JKW-KABAB-13-PA-022

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 13, Text 22, Pages (Folios to )
Author	འཇམ་མགོན་ཀོང་སྤྲུལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 13: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Lineage Supplications - brgyud 'debs
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma dkar mo, sgrol ma yid bzhin 'khor lo
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHI-015

Tibetan Text

Wylie

[edit]

དྷཱི༔ འཆི་མེད་འཕགས་མའི་སྙིང་ཐིག་ལས༔ ཡང་ཟབ་ཚེ་ཡི་བྱིན་རླབས་བཞུགས༔ འཆི་མེད་ཡིད་བཞིན་འཁོར་ལོར་འདུད༔ ཡང་ཟབ་ཚེ་ཡི་བྱིན་རླབས་ནི༔ དབེན་པའི་གནས་སུ་བཀྲ་ཤིས་དུས༔ དཀྱིལ་འཁོར་མཚན་ཉིད་ཡོངས་རྫོགས་དབུས༔ ཐོད་པ་བདུད་རྩི་རིལ་བུས་གཏམས༔ གཡས་སུ་བུམ་པ་བཅུད་ལྡན་དང་༔ གཡོན་དུ་ཚེ་ཡི་འབྲང་རྒྱས་དང་༔ མཐའ་སྐོར་སྨན་གཏོར་རཀྟ་དང་༔ ཉེར་སྤྱོད་ཚོགས་ཀྱི་མཆོད་པ་བཤམ༔ བསྙེན་རྫོགས་ནུས་ལྡན་སློབ་དཔོན་གྱིས༔ བདག་མདུན་དབྱེར་མེད་ལས་གཞུང་བསྲང་༔ ཛབ྄་ཁང་དབྱེ་ཞིང་ཁྱད་པར་དུ༔ རང་བྱུང་བྷནྡྷའི་གཞལ་ཡས་དབུས༔ དཀྱིལ་འཁོར་ཡོངས་རྫོགས་ལྷ་རྣམས་དང་༔ བུམ་པར་བཅོམ་ལྡན་ཚེ་དཔག་མེད༔ གཏོར་མ་རྣམ་པར་རྒྱལ་མར་བསྐྱེད༔ བཟླས་པ་བྱ་ཞིང་ཐུགས་དམ་བསྐུལ༔ ཚོགས་མཆོད་བདག་ཉིད་ནུས་ལྡན་བྱ༔ དེ་ནས་ངེས་པར་སྣོད་རུང་བའི༔ སློབ་མ་ཁྲུས་བྱས་འགེགས་ཚོགས་བསྐྲད༔ མཚམས་བཅད་གསོལ་བ་གདབ་པ་ནི༔ འཆི་མེད་འཕགས་མའི་ཡེ་ཤེས་སྐུ༔ སྒྱུ་འཕྲུལ་དྲྭ་བའི་ཚུལ་སྟོན་པ༔ ཐུགས་རྗེའི་གཏེར་ཆེན་སློབ་དཔོན་གྱིས༔ བདག་ལ་བྱིན་གྱིས་བརླབ་ཏུ་གསོལ༔ སྐྱབས་སེམས་ཚོགས་བསག་ལྷར་བསྐྱེད་ལ༔ ཡེ་ཤེས་དབབ་བསྟིམ་ནན་ཏན་བྱ༔ དེ་ནས་བུམ་པ་སྤྱི་བོར་བསྐུར༔ ཧྲཱི༔ བཀྲ་ཤིས་བུམ་པའི་གཞལ་ཡས་ན༔ འཆི་མེད་མགོན་པོ་ཞུ་བའི་བཅུད༔ ཡེ་ཤེས་བདུད་རྩིའི་ཆུ་རྒྱུན་གྱིས༔ རིག་འཛིན་ཚེ་ཡི་དབང་བསྐུར་རོ༔ ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔ ཀ་ལ་ཤ་ཨ་བྷི་ཥིཉྩ་ཨོཾ་ཧཱུྃ་ཏྲཱྃ་ཧྲཱིཿཨཿ སརྦ་ཏ་ཐཱ་ག་ཏ་ས་མ་ཡ་ཤྲི་ཡེ་ཧཱུྃ༔ བདུད་རྩིས་ལུས་གང་སྒྲིབ་པ་དག༔ འོད་དཔག་མེད་པས་དབུར་བརྒྱན་ཅིང་༔ དྭངས་མ་སྙིང་དབུས་འདུས་པ་ལས༔ ཡེ་ཤེས་སེམས་དཔའ་ཚེ་མཐའ་ཡས༔ དཀར་གསལ་གཟི་བརྗིད་འབར་བར་བསམ༔ དེ་ནས་བྷནྡྷ་སྤྱི་བོར་བཞག༔ ཨོཾ༔ རང་བྱུང་བྷནྡྷའི་སྣོད་མཆོག་ཏུ༔ ཡིད་བཞིན་འཁོར་ལོའི་ལྷ་ཚོགས་བཞུགས༔ སྙོམས་འཇུག་བྱང་སེམས་བདུད་རྩི་ཡིས༔ ཡེ་ཤེས་སྐུ་རུ་དབང་བསྐུར་རོ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཛྙཱ་ན་ཀཱ་ཡ་ཨ་བྷི་ཥིཉྩ་ཨོཾ༔ ཐོད་པའི་ལྷ་ཚོགས་རང་འོད་ཀྱྀ༔ ཡབ་དང་སྙོམས་ཞུགས་བདུད་རྩི་ནི༔ ཚངས་པའི་བུ་ག་ནས་བརྒྱུད་དེ༔ ལུས་གང་རྩ་ཡི་སྒྲིབ་པ་དག༔ ཡེ་ཤེས་སྐུ་རུ་མངོན་སྣང་བསམ༔ ལྷ་ཚོགས་འོད་ཞུའི་བདུད་རྩི་སྦྱིན༔ ཨཱཿ རིག་རྩལ་སྤྲུལ་པའི་དཀྱིལ་འཁོར་ལྷ༔ འོད་གསལ་དབྱིངས་སུ་ཞུ་བའི་རྒྱུན༔ བྱང་ཆུབ་སེམས་ཀྱི་བདུད་རྩི་ཡིས༔ བདེ་བ་ཆེན་པོར་དབང་བསྐུར་རོ༔ མ་ཧཱ་སུ་ཁ་བོ་དྷི་ཙིཏྟ་ཝ་ཀ་ཨ་བྷི་ཥིཉྩ་ཨཱཿ བདུད་རྩིས་ལུས་གང་དབུ་མར་ཞུགས༔ ཡེ་ཤེས་སེམས་དཔའི་ཐུགས་དབུས་སུ༔ ཉི་ཟླའི་གའུ་ཁ་སྦྱོར་གྱུར༔ རླུང་གི་སྒྲིབ་དག་མི་ཤིགས་པའི༔ གཞོམ་མེད་རྡོ་རྗེའི་དབྱངས་སུ་བསམ༔ བདུད་རྩིའི་དྭང་བཅུད་རིལ་བུ་ནི༔ སྙིང་དབུས་ཉིད་དུ་བསྟིམ་ཕྱིར་སྦྱིན༔ ཧཱུྃ༔ འཁོར་འདས་དྭང་བཅུད་ཐམས་ཅད་ཀུན༔ ཐིག་ལེ་ཆེན་པོའི་ཀློང་དུ་རྫོགས༔ ལྷན་ཅིག་སྐྱེས་པའི་བདུད་རྩི་ཡིས༔ འཆི་མེད་རྟག་པའི་དབང་བསྐུར་རོ༔ མ་ཧཱ་ཛྙཱ་ན་ཙིཏྟ་ཨ་བྷི་ཥིཉྩ་ཧཱུྃ༔ རྡོ་རྗེ་ལྕེ་ཡི་ལམ་བརྒྱུད་དེ༔ ཉི་ཟླའི་གའུའི་དབུས་སུ་ཞུགས༔ རླུང་རིག་སེམས་གསུམ་དབྱེར་མེད་པའི༔ ཐིག་ལེ་དཀར་འཚེར་འོད་འབར་གྱུར༔ ཕྱི་རོལ་འོད་ལྔའི་དྲྭ་བས་བསྡམས༔ འཕོ་འགྱུར་མེད་པར་རྒྱས་བཏབ་པས༔ ཁམས་ཀྱི་སྒྲིབ་དག་འགྱུར་མེད་ཐུགས༔ འོད་གསལ་གཉུག་མ་མངོན་གྱུར་བསམ༔ བསལ་བཞག་བྲལ་བའི་ངང་དུ་ཀློད༔ མཐའ་རྟེན་ཚེ་འབྲང་སྤྱི་བོར་བཞག༔ བྷྲཱུྃ༔ འཆི་བདག་བདུད་ལས་རྣམ་རྒྱལ་མ༔ གཙུག་ཏོར་ཆེན་པོའི་ཡེ་ཤེས་ཀྱིས༔ རྟག་ཏུ་བྱིན་གྱིས་བརླབས་པ་ལས༔ བཀྲ་ཤིས་ཚེ་ཡི་དཔལ་ཐོབ་ཤོག༔ ཨོཾ་ཨ་མྲྀ་ཏ་ཨཱ་ཡུརྡ་དེ་སྭཱ་ཧཱ༔ བྷྲཱུྃ་བྷྲཱུྃ་བྷྲཱུྃ༔ གཏོར་མའི་ལྷ་ཉིད་འོད་དུ་ཞུ༔ རྡོ་རྗེའི་གོ་ཁྲབ་རྣམ་པ་ཡིས༔ བ་སྤུའི་ཁུང་བུ་ཀུན་ཏུ་གཏམས༔ མི་ཕྱེད་རྡོ་རྗེའི་སྲོག་འགྲུབ་ཅིང་༔ དེ་ལས་འོད་ཀྱྀ་སྣང་བའི་རྩེར༔ འཕགས་མ་རྣམ་པར་རྒྱལ་མའི་སྐུ༔ གྲངས་མེད་ཕྱོགས་བཅུ་ཀུན་ཏུ་འཕྲོས༔ བཀྲ་ཤིས་རྡོ་རྗེའི་གླུ་ལེན་བཞིན༔ མེ་ཏོག་ཆར་ཆེན་ཕབ་པ་ཡིས༔ ཚེ་ཡི་དགའ་སྟོན་གོང་འཕེལ་བསམ༔ ཤིས་པ་བརྗོད་ཅིང་མེ་ཏོག་འཐོར༔ ཤིན་ཏུ་ཡང་ཟབ་གསང་བའི་བཅུད༔ འཆི་མེད་ཚེ་ཡི་བྱིན་རླབས་འདི༔ གཙུག་ཏོར་རྣམ་པར་རྒྱལ་མ་ཡིས༔ རྗེས་བཟུང་ཤྲི་སིཾ་ཧ་དང་༔ འཕགས་མ་སྒྲོལ་མས་དབུགས་ཕྱུང་བའི༔ འོད་གསལ་ཆེན་པོ་བི་མ་ལ༔ ཚེ་དཔག་མེད་མགོན་ཡབ་ཡུམ་གྱིས༔ མངོན་སུམ་ཉིད་དུ་དབང་བསྐུར་བ༔ བདག་ཉིད་པདྨ་འབྱུང་གནས་ཏེ༔ གྲུབ་པའི་སློབ་དཔོན་རྣམ་གསུམ་གྱི༔ དགོངས་ཉམས་གཅིག་ཏུ་དྲིལ་བྱས་ཏེ༔ ད་ལྟའི་མངའ་བདག་རྗེ་འབངས་དང་༔ མ་འོངས་ལས་ཅན་དོན་དུ་བསྟན༔ ཚུལ་བཞིན་དབང་ཐོབ་ཉམས་བླངས་པས༔ བདེ་ཆེན་ཡེ་ཤེས་སྐུ་འགྲུབ་ན༔ གནས་སྐབས་བར་ཆད་སེལ་བ་དང་༔ ཚེ་དཔལ་འཕེལ་བ་སྨོས་ཅི་དགོས༔ ཚེ་ཟད་པ་ཡང་ངེས་པར་བསྲིང་༔ ཚངས་པའི་ཚེ་དང་ལྡན་པར་འགྱུར༔ དེ་ཕྱིར་ཤིན་ཏུ་གསང་བའི་ལམ༔ སྙིང་གི་དབུས་སུ་གཅེས་པར་ཟུངས༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ བརྡ་ཐིམ༔

[edit]

d+hI:__'chi med 'phags ma'i snying thig las:__yang zab tshe yi byin rlabs bzhugs:__'chi med yid bzhin 'khor lor 'dud:__yang zab tshe yi byin rlabs ni:__dben pa'i gnas su bkra shis dus:__dkyil 'khor mtshan nyid yongs rdzogs dbus:__thod pa bdud rtsi ril bus gtams:__g.yas su bum pa bcud ldan dang :__g.yon du tshe yi 'brang rgyas dang :__mtha' skor sman gtor rak+ta dang :__nyer spyod tshogs kyi mchod pa bsham:__bsnyen rdzogs nus ldan slob dpon gyis:__bdag mdun dbyer med las gzhung bsrang :__dzaba? khang dbye zhing khyad par du:__rang byung b+han+d+ha'i gzhal yas dbus:__dkyil 'khor yongs rdzogs lha rnams dang :__bum par bcom ldan tshe dpag med:__gtor ma rnam par rgyal mar bskyed:__bzlas pa bya zhing thugs dam bskul:__tshogs mchod bdag nyid nus ldan bya:__de nas nges par snod rung ba'i:__slob ma khrus byas 'gegs tshogs bskrad:__mtshams bcad gsol ba gdab pa ni:__'chi med 'phags ma'i ye shes sku:__sgyu 'phrul drwa ba'i tshul ston pa:__thugs rje'i gter chen slob dpon gyis:__bdag la byin gyis brlab tu gsol:__skyabs sems tshogs bsag lhar bskyed la:__ye shes dbab bstim nan tan bya:__de nas bum pa spyi bor bskur:__hrI:__bkra shis bum pa'i gzhal yas na:__'chi med mgon po zhu ba'i bcud:__ye shes bdud rtsi'i chu rgyun gyis:__rig 'dzin tshe yi dbang bskur ro:__oM a mA ra Ni dzI ban+ti ye swA hA:__ka la sha a b+hi Shiny+tsa oM hU~M trA~M hrIHaH__sarba ta thA ga ta sa ma ya shri ye hU~M:__bdud rtsis lus gang sgrib pa dag:__'od dpag med pas dbur brgyan cing :__dwangs ma snying dbus 'dus pa las:__ye shes sems dpa' tshe mtha' yas:__dkar gsal gzi brjid 'bar bar bsam:__de nas b+han+d+ha spyi bor bzhag:__oM:__rang byung b+han+d+ha'i snod mchog tu:__yid bzhin 'khor lo'i lha tshogs bzhugs:__snyoms 'jug byang sems bdud rtsi yis:__ye shes sku ru dbang bskur ro:__oM tA re tut+tA re tu re swA hA:__dz+nyA na kA ya a b+hi Shiny+tsa oM:__thod pa'i lha tshogs rang 'od ky-i:__yab dang snyoms zhugs bdud rtsi ni:__tshangs pa'i bu ga nas brgyud de:__lus gang rtsa yi sgrib pa dag:__ye shes sku ru mngon snang bsam:__lha tshogs 'od zhu'i bdud rtsi sbyin:__AH__rig rtsal sprul pa'i dkyil 'khor lha:__'od gsal dbyings su zhu ba'i rgyun:__byang chub sems kyi bdud rtsi yis:__bde ba chen por dbang bskur ro:__ma hA su kha bo d+hi tsit+ta wa ka a b+hi Shiny+tsa AH__bdud rtsis lus gang dbu mar zhugs:__ye shes sems dpa'i thugs dbus su:__nyi zla'i ga'u kha sbyor gyur:__rlung gi sgrib dag mi shigs pa'i:__gzhom med rdo rje'i dbyangs su bsam:__bdud rtsi'i dwang bcud ril bu ni:__snying dbus nyid du bstim phyir sbyin:__hU~M:__'khor 'das dwang bcud thams cad kun:__thig le chen po'i klong du rdzogs:__lhan cig skyes pa'i bdud rtsi yis:__'chi med rtag pa'i dbang bskur ro:__ma hA dz+nyA na tsit+ta a b+hi Shiny+tsa hU~M:__rdo rje lce yi lam brgyud de:__nyi zla'i ga'u'i dbus su zhugs:__rlung rig sems gsum dbyer med pa'i:__thig le dkar 'tsher 'od 'bar gyur:__phyi rol 'od lnga'i drwa bas bsdams:__'pho 'gyur med par rgyas btab pas:__khams kyi sgrib dag 'gyur med thugs:__'od gsal gnyug ma mngon gyur bsam:__bsal bzhag bral ba'i ngang du klod:__mtha' rten tshe 'brang spyi bor bzhag:__b+h+rU~M:__'chi bdag bdud las rnam rgyal ma:__gtsug tor chen po'i ye shes kyis:__rtag tu byin gyis brlabs pa las:__bkra shis tshe yi dpal thob shog:__oM a mr-i ta A yurda de swA hA:__b+h+rU~M b+h+rU~M b+h+rU~M:__gtor ma'i lha nyid 'od du zhu:__rdo rje'i go khrab rnam pa yis:__ba spu'i khung bu kun tu gtams:__mi phyed rdo rje'i srog 'grub cing :__de las 'od ky-i snang ba'i rtser:__'phags ma rnam par rgyal ma'i sku:__grangs med phyogs bcu kun tu 'phros:__bkra shis rdo rje'i glu len bzhin:__me tog char chen phab pa yis:__tshe yi dga' ston gong 'phel bsam:__shis pa brjod cing me tog 'thor:__shin tu yang zab gsang ba'i bcud:__'chi med tshe yi byin rlabs 'di:__gtsug tor rnam par rgyal ma yis:__rjes bzung shri siM ha dang :__'phags ma sgrol mas dbugs phyung ba'i:__'od gsal chen po bi ma la:__tshe dpag med mgon yab yum gyis:__mngon sum nyid du dbang bskur ba:__bdag nyid pad+ma 'byung gnas te:__grub pa'i slob dpon rnam gsum gyi:__dgongs nyams gcig tu dril byas te:__da lta'i mnga' bdag rje 'bangs dang :__ma 'ongs las can don du bstan:__tshul bzhin dbang thob nyams blangs pas:__bde chen ye shes sku 'grub na:__gnas skabs bar chad sel ba dang :__tshe dpal 'phel ba smos ci dgos:__tshe zad pa yang nges par bsring :__tshangs pa'i tshe dang ldan par 'gyur:__de phyir shin tu gsang ba'i lam:__snying gi dbus su gces par zungs:__sa ma ya:__rgya rgya rgya:__gu h+ya:__brda thim: