JKW-KABAB-09-TA-018

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 9, Text 18, Pages (Folios to )
Author	འཇམ་མགོན་ཀོང་སྤྲུལ་
Less details More details
Tertön	བལ་པོ་ཨ་ཧཱུྃ་འབར་, འཇམ་དབྱངས་མཁྱེན་བརྩེའི་དབང་པོ་ (bal po a hU~M 'bar, 'jam dbyangs mkhyen brtse'i dbang po)
Citation	'jam mgon kong sprul. . In Rdzong sar 'jam dbyangs mkhyen brtse'i dbang po'i bka' babs, Vol. 9: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Wealth Rituals - nor sgrub
Deity	dzam nag
Karchag page	JKW-KABAB-Volume-09-TA-Karchag

Tibetan Text

Wylie

[edit]

༄༅། །རྡོ་རྗེའི་ནོར་ལྷ་ཡཀྵ་ཛམྦྷ་ལ་ཆེན་པོའི་སྲོག་དབང་བསྐུར་བའི་ཆོ་ག་རིན་ཆེན་ཆུ་འཛིན་ཅེས་བྱ་བ་བཞུགས་སོ།། ན་མོ་གུ་རུ་ཡཀྵ་ཛམྦྷཱ་ལཱ་ཡ། མི་བསྐྱོད་རིགས་བརྒྱའི་ཁྱབ་བདག་གནོད་སྦྱིན་གྱི། །སྡེ་དཔོན་ཚུལ་འཛིན་རྡོ་རྗེ་ཁྲོ་བོ་ཆེས། །བྱིན་གྱིས་རློབས་མཛོད་ཟབ་མོ་སྲོག་གི་དབང༌། །སྐལ་བཟང་དོན་གཉིས་སྒྲུབ་པའི་དཔལ་དུ་སྦྱིན། །ཡཀྵ་ཀཱ་ལའི་བསྙེན་སྒྲུབ་ལས་གསུམ་གྱི་སྣོད་དུ་རུང་ཞིང་ནུས་པ་ཐོབ་པར་བྱེད་པ་ཟབ་མོ་སྲོག་གི་དབང་བསྐུར་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་གཤོམ་བཀོད་ནི། སྟེགས་བུའི་སྟེང་རས་བྲིས་ཀྱི་དཀྱིལ་འཁོར་ཡོད་ན་བཀྲམ། མེད་ན་འབྲུ་དཀར་གྱི་ཚོམ་བུ་ལྷ་གྲངས་བཀོད་པའི་དབུས་སུ་ཐོད་པ་སྐུ་རྟེན་སྲོག་འཁོར་རྣམས་བཀོད། དེ་སྟེང་འཕྲུལ་སྟེགས་ལ་ལྷ་བུམ་ཉེར་ལྔའི་བཅུད་ལྡན་མགུལ་ཆིངས་སྔོན་པོ་ཁ་རྒྱན་ཅན་བཤམ། གཡས་སུ་རྟེན་གཏོར། རྒྱབ་ཏུ་མདའ་དར། གཡོན་དུ་གཡང་རྫས། མདུན་ཏུ་ཚེ་འབྲང་ཚེ་རིལ་ཚེ་ཆང་དང་བཅས་པ། བཀྲ་ཤིས་རྫས་རྟགས་རྒྱལ་སྲིད་རྣམས་ཀྱི་ཙཀླི། ཕྱི་མཆོད། གཏོར་འབུལ། ཚོགས་ཆས་སོགས་ཕྲིན་ལས་ཀྱི་གཤམ་བཀོད་དུ་གསལ་བ་ལྟར་ཚོགས་པར་བྱའོ། །གཉིས་པ་ལ། ཐོག་མར་སྒྲུབ་མཆོད་ནི། ལས་བྱང་ལྟར་བརྒྱུད་འདེབས་ནས་བརྩམ། སྔོན་འགྲོ་རྣམས་བཏང༌། དངོས་གཞི་བདག་བསྐྱེད་བཟླས་པ་བཅས་གྲུབ་པ་དང༌། བུམ་སྒྲུབ་ནི། བུམ་པ་རང་བྱུང་ཕོ་བྲང་དབུས༔ པད་ཉི་དྲེགས་པའི་གདན་གྱི་སྟེང་༔ སོགས་བདག་བསྐྱེད་ལྟར་ལ། ཡེ་ཤེས་མེ་ཕུང་ཀློང་དུ་འགྱིང་༔ དམ་ཚིག་ཡེ་ཤེས་དབྱེར་མེད་པའི༔ སོགས་ནས། བྱིན་རླབས་ནུས་སྟོབས་བསྡུས་ཏེ་ཐིམ༔ སྐུ་ལས་རྡོ་རྗེ་བདུད་རྩིའི་རྒྱུན༔ བབས་པས་བུམ་པ་གང་བར་གྱུར༔ ཅེས་དམིགས་པ་བསྙེན་སྔགས་ཅི་འགྲུབ་བཟླས་པའི་མཐར། ལྷ་འོད་དུ་ཞུ་སྟེ་བུམ་པའི་ཆུ་དང་རོ་གཅིག་ཏུ་གྱུར། ཅེས་མོས། དེ་ནས་མདུན་བསྐྱེད་བཏང༌། བསྙེན་སྒྲུབ་བཟླས་པ་ཅི་འགྲུབ་མཐར་མཆོད་བསྟོད་འབུལ། ཐུན་མཚམས་བྱ་བ་གསུམ་ཀ་མ་ལྕོགས་ན་གཏོར་འབུལ་དང་ཚོགས་མཆོད་གང་རུང་གིས་འཐུས། ཐུགས་དམ་བསྐུལ། ལས་བུམ་དུ་བདུད་རྩི་འཁྱིལ་པ་བསྐྱེད་བཟླས་བྱ། སློབ་མ་གཞུག་པའི་གནང་བ་ནོད་དོ། །དེ་ནས་དབང་དངོས་ལ་ཕྱི་རོལ་དུ་སློབ་མ་ཁྲུས་ནས་དབྱུང༌། བགེགས་གཏོར་བཏང་ལ་བཀའ་བསྒོ་ཞིང་མཚམས་བཅད། གྲལ་ལ་འཁོད་ཅིང་མེ་ཏོག་བཀྱེ་བསྡུ་དང་སེམས་བསྐྱེད་གསལ་གདབ། ཆོས་བཤད་ཁྱད་པར། དེའང་སེམས་ཅན་གང་ཞིག་སྔོན་བསགས་བསོད་ནམས་ཀྱི་སྟོབས་དམན་པས་ཟས་གོས་ནོར་གྱི་འབྱོར་པས་ཕོངས་ཤིང་དབུལ་བའི་སྡུག་བསྔལ་གྱིས་ཉམ་ཐག་པ་རྣམས་ཀྱི་དོན་དུ་རིགས་ལྔའི་རྒྱལ་བ་རྣམས་ཀྱི་ཐུགས་ལས་སར་གནས་སེམས་དཔའ་གནོད་སྦྱིན་གྱི་སྡེ་དཔོན་ཆེན་པོའི་ཚུལ་དུ་སྤྲུལ་པ་མགོན་པོ་ཛམྦྷ་ལའི་མཚན་དང་སྙིང་པོ་ཐོས་ཤིང་བཟུང་བ་ཙམ་ཡང་སྐྱེ་བ་ཀུན་ཏུ་དབུལ་ཕོངས་ཀྱི་སྡུག་བསྔལ་ལས་གྲོལ་ཞིང་ལོངས་སྤྱོད་མི་ཟད་པའི་གཏེར་དང་འཕྲད་ནས་སྤྱིན་པའི་ཕར་ཕྱིན་རྫོགས་པར་འགྱུར་བ་སོགས་ཡོན་ཏན་བསམ་གྱིས་མི་ཁྱབ་པ་རྫོགས་པའི་སངས་རྒྱས་ཀྱི་ཞལ་ནས་ལེགས་པར་གསུངས་པ་འདི་ལ་རིགས་དང་མཚན་གྱི་བྱེ་བྲག་མང་དུ་མཆིས་པ་རྣམས་ཀྱི་ནང་ནས། མི་བསྐྱོད་པ་རྡོ་རྗེའི་རིགས་ཀྱི་ཁྲོ་བོ་ཆེན་པོ་ཡཀྵ་ཛམ་བྷ་ལ་ནག་པོའི་གདམས་སྐོར་རྣམས་འཕགས་པའི་ཡུལ་དུ་ཚོང་དཔོན་གྱི་བུུ་དྷ་ན་སཾ་བྷོ་ལ་བཀའ་བབས། དེ་ནས་རིམ་པར་བརྒྱུད་པའི་གདམས་ངག་གསར་མའི་ཕྱོགས་སུ་ཁ་ཆེ་པཎ་ཆེན་ཤཱཀྱ་ཤྲཱིའི་ཞལ་སྔ་ནས་བརྒྱུད་པ་བར་མ་ཆད་པ་བྱུང་བ་དང༌། རྙིང་མའི་ཕྱོགས་སུ་སངས་རྒྱས་གཉིས་པ་པདྨཱ་ཀ་རས་དྷ་ན་སཾ་བྷོའི་གདམས་པ་རྣམས་རྒྱལ་པོ་གུ་རུ་དེ་བ་ལས་གསན་པའི་ཚུལ་མཛད་ཅིང༌། ཡཀྵ་རྩ་བའི་ཏནྟྲ་དང༌། རཏྣ་རྩལ་ཆེན་འདུས་པའི་རྒྱུད་ལེའུ་སུམ་བརྒྱ་བདུན་ཅུ་རྩ་བདུན་པའི་ཟབ་གསང་སྙིང་པོའི་ཡང་བཅུད་དུམ་བུར་ཕྱུང་བ་ཛམྦྷ་ལ་ནག་པོའི་སྒྲུབ་ཐབས་ཀྱི་མན་ངག་རིན་ཆེན་གཏེར་སྤུངས་ཞེས་བྱ་བ་ལག་ལེན་དམར་ཁྲིད་ཀྱི་ཚུལ་དུ་བསྡེབས་ནས། བོད་ཡུལ་གྱི་མངའ་བདག་རྗེ་བློན་རྣམས་ལ་ཐུགས་བརྩེ་བ་ཆེན་པོས་རྗེས་སུ་གདམས། སྙིགས་དུས་ཐ་མའི་གདུལ་བྱ་རྣམས་ཀྱི་དོན་ཏུ་ཡེ་ཤེས་དྷཱ་ཀི་མཚོ་རྒྱལ་གྱིས་དཔེ་རྒྱུད་འདྲ་མིན་གསུམ་དུ་བཀོད་ནས་གཏེར་གནས་སོ་སོར་རྒྱས་བཏབ་པ། མོན་ཆུ་མོ་ཕུག་གི་གཏེར་ཁ་མཆོག་དབྱངས་རྣམ་འཕྲུལ་དགེ་སློང་རྡོ་རྗེ་འཛིན་པ་ཚེ་བརྟན་རྒྱལ་མཚན་གྱིས་བཏོན། ལྷ་རི་བྲག་གི་གཏེར་ཁ་ལྷ་སྲས་མུ་ཏིག་དང་དམ་འཛིན་ཟུང་དུ་འཇུག་པའི་རྣམ་རོལ་གུ་རུ་ཇོ་བོ་ཚེ་དབང་དར་པོས་དྲངས། དུས་སྐབས་སོ་སོར་འགྲོ་དོན་ཅི་རིགས་པ་མཛད། སྔགས་འཆང་རྡོ་རྗེ་བདུད་འཇོམས་ཀྱི་སྤྲུལ་པ་བལ་པོ་ཨ་ཧཱུྃ་འབར་གྱིས་སྤ་གྲོ་ཅལ་གྱི་བྲག་དམར་པོའི་ནུབ་ཕྱོགས་མེ་ལྕེ་འཁྱིལ་བ་འདྲ་བ་ནས་མེ་ཕོ་འབྲུག་ལོ་སྟོན་ཟླ་ར་བའི་ཉ་ལ་སྤྱན་དྲངས་ནས་འགྲོ་དོན་རྒྱ་ཆེར་མཛད། བར་སྐབས་སུ་དར་རྒྱས་ཆེ་བ་བྱུང་ནའང་ཕྱིས་བརྒྱུད་པའི་ངེས་ཏིག་མེད་པ་དང་གཏེར་ཆོས་ཀྱང་ནུབ་པ་ལྟར་གྱུར་པའི་སྐབས། རབ་ཚེས་ལྕགས་འབྲུག་ལོའི་ཆོ་འཕྲུལ་ཟླ་བར་གཏེར་འབྱིན་རྒྱ་མཚོའི་མཁོར་ལོས་སྒྱུར་བ་པདྨ་འོད་གསལ་མདོ་སྔགས་གླིང་པ་ལ་ཆོས་བདག་མཁའ་འགྲོས་སྲོག་འཁོར་མན་ངག་དང་བཅས་པའི་དཔེ་རྙིང་དངོས་སུ་ཕུལ་ཅིང་སྒྲུབ་ཐབས་ཀྱི་སྐོར་རྣམས་བྱིན་གྱིས་བརླབ་པའི་ཚུལ་དུ་སྩལ་བ་ལ་བརྟེན་ནས་གཏན་ལ་ཕབ་པའི་སྐབས་སུ་མནལ་ལམ་དམ་པའི་སྣང་བར། ཡུལ་ལྗོངས་ཤིན་ཏུ་ཉམས་དགའ་བ་ཞིག་གི་ཁ་སྟོད་རི་བོ་གླང་ཆེན་འགྱིང་བ་ལྟ་བུའི་གདོང་པའི་ཐད་ཙམ་དུ་རྗེ་ཉིད་ཕེབས་པས་རྒྱང་རིང་པོ་ནས་འོད་ཀྱི་གོང་བུ་ལྗང་གུ་ཤིན་ཏུ་བཀྲག་མདངས་དང་ལྡན་པ་ལ་ཇེ་ཉེར་སླེབ་པའི་ཚེ་རྡོ་ཤེལ་ལྗང་ནག་དྭངས་པ་ལ་ཉི་ཟེར་ཕོག་པའི་རྐྱེན་གྱིས་འོད་ཟེར་ཁ་དོག་སྣ་ཚོགས་སུ་འཕྲོ་བ། དབྱིབས་ནོར་བུ་མིག་གཅིག་ལྟ་བུ་ཆེ་ཞིང་དྭངས་པ་ཞིག་གི་དྲུང་དུ་སླེབས་པ་ན་ངོ་མཚར་གྱི་སྣང་བ་བཅས་ནང་དུ་ཞུགས་པས་རིན་པོ་ཆེའི་ཁྲི་བཀོད་པ་ཕུན་སུམ་ཚོགས་པའི་སྟེང་དུ་ཛམ་བྷ་ལ་ནག་པོ་ལྗང་འོད་འཚེར་བ། ཞལ་ཕྱག་སོགས་མངོན་རྟོགས་དང་མཚུངས་པ་ཤིན་ཏུ་གསལ་བ་ལ་འཁོར་རྣམས་ཀྱང་ཡོད་དགོངས་པ་བྱུང༌། དེ་ཉིད་སྐད་ཅིག་གིས་ཨོ་རྒྱན་སྣང་སྲིད་ཟིལ་གནོན་གྱི་སྐུར་གནས་གྱུར་ནས་འདིའི་སྨིན་གྲོལ་གྱི་གདམས་པ་ཆིག་རྫོགས་སུ་སྩལ། འདིའི་སྒྲུབ་ཐབས་ཀྱི་སྐོར་རྣམས་སྔར་བལ་པོ་ཨ་ཧཱུྃ་འབར་དང་གུ་རུ་ཇོ་ཚེའི་གཏེར་དཔེ་གཉིས་པོ་གཅིག་ལྟ་བུ་ཡོད་པས་བརྒྱུད་པ་གཉིས་འདྲེས་སུ་འགྱུར་རོ་གསུངས་པའི་གནང་བ་དང་བཅས་བྱིན་རླབས་ཀྱི་མཚན་མ་ཁྱད་པར་ཅན་བརྙེས། ནོར་ལྷ་རྣམས་ཀྱི་ནང་ནས་ཀྱང་འདི་སྒྲུབ་པ་ལ་རྒབ་འདྲེའི་བར་ཆད་མེད་ཅིང་བཅས་པས་ཆོག་པའི་འཁོར་ལོ་སོགས་ཟབ་གནད་ངོ་མཚར་རྨད་དུ་བྱུང་བ་དང་ལྡན་པའི་གནོད་སྦྱིན་སྡེ་དཔོན་ཆེན་པོའི་སྲོག་དབང་ཟབ་མོ་བསྒྲུབ་པ་ལ་སོགས་ཀྱིས་མཚམས་སྦྱར་ལ། རིན་པོ་ཆེ་སོགས་གཅེས་པའི་ནོར་རྫས་ཀྱི་མཎྜལ་ཕུལ་དུ་གཞུག །བླ་མ་དང་གསང་བའི་བདག་པོ་དབྱེར་མེད་པ་ལ་མི་ཕྱེད་དད་པའི་གདུང་ཤུགས་དྲག་པོས་ཐལ་སྦྱར་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས་མཛོད། བླ་མ་གསང་བདག་དཔའ་བོ་ཆེ༔ བདག་ལ་བརྩེ་བས་ཉེར་དགོངས་ནས༔ གནོད་སྦྱིན་སྡེ་དཔོན་ཛམྦྷ་ལའི༔ དངོས་གྲུབ་དབང་བསྐུར་སྩལ་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་གསང་བའི་དམ་ཚིག་བསྒྲག་ཅིང་གནང་བ་སྦྱིན་པ་ཡིན་པས་སྙན་གཏོད་འཚལ༔ འདི་ནི་ཡཀྵ་ཀཱ་ལ་ཆེ༔ བཀའ་གཉན་བྱིན་རླབས་ནུས་སྟོབས་བདག༔ དམ་ཚིག་སྲོག་བཞིན་བསྲུང་ནུས་ན༔ དབང་བསྐུར་སྦྱིན་གྱི་གཞན་དུ་མིན༔ ཅེས་བསྒོ་ཞིང་དམ་ཆུ་བདུད་རྩི་སྦྱིན། ཇི་ལྟར་བསྒོས་པའི་དམ་ལས་ནམ་ཡང་མི་འདའ་བར་ཁས་ལེན་ཅིང་ཐ་ཚིག་གི་བྲོ་བོར་བ་འདིའི་རྗེས་ཟློས། རྡོ་རྗེའི་དམ་ལས་འདའ་མི་བྱ༔ ས་མ་ཡ་ན་ར་ཀན༔ དེ་ནས་རྒྱུད་རྣམ་པར་དག་པར་བྱ་བའི་སླད་དུ། བླ་མ་གསང་བའི་བདག་པོ་དང་མདུན་བསྐྱེད་གནོད་གནས་དབང་པོའི་དཀྱིལ་འཁོར་ལ་རྩ་གསུམ་རབ་འབྱམས་རྒྱ་མཚོས་སྤྲིན་གཏིབས་པ་ལྟར་བསྐོར་ཏེ་བཞུགས་པའི་སྤྱན་སྔར་མཁའ་ཁྱབ་ཀྱི་སེམས་ཅན་རྣམས་དང་ལྷན་ཅིག་པས་བྱང་ཆུབ་བར་དུ་སྐྱབས་སུ་འགྲོ་བའི་འདུན་པས་འདིའི་རྗེས་ཟློས། ན་མོ༔ བདག་དང་ཁམས་གསུམ་འགྲོ་བ་ཀུན༔ དཀོན་མཆོག་གསུམ་ལ་སྐྱབས་སུ་མཆི༔ རྩ་བ་གསུམ་གྱི་བྱིན་གྱིས་རློབས༔ སྐུ་གསུམ་ངང་དུ་གནས་གྱུར་ཅིག༔ ལན་གསུམ། སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པ་གསལ་ཐོབ་ལ་འདིའི་རྗེས་ཟློས། བདག་གིས་སེམས་ཅན་ཐམས་ཅད་ཀུན༔ སངས་རྒྱས་ས་ལ་འགོད་པའི་ཕྱིར༔ གནོད་སྦྱིན་དབང་པོའི་བསྐྱེད་བཟླས་དང་༔ མཆོད་བསྟོད་སྒྲུབ་ལ་བརྩོན་པར་བགྱི༔ ལན་གསུམ། རྒྱུན་བཤགས་ཡན་ལག་བརྒྱད་པའི་ཏིང་ངེ་འཛིན་ཚིག་དོན་རེ་རེ་བཞིན་གསལ་ཐོབ་ལ་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང༌། །དག་པ་མཐའ་བཞིའི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། ལན་གསུམ། དེ་ནས་དབང་གིས་གཞི་དགོད་པ་ཡེ་ཤེས་པ་དབབ་པ་ཡིན་པས་སྒོ་གསུམ་གྱི་གནད་གཅུན་ལ་དམིགས་པ་འདི་རྩེ་གཅིག་ཏུ་སྒོམས་ཤིག །ལས་བུམ་ཆུ་དང༌། ཨ་མྲྀ་ཏས་བསང༌། སྭ་བྷཱ་བས་སྦྱང༌། ཆོས་ཐམས་ཅད་དམིགས་སུ་མེད་པ་འོད་གསལ་སྟོང་པ་ཉིད་ཀྱི་ངང་ལས། ཁྱེད་རང་རྣམས་གང་དུ་གནས་པའི་གོ་སར་སྣ་ཚོགས་པདྨའི་ཟེའུ་འབྲུར་ཉི་མའི་དཀྱིལ་འཁོར་ལ་གནས་པའི་གཏེར་གྱི་བུམ་པ་བཟང་པོ་དང་གནོད་སྦྱིན་ཕོ་མོ་ཟུང་གི་ཁྲིའི་སྟེང་དུ། རང་སེམས་ཧཱུྃ་ཡིག་མཐིང་ནག་འོད་འབར་བ་ལས་རྡོ་རྗེ་ཧཱུྃ་གིས་མཚན་པ། དེ་ལས་འོད་ཟེར་དཔག་ཏུ་མེད་པ་འཕྲོས། འཁོར་འདས་ཀྱི་དཔལ་འབྱོར་དྭངས་བཅུད་ཐམས་ཅད་བསྡུས་ཏེ་ཐིམ་པ་ལས་འོད་ཟེར་མཐིང་ནག་གི་གོང་བུར་གྱུར། དེ་ལས་སྐད་ཅིག་གིས་ཁྱེད་རང་བཅོམ་ལྡན་འདས་མགོན་པོ་ཛམྦྷ་ལ་སྐུ་མདོག་གནག་ལ་སྣུམ་པའི་མདངས་འོད་འཚེར་བ། མིའུ་ཐུང་གཏུམ་ཞིང་ཁྲོས་པའི་ཉམས་ཅན། ཞལ་གཅིག་སྤྱན་གསུམ་ཁྲོ་གཉེར་བསྡུས་ཤིང་མཆེ་བ་བཞི་བཙིགས་པ། ཕྱག་བཞིའི་གཡས་དང་པོས་རྡོ་རྗེའི་ཐོ་བ་གསོར་ཅིང་གཡོན་དང་པོས་ནོར་བུའི་རྒྱལ་མཚན་སྒྲེང་བ། གཡས་འོག་མས་རིན་པོ་ཆེས་བཀང་བའི་ཐོད་པ་བསྣམས་པ་གཡོན་འོག་མས་གཏེར་གྱི་ནེའུ་ལེ་བཟུང་བ། དབུ་སྐྲ་དམར་སེར་གྱེན་དུ་བརྫེས་ཤིང་ཐོད་སྐམ་ལྔའི་དབུ་རྒྱན་རཏྣའི་རྩེ་བྲན་དང་ལྡན་པ། སྟག་ལྤགས་ཀྱི་ཤམ་ཐབས་འཕྱངས་ཤིང་སྤྲུལ་རིགས་ལྔ་དང་རིན་པོ་ཆེས་བརྒྱན་པ། རྟགས་ཀྱི་མཚན་མ་གྱེན་དུ་སྒྲེངས་ཞིང་ཞབས་གཉིས་གཡོན་བརྐྱང་པའི་འདོར་ཐབས་ཀྱིས་ཡེ་ཤེས་མེ་འོད་འབར་བའི་ཀློང་དུ་འགྱིང་བ། ནོར་རྒྱུན་ལྷ་མོ་ལྗང་གུ་ལྕགས་ཀྱུ་དང་གཏེར་བུམ་བསྣམས་པས་གཡོན་ཕྱོགས་ནས་འཁྱུད་པའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་ནམ་མཁའ་གང་བ་འཕྲོས། རང་བཞིན་གྱི་གནས་དང་ལྕང་ལོ་ཅན་ནས་སྒོམ་པ་དང་འདྲ་བའི་ཡེ་ཤེས་པ་དཔག་ཏུ་མེད་པ་ཆར་ཆེན་བབས་པ་ལྟ་བུར་སྤྱན་དྲངས་ནས་སྒོ་གསུམ་ལ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད་ཅིག བྱས་ལ་སྦྱར་བའི་སྤོས་བསྲེག །རོལ་མོ་བསྒྲག །ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ བཛྲ་ཨཱ་བེ་ཤ་ཡ་ཨ་ཨཱཿ ཞེས་དྲག་ཏུ་བརྗོད་ལ་དབབ། རྡོ་རྗེ་སྤྱི་བོར་རྒྱ་གྲམ་དུ་བཞག་ལ། ཏིཥྛ་བཛྲས་བརྟན་པར་བྱ། དེ་ནས་དབང་བསྐུར་དངོས་ལ། གཉེན་པོའི་ལྷ་དབང༌། གནོད་སྦྱིན་དབང་པོའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དབང༌། མཐའ་རྟེན་ཚེའི་དབང་རྣམས་རིམ་པར་སྤྱིན་པའི་ཐོག་མར་བུམ་པའི་དབང་ལ་དམིགས་པ་འདི་ལྟར་མཛོད། སློབ་དཔོན་གྱི་ཐུགས་ཀ་ནས་སྤྲོས་པའི་རིག་པའི་ལྷ་མོ་རྣམས་ཀྱིས་བུམ་པའི་བདུད་རྩིས་སྤྱི་བོ་ནས་དབང་བསྐུར་བས་དྲེགས་ཅན་མཐའ་དག་ཟིལ་གྱིས་གནོན་པའི་གཉེན་པོ་སྟོབས་ཀྱི་དབང་ཆེན་རྫོགས་པར་མོས་ཤིག །རྣམ་བུམ་སྤྱི་བོར་བཞག །བུམ་ཆུ་མཐོར་འཐུང་བྱས་ལ། ཨོཾཿ བཀྲ་ཤིས་བུམ་པའི་ཕོ་བྲང་ན༔ གསང་བདག་འོད་ཞུ་བདུད་རྩིའི་ཆུས༔ སྐལ་ལྡན་བུ་ལ་དབང་བསྐུར་བས༔ གཉེན་པོ་སྟོབས་ཀྱི་དབང་ཐོབ་ཤོག༔ ཨོཾ་བཛྲ་པཱ་ཎི་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཀ་ལ་ཤ་ཨ་མྲྀ་ཏ་ཨ་བྷི་ཥིཉྩ་མི༔ བདུད་རྩིའི་རྒྱུན་གྱིས་ལུས་ཀྱི་ནང་གང༌། དྲི་མ་ཐམས་ཅད་དག །ཆུའི་ལྷག་མ་སྤྱི་བོར་ལུད་པས་རིགས་ཀྱི་བདག་པོ་མི་བསྐྱོད་རྡོ་རྗེས་དབུར་བརྒྱན་པར་གྱུར། སྒྲུབ་པའི་སྐུ་རྟེན་འདི་ཉིད་གནོད་སྦྱིན་ཛམ་བྷ་ལ་ནག་པོ་དངོས་སུ་གསལ་བ་ཁྱེད་རང་གི་དཔྲལ་བར་ཐིམ་པས་བསྐྱེད་རིམ་སྒོམ་པའི་སྣོད་རུང་དུ་གྱུར། ཡེ་ཤེས་སྐུའི་གཟི་བྱིན་འབར་བར་མོས་ཤིག །སྐུ་རྟེན་དཔྲལ་བར་བཞག་ལ། ཨོཾ༔ ཡཀྵ་ཀཱ་ལ་ཛམ་བྷ་ལའི༔ རྡོ་རྗེའི་སྐུ་ཡི་དབང་བསྐུར་བས༔ ལྷ་ཚོགས་བསྒོམ་པའི་སྣོད་དུ་གྱུར༔ ཡེ་ཤེས་གཟི་བྱིན་འབར་བར་ཤོག༔ ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ བསྙེན་སྒྲུབ་ཀྱི་བཟླས་པའི་ལུང་བླང་བའི་སླད་དུ་དམིགས་པ་འདི་བཞིན་དུ་མཛོད། མདུན་བསྐྱེད་གཙོ་བོའི་ཐུགས་ཀར་ཉི་མའི་སྟེང་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་མཐིང་ནག་སྔགས་ཀྱི་ཕྲེང་བས་བསྐོར་བ་ལས་སྔགས་ཕྲེང་གཉིས་པ་བྱུང༌། ཞལ་ནས་ཐོན། ཁྱེད་རང་ལྷར་གསལ་བའི་ཞལ་དུ་ཞུགས། ཐུགས་ཀར་ཉི་སྟེང་རྡོ་རྗེ་ཧཱུྃ་གིས་མཚན་པའི་མཐར་འཁོད། སློབ་དཔོན་གྱི་ཐུགས་ཀ་ནས་འོད་ཟེར་དམར་པོ་ལྕགས་ཀྱུའི་དབྱིབས་ཅན་འཕྲོས། མདུན་བསྐྱེད་ཁྱེད་རང་རྣམས་དང་བཅས་པའི་ཐུགས་སྲོག་སྔགས་ཕྲེང་ལ་ཕོག་པས། ནུས་པའི་སྟོབས་བསྐྱེད། གཟི་བྱིན་ལྷག་པར་འབར། ཐུགས་དམ་གཉན་པོའི་རྒྱུད་བསྐུལ་བས་སྔགས་ཕྲེང་ལས་འོད་ཟེར་གྱི་སྤྲིན་ནམ་མཁའ་ཁྱབ་པར་འཁྲིགས་པ་ལས་འདོད་རྒུའི་དངོས་གྲུབ་ཀྱི་ཆར་ཆེན་པོ་བབས་པར་མོས་ལ་བསྙེན་སྔགས་ཀྱི་རྗེས་ཟློས། ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ ཞེས་ལན་གསུམ་བཟླར་གཞུག །སླར་ཡང་སློབ་དཔོན་གྱི་ཐུགས་ཀའི་འོད་ཟེར་གྱིས་གནོད་སྦྱིན་དབང་པོ་འཁོར་དང་བཅས་པའི་ཐུགས་རྒྱུད་བསྐུལ་བས་སྐུའི་གཟི་བརྗིད་བསྐྱེད། གསུང་གིས་སྔགས་སྒྲ་བསྒྲག །ཐུགས་ལས་ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས་པས་སྟོང་གསུམ་འཇིག་རྟེན་གྱི་ཁམས་ཐམས་ཅད་གཡོས། འཁོར་འདས་ཀུན་གྱི་བཅུད་དང་དཔལ་འབྱོར། ལྷ་ཀླུ་མིའི་ལོངས་སྤྱོད་མ་ལུས་པ་འུབ་ཀྱིས་བསྡུས་ནས་རང་གི་ཡུལ་ཕྱོགས་བང་མཛོད་གནས་ཁང་ཐམས་ཅད་ཁེངས། དྭངས་མ་རང་རང་གི་སྒོ་གསུམ་ལ་ཐིམ་འདོད་རྒུའི་འབྱུང་གནས་ཆེན་པོར་གྱུར་པར་མོས་ལ་སྒྲུབ་སྔགས་ཀྱི་རྗེས་ཟློས། ཨོཾ་ཡཀྵ་ཀཱ་ལ་ཛམྦྷ་ལ་ཛ་ལེནྡྲཱ་ཡ་བ་སུ་དྷ་རཱི་སརྦ་ཙིཏྟ་རཏྣ་སིདྡྷི་ཧྲཱིང་ཧྲཱིང་ཛཿསྭཱ་ཧཱ༔ ཞེས་ལན་གསུམ། སྲོག་འཁོར་གླེགས་བམ་གནོད་སྦྱིན་དབང་པོའི་གསུང་གི་ངོ་བོ་མགྲིན་པར་བཞག་པ་ལ། བསྙེན་སྒྲུབ་བཟླས་བརྗོད་ཀྱི་སྣོད་རུང་དུ་གྱུར། རིག་སྔགས་ཀྱི་དངོས་གྲུབ་འགྲུབ་པའི་ནུས་རྩལ་རྫོགས་པར་མོས་ཤིག །སྲོག་འཁོར་དང༌། རྒྱས་པ་མེད་ན་འཁོར་ལོའི་བྲི་ཡིག་བཅས་མགྲིན་པར་བཞག་ལ། ཨཱཿ ཡིད་བཞིན་འདོད་འཇོའི་ནོར་བུ་སྔགས༔ རྡོ་རྗེའི་གསུང་གི་དབང་བསྐུར་བས༔ བཟླས་ཤིང་གྲུབ་པའི་སྣོད་དུ་གྱུར༔ དངོས་གྲུབ་ནུས་རྩལ་རྫོགས་པར་ཤོག༔ ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ ཝཱ་ཀ་ཨ་བྷི་ཥིཉྩ་ཨཱཿ ཨཱཿ མཚན་ལྡན་བནྡྷ་རྫས་བཅུད་ཀྱིས་བལྟམས་པ་མགོན་པོ་ཛམྦྷ་ལའི་ཐུགས་འོད་གསལ་ཡེ་ཤེས་ཆེན་པོའི་རྟེན་སྙིང་གར་བཞག་པས། རྣམ་ཐར་གསུམ་ལྡན་གྱི་ཏིང་ངེ་འཛིན་བསྒོམ་པའི་སྣོད་རུང་དུ་གྱུར། ལྷར་སྣང་དང་ཆོས་ཉིད་དབྱེར་མི་ཕྱེད་པའི་དགོངས་པའི་རྩལ་རྫོགས་པར་མོས་ཤིག །བནྡྷ་སྙིང་གར་བཞག་ལ། ཧཱུྃ༔ རང་བྱུང་འོད་གསལ་ཀཱ་པཱ་ལ༔ རྡོ་རྗེའི་ཐུགས་ཀྱི་དབང་བསྐུར་བས༔ ཏིང་འཛིན་དགོངས་པའི་སྣོད་དུ་གྱུར༔ ལྷ་དང་ཆོས་ཉིད་དབྱེར་མེད་ཤོག༔ ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ ཙིཏྟ་ཨ་བྷི་ཥིཉྩ་ཧཱུྃ༔ གཡང་གཏོར་རིན་ཆེན་འབར་བ་དཔལ་ལྡན་ཡཀྵ་ཀཱ་ལ་ཆེན་པོའི་ཡོན་ཏན་ཡོངས་རྫོགས་འདུས་པའི་ངོ་བོས་དབང་བསྐུར་བས། ཕྱྭ་གཡང་དཔལ་འབྱོར་སྒྲུབ་པའི་སྣོད་རུང་དུ་གྱུར། ཡིད་ལ་འདོད་རྒུའི་ཆར་འབེབས་པ་ལ་དབང་བརྙེས་པར་མོས་ཤིག །གཏོར་མ་ལྟེ་བར་བཞག་ལ། སྭཱ༔ གཏོར་མ་འདོད་འབྱུང་ནམ་མཁའི་མཛོད༔ ཡོན་ཏན་རྒྱན་གྱིས་དབང་བསྐུར་བས༔ དཔལ་འབྱོར་བསྒྲུབ་པའི་སྣོད་དུ་གྱུར༔ འདོད་རྒུའི་ཆར་ཆེན་འབེབས་པར་ཤོག༔ ཨོཾ་ཛམ་བྷ་ལ་ཛ་ལེནྡྲཱ་ཡེ་སྭཱ་ཧཱ༔ གུ་ན་ཨ་བྷི་ཥིཉྩ་སྭཱ༔ ཕྲིན་ལས་ཀྱི་དབང་བསྐུར་བའི་ཐོག་མར་ཐུགས་དམ་བསྐུལ་ཞིང་ཕྱྭ་གཡང་གི་བཅུད་བསྡུ་བ་ཡིན་པས་དམིགས་པ་འདི་ལྟར་མཛོད་ཅིག །བདག་གི་ཐུགས་ཀའི་འོད་ཟེར་གྱིས༔ མདུན་བསྐྱེད་འཁོར་བཅས་ཐུགས་རྒྱུད་བསྐུལ༔ གཏུམ་ཞིང་སྒེག་པའི་གཟི་བྱིན་བསྐྱེད༔ རྡོ་རྗེའི་སྔགས་ཀྱི་སྒྲ་ཆེན་བསྒྲགས༔ ཡེ་ཤེས་འོད་ཟེར་མཁའ་ཁྱབ་འཕྲོས༔ སྟོང་གསུམ་འཇིག་རྟེན་ཁམས་ཀུན་གཡོས༔ འཁོར་འདས་ཀུན་གྱི་བཅུད་དང་དཔལ༔ ལྷ་ཀླུ་མི་ཡི་ལོངས་སྤྱོད་ཚོགས༔ རང་དབང་མེད་པར་འུབས་ཀྱིས་བསྡུས༔ བདག་གི་བང་མཛོད་གནས་ཁང་དང་༔ ཡུལ་ཕྱོགས་ཐམས་ཅད་ཕྱུར་བུར་ཁེངས༔ དྭངས་མ་རྟེན་རྫས་རྣམས་ལ་ཐིམ༔ ཡིད་བཞིན་འདོད་འཇོའི་དཔལ་དུ་གྱུར༔ ཧཱུྃ༔ བཀྲ་ཤིས་ཡིད་འོང་གྲུབ་པའི་ཞིང་༔ ལོངས་སྤྱོད་གཏེར་གྱི་ཕོ་བྲང་ནས༔ རིགས་ཀྱི་ཁྱབ་བདག་ཛཾ་བྷ་ལ༔ བཙུན་མོ་དཔལ་ལྡན་ནོར་གྱི་རྒྱུན༔ ནོར་ལྷ་རབ་འབྱམས་ཚོགས་དང་བཅས༔ རྩེ་གཅིག་གུས་པས་བསྒྲུབ་ལགས་ན༔ བྱམས་པའི་ཞལ་བཟང་དུས་འདིར་སྟོན༔ དགྱེས་པ་ཆེན་པོའི་གཟི་བྱིན་བསྐྱེད༔ དངོས་བཤམས་ཡིད་ལས་བྱུང་བ་ཡི༔ ཉེར་སྤྱོད་འདོད་ཡོན་སྤྲིན་ལྟར་གཏིབས༔ སྣོད་བཅུད་རི་གླིང་འབྱོར་པའི་ཚོགས༔ བཀྲ་ཤིས་རྟགས་རྫས་རྒྱལ་སྲིད་བདུན༔ བུམ་བཟང་འདོད་འཇོ་དཔག་བསམ་ཤིང་༔ གཏོར་མ་སྐྱེམས་ཕུད་རོ་བཅུད་ལྡན༔ ཟད་མི་ཤེས་པའི་ལོངས་སྤྱོད་ཀྱིས༔ གཡར་དམ་བསྐང་ཞིང་ཉམས་ཆགས་བཤགས༔ མོས་ཤིང་གདུང་བས་རྒྱུད་བསྐུལ་ན༔ ཐུགས་རྗེ་ཐུགས་དམ་དབྱིངས་ནས་དགོངས༔ སྟོང་གསུམ་འཁོར་འདས་རབ་འབྱམས་ཀྱི༔ སྣོད་ཀྱི་འབྱུང་བའི་ཕྱྭ་གཡང་ཁུག༔ བཅུད་ཀྱི་འབྱོར་པའི་ཕྱྭ་གཡང་ཁུག༔ མཛེས་སྡུག་གཟུགས་ཀྱི་ཕྱྭ༴ སྙན་བརྗིད་སྒྲ་ཡི༴ བསུང་ཞིམ་དྲི་ཡི་ཕྱྭ༴ བཅུད་ལྡན་རོ་ཡི༴ འཇམ་འཁྲིལ་རེག་བྱའི༴ ཡིད་མཐུན་ཆོས་ཀྱི༴ ལྷ་ཡི་བདུད་རྩིའི༴ ཀླུ་ཡི་ནོར་བུའི༴ གནོད་སྦྱིན་གཏེར་གྱི༴ གླིང་བཞི་མི་ཡི༴ ཕོ་བྲང་མཁར་གྱི་ཕྱྭ༴ རིགས་བརྒྱུད་སྲས་ཀྱི༴ མངའ་རིས་བདེ་སྐྱིད་ཕྱྭ༴ དཔའ་རྩལ་སྟོབས་ཀྱི༴ སྲ་བརྟན་གོ་ཆའི༴ རྐང་བཞི་ཕྱུགས་ཀྱི༴ ལོ་ཏོག་འབྲུ་བཅུད་ཕྱྭ༴ བཟའ་ཤིང་སྨན་གྱི་ཕྱྭ༴ ཞིམ་མངར་ཟས་ཀྱི་ཕྱྭ༴ བཀྲག་ཅན་གོས་ཀྱི༴ ཡིད་འཕྲོག་རྒྱན་གྱི་ཕྱྭ༴ བརྗིད་ཅན་ནོར་གྱི་ཕྱྭ༴ མཁས་པའི་མཁྱེན་རྩལ་ཕྱྭ༴ གྲུབ་པའི་ནུས་མཐུའི་ཕྱྭ་གཡང་༴ འཕགས་པའི་སྤངས་རྟོགས་ཕྱྭ༴ དམ་པའི་ཆོས་ཀྱི་ཕྱྭ༴ བཤད་སྒྲུབ་བསྟན་པའི་ཕྱྭ༴ འཆི་མེད་ཚེ་ཡི་ཕྱྭ༴ བསོད་ནམས་དབང་ཐང་༴ སྙན་ཅིང་གྲགས་པའི་ཕྱྭ༴ དཔལ་དང་འབྱོར་པའི་ཕྱྭ༴ ནད་མེད་བདེ་བའི་ཕྱྭ༴ རྒས་མེད་ལང་ཚོའི་ཕྱྭ༴ ཅི་བསམ་འགྲུབ་པའི་ཕྱྭ༴ ཕྱྭ་ཁུག་གཡང་སྐྱོབས་དངོས་གྲུབ་སྩོལ༔ བཀྲ་ཤིས་བདེ་ལེགས་རྒྱས་པར་མཛོད༔ ཨོཾ་ཛམ་བྷ་ལ་ཛ་ལེནྡྲཱ་ཡ་སྭཱ་ཧཱ༔ ཤྲཱི་བ་སུ་དྷཱ་རི་ཎཱི་སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ཤར་ནས་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་ནོར་བུ་བཟང་༔ བཙུན་མོ་དཔལ་ལྡན་ཟླ་བའི་འོད༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་གུས་པས་བསྒྲུབས་ལགས་ན༔ བྱམས་པའི་ཞལ་བཟང་སོགས་ནས༔ བཀྲ་ཤིས་བདེ་ལེགས་རྒྱས་པར་མཛོད༔ ཨོཾ་མ་ཎི་བྷ་དྲཱ་ཡ་ཙནྡྲ་ཀནྟྱཻ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ལྷོ་ནས་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་གང་བ་བཟང་༔ བཙུན་མོ་དཔལ་ལྡན་ནོར་སྦྱིན་མ༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་གུས་པས་སོགས་འགྲེ། ཨོཾ་པུརྞ་བྷ་དྲཱ་ཡ་དཏྟཱ་ཡེ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ནུབ་ནས་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་ནོར་སྦྱིན་དང་༔ བཙུན་མོ་དཔལ་ལྡན་རབ་སྦྱིན་མ༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་གུས་པ་སོགས༴ ཨོཾ་དྷ་ན་དཱྀ་ཡ་སུདཏྟཱ་ཡཻ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ། བྱང་ནས་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་རྣམ་ཐོས་སྲས༔ བཙུན་མོ་དཔལ་ལྡན་འཕགས་མ་དང་༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་སོགས༴ ཨོཾ་བཻ་ཤྲ་མ་ཎཱ་ཡ་ཨཱརྨཱ་ཡེ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ཤར་ལྷོའི་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་རོལ་པའི་ཕྲེང་༔ བཙུན་མོ་དཔལ་ལྡན་རབ་བཟང་མ༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་སོགས། ཨོཾ་ཀི་ལི་མཱ་ལི་ནི་སུ་བྷ་དྲཱ་ཡེ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ལྷོ་ནུབ་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་ཀུཎྜ་ལི༔ བཙུན་མོ་དཔལ་ལྡན་རབ་སྦས་མ༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་སོགས༴ ཨོཾ་པི་ཙི་ཀུཎྜ་ལི་སུ་གུཔྟཱ་ཡེ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ ནུབ་བྱང་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་སྒོ་ཡི་དབང་༔ བཙུན་མོ་དཔལ་ལྡན་མཛེས་མ་དང་༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་སོགས༴ ཨོཾ་མུ་ཁནྡྲཱེ་ཡ་དེ་བྱ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ བྱང་ཤར་དངོས་གྲུབ་སྩོལ་བའི་ལྷ༔ གནོད་སྦྱིན་སྡེ་དཔོན་གཡོ་བའི་དབང་༔ བཙུན་མོ་དཔལ་ལྡན་དབྱངས་ཅན་མ༔ སྲས་འཁོར་སྤྲུལ་པར་བཅས་པ་རྣམས༔ རྩེ་གཅིག་སོགས༴ ཨོཾ་ཙ་རནྡྲཱེ་ཡ་སྭ་ར་སྭཏྱཻ་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ དཀྱིལ་འཁོར་ཆེན་པོའི་སྒོ་བཞི་ནས༔ སྒྲུབ་ལ་བར་ཆད་ཟློག་པ་དང་༔ དངོས་གྲུབ་སྩོལ་བར་ཞལ་བཞེས་པའི༔ མཐུ་ཆེན་རྒྱལ་པོ་ཆེན་པོ་བཞི༔ རང་རང་རིགས་ཀྱི་དཔུང་བཅས་རྣམས༔ རྩེ་གཅིག་སོགས༴ ཨོཾ་དྷྲྀཥྟ་རཱཥྟཱ་ཡ་བཻ་རུ་དྷ་ཀཱ་ཡ་བི་རཱུ་པཀྵཱ་ཡ་བཻ་ཤྲ་མ་ཎཱ་ཡ་སྭཱ་ཧཱ༔ སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ ཧཱུྃ༔ གཞན་ཡང་སྟེང་འོག་བར་མཚམས་ནས༔ དངོས་གྲུབ་རིན་ཆེན་ཆར་འབེབས་པའི༔ ནོར་ལྷ་གཏེར་བདག་རབ་འབྱམས་ཚོགས༔ རྩེ་གཅིག་སོགས༴ ཏདྱ་ཐཱ༔ ཨོཾ་ཧི་ལི་མ་ཎི་བྷ་དྲ༔ ཧི་ལི་ཧི་ལི་མ་ཎི་བྷ་དྲ༔ ཀི་ལི་མ་ཎི་བྷ་དྲ༔ ཀི་ལི་ཀི་ལི་མ་ཎི་བྷ་དྲ༔ ཀུ་རུ་མ་ཎི་བྷ་དྲ༔ ཀུ་རུ་ཀུ་རུ་མ་ཎི་བྷ་དྲ༔ ཏུ་རུ་མ་ཎི་བྷ་དྲ༔ ཏུ་རུ་ཏུ་རུ་མ་ཎི་བྷ་དྲ༔ སུ་རུ་མ་ཎི་བྷ་དྲ༔ སུ་རུ་སུ་རུ་མ་ཎི་བྷ་དྲ༔ ཙུ་རུ་མ་ཎི་བྷ་དྲ༔ ཙུ་རུ་ཙུ་རུ་མ་ཎི་བྷ་དྲ༔ ཨོཾ་ཨེ་ཧྱེ་ཧིཿ ཏིཥྛ་ཏིཥྛ༔ སརྦ་ཨརྠ་མེ་སཱ་དྷ་ནི༔ ཏདྱ་ཐཱ༔ སུ་དྷ་ནི༔ སུ་ར་སྱཿ སུ་མ་ཏི༔ སུ་པུ་ཁིཿ ཧི་ལི་མི་ལི་སྭཱ་ཧཱ༔ སརྦ་སིདྡྷི་སྡུས་སྡུས་རཏྣ་པུཥྟིཾ་པ་ཤཾ་ཀུ་རུ་ཧོ༔ འཁོར་འདས་གཉིས་ཀྱི་དཔལ་དང་བཅུད་བསྡུས་པའི་གཡང་རྫས་གནོད་སྦྱིན་ནོར་བདག་ཆེན་པོའི་ཕྲིན་ལས་མི་ཟད་པ་རྒྱན་གྱི་འཁོར་ལོའི་རྣམ་རོལ་ལག་ཏུ་གཏད་པས་འབྱོར་པ་དྲུག་གི་ལེགས་ཚོགས་དཔག་བསམ་ཤིང་ཆེན་ལྟར་རྒྱས་ཤིང་རི་དབང་ལྷུན་པོ་ལྟར་བརྟན་པར་གྱུར་པ་མོས་ཤིག །གཡང་རྫས་རྣམས་ལག་ཏུ་གཏད་ལ། ཧཱ༔ འཁོར་འདས་ཕྱྭ་གཡང་འདུས་པའི་བཅུད༔ ཕྲིན་ལས་རྫས་ཀྱི་དབང་བསྐུར་བས༔ ཚེ་བསོད་དཔལ་འབྱོར་སྙན་གྲགས་དང་༔ སྟོབས་རྩལ་ལེགས་ཚོགས་རྒྱས་པར་ཤོག༔ ཨོཾ་ཛམ་བྷ་ལ་ཛ་ལེནྡྲཱ་ཡ་སྭཱ་ཧཱ༔ ཀརྨ་ཨ་བྷི་ཥིཉྩ་ཧཱ༔ མཐའ་རྟེན་བཀྲ་ཤིས་ཚེའི་དངོས་གྲུབ་སྦྱིན་པའི་སླད་དུ། ཚེའི་འབྲང་རྒྱས་འདི་ཉིད་མགོན་པོ་ཛམྦྷ་ལ་འཆི་མེད་ཚེའི་དབང་ཕྱུག་དངོས་སུ་གསལ་བ་སྤྱི་བོར་བཞག་ཅིང་བྱིན་གྱིས་བརླབས་པས། སྐུ་གསུང་ཐུགས་ལས་འཆི་མེད་བདུད་རྩིའི་རྒྱུན་བབས་པས་ལུས་ཐམས་ཅད་གང༌། འཆི་བ་མེད་པའི་ཚེ་དང་རྡོ་རྗེ་ལྟ་བུའི་སྲོག་ཐོབ་པར་སྒོམས་ཤིག །ཚེ་འབྲང་སྤྱི་བོར་བཞག་ལ། བྷྲཱུྃ༔ འཁོར་འདས་ཚེ་ལ་དབང་བསྒྱུར་བ༔ མགོན་པོ་འཆི་མེད་ཛམྦྷ་ལས༔ རིགས་ཀྱི་བུ་ལ་དབང་བསྐུར་བས༔ མི་འགྱུར་རྡོ་རྗེའི་སྲོག་འགྲུབ་ཤོག༔ ཨོཾ་ཛམྦྷ་ལ་ཛ་ལེནྡྲཱ་ཡ་བཛྲ་ཨཱ་ཡུ་ཥེ་སྭཱ་ཧཱ༔ ཞེས་བསྐུར། སླར་ཡང་སྔགས་དེ་བརྗོད་ལ་ཚེ་རིལ་དང་ཚེ་ཆང་ཡང་སྦྱིན། དེ་ལྟར་དཔལ་ལྡན་མགོན་པོ་ཛམྦྷ་ལའི་དབང་བསྐུར་ཐུན་མོང་མ་ཡིན་པ་ཐོབ་པས་སྐུ་གསུང་ཐུགས་ཡོན་ཏན་ཕྲིན་ལས་ཡོངས་སུ་རྫོགས་པའི་ངོ་བོར་གྱུར་པ་ལ་བཀྲ་ཤིས་པའི་རྫས་རྟགས་བརྒྱད་རྒྱལ་སྲིད་རིན་པོ་ཆེ་རྣམ་པ་བདུན་མདུན་དུ་བསྟར། ཤིས་པ་བརྗོད་པའི་ཚིགས་བཅད་བརྗོད་ཅིང་མེ་ཏོག་གི་ཆར་ཕབས་པས་མངའ་གསོལ་བར་མོས་ཤིག །བྱས་ལ་རྫས་རྟགས་རྒྱལ་སྲིད་རྣམས་སྤྱི་འགྲོའི་ཚིགས་བཅད་རེ་རེ་ཙམ་བརྗོད་ཅིང་གཏད། ཤིས་བརྗོད་རྒྱས་པར་བྱ། དེ་ལྟར་ན་དེ་དག་རྣམས་ཀྱིས་ཡཀྵ་ཛམྦྷ་ལའི་སྣོད་རུང་བྱིན་བརླབ་དབང་བསྐུར་གྱི་རིམ་པ་ལེགས་པར་གྲུབ་པ་ཡིན་པས། དེང་ཕྱིན་ཆད་དམ་ཚིག་མ་ཉམས་པ་ཚུལ་བཞིན་བསྲུང་དགོས་པས་དེའི་དོན་རྩ་བའི་གཞུང་ལས་གསལ་རྒྱས་སུ་བསྟན་པ་འདི་ལ་སྙན་གཏོད་པར་ཞུ། དེ་ལྟར་དབང་བསྐུར་ཐོབ་པ་དང༌། བསྙེན་སྒྲུབ་བརྩོན་པའི་རྣལ་འབྱོར་པས༔ དངོས་གྲུབ་སྲོག་འཛིན་དམ་ཚིག་ནི༔ སྙིང་དང་མིག་ལས་གཅེས་པར་བཟུང་༔ ནོར་ལྷ་མཆོད་པ་ལ་བརྟེན་ནས༔ འབྱོར་པའི་ཁྱད་པར་ཅི་བྱུང་ཡང་༔ ཅུང་ཟད་ཙམ་ཡང་མ་ཞེན་པར༔ རྨི་ལམ་སྒྱུ་མ་ལྟ་བུའི་ངང་༔ ཕུད་ཀྱིས་དཀོན་མཆོག་རྟེན་གསུམ་བཞེངས༔ མར་མེ་ལ་སོགས་མཆོད་རྒྱུན་འཛུགས༔ ཕྱོགས་བཅུའི་དགེ་འདུན་བསྙེན་བཀུར་ཞིང་༔ ཕ་མ་ནད་པ་དཀའ་ཐུབ་ཅན༔ རྒན་རབས་རྣམས་ལ་ཚིམས་པར་གཏད༔ བར་པ་རང་དང་ཉེ་འཁོར་གྱིས༔ ཕུང་ཁམས་ལྷ་ཚོགས་མཆོད་པའི་བློས༔ བཟའ་བཏུང་གོས་རྒྱན་འབྱོར་པ་བྱ༔ ལྷག་མ་དབུལ་ཞིང་ཕོངས་པ་ལ༔ ཁོང་མི་འཁྲུགས་ཤིང་སྙིང་བརྩེ་བས༔ གཏན་པ་མེད་པའི་སྦྱིན་པར་སྤེལ༔ སྲོག་བསླུ་བྱ་ཞིང་ཟམ་པ་འཛུག༔ འགྲས་དང་འཁྲུགས་པ་ནོར་གྱིས་བཟླུམ༔ ཡུལ་ཕྱོགས་དགེ་བའི་ལས་རྣམས་བྱ༔ དེ་ནི་ཕྱི་ཡི་དམ་ཚིག་གོ༔ ནོར་ལྷ་བསྙེན་ཅིང་སྒྲུབ་པ་དང་༔ ཁྱད་པར་ཆུ་སྦྱིན་མ་ཆག་གཏང་༔ ཚེས་བརྒྱད་སོགས་ལ་ལྷག་པར་མཆོད༔ ཤིན་ཏུ་གསང་བས་ཉམས་སུ་བླང་༔ གཞན་ལ་བཀའ་རྒྱ་དམ་པར་སྤེལ༔ དཔེ་དང་ལག་ལེན་ལྷག་པར་བསྡམ༔ རང་གཞན་དབུལ་ཕོངས་ཅི་བྱུང་ཡང་༔ ནོར་ལྷ་མཆོད་པ་མ་གཏོགས་པར༔ ལོག་འཚོ་སྒྲུབ་པའི་བྱ་བ་སྤང་༔ མདོར་ན་གནོད་སྦྱིན་ནོར་ལྷ་དང་༔ ཡི་དམ་དབྱེར་མེད་སྙིང་ལྟར་བཅང་༔ དམ་ཚིག་གཅིག་གིས་འབྲེལ་བ་ཡི༔ མཆེད་ལྕམ་རྣམས་ལ་ལྷག་པར་ཡང་༔ བྱམས་དང་བསྙེན་བཀུར་ཅི་ནུས་བྱ༔ དེ་ནི་ནང་གི་དམ་ཚིག་གོ༔ ཁྱད་པར་གདམས་པ་ཟབ་མོ་འདི༔ གང་ལས་ནོད་པའི་བླ་མ་དེ༔ མི་བསྐྱོད་རྡོ་རྗེ་སེམས་དཔའ་དང་༔ གསང་བདག་ནོར་ལྷ་དབྱེར་མེད་པར༔ མོས་གུས་གདུང་ཤུགས་རྒྱུན་མི་བཅད༔ འབྱོར་པ་གང་བྱུང་ཕུད་དང་ནི༔ བུ་དང་བུ་མོ་ནོར་གྱི་དབྱིག༔ ན་བཟའ་བཅུད་ལྡན་ཞལ་ཟས་སོགས༔ གཅེས་དང་ཡིད་འཐད་རྟག་ཏུ་དབུལ༔ གཟུང་ཟུར་ཙམ་ཡང་གཅག་མི་བྱ༔ འཛུམ་ཞིང་གུས་པས་གསོང་པོར་གསོལ༔ ཐུགས་བཟུང་མཉེས་པའི་བྱ་བ་བསྒྲུབ༔ རང་སེམས་ལྷ་དང་བླ་མ་དང་༔ འབྱོར་པའི་ཡོ་བྱད་ལ་སོགས་པ༔ འཁོར་གསུམ་བདེན་འཛིན་བྲལ་བའི་ངང་༔ དོན་གྱི་དགོངས་པའི་སྲོག་གཟུང་བྱ༔ དེ་རྣམས་གསང་བའི་དམ་ཚིག་གོ༔ དེ་ལྟར་དམ་ཚིག་རབ་བསྲུང་ན༔ གནོད་སྦྱིན་ནོར་ལྷ་མ་བསྒྲུབ་འགྲུབ༔ ཚེ་རིང་ནད་མེད་དཔལ་འབྱོར་འཕེལ༔ མཐོ་རིས་ཐར་པའི་མཆོག་ཐོབ་འགྱུར༔ ཅེས་གསུངས་པའི་ཚིག་དོན་རྣམས་ཐུགས་ལ་ངེས་པའི་སྒོ་ནས་ཕྱི་ནང་གསང་བའི་དམ་ཚིག་དེ་དག་ཅི་ནུས་སུ་བསྲུང་བར་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་གསུམ། གཏང་རག་མཎྜལ། ལུས་འབུལ། དགེ་བསྔོ་བྱས་ལ་སློབ་མ་གྱེས། སློབ་དཔོན་གྱིས་གཏང་རག་མཆོད་བསྟོད། ནོངས་བཤགས་བཟོད་གསོལ། མདུན་བསྐྱེད་བདག་བསྐྱེད་ཀྱི་གཤེགས་བསྡུ། དགེ་བསྔོ་ཤིས་བརྗོད་ཀྱི་བར་ལས་བྱང་གི་དཀྱུས་ལྟར་བྱས་པས་གྲུབ་བོ། །བདག་ཉིད་སྐྱེ་ཀུན་འབྱོར་པའི་གཏེར་དང་འཕྲད། གཞན་ཕན་སྣོད་བཅུད་ཕྱྭ་གཡང་བྱིན་སྤེལ་བས། །བསྟན་འགྲོར་དགེ་མཚན་དཔལ་བརྒྱས་འཚོ་བྱེད་པ། །ཆུ་དབང་སྙིང་རྗེ་ཅན་དང་མཚུངས་པར་ཤོག །ཅེས་པའང་ཟབ་གསང་ཁྱད་པར་འཕགས་པ་འདིའི་ཐོག་མའི་སྨིན་གྲོལ་བདུད་རྩིའི་སྣོད་རུང་དུ་གྱུར་པ་བློ་གྲོས་མཐའ་ཡས་ཀྱིས་རྫོང་གསར་བཀྲ་ཤིས་ལྷ་རྩེའི་ཆོས་གྲྭར་གཞན་ཕན་གྱི་བཙས་སུ་བགྱིས་པ་དགེ་ལེགས་འཕེལ། །སླར་ཕུན་ཚོགས་རྣམ་རྒྱལ་པས་ནག་འགྲོས་སུ་བགྱིས་པའོ།། །།

[edit]

@#/__/rdo rje'i nor lha yak+Sha dzam+b+ha la chen po'i srog dbang bskur ba'i cho ga rin chen chu 'dzin ces bya ba bzhugs so//__na mo gu ru yak+Sha dzam+b+hA lA ya/__mi bskyod rigs brgya'i khyab bdag gnod sbyin gyi/__/sde dpon tshul 'dzin rdo rje khro bo ches/__/byin gyis rlobs mdzod zab mo srog gi dbang*/__/skal bzang don gnyis sgrub pa'i dpal du sbyin/__/yak+Sha kA la'i bsnyen sgrub las gsum gyi snod du rung zhing nus pa thob par byed pa zab mo srog gi dbang bskur ba la gsum/__sbyor ba/__dngos gzhi/__rjes so/__/dang po gshom bkod ni/__stegs bu'i steng ras bris kyi dkyil 'khor yod na bkram/__med na 'bru dkar gyi tshom bu lha grangs bkod pa'i dbus su thod pa sku rten srog 'khor rnams bkod/__de steng 'phrul stegs la lha bum nyer lnga'i bcud ldan mgul chings sngon po kha rgyan can bsham/__g.yas su rten gtor/__rgyab tu mda' dar/__g.yon du g.yang rdzas/__mdun tu tshe 'brang tshe ril tshe chang dang bcas pa/__bkra shis rdzas rtags rgyal srid rnams kyi tsakli/__phyi mchod/__gtor 'bul/__tshogs chas sogs phrin las kyi gsham bkod du gsal ba ltar tshogs par bya'o/__/gnyis pa la/__thog mar sgrub mchod ni/__las byang ltar brgyud 'debs nas brtsam/__sngon 'gro rnams btang*/__dngos gzhi bdag bskyed bzlas pa bcas grub pa dang*/__bum sgrub ni/__bum pa rang byung pho brang dbus:__pad nyi dregs pa'i gdan gyi steng :__sogs bdag bskyed ltar la/__ye shes me phung klong du 'gying :__dam tshig ye shes dbyer med pa'i:__sogs nas/__byin rlabs nus stobs bsdus te thim:__sku las rdo rje bdud rtsi'i rgyun:__babs pas bum pa gang bar gyur:__ces dmigs pa bsnyen sngags ci 'grub bzlas pa'i mthar/__lha 'od du zhu ste bum pa'i chu dang ro gcig tu gyur/__ces mos/__de nas mdun bskyed btang*/__bsnyen sgrub bzlas pa ci 'grub mthar mchod bstod 'bul/__thun mtshams bya ba gsum ka ma lcogs na gtor 'bul dang tshogs mchod gang rung gis 'thus/__thugs dam bskul/__las bum du bdud rtsi 'khyil pa bskyed bzlas bya/__slob ma gzhug pa'i gnang ba nod do/__/de nas dbang dngos la phyi rol du slob ma khrus nas dbyung*/__bgegs gtor btang la bka' bsgo zhing mtshams bcad/__gral la 'khod cing me tog bkye bsdu dang sems bskyed gsal gdab/__chos bshad khyad par/__de'ang sems can gang zhig sngon bsags bsod nams kyi stobs dman pas zas gos nor gyi 'byor pas phongs shing dbul ba'i sdug bsngal gyis nyam thag pa rnams kyi don du rigs lnga'i rgyal ba rnams kyi thugs las sar gnas sems dpa' gnod sbyin gyi sde dpon chen po'i tshul du sprul pa mgon po dzam+b+ha la'i mtshan dang snying po thos shing bzung ba tsam yang skye ba kun tu dbul phongs kyi sdug bsngal las grol zhing longs spyod mi zad pa'i gter dang 'phrad nas spyin pa'i phar phyin rdzogs par 'gyur ba sogs yon tan bsam gyis mi khyab pa rdzogs pa'i sangs rgyas kyi zhal nas legs par gsungs pa 'di la rigs dang mtshan gyi bye brag mang du mchis pa rnams kyi nang nas/__mi bskyod pa rdo rje'i rigs kyi khro bo chen po yak+Sha dzam b+ha la nag po'i gdams skor rnams 'phags pa'i yul du tshong dpon gyi bu+u d+ha na saM b+ho la bka' babs/__de nas rim par brgyud pa'i gdams ngag gsar ma'i phyogs su kha che paN chen shAkya shrI'i zhal snga nas brgyud pa bar ma chad pa byung ba dang*/__rnying ma'i phyogs su sangs rgyas gnyis pa pad+mA ka ras d+ha na saM b+ho'i gdams pa rnams rgyal po gu ru de ba las gsan pa'i tshul mdzad cing*/__yak+Sha rtsa ba'i tan+t+ra dang*/__rat+na rtsal chen 'dus pa'i rgyud le'u sum brgya bdun cu rtsa bdun pa'i zab gsang snying po'i yang bcud dum bur phyung ba dzam+b+ha la nag po'i sgrub thabs kyi man ngag rin chen gter spungs zhes bya ba lag len dmar khrid kyi tshul du bsdebs nas/__bod yul gyi mnga' bdag rje blon rnams la thugs brtse ba chen pos rjes su gdams/__snyigs dus tha ma'i gdul bya rnams kyi don tu ye shes d+hA ki mtsho rgyal gyis dpe rgyud 'dra min gsum du bkod nas gter gnas so sor rgyas btab pa/__mon chu mo phug gi gter kha mchog dbyangs rnam 'phrul dge slong rdo rje 'dzin pa tshe brtan rgyal mtshan gyis bton/__lha ri brag gi gter kha lha sras mu tig dang dam 'dzin zung du 'jug pa'i rnam rol gu ru jo bo tshe dbang dar pos drangs/__dus skabs so sor 'gro don ci rigs pa mdzad/__sngags 'chang rdo rje bdud 'joms kyi sprul pa bal po a hU~M 'bar gyis spa gro cal gyi brag dmar po'i nub phyogs me lce 'khyil ba 'dra ba nas me pho 'brug lo ston zla ra ba'i nya la spyan drangs nas 'gro don rgya cher mdzad/__bar skabs su dar rgyas che ba byung na'ang phyis brgyud pa'i nges tig med pa dang gter chos kyang nub pa ltar gyur pa'i skabs/__rab tshes lcags 'brug lo'i cho 'phrul zla bar gter 'byin rgya mtsho'i mkhor los sgyur ba pad+ma 'od gsal mdo sngags gling pa la chos bdag mkha' 'gros srog 'khor man ngag dang bcas pa'i dpe rnying dngos su phul cing sgrub thabs kyi skor rnams byin gyis brlab pa'i tshul du stsal ba la brten nas gtan la phab pa'i skabs su mnal lam dam pa'i snang bar/__yul ljongs shin tu nyams dga' ba zhig gi kha stod ri bo glang chen 'gying ba lta bu'i gdong pa'i thad tsam du rje nyid phebs pas rgyang ring po nas 'od kyi gong bu ljang gu shin tu bkrag mdangs dang ldan pa la je nyer sleb pa'i tshe rdo shel ljang nag dwangs pa la nyi zer phog pa'i rkyen gyis 'od zer kha dog sna tshogs su 'phro ba/__dbyibs nor bu mig gcig lta bu che zhing dwangs pa zhig gi drung du slebs pa na ngo mtshar gyi snang ba bcas nang du zhugs pas rin po che'i khri bkod pa phun sum tshogs pa'i steng du dzam b+ha la nag po ljang 'od 'tsher ba/__zhal phyag sogs mngon rtogs dang mtshungs pa shin tu gsal ba la 'khor rnams kyang yod dgongs pa byung*/__de nyid skad cig gis o rgyan snang srid zil gnon gyi skur gnas gyur nas 'di'i smin grol gyi gdams pa chig rdzogs su stsal/__'di'i sgrub thabs kyi skor rnams sngar bal po a hU~M 'bar dang gu ru jo tshe'i gter dpe gnyis po gcig lta bu yod pas brgyud pa gnyis 'dres su 'gyur ro gsungs pa'i gnang ba dang bcas byin rlabs kyi mtshan ma khyad par can brnyes/__nor lha rnams kyi nang nas kyang 'di sgrub pa la rgab 'dre'i bar chad med cing bcas pas chog pa'i 'khor lo sogs zab gnad ngo mtshar rmad du byung ba dang ldan pa'i gnod sbyin sde dpon chen po'i srog dbang zab mo bsgrub pa la sogs kyis mtshams sbyar la/__rin po che sogs gces pa'i nor rdzas kyi maN+Dal phul du gzhug__/bla ma dang gsang ba'i bdag po dbyer med pa la mi phyed dad pa'i gdung shugs drag pos thal sbyar dang bcas te gsol ba 'debs pa 'di'i rjes zlos mdzod/__bla ma gsang bdag dpa' bo che:__bdag la brtse bas nyer dgongs nas:__gnod sbyin sde dpon dzam+b+ha la'i:__dngos grub dbang bskur stsal du gsol:__lan gsum/__de ltar gsol ba btab pa la gsang ba'i dam tshig bsgrag cing gnang ba sbyin pa yin pas snyan gtod 'tshal:__'di ni yak+Sha kA la che:__bka' gnyan byin rlabs nus stobs bdag:__dam tshig srog bzhin bsrung nus na:__dbang bskur sbyin gyi gzhan du min:__ces bsgo zhing dam chu bdud rtsi sbyin/__ji ltar bsgos pa'i dam las nam yang mi 'da' bar khas len cing tha tshig gi bro bor ba 'di'i rjes zlos/__rdo rje'i dam las 'da' mi bya:__sa ma ya na ra kan:__de nas rgyud rnam par dag par bya ba'i slad du/__bla ma gsang ba'i bdag po dang mdun bskyed gnod gnas dbang po'i dkyil 'khor la rtsa gsum rab 'byams rgya mtshos sprin gtibs pa ltar bskor te bzhugs pa'i spyan sngar mkha' khyab kyi sems can rnams dang lhan cig pas byang chub bar du skyabs su 'gro ba'i 'dun pas 'di'i rjes zlos/__na mo:__bdag dang khams gsum 'gro ba kun:__dkon mchog gsum la skyabs su mchi:__rtsa ba gsum gyi byin gyis rlobs:__sku gsum ngang du gnas gyur cig:__lan gsum/__smon pa dang 'jug pa'i bdag nyid can gyi byang chub mchog tu sems bskyed pa gsal thob la 'di'i rjes zlos/__bdag gis sems can thams cad kun:__sangs rgyas sa la 'god pa'i phyir:__gnod sbyin dbang po'i bskyed bzlas dang :__mchod bstod sgrub la brtson par bgyi:__lan gsum/__rgyun bshags yan lag brgyad pa'i ting nge 'dzin tshig don re re bzhin gsal thob la 'di'i rjes zlos/__rdo rje slob dpon sangs rgyas dpal/__/dus gsum bzhugs la phyag 'tshal lo/__/mchog gsum bsten pa'i zhing gyur la/__/gnyis med yid kyis skyabs su mchi/__/dngos 'byor yid kyis rnam sprul pa'i/__/dag pa'i mchod pa bzhes su gsol/__/dngos grub chu bo gcod pa'i gegs/__/nyes byas ma lus bshags par bgyi/__/phyogs bcu 'khor gsum dag pa'i chos/__/ma chags spyod la rjes yi rang*/__/dag pa mtha' bzhi'i dri ma med/__/rdzogs pa'i byang chub sems bskyed do/__/bde gshegs dbang phyug sems can la/__/dgos pa gsum phyir lus 'bul lo/__/tshe rabs bgrangs pa'i las rnams kun/__/bsdus te byang chub chen por bsngo/__lan gsum/__de nas dbang gis gzhi dgod pa ye shes pa dbab pa yin pas sgo gsum gyi gnad gcun la dmigs pa 'di rtse gcig tu sgoms shig__/las bum chu dang*/__a mr-i tas bsang*/__swa b+hA bas sbyang*/__chos thams cad dmigs su med pa 'od gsal stong pa nyid kyi ngang las/__khyed rang rnams gang du gnas pa'i go sar sna tshogs pad+ma'i ze'u 'brur nyi ma'i dkyil 'khor la gnas pa'i gter gyi bum pa bzang po dang gnod sbyin pho mo zung gi khri'i steng du/__rang sems hU~M yig mthing nag 'od 'bar ba las rdo rje hU~M gis mtshan pa/__de las 'od zer dpag tu med pa 'phros/__'khor 'das kyi dpal 'byor dwangs bcud thams cad bsdus te thim pa las 'od zer mthing nag gi gong bur gyur/__de las skad cig gis khyed rang bcom ldan 'das mgon po dzam+b+ha la sku mdog gnag la snum pa'i mdangs 'od 'tsher ba/__mi'u thung gtum zhing khros pa'i nyams can/__zhal gcig spyan gsum khro gnyer bsdus shing mche ba bzhi btsigs pa/__phyag bzhi'i g.yas dang pos rdo rje'i tho ba gsor cing g.yon dang pos nor bu'i rgyal mtshan sgreng ba/__g.yas 'og mas rin po ches bkang ba'i thod pa bsnams pa g.yon 'og mas gter gyi ne'u le bzung ba/__dbu skra dmar ser gyen du brdzes shing thod skam lnga'i dbu rgyan rat+na'i rtse bran dang ldan pa/__stag lpags kyi sham thabs 'phyangs shing sprul rigs lnga dang rin po ches brgyan pa/__rtags kyi mtshan ma gyen du sgrengs zhing zhabs gnyis g.yon brkyang pa'i 'dor thabs kyis ye shes me 'od 'bar ba'i klong du 'gying ba/__nor rgyun lha mo ljang gu lcags kyu dang gter bum bsnams pas g.yon phyogs nas 'khyud pa'i gnas gsum du oM AHhU~M gis mtshan pa dang*/__slob dpon gyi thugs ka nas kyang 'od zer nam mkha' gang ba 'phros/__rang bzhin gyi gnas dang lcang lo can nas sgom pa dang 'dra ba'i ye shes pa dpag tu med pa char chen babs pa lta bur spyan drangs nas sgo gsum la thim pas rgyud byin gyis brlabs pa'i mos pa mdzod cig__byas la sbyar ba'i spos bsreg__/rol mo bsgrag__/oM dzam b+ha la dza len+d+rA ye swA hA:__badz+ra A be sha ya a AH__zhes drag tu brjod la dbab/__rdo rje spyi bor rgya gram du bzhag la/__tiSh+Tha badz+ras brtan par bya/__de nas dbang bskur dngos la/__gnyen po'i lha dbang*/__gnod sbyin dbang po'i sku gsung thugs yon tan phrin las dang bcas pa'i dbang*/__mtha' rten tshe'i dbang rnams rim par spyin pa'i thog mar bum pa'i dbang la dmigs pa 'di ltar mdzod/__slob dpon gyi thugs ka nas spros pa'i rig pa'i lha mo rnams kyis bum pa'i bdud rtsis spyi bo nas dbang bskur bas dregs can mtha' dag zil gyis gnon pa'i gnyen po stobs kyi dbang chen rdzogs par mos shig__/rnam bum spyi bor bzhag__/bum chu mthor 'thung byas la/__oMH__bkra shis bum pa'i pho brang na:__gsang bdag 'od zhu bdud rtsi'i chus:__skal ldan bu la dbang bskur bas:__gnyen po stobs kyi dbang thob shog:__oM badz+ra pA Ni tsaN+Da ma hA ro Sha Na hU~M phaT:__ka la sha a mr-i ta a b+hi Shiny+tsa mi:__bdud rtsi'i rgyun gyis lus kyi nang gang*/__dri ma thams cad dag__/chu'i lhag ma spyi bor lud pas rigs kyi bdag po mi bskyod rdo rjes dbur brgyan par gyur/__sgrub pa'i sku rten 'di nyid gnod sbyin dzam b+ha la nag po dngos su gsal ba khyed rang gi dpral bar thim pas bskyed rim sgom pa'i snod rung du gyur/__ye shes sku'i gzi byin 'bar bar mos shig__/sku rten dpral bar bzhag la/__oM:__yak+Sha kA la dzam b+ha la'i:__rdo rje'i sku yi dbang bskur bas:__lha tshogs bsgom pa'i snod du gyur:__ye shes gzi byin 'bar bar shog:__oM dzam b+ha la dza len+d+rA ye swA hA:__kA ya a b+hi Shiny+tsa oM:__bsnyen sgrub kyi bzlas pa'i lung blang ba'i slad du dmigs pa 'di bzhin du mdzod/__mdun bskyed gtso bo'i thugs kar nyi ma'i steng rdo rje sngon po rtse lnga pa'i lte bar hU~M mthing nag sngags kyi phreng bas bskor ba las sngags phreng gnyis pa byung*/__zhal nas thon/__khyed rang lhar gsal ba'i zhal du zhugs/__thugs kar nyi steng rdo rje hU~M gis mtshan pa'i mthar 'khod/__slob dpon gyi thugs ka nas 'od zer dmar po lcags kyu'i dbyibs can 'phros/__mdun bskyed khyed rang rnams dang bcas pa'i thugs srog sngags phreng la phog pas/__nus pa'i stobs bskyed/__gzi byin lhag par 'bar/__thugs dam gnyan po'i rgyud bskul bas sngags phreng las 'od zer gyi sprin nam mkha' khyab par 'khrigs pa las 'dod rgu'i dngos grub kyi char chen po babs par mos la bsnyen sngags kyi rjes zlos/__oM dzam b+ha la dza len+d+rA ye swA hA:__zhes lan gsum bzlar gzhug__/slar yang slob dpon gyi thugs ka'i 'od zer gyis gnod sbyin dbang po 'khor dang bcas pa'i thugs rgyud bskul bas sku'i gzi brjid bskyed/__gsung gis sngags sgra bsgrag__/thugs las ye shes kyi 'od zer mkha' khyab tu 'phros pas stong gsum 'jig rten gyi khams thams cad g.yos/__'khor 'das kun gyi bcud dang dpal 'byor/__lha klu mi'i longs spyod ma lus pa 'ub kyis bsdus nas rang gi yul phyogs bang mdzod gnas khang thams cad khengs/__dwangs ma rang rang gi sgo gsum la thim 'dod rgu'i 'byung gnas chen por gyur par mos la sgrub sngags kyi rjes zlos/__oM yak+Sha kA la dzam+b+ha la dza len+d+rA ya ba su d+ha rI sarba tsit+ta rat+na sid+d+hi hrIng hrIng dzaHswA hA:__zhes lan gsum/__srog 'khor glegs bam gnod sbyin dbang po'i gsung gi ngo bo mgrin par bzhag pa la/__bsnyen sgrub bzlas brjod kyi snod rung du gyur/__rig sngags kyi dngos grub 'grub pa'i nus rtsal rdzogs par mos shig__/srog 'khor dang*/__rgyas pa med na 'khor lo'i bri yig bcas mgrin par bzhag la/__AH__yid bzhin 'dod 'jo'i nor bu sngags:__rdo rje'i gsung gi dbang bskur bas:__bzlas shing grub pa'i snod du gyur:__dngos grub nus rtsal rdzogs par shog:__oM dzam b+ha la dza len+d+rA ye swA hA:__wA ka a b+hi Shiny+tsa AH__AH__mtshan ldan ban+d+ha rdzas bcud kyis bltams pa mgon po dzam+b+ha la'i thugs 'od gsal ye shes chen po'i rten snying gar bzhag pas/__rnam thar gsum ldan gyi ting nge 'dzin bsgom pa'i snod rung du gyur/__lhar snang dang chos nyid dbyer mi phyed pa'i dgongs pa'i rtsal rdzogs par mos shig__/ban+d+ha snying gar bzhag la/__hU~M:__rang byung 'od gsal kA pA la:__rdo rje'i thugs kyi dbang bskur bas:__ting 'dzin dgongs pa'i snod du gyur:__lha dang chos nyid dbyer med shog:__oM dzam b+ha la dza len+d+rA ye swA hA:__tsit+ta a b+hi Shiny+tsa hU~M:__g.yang gtor rin chen 'bar ba dpal ldan yak+Sha kA la chen po'i yon tan yongs rdzogs 'dus pa'i ngo bos dbang bskur bas/__phywa g.yang dpal 'byor sgrub pa'i snod rung du gyur/__yid la 'dod rgu'i char 'bebs pa la dbang brnyes par mos shig__/gtor ma lte bar bzhag la/__swA:__gtor ma 'dod 'byung nam mkha'i mdzod:__yon tan rgyan gyis dbang bskur bas:__dpal 'byor bsgrub pa'i snod du gyur:__'dod rgu'i char chen 'bebs par shog:__oM dzam b+ha la dza len+d+rA ye swA hA:__gu na a b+hi Shiny+tsa swA:__phrin las kyi dbang bskur ba'i thog mar thugs dam bskul zhing phywa g.yang gi bcud bsdu ba yin pas dmigs pa 'di ltar mdzod cig__/bdag gi thugs ka'i 'od zer gyis:__mdun bskyed 'khor bcas thugs rgyud bskul:__gtum zhing sgeg pa'i gzi byin bskyed:__rdo rje'i sngags kyi sgra chen bsgrags:__ye shes 'od zer mkha' khyab 'phros:__stong gsum 'jig rten khams kun g.yos:__'khor 'das kun gyi bcud dang dpal:__lha klu mi yi longs spyod tshogs:__rang dbang med par 'ubs kyis bsdus:__bdag gi bang mdzod gnas khang dang :__yul phyogs thams cad phyur bur khengs:__dwangs ma rten rdzas rnams la thim:__yid bzhin 'dod 'jo'i dpal du gyur:__hU~M:__bkra shis yid 'ong grub pa'i zhing :__longs spyod gter gyi pho brang nas:__rigs kyi khyab bdag dzaM b+ha la:__btsun mo dpal ldan nor gyi rgyun:__nor lha rab 'byams tshogs dang bcas:__rtse gcig gus pas bsgrub lags na:__byams pa'i zhal bzang dus 'dir ston:__dgyes pa chen po'i gzi byin bskyed:__dngos bshams yid las byung ba yi:__nyer spyod 'dod yon sprin ltar gtibs:__snod bcud ri gling 'byor pa'i tshogs:__bkra shis rtags rdzas rgyal srid bdun:__bum bzang 'dod 'jo dpag bsam shing :__gtor ma skyems phud ro bcud ldan:__zad mi shes pa'i longs spyod kyis:__g.yar dam bskang zhing nyams chags bshags:__mos shing gdung bas rgyud bskul na:__thugs rje thugs dam dbyings nas dgongs:__stong gsum 'khor 'das rab 'byams kyi:__snod kyi 'byung ba'i phywa g.yang khug:__bcud kyi 'byor pa'i phywa g.yang khug:__mdzes sdug gzugs kyi phywa=__snyan brjid sgra yi=__bsung zhim dri yi phywa=__bcud ldan ro yi=__'jam 'khril reg bya'i=__yid mthun chos kyi=__lha yi bdud rtsi'i=__klu yi nor bu'i=__gnod sbyin gter gyi=__gling bzhi mi yi=__pho brang mkhar gyi phywa=__rigs brgyud sras kyi=__mnga' ris bde skyid phywa=__dpa' rtsal stobs kyi=__sra brtan go cha'i=__rkang bzhi phyugs kyi=__lo tog 'bru bcud phywa=__bza' shing sman gyi phywa=__zhim mngar zas kyi phywa=__bkrag can gos kyi=__yid 'phrog rgyan gyi phywa=__brjid can nor gyi phywa=__mkhas pa'i mkhyen rtsal phywa=__grub pa'i nus mthu'i phywa g.yang =__'phags pa'i spangs rtogs phywa=__dam pa'i chos kyi phywa=__bshad sgrub bstan pa'i phywa=__'chi med tshe yi phywa=__bsod nams dbang thang =__snyan cing grags pa'i phywa=__dpal dang 'byor pa'i phywa=__nad med bde ba'i phywa=__rgas med lang tsho'i phywa=__ci bsam 'grub pa'i phywa=__phywa khug g.yang skyobs dngos grub stsol:__bkra shis bde legs rgyas par mdzod:__oM dzam b+ha la dza len+d+rA ya swA hA:__shrI ba su d+hA ri NI sarba sid+d+hi sdus sdus rat+na puSh+tiM pa shaM ku ru ho:__hU~M:__shar nas dngos grub stsol ba'i lha:__gnod sbyin sde dpon nor bu bzang :__btsun mo dpal ldan zla ba'i 'od:__sras 'khor sprul par bcas pa rnams:__rtse gcig gus pas bsgrubs lags na:__byams pa'i zhal bzang sogs nas:__bkra shis bde legs rgyas par mdzod:__oM ma Ni b+ha drA ya tsan+d+ra kan+t+yai swA hA:__sarba sid+d+hi sdus sdus rat+na puSh+tiM pa shaM ku ru ho:__hU~M:__lho nas dngos grub stsol ba'i lha:__gnod sbyin sde dpon gang ba bzang :__btsun mo dpal ldan nor sbyin ma:__sras 'khor sprul par bcas pa rnams:__rtse gcig gus pas sogs 'gre/__oM pur+Na b+ha drA ya dat+tA ye swA hA:__sarba sid+d+hi sdus sdus rat+na puSh+tiM pa shaM ku ru ho:__hU~M:__nub nas dngos grub stsol ba'i lha:__gnod sbyin sde dpon nor sbyin dang :__btsun mo dpal ldan rab sbyin ma:__sras 'khor sprul par bcas pa rnams:__rtse gcig gus pa sogs=__oM d+ha na d-I ya sudat+tA yai swA hA:__sarba sid+d+hi sdus sdus rat+na puSh+tiM pa shaM ku ru ho:__hU~M/__byang nas dngos grub stsol ba'i lha:__gnod sbyin sde dpon rnam thos sras:__btsun mo dpal ldan 'phags ma dang :__sras 'khor sprul par bcas pa rnams:__rtse gcig sogs=__oM bai shra ma NA ya ArmA ye swA hA:__sarba sid+d+hi sdus sdus rat+na puSh+tiM pa shaM ku ru ho:__hU~M:__shar lho'i dngos grub stsol ba'i lha:__gnod sbyin sde dpon rol pa'i phreng :___btsun mo dpal ldan rab bzang ma:__sras 'khor sprul par bcas pa rnams:__rtse gcig sogs/__oM ki li mA li ni su b+ha drA ye swA hA:__sarba sid+d+hi sdus sdus rat+na puSh+tiM pa shaM ku ru ho:___hU~M:__lho nub dngos grub stsol ba'i lha:__gnod sbyin sde dpon kuN+Da li:__btsun mo dpal ldan rab sbas ma:__sras 'khor sprul par bcas pa rnams:__rtse gcig sogs=__oM pi tsi kuN+Da li su gup+tA ye swA hA:___sarba sid+d+hi sdus sdus rat+na puSh+tiM pa shaM ku ru ho:__hU~M:__nub byang dngos grub stsol ba'i lha:__gnod sbyin sde dpon sgo yi dbang :__btsun mo dpal ldan mdzes ma dang :__sras 'khor sprul par bcas pa rnams:__rtse gcig sogs=__oM mu khan+d+rA+e ya de bya swA hA:___sarba sid+d+hi sdus sdus rat+na puSh+tiM pa shaM ku ru ho:__hU~M:__byang shar dngos grub stsol ba'i lha:__gnod sbyin sde dpon g.yo ba'i dbang :__btsun mo dpal ldan dbyangs can ma:__sras 'khor sprul par bcas pa rnams:__rtse gcig sogs=__oM tsa ran+d+rA+e ya swa ra swat+yai swA hA:__sarba sid+d+hi sdus sdus rat+na puSh+tiM pa shaM ku ru ho:__hU~M:__dkyil 'khor chen po'i sgo bzhi nas:__sgrub la bar chad zlog pa dang :__dngos grub stsol bar zhal bzhes pa'i:__mthu chen rgyal po chen po bzhi:__rang rang rigs kyi dpung bcas rnams:__rtse gcig sogs=__oM d+hr-iSh+ta rASh+tA ya bai ru d+ha kA ya bi rU pak+ShA ya bai shra ma NA ya swA hA:___sid+d+hi sdus sdus rat+na puSh+tiM pa shaM ku ru ho:__hU~M:__gzhan yang steng 'og bar mtshams nas:__dngos grub rin chen char 'bebs pa'i:__nor lha gter bdag rab 'byams tshogs:__rtse gcig sogs=__tad+ya thA:__oM hi li ma Ni b+ha dra:__hi li hi li ma Ni b+ha dra:__ki li ma Ni b+ha dra:__ki li ki li ma Ni b+ha dra:__ku ru ma Ni b+ha dra:__ku ru ku ru ma Ni b+ha dra:__tu ru ma Ni b+ha dra:__tu ru tu ru ma Ni b+ha dra:__su ru ma Ni b+ha dra:__su ru su ru ma Ni b+ha dra:__tsu ru ma Ni b+ha dra:__tsu ru tsu ru ma Ni b+ha dra:__oM e h+ye hiH__tiSh+Tha tiSh+Tha:__sarba ar+tha me sA d+ha ni:__tad+ya thA:__su d+ha ni:__su ra s+yaH_su ma ti:__su pu khiH__hi li mi li swA hA:__sarba sid+d+hi sdus sdus rat+na puSh+tiM pa shaM ku ru ho:__'khor 'das gnyis kyi dpal dang bcud bsdus pa'i g.yang rdzas gnod sbyin nor bdag chen po'i phrin las mi zad pa rgyan gyi 'khor lo'i rnam rol lag tu gtad pas 'byor pa drug gi legs tshogs dpag bsam shing chen ltar rgyas shing ri dbang lhun po ltar brtan par gyur pa mos shig__/g.yang rdzas rnams lag tu gtad la/__hA:__'khor 'das phywa g.yang 'dus pa'i bcud:__phrin las rdzas kyi dbang bskur bas:__tshe bsod dpal 'byor snyan grags dang :__stobs rtsal legs tshogs rgyas par shog:__oM dzam b+ha la dza len+d+rA ya swA hA:__karma a b+hi Shiny+tsa hA:__mtha' rten bkra shis tshe'i dngos grub sbyin pa'i slad du/__tshe'i 'brang rgyas 'di nyid mgon po dzam+b+ha la 'chi med tshe'i dbang phyug dngos su gsal ba spyi bor bzhag cing byin gyis brlabs pas/__sku gsung thugs las 'chi med bdud rtsi'i rgyun babs pas lus thams cad gang*/__'chi ba med pa'i tshe dang rdo rje lta bu'i srog thob par sgoms shig__/tshe 'brang spyi bor bzhag la/__b+h+rU~M:__'khor 'das tshe la dbang bsgyur ba:__mgon po 'chi med dzam+b+ha las:__rigs kyi bu la dbang bskur bas:__mi 'gyur rdo rje'i srog 'grub shog:__oM dzam+b+ha la dza len+d+rA ya badz+ra A yu She swA hA:__zhes bskur/__slar yang sngags de brjod la tshe ril dang tshe chang yang sbyin/__de ltar dpal ldan mgon po dzam+b+ha la'i dbang bskur thun mong ma yin pa thob pas sku gsung thugs yon tan phrin las yongs su rdzogs pa'i ngo bor gyur pa la bkra shis pa'i rdzas rtags brgyad rgyal srid rin po che rnam pa bdun mdun du bstar/__shis pa brjod pa'i tshigs bcad brjod cing me tog gi char phabs pas mnga' gsol bar mos shig__/byas la rdzas rtags rgyal srid rnams spyi 'gro'i tshigs bcad re re tsam brjod cing gtad/__shis brjod rgyas par bya/__de ltar na de dag rnams kyis yak+Sha dzam+b+ha la'i snod rung byin brlab dbang bskur gyi rim pa legs par grub pa yin pas/__deng phyin chad dam tshig ma nyams pa tshul bzhin bsrung dgos pas de'i don rtsa ba'i gzhung las gsal rgyas su bstan pa 'di la snyan gtod par zhu/__de ltar dbang bskur thob pa dang*/__bsnyen sgrub brtson pa'i rnal 'byor pas:__dngos grub srog 'dzin dam tshig ni:___snying dang mig las gces par bzung :__nor lha mchod pa la brten nas:__'byor pa'i khyad par ci byung yang :__cung zad tsam yang ma zhen par:__rmi lam sgyu ma lta bu'i ngang :___phud kyis dkon mchog rten gsum bzhengs:__mar me la sogs mchod rgyun 'dzugs:__phyogs bcu'i dge 'dun bsnyen bkur zhing :__pha ma nad pa dka' thub can:__rgan rabs rnams la tshims par gtad:__bar pa rang dang nye 'khor gyis:__phung khams lha tshogs mchod pa'i blos:__bza' btung gos rgyan 'byor pa bya:__lhag ma dbul zhing phongs pa la:__khong mi 'khrugs shing snying brtse bas:__gtan pa med pa'i sbyin par spel:__srog bslu bya zhing zam pa 'dzug:__'gras dang 'khrugs pa nor gyis bzlum:__yul phyogs dge ba'i las rnams bya:__de ni phyi yi dam tshig go:__nor lha bsnyen cing sgrub pa dang :__khyad par chu sbyin ma chag gtang :__tshes brgyad sogs la lhag par mchod:__shin tu gsang bas nyams su blang :__gzhan la bka' rgya dam par spel:__dpe dang lag len lhag par bsdam:__rang gzhan dbul phongs ci byung yang :__nor lha mchod pa ma gtogs par:__log 'tsho sgrub pa'i bya ba spang :__mdor na gnod sbyin nor lha dang :__yi dam dbyer med snying ltar bcang :__dam tshig gcig gis 'brel ba yi:__mched lcam rnams la lhag par yang :__byams dang bsnyen bkur ci nus bya:__de ni nang gi dam tshig go:__khyad par gdams pa zab mo 'di:__gang las nod pa'i bla ma de:__mi bskyod rdo rje sems dpa' dang :__gsang bdag nor lha dbyer med par:__mos gus gdung shugs rgyun mi bcad:__'byor pa gang byung phud dang ni:__bu dang bu mo nor gyi dbyig:__na bza' bcud ldan zhal zas sogs:__gces dang yid 'thad rtag tu dbul:__gzung zur tsam yang gcag mi bya:__'dzum zhing gus pas gsong por gsol:__thugs bzung mnyes pa'i bya ba bsgrub:__rang sems lha dang bla ma dang :__'byor pa'i yo byad la sogs pa:__'khor gsum bden 'dzin bral ba'i ngang :__don gyi dgongs pa'i srog gzung bya:__de rnams gsang ba'i dam tshig go:__de ltar dam tshig rab bsrung na:__gnod sbyin nor lha ma bsgrub 'grub:__tshe ring nad med dpal 'byor 'phel:__mtho ris thar pa'i mchog thob 'gyur:__ces gsungs pa'i tshig don rnams thugs la nges pa'i sgo nas phyi nang gsang ba'i dam tshig de dag ci nus su bsrung bar bgyi'o snyam pas 'di'i rjes zlos/__gtso bos ji ltar sogs gsum/__gtang rag maN+Dal/__lus 'bul/__dge bsngo byas la slob ma gyes/__slob dpon gyis gtang rag mchod bstod/__nongs bshags bzod gsol/__mdun bskyed bdag bskyed kyi gshegs bsdu/__dge bsngo shis brjod kyi bar las byang gi dkyus ltar byas pas grub bo/__/bdag nyid skye kun 'byor pa'i gter dang 'phrad/__gzhan phan snod bcud phywa g.yang byin spel bas/__/bstan 'gror dge mtshan dpal brgyas 'tsho byed pa/__/chu dbang snying rje can dang mtshungs par shog__/ces pa'ang zab gsang khyad par 'phags pa 'di'i thog ma'i smin grol bdud rtsi'i snod rung du gyur pa blo gros mtha' yas kyis rdzong gsar bkra shis lha rtse'i chos grwar gzhan phan gyi btsas su bgyis pa dge legs 'phel/__/slar phun tshogs rnam rgyal pas nag 'gros su bgyis pa'o//__//_