JKW-KABUM-10-THA-001-008

🚧 This website is under continued development. We appreciate your patience!

Previous Text Back to Volume PageNext Text

པཎ་ཆེན་ཤཱཀྱ་ཤྲཱིའི་ལུགས་ཀྱི་སྒྲོལ་ལྗང་སྒྲུབ་རྗེས་བདུད་རྩིའི་སྙེ་མ།

Wylie title	paN chen shAkya shrI'i lugs kyi sgrol ljang sgrub rjes bdud rtsi'i snye ma
Location	mkhyen brtse'i bka' 'bum Volume 10, sde tshan 1, Text 8, Pages 94-109 (Folios 47b6 to 55a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	ས་སྐྱ་པཎྜི་ཏ་ (sa skya paN+Di ta)
Associated People	ཁ་ཆེ་པཎ་ཆེན་ཤཱཀྱ་ཤྲཱི་ (Śākyaśrībhadra)
Citation	'jam dbyangs mkhyen brtse'i dbang po. paN chen shAkya shrI'i lugs kyi sgrol ljang sgrub rjes bdud rtsi'i snye ma. In 'jam dbyangs mkhyen brtse'i dbang po'i bka' 'bum, Vol. 10: 94-109. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Cycle	སྒྲོལ་མ་ལྗང་ཁ་ཆེ་པཎ་ཆེན་ལུགས་ (sgrol ma ljang kha che pan chen lugs)
Deity	sgrol ma, sgrol ljang
Colophon	ཅེས་པའང་འཇམ་མགོན་ས་སྐྱ་པཎྜིཏའི་གསུང་རབ་རིན་པོ་ཆེའི་ཞབས་འདེགས་སུ་དམིགས་ཏེ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཉུང་གསལ་བཀླག་པས་གྲུབ་པར་བྲིས་པ་སུ་ཤྲེ་ཡནྟུ།།
	ces pa'ang 'jam mgon sa skya paN+Dita'i gsung rab rin po che'i zhabs 'degs su dmigs te bya bral ba 'jam dbyangs mkhyen brtse'i dbang pos nyung gsal bklag pas grub par bris pa su shre yan+tu

1 Texts in this Section (sde tshan or chos tshan)

8 94-103	པཎ་ཆེན་ཤཱཀྱ་ཤྲཱིའི་ལུགས་ཀྱི་སྒྲོལ་ལྗང་སྒྲུབ་རྗེས་བདུད་རྩིའི་སྙེ་མ། paN chen shAkya shrI'i lugs kyi sgrol ljang sgrub rjes bdud rtsi'i snye ma Permission to Invoke (anujñā) - rjes gnang   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཁ་ཆེ་པཎྜི་ཏ་ཤཱཀྱ་ཤྲཱིའི་ལུགས་ཀྱི་སྒྲོལ་མ་ལྗང་གུའི་རྗེས་གནང་གི་ཆོ་ག་བདུད་རྩིའི་སྙེ་མ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། དྲན་པས་འཇིགས་པ་ཀུན་སེལ་བའི། །རྗེ་བཙུན་འཕགས་མར་གུས་བཏུད་ནས། །དེ་ཡི་རྗེས་གནང་ཟབ་མོའི་ཚུལ། །ཆོ་ག་བདུད་རྩིའི་སྙེ་མ་བསྐྲུན། །གནས་དབེན་ཞིང་གཙང་ལ་ཡིད་དང་རྗེས་སུ་མཐུན་པར་སྟེགས་བུའི་དབུས་སུ་མཉྫིའི་ཁར་མཎྜ་ལར་མེ་ཏོག་གི་ཚོམ་བུ་གཅིག་དགོད། དེའི་མདུན་དུ་འབུལ་གཏོར་དཀར་ཟླུམ་དང་། མེ་ཏོག་ལ་སོགས་པའི་ཉེར་སྤྱོད། རང་གི་ཉེ་ལོགས་སོགས་གང་བདེར་བུམ་པ་བཅུད་ལྡན་ཁ་རྒྱན་མགུལ་ཆིངས་མཆོད་ཡོན་གཟུངས་རྡོར་དང་བཅས་པ་བཤམ། གཞན་ཡང་དགོས་པའི་ཡོ་བྱད་ཐམས་ཅད་འདུ་བྱ། མཆོད་པ་བསང་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག་སོགས་ནས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་པུཥྤེ་ཨཱཿཧཱུྃ་ནས། ཤཔྡ་ཨཱཿཧཱུྃ་གི་བར་གྱིས་བརླབ་དྷརྨཱ་ར་ཎི་ཏས་བྱིན་དབབ། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ཞེས་སྐྱབས་སེམས་སྔོན་དུ་འགྲོ་བས། རང་གི་སྙིང་གར་སོགས་ནས། སྟེང་གི་ཆ་ལ་བཞུགས་པ་ཨོཾ་བཛྲ་ས་མཱ་ཛཿས་ཚོགས་ཞིང་སྤྱན་དྲང་། ཡིད་ཀྱིས་སྤྲུལ་པའི་མཆོད་པ་དཔག་ཏུ་མེད་པར་སྤྲུལ་ལ་དངོས་སུ། ཨོཾ་བཛྲ་པུཥྤེ་ཨཱཿཧཱུྃ་ནས། ནཻ་ཝི་དྱ་ཨཱཿཧཱུྃ་གི་བར་ཉེར་སྤྱོད་ལྔས་མཆོད། པདྨ་ཀ་མ་ལཱ་ཡ་སྟཱཾ་གྱིས་གདན་ཕུལ། དེའི་སྤྱན་སྔར། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ་གྱིས་རྒྱུན་བཤགས་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། ཨོཾ་སྭ་བྷཱ་ཝ་སོགས་ནས་བཟླས་པ་བསྡུ་བའི་བར་བདག་བསྐྱེད་འཇམ་མགོན་ས་སྐྱ་པཎྜི་ཏའི་གསུང་རབ་ལྟར་བྱ། མདུན་གྱི་ཚོམ་བུ་བསང་སྦྱང་། སྟོང་པའི་ངང་ལས་པྃ་ལས་པདྨ་སོགས་ནས། དོན་ཡོད་གྲུབ་པས་དབུར་བརྒྱན་ཞེས་པའི་བར་བདག་བསྐྱེད་ལྟར་ལ། བདག་ཉིད་ཅེས་པའི་ཚིག་དོར། ཁྱོད་ཀྱིས་འདི་ལ་དབང་བསྐུར་དུ་གསོལ་ཞེས་ཁ་བསྒྱུར་བ་ཙམ་ཁྱད་པར་རོ། །དེ་ནས་མཆོད་པ་བསང་སྦྱང་བྱིན་གྱིས་བརླབས་ལ། ཨོཾ་ཨཱཪྻཱ་ཏཱ་རཱ་ས་པ་རི་ཝཱ་ར་ཨོཾ་བཛྲ་པུཥྤེ་ཨཱཿཧཱུྃ་སོགས་ཉེར་སྤྱོད་རོལ་མོར་བཅས་པས་མཆོད། ཕྱག་འཚལ་ཉེར་གཅིག་གམ། ལྷ་དང་ལྷ་མིན་ཅོད་པན་གྱིས། །ཞེས་སོགས་རྒྱས་བསྡུས་གང་རུང་གིས་བསྟོད། གཏོར་མ་བསང་སྦྱང་། ཨོཾ་ཨཱཿཧཱུྃ་གིས་བརླབས་ལ་མཚན་སྔགས་ཀྱི་མཐར་ཨ་ཀཱ་རོ་བཏགས་པས་ཕུལ། མཆོད་ཅིང་བསྟོད། འཕགས་མ་སྒྲོལ་མ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ཀྱིས་འདོད་དོན་གསོལ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱ། བུམ་པ་བསང་སྦྱང་། སྟོང་པའི་ངང་ལས་འོ་མ་ཅན་གྱི་བདུད་རྩིའི་རྒྱ་མཚོ་དཀར་ཞིང་དྭངས་ལ་ཡན་ལག་བརྒྱད་དང་ལྡན་པར་འཁྱིལ་པའི་དབུས་སུ་པྃ་ལས་པདྨ་སོགས་ནས། ཡོན་ཏན་མ་ལུས་པ་ཕུལ་དུ་བྱུང་བའི་སྐུར་གྱུར་ཅེས་པའི་བར་མདུན་བསྐྱེད་ལྟར་གསལ་གདབ། གཟུངས་ཐག་ནས་བཟུང་སྟེ། ཐུགས་ཀར་ཟླ་བའི་སྟེང་དུ་ཏཱྃ་ལྗང་གུ་ལ་སྔགས་ཀྱིས་བསྐོར་བ་ལས་འོད་ཟེར་འཕྲོས། འཕགས་པ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་པ་དང་། སྐུ་ལས་ཀྱང་བདུད་རྩི་དང་སྔགས་ཀྱི་ཡིག་འབྲུའི་ཚོགས་དཔག་ཏུ་མེད་པ་བྱུང་བས་བདུད་རྩིའི་རྒྱ་མཚོ་དང་རོ་གཅིག་ཏུ་འདྲེས་པར་གྱུར་པའི་མོས་པས་བཟླས་པ་ཅི་ནུས་མཐར། མཆོད་ཅིང་བསྟོད། ཨོཾ་ཨཱ་ཧཱུྃ་གིས་མཆོད་ཡོན་ཕུལ་བས། སྒྲོལ་མ་སྔགས་ཀྱི་ཡིག་འབྲུ་དང་བཅས་པ་འོད་དུ་ཞུ། དག་པ་ཡེ་ཤེས་ཀྱི་ཆུར་གྱུར་པར་བསམ་པ་ནི་སློབ་དཔོན་གྱི་བྱ་བའོ། །དེ་ནས་སློབ་མ་རྣམས་ཁྲུས་བྱས་གྲལ་དུ་འཁོད་པ་ལ། མེ་ཏོག་བཀྱེ་བསྡུ་བྱས། སེམས་བསྐྱེད་གསལ་གདབ་པ་སོགས་ཆོས་བཤད་རྒྱས་བསྡུས་ཅི་རིགས་པས་མཚམས་སྦྱར་ཏེ། དེ་ལ་འདིར་འཕགས་པ་འཇམ་དཔལ་གྱི་རྩ་བའི་རྒྱུད་ལས། བྱང་ཆུབ་སེམས་མ་རྫུ་འཕྲུལ་ཆེ། །སེམས་ཅན་རྣམས་ནི་འདུལ་བྱེད་པ། །ལྷ་མོ་སྒྲོལ་མ་ཞེས་སུ་བསྟན། །འདི་ནི་འབད་མེད་འགྲུབ་པ་སྟེ། །སྲུང་དང་སྐྱོབ་དང་སྦ་བར་བྱེད། །ལོངས་སྤྱོད་དབང་ཕྱུག་འཕེལ་བྱེད་པས། །འདིར་ནི་ལྷ་མོ་བསྒྲུབ་པར་བྱ། །ཞེས་སོགས་རྡོ་རྗེ་ཐེག་པའི་སྔགས་རྒྱུད་རྒྱ་མཚོ་ནས་ཕྲིན་ལས་མཐའ་དག་འབད་པ་མེད་པར་སྒྲུབ་པ་ལ་མཆོག་ཏུ་གསུངས་ཤིང་ཆེས་ཆེར་བསྔགས་པའི་འཕགས་མ་སྒྲོལ་མའི་རྒྱུད་དང་། སྒྲུབ་ཐབས་དང་། མན་ངག་གི་ཚོགས་མཐའ་ཡས་པ་ཞིག་སྣང་བ་ལས་ཁྱད་པར་དུ་གྱུར་པ་འདི་ནི་ཇི་སྐད་དུ། གང་ལ་རྒྱལ་བའི་ཡུམ་དེས་རྗེས་བཟུང་བ། །སྡོམ་བརྩོན་དམ་པ་ཤཱཀྱ་དཔལ་གྱི་གསུང་། །འགྲོ་ལ་ཕན་ཕྱིར་ཀུན་དགའ་རྒྱལ་མཚན་དཔལ། །བཟང་པོས་ཚིག་གི་སྡེབ་སྦྱོར་སྤངས་ཏེ་བྲིས། །ཞེས་གསུངས་པ་ལྟར། རྗེ་བཙུན་སྒྲོལ་མས་མངོན་སུམ་དུ་རྗེས་སུ་བཟུང་ཞིང་། ཟབ་པ་དང་རྒྱ་ཆེ་བའི་གདམས་པའི་བདུད་རྩི་གནང་བ་མ་བྱོན་སངས་རྒྱས་རབ་གསལ་གྱི་རྣམ་པར་འཕྲུལ་པ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲའི་ཐུགས་དམ། འཇམ་མགོན་ས་སྐྱ་པཎྜི་ཏས་ཡི་གེར་བཀོད་པའི་སྒྲུབ་ཐབས་ལ་བརྟེན་ནས་ཁྲོ་ཕུ་ལོ་ཙཱ་བ་གནུབས་བྱམས་པའི་དཔལ་གྱི་ཕྱག་གཞེས་ལྟར་རྗེས་སུ་གནང་བ་ཟབ་མོ་བསྒྲུབ་པ་ལ། སློབ་དཔོན་གྱི་བྱ་བ་གྲུབ་ནས་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་རྗེས་གནང་ཞུ་བའི་ཡོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། རྡོ་རྗེ་འཛིན་པ་དགོངས་སུ་གསོལ། །བདག་ནི་འགྲོ་ལ་ཕན་དོན་དུ། །གཙོ་ཆེན་ཁྱེད་ལ་གསོལ་འདེབས་ཀྱི། །མ་ལུས་རྗེས་གནང་སྩལ་དུ་གསོལ། །ལན་གསུམ། མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་སྐྱབས་སུ་འགྲོ་ཞིང་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་མཛོད། འགྲོ་རྣམས་བསྒྲལ་འདོད་སོགས་སྐྱབས་སེམས་ལན་གསུམ། ཁྱད་པར་རྗེ་བཙུན་སྒྲོལ་མའི་རྗེས་གནང་སྩལ་དུ་གསོལ་སྙམ་པའི་འདུན་པས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། བདག་ལ་འཕགས་མ་སྒྲོལ་མའི་རྗེས་སུ་གནང་བ་མ་ལུས་པ་སྩལ་དུ་གསོལ། ལན་གསུམ། རྗེས་གནང་གི་གཞི་དགོད་པའི་སླད་དུ། སྭ་བྷཱ་ཝ་དང་། ཤཱུནྱ་ཏཱ་སོགས། ཕྱི་ནང་གི་ཆོས་ཐམས་ཅད་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་སོགས་ནས། ཚུར་འདུས་པ་ལས་ཁྱེད་རང་རྣམས་རྗེ་བཙུན་སྒྲོལ་མ་སོགས་ནས། ཕུལ་དུ་བྱུང་བའི་སྐུར་གྱུར་པའི་ཐུགས་ཀར་རང་འདྲ་བའི་ཡེ་ཤེས་སེམས་དཔའ་ཚོན་གང་བ། དེའི་ཐུགས་ཀར་ཏིང་ངེ་འཛིན་སེམས་དཔའི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ལྗང་གུ་འོད་ཟེར་དང་བཅས་པ་རྣམས་གསལ་ལམ་སྟེ་གྱུར་པའི་མོས་པ་མཛོད། །རྗེས་གནང་དངོས་ལ། ཐོག་མར་སྐུའི་རྗེས་གནང་གི་སླད་དུ་སློབ་དཔོན་ལ་རྗེ་བཙུན་སྒྲོལ་མ་དངོས་ཡིན་སྙམ་པའི་གུས་འདུད་བྱས་པས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་སེམས་ཐམས་ཅད་ཀྱི་ཐུགས་རྒྱུད་བསྐུལ་བས། སློབ་དཔོན་དང་མདུན་བསྐྱེད་ཀྱི་ལྷ་དང་། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་ཐུགས་ཀ་ནས་རྗེ་བཙུན་མའི་ཚོགས་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། སྔགས་མཐར་ཛཿཧཱུྃ་བྃ་ཧོཿབརྗོད་ཅིང་སྤོས་རོལ་བྱ། སླར་ཡང་ཁྱེད་རང་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་རྣམས་ཀྱིས་མཚན་པར་གྱུར། སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་བསྐུར་གྱི་ལྷ་དེ་བཞིན་གཤེགས་པའི་ཚོགས་བསམ་གྱིས་མི་ཁྱབ་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད། ཁྱེད་རྣམས་ཀྱིས་འདི་ལ་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་བཞིན་གཤེགས་པ་རྣམས་ཀྱིས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བའི་མོས་པ་མཛོད། བུམ་པ་སྤྱི་བོར་བཞག་ཅིང་བུམ་ཆུ་སྦྱིན་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་དབང་བསྐུར་བས་ལུས་ངག་ཡིད་གསུམ་གྱི་དྲི་མ་དག །ཆུའི་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུར་བརྒྱན་པའི་མོས་པ་མཛོད། །གསུང་གི་རྗེས་གནང་གི་སླད་དུ། སློབ་དཔོན་གྱི་ཐུགས་ཀར་ཟླ་བའི་སྟེང་དུ་ཏཱྃ་ལྗང་གུ། དེ་ལས་སྔགས་ཕྲེང་བྱུང་བ་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་གའི་ཏཱྃ་ལ་ཐིམ། དེའི་དུས་སུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་ཀྱི་རྣམ་པར་སྔགས་ཕྲེང་དང་ལྷན་ཅིག་ཞལ་དུ་ཞུགས། སྙིང་གའི་ས་བོན་ལ་ཐིམ་པའི་མོས་པ་དང་བཅས་སྔགས་འདིའི་རྗེས་ཟློས་ལན་གསུམ་མཛོད། ཡི་གེ་བཅུ་པ་བཟླར་གཞུག །དེ་ལྟར་བཟླས་པས་དང་པོས་བྱིན་གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་དང་བཅས་སློབ་དཔོན་ལ་མེ་ཏོག་འཐོར་བཞིན་པས་འདིའི་རྗེས་ཟློས་མཛོད། བཅོམ་ལྡན་བདག་གིས་སོགས་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ་ཁྱེད་རང་གི་སྤྱི་བོར་ཕུལ་བའི་མོས་པ་མཛོད། བཅོམ་ལྡན་འདི་ལ་སོགས། ཐུགས་ཀྱི་རྗེས་གནང་གི་སླད་དུ། མདུན་བསྐྱེད་ཀྱི་ལྷ་ལ་མོས་གུས་དུང་དུང་པ་དང་། བདག་གི་རྒྱུད་བྱིན་གྱིས་བརླབ་ཏུ་གསོལ་སྙམ་པ་མཛད་པས། མདུན་གྱི་ལྷའི་ཐུགས་ཀ་ནས་ཕྱག་མཚན་ཨུཏྤལ་སྔོན་པོའི་ཚོགས་དཔག་ཏུ་མེད་པ་རྒྱངས་ཏེ་བྱོན། ཁྱེད་རང་རྣམས་ཀྱི་སྙིང་གའི་ས་བོན་དང་དབྱེར་མེད་དུ་འདྲེས། དེ་ལ་སེམས་ཞུགས་པ་བཞིན་ཆེར་གྱིས་གཏད་པས། སྙིང་གའི་ཏཱྃ་ལས་འོད་འཕྲོས་ཏེ་སྣོད་བཅུད་ཀྱིས་བསྡུས་པ་ཐམས་ཅད་ལ་ཕོག །དེ་དག་ཐམས་ཅད་རྗེ་བཙུན་མ་སྒྲོལ་མའི་སྐུར་གྱུར་བར་མོས་ལ། དེ་བཞིན་དུ་དམིགས་ཏེ་འོད་ཟེར་སྤྲོ་བསྡུ་ཡང་ནས་ཡང་དུ་བྱ་ཞིང་། མཐར་དེ་དག་ཐམས་ཅད་ཀྱང་རང་བཞིན་མེད་པ་རྨི་ལམ་གྱི་ཚུལ་དུ་བསྒོམ་སྟེ། སྣང་སྟོང་སྒྱུ་མ་ལྟ་བུའི་ངང་དུ་ཅུང་ཟད་རེ་མཉམ་པར་འཇོག་པར་ཞུ། ཞེས་བརྗོད། རྗེས་དམ་ཚིག་ཁས་བླང་སོགས་སྤྱི་ལྟར་བྱས་ལ་སློབ་མ་རྣམས་རང་གནས་སུ་གྱེས། སློབ་དཔོན་གྱིས་མཆོད་པ་བསང་སྦྱང་བྱིན་རླབས། མཆོད་བསྟོད་ནོངས་བཤགས། གཤེགས་གསོལ། བསྔོ་སྨོན་བཀྲ་ཤིས་སོགས་སྤྱི་ལྟར་བྱའོ། །ཤཱཀྱ་ཤྲཱིའི་མན་ངག་གི། །འཕགས་མའི་རྗེས་སུ་གནང་བའི་ཚུལ། །བདུད་རྩིའི་སྙེ་མས་ཡིད་ཅན་ཀུན། །སྲིད་ཞིའི་གདུང་བ་འཇིལ་གྱུར་ཅིག །ཅེས་པའང་འཇམ་མགོན་ས་སྐྱ་པཎྜིཏའི་གསུང་རབ་རིན་པོ་ཆེའི་ཞབས་འདེགས་སུ་དམིགས་ཏེ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་ཉུང་གསལ་བཀླག་པས་གྲུབ་པར་བྲིས་པ་སུ་ཤྲེ་ཡནྟུ།། །། ༈

[edit]

paN chen shAkya shrI'i lugs kyi sgrol ljang sgrub rjes bdud rtsi'i snye ma/_ @#/_/kha che paN+Di ta shAkya shrI'i lugs kyi sgrol ma ljang gu'i rjes gnang gi cho ga bdud rtsi'i snye ma zhes bya ba bzhugs so/__/oM swa sti sid+d+haM/__dran pas 'jigs pa kun sel ba'i/__/rje btsun 'phags mar gus btud nas/__/de yi rjes gnang zab mo'i tshul/__/cho ga bdud rtsi'i snye ma bskrun/__/gnas dben zhing gtsang la yid dang rjes su mthun par stegs bu'i dbus su many+dzi'i khar maN+Da lar me tog gi tshom bu gcig dgod/__de'i mdun du 'bul gtor dkar zlum dang /__me tog la sogs pa'i nyer spyod/__rang gi nye logs sogs gang bder bum pa bcud ldan kha rgyan mgul chings mchod yon gzungs rdor dang bcas pa bsham/__gzhan yang dgos pa'i yo byad thams cad 'du bya/__mchod pa bsang sbyang /__stong pa'i ngang las oM las byung ba'i rin po che las grub pa'i snod yangs shing rgya che ba'i nang du oM zhu ba las byung ba'i lha rdzas las grub pa'i me tog sogs nas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra puSh+pe AHhU~M nas/__shap+da AHhU~M gi bar gyis brlab d+harmA ra Ni tas byin dbab/__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/shes rab snying brtse dang bcas pa'i/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/__/zhes skyabs sems sngon du 'gro bas/__rang gi snying gar sogs nas/__steng gi cha la bzhugs pa oM badz+ra sa mA dzaHsa tshogs zhing spyan drang /__yid kyis sprul pa'i mchod pa dpag tu med par sprul la dngos su/__oM badz+ra puSh+pe AHhU~M nas/__nai wi d+ya AHhU~M gi bar nyer spyod lngas mchod/__pad+ma ka ma lA ya stAM gyis gdan phul/__de'i spyan sngar/__dkon mchog gsum la bdag skyabs mchi sogs lan gsum gyis rgyun bshags dang /__sems can thams cad bde ba dang sogs tshad med bzhi bsgom/__oM swa b+hA wa sogs nas bzlas pa bsdu ba'i bar bdag bskyed 'jam mgon sa skya paN+Di ta'i gsung rab ltar bya/__mdun gyi tshom bu bsang sbyang /__stong pa'i ngang las pa~M las pad+ma sogs nas/__don yod grub pas dbur brgyan zhes pa'i bar bdag bskyed ltar la/__bdag nyid ces pa'i tshig dor/__khyod kyis 'di la dbang bskur du gsol zhes kha bsgyur ba tsam khyad par ro/__/de nas mchod pa bsang sbyang byin gyis brlabs la/__oM AR+YA tA rA sa pa ri wA ra oM badz+ra puSh+pe AHhU~M sogs nyer spyod rol mor bcas pas mchod/__phyag 'tshal nyer gcig gam/__lha dang lha min cod pan gyis/__/zhes sogs rgyas bsdus gang rung gis bstod/__gtor ma bsang sbyang /__oM AHhU~M gis brlabs la mtshan sngags kyi mthar a kA ro btags pas phul/__mchod cing bstod/__'phags ma sgrol ma 'khor bcas rnams/__/mchod sbyin gtor ma 'di bzhes la/__/zhes sogs kyis 'dod don gsol/__mdun bskyed la dmigs pa'i bzlas pa cung zad bya/__bum pa bsang sbyang /__stong pa'i ngang las 'o ma can gyi bdud rtsi'i rgya mtsho dkar zhing dwangs la yan lag brgyad dang ldan par 'khyil pa'i dbus su pa~M las pad+ma sogs nas/__yon tan ma lus pa phul du byung ba'i skur gyur ces pa'i bar mdun bskyed ltar gsal gdab/__gzungs thag nas bzung ste/__thugs kar zla ba'i steng du tA~M ljang gu la sngags kyis bskor ba las 'od zer 'phros/__'phags pa rnams kyi thugs ka nas ye shes kyi bdud rtsi bkug pa dang /__sku las kyang bdud rtsi dang sngags kyi yig 'bru'i tshogs dpag tu med pa byung bas bdud rtsi'i rgya mtsho dang ro gcig tu 'dres par gyur pa'i mos pas bzlas pa ci nus mthar/__mchod cing bstod/__oM A hU~M gis mchod yon phul bas/__sgrol ma sngags kyi yig 'bru dang bcas pa 'od du zhu/__dag pa ye shes kyi chur gyur par bsam pa ni slob dpon gyi bya ba'o/__/de nas slob ma rnams khrus byas gral du 'khod pa la/__me tog bkye bsdu byas/__sems bskyed gsal gdab pa sogs chos bshad rgyas bsdus ci rigs pas mtshams sbyar te/__de la 'dir 'phags pa 'jam dpal gyi rtsa ba'i rgyud las/__byang chub sems ma rdzu 'phrul che/__/sems can rnams ni 'dul byed pa/__/lha mo sgrol ma zhes su bstan/__/'di ni 'bad med 'grub pa ste/__/srung dang skyob dang sba bar byed/__/longs spyod dbang phyug 'phel byed pas/__/'dir ni lha mo bsgrub par bya/___/zhes sogs rdo rje theg pa'i sngags rgyud rgya mtsho nas phrin las mtha' dag 'bad pa med par sgrub pa la mchog tu gsungs shing ches cher bsngags pa'i 'phags ma sgrol ma'i rgyud dang /__sgrub thabs dang /__man ngag gi tshogs mtha' yas pa zhig snang ba las khyad par du gyur pa 'di ni ji skad du/__gang la rgyal ba'i yum des rjes bzung ba/__/sdom brtson dam pa shAkya dpal gyi gsung /__/'gro la phan phyir kun dga' rgyal mtshan dpal/__/bzang pos tshig gi sdeb sbyor spangs te bris/__/zhes gsungs pa ltar/__rje btsun sgrol mas mngon sum du rjes su bzung zhing /__zab pa dang rgya che ba'i gdams pa'i bdud rtsi gnang ba ma byon sangs rgyas rab gsal gyi rnam par 'phrul pa kha che'i paN+Di ta chen po shAkya shrI b+ha dra'i thugs dam/__'jam mgon sa skya paN+Di tas yi ger bkod pa'i sgrub thabs la brten nas khro phu lo tsA ba gnubs byams pa'i dpal gyi phyag gzhes ltar rjes su gnang ba zab mo bsgrub pa la/__slob dpon gyi bya ba grub nas khyed rang rnams kyi ngo skal du gyur pa thog mar rjes gnang zhu ba'i yon du maN+Dal phul/__gsol ba 'debs pa 'di'i rjes zlos mdzod/__rdo rje 'dzin pa dgongs su gsol/__/bdag ni 'gro la phan don du/__/gtso chen khyed la gsol 'debs kyi/__/ma lus rjes gnang stsal du gsol/__/lan gsum/__mdun bskyed kyi lha dang sangs rgyas byang sems rnams kyi drung du skyabs su 'gro zhing sems bskyed par bgyi'o snyam pas 'di'i rjes zlos mdzod/__'gro rnams bsgral 'dod sogs skyabs sems lan gsum/__khyad par rje btsun sgrol ma'i rjes gnang stsal du gsol snyam pa'i 'dun pas 'di'i rjes zlos mdzod/__slob dpon dgongs su gsol/__bdag la 'phags ma sgrol ma'i rjes su gnang ba ma lus pa stsal du gsol/__lan gsum/__rjes gnang gi gzhi dgod pa'i slad du/__swa b+hA wa dang /__shUn+ya tA sogs/__phyi nang gi chos thams cad stong pa nyid du gyur/__stong pa'i ngang las pa~M las pad+ma sogs nas/__tshur 'dus pa las khyed rang rnams rje btsun sgrol ma sogs nas/__phul du byung ba'i skur gyur pa'i thugs kar rang 'dra ba'i ye shes sems dpa' tshon gang ba/__de'i thugs kar ting nge 'dzin sems dpa'i ngo bo zla ba'i dkyil 'khor gyi steng du tA~M ljang gu 'od zer dang bcas pa rnams gsal lam ste gyur pa'i mos pa mdzod/__/rjes gnang dngos la/__thog mar sku'i rjes gnang gi slad du slob dpon la rje btsun sgrol ma dngos yin snyam pa'i gus 'dud byas pas slob dpon gyi thugs ka nas 'od zer 'phros/__mdun bskyed kyi lha'i thugs rgyud bskul/__de'i thugs ka nas 'od zer 'phros/__phyogs bcu'i sangs rgyas dang byang sems thams cad kyi thugs rgyud bskul bas/__slob dpon dang mdun bskyed kyi lha dang /__/phyogs bcu'i sangs rgyas byang sems thams cad kyi thugs ka nas rje btsun ma'i tshogs dpag tu med pa byon nas khyed rang rnams la sib sib thim pas rgyud byin gyis brlabs pa'i mos pa mdzod/__sngags mthar dzaHhU~M ba~M hoHbrjod cing spos rol bya/__slar yang khyed rang rnams kyi spyi bor oM dkar po/__mgrin par AHdmar po/__snying gar hU~M sngon po rnams kyis mtshan par gyur/__slob dpon gyi thugs ka'i sa bon las 'od zer 'phros pas dbang bskur gyi lha de bzhin gshegs pa'i tshogs bsam gyis mi khyab pa mdun gyi nam mkhar oM badz+ra sa mA dzaH__oM badz+ra puSh+pe AHhU~M sogs kyis mchod/__khyed rnams kyis 'di la dbang bskur du gsol/__zhes gsol ba btab pas de bzhin gshegs pa rnams kyis rin po che'i bum pa bdud rtsi'i chu rgyun gyis gang bas dbang bskur ba'i mos pa mdzod/__bum pa spyi bor bzhag cing bum chu sbyin la/__oM sarba ta thA ga ta a b+hi She ka te sa ma ya shri ye hU~M/__zhes gsung zhing bum pa'i chus dbang bskur bas lus ngag yid gsum gyi dri ma dag__/chu'i lhag ma yar lud pa las don yod grub pas dbur brgyan pa'i mos pa mdzod/__/gsung gi rjes gnang gi slad du/__slob dpon gyi thugs kar zla ba'i steng du tA~M ljang gu/__de las sngags phreng byung ba zhal nas thon/__khyed rang rnams kyi zhal du zhugs/__snying ga'i tA~M la thim/__de'i dus su phyogs bcu'i sangs rgyas dang byang chub sems dpa' rnams kyi mkhyen brtse nus mthu thams cad 'od zer kyi rnam par sngags phreng dang lhan cig zhal du zhugs/__snying ga'i sa bon la thim pa'i mos pa dang bcas sngags 'di'i rjes zlos lan gsum mdzod/__yi ge bcu pa bzlar gzhug__/de ltar bzlas pas dang pos byin gyis brlabs/__gnyis pas dbyer med du 'dres/__gsum pas brtan par byas pa'i mos pa dang bcas slob dpon la me tog 'thor bzhin pas 'di'i rjes zlos mdzod/__bcom ldan bdag gis sogs gsum/__de ltar phul ba'i me tog de nyid slar yang byin gyis brlabs te khyed rang gi spyi bor phul ba'i mos pa mdzod/__bcom ldan 'di la sogs/__thugs kyi rjes gnang gi slad du/__mdun bskyed kyi lha la mos gus dung dung pa dang /__bdag gi rgyud byin gyis brlab tu gsol snyam pa mdzad pas/__mdun gyi lha'i thugs ka nas phyag mtshan ut+pal sngon po'i tshogs dpag tu med pa rgyangs te byon/__khyed rang rnams kyi snying ga'i sa bon dang dbyer med du 'dres/__de la sems zhugs pa bzhin cher gyis gtad pas/__snying ga'i tA~M las 'od 'phros te snod bcud kyis bsdus pa thams cad la phog__/de dag thams cad rje btsun ma sgrol ma'i skur gyur bar mos la/__de bzhin du dmigs te 'od zer spro bsdu yang nas yang du bya zhing /__mthar de dag thams cad kyang rang bzhin med pa rmi lam gyi tshul du bsgom ste/__snang stong sgyu ma lta bu'i ngang du cung zad re mnyam par 'jog par zhu/__zhes brjod/__rjes dam tshig khas blang sogs spyi ltar byas la slob ma rnams rang gnas su gyes/__slob dpon gyis mchod pa bsang sbyang byin rlabs/__mchod bstod nongs bshags/__gshegs gsol/__bsngo smon bkra shis sogs spyi ltar bya'o/__/shAkya shrI'i man ngag gi/__/'phags ma'i rjes su gnang ba'i tshul/__/bdud rtsi'i snye mas yid can kun/__/srid zhi'i gdung ba 'jil gyur cig__/ces pa'ang 'jam mgon sa skya paN+Dita'i gsung rab rin po che'i zhabs 'degs su dmigs te bya bral ba 'jam dbyangs mkhyen brtse'i dbang pos nyung gsal bklag pas grub par bris pa su shre yan+tu//___//__!