུ་རྫ་མཁན་ཁྱེའུ་སྣང་བྱེད་དུ་གྱུར་ཏེ་སངས་རྒྱས་ཤཱཀྱ་ཐུབ་པ་ཆེན་པོ་ལ་ཤིན་ཏུ་དད་པར་གྱུར་ཏེ། ཐུག་པ་འཇམ་པོ་ཡོལ་གོ་གང་དང་། མགྲོན་བུ་ལྔས་མཆོད་དེ། བདེ་བར་གཤེགས་པ་ཁྱེད་སྐུ་ཅི་འདྲ་དང་། སོགས་ཀྱི་སྨོན་ལམ་བཏབ་ཅིང་བྱང་ཆུབ་མཆོག་ཏུ་ཐུགས་ཐོག་མར་བསྐྱེད་པ་སྟེ། མདོ་སྡེ་བསྐལ་བཟང་ལས་ཀྱང་། ང་ནི་སྔོན་ཚེ་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་དེ་ལ། །འཇམ་གང་ཞིག་ནི་དབུལ་བར་བྱས་ནས་ཀྱང་། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་དང་པོར་ཐུགས་བསྐྱེད་ཚུལ་དང་། བར་དུ་ཚོགས་བསགས་ཚུལ་ལ། ཐེག་པ་ཆུང་ངུ་ལས། གྲངས་མེད་དང་པོ་ལ། རྫ་མཁན་གྱི་ཁྱེའུར་གྱུར་པའི་ཚེ། །ཤཱཀྱ་ཐུབ་པ་ཆེན་པོ་འཇིག་རྟེན་དུ་བྱོན་པ་ནས། དེ་བཞིན་གཤེགས་ཡུལ་འཁོར་སྐྱོང་གི་བར་ལ་བདུན་ཁྲི་ལྔ་སྟོང་ལ་བསྙེན་བཀུར་བྱས་པ་དང་། གྲངས་མེད་གཉིས་པར་བྲམ་ཟེའི་ཁྱེའུར་གྱུར་པའི་ཚེ། མར་མེ་མཛད་ལ་ཨུཏྤལ་སྔོན་པོ་བདུན་གཏོར་བ་ནས་བདེ་གཤེགས་དབང་པོའི་རྒྱལ་མཚན་གྱི་བར་བདུན་ཁྲི་དྲུག་སྟོང་ལ་བསྙེན་བཀུར་བྱས། གྲངས་མེད་གསུམ་པ་ལ་རྒྱལ་པོར་གྱུར་བའི་ཚེ་བདེ་གཤེགས་བདེ་མཛད་ལ་མཆོད་པ་ཕུལ་ཞིང་། དེ་ཡི་སྐུ་གདུང་གི་མཆོད་རྟེན་བརྩེགས་པ་ནས། སངས་རྒྱས་འོད་སྲུང་ལས་རབ་ཏུ་བྱུང་ཞིང་ཐུགས་བསྐྱེད་པའི་བར་བདུན་ཁྲི་བདུན་སྟོང་བསྙེན་བཀུར་ཞིང་མཉེས་པར་བྱས་སོ་གསུངས། མཛོད་ལས། ཤཱཀྱ་ཐུབ་ནས་རིན་ཆེན་གཙུག་ཏོར་ཅན་གྱི་བར་གྲངས་མེད་དང་པོ། མར་མེ་མཛད་ཀྱི་བར་གྲངས་མེད་གཉིས། རྣམ་གཟིགས་ཀྱི་བར་གྲངས་མེད་གསུམ། དེ་ནས་མཚན་བཟང་གི་རྒྱུ་སྒྲུབ་པ་ལ་བསྐལ་པ་བརྒྱ་ཐོགས། བྲམ་ཟེའི་ཁྱེའུར་གྱུར་པ་ན་སངས་རྒྱས་སྐར་རྒྱལ་མེ་ཡི་ཁམས་ལ་སྙོམས་བར་ཞུགས་པ་ལ་རྐང་པ་ཡ་གཅིག་འགྲེང་ནས་ཞག་བདུན་གྱི་བར་བསྐོར་བ་བྱས། སྐྱེས་བུ་ཁྱུ་མཆོག་སོགས་ཀྱིས་བསྟོད་པས་བསྐལ་པ་དགུ་ཡི་ཚོགས་ཟླུམ། དེ་ནས་བསྐལ་བ་དགུ་བཅུ་རྩ་གཅིག་འདས་པ་ན་གྲོང་ཁྱེར་ཉེར་ལྡན་དུ་སངས་རྒྱས་འོད་སྲུང་བྱོན་པའི་ཚེ་བྲམ་ཟེའི་ཁྱེའུ་བླ་མར་གྱུར་པ་ཡན་ཆད་ཀྱི་མཚན་གྱི་རྒྱུ་གྲུབ་ནས་བྱང་སེམས་ངེས་པ་ལ་གནས་པ་ཞེས་བྱ། མཚན་བཟང་འགྲུབ་པའི་རྒྱུ་མཐར་ཕྱིན་ནས་དགའ་ལྡན་དུ་དམ་པ་ཏོག་དཀར་དུ་འཁྲུངས་པ་ནི། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དང་། དེ་ནས་འཛམ་གླིང་དུ་དོན་ཐམས་ཅད་གྲུབ་པ་ཞེས་བྱ་བར་གྱུར་པ་ནི། སྲིད་པ་ཐ་མ་པའི་བྱང་ཆུབ་སེམས་དཔའ། རྟེན་དེ་ལ་རྡོ་རྗེ་གདན་དུ་སྲོད་ལ་བདུད་བཏུལ། གུང་ལ་མཉམ་པར་གཞག །ཐོ་རངས་རྡོ་རྗེ་ལྟ་བུའི་ཏིང་ངེ་འཛིན་མངོན་དུ་མཛད་པའོ། །ཞེས་བཞེད། ཐེག་ཆེན་ལུགས་ནི། གྲངས་མེད་དང་པོ་ནི་མོས་པས་སྤྱོད་པའི་ས་དང་པོ་དང་། གྲངས་མེད་གཉིས་པས། ས་གཉིས་པ་ནས་བདུན་པ་མན་ཆད་དང་། གྲངས་མེད་གསུམ་པས་ནི། ས་བཅུ་པ་མན་ཆད་ཐོབ་པར་བཞེད། བརྒྱད་སྟོང་འགྲེལ་ཆེན་ལས། གྲངས་མེད་སུམ་ཅུ་རྩ་གསུམ་དུའང་བཤད། གྲངས་མེད་བརྩམས་པའི་ཐོག་མ་ནི། ཐེག་བསྡུས་ལས། བཟང་དང་སྨོན་པའི་སྟོབས་ཅན་དང་། །སེམས་བརྟན་ཁྱད་པར་འགྲོ་བ་ཡིས། །བྱང་ཆུབ་སེམས་དཔའ་གྲངས་མེད་གསུམ། །ཀུན་ཏུ་བརྩམ་པར་མཛད་པ་ཡིན། ཅེས་ཆོས་བཞི་པོ་འདི་དག་ཚོགས་ལམ་དུ་ནམ་ཐོབ་ན་གྲངས་མེད་ཀྱི་མགོ་བརྩམས་པར་བཞེད་དོ། །དེའང་རྒྱལ་པོ་རྣམ་རྒྱལ་གྱི་སྲས་གཞོན་ནུ་བརྩོན་འགྲུས་སྤྱོད་དུ་གྱུར་པའི་ཚེ་དེ་བཞིན་གཤེགས་པ་འོད་འཕྲོའི་ཕུང་པོ་ལས་རྗེས་སུ་བསྟན་པ་ནོས་ཏེ་ལོ་བྱེ་བ་ཕྲག་དྲུག་ཅུ་རྩ་དྲུག་ཏུ་སངས་རྒྱས་འཁོར་བཅས་མཆོད་པས་ས་དང་པོ་མངོན་དུ་མཛད། གྲངས་མེད་གཉིས་པར། གྲོང་ཁྱེར་ཛམྦུའི་ཆུ་གསེར་དུ་རྒྱལ་པོ་མཛེས་སྣང་ཞེས་པ་བྱུང་བ་ན། སྟོན་པ་ཉིད་ཚོང་དཔོན་ཤེས་རབ་བཟང་པོར་གྱུར་ཏེ། དེ་བཞིན་གཤེགས་པ་དཀོན་མཆོག་ཡན་ལག་རྗེས་སུ་བསྟན་པ་ནོས་ཤིང་། དེ་བཞིན་གཤེགས་པ་ལོ་སྟོང་དུ་བསྙེན་བཀུར་ནས་ཚོགས་བསགས་པས། ས་བདུན་པ་མངོན་དུ་མཛད། གྲངས་མེད་གསུམ་པ་ལ། རྒྱལ་པོ་དགྲ་ཐུལ་གྱི་ཕོ་བྲང་པདྨ་ཅན་དང་ཉེ་བར་བྲམ་ཟེའི་སློབ་མ་གཞོན་ནུ་སྤྲིན་དུ་གྱུར་པའི་ཚེ་བདེ་གཤེགས་མར་མེ་མཛད་ལ་ཨཏྤལ་ལྔས་གཏོར་ཏེ་རལ་པ་གསེར་གྱི་མདོག་ཅན་སྟན་དུ་བཏིང་ནས་བདག་ལུང་སྟོན་བར་མི་མཛད་ན་ལུས་བསྐམ་པར་བྱའོ་ཞེས་དམ་བཅས་པ། དེ་བཞིན་གཤེགས་པས་མཁྱེན་ཏེ། རལ་པ་ལ་ཞབས་བཞག་ནས། མ་འོངས་པ་ན་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་སྟོན་པ་ན་དགའ་མགུ་རངས་པར་གྱུར་ནས་ཤིང་ཏ་ལ་བདུན་སྲིད་དུ་འཕགས་ནས། ཏིང་ངེ་འཛིན་བྱེ་བ་ཁྲག་ཁྲིག་མང་པོ་མངོན་དུ་བྱས་ཏེ་ས་བརྒྱད་པ་མངོན་དུ་མཛད་པ་ཡིན་ནོ། །དེ་ནས་ཀྱང་བརྒྱ་བྱིན་མིག་བཟང་སོགས་སྐྱེ་བ་མང་དུ་བཞེས་ནས་སེམས་ཅན་གྱི་དོན་མཛད་པའི་མཐར་ཚེ་ལོ་ཉི་ཁྲིའི་དུས་སུ་སངས་རྒྱས་འོད་སྲུངས་བྱོན་པའི་ཚེ་བྲམ་ཟེའི་ཁྱེའུ་བླ་མར་གྱུར་ཏེ་གྲངས་མེད་གཅིག་ཏུ་སངས་རྒྱས་མང་པོ་ལ་བསྙེན་བཀུར་ཚོགས་བསགས་པས་ས་བཅུ་པ་མངོན་དུ་བྱས་ནས། ས་བཅུའི་རྒྱུན་གྱི་ཐ་མར་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་བག་ཆགས་དང་བཅས་པ་ཕྱིར་མི་ལྡོག་པ་ཡོངས་སུ་སྤངས་པ་མཐར་ཕྱིན་པ་དང་། ཤེས་བྱ་ཇི་ལྟ་བ་དང་ཇི་སྙེད་པའི་དོན་མངོན་སུམ་མཁྱེན་པའི་ཡེ་ཤེས་བརྙེས་པས་རྟོགས་པ་མཐར་ཕྱིན་པའི་བྱང་ཆུབ་ཆེན་པོ་ཐོབ་པ་སྟེ། རང་དོན་ཕུན་སུམ་ཚོགས་པ། ལོངས་སྤྱོད་རྫོགས་སྐུ་དང་། གཞན་དོན་ཕུན་སུམ་ཚོགས་པ་སྤྲུལ་པའི་སྐུ་དང་། དེ་གཉིས་ཀའི་རྟེན་ཆོས་ཀྱི་སྐུ་སྟེ་གསུམ་གྱི་རང་བཞིན་ནམ་ཟག་པ་མེད་པའི་ཡོན་ཏན་དང་དབྱེར་མི་ཕྱེད་ཅིང་ཆོས་དབྱིངས་དག་པ་གཉིས་ལྡན་མངོན་དུ་གྱུར་པའི་ཆ་ནས་ངོ་བོ་ཉིད་སྐུ་སྟེ། མངོན་རྟོགས་རྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་འགྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་དང་། དེ་ཉིད་འོག་མིན་ཆེན་པོར་སྐུ་མཚན་དང་དཔེ་བྱད་དུ་འབར་བ་སྟེ། མཚན་ནི་སུམ་ཅུ་རྩ་གསུམ་དང་། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་དང་། དེ་ཉིད་གདུལ་བྱ་མཐའ་ཡས་པར་སེམས་ཅན་གྱི་དོན་རྒྱུན་མི་ཆད་པར་མཛད་པ་སྟེ། གང་གི་སྲིད་པ་ཇི་སྲིད་བར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་ཆད། །ཅེས་གསུངས་པ་ལྟར་རོ། །དེ་ལྟར་སྟོན་མཆོག་ཐུབ་པའི་དབང་པོ་དེ་ཉིད་ཀྱིས་ཞིང་འདིའི་མཛད་པའི་གཙོ་བོ་སྡེ་ཚན་བཅུ་གཉིས་སུ་དོན་གྱིས་འདུ་བ་སྟེ། རྒྱུད་བླ་མས། སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་སོ། །ཡུལ་ཝཱ་རཱ་ཎ་སཱིར་བཀའ་འཁོར་ལོ་དང་པོ། གཉིས་པ་བྱ་རྒོད་ཕུང་པོའི་རི་བོར་བཀའ་བར་པ། ཡུལ་མཉན་ཡོད་ལ་སོགས་པར་བཀའ་འཁོར་ལོ་ཐ་མ་བསྐོར་བ། ཅིག་ཆར་དུ་བསྐོར་བ་ནི། དགོངས་པ་ལུང་སྟོན་ལས། རྟོག་པ་མེད་ཅིང་འཁྲུལ་མེད་པ། །ཡིད་འོང་རྡོ་རྗེའི་ཚིག་གཅིག་པུ། །གདུལ་བྱའི་བསམ་པའི་དབང་གིས་ནི། །བྱེ་བྲག་མང་པོར་འགྱུར་བ་ཡིན། །ཅེས་སོ།། །། ༈ བཀའ་བསྡུ་དང་པོ། ནྱ་གྲོ་དྷ་ཕུག་ཏུ་དབེན་པར་གཟིགས་ནས་དེ་ཉིད་དུ་བྱོན་ནོ། །བཀའ་བསྡུ་གཉིས་པར། ཡངས་པ་ཅན་གྱི་དགེ་སློང་རྣམས་ཀྱིས་མི་རུང་བའི་གཞི་བཅུ་སྤྱོད་པ་ན། ཡངས་པ་ཅན་གྱི་ཀཥྨི་པཱུ་རིའི་གཙུག་ལག་ཁང་དུ་དགྲ་བཅོམ་པ་གྲགས་པར་མྱ་ངན་མེད་ཀྱི་སྦྱིན་བདག་བྱས་ཏེ། དགྲ་བཅོམ་བདུན་བརྒྱ་འདུས་ནས་གཞི་བཅུ་སུན་དབྱུངས་ཏེ་བཀའ་བསྡུ་མཛད་དོ། །བཀའ་བསྡུ་གསུམ་པ་ནི། ཁ་ཆེའི་ཡུལ་གྱི་བྱེ་བྲག་ཀུན་ས་ན་ཞེས་བྱ་བའི་དགོན་པར། ཛ་ལནྡྷ་རའི་རྒྱལ་པོ་ཀ་ནིཥྐས་སྦྱིན་བདག་བྱས་ནས་གནས་བརྟན་དགྲ་བཅོམ་པ་སེངྒེ་ཞེས་བྱ་བས་གཞི་བཟུངས་པུརྞི་ཀ་སོགས་དགྲ་བཅོམ་ལྔ་བརྒྱ། བ་སུ་མི་ཏྲ་སོགས་བྱང་སེམས་ལྔ་བརྒྱ། སོ་སོའི་སྐྱེ་བོའི་པཎྜི་ཏ་ལྔ་བརྒྱ་འདུས་ནས་སྡེ་པ་བཅོ་བརྒྱད་བཀར་སྒྲུབ་སྟེ་བཀའ་བསྡུ་མཛད།། །། ༈ ཐོག་མར་དབུས་མཐར་མེད་ཅིང་རྣམ་དབྱེར་མེད། །གཉིས་མེད་གསུམ་བྲལ་དྲི་མེད་རྣམ་རྟོག་མེད། །ཆོས་དབྱིངས་རང་བཞིན་གང་ཡིན་དེ་སྟོང་བ། །མཉམ་པར་བཞག་པའི་རྣལ་འབྱོར་པ་ཡིས་མཐོང་། །གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས། །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར།། །། ༈ འཁོར་ལྔ་སྡེ་ནི། ཀུན་ཤེས་ཀཽ་ཌི་ཎྱ། རྟ་ཐུལ། བཟང་ལྡན། རླངས་པ། མིང་ཆེན་ལྔའོ།། །།

[edit]

de'ang bdag cag gi ston mchog thugs rje can 'di drin lan bsab pa'i mdor/__sngon bskal pa thog ma med pa'i dus kyi gong rol zhig tu so skye 'ching ba kun ldan du gyur pa'i tshe/__las dbang gi me yi shing rta zhes bya ba'i dmyal bar ltung ba na/__grogs gzhan zhig dang bsdongs te/__dmyal srung a wa glang mgo sdod sa'i shing rta 'dren pa'i gyad du gyur pa na/__grogs de yi shing rta 'dren mi nus pa sdug bsngal bar gyur pa la/__gyad theg chen gyi rigs can yin pas srung ma a wa la 'di la snying rje cung skyed cig byas pas/__de khros nas lcags kyi mdung rtse gsum gyad kyi gnyan sar bsnun pas tshe yi dus byas/__bskal pa brgya yi sdig pa byang nas de las thar te ring zhig nas 'dzam gling lho phyogs kyi rgyud du rdza mkhan khye'u snang byed du gyur te sangs rgyas shAkya thub pa chen po la shin tu dad par gyur te/__thug pa 'jam po yol go gang dang /__mgron bu lngas mchod de/__bde bar gshegs pa khyed sku ci 'dra dang /__sogs kyi smon lam btab cing byang chub mchog tu thugs thog mar bskyed pa ste/__mdo sde bskal bzang las kyang /__nga ni sngon tshe dman par gyur pa'i tshe/__/de bzhin gshegs pa shAkya thub de la/__/'jam gang zhig ni dbul bar byas nas kyang /__/dang por byang chub mchog tu sems bskyed do/__/zhes dang por thugs bskyed tshul dang /__bar du tshogs bsags tshul la/__theg pa chung ngu las/__grangs med dang po la/__rdza mkhan gyi khye'ur gyur pa'i tshe/__/shAkya thub pa chen po 'jig rten du byon pa nas/__de bzhin gshegs yul 'khor skyong gi bar la bdun khri lnga stong la bsnyen bkur byas pa dang /__grangs med gnyis par bram ze'i khye'ur gyur pa'i tshe/__mar me mdzad la ut+pal sngon po bdun gtor ba nas bde gshegs dbang po'i rgyal mtshan gyi bar bdun khri drug stong la bsnyen bkur byas/__grangs med gsum pa la rgyal por gyur ba'i tshe bde gshegs bde mdzad la mchod pa phul zhing /__de yi sku gdung gi mchod rten brtsegs pa nas/__sangs rgyas 'od srung las rab tu byung zhing thugs bskyed pa'i bar bdun khri bdun stong bsnyen bkur zhing mnyes par byas so gsungs/__mdzod las/__shAkya thub nas rin chen gtsug tor can gyi bar grangs med dang po/__mar me mdzad kyi bar grangs med gnyis/__rnam gzigs kyi bar grangs med gsum/__de nas mtshan bzang gi rgyu sgrub pa la bskal pa brgya thogs/__bram ze'i khye'ur gyur pa na sangs rgyas skar rgyal me yi khams la snyoms bar zhugs pa la rkang pa ya gcig 'greng nas zhag bdun gyi bar bskor ba byas/__skyes bu khyu mchog sogs kyis bstod pas bskal pa dgu yi tshogs zlum/__de nas bskal ba dgu bcu rtsa gcig 'das pa na grong khyer nyer ldan du sangs rgyas 'od srung byon pa'i tshe bram ze'i khye'u bla mar gyur pa yan chad kyi mtshan gyi rgyu grub nas byang sems nges pa la gnas pa zhes bya/__mtshan bzang 'grub pa'i rgyu mthar phyin nas dga' ldan du dam pa tog dkar du 'khrungs pa ni/__skye ba gcig gis thogs pa'i byang chub sems dpa' dang /__de nas 'dzam gling du don thams cad grub pa zhes bya bar gyur pa ni/__srid pa tha ma pa'i byang chub sems dpa'/__rten de la rdo rje gdan du srod la bdud btul/__gung la mnyam par gzhag__/tho rangs rdo rje lta bu'i ting nge 'dzin mngon du mdzad pa'o/__/zhes bzhed/__theg chen lugs ni/__grangs med dang po ni mos pas spyod pa'i sa dang po dang /__grangs med gnyis pas/__sa gnyis pa nas bdun pa man chad dang /__grangs med gsum pas ni/__sa bcu pa man chad thob par bzhed/__brgyad stong 'grel chen las/__grangs med sum cu rtsa gsum du'ang bshad/__grangs med brtsams pa'i thog ma ni/__theg bsdus las/__bzang dang smon pa'i stobs can dang /__/sems brtan khyad par 'gro ba yis/__/byang chub sems dpa' grangs med gsum/__/kun tu brtsam par mdzad pa yin/__ces chos bzhi po 'di dag tshogs lam du nam thob na grangs med kyi mgo brtsams par bzhed do/__/de'ang rgyal po rnam rgyal gyi sras gzhon nu brtson 'grus spyod du gyur pa'i tshe de bzhin gshegs pa 'od 'phro'i phung po las rjes su bstan pa nos te lo bye ba phrag drug cu rtsa drug tu sangs rgyas 'khor bcas mchod pas sa dang po mngon du mdzad/__grangs med gnyis par/__grong khyer dzam+bu'i chu gser du rgyal po mdzes snang zhes pa byung ba na/__ston pa nyid tshong dpon shes rab bzang por gyur te/__de bzhin gshegs pa dkon mchog yan lag rjes su bstan pa nos shing /__de bzhin gshegs pa lo stong du bsnyen bkur nas tshogs bsags pas/__sa bdun pa mngon du mdzad/__grangs med gsum pa la/__rgyal po dgra thul gyi pho brang pad+ma can dang nye bar bram ze'i slob ma gzhon nu sprin du gyur pa'i tshe bde gshegs mar me mdzad la at+pal lngas gtor te ral pa gser gyi mdog can stan du bting nas bdag lung ston bar mi mdzad na lus bskam par bya'o zhes dam bcas pa/__de bzhin gshegs pas mkhyen te/__ral pa la zhabs bzhag nas/__ma 'ongs pa na sangs rgyas shAkya thub pa zhes bya bar 'gyur ro zhes lung ston pa na dga' mgu rangs par gyur nas shing ta la bdun srid du 'phags nas/__ting nge 'dzin bye ba khrag khrig mang po mngon du byas te sa brgyad pa mngon du mdzad pa yin no/__/de nas kyang brgya byin mig bzang sogs skye ba mang du bzhes nas sems can gyi don mdzad pa'i mthar tshe lo nyi khri'i dus su sangs rgyas 'od srungs byon pa'i tshe bram ze'i khye'u bla mar gyur te grangs med gcig tu sangs rgyas mang po la bsnyen bkur tshogs bsags pas sa bcu pa mngon du byas nas/__sa bcu'i rgyun gyi tha mar rdo rje lta bu'i ting nge 'dzin gyis sgrib pa bag chags dang bcas pa phyir mi ldog pa yongs su spangs pa mthar phyin pa dang /__shes bya ji lta ba dang ji snyed pa'i don mngon sum mkhyen pa'i ye shes brnyes pas rtogs pa mthar phyin pa'i byang chub chen po thob pa ste/__rang don phun sum tshogs pa/__longs spyod rdzogs sku dang /__gzhan don phun sum tshogs pa sprul pa'i sku dang /__de gnyis ka'i rten chos kyi sku ste gsum gyi rang bzhin nam zag pa med pa'i yon tan dang dbyer mi phyed cing chos dbyings dag pa gnyis ldan mngon du gyur pa'i cha nas ngo bo nyid sku ste/__mngon rtogs rgyan las/__thub pa'i ngo bo nyid sku ni/__/zag pa med pa'i chos gang dag__/thob 'gyur rnam kun rnam dag pa/__/de dag rang bzhin mtshan nyid can/__/zhes dang /__de nyid 'og min chen por sku mtshan dang dpe byad du 'bar ba ste/__mtshan ni sum cu rtsa gsum dang /__/dpe byad brgyad cu'i bdag nyid 'di/__/theg chen nye bar longs spyod phyir/__/thub pa'i longs spyod rdzogs skur bzhed/__/ces dang /__de nyid gdul bya mtha' yas par sems can gyi don rgyun mi chad par mdzad pa ste/__gang gi srid pa ji srid bar/__/'gro la phan pa sna tshogs dag__/mnyam du mdzad pa'i sku de ni/__/thub pa'i sprul sku rgyun mi chad/__/ces gsungs pa ltar ro/__/de ltar ston mchog thub pa'i dbang po de nyid kyis zhing 'di'i mdzad pa'i gtso bo sde tshan bcu gnyis su don gyis 'du ba ste/__rgyud bla mas/__skye ba mngon par skye ba dang /__/dga' ldan gnas nas 'pho ba dang /__/lhums su 'jug dang bltams pa dang /__/bzo yi gnas la mkhas pa dang /__/btsun mo'i 'khor dgyes rol pa dang /__/nges 'byung dka' ba spyod pa dang /__/byang chub snying por gshegs pa dang /__/bdud sde 'joms dang rdzogs par ni/__/byang chub chos kyi 'khor lo dang /__/mya ngan 'das par gshegs mdzad rnams/__/yongs su ma dag zhing rnams su/__/srid pa ji srid gnas par ston/__/zhes so/__/yul wA rA Na sIr bka' 'khor lo dang po/__gnyis pa bya rgod phung po'i ri bor bka' bar pa/__yul mnyan yod la sogs par bka' 'khor lo tha ma bskor ba/__cig char du bskor ba ni/__dgongs pa lung ston las/__rtog pa med cing 'khrul med pa/__/yid 'ong rdo rje'i tshig gcig pu/__/gdul bya'i bsam pa'i dbang gis ni/__/bye brag mang por 'gyur ba yin/__/ces so//__//__!__bka' bsdu dang po/__n+ya gro d+ha phug tu dben par gzigs nas de nyid du byon no/__/bka' bsdu gnyis par/__yangs pa can gyi dge slong rnams kyis mi rung ba'i gzhi bcu spyod pa na/__yangs pa can gyi kaSh+mi pU ri'i gtsug lag khang du dgra bcom pa grags par mya ngan med kyi sbyin bdag byas te/__dgra bcom bdun brgya 'dus nas gzhi bcu sun dbyungs te bka' bsdu mdzad do/__/bka' bsdu gsum pa ni/__kha che'i yul gyi bye brag kun sa na zhes bya ba'i dgon par/__dza lan+d+ha ra'i rgyal po ka niSh+kas sbyin bdag byas nas gnas brtan dgra bcom pa seng+ge zhes bya bas gzhi bzungs pur+Ni ka sogs dgra bcom lnga brgya/__ba su mi tra sogs byang sems lnga brgya/__so so'i skye bo'i paN+Di ta lnga brgya 'dus nas sde pa bco brgyad bkar sgrub ste bka' bsdu mdzad//__//__!__thog mar dbus mthar med cing rnam dbyer med/__/gnyis med gsum bral dri med rnam rtog med/__/chos dbyings rang bzhin gang yin de stong ba/__/mnyam par bzhag pa'i rnal 'byor pa yis mthong /__/gang phyir rgyal las ches mkhas 'ga' yang 'jig rten 'di na yod min te/__/ma lus de nyid mchog ni tshul bzhin kun mkhyen gyis mkhyen gzhan min pa/__/de phyir drang srong rang nyid kyis bzhag mdo sde gang yin de mi dkrugs/__/thub tshul bshig phyir de yang dam chos la ni gnod pa byed par 'gyur//__//__!__'khor lnga sde ni/__kun shes kau Di N+ya/__rta thul/__bzang ldan/__rlangs pa/__ming chen lnga'o//__//