JKW-KABUM-12-NA-010

🚧 This website is under continued development. We appreciate your patience!

Previous Section"NA" is not a number. Back to Volume Page"NA" is not a number.Next Section "NA" is not a number.

Wylie title
Location	mkhyen brtse'i bka' 'bum Volume , sde tshan 10, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum "NA" is not a number.

1 Texts in this Section (sde tshan or chos tshan)

445-449	གྲྭ་མངོན་ཕྱག་རྡོར་གཏུམ་པོ་དམར་པོའི་སྒྲུབ་ཐབས། grwa mngon phyag rdor gtum po dmar po'i sgrub thabs Daily Practice - rgyun khyer   ·   Revelations - gter ma   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

"NA" is not a number.

Tibetan Text

Wylie

[edit]

གྲྭ་མངོན་ཕྱག་རྡོར་གཏུམ་པོ་དམར་པོའི་སྒྲུབ་ཐབས།

༄༅། །གྲ་པ་མངོན་ཤེས་ཀྱི་གཏེར་བྱོན་ཕྱག་རྡོར་གཏུམ་པོ་དམར་པོའི་སྒྲུབ་ཐབས་བཞུགས་སོ།། །། ན་མོ་གུ་རུ་བཛྲ་པཱ་ཎ་ཡེ། གཏུམ་པོ་དམར་པོའི་སྒོམ་བཟླས་ཉམས་སུ་ལེན་པར་འདོད་ན། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པའི་ངང་ལས་པདྨ་ཟླ་བའི་སྟེང་། །རང་སེམས་ཧཱུྃ་ཡིག་དམར་པོ་ཡོངས་གྱུར་ལས། །རང་ཉིད་ཕྱག་ན་རྡོ་རྗེ་སྐུ་མདོག་དམར། །ཕྱག་གཡས་རྡོ་རྗེ་ནག་པོ་རྩེ་ལྔ་འཕྱར། །གཡོན་པས་ཐུགས་ཀར་རྡོ་རྗེའི་ཞགས་པ་འཛིན། །སྟག་ལྤགས་དང་ནི་དར་གྱི་ཤམ་ཐབས་གསོལ། །རིན་ཆེན་སྦྲུལ་རྒྱན་མི་བསྐྱོད་ཅོད་པན་ཅན། །ཁྲོ་བོའི་ཆས་རྫོགས་མེ་ཕུང་ཀློང་ན་འགྱིང་། །སྙིང་གར་རང་འདྲའི་ཡེ་ཤེས་སེམས་དཔའ་ནི། །སྐུ་མདོག་ནག་པོ་དེ་ཡི་ཐུགས་ཀ་རུ། །ཏིང་འཛིན་སེམས་དཔའ་རྡོ་རྗེའི་ལྟེ་བར་ཧཱུྃ། །དེ་ལས་འོད་འཕྲོས་གསང་བདག་མཐིང་གའི་ཚོགས། །ནམ་མཁའ་གང་བར་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། །རང་ཉིད་སྐུ་མདོག་དམར་མཐིང་འབར་བ་ཡི། །ཕྲག་གོང་གཡས་སུ་བྱ་ཁྱུང་ནག་པོ་དང་། །གཡོན་དུ་གཤོག་པ་གཡུ་ཡི་མདོག་ཅན་གཉིས། །གདུག་པའི་སྦྲུལ་བཟུང་ཞལ་དུ་གསོལ་བ་ལ། །རང་འདྲའི་འཁོར་ཚོགས་དཔག་ཏུ་མེད་པས་བསྐོར། །གནམ་ས་ཐམས་ཅད་གྲགས་སྟོང་སྔགས་སྒྲས་ཁེངས། །གདུག་པ་ཚར་བཅད་དངོས་གྲུབ་མཆོག་ཐོབ་གྱུར། །ཨོཾ་བཛྲ་པཱ་ཎི་ཧཱུྃ་ཕཊ། །ཅེས་བཟླ། ཐུན་ལས་ལྡང་བ་ན། དགེ་བ་འདི་ཡིས་མྱུར་དུ་བདག །གསང་བདག་གཏུམ་པོ་འགྲུབ་གྱུར་ནས་ཞེས་སོགས་བསྔོ་སྨོན་བྱ། ཐུན་མཚམས་སུ་གཏོར་མ་འབུལ་ན། ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལར་འབྲུ་གསུམ་ཞུ་བ་ལས་གཏོར་མ་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ་གསུམ། རང་གི་སྙིང་ག་ནས་འོད་ཟེར་འཕྲོས་པས་ལྕང་ལོ་ཅན་ནས་གསང་བའི་བདག་པོ་འཁོར་དང་བཅས་པ་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲང་། ཨོཾ་བཛྲ་པཱ་ཎི་ཧཱུྃ་ཕཊ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། ལན་གསུམ། ཨོཾ་བཛྲ་པཱ་ཎི་ས་པ་རི་ཝ་ར་ཨརྒྷཾ་ནས། ཤཔྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད། ལྕང་ལོ་ཅན་གྱི་གནས་མཆོག་དམ་པ་ན། །གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །བཅོམ་ལྡན་རྡོ་རྗེ་བསྣམས་ལ་ཕྱག་འཚལ་བསྟོད། །གསང་བདག་གཏུམ་པོ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་བསྟོད་ཅིང་ཕྲིན་ལས་བཅོལ། ཡི་གེ་བརྒྱ་པས་ནོངས་པ་བཤགས། རྟེན་ཡོད་ན། སུ་པྲ་ཏིཥྛས་བརྟན་བཞུགས་བྱ། མེད་ན། བཛྲ་མུཿས་གཤེགས། བསྔོ་སྨོན་བཀྲ་ཤིས་བྱ། བསྙེན་ཚད་འབུམ་ཕྲག་གཅིག་ཏུ་གསུངས། འདི་ནི་བཟླས་ལུང་དང་འབྲེལ་བར་བདག་བསྐྱེད་རྐྱང་བ་ལ་བརྟེན་ནས་རྩ་བའི་བཟླས་པ་བྱ་བའི་ཚུལ་ཡིན་ལ། དབང་དང་འབྲེལ་བར་བདག་བསྐྱེད་སྔོན་དུ་འགྲོ་བས་མདུན་བསྐྱེད་ཕྱག་མཚན་གཉིས་ལ་བརྟེན་པ་དང་། དྲག་སྔགས་ཀྱི་ཤམ་འདོགས་སོགས་ནི་གཞུང་དང་། རྗེ་བཙུན་ཏཱ་ར་ནཱ་ཐས་མཛད་པའི་སྒྲུབ་དཀྱིལ་སོགས་ལ་གསལ་བར་བཞུགས་ཀྱང་། དེང་སང་རྒྱུན་མེད་པས་འདིར་མ་བཀོད་དོ། །ཞེས་པའང་འཇམ་དབྱངས་མཁྱེན་བརྩེའི་དབང་པོས་སྒྲུབ་པའི་ཐབས་རིན་ཆེན་འབྱུང་གནས་ལས་གསུངས་པ་ཚིགས་བཅད་དུ་བསྡེབས་ཏེ་བྲིས་པ་དགེ་ལེགས་སུ་གྱུར་ཅིག །མངྒ་ལཾ།།

[edit]

grwa mngon phyag rdor gtum po dmar po'i sgrub thabs/ @#/__/gra pa mngon shes kyi gter byon phyag rdor gtum po dmar po'i sgrub thabs bzhugs so//__// na mo gu ru badz+ra pA Na ye/__gtum po dmar po'i sgom bzlas nyams su len par 'dod na/__skyabs sems tshad med bzhi bsgom pa sngon du 'gro bas/__oM ma hA shU n+ya tA dz+nyA na badz+ra swa b+hA ba At+ma ko\u0f85haM/__stong pa'i ngang las pad+ma zla ba'i steng /__/rang sems hU~M yig dmar po yongs gyur las/__/rang nyid phyag na rdo rje sku mdog dmar/__/phyag g.yas rdo rje nag po rtse lnga 'phyar/__/g.yon pas thugs kar rdo rje'i zhags pa 'dzin/__/stag lpags dang ni dar gyi sham thabs gsol/__/rin chen sbrul rgyan mi bskyod cod pan can/__/khro bo'i chas rdzogs me phung klong na 'gying /__/snying gar rang 'dra'i ye shes sems dpa' ni/__/sku mdog nag po de yi thugs ka ru/__/ting 'dzin sems dpa' rdo rje'i lte bar hU~M/__/de las 'od 'phros gsang bdag mthing ga'i tshogs/__/nam mkha' gang bar badz+ra sa mA dzaH__dzaHhU~M ba~M hoH_gnyis su med par thim/__/rang nyid sku mdog dmar mthing 'bar ba yi/__/phrag gong g.yas su bya khyung nag po dang /__/g.yon du gshog pa g.yu yi mdog can gnyis/_/gdug pa'i sbrul bzung zhal du gsol ba la/__/rang 'dra'i 'khor tshogs dpag tu med pas bskor/__/gnam sa thams cad grags stong sngags sgras khengs/__/gdug pa tshar bcad dngos grub mchog thob gyur/__/oM badz+ra pA Ni hU~M phaT/__/ces bzla/__thun las ldang ba na/__dge ba 'di yis myur du bdag__/gsang bdag gtum po 'grub gyur nas zhes sogs bsngo smon bya/__thun mtshams su gtor ma 'bul na/__a mr-i tas bsang /__swa b+hA bas sbyang /__stong pa'i ngang las a las ye shes kyi ka pA lar 'bru gsum zhu ba las gtor ma bdud rtsi'i rgya mtshor gyur/__oM AHhU~M gsum/__rang gi snying ga nas 'od zer 'phros pas lcang lo can nas gsang ba'i bdag po 'khor dang bcas pa mdun gyi nam mkhar badz+ra sa mA dzaHsa spyan drang /__oM badz+ra pA Ni hU~M phaT i daM ba liM ta kha kha khA hi khA hi/__ma hA pany+tsa a mr-i ta khA hi/__ma hA rak+ta khA hi/__lan gsum/__oM badz+ra pA Ni sa pa ri wa ra ar+g+haM nas/__shap+da pra tIts+tsha swA hA'i bar gyis mchod/__lcang lo can gyi gnas mchog dam pa na/__/gsang sngags rig sngags kun gyi bdag po ste/__/log 'dren bgegs kyi tshogs rnams 'joms mdzad pa/__/bcom ldan rdo rje bsnams la phyag 'tshal bstod/__/gsang bdag gtum po 'khor bcas rnams/__/mchod sbyin gtor ma 'di bzhes la sogs kyis bstod cing phrin las bcol/__yi ge brgya pas nongs pa bshags/__rten yod na/__su pra tiSh+Thas brtan bzhugs bya/__med na/__badz+ra muHsa gshegs/__bsngo smon bkra shis bya/__bsnyen tshad 'bum phrag gcig tu gsungs/__'di ni bzlas lung dang 'brel bar bdag bskyed rkyang ba la brten nas rtsa ba'i bzlas pa bya ba'i tshul yin la/__dbang dang 'brel bar bdag bskyed sngon du 'gro bas mdun bskyed phyag mtshan gnyis la brten pa dang /__drag sngags kyi sham 'dogs sogs ni gzhung dang /__rje btsun tA ra nA thas mdzad pa'i sgrub dkyil sogs la gsal bar bzhugs kyang /__deng sang rgyun med pas 'dir ma bkod do/__/zhes pa'ang 'jam dbyangs mkhyen brtse'i dbang pos sgrub pa'i thabs rin chen 'byung gnas las gsungs pa tshigs bcad du bsdebs te bris pa dge legs su gyur cig__/mang+ga laM//_